|₪|..قـلـوب تـحـت الـمـجـهـر ..|₪|

أهلاً

الجزء واااااايد حلو
عيبني مروان والله يتمم اللي فيه الخير
كنت خايفه من سويره ما توافق بس الحمدلله
مي اطلعت قاسيه شوي :k_devil2:
لا تخلين سلطان لـ مي نبيها لـ فارس :fa52:
ضحكتني سالفة جسوم بالمسيد :laugh:

كل الشكر ع الجزء الغاوي

تسلمين الغاليه

الاجزاء ماله كلام

بس لا طولين عليناا واايد

زين يوم واففت سارووووه

انزين يوم راشد الحين خطب مي .. يعني ما بتكون لــ سلطــان .. انا احسه حاط عينه عليها ..اممم

حلووه القصه وعيبني الجزء لوووووول كله ولا جسوم يوم راقد في المسيد..اسميه خبصنا انا خفت يكون مستوي به شي ... بس زين الحمدلله عدت على خير هالحركه..

السلام عليكم والرحمه
اشحالكم واعلوومكم
عساكم إلا بخير

ياحبيباااتي يا جودي و صديقتها"مااتذكر اسامي صديقتها"
تسلمن عالجزء الغاااوي
اشيااا كثيره حبيتها:fa47:

لووول الموقف إلي كان من بين نايف ومريم وخلفاان
:argue: -------->:bash:
خخخخخخخ مدري كنت اتحرى كذى راح تكون النهاايه
حبيتها اونه ناوي يعرس
قلبي طااح


مرواان معرسنا حيووه:a036:
تعرفين كيف الفرق بين الشرق والغرب
هل الفرق بالضبط بين فارس ومرواان:thumbup1:
حلو هالإختلااااف
لووول ابوه مدحه وامه سميره:a068:
الصرااحه
كنت متوقعه عليا ترفض:k_icon9: مدري بس جذى توقع ويوم واافقت قلت اكيد الإخت مايهزك ريح ساره رااح ترفض
والكل توقعاات ذهبت مع الريح:4:


شي حلو بالقصه
انكم قاعدين تغيروون نظرتنا عن جامعه الإمارات والسكن
الكل على باااله سوالف وحركاات :a108: وتوصل لنا الأخبار عن بنت فلان مدري وش صار لها ليش عسب السكن
أعوذ بالله
الصرااحه إلي محصن نفسه وحاافظنها ماراح يكون عليه شر
ومي ينطبق عليها القول إلي ينقال كانا كانا اعجبك انا:fa47:


وجسووم:bash:
طيح لي قلبي غربلات الإبليس
لووول اونه إلي بالمسيد طرده اسميه سوااالف

فجر :image005: مااجذب عليج تكسر خاطريه احس ضااايعه
يعني هي لوووكانت ملتزمه مع اختها والله ابصم لها بالعشره كانت بتستااانس

وبالنهاية والختام
مايسعني غير اقوولج
مبرووك عليننا الجزء الحلو
لاهنتووا الصراااحه

هيه آخر شي حبيتها حركة راااشد لولده:4: طيح له فؤاده والولد انهم بالسرعه حليل حالك يامرواان
وسلطان شكله بياخذ حلامي لأن امه مدري احس بها ماراح تجاازف وتخطب مي

طولنا
يا الله ننتريا الجزء الياي
:a074: موفقين يالشيخاات

.
.
.

مزن هتان

أهلين وسهلين ..
عيونج الحلوين ختيه ..:inlove:

اقتباس:

---

مي اطلعت قاسيه شوي

---

القسوه فبعض الأحيان يحتاجها الانسان .. :k_icon9:

اقتباس:

---

لا تخلين سلطان لـ مي نبيها لـ فارس

---

:a100: .. خلاص بنشاورها ..


العفو حبيبتي .. ولا تحرمينا من طلتج الغاويه ..

.
.
.


عاشقة اليولات

الله يسلمج فديتج ..
والحمدلله انه عيبج الجزء..

أرد وأقول تذكريني بربيعتي مادري ليش :k_icon9: ..
انتي من راك؟


.

.
.
.

شمـه

اقتباس:

---

انزين يوم راشد الحين خطب مي .. يعني ما بتكون لــ سلطــان .. انا احسه حاط عينه عليها ..اممم

---

مسوتلكم أزمه ها المي عيل .. :4: .. السالفه ما بتطول ان شاءالله .. عما قريب بتعرفون شو بيصير لـ مي .. ولـ سلطان .. ولـ فارس.. ولـ ساره .. ولـ مروان .. ولـ ولـ ولـ ..
بس أهم شي تكونون راضين ..

عيونج الأحلى فديتج ..

اقتباس:

---

لوووووول كله ولا جسوم يوم راقد في المسيد..اسميه خبصنا انا خفت يكون مستوي به شي ... بس زين الحمدلله عدت على خير هالحركه..

---

خخخ عاد جسوم وحركاته القرعه .. بس مسولكم جو ..

ولا تحرمينا من ردودج الحلوه .. حياج ..

.
.
.

.
.
.

هزاايم


وعليكم السلام والرحمه ..
نحن بخير وسهاله.. ومن صووبج!!

اقتباس:

---

حبيتها اونه ناوي يعرس

---

خخ ماعليج حركات شواااب ..

اقتباس:

---

مرواان معرسنا حيووه

---

:fa47: :fa47:

فارس له طبعه ومروان له طبعه.. بس كلهم حلوين صح خخ ..
وزين يوم انه توقعاتج ذهبت مع الريح.. خلونا نريح مروان شوي ..

اقتباس:

---

شي حلو بالقصه
انكم قاعدين تغيروون نظرتنا عن جامعه الإمارات والسكن
الكل على باااله سوالف وحركاات وتوصل لنا الأخبار عن بنت فلان مدري وش صار لها ليش عسب السكن
أعوذ بالله
الصرااحه إلي محصن نفسه وحاافظنها ماراح يكون عليه شر
ومي ينطبق عليها القول إلي ينقال كانا كانا اعجبك انا

---

ها التعليق بالذااات واايد عيبني .. :a036: ..
انا ها الي ابا اوصله الكم .. الزين والشين فكل مكان.. والنظره السلبيه لسكن جامعة الامارات فخاطري انكم تخوزونه.. قريت وايد قصص وكانو طايحين فبنات السكن .. ها الشي خلاني اتحفز اني ارد عليهم من خلال ها القصه ولو بالشي البسيط..

اقتباس:

---

فجر مااجذب عليج تكسر خاطريه احس ضااايعه

---

بس قدرت تلقى طريقها واخيرا!

اقتباس:

---

وسلطان شكله بياخذ حلامي لأن امه مدري احس بها ماراح تجاازف وتخطب مي

---

كل شي جايز وكل التوقعات وارده .. بس تري ويانا وبنشوف شو بيصير..


وحياج الله الغاليه.. ولاتحرمينا طلتج ..

.
.
.

مرحباا

هيه نعم من راك

يالله عرفيني ع ربيعتج خخخخخخخخخخخخخخخخخخخخخخخ

اختي متي ناويه تنزلينا جزاء

خلااص ملينا من الانتظر

مب جنى طولتــي علينا ..

اقول الشيخه تراايج واايد طولتي

اذا ع منتدي الثاني ما بيفتحونه

نزلونا القصه ما فينا صبر

السموحه

عزيزتي المزيونه ؟؟ شو سالفة هالغياب ؟ ظروف أو ؟؟؟

مرحبااا

وينج الغاليه

لي حد علمي انه ماشي امتحانات هااي فتره الا جان بتسلمون برجكات او تقارير

ولا بنتري لين الموقع الثاني ينفتح
ياابوكم بنسا القصه

.
.
.

عاشقة اليولات

حيالله اهل راك .. الله يسملج منتدى عاشقة الشمال مادريبه متى بيفتح .. ونحن عادي بنكمل التنزيل هنه
لكن المشكله مب قادرين نخلص البارت الي فايدينا ..

اقتباس:

---

لي حد علمي انه ماشي امتحانات هااي فتره الا جان بتسلمون برجكات او تقارير

---

الجامعه وما ادراك ما الجامعه .. قسم بالله كارفينا .. خلصت الميديرمات وقالوا يالله سعيات .. :fa44:
ويالله بروجيكتات .. وعاشقه وحليلها متأزمه وايد بالبروجيكتات .. وها كله مسولنا ضغط كبير .. فالسموحه منكم .. :pullhair:

لا افا لا تنسينها .. ردي اقريها من اول خخ ..
حياج ..


.
.
.

شمــه .. حلم الطفوله

اعرف طولت ها المره .. بس تعرفون الدراسه والسكن مشاغل .. فأقرب وقت خلال ها اليومين بتحصلون الجزء.. والسموحه..


.
.
.

اسمحيلينا الغاليه

صح نحن طالبات تقنيه ماا نعرف شي عن الجامعات

نفس شي برجكتات ورااك ورااك


السمووحه.. يسلمون عليج شله ويقولج لا تبطين علينا ,,

نترياج حبوبه

.
.
.

عاشقة اليولات

بالحل الغاليه .. ويلا واخيرا قدرنا نخلصها .. بس صدق الظروف وايد معاندتنا ..


مزن هتان

اوكيك

.
.
.

الجزء الخامس والعشرون

************************
(الاثنين) 28 مارس 2005
************************

عقب صلاة العصر نزلت ناعمه من قسمها بحركتها البطيئة ..وهي لابسه عباتها وشيلتها وفايدها سويج سيراتها وشنطتها .. وهي نازله لاقت ام سيف طالعه من حجرتها..

ناعمه: هلا عمتي ..
ام سيف: اهلين.. ها على وين العزم ..
ناعمه: والله بودي ميود وجسوم افصللهم كنادير حق الملجه.. قلت لسيف قالي مب فاظي وديهم انتي
ام سيف: ماعليه امايه وسعي بارضج لهم .. بروحج بتسوقين ؟
ناعمه: هيه سيف ماخذ الدريول
ام سيف: تحملوا على عماركم عيل
ناعمه: ان شا الله يلا..فمان الله

طلعت ناعمه وشغلت سيارتها وبعدهم مايد وجاسم مانزلوا من فوق .. يلست تضربلهم هرنات عشان يستعيلون
في هالوقت نزل مايد بسرعه و وراه جاسم يمشي ويفصم كندورته
مايد: يالله بسرعه امي معصبه
جاسم: هاي امك حشره ماتروم تصبر شويه يعني ..
سمعتهم ام سيف اللي كانت يالسه في الصاله
ام سيف: يالله بسرعه وينكم متاخرين لين احين
مايد: ها جسوم يتسبح
جاسم: عيل مثلك اظهر بليا سبوح
مايد: طوف طوف انته
جاسم: امايه زهبوا العشا من وقت برد يوعان
ام سيف: يارك الله انته

وصل جاسم لسيارة ناعمه ولقى مايد فاتح الباب اللي جدام بيركب

جاسم: وقف ايه وين بتركب جدام انا بركب
مايد: انا ييت قبلك
جاسم: مب ع كيفك يالله سير ورا
مايد: مب ساير
جاسم: يلا ميوود انا اكبر عنك احترمني
مايد: اهااا.. وين اكبر عني .. انا مولود قبلك يلا اجلب ويهك
جاسم: يا الهرم يا ولد نعوم ..
ناعمه : فكوني يالله لاتيلسون تظاربون انتوا احين ركبوا خلصوني
مايد ركب جدام وسكر الباب اما جاسم سار ورا
جاسم: ماعليه ميود بتشوف
ناعمه: عن الصدعه اسكتوا شوي
جاسم: خوزي كرشتج عن تلف السكان هههه
ناعمه: مب كبيره كرشتي وانا بعيد عن السكان.. ماتشوف
جاسم: لااشوف
ناعمه: تشوف ولا ماتشوف هاهاي
مايد وهو يطالع امه : ههههه اوووووه اميه قامت تنكت
جاسم مستغرب وهو ناقز جدام ويطالع ناعمه..
جاسم: اوونه نعوم يطلع منها بعد ..
ناعمه: ههههه بس بس محد يسويلكم سالفه.. ايلس جسوم عن اطيح..

وتم ها حالهم طول الدرب تعليق وضحك .. والحلو فالموضوع انه ناعمه قامت تساير جاسم وما تعصب من تغليسه عليها ..
وصلوا عند الخياط اللي يبون يفصلون عنده .. جاسم على طول نزل .. ولحقه مايد اما ناعمه بركنت السياره وانزلت ..

كانوا مايد وجاسم واقفين يختارون القطع ..

ناعمه: ها شو اخترتوا
مايد: انا ابا هالبيضا لكن هالغبي جسوم
ناعمه: بلاه ؟
مايد: يبى يفصل سودا
ناعمه: سودا ؟ جيه بتفصل حق ملجه انته والا عزا
جاسم: فال الله ولا فالج
ناعمه: شو تبابها السودا مب حلوه
جاسم: انا اباها فنانه انتي شو عرفج
ناعمه: لا لا مب حلوه .. اختار لون غير جان ماتبى ابيض
جاسم: بسوي سودا وبشتري غتره حمرا ماعليه منكم انا
ناعمه: جسوم لاتصدعبي اختار لون غير
جاسم: مابا
ناعمه: ميود خله يقايس عليك
وقف مايد يقايس وسأله الهندي: شو يريد ها موديل عربي؟
مايد: لا لا اباها قطريه
جاسم: اطاع ها انته ماتعرف تختار
مايد: ياخي كيفي انته بتختار بروحك انا بعد بختار
ناعمه: حلوه القطريه بلاها بعد
جاسم: انا ابا عربيه وفيها فروخه بعد
ناعمه: يالله يا انته .. مادري منو تتحرى عمرك .. كندوره سودا وعربيه وفروخه و غتره حمرا
جاسم: اخو العروس كيفي
مايد: وانا اخوها بعد جيه انا ولد السيلانيه
جاسم: لا ولد نعوم
ناعمه عصبت: جسوم اقبض لسانك يالله .. وميود قوم جان خلصت خل يقايس ع جسوم ..مب منكم من اللي فازعه ويايبتنكم
جاسم: خيبه بتذلينا ..
ناعمه: يلا جسوم خلص بسرعه ..

رد مره ثانيه جاسم لصوب القطع ولفتت نظره قطعه ثانيه .. دشت مزاجه وسار يرمس الهندي..

جاسم: اقولك
الهندي: نعم
جاسم: شوف فصل ها كندوره سودا .. وبعد يريد هذي
الهندي: وين
جاسم: هاي الكركميه
مايد وهو يطالع جاسم : لاااوالله شحقه تفصل ثنتين
جاسم: لم ثمك ..
مايد: امايه بيفصله وحده ثانيه تراه
ناعمه: افف.. فصلوا اللي بتفصلونه بس خلصوني ..
جاسم: اسمع شوري ها المره وسو شراتي
مايد: شو بتفصل؟
جاسم: بسوي ها اللون الكركمي عربيه بعد .. حلوه بتغدي
مايد: يلا انزين خلص بسرعه عن تحرج اميه.. هاكيه متغصصه
جاسم: انزين يلا ..


بعد ماخذوا قياساتهم ودفعت ناعمه الفواتير.. ودتهم تاخذ لهم نعول عشان تخلص كل حاجاتهم وتفتك منهم .. ورجعت البيت وهي اعصابها تلفانه من مناجرهم


****

فليل في السكن كانت مي مجابله الكبت واطلع ثيابها وتحطها فالشنطه.. وساره يالسه ع اللابتوب مالها تكتب اسايمنت تسليمه بيكون بعد ساعه .. وباذله كل جهدها عسب تخلصه .. ويوم حست انها طفرت منه ومارامت تخلصه شلت اللاب تبى تسير عند بنت كلاسها تساعدها فشي ماعرفتله ..


ساره: ميوه حطيلي ثيابي انا بعد
مي : ماروم ابا اخلص واسير اتسبح انا
ساره: يالله عنج يا ميوه انا اختج حرام عليج ساعديني
مي: ماشوفج تساعديني يوم اقولج ساره رتبي شنطتي ولا كوي ثيابي
ساره : نحسه
مي اطالعت ساره وطلعت لها لسانها ..

في هالوقت دخلت عليهن منى ربيعتهن وشافت كل وحده منهن لاهيه بشغله ..

منى: شو تسوون
ساره: انا بشل لابي وبسير عند بنت كلاسي عندنا تسليم اسايمنت
منى: اها.. وشحقه ميوه تزهبين شنطتج من الحين؟
مي: ما قلنالكم بننزل
منى: له ؟ متى؟؟
ساره: باجر عشان بالاربعا اسير اسوي تحاليل حق الملجه
منى: اهاا.. والله وكبرتي يا ساروه.. يعني خلاص اكيده الملجه
ساره وهي شاله اللاب وواقفه: هيي ياختي..كبرنا خلاص وبنملج
منى: ههههه ماتخيلها هاي عروس
ساره وهي ومسويه عمرها مستحيه وتتحيس وهي تمشي فالحجره ولاويه ع اللاب توب ..
مي: ياشين السرج ع البقر
ساره: جب انتي
منى: ههه وانتي ميوه شحقه بعد بتنزلين ؟
ساره: رزه ياختي
مي: من الله ماعندي دوام الاربعا شو ايلسني ..
منى: زين ياحيكن والله .. ياحليلج ياسويره والا بتملجين الاسبوع الياي ..
ساره: اسكتي ياختي كل ماتذكر اني ماخذت فستان ارتبك
منى: وانتي ثرج للحين ماخذتي؟
ساره: من الله ها الاسبوع محددين كل شي..
منى: ليش انزين ما قلتيلهم يتريون
ساره: ماعرف..كل شي استوى بسرعه
مي: يابوج الريال مشتط..
منى:هههه الله يعينه على ساروه عيل
ساره: يلا عاااد ..
منى:خخخ سيري سيري انتي بدال ها الوقفه .. ايدج بطيح من اللاب
ساره: هي والله نسيتني الاسايمنت يلا باي
منى: باي

طلعت ساره من الحجره وتمن منى ومي يسولفن عن الملجه واستعداداتهم
منى: وانتي ميوه شو بتلبسين.؟
مي: ماسوينا شي موول.. ها الخميس بتودينا اميه دبي وبنشوف
منى: وخواتج؟
مي: ريمان عندها فستان كانت مسوتنه حق زهابها ومالبسته بتلبسه ومهوه ومهروه امايه فصلت لهن اظني ..
منى: يعني الا انتن تامات..يلا ان شاء الله تحصلن.. يوم بتسيرين دقيلي بدليج على وحده تبيع فساتين روعه
مي: هي انا محطيه فبالي بشتري.. بشوف على عيني وما بكتظ..
منى: زين زين .. يلا ماخلصتي ترتيب
مي: امبلا برتب شنطة ها السباله بعد
منى: يلا بسرعه رتبي وخلصي بسير اسوي نسكافيه
مي : اوكي..
منى: وعقب بنسير جناح قوم ندوي ربيعتي
مي: لييش؟؟
منى: بنسوي زياره
مي: خلاص اوكي..من زمان ماشفتها يبالنا نسير نخترش وياها
منى:هي والله..يلا عيل خلصي
مي: انزيين

بعد ما خلصت مي ترتيب شنطة ساره .. سارت صوب كبتها شافت عمرها فالمنظره وعدلت شعرها .. طلعت عطرها وتعطرت .. وشلت تيلفونها وظهرت من الحجره..
لقت منى ويا بنات جناهم فالصاله يشربون النسكافيه .. شلت مي كوبها وقامت منى ..

