أخواني وخواتي بغيتكم بكلمه راس

السلام عليكم ورحمه الله وبركاته

أشحالكم خواتي العزيزات وشو أخباركم أخواني الكرام
الصراحه ومن دون مقدمات حال الواحات أبد مب عايبني ما أدري شو اللي صار ولـــــــــــــــــــــــ ـــــــــــــــــــــــــ ـــــــــــــــــــــــــ ــــــيش
بس اللي أعرفه من رجعت مالي خاطر أحدر الواحات لأنه بين موضوع والثاني موضوع خلاف أو سوء فهم أو ضرابه أو أعتراضات ليش؟؟؟؟؟

شو اللي صار بعد ما كنتوا كلكم أخوان صرتوا أعداء ؟؟؟!!!!!

صدق اللي يشوف الواحات اليوم يتحسف عليها قبل أربع شهور!!!! كيف ممكن تنقلب الموازين بين ليله وضحاها ؟؟؟؟؟ وليييييييش ؟؟؟؟ لمصلحه من ؟؟؟؟

ماشي جواب ....

أدري الكل يتحراني أتفسلف جني أبله في الإعداديه بس صدقوني من حبي لكم وخوفي عليكم ما أتمنى هالشي يستمر ....

أتمنى تصفى القلوب وأتزول الخلافات ... وترجعون شرا قبل كلكم أيد وحده خوات وأخوان تجمعهم المحبه والأخوه لا أكثر ولاتنسون أنكم كلكم عيال زايد اللي فيوم ما تمنى يشوفكم بهالشكل أبد



اللي يحس أنه هالرمسه مالها لزمه لا يرد على موضوعي ولا يهتم به أبد

وسلامتكم


تحياتي الجناويه

عليج السلام والرحمه

بـ كل بساطه اقولج ..

:vampire: هاي نحاسه زايده :vampire:

لا امزح امزح

بس يعني

هالشي طبيعي .. يصير بين فتره و فتره

شرات الزجام هالايام .. وباء الخلافات على قولتج منتشر بينهم بس .. بشكل دوري

وعليكم السلام ورحمة الله وبركاته

الجنيه

كلامج على العين والراس طولى بعمرج واشكرج جزيل الشكر والعرفان على الاهتمام الطيب لى تبذلينه فى الواحات

وانا اشوف الصراحه الواحات انجلبت مره وحده كل شىء تغير فيها ليش الخلافات والزعل وهذا مايحب هذا وهذاك مايحب هذا لين متى ... اتمنى للجميع الخير وانه يردون مثل اول واحسن وكلكم قلب واحد واخوه

وتزدهر الواحات واكثر .. هذا ماعندى من كلام والسموحه على القصووور

اخوكم/ بحر الموده

مرحب ملايين


هلا اختي الجنيه

موضوعج فيه عبره
وان دل على شي دل على اهتمامج وحرصج للواحات
ومثل ماقلتي كلنا اخوان وخوات وماله داعي للضرابه هذي

بس هذي فتره وبتزول وانشالله ماترجع ابد
والكل يرد شرات قبل على قلب واحد

في بعض الاحيان تكون في حساسيه زايده
يعني بعض الاعضاء يبون يبدون رايهم في شي
والاداره مب قادره تتفهم هذا الشي
فيستوي خلاف من بينهم

مرحبا الغاليه ..
هذا هو حالنا .. شو نسوي ..
الكل على خلاف .. ما ادري شو بلاهم ؟
نادر ما تشوفين حد متفاهم في الواحات ..
بس ان شاء الله يردون لحالهم القبلي .. ونرجع اخوان ..
تسلمين الغلا على غيرتج على اخوانج وخواتج ..
والسمووحه

وانا بعد بقوول كلام في خاطري عن هالموضوووع
الصراحه حال المنتدى مووول مب عايبني الخلافات زادت
و نتيجه لهالخلافات صار حقد بين الاعضاء
الصراااحه الصراااحه المنتدى قبل سنتييين احلى بوااااااايد من الحين مع انه كان عدد الاعضاء اقل عن عددهم الحين بس والله كنت مدمنه عليه بس الحين كل شي تغير

وعليكم السلام ورحمة الله وبركاته

الجنيه

بالعكس والله كلامج يأ في محلة ، لا فيه تفلسيف ولا شيء ، نعم حال الواحه ما يسر ، مب شرات قبل !!! بس لاتخافين ان شاء الله كل شيء بيرجع وان شاء الله الكل يتصالح. ونكون على قلب واحد وايد وحدة باذن الله.

