الى يشتغـلون ... تـفضّلو

مرحبا

(مادري اذا انا حاطه الموضوع في المكان الصح ولا لا)


يالسـه اسوي ري-سيرج لـ بروجكت عندي وحابه آخذ رايكم بما انه وايدين هني يشتغلون..


شو هي الأسـباب الى تخليكم تحبون شغلكم واتمون هناك وماتستقيلون؟

شو هي الاسبـاب الى تدفعكم لـ الاسقاله؟؟

يوم تحطون في بـالكم انكم بتستقيلون.. تظنون انه شي طرق انه الشركه تقدر ترضييكم واتمون فيها وماتستقيـلون؟ ولا خلاص لو بتستقيلون يعني بتستقيلون وماشي أمل؟

هل المعاش سبب رئيسي في استقالة معظم الموظفيـن؟

الصراحة السبب اللي يخليني أحب شغلي، إني أرضي ضميري ودايما أحس إنه الله يراقبني، ولو تيني فترات

أقول مليت من روتين الشغل، لأنه مافيه تغيير ...

فكرت أقدم استقالتي، لأنه ماشي رضا وظيفي، بحيث الإداريين ( المسؤولين ) مايسمعونا ..

ودايما يطلبون منا إنه نتكلم بحريه، ويوم نتكلم يتجالهون راينا، هذا سبب يخليني أفكر بالاستقاله ..

المكان اللي أنا فيه ما يحاولون يرضونا ...


بالنسبة للراتب ، الفترة الأخيرة .. وايدين يظهرون من المكان اللي يشتغلون فيه، كونهم بيحصلون راتب أعلى ..

وهذا الشي صار بزيادة، لأنه الاسعار ارتفعت والراتب نفسه، وماشي مميزات ولا بونص ...

يعني تحس الراتب شي مهم؟

عن نفسي، إذا توني مشتغل مايهمني الراتب من البداية، بس كوني اشتغل سنوات خبرة + اكرف والراتب يزيد

300 درهم ... أحس لي الحق إني أظهر من المكان اللي أنا فيه ..

بالتالي أحس إنه مهم ( الراتب )

اها اوكيـه
شكرا

تعجبني افكار اخوي عمار في الشغل ,,

قبل فتره كان يبي يطلع من شغله ,, وكله يتكلم عن هذا الموضوع
لانه وصل حده في الشغل والسبب ان اخوي متخرج من امريكا لوجستك
ومن يوم داوم لين قبل شهرين ما كان يطببق اللي درسه طول الفتره اللي قضاها في الخارج
بس الحين حاب شغله وايد
هو محتفظ بجريدة مادري بشو
المهم انه هذا استفتاء ( ماعرف اذا بتحصلينه في النت او لا )
المهم ان هذا الإستفتاء يبين لك مدى حبك للوظيفة اللي انت فيها

قبل كان يطلع حقه ان 64% ان يبي يطلع
بس الحين قلت هذي النسبه وصارت 72% حبه للوظيف

انا فسرت هذا الشي
ان الواحد لو يشتغل بنفس مجال دراسته راح يبدع ويحب شغله اكثر

مع ان الراتب مهم بالنسبه لأي شخص في العالم
وهو لو يشتغل في اي شركه معاشه راح يتعدى ال40 ألف
لان تخصصه مطلووب
بس هو حاب شغله الحين ومرتاح فيه
( يمكن لان نفسيته ما تستحمل اللا الشغل العسكري )




سوري لاني رديت مع اني ما اشتغل
بس قلت يمكن تستفيدين من كلامي من خلال تجربة اخوي

اللي حبيت اوضحه في الرد الي فات ان يطبق اللي درسه في الشغل ,, راح يحب شغله !!

انا عن نفسي مب وايد مهم عندي الراتب ..

انا بديت الشغل من شهر .. و بصراحة حبيته لان مديري واااااااااااااااااااااااا ااااااايد زين ..

صار موقف قبل امس .. كان عندي موعد مستشفى في دبي .. و انا ظهرت من الدوام 11 و موعدي 12 .. يا دوب اوصل بس ..

المهم خلصت شغلي 12 و نص .. مع اني ماخذ اذن خروج .. يعني خلاص مب لازم ارد ..

لكن لاني حبيت شغلي و حبيت مديري ... رديت الدوام و وصلت 1 و خلصت شغلي اللي المفروض اخله الاسبوع الياي ..!


اذا صار ( لا سمح الله ) سوء تفاهم بيني و بين مديري .. و خلاص ماشي حل .. بطلب اني انتقل لقسم ثاني .. لان دوامي ماشاء الله عليهم .. معظم الاقسام عليها مدراء زينين ..

و مدير ادارتنا امشي الشغل صح .. و هذا المطلوب ..