منى: يلا خلصتي
مي: هي يلا

وسارن صوب مبنى ربيعة منى وكانن ملتهيات بالسوالف .. لين ما وصلن جناح ربعهم ..
يلسن فالحجره ويا ندى ربيعة منى..والسوالف ماتخلص.. شوي يا اتصال لمي ..اطالعت منى وهي متملله ..

منى: بلاج؟
مي: شوفي منو متصل
منى: فطووم.. انزين ردي عليها
مي: مابا
ندى: ليش شو السالفه..
منى: ماشي سالفه.. بنتنا مب راضيه ترابع فطوم
ندى: فطوم بنت باصكم؟؟
منى: هي ربيعتنا
ندى: ههههههه وليش عاد ميوه
مي: مب اني مابا ارابعها..بس ماعرف كيف اتعامل وياها
ندى: ليش يعني؟؟ تسويلج حركات شي؟
مي: هي ياحليلها بس اطرش مسجات وتتصل يوميا وكله تبا تعرف تفاصيل يومي كامل .. بس شو اللي يقهر اني لو قلتلها تعرفت على فلانه تتضيج .. ماعرف ليش
منى: ميوه البنت شكلها متعلقه فيييج
مي: انزين وانا شو اسوي؟
ندى: اووه عيل فطوم مغرم صبابه
مي: اي والله ها الرمسه ماتظهر من بينا.. انا ماحب ارمس عنها فشي مب اوكي.. بس والله خلاص مليت ..
ندى: شكلها تباج كلوووز
مي: بس لاه ويا ها المصطلحات البايخه
منى:هههههه ندوه لا تعصبيبها .. هاي من ينطرالها الكلوز تنقهر
ندى: ترا ها السايد فالجامعه الربيعه القوو وياج سموها كلوز..
مي: الله يعينا نحن ..

رد يرن موبايل مي مره ثانيه.. ها المره ربعها خلنها ترد على البنت..

فاطمه: يالله اتصل وماتردين؟!!
مي: سوري كنت ويا ربعي
فاطمه: منو ربعج
مي: ربعي وبس
فاطمه: اها.. انتي وين
مي باستغراب: اقولج عند ربعي!
فاطمه: انزين وين
مي: ليش يعني
فاطمه: ماشي ابا اتمشى وياج
مي: ليش انتي ويين؟
فاطمه: فسكنكم
مي: البوابه سكرت
فاطمه: تممت وييت .. عادي فيها شي؟
مي بيأس: ماعليه ببلغ عليج
فاطمه: بقولهم يايه عند مي
مي: يا النذله
فاطمه: هههه يلا تعاليلي
مي: بفكر
فاطمه: انا بدق لساروه اختج بشوفها وين
مي: خلاص اوكي
فاطمه: اترياج
مي: اوكي
فاطمه:باي

سكرت مي عن فاطمه وهي تضحك ..

منى: ها بلاها
مي: الحرمه هنه عندنا
منى: دومها مطيحه هنه ما ملت من الشقحات هاي
مي: شدراني بها
ندى: والله البنات متفيجات.. شو مكلفنها تشقح اليدار
مي: لا هي هنه قبل ما تسكر البوابه
منى:انزين الرده تراها بتشقح
مي: خبيل تراها.. بتسير عند ساروه الحين وتباني اسيرلها
منى: يلا جبري بخاطرها ويلسي وياها
مي: امرنا لله.. يلا خلينا نروح..
ندى: يلا يلا بنزل وياكم خلونا نستهبل تحت شوي..
مي: يبالنا والله ..يلااا


ونزلن الثلاث تحت .. ودقت مي لفاطمه تشوفها وين هيه وطلعت فحجرة قوم مي ويا ساره .. وسارولها فوق ويلسوا كلهم يميع يسولفون ..



************************
(الاربعا) 30 مارس 2005
************************

الساعه 10 الصبح كانت ساره ناشه من النوم تغسلت ونزلت تحت عند يدتها .. كان خالها مانع يايبنها من الجامعه بالأمس عشان اليوم تسير تسوي التحاليل اللازمه للملجه ..
نزلت تحت وهي شاله عباتها وشيلتها في ايدها وتتثاوب..
لقت يدتها يالسه في الصاله تتقهوي .. وتطالع التلفزيون ..

ساره: صباح الخير امايه
ام سيف: يا مرحبا وسهلا صباح النور بنت سيف اشحالج؟
ساره: حالي جسيف .. ابا ارقد امايه ماشبعت
ام سيف: معلوم فديتج مابتشبعن انتي واختج .. جنه مطرشينكن العين تسهرن وتن اهني ترقدن
ساره: الله كريم .. انا يوعانه
ام سيف: احين بضرب لنيموه تيب لج ريوق ..
ضغطت اليده ع الجهاز اللي عندها ويتها نجمه
نجمه: ها ماماه
ام سيف: نيموه هاتي ريوق حق ساره
نجمه: ساره ليش انتي مايسير جيب ريوق حق انتي بروحه .. احين انتي يستوي عروسه لازم معلوم شغل .. بس يغني يغني هذا مافي فايده
ساره: خيبه وشحقه مشتطه انتي .. برايه بغني شو عليج والا عشان صوتج هب غاوي تغارين .. وبعدين انا يوم بعرس بشتغل حق ريلي الحين انتي ايبيلي يالله
ام سيف: هيه لازم .. قالولها دقي لابوج قالت مابدق .. قالولها دقي لريلج قالت طاب الدقاق
ساره: هيهيهي .. منو هاي ؟
ام سيف: ها مثل مالت عليكم عيال هالايام ولا يعرفون شي
ساره: انزين نجمه يالله سيري بطلع انا
ام سيف: انتي مب سايره تسوين تحاليل ؟
ساره: هيه
ام سيف: تمي بصيامج احسن للتحليل لاتاكلين
ساره: ويه صح نسيت خلاص عيل مابا ريوق استانسي نجموه
نجمه: جين
ساره: جين بعد تقول ويا راسها .. صبري انزين اندوج هاي فلوس بيي راعي الدكان اييب بطاقة
نجمه: ساره انتي كم بطاقه يشتري داخل واحد شهر ؟
ساره: اخذ من جيبج انا ؟
نجمه: ماماه .. الحين هذا شهر ساره يشتري 17 بطاقة
ساره: والخيبه ..تعدهم بعد
ام سيف: هاييل مايشبعن من الهذربان في التلفون .. فلوسهن كلها على هالبطايق .. بتدود اذنيهن من الرمسه بهالتلفونات
ساره: نجموه صدق انج سوسه يالله سيري ناقصه انا من صباح الله خير
نجمه: والله مسخره
ساره: اطاع هاي شو تقول
ام سيف: هههه خلها عنج انتي طولي خلينا بنسمع البث المباشر
يلست ساره تطالع البرنامج مع يدتها.. لين مرت عليها امها .. وطلعت لها ساره .. سلمت عليها .. ويلست ..

ساره: هلا امايه اشحالج ؟
عليا: الحمدلله شخباركم انتوا ويدتج اشحالها؟
ساره: زينه يالسه تسمع بوراشد
عليا: ياحيها .. ومرت ابوج عيل وينها ؟ تداوم احين ؟
ساره: لا ماتداوم خلاص استقالت .. ماتروم ويا كرشتها
عليا: الله يتمم لها ع خير ..

وصلت عليا ويا بنتها لصندوق الزواج .. خذوا الورقه اللازمه للتحاليل واتجهوا للطب الوقائي .. واجرت ساره التحاليل اللازمه .. اللي بتستلم نتايجها السبت ..

****


الظهر بدريه كانت يالسه في غرفتها تعطر ثياب زوجها اللي بتحطهم له في شنطته .. الصبح كانت ملجته .. والظهر عزيمه الغدى بيت اهل العروس .. والعصر بيشل اغراضه وبيروح معاها ..
رجعت تذكرت يوم كانت تجهز شنطته عقب ماجهزت شنطتها عشان يرجعون البلاد بعد ماقضوا شهر العسل

بدريه : عندك شي احطه
تجدم عدنان منها وهو شال الفوطه: هاي بس
خذتها عنه وهي تبتسم له
عدنان: بدريه
بدريه: هلا
عدنان: استانستي ؟
بدريه : واييييييييد
عدنان: ان شاء الله دوم .. ترا شهر العسل ماخلص
بدريه اطالعته باستغراب
عدنان: لانه ايامنا كلها بتكون عسل ان شاء الله
بدريه وهي تبتسم بدلع: ان شاء الله

حست بحرقه في عيونها .. كانت سعيده وياه .. مرتاحين .. وين كان القصور ؟

كانت يالسه في غرفتها عقب ماروح ريلها الشغل .. وطبعا مابيرجع قبل 10 ايام ..
ملت ماعرفت شو تسوي.. فتحت الكمبيوتر وبدت تجلب في المنتديات ..
لقت موضوع في قسم الكمبيوتر والبرامج .. دروس عن الويندوز ..
حبت تجرب من بعد ماقرت عن فوايد هالدروس للكمبيوتر..
بدت تجرب في الدرس ولكن صارت عندها مشكله في الجهاز ..
وبما انها مب عضوه في المنتدى فما تقدر تستفسر ..
لقت ايميل العضو اللي طارح الدرس .. موجود في توقيعه ..
خذت الايميل وظافته عندها ع المسنجر عشان تساله بخصوص الدرس ..
وبما انه الشيطان ثالث الاثنين ..
تحول الوضع من درس في الكمبيوتر الى درس في الحياه مستحيل تنساه ..

يلست ع السرير وهي تفكر في اللي صار واللي قاعد يصير لها ..
ياربي ليش كل ها يصير معاي ..
انا اللي يبته لعمري .. انا اللي جنيت على نفسي
زوجي كان ومازال شخص يملك كل المواصفات اللي تتمناها البنت ..
لكن انا ليش ماشفت هاي الاشيا الا عقب مافات الفوت ..
شو اللي غطى على عيوني واغشاني عن زوجي وبيتي .. وقبل ها كله ..
شو اللي اغشاني عن ربي ..
انا طلعت مب كفو .. انا مب قد مسؤوليه الزواج .. ومب كفو اكون ام ..
تعوذت من ابليس ورجعت تتذكر انه اللي يصير امر مكتوب .. وانه الايمان بالقضاء والقدر من اركان الايمان .. وهي انسانه مؤمنه ..
الله يقدرها بس وتعوض اللي طاف ..

****

المغرب كان مروان يالس في غرفته ويا امه وعزه واحلام بنت عمه اللي كانت من العصر يالسه ويا عزه بنت عمها ..

احلام: مروان تراك خاديت بنا ارسالك على بر
مروان: انزين خلاص .. هالكندوره احلى صح
ميره : هيه كم مره اقولك ماتسمع
مروان: انزين صبروا شوفوا أي نعال احلى

سار مروان وشل كمن كرتون كان محطنهم فوق بعض عند الكبت ويابهم حذال امه واخته وفتحهم
عزه: الله واكبر .. هالنعل كلهن عشان تنقي منهن واحد .. شكلي باخذ عنك واحد حق فيصل
مروان: فكينا انتي وفيصلج ها .. ها امايه شو تشوفون أي واحد احلى
ميره: حشى حشى يامروان .. حتى العروس ماتسوي جيه .. اشوف ها احلى
مروان: انزين

سار صوب الكبت وطلع غتره وعقال .. ولبسهم .. وسار صوب امه ولبس النعال اللي نقته

احلام: بسم الله عموه ها ولدج هب صاحي
ميره: الله يتمم عليه نعمه العقل
مروان وقف عند المنظره يطالع عمره : والله طالع فنان
عزه : بس ماتدق عود
مروان: ها ها ها لاتتسخفين دخيلج
ميره: انا بقوم عنكم بسير عند عليا بشوف وياها الترتيبات ..
مروان: جان بغيتي شي ام مروان انا في الشوفه
ميره: استريح انته
طلعت ميره عنهم وتم مروان واقف بكشخته ..
عزه: مروانوه تعبت منك انا بسير
مروان: تمي عزوه شوفي انزين جيه اوكي والا اغير العقال .. ها بنت العم شو رايج فيني
احلام: ماعليك قصور بن عمي
عزه: اخاف من كثر ماجابلك ولدي يطلع يشبهك عقب صدق ماباه
مروان: ودج الا انتي ..
تقرب مروان من بطن عزه
مروان: ايه انته اسمع .. انا خالك مروان .. المعرس .. بترياك لين تي وعقب بعرس عشان تتصور ويايه .. بس بشرط .. لازم تشبهني مب تشبه امك العنزه
عزه ضربت مروان ع جتفه: ايه بتعقد الولد قوم مناك ويا راسك
مروان: متى بتربين ؟
عزه: اخر 9 او اول 10
مروان: زين احين قولولي جيه اوكي انا طالع ؟
احلام: والله العظيم اوكي
مروان: انزين صبري بسوي بروفه .. يوم ادخل شوفي كيف المشيه

رجع مروان وقف عند الباب وسوى عمره داخل وكان شاق الحلج

عزه: ايه ايه شو ها
مروان: شو
احلام: مطلع ضروسك كلهن شحقه ؟ تسوي دعايا معجون !
عزه: ثانيا لاتمشي بسرعه وايد عشان التصوير
مروان: انزين اوف مره ثانيه

رجع مره ثانيه مروان يجرب يمشي .. كانت مشيته هالمره احسن من اللي قبلها ..
عزه: بس جي زين .. خلني بسير عيزت منك
مروان: وين سايرين ؟
عزه: بسير بتصل بساره بشوف ويا ها الترتيبات .. انته متى بتي من العين ؟
مروان:انا ماخذ اجازه اسبوع
احلام: مرتب اموره هووو
مروان: سلمي عليها
عزه: هههههه الله يسلمك ..

طلعت عزه وبنت عمها وساروا تحت عند ميره لكن ماحصلوها .. خمنوا انها اكيد سارت بيت يدهم .. يلسوا في الصاله واتصلت عزه حق ساره بس ماردت عليها ..

عزه: ماترد ساروه
احلام: دقي ع رقم ميوه
عزه اتصلت ع رقم مي
احلام: عطيني انا برمسها
شلت السماعه احلام .. ويلست تتريا لين ردت عليها مي اللي كان عندها الصوت وايد حشره
مي: الوه
احلام: الوه هلا ميوه اشحالج؟
مي: الحمدلله انتي اشحالج ؟ عزوه اشحالها اشوفج متصله من رقمها
احلام: كلنا بخير .. انا يالسه بيت عمي راشد .. شو هالحشره اللي عندج؟
مي: هاي ساروه ويا هالاورج مالها .. صدعه من الخاطر
احلام: هيهيهي بلاها
مي: جنه محد بيعرس الا هي
احلام : ههههه عندنا وعندج الخير
مي: ليش شو عندكم انتوا بعد
احلام: مروان متخبل يلبس العقال والغتره ويسوي بروفات حق الملجه
مي: هههههههه الموضوع عندكم مستعصي .. نحن زين بس ساروه تدق وتغني
احلام: ههههههه
عزه: بلاكم ؟
احلام: يقولج ساروه طايحه تدق وتغني
عزه: ههههههههه لم المتعوس على خايب الرجا
احلام: انزين خلاص برايج بنخليج نحن برمسج خلاف
مي: اوكي ..
سكرت احلام وصدت لعزه : اسميها ساروه رابشتنهم .. قومي نسير بيتنا
عزه: يالله قومي ..

وسارت احلام وعزه بيت يدهم ..
اما مي ردت صدت لساره اختها اللي يالسه ع الاورج وتدقدق وكل شوي تشغل زغاريط .. ومي يالسه ع السرير ..

مي: قاصر عليج تنشين ترقصين
ساره: ماروم اعزف واغني وارقص في وقت واحد .. شو مولينكس قالولج
مي: احين اخترتي أي زفه بتنزلين عليها ؟
ساره: هيه اخترت
مي: انزين ساروه بدال هالدق اللي مامنه فايده انا بختار اغنيه
ساره استانست نادر اذا مي تساير ساره: اوكي
مي: اممم غنيلي أي شي ع ذوقج لعبدالمجيد
ساره: انزين بس بعزفها خخخ
مي: ماتوب.. يلا انزين اطربينا

ساره سكتت شوي وبدت تخبط ع الاورج..لين لقت النوت الصح وبدت تعزف .. وغنت..

" قلة لا تلاقينا امام الناس يسلم .. لايبين أي حد منا متألم .. لايخلينا حكاية .. كفاية . ماجرى منه كـفايــــــة "

مي: ياااسلاام يااسلااام ..
ساره: كح كح ..
مي:ليش تغنين حزين انتي عروس يا العنز هاتي شي اربش ..
ساره: خخخخ احب ها الستايل من الاغاني
مي: مشكله ..يلا نحن ففرح الحين لا تقاشرين علينا.. غني شي اربش
ساره: انزين .. سمعي هاي ..
الجامعه حلوه حلوه بس الريل ماله مثيل
لو احنا عنسنا العلم ماينفعنا حب الريل غالي والعيشه في جنه
مي: مالت عليج ساروه ..
ساره: ماعرفتلج .. تبين ربشه ولا حزين ..
مي: بس بس مابا شي ..

سكتت ساره وهي مبتسمه .. وتمت تعزف لحن " قلة" وهي تحاول تضبط كل نوت..

مي: ساروه
ساره: انا مركزه .. شوها تخربين عليه
مي: ويا ويهج .. انزين بسألج
ساره: شو
مي: تحبينه مروان ..؟
لفت ساره على مي .. رفعتلها حايب ..
مي: بلاج.. اسالج انا
ساره: ماقدر اقول هي ولا اقول لا
مي: ساروه الحين كيف موقفج يعني..كيف تحددين مشاعرج .. يلا قوولي
ساره: ليش بتكتبين خاطره عن مشاعريه خخخ
مي: سخيفه
ساره: شوفي ميوه يعني اللي في القلب في القلب الواحد مايروم يطلعه .. لكن انا اشوف محبة مروان لي .. ومروان من قبل كان يعنيلي لكن ماحبيت اهتم وايد لامره عشان ماعيش في اوهام .. واستوى الموضوع يعنيلي اكثر يوم احلام خبرتنا انه خالي حيرنا .. بس تقدرين تقولين حبيته من اصراره عليه وانه قد كلامه وسوى أي شي عشان اكون له .. وبعدين خلاص هو بيكون ريلي .. ان اليوم ماحبيته باجر بحبه
مي: له له .. في تقدم والله
ساره: مالت عليج انتي ..
مي: خلج خلج ويا معزوفاتج يا بتهوفن زمانج

مي ربتت ع جتف ساره ومطتها من شعرها وظهرت عنها ..
وساره .. كملت عزف .. وبدى قلبها يعزف وياها .. هل صدق اللي قالته لميوه!
هي بنفسها ماتعرف .. بس اللي تعرف انه اللي قالته مايعطي اللي في قلبها حقه



*************************
(الخميس) 31 مارس 2005
*************************

الساعه تسع فليل كانت ساره توها واصله من دبي من بعد يوم شاق في سبيل انها ادورلها فستان للملجه..كانت سايره وياها امها ومي اختها .. وبعد عناء طويل حصلت اللي دخل مزاجها عقب ماتعبت من كثر اللف وياهم..
وكذلك مي بعد خذت لها فستان بسيط للمجله.. وصلوا امهم للبيت وبعدين ردن بيتهم .. نزلن من السياره وهن تعبانات .. دخلن الفله وساره شاله في ايدها اجياس و مي وياها تساعدها ..