مشكورة اختي عالموضوع ، ويعطيج العافيه.

ام خدود

الا نحاسه ونص صدق يعني شي يقهر
ان شاء الله تصفى القلوب وتعود المياه لمجاريها

بحر الموده

صدقت ياأخوي الله يهدينا ويهديهم أجمعين

آميييييييييين

بنت الدلع

الله يسمع منج واتزول هالفتره لأنها صدق مو حلوه

صحيـــح الواحات تغيرت

لكن اظني مب عشان زعلانين وهالسوالف

يمكن نسبة منهم زعلانيـــن

بس نسبــة عــوده من الأعضاء يمرون بفترة امتحانات

ان شاء الله يخلصون وعقب بترد الواحات مثل اول واحسن

تفاءلوا خير ..

عنود الريف

أتمنى

المتفيزره عالعرقووب

ان شاء الله تتحسن الأمور وتتغير لللأحسن


ولد الحكومة

العفو ... وان شاء الله ترجع المياه لمجاريها


العجيبه
كلامج صحيح حبوبه بس أنا أتكلم عن الحاله اللي وصل
لها المنتدى من زعل وخلافات وسوء تفاهم ...

واللي ابتعد عن المنتدى بسبة الامتحانات عذره معاه والله يوفقهم ...

السلام عليكم ...

انا اشوف ان الخلافات دايماً موجوده ... في كل مكان مب بس في الواحات ... بس عاد وين تطلع هني السالفه ... انزين المقومات كثيرة مثل ما انتوا شايفين... ما ادري ما يحتاي ادخل في تفاصيلها :fa36: ... بس يعني الواحد لازم يقتنع في اشياء مب شرط تعجبه بس تكون سليمه ومافيها شي ...

انا ما اقول الا الحمد لله على كل حال ... والواحات بخير بوجود ناس مثلكم تعرف ان الخلافات لا بتودي ولا بتييب والمفروض نكون مثل عايلة وحده كلنا فيها اخوان ...

الله يسمع منكم وان شاء الله تنتهي كل الخلافات على خير ...:laugh:

والسموحه ...

من ملاحظاتي على اسباب الخلافات .. معظمها تكون بسبب الا وهو:

اذا حد قال شي... والثاني علق بس رائه مغاير عن الاول... يتشط الاول ويتنرفز الثاني.. وكلن.. يبغي يفرض رائيه غصب عن الاخرين

الحاضر الغايب

وعليكم السلام ورحمه الله وبركاته

ما عليك زود يا أخوي ومثل ما قلت الخلافات بكل مكان بس الشطاره
في اللي يتجاوزها ويكبر عقله أشوي
يعني الصراحه أحيانا أتكون أسباب الخلاف بسيطه وما له داعي تكبر السالفه
بس الله يهداهم ما يقتنعون ...

الله المستعان


الحساس

الله يسلمك المشاكل ما أتصير الا من العناد ومحاولة فرض الرأي بالغصب
الله يهديهم ...

السلام عليكم

سوء تعامل بعض افراد الادارة مع الاعضاء . . و تمسكهم برأيهم حتى و ان كانوا على خطاً و الاعضاء على صواب

عندج تغير شكل الواحات له دور كبير في حالة الواحات حاليا ً
بس ابا اداري من الاداريين الي كل واحد منهم تفلسف و قال انه مع هـ التغير الواحات بتتطور ونحن يالسين نقدم الافضل للواحات وانتوا ماتعرفون شي و نحن نبا ونعرف مصلحة الواحات . . بس اباهم يجاوبون على كم سؤال بسيط
بكل صراحة الواحات بالشكل الجديم افضل ولا الحين ؟
كم عضو يدخل الواحات قبل التغير و الحين؟
كم مشاركة في اليوم الواحد الحين وقبل التغير ؟
ليش مانشوف مواضيع يديده يوميا ً شرات قبل . . الحين يالله يالله نحصل رد يديد في واحة بأكملها . . الله يرحم ايام قبل التغير على سبيل المثال الواحة المفتوحة كل يوم مواضيع يديده و ردود و نقاشات الحين شو !؟ ادخلي اليوم و بعد اسبوع خبريني في شي تغير !