الاشيا اللي بتخليني استقيل .. هي اني ما احصل Feedback من الشغل اللي اشتغله .. او اني ما احصل ترقيات مثلآ ..

و في شي الناس اتشوفه بسيط .. بس اشوفه شي كبير ..

الناس اللي ترمس بالدوام .. اشكثر اكرههم ..

يخربون جو العمل كله ..

انا ما علي من هالصغاريه .. لكـن .. البعض منا للأسف يصدق كل كلمه تنقال =@


و اسمحولي طولت >.<

مجموعة انسـان
هيه حتى كزنتي عندها هالمشكله =s انه شغلها مب نفس تخصصها
بكتبه في لستة الاسباب


الزرعوني
هل تظن انه العلاقه بين المديـر والموظف سبب اساسي في اذا الموظف مرتاح في شغله ولا لا؟

انا بعطيج سبب ثاني يمكن يكون نفس جواب الزرعوني او يمكن شي يديد

هو أن لو المدير ما يسوي نظام الطبقات أو نظام العنصرية أو نظام الواسطه

هني بيكون المدير 100%

وبعد ما ننسى التعاون المشترك بين المدير والموظفين اللي تحت سيطرتهخ
لان في وايد مدرا بس يكون مدير خلاص يتكبر تقولين محد صار مدير غيره !!

انا اشتغل بس ما بفيدج لنه ورك بليسمنت والرمسة الي بتحصلينها مني كله عتب وملام XP

السلام عليكم

عزيزتي شمعة أمل.. حبيت اشارك بموضوعج لانج ذكرتيني بأيام الكلية و الدراسة :d010:
مع اني من سنين مب مشاركة .. المهم

بالنسبة للسؤال الأول: بالنسبة لي انا حابة شغلي الحالي و اهم سبب هو الراحة النفسية .. ليش؟ الإدارة ممتازة .. تقدير للجهود (مادي و معنوي) .. ترقيات في فتره بسيطه أو انهم يعطون الموظف حرية اختيار القسم اللي يبغي ينتقل له و هالشي طبعا بالنسبه لي حلو بحيث اقدر اتعلم اشيا مختلفة

السؤال الثاني: بعد بخبرج عن تجربتي.. استقالتي من مكان عملي السابق كانت بسبب ساعات العمل ( من 8 لين 8 ,ساعتين بريك) يعني كنت اقضي 12 ساعة في الدوام+ ضغط الشغل :fa54: مع ان الراتب اعلى

بالنسبة للراتب .. اجابتي نفس اجابة اخوي المزوحي .. هالايام وايدين قامو يستقيلون بسبب الرواتب

بالمختصر المفيد ..الراتب صح انه مهم .. بس بعد ما اعتبره اهم شي .. اهم شي جو الشغل يكون مريح من حيث الادارة و الزملاء تكون العلاقات طيبه . و ثاني شي انه ما يكون روتيني (كل يوم شي يديد) .. و يكون حيوي ( تعامل مع العملاء) مب فاريني بروحي فمكتب محد يدري عني عايشه و الا ميته

اتمنى تستفيدين من مشاركتي.. و اسمحي لي

ربيعي اللي ويايه في القسم .. يشتغل شغل اقل عن شهادته، ومب راضي ينتقل، لأنه مرتاح من المكان ...

الله يعطيج الصحه والعافية غلاي شمعة أمل ...
يسلمج ربي أنا اشتغلت وتدربت في أماكن مختلفة فـ شفت الفروقات في الشغل
يمكن هذا سبب كبيــــر إني مش حابة شغلي الحالي !

ما أحب شغلي because:

- ما احس اني اطبق اللي درسته موووووووووليه
- لا حمد ولا شكر على مجهودي اللي أبذله <<<< قااااهرتني وحده في الإداره يوم قالت لي تراا ها شغلج وتحصلين راتب عليه شو تبين بعد!!! << كأني بشكارة أبوهاا
- جو الشغل مووووووول ما يساعد إني ابدع أو أقدم شي
- ساعات الشغل القليييييييييلة جداً (( أكيد الكل وده يفلعني على هالنقطة)) بس أنا من النوع اللي ما احب اشل شغلي وياي للبيت.. فـ ابا اتم واخلصه وارد البيت مرتاحه!
- أرد واركــــــــــــز على أهم نقطة "مافيه تشجيع معنوي عشان نبدع وإذا ابدعنا قالوا لنا تراه شغلكم"!!!
- وطبعاً الراااتب تعبان بس بالنسبة لي مش مهم أكثر من النقاط اللي قبله!

أنا الحينه ناويه أقدم استقالتي بس أحصل لي وظيفة ثانية قبل "قدمت أوراقي لأماكن ثانية وقالوا بيتصلون فـ ان شاء الله خير" . . .

ردآ عليج اختيه سمعة أمل .. تقدرين اتقولين انه شي اساسي :)