ساره: هلوووو
ام سيف: يااا مرحباا بالعرووس
ساره: مرحبا بج يا ام سيف (وصدت على ناعمه) ها الولود شحالج؟
ناعمه: ساره يايتني بحشرتج .. راده تعبانه ولج بارض؟
ساره: هههههه فديتني دومي لي بارض
ناعمه: خلاص انتي احين بتعرسين اعقلي
ساره: خليت العقل لج ..
مي: امايه ريمان مايت اليوم ؟
ام سيف: لا فديتج ما يتنا ..
مي: ممم..انزين انا بسير فوق
ساره: ليش شو تبينها ريمان؟
مي: اتصلت وعرفت انه خذنا لساروه بس انا ماحصلت وتمت تحاتي ..عاد مارمستها عشان اخبرها اني حصلت..
ام سيف: ماتبون عشا ؟
مي: لا تعشينا في الدرب ..
ام سيف: ساره خذتيلج اللي تبينه كله؟
ساره: هيه امايه خذت.. بروايج يوم بتكونين بروحج

وعيبت على ناعمه وطلعت ..اما مي فكانت يالسه حذال يدتها ..

ام سيف: هههه تسوي وياج سوالف
ناعمه: ادريبها هاي الخبله
مي: يالله امايه انا بعد بسير
ام سيف: سيروا ارتاحوا امايه ماروى عليكم من الصبح طالعين

كان البيت مافيه حد من اخوانهم .. كلهم ساروا يباتون عند امهم من الصبح ..
عقب ما خذتلها ساره دش ع السريع وصلت العشا اتصلت حق ريم اختها لكنها ما ردت عليها .. حطت فبالها انهم اكيد الحين بيت عمتها متيمعين رباعه وقت العشا.. فاتصلت حق اسما بنت عمتها

اسما: هلا والله بالعروس
ساره: احم احم اهلين اشحالج
اسما: هههههه بخير انتي اشحالج ؟
ساره: تمام الحمدلله..
أسما: ها بشري .. حصلتي شي
ساره: هيه نعم .. الاجسام الرشيقه كل شي ايوز لها
اسما: اجل اجل
ساره: انزين انتوا وين ؟
اسما: في البيت وانتي بيت امج ؟
ساره: لا بيتنا اهنه .. اقولج ريمان وينها عنكم ؟
اسما: اهنه يالسه
ساره: عيل بلاها ماترد عليه ؟
اسما صدت لريم: ريمان ساروه تتصلبج مارديتي عليها
ريم: تلفوني فوق مخلتنه
اسما: فوق تلفونها
ساره: انزين اقولج اسوم .. شو رايكم تون تشوفون الفستان.. باجر بنسير الجامعه ما بيواحيلنا ..
اسما: الحين ؟
ساره: من بعد البيت عاد .. تعالوا يلسوا عندنا ويفضل لو تباتون محد عندنا اهنه الا انا وميوه الباقين كلهم عند امايه
اسما: انزين بطالعهم احين وبردلج يالله باي
ساره: باي

صدت اسما للي كانوا يالسين حوالينها .. نايف وريم ولطيفه واسما وعمار وامهم اللي كانت نوره راقده ع ريولها ..

اسما: امايه نبى نسير بيت خالي
مريم وهي تطالع الساعه اللي في ايدها: احين؟
اسما: هيه امايه بعدها 9 ونص ونحن بنسير بيت خالي هب بيت حد غريب
لطيفه: شوعندج الحين اهناك ؟
اسما: ساروه يايبه فستان ملجتها وتبانا نشوفه ما بيواحيلنا باجر بنسير والاسبوع الياي الملجه ..
لطيفه: حصلت فستان؟ زين والله
اسما: تقول اصحاب الاجسام الرشيقه لازم بيحصلون
لطيفه: الهرمه شكلها الاتعيب عليه
اسما: هههه شدرانيبها ..
لطيفه: انزين امايه خلينا نسير
مريم: شو يوديكن
ريم: عادي عموه اخواني مب في البيت.. امره محد اهناك الا ساره ومي .. حتى عفاري قامت تسير وياهم ..
نايف يرمس ريم بصوت واطي : انتي تبين تسيرين تشوفين فستانها؟
ريم سكتت خافت تقوله هيه ويضايقه هالشي
نايف: ها شو؟
ريم اطالعته وشافته يبتسم الها..
ريم: عادي..كله واحد ..
نايف اطالع امه: امايه انا بوديهن ويا ريم و بمر عليهم فليل عقب مارد من ميلس ربيعي ..
مريم: برايكم يوم اخوكم بيوديكم
اسما: امايه نحن بنبات انا ولطوف
مريم: مصختنها عاد ..
لطيفه: امايه بنبات عادي مافي حد غريب اهناك ..
ريم: ماتشبعن من بعض في الجامعه بعد اهنه
لطيفه: في الجامعه وين يمديني اشوفهن وهن طول الوقت يهومن ويا البنات
اسما: هيه بدت عاد لطوف حركاتها ..
نايف: يالله انزين قومن البسن 10 دقايق ان ماييتن بودي ريم وانتن ولن ..

نشن لطيفه واسما وتجهزن وريم بعد سارت تلبست وساروا بيت سيف ..
عقب ماسلموا على يدتهم صعدوا فوق لكن من قبل مايدخلون جناح البنات كان يسمعون صوت الاغاني طار الدنيا

ريم: الله يعينج ياميوه

ضحكن البنات ع تعليق ريم .. دخلن داخل ماحصلن حد فالصاله وتوجهن غرفة مي وساره ..لقوا ساروه فاتحه اغاني ع الكمبيوتر وتشغل الزغاريط من الاورج
اما مي يالسه ترتب شنطتها للجامعه ..


اسما: هلوووووووووو
ساره: هلا والله مارديتوا عليه خبر تحريت مابتون

سلموا البنات على بعض ويلسن ع الأسره ريم وساره حذال بعض مجابلات لطيفه ومي واسما ع السرير الثاني ..

ريم: يالله ساروه راوينا شو اشتريتي
ساره: منو قال بروايكم ؟ مفاجأه شو ها
ريم اطالعت اسما
اسما: مايخصني هي قالت تعالوا بروايكم
لطيفه: يالله يالله قومي البسي تعالي راوينا
ساره سوت عمرها مستحيه وشلت الكيس اللي فيه فستانها وسارت تلبسه في غرفه التوم ..
ورجعت لهم وهي تمشي بدلع
لطيفه: اوه اوه شو هالزين
اسما: سندريلا سندريلا
ساره: شو رايكم في الفستان
ريم: وايد حلووو.. الذهبي عاطنه فخامه
لطيفه: هيه صح
ساره: انزين كيف اسوي التسريحه ؟
مي: كم مره قلت لج خليه نصه مرفوع ونصه مفتوح مب من طوله عشان ترفعينه كله ..
ريم: هيه صح احسن جيه نص ونص
ساره : انزين ريمان انتي حجزتيلي هاي اللي بتي ؟
ريم: هي قلت لها

في هالوقت دخلت ناعمه عليهم ..
ناعمه: الله وايد حلووو الفستان ساروه وين خذتيه
ساره: عيوني الحلوه .. خذته من محل ماعندهم مقاسات حق اللي نفس وزنج
ناعمه : عن الغلط انا حامل .. وبعدين ماكنت بسير اشتريلي لانه اعرف انه ماعندهم فساتين للحوامل .. الله يخسكن انتي وريمان ماعرستوا الا يوم انا بكرشتي ..
ريم: ههههههه شو نسويبج انزين .. بعدين على عرس ساروه بتكونين مربيه
مي: تحملي مب تردين تحملين عاد عقب ..
ناعمه: لا بسني شو بعد احمل
ساره: نعوم انتي شو يايبنج .. قلتلج ما براويج
ناعمه: جي ع كيفج هو .. غصبا عنج بشوف ..

تجدمت ناعمه من البنات ويلست بشوي شوي حذال ريم وهي حاطه ايدها ورا ظهرها وتتنفس بصعوبه ..
ريم: ناعمه تعالي اتساندي هنه .. بحطلج المخاد..
ناعمه: والله بتسوين فيني خير ..

يلست ناعمه مكان ريم وتساندت ع الشبريه ..
مي: يالله يا نعوم .. امره ما تقهر شي .. اييبلج ماي
ناعمه: هاتي جان شي هنه ..
مي: شي لا تحاتين .. ثلاجه الماي اللي فالصاله ما تقصر..

طلعت مي اتيب ماي لناعمه .. وساره كانت تحوط فالحجره وهي تتدرب ع المشي وتستعرض فستانها وهي مستانسه .. ريم كانت تتطالعها وهي مبتسمه .. تذكرت عمرها .. ماكانت وناستها كثر وناسة ساره الحين .. لكنها حمدت ربها ع النعمه اللي هيه فيها .. شوي يت مي وفايدها كوب ماي لناعمه .. ناولته ناعمه ويلست ع الطاولة اللي بين السراير ..

مي: بسج ساروه سيري بدلي ..
اسما: تضحك ساروه والله
لطيفه: خلنها حليلها مستانسه على عمرها
مي: ههههههه والله خبيل هاي ..
ساره: يلا عاد بسكن حش ..
ريم: جان الا بتعقل عقب الملجه وايد زين
مي: هي وتودر سوالف بنات الجامعه والمسابر
ساره: يلاا عاد .. الجامعه شي والملجه شي ثاني .. ليش الريل كل شي ثره
لطيفه: هههههه والله هاي ما تجنع ..
مي: هي منو عقب بيقردن فلانه وبيسابر علانه .. خلوها ملتهيه ..
اسما: ميوه نحن لازم ندربج ع المسابر .. بسج عاد لا تسابر ولا تفيس حد شوها
ريم: خربنها انتن يا الهرمات
لطيفه: ههههههه والله اسوم وساروه خرااب دار
ساره: ماعليكن .. ميوه بدى راسها يفتر شويه ..
مي: وين ما بيفتر وانتن مخبلاتبي .. الا تمشي ويا هاي .. وودري هاي ..

ناعمه كانت مندمجه وياهن وهن يسولفن عن امورهن فالجامعه .. تعيبها سوالف السكن كون انها كان فخاطرها تسير سكن وتعيش فلمة .. لكن ظهور سيف في حياتها ما سمحلها ..

ناعمه: ساروه انتي ما كلوزتي
ساره: ههههههه وانتي شدراج بها السوالف
ناعمه: هي اعرف عيل شو .. امبونهن ربعي يسمنهن شراشير شي جي
مي: ههههههههه مال اول انتو ..
ساره: والله كل حد ومفهومه .. بس محد بيعرف واقع بنات السكن الا اللي بيعيش وياهن ..
مي: هيه والله انا من ها الناحيه اشهد ..
ريم: بس ساروه .. انتي يعني الصراحه وايد تبالغين .. كل شهر متعرفتلنا ع وحده ومتعلقه فيها واهتمام وسالفه .. وعقب تودرينها ..
اسما: ههههههه استلموها ساروه.. لا هيه ما تودر .. بس ساروه تنوع بين الربع
ساره: نعم نعم .. أي اقري وذ يو ..
اسما: ههههههه مدافع عام ..
لطيفه: مب من شي .. الخوات نفس الطينه تراهن

وعلى ها الحال والسوالف قضن البنات يلستهن .. لين ما مر نايف على ريم الساعه وحده وروحوا .. وناعمه غلبها النعاس وسارت ترقد .. اما باقي البنات يسولفن ويضحكن على عبط ساره .. اللي من وصلها مسج سكتت .. رفعت تيلفونها تشوف المسج ..
قرت المسج كم مره ورجعت تتاكد من اللي مكتوب فيه ..

" ساره اسمحيلي بس انا احس اني وايد تسرعت بموضوع الملجه افضل لو ناجلها على الاقل 5 شهور.. انا اسف بس انا فكرت فيها زين الحين
واذا عندج أي شي راجعي الكلندر"

انصدمت ساره من المسج .. مافهمت اخر جمله .. سكرت المسج وفتحت التقويم مال التواريخ .. شافت التاريخ صار 1 ابريل .. فهمتها .. انقهرت .. قص عليها .. وسواها فيها ..

ردت عليه بمسج

" انا ماعندي مانع ابدا بس هالمره بدون ماتراجع الكلندر"

ثواني واتصل بها مروان .. شلت تلفونها وطلعت عنهم من الغرفه ..
اول ماشلته كان مروان يضحك عليها

مروان: الوه
ساره: مابا
مروان: هههههه شو ماتبين
ساره: مابا ارمسك
مروان: عيل ليش رديتي عليه ؟
ساره: تباني اسكر
مروان: لا لا عنبو تترياها ..
ساره: ليش تقص عليه
مروان: بغيت اسويلج مقلب بما انها جذبة ابريل..
ساره: ها ها هاي .. سخيف
مروان: خيبه .. الا نتي

ساره ضحكت على تعليقه .. توجهت لغرفة ريم اختها بما انها فاضيه عشان ترمس مروان ع راحتها ..بدت تاخذ وتعطي وياه اكثر عن قبل من بعد ماتحددت الملجه .. وبدت الحواجز شوي شوي تذوب من بينهم ..


*********************
(السبت) 2 ابريل 2005
*********************

نش فارس من نومه متأخر .. شاف الساعه لقاها 8 الا عشر .. بسرعه قام من فراشه وتغسل وتلبس .. وشل كتبه ساير الكليه .. اول ماوصل الكلاس .. كانت الساعه 8 وعشر .. دق الباب وفتحه عشان يدخل لكن الدكتور وقفه

الدكتور : faris ur late and there is a rule says no body enters after me .. so please
واشر له ع الباب ..
ماقدر يرد عليه .. ظهر من الباب وسكره وراه

فارس: الله يغربله ان شاء الله مادري بلاه ها عليه .. انزين احسبني متاخر شحقه تروغني .. مالي الا اسير اتريق شو اسوي بعد ..

سار مطعم الكليه وحطله ريوق من البوفيه ويلس .. قام واتصل بمروان اخوه يقزر شوية وقت وياه ..

مروان: الوه
فارس: هلا
مروان: بسم الله بلاك لايعه جبدك تقولها من ورا خاطرك
فارس: ياخي هالكليه لوعه جبد مذله والله
مروان: بلاهم ؟
فارس: تاخرت 10 دقايق وراغني دكتور الماث.. ماخلاني ادخل الكلاس
مروان: هههههههه وييييييو راغوه .. ضاعت شيم المريله
فارس: مروانوه مب متفيج لك
مروان: ههههه بلاك ياخي معصب نسوي وياك سوالف
فارس: بروحي منقهر .. عندنا كوز اليوم واحين بتضيع عليه درجته
مروان: هيه عاد انته المصري ماتروم تضيع درجه
فارس: اخبرك اجلب ويهك مب متفيج لك
مروان: بلاك معصب .. برايه هونها وتهون ..هاي الكليه اللي صحتها ما تبى غيرها تحمل اللي اييك..
فارس يتنهد: تراني متحمل .. شو بسوي .
مروان: عيل لا تشكى وضبط منبهك زين ..
فارس: مضبطنه ياخوك..الا اني غفلت ..
مروان: يلا ماعليه تعيش وتاكل غيرها..
فارس: وياويهك ..
مروان: هي حق ..اخبرك ترا الخميس ملجتيه مب تسويلك فيلم هندي وتقول عندي امتحانات ..
فارس: ادري امك حاشرتني لاتحاتي .. سرت فصلت بعد
مروان: ياحيك.. زين يالله عندي شغل احين انا بطير طياره
فارس: اتحمل عن تدق بها .. وراك عرس انته
مروان: انا عارف ماتفكرش .. دانا لسه مادخلتش دنيا
فارس: هههههههههههههههه والله انك رابش عمرك
مروان: هههه يالله فمان الله
فارس: فمان الكريم ..

سكر فارس وهو يحس انه غير شوي جو ويا اخوه .. كمل ريوقه وتم يلعب شوي بتيلفونه لين وصلت الساعه تسع الا ربع .. شل كتبه وقام يبى يلحق كلاسه اللي عقب مافيه يتاخر بعد .. وهو ماشي انتبه لربيعه مار وزقر عليه ..

مبارك: ههههههه ها فاارس .. راغوك عيل
فارس: يلعن بليسه الهرم .. فشلني جدام الشباب
مبارك: انتبه يا فارس.. مايرحم ها الدكتور
فارس: عثره تعثره .. بس غربلني تراه وايد
مبارك: هد هد .. خلنا نلحق ع الكلاس الثاني
فارس: يلا انزين ..

وتموا يمشون هم الاثنين ويسولفون ومبارك يخبر فارس عن الكوزاللي عطاهم اياه الدكتور كيف كان صعب .. وكل شوي ينكت على فارس يوم انه راغه الدكتور وفارس لابسنه ويسوي عمره ما يسمعه .. لين وصلوا الكلاس وحدروا ..

****

كانت ريم يالسه في شغلها .. اللي كانت تتدرب فيه هي وربيعتها سميه ..
كانوا يالسين يخلصون بعض من معاملات المراجعين .. لكن كل وحده مشغوله في صوب ..
يا واحد عند ريم وعطاها معامله تخلصها له .. ولكن كان باين على هالشخص انه متعود على ها المكان ومألوف له وايد ..

خالد: لو سمحتي اختي هالمعامله محتاجه ختم
ريم : ان شاء الله ..
كانت ريم تحاول ترد عليه بطيب ولكن دون تساهل .. خلصت له معاملته وختمتها له .. وعطتها اياه وهي تبتسم
ريم: اتفضل .. بس تحتاج توقيع من الاستاذ علي.. اخر كاونتر ..
خالد: انتي متدربه اهني ؟
ريم: عفوا
خالد: انتي متدربه
ريم: هيه نعم
خالد: انا اقول .. والا نادر ماتلقين موظفه اهنه تبتسم للمراجعين وتعاملهم زين .. لكن ان حبيتي تتواصلين معاي .. انا في قسم التخطيط الدور الاول .. اسمي خالد عبدالله ..

روح عنها وهي منصدمه من هالحركه .. ماعرفت شو تسوي .. خلت شغلها وسارت صوب ربيعتها سميه ..

ريم: سميه
سميه: ها شو بريك ؟
ريم: لا مب بريك .. واحد توه تحريته من المراجعين يقولي اونه اول مره اشوف موظفه تبتسم وماعرف شو .. وانا ان حبيتي تتواصلين ويايه في قسم التخطيط
سميه: هههههههه بعدنا اول اسبوع .. سووها فيج
ريم: تضحكين بعد ؟
سميه وخت على ايد ريم : تستاهلين ..
ريم: ليش
سميه: شحقه مب لابسه دبلتج ..
ريم: الايد تلفت بالخواتم وقلت مابلبسها
سميه: احفظي عمرج من حركاتهم هاييل ولبسي دبلتج احسن ..
ريم وهي مستاءه: بلبسها باجر .. الله يغربل بليسه والله خوفني
سميه: تبين نشكتي عليه ؟
ريم: من الله متدربات .. بيشوتونا برع .. خلينا ساكتين الله يعينا لين نهايه التدريب
سميه: امين .. يالله سيري عن يقولون يالسات يسولفن .. اشوفج في البريك
ريم: اوكي ..

