العلاقة بين اسمك المستعار واسمك الحقيقي

بسم الله الرحمن الرحيم...



في البداية أتوجه بالشكر الجزيل لكل من دخل هذا الموضوع حتى يشارك فيه..



فأنا دائما أقارن رد الشخص باسمه .. لأن لكل شخص من اسمه نصيب..

فسأل نفسي..

ما مدى علاقة أسلوب الشخص في الرد على الموضوع بالاسم المستعار الذي اختاره لنفسه؟:look:

فالأسماء التي نختارها لأنفسنا غالبا ما تعبر عن ما في داخلنا..:fa45:

فهناك أسم تسكنه العاطفة..فيكون وراء هذا اللقب قبل تملؤه المشاعر والأحاسيس:woot:

وأسم آخر يحمل في طياته قسوة الزمن..فيكون وراء هذا اللقب قلب تصدعت جدرانه من آلام وهموم قد تكبدت عليه..:sad:

وهناك أسم مضحك..وآخر يحمل معنى السخرية..:fa56:

على الرغم من أن هناك فئة..فضلت أن تكون واضحة وان تضع لنفسها اسمها الذي يربطها بالواقع..

كما أن هناك فئة استخدمت رموز أو أحرف لا معنى لها ..تختبئ خلفها شخصيات متعددة..إما أن تكون

غامضة أو ساخرة..أو أنها دخلت لا للمشاركة بل للتفرج فقط؟؟؟:fa46:

وهنا تحاوطني التساؤلات الفضولية؟

ما مدى علاقة الشخص باسمه المستعار؟

وما هو سبب تسميته بهذا الاسم؟

وهل بالفعل يرى كل واحد منا أن شخصيته الواقعية تناسب اسمه المستعار؟

أم أننا نضع لأنفسنا شخصية مثالية تتناقض مع شخصيتنا في الواقع؟

وهل انعكس هذا الاسم على شخصيتك؟



ارجوا التفاعل مع الموضوع والرد عليه بكل صراحة..



ولكم مني جزيل الشكر..

السلام عليكم

موضوع جميل جدا وانا اشكرك وايد على الجهد الي بذلته :fa38:



والله يالغالي انا هالاسم مش انا مختارنه ، في ريال الله يستر عليه وفي اعتقادي الشخصي انه ظهر من المنتدى هو الي اختارلي هذا الاسم وانا الصراحه وايد عايبني ومتمسك فيه ، وكان بودي اني اختار اسم من عندي ولاكن شائت الظروف ، والحمدالله كان اختيار موفق وانا مرتاح من هالاسم واااايد :woot:

والسمووووحه ما رديت على الموضوع ، لانه لو كان اختيار الاسم من عندي جان استوى كلام ثاني ، بس شو اسوي هذا حظي :fa36: .

على العموم مشكور الغالي عالموضوع ، ويعطيك العافيه عليه.

لك مني احلى وارق تحيه .

اخوووك / ولد الحكومة :blush:

طال عمرج...

اخترت الحساس.. لان مافي حد بالدنيا كاقالي انت حساس بطبعك
اي شي يصير من كلمه او فعل اكبر من حجمه واعطيه اكبر من قدره!! واحيد يوم بغيت اختار الاسم او اسم يي ببالي هذا ماعرف ليش..

بالمختصر يعكس شخصيتي
رغم اني جاد في كثير من الاحيان الي اني احاول اتخلص من ها الطبع قد ماروم..

والحمدالله على كل حال..

السلام عليكم ورحمه الله وبركاته

عن نفسي هالاسم يعجبني ومسميني اياه أيام الكليه لأني كنت شيطانه
وشريه أشوي يعني مثل الجنيه ....

نك يدل على شخصيتي بس مش 100% يعني مش ولابد

أما عن البقيه فبإعتقادي الاسماء المستعاره تتفاوت بنسبه ملاءمتها للشخصيات
ومش دائماً تكون مطابقه أو ملاءمه للشخص...


تحياتي الجناويه

الصراحه ماعرف ليش اخترت هالنك يمكن لانه غرييب و البعض منكم مب فاهمنه
and that's it

[glow="999999"]
الصراحه ماعرف ليش اخترت هالنك يمكن لانه غرييب و أدري انه البعض منكم مب فاهمنه
and that's it
[/glow]

ثانكس ع الموضوع الحلو ..