والمصيبة انهم عارفين انه هالتغير فاشل لكن ما يبون يتراجعون عن الخطأ . .
مب مشكلة يوم الواحد يغلط . . الانسان مب كامل بس المشكلة يوم يعاند ويستمر على الغلط وهو يعرف انه الي يسويه شي سلبي ! بالعكس يوم يتراجع عن غلطه و يصححه يكبر في عين الجميع ولا شرايج يالجنيه


الخلافات بين الاعضاء كانت موجوده قبل لكن مع هالشي الواحات كانت مميزة وفي قمة المنتديات من جميع النواحي

باختصار السبب الرئيسي وراء تدهور الواحات من جميع النواحي و هو تغير شكل الواحات اول شي مما ادى الى ظهور الخلافات و هجرة البعض وغياب الكثير من ابناءها . . الخ

وايد رمست بس مستعد اواجه اي واحد يقول عكس الي قلته
الواحد يوم بيرمس يرمس عن واقع مب يكتبله كم كلمة مالها اي منطق ومصادقية واونه بيسكت الاعضاء عسب والله انا اداري
.
.

:: غرشوب ::

غرشوب

صدقت بكل كلمه قلتها الصراحه أنا شخصيا ابتعدت جزئياً عن الواحات
بسسب الشكل الجديد اللي المفروض كان يحسن ويطور مب العكس ...

الصراحه كفيت ووفيت وما عليك زود
كلي أمل ترجع المياه لمجاريها وترجع الواحات شرا قبل وأحسن ...

تحياتي الجناويه

وعليكم السلام ..

وشحالهم الحضور ..

الجنية

بصراحه تواجد الأعضاء أو غيابهم يعتمد على مناخ الواحات والارتباطات الخارجيه

وكل واحد وله ظروف تجبره أنه يلتهي بدراسته أو أشغاله أو حياته

بشكل عام وتبعده عن الواحات وهالشي طبيعي

ولكن إذا فسرتوا أن غياب

الأعضاء سببه

هي الخلافات أو الدزاين أو عدد المشاركات تراكم تظلمون

الواحات في هالحاله وأنا من وجهة نظري

ماشوف أن هالامور لها

أي دخل !

:fa36:

ولاتنسين يالجنيه انج انتي أول وحده صار لها فترة غايبه

عن الواحات يعني غيرج معذور وعنده أسبابه

مثل انتي غبتي وعندج أسبابج

والغايب حجته

معاه

;)

غرشوب

ماشاءالله وايد شال فخاطرك على الادارة

والواحات بشكل عام !

:fa46:

بخصوص الشكل أنا أشوف أن هذا وايد فيه مميزات ماكانت موجوده قبل

وكفايه أنه أسرع ، وبعدين أنت في بداية ردك تقول أن الواحد

لازم مايتمسك في رايه ويعطي المجال للطرف

الثاني أنه يبدي رايه لأنه يمكن

يقتنع فيه ويتراجع

وأن هالشي بيخليه يكبر في عين الناس وفي آخر ردك تقول اللي

عنده راي غير رايي أنا مستعد أواجهه يعني أنت

أول واحد متمسك برايك ويالس

تناقض أفكارك !

:wacko:

على العموم في أشياء الواحد مايفهمها إلا بعدما يتقدم فالعمر

ويتفتح عقله أكثر وإن شاء الله كلنا نكبر

ونستوعب الأشياء بشكل

صحيح

:vampire:

والسموحه

الاســـطـــوري

أخوكم

الإسطوري ..
الله يسمـع منـك وعقـبــال ما نكبــر معــاك ونغـدي حكمــاء ,,

قريــت رد غرشـوب واتفـق معـاه في بعــض النقــاط وفـي بعـض النقـاط اختلف معـاه فيهــا ..
الشكـل العـام ما خرب الواحات بشكـل كبيــر .. هو له دور بـس هب الدور الكبيـر شرات ما يتصـور الأغلبيــة ..
يمـكـن شي أسبـاب ثانيـة وشرات ما يقولون " قسمـت ظهـر البعيــر " لأن " كثـر الدق يفك الإلحــام "

ملاحظـة للإسطــوري ..
اللي يكون معتمـد على أدلـة وقوانيـن ملموسـة وواثـق من رأيه لأن واقـع لا خرفات ولأن الأغلبيـة " العاقلـة " تردده ما يحتـاي يغيـّـر رايه وما يسمـونه تنـاقض :laugh:

الله يكبـرنا ويفهمنـا معنـى " التناقض " على أصوله

والسموحه

أخــوكم
أحلى منصوري

والله توقعت هالشي

:fa56:

توني أدري أن الريال عين محامين يشتغلون عنده ويدافعون عنه بس مادري كم أتعابك !