روحت عنها ريم وهي بعدها خايفه .. وقررت اتم مبوزه ولا تبتسم لحد .. عشان مايظن فيها ظن سوء..يا فبالها ريلها .. لو درى عن ها الموقف السخيف اسميه بيشل الدنيا عليها .. من حقه .. حرمته ومايبى أي حد يتحرش فيها ..


****


طلع سيف من شركته وهو ماسك التلفون يتصل براشد .. عطاه علم انه الحين بيمر عليه .. ركب السياره وطلع من الباركن ماله .. كان فكره سرحان وهو يسوق .. ما انتبه للاشاره الحمرا من كثر ما هو يفكر وادارك الوضع ع اخر لحظه وضرب بريك..

سيف: عوذ بالله من الشيطان .. زين ما نفدت عمري ..

وستهدى بالرحمن وساق بهدوء لين وصل لشركة راشد للمقاولات.. نزل وقفل السياره .. دخل الشركه .. وهو صاعد شاف واحد يبتسم له من بعيد.. ميز الشخص وقرب منه ..

سيف: يا حيالله سلطان
سلطان: ربي يحييك .. وشحاالك بو مايد
سيف: الحمدلله بخير وسهاله. شحالك انته ابويه
سلطان: الحمدلله .. ها ماشاء الله مشرفنا اليوم
سيف: هي يابوك .. متوله ع راشد قلت بمر اسلم عليه
سلطان: ههههههه عاد لازم شغل النسبا بيبدى الحين ..
سيف: وها مروان سبقك .. يلا وراه انته
سلطان: هي امره ماعليك ... خلنا نلقى بنت الحلال وع طول خطبه وملجه وعرس
سيف: ههههههه مره وحده
سلطان: ههه شفت عاد .. لا لا انا بخطب الا .. مافيني خل اكمل دراستيه احسن .. عشان عقب ما تعلثلي والله ماباه ما عنده شهاده
سيف: شو لها فالشهاده يوم انها بتحصل واحد شراتك شاطر وفاهم وامشي شغله وشغلة خاله .. بس عليها لله يوم بتاخذك ..
سلطان: الخير والبركه فالأهل يا بو مايد .. لولا خالي ما وصلت لها المواصيل .. بس بعد الشهاده ضروريه ..
سيف ابتسم لسلطان وربت ع جتفه: بارك الله فيك ..
سلطان: طولت عليك بو مايد .. اكيد خالي يترياك
سيف: بسيرله الحين . يلا وليدي فمان الله
سلطان : الله يحفظك..

صعد سيف لمكتب راشد .. دخل ع راشد اللي كان يالس يترياه .. يلسوا ع الكراسي ع طرف يسولفون عن امورهم العائليه .. وعن امور الملجه .. وأمور العيال .. لين بدى سيف يرمس عن اللي فخاطره .. واللي شال منه التفكير خلال ها الأيام..

راشد: وليش يعني فكرت بها الشي!
سيف: ماعرف يا راشد .. ما هان عليه اشوف بنتي جي جازتني ..
راشد: يبته لعمرك تراك
سيف: والله يا راشد خلاص ماروم اتحمل عمري من اشوف ميوه .. ما طيع تيلس ويايه مول .. وماطيع تاخذ شي من عندي ..
راشد: بيني وبينك .. هاي اللي عرفت اتيب راسك .. لا عليا ولا ناعمه رامن امك الله رحمها ماتدري عنك وناعمه مب مسوتلك سالفه .. الا مي صدق انها بنتك وتخاف عليك ..
سيف: اخ يا راشد .. لاتجلب ع الجروح .. بس انا ناوي نيه .. وان شاء الله ما تراجع فيها .. خلاص بتعالج من ها السم .. بودره ..
راشد: عين العقل يا بومايد ..لو أدري انه مي جي بتأثر فيك جان من زمان خبرناها
سيف: يا راشد نظراتها عتاب ولوم .. مي من بد بناتي يبين على ويها ما تنافق حد ولا تجامل حد .. صح عرفت شخصياتهن متأخر وايد .. لكنها وااضحه فكل شي .. احس اني مجرم .. شتت عيالي ..

تم راشد يطالع سيف اللي كان موخي براسه ومسانده بادينه الثنتين اللي ع ركبه .. حال سيف ما يسر .. وراشد بيتم ربيعه المقرب لو شو ماصارت من خلافات ومشاكل ..

راشد: يا بو مايد حط الرحمن فصدرك.. أهم شي بتسوي ها الشي عن قناعه .. واذ بنتك عتبت عليك تراها ماتباك تعذب عقب فآخرتك .. انته تعرف انه الشرب حرام .. سويت لعمرك سوالف.. انا مابعاتبك زود .. خلاص .. بس يبالنا نرتب سفره وياك .. شهرين برع البلاد تتعالج ومحد بيدريبك .. بترد رقييص
سيف خوز ايده واطالع فويه راشد..
سيف: يعني بروم اودره
راشد: اللي الشرب فدمهم راموا يودرون .. كيف انته ..
سيف: ووين نسير؟
راشد: أي بلاد فاوروبا.. بنتملنا شهرين بالكثير .. وان شاء الله تيسر أمورك..
سيف: خلااص .. شورك وهداية الله ..
راشد: افا عليك يا بومايد.. انا من عقب ما عيزت من النصايح. ترييت ها اليوم اللي انته بنفسك بتيني فيه وبتقول انك خلاص تعبت .. الحمدلله لك يارب ..

سيف ابتسم لراشد .. ما قدر انه يتم فيلسته هاي .. يحس خنقته غلبته .. تشكر راشد وترخص منه لانه يبى يسير البيت يرتاح ..
طلع سيف من مكتب راشد .. أما راشد تم سرحان فها اليلسه اللي كانت والرمسه اللي دارت امبينهم .. يحس برااحه كبيره تسري فخاطره .. وأخيرا .. ربيعه قرر انه يودر سواياه.. صح يت متأخره واايد.. لكن أحسن من لا شيء..


*********************
(الاثنين) 4 ابريل 2005
*********************

الساعه 10 ونص الصبح نزلت ناعمه من جناحها لقت ام سيف فارشه سماط عليه غراش عطور ويالسه تخلط للملجه .. يلست حذالها ناعمه من بعد ماصبحت عليها وحبتها فوق راسها ..
ناعمه: ماشالله عمووه تخلطين ..
ام سيف: هيه اسوي مخمريه واخلط عطور حق الملجه بنعطر العرب بهم
ناعمه: اسمييج..انزين بتتعبين من ها اليلسه
ام سيف: يالله شو يتعبني ضاريه اسويلكم ها العطور انا ..
ناعمه: من وين تاخذينهن العطور انتي؟؟
ام سيف: فديتج انا اطلب العطور من بومباي تيبهن لي ام خالد يوم تسير وايلس اخلط..
ناعمه: يحيج..عيل بيلس اسوي وياج بنتعلم منج..
ام سيف: زين حياج .. الا انتي ليش ناشه من وقت؟؟
ناعمه: مادري عموه قابظتني حموضه
ام سيف: عيل صبري بزقر نجموه تفور لج سنوت .. امره بتفتكين منه
ضربت ام سيف الجرس لنجمه وطلبت منها تسوي سنوت و ريوق حق ناعمه ..
ناعمه: عموه هذا شو ؟
ام سيف: هذا عرق الزعفران ..
ناعمه: حق شو تحطينه ؟
ام سيف: ها للمخمرية
ناعمه:وشو تحطون بعد فيها
ام سيف: عرق الحنا وموتيا وزعفران ودهن عود ومسك .. قال المتوصف : ياللي طلع من بيته زاير بيت اليران .. نروح ريحه ينوبه مسك وزعفران
ناعمه: صح لسانج
ام سيف:صح بدنج..
ناعمه: مايابت السنوت ها النجمه..وراسه سيره
ام سيف: ليش ويين بسيرين؟
ناعمه: الساعه 12 بسير مدرسه عفاري بتخبر عنها
ام سيف: هي زين زين .. ها هاذي نجمه بنت حلال ..
نجمه: ها ماما شو يقول عن انا
ناعمه : انقول تأخرت نجمووه
ام سيف: حطي الاكل مني وتعالي شلي ها العطور الي مخلصينهن فكبتي عن يعفدون عليها جسوم وميود ..
نجمه: انشالله ماماه ..
في هالوقت رن تلفون البيت
ام سيف: شليه ناعمه ماروم اهبشه انا اديه وصخه
ناعمه شلت التلفون: الوووه ؟
ساره: منو مطلع المارد؟
ناعمه: مارد في عينج
ساره: خخخ نعوم شو موعنج من الصبح
ناعمه: انش انا كل يوم
ساره: لا ويالسه تحت بعد .. شو هالمعجزه
ناعمه: شو تبين انتي متصله تهازبين؟
ساره: لا متصله ارمس امايه ظاريه ادقلها احين
ناعمه: عموه يالسه تسوي عطور وايدها وصخه
ساره: عطور؟ حق شو ؟
ناعمه: تسوي مخلطات ومخمريه حق ملجتج
ساره: هيهي جان استحي
ناعمه: عدال
ساره: زين والله حاسين انه في شي بيستوي .. انا اهنه في العين ولا جني بملج مب حاسه بشي شعوري شعور أي مواطن صالح في هذا المجتمع
ناعمه: من استويتي .. الا متى بتين ؟
ساره: ان شاء الله باجر مايندرى عاد احصل حد ايني والا
ناعمه: اها زين
ساره: اخبرج ام خالد يايه ؟
ناعمه: لا مايت لين احين
ساره: عساها ماتي
ناعمه: هههه لو يت سلمي ع العطور
ساره: خخخخ انا اقول جيه بعد . سكتي عن تسمعج امايه .. برايها سلمي عليها بتصل بها خلاف انا
ناعمه: اوكي الله يسلمج .. مع السلامه
ساره: باي

ناعمه: سكرت وتسلم عليج تقول بتتصلبج خلاف
ام سيف: الله يسلمها .. تتصل دومها هالوقت وهي سايره كليتها .. اسمعي اميه هاي الثلاث غراش صبيهن في هالغرشه العوده انزين ؟ انا بسير اصلي الظحى
ناعمه: ان شاء الله

سارت ام سيف ويلست ناعمه تخلط العطور اللي قالت لها عنهن ام سيف وهي كل شوي تشم ريحه العطر قبل ماتخلطه وعقب الخلط ومستمتعه بالشغله ..

***

الظهر عقب مارجع سلطان من شغله يلس في غرفته مب ياينه رقاد .. قرر يفتح كمبيوتره يشوف اخر البرامج اللي نازله .. وتلقائيا انفتح المسنجر اول ما انفتح الكمبيوتر لكنه طنشه .. وفتحله موقع وتم يتصفحه .. وشويه ..
انتبه لمحادثه وصلته من حد .. وفتحها ..
حاول يتذكر الايميل .. لكن مايحتاي .. الموضوع معروف من عنوانه .. الايميل ايميل بنت..

البنت " هلا والله ! عاش من شافك "
سلطان أتأمل الرسالة وبشعور لا إرادي رد عليها " اهلين عاشت ايامج"
البنت " اشحالك؟"
انتبه سلطان لنفسه .. ليش يالس يرد عليها مايبى يسمح لعمره انه يفتح مجال مره ثانيه لها الامور .. الحمدلله انه قدر يرد عمره عن اللي كان يسويه .. تعوذ من بليس وسوى حق الايميل بلوك .. وراجع الايميلات الموجوده وخذى منها ايميلات ربعه وظافهم في ايميل يديد.. مايبى يفتح هذا الايميل مره ثانيه خلاص .. بسبة ها الشي خطا اول خطواته الخطأ وبسبة ها الشي حكم على وحده انها تعيش حياة بدون ما تتهنى بشوف ضنى الها .. اتذكر ها المأساه اللي صارت وغيرتله مجريات حياته .. خفقان قلبه ازداد وماقدر يتحمل ها الشعور وقام من مكانه .. يبى يغير الوضعيه اللي هو فيها ..
في هالوقت ياه اتصال من مروان طلعه من المحاكمه اللي هو فيها ويا نفسه ..

مروان: الوووه
سلطان: هلا مروان
مروان: اشحالك؟
سلطان: الحمدلله شو اخبارك انته
مروان: والله تمام .. وينك انته ؟
سلطان: في البيت
مروان: بترقد شي؟
سلطان: لا ماظنتي ارقد آمر
مروان: مايامر عليك عدو لكن بغيت حد يسير اييب ويايه دبش من السوق بنوديهم العزبه لين الملجه
سلطان: شحقه من احين ؟
مروان: امايه تقول اونه احسن عشان يسمنن
سلطان: ههههه هالحريم عليهن افكار
مروان: شو نسويبهم بعد .. ها بتي ويايه ؟
سلطان: هيه بيي .. بتخطف انته عليه ؟ والا اييك في موتري ؟
مروان: لا انا بمر عليك بالبيكب
سلطان: يا حافظ البكيب بعد
مروان: عيل شو تتحرى .. يالله ياينك اتزهب
سلطان: يالله فمان الله

سكر سلطان وهو يظحك على مروان.. الحمدلله علاقته فيه تحسنت اكثر عن قبل .. يلس يفكر شوي .. متى هو بعد بيحصل بنت الحلال وبيرتبش بملجته ويربشهم وياه..
دقايق كان يفكر فيها سلطان قطعها عليه هرن البيكب .. وقام نزل حق ولد خاله..


***

فليل فجناح ساره ومي كانوا الكل متيمعين فالصاله ورابشين الدنيا بسبب قرب ملجة ساره.. كل شوي ينزلون اغنيه ويسمعونها ساره اذ تباها ولا لا عسب يسوون سي دي للملجه.. وساره قابضه لابتوبها اتدور لها اغنيه اوكي حق الزفه .. وحذالها يالسه منى تسولف وياها ..
منى: فخاطري ايي ملجتج
ساره: يالله يا منوه ازن عليج من متى .. يلا عاد تعالي
منى: ساروه درب من الشارجه لراس الخيمه وفليل
ساره: يالله الا هو يوم
منى: بشوف ان شاءالله .. بحاول ويا اميه انها اتي ويايه
ساره: يلا ان شاءالله خير..
منى: انتي شرايج اتيبين فيديو الملجه هنه
ساره: ليش بصور بالفيديو انا؟؟
منى: هي طلبوا منها تصوير فيديو وع طول خذوا عنها الفلم من تخلص
ساره: مادري والله بشوف
منى: اذ أكيد بتصورون خبريني عسب اهرب ويايه فيديو المره اليايه ونيلس جي يمعه نتابع خخ
ساره: ههههه ليش فيلم ..
منى: الا مب فيلم
ساره: خلاص بشوف ان شاء الله .. بس اخاف من المدامات
منى: ماعليج انا بييب الفيديو وبندسه .. محد بيعرف انه يايبين
ساره: زين .. اقولج منوه سمعي هاي حلوه حق الزفه ولا
منى: حطي سماعات يبوج ما اسمع من صدعة ها البنات
ساره: ها اندوج ..

وفالصوب الثاني كانت مي واسما بنت عمتها يالسات يخزنن الاغاني اللي نزلنها من النت ويجمعنها كلها في سي دي ..

اسما: ميوه سيري سويلي نودلز والله اني يعت من متى اقولكم ابا اكل
مي: اسووم خلنا نخلص مره وحده وبنسير نعابل فالمطبخ
اسما: لااا ماروم خلاص خلص البتري..
مي: انزين قومي ويايه يلا ..
اسما: اف منج .. ما يسوا علينا ها النودلز اللي تسوينه النا ..
مي: ها ارمسي ارمسي..
اسما: ذليتينا .. ندري انج احسن وحده تسوي نودلز
مي: هي جي واااايد اووكي
اسما: يلا انزين ..
وطن اللاب توب وتوجهن المطبخ .. وطلعت مي المقادير اللي تحطها فالنودلز وأسما وياها تساعدها .. غسلن الجدر وحطن فيه ماي وبطلن اكياس النودلز .. وفورنه .. وصبن عليه شوية حليب .. طلعت مي الذره والجبن والداقوس والبهارات عسب تخلطها ويا النودلز بعد ما يستوي .. واسما كل شوي تشوف وتسرط ريجها من اليوع.. وبعد ماخلصن وزعنه فصحون وشلنه الصاله ..

والتمن البنات ع الاكل .. اول ما بطلت اسما حلجها ياها اتصال.. وطت الخاشوقه وردت ع التيلفون .. وبين على ويها التوتر .. وسكرت على طول ..

مي: بلاااج؟؟
اسما: قوومي ويايه بسرعه
مي: ويين؟؟
اسما: الله يغربلهم ما هنوني فالاكل
منى: شو السالفه اسوم
اسما: مدامتنا الكلبه اتدور عليه
منى: لييش مب متممه؟؟
اسما: امبلا.. بس شكلها شاكه اني شاقحه عندكم ..
ساره: الله يقفعهن من مدامات .. يحسن .
مي: لازم بيحسن وهي كل يوم والثاني ناطه من الييدار ويايه عندنا
ساره: انتي منو خبرج؟
اسما: توها لطوف داقتلي تخبرني.. وطرشت فطوم عسب تيلس شويه ويا المدام وتلهيها
ساره: زين سوت .. كلي وبنسير نشقحج
اسما: والله اني ميته من اليوع وفخاطري ها النودلز
مي: بحطه لج فكوب وبغطيه يلا قومي خلينا نسير عن يبهدلونج ..

وطلعن ساره واسما ومي ومنى من الصاله .. وتوجهن للبوابه الصغيره اللي تفصل بين المقامين .. تأكدن من خلو المكان من المدامات وبسرعه شقحوا أسما لمقامهم.. وتمن يرمسنها ورا الييدار..

مي: ها وصلتي بالسلامه
أسما: هي.. يلا حطن الكوب فوق الييدار .. ما بسير بدووونه
مي: اوكي ..

وخذت اسما النودلز وتمت تاكله فالدرب وهي على اعصاب بارده وتوجهت لحجرة المدام تشوف شو تبى منها ..

وحياكم..

يسلموووووووووووووووووووووووووووووووووووووووو واخير نزلتووو

مشكوووووووووووووووووووورين

السلام عليكم...

بصراحه.. هالقصه ما بديت اقراها الا من كمن اسبوع ! وكنت جداااااااً مستمتعه.. طبعاً لانه الاجزاء موجوده و كنت اقرا في اليوم 2-3 اجزاء.. يعني السالفه ع راحتي وما اتحرقص مثل الردووود اللي أشوفها..!

بس مسسسسسسسسسرع ما خلصت الاجزاء.. و شكلي بوقف ويا الجماعه في الدور.. اتريا الجزء الياي..! لانه صدق القصه ممتعه.. و سبحان الله الواحد يحس جنه الاحداث تستوي جدامه.. و ماشاء الله هذا بفضل ربي سبحانه و من ثم ابداعكم يا المزيووونه و عاشقة الشمال..

احم

هالله هالله بميوووه.. حبيبة الشعب :fa42:

وجداً استمتعت بمواقف مروان.. عجيب هالانسان .. :k_blush-anim-cl:

..