الصراحة انا يوم اخترت الاسم .. كنت ادور على شي من بيئتنا ..

امممممم وطلع هالاسم .. وعجبني وانا الحين مقتنعه فيه ..

بس هل هو يعبر عن شخصيتي .. ( ما يخص )


بنـــــــــ الساحل ـــــــــــت

:woot: لبــــــــــــــــــن مثلج:woot:


اسم بعييييييييييييييييييييد عن شخصيتي... اخترته في فترة كنت في قمه الشطانه وحبي للمقالب:fa56: ... يعني كنا مجموعة في الواحات (الجديمة؟) وكنا انسوي مقالب في بعض ،، وكنا تقريبا من نفس العايلة ...

بس اسمي مايخصه بشخصيتي لاني مب باردة ولا ثلج ,, بالعكس :vampire:

تحياتي لجميع الأعضاء وأشكر "أحلى شيء" على طرحه هذا الموضوع

أنا اخترت اسم "انسان عادي" لأن الكل ينعت نفسه بلقب يوصف طبعه او ما شابه

وانا اشوف عمري انسان عادي ... ما عندي شيء غير عن الناس ..

.. والسموحه

بـصراحه كان نك ربيعتي بس مول ما كانت اتشارك فيه
إلين ما لقيت عمري يوم من الايام بدون نك

جان اخذه عنها وبس

وبين اسلوبي وشخصيتي الواقع ..

فـ هيه .. ام خدود في الواحات مثل ما هيه على الواقع

بس اكيد ما اهذرب وي اي حد مني والدرب ..

يعني انا مب كول وي كل الناس

اسولف واتناقش واتمصخر وي ربيعاتي الي وايد ويايه

^.^

السلام عليكم..:)
أشكرج اختي على موضوعج و بالنسبه لنك نيمي..الصراااااااحه:rolleyes: ..
أنا كنت محتاره وكل يوم كنت أأذي:fa43: ربعي عشان ادورولي نك نييم الين ما حصلتلي ربيعتي ها النك و حبيته:heart: ..وجان أحطه(عاد انا ما صدقت سييييدة حطيييته:fa56: ) هههههههه......وجي سالفة نك نيمي:woot: ...
اختج
شمعة الجلاس

مرحبا اختي احلى شي ..
تسلمين على الموضوع ..
اما عني انا ..
انا اصلا كان اسمي بنت جميرا .. لاني اصلا اسكن في جميرا .. بس عقب فتره دخلت عضوة ثانيه بنفس الاسم بس هي كاتبه جميره جذي ..
فقررت اني اغير اسمي ... غيرت اسمي وخليته عنود الريف .. لاني احب اسمع اشعار يمعه بن نايم الكعبي .. وفي وحده من قصايده .. اسم عنود الريف ..
والكل يعرف شو معناة عنود ..
فانا حبيت الاسم ..
اما عن الشخصيه .. اما انا سريعه في الحركه .. بس ما اخاف من الناس شرا الغزال وابتعد عنهم ..
يعني الزبده .. ان في اشياء تنطبق عليه وفي اشياء ما تنطبق عليه ..
والسمووحه

تسلم أخوي ع الموضوع... الصراحة انا مادري ليش اخترت هالنك



اختكم:دلــوعــة دبــي

ممممممم نك نيمــــــــي اخترته لانه عيبني :laugh: ..

ويعكس جانب من جوانب شخصيتي .." غاليه " .. عكس الرخيصه

ولان حد في العايلة ينعتني بهالاسم ..

وهاااااي هي السالفه :blush:

مرحبا

عن نفسي كنت وايد احب اقرا قصص
الحب و احب احل هذي المشاكل
يعني اي حد يحب و عنده مشكله
اساعده لو صعبه كانت
بس سموني سيدة الحب
نفس لقب سيد الحب اغنية خالد عبد الرحمن

و بس:blush:

خسووفه = هب غاويه

حبيت اعقب على الموضوع بعد ماقريت ردود الاعضاء..