أشكرك على الملاحظة الثمينة الغالية بس ترا أنا أرمس فموضوع وأنت ترد

فموضوع ثاني وفعلا الفكرة الأخيرة تناسبك وايد وعرفت

تختار الشي المناسب وبعدين توني أدري

أنالقوانين تكون ملموسه

لأني أعرف العكس

صحيح

:rock:

بس أنا محيرني شي واحد كيف أنقلبت 180 درجه على الإدارة بعدما طلعت

منها بس مهما صار في الواحات من تغيير أو تعديل أو شو ماتبى

تسميه سمه لازم تتقبل الوضع وتتماشى معاه والآراء

تظل آراء لا تقدم ولا تأخر وهذا اللي

صاير واللي مب عايبنه

...........

:fa46:

والسموحه

منكم

والأغرب في الأمـر يوم أشوف واحـد يحبنـي ويمــوت فينــي وخلاف يظهـر تحت السواهي دواهي :fa56: ..
حلوة طريقـة كتابتـك وايــــد :vampire: ,, بس أنا اقـتـرح بوضـع " متـرجم " لأصحـاب " العربي الضعيـف " أو ترسل الواحات بعثـات لـ " معـهـد الخوارزمـي " لتعليـم اللغـة العربيـة وخاصـة يوم اكتـب حايـه ويفهمونه الأعضــاء بطريقـة ثانيـة .. لا لا لا لا أنا اللي ما اعرف ارمس واتكلم " زنجباري " ( علمني بو الخيـر :laugh: ) ..

أول حايـه سالفة دخولي وخروجي من الرقابـة ما اتخص " الأعضــاء العاديين " والإدارة على علم بكل الوقائـع وخاصـة " عايـش وهــم " لأنه هو اللي رقاني هب حضـرتـك :fa44:

والواحات للجميـع وهب انت اللي تطـردنـا يا " حبيبي "

كنت أتمنى يعيني غرشوب محامي لـه لأنه ما شاء الله يعطـي مرتب عالي وعلاوات محفزة بس للأسف للحينـه ما وصلت ورقة تعييني:woot: ..

ملاحظـة .. أنا وجاري وش دخلك يا " للشطار .. أكمل الفراغ " :fa38:

والسموحه منج يالجنيــة ..

وما ليـه رد مـرة ثانيـة على " حبيبي " أخاف يكرهني :laugh:

أخــوكم
المنصــوري

الاسطوري

اقرا ردي عدل . . انا قلت ما يتمسك برأيه و هو عارف انه غلط !

و قلت بيكبر في عين الجميع يوم يتراجع عن عناده ورأيه الغير صحيح ويعود للصواب !

ماشوف اي تناقض ؟ وين التناقض الي ترمس عنه !!

هيه قلت مستعد اواجهه اي شخص تعرف ليش . . لأني واثق من كلامي ورأي و مستعد اتحاور و اتناقش وادعم رأي ويا اي شخص يختلف وياي ومب مقتنع مب شرات البعض عندنا يخافون المواجهة والنقاش تعرف ليش ؟ انا بخبرك كون رأيهم غير صحيح يعاندون ويكابرون . . مب قادرين يدافعون عن رأيهم كونه غلط او غير واثقين من انفسهم فـ يلجأون لكافة الاساليب الي يتبعها الضعفاء من ترديد كلام ماله اي منطق وعدم التحاور بجديه حتى احيانا ً يوقفون اشتراكك يوم تفحمهم و رأيك يطلع الصح و هم غلط . .

وعزيزي انا يوم ابا اقول شي ما اعين محامين شرات البعض عندنا يطرشون ناس ترمس عنهم . . شكلك ما تعرف من هو غرشوب !

المنصوري عزيز على قلبي لو بيدي بـ عينه وزير مب بس محامي . .

ارفع عقالي احتراما ً للوزير المنصوري الغاوي :fa56:

.

.

يا اخواني ...

نبي انصلح الغلط .. وانعدل الخربان ..
يعني مافي داعي للنغزات والكلام اللي من تحت لتحت..

نحن ما شاركنا في الواحات عشان انحطي مواضيع عتب ولوم وطنازه علا فلان وفلانه ..

الواحات في الطريق الى التدهور .. ونحن بصفتا اهل .. لازم انحسن بيتنا الثاني ..

نحن اخوه .. نبي تعاون .. مب ضرابه ..

هذا رايي وبعض النصايح ..

والسموحه

يحليلج يالجنيه

اكيد في حد داعي عليج...

موضوعج راح وطي!!!!

اقتباس:

---

المشاركة الأصلية كتبت بواسطة الحساس

يحليلج يالجنيه

اكيد في حد داعي عليج...

موضوعج راح وطي!!!!

---

"هيه قلت مستعد اواجهه اي شخص تعرف ليش . . لأني واثق من كلامي ورأي و مستعد اتحاور و اتناقش وادعم رأي ويا اي شخص يختلف وياي ومب مقتنع مب شرات البعض عندنا يخافون المواجهة والنقاش تعرف ليش ؟ انا بخبرك كون رأيهم غير صحيح يعاندون ويكابرون . . مب قادرين يدافعون عن رأيهم كونه غلط او غير واثقين من انفسهم فـ يلجأون لكافة الاساليب الي يتبعها الضعفاء من ترديد كلام ماله اي منطق وعدم التحاور بجديه حتى احيانا ً يوقفون اشتراكك يوم تفحمهم و رأيك يطلع الصح و هم غلط . . "

الله يحبني . . دليل كلامي اهنه في نفس الموضوع

تؤتؤتؤتؤ ..

حرام والله تضاربون على سوالف منتدى !!

هلا والله

ياخي ماسمعت المثل اللي يقول إن اللي يحبك هو اللي يزعلك ، ومب لازم مترجم دام
إن الأكثرية قدروا يقرون كلامي وإذا كان وايد مهم بالنسبة لك أشوف
إنك تتعلم اللغة اللي أنا أستعلمها وايد أحسن لأن
الترجمات عمرها ماعطت نفس
المعنى 100% ،
وتعال توني أدري إنك تعلمت اللغة العربية في هالمعهد وماعندي مانع ولا
حمدان إني أروح أتعلم فيه دام إني بعرف أرمس بلبل شراتك
وبقدر ... مثلك ! بس عاد الموضوع محتاي
واسطه منك ولا ماتباني أوصل
لمستواك ؟
:blush:

احم احم الحين منو سألك عن دخولك وخروجك من الرقابه وعن اللي رقاك
ولا بعد أنا قلت هالشي وأنا مادري ولا يمكن هاي معلومات عامه
على العموم أستفدنا شي من هالجلمتين ، وبعدين
منو طردك والله مب أنا ولا تتبلاني
(أنا ماطردته تبلاني ... )
وبعدين أنا ماقلت الواحات لي ولا شي من اللي تقوله ومثل ماقلت
تراك تقرا بسرعه وترد وأنت مب مستوعب شي
والله يعينك على بلواك ويصبر
اللي حولك

والملاحظه فنانه وزين يوم إنك تعرف تضرب أمثال وتنغز .... بها بدون
ماتدري واللبيب بالإشارة يفهم ، وتعال ياخي بلاك مروح البيت
بيتك وبعدك ماتقهويت وخلاص مابقولك شي
مايسوى عليك هالحوار اللي
أنت بديت به !

(الإناء بما فيه ينضح)

ومادري إذا سمعت عن ظاهرة إنقراض بعض الأنواع وأنا بصراحه أحب البيئة
وأخاف على دورة الحياة في الواحات ومابى أي نوع ينقرض عشان
ماتتأزم الأمور بدونه وتوقف الحياة فأتمنى نحافظ
على الأنواع كلها ونحميها من
خطر الإنقراض
:ghostface

غرشوب
الحبوب

إن شاء الله طال عمرك بقراه
عدل بس أنتي هدي
أعصابك
:fa46:

التناقض مب في هالنقطه التناقض بينها وبين الأسلوب اللي تتبعه بأن رايك
دوم هو الصح وعمرك ماقلت أن رايك غلط ولا تبى تعترف حتى
وإن حصل هالشي وخلنا نفترض إن رايك دايما
هو الصح وهالشي أنت عبرت
عنه في آخر ردك
:look:

أنا مابتدخل في شؤون الإدارة عشان محد يقولي أنتوا الأعضاء العاديين مالكم
خص :fa56: ، وتوني أدري أن الأعضاء صايرين فدائيين
غرشوب ويدافعون عنك بس على حسب علمي
سمعت إنك تعطي رواتب عاليه
و و و ولا هالمعلومات
غلط !

خاطري أعرف منو غرشوب
اللي تتكلم عنه ؟
:rock:

حبوبي أنا أرمس فوادي وأنت ترد علي فوادي ثاني وموضوعنا التناقض فردك
بإنك تبى تثبت أن الراي يحتمل الغلط ولكن إذا كان راي الغير أما إذا
كان رايك فأنه دايما بيكون صح لأنك ترمس بجديه وأنا
توني أدري أن أي واحد يرمس بجديه يعني
رايه صح وزين يوم إنك أكتشفت
شي كل الناس ماقدروا
يوصلون له ومن اليوم ورايح بكون جاد عشان يكون رايي صح وأنت
ترضى عني وبعدين أنا يالس أرمس عن إبتعاد الأعضاء
وأسباب هالشي بس مادري شو اللي غير
الموضوع والردود موجوده
وأي قارئ عاقل وفاهم بيعرف الأسباب واللي فخاطره شي
يقوله والمنتدى مفتوح للنقاش وتبادل الآراء بس
في نكهات أتدخل عمرها غصب فنص
الموضوع ويالله بنعتبرها
نكهة الكاري

أويييييييييه الجنيه عاد بتعصب علينا ، اسمحلينا على هالمداخلات
الطيبه والبهارات تراها تحلي كل شي بس
تراها مب بيدي أنا !!
:)

السموحه منكم
يالحاضرين

ام مخدود عندي طلب..

ممكن اضارب وياج لو سمحتي؟؟

ترا صارت موضه بالواحات.. كلن يضارب الثاني .. وافكر اني اضارب انا بعد ماحب اكون شاذ عن خلق الله..

صدقتي حرام يضاربون على سوالف منتدى ..

الاسطوري... كلامك كبير ومايظهر الا من كبير.. تحياتي..
ملاحظه : احب ترتيبك لكلامك من ناحية الافكار والطريقه كتابة الردود ..

ودمتم بخير وعافيه وبعيدين عن التوتر

الاسطوري

رأي عرضه للخطا قبل ما يكون للصواب . . انا ماقلت كل شي اقوله صح بس من وجهة نظري اشوفه الصح لأني مقتنع فيه ان كنت تشوفه غلط فأهلا ً وسهلا ً هالساعة المباركة تعال اقنعني بوجهة نظرك او رأيك يمكن اتفق معاك و اغير رأي وانا بالعكس احب يوم الواحد يختلف وياي ويقنعني بالطرق الحضارية والاسلوب الحلو يعني مافيها شي اتراجع عن رأي ان شفت ان رأي الاخر هو الصواب و اقنعني به . . بس يوم تحصل شخص يكون رأيه يختلف عنك و انته ترمس وتدعم رأيك و هو متمسك ومتعصب لـ رأيه بدون ما يدافع عنه بـ منطق واسلوب حضاري و يطبق مقولة "عنزه لو طارت " و انته تفحمه و اسبابك تكون اقوى عن اسبابه لكن يصر انه هو كلامه صحيح وانته الغلط واحيانا ً يهرب من المواجهة ! هـا شو تسميه ؟

ببسطلك المسألة . .
يوم تتناقش ويا شخص بنقول اربيعك و كل واحد منكم له رأي مختلف ويشوفه الصح تتوقع انه يرد عليك بسخريه ولا جديه عشان يثبت رأيه على صواب ؟

ان ناقشك ورمسك بجديه واعطاك اسباب تدعم رأيه في احتمال كبير تغير رأيك و تقتنع برأيه
اما ان يلس يتمصخر و يقول رأيه بدون لا يقولك ليش قال جيه و عطاك اسباب مش منطقيه فـ اهنه صعب انك تقتنع برأيه ويكون غلط من وجهة نظرك ورأيك هو الصح. .

مثلا ً انته شاري موتر و اربيعك يقولك مب شي موترك ما ينفع لو شاري موتر ثاني اخيرلك
تقوله لا موتري زين وانا شارنه لانه فيه هالشي و هالشي و لانه الخ و تعطيه المواصفات والاسباب الي خلتك تشتريه . .
بعدين تحصله هو يرد عليك ويقولك والله سيكل راعي الدكان احسن عنه و يالس يضحك:fa56: !

اهنه رأيك يكون اقوى وله من المنطق الكثير مما يخليه هو الصح
اما رأي اربيعك فـ كلامه سخافة وتفاهة ! ولا شي يدعمه

اما ان قالك اربيعك ليش موترك مب شي بجاوب ثاني مثل : الموتر الفلاني سعره شرات سعر موترك وعلييه ضمان مدة اطول و يعمر اكثر بالاضافة انه فيه مواصفات اكثر عن موترك و توه يديد نازل وتقدر تجربه قبل لا تشتريه وفيه هالشي مب متوفر الا فـ هالموتر و و و . . الخ

اهنه انته ممكن تقتنع برأي اربيعك وتغير نظرتك وتقول والله كلامك صح . . صح انته كنت مختلف وياه اول شي لكن رد عليك بجديه و اقنعك برأيه بشكل حضاري وحلو . .


.
.

السلام عليكم ورحمه الله وبركاته

أخواني الأعزاء أعتقد هالموضوع حطيته عشان نلقى حل للمشكله
مب أنزيد المشاكل ... مب عيب أن كل واحد يبدي رأيه ويتمسك به دام أنه مقتنع أنه صح والمفروض يحاول يقنع غيرهبوجهة نضره ...

فلو سمحتوا ما أبي مشاكل واللي حاس نفسه مب قادر يمسك عمره لا يرد أخير له ....


الأسطوري
ماشاء الله عليه مستوي بولسانين محد يقدر عليك يعني ... وبعدين لوأشويه بس
أتبطل عيونك الحلوه وتقرا الموضوع من أول أحسن لأني ما تطرقت لغياب الأعضاء كثر ما كانت فكره الموضوع الحال اللي وصلنا عليه الا وهو كثره الخلافات وسوء الفهم اللي منتشر في المنتدى مثل الوباء وهالشي ما يباله كلام
نظره وحده لردودكم أتعبر عن اللي فخاطري وزود ...

الموضوع موضوعكم وحابه تواصلكم بس لو سمحتوا من دون تنغيييييييييييييييييز

لا اتخلوني استعين بربعي الجنون

وعليكم السلام ورحمة الله

غرشوب

أخوي دام إنك فاهم الشي اللي قلته ليش ماتطبقه ويمكن للحين مالقيت الشخص المناسب
وفي هالحاله أنت معذور ، على العموم أنا وصلت للشي
اللي أباه ونقاشي وياك هني
إنتهى .

الجنيه

هدي أعصابج ماصار إلا الخير ولا تغرج المظاهر ترا القلوب على بعض ، وبعدين والله
العظيم عندي لسان واحد مب لسانين :sad: ليش تتبلون عليه ، وأنا فتحت
عيني عدل وقريت الموضوع بعد مره وشفت إنكم صابين
الموضوع في قالب الخلافات مع إني أشوف
أن الخلافات حاليا مالها أي
وجود يذكر
واختلاف الرأي شي طبيعي وأنتوا تطرقتوا لموضوع غياب الأعضاء
وأنا علقت عليه بتركيز شويه وكان حواري ويه أخوي
غرشوب يمكن ساخن شوي ولكنه
عادي مثله مثل أي
حوار ثاني
بس مب مثل الجزيرة وضرابيها ومب شرط في كل حوار
أحد الطرفين يقتنع بس على الأقل تنحط في
باله صورة عن الرأي الآخر
وله حرية القبول أو
الرفض
:fa54:

وهالوضع حله في تصفية نية كل واحد والمشاركة
بقلب صافي والتخلص من الأمراض
والجراثيم عشان مايتعكر
الجو الصافي !
:)

ملاحظة : التنغيز بدأ علي مب مني .

ربي
يحفظكم

الجنيـه ..
كله ولا ربعج الينانوه :fa56:

غرشوب ..
الصراخ في قارورة فارغـة :fa38:

والسموحه

خويكم
المنصوري

أحلى منصوري

لا تعليق

نجمة دبي

بارك الله فيج وان شاء الله الكل استفاد

الحساس
,,, فديتني ماماتي داعيه لي مب داعيه علي
والحمدلله الموضوع ماشي تمام التمام وفي النهايه اللي يهمني رضاكم
والصلح بينكم ..


أم خدود

حبوبه مافي شي يستاهل وان شا الله الكل بيرضى في النهايه