يلا.. ربي يسهل عليكم و اتحطونا الاجزاء اليديده.. جريب :)

السلام عليكم

أحلى المزايين المجكنمين ....المزيونه:a074:

ما زلنا بانتظارك لتكملي لنا القصه التي أسرتنا بشخصياتها .... كلهم كلهم حبيناهم حتى سلطون:argue:

بانتظارك فلا تطيلي الغياب:3:

.
.
.


عاشقة اليولات

الله يسلمج فديتج ..

.
.
.

شوق القلوب

وعليكم السلام والرحمه ..

استانست بتواجدج في قصتي المتواضعه ..
ماعليج انا ماكنت احرقصهم قبل .. طيوبه فديتني كل يومين ثلاث بارت يديد ..

وتسلمين على ها الشهاده فحقنا .. القصه متعوب فيها والحمدلله انها ظهرت بمستوى
طيب ..

اقتباس:

---

هالله هالله بميوووه.. حبيبة الشعب

---

:)


.
.
.


حلم الطفولة

وعليكم السلام ..

افتقدت تواجدج فالفتره الاخيره .. ولكن رجعتي :yes: ..


.
.
.

أعزائي القراء..

ظروف صعبه مرت علينا خلال ها الفتره الي طولنا فيها في تنزيل الأجزاء ..
أولها كانت وفاة يدي رحمة الله عليه ..

. . . وتوالت الأيام .. وصار الي مب فالبال ..

وفاة والد الغاليه عاشقة الشمال ..

صعب جدا اني اخبركم بها الخبر .. لكن هذا قضاء الله وقدره واتمنى من كل شخص قرء قصتنا ودش موضوعنا انه يدعي لوالد عاشقة الشمال بالرحمه ويسكنه فسيح جناته ان شاء الله ..

ممكن يكون آخر تواجد إلى إشعار آخر ..

مع السلامه ..

عظم الله أجركم وربي يصبركم ع ,,


الله يرحم الفقيد ويتغمده بواسع رحمته

اللهم اغـفـر لـِـه وارحـمه,وعـافـه واعف عـنـه,وأكـرم نزلـه,و وسِّع مُـدخَله,واغـسله بالماء والثـلج والبـرد,ونـقه من الخـطايا كما تـنـقي الثـوب الأبـيـض من الدنـس,وأبـدله داراً خـيراً من داره,و أهـلاً خـيراً من أهـلـه,و زوجاً خـيراً من زوجـه,و أَدخـله الجنة وأعـذه مـن عـذاب الـقـبر وعـذاب الـنار

امين يارب العالمين.. يزاج الله خير

اللهم اغـفـر لـِـه وارحـمه,وعـافـه واعف عـنـه,وأكـرم نزلـه,و وسِّع مُـدخَله,واغـسله بالماء والثـلج والبـرد,ونـقه من الخـطايا كما تـنـقي الثـوب الأبـيـض من الدنـس,وأبـدله داراً خـيراً من داره,و أهـلاً خـيراً من أهـلـه,و زوجاً خـيراً من زوجـه,و أَدخـله الجنة وأعـذه مـن عـذاب الـقـبر وعـذاب الـنار

عظم الله اجرج اختي عاشقة الشمال

اللهم ارحمه وتجاوز عنه

الله يرحمهم ويغفر لهم يااااااااارب

ويرحم كل موتانا وموتى المسلمين .. ويجمعنا وياهم فالجنـــــه

اللهم اغفر له وارحمه وعافيه واعفو عنه واكرم نزله ووسع مدخله
عظم الله أجرج وكلنا لها
وجعله ربي آخر الأحزان,,ربي يصبرج يا الغاليه

اليوم واصلة الجزء الثامن
بصراحه اول مره افكر اقرا قصة نت كامله
من عقب ما ودر الكتابه بطلت اقرا بعد
يالله الحين بردة قرايتي برد اكتب بعد
لين الحين متشوقه للوصول للحبكه
و ان شاء الله برد و بكتب تعليقي ع الاجزاء في وقت ثاني

يالله يالله
في الجزء الثاني عشر مي جنها انا
احس نتشابه انا و هاي البنت
القصه وايد طويله و يبالها وقت لين ما اخلصها
كل يوم اقرا جزئين و يالله يالله الحق
ما اعر ف متى بوصل لجزء 25 بس ان شاء الله خير

فنجان قهوه
شكلي سأقرأ الأجزااء "مااحب اللغه العاميه لكلمه reading"والله اشتقنا للشخصيات ولأم سيف ونعووم و مي وساروه والتوااائم و ريم والكل
حتى حلامي

يا الله اختيه استمتعي بالأجزاء
ونحن هنا ننتظر

ربي يوفقكم ياارب"فتره امتحانات صح؟!"

هزومه عزيزتي .... شكلنا بننتظر وااااااااااااااااااايد يا أحلى الهزايم المجكنمين

المزيونه وعاشقة الشمال ....ربي يوفقكم وتكملونا القصه

شكلنا إلا جذى
معليه
إن الله مع الصااابرين,,واكيد بيكون نصيبنا شي الزين
يا أحلى مجكنمه<<<لوول انا قلت اقولها مجكلمه هيهيهي العتب على النظر كبرنا وعيزنا

قرائنا الحلويـــن

عدنا لكم والعود أحمد .. وان شاء الله نكمل ما بدأناه هنا في هذه الصفحات ..
ذهب الكثير وما بقي الا القليل ...

نتمنى لكم قراءة ممتعه ..
:fa35:

الجزء السـادس والعشــرون

***********************
(الخميس) 7 ابريل 2005
***********************

كان واقف عند باب الميلس الداخلي وهو ماسك ايدها .. اطالعها وابتسم بكل عذوبه .. وخت براسها وهي خجلانه من قربه الزايد منها .. تجدمها ويلسوا حذال بعض على وحده من الغنفات..

مروان: ليش مايلستي فالميلس انتي؟
ساره: ماعرف.. ريم كانت هنه فملجتها قلت خل اغير .. ونكون فالصاله ..
مروان: هيه ..

كان ماسك ايدها ومب راضي يهدها .. هي تحاول تملص منه بس ما تقدر .. خدودها تمن موردات زود ماهن محمرات من البلاشر ..

ساره: بقوم اخليهم ايبون لك عشا
مروان: لا لاتقومين ولا تعنين.. مابا شي انا .. يكفي الكيكه اللي طعمتيني منها هههه
ساره: يالله عاد الحين كلت ثرك..

مروان مانزل عيونه منها ..اما هي كل ما تتجرأ ترفع راسها تطيح عينها بعينه وترجع تنزل نظرها ...

مروان: ماشاء الله عليج يا ساره.. محلوه وايد .. الفستان رهيب
ساره ابتسمتله: عيونك الاحلى
مروان: اسميهن الحريم مزرن الصاله .. زحمه واايد .. تلومت احدر اول شي الا امايه وعمتيه تمن واقفات ع راسي
ساره : وكان عادي عندك ما دش؟
مروان: لاا .. بس تلومت .. وايد حريم
ساره: هههه لازم معازيم من الصوبين .. اهل ابويه واليران واهل اميه
مروان: محد مستانس اليوم كثر عمتيه عليا.. مستويه ام العروس والمعرس
ساره: فديتها اميه .. تراها مربتنكم بعد ..
مروان: الله يخليها لنا ان شاء الله وتربي عيالنا بعد ..

نزلت ساره راسها وهي تبتسم.. أما مروان .. قرب منها أكثر .. ضغط على ايدها
رجفت ساره وهي بها الوضع .. ابتسم مروان وهد ايدها ..
بعد شوي .. دخلت نجمه الميلس بعد ما دقت الباب وهي يايبه ويا البشكاره الثانيه العشى .. حطولهم اياه ع الطاوله وروحن ..
يلسوا مروان وساره .. يحاولون انهم يتعشون ..
مروان كان ملطف الجو واايد لساره .. كل شوي يعلق ويضحك .. وهي تضحك وياه..

أما برع فالصاله .. كانت مي يالسه حذال يدتها وهي رافعه ريولها ع الطاوله اللي جدامها وتتذمر ..

ام سيف: قومي تودني بماي حار
مي: يالله يا امااايه بموووت .. شو ملبسني كعب عالي انا اليوم .. تسلطت عليه نعوم الا ألبس ها الكعب الطويل..
أم سيف: ماياااج خير .. والا حد يسمع رمسة نعوم
مي: واااي وااي ماروم احس ريولي متورمه ..
ام سيف: يالله تستر عليينا.. بعدج شباب
مي: ههههه شو تم انا فيني صاحي..مالت عليه
ام سيف: اغصان الجنه ان شاء الله ..
مي: وين طسن كل خواتي
ام سيف: مها ومهره اسمعهن من روحوا الناس يقولون بيسيرن يرقدن ما ارتاحن من يومين.. وريم قبل ماتين بشويه ياينها نايف وروحت بيتها
مي: هيه .. والاولاد
ام سيف: مايندرابهم وين .. قومي طالعيهم .. اخافهم الا بربشتهم هاي يتمون خاري طول الليل
مي: فديت جسوم ماصدق خفن الحريم يا ايوول فالصاله .. مرتبش
ام سيف: هههههه ما علم ميود اليوله
مي: هذا شدراه باليوله هب مخلفه عليه..
ام سيف: هههههههه الا حق جسوم عيل هيه
مي: هييه .. نصه بدوي خله يعبر عن مشاعره باليوله
ام سيف: وابويه عليج انا ..
مي: وها مروان متى بيروح .. بسه نبا اختنا نحن بنسولف وياها شويه
ام سيف: يالله اسميج حاشره البقعه .. خليهم حليلهم بعدها الساعه 12 ما يت
مي: هي محد بيخربها غيرج .. بيظرى عقب تراه
ام سيف: برايهم .. ريال وحرمته ..شو تبين فيهم
مي: لاا حووول محد يعاييها العيوز.. خلاص انا ابا املج بعد .. غرت من خواتي
ام سيف ضحكت على رمسة مي.. وضربتها ع جتفها ..
مي: عورتيييني اماايه
ام سيف: عيل حد يرمس بها الرمسه .. يوم بيي نصيبج محد بيرده ..
مي: بل .. خلاص خلاص انا مابا اعرس ..
ام سيف: لله بتعرسين .. بيت الريل استر للبنت
مي: بتم عندج انا
ام سيف: انا ما بدوملكن .. اخر العمر خلاص
مي اطالعت يدتها وقربت منها .. حطت راسها ع ريول يدتها وتمت ماسكه ايديها ..
مي: بسم الله عليج ياامايه.. هب تبين ها الطاري .. بعد عمر طويل ان شاء الله
ام سيف ابتسمت لمي .. وتمت تمسح ع راسها ..

شوي حسوا بحد يدخل الصاله .. كانت ساره واقفه وهيه تشوفهم ..

ام سيف: ها امايه روح مروان
ساره: هي توه ظهر
مي: ماطولتوا عيل
ساره: مايبا يثجل بعد هو ..
مي: حليله مروان .. يلا تعالي خبرينا شو صار
ساره: متفيجه .. انا بموت من التعب .. بسير فوق
ام سيف: يلا قومن انزين سيرن .. انا بعد بدخل اتسنن واوطي راسي .. من اصبحنا مرتبشين ..
ساره: وهي انتن يالسات هنه رقيب وعتيد .. خخخ ما بنسوي شي نحن
مي: ههههههه مالت عليج انا اقول.. يلا قومي نسير فوق
ام سيف: يالله حتى وهيه عروس تتطنز ها البنت ..
ساره: فديتج يا امايه.. خلاص دوخت انا بقوم اسير
مي: يلا عيل امايه تصبحين ع خير .. انا بعد بقوم

طلعن مي وساره من الصاله وسارن فوق .. دخلت ساره تتسبح .. اما مي يلست تمسح المكياج .. سمعت دق ع الباب ..

مي: منوو

ع طول دخل جاسم ..

جاسم: وينها العروووس.. ما يكون شلها مروان
مي: هههه خبيل انته .. داخل تتسبح
جاسم: اوهو وقته .. انا ياينها بيوللها شوي قبل ما ترقد
مي: متفيج ياا ها النااس .. يول باجر .. يلا سير نحن بنرقد تعبانين
جاسم: جب جب ما يخصني هي بروحها مساعه قالتلي بنرتبش فليل
مي: الله ياخذ بليسكم..والله تسويها ساروه ام الربشه ..
جاسم: انا فالصاله بعلم ميود اليوله .. يوم بتظهر قوليلها اتينا
مي: ان شاء الله عمي ..شي ثاني
جاسم: هيه بعد عفاري بتنعش
مي: غربلا بليسكم حتى هاااي خرشتوها
جاسم: والتوم الحين بسير اوعيهن .. بنسوي عرس ثاني الحين
مي: مب قاصر الا تعفدون ع نعوم وتسحبونها هي وكرشتها
جاسم: هي هي بقول حق ميود يقول لامه
مي: جسووم اذلف اقولك عن ويهي .. صدق متفيج تراك.. ورانا درب نحن باجر.. مابا حشره .. برقد اناا
جاسم: تولمي ..
مي: جاااسم
جاسم: سوو طاااف

وظهر جاسم من الحجره وماعطا مي سالفه .. اما ميوه غصبا عنها ضحكت.. وكملت مسح مكياجها .. تريت ساره لين تظهر وعقب دخلت مي تتسبح .. اما ساره فطلعت عند اخوانها اللي كانوا محتشرين فالصاله ..
يوم شافوها يايه صوبهم تموا يصفرون ويصرخون ..

مايد: اف لييش بدلتي ..
ساره: بس تعبت
جاسم: يلا انزين تعالي يلسي .. نحن مسوين حقج فرقه.. يويله ونعاشات
مها: ههههههه ساروه وعونا من رقادنا عشان نفتر بروسنا وننعش
ساره: خلكن ..جي كم مره بملج انا يلا

شغل جاسم الستيريو اللي كان مظهرنه من حجرة ساره وحطلهم اغنيه حلوه.. وبدوا ايولون هو ومايد وعفرا تنعش .. مها اخترشت وقامت هي بعد تنعش ..
مهره وساره يالسات ويطالعن ويضحكن عليهم وعلى حركاتهم.. كل شوي كان الكلاشن يطيح من ايد مايد .. وجاسم يتم يصرخ عليه .. مها تتمصخر ع عفرا وهي تنعش وتيب شعرها على عفرا اللي اتم متغصصه منها ..
كانت اليلسه كلها ضحك ف ضحك .. وساره وايد مستانسه عليهم وعلى وربشتهم هذي .. لين وصلت الساعه ثثنتين والكل تم مدوخ من الصدعه .. وقرروا كلهم يسيرون يرقدون.. طبعا ساره من قال بترقد .. كان ياينها اتصال من مروان .. طلعت من الحجره لان ميوه كانت راقده ويلست فالصاله بعد ما فضت من لمة اخوانها.. وتمت ترمس ويا مروان لين اذان الفجر ..




**********************
(السبت) 9 ابريل 2005
**********************

كان فارس طالع من كلاس الرياضيات ومعصب ع الاخر .. و وياه ربيعه مبارك .. كان فارس يتابع ورقته ويتابع التصحيح للمسائل و كل شوي يدعي ع الدكتور ومبارك يهدي فيه..

فارس: ياخي انا حال كل شي صح بلاه ها محطلي صفر ع المسأله
مبارك: جيكت انته ؟
فارس: هات ورقتك
يلس فارس يقارن بين ورقته وورقه ربيعه
مبارك: كيف جي انته حال صح واحسن عني بعد
فارس: اقولك ترا ها متربص لي الا يرسبني الخايس
مبارك: سيرله المكتب راجعه
فارس: بسير له الحين .. بتصل بك عقب
مبارك: اوكي

سار فارس للدكتور ودق عليه الباب ودخل
فارس: دكتور لو سمحت ابا اراجع وياك الهوم ورك .. انا حالنه صح واجابتي نفس اجابه حد من الشباب وانته محطله صح
الدكتور: انا ما اغلط ابدا
فارس: دكتور لو سمحت تقدر تجيك عليه
جدم فارس الورقه ..
الدكتور قبض الورقه ويلس يراجعله على كل رقم .. وكل قانون ويفتح الكتاب .. طول الدكتور تقريبا ربع ساعه .. عقب عطا فارس الورقه..
الدكتور : راجع الحل ولاتغش من احد
فارس: بس انا بروحي حالنه
الدكتور : خلاص .. تفضل انا مشغول

طلع فارس من عنده وهو معصب ع الاخر .. مايعرف ليش هالدكتور محطي دوبه من دوب فارس .. وتمنى انه يعدي ها الكورس على خير ..

****

نزلت ناعمه من الدري على هونها .. وهي تزقر مايد ولدها وجاسم .. بس محد يسمعها .. وصلت تحت بسلام ومشت ببطء لين غرفة الألعاب.. دخلت عليهم ..

ناعمه: ميوود وصمه .. عنبوك ما تسمعني وانا ازقرك
جاسم : ها بلاااج .. لا تصارخين عن يطيح الياهل
ناعمه: صخ جسوم .. ميود قم عند الباب دخل أمل ربيعتي.. ماورم اظهر لين الباب
مايد: ان شاء الله امايه .. سيري استريحي فالميلس. لاتعصبين
ناعمه وهي تظهر من الحجره وحاطه ايدها ورا ظهرها وتتحرطم: وين ما بعصب وانتو ترفعون الضغط ازاقر لين الله يذلني ولا تردون..
مايد وهو يمشي وراها: سيري ارتاحي .. لا تحرطمين وايد
ناعمه وهي تطالع مايد اللي ضحك بصوت عالي وركض عنها عن تضربه..
اما ناعمه فتوجهت للميلس .. كل شي مرتب ..
يلست ع الغنفه ترتاح .. وشوي سمعت صوت أمل تسلم .. قامت ناعمه ورحبتبها وسلمت عليها..

ناعمه: حيالله من زاارنا ..
أمل: الله يحييج.. شحالج ناعمه؟
ناعمه: هاه .. ها حالي.. لا يسر عدو ولاصديق
أمل وهي تيلس حذال ناعمه: يالله يا ناعمه..تراه حمال لازم تتحملين..
ناعمه: الله يعين.. انزين اخبارج انتي وشو علومج.. يالله ما نشوفج يعني الا يوم نعزمج ..
أمل: والله يا ناعمه تدرين الشغل والبيت .. يدوبنا ..
ناعمه: هي يا ختي .. عيل يوم بتوله عليج بعزمج ع الغدى عشان ماتعلثين بالبيت
أمل: هههههه افا عليج ..
ناعمه: وشوو الداوم؟
أمل: شو تحيدينه.. تراه على حاله ..الا ناعمه شو طلع فيج .. ولد ولا بنت
ناعمه: اللي أيي من الله حياه الله
أمل: انزين بس شوو
ناعمه: يقولون ولد.. ما يندرى
أمل: زين زين بتيبين اخو لمايد
ناعمه: وجاسم بعد
أمل: هههه رضيتي عليهم
ناعمه: ونسوني حليلهم..
أمل: يا حليلهم
ناعمه: بدق للبشكاره خلها تحط الغدى.. الساعه ثنتين اكيد هلكانه انتي
أمل: على هواج
ناعمه: هههه خلاص بتصل فيهن ..

اتصلت ناعمه بالبشاكير عشان اييبون الغدى .. ويلسن هن الثنتين ع الطاوله ياكلن ويسولفن .. كانت ناعمه حابه انها تقضي وقتها شوي ويا ربيعتها .. وتقضي شوي على الملل اللي حل بحياتها .. واستانست اليوم على اليلسه ويا أمل وخذن علوم بعض..