ماادري اذا كان هذا الموضوع مكرر اصلا او لا .. بس هب هذا المهم المهم هو... اسمعوا عاد المهم خلوكم منتبهين .. الي هب منتبه يسير يغسل ويه وايي.. ها غسلتوا خلاص ياهزين.. نبدا احين.. يالله ... لحظه... بسير بييب لي كوفي وبرد برب................ بااااك رديت .. الموهيييييييييم (على قولة ام خدود) انزين انا الحين نسيت السالفه الي بغيت اقولها اوهوووو شو شو شو .. هي تذكرت...

احب اشكر صاحب الموضوع الي فتح المجال للجميع بموضوعه هذا .. لاني تلمست (انتبهوا على الكلمه وايد فعاله والنتيجه فتاكه) تلمست ان كل من كتب وعلق علق من باطن (باطن من الداخل هب الباطن الي بعمان) قلبه .. اول مره احس من بدايه افتتاح الواحات اليديده ان الاعضاء ترد من قلبها هب بتصنع او غيره.. او يمكن لان الاعضاء كتبوا عن حقيقتهم وها الشي تفتقده باقي المواضيع الي فقط فيها ردود يمكن ويمكن لا ان تكون معبره عن ذات الانسان نفسه...

بعد في قلبي هذربه زايده بس انتوا لو تعطوني فرصه جان ظهرتها لكم كلها .. واتريا موافقتكم P:

السلام عليكم

عن نيك نيمي

امم ما كان فبالي اي نيك نيم يوم كنت ابا اشارك

وربيعتي اللي تسميني عفاريتووو كانت اون لاين

عاد ليش تسميني عفاريتووو مادري انا مب لهل درجة عفريته :wacko:

قالتلي اشارك ب عفاريتووو

وشاركت فيه

وبس

انا عن نفسي
كنت انا واختيه يالسين كنت
اقوللها اني ابا اشترك في منتدى واحات بن دبي
وها اول منتدى اشترك فيه جان اقولها ابا نك اشارك فيه قالتلي
كذا نك من الالقاب اللي يزقروني اياها في البيت بس ماطعت
جان اقولها بشترك بنك الدلوعة اول شي بلا شك تمصخرت عليه
لنه ها النك هم راكب عليه مول بس انا عاندت فيها واشتركت فيه
وبس

والسموحة

مشكوور اخوي ع الموضوع ..


ممم انا اصلا كنت مشاركه بنك ثاني .. وغيرته للمزيوونه عقب فتره بسيطه .. ماعرف ليش للمزيونه ..
انا احس المزيوونه لوحده هاااديه يعني هو ما يعبر عن شخصيتي كثر ما كانت ردودي تعبر ..
غيرته لنك نيم ثاني بس الجماعه اقترحوا عليه ارده للمزيونه << ركب عليه شكله هيهيهي ..
وهذي كل الحكاايه ..

الله حيه

بسم الله الرحمن الرحيم

في البداية
حبيت اشكر كل المتواجدين معاي في الموضوع..

وأقدم اعتذاري للكل عن سبب التاخر في الرد على الموضوع..:fa46:

يعني كان لازم اكون انا اول وحدة تذكر سبب تسميتها بهذا الاسم..:blush:

لني صاحبة الموضوع..يعني لازم ابدا بنفسي..
لكن الضروف حالت دون ذلك..

(ولد الحكومة)..
يشرفني ان يكون اول المشاركين معي..مرافق اداري..
شكرا على المرور..

( االحساس)..
هذا زمن ماتت فيه المشاعر والاحاسيس عند اغلب البشر..
فمن الرائع ان تمتلك صفة الحس..
وترى الموضوع موضوعك خذ راحتك فيه..
واعجبني رد الثاني..
لأن صدق المشاعر والاحاسيس هو ما نحتاجه في هذه الواحات..

( الجنية)..
من ردودج يبن انج وحده جنية..

(المتفيزره عالعرقوب)..
جدا غريب..
والأغرب من ذلك..
اني كنت فترة طويله اقراها..
المتفيزرة عالقروب!!!

( بنت الساحل)..
اسمج يعبر عن وطنيتج..
يعني اكيد يخصه في شخصيتج..

(لبن مثلج)..
اسم يمتاز بالطفولة المشردة..
يعني تذكرت طفولتي ..
شكرا على المرور..
.
.
.
.
*** للحديث بقية***

مرحبا من جديد..:woot:
.
.
.

(إنسان عادي)..
ردك يدل على انك متواضع في حياتك..
ومن تواضع لله رفعه..
اتوقع اسمك المستعار ينطبق على شخصيتك..

( أم خدود)..
شكرا على الصراحة..
واسعدني تواجدك..

(شمعة الجلاس)..
شكرا على التواجد..
ونورتي الموضوع بنورج يالشمعة..

(عنود الريف)..
شكرا عزيزتي على التواجد..

(دلوعة دبي)..
لكل شخص من اسمه نصيب..
يعني يمكن اخترتي هالاسم لنج في الواقع يمكن تكونين دلوعة!!

(الغالية)..
شكرا على المرور..

(سيدة الحب)..
شكرا على المرور..

(خسوفة)..
بصراحة..احترت كيف ارد على مشاركتج..
بس ما اعتقد ان اسمج ينطبق على شخصيتج..
شكرا على المشاركة..

(عفاريتوووو)..
شكرا على المرور..

(الدلوووعة)..
شكرا على المرور..
بس لفت انتباهي توقيعج...
توقعتج شرجاوية..
لن اصحاب السعادة هم الشرجاوييين..

( المزيوونه)..
شكرا على المشاركة..


وشكرا للجميع..:woot:

أوه ..:crosseyed
نسيت اكتب عن نفسي..

أما انا فأشعر أن اسمي المستعار بلا معنى!!:fa46:

وأحيانا أفكر اني اغيره..

بس اتراجع ما اعرف ليش..

في البداية ما كنت مختاره هالاسم..
بس الي اتذكره اني كل ما اسجل اشتراكي بأسم معين
يكون في حد مشارك بنفس الاسم فيرفض الكمبيوتر تسجيلي..
اتذكر اني كنت مختاره اسم( أعماق السكون)..
بس ما صار!!
وبعد اكثر من محاولة..
لاعت جبدي..
وقلت بكتب احلى شي..
بس ان اسمي المستعار ماله معنى ..:fa55:
هذا اكيد ماله علاقة بشخصيتي..
وردودي في المواضيع اتوقع انها تعكس شخصيتي..
والدليل..
مشاركاتي القليلة في المنتدى..:blush:
وذلك الانني عندما اشعر ااني غير قادرة على
ترك بصمة لها اثر من خلال ردي على اي موضوع فإنني لا اشارك..
حتى لو كان الموضوع جميل!!:woot:

اتمنى انكم فهمتوا قصدي...

والسموحة على الإطالة؟؟

نيك نيمي ما يباله شي

عبارة عن اسمي مع شوية تعديلات :fa46:


الله يسلمكم النيك نيم هذا مب انا الي حطيته

اخوي هو الي اختاره لي
بتقولون ليش اختار اسم نصووور

انا بقولكم ليش
لأني يوم ييت بسجل عصرت مخي عسب اطلع نيك نيم

ما طلع وياي شي, و خاصة انه لازم يكون النيك نيم بالعربي

المهم اخوي قال انا بختارلك اسم

قلتله اوكيه

قالي بس لا تقول ما ابغيه

قلت مب مشكلة
قالي اكيد

قلتله اكيد

قال ما بتحرج عليي >>> اخوي الصغير :fa46:

قال غمض عينك و انا بكتب النيك نيم

و هذا الي طلع وياه ((( نصووور ))) :woot:

مرات اقول شو هالنيك نيم البايخ بغيره او بسوي اشتراك يديد :fa44:

و ما ادري ليش في اخر لحظة اغير رايي :fa36:
يمكن لأني صرت معروف في الواحات بهذا النيك نيم :vampire:




تحياتي :fa54:

(الدلوووعة)..
شكرا على المرور..
بس لفت انتباهي توقيعج...
توقعتج شرجاوية..
لن اصحاب السعادة هم الشرجاوييين

كيف الشرجاوية هم اصحاب السعادة
مافهمت شو قصدج بس اذا قصدج انه اللقب اصحاب السعادة مال الشارجة
لا ها لقب الوحدة والشارجة لقبهم الملك
واذا قصدج اني من الشارجة فقولج لا هب من الشارجة( بس ببلادي الثانية عقب بوظبي الشارجة )
والسموحة