****

كانت تتمشى بروحها فالكليه وهي ماسكه مذكرة فايدها رافعتنها على ويها عن الشمس .. فيها رقاد فضييع تسابق خطوات الكل عسب توصل للسكن .. انتبهت مي لباص خاطف حذال مبنى"مخج" .. ويلست تتريا فالموقف شوي لين يوصل الباص وركبته ..

ضحكت على الصدفه اللي جمعتها ويا ها الانسانه ها الوقت .. رفعت فاطمه راسها وابتسمت لمي ولزت ع طرف عسب تيلس ع الكرسي اللي حذالها .. ماحبت مي انها تقفطها ويلست ..

فاطمه: ها مخلصه دواام؟؟
مي: هي توني..
فاطمه: شو كان عندج؟
مي: كلاسين اليوم بس.. ESP وعقبه ثقافه
فاطمه: اهاا .. مب نحن نكرف من الصبح
مي: الله واكبر عليج..لاحقه ع الكراف انا ..
فاطمه: اخبارها ساروه؟
مي: الحمدلله
فاطمه: يلا عاد نبى نشوف صوركم مال الملجه!
مي: الله يخلييج .. من زيناا عاد ...

اضحكت فاطمه لمي .. كانت مي تبى الباص يحرك بسرعه ويوصلها سكنها خلاص ماتروم تجامل ها البنت وايد ..

فاطمه: راده السكن
مي: هيه
فاطمه: مم انزين شو رايج تين وياي الرباعيه ناكللنا شي ؟
مي: لا لا لا ...بموت من الرقاد..

فاطمه اطالعتها بنظره .. اتجاهلت مي ها النظره .. واول ما وصل الباص جدام بوابة سكنها نزلت ع طول ..
فاطمه انعجبت بشخصية مي وايد و من بداية الكورس الاول لين الحين فخاطرها تتقرب لمي اكثر بس مي دايما تصدها..
أسلوب فاطمه يطفر في مي .. تحس بأنه ها الفاطمه تفرض نفسها عليها .. وهي ماتحب ها الشي في الشخصيه.. الهدايا اللي اطرشها .. والمسجات اللي اطرشها والاتصالات اليوميه .. ها كله طفر بمي.. ها الاهتمام الزايد عن حده مب قادره تبلعه .. ومب عارفه كيف تقول لفاطمه بس خلاص مابا ها الاهتمام ..
مي فخاطرها تكون وياها ربيعه عاديه.. لكن فاطمه ماينعرف الها !
مي بالأساس..علاقتها ويا بنت خالها ماخلت لها مجال انها تكون ويا وحده ثانيه علاقه قويه.. لان عندها اللي تفضفض له .. عندها اللي تأمنه اسرارها.. عندها احلام فكل وقت تحتاج فيه لقلب يسمعلها .. لكن حياتها فالسكن .. خلتها تخالط شخصيات مختلفه .. وتستانس على وايد بنات كانت تتخوف منهن لمجرد كلام فاضي تسمعه من البنات.. ترد فبالها فاطمه .. لكن ع طول تشيلها ..

وصلت مي للمبنى وصعدت جناحهم.. دخلت الحجره وشافت ساره اختها بعباتها وشكلها توها واصله ..

مي: اف اف حر اليوم .. ابا ماااي
ساره: شو سويتي فالشرح؟
مي: سكتي الله يخليج القاعه فوق 70 بنت وانا واقفه ارتقل
ساره: هههههه مالت عليج ..
مي: ماعليج ماعليج .. عطاني الدكتور 5 ع الشرح..فول ماارك..
ساره: من الرقله يبوج .. غمضتيه ..

يلست مي ع السرير وهي تبطل جوتيها .. تذكرت فاطمه يوم تقول تبى تشوف صورها .. وصدت ع ساره

مي: ساروه وينها منوه؟
ساره: ماعرف
مي: اقولج ما يكون قلتي لحد اني يايبه كيمرتيه الديجيتال
ساره: لا ماقلت
مي: هي اشوى.. اليوم لقيت فاطمه وقالتلي تبى تشوف صورنا .. زغت عبالي تعرف اني يايبه الكيمرا لي فيها الصور
ساره: لا ماقلت لحد انا .. راوي بنات الجناح اخر الاسبوع ونزلي الكيمرا..عادي حد يستنذل ويخبر علينا واييج فصل
مي: هب هباج فال الله ولافالج ..

قامت مي بتعق عباتها وبطلت الكبت تتطمن على الكيمرا ..دورتها .. ماحصلتها فها المكان .. بطلت الكبت الثاني.. قامت ادور بتوتر .. وهي مب محصلتنها ..

ساره: شو بلاج؟
مي: ساروه ويينها الكيمرا
ساره: وين انتي محطتنها؟
مي: فكبتيه .. ما حصلتها
ساره: غربلا بليسج ..

قامت ساره وتمت تنبش ويا مي ويدورون فكل مكان بالحجره .. ومي بدت تضيع من ذاكرتها وكل شوي تقول ما دري وين حطيتها .. بس هي متأكده انها حاطتنها فالكبت ..

ساره: منها العوض وعليها العوض.. شكلها انسرقت
مي وهي زايغه: تستهبلين .. شوو تنسرق .. فييها صووريه
ساره: كله منج انتي .. شحقه تيبينها
مي: ساروه لاتيلسين تلوميني.. بروحي زايغه
ساره: ولا تدارين ع اغراضج..شحقه ما تقفلين الكبت
مي: شدرااني انا ..عمرنا مانسرقنا
ساره: الجامعه مافيها امان ..
مي: افف
ساره: دوريها فشنطتج.. ولا شنطة الثياب
مي: ساروه انا متأكده اني خاشتنها هنه ..
ساره: وينها عيل!
مي: اي بطني.. ماتخيل انسرقت
ساره: ابوي دام مب محصلتنها فديتج.. تخيلي عيل انها انسرقت..
مي: اييه شو تنسرق .. والله لو درت اميه بتذبحني
ساره: عاد اميه تحيدينها كيف تستحرص
مي: لاتخبرينها مافيني
ساره: اووه يا ميووه باجر فتحي منتداج بتحصلين صورتج معروووضه
مي: جب جب
ساره: ولااا كاتبين عليها مي سيف الملقبه بـ ............. ..
مي: الله يغربل بليسج
ساره: شاهره عمرج فالمنتدى بالتصاميم والخواطر الحين بينزلون صورتج ماعليه
مي: جب انزين اللي يقول امره اللي سرقها يعرف اني فها المنتدى
ساره: ههههههه ها زايغه
مي: انجبي وسيري شوفي بنات الجناح .. شافوا حد داش الحجره ولا .. يمكن وحده ماخذتنها ومسويه مقلب..
ساره: تراج تقولين محد يدري

تمت مي يالسه مستغصه .. طلعت ساره وسألت بنات الجناح اذا شافوا حد دخل الحجره .. واكتشفوا انه في بنت انسرقت عنها فلوسها .. ووحده انسرقت عنها ساعتها .. ووحده انسرق عنها الدكشنري الالي عنها ..
السرقه مستويه للكل ..
مي تمت يالسه متوتره .. مايقدرون يبلغون .. لانها يايبه كيمرا ولو عرفوا ع طول فصل .. بس ساره قالتلهم انه اللي انسرق عن مي فلوسها ..
واتفقن البنات يسيرن كلهن ويبلغن المدام ..
بس مي ما قدرت تتحرك من مكانها وهي خايفه ع صورها اللي بالكيمرا اكثر من خوفها ع سالفة الكيمرا..

**********************
(الأحد) 10 ابريل 2005
**********************

الظحى نزل سيف من سيارته ووياه راشد .. دخلوا مكتب السفريات يشوفون الهم حجز لدولة يسافرولها خلال الاسبوع الياي .. استقبلهم الموظف ..

الموظف: مرحبا كيف بدي اخدمكون؟
راشد:والله بغينا تشوفلنا حجز لدوله اوروبيه تكون هاديه وحلوه..
الموظف: سياحه بدكوون؟
سيف: لا لا مانبى سياحه لاحقين عليها
الموظف: يعني لعلاج .. لمصحات ؟
راشد: هي احيد التشيك يمدحون مصحاتها .. شوفلنا حجوزاتها
سيف: عاد نبغي فندق قريب من المصحات وزين..
الموظف: أكيد احنا ما بنتعامل الا ويا ارقى الفنادق..
راشد: زين زين .. يلا راونا
الموظف: تكرم عيوونك اخي ..

وبعد ما خلصوا شغلهم .. ظهروا من المكتب وهم يتناقشون عن السفره ..

راشد: لا ماعليك حلوه التشيك .. والمصحات هناك بعد بتريحك .. بنتملنا شهرين امره لين ننجف منها ..
سيف: يلا زين .. وعقب بنمر ع فرنسا عاد من سنتين ما سرت
راشد: فاالك طيب .. بس من اشوفك تحسنت حالتك انا عليه اوديك
سيف: ههههههه زين بنشوف ..
راشد: يبالنا نتزهب للسفر عيل
سيف: خلاص باجر بنسير وياك دبي
راشد: شعنه دبي .. الثياب مكوده اهنه
سيف: لا لا .. بنسير دبي احسن ..
راشد: والله انك انته ..
سيف وهو يركب السياره: هزرك عاد البنات بيرضن عقب
راشد: ليش ما بيرضن.. بيفرحلك حتى ..
سيف: ولو ما تغيرت النظره
راشد: بتكون انته عالجت نفسك وتراك مستفيد مب متضرر.. وبناتك جان ماغيرن نظرتهن مردهن بيت رياييلهن .. وعيالك الصغار ما يعرفون.. بتبدى صفحه يديده وياهم
سيف وهو يتنهد .. ساق السياره بهدوء ..
راشد: يلا ماعليه بو مايد .. ان شاء الله ميوه من تشوف انك بخير بيرد حالها وياك.. بنتك تحبك وتبالك الخير ..
سيف: الله يسمع منك ..

واتوجهوا للقهوه ونزلوا يسولفون ويا ربعهم .. وسيف طول الوقت .. يسرح باله ف السفره ويدعي ربه فخاطره انه يفكه من ها المشروب .. ويقدر يرد هيبته فعيون بناته من بعد ما ضيعها بأفعاله ...


****

الساعه وحده الظهر كانت ساره واقفه عند باب الحجره عسب تطلع الكليه لأن دوامها باقله نص ساعه .. لفت ع مي اللي يالسه ع شبريتها ويبين من شكلها انها مب راقده عدل ..

ساره: دامج مب مداومه شي وطي راسج ورقدي
مي: ما رقدت غير كم ساعه .. كل شويه افز
ساره: يالله يا ميوه مب كيمرا مسوتلج ها الارق
مي: ساروه والله اني متروعه
ساره: استهدي بالرحمن ولا تحاتين .. ادعي من ربج بالستر
مي:الله كريم ..
ساره: يلا باي بسير
مي: باي

طلعت ساره من الحجره وهي فبالها سالفة مي والكيمرا .. تفكر كيف صارت السرقه.. قطع عليها افكارها صوت التيلفون .. ابتسمت وردت ..

ساره: هلا والله
مروان: اهلين وسهلين .. اشحالج ؟
ساره: الحمدلله تمام .. شخبارك انته؟
مروان: طيبه ..ها ناشه عيل .. ماترييتيني اوعيج للدوام
ساره: لا اليوم ناشه من وقت وطالعه من وقت
مروان: فالكليه انتي؟
ساره: توي طالعه من المبنى بعدني ما وصلت الكليه..
مروان: اهاا .. وليش ناشه من وقت؟
ساره: همم بس جي
مروان: امس احيدج سهرانه
ساره: هي رقدت ع الفير
مروان: غريبه ناشه من وقت
ساره: لا ماشي .. ميوه كانت ناشه ونشيت
مروان: اهاا .. شحالها هيه؟
ساره: والله انها
مروان: ليش
ساره: متغصصه ولايعه جبدها
مروان: ليش شو السالفه؟؟
ساره انتبهت لعمرها انها تشكت من حال مي عند مروان من غير ما تحس وعضت ع شفايفها ..
مروان: شو السالفه ساروه؟
ساره: لا مااااشي
مروان: يلا عاد عن الاستهبال..بلاها ميوووه؟؟
ساره: شوف بقولك بس لا تطريه عند حد.. بتعصب عليه عقب لانها قايله ماتبى حد يعرف..
مروان: قولي انزين شو مستوي؟
ساره: ميوه يايبه كاميرتها وفيها صور الملجه ويوم ردت ماحصلتها فالحجره..
مروان: انزيين
ساره: انسرقت بعد شو
مروان: مووول ما حصلتها
ساره: نجلنا الدنيا .. وبعدين كم وحده فالجناح انسرق عنهم شي .. خلاص اكيد مسروقه
مروان: صوركم فيها ؟
ساره: صورها هيه ..
مروان: وشله ميوه تودي كاميرتها انزين جان حطتها وقفلت عليها زين جيه صوركم تسير عن كل حد ويشوفها هذا ان ماسووبها فضيحه بعد
ساره: مروان ليش تتحرطم عليه انا .. انا مايخصني ميوه يايبتنها شو تباني اسوي
مروان: بلغوا مشرفتكم مادري هاي المسؤوله عندكم
ساره: الكاميرا ممنوع فيها فصل كيف تبانا نسير نخبر على عمارنا
مروان: ياسلام عليكم ..
ساره: بليز مروان لاتعصب انا مايخصني في السالفه وميوه ماتزداد
مروان: ميوه وين ؟
ساره: في السكن ميلسه مب راقده زين ومارامت اتدوام
مروان: انزين برايج انا برمسج عقب
ساره: ليش
مروان: برمسج عقب سيري دوامج انتي
ساره: انزين ..
مروان: يالله مع السلامه
ساره: مع السلامه

سكرت ساره وهي خايفه انه مروان يخبر حد .. ومروان تم يفكر فالسالفه اللي صايره وهو خايف على مي .. ومن غير ما يفكر على طول لجأ لسلطان يعاونه فها السالفه ..اتصل على رقمه واتريا يرد عليه ..وبعد السلام واخذ الاخبار

مروان: اقولك بتخبرك ..
سلطان: تخبر
مروان: يوم حد ينسرق عنه شي شو يسووون؟؟ فيه شي بس ماعرفه
سلطان: هييه يسون التحيووره على ها الشي المسروق..ليش شو انسرق عنك
مروان: لا مب انا .. واحد من الربع
سلطان: انزين شو انسرق عنه
مروان: كيمرته وفيها صور الاهل وجي ..
سلطان: اندوووك.. ليش وين فار الكيمرا هو الله يهديه
مروان: مادريبه.. انزين قولي شو يسوي
سلطان: خله يسير عند مطوع ويحير ع الكيمرا ..
مروان: والتحيوره مب بدعه؟!
سلطان: يابويه التحيوره ايات قرانيه .. البدع اللي فيها استعانه بالجن
مروان: تعرف حد زين؟
سلطان سكت شوي يفكر وهو يحرك اصابعه على قبضه سكان السيارة
سلطان: اعرف مطوع زين .. مره كنت مودي امايه عنده يوم ضاع ذهبها حير ع الذهب وامره حصلته ..
مروان: انزين ها ضاع عنها .. بس الكيمرا مسروقه
سلطان: كله واحد .. ع الشي المختفي هو ..
مروان: انزين سير عند المطوع هذا وخله يحير ع الكيمرا
سلطان: خلاص ماعليه .. عاد اللي بييبه من المطوع خله يحطه مكان الكيمرا قبل ما تنسرق
مروان: اوونه .. في شي يعني لازم ينحط
سلطان: هي عيل شو ..
مروان: همم.. احس صعبه ..
سلطان: عادي مافيها شي..
مروان: شووف المشكله كيف بنوديه
سلطان: يالله تواعد ويا الريال وعطه
مروان: همم اسمعني سلطان ..بقولك بس هب تطريه عند حد
سلطان: لا تخاف
مروان: اللي مسروق عنهن الكيمرا بنات عمتيه عليا
سلطان: شووو
مروان: مسروقه عن مي
سلطان: وفيها الصور؟؟؟
مروان: هي ها اللي مخلنا نحاتي اكثر ولا نفادها الكيمرا
سلطان: وين انسرقت عنها ؟
مروان: في سكن الجامعه
سلطان: جان بلغن حد فالسكن
مروان: ترا الكيمرا ممنوعه ما يقدرن يسون شي
سلطان: يا هي ساالفه ..كيف بنوصللهن التحيوره عيل يوم انهن فالسكن والمطوع هنه ..
مروان: انا بوديها لساروه .. عندي تصريح اذا بغن انزلهن ولا شي ..
سلطان: اها زين .. انته الحين فالعين عيل
مروان: هييه دواام
سلطان: عيل سر عند مطوع هناك فالعين .. ليش نسير عند ها اللي هنه
مروان: همم
سلطان: بدق حق واحد من الربع يدلينا ع مطوع زين ..
مروان: خلاص اوكيك
سلطان:انزين اتصل فيهن خل يقوللك السالفه بالضبط
مروان: ماعليه برد لك خبر بس لاتخبر حد
سلطان: لا تحاتي ..
مروان: يلا باي ..

سكر مروان التيلفون .. واتصل ع طول فساره لكنها ما ردت عليه..تذكر انها الحين فالكلاس.. وطرشلها مسج ..

" ساروه فديتج ماشي غير انه نحير ع الكيمرا.. خبريني كيف استوت السرقه ومتى؟"

قرت ساره المسج وهي فالكلاس .. وع طول ردت عليه ..

" انته اتصل فمي وهي بتخبرك السالفه اوكيك .."

قرى المسج .. واتصل فمي .. اللي كانت طايحه على سريرها ومتغطيه بالكامل تفكر في العواقب اللي ممكن تستويلها في اللحظه اللي رن فيها تلفونها ..
رفعت التلفون تشوف اللي متصل "مروان" استغربت اتصاله وحطت فبالها انه بيسأل عن ساره .. يمكن دقلها وماردت عليه ..
ردت ع الاتصال .

مي: الوه
مروان: هلا مي
مي: اهلين .. اشحالك مروان ؟
مروان: الحمدلله .. شو راقده ؟
مي: لا طايحه احاول ارقد .. تدور ساروه؟
مروان: لا رمستها .. بس بغيت اسالج عن الكاميرا
مي حست انه نفسها توقف لثواني وتمت تتحرطم وهي امبعده التيلفون عنها ..
مي: الله ياخذ بليسج يا ساروه.. حلج ماتروم تيود لسانها
مروان: الوه
مي رفعت التيلفون: هاه
مروان: خبرتني ساره عن السالفه ولاتحاتين مابنخبر حد لكن بغيت اساالج عن اشيا لاني بسير عند مطوع يسوي تحيروه عليها
مي: شو ها التحيوره
مروان: يحيرون ع الشي الضايع والمسروق..يعني ايات قرآنيه تنكتب فورقه وتحطينها مكان الكيمرا..
مي: عادي يعني وبحصلها
مروان: ان الله راد .. بس سلطان قالي انه عمتيه شيخه حصلت ذهبها يوم حيرت عليه
مي: ليييش انته خبرت سلطاااان؟؟
مروان: بس سلطان.. لا تحاتين لانه هو اللي دالني على ها السالفه .. ماعرفت منو اشاور وانتي منبهه ما تبين حد من الحريم يعرف
مي: انزين.. وشو بتسوون
مروان: قلتلج بنحير على الكيمرا وبييكم السكن خلاف بييبلج شي حطيه مكان الكيمرا..
مي: شو ها الشي
مروان: مطوع بيكتب ايات قرآنيه وادعيه وحطيها
مي: هاي التحيوره
مروان: هيه
مي: يعني فيه امل
مروان: ان شاءالله .. لا تاكلين بعمرج ان شاءالله خير
مي: ان شاء الله
مروان:انزين خبريني كيف ومتى وليش اصلا شاله الكيمرا؟؟

بدت مي تروي له عن الكاميرا و وين حطتها وكيف عرفت انها انسرقت..وتم مروان يطمنها ويشل من همها الي مأرقنها من أمس ..


****

الظهر رجعت احلام من مدرستها ويا عمتها ومديه اختها .. في طريقهم للفله وهم شالين شنطهم انتبهوا لحد زقرهم من صوب الميلس .. لفت احلام ع مصدر الصوت وكانت امها واقفه ..


عبير: احلام
احلام وهي تغطي عينها بايدها تحجب عنها اشعه الشمس
احلام: هلا اميه شو تسوين اهناك ؟
عبير: تعالوا ابيكم
مديه: ليش؟
عبير: تعالوا انتوا
عليا : وطن شنطكن وسيرن شوفن امكن شو تبا ..

خلن مديه واحلام شنطهن في الحوي وسارن صوب امهن عند باب الميلس اللي برع

احلام: ها اميه
عبير: دخلوا داخل المليس ..
مديه: شو السالفه
عبير وهي تبتسم: دشوا داخل أول ..

احلام استغربت رمسه امها .. وتقربت من باب الميلس تشوف شو داخل ..
ماصدقت المفاجأه اللي تشوفها ..

احلام وهي شاقه الحلج: خالي بشـــــــــار

ركضت على طول داخل تسلم عليه اما مديه اللي كانت واقفه من سمعت اللي قالته احلام على طول دخلت وراها ..
كان بشار لاوي على بنات اخته ويحبهم على راسهم
وعبير واقفه تشوفهم من بعيد .. اخوها فاجأها بزيارته للامارات البارحه لكن محد كان عنده علم الا محمد لانه وصل في وقت متاخر .. بات في الفندق والصبح فاجأ عبير بزيارته اللي وعدها فيها من شهر 9 .. يوم وصلهم خبر ابوهم ..
عبير من الصبح يالسه وياه في الميلس وياخذون اخبار بعض ..
عقب ماسلم بشار على بنات اخته يلسوا وكانوا محاوطينه احلام عن يمينه ومديه عن يساره .. وعبير يلست على الغنفه المجابله ..

احلام: جان خبرتينا انزين بنكشخ بنغير ثيابنها زين جيه يايات من المدرسه شعث غبر
بشار: هههههه شعث غبر مره وحده .. وين فيه نحن بالحج !
مديه: خالي والله تولهنا عليك من زمان ماييتنا
بشار: وليش انتوا مازرتوني ؟
مديه: نحن عندنا مدرسه
بشار: وانا عندي شغل بعد والا انتوا واحشيني انتوا وامكم
خطر في بال احلام سؤال سألته عن طيب خاطر
أحلام: فجر اشحالها ؟
بشار: الحمدلله
عبير: قاصرنا وجودها والله
بشار: عندها جامعه وتعرفين ماراح تقدر تيي .. لين خلصوا دراسه يمكن ايي ويا العيال وامهم نصيف عندكم
احلام: الله ونااااااااسه
عبير: ترا خالكم ياي ياخذني
اتوجهت انظار البنات لامهم مستغربات جملتها الي قالتها..
عبير: ههه شفيكم اطالعوني جيه
احلام: مديه انتي سمعتي اللي انا سمعته !
مديه: اظنه
عبير: ههه قلت خالكم ياي ياخذني بروح معاه الكويت ؟
احلام: وريلج وبناتج!
بشار: هههههههه الله يقطع سوالفج يا احلام
مديه: صدق انزين ونحن ؟ كيف يعني بتسيرين وياه اميه ؟
عبير:بروح معاه اسبوع عشان محتاجين تواقيعي اهناك وبكتب وكاله لخالكم عن حلال ابوي الله يرحمه
احلام بوزت: وايد
بشار: شدعوه بتروح شهر .. كلها اسبوع او عشره ايام وترجع لكم خلوني اشبع من اختي شوي ولهان عليها
احلام: مب مشكلتنا .. ايلس وياها اهني اسبوع اشبع منها عقب ودها يومين توقع الاوراق وترجع
عبير: هههههه قومي قومي عن هالكلام اللي مامنه فايده غيروا ملابسكم وتعالوا قعدوا ويا خالكم عشان اروح انجب الغدى
مديه: ههه اميه بلاج انحاس السانج .. يوم واحد ويا خالي جيه .. اسبوع عندهم شو بتسوين

ظحكوا كلهم على تعليق مديه .. وقاموا يبدلون ثيابهم بسرعه عشان يردون ييلسون ويا خالهم بشار اللي بالفعل كانوا متولهين عليه .. ومن فتره مب شايفينه ..



************************
(الخميس) 14 ابريل 2005
************************


كانت تتجلب ع الفراش تبى تكمل رقادها مب قادره .. غمضت عينها كذا مره وهي تناجي النوم لكن ما قدرت .. عقت اللحاف ونشت من على السرير وهي تتأفف .. دخلت الحمام تتغسل .. وبعد ما طلعت رجعت لسريرها وشلت تيلفونها ونزلت تحت..
كانت الساعه ثمان وقت اللي دخلت فيه مي الصاله وشافت ام سيف يالسه على مكينتها تخيط كندورتها ..

مي: صبحج الله بالخيير عيووزي
ام سيف وهي ترفع راسها لمي: صبحج الله بالنووور والسرور..
يلست مي حذال يدتها عقب ما باستها ع راسها .. وام سيف عيونها فيها تساؤلات لمي ..
مي: هههه امايه بلاج؟
ام سيف: غريبه ناشه من غبشه.. احيدج خميره
مي: هههههههه حرام عليج يا امايه..
ام سيف: هي احيدكن ترقدن لين الظهر والا القايله .. ماظريت على نشتكن الصبح
مي: شو نسوي نسهر ونرقد الصبح..
ام سيف: عيل لابدج راقده من وقت البارحه
مي: ليش رقدت انا اصلا؟
ام سيف: ويدي بلاج؟
مي: لا لا ماشي.. بس شويه يعني افكر فالدراسه تعرفين انتي عاد هم ..
ام سيف: هيي الله يعينج يا امايه ويوفقكم انتي واخوانج.. نشي تريقي .. مادريبج انج بتنشين ولا جان ترييت وتريقت وياج
مي: بقوم اصبلي كوب حليب ماشتهي ريوق الحين..

نشت مي تصبلها كوب الحليب وهي تسولف ويا يدتها .. وردت تتراود لفكرها سالفة الكيمرا .. يلست حذال يدتها ..

مي: بسألج امايه
ام سيف: امري
مي: التحيوره ع الشي الضايع لها فايده
ام سيف: تحيوره! ليش شي ضايع عنج
مي: لا لا لا .. بس سؤال
ام سيف: مادري يا امج .. بس اي شي فيه ذكر الله تراه له فايده
مي: يعني اللي يحير ع الشي اكيد اكيد بيحصله
ام سيف: مب شرط .. الا يوم ربج يريد( انها ان تك مثقال حبة من خردل فتكن في صخرة او في السموات أو في الارض يأت بها الله ان الله لطيف خبير)

مي: هممم .. زين زين ..

وتمت تسولف مي ويا يدتها سوالف مختلفه عن امور وايده .. شغلن التلفزيون يقضن فيه وقت لين ما ينشون البقيه ..
شوي و رن تيلفون البيت.. قامت مي من مكانها وردت على التيلفون ويلست حذال يدتها.. عرفت ام سيف انه المتصل هي بنتها مريم.. ومي يالسه تسولف ويااها..
سحبت مي التيلفون وناولته يدتها ..

ام سيف: هلا مريوم
مريم: اهلين امايه.. ها شو اصبحتي
ام سيف: الحمدلله بخير .. شحالج انتي شحال عيالج
مريم: الحمدلله كلهم بخير

وكانوا حذال مريم عيالها عمار ونواري واسما يتريقون ومحتشرين

ام سيف: منو يرمس عندج
مريم: عمار يلاكش نواري.. واسموه تنازعهم
ام سيف: هي وحليلهم..
مريم: امبوني ضاريه ع حشرة عمار ونوره .. الا اليوم اسوم مشاركتنهم ناشه من وقت ..
ام سيف: هي لاحقه ميوه ..
مريم: لا عاد بنتي لابدها تبا تسير مكان ولا ماتنش من الله هيه ..
ام سيف: هههه عاد ردن من حبسة الجامعه يبن يفججن روسهن شويه
مريم: هي ادلهن ..

اسما تقربت من امها وهي تسمعها تطريها .. ويلست تسمع من غير ما تعلق .. شوي وسكرت مريم التيلفون ..

اسما: شو كنتوا تقولون؟
مريم: ماشي ماشي ..عمار ابويه لاتصيح اختك عطها عروستها
عمار: اميه ما اصيحها هي عياره شويه
نوره: ماماه عمار يضرب العروسه حرام
عمار: ها ماقلتلج عياره عيل العروسه وين تحس
مريم: هههههه تعالي نوره لعبي هنه بالعروسه.

وعلى لمتهم الصغيرونه وسوالفهم انتبهت مريم للشغاله وهي شاله صينيه فايدها ومتوجهه للدري .. زقرت عليها تسألها ..


مريم: تعالي ايه وين موديه الاكل ؟
الشغاله: سير نايف قول جيب ريوق فوق
مريم:هيييه.. برايج وديه عيل
اسما: ليش ماينزل هو يتريق تحت ؟
مريم: شو عليج انتي ؟ يمكن يبى يتريق ويا حرمته
اسما: اونه عاد ..
مريم: صه ..
كملت البشكاره دربها .. واسما اطالعت امها وفبالها رمسه ..

اسما: امييه
مريم: خير
اسما: ابا اطلع
مريم: طلعي انزين الباب مفتوح
اسما: اماايه عاد لاتطنزين..وديني دبي
مريم: حشى عليه ماروم
اسما: شوفي اميه من متى انا ماطلبت شي وما قلتلكم ودوني مكان .. قولي لنايف يظهرني يوديني ابا اخذ بدل .. الحين بتي حفلات تخرج في الجامعه وابا لبس يديد
مريم: بنات الخلق يتخرجن ونحن نصرف عليج في هالثياب .. ماتشبعين منهن ؟
اسما: امايه شو تبين يعني البنات كلهن يطلعن كشختهن في الحفلات هاي
مريم: عاد انتي مول ماعندج ثياب ..
اسما: عندي كنادير بس ماعندي بدل
مريم: اسموه لاتغصصيبي انا اطري انه عندج بدل وكم بنوبل نحن في الكورس الواحد 5 او 7 حفلات تستوي بتشترين 7 بدل ؟
اسما: هيه
مريم: وهوى
اسما: امايه رمسي نايف يوديني دبي
مريم: تعرفينه رقم اخوج ؟
اسما: هيه
مريم: دقيله قوليله مالي سنع اتشرط عليه
اسما: امايه عاد .. اذ نايف ما بيودينا منو بيودينا.. تحيدين ابويه مايسير دبي ولا يداني السوق . منو يعني بيتبرض منا؟؟
مريم: انزين
اسما: نايف عودنا انه يودينا ويردنا ومايخلينا نسير ويا الدريول يعني لانه عرس كل شي تغير؟!
مريم:نايف ما بيتم مسؤول عنكن دووم .. هذا وهو عنده حرمه مب مقصر وياكن..
اسما: انزين وشو بيستوي لو ما قصر ويايه الحينه بعد؟
مريم: مالي شغل فيكن..
اسما: اوف بسيرله انا فوق
مريم: قري مكانج .. تشوفين شالين الريوق بيتريقون يعني مايبون ييلسون ويا حد خليهم ساعه وعقب سيريلهم
اسما: عزات طاف الوقت علينا وماسرنا مكان..

في هالوقت رن تلفون مريم وشلته ترمس ربيعتها وطنشت اسما..
اسما قامت من مكانها وصعدت فوق ..
كانت تتشاور تدق عليهم الباب والا لا ؟ بس لو تاخرت بيتاخر الوقت ومابيوديها
دقت الباب وتمت واقفه تتريا .. لين فتح لها نايف الباب.

اسما: صباح الخير
نايف: صباح النور هلا
اسما: اشحالك.؟
نايف: الحمدلله
اسما: بتطلعون انتوا مكان ؟
نايف: ماعرف لين احين شو بغيتي ؟
اسما:نايف ابا اسير دبي اوالشارجه ابا اشتري بدل
نايف: انتي ماتشبعين من المشاري
اسما: وانتوا محد يطلب منكم شي الا نهزرتوبه .. محد يتسخر يخدم حد في هالبيت صدق لوعه جبد
نايف: بلاج تتحرطمين ايه
اسما: اقول لامي ودينا تقول ماروم وانته تقول ماتشبعون
نايف: ماجذبنا انزين
اسما: برايك مشكور

روحت عنه اسما من غير ما تلف عليه وهي صدق معصبه ...

نايف: تعالي اسموه

طنشته اسما وروحت عنه غرفتها و نايف دخل قسمهم ..

ريم: بلاها اسما ؟
نايف: ماشي
ريم: حليبك برد
نايف: ماباه
ريم: بلاك نايف شو قالت لك اسما ليش معصب
نايف: هاي اسموه ماتحترم .. اسلوبها كله بشروط وصراخ
ريم: شو تبى هي ؟
نايف: تبى تسير دبي تشتري
ريم: شو تشتري؟
نايف: ثياب مادري شو تبى بعد
ريم: انزين برايه نايف ودها منو بيوديها جان انته ماوديتها
نايف: مب مودنها خلها تتادب عن هالطبايع المصاخه اللي تباه ماترد عنه
ريم: حرام نايف .. البنات ترا في الجامعه يستهلكون الثياب وانا خواتي نفسها ترا
نايف: ريم بس خلاص

سكتت ريم وتمت تطالع نايف اللي نش من مكانه ودخل يتسبح ..
وتمت تلوم نفسها انها ناقشته فالموضوع .. مابغت أي زعل او أي خلاف يصير بين نايف وخواته عسب ماتكون في محل ظنونهم انها دفعته لها الشي..تعوذت من بليس وحطت فبالها انه مستحيل بنات عمتها يحطن فبالهن ها الشي ..
في هالوقت رن موبايل ريم وسارت غرفتها تشوف اللي متصل ..

ساره: الوه
ريم: هلا
ساره: اشحالج ريمان؟
ريم: الحمدلله اشحالكم ؟
ساره: بخير ..
ريم: شو راقده انتي؟
ساره: ناشه من شويه بس متسلقيه ع السرير.. عيزانه اقوم
ريم: يحيج..
ساره: انزين اقولج مابتسيرين بيت امايه اليوم ؟
ريم: لا ماظن نايف مابيظهر اليوم او يمكن اظهر وياه
ساره: ليش؟ من الله امس يوم يينا ماشفناج
ريم: ماعليه يمكن باجر ايي الصبح..
ريم سمعت صوت باب الحمام ينفتح: اقولج ساروه برجع اتصلبج اوكي يالله باي
سكرت ريم التلفون قبل مايظهر نايف ويشوفها ترمس .. مافيها على مزاجه وهو متضيج ..

اما ساره من بعد ماسكرت عنها اختها تمت تتطالع التيلفون وهي مستنكره ..
وطت تيلفونها.. وتمت طايحه تتجلب ع السرير لين الساعه 12 الظهر وهي فبالها شو بتلبس اليوم!
دخلت الحمام تتغسل ويوم طلعت ع طول جابلت الكبت وتمت تجلب فثيابها ابتسمت وهي تتخيل لقاء اليوم .. طلعت من الحجره ..
ونزلت تحت عند يدتها .. لقت مي طايحه ع الغنفه وشكلها ماخذتلها قيلوله ..
وام سيف مشغله الراديو على اذاعة القرآن وقابضه المسباح فايدها وتسبح ..
يلست ساره بكل هدوء حذال يدتها .. اللي لفت عليها وابتسمت الها..

ام سيف: ها العروس صح النوم
ساره: احم احم ..
ام سيف: نشي صبيلج حليب وتريقي
ساره: لا ماشتهي.. بتريا الغدى
ام سيف: على هواج ...
ساره: هاي من متى ناشه؟
ام سيف وهي تلف ع مي: من الصبح متنشطه اليوم.. من يت الساعه 11 وطت راسها ورقدت ..
ساره: لازم بترقد
ام سيف: شبلاها هيه؟؟ تحاتي شي وراها
ساره: ها!
ام سيف: شي فبالها ميووه
ساره: لا لا ماظني ..
ام سيف: شكلها مهموم من شي .. مادل شوفيها ها البنت
ساره: لا ماعليج امايه الا دقات ميوه ..

وتمت ساره تسولف ويا يدتها لين ما اذن الظهر .. وعوا ميوه ونشوا كلهم يصلون .. وحزت الغدى الكل التم فالصاله من اكبرهم لأصغرهم .. الا ناعمه ..
سيف يالس يقرى الجريده وام سيف تغرف الاكل ويا البشاكير والعيال متحاوطين ع بعض اللي يشوف التلفزيون واللي يقرى ملحق الرياضه ..

مي: جسوم عطني الرياضيه شويه
جاسم: يلا مناك.. انتي بنت مايخصج فالرياضه
مي: لاوالله
مايد: يعني الحين الرياضه بس حق الاولاد
جاسم: هي عيل شو
مي: ههههه يا الخديه انته
جاسم: خديه ابوج
مي بطلت عيونها ورفعت راسها ع ابوها اللي كان منمدج فالجريده
مي وهي تصاصر جاسم: خس الله بليسك عيب
جاسم بصوت واطي: اوووه نسيت ابوج هنه ..
مايد: هههههه ما جنه ابووك

زقرت عليهم ام سيف عشان الغدى .. والتموا كلهم ع سفرة الأكل ..

ام سيف: نعوم لين الحين مانزلت
سيف: ساره اتصليلها شوفيها..
ساره: ادله انه وقت اكل .. شو ها المذهب اللي قابضتنه هيه مانروم نترياها
مي: خييبه ما يسوى عليج يا نعوم.. انا بدقلها ..
وقبل ما دقلها مي دخلت ناعمه الصاله ..
ناعمه: هااا كلتوا قبلي
ساره: يلا حطينالج غياب هاتي عذر تأخير من المديره
ناعمه: والله متفيجه ساروه
مي: هههههههه نعوم عن يوصلج الحرمان تراج قمتي تتأخرين عن كل وجبه
ناعمه: شو اسوي انزين حركتي مستويه بطيئه ماروم
ساره: يااامنكرج انتي
ام سيف: نعوم جنج الا اول مره تحملين
ناعمه: والله عموه ها المره وايد متعبني
ام سيف: الله يعينج
ساره: كلي كلي انتي ..
مايد: اقول اميه عطيني غرشة السمن اللي حذالج
ناعمه قبضت الغرشه وجدمتها شويه حذال ساره عسب تعطيها مايد .. لكنها انفرطت من ايدها ..
ناعمه: شو ها ساره ماتعرفين تزخين
ساره: الله اكبر هي طيحتها وقالتلي انا ما اعرف ازخ ليش انا مديت ايدي
ناعمه: تراني اناولج اياها
مي: ههههههه بدن ها الثنتين ..

وتم الكل ياكل وهو يضحك ع المناقر اللي صاير بين ساره وناعمه ..
وبعد الغدى قامن بنات سيف عسب يسيرن بيت امهن تمن يتزهبن لين ياهن الدريول سلمن على يدتهن قبل ما ترقد الظهر وتوجهن بيت امهن ..

طول العصر تمت ساره معتكفه البيت ولا طاعت تظهر .. مي واحلام داخلات طالعات .. لين قبل المغرب بشوي ردن عند ساره ..
وفي الحجره..
كانت ساره واقفه عند التسريحه وتتجحل بكل تركيز..

مي وهي تتطالع ساره...
مي: بسألكم سؤال!
احلام: شو؟
مي: ليش ساره يوم تتجحل تبطل حلجها؟
احلام وهي تطالع ساره ونقعت من الضحك ..
ساره لفت عليهن تسوي عمرها معصبه: شو يعني الواحد مايركز
احلام: ههههههه بس شكلج يضحك اول مره انتبه لها الشي
ساره: حبيبتي كلكم مب الا انا
مي: لا حشا انا ما ابطل حلجي شوو قالولج ميوعه
ساره: خسج الله .. حبيبتي اصلا ها الحركه عسب تشد عضلات العين فماترمش العين.. انتي شدراج
احلام: ياحافظ عليج..
مي: ساروه ماظهرتي اليوم العصر خاري. غريبه يعني
ساره: احم انا عروس المفروض شوي انخش خخخ
مي: بس عليج..عريس الغفله يا شوي وروح ..بس الجوو بدى يحر خنقه اليوم..
احلام: بلادنا الشتا فيها شهرين و10 شهور صيف
تربت ساره من ميوه تراويها الشدو الي حطته اذ اوكي ولا..
ويوم شافتهن شهقت ..
ساره: احلاموووووووه و ويعه يلستي على مغربيتي
احلام فزت من مكانها وشافت تحتها كندوره ساره
احلام: شو تسوي هاي اهنه ماشفتها
ساره: سيري وديها يكوولي اياها مره ثانيه
احلام: ما تقرفصت عادي ..
ساره: مابا ردي اكويها
مي: شو عندج انتي بتلبسين مغربيه وحرير بعد ؟ حر الدنيا شو تبينها
ساره: ليش حبيبتي نسيتي انه اليوم الخميس؟ ولازم اشوف ريلي
مي: بتردين البيت يعني ؟
ساره: ليش وهالبيت مافيه ميلس؟ بنيلس في الميلس عادي
مي: خيبه انا مافكرت فيها .. اسميكم ماتطوفون انا قلت البنت منخشه داخل من الحيا ومندسه عن الريل .. ثره فيه مواعيد غرام ..
احلام: عن تحسدينهم .. بنيلس شوي وياهم نمتصخر وبنشوف مروان كيف خخ
ساره: استريحي فديتج .. لاتشوفينه وصكي الدعنه ..
مي: خخخخخخخ اونها تغار .. ياخي صدق مايركب عليج
ساره: جب جب .. قومي احلاموه ودي الكندوره يكوونها بيوصل
سارت احلام تودي كندوره ساره يكوونها .. واستغلت مي خلو الجو ورمست ساره فموضوعها..

مي: ساروه مارمسج مروان عن الكاميرا ؟
ساره: سالني امس جان حصلناها والا لا وقلت له ماحصلناها
مي: شو قال ؟
ساره: شو بيقول يعني
مي: انزين شو بيسوي احين
ساره: شو تبينه يسوي ميوه ؟ تراه يابلنا التحيوره من 3 ايام وماحصلناها..
مي: حسبي الله ونعم الوكيل..
ساره: عشان تتأدبين غير مره
مي: بس انزين الله يخليج صكي السالفه لانها تضيج بي من الخاطر ..
ساره: انتي الي تفتحينها..
بعد شوي دخلت احلام يايبه الكندوره حق ساره..
احلام: اقولج ساروه .. ترا سبع البرومبا برع
ساره: خيبه يا ؟ ماتصلبي قايلتله لاتي قبل ماتتصل
مي: بيت يده بيشاروج يعني
احلام: هب اول مره يدخل هو عادي ياي يسلم عليهم
ساره: بسم الله كلتني .. بسير اتلبس
مي: احلام متى بترد امج ؟
احلام: عقب اسبوع .. بس تبين الصدق ميوه .. تولهت عليها وايد .. صح ساعات احط راسي براسها وتناجرني لكن ماصبر عنها
مي وهي مبتسمه: منو يصبر عن امه .. شوفينا جدامج مره في الاسبوع نشوفها نحن
احلام: بديت احس باحساسكم صدق .. الله يعينكم
مي: الله كريم
احلام: ميوه بلاج انتي اليوم مب ع بعضج!
مي: مابلايه شي بس مارقدت زين واحس اني مسطله .. قومي نطلع الصاله
احلام: يالله
نشن مي واحلام وظهرن الصاله لقن مروان يالس ويا يدته وعمته عليا ومديه
مي: السلام عليكم
مروان: وعليكم السلام .. اشحالج مي ؟
مي كانت تتحاشى نظرات مروان .. تحس انها مفتشله منها عشان سالفه الكاميرا
مي: الحمدلله .. امايه وين مها ومهروه ؟
مديه: في حجرتنا يتابعن التلفزيون
عليا: احلام قلتي لساره انه مروان اهنه ؟
احلام: هي قلتلها .. ياحافظ على مروان .. استوت الزيارات حق الحرمه احين والا نحن عيال عمه مايبانا .. شفتي امايه سلامه ظهر مافيه خير
مروان: ايه انتي يالعيوز بلاج تتحرطمين وشعنه مافيني خير .. امبوني اييكم واسلم عليكم يالله لاتخربينهم عليه
ام راشد: لا فديته مروان غير عنهم كلهم من استوى مايقطعني
عليا: هي فديته
احلام: وييه وييه ها كله حق مروان .. منو قدك ..
في هالوقت طلعت ساره من الغرفه لابسه مغربيه بنيه وشيلتها ..
وقف مروان ومدت ايدها: السلام عليكم
مروان: وعليكم السلام ..اشحالج؟
ساره: الحمدلله
ويلست ساره بعيد عنه .. وياهم في نفس اللمه ..
مي اللي كانت يالسه حذال احلام بدت تعلق ع ساره
مي: بروحها مسوده ولابسه مغربيه بنيه بعد تبى تحترق الاخت
احلام: هي شو ياها جيه اسمرت
مي: شدراني عنها من المشي في الشمس .. شمس العين ترحم ثرها .. حاميه وايد
ساره: لاتحشون
ظحك مروان على شكل مي واحلام اللي كانن يالسات وروسهن حذال بعض ويرمسن بصوت واطي .. وبعدين يلس يطالع ساره .. مب رايم يرمسها وهي بعيد عنه وفي نفس الوقت مستحي يرمسها جدامهم كلهم ..
مي بصوت واطي: احلاموه اطاعيهم يبون يظهرون مب عارفين كيف
احلام: اعرف بس نذاله مابساعدهم
ام راشد وعليا كانوا مركزين نظرهم للتلفزيون اما مديه كانت يالسه تقرا ومب في بالهم ..
كانوا مروان وساره يتبادلون النظرات وهم ساكتين ..
مي:احلاموه يغمضون اخاف عقب يوم املج حد يخسس فيني جيه
احلام: انزين تصرفي

رمست مي بصوت عالي: ساره قومي سيروا الميلس
ام راشد انتبهت لرمسه مي: هي فديتكم سيروا اهناك محد فيه الميلس
مروان: ان شاء الله
نش مروان ووقفت بعد ساره وساروا يتمشون رباعه للميلس
مي: ههه وحليلهم مب رايمين يرمسون

تمشوا ساره ومروان للميلس اللي برع
مروان: سوت فينا خير ميوه والا عمتيه وامايه ولا في بالهم يطالعون الاخبار
ساره: شو تباهم يقولون يعني
مروان: وانتي اخس عنهم ماترمسين
ساره: استحي انا
مروان: يارج الله انتي ..
قبل مايوصلون الميلس لاقفوا سلطان داخل من باب الحوي ساره استحت ودخلت الميلس قبل سلطان اما مروان وقف يسلم عليه
مروان: حيا الله بن العمه
سلطان: يحييك ويبجيك .. اشحالك ؟
مروان: الحمدلله
سلطان: كنت بتصل بك عقب قلت اليوم الخميس يمكن تكون عند الحرمه
مروان: هي بس عاد الحرمه اهنه فييت اهنه بسلم عليها
سلطان: زين زين برايك سير ادخل انته الميلس .. انا بسير اسلم داخل
مروان: هود قبل ماتحدر ترا البنيات داخل
سلطان: ماعليك ..

دخل مروان الميلس وسلطان سار صوب الفله .. وقف عند باب الصاله يدقه
سلطان: هوود
ام راشد: هداااا .. تلحفن بنات
دخل سلطان: السلام عليكم
ام راشد: وعليك السلام هلا ابويه اقرب اقرب
سلطان: قريب امايه ...
سلم سلطان على يدته وخالته .. والتفت للبنات : اشحالكن بنات ؟
احلام: الحمدلله

مي انصب عليها ماي بارد ع ويها وهي تشوف سلطان.. توها نظرات مروان ما قهرتها والحين سلطان بكبره ياي.. تمت صاخه وتدعي انه سلطان ما يزل لسانه ويسألها عن الكيمرا جدام امها ..

عليا: وينك سلطان غيبت عنا كمن يوم ماشفناك
سلطان: اطلع دبي خالتيه اخلص اوراق لخالي وارد تعبان اصلي العشا وارقد
ام راشد: بارك الله فيك ابويه ..
عليا: امك وينها عيل ماريناها ؟
سلطان: مادلها وين ظاهره عندها دوريه
ام راشد: شو دوريته ؟
سلطان: هههه هياته امايه مادري وين سايره ماتخلي بيت ماتفتر وترد تقول يالله ياركبيه محد بيخلف ركب امايه سلامه الا انا
ام راشد: لله امها سلامه ماتحوط شراتها هاي الا امك ماتخلي حد من هالعيايز
والحرمات ماتفتر تسلم عليهن
احلام:حليلها عموه هذا الواجب .. من جدم الحسنات استوفى اليمايل ..
عليا: ارمست العيوز

ابتسم سلطان على تعليق خالته .. ولف على احلام وهو يضحك عليها .. انتبه لمي الي يالسه حذالها وتلعب بتيلفونها .. استغرب منها مب فعادتها .. كل مره يشوف مرحها .. واتذكر ع طول سالفة الكيمرا توصياتها انه محد يدري بالسالفه.. ابتسم فخاطره لانه فهم الرساله ..

سلطان: اسمحولي انا بسير
ام راشد: وين ابويه بعدك يالس
سلطان: بيقيمون الصلاه مافيني اتأخر
عليا: ربي يبارك فيك فديتك..
سلطان: تامرون ع شي؟
ام راشد: سلامتك هاالله هالله بعمرك
سلطان: ان شاء الله ..فمان الله

ظهر سلطان من الصاله وتم يمشي وهو يتذكر مروان يوم يخبره عن كيمرة مي.. السالفه مب هينه فيها صور وشرف.. هو صح ماله دخل بس يحس بحرقه عليها.. يدري انها تحاتي السالفه .. ومايقدر انه يسوي شي الها!
دق سلطان باب الميلس ع مروان عسب يسير وياه يصلي ..
طلع مروان من الميلس .. وساره توجهت للبيت ..


عليا:ها بلاج ؟
ساره: سلطان دق باب الميلس ع مروان عشان يسير يصلي العشا .. بيصلي وبيرد
مي: وييييو خربوا عليها
ساره: عادي انزين شو يعني انا بعد بسير اصلي
احلام: اونها ماتبى تتفشل عاد
ساره: جب جب

يلسن البنات يتحرشن في ساره لين رجع مروان من الصلاه ..

اما مي كانت تحس ان يلستها ويا احلام خلتها تغير شوي من مزاجها المتعكر .. وفي خاطرها تخبر احلام عن اللي مظايجنها بما انها تعودت تقولها عن كل شي .. الا انه هذا ثاني شي يصير لمي يظايقها وتحس انها ماتقدر تخبر احلام ..
الاول كان اللي عرفته عن ابوها
والثاني عن الكاميرا اللي خايفه انه احلام تلومها زياده ان خبرتها او يزل لسانها وتخبر حد ..

تمت مي يالسه تتريا احلام تخلص صلاتها .. ويلست تلعب بتيلفونها .. يت فبالها ريم اختها وع طول اتصلت فيها تشوفها ليش ما يتهم اليوم ..

مي: افتقدناج اليوم
ريم: شو نسوي .. التزامات وريل
مي: الله يعيين .. وين سرتوا وين ييتوو؟؟
ريم: ابدن يلسه فالبيت
مي: اونه .. جااان ييتنا
ريم: ماعرف.. نايف شوي اليوم متعكر مزاجه وطلع العصر ولا رد..
مي: اسميهم الرياييل غصه
ريم: ههه حرام عليج..لحظه لحظه

رفعت ريم تيلفونها تشوف منو ع الخط الثاني..

ريم: اقولج ميوه نايف ع الخط..
مي: خلاص عيل سلمي عليه..
ريم: يبلغ ..فمان الله..

ردت ريم ع الخط الثاني..

نايف: هلا
ريم:اهلين
نايف: وين انتي ؟
ريم: في الحجره
نايف: شو تسوين ؟ تقرين ؟
ريم: هيه .. وعقب رمست ميوه..
نايف:مانزلتي عند قوم امايه عقب ماطلعت عنج
ريم: لا
نايف: شو بلاج زعلانه ؟
ريم: مب زعلانه
نايف: شو بلاج عيل منتفخه
ريم: مب منتفخه
نايف: اعرف انه اسلوبي ماكان اوكي بس هاي اسموه نرفزتبي وانا يوم اظايج من حد مابا اسمع حد يدافع عنه
ريم: اوكي
نايف: شو اوكي
ريم: اوكي يعني فهمت انه مره ثانيه لو حد ظايج بك مابدافع لانك ماتحب هالشي
نايف: ريمان قولي شو في خاطرج
ريم: ماشي
نايف: قولي مابزعل
ريم: نايف مابا اشوفك في مشكله ويا اهلك وما اهدي الوضع .. ومابا ينقال انه انا غيرتك عليهم او اني ماحاولت اصلح شي صار وانا لي القدره اني اتدخل
نايف: ليش جيه تفكرين ؟
ريم: لازم افكر جيه عشان احافظ على صورتي جدامهم وانا بها الشي ماجامل انا يالسه اادي واجب واسوي اللي تمليه عليه اطباعي وانا احب بنات عمتي ومارضى هالشي يستوي ويا اخوهن سواء كان هالاخو زوجي او لا

نايف سكت .. كلام ريم صح ها تصرف طبيعي .. لازم انها بتحاول تهدي الوضع كون انه علاقتها زينه ويا خواته .. لو هي ماتحبهم جان زادته .. وهو غلط يوم انه رفض تتدخل بس بعد هو انقهر من اخته ..
نايف: حقج عليه ماكان لازم اعصب عليج لكن انا كنت معصب ومارمت ايود عمري
ريم: نايف السالفه ماترزى تعصب عليها .. انته اخوهم العود لازم تتحملهم انا ياما احصل من خواتي لكني ماعصب واطنشهم .. مايهونون عليه اعصب منهم وارد عادي
نايف: انزين شو يرضيج اسوي؟
ريم: شو رايك باجر تودي اسما ولطوف دبي وعقب نوصلهم العين
نايف: لا صعبه ريمان
ريم: شو الصعب
نايف: ورانا دوامات
ريم: انزين مابنبطي بنظهر من الظحى ..انته بتنزل تصلي الجمعه في دبي ونحن بنترياك وعقب بنسير السوق ع العصر بنطلع العين نوديهم ونرجع
نايف: بشرط
ريم: شو ؟
نايف: ونحن رادين نسير نتعشى انا وانتي
ريم: غالي والطلب رخيص
نايف: ههه جيه اباج ماحب يوم تبوزين
ريم: عاد انا اللي احب يوم تبوز .. يالله رد البيت بسك هياته
نايف: انا تحت طلي من الدريشه بتشوفيني في السياره
ريم: ويالس ترمسني في التلفون ؟ قوم يالله انزل
نايف: انزلي انتي شوي بنيلس ويا قوم امايه تحت مايلسنا اليوم
ريم: اوكي .. يالله حبيبي باي
نايف : باي

سكرت ريم وسارت تتلبس وهي تحس براحه .. يوم يستوي اقل شي بينها وين نايف تحس الدنيا ظايجه عليها لكن من ينحل ترتاح وايد وتحس الحياه سهله ..


رايكم يهمنــا..:blush:

صراحه أسلوب و لا أروع و بأذن الله أنشوف لج مألفات و مطبوعات

و ما شاء الله عليج أنتي رائده في مجال القصه

أتمنى لج التوفيق

السلام عليكم..

شو هالجزء الحلوووو؟؟

ماشاء الله .. شو قتينا و ونستينا بهالاضافه .. ^_^

..

ربي يعطيج العافيه .. :fa51:

بطني يعورنيه من الخووووووووف على مي
لا حووول صدق الواحد يبتلش يوم يضيع عنه شي
الجزء روعه وماعليه كلام
يعني هذي نتايج صبرنا:a033:
بس بعدني احاتي مي
اظني سلطان بهالطريجه رااح يتقرب من مي مدري ليه؟؟
لاهنتوا عالجزء

.
.
.

نجم سهيل

اقتباس:

---

صراحه أسلوب و لا أروع و بأذن الله أنشوف لج مألفات و مطبوعات

و ما شاء الله عليج أنتي رائده في مجال القصه

أتمنى لج التوفيق

---

أخجلت تواضعنا اخي الكريم :k_blush-anim-cl: ..
لا ما نوصل للرياده لكنا مجرد هواه ونتمنى انه خطانا تستمر في مجال الكتابه
مشكور اخوي على اضافتك الرائعه ..

.
.
.

شوق القلوب

اقتباس:

---

شو هالجزء الحلوووو؟؟

ماشاء الله .. شو قتينا و ونستينا بهالاضافه .. ^_^

---

عيونج الحلوين عزيزتي ..
ترقبي الياي ان شاءالله يونسج أكثر ..
وربي يعافيج .. :fa35:

.
.
.

هزاايم

اقتباس:

---

بطني يعورنيه من الخووووووووف على مي
لا حووول صدق الواحد يبتلش يوم يضيع عنه شي

---

الله يعينها مي .. السالفه مب هينه لكن ما يندرى شو ممكن يصير !

اقتباس:

---

الجزء روعه وماعليه كلام
يعني هذي نتايج صبرنا
بس بعدني احاتي مي
اظني سلطان بهالطريجه رااح يتقرب من مي مدري ليه؟؟
لاهنتوا عالجزء

---

تسلمين عزيزتي ..
وسلطان هل بيتقرب ولا بيبعد كل شي بيتضح ..
حياج الله .. :fa35: