|₪|..قـلـوب تـحـت الـمـجـهـر ..|₪|

حلم الطفوله

اقتباس:

---

السلام عليكم

أحلى المزايين المجكنمين في الواحات والجامعه:fa35:

يقولج هالجزء وايد عيبني ... فيه أحداث حلوه عن ريماني ...

وكله ولا نظرية صاد عين صاد .... جان أطبقها في تشفيراتي مع ربيعتي:fa35:

ربي يعطيج العافيه انتي وعاشقة الشمال .... هالقصه قريبه للقلب سبحان الله:ice:

---

وعليكم السلام والرحمه ..

ان شاءالله دوم وكل جزء ..
ص ع ص دايما متواجده فحياتنا اليوميه .. خخخ .. يحتاي لمثل ها التشفيرات ..
الله يعافيج الغاليه ..وحياج ..

ريم ريم

اقتباس:

---

وينج طولتي وااااااايد

---

دلعناكم فالصيف .. عاد الحين اعذرونا :ice:
تدرون سكن ودوام .. بس ان شاءالله انزل اليوم ..
وحياج..

الجـــزء التــــاسع عشـــر

************************
(الاربعا) 20 اكتوبر 2004
************************

من بعد ما وصلن ساره ومي من الجامعه .. نزلن من الباص وكان اللي ياينهن ها المره خالهن محمد .. سلمن عليه وركبن السياره وتموا يسولفون..

محمد: ميووه شو غادي عليج جي ضعفانه ومسمره
مي: لا تقووول .. مسمره؟؟!
محمد: هي والله
مي: مادري والله .. دوامي عز الظهر لازم بدقني الشمس وبسود
محمد: الله يعينج .. شخبار دراستكم انزين!
مي: الحمدلله
محمد: وانتي ساروه؟
ساره: الحمدلله خالي .. امشين ..
محمد: زين والله
مي: يلا خالي مش بسرعه ..
محمد: هههه ع شو لاحقه
مي: احس وناسه بنفطر عندكم .. احب ها الوقت قبل الفطور عندكم.. الكل يلتم..
محمد: ياوناسة بناتي عيل ..
ساره: يدرن انه بني؟
محمد: هي خواتكن من الظهر عندنا ..تلقن احلام الحين واقفه عند دروازة البيت تترياكن
مي: ههههههه تسويها الخبله ..

من بعد ما وصلوا واستقبلوهم الموجودين .. قامن البنات يساعدن الحريم في الفرش .. وتجهيز السفره .. وبعد الفطور .. تيمعن البنات فحجرة احلام ياخذن اخبار بعض ..

احلام: اقول ما بتسيرن تصلن فالمسيد؟
ساره: اانا مااروم
مي: ليش ساروه.. انا فخاطريه اسير
احلام: انزين خلينا نسير انا وانتي .. ترا ماشي وقت باجي نص ساعه
مي: انا ابا اسير .. بقوم اتسبح ..
احلام: عيل استعيلي انا بعد بقوم اتسبح ..
مي: اووكيك ..
ساره:انا بسير بطالع التلفزيون

وكل وحدة سارت تقضي حايتها .. ومن بعد ما خلصوا مي واحلام طلعوا ويا الحريم صوب المسيد ..
وعقب صلاه التراويح توالفوا كل الحريم برع وفرشوا فمكانهم المعتاد .. اما البنات تيمعوا ع صوب ويلسن يسولفن ..

مي: عن منو يرمسن الحريم.. منو تعبان؟
احلام: بابا زايد ترا تعبان ..
مي: هي صح .. فديت روحه الله يقومه بالسلامه ..
احلام: من طاح تعبان وانا قلبي يعورني عليه ..
مي: مأجور ان شاء الله ..
ساره: اقولكن قومن نيلس بعيد عن الحريم .. رمستهن تيب الكآبه
مي : وين تبين؟
ساره: نسير صوب الكراج.. مكاني المفضل
احلام: مالت عليج ..
مي: صبرن بييبلي كراميل .. فخاطريه ..
احلام: انا ابا جلي .. هاتيلي وياج
مي: وانتي ساره؟
ساره: مابا شي ..

سارن احلام وساره للمكان المقصود ولحقتهن مي وفايدها الكراميل والجلي ويلسن كلهن حذال بعض ..

مي: ابا اكمل رمضان هنه .. والله شوها فالجامعه تعب
ساره: بس بعد وناسه فالسكن..
احلام: لازم وناسه عند ساروه .. اقولج سويره اطربينا بصوتج الشجي شويه
ساره: كح كح .. اخجلتيني ..
احلام: ههههه غبيه ..
ساره: يلا ما يطلبه المشاهدون ..
مي: اييه رمضان خافن ربكن
احلام: يالله عاد انتي .. من الله تغني بدون لحن ..
مي: عاد المفتي يوم يفتي
احلام: يلا عااد .. ساروه اطربينا يالله ..
ساره: اليكم كوكب الشرق ..
مي: ههههههه كوكب الشرق قاالت
احلام: لا لا كوكب الشمال هاي
ساره: بس اص خلوني اندمج فاللحن ..
وقامت ساره تلحن .. لين بدى صوتها يظهر بكلمات حلوه ..

مروان في هالوقت يالس توه بيدخل البيت من باب الكراج لكنه سمع صوت حد يغني .. وقف وتم متذري بشيره الغافه اللي عند الباب ..

ساره: صغيره كنت وانته صغيرون ..
حبنا بدى بنظرات العيون ..
قالوا ترى ذولا يحبون ..
وبننتظر لمن يكبرون ..
احلام: بس بس لاتكملين عراقي عن تسمعج امي ويحل عليج غضب الاله
مي: هيهيهي تطلع حرتها في ساروه وتقوم تغتالها
ساره: لالا يابويه لاتغتالني احين بجلب الموجه
وطني حبيبي وطني الغالي وطني النجم العالي وطني
شعله مضيئه كلمه جريئه وطني وطني الغالي وطني
كملت وياها احلام: الله الله يانجم الحياه .. ياكويت ياكويت انتي الحياه
مي: هههههه والله انكن حاله ..

تراجع مروان بخطواته وقرر يأجل زيارته وروح بيتهم ..
وهو يمشي لين البيت ردد باقي كلمات الاغنيه اللي غنتها ساره .. وكتب تكملتها في مسج وطرشه لها ..

رن تلفون ساره يدل انه في مسج واصل

ساره وهي تحط ايدها في مخباها تطلع التلفون: وااا فديت اللي يذكرني اناا
فتحت المسج وانجلب ويها كامل .. لكن رحمها ضوء القمر الخافت اللي ساعد في اخفاء تعابير ويها
مي: منو اللي ذكرج ؟
ساره: هاه .. هاي وحده من بنات الجامعه ..
مي: وفي حد يذكرج غيرهم ..قومن نسير صوب الحريم باجر بنروح عنهم
قاموا كلهم وتمت ساره اخر وحده .. ريلها ماشلتها من الصدمه ..
كان المسج من مروان كاتب فيه
( مثل نجمه والقمر
كبر حبنا وازدهر
بعيونك حبيبي
تبتدي دروب السفر)
هاي تكمله الاغنيه اللي كانت تغنيها !!!
معقووووووله سمعها ؟!
ليش وين كان هوو؟
وكيف ماحستبه ؟

ماعرفت شو تسوي ؟ واذا زقرت مي بتحس احلام انه في شي..
خلت السالفه بينها وبين نفسها .. بس الافكار توديها وتيبها .. تحس بحراره تسري بجسمها كله ومب عارفه شو تسوي ..

****

هالويكند فجر قررت ما تنزل البيت .. بما انه الجامعه في رمضان لها طعم ثاني .. اقنوعها ربيعاتها انهم يتمون ويسهرون مع بعض ويطلعون رباعه ..
وعلى الساعه 10 بدت سهرة البنات وظهرت فجر بسيارتها ويا دلال ولولوه و كانت وياهم زهره ربيعتهم متعرفات عليها من فتره بسيطه..كانن وايد مستانسين على هاي الظهره .. وتوجهن لشاطي البحر وفرشن هناك ويلسن ..

فجر: اروح اطلبلنا عشا؟
دلال: لا فجر تو الناس ..
لولوه: انا احس شبعانه من الفطور .. مابي اكل شي ثاني اخاف انتفخ..
فجر: شدعوه عاد .. يا على اليوم تبين تحافظين فيه على رشاقتج
لولوه: اذا بناكل شي خفيف هي اوكي ..
فجر: خلاص .. كملوا سوالفكم وانا بروح اطلبلنا أي شي ..

قامت فجر من عندهم وركبت سيارتها وتوجهت لأقرب كافتيريا منهم .. مانزلت ولكنها كانت تنتظر شخص .. ويوم لمحته نزلت من سيارتها وتوجهت عنده ..

فجر: قوه أحمد
أحمد: هلا والله ..
فجر: تأخرت عليك؟
أحمد: لا عادي.. قايلين عشر ونص نكون فها المكان .. بس تأخرتي خمس دقايق
فجر: ههههه حاسبنهم ..
ابتسملها أحمد ..اما فجر حاولت تشتت نظرها فكل مكان بس عسب ما تتلاقى ويا نظراته اللي تذبحها ..
أحمد: وربيعاتج وين عيل؟
فجر: قاعدين ع الشاطي..مو فخاطرك تقعد معانا؟
أحمد: مم .. انتو شلة بنات كيف تبيني ايلس وياكم جي
فجر: عادي تعال .. لولوه رفيجتي بتنادي خطيبها واكيد هو بيي ويا رفيجه..
احمد: ماعرف
فجرتتوسله بكل رقه: الله يخليك..وناسه
أحمد ما قدر يقاوم ويمنع رغبته من انه ييلس وياهم .. ما يدري ليش بس فخاطره كان يكون ويا فجر ها الوقت .. يبى يسولف وياها ..
احمد: خلاص اوكي .. بس ..
فجر: آمر
احمد: ما يامر عليج عدو .. انا بتم هنيه ويوم خطيب ربيعتج بيي قوليلي عشان انا ايي
فجر: ممم .. وليش ما تي معاي الحين
احمد: لا احس فشله ..
فجر: خلاص اوكي .. انا بطلب للبنات شي بارد وبرجع ..
احمد: لا تطلبين شي .. انا يوم بيي بييب الكم كل شي
فجر: لا والله ما يصير
أحمد: يصير ونص .. خلاص ركبي سيارتج ولا ترديني
ناظرته فجر فعينه ونزلتها حيا وهي تبتسم ..
فجر: خلاص اوكي ..

أخرت على ورا وتوجهت لسيارتها وركبتها وهي تأشرله .. رجعت لربعها وهي فكرها أبدن مب وياها .. انسحرت .. انشلت اطرافها .. اتجمد تفكيرها .. ماتقدر تشيل احمد من بالها .. نزلت من السياره وانتبهت انه الشله زادت ..
عرفتهم لولوه على خطيبها اللي كان ياي ويا ربيعه ..
اتصلت فجر على طول بأحمد تقوله اييهم وخبرته بالمكان .. وبعد ربع ساعه وصل عندهم أحمد .. واتعرفوا كلهم على بعض وتسامروا فها الليل ..
فجر كانت وااايد مستانسه وفخاطرها الليل يطول أكثر..ويلسوا يلعبون ورقه وخذوا على بعض وايد فها اليلسه ..


**********************
(الثلاثا) 2 نوفمبر 2004
**********************

بعد ما خلصت مهره صلاه التراويح .. نزلت الصاله اللي تحت وشغلت التلفزيون تبى تشوف المسلسل لكنه بعده مابدى .. فبدت تجلب في باقي القنوات وصلت لقناة دبي
(وانا لله وانا اليه راجعون
صاحب السمو رئيس دولة الامارات طيب الله ثراه كان رجل بكل مابالكلمه من معنى
حياته في هذا التقرير)

مهره يلست مكانها وهي تبلع ريجها .. صحيح اللي تسمعه ..
ركضت غرفه يدتها اللي كانت توها واقفه بتكمل صلاتها ..

مهره: امايه امايه
ام سيف التفتت لها: خير
مهره: امايه بابا زايد توفى
ام سيف: شوووو ؟ منو يقولج ؟
مهره: هاكم مطلعين في قناه دبي
ام سيف: لاحوووول ولا قوه الا بالله
لاحول ولا قوه الا بالله

مشت لين الصاله وهي تكرر هالجمله .. ويلست وهي بعدها بوقايتها مال الصلاه جدام التلفزيون

ام سيف: طولي ع الصوت
مهره طولت ع الصوت وتمت ام سيف تطالع التلفزيون ودموعها على خدها
ام سيف: الله يرحمك يا بوخليفه الله يرحمك ويعفو عنك
في هالوقت دخل جاسم ومايد راجعين من المسيد ..
مايد: السلام عليكم
محد رد عليه .. مهره ويدتها عيونهم ع التلفزيون
مايد: بلاكم؟
جاسم تجدم من التلفزيون وهو ينقل نظره بين يدته والشاشه ويقرا الخبر اللي مكتوب عليها
جاسم: زايد في ذمه الله ..
مايد يلس ع الكرسي و جسوم يطالع يدته ويلس ع الارض..
ام سيف: الخلاف الله عقبك يا زايد .. ظعنا من وراك يا بوخليفه.. الله يرحمك ويغمد روحك الجنه يا شيخنا ..
ورفعت ايدها تدعي بصوت متقطع تصاحبه دموع حاره من عيونها تحرق قلبها على الوالد الغالي الي وافته المنيه .. وقع الخبر سبب الصدمه ومحد مستوعب الي صاير ..
ام سيف: يالله يارب تغفرله ونحن في هالايام المباركه وتعفو عنه .. يارب ارزقه الجنه بدون حساب امين يا رب العالمين ..

وكملت دموع ام سيف بالانهمار وهي حاطه طرف شيلتها على عيونها تمسح فيها دموعها الي ما وقفت ..
دشت مها الصاله وهي تشوف الاجواء من بعد ما سمعت الخبر من عند ناعمه الي كانت يالسه وياها فصالتها فوق .. تم قلبها قابضنها وهي تشوف يدتها تصيح بها الضعف .. وتجدمت ويلست حذال مهره وهي تطالعها بنظره مكسوره ..

مها: الله يرحمك يا ابونا.. مادري شو من عيشه بنعيشها من عقبك
مهره: خلف رياييل وراه .. بس ماظن حد فها الكون بيكون شرات بابا زايد
مها: الله يعيين .. الا ريمان وين .؟ تدري؟
مهره: مادلها
مها: بقوم اطالعها ..

وقبل ما تنش مها .. دخلت ريم الصاله من بعد ما نزلت من فوق بعد ماوصلها مسج عن الخبر .. ولقتهم متيمعين في الصاله ..
ريم وهي تحب يدتها ع راسها
ريم: عظم الله اجركم امايه
ام سيف : اجمعين فديتج

ريم من شافت حال يدتها ضعف قلبها أكثر بس يودت على عمرها ..
نشت ام سيف بخطوتها البطيئه تمشي لغرفتها

مهره: وين سايره اميه ؟
ام سيف: بكمل صلاتي ..

نشت ريم ورا يدتها توصلها للحجره وخذت لها وقايه من عندها وشلت مصحف وطلعت يلست في الحوي جداام باب الفله .. قلبها معورنها وبدت تنزل دموعها اللي ميودتنهن .. آثار الصدمه امبينه على ويوه الكل .. والاستيعاب صاير بطئ .. والدنا الغالي سلم روحه لباريه .. صدقج يا مها شو من حياة بنعيشها من بعدك يا زايد الخير..
فتحت ريم المصحف وبدت ترتل آيات قرآنيه ..
يت مهره ويلست عدالها ع الدري وهي تسمعها تقرى .. ولا ارادي نزلن دموعها ..
رفعت ريم راسها وهي تقاوم دموعها وتمسحهم وتشوف مهره ..

ريم: وين خوانج
مهره: كلهم داخل .. الفروخ يطالعون الاخبار ومهوه سارت تصلي وتقرا قرآن
ريم: زين ..
مهره: ريمان
ريم : ها؟
مهره: مارمستي قوم ميوه ؟ يعرفون ولا؟؟
ريم: مادري مارمستهم .. تلفوني فووق .. سيري دقيلهن شوفيهن..
مهره : ادق لميوه وماترد وساروه مغلق
ريم: اكيد عندهن خبر عيل
مهره: لازم .. من الله انتشر بسرعه فدقيقه بعد ..
ريم: الله يعين..

قامت مهره اما ريم تمت يالسه مكانها وكملت تلاوه .. بس وقفها صوت سياره داخله البيت ..
رفعت راسها وسارعت في مسح دموعها
نور اشعة السياره ماخلتها تميز نوعها لين تقربت أكثر.. انصدمت انه اللي ياي نايف .. اول ما نزلوا من السياره وقفت ريم على طول وعدلت تحجيبتها ..
تقربت منها عمتها..

مريم: مرحبا ريمان
ريم: مرحبتين.. اشحالج عموه؟
مريم: الحمدلله غناتي.. انتي اشحالج ؟
ريم: الحمدلله ..
تقرب نايف من ورا امه ومد ايده حق ريم
نايف: هلا ريمان اشحالج؟
ريم: الحمدلله ..
مريم: عيل امايه وينها ؟
ريم: داخل تصلي
مريم: زين عيل بدخل اطالعها
دخلت مريم وتم نايف واقف مجابل ريم اللي وطت راسها يوم شافته مركز نظره عليها
نايف: كوني اقوى عن جي ..
عظت ريم ع شفايفها وحاولت تتمالك نفسها ..
ريم: اتفضل مابتدخل ؟
نايف: لا .. بيلس مكان ماكنتي يالسه ..

تجدم ويلس ع الدري قبلها واشر لها عشان تيلس عداله .تجدمت ريم ويلست قريب منه .. وبدى شوي يرمسها يحاول يغير مزاجها مع انه هو الثاني اتعكر مزاجه وتموا الاثنين يالسين عدال بعض كل واحد متظايج .. ريم لامه ريولها ومسنده ويها على ركبها ونايف عدالها يلعب بسويجه وسرحان .. لين طلعت برع يدتهم ومريم ويلسوا كلهم برع ولكن الحزن مغيم عليهم ..


****

فالسكن .. كانت مي قابضه كتابها اللي مسولها أزمه من ثجله وتحوطبه فالجناح .. نازعتها وحده من ربعها تباها تيلس فالحجره وتذاكر .. لان كان عندها بالباجر منتصف ماث ..
حطت مي الكتاب ع راسها وهي تتأفف وردت داخل الحجره وقفلت ربيعتها عليها الباب .. طاحت ع شبريتها وتمت تجلب فالكتاب بس ماتحس لها نفس للدراسه..
ماهي الا دقايق وتسمع دق ع الباب .. وشوي انفتح الباب .. وكانت البنت اللي قافله عليها الباب يايتنها ..

مي: منووه شو بلااج؟
منى تمت ساكته ويلست حذال مي ..
مي: شو بلاج .. ليش تصيحين؟
منى: ميووه .. الشيخ زااايد
مي بحلقت بعينها ع الاخر ..
مي: منوه دخيلج لا تقولين
منى: ماعرف ميوه .. ماعرف اذ الخبر اكيد ولا لا.. بس القنوات كلها محطيه قراان

مي تمت ترجف.. ماعرفت شو تسوي .. قبضت تيلفونها .. دورت الارقام .. لمنو بتتصل.. منو بيعطيها الخبر الاكيد .. محمد .. ماغيره ..
دقت مي لخالها .. اللي تأخر فالرد ..
رد عليها بصوت متقطع وحزين ..

مي: خالي صدق اللي سمعناه
محمد: شو سمعتي
مي: خالي قوول.. صدق الخبر ولا..
محمد: انا لله وانا اليه راجعون.. هي فديتج .. زايد رحل عنا خلاص..

فها الوقت من بعد ما تيقنت مي من الخبر .. اطلقت العنان لدموعها .. وشاركتها ربيعتها .. دخلت عليهم ساره اللي كانت مصدومه بالخبر .. ويلست حذالهم ..

اما فالصاله .. البنات كلهن كانن يتصايحن .. واللي منهن مب مستوعب الخبر .. كيف ابو الدوله اللي متعودين عليه .. فجأه يرحل عنهم .. دموع الناس لو انهمرت من اليوم لسنه .. عمرها ما بتوفي لزايد أي حق ..
من بيواسي من .. الكل يصيح .. ساره ما قدرت تهدي فمي اللي كانت تصيح من خاطرها ... ماعرفت شو تسوي غير انها تحضن اختها وتنزل دموعها اللي كانت حابستهن عسب تقوي من مي شوي..

وبعد ساعه تقريبا من ها الخبر .. قامن مي وساره وتيددن .. وتوجهن هن وربعهن للساحه اللي تقام فيها صلاة التراويح فالسكن.. وصلوا صلاة الغايب .. وعقب رجعن المبنى .. ماكان لأي شخص فها اليوم خاطر لأي شي ..

جيكت ساره ع تيلفونها وشافت انه امها متصله كم مره .. اتصلتلها .. وتمن يرمسن .. وعطت مي السماعه عسب ترمس امها..

عليا: ها حبيبتي شحالج
مي: شو حالنا من بعد بو خليفه يا اميه..
عليا: الله يرحمه ويغمد روحه الجنه .. ونعم القايد كان.. لكن الواحد شو بيقول
مي: انتو شحوالكم؟
عليا: الحمدلله .. متى بيردونكم باجر؟
مي: والله مادري يمكن الصبح ..
عليا: خلاص فديتج لا تسهرون وايد .. انا بسكر عنج الحين وبسير اشوف قوم اميه
مي: خلاص اوكي.. سلمي عليهم
عليا: يوصل .. فمان الله
مي: مع السلامه ..

سكرت عليا التيلفون .. وقامت بتسير الصاله بتشوف منو يالس هناك .. دخلت الصاله وماكان غير صوت المذيع يتكلم عن حياة زايد .. وكل اللي يالسين صاخين ولا يتنطقون بأي صوت .. يلست وياهم عليا وشاركتهم أجواء الحزن ..

ام راشد: عليا رمستي بناتج.؟
عليا: هي اميه توني مسكره عنهم
ام راشد: متى بيردونهن
عليا: بعدهن ما يدرن .. المفروض عندهن امتحانات باجر بس اكيد كل شي بيتأجل
محمد: طبيعي .. مستحيل اصلا يخلونهم يداومون شي لازم بينزلونهم من الصبح
عليا: تقولي ساروه كم وحده اغمى عليها هناك فالجامعه من عرفت الخبر
ام راشد: عندالله يا الدنيا..
عبير: الله يصبرنا كلنا ان شاء الله ..
محمد: امين ان شاءالله .. عاد انا باجر لازم افزع من وقت للجريده.. الشغل بيكون لين فوق روسنا ..
عليا: الله يعينكم ..

وتمت هاي مناقشاتهم عن الموضوع .. احلام ومديه كانن يالسات حذال بعض مره يسمعن الاهل ومره يلفن ع التلفزيون ويشوفن .. احلام كانت تحس بغصه فحلجها ومب قادره دموعها تنزل.. تحس انه ها الشي مب فالحسبان .. تعودوا يقولون الله يحفظك يا بوخليفه ..الله يطول بعمرك يا بوخليفه.. لكن الحين .. بوخليفه راح .. ومالهم غير الدعاء له .. ربي يرحمك يا بو خليفه ..



***********************
(الاربعا) 3 نوفمبر 2004
***********************


الساعة 12 الظهر دخلن مي وساره البيت اللي كان هاادي وما ينسمع فيه ولا حس.. زقرت مي يدتها لكن محد رد عليها .. وسارت على طول لحجرة ام سيف .. حصلتها هناك راقده .. مابغت تغثها حبتها ع راسها وطلعت من الحجره .. لكن قبل ما تظهر ..

ام سيف: منو ها
لفت مي على يدتها وتجدمت صوبها
مي: قمتي
ام سيف: ميووه .. فديتج متى ييتوا!
مي: تونا واصلين
ام سيف: وساروه وين؟
مي: سارت تزقر نجموه عسب تشل الشنط ..

يلست مي حذال يدتها اللي قامت من طيحتها وتربعت ع السرير..
وشوي دخلت ساره الحجره ..

ساره: السلاام علييكم
ام سيف: وعليكم السلام .. هلا وغلا بسويره
تجدمت ساره وسلمت على يدتها .. ويلست حذال اختها ..

ساره: بلاه البيت ميت ..
ام سيف: جان مب رقود
مي: شكلهم جي .. الدنيا وايد صخه
ام سيف: من وصلنا الخبر محد ياه نوم موول.. شكلهم انهدوا الحينه ورقدوا
ساره: الله يرحمك يا بوخليفه..

ام سيف تغلبها دمعه نزلت من عيونها ومسحتها بطرف وقايتها ..
ام سيف: عند الله يا الدنيا.. شيخ الرياييل كلهم راح خلاص
مي: الله يرحمه يا امايه.. مسكين كان تعبان ومريض.. الله ريحه من ها التعب..
ساره: الله يرحمنا برحمته ..
مي: تعرفين اميه .. ونحن رادين الشوارع كلها فاضيه..بس باصات الجامعه ..
ام سيف: الناس كلها فبوظبي.. لازم بتفضى الشوارع
مي: والله يا امايه الواحد مايروم يستوعب الي مستوي .. صدق يعني
ام سيف: هي والله ..
ساره: الله يرحمه ان شاء الله ..

قامت ساره من مكانها ..
ساره: انا بقوم ارقد راسي يدور دوار
مي: هي انا بعد
ام سيف: شو تبن فطور؟
ساره: انا مابا غير الرقاد

طلعن مي وساره وتوجهن لغرفتهن .. بدلن وصلن ورقدن من عقب ما انهد حيلهن من المواصل والسهر والدرب..اما خواتهن فكانن يالسات فالصاله.. وعقب نزلت ريم عند يدتها وكانت ناعمه وياها.. وتموا يرمسون عن الشغل الشاغل ها الوقت وهم يتابعون مراسم الدفن..

****

كانت عليا يالسه في الصاله ويا امها وعبير وميره وشيخه ..بعد يتابعون مراسم الدفن .. عليا قابضه في ايدها اوراق امتحانات لطالباتها اللي تدرسهم .. تصححها..

احلام: عموه شو تبين تصلحين احين هالاوراق ؟
عليا: ابا افتك منهن عندي 90 ورقه قبل يومين ممتحنتنهن وابا اخلص عشان ارصد الدرجات
احلام: اساعدج عموه ؟
عليا: لامابتعرفين انا ساعات اتجاوز في بعض الاجابات ..
احلام: انزين بصلح الصح والخطأ
عليا: اوكي صبري بعطيج ورقه وحده يايبه علامه كامله وصلحي عليها .. بس لاتخربطين شوي شوي
احلام: اوكي
قبضت احلام قلم احمر ويلست تساعد عمتها وتصلح وياها بينما كانوا يتابعون التلفزيون اللي كانت قنواته تحكي عن سيره الشيخ زايد رحمه الله ..
في هالوقت دخل محمد عليهم ياي من الجريده ..

محمد: السلام عليكم
الحريم: وعليكم السلام
محمد يلس على اول كرسي : شحااالهم ؟
ام راشد: بخير وسهاله يا وليدي
عبير: شفيك تاخرت اليوم ؟
محمد: زاد الشغل عليينا ها اليومين
احلام: ابويه ليش مب عاطينك اجازه ؟
محمد: ماماه هاي جريده.. وفي خبر مهم مثل ها بيزيد عندنا الشغل .. انا كتبت مقاله باجر بتنزل الجريده ..
عبير: انزين روح ارتاح شوي بقعدك تصلي العصر
محمد: خلاص اوكي .. لانه عقب التراويح بعد برجع الجريده اراجع الشغل
عليا: الله يعطيك العافيه ياخويه
محمد: الله يعافيكم ..

قام محمد ورجعوا الحريم يتابعون التلفزيون .. واحلام وعليا كملوا تصحيح الاوراق لين صلاه العصر عقب قاموا يجهزون للفطور ..




************************
( السبت ) 6 نوفمبر 2004
************************

الصبح طلعت ريم ومي من البيت وتوجهن لبيت امهن عسب يسيرن السوق.. اول ما وصلوا نزلت مي من السياره ودخلت البيت اما ريم فتمت فالسياره.. دخلت مي على امها وشافتها ادور فالكبت على شي ..

مي: مرحباا
لفت عليا على اللي داخل وشافت بنتها واقفه.. ابتسمتلها وفتحتلها ذراعينها .. مي توجهت لامها وطاحت فحضنها ..

عليا: شحالج غناتي؟
مي: الحمدلله اخبارج انتي
عليا: الحمدلله ..
مي: ها خلصتي..
عليا: هيه .. بس يالسه ادور فاتورة المخور وفي ثانيه مالت الخياط .. مب محصلتنهن
مي: ليش انتي وين حاطتنهن ؟
عليا: هنه ..
مي: قومي انزين انا بنبش.. خبره فالتنبيش
عليا: هههه تخبريني عنج .. محد كان مخبلبي غيرج انتي وتنبيشج ..

وتمت مي اتدور فالكبت وما حصلت الفواتير.

مي: اميه .. تذكري يوم رديتي من المخور وين حطيتي الفاتوره.؟
عليا: ما ادري يا امج .. ناسيه
مي: شو خرفتي مامااه!
عليا: هههههه عيزت امج ..
مي: ماعليه انزين الخياط من الله يعرفنا .. مايباله فاتوره.. بس المخور ..
عليا: ترا هذا هو
مي: انزين شفتي ف بوكج ؟
عليا ضحكت بعد ما ستوعبت اخر كلمه قالتها مي ..
مي: اكيد فالبوك
عليا: هيي .. خاشتنها فيه امس فليل..
مي: يوم اقولج خرفتي
عليا: تراا قبل كنت حاطتنها فالكبت نسيت اني رديتها فالبوك
مي: والله انج انتي يا امااايه تحفه
عليا: غربلات بليسج ماباقي الا تخليني مزهريه
مي: هههههههه فديت اميه ..
عليا: يلا انزين خلينا نسير
مي: اوكي .. اميه احلام ما بسير ويانا؟
عليا: امبلا مساعه قايلتي انها بتسير .. داخله تلبس احيدها مري عليها
مي: اوكي..بسير ازقرها .. ريموه بتحشر الدنيا ..
عليا: يلا انزين .. انا بسير السياره لحقنا ..
مي: اوكي..

طلعت عليا برع ومي سارت لبنت خالها وسحبتها من حجرتها وركبن السياره .. وصلوا السوق وكل شوي ينزلون مكان .. واخر محطاتهم كانت عند المخور عسب ياخذن كنادير العيد..
وهم نازلين .. رن تيلفون ريم .. شافت المتصل .. ابتسمت وردت على طول..

ريم: الوه
نايف كان مبين من صوته انه توه ناش من الرقاد: الووه
ريم بفرح: صباااااح الخير
نايف: صباح النور..
ريم: توك ناش؟
نايف: هي .. بعدني ع السرير ..

سمع نايف اصوات السيايير واستغرب .. سألها على طول..

نايف: وين انتي ؟
ريم: انا سايره السوق..
نايف: متى طالعه ؟
ريم: من الساعه 9 ونص جيه ..
نايف: ومنو وياج؟
ريم: اميه .. وميوه .. وبنت خالي ..
نايف: اهاا ..وانا ؟
ريم: شو انته ؟
نايف وهو كابت على غصته: انا مالي شور؟
ريم: تراك انته راقد و انا الا طالعه ويا اميه
نايف: في تطور اسمه مسج ..
ريم تمت ساكته متلومه مب عارفه شو تقول..
نايف: برايج يوم بتردين اتصلي .. فمان الله
ريم: مع السلامه ..

سكرت ريم التلفون والتفت لمي اللي يالسه مجابلتنها وتطالع الكندوره في ايدها

مي: شوفي كيف خربها .. حرام القطعه غاويه قام وخرب الوان الخوار.. اطالعي كيف استوت.. موول مب شي
ريم تمت ساكته بس عينها تلمع ..
مي: بلاج ؟
ريم: ماشي
مي: لا شي .. منو كنتي ترمسين ؟
ريم: نايف
مي: بلاه
ريم: ماعرف.. عقب بقولج ..

بعد ما خلصوا ركبوا السياره ورحوا. . نزلوا عليا واحلام وردن مي وريم البيت .. اول ما دخلن مي وريم الصاله لقن امهم عفرا يالسه تقرا قران ..
سلموا عليها ويلسن ..

ريم: اشحالج امايه ؟
ام سيف: بخير .. ابطيتوا
مي: وايييييييي تعبت والله يابوج من محل لمحل ومن خياط لمخور والله هلكونا
ام سيف: هههههه يا العيوز
ريم: امايه ها الكيس فيه كناديرج
ام سيف: كناديري؟ شو كناديره
ريم وهي تبطل الكيس وتطلع منه الكنادير : مخاوير العيد .. نحن سوينالج اياهن
ام سيف تمت تطالع الكنادير وتطالع البنات وهي مستغربه من تصرفهم
ام سيف: 13 سنه عشت ويا نعوم ما دخلت عليه حتى بوقاية صلاه وانتن تسون لي كنادير العيد
مي وهي تلوي ع يدتها: امايه نحن بناتج ونبى نلبس شراتج ... ترا هالقطعه الحمرا شرات كندورتيه .. بطقم وياج يالعيوز
ام سيف: ههه فديتكن والله ربي يحفظكن ليه ..بس منو له خاطر فها العيد من بعد بو خليفه
ريم: الله يرحمه يا امايه .. الحزن بيتم فقلوبنا وزايد لو انه راح بيتم ويانا كل شي حولنا يذكرنا به .. نحن من انولدنا وهو شيخنا .. ومن عشنا فتراب ها الدوله وهي تشهد له بكل شي.. زايد مامات يا امايه.. حي فقلوبنا ..
مي استغبنت وتمت ساكته ..
ام سيف: لكن الموت حق والله خذ امانته ..
ريم: ونعم بالله ..خلاص فديتج انا بصعد فووق تامرين بشي امايه ؟

ام سيف: لا فديتج .. هي صدق نايف اتصلبي مطرشلج ويا الدريول دفاتر مادري يقولي مال الصبغ ومال قطع الستاير.. عاد قالي اقولج نقي اللي تبينه وحطي عليه علامه عشان يوديه ..

ريم تغيرت ملامح ويها ع طول .. كان قايل لها انه بيمر هو بييب الكتلوجات وبيختارون مع بعض لون واثاث غرفتهم .. والحين طرشهم ويا الدريول!!
هالحركه اكدت لها انه مب بس عتبان عليها .. الا زعلان .. و وايد بعد ..
شلت اغراضها وصعدت فووق بدون ماتعلق على شي..

مي حست انه في شي .. وصعدت وراها على طول
ودخلت عليها الحجره لقتها يالسه ع السرير وشكلها متظايج
مي: شو بلاج ريموه ؟
ريم: نايف معصب عليه
مي: ليش؟
ريم: اتصل فيني يوم كنا في الخياط وقالي اني ظهرت بلا شور .. وسكر عني والحين يوم ييت البيت يدوه تقول انه مطرش الكتلوجات مع انه كان قايل انه هو بيخطفهن عليه عشان يختار ويايه
مي: وانتي ليش ماخبرتيه انج بتظهرين؟ كان بيمانع يعني
ريم: لا بس تعرفين اجازه وقلت اكيد راقد ما اتصلت به هاي يزاتي مابا انششه
مي: جان طرشتيله انزين مسج ع الاقل تكونين عطيتيه خبر
ريم: ترا هو قالي نفس الكلام
مي: انزين لاتظايقين بعمرج انتي واتصليبه عقب استسمحي منه قوليله ان شاء الله ما اتكرر .. واعزميه على سويت عقب التراويح عشان ايي بالمره وتختارون مع بعض مثل ماكنتوا ناوين

ريم سكتت ويلست تفكر شوي .. ليش هي تعقد المسأله كلام مي اختها صح
هي ماكانت متعمده تسوي شي يزعجه .. هي ماقصدت هالشي ودايما امها كانت تقولها انه هالفتره بتصير خلافات بسيطه لين كل واحد يتعود على طبع الثاني وشو اللي يحبه واللي مايحبه ..
ميوه طلعت اعقل عنها .. قدرت حجم الموضوع وعطتها حل ..
ريم ابتسمت لمي ورفعت تلفونها عشان تتصل بنايف
اما مي خلتها وسارت غرفتها ..

****

بين صلاة المغرب والعشا كانت بدريه يالسه في المستشفى مع عمتها وزوجها..
تحس بالم في بطنها لكن ماتعرف شو اسبابه .. وبما انها داخله من باب الطوارئ ماسوولها كل الفحوصات اللازمه لكن الفحوصات المبدئيه كانت اوكي .. عطوها موعد تراجعهم بعد 3 ايام في العياده الصبح ..
طلعت بدريه من المستشفى ويلست ورا وخلت عمتها تيلس جدام حذال ولدها
كان عدنان كل شوي يطالع بدريه من الجامه اللي جدامه

عدنان: الحين شو تحسين انتي احسن؟
بدريه رفعت نظرها تشوف عدنان وللحظه تخيلت اللي جدامها يالس سلطان سكتت وابتسمت له بوهن ورجعت ردت عليه
بدريه: الحمدلله حبيبي
عدنان استغرب الاسلوب اللي ترمس فيه وفي نفس الوقت استانس عليها
عدنان: ماباج تتعبين عمرج مول وان ماترومين للصيام فطري وبتعيدينه عقب .. اهم شي صحتج وصحه ولدي ..

كلمه ولدي كانت مثل الصفعه ع ويه بدريه اللي خلاها ترجع تمعن النظر في الجامه وتشوف اللي يرمسها عدنان مب سلطان ..
حست بغبنه تبى تنزل دموعها تباهم ينهمرن على خدودها .. خلاص ماعاد لها أي قدره على الاحتمال .. كتمت وايد فصدرها .. صار لها سر فحياتها .. محد يدريبه غيرها هيه وسلطان .. لكن سلطان وينه عنها .. تبرى منها ومن اللي فبطنها .. وهي مالها أي حقوق عليه عسب تطالب بها .. ماعندها غير انها تكمل الجذبه وتعيشها جنها هي الحقيقه ..

اول ما وصلوا البيت نزلت ام عدنان من السياره وتوجهت للبيت .. بدريه كانت فعالم ثاني ولا تدري انهم واصلين ..

عدنان: بدريه حبيبتي .. وصلنا البيت
انتبهت بدريه لصوت عدنان والتفتت حوالينها ..
بدريه: ها
عدنان: مب فخاطرج تنزلين.؟
بدريه: ماعرف.. عدنان ودني أي مكان مابا انزل البيت الحين
عدنان: انزين الساعه عشر الحين .. وين تبين تسيرين
بدريه: ماعرف عدنان .. ودني أي مكان .. والا اقول .. ودني البحر
عدنان: الا البحر .. ماطلبتي فديتج . تعالي يلسي حذالي .. بنخطف ناخذلنا شي بارد وبسير البحر..

اطالعته بدريه من الجامه وابتسمت له .. نزلت من السياره وركبت جدام ..وتوجهوا للبحر .. بدريه كان ودها تعق كل همها لها البحر .. وعدنان كل وده انه يقعد ويا حرمته فمثل ها الأجواء الحلوه .. تختلف النوايا لكن المكان بيظل يجمعهم

****

اما سلطان هالوقت كان موقف موتره عند باب بيت يده .. وناوي يدخل يشوف ان كانت فجر موجوده او لا .. يمكن يصدف انه يشوفها ويقدر يعرف منها ليش ماترد على تلفوناته ..
دخل البيت ولقى الحصير مفروش في الحوي بس محد يالس ..
وقف عند باب الفله وهود .. طلعت له مديه اللي كانت منسدحه تطالع التلفزيون

مديه: هدااا
سلطان: هلا .. امايه سلامه داخل؟
مديه: لا بس نحن اهنه
سلطان: منو انتوا ؟
مديه: طل براسك داخل بتشوف منو موجود في الصاله .. سوري بيطوفني المسلسل
دخلت عنه ورجعت يلست مكانها وين كانت يالسه تطالع ..
دخل سلطان راسه ولقى احلام ومديه يالسين يطالعون التلفزيون
وعقب قرر يدخل يمكن يلقاها ..

سلطان: السلام عليكم
احلام اعتدلت في يلستها: وعليكم السلام
تجدم ويلس ع اول غنفه ويلس يطالع وياهم المسلسل اللي هن مندمجات فيه ..
سلطان: احين انتن من الصبح تطالعن ها ؟ من زينه يعني
مديه: ليش مب عايبنك ؟
سلطان: شو فيه من زينه .. كل اللي في المسلسل بدون وهاي ماخذه مصري والعيال متلعوزين و مادري شو سالفتهم
مديه: برايه حلو
سلطان: لا لا مب شي .. حطن عشتار الفريد احسن

احلام كانت صاخه وتطالع سلطان وهو يرمس .. غريبه يعني يسولف وياهم
نشت من مكانها وسارت المطبخ .. تشوف الشغالات عشان ييبون كستر وحليب ..
في هالوقت سلطان كان يالس يتريا حد يخطف عليه لكن محد خطف لين احين ..

سلطان: مديه محد اهنه ؟
مديه: امايه سلامه وعموه بيت عمي راشد ..
سلطان كان يترياها تقول وين امها وخالتها لكنها ماقالت ..
سلطان: انزين قوليلهم اني ييت اسلم عليهم اوكي
مديه: اوكي
كان توه سلطان طالع من الفله ولقى عبير في ويهه
عبير: مرحبا سلطان
سلطان: هلا مرت خالي اشحالج؟
عبير: تمام انت شلونك ؟
سلطان: الحمدلله
عبير: وين رايح؟
سلطان كان يرمسها ويركز ع اللي وراها عند السياره : كنت ياي اسلم ع قوم امايه وماحصلتهم . يالله برخصتج
عبير: الله يحفظك
دخلت عبير الفله .. وتوجه سلطان صوب فجر
سلطان: فجر
فجر صدت ولقت سلطان في ويها: سلطان
سلطان: وينج انتي ؟ ليش ماتردين عليه يوم اتصل فيج ؟ شو فيج
فجر: اسكت لا حد يسمعك شفيك انته ينيت
سلطان: هيه تخبلت وصدقيني مابروح لين تقوليلي ليش ماتردين عليه
فجر: دخيلك وط صوتك روح روح وانا بدخل الحين بتصل فيك بس انته روح
سلطان: وان ماتصلتي
فجر: والله بتصل بس روح انته الحين
سلطان: اوكي بنشوف
روح سلطان عنها ودخلت هي البيت على طول ..
حطت اغراضها وقفلت باب الغرفه
فجر: حسبي الله عليه .. ين وقعد .. شفيه هذا زين مافضحنا .. كنت ناقصته انا..
شلت تلفونها واتصلت به
فجر: الوه
سلطان: الوه
فجر: سلطان ينيت انت ؟ شنو حركات المينن هاي اللي تسويها
سلطان: اوكي يا فجر الحين انا مينون
فجر: سلطان شفيك شصار الحين يعني
سلطان: ليش اتصل فيج ماتردين عليه .. لابستني ولا جنج تعرفيني
فجر: منو قال
سلطان: لا والله وليش يوم اتصل ماتردين
فجر: ماكو بس انت تعرف ان انا في البيت ماقدر اتكلم في التلفون داخلين طالعين عندي ماقدر اخذ راحتي
سلطان: مره وحده ماتظر ولا اظن حتى المسج بيظرج يعني
فجر: شفيك سلطان انته ادرى بالوضع في هالبيت شلون صاير سوق سمج مو بيت
سلطان: لاتطنزين
فجر: ماتطنز بس تشبيه بليغ
سلطان: لا والله
فجر: بس عاد شفيك حمقان علي
سلطان: ماشي ..
فجر: انزين شلونك ؟
سلطان: شو شفتي لوني توج ؟
فجر: ماشفت زين مافي اضاءه زينه
سلطان: لا والله تنكت اونها
فجر: انزين سلطان انا يايه بعدني مابدلت ملابسي .. ببدل وبكلمك بالليل اوكي
سلطان: اوكي بترياج
فجر: يالله مع السلامه
سلطان : باي..

سكرت فجر وهي تحس انها فموضع لا تحسد عليه .. شخصيته وايد قويه ها السلطان وماعليه من حد .. شو بتقول عنها عبير لو شافت سلطان وياها برع .. او لو جكتها انها تكلمه .. تم قلبها ناغزنها .. لكنها طبت الموضوع ..



***********************
(الثلاثاء) 9 نوفمبر 2004
***********************

الظهر عند غرفه العمليات كانوا ام بدريه وام عدنان يالسين يتريون بدريه .. اللي كانت يايه تراجع الموعد اللي عاطينها اياه واضطروا انهم ينقلونها غرفه العمليه
بعد ما اكتشفوا وفاة الجنين في بطنها من اكثر من اسبوعين..
عدنان وصل المستشفى بعد ماعرف عن الموضوع ويلس ع طرف في الانتظار وهو مظايج وعيونه تدمع ..
قامت امه ويلست حذاله وهي تمسح ع جتفه

ام عدنان: ماعليه فديتك ها امر الله .. عطاك وخذ عنك .. لاتتظايج المهم صحتها الحين ومدام انها حملت ها خير من الله وان شاء الله بتحمل مره ثانيه وبتيب لك عيال ..
عدنان وعبرته مخنوقه: بس انا ماصدقت تحمل .. من متى وانا اتريا
ام عدنان: حتى نحن يابويه لكن شو نسوي انته في هالايام المباركه ادعي ربك وادعيلها تنش بالسلامه و الله يرزقك بالذريه ان شاء الله
عدنان: امين ..
انتبه عدنان للدكتوره ظاهره من غرفه العمليات وتجدمت صوبه .. قام من مكانه
يبى يسمع منها خبر .. تقوله الجنين حي بعده .. لكن ويها ماكان يعبر عن هالخبر السعيد .. تقربت منه
الدكتوره: حضرتك زوج مدام بدريه
عدنان: هيه شو حالها يا دكتوره
الدكتوره : بص يا استاذ .. زي ماعرفت الجنين كان متوفى في بطن امه .. ولكن فتره الوفاه كانت طويله وسبتت تعفن شديد في الرحم عشان كده احنا محتاجين توقيعك على عمليه استئصال الرحم بسرعه
عدنان: شووووووووو استئصال رحم ؟ شو تقولين انتي ؟
وصد صوب امه
عدنان: اميه تسمعين شو تقول؟ يبون يستاصلون الرحم
الدكتوره: يا استاز لو ما استاصلناش الرحم المدام حتتعب اوووي ودا حيضرها ويمكن يسبب لها سرطان لاقدر الله
ام بدريه: بسم الله على بنتي .. وقع يا عدنان خلهم يسون لها العمليه
عدنان يطالعهم ويرجع بنظره لامه: اميه اي عيال هاييل اللي تقولين عنهم بيوني بعد مايشلون الرحم .. شو الفايده الحين
ام عدنان: وقع يا عدنان شو بتسوي الحين صحه حرمتك اهم
عدنان : مابوقع شي .. انا مابوقع شي

وروح عنهم طالع من المستشفى وامه وراه تنادي عليه
اما ام بدريه راحت مع الدكتوره عشان توقع العمليه ..

****

العصر مي وساره كانن يالسات في المطبخ ام سيف تسوي لقيمات ومي يالسه مجابلتنها اما ساره متسانده ع الطاوله وتلعب بتلفونها...

مي: امايه عطيني انزين انا بسوي
ام سيف: لا بينطش عليج الدهن وبتحرقين ايديج
مي: مابحرقها امايه فديتج عطيني بسوي شوي وياج
ام سيف: ياربي ياميوه يا مكثر ماتحنين
ساره: عاد ميوه شو بتحصلين من وراها غير الحنه والزنه
مي:عدال عاد انتي ..
ام سيف: هههه هي تبى تفازع فديتها..لكن انتي شوالفايده منج ..ميلسه الا تدقدقين في ها التلفون..
ساره شهقت: ماتقصدين امايه ..
مي: هي والله صدقها امايه .. انزين امايه بسوي
ام سيف: قومي غسلي ايديج انزين وحطي بس شوي شوي هب تفرين العيينه بقوو بينطش عليج الزيت..
ساره: امايه هب زين تحطين زيت وايد ها كله اييب الكولسترول
ام سيف: ها دهن عربي مب هالزيوت مال السوق اللي مامنها الا المرض
مي غسلت ايدها وخذت من طرف العيينه وبدت تحط منها في التاوه
مي: ايي
ام سيف: اقولج بيحرقج
مي: هيهي لا بس اقص عليج مايحرق
ساره: لاتجذبين وانتي صايمه
مي: يعني عادي عقب الفطور اجذب
ساره: هيه
مي : ههه هبلى
ساره: اللهم اني صائمه
مي: خخخ يوم كنا يهال ع كل دقه قلنا اللهم اني صائمه..
ساره سكتت عن مي ويلست تدنن شي بصوت واطي
ام سيف: ساروه طبي حلجج عن اظربج بالملاس خافي الله
ساره: بلاج امايه هاي نشيدة
مي: ماتروم تيود لسانها قبل الفطور اناشيد عقب الفطور اغاني .. المهم ماتسكت
ام سيف: ياربي انا دوم ايلس اطبخ ع راحتيه اليوم ميلسات ع راسي
مي : حليلي امايه انا اساعدج بس هاي ساروه اللي مامنها فايده
ساره: جب ميووه..اقول اسموه مطرشه مسج تقول بين يفطرن عندنا
مي: اونه زين قومي عيل بنسير نبدل ثيابنا قبل مايوصلن وريحتنا كلها شياط..
ام سيف: زين فجن عن راسي شويه .. وسون مدخن دخنن البيت عقب الفطور ..
ساره: اوكي

كملت مي اللقيمات ويا يدتها وساره سارت تتسبح .. وعقب ما خلصت مي من اللي فايدها لحقت اختها فوق .. دشت مي تتسبح وبعد ما ظهرت من الحمام توجهت للصاله ..

مي: مهوه
مها: هاه
مي: وين ساروه ؟
مها: مادريبها احيدها تقول بتسير تتطالع نعمه الله
مي: اهاا

طلعت مي من جناحهم وسارت قسم ناعمه ودقت ع الباب ودخلت ..
لقت ناعمه وساره يالسات يطاالعن التلفزيون ..

مي: سلام حرم ابي المصون
ناعمه: وعليج السلام بنت زوجي المصون
ساره: خخخ اونها تنكت نعوم
ناعمه: مابرد عليج

مي: ايه قوموا نظهر خاري .. بسكم من التلفزيون الممل ..
ناعمه: يالله يا ميوه شو تظهريبنا برع احين
مي: قوموا حلاته الجو قبل الفطور ..
ساره: انا بشوف المسلسل
مي: الله ياخذهم ها القنوات .. ماكمل ابونا شهر من اتوفا وهم امره كملوا مسلسلاتهم..
ناعمه: سكروا القنوات بس ثلاثة ايام ..
مي: بس عليهم ..
ناعمه تتنهد: يا مي الحزن فالقلوب بيتم ..
مي: الله يعينا ويعين اهل الامارات .. يلا نعوم قومي
ناعمه: يالله انزين
ساره:انا بيلس اطالع التلفزيون ماروم اطلع اتمشى

طلعن ناعمه ومي يتمشون في الحوي ويسولفون
مي: وناسه انه يالسين نرمض في البيت بس صدق سبب الاجازه يضيج البال..
ناعمه: امر ربج .. خلصتي مشاري العيد ميوه ؟
مي: هيه خلصت امي ماتقصر تسوي لو مانقولها
ناعمه: انا مفصله عباه في الشارجه وابا اسير اييبها ومتعايزه
مي: انا بسير وياج خل نسير باجر
ناعمه: صدق ؟ زين انا كنت ابا حد يسير ويايه
مي: اصلا لو قلتي حق ساروه مابتقولج لا اول وحده بتركب السياره
ناعمه: لا لا ساروه ماباخذها هاي ام لسان وكله تظارب
مي: هههههه عاد انتي اللي تقصرين يعني بالسانج

انتبهوا لصوت سياره داخله البيت .. التفتت مي للسياره اما ناعمه على طول وقفت متذريه بمي..

ناعمه: منو ها ..
مي: هاي سياره مروان ولد خالي .. شو ياي يسوي ؟
ناعمه: سيري اتجدمي صوبه اطاعيه انا بدخل الفله
مي: اوكيه
نزل مروان من السياره ومي تقربت منه
مروان: سلام عليج بنت العمه
مي:وعليك السلام اشحالك
مروان: الحمدلله انتوا اشحالكم ؟
مي: بخير
مروان: بلاها علامات الاستفهام تناقز فوق راسج
مي رفعت راسها كانها تبى تشوف شو فوقها وردت نزلتها
مروان: ههههههههه هبلى شو تشوفين
مي: ايه بروحي مسطله لاتيلس تتمصخر .. خير شو يايبنك
مروان: بل عليج ..
مي: ههه اسولف ..
مروان: انزين .. بناء على طلبات العمه يايبلكم قرص ولبن وفريد
مي: الله جان ايوع اكثر
مروان: قومي انزين ازقري حد ايي يشل عني الطبقات بروح ماشي باجي ع الاذان
مي: هاتهم انا بشلهم برايه
مروان: شو تشلينهم كبار
مي: انزين وطهم عند الباب اهنه مال الفله وانا بطرش الشغاله عشان تلحق
مروان: انزين تعالي ساعديني شلي اللبن ..
شلت مي اللبن عن مروان وحط الطبقات ع الباب اللي صوب الفله وكان يطالع باب الفله المفتوح كأنه يدور حد بنظره ..
مي: خلاص هاييل هم ؟
مروان: هيه .. شخبارهم خواتج ؟
مي:خواتي الحمدلله كلهم بخير
مروان: ساره كانت وياج توه يوم دخلت انا ؟
مي: لا لا هاي حرمه ابويه
مروان: اها انزين يالله عيل انا بسير تامرين ع شي؟
مي: سلم ع الاهل اهناك .. وابلغهم تحياتي ..
مروان: الله يسلمج .. سلمي ع البنات .. مع السلامه

روح مروان ودخلت مي وهي شاله اللبن في ايدها وحطت ع سماط الفطور .. وصدت ع ساره اللي توها نازله من فوق ..

مي: ياريتج جدمتي شوي
ساره: ليش؟
مي: توه مروان مروح
ساره: مروان !! شو يايبنه
مي: يايب فريد وقرص ولبن
ساره: الله قرص وينه اشوف
مي: اقولها مروان يايبنه تقول وين القرص.. احم سال عنج
ساره: شو قال !
مي: قال اللي كانت وياج ساره
ساره: وين
مي: ترا شاف نعوم من بعيد وهو داخل قبل ماتسير الفله
ساره: انزين وبعد
في هالوقت يت يدتهم ومي اطالعت ساره واسكتت ..
كانت مي مستانسه انها سكتت عن السالفه تبى ساره شوي تحس وتتحرقص..
ولاحظت هالشي ع ويه ساره اللي اعتفس يوم يت يدتها وماعرفت باقي السالفه ..

وبدن الكل ينزل للفطور .. ويت مريم وبناتها.. والتموا كلهم ع السفره يتريون الاذان .. اللي يهلل ويستغفر ..واللي يصاصر ويسولف .. وام سيف كل شوي تنازع البنات عسب يدعن ويستغفرن بدال الرمسه .. لين ما اذن الاذان وفطروا على شوربه وخفايف وساروا يصلون ..

****

بعد التراويح كانت بدريه في غرفتها وامها حذالها يالسه وقابظه في ايدها القران وتقرا .. فتحت بدريه عيونها بتهاون ورجعت غمضتها .. وهي تسمع صوت امها ترتل القران .. كانت مب قادره تفتح عيونها لكن دموعها كانت تنزل على اطراف ويها..

انتبهت لامها وهي تقرا (إن الذين يحبون أن تشيع الفاحشة فى الذين آمنوا لهم عذاب أليم فى الدنيا والآخرة والله يعلم وأنتم لا تعلمون )
انتبهت امها لشهقه بنتها وهي تصيح

ام بدريه: بدريه بسم الله عليج امايه شو فيج شو يعورج؟
بدريه فجت عيونها اللي كانت مبلله بالدموع وتمت تصيح وهي ساكته
امها حطت ايدها ع راسها: بسم الله عليج بسم الله عليج .. شي يعورج ؟
بدريه هزت راسها بالنفي
امها وقفت على راسها وبدت تقرا عليها من القران تحاول تهدي به سر بنتها لحد مادخلت عليهم ام عدنان اللي كان شكلها حزين

ام عدنان: السلام عليكم ..
ام بدريه: وعليكم السلام
ام عدنان: تستاهلين سلامه بدريه
ام بدريه: الله يسلمج
تقربت ام عدنان تشوف بدريه لكن لقتها مغمضه عيونها
ام عدنان: راقده بعدها؟
ام بدريه: كانت واعيه تصيح بس يلست اقرا عليها شوي وغمضت عيونها يمكن ردت رقدت
يلست ام بدريه وام عدنان بدت ترمس: ياختي ماعرف شو اسوي ويا عدنان
من سرنا البيت وهو قافل على عمره الباب ولا راضي يكلم حد ابد ..حتى الفطور ماذاقه
ام بدريه: شو بقولج يا اختي الله يلوم اللي يلومه والقلب لازم بيحزن .. لكن شو بيدنا نسوي .. اللي تمنيتوه تمنيناه نحن لكن حكمة ربج
نشت بدريه على صوت حد يرمس .. ماتحركت من مكانها لكنها كاانت تحاول تركز في الاصوات اللي حولها
ام عدنان: يوم قالوا مات الجنين حاولت اصبره وقلت له الله بيعوضك .. لكن يوم شلوا عنها الرحم .. شو بقوله بشووو بصبره
سمعت بدريه اخر جمله قالتها ام عدنان ..
شلوا عنها الرحم !!
حاولت تتحرك من مكانها وانتبهوا لحركتها امها وعمتها
ام بدريه: ها امايه شو فيج ؟
بدريه: شو قلتوا توه ؟ انا شو سووا فيني
ام بدريه: اذكري الله اذكري الله
بدريه: شلووووا الرحم ؟ يعني خلاص ماقدر احمل ؟ صح
ام عدنان تصيح وامها تحاول تهديها: يا بنتي اذكري الله قولي الحمدلله
بدريه صرخت: صح والا لاااااااااا
امها تمت حاظنه راس بنتها : يا امايه تعوذي من ابليس قولي الحمدلله واحتسبي الاجر عند الله .. هذا اختبار من رب العالمين

صاحت بدريه بحراره .. تحس بحرقه في صدرها .. هذا ماكان اختبار هذي كانت عقوبه وجزاء ..
طلبولها الممرضه وعطوها ابره تهديها وتخليها ترقد ترتاح ..

بانتظاركم..!

يالمزيووووووووووونه والله يبالج حد يكفخج من الخاطر


نزلي البارت والله مطوله انتي بذبحج وبفرررررج بالبحر

السلام عليكم

المزيونه ... اليوم انتي مب امجكنمه وااايد:kkk:

شو هالمآسي بالأحداث:fa36: ...

الله يرحمك يا أبوي زاااايد

ننتظرج ... ببارت يديد يبرد القلب وخالي منالأحزان:bye2: زيت عافيه مب بارت:boxed:

اووووووه توني اشوف هالصفحه

ثانكس حبوبه عالقصه بقراها احين ^_^

الله يرحمه بابا زايد ..........
ويغفرله يارب .......

اباااااااا البارت اليديد

لاحول ولاقوة إلا بالله
يحزن الجزء
لاتعليق

ريم ريم

اقتباس:

---

يالمزيووووووووووونه والله يبالج حد يكفخج من الخاطر


نزلي البارت والله مطوله انتي بذبحج وبفرررررج بالبحر

---

بل بل .. :look: ..

اقتباس:

---

اووووووه توني اشوف هالصفحه

ثانكس حبوبه عالقصه بقراها احين ^_^

---

خخخ زين يا المتسرعه .. ولكم فديتج ..

حلم الطفولة

اقتباس:

---

السلام عليكم

المزيونه ... اليوم انتي مب امجكنمه وااايد:kkk:

شو هالمآسي بالأحداث :fa36: ...

الله يرحمك يا أبوي زاااايد

ننتظرج ... ببارت يديد يبرد القلب وخالي منالأحزان :bye2: زيت عافيه مب بارت:boxed:

---

وعليكم السلام ..

افا ليش مب مجكنمه .. لازم ترا انوع فالاحداث ولا شو رايج ..
الله يرحمه ويغمد روحه الجنه .. وبما انه القصه ادور احداثها فسنة 2004 قلنا يتوجب علينا نذكر
مثل ها اليوم الي غطت فيه غيوم الحزن ع دولتنا ...

وانتظرينا فالبارت اليديد .. :fa38:

الشوق

اقتباس:

---

الله يرحمه بابا زايد ..........
ويغفرله يارب .......

---

اميين يا رب العالمين ..

شوق البدو

اقتباس:

---

اباااااااا البارت اليديد

---

ها الي فالحه فيه :a046: .. تعالي حجرتيه بعطيج البارت خخخ ..
ان شاااء الله عموه الحين بنزله الكم

هزاايم

اقتباس:

---

لاحول ولاقوة إلا بالله
يحزن الجزء
لاتعليق

---

الله كريم .. ونتريا تعليقاتج ع البارتات اليايه ..

حبايبي .. أخليكم فها البارت ويا عــاشقة الشمــال .. ويلا استلموها ها المره ..
وانا بروح منتداها بتواصل ويا الاعضاء هناك ..

نراكم في خير .. والله الله في عااشقة الشمال .. ما وصيكم :b015:

الجــزء العشـــرون

***********************
(الاحد) 14 نوفمبر 2004
***********************

اليوم ثالث العيد .. كان المفروض عرس عزه يصادف هاليوم .. ولكن بما انه تاجلت الاعراس لمده 40 يوم فترة حداد المغفور له باذن الله الشيخ زايد ..
تم تأجيل العرس لبعد شهر ..
قررت العايله كلها تطلع رحله للبر يغيرون جو ويلتمون كلهم فمكان واحد وطبعا كانت وناستهم الكبيره فها الأيام ردة مانع اللي حصل على اجازة قبل العيد باسبوع .. وبيقي وياهم كم يوم وبيرجع يكمل دورته اللي بتخلص ع شهر واحد..

كان الجووو مغيم وحلووو .. والدينا خضره ..
طلعت عايله بوراشد وعيالهم وعيال عيالهم .. كلهم بلا استثناء .. حتى سلطان اللي كان بالعاده مستثنى شاركهم هالمره الرحله .. لغرض في نفسه أكيد ..

ركب مانع سيارته وشل وياه امه وابوه واخته شيخه وركبوا وياهم جاسم ومايد..
وراشد شل حرمته وبناته عزه وايمان وشلوا كل أغراض الرحلة وياهم..
اما محمد فخلى فارس يسوقبهم وخذ وياه عبير وفجر ومديه ..
وسلطان شل اخوانه منصور وخليفه وياه..
اما مروان شال عمته عليا وريم وساره ومي ومها ومهره واحلام.. زاحمات البنات عمارهن بس عسب يكونن ويا بعض..
مروان كان رابشنهم وكل شوي يشغل لهم اغاني ميحد واحلام ومهره ومها في الدبه مرتبشات ويصفقن ..

صدت لهم عليا : شو ياهن هاييل اللي ورا ارتبشن مره وحده ؟
ساره : خليهن ماورى عليهن من زمان ماظهرن رحله
مي: ساروه في خاطرها تسوي شراتهن واكثر الا ميوده عمرها
ساره: جب انتي
عليا: بس انزين هب تتظاربن ..
وصدت عليا لمروان: وانته شو ياينك مرتبش جيه ؟
مروان: عادي عموه عيد عيد
مي ترمس بصوت واطي: عاد العيد عيدين عند مروان .. عيد الفطر وشوفه ساروه

ساره انغزت مي عشان تسكت وتتوعدلها ان ما طبت حلجها .. انتبهت ريم لمناغزهن وحست باللي صاير وضربت مي اللي كانت يالسه فوسطهن ع ريلها ..
التفت مي لريم وهي تبتسم ببراءه .. ويا فبالها تسألها..

مي: قلتي حق ريلج انج ظاهره ؟
ريم: هيه اتصلت به قبل ماطلع
مي: زين بعد .. عن ينتفخ عليج
ريم: هههههه انتي محد يقولج شي
مي: هيهي فدييتني

تموا يحوطون ورا خالهم راشد لين حصلوا بقعه مناسبه .. على تل اخضر بين الغاف الطوال.. حلوووه وبعيده عن الزحمه ..

ساره: ميوه ميوه
مي: شو ؟
ساره: مب جنه المكان جيه بين الشير نفس تصوير اغنيه تملي معاك مال عمرو دياب
مي: هيه صدقج والله هههه

نزلوا كلهم وفرشوا المفارش عزلوا مفرش للحريم عشان يطبخون ويشوون عليه .. وفرشوا مفرشين كبار حذال بعض يتوزعون عليها .. الرياييل ع حصير والحريم ع الثاني ..

يلسوا الحريم يجهزون الاكل .. والبنات تيلسن ع طرف وفجر وياهم .. اما الشباب نشوا يحوطون ويفجون الدرجات اللي يايبينها من السيارات..

رن تيلفون فجر في هالوقت.. شافت الرقم ونشت من مكانها وردت ع طول بابتسامه ولهفه ..

فجر: الوووه
احمد: الوه هلا فجر مباركن عيدج
فجر بدلع: تو الناس .. الله يبارك فيك
احمد: اسمحيلي عاد مارمت اتصل بج قلت اكيد انتي اهناك ويا الاهل ومنشغله وياهم
فجر: لا عادي .. المهم مانسيتني
احمد: يالله وانا اروم انسى

وكملوا سوالفهم بينما سلطان كان يالس في سيارته يراقب فجر وهي ترمس وتبتسم ومندمجه مع المكالمات اللي عندها ..
كانت لابسه بنطلون وردي مع قميص ابيض طويل لين الركب .. ومحطيه حجاب وردي ولكن شعرها الاشقر من جدام طالع..
ورجع التفت لبنات العايله .. كانن ساره ومي واحلام وعزه وريم يتمشن ويا بعض ويسولفن .
ليش مب مندمجات ويا فجر ؟ والا هي طبعها جيه ماتندمج ويا حد ..ولا طبعها غير عنهن..انتبه انه فجر سكرت التلفون وفي طريقها لليلسه
اتصل بها تلفون على طول ..فجر شافت الرقم والتفتت تدوره وين هوو وردت ع التلفون ..

فجر: سلطان
سلطان: هلا
فجر: شفيك ؟ ينيت ؟ الحين يشوفوني رافعه التلفون وانته رافعنه
سلطان: محد بيفكر هالتفكير انتي من قبل كنتي ترمسين .. بس منو ترمسين ؟ّ
فجر: رفيجتي
سلطان: رفيجتج ؟
فجر: ايه رفيجتي متصله من الكويت ..
سلطان: هيييه اوكي .. ابا ايلس وياج
فجر: شووو ؟ وين تقعد معاي جدامهم كلهم
سلطان: لا.. خلنا نسير اي مكان بعيد
فجر: مافي مكان بعيد اهني ومابي حد يشوفني معاك
سلطان: بنشوف الوضع انزين جان يسمح ليش لا .. بينا مسجات اوكي .. يالله باي
فجر: باي ..

رجعت فجر تيلس ويا اختها عبير و سلطان تم يالس في سيارته يجلب في التلفون لكن وصله مسج ..
من بدريه ؟! غريبه هي من متى ماتصلت ولا طرشت مسج ..
فتح المسج لقاها كاتبه فيه

" قال تعالى : (فلما نسوا ما ذكروا به فتحنا عليهم ابواب كل شيء حتى اذا فرحوا بما اوتوا اخذناهم بغتة فاذا هم مبلسون)
ولدك اللي حملته من الزنا مات في بطني
وبسببه شالوا عني الرحم ..
الله عاقبني ومن بعد ابن الحرام حرمني من اي ابن بالحلال ..
وانته بعد بيي يوم والله بيعاقبك باللي سويته ..
ان الله يمهل ولا يهمل .. "

تم سلطان يقرا المسج مره .. مرتين .. ثلاث.. بس يبى يستوعب اللي يقراه.. حس بوقع الخبر شديد عليه ..بدى العرق يتصبب ع يبهته ودقات قلبه في تزايد وهو يسحب الهوا بصعوبه ..
حطي ادينه الثنتين ع راسه واتاكى بسكان السياره ..
الحين هذا كله صار لبدريه بسبته هو ؟
حس برعشه تنتاب كل جسمه وهو يتخيل اللي يصير واللي ممكن يصير حقه..
شو من العقوبه بيعاقبه فيها الله بالدنيا هذا غير الآخره ..

عق الغتره الي ع راسه ع صوب وضغط باديه ع السكان وحرك موتره بدون حاسيه وسار بعيد عنهم ..

شيخه: خليفه اخوك وين ساير ؟
خليفه : مادريبه لكن لاتستعجبين جان سار عنا .. اصلا العجب انه يا ويانا

مشى بسيارته في البر لين وصل للشارع العام ..
وقف عند بقاله يبى يشتري ماي حس بعطش فظيع .. عند البقاله
سمع صوت الاذان وتذكر دنياه اللي ماسوى فيها شي
وقف موتره عند المسيد .. شاف المصلين يتوافدون عليه وهو بعده يالس في سيارته انتبه لخاله مانع وخاله راشد ويده يدشون المسيد وهو بعده يالسه فسيارته فدنيا غير ها الدنيا.. فباله اللي صار لبدريه .. الله حرمها من العيال خلاص .. قلبه وقف وهو يتذكر " الله يمهل ولا يهمل" وفز من مكانه وهو يسمع دق ع الدريشه ..
فتحها بكل بطء .. كان اخوه خليفه ومنصور وفارس ومروان لاحقين مانع فسيارته لأقرب مسيد وصادف انه هو نفسه اللي واقف عنده سلطان.. انتبهو لسيارته وساروا صوبه يشوفونه..

خليفه: ليش واقف اهنه سلطان؟
سلطان بتلعثم: هاه لا ماشي
خليفه: بلاك عرقان جي .. الناس مشتيه وبردانه
سلطان: ها .. لا شوية ضغطه هنه فالموتر..
خليفه: هيه ..يالله انزل يا اخويه . قاموا الصلاة..
سلطان: هيه .. ان شاء الله ..

سلطان فتح باب السياره ونزل توضأ ويا اخوانه.. ودخل المسيد ..
من الناااااااااااادر جدا انه سلطان يدخل المسيد في غير يوم الجمعه ..

وقف سلطان وياهم وصلى .. حس بشعور خووف ينتابه اكثر من شعور اطمئنان .. لانه كم مضى عليه من الوقت ماصلى فجماعه وشو ممكن يسوي علشان الله يغفر له اللي صار وتجنب عقوبة رب العالمين ..

بعد ماصلى التفت له خليفه وقاله بصوت واطي
خليفه: مابتسلم على مروان؟ مب زين اتمون جيه متزاعلين انتوا اهل والحين عيد

كان سلطان مستسلم في هالوقت لاي شي .. مايفكر في اي شي ..
قام وزقر على مروان اللي كان توه بيطلع من المسيد .. ومد له ايده
كانت رده فعل مروان متاخره مستغرب حركه ولد عمته لكنه مد ايده وهو يبتسم وبادر بالكلام

مروان: مباركن عيدك يا اخويه..
سلطان: عساك من العايدين والسالمين ..

وبلا ارادي سحب سلطان مروان وحضنه وهو يربت ع ظهره .. مروان مستغرب من ها الحال لكنه كان يحس بفرحه تسري فقلبه وراااحه ..

خليفه وهو يبتسم الهم : ها بو ميوود مابترد ويانا ؟
سلطان يبتسم لاخوه: لا انا بروح البيت احس راسي يعورني ومصدع وايد.. انتوا جان بغيتوا تردون وماشي مكان اتصلوبي بييكم ..

روح سلطان عقب ماقال كلماته هاي .. ورجعوا الشباب مع بعض في سياره مروان ..
منصور: سلطان شوبلاه ؟
خليفه: والله انا بروحي ماعرف شو بلاه .. ماصدقت يوم شفته واقف عند المسيد ..
مروان: يمكن الله هداه انتوا بلاكم ع الريال
فارس: السموحه منكم الصراحه ها السلطان ما اثق فيه ولكن ياخبر اليوم بفلوس باجر ببلاش
مروان: على رايك .. توكل خلنا نلحق على الغدى ترا ريحه الذبيحه المشوايه ظاربه في راسي ..

توجهوا للمكان اللي كانوا يالسين فيه وبدوا كلهم يتغدون مع بعض ..

شيخه: وينه اخوكم ؟
خليفه: سار البيت وعقب بيي يشلنا
شيخه: بلاه ؟
خليفه: مابلاه شي امايه راسه يعوره ..

غيروا الموضوع عشان ماتيلس شيخه تسال اكثر بوجود خوالهم..

عقب الغدى يلسن عزه وريم يسوون جاهي حليب ع الضو..
عزه كانت مستآه نوعا ما ويلست ويا ريم ع طرف ..

ريم: جاسم قوم حبيبي انته ومايد هاتولنا سمر عشان نوري به الضووو
جاسم: انزين تبين كبار ؟ والا صغار
ريم: صغار .. سير انته وميود مب بروحك
جاسم: اوكي..

ساروا جاسم ومايد يدورون السمر .. ويلست ريم ويا عزه
انتبهت ريم انه عزه تلعب في تلفونها وموخيه

ريم: ليش مويمه ؟
عزه: المفروض عرسي اليوم
ريم: العرس تاجل عزه ما انلغى وصدقيني كل تاخيره فيها خيره
انتوا متى حجزتوا احين ؟
عزه: عقب شهر يعني قولي على اخر شهر 12..23 ولا 30 على حسب الحجوزات..
ريم: زييييين يابنت الحلال كملي الشغلات اللي ماخلصتيهن من الزهاب وخلي هالشهر للراحة.. تريحين بشرتج وتهتمين بنفسج .. عشان شكلج يطلع احلى في العرس
عزه: صدقج بس فيصل متضيج..
ريم: ماعليه حبيبتي قوليله هالرمسه وبيطيب خاطره.. لكن يوم انتي متضيجه وترمسينه بها النفسيه لازم بيضيج .. بيخطف بسرعه ها الشهر..
عزه: ان شا الله ..انزين ماعليج مني.. المهم انتي مرتاحه ويا ريلج ؟
ريم: الحمدلله
عزه: متى عرسكم ؟
ريم: شهر 1 بس ماعرف اي وقت بالضبط
عزه: يالله زين .. تريني لين ارد من شهر العسل عشان احظر ..
ريم: لا بتحظرين ان شا الله.. كيفج جانج بتسافرين تقطعين سفرج وتردين تحظرين عرسي
عزه: هههههه ما طلبتي.. اصلا يمكن مانسافر .. بنأجله للصيف..
ريم: ماعليه المهم تحظرين عرسي
عزه: ان شاء الله خير..

كانت ساره يالسه بعيد عنهم .. ع نقى صغير ومحطيه تلفون امها عندها وتتسمع الاف ام ..
مروان شافها وسوى عمره يتمشى لين وصل صوبها ..
مروان: ساره..
ساره وهي ترفع راسها .. استغربت ليش مروان ياي لين عندها ..
ساره: هلا
مروان: شو تسوين بروحج ؟
ساره: ماشي ..
مروان: اها.. انا اقول بلاها.. كنت مار تحت وشفتج يالسه ع النقى مويمه..
ساره: هههه لا بس كنت موخية العب بالتراب..
مروان: شو تتسمعين
ساره: ماشي.. مشغله الاف ام ..
مروان باستعباط: انزين غنيلي
ساره اطالعته باستغراب : اغنيلك ؟
مروان: هيه غنيلي
ساره : ماعرف اغني
مروان وهو يغمزلها: جذوب .. انا سامعنج تغنين

فجأه انتبهوا لصراخ جاسم ومايد متوجهين صوب تجمع العايله
ساره: بسم الله بلاهم هاذيل..
مروان: يلعبون
ساره: لا شوفهم هكم يتراكضون ..
مروان: هي صدقج.. خل نسير صوبهم ..

يايه بتقوم ساره من محلها بس طاح التيلفون من ايدها ع الرمله .. وخى مروان ويابه ..

مروان: سلمتي
ساره: الله يسلمك ..
مروان: يالله تعالي.. جاد انهم شايفيلهم حصني مافينا بعد يهجم عليج ياكلج

ساره ضحكت على طنازة مروان واطالعته بنظره ومشت قبله وهو لحقها
وساروا صوب العايله..

جاسم كان يركض وهو يصارخ: الحقووووووووووووووو جني اهنااااك

ريم نشت من مكانها وكلهم وقفوا ..عليا يودت ولدها

عليا: جاسم شو بلاك
مايد كان منخش عند ريم
جاسم: شفت جني جني
ريم: ميود بلاكم شو شايفين
مايد: اهناااااااااااك شفنا ايد طالعه من الرمل
ريم: بسم الله ايد شو
مايد: ايد انسان
جاسم: لااااااا مب انسان جني جني
محمد: وين انزين ؟ قوم مايد ودني المكان اللي حصلتو فيه الايد

وساروا الشباب كلهم للمكان اللي دلوهم عليه مايد وجاسم .. ومن قبل ما يوصلون للمكان تم جاسم يصرخ ويأشر ع المكان .. تجمهروا كلهم فها المكان ..
والحريم يالسات يحاتن ومايعرفن شو صاير..

منصور: بسم الله شو هاااااااااي ؟ جثه ؟
مانع: خلوها لاحد يزخها ..
شل محمد حطبه وحرك الايد وجاسم يصارخ ومروان لاوي عليه مايباه يشوف ..
مروان: عمي اتصل بالشرطه ؟
محمد: مانع اتصل انته .. هاي ايد حرمه ..
مانع: لاحول ولا قوه ..

قبض مانع تيلفونه واتصل بالشرطه..
ردوا فارس ومنصور لمكان يلستهم واستلموهم الحريم يسألون شو صاير وخبرهم انها جثه مدفونه .. ركبو وحده من السيايير وتوجهوا للشارع العام عسب يتريون سيارة الشرطه ويدلونهم ع المكان ..

اما البنات ما قدرن ييلسن من غير ما يشوفن بنفسهم.. وسارن عليا ومي وساره وعزه واحلام.. لين وصلوا المكان اللي كانوا فيه الباقين عشان يشوفون
ساره: بسم الله شو هاي ؟
مروان: انتن شو يايبنكن احين بيون الشرطه اهنه ردن
مي: بنطالع انزين
عليا: يالله تعافينا .. جاسم ابويه تعال لاتطالع ..
جاسم: ماعليج انا ريال ما اخاف
مروان: هي ريال ومن مساعه تصرخ ..
عليا: فديته استقطع ماعرف شو السالفه ..
عزه: عموه تلقين هاي وحده ظاهره ويا واحد وجتلها
مروان: عزوه انطبي وسيرن يالله الشرطه بيون
مي: بلاك انزين منهد علينا بنسير .. عاد اللي يسمع الشرطه .. هاييل تتصل بهم تقولهم تعالوا عندنا حد بيموت مايون لين ايموت الريال ويخلص .. احين قايليلهم حد ميت بيون ؟
محمد: هاي ميوه وين تروم للسانها .. يالله سيرن وعليا شلي وياج مايد وجاسم ..
عليا: ان شا الله قومن بنات يالله

سارن عليا والبنات ووصلت الشرطه .. بعد الحفر طلعوا جثه حرمه يبين من شكلها روسيه مجتوله .. كانت الجثه ريحتها خايسه .. وكلهم قاموا بعيد عنها

الشرطي: الظاهر انه هاي اللي ندور عليها من زمان
محمد: تدورون عليها ؟ منو هاي
الشرطي: واصلنا بلاغ عن اختفاء وحده واظن انه المواصفات مطابقه بنوديها الفحص الجنائي وبنشوف .. منو منكم بيتفضل عشان يوقع البلاغ ..
محمد: انا .. بودي الاهل البيت وان شا الله بنيكم المركز ..
الشرطي: خلاص ان شا الله نتلاقى اهناك

بعد ها الاكتشاف اللي عكر عليهم صفو رحلتهم .. رجعوا كلهم البيت ..وعقب ركب محمد ويا مانع ومروان وتجهوا للمركز.. اما جاسم مازال خايف وكل شوي تتراواله هاييج الايد اللي كان بيشل السمره من عدالها ..

يلسوا كلهم في الصاله عقب ماتسبحوا يتريون محمد يرجع ويعطيهم الاخبار

مي: احين هاللي دفنها .. دفنها بكبرها عيزان يخش ايدها ؟
ساره: لا الظاهر دفنها وهي فيها روح شوي .. فطلعت ايدها لكن طلعت روحها
عليا: شو هالرمسه انتن ناقصات نحن زياغ ..حشى والله قلبي بروحه ماينزاد
مي: عادي امايه نحن الا شفنا الايد لو شفناها بكبرها شو بتسون
عليا: يالله تعافينا .. هذيل الاجانب والدمار الي اييبونه .. اصلا سامعه من قبل وايد سوالف نفس جي مستويه .. عافانا الله ..
ساره: وي حسبي الله عليهم .. وصخوا بقعتنا ..

كلهم كانوا في صوب يرمسون عن الموضوع وفجر في الغرفه يالسه .. مستغربه من حركه سلطان..روح عقب ماكلمها على طول ولين الحين ماتصل ولا طرش مسج .. شو صار عليه ؟

دخل محمد في هالوقت ويا مروان ومانع..

احلام: ها ابويه منو طلعت؟
عبير : احلام قومي عن ابوج خليه يقعد يرتاح
ام راشد: ها ابويه شو صار ؟
مانع: امايه هاي روسيه جاتلنها واحد ظاهره وياه .. بس ليش مايدرون ..ومن متى يدورون عليها ..
عبير: اللهم ياكافي
محمد: سبحان الله لازم الله يخلي خيط للجريمه عشان ينكشف المجرم
عليا: وانتوا الحين شو سوو وياكم ؟
محمد: لانحن مايخصنا وقعنا ع البلاغ بس..

يلسوا كلهم يسولفون لين حل الليل وكل واحد سار يرتاح عقب تعب هاليوم ..والأحداث المثيرة اللي صارتلهم اليوم ..
وجاسم طول الوقت يهاذي بالسالفه وبدى يألف حكايات وانه هو البطل اللي اكتشف الجريمه ..


************************
(السبت) 20 نوفمبر 2004
************************

في الكليه كانت مي واقفه جدام كلاسها قبل ما يبدى بربع ساعه تتريا كلاس العربي .. كانت تكره الدكتور مالهم يلست هي وربعها متأففين ما يبون يحظرون .. وايقن فالكلاس ماحصلن حد ياي لانه واقفات من وقت ودكتورهم القبلاني مطلعنهم من وقت ..
مي: اووووف انا مووووووول مالي خلق اشاهد ويه هالدكتور
شمسه: انا اخس عنج لايعه جبدي ياختيه ..
وفاء: ياربي من هالدكتور شقى نحس
مي: شو رايكم نلغي كلاسه ؟!
وفاء: ياسلام عشان يوصلج حرمان مب ناقصين غيابات نحن
مي: مب نحن اللي بنغيب الدكتور اللي بيغيب
شمسه: ياريت يغيب .. ها لو ميهود يداوم
مي: لا بنكتب ع الصبوره انه الدكتور يعتذر عن المحاظره..
شمسه: عجييييبه .. يالله ..

دورت شمسه قلم صبوره .. وكتبت انه الدكتور يعتذرعن حظور هذه المحاظره

وفاء: ايه لاتسون جيه والله اخاف يجكنا
مي: عن الخوف لاه .. محد بيدريبنا ..

طلعن مي وربعها من الكلاس بسرعه قبل ما ايي حد ويخرب عليهم ..

وفاء: شوفي ميوه لو قال منو سوى هالشي موووووول لاتعترفون
شمسه: وفوي لاتحنين مابيعرف .. لكن محد بيخرب علينا الا هاييج ام نظاره
وفاء: منو ام نظاره ؟
شمسه: هاييج الملقعه اللي تيلس جدام
مي: خلها تولي محد بيحظر

وقفن البنات من بعيد يراقبن الدكتور يوم بيي .. وطرشوا وحده من ربيعاتهم اللي مب معاهم في نفس المساق تشوف شو رده فعل الدكتور ..
وصلت ام نظاره مثل ماكانن البنات يسمونها.. تمت واقفه عند باب الكلاس ..

مي : شوفو شوفو احين بتم واقفه مابتسير ..
كانوا البنات ايون عند الكلاس واول مايقرون الي مكتوب يروحون ..
الا هاييج البنت .. كانت واقفه تتريا الدكتور .. وربيعتهم اللي كانت واقفه تسوي عمرها تقرا اعلانات حذال الكلاس..
وصل الدكتور وتم واقف عند المكتب ويقرا المكتوب وهو يرمس البنت ام نظاره
الدكتور: من فعل هذا ! انا لم اكتبه

البنت: دكتور انا قلت هذا مب خطك وماطعت اسير
الدكتور: هذا يسمى تزوير .. من فعله
البنت: ماعرف دكتور .. بس البنات كلهم قروا وروحوا ..
الدكتور: لايجوز هذا الفعل

وتم يتحرطم وروح لمكتبه مره ثانيه .. كانوا قوم مي لحظتها منخشات لين روح ..
ويتهم ربيعتهم تخبرهم باللي صار وتموا يظحكون ومستانسين عقب هذا الانجاز اللي سووه..

اما وفاء اللي كانت خايفه من وناستها بالانجاز ماخلت حد ماخبرته باللي سوته ..
مي شلت عمرها وسارت ترقد كانت تتريا متى تنلغي هالمحاظره .. يوم السبت كئيب والدوام فيه طويل .. وما قدرت تأبسن فها الكلاس عسب ما يوصلها الحرمان من المساق .. بس من انلغى الكلاس طنشت الي عقبه وردت سكنها ..


****

بعد المغرب دقت ريم الباب ع غرفه مرت ابوها تطالع اذا جهزت والا لا عشان يسيرن النادي الرياضي ..

ريم: ناعمه ؟
ناعمه: هاه دخلي ريموه
دخلت ريم غرفه مرت ابوها لقتها لابسه بنطلون اسود مخطط ع الاطراف بلون وردي .. والقميص وردي مخطط باسود .. طايحه على السرير

ريم: شو مب ناويه تسيرين النادي ؟ يالله بنتاخر
ناعمه: لبست وعيزانه اسير مادري بلايه مستويه كله اتعب
ريم: هاي الا هيازه زايده قومي تنشطي ..
ناعمه: اوف انزين الله يخليج طاوليني عباتي ع الشماعه
ريم عطت ناعمه عباتها
ريم: انا بترياج تحت
نزلت ريم ولقت يدتها يالسه تحت وعندها جاسم ومايد
ريم: السلام عليكم
ام سيف: وعليكم السلام .. ها امايه سايره الرياضه ؟
ريم: هيه اميه
جاسم: انزين ريمان انا عندي امتحان منو بيدرسني
ريم: امتحان شو ؟
جاسم: عربي
ريم: قوم اركب ويانا في السياره بنزلك عند امايه تعلمك ونحن راجعين بنمر نيبك
جاسم: هيه احسن ..
مايد: انا بسير وياه بعد تعلمني ..
ام سيف: شعنه تفزعيبه اهناك وتغثين امج .. يوم بتردين بتعلمينه
ريم: اميه مدرسه عربي تراها بتعلمه زين .. اخافني ارد تعبانه او يتاخر الوقت وهو مايستوعب ..قوموا زهبوا الكتب بتصل بامايه بخبرها

زهبوا كتبهم وركبوا ويا ناعمه وريم اللي نزلوهم في طريقهم وساروا النادي
ناعمه كانت تلعب بتثاقل وكل شوي تيلس.. في الاستراحه يلست ريم حذالها تسمح بالفوطه ع ويها

ريم: بلاج نعوم ماتلعبين
ناعمه: راسي يدور ماعرف
ريم: تبين اييب لج ماي ؟
ناعمه: لا لا . قومي خل نكمل ونروح تعبانه .. برمس ابوج اييب قوم ميود ماروم امر عليهم انا
ريم: امايه قالت يوم بتخلص بتيبهم هي
ناعمه: زين بعد
قامت ناعمه وريم يكملون لعبهم مع المدربه .. وفجأه طاحت ناعمه مغمى عليها
تجمعوا حولها كلهم وقامت ريم تصب الماي ع ويها..
ريم: حد عنده عطر؟
يابولها عطر وعطرت ايدها وحطتها ع خشم ناعمه ..اللي بعد شوي انتبهت
ريم اتصلت في ابوها عشان ايي ياخذهم ويودونها المستشفى .. تمت ناعمه طايحه ع الارض ومسنده راسها ع ريول ريم اللي كانت يالسه تغسل ويها بالماي وتقرا عليها ..ريم لبستها بمساعده الموجودين عباتها ..وهي تلبست وطلعت لابوها اللي كان ياي ياخذهم..
ساروا على طول للعياده رقدوا ناعمه وحطولها مغذي لين تطلع نتايج التحاليل..
كانت ريم يالسه تجلب مجله طبيه حذال ناعمه..وابوها يالس يتريا..
بعد نتايج التحاليل دخلت عليهم الدكتوره..
الدكتوره تجدمت من ناعمه تطالعها وهي تبتسم.

الدكتوره:كيف حالك الحين احسن ؟
ناعمه: هيه الحمدلله ..
الدكتوره: انتي مافي معلوم انتي في حمل ؟
وريم وسيف تقربوا من الدكتوره عشان يسمعون اللي قالته
سيف: حاااامل ؟
الدكتوره: هيه مدام حامل في شهر 3

سيف اطالع ناعمه وملامح الفرحه غطت ويهه..كان يتحرى انه عفرا اخر عنقوده وخلاص..ناعمه كانت منصدمه من الخبر..ماحست للحظه انها بتيب ياهل غير عيالها الاثنين وماكانت تفكر في هالشي
اما ريم كانت وايد مستانسه انه بيكون في البيت ياهل صغير يملا عليهم البيت بصريخه ولعبه ..

الدكتوره: انا بكتب شوي فيتامين زين حق حمل .. يقدر يروح بعد مايخلص جيلكوز
سيف: شكرا دكتوره .. ريم قومي ييبي عنها الورقه
قامت ريم ويا الدكتوره تيب عنها الورقه ..
اما سيف تجدم من ناعمه وحبها ع راسها
سيف: مبروك يا ام مايد
ناعمه: الله يبارك فيك..

كانت تقولها وهي بعدها مب مقتنعه انها فرحانه..بس كانت تشوف الفرحه على ويه سيف.. بعد المغذي رجعوا البيت ولقوا جاسم ومايد يتريونهم اهناك .. كانت عليا يايبتنهم .. وصعدت ناعمه غرفتها على طول من غير ما تنبس بأي كلمه .. ما بغت غير انها اطيح ع سريرها وتغمض عينها وتفكر بالي صار وبالي بيصير ..

****

في الحرم المكي .. كانت بدريه يالسه حذال عمتها ام زوجها على واحد من الدريات اللي تحيط بالكعبه .. يشوفون الكعبه بعد ماصلوا العشا ..
كانت رحلتهم للعمره بعد الحاح ام عدنان على ولدها انه يوديهم العمره عشان تتحسن نفسياتهم .. خصوصا انه اللي صار لبدريه اثر على علاقتها بزوجها ..
كان حزين لدرجه انه ماكان يقدر يواسي زوجته .. واقتراح امه للعمره كان في وقته .. عشان كل واحد منهم تطمئن نفسيته ..
كانت بدريه ظامه ريولها لبطنها ومسنده ويها ع ركبتها وتتأمل الكعبه..
تشوف الناس تطوف حوالينها بشكل مرتب .. يدعون ربهم ويرتجون منه الرحمه..
رفعت نظرها للسما .. سمعت انه عرش الرحمن فوق الكعبه تطوف عليه الملائكه

دمعت عينها وهي تتخيل هالشي .. تمت تطالع فوق ورفعت ايدها تدعي ربها انه يغفر لها ويصبرها هي وزوجها ..
انتبهت لعمتها تدقها ع جتفها .. التفتت بدريه وهي تسمع دموعها ..

ام عدنان: قومي بدريه خلينا نسير ..
بدريه: يالله ..
قامت بدريه وهي تتمشى ويا عمتها
ام عدنان: قومي بنسير شوي السوق .. بناخذ قطع
بدريه: ان شا الله

ساروا صوب السوق .. كانت بدريه لابسه عباه ع الجتف مع شيله سودا ..
دخلت عمتها لمحل القطع وبعدين التفتت بدريه لمحل عبايات .. وطلبت من عمتها انهم يدخلونه ..
دخلت المحل وطلبت نقاب مع عباه الراس ..
عمتها صدت لها : بتاخذين لامج ؟
بدريه: لا عموه .. انا ابا نقاب وعباة راس ..

ارتسمت ابتسامه فرحه على ويه ام عدنان وربتت على جتف بدريه
ام عدنان: بارك الله فيج يابنتي
اشترت بدريه العباه وكانت تحس بفرحه تبى ترجع الفندق بسرعه .. عشان تجربهم في اللبس ..
رجعوا الفندق وفتحت بدريه الاكياس تجرب العباه مع النقاب ..
التفتت لعمتها اللي كانت يالسه تسوي حليب .. ونادتها
بدريه: عموه شو رايج ؟
ام عدنان: تبارك الله حلوه عليج
وقفت بدريه وهي تتامل نفسها في المنظره..
في هاللحظه دخل عدنان الغرفه ولكنه وقف يتحرى حد عند اهله ..
بدريه: هاذي انا عدنان
ورفعت النقاب علشان يشوفها ..
ابتسلمها .. كانت اول مره يبتسم فيها عدنان لبدريه من بعد اللي صار ..
بدريه تجدمت منه: شو رايك ؟
عدنان: حلووه . هاي لج ؟
بدريه: هيه لي .. بلبس على طول جيه .. احسن واستر
عدنان ابتسم وهو يشوفها ويلس ع الكرسي
عدنان: صح .. جيه احلى عليج

بدريه ابتسمت وفصخت عباتها والنقاب .. ويلست تجهز ويا عمتها العشا حق ريلها..



************************
(الاربعا) 24 نوفمبر 2004
************************


كعادة كل أربعا نزلة مي وساره من الجامعه .. وصلن الموقف متأخرات شوي ها المره .. نزلن من الباص وشافن جاسم واقف ويبين من شكله معصب ..
تجدمت مي صوبه وسلمت عليه ..

مي: شو بلااك
جاسم: وينه هذا دريول الباص بسير اضارب وياه
مي: عوذ بالله .. جي شو تبابه
جاسم: عنبوه من ربع ساعه ونحن نتريا ..
مي: هد اعصابك انزين .. ازقر ع الدريول خله ايي يشل الشنط ..
ساره وهيه يايه صوبهم..
ساره: نزلت الشنط تحت .. وين الدريول
مي: يلا انزين نركب السياره ..

وركبوا ثلاثتهم السياره ونزل الدريول اييب الشنط ..

مي: ههههههه ضحكني جسوم يبى يسير يتكافخ ويا راعي الباص
ساره: لييش
مي: اونه ليش متأخرين ..
جاسم: والله صدق.. عيزنا من كثر ما نتريا ..
ساره: غريبه جسوم ياي بروحك .. وينه ميود؟
جاسم: خله ها ولد امه ..
مي: لييش
جاسم: من درى انه امه حامل وهو كله مطيح عندها .. الا يربع اييبلها الدوا واييبلها الما وينزلها من الدري .. مصخره ها
مي: فديييته يداري على امه .. مستانسين بالياهل اللي بييهم
ساره: غربلاااات بليسج يا نعوم بتيبلنا ياهل .. تصدقين ميوه احس من خبروني وانا جي مستانسه
مي: حتى انا انزين . . اول ما نزل من السياره بسيرلها ..

وفعلا .. اول ما وصلوا البيت .. نزلن البنات سلمن على الموجود فالصاله وتسابقن لين فوق .. دشن قسم ابوهم وحصلن ناعمه مستلقيه على وحده من الغنفات وفايدها الريموت كنترول وتبدل ..

ساره: ام ميووود شحاالج

سلمن عليها ويلسن حذالها ..

مي: هاااا بيي ولي عهد يديد عيل
ناعمه وهي متلومه: شفتن عاد
ساره: بلاج جي محمره .. عادي انتي ماسويتي جريمه مب اول حرمه كبيره فالسن تحمل .. عاادي
ناعمه وهي تتطالع ساره بنظره: شوو تقصدين .. انا بعدني صغيره اللي كبري ما وقفن حمل ..
ساره: ههههههه بلاج حرجتي عادي عادي الا اسولف .. يالله اصلا نحن شو مستانسين انه ياهل بيينا البيت ..
مي: داري على عمرج عاد وخلي عنج الهوامه ولاتسوقين خلاص..نباه ولدنا نحن.
ناعمه وهي مستانسه على ها الاهتمام من قبل البنات ..
ناعمه: اصلا سيف مانعني من كل شي .. حتى الشغل يباني اقدم على اجازه بدون راتب..
مي: هيه ومن ايي حطي فبالج تراني انا بربيه من الله انتي ما تفيجين لتربية عيالج
ناعمه: اييه انتن يايات تسبني ولا تباركلي .. مالت عليكن تفرحني دقيقه وتغصصبي عقب
ساره: ههههههههههه وحليلج يا نعوم .. والله نسولف وياج
مي: يالله لا تغصصين الحين انتي مجابلتنا من كم شهر ما عرفتي لطبايعنا .. تراج حرمة ابونا بعد وماتهونين علينا..
ساره: يلا انا بسير ابدل وبرقد ..
ناعمه: هاي من تي البيت الا كله رقاد ..
مي: لازم .. مجابله فلانه وعلانه فالجامعه وكل يوم سهر
ساره: بس بس ميوه لاتفتحيلي موالج الدايم ..
ناعمه: وميوه ليش انتي بعد ماتلعبين شراتها
مي: فديتني انا .. اوني ثجيله يسابرولي بس ما سوي سالفه لحد ..
ساره: بس عيل.. كل حد يقول عنها وغيده
ناعمه: يالله الوغاده عندج انتي مب عند ميوه .. ماعرفن يحكمن
مي وهي متشققه: ههيهي جان استحي..
ساره: ماعليج منها نعوم.. هي بعدها ماخذت وايد ع البنات بس صبري عليها .. من الله مستجده ومسويه عمرها قو ما تمشي ويا البنات
مي: سيري لاه انتي .. يوم بتي البنت تتعرف عادي بمشي وياها لكن حركاتكن هاي سلمي على فلانه وهاتي رقمها بس لا تخبرينها ومادري شو ..
ناعمه: والله سوالف بنات الجامعه .. خبرني بعد شو تسوون
ساره: ههههه مشكله عاد نعوم تعيبها ها السوالف .. انا بسير ابوي .. يلا باي

طلعت ساره من قسم ابوها .. اما مي فتمت يالسه ويا ناعمه وكملوا سوالفهم عن الجامعه وعن تعامل البنات ..

ناعمه: عيل شو الرمسه اللي توصلنا عن البنات وحركاتهن.. والبويات الي مزرن الجامعه ..
مي: مم مادري والله يانعوم..اصلا الكل ماخذ فكره غلط وعباله كل حد جي.. ماعليج مني يوم اقولج ساروه مال حركات وجي بس هن غير يعني سوالف وعايشات حياتهن ويتعرفن عادي عندهم ..وعن البويات ترا ها الظاهره فكل مكان منتشره حتى فكليات التقنيه والجامعات الثانيه ..
ناعمه: وشو ها الكلوز ..؟
مي: ههههه بعد .. الكلوز ها تسميه منتشره فالجامعه .. الصراحه انا ماحب ها الكلمه بس شو بتسوين فالبنات ..
ناعمه: انزين شو هي؟
مي: ماشي بنتين ربع قو سموهن كلوز
ناعمه: يعني يكونن مب اوكي ؟ مب زينات؟
مي: ههههه تراه اللي مب عايش ويانا بياخذ ها الانطباع.. يعني عادي نعوم يكونن ربع ووايد ويا بعض سيراتهن رداتهن لبسهن نفس الشي وسموهن كلوز .. تعرفين انا استغرب عندنا ربع من بنات العين تتخيلين انهن مايطبن السكن .. اونه يخافن..
ناعمه: اونه
مي: هي والله.. اللي محلوفلها ما دش السكن .. واللي تخاف من البنات .. واللي واللي..
ناعمه: اسميهم عيل ماخذين فكره غلط
مي: شدراني..بس استغرب انه هن بعد عندهن سوالف مسابر وكلوز وجي بس ماعرف ليش كله طايحات فبنات السكن .. مب الكل طبعا بس كل ماكون ويا شله وفيها ربعهن بنات العين كله يتضجرن من بنات السكن..
ناعمه: كل مكان فيه الزين و الشين
مي: خخخخ ترا هاي مقولتيه .. بس احلى مافي السكن ربشة البنات
ناعمه: يالله عاد انتي اربشوني وبخترش
مي: ههههههه فدييتني ..

وكملو سوالفهم شوي وعقب ترخصت مي من ناعمه وسارت تسبح من عقب تعب الباص .. وعقب نزلت تحت عند يدتها واخوانها تاخذ اخبارهم وشو سوو خلال ها الاسبوع ..

****

المغرب كانت فجر طالعه ويا ربيعتها زهره .. فجر تعرف زهره من فتره بسيطه وعلاقتها قوت وياها واايد حتى اكثر من علاقتها بدلال ولولوه بنات بلادها ..
لدرجة انه فجر أمنت زهره بوايد من اسرارها وخصوصا مشاعرها تجاه أحمد ..
زهره كانت تشجع فجر على علاقتها بأحمد وتعطيها من النصايح وطبعا فجر مستانسه وايد عليها .. كانت ترتب اللقاءات امبينهم في أمل انه أحمد يصارح فجر باللي فخاطره قبل ما تفضفضله فجر بنفسها .. وكان اليوم واحد من ها اللقاءات ..
اتفقوا انهم يتلاقون في المول ..
طلعت فجر بسيارتها وتلاقت في المول مع زهره اللي تمت تتمشى وياها وقصوا تذكرتين للسينما ..
في هالوقت وصل احمد .. سلمت عليه فجر اللي كانت لابسه تنوره بيضا قصيره اطول من تحت الركبه بشبر .. مع قميص ايده قصيره لونه اسود .. ورافعه شعرها بشكل عشوائي ..
سلم عليهم احمد وعلى ربيعتها زهره .. اللي كانت لابسه عباه مفتوحه فوق بنطلون جنز .. وشيلتها كل شوي اطيح ع جتفها..
يلسوا في الكوفي شوب كلهم يسولفون عن امور مختلفه
رن تلفون زهره .. كانوا اهلها متصلين ..
اضطرت انها تعتذر منهم بحجه انه اهلها يبونها ضروري ..
فجر: شفيج مستعيله وين رايحه ؟
زهره: اسمحولي اميه متصله وتباني ارد البيت .. مادري شوعندها مع اني قايلتلها اليوم يعطوني اجازه لين بالليل .. هههه شكلهم ما يستغنون عني ..
فجر: ايه من قدج عيل ..
احمد: كان ودنا تقضين وقت اكثر ويانا
فجر اطالعت احمد بنظره وردت تتطالع زهره اللي ابتسمتلها وغمزت ..
زهره: يلا ماعليه .. اليايات اكثر.. يلا بااي
احمد: وحليلها ربيعتج شكلها طيوبه
فجر: ايه ..
احمد: من وين هيه
فجر: من دبي
احمد: اها .. من قوم منو
فجر وتحس بحراره فويها: وانته شكو فيها ..
احمد: ههههههه لا بس أسأل ..
فجر: عيل لو تشرب قهوتك وايد احسن ..
استغرب احمد من ردة فعل فجر بس اكتفى بابتسامه ساحره لفجر..
احمد: بدشين الفيلم انتي؟؟
فجر: ايه
احمد: متى بيبدى
فجر: بعد 5 دقايق ..
سكتت للحظه لكنها تجرأت وقالت له : تدخل معاي ؟
احمد ابتسم: اوكي يالله ..

مشوا مع بعض للسينما .. وهم يسولفون عن اخر فتره قضوها مع بعض .. كل منهم حس انه كان وايد قريب من الثاني .. فجر وايد مستانسه لقرب احمد .. ولكن ماتدري هل هو يبادلها ها الشعور ولا لا!

وفها الاثناء..
كان هو يمشي ويا امه اللي اصرت انه اييبها صحارى تتسوق ..
انتبه لوحده مألوفه تمشي ويا شخص غريب وهي الابتسامه ما تفارق محياها ..ركز أكثر وحس جنه حد صافعنه ع ويهه ..

سلطان: امايه لا تظهرين من المحل ليين اييج .. بسلم على واحد من الربع وبييج ..

مشى سلطان يبى يتاكد من اللي شافه .. فجر تمشي ويا واحد غيره !!
كانت تلعب عليه يعني ؟ والا شو سالفتها ؟ مالها تفسير ثاني ..
فجر لعبت عليه ..
لاول مره في سلسله معارف سلطان .. ينلعب عليه .. لعب على كل حد وخذ كل اللي يباه ولا حد يقدر يكسر كلمته او رغبته ..
والحين تدور عليه الدواير وينلعب عليه هو ..
اول الغيث قطره
وهاي أول قطره ..

حس بألم فراسه وهو يتذكر بدريه ومصيرها اللي آلت له .. من عشر ايام وهو عايش فكابوس بدريه .. بس خوز ها الأفكار بسرعه من راسه
ورجع عند امه قالها انه المكان بدى يزدحم ولازم تخلص بسرعه عشان يرجعون .. ماكان له مزاج انه يتم اكثر فها المكان اللي شهد فيه خيانة فجر .. صح ما عنتله الكثير . لكن هو سلطان .. كرامته فوق كل شي .. محد يدوسله اياها ومحد يلعب من وراه .. واليوم شاف اللي لعب من وراه وماعبره ..
حس بخنقه فضيعه .. وتم يبطل فصم كندورته وبدى يتأفف لين حستبه امه وطلعت من المول ورجعوا البيت ..



****


وفي بيت مريم .. يلسن اسما ولطيفه ويا امهن يسولفن وحده تتشكى من دواماتها والثانيه تتخبرها عن الاهل وشو سووا ها الاسبوع..

لطيفه: امايه نايف وينه عيل راقد ؟
مريم: لا امايه فوق السطح عند الحمام .. ها مادري شقى بيعرس وهو دوم لابد فووق عند هالحمام
لطيفه: ماعليج بتيه اللي بتسحبه تحت ..
مريم: ان شا الله ..
اسما: والا صدق مرت خالي حامل ؟!
مريم: هيه حليلك ياسيف
لطيفه: يالله عاد محد هزربها بتحمل عقب ماوقفت احين مادري 10 سنين اظن مادري كم
مريم: يالله رزق من الله ياهم .. الحمدلله
في هالوقت نزل نايف من فووق شال في ايده حمامه
سلمن عليه خواته وتم يالس وياهم والحمامه بعدها في ايدها يمسح على ريشها
اسما: توه امايه تقول شقى انته بتعرس وهالحمام دومك زابن عندهم
نايف: ماعليه بسحب ريمان ويايه فوق عند الحمام
مريم: اندوكم .. واحين وين تبابها ها الحمامه !
نايف: بوديها عند البيطري شوي اشوفها والله انها
لطيفه : انزين خلنا من سالفه هالحمامه قولي شو سويت في الجناح احين ؟
نايف: اخترنا تراه بس نترياهم يخلصون تركيب الحمامات وعقب بيصبغون
مريم: والاثاث ؟
نايف: عقب بنتنقاه انا وياها بنشوف يوم واحد بنسير الشارجه او دبي
اسما: كيف بتسير وياها ؟ عادي ؟
مريم: لا هب عادي انا بسير وياهم والا هي تاخذ اخوانها ..
نايف: لازم يعني ؟ ريلها انا ع سنه الله ورسوله
مريم: يالله استح ع ويهك .. عيب .. عيزان تصبر شهرين وعقب خذها ودها وين تبى .. لو سمعتك امايه جان عرفت شو تسويبك
لطيفه: فديت امايه اشحالها ولهانه عليها .. قوموا نسير لهم الحين..
نايف: ريم تكون محد عقب المغرب
لطيفه: ليش وين تسير ؟
نايف: تسير نادي رياضي عشان تظعف اونه هب عايبنها تبى تخف شوي
لطيفه: ايواا . زين زين ..
نايف يطالع لطيفه: عقبال بعض الناس اللي لين احين مب طايعين يحسون ع دمهم
لطيفه: كيفي عايبني جيه .. انا حلاتي وانا متينه
نايف: ريمان اللي اظعف منج سوت رياضه ومادري شو وانتي تامه لين احين جيه يبوج اظعفي عندج شهرين لين عرسي خلي الناس تشوفج وتخطبج وتفكنا منج
مريم: الله واكبر ها كله ! شو تباها بنتي غاويه برايها
نايف: عدال انتي وبنتج .. يالله انا بقوم عنكم بسير اودي حماماتي
اسما: خطاها السووو ماتشوف شر ان شا الله
نايف: الشر ماييج ..

روح نايف ونشن البنات يبدلن ثيابهن عسب يسيرن بيت خالهن..




*************************
(الخميس) 2 ديسمبر 2004
*************************

كانت فجر مجابله لابتوبها ومحتاسه مب عارفه تسوي البروجيكت اللي عندها وبما انه امتحاناتهم قربت كان هذا فاينل بروجيكت ..
رفعت تلفونها واتصلت باحمد .. اللي تحس انه خلاص تملك احاسيسها خصوصا فآخر فتره زادت فيهم شوفاتهم.. اتريته يرد عليها لكنه مارد ..وطت التيلفون وهي تفكر شو يسوي احمد الحين.. ليش ما رد عليها ..
ورد بالها للبروجيكت بدت تشتغل فيه شوي بس ماعرفت تكمل .. طفرت .. وتذكرت ملاذها فها الأمور ..رفعت سماعه التلفون واتصلت حق سلطان .. يمكن يقدر يسويلها البروجيكت مثل ماسوالها من قبل كل بروجيكتاتها طول ها الكورس..

تردد سلطان لكنه رد عليها يشوفها شو تبى ..

سلطان: الوه
فجر: قوه
سلطان: الله يقويج
فجر: اشلونك سلطان؟
سلطان: لوني..مسمر ها الايام..
فجر: هههه تنكت ..
سلطان: لا بس اغير جو ..
فجر: اها .. زين اخبارك
سلطان: تهمج
فجر: هو! .. سلطان شفيك
سلطان: لا ابدن .. بس اخباري توب
فجر: ان شاء الله دوم ..
سلطان: امين
فجر: وليش ما تسأل عن اخباري
سلطان: ممم .. مايحتاي اسمعها.. اكيد انج بخير

فجر عقدت حياتها .. اول مره تسمع سلطان يرمس بها اللهجه اللاذعه .. صارلها فتره ما رمسته لكن اخر مره كان مرمسنها باسلوبه المعتاد..

فجر: لا مب بخير ..
سلطان: افا شوفيج
فجر وهي ترقق اسلوبها: ماكو ..
سلطان: اها
فجر: سلطاان.. تعبت من ها الدراسه .. مليت ابي اطلع من الجامعه خلاص

سكت سلطان يعرف اسلوبها تبى تطلب منه شي لكن قرر انه يسايرها

سلطان: ليييش ؟ خير ان شا الله
فجر: عندي بروجيكت ومحتاسه مب عارفه له زين..والله أرف..
سلطان: اهاا الله يوفقج
فجر: من 3 ايام قاعده ادور عنه في الانترنت مولاقيه شي ..
سلطان: هيه الله يعينج
فجر زاد استغرابها.. شوفيه سلطان .. في العاده يعرض عليها خدماته قبل ما تطلب منه .. والحين مجافنها واايد ..
فجر: تعبت والله ..
سلطان: يلا ماعليه شدي حيلج .. هاي الدراسه تراها ..
فجر من غير تردد:ممكن تساعدني شوي اذا كنت فاظي
سلطان بسخريه: هه كان ودي بس مب فاضي ها الايام..
فجر سكتت ..
سلطان وهو قاصد ينقم: الا ليش ماتخلين ربيعج يساعدج ؟
فجر مستنكره: منووو ؟
سلطان: اللي فالح يوديج مولات وسينمات .. خله يسويلج بروجيكتاتج بعد ..

فجر سكتت انصدمت ماعرفت شو تقول .. خافت ..

سلطان: سمعي.. ماعندي وقت اضيعه ع ناس من امثالج ..باي

سكر التلفون في ويها .. وغلق التيلفون وفره فالسده .. وطلع تيلفونه الثاني .. خلاص .. يكفي اللي ياه لحد الحين .. استغلته ها الانسانه وهو عباله انه يلعب كالمعتاد .. كره الوقت اللي قضاه وهو يشتغل الها شغلها ويساعدها فواجباتها ..

اما فجر بدت تساورها الشكوك .. سلطان أكيد شافها ويا أحمد فواحد من الاماكن اللي ساروله .. بدت تخاف على نفسها .. سلطان ما يطوف ها الامور وما بيسكت .. خافت يخبر عليها .. ارتبكت أكثر وما قدرت تركز فاللي قاعده تسويه ..


****



دش محمد البيت وفإيده مغلف بني .. شاف بناته الثنتين يالسات فالصاله ويا امه يهمزن ع ريولها .. دخل عندهم وحب امه ع راسها ويلس حذالها ..
وطى المغلف ع الغنفه .. وانتبهت احلام له وسألته ع طول..

أحلام بحمااس: ابووويه يبتهااااا؟؟
محمد وهو يبتسم لبنته : وأخيرا ..
احلام: الله .. ابا اشوفها
محمد: مايصير قبل ماتشوفها امج
مديه: ابويه شو هيه؟؟
ام راشد: ليش شو يايب لعبير
محمد: لا ماشي .. مسولها روايه ومن متى اكتبها والحين خلصتها كامله وموجوده فالنشر من عقب ما قراها رئيس التحرير وعطاني رايه .. وهاي اول نسخه مهدايه لحرمتيه..
ام راشد: ياحافظ عليك .. تستاهل ام احلام
مديه: ياسلاام .. عاد نحن قارلنا اياها بس نبى نشووف كيف الشكل النهائي..
محمد: خلاص من اعطيها امكن شوفنها ..
احلام: يا سلام .. ياحظها اميه فيك يا ابويه
محمد: هههههههه وليش مب يحظي انا فيها
مديه: يحظكم ثنينتكم فبعض ..

ام راشد كانت تشوف محمد وبناته وتبتسم من خاطرها الهم .. قلبها واااايد يرتاح وهي تشوفهم ملتمين جي ويسولفون .. طبيعة العلاقه هاي بين محمد وبناته كل حد يتمناها وكل حد يستانس عليهم .. دعت من قلبها انه الله ما يغير عليهم ويحفظهم لبعض..
قامت احلام من مكانها تشوف وين امها .. ولقتها فالحجره يالسه ترتبها وردت تركض عند ابوها ..

احلام: ابوويه ابوويه
محمد: ها شو بلاج
احلام: اميه فالحجره .. سيرلها يلا .. وخبرنا ردة فعلها ..
محمد ابتسلم لبنته ..
محمد: يالله ياامايه ماروم اسوي شي ما يشاركني فيه ها الثنتين ..لا ويتحمسن بعد..
ام راشد: هههه فديتهن .. يلا قم سير لحرمتك
محمد: ان شالله ..

وقام محمد من مكانه وطبع بوسه على راس امه .. شل المغلف وتوجه لحجرته .. دش على عبير اللي كانت ملتهيه بتنظيف الحجره ..

محمد: السلام عليج .
عبير: هلا والله .. وعليك السلام والرحمه
محمد: شحالج
عبير: تماام .. ها وين رحت اليوم .. من الصبح طالع
محمد وهو ييلس ع الغنفه .: ابدن .. مني ومناك ..
عبير وهي ترتب الكتب فالمكتبه: حلو ..
محمد: خلي ها اللي فايدج وتعالي يلسي حذالي
عبير وهي تطالعه: متوله علي
محمد: هي وايد
ابتسمتله عبير وخلصت اللي فايدها وسارت تيلس حذاله.. انتبهت للمغلف اللي ع الطاوله ..
عبير: شو ها
محمد: بطليه وشوفيه ..
فتحت عبير المغلف وطلعت منه اللي فيه .. تمت تتأمل الواجه وتقرى العنوان ..

(اسم الروايه: شق في جبين الذاكره!

تأليف: محمد سلطان بن مانع..)

واطالعته عبير وهي مبتسمه ..
عبير: الصحفي قام يكتب روايات
محمد: هاي انطلاقتيه فمجال الأدب القصصي ..
عبير: الله يوفقك ان شاء الله
محمد: ماودج تقرينها .. او تعرفين سالفتها..
عبير: رواية ريلي حبيبي وما اقراها .. ما يصير
محمد: اووه قوموا عني ..
عبير: هههههه يلا خلنا نقرى المقدمه ..
محمد: لا .. اقري الاهداء أول ..

فتحت عبير ع الاهداء وتمت تقراه .. غرقرت عيونها وبدى قلبها ينغزها .. ها الروايه اهداء من ريلها الها .. بطلت ع المقدمه وقرت شوي تبى تعرف شو سالفة ها الروايه .. بدت تقرا بداية احداث مألوفه عليها على طول فهمت انه هاي قصه محمد معاها في الكويت .. رفعت راسها وطاحت عينها بعين محمد .. نزلت دمعتها على طول وطاحت فحظن ريلها ..
مسح محمد ع شعرها ويحس براحه تسري فجسمه لها الانجاز ..

محمد: شو ما عيبتج البدايه؟
عبير: محمد .. هذيل نحن .. هاي قصتنا ؟!
محمد: هي حبيبتي .. نحن هذيل ..
عبير: من متى وانته تكتبها؟
محمد: من فتره طويله .. حاولت انجزها فأسرع وقت .. كنت اتخيل كل شي واكتبه على طول ..
عبير وهي تشوف عيون محمد ..
عبير: هديه ولا أروع ..
محمد: فديتج والله .. تستاهلين كل خير يا ام بناتي ..

وتمت عبير قابضه الروايه فايدها وتجلب فيها .. وكل ما تقرى موقف تعود ذاكرتها لذاك اليوم ويلست تناقش محمد عن كل شي .. وهو الثاني مستانس وتموا يتذكرون اللي مروا فيه ..


****

توها مي مسكره من احلام اللي خبرتها عن سالفة الروايه .. ما يتم شي فبطنها لازم تخبر توأمها الروحي بكل كبيره وصغيره .. مي واايد عيبتها السالفه واستانست عليها وتم فخاطرها تقرى رواية خالها ..

قامت من مكانها ونزلت تحت.. لقت مها ومهره وجاسم ومايد وعفرا يلعبون مونوبولي وحاشرين الدنيا ..

مي: ايه خفوا حسكم عنبوكم طارين الدنيا
مها: هذا جسوم كله يصرخ ..
مي: يالله يا انتن كله تردنه على جسوم ..
جاسم: عادي عادي ميوه .. سووو طاااف ..
مي: هههههه فديت الطاف انا .. احسن شي ..
مها: ميوه بنسألج ..
مي: شو
جاسم: ميوه شوفي انا اقولهم خلاص ماشي عيد الاتحاد الحين .. بابا زايد توفى .. وهم يقولون كل سنه فيه عيد اتحاد
مهره: انزين شو يخصه.. عيد الاتحاد ها يا حبيبي غير عن عيد الجلوس
مايد: هذا جسوم ما يقتنع
مي: هه .. صدقه جسوم أي عيد اتحاد هذا بنعيشه وزايد محد..
مها: انزين بس كل سنه فيه عيد اتحاد
مي: والله انكم حاله .. تناقشوا بروحكم احسلكم انا بسير..



طلعت مي من عندهم وسارت مكتب ابوها .. ملاذها اللي كل ما ملت دشته .. صارلها فتره ما يلست فها المكان وطلعت خواطرها .. يلست ع المكتب وخذتلها ورقه من الاوراق المكدسه جدامها..
تذكرت خالها وحرمته وابتسمت .. حست انها متعايشه ويا الموقف..
ماتعرف شو من احساس مر عليها .. بس تذكرت شي .. وبدت خواطرها تنساب ..


هل يتحقق الحلم !!

ماذا دهانا يا عزيزي !!
بالأمس كنا نلهو ونلعب في الرمل ولا نبالي ..
نفرح وترتسم الابتسامة على وجوهنا بكل براءة ..
نأمل بتحقيق حلم لنا .. وبغد نكبر فيه كلينا ..
فنضحك لمداعبة هذه الأحلام لنا ..
فنعود ونلهو ونلعب في الرمال ولا نبالي ..
واليوم ؟؟ شتان مابينه وبين الأمس ..
كل منا أصبحت له لعبته الخاصة ..
تبدد الفرح واختفت تلك الابتسامة ..
وكست وجوهنا معالم الحزن .. الخوف ولربما الخجل من حلم مضى ..
ذلك الحلم الجميل قد زال وحلت محله أمنية للعودة إلى الصغر ..
لنأمل من جديد بتحقيق حلم لنا ..

يلست تتطالع اللي كتبته .. بمنو فكرت وهي تكتب ها الكلام.. تذكرت الماضي.. تذكرت العفويه والطفوله اللي مالها حدود .. تولهت ع ايامهم قبل..
قطع حبل افكارها دخلة ساره المفاجأه وصفقت الباب وراها ..

ساره: ميوووه ميووه ميووه
مي: بسم الله بلاااج طيرتي حمامة فوادي
ساره: ميووه
مي: وطهف.. بلاج
ساره: يشلج ..

تجدمت ساره من مي ويلست ع المكتب مجابلتنها ..

ساره: ماتدرين باللي صاار يا ميوه ..
مي: شو مستوي
ساره: يقولج مروان
مي: بلاه
ساره: اندوج التيلفون اقري ..

مي على طول حست انه مروان خايرنها فشي وخذت التيلفون وقرت المسج اللي مطرشنه ..

" ساره..
الصراحه..ماقدر اخبي أكثر.. حاولت انج تفهميني فها الفتره وأتقرب منج أكثر بس ماعرف اذ كنتي حاسه بها الشي..راسج عنيد وايد ..
بس اعرفي اني احبج .. ومابا حد غيرج"

تشققت مي وهي تقرى المسج وتم قلبها يدق ..

مي: ابيييه سارووه ماروم اتحمل
ساره وهي رافعه حايب: وانتي شلج
مي: هههههه ماشي احب جي .. ساروه شو رديتي عليه
ساره: ماشي ..
مي:من متى مطرشنه
ساره: قبل ربع ساعه .. كنا نمسج بعض عادي مثل العاده .. بس ماعرف ليش جي طرشلي ..
مي: تعب من برودج وحليله ..
ساره: ميووه انا مابا جي ..
مي: شو ماتبين
ساره: ماعرف.. يعني اوكي لو كانت امبينا مسجات بس .. يعني بس كانت سوالف.. لكن انها تكون جديه جي انا ماقدر
مي: وشو بسوين
ساره: ماعرف..

وشوي وصلها مسج ثاني من مروان .. فتحته ساره وقرته ..
ساره: اتريا ردج!
مي: افف بدى الأكشن ..
ساره: انا الغلط مني اني سايرته فالبدايه .. ميوه .. انا مابعطيه الحب الحين.. خل كل شي يستوي رسمي
مي: مالت عليج.. انتي فصوب والرومانسيه فصووب
ساره: ميوه انا ماحب جي..
مي: انا لو كنت مكانج بعيش الحب وحيااتج
ساره: اف عاد انتي عايشه بطولات القصص والشعر لازم بتكونين هيمانه
مي: هههههه ويا ويهج .. بس وينه اللي بيطلع ها المشاعر .. مالت عليهم شبابنا.. الامروان طلع قيس العايله ..
ساره: وشو يعني تترين مني اكون ليلى
مي: اقطع ايدي من هنه جان كنتي ليلى ..
ساره: انزين فكينا قوليلي شو اقوله ..
مي: قوليله اللي فخاطرج
ساره: مب فخاطريه شي .. انا ما حبه .. عادي
مي: بس متقبلتنه
ساره: هي عادي..
مي: ماعليه يا ساروه بنشوفج عقب .. الا ما تتعلقينه وتحبينه
ساره: الحب عقب العرس ..
مي: اف منج ..

كتبت ساره مسج لمروان " شو ارد عليك"

رد عليها بسرعه
" ماعرف.. بس اللي ابا اعرفه تبيني مثل ما اباج.؟"

مي: ساروه .. يبى يوصلج انه يبى يخطبج وانتي شو رايج
ساره: ميوه من الله قايلتلي انه خالي رامس عنا .. بعد شو
مي: انزين هو يبا يشاورج انتي قبل ما يرمس
ساره: شو اقوله ..
مي: كتبيله .. اذا الاهل راضين انا ما بعارض..

وطرشتله ساره ها المسج ..
انقهر مروان من برودها .. يباها ع الاقل تبوحله بشي بس حس انها وايد محافظه.. رد عليها بمسج
" انا برمس ابويه .. وقريب ان شالله بينتشر الخبر .. مابا اثجل عليج اكثر..فمان الله"

ساره: شو يعني عصب مني.؟
مي: ومنو ما يعصب منج انتي .. وياها البرود ..
ساره: ميووه بالعقل يعني .. تبيني اعق عمري عليه
مي: لا تاخذينها من ها المبدأ .. مم بس ماعليه .. احسن الثجل شوي .. بنشوفه شو بيسوي..
ساره: ماعرف والله
مي: بس كاتب بيقول لابوه .. يعني قبل يوم انه خالي رمس وقال يبانا لعياله ماكان مروان يدري ولا رمس فالموضوع
ساره: همم شكله جي .. يمكن خالي بروحه رمس
مي: هذا هو ..
ساره: خلينا من ها السالفه انتي الحين .. انا شو اسوي
مي: لا سوين شي .. اتريي ..

تمن الثنتين صاخات ويفكرن باللي بيصير .. مي كانت مستانسه انه فرحه ثانيه بتدخل بيتهم وثاني وحده من خواتها بتنخطب.. وحست بقشعريره تسري فجسمها ونغزات فبطنها ..

مي: ساروه
ساره: بلاج
مي: بطني يعورني.. تذكرت اني بكون نيمونيه من عقبج
ساره: هههههههه مالت عليج .. منو يباج انتي.. غلطان اصلا خالي يوم رمس عنج ..
مي: جب جب .. كثير اللي يتمنوني
ساره: خلج جي مرتاحه ولا ها التفكير.. ويوم بتصير حزتها فكري..
مي: ليش بديتي تفكرين
ساره: ميوه لا تستعبطين .. الموضوع بعد يخلي الواحد يفكر ..

شلت ساره بعمرها وطلعت من المكتب .. تمت تتطالع المسجات .. مروان يباها هيه .. وما يبا غيرها.. لو كانوا يحسون بها الشي بس لما يأكد الشخص حبه ويوثقه يتغير كل شي .. ركبت الدري وصعدت فوق ..
ضربات قلبها زادت .. لكنها حاولت تتناسى الموضوع


****


الساعه 12 فليل كانت فجر طايحه في الغرفه .. بعدها منصدمه من موقف سلطان .. كانت خايفه انه يستنذل ويخبر عبير او محمد .. وقتها ماكانت تعرف شو بيستوي لكن اقل شي بتطيح من عينهم ويمكن تعرض اختها لمشاكل مع زوجها..
لو صار وسلطان خبر اختها .. اكيد بتجبرها عبير انها ترجع الكويت ..
يا فبالها أحمد .. كيف بترد وبتخليه .. لا ما تقدر قلبها تعلق خلاص .. تمت تدعي من الله انه سلطان يسكت عن السالفه وما يخبر ..

جلبت فتيلفونها وهي فبالها أحمد .. طول اليوم ما رمسته كل ما تدق ما يرد .. قالت بتطرشله مسج ..

( مسا الخير .. عسى ماشر مالك صوت..أتصل ما ترد!؟ )

تمت قابضه التيلفون تتريا يوصلها شي .. ملت وحطته ع جنب وقررت ادش تسبح .. وبعد نص ساعه ظهرت من الحمام وهي تنشف شعرها .. سارت اتجيك ع تيلفونها وطارت من الفرحه يوم شافت انه واصلنها مسج ..
فحته ع طول .. لكن انصدمت باللي تقراه..

كيف.. وبكل ها السهوله .. طرشلها ها المسج .. ماراعى شعورها؟!
ردت تقراه وهي مب راضيه تقنع عمرها انه اللي مطرشلها المسج هو نفسه أحمد

فجر: مسا النور ..سوري والله كنت مشغول بملجتي على بنت عمي .. بغيتي شي؟؟

فرت التيلفون من ايدها وبدت دموعها تنزل ..

فجر: هذا شنو قاعد يخربط .. كيف .. ومتى وليش.. وااايد مستانس انه مطرش ها المسج اللي يحرق .. ليش انا وين رحت .. شنو يعني كان قاعد يتسلى فيني ..


ماقدرت تتمالك نفسها رفعت التلفون واتصلت فيه ..

احمد: الوه
فجر: احمد
احمد: هلا
فجر: شنو هالمسج اللي دازه لي ؟
احمد: شو فيه
فجر: انت ملجت صدق؟
احمد: هيه البارحه .. مابتقوليلي مبروك
فجر: مبروك على شنووو ؟ انته متى خاطب ؟ وليش ماقلت لي ؟
احمد: انا محير لبنت عمي من كنا صغار .. وفجاه ابويه قرر اني املج وانا وافقت
فجر: وانا شنو؟
احمد: انتي زميله واخت يا فجر
فجر: ليش كنت تخدعني لين خليتني اتعلق فيك ؟
احمد: انا ماخدعتج وعمري ماحسستج اني احبج او اباج كنت اعاملج كزميله
فجر: هذا كله وزميله ؟
احمد: شو هذا كله .. ماصار شي
فجر: كيف ما صار شي .. يلساتنا ويا بعض وين راحت .. مكالماتنا ..طلعتنا ورجعتنا .. كل هذا وين رااح
احمد: فجر انا ماييت فيوم وقلتلج اني احبج او اني اباج .. كنت مستانس بصحبتج..زميلة دراسه لا غير ..
فجر وصوتها متقطع ودموعها تنهمر: احمد انت شنو قاااعد تقوول
احمد: شوفيج ماخذه الامر بحساسيه .. حتى انتي ما حسستيني انج تحبيني ..
فجر: لي كرامتي .. وكنت اترياك انت تبدى
احمد: لو كنتي فخاطري ما كنت فيوم بخبي مشاعري ..بس انا اعرف اني لبنت عمي وماظن مشاعري تروح لشخص غيرها
فجر: لاا .. احمد .. لاتهدني
احمد بجفا: فجر اسمحيلي ..زوجتي تتصل ع الخط الثاني .. مع السلامه
فجر: أحمــد لااا ..
احمد: فمان الله..

سكر التلفون عنها.. ويلست فجر تصيح من حسرتها ع اللي صارلها ..صفعتين فيوم واحد .. صفعه من سلطان وثانيه كانت اقوى من أحمد .. خلاص ما قدرت تستحمل أكثر طاحت ع الشبريه وهي تصيح صياح يقطع القلب ..
الشخص اللي حبته وسلمتله كل احاسيسها طلع مجرد وهم خادع..
لو حد يعرف باللي صايرها اكيد بيعايرونها .. فلحظة ضعف صدقت مشاعرها .. مشت بكل ثقه لين يا ها اليوم اللي اطيح فيه على ويها ..
جلبت صفحاتها من اول ما يت ها البيت لها اليوم .. وقررت تسكر الدفتر خلاص .. ماعاد لها مكان .. بتعلن الرحيل من بعد الهزيمه ..
وبتثبت وجودها من يديد برحيلها ..

****

كان غافل ع سريره وقت ما سمع دق ع الباب .. انتبه للنور اللي ضوى من حجرته شوي .. وغطى ويهه بايده وهو يتأفف ..

فارس: شو مرقدنك من الحينه؟
مروان وهو متضجر ..
مروان: شو تبى
فارس: ماشي ييت البيت ماحصلت حد
مروان: الساعه وحده منو بتلقى واعي يعني
فارس: احيدكم انته وعزوه تتيلسون فالصاله
مروان: عزوه راقده من وقت اليوم ..
فارس: مب منها .. خامه المولات اليوم..
مروان: انزين خلني برقد ..
فارس: اف منكم .. بدق لمنصور بسير وياه العزبه
مروان: هاي شغلتكم تراها .. ماتملون من ها الميلس
فارس: يلا باي

طلع فارس من الحجره وسكر وراه الباب ..
ومروان حاول انه يرقد بس ما قدر .. يلس فمكانه وبدى فكره يجول به .. تذكر المسجات اللي كانت بينه وبين ساره اليوم ..
قبض تيلفونه يبى يتصللها.. ومن غير تردد ضرب على رقمها .. لكن ما من مجيب..
بند بكل هدوء ووطى تيلفونه .. طاح وهو محطي ايده ورا راسه..

ليش يعني هيه متجاهله مشاعره .. وليش بارده جذي.. شو يعني ناويه على تعذيبه.. شال ها الافكار من راسه .. وقرر انه باجر يكلم ابوه فالموضوع..خلاص ما يقدر يصبر .. كان قبل متخوف انها ماترضى عليه لكن لما وصللها وبدى ياخذ ويعطي وياها تعلقها أكثرواطمن قلبه انها هيه متقبلتنه ..


بانتظار ارائكم .. وحياني الله امبينكم :k_smile2:

اوه شي قصة يديده من تاليف المزيونه وانا مادري شو السالفة افا

ان شاءالله بقرا القصة

يااااااااااااويييل حااالي الباااااااارت وااااااااااااااااايد حلوو

وااايه ع نعووووم والا بتيييبلهم بيبي خخخخ

استاااااانست ع سلطااان الله يهديييه ياربي

وجااان استاانس ل مروااان بعد الله يتمم الخطبه على خير

** تستااااهل فجر

يسلمووو المزيوووونه

مذهله:fa41:

تفاصيل واقعيه ... يعطيكم العافيه خواتي:thumbup1:

ياهلا والله
نور المنتدى
***
استانست ع سلطان<<<وايد يعيبني
فجور تستحق أكثر من كذه
والله يسهل ع نعوم
والله يعوض بدريه وزوجها خير إن شاء الله
***
تسلم لي الأنامل اللي كتبت
ونزلت الجزء :thumbup1:
تشكرات خواتي

حراام تدرين مع اني كنت كاره فجر بس عورت قلبي وحليلهــا.. انصدمــت في احمد.. طلع بس زميل عيل .. افا افا افا..

ساروه بعد اتكابر انزين فكي الريال وقولي احبــــــه..

نعوم وحليلها طلعت حامل .. مسكينــه تستاهل كل خير .. حرام مب شريره تراها..

سلطــان ما بحكم عليه الحين لاني اخاف ياخذ مي .. واتمنى ما ياخذها عقب ما لعب ع بنات خلق الله ياي لهــا.. ان شاء الله تاخذ فارس..

وبس .. حلوو كان الجزء ..

حيا الله عاشقه الشمال
مرحبابج يالشيخه
اقربي يابووج رااح نسحرج ونقويج على صياام باجر :birgits_giggle:

عن الجزء الصرااحه واايد :shocked: إيه انصدمت

وجاااااااااان يكبر بعيوني:thumbup1: أحمد
يا الله من يقول إن بس يعتبرها زميله
اصلا الغلطه في فجر إنها تتوهم اشياااا مش من الواقع

وسلطاان
انا قايله إن كل السلاطين عندنا ربي هاديهم
والحمدلله ربي هدااه يارب ويثبته بس الصرااحه طلع:fa51: مش هين يوم لبس فجر
أسميها طراره وتتشرط سة هاانم
اللهم إني صائم :birgits_giggle:

والبناات
وااي ياربي
مااشاء الله عليها عليا ونعمه الحرمه
عرفت تربي موول ماتوقعت إنهن يفرحن لحماال نعمة الله حليلها والله
و واايد اشياا بس عسب مدري وش استوى بالواحات نسيت
افرحي ماراح اهثرب وااايد لووولز
مرحبابكم والله
ومبرووك عليكم الشهر

السلام عليكم ..

مبروك عليكم الشهر ..

انا اعتذر عن التعليق ع ردودكم بس بعوضكم بجزئين يداد من بعد مافتح المنتدى ..

الجزء الحادي والعشرون

***********************
(الخميس) 6 يناير 2006
***********************


"يا مرحبا وسهلا حيا الله من لفانا"

كانت ام سيف واقفة عند الباب ترحب بالحضور اللي كانوا يتوافدون على القاعة محطيه شيله تور عليها عباه ع الراس ..و لابسه ثوبها العنابي المطرز بذهبي اللي فصلته لها ريم بهاي المناسبه ..
وراها ناعمه اللي يالسه ع الكرسي ومن بعدها يتتالون ام راشد وعليا وشيخه وميره ومريم وعبير على الصوبين للباب..
كانت الطاولات في القاعه مفروشه بمفرش ابيض عليها مخمل اصفر فاتح ..
وعليها ورود تشكل دائره من اللونين الابيض والاصفر ..
كان التزيين بسيط الا انه راقي وهادي في نفس الوقت ..
ساره كانت واقفه اخر الاستقبال .. لين يتها مي تزقرها

مي: ساروه لحقي عليه
ساره: بلاج ؟
مي: انطر الفستان
ساره: تغربلتي .. من دفاشتج .. هاتي اشوف ؟

مي التفتت عشان ساره تشوف وين الفستان مطرور..
صدت لهم عبير مرت خالهم

عبير: شفيكم ؟
ساره: انطر فستانها
عبير: عيل حمدي ربج اني يايبه وياي ابره وخيط
ساره: حق شو؟
عبير: دقتلي ميره تبا ابره وخيط لبنتها ايمان .. فصمة فستانها طايحه
ساره: زين
مي: انزين عبير وين الابره والخيط ؟ يله سوولي
عبير: في شنطتي .. تعالي معاي بسويه لج عند ريم فوق..
مي: يلا انزين قبل ما ايون ربعي .

طلعت مي ويا عبير فوق عند ريم اللي كانت لطيفه يالسه عندها وهي تتصور..
مي ابتسمت لريم اما عبير تمت واقفه محلها وهي تتطالع ريم وتسمي بالرحمن ..

عبير: بسم الله تبارك الله .. انا بنادي محمد يقرا عليج
ريم: هههه مب لها الدرجه عاد

اللي كان شايف ريم قبل والحين بيعرف الفرق ..
ضعفت وترتب جسمها وشكلها مرتاااح اكثر من قبل ..
فستانها كان ناصع البياض .. ايده طويله .. والطرحه دانتيل مشغول .. يايه على راسها تغطي ويها من الاطراف .. فاتحه شعرها اللي كانت تسريحته غريبه بالنسبه لعروس .. كان كستنائي مموج يوصل لين تحت جتفها بشوي .. حركته كانت غير عن الحركات المعتاده لتسريحات العرايس ..

مي: ريموه .. بتصور وياج
ريم: انزين نحن مخلين حقكم لا تخافين ..
مي: انزين انا ابا اتصور الحينه . اخر العرس بنكون تعبانين ومالنا بارض والميك اب بيخترب
ريم: انزين خلاص زقري اللي يبا يتصور .. انا تقريبا خلصت .. ابا ايلس ارتاح
مي: اوكي بس خل يعدلولي فستاني اول
لطيفه: ليش بلاه؟
مي: خخخ نزلت من الكوشه وعلق الذيل فشي وانطر شويه
لطيفه: اويييه .. وماتشوفين اللي جدامج وانتي تمشين
مي: شدراني كنت مستعيله ..
عبير: يلا انزين تعالي ..

ويلست مي حذال عبير ورفعت فستانها وعطت عبير تسويه الها .. ريم كانت تعلق على مي ولطيفه تضحك ..
وبعد ما خلصوا ..

عبير: يلا خلصت .. انا بنزل عنكم ..
مي: انا بعد .. بشوف ربعي احس ين ..
ريم: وما بتصورن؟
لطيفه: انا بتصور الحين بروحي وياج .. ميوه زقري خواتج واسوم
مي: اوكيك .. يلا كل شوي دفعه بتي .. احين بني انا وحلام..
ريم: يلا انزين ..
مي: هيه صح ترى سميه ربيعتج يت تحت بسير اييبها
ريم: هيه خل تي فوق بسلم عليها وبتصور وياها
مي : اوكي

نزلن مي وعبير .. ولطيفه تمت ويا ريم تتصور .. كان بعده فيه وقت فخذن البنات راحتهن فالتصوير .. وكل شوي تي مجموعه منهن يتصورن .. وفالأخير .. يت عليا فوق عند بنتها ..

كانن اسما وساره اخر حد يايات يتصورن ويا ريم .. طلبت منهن عليا انهن يخلنها ويا ريم شوي قبل ما تنزل ..

ساره: ومتى بتنزلين ريموه؟
ريم: الحين الساعه عشر بعدها
اسما: انزين دقيلنا رنه اول ما بتنزلين .. نحن مزهبين كل شي والدي جي بنقوله بعد يستعد للزفه
ريم: خلاص اوكي .. المهم كل شي يكون مرتب .. مابا انزل ويخترب شي وارتبك
ساره: لا ماعليج .. اذ اخترب شي انا بقبض المكرفون وبغنيلج هيهي
ريم: ههههه متفيجه .. يلا سيرن بطني قام يعورني ..
عليا كانت يالسه حذال بنتها اللي محطيه ايدها فايد امها وتبتسم الهن ..
طلعن البنات وتمت عليا ويا ريم ..

ريم: من متى اترياج اتين .. اقول فخاطريه ما بنزل من غير ماشوفج
عليا: فديتج يا ريمان .. قمر طالعه
ريم: اميه انتي متخيله اني عروس ..
عليا: وليش مب متخيله..بسم الله عليج وحواليج منو يشوف ها الحسن كله وما يتخيل انها بتكون عروس ..

رفعت ريم راسها واطالعت امها .. كانت نظرتها رزينه وثابته .. مافيها مدخل للخوف .. ها اللي لاحظته عليا فنظرات ريم اخر فتره ..

ريم: اميه .. الصداع وايد خف عني الحمدلله
عليا: لان نفسيتج تعدلت .. وقايلتلج من قبل وقايلنها لج الدكتور
ريم: بس حزات اييني خفيف
عليا: الحمدلله يا امايه ..المهم انتي تكونين مرتاحه
ريم وهي ترص على ايد امها: نايف خلاني ارتاح .. طمن قلبي وايد .. ماكنت مستعده فيوم اني اثق فريال .. لكن هوه خلاني اراجع حكمي في هالموضوع
عليا: لانه ريلج ويحبج ومحد بيداريج كثره .. انتي قبل معقده بعمرج ..
ريم: الاوضاع اللي كانت والاحداث اللي استوت هيه اللي خلتني اعقد بعمري .. وبعدين انا احس انه صلاه الاستخاره يوم صليتها الله يسر لي كل شي الحمدلله وتقبلته بشكل اسرع من اللي كنت اتوقعه

عليا رفعت ايد بنتها وباستها بكل حنان .. دمعت عينها وهي تتذكر الماضي فثواني .. وريم حظنت امها وتحاول انها تمسك دموعها..
عليا: اللي حسيته اخر فتره .. انه ردتكن لبيت ابوكن كانت فصالحكن ..
ريم وهيه تطالع امها ..
ريم: انا وياج .. كنا قبل مب متقبلينهم .. لكن والله يدوه تغيرت .. نعوم قامن خواتي وايد يسايرنها لين قدرن لها .. وابويه اللي ما كنت فيوم حاطه فبالي اني بتعامل وياه .. صرت كل يوم والثاني اثبت فكرة ابوته فبالي لين ما قدرت اني اكلمه عادي .. وايد اشيا تغيرت فيني يا اميه
عليا: الحمدلله ع كل حال يا ريم ..

وقامت عليا من مكانها ووقفت ريم .. وقفت عليا مجابله بنتها وحبتها ع راسها ..

عليا: ما وصيج يا ريم .. انتي كبيره وعاقله .. اوزني امورج ويا ريلج صح .. ولا تخلين للشيطان مدخل امبينكم ..
ريم: ان شاء الله
عليا: الله يبارك الكم ويرزقكم الذريه الصالحه يا رب
ريم: امين ان شااء الله ..

وبعد ها اليلسه ويا امها .. حست ريم باطمئنان يسري فبالها .. اتصلت عليا بساره تقولها انها بتنزل ريم الحين .. واول ما يشوفون ريم طالعه من الباب خل يشغلون الزفه ..

طلعت عليا قبل ريم وفتحتلها الباب .. سمت ريم بالرحمن وهي قلبها كان يدق .. طلعت من باب في الطابق الثاني يودي على بلكونه طويله على مدى مساحه القاعه .. واول ماطلعت ريم عينها شافت كيف القاعه تحتها تضج بالمعازيم .. مشت بشوي شوي فالممر الي يوصل لين اللفت .. الكل كان يطالعها ومركز نظره عليها وعلى شاشة العرض اللي اطلع ملامحها واضحه ..

وصلت للفت كان ينزل في وسط القاعه .. تبطل وركبت فيه وهي مقابل الواجهه الزجاجيه للفت اللي يعكس شكلها للمعازيم وهو نازل .. كانت تبتسم بكل هدوء تحاول بس تضبط دقات قلبها المتزايده وهي تتذكر وصيه خواتها عشان ماتوطي راسها وهي تمشي .. واول ما وصلت للطابق الارضي وانفتح باب اللفت .. شافت انه الناس كلهم قراب منها .. ارتبكت اكثر .. وبدت تمشي ع الستيج بخطوات واهنه . تحس بريولها ترجف .. لكنها تقاوم .. وتجبر نفسها ع الابتسامه ..

كاانن مي ولطيفه كل وحده من صوب تحت الستيج.. يحثنها انها تتلفت يمين وشمال وتبتسم .. وبعد تعطي المصوره اللي جدامها نصيب من ابتساماتها ..

كانت ام سيف هالوقت يالسه ع واحد من كراسي الاستقبال حذالها ام راشد ..
كانت ام سيف قابظه طرف شيلتها وتصيح
ام راشد: بلاج يا ام سيف البنت بنتج وخذت ولدج ادعيلها انتي بس
ام سيف: فديتها هاي الغاليه عاد ماتغمض عينها لو ماتلف ع البيت كله وتطالعهم كلهم
ام راشد: من استوت فديتها ..
حاولت ام راشد تصبر ام سيف لكنها قررت في الاخير تشاطرها دموع الفرح

بعد ما خلصت الزفه .. يلست ريم ع الكوشه .. وهي تحمد ربها انه كل شي مر بسلام .. وبدوا ربعها وبنات اهلها يركبون عندها يسلمون عليها .. واللي يتصور وياها .. واللي يسولف وياها .. لين ما يا الوقت اللي بيدش فيه نايف..

وبدت حالة الطواري من يديد .. ولبسن البنات عبيهن ..

من بعد ما نزلوا الرياييل اللي كانوا يتمثلون في المعرس وسيف ومايد وجاسم ومحمد اللي كانت ريم طالبه منه انه يدش ويا ريلها.. بدوا المعازيم يخفون .. لين ما فضت القاعه تقريبا ومحد تم فيها غير اهل المعرس والعروس ..
نايف خذ حرمته وصعدوا فوق يكملون تصوير ..
اول ما صعدوا نايف وريم شافو عليا يالسه ..
عليا .. اللي من شافت سيف داش القاعه .. شلت بعمرها ويلست فوق ..
ما تحملت تشوف ها الانسان مجددا .. ولا عندها أي رغبه في انها تشوفه.. كرهت النظره اللي لمحته فيها ..
استانست ريم وايد انها شافت امها وطلبت منها انها تتصور ها المره وياهم هم الاثنينه .. وطبعا عليا ما بترد بنتها فشي فيوم فرحتها ..

اما اللي بجوا فالقاعه ..
نزلولهم طاولات اكل وتعشوا كلهم رباعه ..

كانت ناعمه يالسه ع طاوله ويا البنات ..

مي: نعوم كلي .. مستويه ميته ما يسوى علينا ها الحمال نحن
ساره: ههههه تخاف المتن هيه .. ماعليه بتستويلج كرشه من عقب ما تربين
ناعمه: بسم الله عليه فال الله ولا فالج .. ما بهمل عمري انا ..
احلام وهي تنغز مي وتصاصرها: فيني ضحكه..ماعرف ليش نعوم تضحكني
مي: ههههه ليش
احلام: مادري كل ماشوفج انتي وساروه وياها احس تيني ضحكه..كله تضاربن وياها
مي: الا نسولف وياها.. وحليلها نعوم ..
لطيفه: ناعمه انتي فاي شهر؟
ساره: الولووود هاي ع قولة ابو محبوبه عند قوم خالتي قماشه لا تقولولها ناعمه .. في الرابع احين
ناعمه: سالوني انا انزين والولود هاي محد غيرج
لطيفه: ههههههه بدن عاد ..
اسما: لا ساروه ولا ناعمه ايوزن عن بعض
ساره: خخخ انا احب اغصص فيها
ناعمه: هيه وخلي ها اللي فبطني يطلع عصبي عقب
مي: مااااعليج منه ها اللي فبطنج.. كم مره قايلتلج انا بربيه
لطيفه: بتربينه سنه سنتين .. وعقب خلاص ع بيت الريل
مي: هاا .. لا فديتني بعدني صغيره ..
اسما: يلا .. قالتها ساروه قبلج .. والحينه شوفيها سالفة خطبتها انتشرت
ساره وبدت تتلعثم: اييه .. هيهي لاتحرجوني
احلام: هي ماشي .. خطيب مي ياي فالدرب ..

مي قرصت احلام فايدها تباها تسكت .. واحلام غصب عنها ضحكت .. والكل قام يتحرش فساره ومي وطاحوبهن على كثر ما كانن يطنزن ع الساير والراد ..

اما فالطاوله اللي حذالهم .. فكانن الحريم يالسات يتعشن ويسولفن عن امور العرس ويتمدحن فالترتيب اللي كان والكل كان مستانس على ريم ..

عزه: فديتها ريمان.. كانت رهيبه
شيخه: هي ماشالله عليها ..
عزه: الله يحفظها ان شاء الله
عبير وهي ترمس عمتها: عمتي محمد يتصل..شكلنا خليناه ينطر وايد..
ام راشد: هي وحليله ..
ام راشد وهي تخاطب ام سيف: يلا عاد يا ام سيف نحن بنترخص الحين ..
ام سيف: تو الناس.. خلكم بعدها الساعه ما يت وحده
عبير: محمد برع ينطرنا..مافينا نأخره.. الا عليا ويين؟؟
ام راشد: ماشفتها انا مادريبها وين غاطه
ام سيف: اكيد تلقنها عند ريم
عبير: هي شكلها جي.. بتصللها بشوفها ..
مريم: يا حليلها عليا.. الفرحه ماليه عينها اليوم ..
ام راشد: لازم يا امايه.. اول بناتها اليوم عروس..
ام سيف: فدييت ريمان .. الله يصبرني على فراقها
مريم: يالله يا امايه الا حذالكم بتكون ..

ودقايق .. نزلت عليا بعد ما طمنتها عبير انه محد من الرياييل يالس فالقاعه .. سلمت على الموجودين وطلعت عليا وام راشد وعبير ..
اما البنات مديه واحلام تشبصن ببنات عمتهن وما رضن يروحن .. يبن يباتن ويا بنات عمتهن .. واستانسن من بعد ما وافق ابوهن انهن يباتن لباجر ..


وبعد ما فضت القاعه وكلن راح لبيته .. طلعوا نايف وريم وبعد درب استغرق ساعه ..
وقفت الليموزين عند بوابه برج العرب .. نزلت منها ريم اللي كانت متغشيه ونزل نايف .. وقفت ريم على طرف لحد ماخلص نايف الاجراءات بشكل سريع وناداها يروحون لجناحهم ..
دخلت ريم وفتحت غشوتها وفصخت عباتها وشيلتها .
كانت لابسه فستان بسيط .. ومخليه شعرها مثل ماهو والميك اب ..
ابتسم لها نايف وهو يشوفها موخيه ومستحيه ..

يلس معاها ع الغنفات وهو قابض مينيو العشا
نايف: تراني ميت يوع
كانت ريم بعد يوعانه بس مستحيه ..
نايف: شو تحبين ؟
ريم: امم أي شي خبز وجبن
نايف: ليكون انا ماخذ فاره .. ههههه .. قولي شو تحبين ها مايسد يوعج
ريم: ههه اوكي في بيتزا ؟
نايف: هيه بيتزا شو ؟
ريم: مارقريتا
نايف: بعد جبن؟ هههه اوكي
اتصل نايف وطلب العشا ..

يلسوا يتعشون كانت ريم متعوده عليه نوعا ما لانه دايما كان يشاركها وجباتها في البيت فتره الملجه ..

بعده توجهوا اللدور الثاني من الجناح اللي يودي لغرفه النوم ..

طلعت ريم من الحمام بعد مامسحت المكياج .. وتمسحت عشان تصلي ..
لبست عباتها وشيلتها .. كان نايف فارش سياده للصلاه .. وهو بعد كان مستعد للصلاه ..
وقف نايف وريم وراه يأم بها ويصلون ركعتين اقتداء بالسنه ..
بعد ماصلى نايف التفت لريم اللي كانت يالسه وراه وحطى ايده على يبهتها
وقال " اللهم إني أسألك خيرها وخير ما جبلت عليه، وأعوذ بك من شرها وشر ما جبلت عليه"
وتجدم وحبها على راسها ..


**********************
(الجمعه) 7 يناير 2005
**********************


من بعد ليل طويل صاحبه ضجه وربشة ما بعد العرس..قامت مي من نومها .. بس تمت مسترخيه ع سرير ريم .. لفت الصوب الثاني شافت احلام مستغرقه فالنوم..ابتسمت وهي تشوف احلام .. وقربت صوبها .. خذت خصله من شعر احلام وقامت تلعوزها .. تحطها فاذنها وتم تغصصبها ..
بطلت احلام عينها ولفت الصوب الثاني عن مي ..

مي: يلا نشي
احلام: مابا
مي: قووومي عاد وصلت الساعه 12
احلام: ماروم ..
مي: قوومي اخاف ابوج ايي
احلام: لا بيي فليل
مي: افف انزين قومي يلا ..
احلام: انزين بقوم عقبج
مي: بشوفج ان مانشيتي

قامت مي ودشت الحمام .. اما احلام .. من بعد ما وعتها مي طار النوم من عينها .. تذكرت الحلم اللي كانت حالمتنه وابتسمت..
قامت من ع السرير وجابلت التسريحه وقامت تمشط شعرها ولفته واول ما طلعت مي من الحمام دشت احلام ع طول ..
اما مي طلعت من حجرة ريم وتوجهت لحجرتها .. كانت مديه راقده ع سريرها ..بطلت مي الليتات..

مي: يلا قوووومن .. مدوي.. ساروه .. بسكن رقاد ..
ساره بتضجر: اف منج .. دومج حشره
مي: يعلج الحشره.. انتي الي دومج باخه رقاد قومي يلا
مديه: ميووه كم الساعه؟
مي: 12 وربع ..
مديه: حلامي قامت.؟
مي: هي توي وعيتها..

طلعت مي من عندهن وكملت السالفه وسارت تشوف خواتها الباجيات وبعدين ردت عند احلام اللي كانت منبطحه ع الشبريه وتقرى مسجات من تيلفون مي..

مي: باااك
احلام: ولكم.. ها وعيتيهن؟
مي: هي لفيت عليهن كلهن.. منهدات يبوج من عقب العرس
احلام: هي والله .. ريلي عورتني امس وايد
مي: بس حلوو العرس كاااان
احلام: هيي .. الحين ريموه وين..؟
مي: ويا ريلها بعد وين؟
احلام: سخيفه وحده .. اقصد وين بالضبط
مي: في برج العرب
احلام: ليش ما بيسافرون؟
مي:امبلا .. اليوم بيسافرون
احلام: متى
مي: العصر
احلام: اوونه.. زين (وهي تتذكر شي) ميووه
مي: هاه .
احلام: قولي شو حلمت
مي: شوه
احلام: ههههه حلمتج بفستان ابيض وكنتي وااايد حلوه..
مي: متأثره بعرس ريمان شكلج
احلام: يمكن .. بس تعرفين كان ويهج يشع ماعرف كيف ..
مي: اونه .. كنت حلوه يعني.. ها تفسيره اني ما بعرس
احلام: يلا مناك .. بفسره الحلم.. بس احيد الابيض طهاره
مي: الله ..
احلام: الا تعالي..
مي: شو
احلام: الحين سالفة خطبة ساروه شو غدى عليها
مي: والله مادري.. تعرفين اميه عليا موول ماطرتلنا شي
احلام: عيل
مي: يدوه مره قالت جدامي وجدام ريم انه خالي راشد رمس ابويه.. وعاد عقب انتشر الخبر فالبيت .. وريم يوم خبرت اميه قالتلها من زمان راشد خاطب البنات
احلام: يعني انتي بعد
مي: هئ جان استحي..
احلام: يوم اقولج من قبل.. مدووي سامعه عمي يرمس ..
مي: انزين بس السالفه الاكيده الحينه سالفة ساره.. يعني مروان بروحه رمس..
احلام: وحتى سالفتج
مي: لا حبيبتي .. انا ما بحط لعمري أمل دام فارس بنفسه ما رمس..
احلام: اف منج
مي: تأففي لين باجر.. يلا قومي ننزل تحت .. ابا اشربلي عصير فرش
احلام: اقولج
مي: ها
احلام: عمي مانع متى بيي؟
مي: فدييييته يا ربي ذكرتيني .. من اسبوع كان مرمس ريم وفخاطره ايي العرس.. خلاص دورته بتخلص الاسبوع الياي .. يالله لو تأجل العرس ولا يتم فخاطره
احلام: بعد هم ملتزمين بالحجز
مي: هي انزين .. يلا ماعليه المهم ايي ونشوفه .. تولهت عليه وعلى سوالفه
احلام: يا حليله عمي.. يلا انزين نشي .. فخاطريه نيلس شويه ويا نعوم.. هيهي ابا اضحك
مي: ليش حرمة ابونا ارقووووز
احلام: هههههههه ها البيت كله يبوج مب الا حرمة ابوج
مي: قومي انزين ..
احلام: وانتن متى بتردن الجامعه؟
مي: بنرد اليوم المغرب..
احلام: عيل العصر برجع البيت
مي: تمن لين نروح
احلام: منو بيوديكن
مي: ابويه بيفزعبنا ..
احلام: اوونه .. زين زين
مي: اف عرس ريمان ياي مخالف .. زين اني مخلصه امتحاناتي قبل ما انزل .. بس باقلي امتحانين تحدي..وساروه باقلها امتحان اظن
احلام: الله يعينكن ..


ونزلن البنات تحت .. دشن المطبخ التحظيري وسولتها مي عصير برتقال فرش الها ولاحلام وعقب يلسن فالصاله شوي .. لين يت الساعه وحده وردن فوق يصلن الظهر عشان ينزلن كلهن ع لمه الغدى..

****

فصالة بيت راشد كانت ميره يالسه ويا عزه وريلها فيصل.. تاخذ اخبارهم وتطمن على اوضاعهم .. مستانسه وايد على وناسة بنتها .. وتشوف الفرحه فعين فيصل اللي وده انه يشل عزه ويحطها فعيونه الثنتين ..

فيصل: والله يا عمتيه على كثر ماهي تتشرط الا اني مسايرنها
ميره: ههههه عاد تحيدها عزوه ..
عزه: يالله عنك يا فيصل وين تشرطت.. سوالف الا اسوي انا ..
فيصل: ماعليه انزين بدلعج انا الا ها الكمن شهر . بس بعدين خلاص
ميره: هيه بتجدم عقب ..
عزه: يلااا عااد ..
فيصل: ههههههههه شوفي عمتيه كله تتغصص وتعنطز من السوالف
ميره: تسويلك علوم الا هيه ..
فيصل وهو يطالع عزه ويغمزلها: يا حلو علومها عيل
عزه: هي قص عليه
فيصل: لا افا مايطيع زينج اقص عليج.. الا اقول
ميره: امر
فيصل: مايامر عليج عدو.. بس الشباب وينهم؟
عزه: خواني لا تسأل عنهم .. اكيييد فالعزبه
ميره: ههههه مروان هيه .. بس فارس ظنتي سار يلعب كوره
عزه: هيه يوم بيتكسر عقب تمي بالحسره
ميره: شو اسويبه انزين .. مايطيعلنا .. كم بنرمسه
فيصل: اخر مره تقولي عزه انه الاربطه عنده ملتهبه
ميره: هيه وانكسرت ريله وجبسوها .. الا انه ما يتعايا .. يقول بس يلعب شويه عن خاطره ..
فيصل: ها الشباب ما يبون النصيحه مول ..
ميره: الله يحفظه ان شالله .. شو بنسويبه ..
عزه: وشو دراسته هو؟
ميره: الحمدلله .. يقول صعبه وايد وكارفينهم لكن مستقبل شهادتهم زين..
فيصل: بعده فكلية الاتصالات
ميره: هيه ..
فيصل: يلا زين الله يوفجه..
ميره: امين ان شاءالله..
فيصل وهو يقوم: خلاص عيل بترخص منكم الحين ..
ميره: وين توك ياي
فيصل: بسير مواعد واحد من الشباب مافيني اتاخر عليه
ميره: هيي زيين عيل ..
فيصل: يلا عيل فمان الله ..
ميره: الله وياك

قامت عزه بتوصل ريلها لين باب البيت .. ركب سيارته وروح .. اما عزه فردت عند امها وقالتها انها تبى تسير بيت يدها عسب تسلم عليهم ..

وفي بيت بو راشد .. بعد ما وصلن ميره وبنتها اقترحن ع الموجودين فلمة الصاله انهم يفرشون فالحوي ويلسون برع لان الجو مغيم وبارد .. وطلعوا كلهم

اما اللي تم داخل الصاله .. فجر واختها عبير ..

عبير: يلا خلينا نسير برع
فجر: لا مابي.. وايدين
عبير: منو .. الا عمتي وبناتها وميره وعزه ..
فجر: ممم
عبير: قومي وقعدي معاهم .. من الله اخر ايام لج هنه امبينهم
فجر: اييه ذكرتيني.. عبير عاد انا بروح عنكم وبرد الكويت .. لازم ترفهوني ها الاسبوع
عبير: شوف انتو.. لازم تتطلب
فجر: شدعوه طالبه بيت شعبي
عبير: هههه خلاص ولا يهمج كم اخت انا عندي.. انا بقترح ع محمد انه نقضي ها الاسبوع فدبي .. نتونس ويا بعض لين يوم سفرج ..
فجر: الله .. حلوو بعد بواعد رفيجتي زهره .. بودعها ..
عبير: زين .. واللي كانو وياج فالسكن؟
فجر: لولوه ودلال .. رجعوا الكويت من بدت الاجازه .. ان شاء الله بشوفهم هناك ..
عبير: حلو .. كونتيلج صحبه يديده
فجر: ايه
عبير: زين ..يلا خلينا نطلع
فجر: اوكي ..

قامت عبير من مكانها وسحبت اختها وياها اللي قررت من فتره انها خلاص ترد الكويت من عقب ما حست انه الدنيا ضاقت عليها هنه .. استحملت لين ما خلصت ها الكورس بسلام واعلنت عن قرارها اللي الكل انصدم منه.. ولكنها فجر.. اللي فراسها بتسويه ومحد يروم يردها.. يكفي صدمة قلبها وخيبة أمله .. والحين ما تبى لأملها يخيب فأي شي .. ولا تبى صدمات فحياتها ..


********************
(الاحد) 9 يناير 2005
********************

كان نايف ماسك ايد ريم وهم واقفين على منصه المشاهده في شمال جزيرة موريشيوس عند اهم المعالم الطبيعيه .. يراقبون من بعيد النهر الاسود العميق اللي يخترق جبال الجزيره .. تمشوا شوي مع المرشد السياحي اللي كان من اصل هندي..
المرشد: this area called shamaryal it has 7 colors of sand
ريم: ماشاء الله روعه
نايف: كنت قاري عنها .. لها 7 الوان ولين الحين مب محصلين لها تفسير علمي
ريم: سبحانك ربي ..
المرشد: stand with your wife here I will take photo for you
نايف: ها شكله ماصدق قبض كاميرا
ريم: هههههه اشوفه
وقفوا وخذ لهم صوره ..
ريم:وين بنسير الحين ؟
نايف: محميه الطيور ..
ريم: هيه عاد عوقك انته الطيور
نايف: ههههه عرفتي يعني ..

دخلوا محميه الطيور اللي كانت تظم 150 نوع .. نايف كان وايد مستانس بما انه مولع بالطيور .. ويشرح لريم بعض اللي يعرفه عن الطيور ..

نايف: يالله قومي بنسير نتغدى
ريم: والله الواحد الي يشوف ها المناظر يشبع من الاكل ومن كل شي
نايف ابتسم لريم وهو يشوفها تتأمل الي حوالينها ..
نايف: ان شاءالله بس تكونين مستانسه
ريم: وااايد .. فوق ماتصور .. انا وايد احب الطبيعه والهدوء
نايف: عيل وايد بنغامر فها الجزيره.. فيها وايد اشيا حلوه
ريم: حلوو
نايف: يلا عاد نسير نتغدى .. يوعان انا
ريم: هههههه اووكي ..

ساروا لمطعم في نفس منطقه شاماريل على تله ويطل على جبل منظره وايد حلوو .. احتاروا شو يطلبون من اللسته اللي موجوده جدامهم ..
لكن النادل اقترح عليهم الاكله الشعبيه في موريشيوس وهي وجبه (الكريول) ووافقوا..كانت الوجبه عباره عن ارز مع كاري وخضروات وبقول ..

عقب الغدى توجهوا لرحله جويه بطايره الهليوكبتر عشان يشوفون هالجزيره اللي هم يالسين فيها ..
مرت الطياره من فوق بركان "Trou aux Cerfs" الخامد ..
اللي ممكن يثور في لحظه ..
ريم: بسم الله ها ليش جي منزل الهليكوبتر فووق البركان ؟

لكن كانت اجابه قائد الطياره اسرع من اجابه نايف اللي طمنهم وهو يقولهم
"dont be scared the last erupting Volcano was from 200 years ago"

طافت الطايره فوق انحاء الجزيره ومرت على مزارع الشاي وحقول القصب وارقى المنتجعات الفندقيه .. نايف وريم كانوا وايد مستانسين ع جولاتهم فها اليوم .. ما ملوا ولا دقيقه .. ويخططون لرحالتهم اليايه وين بتكون ..

****

على مكتبه في شركه خاله كان سلطان يالس ويجري بعض الاتصالات وبعد ما خلص تم يفكر فالي بيسويه .. كان الكمبيوتر مشغل .. حرك الماوس وفتح صفحة قوقل وقام يسوي سيرج عن مناسك الحج.. قعد يقرى ويقرى .. وخافقه يزيد فاضطرابه ..
قطع عليه قرايته دخلت مروان ..

مروان: السلااام عليكم
سلطان وهو يبتسم: وعليييكم السلام..
قام سلطان وتخاشم ويا ولد خاله .. ويلسوا ع الكراسي مجابلين بعض ..
سلطان: حيالله من يانا
مروان: الله يحييك.. ها اخبار الشغل
سلطان: والله تمام .. علومك انته؟
مروان: ملان ياخي.. من عطوني الاجازه وانا ماعرف وين اودي بعمري
سلطان: الا اسبوعين هن قزر وقتك فأي شي
مروان: الله كريم..
سلطان: يحيك والله ..
مروان: الله يحييك ويبجيك .. خلاص عيل انا بخليك ويا شغلك بمر على ابويه بشوفه
سلطان: يلس يا ريال .. لاحقين ع الشغل
مروان: لا ابويه مافيني.. يمر مديركم ويشوفني داق وياك سوالف ويبهدلني
سلطان: ههههههه الا ابوك هوه عادي خله يبهدلك والا ماتحق على عمرك يوم غديت معرس احين
مروان: هههه لاتذكرني ياخي قهر ..
سلطان: افا ليش؟
مروان: سووها خطبه رسميه ويلسوا ..
سلطان: وانته شو تبى.. تعرس؟
مروان: هالموضوع اللي كنت ياي ارمس ابويه عنه
سلطان: العرس؟
مروان: هيه ابا اعرس ع الاقل في الصيف
سلطان: تراك ماتنعطى ويه .. قلت بس بخطب وسويت سالفه ويوم خطبوا قلت بعرس
مروان: مب جي ياريال .. شوف احين اللي عرسوا يابوا عيال ولا طلع لهم صندوق الزواج ولا قرض الاسكان .. من جي ابا املج ع الاقل وااقدم لصندوق الزواج والقرض
سلطان: والعرس ؟
مروان: بعده .. يوم بيبقالها كورس واحد بس بعرس .. يعني شهر 1 السنه اليايه .. امبوني انا عايش في العين وبتسير كليتها وبترد البيت
سلطان:ماشا الله مخطط ومرتب
مروان: قول ان شا الله انته بس الوالد مايخرب علينا
سلطان: لا لا بيوافق ان شا الله .. قوم سير واقرى في ويهه
مروان: ههههه ذكرتني بايام الغش في المدرسه يوم نقرا في ويوه المدرسين
سلطان: هههههه

وقام مروان مكانه وقام وياه سلطان .. وصله لباب المكتب .. روح مروان عند ابوه.. قاله السكرتير انه ابوه فاجتماع مهم .. مايقدر انه يقطعه .. تنهد مروان .. ورجع بخطواته ع ورا وتم يفكر متى بترد الشجاعه له وبيقول لابوه..

اما سلطان رد ييلس ع مكتبه .. حط اديه ورا راسه وسرح بفكره ..
يتذكر اليوم اللي تضارب فيه ويا مروان ..
فهذاك اليوم شاف عمره له هيبه .. لكن اليوم .. وهو يتذكر كره عمره ..
حمد ربه انه حاله اعتدل .. وربه هداه للطريق الصح ..

"بــدريــه"

ها الاسم ما فارق احلامه ومخيلته .. كان حاس بتأنيب ضمير فضيع.. كل يوم قبل ما يرقد يتذكر اللي سواه فيها .. ويتذكر اللي صارلها.. ما يهناله رقاد.. يقوم يصلي ركعتين ويرد يحاول يرقد ..
لو انه بدى يمشي صح.. لكن ضميره مب مرتاح مول .. كل ما يحاول انه يوصل لبدريه يمنعه شي ..

قبض تيلفونه ومثل كل مره كتب مسج .. بس ما مسحه مثل كل مره ..
طرشه ع الرقم اللي كان يتذكره .. دعى ربه انه يوصللها وتقراه وهي بمفردها ..

اشويه ووصل له مسج
" اخوي بغيت منو؟! .. انا مش بدريه!"

وطى التيلفون من ايده وحط ايده ع راسه وهو مأجب على الطاوله .. نسى رقمها .. كيف بيقدر اييبه .. لازم يوصللها .. لازم يرمسها .. يباها تسامحه ..
أي شي بيسويه بس عشان تسامحه.. خلاص من بعد ما ضميره صحى
ما يقدر يعيش فتأنيبه طول الوقت .. ما يهناله شي مول ..


****

بعد ما ودعت فجر اهل بيت بو راشد .. ركبت سيارة محمد تتريا العدد يكتمل .. وبعد ما ركب محمد وعبير وبناتهم طلعوا من البيت متجهين دبي ..
فالدرب كان محمد يسولف ويا بناته ويحكون لبعض حكايات ويعلقون ع روايه ابوهم ويسالونه عشان يشرح لهم اكثر عن المواقف اللي ذاكرنها فالروايه ..
اما عبير فكل شوي تلتفت لفجر اللي من تحركوا وهي لازمه الصمت وتتطالع الشارع..
وبعدين صرفت نظرها عنها وكلمت زوجها ..

عبير: الحين انت وين حاجز لنا؟
محمد: سويت في شارع زايد
احلام: الله حلوو .. انا وايد احب هالشارع ..
مديه: بنتم كم يوووم؟
عبير: ليما تسافر فجر وبنرجع
احلام: خلونا بعد لين الجمعه .. الا ثلاث ايام ما يسدن
محمد: من طمع طبع.. مب كله مره وحده .. بنحوط ان شالله عقب ..
مديه: متى ابويه؟ الاجازه قصيره
محمد: ماعليه في وقت توكم مخلصين امتحانات.. ان شاء الله بنسير الفجيره بعد
احلام: الله ونااسه .. عاد خلونا نسير لمه مب بس نحن
عبير: ههههه طالع هاي .. مب تارسين عينج نحن
احلام: لا افا منو قال.. بس بعد لزوم الربشه
محمد: انتي عوقج ميوه وخواتها .. وجان صار وسرنا بنشلهم زيين جي
احلام وهي مستانسه : اوووووكي

ردت احلام على ورى من بعد ما كانت متشبصه بالسيت اللي يالسه عليه امها وتاكت ع السيت .. ومديه فالنص قابضه فايدها قيم بوي تتسلابها .. اما فجر ماتنطقت بأي حرف ..

كانت سرحانه وتفكر باللي صارلها .. بالنسبه لها مب شويه .. حبت باخلاص ولأول مره جربت ها الشي لكن تجربتها فاشله..صفعتها كانت قويه وآلمت قلبها وايد ..
عرفت سلطان وخلته للمصلحه فوقت عرفت فيه احمد وما درت انها بطيح فحبه .. خافت انه سلطان يفضحها جدام اهلها لكن ما تعرف شو الي صار فسلطان سكت عن الموضوع ولا ظهرلها من بعد ذاك اليوم .. ما هتمت انها تسأل بس حمدت ربها انه سلطان غض البصر عنها .. وتزامن ها الشي الخبر المشؤووم بالنسبه الها.. خبر ملجة أحمد من بنت عمه ..
احتاجت وقت وايد بس عشان تتأقلم ويا فكرة انها خلاص ماعاد شي بينها وبين احمد .. قبضت تيلفونها وكتبت بمسج كلمات كانت فخاطرها
.
.
" ماتمنيت أبدا اني اكون فمثل ها الموقف فيوم.. لكن ما قدر امنع الواقع .. حبيت من كل قلبي لكن الحب خون فيني ..
كل شي بغيته لقيته جدامي .. لكن انت .. ما قدرت اخليك تكون لي ..
الي يحب ما بايده غير انه يدعي للي يحبه..
الله يهنيك بحياتك ويسعدك ويا زوجتك ..
انا برجع بلادي وللأبد ..
الوداع"
.
.
ما قدرت تمنع دموعها من النزول .. لكنها مسحتها ع طول عن حد ينتبه الها .. غلقت الموبايل ماتبى تشوف أي رد الحين .. ما تعرف شو ممكن يصير لها لو قرت رد أحمد .. فحبت تتجنب ها الشي ..

**********************
)الأربعاء) 12 يناير 2005
**********************


فمطار دبي الدولي .. كان محمد قابض جواز فجر والتذكره ويخلص امورها.. اما فجر فكانت يالسه عند الكراسي ويا عبير وبناتها .. وكانت زهره ربيعتها يايتنها المطار تودعها ..

زهره: فجر .. يلا حبيبتي انا تأخرت بروح ..
فجر: بعده في وقت .. قعدي شوي
زهره: ودي والله لكن اميه تباني اوصل اخواني المول.. حاشرينها ..
فجر: عاد مشكله يوم تصيرين ريال البيت ..
زهره: شو نسوي ..

قامت فجر من مكانها وقالت لاختها بتسير شوي ويا زهره وبترجع ..

زهره: رجعي عند اختج
فجر: شوي بس
زهره: بشتاقلج وايد
فجر: وانا اكثر
زهره: الا فجر بسألج ..
فجر: هلا
زهره: واحمد ؟رضيتي يعني انه يكون لغيرج؟
فجر: زهره .. انا سكرت الموضوع خلاص .. بليز انسي السالفه
زهره: خلاص .. اللي يريحج
فجر: طرشتله من يومين مسج .. كتبت فيه اني خلاص بروح ..
زهره: زين ورد عليج؟
فجر: تخيلي .. غلقت الموبايل يوم كامل وفتحته بالليل على امل انه مطرشلي شي
زهره: وما طرش؟
فجر: قرر اليوم اللي بعده انه يطرش..
زهره: وشو كان مطرش؟؟
فجر: الله يوفقج فحياتج
زهره: يقهر
فجر: يلا ماعليه .. خلاص حبيبتي انا برجع ..
زهره: اوكي
فجر: خلينا نشوفج.. واذا يتوا الكويت ع طول عطيني خبر .. انا ان شالله اول ما اوصل واخذ رقم بطرشه لج
زهره وهي تبتسملها: خلاص اوكي..

سلموا ع بعض بحراره وكلن سار بطريج معاكس للثاني ..
وصلت فجر عند اختها.. طلعت البطاقه من تيلفونها وعطتها عبير ..

عبير: بيودها لج جان فكرتي ترجعين
فجر: لا عبير .. قطعوها أحسن .. بيقعدون رفيجاتي اللي ما يدرون اني سافرت يتصلون.. احسن تقطعونها .. وانا اول ما اوصل هناك بطرشلهم رقمي ..
عبير: اها .. خلاص زين .. كا محمد يا ..

وبعد ما خلص محمد كل شي ..
وصلوا فجر لمكان دخول المسافرين..
سلمت عبير على فجر وسلموا بنات اختها عليها . . دخلت عنهم وهي تمشي كل شوي كانت تلتفت تشوفهم اذا ساروا والا لين غابوا عن عيونها ..



****

قررت ريم مع نايف يخوضون تجربه يديده على هالجزيره .. توجهوا لغواصه تغوص لعمق يزيد عن الثلاثين متر .. كان نايف حاجز غواصه زجاجيه خاصه للمتزوجين .. عشان يتمتعون بالمناظر الحلوه للسمج المحيط بهم ..
عرف نايف انه يقدر ينزل البحر ويتمتع اكثر بحركه السمج من حوله ..
خلا ريم في الغواصه ولبسه خوذه زجاجيه معبايه بالهوى ومسكره بشكل محكم ..
ونزل البحر وريم تراقبه من نوافذ الغواصه .. كانت مستانس بالحركه والمشي بين السمج ..
مسك سمجه صغيره من اللي كانوا يطوفون حواليه ولزقها ع الجامه عند ريم وهي تاشر له انه يهدها وهو ملعوز السمجه اللي كانت تتحرك بين ايده لين هدها ..
رجع للغواصه وبدل ملابسه عشان يتغدون ..
بعدين بدت الغواصه تتحرك ويشوفون سفن الصيد الغارقه في البحر
نايف: هاي شرات تايتنك شوفي شو كبرها
ريم: ليش ماطلعوها لين احين ؟
نايف:هاي سفينه يابانيه اسمها نجمه البحر
ريم: من متى هاييل غارقين اهنه ؟
نايف: من القرن 17
ريم: خيبه لين احين ؟
نايف: هيه اكيد مابيطلعونها مستغلينها عشان يجذبون السياح

تمشوا اكثر في الغواصه وريم كانت مستمتعه بتصوير الشعب المرجانيه والسمج الملون ..
ماوقفوا عند هالحد كان لهم زياده من الاكتشافات في طريقهم للفندق ..
مروا بحدائق بامليموسيس
نايف: شوفي ريمان هاي اقدم محميه طبيعيه في نص الكره الجنوبي
ريم: وايد روعه ..
نايف: يقولج فيها شير اسمه الطايب .. هندي هو .. مايثمر الا كل ستين سنه ..
ريم: والله ؟ سبحان الله ..
نايف: شوفي اهنه مكتوب بعد في هالورقه انه في هالمحميه 80 نوع من النخيل .
بعد هالرحله رغم التعب توجهت ريم ونايف لفندق ومنتجع الهوليدي ان اللي كانوا ساكنين فيه .. بدلوا ملابسهم وساروا يتعشون في مطعم ويشوفون رقصات محليه فولكلوريه مثل رقصة (سيجا) التقليديه في موريشيوس .

****

فستاد آل مكتوم بنادي النصر الرياضي ع الساعه سبع كانوا مروان وفارس ومنصور يالسين فالمدرجات فوسط جمهور خفيف .. كانوا حاجزين يتابعون مباراه عقب حنة فارس ..

مروان: والله انا شو مخلني اسمع الكم
فارس: يا ريال بلاك..
منصور: ههههههه مروان لا ترمسه متحمس ها خله
مروان: الساعه 11 مانع بيوصل .. ما بنتم لين اخر المباراه
فارس: انزين انزين ..

شوي رن تيلفون مروان .. ومن الحشره اللي عنده ما قدر انه يرد .. قام من مكانه ووصل لمكان اشوي اهدى .. ورجع اتصل ..

سلطان: ليش ماترد؟ .. وشو ها الحشره والتطبيل ؟
مروان: يبوك هاذيل فارس ومنصور قاصين عليه يايبيني اتابع وياهم مباراه
سلطان: اسمييكم.. يعني بتمرون ع مانع ؟؟
مروان: هيه انا ياي الا عشانه ..
سلطان: زين .. رمسته مساعه الصبح وقالي بيوصل فليل
مروان: هي ادريبه
سلطان: زين عيل ماله داعي ايي
مروان: وانته متى سيرتك ؟
سلطان: الثلاثا الياي ان شاء الله
مروان: هي بتسير ويا نسيبتيه وريلها ؟
سلطان: زين يوم حصلت حد بيسير ويايه .. بيونسنا نايف
مروان: زين زين الله يوفقك عاد ماوصيك ادعيلنا
سلطان: فالك طيب.. يوم بتوصلون البيت خبروني عشان ايي اسلم عليه
مروان: خلاص ان شاء الله ..

ومن بعد ما سكر مروان رد عند الشباب .. اما سلطان .. فكان يالس فالعزبه ويا ابوه وخواله .. طلع من الميلس ويلس برع .. قبض تيلفونه وتم يشوف الرقم اللي حصل عليه من الاتصالات ..يتذكر ها الرقم بس ماكان قادر يجمعه.. والحين صار بايده ..
لو اتصل يدري انه بدريه مستحيل ترد عليه .. بعده بيتم اللي سواه مب شويه ..ها الوقت فالعاده تكون بروحها قاعده.. كان حافظ يومياتها.. توكل على الله وطرش الها مسج ..

" ممكن دقايق من وقتج؟"

تلقى منها رد على طول .. ماتوقع ابدا انها ترد عليه ..

" ياي تهدد ؟؟؟؟؟؟"

استغرب من ردة فعلها .. شكله خوفها كعادته .. رد عليها ..

" ابا اكلمج ضروري"

بدريه خافت وايد .. سلطان انسحب من حياتها .. وهي الله هداها .. كانت تخاف من يوم يرد فيه ويفضحها .. لكن كانت تبعد ها الافكار من بالها لانه هو بيستر على عمره اول شي مب عليها ..

" شو تبى راد من يديد؟"

سلطان " بدريه .. انا مب سلطان الاولي .. انا وايد تغيرت.. ردي عليه الله يخليج.."

طرش المسج .. وتريا دقايق واتصل فيها .. كانت بدريه متردده وايد قبل ماترد..لكن سلطان ما ستسلم وتم يدق .. لين ردت ..

سلطان: الو
بدريه: نعم
سلطان: بدريه .. سمعيني للآخر .. انا مب ياي اهدد شرا ما تقولين.. لاتخافين .. يكفي اللي سويته فيج فالماضي. بدريه الله يخلييج .. الله يخليج..

بدريه مستغربه من اسلوب سلطان .. هذا يمثل من يديد ولا شو سالفته ..
اما سلطان غصت الكلمه فحلجه مب قادر يقولها ..

بدريه: شو الله يخليني .. تبى تلعب الدور بعدك؟
سلطان بصوت واهن: بدريه الله يخليج سامحيني .. والله والله اني متندم على كل شي .. والله يا بدريه اني تغيرت .. صدق تغيرت .. بس مب قادر اغير اللي مضى..بدريه انا من عرفت سالفتج وانا ما هنالي يوم .. ما قدرت اوصل لج .. بغيتج تصفحين عني انا اللي سويته واااايد كبير .. مب بس فحقج .. فحق نفسي .. انتي غيرتي فيني يا بدريه .. بدريه انتي السبب فردتي للدرب الصح.. انا بسير الحي ان شاء الله .. وبرد انسان ثاني .. انسان نظيف .. واباج تسامحيني يا بدريه..

كلمات سلطان هاذي بلا ارادي خلت دموع بدريه تنهمر .. ماتوقعت تشوف سلطان فيوم من الايام بها الضعف .. كان يتوسلها تصفح عنه .. تسامحه ..
مازال فقلبها عايش ع الرغم من افعاله .. وعلى الرغم من انها نست الماضي وبدت ويا ريلها صفحه يديده ..

بدريه: سلطان.. اطلب من ربك السماح.. على كثر اللي سويته فيني .. الا اني مسامحتنك يا سلطان .. روح والرب حافظنك ..
سلطان: الله يعوضج بكل خير يا بدريه ..
بدريه: امين ان شاء الله
سلطان: خلاص .. اسمحيلي ازعجتج ..
بدريه: بالحل .. الله يحفظك ..

سكرت بدريه التيلفون من غير ما تتريا أي رد من سلطان .. طاحت ع سريرها وهي تصيح بكل حرقه ..
ماتوقعت فيوم انه يصير ها الشي..وتمت تحمد ربها انه سلطان رد للطريج الصح من عقب ما هي عرفته ..

اما سلطان ما قدر يستحمل .. ركب سيارته والافكار تغزيه .. يحس براحه انه كلم بدريه .. وانها سمعت له .. لكن بيظل عايش فها الذكرى الأليمه .. اللي ما بتفارقه مول ..



********************
)الأحد) 16 يناير 2005
********************

نشت مي الظحى ع اضاءة الستاير المبطله .. تذمرت وردت اللحاف على ويها .. تجدمت عليا من السرير ويلست ع طرف وهي تحاول توعي مي وساره .. لكن ما من مجيب.. قامت وبندت المكيف وتمت ع روسهن تغصص فيهن..

مي: اميييه فيني رقااد
عليا: يلا نشن .. ما صدقت اتن ترقدن اهنه تاخذن اليوم كله رقاد
ساره وهي تبطل اللحاف: اميه بس ساعه انزين
عليا: لا ماشي.. هكم فالصاله يسألون عنكن ..
ساره: والله ها الرقاد ننحرم منه فالجامعه .. خلونا نعوض
مي: هي والله
عليا: لا ماشي يلا نشن .. خالكن مانع من اصبح وهو يسأل عنكن..
مي: هممم..زين اميه امهلينا شوي .. عشر دقايق بس وبنش
عليا: شو فرقت يعني؟
ساره: اميه دخيلج شويه

ضحكت عليا عليهن .. ورأفت بحالهن وظهرت عنهن الصاله .. كانوا اللي يالسين مانع وابوه وامه .. عبير ومحمد .. التوم ومديه واحلام .. يلست عليا وهي تخبرهم عن مي وساره ..

مانع: وشعنه ما نشن .. بظربهن تراني
عليا: عندك اياهن
احلام: حليلهن منهدات من الجامعه .. خلووهن يرقدن
مانع: عنبو من كم يوم انزين هن يايات بسهن رقاد ..
محمد: عاد مانع مايروم ييلس بدون ما يتناقر ويا ها الثنتين
مانع: ههههههه والله متوله عليهن .. بس عليه ست شهور بعيد عنكم
ام راشد: فديييتك ياوليدي ..الدار ظلمه من عقبك
محمد: هاا الواالده .. ليش نحن ماكنا منورين
مانع: بدت بدت الغيره
ام راشد: منورين فديتكم .. بس بعد وليدي متغرب وبعيد
لوى مانع على امه وتم يبوسها ويغصص فيها وابوه يضحك عليهم ..
محمد: يالله يا العيار عاد .. انزين اقولكم عندي لكم اقترااح
عبير: ها خير ..
محمد: اليوم الجو حلوو .. خلونا نسير الفجيره.. من امس امطار فيها .. شو الوديان يقولون ..
احلام: يااااا سلااام .. اقترااح مقبول ابويه
مانع: ههههههه يبنها من الله
احلام: هي عيل شو
مانع: زين حمود خلنا نسير سوق الجمعه بودي العيوز انا
محمد: وبنلف صوب البحر شويه
عليا: والله زين متبرضين شكلكم اليوم
احلام: اكيد اكيد يعني السيره..بسير ابشر البنات

قامت احلام من مكانها تتريا ملامح ابوها تأكدلها ع السيره .. بس اكتفى بابتسامه الها وع طول ركضت توعي ساره ومي .. واللي فالصاله متحمسين ع السيره ويخططون شو بيسون .. واحلام اول ما دشت الحجره .. بطلت الليتات ونقزت ع السرير وهي تصرخ ..

مي: وعله يا حلام .. قومي وطيتي ع ريولي
احلام: نشن نشن نشن
ساره: حلااام بلاااج
احلام: بنسير الفجيره يلا نشن
مي: متفجيه انتي .. جذووب
احلام: والله والله رحله عائليه اليوم يلا نشن تنشطن وشاركنا اجواء الفرحه قومن يلا.. يلا قووومن ..
خوزت مي اللحاف عن ويها وهي مرصصه بعيونها بسبة الليت .. وشوي شوي بطلتهم وهي محطيه ايدها ع ويها .. تثاوبت بكسل واطالعت احلام ..
مي: والله يا احلام ان كنتي تقصين علينا بتنظربين
احلام: والله ماقص عليج .. يلا بسج نشي
مي: انزين قومي عني باركه علينا ..
احلام: انزين .. ساروه الدعنه يلا قومي
ساره: حلامي بعدي عني عن شياطيني يركبوني
احلام: والخيييبه ..
قامت مي من ع السرير واطالعت احلام وعيبت عليها .. دشت الحمام تتغسل اما احلام تمت تغصص بساروه عسب تنش ..

وبرع .. بعد ما تأكدت السيره انها تكون بعد الغدى .. شلت عليا السماعه بدق لبيت شيخه اختها تعزمها ع السيره .. رد عليها منصور اللي كان فالصاله ويالس يقرى جريده .. قام زقر امه اللي يت ع طول وشلت السماعه ..

شيخه: لاوالله .. ومتى بسيرون؟
عليا: عزموا عقب الغدى يسيرون ..
شيخه: زين والله .. ماندرابهم عيالي .. ماعرف جان بيطيعون يسيرون
منصور: ليش اميه وين بسيرون؟؟
شيخه تأشر لولدها عسب يتريث..
شيخه: خليفه ادريبه مشغول مب متفيج .. والابو لاهي تحيدينه ..
عليا: سلطان انزين
شيخه: مادريبه وين .. بشوفه وبنرد الكم خبر ..
عليا: خلاص زين .. ولو ماحصلتي حد تعالي ويانا عندنا نفس فالسياره
شيخه: ماعليه بشوف ..

سكرت شيخه عن اختها .. اطالعت الساعه كانت مقاربه لـ 12 الظهر .. اكيد سلطان بيي عقب شوي .. دقتله تيلفون تسأله وين هو .. وقالها انه فوق فحجرته يرتب أغراض السفر .. وطلبت منه ينزل تحت

بعد ربع ساعه نزل سلطان وهو يصفر ويغني .. تلاقت وياه امه ع الدري وهو نازل ..

شيخه: يا وليدي بتسير تحج وتغني
سلطان: هههههه الا اصفر
شيخه: انزين فديتك .. الاهل معزمين ع سيره للفجيره خلاف.. بتودينا
سلطان: الفجييره! ليش يعني
شيخه: بيسيرون يستانسون
سلطان: مااروم اماايه ..
شيخه: شو وراك من شغله ..
سلطان: بسير القهوه عند ربعي الحين
شيخه: يا ها القهوه اللي ماتبى تودرها .. هناك الا عافد ع الشيشه يا ولدي مب زين
سلطان: لا منو قالج اشيش
شيخه: ما اروحك تراني
سلطان: ههههههه .. ماعليج
شيخه: بتظرك تراها
سلطان: امايه لا تحاتين .. شو انتي تبين تسيرين يعني
شيخه: هيه
سلطان: متى بيسيرون؟
شيخه: عقب الغدى
سلطان: خلاص انا بسير القهوه بصلي الظهر وبرجع اتغدى هنه وبنظهر رباعه .. حلو الكلام ..
شيخه ابتسمت لولدها وظربته ع جتفه وهو مروح عنها ..
شيخه: بنشووف

طلع سلطان من البيت وهو يضحك .. وشيخه ردت تتصل بعليا تقولها انه سلطان بيوديها هي ومنصور .. ودقوا لميره حرمت راشد يعزمونها ع السيره .. وقالت بتركب ويا سلطان وشيخه لان مروان طلبوه فالدوام وقطع اجازته ورجع العين..

وبعد الغدى .. ارتبشوا الكل ع السيره .. ركب مانع سيارته وحذاله ابوه وورا امه وعليا وجاسم والتوم .. محمد شل حرمته وبناته ووياهم ساره ومي .. وفسيارة سلطان ركبوا فارس ومنصور وشيخه وميره وايمان بنتها .. وانطلقوا كلهم صوب الفجيره ..

وفي الدرب .. كانوا مانع وسلطان ومحمد كل واحد منهم يسابق الثاني واللي فالسيايير محتشرين عليهم ..

في سيارة سلطان ..

شيخه: واابوويه يا سلطان .. خف خف .. ها الشوارع خطره يا بوييه
منصور اللي يالس حذال امه: ههههههه امايه بلاج خايفه عادي
سلطان وهو يطالع فارس: طرت عنهم .. خله مانع.. يروم يرايس عيل
فارس: حاسب انته عن تنفدنا ..
سلطان: لا ماعليك ..
ايمان وهي لاصقه بالدريشه: هاذم لحقونا ..
سلطان: افاا .. عطــه عيل ..
ميره: ايه عن هاللعبان بتجتلونا انتوا .. يااويل الي يركب ويا هاذيل الشباب

اما في سيارة مانع ..

مانع: ههههه ها الخبيل سلطوون .. شوف كيف مسرع
ام راشد: اسميهن اللي فالسياره وياه راحن
عليا: متهور يابوكم ها سلطان .. الله يهديه
مانع: مايباني اغلبه ادريبه .. يبى يترأس ..
جاسم: خالي لا تخليه يغلبك ها .. اسرع عطه وييل
عليا: جاسم حبيبي لا تلعوز خالك .. خله يسوق براحته
مانع: لا لا صدقه .. شو نخلي سلطون يغلبنا
عليا: الله يهديكم انتوا الاثنينه .. محد مريح غير الي ويا محمد اخويه .. اخر الناس..
مانع: هههههه ها حموود برود ..
ام راشد: فديته ريوله تعوره مايروم يسوق الا بروحه عزر يبى يسوق مايبى الدريول
جاسم: ماعليك خالي انته اسرع اسرع.. العياييز الا زايغات
عليا: هههههه والله انك يا جسوم ..

وفي سيارة محمد..
كانوا عايشين جو ثاني ..البنات مرتبشات ضحك وسوالف .. ويتمصخرن على خالهن محمد واحلام مشاركتنهن ..عقب انجلبوا على عبير ومحمد يدافع عنها
صدت عبير على محمد تباه يسكت عنها مسحتيه
عبير: محمد
ساره ارتبشت وقامت تغني والبنات يصفقون وياها

" الله اكبر يوم ضحكت بالعيون .. نادت محمد وأنا فيها سرحت
لو تنادي ع البشر كلهم يجوون .. إلا أنا من لهفتي ما جيت رحت
شفتها ونسيت نفسي من أكون .. ما قدر أوصف ما جرالي لو شرحت
شعره مابين عقلي والجنون .. لو أقطعتها كان من الحب استرحت"

مي: عاشت مرت خالي عاشت
ساره: عبير هاي تراها اهداء من خالي لج ..
محمد وهو يطالع ساره ويضحك ..
عبير ابتسمت لهن وتمت متلومه .. واحلام ومديه يضحكن على امهن وابوهن ..

..

ويوم وصلوا سوق الجمعه .. البنات تمن فالسيايير .. نزلوا الشباب ياخذون ذره حقهم . ونزلن ام راشد وعليا وشيخه وميره وعبير يشوفن الفواكه اللي عندهم ..
ومنصور وفارس يحاوطون حذال مال الالعاب وعيبتهم كوره وخذوها.. اما جاسم كان ويا سلطان وكل شوي يغصصون بواحد من الهنود ..

جاسم: سلطان مشتهي هذا انا .. هاتلي اياه
سلطان: شوو
جاسم : هذا هذا ..
أشر جاسم ع قصب السكر .. وسلطان ضحك عليه .. ياي سلطان بيحاسب لكن شي وقفه .. وتم يطالع جاسم
سلطان: جسووووم
جاسم: ها بلاك
سلطان: انته والله انك قاص عليه.. احيده يضرك ها مادري كيف نسيت انا ..

ضحك جاسم وهو يحاول انه يمط الكيس من ايد سلطان بس ادارك سلطان الوضع ورد الكيس ع البياع .. وسحب جاسم يحوط وياه فمكان ثاني وياخذله الي يباه

وردوا ركبوا السيايير يوم حسوا انه الجو بدى يبرد .. وبدت السما تمطر .. تموا فاتحين الدرايش وهم مستانسين ع الجو .. والمطر اللي يطيح قو ويضرب ع الدرايش .. والوديان اللي قامت اطيح من أعالى الجبال ..
المناظر كانت وايد روعه .. والكل مستمتع ..ومي ماتفوت قابضه كاميرتها وتصور
فالأخير توجهوا صوب شاطي بحر العقه لانه ماكان فيه ناس وبيقدرون ياخذون راحتهم ..
وقفوا سياييرهم بعيد شوي عن البحر والكل توجه للبحر ..

كانت ساره ومديه والتوم وايمان بنت راشد متجدمات فالمشي ويسولفن وعايبنهن المنظر.. لحقنهم الحريم .. وفارس ومنصور .. وعند السيايير بعد ما بركنوا .. تجدموا محمد وجاسم .. وتبعوهم سلطان ومانع واحلام ومي ..

كان مانع ينكت ع مي اللي من نزلت من عند قوم خالها ع طول ركضت لمانع .. لان فخاطرها تركب وياه بس عشان خاطر احلام ركبت فسيارتهم ..

مانع: يلا ميوه .. بعقج فالبحر ..
مي: هههه وين تبا ..
مانع وهو حاط ايده ع جتف ميوه ويمشي حذالها ..
مانع: صدق انزين .. خلينا نوصل
مي وهي تحاول تتملص من ايد خالها ..
مي: خل عنك .. قم قم
مانع: هههههههه لا لا .. تعالي ..
مي: ادريبك انته نواياك والله انها من رديت من السفر..
سلطان: ههههههه مانع شقى قابضنها جي .. زاغت منك
مانع: ماعليكم انا وبنت اختيه متفاهمين ..
مي: والله يا خالي ان خيستني بتشوف
سلطان: هههههههههه هااا قامت تهددك ..
مانع حط ايده ع اذنه وقام ينهم: هووووو ياماااااااال .. وسرنا البحر وشلينا ميوووه ويانا هوووو يامال..وفريناها في البحر عشان ياكلها اليريور وروحنا عنها
لاعت جبده اليريور ومات وطلعت ميوووه ام سبعة ارواح .. هوووو ياااماال ..

سلطان واحلام ومي نقعوااا من الضحك على مانع

سلطان: مانع هد يبوك .. انته راعي بر هب راعي بحر ..
احلام: والله يضحك عمي مانع.. وايد مرتبش..
سلطان: لا ويايبينه البحر .. وين تبى .. بدوي فالبحر ماايصير..
مي لفت ع ورا وهي تشوف سلطان واحلام ..
مي: عفوااا ..
احلام: هههههههههههه
سلطان: ها شو عفوا .. ماغلطنا
مي: لا تسبون خالي رجاءً
سلطان: يوم بيفرج فالبحر قولي لا تسبونه
مي وهي تتطالع مانع: خالي طيب حبيبي ما بيأذيني .. صح
مانع: هيييييه صح .. فديتج انتي ..

وكملوا دربهم عسب يلحقون اللي سبقوهم للبحر .. مي واحلام تمن يلتفتن يدورن ساره .. ويوم شافوها سارن صوبها ..
و ساره كانت يالسه ترسم ع الرمل و تغني وهي ملتهيه فالي ترسمه ..

احلام: وييييييه مندمجه الاخت
مي: الجو جميل وشاعري
ساره لفت ع مي: أي شاعري ياحسره .. وهاك منطور في العين
مي: اوه اوه قوموا عنها
احلام يلست حذال ساره تغصص بها: قصدج عشان مروان مب ويانا في هالرحله ماصار الجو شاعري .. هاا .. حليلج ..
مي بعد يلست مجابله ساره: هههه حليلها من متى تتريا يستوي الرسمي ويوم استوى ماتهنت بيمعه وياه
ساره: جب جب انتن تقهرن صدق
مي: انزين بهالمناسبه التعيسه غنيلنا شي بس مب تعيس
ساره: مابا
احلام: وييييه اول ماتصدق حد يقولها غني احين تتغلى
ساره:هههه
مي: يالله عن المصاخه غني ساروه
ساره تمت تتطالعهن وحايستلهم بوزها .. يت فبالها اغنيه واطالعت مي واحلام بنص عين وبدت ادندن .. ودشت فالاغنيه ..

"ماعلينا ياحبيبي ماعلينا
من كلام الناس ماكنا درينا
لويقولوا عننا مهما يقولوا
انتهينا عاد حنا االا بدينا "

مي: خيبه كلام الناس ؟ يعني نحن ..
احلام: زين جيه ميوه عقب كل ها الخطط اخر عمرنا استوينا عواذل
ساره: هههه بس لاه وياراسكم متفيجات

تموا البنات يسولفون شوي ويلعبون بالرمل ويتراشون بالماي لمده ساعه ..
التموا مانع والشباب وكونولهم فريقين .. مانع ومنصور وجاسم فريق ..وفارس وسلطان فريق ويلسوا يلعبون كوره قدم ع الشاطي..
كان مانع أكثر واحد مستانس بها الرحله..ست شهور منحرم من لمتهم ووناستهم .. والحين بها السيره ردتله الروح .. وحاط شوي فالبلاد من بعد ما انحرم منها ..
وقبل اذان المغرب كلن ركب سيارته عسب يرجعون ..

مرحباا وسهلا .. عدت لكم من جديد .. ها ما تولهتوا عليه!!
والسموحه ع التأخير .. وياكم الحين ها الجزء ..
وانتظروا الباجي فالقريب العاجل ..


الجزء الثــأني والعشــرون

**********************
(الثلاثا) 18 يناير 2005
**********************

الساعه 3:30 الفجر نشت ريم من النوم.. رجعت بتغمض عينها الا انها استوعبت الساعه .. قامت على طول ودشت الحمام تسبحت ولبست احرامها وسارت عقب توعي نايف..

ريم: نايف.. نايف قوم يالله ماشي وقت.. ناايف ..
نايف وهو يتحرك: ليش كم الساعه ؟
ريم: 4 ..
نايف نش بسرعه من مكانه: اوه ماشي وقت .. بقوم اتسبح وانتي تزهبي يالله
ريم: انا زاهبه .. نشيت قبلك عسب ما نتأخر..
نايف: زين .. حطيتي احرامي ؟
ريم: هي حطيت كل شي ..يلا بارك الله فيك ..
نايف: اوكي
دخل نايف يتسبح وريم رتبت اغراضهم كلها .. بعد ما طلع نايف ولبس كندورته .. خلصوا تقريبا ونزلوا تحت..
كانت مريم يالسه تصلي السنه قبل صلاة الفجر ..

نايف: امايه
مريم: هلا ابويه .. هاه سايرين ؟
نايف: هيه توه مال المطار واصل
مريم: بتسير بسياره المطار!
نايف: هي امايه .. ان سرت بسيارتي وين بحطها .. احسن سياره المطار تودينا وتيبنا ..
ريم: نايف رمست سلطان ؟
نايف: هيه اتصلت به السياره سارت تيبه والحين هو ياينا
مريم: شنطكم وين ؟
ريم: خذووها مال الحمله من فليل مودينها ..
مريم: زين سووا

سمعوا الهرن مال السياره ..
سلموا على مريم وركبوا السياره وهي وراهم توصيهم

مريم: هالله هالله في ريمان .. تحمل عليها لاتهدها بروحها ولاتزاحم بها
وانتي ياريم لاتهدينه تمي متعلقه في احرامه .. ولاتشلون وياكم فلوس فالحرم عن يسرقونكم والا يسووبكم شي .. والرمي لاتسيربها وقت الزحمه ..
نايف: ههههه امايه لاتوصين ان شا الله كل شي بيكون اوكي.. لاتخوفين ريمان بروحها زايغه ..
ركبوا السياره وكان سلطان يالس جدام

نايف: السلام عليك
سلطان: هلا نايف وعليك السلام.. ريم اشحالج
ريم: الحمدلله ..

وصلوا المطار وكان الفجر مأذن ..
دخلوا اوراقهم وصلوا الفجر واتجهوا لقاعه الانتظار اللي كانت تضج بالوان ماتعدت الاخضر والاسود والابيض ..
كانت ريم تحس باحساس حلو .. يوزعون عليهم اوراق عن الحج .. والناس ويوها منوره ..ماطالت المده وتوجهوا للطياره ..
يلست ريم عند الدريشه ونايف وسلطان على يمينها ..قبضتلها كتاب عن الحج تقرا فيه وتتناقش في اموره مع نايف ..


****


الساعه 11 الضحى كانت ساره واقفه عند سيارة ابوها تشوف الشغالات وهم ينزلون الاورج اللي سارت ويا ابوها تشتريه من بعد ما تمت تحن على راسه لانه ما يقدرون مواهبها الفنيه ..

ساره محتشره: شوي شوي عن تكسرونه بكسر راسكم
سيف: بلاج عليهم بيشلونه عدل ..
نجمه: هذا وين ودي؟
ساره: حجره امايه عفرا ... وين يعني بتودينه.. حجرتيه
نجمه: شو هزاا ساروه .. سوي نقمه بعد!
سيف: هههههههه ليش تنقمينها .. هاي رابيه عندنا تعرف كل شي
ساره: غربلها الله .. يلا انزين شلوه زين

شلوه الشغالات ودخلوه وهي وراهم شاله في ايدها بعد كيس فيه سي ديات اغاني يديده .. دخلت الصاله ولقت ام سيف وناعمه ميلسات

ساره: سلملم
ام سيف: ويدي ساروه شو بعد سلملم
ساره: اشحالج امايه ؟
هوت عليها تحبها ع راسها
ام سيف: الحمدلله
ساره: الولوود اشحالج ؟
ناعمه: ساروه يوزي عني
ام سيف: يبتيه ها اللي تبينه؟
ساره: هيه نعم
ام سيف: والله انج ماتسمعين الرمسه .. عنبوج في 10 من ذي الحجه الناس تصوم وتتقرب من ربها وتحج .. وانتي سايره تشترين لي ها الموسيقى مالج
ساره: شو اسوي امايه .. انا بعد مانلام .. راعية هوى
ناعمه: سيف وينه ؟
ساره: مادريبه برع اظن بيبركن الموتر .. انا بسير فوق يالله باي

ركبت ساره فوق ولقت مي مب طايعه تخلي الشغالات يحطون الاورج في الحجره

ساره: بلاكم
مي: ساروه شو بتدخلين هاذا الحجره؟ عاني الله جان عرفت ارقد لي ساعه
ساره: ميوه عن السخافات عيل وين احطه
مي: في الصاله
رد جاسم اللي كان يطالع التلفزيون: لا لا شو في الصاله مابنروم نشوف شي نحن
ساره: ياسلام عليكم .. وين احطه عيل فوق راسي ..قومي قومي

دزت مي عن الباب وشلته ويا الشغالات وحطته في حجرتها
وقفت مي وهي محطيه ايدها ع خصرها تشوف ساره وهي تعق شيلتها وعباتها ويالسه تشوف اوراق الاورج وتشغله

مي: ساروه والله انج طفسه .. الحجره حجرتيه مثل ما هي حجرتج
ساره: ميوه لا تسويلي فيها شريفة مكه
مي: لا والله .. يعني اركب عمري اثم ويااج
ساره: يوم بيلس عليه حطي سدادات فاذنج
مي: ما بتهنيني فراقدي حتى.. انا بشل قشي من ها الحجره وباخذلي حجرة ريمان..
ساره: هاكو الدرب..
مي تجدمت منها : ساروه عيب عليج احين انتي حرمه كبيره ومخطوبه باجر بتعرسين لين متى بتمين ويا اغانيج هاي يوزي عنها عنبو كلنا نسمع لكن هب جيه
ساره: نفس الكلام اللي قلته حق امايه بقوله لج
مي: وشو قلتي ؟
ساره وهي ترفع جتفها وترمس : شو اسوي بعمري يوم اني راعيه هوى .. الموسيقى والاغاني تسري في دمي خخخخ ..
مي: مالت عليج.. ليكون تتحرين عمرج داييقو الونسو
ساره: احسن عنه انا
مي: انتي الرمسه وياج ضايعه..انا بسير بتصل حق ريموه بطالعها اكيد وصلت احين
ساره: زين سلمي عليها ..
مي وهي ظاهره وتتحرطم:والله حاله .. هاي تركب اورج من هنه وهاييج تحج من اهناك .. صدق مفارقات الحياه ..

وقبضت تيلفونها وقامت تتصل فريم تتطمن عليها ..
ريم: الوه
مي: ها حجيه
ريم: ههه بعدنا بعدنا
مي: وين انتوا؟
ريم: في الباص الحين سايرين مكه
مي: انزين عقب ماتطوفون وتسعون طمنينا انزين
ريم: ان شا الله .. سلمي عليهم كلهم
مي: الله يسلمكم هالله هالله بعمرج .. عن الدفاشه ولاتدززين الخلق
ريم:ههههههه ان شا الله ..
مي: ههه يالله مع السلامه
ريم: مع السلامه

ومن بعد ما سكرت يلست شويه ويا خوانها فالصاله اللي من سمعوا دق فحجرة ساره ترابعوا عندها يشوفون .. اما مي ما تحملت الصدعه وسارت تشوف جان مرت ابوها في حجرتها .. فتحت باب الجناح مالقت حد في الصاله الا عفرا اختها

مي: عفاري
عفرا: نعم
مي: شو تسوين
عفرا: اشوف سبيس تون
مي تجدمت ويلست ع الغنفه : ماتملين من التلفزيون
عفرا: شو بسوي يعني.. يا تلفزيون .. يا ارسم
مي: شو ترسميين
عفرا لفت على اختها وابتسمت ..
عفرا: ارااويج؟
مي: هيه
قامت عفرا من مكانها وركضت غرفتها اتيب كراس الرسم والتلوين ..
وردت عند مي .. كانت ماسكتنه بحضنها وهي تشوف اختها ومستحيه..

مي: يلا هاتي بشوف
عفرا: انزين..اندوج..

خذت مي الكراس وبدت تجلب الصفحات .. عيبها رسم اختها كونها توها صغيره.. الرسم هذا اكبر من سنها .. قبضت مي قلم كان ع الطاوله .. ورسمت ويهين تحت وحده من الصفحات وكتبت عليهم مي وعفرا وعطتها اياه ..

عفرا: انتي بعد تعرفين ترسمين .. لكن ترسمين ويوه تضحك
مي: انا ماعرف وايد .. بس اتمصخر يوم ارسم ..
عفرا: انا وااايد احب ارسم .. يوم بكبر بستوي معلمة رسم

ابتسمت مي لعفرا اختها وشجعتها على تنمية موهبتها هاي .. وردت عفرا تتطالع التلفزيون .. خيم السكون شوي .. لين كسرته مي بسؤالها..

مي: ليش ماتسيرين عند قوم مهوه ومهروه تيلسين وياهم؟
عفرا: هم مايحبوني
مي: منو قال؟ هم خواتج كيف مايحبونج
عفرا: هم مايحبون ايلس وياهم
مي: عفاري انتي ماتعرفين ليش هم مايحبون ييلسون وياج
عفرا سكتت
مي: تعرفين عفاري انتي تقولين اشيا مب صدق وتعرفين بعد انه اللي مايقول الصدق يروح النار صح؟

عفرا تمت تعض ع شفايفها وتطالع مي
مي تقربت ويلست حذالها ع الارض وهي تمسح ع شعرها

مي: عفاري .. انا وانتي وريم وساره ومها ومهره وجاسم ومايد كلنا اخوان وكلنا نحب بعض وايد وحتى البيبي اللي بتيبه ماماه احين .. مب اللي يحب واحد يباه يكون بخير دوم ؟
عفرا: هيه
مي سكتت ماعرفت كيف تشرح بس حاولت تفهمها اكثر ..
مي: عفاري انتي تحبين مايد؟
عفرا: هو يظربني ساعات بس انا احبه
مي: لو مايد يعوره شي انتي بتزعلين؟
عفرا: هيه
مي: قوم مها ومهره بعد يحبونج ويبون تكونين بخير .. مايبونج تحترقين في النار عشان انتي تجذبين ..
مي في خاطرها
"والله ماعرف افهم يهال مادري جان فهمت عليه"
عفرا وهي خايفه: انا مابا احترق في النار

وبدت تصيح..مي حظنتها ويلست تسمح ع راسها
مي: انزين عيل خلاص قولي انج مابتجذبين مره ثانيه وكله بتقولين الصدق وقوم مها ومهره بيحبونج وايد وبيخلونج دوم عندهم .. مب انتي تبين خوات تلعبين وياهم .. هاذييل خواتج حبيبتي .. سيري عندهم ولاتقولين اشيا مب صدق .. انزين
عفرا: انزين
خوزتها مي ومسحت دموعها: يالله روحي الحين حجرتيه بتحلصينهم كلهم اهناك يالسين ويا ساره تعزف موسيقى وتغني سيري عندهم حبيبتي
عفرا: انزين

قامت عفاري وهي ترمش بعيونها لمي اللي ضحكت على حركتها هاي وقامت ترمش بعيونها هيه الثانيه .. هوت عفرا على مي وطبعت بوسه ع خد مي وطلعت من الجناح وهي تتنطط ..
ابتسمت مي ولفت ع ورا لكن ماكان لعفرا وجود .. وفها الوقت طلعت ناعمه من غرفتها ..

ناعمه: ميوه
مي لفت ع ناعمه بسرعه: هاه
ناعمه: شو تسوين اهنه
مي: ماشي كنت ارمس عفاري
ناعمه: وين سارت احين؟
مي : عند خواتي

ناعمه طاحت ع الغنفه اللي كان موجود عليها لحاف وتغطت وتمت طايحه
نشت مي من ع الارض ويلست ع الغنفه

مي: بلاج ؟
ناعمه: ماشي بس احس بلوعه
مي: لوعتي بجبدنا تراج عنبو مب وحام ها
ناعمه: وانا شو اللي كرهني في الحمل الا الوحام اوف تعب
مي: لاتتاففين العيال نعمه غيرج مب محصلنهم
ناعمه صخت عنها
مي: لين متى بتمين ماخذه اجازه ؟
ناعمه: لين اربي ماروم اسير الدوام
مي: انا اشوف تقدمين استقالتج احسن
ناعمه: ليش بالله
مي: اولا وايد ناس محتاجه تشتغل مكانج .. ثانيا بس خلاص بيكون عندج بيبي وتعرفين نحن مب دوم اهني وامايه عفرا ماتروم لليهال .. ولازم تجابلينه
ناعمه سكتت
مي: ها شو قلتي ؟
ناعمه: يلسه البيت ملل
مي: يوم بتملين اظهري غيري جو لكن الشغل مايناسبج صدقيني
ناعمه: ماعرف ..
مي: انزين شو فصلتي للعيد ؟
ناعمه: شو بفصل بعد ..شي بيدخل عليه ويا هالكرشه
مي: ههههه بلاج انزين معقده بعمرج بتربين وبتخوز .. نحن خذنا بدل يوم سرنا دبي ويا اميه ..
ناعمه: متى سرتوا ؟
مي: قبل كمن يوم .. يوم كنا هناك عند اميه ودتنا ..
ناعمه: زين انا خذت لي جلابيه كويتيه
مي: حلو انزين انتي طويله وبيطلع عليج فنان
ناعمه: ميوه
مي: هاه
ناعمه: خاطري في ايس كريم
مي: اوهو ها وحامج مابيخلص .. اقولج حجي ظهرج فكينا عن يطلع في ويه البيبي
ناعمه: ماتمصخر قومي طلبيلي
مي: شو تبين أي واحد
ناعمه: ها بو التوت قوم بونص اللي فيه حطبه من تحت
مي: خيبه ليش ها يبيعونه لين احين ؟
ناعمه: مادري تصرفي ان مالقيتي هاتيلي المثلث اللي اخر شي لبان
مي: وين طالعتلي انتي بهالغبار؟ اختاري شي يديد
ناعمه : هههههه ها اللي في خاطري شو اسوي
مي: انزين هاتي التلفون بتصل الدكان
خذت مي التلفون وطلبت ايس كريم حق مرت ابوها ..
وعقب ماسكرت
مي: نعمه الله
ناعمه: نعامه ترفس عدوج .. شو تبين.؟
مي: هههه شو تبين تيبين بنت والا ولد ؟
ناعمه: مافكرت عادي أي شي
مي: انتي مول ماشي احساس دومج مب مفتكره
ناعمه: ميوه عندي البنت وعندي الولد يعني عادي عندي
مي: انزين انا ابا ولد
ناعمه: ليش؟ طالعه على يدتج
مي: ههههههه لا مب جي بس نحن وايد بنات نبى اولاد ..
ناعمه: اللي بيي من الله حياه الله
مي: انزين لو بنت شو تبين تسمينها ولو ولد شو بتسمينه
ناعمه: اممم بسمي الولد راشد والبنت روضه
مي: حلوه الاسامي بس ليش عندج حد معين بتسمين عليه ؟
ناعمه: هيه .. بسمي على ابوي الله يرحمه .. اما البنت بس جيه يعيبني هالاسم
مي: زين زين .. ريم .. ساره .. مي .. مها .. مهره ..عفرا.. روضه .. لا لا زين مناسب للقائمه
ناعمه: هههههه .. زين .. قومي اطاعي يمكن يابوا الايس كريم تحت
مي: اوكي بنزل بطالع .. حطي ع قناه دبي احين ايحطون مسلسل حلو .. لين ارجع

نزلت مي تحت تطالع جان الدكان يا .. تاقلمت على بيتهم ها وايد و مرت ابوها .. بدت تلاطفهم وخذت وخذوا عليها .. لو ماكانت مثل امهم بس بتم شرات اختهم الكبيره..



************************
(الخميس) 20 يناير 2005
************************

الساعه 10 الصبح كانت ام سيف يالسه وماغطه ريولها ع الكرسي الي كانت ملبسه نايلون .. ومي قابظه قلم وتخط به ريول يدتها ..

ام سيف: ميوه بسرعه شخطيه يقرقرطني
مي: هههه انزين صبري خليني ارسم القصه عدل
ام سيف: احين انا عيوز شو تبين طايحه تحنيني وملعوزتني
مي: برايه انتي في عيوني شباب
ام سيف : هيه الا قصي عليه انتي ..
بعد مارسمت مي قاعه ريول يدتها .. بدت تحط الحنا وتعدله بالخاشوقه ..
ام سيف: ميوه بارد ها
مي: من مساعه مظهرينه من الثلاجه .. برايه بردي ع ريولج
كانت مي محنيه ايد يدتها .. والحين يالسه تحني ريولها ..
في هالوقت انفتح باب الصاله
ام خالد: يا اهل البيت
ام سيف: مرحبا حيا الله من يا اقربي اقربي
مي: اوهو ها وقته احين بترقع امايه بعين
ام سيف: صه ميوه..
ام خالد: سلامن عليكم

هوت على ام سيف تسلم عليها ومي نشت بعد سلمت عليها .. وردت تحني يدتها
ام خالد: شو اصبحتوا ؟ ماشا الله تتحنون ..
ام سيف: هي يبوج عافده عليه هاي ميوه الا تحنيني..
ام خالد:يا امج انا بغيت اتحنى ومن الساعه 8 سايره الصالون ..من كثر الحريم مارمت.. تارسات الصالون ..
ام سيف: حشى مايسوى عليهن .. جان تمن في بيتهن ويلسن يدعن ويصلن ابركلهن .. صيّام شو فيهن من الحيل حق يلسه الصوالين..
ام خالد: شدراني عنهن .. زين ماشا الله اشوفج خلصتي .. شي زايد عندكم حنا؟
ام سيف: هيه شي .. وايد يايبه ناعمه ..
ام خالد: زين عيل امايه مي عقب ماتخلصين من يدتج تعالي حنيني ..

وبدون ماتمسع رد من مي منها قامت من الغنفه ويلست ع الارض ..شلت موسده وحطتها تحت ريولها ويلست تتريا دورها .. مي اطالعت يدتها وكانت فيها ظحكه بس يودت عمرها ..

ام سيف: ام خالد قومي يلسي ع الغنفه ..
ام خالد: لا برايه ..
ام سيف: لا حشى ما يلستي ع الارض..
ام خالد: يا ام سيف اخاف تخيس الغنفه
مي: ماعليج ام خالد بنلبسها نايلون نفس ها الكرسي
ام خالد : هييه.. جان جي زين ..

قامت ام خالد من مكانها ويلست ع الغنفه اما مي فقامت اتييب نايلون ولبسته الكرسي وحطت موسده لام خالد وخلتها ترتاح ..

ام خالد: بارك الله فيج بنيتي..

من بعد ما خلصت مي من يدتها ويلست تحني ريول ام خالد وعقب ايدها ..

ام خالد: سولي نقش خفيف
مي: انا هب حنايه .. شو عرفني بعد في النقش .. ماعرف احني الا قصه مال اول تبين والا ؟
ام خالد: يالله برايه احسن من ماشي .. اخبارها ريم اهناك ؟
ام سيف: الحمدلله رمسني نايف الصبح يقول في الدرب سايرين عرفه الله يحفظهم
ام خالد: عاد ريم وخذها نايف .. وساره خطبوها هل امها.. مي انا مابضيعها من ايدي .. ان شا الله انها تكون لولدي..

مي عقدت حيااتها وهي موخيه تحني ام خالد .. كان في خاطرها تشخبط على ايدها .. هاللي قاصر تاخذ ولدها عشان من اول يوم ترقعهم بعين ويروحون فيها هالافكار خلت مي تبتسم وتحس انها بتظحك ..
اما ام سيف تجاهلت رمسة ام خالد اللي ما دشت مزاجها وتمت تسولف وياها فامور ثانيه .. حاولت مي انها تخلص بسرعه واول ما خلصت ترخصت عنهم وسارت..وخلت يدتها وربيعتها يسولفن بروحهن ..

****

الساعه 3 الظهر كانت ريم يالسه في خيمه معاها 20 حرمه .. ونفس الشي نايف..
اتصل فيها عشان تطلع برع الخيمه ويروحون مع بعض ييلسون بروحهم يجتهدون في الدعاء ..
طلعت ريم وياه ومشوا لواحد من جبال عرفه كان جريب من خيمتهم .. صعدوا اليبل ويلسوا على صخره منبسطه .. مجابلين القبله .. على يمينهم من بعيد يشوفون جبل عرفه اللي كان مغطى بالكامل باللون الابيض .. ثياب الاحرام اللي لابسينها الحجاج اللي يالسين عليه ..
رفعت ريم ايدها وبدت تدعي ..
ونفس الشي نايف .. فتح دفتر صغير في ايده وبدى يدعي منه .. وبعد ماخلصه عطاه ريم ورجع يدعي بروحه ..

على بعد منهم كان سلطان يالس .. اللي كان اكثر منهم اجتهادا في الدعاء ..
يدعي ان الله يغفر له كل اللي سواه من خطأ في حق نفسه قبل حق الناس ..
يدعي لبدريه المسكينه ان الله يعوضها خير ويغفرلها ذنوبها ويجعل مثواها الجنه ويغفر له ع اللي سواه فيها ..
مب هي بس .. كل اللي اذاهم واللي جذب ولعب عليهم ..
غطى ويهه باديه واجهر دموعه .. الي كلها حرقه وحسره على الي فات من عمره .. على الي سواه من قبل وعلى كل خطوه خطاها وانكتبت له فيها سيئه .. وفها اللحظه عاهد رب العالمين وعاهد نفسه انه بيمشي ع الدرب الصح .. وبيبدى صفحه يديده في حياته صفحه بيضا مافيها أية شوائب..

نايف في هاللحظه كان يتلفت ويشوف اللي حواليه وانتبه لسلطان وهو ضام ويهه بكفينه..

نايف: ريمان
ريم التفتت: نعم ؟
نايف اشر على سلطان
ريم تمت تطالعه وساكته : اول مره اشوف سلطان جيه
نايف: ليش؟
ريم: ماشي بس يعني سلطان كان غير والحين وااايد غير ..
نايف: الله يغير ولا يتغير..
ريم: ونعم بالله .. بس الحمدلله يعني .. سلطان كان مبهدل العايله كلها ومب مندمج ويانا ابدا وملعوز خالوه .. بس شوف سبحان مبدل الاحوال.. من فتره الكل حاس بتغيير في نفسية سلطان .. مادري شو السبب
نايف وهو مركز نظره ع سلطان ..
نايف: احس ها الانسان له جاذبيه عجيبه ..
ريم: شخصيته قويه .. ويعتمد عليه ..
نايف: فحجتنا هاذي لولاه ماعرف شو كنت بسوي بروحي .. مع انه هو بعد اول مره يحج ..
ريم : الحمدلله يابوك على كل شي .. الله كاتبله الهدايه والله يديمها عليه من نعمه
نايف: اللهم امين ..

زادوا اجتهادهم في الدعاء كل ماقربت ساعات المغيب ..

****

قبل اذان المغرب بشوي كانوا عيال سيف كلهم متيمعين في الصاله تحت .. يتابعون على التلفزيون الحجاج في يوم عرفه .. جاسم كان يالس يطالع ومتقرب وايد من التلفزيون..

مهره: جسوم قوم شوي مانشوف
جاسم: صبري بدور قوم نايف وريمان وسلطان ولد خالوه
مها: هيه امره عاد.. تحمل عن تحصلهم
جاسم صد على مي: ميوه اتصلي اتصلي حق ريمان
مي: اتصل شو اقولها
جاسم: اساليها شو لابسين
الكل ضحك ع جاسم ..
ام سيف: شو بيلبسون بعد .. نايف وسلطان باحرام ابيض وريم بعباتها
جاسم: اوف ليش مايلبسون غير عن الناس عشان نشوفهم .. انزين قوليلهم خلي يسيرون عند الكاميرا يسون لنا بيباي
مايد: سايرين الحج هاييل مب مدهش عشان يسون بيباي حق الكاميرا
جاسم: اسكت انته لاتتطنز شو عرفك ساير قبل!
مايد: لا مب ساير بس اعرف
جاسم: لا ماتعرف شي
ام سيف: صخوا انزين صخوا خلونا نسبح وندعي قبل الاذان ..

دقايق مضت وكلهم ساكتين .. واولهم ساره اللي طايحه ع الغنفه تعبانه من اليوع
لين سمعوا اذان المغرب .. نطت ساره على طول صوب الماي
ام سيف: بسم الله سويره بلاج .. ادعي امايه قبل ماتاكلين
ساره وهي تشرب الماي: ماقدر اتذكر الدعاء وانا عطشانه احين بقوله

فطروا كلهم وعقب الفطور والصلاه تيمعوا في الصاله ..
في هالاثناء رن تلفون مي وردت عليه ..

مي: مرحبا امايه تقبل الله صيامكم
عليا: منا ومنج حبيبتي .. اشحالكم وشو اخبار اخوانج؟
مي: كلنا بخير فطرنا واحين يالسين في الصاله
عليا: زين عيل انا مطرشه الدريول احين خلوا الشغالات ياخذون عنه الاغراض
مي: شو مطرشه؟
عليا: حلويات العيد .. ادري ريمان محد وانتن مابتفتكرن تسون شي
مي: هيه والله صدقتي محد افتكر
عليا: زين انا طرشت لكم صياني الحلويات والبسكوت وكل شي امره .. لاتفشلون يدتكم في العرب يوم بييونها
مي: فديتج يا امايه ماتقصرين
عليا: يالله عيل امايه بخليج انا سلمي عليهم ..
مي: الله يسلمج مع السلامه

سكرت مي التلفون وتريوا الدريول لين وصل وخذوا عنه الحلويات وسارت مي المطبخ ترتبهم ويا يدتها .. اما ساره مستحيل تسوي شي غير انها مجابله المسجل والاورج او التلفون ..



**********************
(الأربعا) 26 يناير 2005
**********************

من بعد ما رجعت ريم من رحلة الحج هي وريلها .. التزمت اليلسه فبيتها احد واثنين وثلاثا لان الزوار ما وقفوا .. اللي ايي يسلم ويبارك الها ولنايف على الحج .. يدتها وخواتها كل يوم عصر سارلها ويلسن وياها .. كانت ريم تحس بتعب فضيع وجسمها كله منهد .. ونايف يته حساسيه وماخلى عياده ماسارلها .. الحج جهاد والله يباركلهم فيه ..
واليوم .. بغت تغير جو من بعد ها اليومين وقررت انها تسير تقيل بيت ابوها .. تحس شوي وياهم بطعم العيد.. أول عيد يمر عليها وهيه بعيد عنهم ..


ام سيف: اتخبرج ذاك اليوم عن الحمله الي سرتوا وياها ماخبرتيني عنها!!
ريم: هههه ماعندي حياد يبوج .. ها اليومين الي مرن وايد تعب ضيعت فيهم كل شي .. بس الحمله وايد فنانه امايه ماقصروا امره في شي .. ولاتعذبنا مول كل شي كان متسهل حتى الرمي ..
ساره: انا هالرمي يخوفني..وايد جتله تصير عنده..
ريم: لا لا مايخوف انا كنت مثلج اخاف.. بس يوم تسيرين ترمين عادي انا كل مره كنت ارمي فيه اكون وااايد قريبه من الحوض ومحد يظكني الحمدلله ..
ام سيف: زين زين ماقصر عيل فيج نايف تحمل منج

ريم ابتسمت ليدتها .. كانت تحس براحه كبيره بوجود نايف وزادت
راحتها هاي عقب ماسارت الحج .. نايف عرف باسلوبه كيف يقدر يغيرها تجاه نفسها وتجاهه هو بعد ..
يلسوا يتبادلون السوالف فيما بينهم لين اذن العصر وكلن سار يصلي ..عقب الصلاه طلعت ريم وساره ومي للحوي بما انه هادي وحلو .. وتمت تسولف لهم عن سوالفهم اللي صارت لهم ف الحج ..

مي: انا اللي مستغربته لين يومكن هذا التغير المفاجئ فسلطان
ريم: الله هداه ياختي
مي: لا بس صدق يعني فخاطريه اعرف
ساره: محد بيتنيحس ع الريال غيرج .. من اعتدل حاله وهي دومها الا حاشرتنا شو غيره .. الحين بيرد يصيع
مي: فال الله ولا فالج .. توه الريال حاج ..
ريم: هههه الله يعينه الحين شي بيستويبه من رمستكن هاذي.. بس حليله صدق كان يبين عليه انه ساير الحج ويبى يرد طاهر..
مي: الله يكمل عليه ..

في هالاثناء كان جاسم ياي من المسيد ويا مايد ..دش مايد من الدروازه اما جاسم فانتبه للباب الصغير اللي يودي للميالس.. شاف انه في قطوه هناك وكعادته بغى يلعوزها.. هالميلس بعيد عن الفله وحذال الدروازه على طرف.. ما جد حد دخله من البنات ولا الاولاد لانه كله على بالهم انه مهجور .. ويبين انهم بيسووله صيانه ..
يوم وصل جاسم للباب انتبه انه الباب مب مسكر زين .. اثار فضوله ها الباب .. راغ القطوه من دربه وفتح الباب..دخل لقى الميلس عود واليلسه فيه حلوه .. لكن المكان معفوس شوي .. ع الارض بقايا اكل ومكسرات .. وقواطي مفروره..
ع طرف الميلس لقى ثلاجه .. سار صوبها وهو يتلفت يمين وشمال ..فتحها لقى فيها وايد انواع من المشروبات و بعض الفواكه ..
خذله جاسم شي يشربه وطلع برع الميلس.. شاف خواته فالحوي يتمشن وشكلهن كان مرح .. تم يزقر عليهن ..

جاسم: ساااااااااروه ميووووووووووه

التفتن له ولقوه واقف عند باب الميلس وتجربن منه وهن مستغربات من وين هو طالع!

ريم: شو تسوي اهنه
جاسم: تعالوا شي عصاير اهنه وايد .. (وجدم لهم اللي في ايده) بطلولي ها مارمت له

شافن البنات اللي فايده وصرخن كلهن مره وحده ..

مي: جسوم شو هااااااا وين يايبنه
ساره: منو عاطنك اياه قووووووول ؟
جاسم خاف وتم يقولهن وهو زايغ منهن: اهنه ..حصلته في الميلس والله .. ماخذته من حد ..
ريم كانت أكثرهم متمالكه اعصابها : هات ها وروح انته عند ميود
جاسم: ليش شوها؟
ريم وشاده على عمرها: هات و روح قلت لك ..
قالتها ريم بطريقه عصبيه .. عطاها اللي فايده وروح .. كل شوي كان يلتفت لورى وهو يمشي فدربه.. يبى يعرف شو فيهن خواته .. شافهن دخلن الميلس .. بس كمل طريجه لانه صدق خاف من ردت فعلهن ..

فتحت مي الليتات وساره كانت تطالع حوالينها .. اما ريم يلست على اول غنفه ..

ساره: شوها ؟ شو اللي يستوي اهنه

مي بدت تتقرب اكثر وتتجول بين المكسارات والقواطي واكياس الاكل .. وساره واقفه مجتفه ادينها وتتطالع بكل اشمئزاز .. اما ريم كانت ضاغطه على العلبه اللي عطاها اياها جاسم وموخيه وتصيح

ساره صدت لها: ريموه شحقه تصيحين ؟ شو السالفه تعرفين شي نحن مانعرفه

مي تجدمت وسارت للثلاجه اللي حصلت فيها قواطي الخمر من اشكال وانواع

مي: شوووووو ها ؟ منو اللي محطي ها الوصاااخه كلها اهنه

فرت ريم العلبه اللي فايدها و حطت ايدها على ويها وهي تصيح وتذكرت يوم كانت يالسه في الصاله تلعب بعروستها ودخل عليها ابوها في ايده نفس العلبه اللي كانت فايدها ..
ركضت له ريم عشان تسلم عليه
ريم: ابويه ابويه
لوت على ريوله وهو واقف وخوزها عنه بعيد ويلس على الارض
ريم: باباه شو عندك ؟ عطني سفن اب انا ابا
سيف شاح ويهه عنها
وقفت ريم عشان تاخذ عن ابوها القوطي تبى تشرب وهو يخوزه بعيد عنها
ريم: عطني عطني انا باا شوي
عصب سيف ودزها بعيد
ردت ريم تترجاه بكل براءه تبى يعطيها عصير..
صد عليها سيف وهو معصب ومسكها من رقبتها بالقو عشان يبعدها عنه ..وتم ضاغط بكل قوته ع رقبتها وهي مبطله عيونها من الصدمه ..
سيف: قلت لج لا .. خلاص قومي لاتلعوزيني الله ياخذج من بنت ..

سمعوا شهقت ريم فجأه وهي تصيح وترتجف ..وتجدمن منها مي وساره يحاولون يخوزون ايدها عن عيونها .. بس ما قدروا لها ..

مي: ريمان بلاج شو مستوي
زاد نحيب ريم ورجفتها..
مي: ساروه هاتيلها ماي
فجت ساره الثلاجه وطلعت ماي بدت مي ترشه ع ايدها وتفرك به ويه ريم

مي: بسم الله الرحمن بسم الله بلاج ريمان
ريم تصيح بعدها ولا ردت عليهم
ساره: ريمان ليش تصيحين خبرينااا.

ريم حاولت تتمالك اعصابها وهي بعدها تصيح..وحست بنغزات فراسها والدنيا اتدور عليها .. مسكت راسها وتمت تهوس عليه بالقو ..
مي يلست ع الارض مجابله ريم

مي: ريم شو السالفه ؟ شو تعرفين ونحن مانعرف
ساره: بس مي انا فهمت .. ريم ابويه يشرب صح !
ريم صاحت أكثر من بعد ما خلصت ساره جملتها الاخيره..
مي: ريم صح الي تقوله سااره؟
ريم: بس خفوا عليه .. بس ..
مي: انزين قووولي
ريم: هييي .. هيي صح
مي وتحس بغصه فحلجها ومب رايمه تيلس فمكانها.. قامت وهي تشوف القذاره اللي من حولها..
مي: بس عمرنا ماحسينا به ولا استنكرنا ريحته حتى يوم ايينا فليل
ساره: اكيد مب كل يوم .. قوموا نسير عن تدورنا امايه خل نسير غرفتنا واهناك بنتفاهم .. ريم مسحي ويهج ..قومي يلا ..

مسحت ريم ويها وتمت تتشاهد وهي حاطه ايدها ع راسها ..
قبضتها مي من ايدها عسب تمشيها .. وطلعوا كلهم من الميلس اللي برع ودخلوا الفله ..
كانوا يحاولون يصعدون بدون ماتشوفهم يدتهم .. وفعلا ركبوا فوق بدون ماتشوفهم لانها كانت مشغوله ترمس بالتلفون ..

ساروا كلهم غرفه ريم وسكروا الباب عليهم ..
ريم من دخلت غرفتها زاد صياحها ومي كانت عينها تدمع بعد.. اما ساره ماكانت قادره تفسر احساسها بعدها .. بعد ماهدت ريم .. يلسوا كلهم ع السرير متجابلات ..

مي: احين ممكن افهم الموضوع اكثر.. ريمان دخيلج تماسكي اعصابج ولاتصيحين راسج بيعورج اكثر انتي بروحج مب ناقصه .. ماصدقتي تفتكين من ويعه ..
ريم: بحاول..
مي: يلا فهموووني
ساره: شو اللي تبين تفهمينه ميوه..كل شي واضح الحين..
مي:وين واضح!!.. ابا افهم ابويه من متى جيه وليش محد حاس فيه طول هالفتره اللي نحن فيها فها البيت .. يعني هو يشرب عندنا في البيت ونحن ماندريبه ؟؟
ريم: اكيد يكون برع في الميلس وينظف الميلس البشكار .. ومحد يعرف عنه شي..والميلس كلنا ماخذين فكره انه مهجور ومب مسويله صيانه لازم محد بيقرب صوبه..
مي: ممم ..انزين نعوم اكيد تعرف
ساره: لا ماظن..
مي:حبييبتي.. اكيد تعرف يعني كل ها ومابتروح ريحته ع الاقل ؟
ساره: ماعرف يمكن.. بس ماتفرق عندها
ريم: بس الأكيد امايه عفرا ماتعرف
مي: تحسون هذا هو سبب طلاق امي؟
سكتن البنات كلهن ..
مي: باجر نحن سايريلها وعند جهينه الخبر اليقين.. لازم نيلس وتخبرنا بكل شي خلاص .. نحن كبرنا.. وعرفنا خيط للسالفه .. ماله داعي يخبون أكثر..
ريم بحسره: انا عن نفسي فهمت واااايد اشيا
ساره: شو فهمتي
ريم: باجر بتفهمون من امايه .. اما الحين محد بيعرف الا نحن الثلاث..
مي: نسيتي انه جسوم كان في الميلس ؟
ريم: لازم حد ينبه جسوم انه مايسير اهناك..وينسى السالفه هاي من باله..واذ سألكن دورن أي عله تقولنها له ..
ساره: جسوم مايتصابى تعرفينه انتي
ريم: عيل ابوكم يتصرف المهم اخوانا مايعرفون
مي: منو بيقول لابويه ؟
ريم: انا بتصرف.. او نخلي خالي راشد يرمسه .. بتقولولي عيب نفظحه ؟ انا متاكده انه خالي يعرف عنه .. اما الحين ها ابونا لازم نستر عليه ونحاول وياه عشان الله يصلحه .. وعلينا ندعيله ..

انتبهوا لاذان المغرب .. قاموا كلهم يصلون وبعد ما خلصوا .. لبست ريم عباتها ونزلت عنهن عشان نايف بياخذها وبيروحون البيت ..سلمت على الكل وركبت السياره ويا نايف ..

كان ملاحظ شرودها .. يكلمها ماترد عليه بسرعه او ماتفهم هو شو يقول .. استغرب نايف من حالها .. مودنها بيت اهلها بخيير مافيها شي ..

نايف: ريم حبيبتي شو ياج.؟
ريم: ها .. ماشي
نايف: لا فيج شي .. ذهنج مب وياج مول؟!
ريم حاولت تبتسم لريها وحطت ايدها على ايده..
ريم: مافيني شي طولي بعمرك.. بس شكله الصداع ردلي اليوم
نايف: ياويلي من ها الصداع..
ريم: لا ماعليك خفيف ..
نايف: الله يعينج ..

وبعد ما وصلوا البيت صعدت ريم على طول فوق اما نايف دش الصاله عند اهله .. دشت حجرتها وبطلت العباه .. دشت الحمام تبى تاخذلها دش بارد يبرد حرقتها اللي يتها اليوم..بعد ما خلصت يلست فصالة جناحهم شغلت التلفزيون لكن بالها فمكان ثاني.. كانت تفكر بالأمور اللي اتضحت الها اليوم .. تفكر فالايد اللي لطالما عانت منها وكأنه عقلها الباطني مجذب انه هاي سوايا ابوها .. تذكرت الموقف اللي صار بينها وبين ابوها برمته مع انها ياما حاولت من قبل انها تتذكر او انها تعرف شو سر هذي الايد اللي تقرب منها كل ما اييها صداع لكن ما عرفت السر.. واليوم بس .. قدرت توضح زوايا الصوره فبالها صح ..
من صدمتها فذاك اليوم ماقدرت تجمع انه اللي زغدها وكان ممكن يجتلها هو نفسه ابوها .. تذكرت لما عليا يت تركض وهي تسمع صراخ بنتها وتشوف سيف قابضنها من رقبتها من دون رحمه ..

عليا وهي تصرخ: اتخبلت انته !!!
سيف: شليها عني .. شليييييييهااا
عليا وهي دموعها تنهمر بغزاره: خاف ربك فعيالك يا سيف .. حرام اللي تسويه والله حرااام ..
كانت تسحب ريم من ايده اللي كانت ضاغطه ع رقبتها وهي تسعل ..
عليا: فج بنتي حسبي الله عليك ..

بعد ما بطلت ريم من ايده شلتها وهي تحاول انها تقوم .. لكن ما قدرت .. بطنها عورها .. وقفتها وسحبتها من ايدها .. كانت عليا تصيح بحرقه .. اول ما وصلت حجرة بناتها حطت ريم ع السرير ..ريم ماكانت مستوعبه اللي يصير .. تمت تسعل طول الوقت .. وعليا قلبها متقطع عليها ..

سعلت ريم بقو وهي حاطه ايدها على رقبتها .. حست بخنقه وقامت بسرعه للثلاجه وطلعتلها ماي .. صبتلها كوب ماي ورشفته مره وحده ..

دخل نايف الجناح واستغرب من عدم وجود ريم وزقر عليها .. طلعت ريم من المطبخ التحظيري .. ووقفت عند الباب..

ريم: هلا نايف ..
نايف: يسالون عنج تحت قلت لهم مصدعه .. ماخف راسج؟
ريم: لا
كان يبين الذبول على ويه ريم .. عينها وارمه وشكلها شاحب .. وتتحاشى النظر في ويه نايف ..
نايف: خذتي مسكن؟
ريم: هيه
نايف: اوديج المستشفى ؟
ريم: لا مايحتاي ظاري يستوي لي جيه
نايف: عيل مدام جيه لازم تسيرين العياده نشوف شو سالفه هالصداع؟انا ماصدقته يخف عنج اخر فتره ..
ريم: ماعليه..بيخف ان شاء الله ..
نايف: انزين يايبين لج عشا كلي عشان يخف عنج راسج شوي
ريم: شربت حليب نايف مابا بعد شي ماكله في بيت اهلي
قالت جيه عشان تتحاشى اصرار نايف الزايد عليها
ريم: نايف؟
نايف: آمري
ريم: باجر ابا اسير عند أميه عليا بسلم عليها ماشفتها
نايف: ليش ماتعزمينها عندنا ؟ البيت بيتج ريم لاتستحين
ريم: لا مب جيه بس ابا اسلم على اهليه اهناك كلهم ومابيون كلهم خصه امايه سلامه وابويه الشيبه ..
نايف: متى تبين اوديج؟
ريم: لا انا ابا اسير ويا خواتي من الصبح لانه هم بعد ماساروا عند امايه من يوم اول يوم عيد ..
نايف: خلاص على راحتج سلمي عليهم ..
ريم: الله يسلمك .. خلاص انا بقوم ارقد تامر ع شي؟
نايف: لا مايامر عليج عدو سيري ارتاحي .. انا بطالع التلفزيون شوي مافيني رقاد..
ريم: اوكي تصبح على خير
نايف: وانتي من اهله

روحت عنه ريم وهي تفكر شو بتسوي وشو بتقول باجر لامها .. رجعت تذكرت الموقف اللي صارلها معقوله هالسنين كلها ماقدرت تخليها تتذكر هالموقف ..ولا الصداع اللي اييها كان من نتاج التفكير الدايم لها الموضوع.. مالقت لاسالتها اجوبه.. وتريت باجر بفارغ الصبر عشان تشوف امها وتخبرها بكل اللي شافته فذاكرتها..ولا هو بس اوهام تخيلتها؟!


************************
(الخميس) 27 يناير 2005
************************

الصبح يت ريم عند خواتها ووداهن الدريول بيت امهن .. مي وساره .. وريم .. كل وحده مجهزه أسألتها اللي تفكر فيها من امس..
مهره ومها يالسات بكل هدوء وهن مب عارفات شو صاير على خواتهن .. جاسم الوحيد اللي كان له بارض للسوالف ومب محصل غير الدريول يسولف وياه..

بعد ما وصلوا وسلموا ع الكل .. التموا لمه جماعيه ع الضحى .... بو راشد كان فالصاله يالس وام راشد بعد ..وعليا وبناتها متحوطين بهم .. مانع كان ناش من رقاده وطلع من بيته وسار عندهم كعادته كل ضحى..
اما محمد كان بيطلع لكن لما شاف العايله بدت تلتم رد ويلس وياهم..
طلعت عبير ويلست ويا الموجودين فالصاله ..

ام راشد: مانع ابويه.. مخليلك ريوق
مانع: وينه.. انا اليوم ناش وصدق يوعاان
ام راشد: بشوف البشاكير
مي: يلسي امايه انا بقوم اييبه ..
مانع: نفعت بنت سيف
مي ابتسمت لخالها.. وتردد فبالها اسم ابوها .. نفخت بضجر .. يابت الريوق لخالها ويلست حذاله..

مانع: شو بتشاركيني؟!
مي: ليش ماتباني اكل وياك
مانع: بتخلصينه عني
مي: لاوالله شووو شايفني
مانع: ههههههههه فديت ها الحس .. تولهت ع مناقرج
مي: هيهي جان استحي ..
مانع: حطيلي عسل ..
مي: انا عسل شو تبى بالعسل بعد
مانع: يالله عاااد مانروم نقول شي .. خقت علينا
مي: ههههه ... بحطلك يبوك كلتني ..
مانع: رقيه وسبيجه وين عنكن
مي: منو احلام ومدوي
مانع: هيه
مي: رقود .. ما وعيتهن بسيرلهن عقب شويه ..
مانع وهو يلف على بنات عليا: بنات ماتبن اكل
ريم: تسلم خالي.. متريقين ..
مانع: ساروه؟
ساره: لا ماشتهي انا ..
مانع: عيل ها المفجوعه قوموها بتمتن ..
مي: خاالي عاااد .. والله صدق تراني بقوم
مانع: هههههههه بلاج ما تستحمليني انتي مستويه .. عنبو ماكملت وياكن كم اسبوع من ييت .. شو ماتولهتي عليه وعلى تغصيصي لج..
مي اطالعه وهي مبتسمه: فديت روحك امبلا تولهت ..

وتمت مي تسولف يا خالها .. ساره وريم كل شوي يصاصرن ع الخفيف .. اما مها ومهره فقامن هن ها المره يوعن بنات خالهن محمد .. ملن من يلسة الكبار ..

وتموا على ها اللمه لين صلاة الظهر .. ومن عقبها تيمعوا مره ثانيه عشان الغدى .. وعقب الغدى دخلن مي وساره غرفتهم و كانت احلام يالسه وياهم ..
كانن ساره ومي وريم متفقات ييلسن ويا امهن عقب الغدى.. بس احلام الحين يالسه وياهن ومب عارفات كيف يتملصن منها .. ما يبنها اتي وياهن عند امهن ..

مي: حلامي
احلام وهي تلتفت لمي: شو
مي: اقوولج .. الروايه اللي مسونها خالي وين؟
احلام: هناك فالحجره
مي: سيري هاتيها بنقرا شويه
احلام: قوم امايه رقود يمكن
مي: لا لا توهم متفرقين اللمه .. سيري لحقي عليها قبل ما ترقد
احلام: ميووه ماروم..لازم الحينه يعني
مي: هي هي
ساره: يلا حلاامي قومي بنشوفها ..

احلام وهي تتطالعهن بضجر .. قامت من مكانها وسارت تبى تيب الروايه .. اما ساره ومي من اول ما ظهرت احلام شلن بعمارهن وع طول توجهن لحجرة امهن اللي كانت مقفوله ..
دقن الباب ..

مي: امااايه..
عليا بهدوء: نعم..
ساره من ورا: امايه ريم اهنه ؟
عليا: هيه شو تبون
مي: بطلي بطلي نبى نرمسج

عليا اطالعت ريم وتنهدت .. عرفت بالسالفه من ريم وتدري انه بناتها ما بيسكتن ها المره .. وصلت لين عند الباب وفتحته ..
لقن ريم يالسه ع السرير متربعه وشكلها كانت تصيح ..سارن صوبها ويلسن حذالها..

عليا: ها بناتي تبن تستجوبني!
مي: اميه اذا سمحتي يعني
عليا:خبرتني ريم عن اللي صار امس
ساره: الحين دورج انتي تخبرينا
عليا: اخبركم شو ؟
مي: خلاص امايه لاتمين تماطلين خبرينا شو سبب طلاقج ريحونا
عليا: شو هالرمسه ميوه
ساره: صدق طفرنا اكثر عن جيه شو تبون تسووبنا
كانت العصبيه تبين من نبرة صوت البنات
عليا: انا مالي ذنب في أي شي صار .. ابوكم من تزوجته كان يشرب .. لكنه كان يحترمني .. مايشرب في البيت .. عشان جيه محد كان يعرف عنه الا انا..ايي وريحته تفوح من ها الوصخ ..
ساره: لييش ما حاولتي ويااه انزين ؟؟ ليش اطلقتوا ؟
عليا: ساره .. الطلاق كان انسب حل.. منو قالج ما حاولت وياه ..لكن ابوكن لين يومكن هذا وهو مب رايم يخلي ها السم .. ماكان يسمعلي ابدا .. ومحد كان يعرف غيري مثل ما قلتلكن شو كان بايدي اسوي لمنو بشكيه يعني!!
مي: كملي اميه .. يعني عشانه يشرب طلبتي الطلاق!!

عليا يلست ع طرف الشبريه وتحس بدقات قلبها تتسارع..يا اليوم اللي كانت تخاف منه .. سترت على ابوهن وايد وعلى افعاله .. لكن مب بايدها اليوم اذ كشفت الاوراق.. بناتها عاشن عمرهن فها السر ومب عارفات ليش امهن فجأه ومن غير سابق انذار كرهت ابوهن واطلقت منه ..

ريم: اميه تبين ماي؟
عليا: لا فديتج .. سمعن بناتي ..انا من عرفته ابوكن وهو يشرب بس استحملت .. حملت بريم وصبرت عليه وعقبه ساره وعقبه مي وعقبه التوم .. صرتن خمسه فرقبتيه انجبرت اتهاون ويا ابوكن ما دام انه محترم وجودي وما يسكر فالبيت .. يدتكن بغت الولد بغت ماايد..حنت ع راس ابوكن لين يوزته ..وانا سكت وصبرت عشانكم حملت انا وناعمه في نفس الوقت .. المفروض نربي مع بعض .. لكن هي ربت في الشهر السابع وسبقت ويابت مايد .. سارت عند اهلها وكنت انا بعدني باقيلي شهر واربي..كانت يدتكم سايره تبات عند مريم لانها مريضه .. وتم البيت خالي .. طبعا كان عبالي انه ابوكم محترم وجودنا كلنا فالبيت ويسكر برع البيت وايي متأخر .. لكن في اليوم اللي محد كان فيه دخل البيت علينا .. طلع الاحترام مب لي انا .. كان لامه وحرمته هاييج .. بعد سكت عنه.. لكن يوم انه ضرب ريم اختكم ماحقيتها على نفسي ولا عليكم .. شليتكم وطلعت من البيت وييت بيت اهليه..
ساره بدهشه: كيف ضرب ريم ؟؟
عليا صدت صوب بنتها ريم وردت اطالعتهم : كانت تبى اللي في ايده تتحسب انه عصير وضربها ..
ريم اهنه نزلت راسها وهلت دموعها ..
عليا: ابووكن كان بيجتلها وهي حيه ..
ريم: اميه خلاااص
عليا: كان زاغدنها لين ما زرقت ريم وقامت تسعل .. الحمدلله اني وصلت ع صريخها المتقطع .. ولا كان قضى عليها ..اختكم قامت تهلوس تعقدت كرهت الرياييل بسبة ابوكن .. قام الصداع اييها من كثر ما تفكر .. من كثر ما تتخيل ها الايد اللي ماتعرف مصدرها منو وتبى تزغدها... ابوكن ما هنااها حتى فرقادها.. حسبي الله عليه حسبي الله عليه

ونزلن دموع عليا بغزاره وصاحت بصوت يقطع القلب .. ريم ما تحملت وتجدمت صوب امها وحضنتها .. مي وساره كل وحده تقاوم دموعها لكن ما قدرن ..يتخيلن الموقف اللي كان .. ويتخيلن وحشية ابوهن ..

مي وهي تطالع ريم: ريمان .. يعني الصداع اللي ييج بسبة افعال ابويه!!
ساره: كنتي تتخيلين اييد تزغدج واييج الصدااع!!
ريم صدت عليهن: ابوكن كان سكران..مايعرف شو يسوي
مي: ولووو .. كيف تجرأ.. ريمان.. بسبته انتي عشتي تصارعين ها الصداع كيف تقولون عنه ها ابوو ..
عليا وهي تمسح دموعها وتطالع مي: هذا اللي ماكنت اباكن توصلله..لاتكرهن ابوكن بسبة الماضي.. بيتم ابوكن
ساره: ابونا قطع قلوبنا على امنا واختنا..
ريم: ساروه.. انا صاحبة الشان ومسامحتنه .. خلاص .. نحن الحين فاليوم ..من يومين بس عرفنا شو صار قبل.. مايحقلنا نعيش الماضي خلاص..

تم الكل صاخ .. صدى الماضي رجع لعليا .. اتذكرت ذاك اليوم .. من بعد سالفة ريم..من بعد ما خاز تأثير المشروب من على سيف.. فليل سارلها..

سيف: عليا شو اللي تبغيني اسويه .. انتي تعرفين اني
وقبل مايكمل كلامه قالتله عليا وهي تصرخ: روح عني رووووح
سيف: عليا فكري ..عشرت ثمان سنين ماتكفرلي !!
عليا ودموعها فعينها: لاااا..مستحيل..
سيف بصوت جبان: لكن....عليــ..علياااا
عليا: سيف ابعد عني وعن بنااااتي خلاص.. انا بشل اغراضي وبهج من البيت.. ماعاد لي وجود هنه من عقب اللي سويته اليوم
سيف: عليا .. كنت شارب
عليا وهي تتطالعه بكل بغض: خلك ويا شربك يا سيف..

طلعت عليا من الحجره وهي تقاوم دموعها وتثبت عمرها على ها الدرب ..ماتبى تتراجع فاتخاذ ها القرار .. زقرت ع نجمه عشان تشل البنات والأغراض وياها..

تنهدت عليا بيأس وهي تشوف بناتها اللي كانن صاخات يترينها ترد لارض الواقع.. ضغطت بايدها على ايد ريم ..

ريم: انتي بخير اميه
عليا: بخير فديتج.. عمر وانا اتحمل .. ماعليج ..
مي يا فبالها السؤال: انزين اميه نعوم تعرف انه يشرب؟
ساره: واماايه عفرااا؟؟
عليا بحسره: ناعمه اكيد تعرف بس هو يخاف منها من جيه مايسكر جدامها .. يسكر برع ويرجع البيت يتسبح عقب يسير لها .. وامكم عفرا يا غافلين لكم الله.. سيف يخاف عليها عن يصيرلها شي فمتستر ع السالفه ويمكن لانه كان يخاف منها ايام سلطتها وجبروتها..
ريم: حليلج يا امايه ..
عليا: المهم احين عرفتوا كل شي ولا مابا شي يتغير فيكم بيتمون اهلكم .. ماوصيكن اخوانكن لازم مايعرفون شي .. استروا على ابوكم ..وبما انه هو ييلس في الميلس وجاسم تجرا وسار اليوم .. يمكن يسير يوم ثاني .. عشان جيه انا بتفاهم ويا راشد اخويه .. وبتنحل المشكله .. ما بوصي وايد.. ابوكم ماباكم تتغيرون عليه .. مهما كان ها ابوكم .. ومب مقصر فيكم ..
ساره: يعني خالي راشد يعرف كل شي
مي: قلنا امس انه يعرف ..
عليا: راشد يعرف لكن ما قدر لسيف قبل.. بس الحين لازم يرد يتدخل فالموضوع .. وانتن ما برد اوصيكن.. الماضي انسنه ولا تردن تنبشن فيه.. استرن على ابوكن ..

ريم ومي وساره كانن يطالعن امهن وهي ترمس.. بعدها توصيهن على ابوهن!!
أي طيبه يشله ها القلب يا عليا.. ساكته ها الدهر ولا تكلمتي..واليوم ين بناتج يبن يطلعن السر المدفون فوق الـ 13 سنه .. وما يلقن منج غير طيبة القلب هذي والتسامح .. تمن ساكتات ويفكرن فموقف امهن .. اذا امهن هذا ردها .. هن شو ممكن يسون وشو مكن يقولن!

فانتظار رايكم .. :b015:

وين التكملة وين سرتي

..؟؟..

جزء حلو
الحين عرفنا سالفة الصداااع !!

نتريا الجزء اليديد

السلام عليكم ورحمه
خوييز العيووز وصلت
ياالله حيهن بناتنااا
اشحالكهم واعلووومهم



ابص لج بالعشره إني كنت متوقعه ابووها هو إلي زااااغدها انا ارمس عن ريماان
بس توقعته متنااجر مع علياا ولا معصب وشااف ريماان وطلع حرته
آخ ياريااال يسكر ويسهر وببيته على الدنياا السلام
مايرااعي حرمته
مايخااف على عيااله


سلطان ماشاء الله عليه ربي يثبته يااارب
انا اتوقع لوفكر يعرس رااح ياخذ يامي أو أحلام
وربي يتقبل طااعتهم ياارب صدق متأثره:fa46:

مي الصرااحه احس بها ماخذ صفاات ريماان بس على كوول:thumbup1:
يعني كبرت بعيني وهي تنصح عفاااري يعني حلوو كيف فهمتها لوول تذكروون مسيلمه الكذااب
وماشاء الله لاعب الدور بهالجزء
بينها وين نعمة الله وبين رفيجه امايه عفرا
عجبتني طريقتكم في وصف الأحدااث كنها اما عيوونا:thumbup1:

وخاصة جسووم
أحيد بعماارنا يوم نشوووف الصلاه ولا حاجه على كيفنا هذا خاليه وهذا ابويه وهذا مدري من خخخخ خاوينا الآواادم لووول

وسااروه رااعية الهوى ياا الله يوم عرفه ومستطربه وينها عناا حنا ينحد حليناا ذااك اليوم لووول صدق ناس اجنااس


الصرااحه عليا هالإنسااانه ونعم بها
عاااقل ماشاء الله عليها
كيف ياربي لها القلب كبيير
وتعلم بناتها الزين وتبذ لهم الكره
ربي حافظها


وجان نستمتع بهالجزء ونحنا يووااعه
متى يأذن والله صايبتني مجااعه صوومال

سلمت يمنااكن لاهاانت
وننتظر باقي الأجزاااء
وهالله هالله بالعيديه
نريد جزء محترم وطوييل وشغل عدل:thumbup1:

كان خاطري اقراها لانج انتي كاتبتنها .. بقراها ان شاء الله هالاسبووع .. ببدا فيها
لان ماكان عندي وقت

(( ان الله ان اليه راجعون))

حسن الله عزاج الغاليه

اسمحيلي ع القصور

عاشقه اليولات
اختيه عسى ماشر

اختي هزايم

جد المزيونه توفي

حسن الله عزاج اختي المزيونه

ريم ريم .. هواجيس مشتاق.. هزاايم ..

أشكر لكم متابعتكم الطيبه ..

الياه

حياج حبيبتي اي وقت..


عاشقة اليولات

الدوام لله اختيه .. وتسلمين طولي بعمرج..
كان اسبوع كئيب لكن الحمدلله ع كل حال ..


حياكم..

أحسن الله عزااااج أختي المزيووونه\
والبقية بحياااتكم
..
الله يعينكم ويصبركم .. ويكتبلهالأجر ان شاء الله في العشر الأواخر

i'll read it and i'll came back

.
.
.

هواجيس مشتاق

الدوام لله اخوويه.. اميين ان شاء الله..


فنجان قهوه

Waiting u

.
.
.

الجزء الثالث والعشرون

***********************
(الثلاثاء) 1 فبراير 2005
***********************

من بعد حوار مطول بين عليا وراشد اخوها صار من يومين .. قرر اليوم راشد انه يسير يشوف سيف بدون سابق انذار.. دخل على مكتبه فالشركه من عقب ما دق الباب..

راشد: السلام عليكم
سيف وهو متفاجئ لها الزياره: مرحبا الساع وعليكم السلام شو هالمفاجاه
راشد: اشحالك بومايد ؟
سيف: الحمدلله استريح استريح .. اشحالك انته ؟
راشد: بخير وسهاله ..
سيف: وين دارك يا راشد..عنبو ما شفناك من نهار العيد..
راشد: ياخووك تحيد عاد .. الشركه والاشغال والعزبه .. كلن يبا مجابل..
سيف: الله يعينك يا ريال.. اقرب اقرب..

ويلسوا ع الغنفات اللي ع طرف .. وبدوا ياخذون علوم بعض ..لين ما فتح راشد الموضوع اللي ياي عشانه ..

راشد: عاد يا سيف انا ياينك وعندي رمسه..
سيف وهو مستغرب: خير ان شاء الله
راشد: بناتك مطرشيني لك
سيف استغرب أكثر: بناتي؟ بخصوص شو ؟ يبون يرجعون لامهم ؟
راشد: لا .. شوف يا سيف .. انا عيزت وانا اقولك احترس وحافظ على بيتك وعيالك .. ضيعت عليا ولاتضيع الباجين ..كم مره قلتلك سواياك هاي يوز عنها لاكنك ماطيع الشور .. سنين وانا احايل وياك .. والحين اتحمل اللي بييك عاد

سيف نش من مكانه وهو منفعل من الرمسه هاي .. ماعرف شو مقصد راشد من ها كله .. تعود يسمع منه ها الكلام .. لكن ها المره شكله الموضوع أكبر ..

سيف : شو مستوي انزين..شو الساالفه خبرني.. ليش تقول ها الرمسه الحين؟!
راشد: يا سيف عيالك دخلوا الميلس اللي برع .. وشافوا سواد الويه اللي اهناك

سيف انصعق من الرمسه اللي يسمعها .. جنه حد صب ماي بارد عليه .. ماقدر يتم واقف يلس محله وهو يطالع راشد بنظره مهزومه ..

سيف: دخلوا الميلس!! كييف؟
راشد: شو كيفه بعد .. من الباب بعد شقى بيدخلون..
سيف: انزين انا دوم اقول للبشكار يقفله
راشد: لابد انه نسى .. المهم مب موضوعنا قفل الباب .. بناتك عرفوا يا سيف
سيف بتوتر: منو منهم اللي عرف؟
راشد: جاسم اللي فتح الميلس بس ماعرف شو اللي داخل ..ماستوعب يعني ..ريم وساره ومي يوم دخلوا وراه شافوا وعرفوا .. وخبروا امهم .. ها الثلاث الي عرفن .. اما الباجي مادروا بشي ..

سيف ماكان قادر يتخيل الموقف .. بعد ها السنين من الستر .. انكشف وضعه جدام عياله .. شو بتكون صورته .. كيف هي نظرت عياله الحين صوبه؟؟ هو ماصدق على الله انهم يردون وياه عادي .. والحين !
قام سيف من مكانه وسار صوب المكتب .. خذ كوب الماي الي موطاي وبدى يرشفه .. يبى يبلل ريجه الي نشف من ها الخبر .. لف على راشد وهو يترياه يرمس يقول شي ..

راشد: ها يا سيف..
سيف: راشد.. شمعنى الحين يايين يشوفون سوايا ابوووهم!!!
راشد: يا سيف السر ما يتم مدفون طول عمره.. وانته الله يهداك يوم اخترت تسكر اخترت ميلس البيت .. بناتك كبار وفاهمات .. الا ما ايي يوم ويقولن ها الميلس شو خانته فها البيت .. الا ما ايي يوم ووحده منهن تقول بسير انظف الميلس بشوف شو فيه.. محد حط فباله انه جاسم بيسير يشوفه وبيكشف سرك اللي هدمت فيه بيتك وخسرت فيه ام عيالك ..
سيف: والحل يا رااشد
راشد: الحين خبرني كيف صورتك بتكون جدام بناتك ؟؟ هاا؟؟ عيزت وانا ارمسك قلت لك كم مره تحتذر .. لكن يوم يفوت الفوت ماينفع الصوت ..

تجدم سيف من راشد ويلس حذاله .. سند راسه بقبضة ادينه اللي كانت على ركبه
سيف: لا تزيدني يا راشد.. قولي شو الحل الحييين!!
راشد: ودر عنك هاللعبان ياسيف بسك عاد انته كبرت وبنتك عرست وباجر بتستوي يد .. لين متى بتم جيه .. كافي اللي ضيعته ياسيف..
سيف: شو تباني اسوي؟
راشد: عمال مقاولتيه بيونك السبت .. بهش الميلس كامل .. لانه لو خليته في كل لحظه بيتراولهم انه في شي حتى لو ماكان فيه شي.. ولو تم الميلس بيتمن البنات حاطات فبالهن انك بعدك تشرب..
سيف: بتهشه
راشد: هي بينهش.. الميلس ما بيتم يا سيف دام بنات اختيه فالبيت ..تربن فبيت نظيف خلهن يكملن حياتهن فبيت نظيف..
سيف: زين زين .. لكن البنات .. كيف اجابلهن ..
راشد: من سواد الويه ما بتروم تجابلهن
سيف: راشد بسك عاد .. اقصد كيف اقولهم .. كيف افاتحهم بالموضوع
راشد: تبى ترمسهم يعني ؟
سيف: لا لا شو بقولهم ..
راشد: خلاص يا سيف.. يوم انته بتشل الميلس بيعرفون بروحهم انك فهمت ويمكن يتحرون انك تغيرت..
سيف: هزرك؟ عيل يبالي اخذلي شقه ..
راشد: اسميك ما توب تحمل سواياك عاد
سيف: ياراشد لاتزيدني انته بعد
راشد بتأمل: خلاص يا خويه ودر عنك ها العلوم
سيف: شو ترمس انته .. حاولت تراني من قبل بس ما رمت..لكن الحينه الحمدلله خفيت.. احسن عن قبل ..
راشد بتضجر: كيفك عيزت منك انا مليت خلااص.. يالله اسمحلي انا بتخرص
سيف: وين؟
راشد: بسير البنك عندي شغل .. لاتنسى عمالي بيكونون عندك السبت ..
سيف: ماعليه ..
راشد: يالله فمان الله
سيف: يالله مع السلامه

طلع راشد من عند سيف وهو يدعي ربه انه يقدره ويخلي سيف يبطل ها العاده .. حاول وحاول وياه قبل لكن ما قدر .. والحين من بعد ماعرفن بنات اخته الماضي ما هانن عليه يتمن جذه .. لازم يتم ورا سيف ..

****

الظهر رجع سلطان من دوامه وتغدى ويا امه وابوه واخوانه.. وعقب الغدى خليفه نش عنهم وسار مكتبه اللي فالبيت.. اما منصور ياه فارس وركب وياه وساروا يهيتون.. وابوهم طلع يرقد ومحد تم غير سلطان وامه فالصاله ..

شيخه: فديتك قوم سير ارقد مارقدت من الفجر
سلطان: اخاف ارقد ومانش لصلاه العصر .. بصلي وبرقد
ابتسمت شيخه وهي تحمد ربها في خاطرها: ربي يباركلي فيك
سلطان وهو يتذكر شي: هيه صح امايه..
شيخه: ها ابويه
سلطان: انا ناوي على شي..
شيخه وهي تتطالع ولدها: خير
سلطان: كل الخير ان شاء الله..انا ناوي اكمل دراستيه.. بخذ الثانويه وبكمل..
شيخه ابتسمت لولدها بكل سرور: احسن لك يا بويه انته شاطر ومخك نظيف .. والثانويه احين سهلوها هب شرات قبل .. بتنجح ان شاء الله
سلطان: بقدم عليها من السنه اليايه .. هالسنه ضاعت عليه مابيقبلوني .. وعقب الثانويه بقدم على كلية التقنيه
شيخه: صدق والله ؟
سلطان وهو يراقب الدهشه على ويه امه ويرد عليها وهو مبتسم
سلطان: هيه صدق ..
شيخه: وشغل خالك ؟
سلطان: بشتغل عند خالي الصبح وبدرس العصر في التقنيه ..
شيخه: الحمدلله رب العالمين الحمدلله .. الله يوفقك فديتك ويطرح فيك البركه
سلطان: امين .. امايه
شيخه: ها فديتك
سلطان: امايه افكر عقب ماخذ الثانويه اعرس وعقب اكمل دراستيه فالتقنيه .. شو رايج؟!
شيخه : تعرس؟ هاي الساعه المباركه فديتك ليش لا .. معاشك عند خالك بيسدك لين تاخذ الشهاده وابوك بعد مابيقصر عليك فشي..
سلطان: انزين يالله عاد انتي شغلي رادارج و دوريلي الحرمه
شيخه: فالك طيب يوم بسير اعراس الفريج بطالع زين ..
سلطان: لا امايه
شيخه: لاتقولي في حد في بالك
سلطان: لا حشى .. بس انا مابا الا من الاهل
شيخه: منو تبى ؟
سلطان: ماعرف أي حد المهم من اهليه
شيخه: انزين حتى بنات ها الفريج نعرفهم ومن قرايبنا..
سلطان: لا امايه..
شيخه: ليش؟
سلطان: ما اثق ببنات من برع .. بس امايه انتي شوفيلي أي وحده ترتاحيلها وتكون من الاهل ..
شيخه: فالك طيب الغالي .. البنات موجودات ..
سلطان : يالله عيل بسير انا شوي بطالع علوم الكمبيوتر لين الاذان .. فمان الله
نش سلطان وحب امه ع راسها
شيخه: فمان الكريم

سار سلطان وتمت شيخه تحمد ربها على هذي النعمه .. وتفكر في البنت اللي بتخطبها لسلطان.. بنت خاله عرست .. والباقين صغار .. وبنات اختها .. عرست وحده والثانيه انخطبت رسمي .. ماتمت الا مي .. لكن هاي بعد راشد قايل يباها لفارس .. واحلام! يلست شيخه تحسب الفرق بين سلطان واحلام ..
7 سنين ! محمد بيشوف بنته صغيره على سلطان ..
الله بيسرها لين ذاك اليوم ..

****

العصر فجناح بنات سيف .. كانت مي يالسه فالصاله وتجلب مجله فايدها .. وتسمع العزف الصادر من حجرتها .. وطت المجله وسارت متملله عند ساره .. دخلت عليها الحجره ..

مي: سويره

لكن ما من مجيب .. سارت مي وبندت الكهربا عن ساره .. طالعتها ساره وهي معصبه..
ساره: لييش؟
مي: ازقرج ما توايبين .. جي بتعامل وياج غير مره يوم برمسج بمجع الفيشه اول
ساره: جلبه
مي: جلب ريل بيظويج ..
ساره اطالعت مي بنظره: بقوله
مي باستهزاء: زايغه منه ..
ساره: ميوه فكيني شو تبين؟
مي: انا ماخلصت اغراض الجامعه .. ابا اسير اخذلي بدل بعدني
ساره: بسج الاسبوع اللي طاف مشترين
مي: لا ما يكفي .. ابالي بعدني كم بيجامه وكم بدله ماخذت وايد ..
ساره: انزين قولي لابوج
مي: عفواا
ساره وهي تطالع مي: هي قولي لابوج .. جيه بنتم محاربينه نحن !!
مي: لاوالله
ساره: اميه بروحها قالت لا تغيرن على ابوكن ..
مي: انزين ادري .. بس انا مب عارفه ليش من اشوفه .. اتذكر اللي خبرتنا عنه امايه واتخيله وهو يضرب ريم .. احس ماروم اشوف شكله حتى .. ماحب ارمسه..
ساره: ميوه .. الماضي مضى خلاص.. وانتي بروحج تشوفين كيف ريم الي هي ريم ماتواطن الرياييل عادي الحين ويا ابويه ..
مي: ريم مب عايشه الحين ويانا فنفس البيت.. وبعدين ريم من يينا ها البيت وهي مواقفها ويا ابويه معدوده.. ماندمجت وياه كثرنا نحن الي خذنا وعطينا وياه
ساره: ميوه بسج انزين هذا ابوج لاتمين شاله فخاطرج عليه .. بيتم ابونا وحايتنا عنده ..
مي: هذا هو .. ماتبينه الا للحايه .. والله انج انتي مافيج احساس
ساره: ميوه انتي يايه تسولفين ولا تعطيني محاظره ف الادب والمشاعر .. ترمسون عني جني انا انسانه مافيها قلب ماتحس وماياثر فيها شي .. لازم يعني ابين لكم شكثر انا متأثره؟ انا اشوفني اعقل منكم من جيه ماخلي شي مثل هالاشيا تاثر ع حياتي دام انها مضت واهلها نفسهم ماعادت تعنيلهم الكثير .. انا عادي عندي ..
مي: افف .. خلاص دام عادي عندج .. قوليله انه نبى نسير السوق .. ابا اخلص اغراضي ..
ساره: توه انا الي ماباه الا للحايه.. ها اخت مي ..
مي: جب جب .. والله انا مافكرت بها المنظور .. وطلباتي ماتي شي حذال بحر طلباتج..
ساره: اف..ماعليه يوم بشوفه خلاف بقوله ..

طلعت مي من عند ساره اللي ردت لمعزوفاتها وانغامها.. نزلت تحت تشوف الباقين شو يسون .. حاولت تلملم فبالها صورة ابوها اللي تكسرت.. وايد ناس لهم ماضي شنيع لكنهم عدلوه وكسبوا احترام الناس.. لكن ابوها بعده فدنياه لاهي .. تم قلبها معورنها عليه .. ماتباه يتم جذيه ..
تذكرت سلطان ولد خالتها .. كان الكل كارهنه على افعاله معقوله كان له سوابق نفس ابوها .. لكن الحين هو شخص ثاني الكل يحترمه .. دعت من كل قلبها انه الله يهدي ابوها شرات ما هدى سلطان ..

يلست فالصاله .. كانوا مايد وجاسم مخلين الصاله فوق حدر من كثر ركيضهم ولعبهم .. يتفاررون بالخداديات اونهم يسوون حرب .. ومي كل شوي اتيها ضربه ع راسها بالمخدات ..

مي: ميووووود جسووم .. اصطلبوو
مايد: هههههه والله ها جسوم بدى .. ما يخصني
جاسم: انا بديت.. ولد امك انته .. اندووك ها

يت المخده ها المره على ويه سيف اللي كان توه داش الصاله .. تم جاسم واقف متيبس .. كيف ظهر ابوه فجأه فالصاله .. ومايد يطالع جاسم ويرد يطالع الابو .. مي اللي كانت يالسه ع الغنفه وتتطالعهم ليش صخوا .. لفت على ورا لمحل انظار مايد وجاسم وشافت ابوها ماسك الخداديه فايده ومعقد حياته ..

سيف: شو ها اللعبااان ها
جاسم: ها .. ماشي ماشي كنت اروغ ذبابه ملعوزتي
سيف: ذبابه هاا
مي ماقدرت تكتم ضحكتها وظحكت ع الخفيف ..
سيف: شو مسوين انتوا هنه .. والله لو تشوف ناعمه بطيح واقفه.. خربتولها البيت.. قوموا يلا عدلو ..
مايد: انزين ابويه بنعدل كل شي الحين ..
سيف: مي انتي يالسه وساكته عنهم

مي اطالعت ابوها وسكتت .. مسكت مجلة الشعر اللي يايه هديه ويا مجله ثانيه وتمت تجلبها وتقرى فيها .. سيف تنهد وسكت عنها .. ويلس مجابلنها ..
مي تمت تقرى مندمجه وطاحت عينها ع قصيده وايد استانست عليها.. وابتسمت ..

سيف: ها شو قريتي ..
مي: لا ماشي ..

قامت مي وهي قابضه المجله .. ووجهت كلامها لمايد وجاسم اللي يالسين يرتبون..

مي: نظفوا زين من بعد ها المزبله .. الحين امايه بتي تيلس هنه شلو المخاد من ع الارض عن تعثر بهن
جاسم: انزين انزين ..حشرتينا

طلعت مي من الصاله وهي مخليه وراها ابوها فحيرته .. وصعدت فوق وهي تركض.. دخلت جناحهم وع طول توجهت لساره ..

مي: ساروه ساروه ساروه
ساره: ها ميوه ميوه ميوه .. تعلمتي الدرس اشكر فنج
مي: هههه سخيفه
ساره: بلاج مبسوطه توج ظاهره من عندي متغصصه!
مي: ماشي غيرت جو ويا العبايط جسوم وميود وييت
ساره: زين والله .. الحمدلله مزاجج بسرعه يتحسن انتي ..
مي: سخيفه.. انزين شوفي .. اقري ها القصيدة ..
ساره: افف يتنا بقصايدها..بس هلكتينا من الشعر
مي: اقري اقري انتي ..

قبضت ساره المجله وتمت تقرى .. لكن مي ماعيبها القاء ساره ومطت منها المجله وبدت مي تلقي الشعر بكل احساس..

"مـن كـتب الحب العتاق ؛؛ وتاريخ الفراق
وســتـايـر الــدمـع الــرقـاق
جـمعت قـلبي غـبار ؛؛ وقـطع فخار
ومــن عـلـى الـمـرمر الـبـارد
ومن ما نسته النار ؛؛ من غيمي المحروق
وحملت عيوني وركبت أول سفينه تبحر
عـلى وجـهي الاصفر ؛؛ خريفٍ طال
وســـلال مـــن رذاذ ومــلـح
وفـي صـدري حـجارة نسيوها بحاره
مــــروا عــلــي ف يـــوم
وقـالوا تـعال مـعنا ؛؛ وما كان يجمعنا
إلا الــضــيــاع والـــريــح
راجـع مـن الايـام ؛؛ مـن الاحـلام
ومـن الـف سـناره ؛؛ مغروسة بقلبي
لـقيت لـي بشارة ؛؛ ما اغلى عطا ربي
أثـر الـعمر ساره ؛؛ وموج البحر ساره
وكــــل الــمــدى ســــاره
سـافرت كل العمر ؛؛ وراجع احب سارة "

ساره وهي مستانسه حدها: راجع احب ساااره .. الله الله .. يااسلام .. وقوووف .. تصفييق ..
مي: هي هي .. توج تلومين ام الشعر
ساره: عجييبه ميووه
مي: هاي كلمات الامير بدر بن عبدالمحسن ..
ساره: تخبريني انا عن الشعرا .. ماعرف ماعرف .. المهم عيبتني
مي: يلا يلسي لحنيها وغنيها لنا ..
ساره: خخخ يبالي والله .. خلاص فضولي جو بيلس الحن
مي: مالت عليج .. صدق صدق ساروه عن يكون تحرين عمرج..بتهوفن..لا لا خلنا من هذيل.. عن يكون تحرين عمرج محمد عبدو ولا فايز السعيد ..
ساره: عدااال عاد يا نزار قباني
مي: ههههههههه ويا ها الويه ..

وتمن الخوات كعادتهن يسولف ويتضاربن وينكتن ع بعض.. ساره التهت باللحن اللي تبى تألفه ومي تتطالعها وتعطيها مقترحات .. وكل شوي يصرخن فويه بعض..
وتستمر الحياه عندهم .. عادي ..


****

الساعه 10 ونص فليل كان نايف يالس ويا ريم في غرفتهم ويسولفون عن ذكرياتهم ويا بعض .. وكل شوي يتذكرون سالفه استوت قبل ويضحكون .. تذكر نايف الصور اللي عطنه اياهن خواته ويابهن لريم وتموا يعلقون ع الصور..
و شوي اندق الباب عليهم .. وطى نايف الصور من ايده ع الطاوله..

نايف: منو ها
ريم: ماعرف اطالع
نايف تجدم من الباب: منووو
نوره: انا بطل الباب
نايف: ههههه شو تبين ؟
نوره: بطل الباااااب
نايف بطل لها الباب: نعم
دخلت نوره ببجامتها وسارت على طول عند ريم وطاحت ع السرير
نايف: لحظه.. شو وكاله من غير بواب وين تبين ؟
ريم كانت تظحك وهي لاويه على نوره
نوره: برقد عندكم
تجدم نايف منها: نعم ؟ منو قال
نوره: انا ابا ارقد عند العروسه
نايف: يالله يالله قومي سيري عند امج..هاللي ناقص
نوره وهي متمسكه بريم: مابا مابا برقد اهنه
نايف: قومي نوروه سيري عند ماماه يالله تعالي باجر
نوره صاحت: مابا ابا اتم انا هنه
ريم: ماعليه نايف خلها حليلها
نايف: لا .. بتعيبها السالفه وكل يوم بتي
ريم: انزين انته خلها برقدها وشلها ودها
نايف: اوف انزين ..
نوره: انزين ليش انته تقول اوف
نايف: عشان انتي غصصتيبي
ريم: ههه حرام عليك
نوره عقدت حياتها وهي تتطالع نايف ..
نايف: ها بلاج ..
نوره: انزين انته ليش تحب ريمان ماتحبني
ريم: ههههههه ويه نواري شو ها الاسئله
نايف: حبيبي انا احبج واحب ريم .. زين جي
نوره: انزين ليش تحب ريم
ريم: عاااد نواري واسئلتها
نايف اطالع ريم وابتسملها ..
نايف: احبها لانها حرمتي
لفت نوره على ريم وضحكت بدلع ..
نايف: ياربي انا كيف اموت على ها البنت

وبدى يتحرش نايف بنوره ويقرقطها ع بطنها وهي تضحك .. مالقت مفر من نايف غير حضن ريم .. تمت لاويه عليها وريم تمسح ع راسها .. نايف ابتسم لريم وهو يتخيل شي ثاني .. يتخيل الياهل اللي بيملي حياتهم فرح .. لف ع الابجوره وسكرها وتغطى باللحاف وهو يدعي من ربه انه يرزقه بنوته شرات اخته ..
وتم فكره سرحان .. وريم اطبطب على نوره تباها ترقد ..
كسر الهدوء وسألها..


نايف: ريمان هالكورس عندج تدريب صح ؟
ريم: هيه
نايف: وين ؟
ريم: ماعرف وين بيودونا بس انا قايلتلهم مابا مكان فيه وايد ريايل
نايف: هيه احسن هاللي كنت بقولج اياه
نوره: اوف اسكتوا وايد حشره انا ماقدر ارقد
ريم: ههههههه
نايف: بجتلها انا هاي
ريم: اسكت عنها بترقد احين
نوره: نايف مافي مكان سير ارقد ع الارض
نايف: والله انج ماتنعطين ويه
ريم: خلها بترقد اصلا هي مسطله اسكت عنها انته بس

سكت نايف وتمت ريم تقول لنوره قصه وتسمح على شعرها لين رقدت .. تمت تتطالعها ريم وباستها ع يبهتها .. و زقرت ع نايف تقوله انه نوره رقدت عشان يشلها ويوديها عند امه..صدت عليه ولقته هو الثاني رقد .. ابتسمت .. وسكرت الابجوره عشان هي بعد ترقد ..

بعد مرور شهر وعشرة ايام

*************************
(الخميس) 10 مارس 2005
*************************

اليوم من تسع الصبح البنات ناشات من رقادهن .. طبعا بينشن من وقت .. وراهن سيرة لبيت امهن يقيلن فيها لين فليل .. بعد ما تجهز الكل نزلوا تحت يتريقون
ام سيف كانت يالسه وتعدل جلابيه جاسم الطويله بمكينة الخياطة.. من قبل كانت ام سيف تحب تخيط لكن مكينتها من اختربت ماردت اتصلحها .. والحين البنات خذلها وحده يديده ويابوها لها عشان تتسلابها .. وقامت ام سيف من تشوف شي فالكنادير مب عدل بروحها تعبلت وعدلت.. سلمن البنات ويلسن فالصاله محاوطات بامهن يتريقن ..

ساره: حشى حشى الواحد ينش من الصبح ع تقرقيع هالكيرخانه
مي: ولا في بالج هي ..ولا تسمعج
ام سيف: اسمع اسمع جيه ماسمع
ساره: ههههههه امايه شو تبينها هالمكينه الخيايط مكودين
ام سيف: لو مب هالمكينه انا ماعيشت ابوكن وعمتكن عقب ما مات أبوهم
مي: ليش يعني ؟ يدي ماخلف شي
ام سيف: خلف النا البيت بس والا غيره ماكان عندنا .. قمت انا اخيط وافصل وابيع عقب طلع لي ورث ابويه ماكان وايد لكني طرشت به ابوكن مصر يدرس .. والا مريم من استوى عمرها 15 يوزتها .. مارمت ع المصاريف .. لين اتخرج ابوكم والحمدلله يانا الخير
ساره: قصة كفاح هاي
ام سيف: عيل مثلكم يانا كل شي ع البارد .. انا يوم مات يدكم بعدني بنت 23 سنه..
مي: ويه امايه وايد صغيره كنتي
ام سيف: هيه لكن شو نسوي
ساره: انزين امايه .. كيف توفى يدي !
ام سيف غمضت عينها لها الذكرى الأليمه وطلعت صوت تنهيده تدل على بعد الذكرى وبعد ذاك الزمن اللي ولى ...
ام سيف: يدكن كان يسقي الزرع ومسك الديلمه مال الماي وايده خرسانه .. مسكته الكهربا .. وصار اللي صار .. كان يومه ..رحمة الله عليه
مي بأسى: الله يرحمه ان شاء الله
ام سيف: الله يرحمه ويغمد روحه الجنه..كان ونعم الريال
ساره: انزين امايه انتي ماعندج اخوان والا خوات ؟
ام سيف: لا ماعندي انا ربيت بروحي لكن يدكم عنده اخوان
ساره: عمومة ابويه يعني ؟
ام سيف:هيه لكن كلهم ساروا بوظبي من سنييين وماعاد حد منهم اهنه
مي: مايونكم ؟
ام سيف: لا مايون توفوا وعيالهم مايعرفونا ذاك الزود
ساره: اها والله سالفه .. ميوه صبيلي حليب
مي: بسج خلص الحليب
ام سيف: دقوا جرس لنجموه تسويلكم احين بينش ابوكم بعد بيقول يبى حليب..
مي : انا بسيرلها.. ايه cut cut .. لا تكملون السالفه لين ما ارد ..
ام سيف: ماشي سالفه يا امج .. قلتلكم كل شي
مي: هي زين .. بسير اودي الدله

نشت مي وسارت صوب نجمه في المطبخ اللي كانت يالسه تتريق وتتسمع الراديو

مي: نجموووه ..طحت عليييج شو تسويين
نجمه قفزت وهي تلتفت ع ورا بسرعه تشوف الي عند الباب..
نجمه: مافي فايده هذا بنت .. كم مره انا يقولي سوي شوي شوي كلام انا في خوف
مي: ماتعولين .. اقولج هذي دله الحليب سوي زياده حليب
نجمه: انا سوي اثنين مره الحين
مي: انزين برايه سوي زياده انتي ثره شو عندج من الشغله غير ميلسه وتسمعين هالرادوو وتزطين ..
نجمه: جين جين..مافي سوي حشره..

يلست مي تغصص ع نجمه لين خلصت الحليب .. وشلت وياها الدله .. رجعت الصاله ولقت ابوها يالس ع الطاوله يتريق.. حطت مي الدله ع الطاوله وما تكلمت
وقبل لا تلف وقفها سلام ابوها ..

سيف: صباح الخير
مي: صباح النور
سيف: منو مسوي الحليب انتي والا نجمه ؟
مي: نجمه
سيف: يالله قلت بنتي بتشربنا من دلتها..
تحركت مي عشان تروح تيلس ويا خواتها لكن ابوها زقرها
سيف: مي..وين سايره يلسي تريقي
مي: تريقت
سيف: انزين يلسي بسولف وياج
مي يلست ع الطاوله ويا ابوها وهي تتحاشى تطالع في عيونه ..
سيف: اخبار الدراسه ؟
مي: زينه
سيف: شو معدلج الكورس الاول ؟
مي: الحمدالله..
سيف: هاا ابا امتياز انا
مي: ان شا الله خير
سيف: بتسيرون عند امكم ؟
مي: هيه
سيف: بتريق وبوديكم
مي : ريم بتخطف علينا

سيف سكت عن مي ها حالها وياه من فتره طويله من ذاك اليوم المشؤوم بالنسبه للبنات وسيف.. قامت مي تتحاشى اليلسه وياه في مكان واحد .. او ترد عليه باجابات مختصره .. ريم اوريدي كان تعاملها ويا ابوها عادي.. وساره ما بينت شي لابوها .. لكن ردة فعل مي مب قادر سيف انه يبلعها.. تخليه يحترق من حقرانها له.. الميلس وانهش .. ومن يومها وهو يحاول يكسر الصمت الي صاير بس مي تصده ومب قادر الها .. شو ممكن يسويلها مايعرف!

بعد ما رد الهدوء يعم ع الطاوله بينها وبين ابوها .. شلت مي بعمرها وترخصت من ابوها وسارت تيلس حذال سارة اللي كانت يالسه تقرا جريدة اليوم بانتظار ريم اختهم اللي قالت لهم من امس انها بتمر عليهم وبيروحون عند امهم ..

مي: اتصلي فريم شوفيها ..
ساره: بنأذيها الفقيره كم مره متصلين
مي: انا بدقلها ..

شلت مي تيلفونها واتصلت بريم ..

ريم: اليوم متنشطات واعيات من وقت انتن ..
مي: هي نبى نسير يلا قبل ابويه ما يرد لاقتراحه
ريم: أي اقتراح
مي: قال توه بيودينا قلتله ريم بتودينا
ريم:اها.. لا ماعليج.. احين بنش بتلبس
مي: انتي بعدج مااانشيتي
ريم: خذتني رقده .. نايف مادري من متى ناش .. بتلبس وبنزل اشوفه
مي: يلا استعيلوا
ريم: اوكي..


سكرت ريم التيلفون وطته ع جنب .. وقامت من نومها بتثاقل . طلعت ثيابها من الكبت ودخلت الحمام تتسبح .. تلبست ويلست جدام التسريحه تمشط شعرها.. جحلت عينها ع الخفيف وحطت بودره خفيفه .. لبست عباتها وشيلتها وشلت شنطتها ونزلت تشوف نايف..
لقته يالس فالصاله بجلابيته مال النوم .. استغربت ليش للحين مالبس..

ريم: السلام عليكم
مريم: وعليكم السلام
نايف صد على ريم واستغرب انها بشيلتها وعباتها ! وين بتسير!
نايف: هلا ريمان وين سايره!
ريم: نايف كيف وين سايره اكيد عند اميه .. ليش انته مالبست للحين !
نايف: انا مادريبج بتسيرين الحين .. انا كنت
وماكمل كلامه لانه تلفون ريم قاطعه
ردت ريم على ساره اللي كانت متصله فيها: الوه .. ها ساره .. جاهزين انتوا؟ خلاص انزين انا جاهزه جيه 10 دقايق وبمر عليكم .. يالله مع السلامه

كان نايف يسمع كلامها ويا اختها .. ترمس كأنها مخططه للسيرة من قبل ..
ريم: يالله نايف مابتتلبس؟ خواتي يترين عشان تودينا اهناك
نايف : انزين خلهن يسيرن ويا الدريول انا بوديج فليل
ريم: لا عاد انا قلت لهن الحين .. وهن يترينا
نايف: ريم ماروم الحين ..
يلست ريم حذال نايف ..
ريم: كيف ماتروم من امس تراك قايللي بتوديني اليوم..وانا قلت لخواتي عساس نحن بنمر عليهم ..
مريم: قم ابويه يوم انك واعد حرمتك ..
نايف اطالع ريم وابتسم من ورا خاطره : ماعليه ..


نش نايف من مكانه وصعد غرفته .. يبدل ثيابه وهو متظايج من هالوضع .. لكنه ماحب يحرجها جدام امه .. هو صح متفق وياها يوديها عند امها .. لكن ماحددوا الوقت .. كيف تصرفت جي على هواها !!
الخميس اجازته وياها لكنه مايقضيها وياها .. ما عيبه ها الحال ..
سكت عن السالفه ولبس ثيابه عشان يسير ياخذ بنات خاله ويوديهم بيت امهم
طلع من قسمهم ونزل تحت وهو فايده سويج السياره يفره ويمسكه فايده .. وقف عند باب الصاله .. زقر ع ريم عسب تقوم .. نشت حبت عمتها ع راسها ولحقت ريلها .. ركبوا السياره .. ونايف قام يسولف وياها ويتجاهل أي مشاعر استياء تنتابه .. وصلوا بيت سيف وشلوا البنات وساروا عند امهم ..

اول ما نزلن البنات من السياره شلن اغراضهن وتوجهن لداخل البيت .. اما ريم تمت فالسياره ويا نايف ..

ريم: ما بتنزل تسلم ..
نايف: لا .. يوم بمر عليج عقب بسلم
ريم: همم زين
نايف: متى تبين تروحين؟
ريم اطالعته وهي مستغربه .. يعني تعودت انها ها اليوم تقضيه عند امها .. ليش اليوم شو صاير فيه!
ريم: مب لين فليل!!
نايف: والله يا ريم مادريبج..
ريم: انزين.. أي وقت تباه تعال عادي
نايف: مب اييج الظهر وتضايجين ماتبين تردين
ريم ابتسمت لريلها: ليش ها الكثر ماتروم تفارقني
نايف: حرمتي وماصبر عنها ثواني
ريم: خل عنك
نايف: والله جد ماسولف
ريم وهي يايه بتنزل ..
نايف: بمرج العصر
ريم اطالعته وسكتت ..
نايف: هاا؟
ريم: اللي تشوفه حبيبي
وغمز نايف لريم .. سكرت ريم باب السياره وهي تبتسم له .. اما نايف ريوس بسيارته وطلع من البيت ..

دخلت ريم البيت .. محد كان فالصاله ها المره .. ع طول توجهت لغرفة امها .. شافت امها يالسه وجدامها اوراق تصلحهم .. سلمت ع امها وفصخت عباتها ويلست حذال امها ع الشبريه..

ريم: ليش البنات وينهن؟
عليا: قبل شويه ظهرن .. سارن حجرتهن يعقن عبيهن ..
ريم: اها .. شو ماشالله بديتي تمتحنين؟
عليا: كملنا شهر فالدوام.. يبون الدرجات بيعطون الشهايد..
ريم: هيه.. الله يعينج .. والله التدريس صعب وعباله
عليا: كل شي عشان خاطركم تحملته يا ريم
ريم: فديتج والله يا امايه ماقصرتي موول ويانا..
عليا: عيالي .. لازم مابقصرعليكم في شي.. يوم الله بيرزقج انتي بعد بالعيال..بتحسين كيف الام تبى تضحي بكل شي بس عشان ترسم البسمه ع ويوه عيالها

ريم ابتسمت لامها بخجل .. وعليا تمت تسولف ويا ريم عن امورها العائليه والزوجيه واذ كانت تبى أي نصح من امها تراها مستعده لكل شي ..

شوي طب عليهم جاسم يزاقر ..

عليا: ها ابويه بلاك ..
جاسم تجدم ويلس حذال امه ع الشبريه .. وتم يناقز وهو يالس ..
عليا: جسوم بلاك .. يلس زين
ريم: مايهدى ها فمكان.. لازم يرتبش
جاسم: انزين انزين .. اميه سمعي ..
عليا: ها ابويه .. قول شو تبى
جاسم: خخخ مابا شي ..
عليا: الا جي يعني ..
جاسم وطى راسه وشاف اوراق الامتحانات اللي محطتنهن امه جدامها
يلس وقبض الاوراق في ايده يطالعهن ..

عليا: شو تباهن بتخربط الشعب خلهن
جاسم: بشوف الا .. الاسم: خوله سعيد .. اميه هاي حلوه
عليا: وابويه عليك .. شو تباها حلوه ولا ..
بدل جاسم ع الورقه الي ورا.. وقرى اسم البنت ..
جاسم: كيف شكلها هاي ..
ريم: ههههههه استخف جسوم
عليا: يلا جاسم هات الاوراق
جاسم : انزين انزين ..
قرى اسم البنت صاحبة الورقه الي عقب ..
عليا: ها شو بعد ..
جاسم: لا هاي كسلانه .. ماباها ..
ريم: طاعو انتووو
جاسم متلهف وهو يشوف الورقه الي ورا علامتها كامله ..
جاسم: هاااي اكيد حلوه .. يايبه درجه كامله ..
سحبت عليا الاوراق من ايد جاسم وهي تضحك عليه..
عليا: هههه ها من الحينه عيونك قامت تزيغ
جاسم:ماداني البنات انا .. ماغازلهن .. اسويلهن طااف
وطى جاسم الاوراق من ايده ويا بيطلع من الحجره لكنه تذكر شي ورد..
جاسم: هي صح نسيت ..
عليا: ها حبيبي شو نسيت بعد
جاسم: امج واخوج برع .. قايليلي ازقرج
عليا: ههههههه يدتك وخالك يا الهريم ..
ريم: يالله انزين بني الحين ..
جاسم: كلهم برع .. يتريونكم تلتمون
عليا: انزين يلا .. ها وطينا الاوراق .. قومي ريم ..

طلعوا هم الثلاثه برع فالصاله .. كانوا ام راشد وحفيداتها يالسات ووياهم مانع ..
يلست عليا ع الارض حذال صينية القهوه .. وصبت الها ولامها ولمانع وريم ..

عليا: ليش محمد وعبير وينهم
احلام: سايرين السوق ..
ساره: يالله انا فخاطريه اسير السوووق
عليا: صخي انتي اللي ماتجنعين من السوق.. لو نفجج من اليوم لباجر ما بتشبعين
مي: ههههههه وييو ..
ساره اطالعت مي بنظره وسكتت عنها ..
مانع: يالله بنتيه ميوه ماتتطلب ماتقول تبى شي .. اترياها بس تقول ابا عشان اسويلها ..
عليا: هي امره .. الا مي وساره لاتقول عنهن شي .. كل شي يبنه
مي: هههه امييه دخيلج لا تحاملين عليه.. خلي خالي دام انه متكفل فيني
ساره: انته تبناها يوم انه ماتحق عليها ولا كلمه
مي: شو بدت الغيره يعني
احلام: لا صدق .. عمي مانع كله فصف ميوه .. شو مسوتله ساحرتنه انتي
مانع: هههههههه حليلها ميوه.. تعرفون شو اللي يعيبني فميوه..
احلام: شووو
مي: خالي لا تمدحني وايد .. انني اخجل ..
مانع: لا صدق ارمس.. ميوه انسانه لا لها ولا عليها .. شفافه وايد.. اللي فقلبها ماتروم تجاهله ولو شاله بخاطرها من حد ماتقدر تتصرف وياه ..

مي كانت تتطالع خالها وهي تسمع تعليقه عليها وانتقاده .. سرحت في آخر شي قاله .. وسكتت .. كيف قدر خالها يفسر ها الشي .. صح يعني !

ساره: وينها ميووه
مانع: شو وينها هاذيه ماتشوفينها
ساره: لا تراها شفافه ههااااي

كل اللي فالصاله تموا يضحكون ع تعليق ساره ومانع ماقدر يمسك عمره فر ساروه بتيلفونه وهي تضحك ..
مانع: تمصخرين حضرتج ..
ساره:ههههه اخ رقعتني بها الطابوقه حشى ..

وعلى ضحكهم وسوالفهم .. سمعوا دق ع باب الصاله .. تبطل الباب من بعد ما حطن البنات شيلهن ع روسهم .. دخلت ميره الصاله ونبهت الموجودين انه مروان وفارس بيدخلون ..
وتموا يسولفون ويناقشون امور وايده كعادتهم .. ساره توترت وايد من ها الجو..تحس الانظار عليها .. كل ماترفع راسها تشوف الموجودين ماتبى تحط عينها بعين مروان .. تشوف الكل الا مروان .. ماتلف صوبه ابدا ..
تمت تلعب باظافرها تلتهي بشي ..
ومي كانت حذال مانع تتعبل بتيلفونه .. وهو كل شوي يمطه من ايدها .. شغلت البلوتوث تبى تلقط الموجودين فالصاله .. ومانع يشوفها ويضحك عليها..

مي: شوف شوف .. ارقام بعد ..
مانع: هي انتي هب تشغلين البلوتوث فمكان
مي: يا حسره تيلفوني كحيان مال بنات جامعة العين .. شو تتحرا عندي بلوتوث وكيمرا
مانع: احسلكن انزين ..
مي: لا مايخصني ابا تيلفون يديد .. ها هدية من احلام حق الجامعة وابا ثاني للبيت .. ليش ساروه عندها ..
مانع: توني اقول مي ما تتطلب ..
مي: خلاص الحينه اطلب انا .. يلا هاتلي ..
مانع: هههههههه انزين انزين ..

غيرت مي نيك نيم خالها وحطت " حيوا مانع بن سلطان"

وتمت تلقط اجهزه .. ميزت رقم مروان .. وطرشتله شي يضحك من تيلفون خالها .. استقبل مروان وهو يقرى النك نيم وضحك ..

مروان: مصدق عمرك انته .. حيوا مانع
بس انتبه انه التيلفون فايد مي مب مانع ..
مي: استقبل انته ..
مروان: هههههههه والله انتي حركات
مانع: شو تطرشيله
مي: ماعرف ها فيديو يضحك طرشته .. بنقالي يرقص
مانع: هههههههههه

والكل عيبته السالفه اللي بدتها مي وقاموا يراسلون بعض بالبلوتوث ويسولفون وهم ينكتون ع نيك نيمات بعض .. ومي كل شوي تغير نيك نيم خالها باسم يظحك .. وتم ها حالهم لين اذن الظهر وتفرقت اللمه للصلاه.. قبل ما يظهر مروان .. لف على ورا .. بعدها محافظه على هدوءها ويلستها .. ترمس ع الخفيف بس .. كل البنات ملاحظات حياها .. موقفها لايحسد عليه.. لكن مروان ماتمنى ها الشي .. يباها ع طبيعتها .. يباها تسولف .. يبى يكسر الحاجز هذا .. تنهد وظهر برع البيت..
عقب مارجعوا من الصلاة تغدوا الريايل وعقبهم الحريم وكل حد سار في صوب ..
مانع سار العزبه ويا محمد .. عبير دخلت ترقد . وريم سارت الغرفه تسولف ويا امها اللي رجعت تكمل تصحيح الاوراق.. مها ومهره ومديه كانوا في غرفتهم
واللي بقوا في الصاله ..ام راشد وشيخه وميره.. ووياهم مي وساره .. ومروان فضل انه ييلس وياهم دام انه الصاله خلت من اللمه القبليه ..
كان مروان متساند ع الغنفه وقابض جهاز التلفزيون فايده ..
ومي قابظه عدة ترتيب الاظافر وتعابل ظفورها .. وساره قابظه تلفونها وتلعب فيه..
اما ام راشد و شيخه وميرة فيسولفون..

مي: مروان افتر راسي اثبت لك ع قناة ..
مروان: مافي شي يتشاهد فالتلفزيون ..
مي: ها مروان .. صبر صبر رد ع هالاغنيه
مروان: أي وحده ؟
مي: توه خطفت عنها.. في نجووم

رد مروان ع قناة نجوم وكانت الاغنيه اللي تباها مي اغنية حمد العامري.. احبك لو بعيد الدار ..

مي: ياسلام بس خلها
ابتسم مروان لمي اللي تمت تتطالع الفيديو كليب.. رفع راسه صوب ساره ع السريع يبى يشوفها شو تسوي .. كانت مندمجه فالتلفون .. شو يعني تبى تتهرب من الاجواء ولا مب قادره انها ترفع راسها ..
مروان مب ناوي يعدي ها اليوم على ساره ..
يت فباله فكره وهو يسمع الاغنيه طويله بعض الشي لكن يبى يغير جو.. وع طول طرش مسج لساره..
وصل المسج لساره وقرته " انتبهي للمسجات ع التلفزيون"
ارفعت ساره عينها للتلفزيون بينما كانت تنقل نظرها لمي والتلفزيون عشان تتاكد من انشغال مي اللي كانت تتسمع الاغنيه وترتب اظافرها ..
شوي وانعرض المسج ع الشاشه ..
" غلاج في خافقي تحت الضلوعي يا ساره"

ساره تمت متلومه وهي تقرى ها المسج ومروان يالسه فنفس المكان اللي هيه فيه.. محادثتهم من تحت لتحت ولا حد حاس باللي يصير .. تشجعت انها تكمل ويا مروان .. وبحركه لا اراديه منها رفعت راسها طاحت عينها بعين مروان وعلى طول لفت ع التلفزيون وكأنها تبى تقوله كمل قراية المسجات..
قبضت تيلفونها وردت على مروان من نفس مقطع ها الاغنيه وطرشت المسج ع الرقم المعروض..
" مروان.. عسى الأيام مني يقربنك فلا يبقى لها الفرقى رجوعي"

ابتسم مروان للي قراه ابتسامة واحد مب مصدق اللي يصير.. اما ساره من بعد ما طرشت المسج وهي تحس بألم فمعدتها من كثر الفشله.. اول مره تتجرأ تسوي ها الشي .. لا وجدامه .. شلت بعمرها تبى تدش داخل .. تتوارى عن نظرات مروان اللي توترها ..
مي: وين سايرة؟
ساره: بسير شوي الحجره
مروان فهم انه ساره استحت لكنه ها كله مايهمه .. يهمه اللي سوته .. البادره الطيبه منها اللي بردت على فواده المتشفق ..
سارت سارة عنهم وتم مروان يراقب تحركات ساره لين ما دشت .. ومي تشوفه وتضحك عليه ..
مي: ايه بو الشباب.. نحن هنا
مروان: ها
مي: خخخ لا ماشي..
مروان ضحك وهو مفتشل..
مروان: يالله عيل انا بقوم بسير بعد

قالها بس الحريم ما سمعنه من كثر السوالف الي عندهن ..لكن مي ردت عليه..

مي: ايلس يا غبي بيقولون من روحت ساروه روح هو بعد
مروان: انا غبي
مي: هيه نعم
مروان: خاطري اظربج بها الريموت ع راسك
مي رفعت راسها: بشخط لك ويهك بها المسحت
مروان: خيبه مجرمه
مي: هيه عيل شو تحرى
رفع مروان تيلفونه واتصل فسلطان يشوف وين هو ..
مروان: هلا سلطان .. الحمدلله اخبارك انته ؟ انا اهنه بيت امايه .. انته في العزبه ويا مانع ؟ يالله عيل ياينكم انا .. اوكي فمان الله
ميره انتبهت لولدها : هاه بتسير العزبه انته ؟
مروان: هيه توني مسكر عن سلطان يقول يالسين اهناك ويا مانع والشباب
ميره:زين برايك عن السرعه
مروان: ان شاء الله يالله فمان الله

ضحكت مي وهي تشوف مروان طالع.. صدقها لو ساره تمت ميلسه ما بيفكر يطلع .. قامت مي هي الثانيه ودشت داخل عند ساره .. لقتها طايحه ع السرير وتيلفونها فايدها تقرا شي فيه ..

مي: منو مطرشلج مسج؟
ساره: محد .. يالسه اقرى المسجات المرسله..
مي: اها.. ليش تراجعين حساباتج فيهن؟؟
ساره قامت من طيحتها: اي حسابات
مي: بسم الله بلاج..
ساره: لا ماشي .. بس شو تقصدين
مي: ههه خيبه ماشي .. بس انا جيه دايما ارد اقرى شو انا مطرشه عن اكون مخربطه فشي..
ساره: هيه .. اتحرى ..
وهي فخاطرها" مالت عليج يا ميوه.. عبالي عرفتي بالحركه اللي سويناها.. طيحتي قلبي.."
مي: بسير اشوف حلامي

طلعت مي من الحجره وتمت ساره بروحها .. وكل شوي تتراوالها نظرة مروان..يتراوالها المسج اللي طرشه .. واللي هيه طرشته .. شو ها الاكشن اللي صار بينهم اليوم .. بدى خافقها يهيج .. ليش تمنع ها المشاعر من انها تظهر.. ليش ماتقدر انها تعيش الحب ويا مروان دام كل شي امبينهم واضح وكل حد يدري انهم لبعض..
بس ردت وحطت فبالها .. قيمها اللي ربت عليها .. هي ماتقدر انها تكلم مروان او حتى تفظح مشاعرها جدامه الا لما يكون حلها وحلالها .. ترا الدنيا دواره.. تشوف انه علاقتها ويا مروان تظل جذي احسن لهم ..


************************
(الاربعا) 16 مارس 2005
************************

كان مروان في سيارته راد من العين .. ومشغل الاغاني ويسمع وسرحان .. وأكيد محد غيرها ماخذ باله وتفكيره .. بس مل من الصبر مايقدر يتريا اكثر لازم اليوم يرمس ابوه ويقوله على اللي ناوي عليه .. كم مره قبل حاول انه يقوله بس مايدري شو الي يوقف فويهه ومايخليه يكمل اللي يباه .. بس اليوم معزم خلاص .. وبيرمس ابوه باللي يباه ..
وصل البيت الساعه 1 ونص .. لقاهم متيمعين ع الغدى سلم عليهم وسار حجرته بدل ثيابه وتغسل ونزل عندهم ويلس يتغدى وياهم..

مروان: فارس وينه مايا؟
ميره: لا يقول عليه امتحانات بييلس يذاكر مابينزل
مروان: مصري ولدج ها مادري ع منو طالع
ميره: قول لا اله الا الله بتحسده
ايمان: طالع عليه انا طبعا شاطره
مروان: عدال عاد ..
راشد: مروان بترقد انته الظهر ؟
مروان: لا.. ليش
راشد: اباك توديني العزبه..موتريه مودنه الكراج

مروان ابتسم لابوه..فرصه يته من السما انه يلس ويا وابوه بروحهم ويكون ابوه متفضي وما عنده شغل .. يعني بيقدر يتفاهم وياه ..
مروان: فاااالك طيب بو مروان ..
راشد: فالك ما يخيب..

بعد ما شربوا الجاي وسولفوا شوي عن امورهم وقروا الجريده .. قام راشد ويا مروان سايرين صوب العزبه .. وفالدرب..

مروان: ابويه
راشد: نعم
مروان: ابويه ابا ارمسك في موضوع
راشد: خير !
مروان: ابويه انا ابا املج
راشد صد على ولده: خبيل انته ؟ خطبه وخطبنالك رسمي شو تبى بعد اصبر.. البنت بعدها تدرس.. مابتطير عنك بلاك مستلغث
مروان: ابويه من الله دوامي فالعين وطول الاسبوع انا هناك وحتى لو عرست مابيضرها شي هي بتسير جامعتها وبترد البيت ما بمنعها من الدراسه بالعكس بشجعها اكثر ..هاكيه اختها عرست وهي بعدها تدرس..
راشد: اختها بتخلص احين الا تدريب عندها ..وساره بعدها
مروان: برايه ماتفرق ترا كلها دراسه .. بعدين انا قلت بملج مابعرس
راشد: شو تباها الملجه
مروان: ابا اقدم ع صندوق الزواج احين فيصل من متى مالج على عزوه وخذها ولين احين ماطلع له .. بقدم ع صندوق الزواج وقرض الاسكان .. لين يطلع لي ابويه يباله وقت..
راشد: انته عليك قاصر؟
مروان: هيه عليه .. ومعاشي مابيسدني .. وانا مابا منك.. ابويه ابا اعتمد ع عمري
راشد: انا ابوك ولازم ايوزك وايوز اخوك
مروان: بتيوزني لكن بتبنيلي بيت بعد ؟ بعيش عندك لكن لين متى لازم بطلع وبستقل.. من جيه لازم اخطط وارتب من احين .. ابويه انته ماقصرت ولا بتقصر علينا لكن انا حاب اني اعتمد ع عمري ..

راشد سكت وما علق .. حس انه ولده يرمس فأمور واقعيه وصحيحه لأي شاب يخطط انه يعرس.. من داخله استانس على رمسة ولده ومحاولاته في اقناع ابوه..ولكن ما يخفى عليه انه هو متعلق فساره وفخاطره اليوم قبل باجر انه يملج بها ..

مروان: ابويه بملج الا انا ..مابسوي شي وهاي بنت عمتيه مب وحده غريبه ..
راشد: انا ماعندي مانع لكن رمس امك ورمس عمتك انته انا مابرمسهم .. فالخطبه رمسناهم لك .. لكن الحين تبى تعتمد على عمرك سر انته ورمس عمتك..
مروان: يالله يابويه شحقه عاد .. رمس انته عموه هاي شغلاتكم انتو ما يخصها فالاعتماد ع النفس..
راشد: لا انته اللي تبى تملج انته ترمسها..مافيني اقولها يبى يملج وبنتها بعدها تدرس وتم عليا متولمه مني.. انته رمسها عن مرادك وفهمها ..

راشد كان يحاول يعجز مروان لكن مروان كان مصر على السالفه..صدق طفح الكيل عنده وساره مب مسوتله سالفه..كل ما حاول يقرب منها كونه خطيبها رسمي هي تصده.. فخاطره ياخذ راحته وياها فالرمسه ويقولها عن اللي بقلبه من صوبها.. لكن ها المشاعر ما بتظهر كلها الا اذ كان وثاق يربط امبينهم..كل يوم والثاني تكبر فعينه ويحاول يوصللها .. يحاول انه يستميلها يكلمها يمسجها عقب طلعة الروح تتجاوب وياه .. واذا تجاوبت تتجاوب فشي بسيط..
اخر موقف جمعها وياه خلاه صدق يفكر ويعزم على ها القرار.. يباها تكون طبيعيه وياه.. يبا يسمع ضحكتها.. صوتها.. يباها ساره الي يحبها.. يبى يعيش الحب ..


مروان: خلاص انا برمسها ماعندي مانع ..
راشد هز راسه: يوم تبى الشي ماترد عنه ..
مروان:ابويه قولي الله يوفقك وادعالي..
راشد ضرب على جتف ولده وهو صاد صوبه: الله يوفقك ويرزقك الخير يا بويه..

ابتسم مروان لابوه وحس باساريره شوي بدت تنفرج.. اول مطبه وتخطاها .. ويحس انه قدر يقنع ابوه .. بيتحمل كل شي عشان ساره .. وبيتحمل الاحراج وبيكلم عمته هو بنفسه ها المره ..

****


" اسأل الله لي ولكم علما نافعا وقلبا خاشعا وبارك الله لكم جمعكم هذا وسدد خطاكم لما يحب ويرضى ,, لقائنا الاسبوع القادم ان شاء الله في نفس الموعد لاكمال الدرس"
ختمت بدريه درس الفقه اللي كانت تلقيه في بيتها .. من بعد مادرست الفقه في الصلاه وخذت الاجازه فيه خلال شهرين عشان تعطي هي بعد الدروس هاي لمن يحب انه يستفيد .. وبتواصل دراستها في الفقه ان شا الله ..

طلعوا الموجودات من بعد ماسلموا على بدريه واهل زوجها اللي كانت تعطي الدروس في بيتهم .. وروحت هي بعد غرفتها ..
كانت تحس براحه كبيره .. وقفت عند المرايه .. شافت ويها ..
كانت تحس انها حلوه قبل .. بس حلاتها كانت مظلمه .. ماتنورت الا بنور الايمان ..
اندق الباب ودخل عليها زوجها هالوقت ..

عدنان: السلام عليكم
بدريه ابتسمت له: وعليكم السلام
عدنان: ماشالله شو ها الحريم الي ظاهرات من البيت
بدريه: كنت القي عليهن درس..
عدنان: هييه.. يزاج الله خير .. بتسوين خير فها العيايز
بدريه وهي تيلس ع الشبريه: هي وحليلهن ..

تجدم عدنان ويلس حذالها .. فخاطره كلام من كم يوم يبى يقولها اياه .. بس ما يتشجع..ماتهون على حرمته .. لكن لابد منه ها الامر ..

عدنان وهو متردد: بدريه بغيتج شوي في رمسه ..
بدريه : امر
عدنان: بدريه ماباج تحسسين من الموضوع عشان خاطري
بدريه بدى قلبها يدق..حست انه في شي .. بس ما تبها تصدق حدسها..
بدريه: شو انزين
عدنان: بدريه .. انا ابا اتزوج ..

نبض قلبها زااد أكثر وتمت تتامل ملامح زوجها كانها اول مره تشوفها ..

عدنان: بدريه انتي زوجتي وانا احبج واقدرج وايد وكل يوم احبج اكثر من اللي قبله .. ومابحصل احسن عنج لكن الشرع حلل اربع عند وجود سبب .. والسبب انتي تعرفينه .. انا اتمنى انه الله يرزقني بذريه وانتي تعرفين هالشي من بعد ماكان ممكن انه يصير وصبرنا عليه .. اصبح مستحيل .. بتمين انتي ع ذمتي وبوفيج حقج على اكمل وجه ..

بدريه سكتت ووطت راسها .. وعدنان كان يطالعها .. يتريا أي ردت فعل من صوبها ..

عدنان: بدريه رمسي لاتمين ساكته.. بدريه .. انا ابا ياهل يشل اسمي..


ها كان مصيرها حتميا وهي تعرفه من قبل بس تحاول تتجاهله .. هي امنت بقضاء الله وقدره .. وها نصيبها .. لو طلبت الطلاق ماشي فايده .. محد بيتزوج مطلقه وماتيب عيال .. واهلها مابيدومون لها .. اتم عند ريلها احسن .. ع الاقل سند لها في هالدنيا .. ماتخلى عنها طالب الاحتفاظ فيها واعترف بحبه لها .. وهي هالشي تعرفه من قبل .. لكن هذا بعد حقه وماتقدر تحرمه منه ..

بدريه رفعت راسها وعينها تلمع: هذا حقك عدنان الله يوفقك ان شاء الله
عدنان انفرجت اساريره وارتاح انها موافقه ..
عدنان: انتي خطبيلي ع شورج
بدريه وهي تحاول تصطنع الابتسامه: برمس عمتي وبشوف ان شا الله
عدنان: الله لايحرمني منج ان شا الله .. ويقدرني اني ما قصر وياج فشي ابدا..
بدريه: انته ما قصرت ويايه يا عدنان.. وعيالك اللي بتيبهم من الحرمه الثانيه بروحي بحطهم فعيوني الثنتين وبعدهم عيالي الي نحرمت منهم .. عيال الغالي لازم بيكونون غاليين..

عدنان ما هانت عليه بدريه موول.. تجدم منها وحضنها .. غمضه حالها اللي هيه فيه.. وحده حلوه وفعز شبابها تنحرم من العيال.. تنحرم من الامومه .. حبها ع راسها بكل ود .. ويدعي من ربه انه يسعد بدريه وماييب الحزن لقلبها..

****

كان نايف مار بيت يدته فليل ياخذ ريم اللي تعود عليها من بعد المغرب تسير عند اخوانها يوميا.. اخر فتره جاسم وايد تدنى مستواه الدراسي وردت ريم تستحرص عليه أكثر عن قبل..واليوم كانت سايره عشان تسلم على خواتها..


نايف: اشحالهم اخوانج ؟
ريم: تمام الحمدلله ..
نايف: انزين ريمان شو رايج نسير باجر دبي ؟ نتكشت
ريم: حلوو .. بقول حق اخواني جان بيون ويانا بيستانسون

نايف رفع حايب وهو يطالع ريم .. تم ساكت ..
ريم استغربت..ريم: شو بلاك
نايف: ريم.. سمعيني فديتج ..انا بسألج
ريم: اسأل
نايف: انا ماخذنج والا ماخذ اخوانج؟
ريم: نايف!!
نايف: ريم انا ماقولج قصري عليهم لكن خلي شوي لحياتنا خصوصيه .. من خذتج وانتي دوم عند اخوانج والا عند اخواني .. وانا وين من حياتج ؟
ريم: نايف شو هالرمسه
وقف نايف سيارته في حوي بيت ابوه .. وكمل كلامه

نايف: ريم اخوانج اخواني والعكس .. لكن انا لازم اكون مميز عنهم بشي انا ريلج ولي حق عليج .. انتي من الصبح لين الظهر في الكليه ..اتردين تعبانه مالج بارض.. بتيلسين شويه العصر وعقب يا تسيرين تدرسين اخوانج او هم ايونج .. وعقب لين تخلصين اللي عليج يتاخر الوقت ولازم ترقدين لانه عندج دوام .. وانا وين من جدولج ها ؟ انا كنت ساكت اقول يمكن تحس .. قلت بوديج السوق الاسبوع اللي طاف عزمتي خواتي ويانا.. قلت بستانس وياج بخميس واجازه وجي قلتي بسير عند اميه .. قلت بوديج دبي باجر قلتي بقول لاخواني .. انزين خلينا نسوي شي مره وحده بروحنا ..في وقت لطلعتنا ووقت للطلعات الجماعيه .. مب حاله هاي ..

بند السياره ونزل منها .. وهي على طول نزلت قفلها وروح عنها ..
وهي بعدها واقفه ومنصدمه من اسلوبه .. انتبهت لنفسها انها بعدها في الحوي ودخلت .. مالقت في الصاله الا عمار يالس يطالع التلفزيون..

ريم: السلام عليكم
عمار: وعليكم السلاام
ريم: عيل عموه والبنات وين ؟
عمار: فوق يالسين ..
ريم: اها.. خلاص عيل بسيرلهم..
عمار: اقولج ريم ..قوم جسوم باجر بسيرون بيت امج ؟
ريم: مادريبهم اتصل اسالهم..
عمار:اوكي

روحت عنه ريم ولقت عمتها والبنات يالسات في الصاله اللي فوق ..

ريم: السلام عليكم
مريم: هلا امايه وعليج السلام.. اشحالج ؟
ريم: الحمدلله عموه
مريم: شخبارها امايه اليوم ؟ مارمستها من الصبح ..
ريم: الحمدلله
اسما: لازم مابترمسج العصر عندها ساروه وميوه شاغلينها
ريم ابتسمت : اسمحولي بسير بطالع نايف
مريم: يانا هو سلم ودخل بلاه ؟
ريم ماعرفت شو تقول: لا ماشي عموه بس اظن عنده مشكله في شغله بسير اطالعه
مريم: سيري امايه

دخلت ريم جناحهم .. ماحصلت نايف فالصاله وسارت غرفة النوم وبعد ماحصلته .. فصخت عباتها وشيلتها ..شافت باب الحمام مقفول .. اكيد دش يتسبح .. طلعت الصاله وفتحت التلفزيون..وعقب ربع ساعه سمعت صوت فالحجره ورجعت غرفه النوم لقته واقف وينشف شعره..
شافها وكان يبين على ويهه انه متضيج .. تجاهل وجودها وطلع من الحجره ..

ريم: نايف
وقف وصد صوبها
تجدمت منه ريم: نايف وين بتسير ؟
نايف: هنه..الصاله
ريم: عمتيه سالتني عنك قلت لها عنده مشكله في الدوام .. عن تسالك
نايف: اوكي

وروح عنها الصاله .. ماعرفت ريم شو تسوي .. دخلت تتسبح وصلت العشا.. يايه بتطلع تمت واقفه عند الباب اطالعت نايف الي عاطنها الظهر .. ماتشجعت ردت يلست ع شبريتها وخذت الروايه الي كانت موطايه ع الكميدينو .. فحتها للصفحه الي كانت واصلتنها .. ماقدرت تركز فقرايتها وطتها وهي تتنهد ..وتعوذت من ابليس وسارت له الصاله ويلست في الغنفه اللي حذاله

ريم: نايف
نايف بدون مايصد لها: همم
ريم: نايف انا اسفه

نايف صد عليها وتم ساكت .. اما هي وطت راسها

ريم: ماكنت منتبهه لتصرفاتي .. انا عشت حياتي جيه بين اخواني .. اهتم بهم واهتم بالكل بشكل عام
نايف: وانا ؟
ريم: انته تهمني نايف صدقني .. انا اسفه ع اللي صار وان شا الله بحاسب ع تصرفاتي اكثر ومابقصر ..

نايف ابتسم لها وهز راسه بالايجاب .. واشر ع المكان اللي حذاله عشان تيلس عنده ..مايحق انه حد يزعلها كيف هو !!.. لو كان ها الشي بخاطره وطلعه كله مره وحده من غير سابق انذار.. بس تم متضيج انه هو الي خلاها تتضايج..
قامت من مكانها ويلست حذاله وهي تحس بهم وانزاح عن نفسها ..حط ايده ورا جتفها وقربها منه أكثر..


نايف: باجر 10 الصبح بنسير دبي لين فليل اوكي.. انا وانتي بس
ريم وهي تطالعه وتبتسم: ان شاء الله ..

خذت ريم الريموت من ايده وبدلت ع قناة الامارات ..

نايف: الله فيلم هندي
ريم: ههههه ادريبك بتستانس عشان جي حطيتلك الامارات.. احيدهم اييبون افلام هنديه ها اليوم ..

وطت ريم الريموت حذالها وتقربت من نايف وهي تحس بدفوة وحنان ريال ناقصتنها من يوم ما كانت ياهل .. نايف ارتاحت نفسه واستانس ع الجو اكثر من الفيلم..

عيدكم مبارك .. والسموحه ع القصور..

السلام عليكم

أحلى المزايين المجكنمين ...مشكوره على عيدية العيد ...هالبارت فعلا رهيب

ننتظر التكمله بكل شوق وحلم وريم ومي وساره ومهره ومها ,,,, وأم سيف

يعطيج العافيه

المزيونه .. عظم الله اجرج يالغلا
والسموحه ع القصور والتأخير في الاجزاء اللي طافت
لاني ما كنت موجوده ..
(( الاحداث كل ما يت قامت تحلو ... بس تدرون بعد خاطري سلطووون ياخذ ميوووه )) \
حاسه ان الفارس له عالمه الخاص ...
.
.
.
وتسلمون ع الاجزاء
اختكم/ الشوق
في انتظار الجديد منكم

حتى أنا حاااااسه باحساااااس !

ميوه شخصيه حلوه ....تناسب سلطان .... وبعد تناسب فروس!

فاحساسي يقولي إنه بياخذها سلطون وفروس المصري بياخذ أحلام لين تكبر وتخلص المدرسه!

الحين فكونا من أم كلثوم ويوزوها مروان .... عشان تعتزل الفن وتتفرغ للعايله:)

.
.
.

حلم الطفوله

وعليكم السلام والرحمه ..

العفو غناتي.. وان شاء الله كل مره ينال ع اعجابكم ..

اقتباس:

---

ننتظر التكمله بكل شوق وحلم وريم ومي وساره ومهره ومها ,,,, وأم سيف

---

افا نسيتي نعووم :k_harhar1:

اقتباس:

---

فاحساسي يقولي إنه بياخذها سلطون وفروس المصري بياخذ أحلام لين تكبر وتخلص المدرسه!

---

:look: .. همم دايما احاسيسنا خداعه .. لكن بنشوف لين النهايه .. وكل شي بيتوضح..

وام كلثوم .. تريوا عليها شوي .. خلوها تستوعب الي يصيرلها :b015:

نترياج غناتي ..

.
.
.

الشوق

الدوام لله اختي .. ويزاك الله خير ..

اقتباس:

---

(( الاحداث كل ما يت قامت تحلو ... بس تدرون بعد خاطري سلطووون ياخذ ميوووه )) \
حاسه ان الفارس له عالمه الخاص ...

---

الله يقدرنا انه نحليها أكثر وأكثر ..
خلاص برمس سلطان عسب ياخذ ميوه ولا يكون فخاطرج :k_smile2: ..
وفارس.. ها الشخصيه ملعوزتنا ونحن نكتب عنها .. غامض .. ماتعرفين للي يجول فباله ..
ممكن الي لين احين يبين النا عالم دراسته..هوايته.. وتعليقاته الخفيفه فالبيت..
ماعليه ما ينلام انسان خجول :k_smartass:


وحياج الله حبيبتي..

.
.
.

المزيونه

الأحداااث بالمره مؤثره
انا مااراااح اعلق على شي
غير عن بدريه
صدق صدق سبحاان إلي يغير ولا يتغير
نفووس تهدى ونفوووس تعصى

وشي ثاني
مي شخصيتها قويه
وساره شخصيتها هم قويه لكن صدق عجبتني مايهزك ريح هالإنسانه
مي ماتوقعت قلبها جاامد وقوي بالدرجه إنها ماتتعامل مع ابوها
صح إلي سوااها شي ماينسكت لكن بعد هذي مي المرحه ماتعودنا كذى


ملاحظه صغنطوطه
ام سيف مختفيه عن الساحه وين دوورها؟!
وشي ثااني
اختي المزيوونه
قسم بالله من يوم عرفت الخبر بديت احااتيج
كلنا لها إختي وربي يجعل مثوااه الجنه
ماعليج شر ان شااء الله
واشتقنا لج

تسلمين الحبوبه

هذا جزاء ما عليه كلام

صح ام سيف ماا لهاا دور وااايد في هذا الجزاء

.
.
.

هزاايم

اقتباس:

---

صدق صدق سبحاان إلي يغير ولا يتغير
نفووس تهدى ونفوووس تعصى

---

هي والله .. ولا تنسين سلطان بعد :k_smile2:

اقتباس:

---

مي ماتوقعت قلبها جاامد وقوي بالدرجه إنها ماتتعامل مع ابوها
صح إلي سوااها شي ماينسكت لكن بعد هذي مي المرحه ماتعودنا كذى

---

موقف مي ينم عن شخصيتها .. هي انسانه مرحه لكن لما صورة الشخص تهتز جدامها
ماتقدر انها ترد تتعامل طبيعي وياها الشخص .. الابو على معصيه .. وهي مب قادره ترد وياه عادي
هل ممكن نشوف المياه ترد لمجاريها او لا .. بنعرف عقب ..

اقتباس:

---

ام سيف مختفيه عن الساحه وين دوورها؟!

---

مايضيع حق العيايز ماعليج .. اليايات اكثر ..

اقتباس:

---

وشي ثااني
اختي المزيوونه
قسم بالله من يوم عرفت الخبر بديت احااتيج
كلنا لها إختي وربي يجعل مثوااه الجنه
ماعليج شر ان شااء الله
واشتقنا لج

---

تسلمين الغاليه .. والدوام لله فديتج هاي سنته فالحياه وماعلينا غير الصبر ..
اشتاقتلج العافيه..


.
.
.

عاشقة اليولات

الله يسلمج فديتج .. وام سيف ما نستغني عنها ابدا .. بتشوفونها ان شاء الله المرات اليايه..

.
.
.

الجزء الرابع والعشرين

************************
(الجمعه) 18 مارس 2005
************************
على الغدى كانوا الكل متيعين ع نفس السفره .. قامت اسما بسرعه وسارت فوق تلبس عباتها لانها متأخره عن الباصات .. اما لطيفه فكانت جاهزه وتاكل براحتها تتريا اختها لين ما تخلص..

ريم: اسوم وساروه ياخذن من اطباع بعض
مريم: هذيل طالعات على حياة يدوه .. باردات ..
نايف: ماعطتهن امايه عفرا عيل هههههههه
ريم: فديتها امايه.. لانت يبوك الحين .. مب شرات قبل ..
مريم: الله يطولي بعمرها..
الكل: امين ..
خلفان: نايف شو سويت بالسالفه اللي قلتلك عنها
مريم وياها الفضول: أي سالفه؟
خلفان ضحك على فضول حرمته بس تجاهلها.
نايف: أي وحده ابويه؟
مريم: بس فيه سوالف وايده ثرها
خلفان: هاذيج .. اللي موصنك عليها
نايف وهو يغمز لابوه : هييه .. الــ
خلفان: خلاص عقب عقب
مريم: نايف قول قول .. شو داسين عني
نايف ضحك .. وكمل ويا ابوه..
نايف: هي امايه .. الصراحه انا ما ابا اخبي أكثر ..
خلفان: نايف غد ريال عااد
نايف: ابويه انا ريال .. بس ها السالفه ما ينسكت عنها
مريم: يالله طيحتولي قلبي.. شو مستوي؟
نايف: امايه ترا ريلج يبا يعرس عليج.. عايبتنه سكرتيرة خالي سيف ويباها
مريم وهي تطالع نايف وعلامات التوتر باينه على ويها ..
خلفان: وشحقه ترمس انته .. انا بروحي بشاور حرمتيه وبخليها تخطبلي اياها
مريم فولت ولفت على خلفان: الا على قص رقبتيه ها الي قاصر..تيبلي لبنانيه ف البيت تتميعلي .. والله ثم والله مـا
نايف: بل بل بدت تهدد الواالده ..
خلفان: هههههههههه عن يرتفعلج الضغط
البنات كانن يسمعن ويشوفن ملامح الويوه ومب مستوعبات وفنفس الوقت بدن يتحاملن على خلفان ..
نايف: ههههههههههههه امااايه هدي هدي كنتي في برنامج صادوه
مريم وهي تطالع نايف: سود الله ها الويه.. عنبو زين ما نطرت ميته..شو بتستفيدون عقب
خلفان: يالله .. ها الكثر تغارين؟
مريم: لا هب غيره ..
ريم: ههههه والله انكم خوفتونا نحن بعد .. امره على الخط نايف ويا عمي
لطيفه: هههه حليلج يا امايه..
مريم: عيل ..
خلفان ونايف تموا يضحكون ..
خلفان: انزين لا صدق .. شتريت الاسهم اللي قلتلك عنهن
نايف: لا ابويه بعدني.. بسير ان شاء الله باجر وبشتريهن ..
مريم: الا سالفة اسهم هيه
ريم: وشو شغلهم الشاغل ها الايام غير الاسهم يا عمتيه ..

من بعد الغدى .. ركب لطيفه واسما ويا نايف اللي سار يوصلهم موقف الباصات .. نزل نايف وياهن الاغراض وسلم عليهن وعقب ركب سيارته بيروح ..



****

العصر قبل مايسير مروان العين طلع سيارته من حوي البيت ووقفها جدام بيت يده نزل عسب يسلم عليهم .. لقى يدته وامه يالسين في الحوي مع مرت عمه وبناته.. سلم عليهم ويلس يشرب قهوه ..

احلام: عاش من شافك
مروان: هههههه عاشت ايامج بنت محمد
احلام: بطرت علينا احين ماتي تسلم شرات قبل
مروان: لا افا .. انا ابطر ع خواتي مايستوي
احلام: هيه قص عليه انته
مروان: ههه عموه عليا وينها ؟
ميره: داخل .. سيرلها

كان مروان مرمس امه .. اللي ما مانعت بالعكس استانست وايد وحثته انه يقنع عمته جان بترضى..
دخل مروان الصاله لقى عمته يالسه اتابع مسلسل..

مروان : السلاام علييكم العمه ..
عليا وهي تطالع اللي ياي.. ابتسمت: وعليك السلام..هلا فديتك اشحالك؟
مروان: الحمدلله اشحالج انتي عموه؟
عليا: الحمدلله .. شو شكلك ناوي الجنوب..
مروان: هييي يا العمه ..والله مليت من الدرب..
عليا: يالله شو بتسوي
مروان: الحمدلله على كل حال..
عليا: الحمدلله .. ملازم ومتخرج من كلية الطيران .. نعمه يا وليدي ..
مروان:الله يديمها ان شاء الله
عليا: ان شاء الله..

مروان ماعرف شو يقول بس يخاف ياذن المغرب وكل الحريم يدخلون ويخربون عليه..
مروان: ويديمها على حرمتيه ان شاء الله
عليا ابتسمت : حرمتك بعد ان شاءالله بتخلص وبتتوظف وبتعاونك..
مروان: ان شاء الله ..
عليا يت فبالها بنتها وهي تشوف مروان .. وحمدت ربها على ها النعمه وانه ريال مثل مروان خطب بنتها ويباها..

مروان: عموه طلبتج
عليا: امر فديتك
مروان دش فالموضوع ع طول: عموه انا بغيت املج ع ساره
عليا بدهشه: تملج عليها ؟ ليش فديتك مستعيل.. بعدها ساره باقلها سنتين
مروان: عموه انتي تشوفين كيف صندوق الزواج ياخر الطلبات .. الناس يعرسون واييبون ولدهم الثاني عقب يطلع لهم .. هذا غير قرض الاسكان اللي يباله وقت وايد .. وانا على معاشي بس مابقدر .. ابويه مابيقصر بس انا احب اعتمد على عمري ..
عليا سكتت كلام مروان مقنع بس بعد الوقت طويل : انزين اذا ملجت احين متى تبى تعرس !
مروان: ماعرف عموه متى ما يناسبكم .. انا عايش في العين ولو عرست ساره بتكون في البيت وبتسير كليتها وبترد ما بيأثر عليها شي .. بالعكس بتكمل دراستها وانا بشجعها أكثر.. ولو ما بغت العرس معليه بصبر لين ما تتخرج.. المهم املج الحين ..
عليا وهي تضحك: بتصبر..
مروان: هي.. ليش
عليا: الريال من عقب ما يملج خلاص..بيستعيل على العرس.. وانته ما مداك خطبت والحين تقول تبى تملج..
مروان: انزين.. مادري.. عموه انا ابا املج.. ماروم اتريا ..


عليا ابتسمت .. مروان يبين عليه متستعيل.. ما ينلام .. متخرج من الكليه من سنه ويبى يستقر..

عليا: والله انا ماقدر ارد عليك لكن برمسها وبشوفها شو رايها
مروان: عموه انتي شو رايج ؟
عليا: لو كنت واحد غريب ماكنت برضى بس انته ولد اخويه والثقه فيك قبل غيرك ويسعدني انك حاب تعتمد على عمرك وهالشي يطمني اكثر ع مستقبل ساره .. الله يوفقك وياها فديتك.. انا موافقه وان شاء الله هي توافق بعد

مروان نش حب عمته ع راسها
عليا: بارك الله فيك وليدي ..
مروان: يالله عيل عموه.. ورايه درب بترخص منج
عليا: درب السلامه فديتك.. الله الله فالمعرس عاد
مروان وهو مستانس حده: لا ماعليج .. بس خلها توافق هيه..
عليا: اللي رايده ربك بيصير..

سلم مروان على عمته وظهر من عندها متوجه صوب سيارته نسى حتى يمر على الي يالسين فالحوي .. زقرته امه .. وانته الهم وسار صوبهم..

احلام: وين تبى طار السكه..تعال سلم وروح..
مروان: ههههه اسمحيلي بنت محمد

سلم عليهم مروان وغمز لامه عشان تفهم انه عمته وافقت .. لكن هي فهمت من قبل حتى هالحركه.. لاحظت ابتسامته وعرفت انه عمته وافقت .. وروح مروان عقب ماسلم عليهم ..
الحين باقي دوره ويا ساره وكل شي بيمشي ان شا الله ..
طلع عنهم مروان واتصل باخوه فارس اللي ماشافه هالاسبوع ..

فارس: الوه
مروان: هلا والله بالدحيح
فارس: متصل تحسد انته ؟ الله واكبر عليك
مروان: ههههه عنبوك مابتطير الكتب عنك هاتها وتعال اهنه ادرس
فارس: ياخي ان رديت مايلست في البيت .. تباني اجابل ملعب الكره وايلس
مروان: ياخي مايركب دحيح ولاعب كوره ..
فارس: يوز عني مروانوه
مروان: انزين اخر سؤال
فارس : تفضل
مروان: ماحيد انا امك سميره وابوك مدحت عشان تطلع جيه مصري
فارس حاول ايود عمره لكنه ظحك: ههههههه الله يقطع شرك .. بلاك عليه بقوم اقرالي في ماي بتاكلني
مروان: ههههه اسولف وياك الا ..
فارس: وين انته ؟
مروان: ع الخط ساير العين
فارس: مابتخطف صوبي الشارجه شوي
مروان: ليش ؟
فارس: بطلع بحوط وياك
مروان: زين والله ..انا رايق ع الاخر .. خلاص انا من اوصل جريب منك بتصل بك
فارس: اووووكي
مروان: يالله باي
فارس: مع السلامه

سكر فارس عن اخوه وهو يضحك عليه .. شكله مستانس وايد .. وطى فارس التيلفون ع طرف وقبض الكتاب يفصص المسأله يبى يحلها وهي مستعصيه وياه ..
ويوم انقهر .. رفع التيلفون واتصل فربيعه ..

فارس: الوو
مبارك: ها
فارس: هب هباك.. حد اييه اتصال يقول ها ..
مبارك: شو تباني اقولك
فارس: بلااك انته
مبارك: ماشي
فارس: بسم الله شوفيه حسك؟؟
مبارك: ولا شي..
فارس: يلااا عاد لا تستهبل
مبارك: تعبان مرقد فالمستشفى
فارس وهو مصدوم: من متى؟؟؟
مبارك: من يومين
فارس: اووه..الحمدلله ع السلامه.. ليش شو استوى فيك؟؟
مبارك: الله يسلمك طحت عليهم محموم
فارس: يالله الحمى جيه تهد حيلك وتنومك فالدختر
مبارك: حمى قويه يتني والله يا اني اهاذي طول الوقت..
فارس: انزين وشو هباتك الحين؟
مبارك: والله اليوم الحمدلله احسن بواايد عن امس.. رمت ارمس ع الاقل..
فارس: اسمييك.. اسمحلي الشيخ محد خبرني..
مبارك: لازم محد بيخبرك .. ثرك مرابع حد انته؟
فارس: هههه هيه مرابعنك انته
مبارك: بس عليك.. انا ما تم حد ماعرفني وانته ما تعامل غير ويايه
فارس: ماعلينا.. انا انسان ملتزم فدراستيه الحين مب متفيج لخربطان الشباب.. ولو بغيت استانس منصور ولد عمتيه مايقصر دومه ويايه.. وانته بعد ماتقصر
مبارك: هههه هي مابقصر.. بس يوم اقولك بنسير ميلس قوم فلان ما طيع ولا يوم بقولك بنسير معزومين عند شلة فلان ماطيع
فارس: مشكلتك اتي فأوقات صدق متأزم فيها وماشي وقت اني اطلع..والله الدراسه تهد الحيل وها نحن فأول سنه ..
مبارك: الله يعينا يا خوك .. يلا بتعدي ها الكم سنه
فارس: ياحيك .. عيل بروك طايح تعبان ..
مبارك: هي يا فروس
فارس: طحت عليهم فويكند .. ماطافك شي ولا سويتلك شغلك
مبارك: هي مداوم لين الاربعا ومخلص .. جان الا بتسويلي اشغال الاسبوع الياي
فارس: ههههههه يلا اجلب ويهك.. بتقوم شرات الحصان وبتسوي لعمرك..
مبارك: يا المصري
فارس: عدال عاد..
مبارك ضحك على فارس .. لأنه يدري انه الكل يعلق عليه بها الكلمه .. وطايحين فيه لمجرد انه انسان مفرغ عمره لدراسته..
فارس: يلا ابويه .. انا بكمل حل ها المسأله الكريهه .. وعقب بييني مروان اخويه.. وان شاءالله بنخطف عليك .. بدقلك عقب ودلني ع مستشفاك
مبارك: خلاص اوكي .. اترياكم
فارس: اوكي.. يلا فمان الله ..

سكر فارس التيلفون .. سرح شويه بفكره.. صحيح هو مبعد عن الكل .. بس مستانس باللي هو فيه !
يعرف انه طبعه صعب بعض الشيء..وانه ما يندمج وأي حد .. بس بعد مايعير ها الأشيا أي اهتمام .. ركز اهتمامه فالكراس الي جدامه ..
واخيرا بعد ما حل ها المسأله ارتاح نفسيا وقام بيتسبح وبيتزهب لين ما يوصل اخوه..

****

فليل في سكن البنات .. وبالتحديد فالجناح .. كانت مي طالعه من حجرتها عقب ما خلصت لبس.. جيكت ع تيلفونها وشافت مكالمه .. ردت اتصلت ..

عبير: مرحبا
مي: مرحبتيين.. شحالج عبير..
عبير: الحمدلله تمام .. اخبارج انتي؟
مي: والله تمام .. شخبار خالي والبنات
عبير: كلهم بخير الحمدلله.. ها فالسكن
مي: هي يبوج .. عيل حلام وين؟
عبير: هي هيه دقتلج وما رديتي تقول
مي: هي كنت راقده..
عبير: اها .. خلاص بناديها لج ..

خذت احلام تيلفون امها وسارت حجرتها ترمس مي..

احلام: شحقه كنتي راقده
مي: مادري راسي يعورني .. اول ما وصلت وطيت راسي وقبل شويه واعيه
احلام: اها ..وساروه اخبارها
مي: الحمدلله .. هي بروحها منطبه راقده
احلام: ههههه حليلها .. اليوم يانا مروان وشكله متشقق .. لا ويلس ويا عموه عليا بعد بروحهم .. احس وراهم شي
مي: يالله يا انتي يا ام الدواهي.. شو بيكون وراهم
احلام: شدراني خخخ
مي: يا حليله مروان..
احلام: شكله مستااانس واايد من عقب ما خطب
مي: وعاده هيه مب مسويه سالفه..جامده ها البنت..
احلام: ما عطيناها من رومانسيتنا
مي: ههههههه مالت علينا ..جان حصلنالنا اللي يحبنا عيل
احلام: ماعليج ماعليج .. فالدرب يايين ..
مي: هههههه مستخفه..

وفنص السوالف انتبهت مي لوحده من بنات الجناح يايه صوبها وفايدها كيس .. عطته اياها ..

مي: من منو؟
منى: فطوم
مي اطالعت منى بنظرة يأس
منى: ياخي اذيتينا وياها انتي.. بتم وراج لين تكلوزينها هاي
مي: تهبي الا هيه .. ما لقت غيري انا
منى: هههه على بابا يا ماما
مي: لاوالله
منى: صدق مستجده مستعصيه انتي ههههههه
مي: منووه عاد.. كم مره قايلتلكم لاتسوولي سوالف وياها.. بس وايد طرشت اهداءات وتشوفني اني مب معبرتنها .. شو تبى هاي
احلام: بل عليج يا ميوه..
مي: صخي انتي بعد
منى: هههههه والله ما يخصني .. شو ذنبي اني وياها فالباص .. كل اسبوع تحملني اغراض حقج
مي: هاي محد غير ساروه مخلتنها تكمل .. بأدبها انا ساروه
احلام: عاد ساروه تستانس على ها السوالف
مي: والله مب مريحتني .. كل ماتشوفني تطالعني بنظرات جني مجرمه.. شو تباني اسوي تعاملت وياها عادي حالها حال أي وحده من ربع ساروه وتمت تتشره.. خذت وعطيت وياها بغت أكثر.. بس خلاص عاد..
منى: ههههههههههه قسم بالله انج تحفه ..
مي: منوه الله يخليج .. رمسيها انتي.. انا مب ويه تكلويز .. ادورلها وحده تسايرها فها السوالف ..

منى يلست حذال مي وهي تشوفها انها صدق متغصصه .. مي بتكمل وياهم كورسين .. عرفوا كيف طبعها المخاالف لطبع ساره .. استانسو بعشرتها .. وبسوالفها .. ومايرضون عليها شي .. اسلوب مي يجذب وايد من البنات صوبها .. واللي تشوفهم مي انهم كفو ترابعهم تمشي وياهم ك ربيعه ويستانسون وايد عليها.. لكن اللي تشوف انه غرضها شي ثاني على طول تتجاهل مي وجودها..

منى:حبيبتي والله ميوه .. شورايج تحبيني واحبج
احلام: خيييبه شو تقول هاي
مي: هههههههههه فديييت منووه والله وين بحصل حبيبه شراتج ..
منى: هيه ما شي انا خريجه ما بتحصلون شراتي عقب..

ميوه حضنت بنت جناحها وباستها ع خدها ..

منى: ميوه خلاص بنمثل دور الكلوز .. واوني بغار عليج ومحد بيقرب صوبج
مي: هههههههه لا حبيبتي مابا سوقي يطيح
منى: شوف شوف مابا مابا دزوني عليه
مي: هههه استعبط فديتني
منى: خلاص كلووزي.. انا الخرييجه منى .. اكلوز المستجده مي
مي: هههههههه ايه وايد مصدقه عمرج..بلاهن المستجداااات
منى: بل عليكن حلوج مانروم الكن ..

احلام عصبت من ميوه اللي مخلتنها ع الخط وتسولف ويا بنت جناحها .. سكرت في ويها ..

مي: ابييه حلامي عصبت ..
منى: هههههههه ما تنلام مسوتلها طاف
مي: يالله انتي يايه ترمسيني تبيني اطنشج
منى: خخخ يعني مني الغلط
مي: نص نص
منى: الا تعالي اقولج..ماخبرووج عن بنات جناحنا شو صارلهم اليوم؟؟
مي:شووو
منى: ميوه ماتدرين انه جناحنا مسكوون!!
مي: ويه بسم الله
منى: هي والله.. يقولج امون كانت سابحه ويوم طلعت شافت انه ايدها مشمخه مع انها تقول مافيها ظفور
مي: وييييه سمعنا وسلمنا
منى: وسعادوه بعد وسمة فرقبتها اليوم انتبهنالها..ماكانت فيها
مي: ايه منوه لاتخوفيني ..
منى: مادري شياهم ها الينانوه
مي: امييييه بنشغل قرآن فالجناح يابوج
منى: يبالنا والله.. الشي مب من فراغ ياي..
مي:يالله ماحصلوا الا جناحنا يسكنونه ..ايه انا اخاف
منى: بيني وبينج هو عادي نحن من يينا الجناح قايليلنا ترا ها الجناح ثجيل شوي وتخيلي مره سمعنا ركيض فالممر واصلا محد كان فيه..ومره سمعنا صوت ياهل يصيح ..
مي: ويه ويه ويه لا ترمسين اكثر عن يشرفونا
منى: ههههه يلا تعودنا عليهم من سكنا ها الجناح .. صاروا ربعنا عادي
مي: شياهم عيل اليوم اعتدوا ع البنات
منى: انا ادري!
مي: الله يقفع بليسج الحين كيف برقد .. قبل تقولي ساروه سوالف بس ما صدقها لكن اليوووم السالفه فيها اعتداااء.. ما بنسكت عنهم
منى: وين تبييين .. شو بتسويلهم بتحاربينهم يعني
مي: بنمزر الجناح بالغام ومتفجرات ههه
منى وهي تضحك: والله انج تحفه.. بعدين بيعصبون عليج
مي وهي حايسه بوزها: وييين الا رمسه .. ولا انا ديايوه ما أيسر خخخ
منى: الله يكفينا شرهم
مي وهي ترفع ايدها للسما ومغيره ملامح ويها: امييين

وضحكوا ثنتيناتهم .. وعقب ما روحت منى تذكرت مي انه احلام سكرت فويها.. شلت تيلفونها وردت تتصل فأحلام..اللي خلته يرن وما ردت .. بس فالاخير ما قاومت وردت وهي ماده بوزها .. وتمت تحايل فيها ميوه عسب ترضى.. وفالأخير قردنتها ميوه ومشت وياها أحلام كالمعتاد..


************************
(الاثنين) 21 مارس 2005
************************

كانت ام سيف الظحى يالسه مجابله مكينه الخياطه وتعدل كندورتها اللي كانت طويلها عليها .. وقالت بتقصرها ع قياسها ..
رن التلفون اللي محطتنه حذالها ووقفت مكينتها .. ردت ع التيلفون ..

ام سيف: مرحبا
الريال: مرحبتين .. هذا بيت جاسم سيف
ام سيف: هي نعم بلاه جاسم ؟
الريال: انا اخصائي المدرسه .. عسى ماشر جاسم اليوم ماداوم ؟
ام سيف: جاسم ماداوم ؟ كيف ؟ انا بروحي موعتنه وشفته وهو ظاهر من الباب
الريال: بس وصلني توه الملف وهو غايب ..سألنا طلاب الصف اذا شافوه والا لا قالوا لا ..
ام سيف: ومايد اخوه ؟ والا صح مايد هب وياه في نفس المدرسه .. دوروه ابويه ترى عنده السكري هالولد وساعات يطيح علينا .. انا مريقتنه عيل قبل مايظهر
الريال: اعرف الوالده ولكن هو مايانا .. تاكدي من السايق اوالشخص اللي اييبه اذا هو يا المدرسه والا لا
ام سيف: ان شا الله .. فمان الله ..

سكرت ام سيف وهي خايفه مب عارفه تتصرف .. وين سار جاسم ؟ اتصلت لولدها تستنجد به ..

ام سيف: الوه سيف
سيف: مرحبا امايه
ام سيف: مرحبتين.. ابويه ها الاخصائي مال مدرسة جسوم متصل يقول جسوم ماسار المدرسه اليوم ..مادري وين ولدك قوم اطالعه
سيف: امايه يمكن سار فوق رقد
ام سيف: انا جدامي شايفتنه يوم متريق وشال شنطته بيسير المدرسه
سيف : انزين انزين بتصل بالدريول بطالعه
سكر سيف التلفون واتصل للسايق اللي اكد له انه جاسم ماركب وياه .. لانه متعود يودي جاسم قبل البنات .. اما مايد يسير ويا عمار ولد عمته ..
طلب سيف من الدريول يدور عليه جان في الحجره اللي برع والا أي مكان .. لين يوصل البيت .. اما ام سيف كانت تحاتي وكل شوي تطرش نجمه تدوره في مكان ..
قبل مايرجع سيف البيت .. انفتح باب الصاله ودخل جاسم

ام سيف: جسوووووم انته وين سرت
جاسم وهو يحج عيونه : شووو
ام سيف: بلاك ابويه شي يعورك؟ وين سرت انته ليش ماسرت المدرسه
جاسم: سرت ارقد انا تعبان.. قلت لج الصبح انا تعبان انتي ماتخليني ارقد
ام سيف: وين سرت ترقد
جاسم: في المسيد عقب يا ها المطوع وعاني حشره ها بعد
ام سيف: حسبي الله على بليسك جانك خليتني الا احاتي واخاف ولا خليت حد ماخبرته حتى ريم اتصلت بها
جاسم: اوهو امايه انتي ليش جيه وشايه ماتعرفين تسكتين
ام سيف: صه يالله .. مسود العين ..

قامت ام سيف واتصلت تلفون لسيف ولدها .. وخبرته .. واول ماسكرت ياها اتصال من ريم ..

ريم: ها امايه
ام سيف: لاتخافين هاذوه ها مسود العين ميلس اهنه
ريم: وين كان ؟
ام سيف: سار يرقد في المسيد اونه ماشبع رقاد الصبح يوم اني وعيته
ريم: حسبي الله ع بليسك يا جسوم .. وقفتوا قلبي والله
ام سيف: شدراني انا بعد شحقه اتصلت بج .. من خدايتي ماعرفت منو ارمس
ريم: لا ماعليه امايه الحمدلله انه بخير انا يوم برجع دواه عندي
ام سيف: عندج اياه .. يالله برايج بقوم اشرب لي ماي نشف ريجي
ريم: يالله فمان الله

سكرت ام سيف عن ريم..و ردت لمكينتها من عقب ما تطمنت على جاسم ..
اما جاسم خلى يدته وروح فوق يكمل رقاد في حجره ريم..

وريم من عقب ما تطمنت على اخوها طمنت ربيعتها ..

سميه: وين لقووه؟؟
ريم: ههههه والله سالفه جسوم.. اونه ماشبع رقاد وسار المسيد يكمل رقاده .. اتمرد من طلعت عنهم امبونه ماييسر يقول مابسير المدرسه .. الا امايه حليلها هب رايمتله..
سميه: يالله المهم انه هو بخير .. قومي انسير الكافتيريا مدام الكلاس بدى وبعدنا مادخلنا اكيد بيحسبنا غياب طافت ربع ساعه ..
ريم: يالله عيل ..

تذكرت ريم شي..

ريم: كم التاريخ .؟
شافت تيلفونها ع الكلندر..
سميه: ليش؟؟
ريم: اليوووم عييد الأم .. والله فبالي من كم يوم .. نسيت السالفه.. بتصل فاميه ..

سميه اطالعت ريم وابتسمت .. مازالت سميه تتمنى تكون شرات ريم فاهتمامها لامها ..
ريم: اتصلي لامج انتي بعد
سميه: ها.. هي بدقلها ..

اطالعاتها ريم وفخاطرها ترمسها عن وضعها هيه وامها ..ريم كانت تشغل بالها من تشوفها تستعر من امها .. امها ما سوتلها شي شو ذنبها يعني انها مب مواطنه! تراها بتم امها .. لكن ريم ما اقحمت نفسها فالموضوع .. عل وعسى سميه بروحها من نفسها تحن على امها ..

اتصلت ريم فامها عليا وهنتها بها اليوم .. وعقب اتصلت فيدتها ..

ام سيف: ها امايه
ريم: ههههه امايه .. ترا اليوم يوم الام .. وانا نسيت مساعه ما اهنيج ..كل عام وانتي بخير
ام سيف: فدييت روحج .. وانتي بخير يا اميه.. الا عاد انا شدراني بها السوالف
ريم: ههههه يلا ماعليه المهم نهنيج .. سموه تراهم يوم الام ..

وسكرت عن امها .. وما نست ناعمه .. قالت اكيد انها راقده .. طرشتلها ع تيلفونها تهنيها .. وطرشت مسج لخواتها مي وساره تذكرهن بها المناسبه ..
وكملت دربها ويا ربيعتها للكافتيريا..

اما ساره فها الوقت كانت راقده .. انتبهت ع المسج الي مطرشتنه ريم .. ابتسمت وعلى طول طرشت مسج لامها تهنيها .. شافت انه الساعه وصلت 10 .. دوامها اليوم يبدى 12 .. تمت تجلب ع السرير وعقب قامت .. طار عنها الرقاد..
وعقب ما تغسلت ردت الغرفه .. شغلت الليتات وفتحت الكبت اطلعلها لبس..

انتبهت لميوه انه بدت تجلب .. ونشت ..
مي: ساروه احترمي نفسج وسكري الليت
ساره: اف قومي بسج انزين انتي
مي: والله انا انسانه ماعندي دوام لين الظهر
ساره: بتلبس وبتعدل وبظهر عنج
مي: والله انج سخيفه..
ساره: قلتلج بخلص وبظهر
مي: لاتقرقعين الكباته انزين..ادريبه الا شغل مغايض
ساره: ميوووه لاتسوينهاا سالفه..
مي: مالت عليج صدق حقوق الغير مهضومه عندج.. بتشوفين انزين.. وحده بوحده
ساره: انتي الي تبين تغايضين..
مي: اوكي انزين

غطت مي نفسها باللحاف وحاولت ترقد .. لكنها جيكت ع تيلفونها تشوف الساعه وشافت انه واصلنها مسج قرته .. خوزت اللحاف ..

مي: ايه السودا
ساره: ريلن بياخذج
مي: جب.. هنيتي اميه؟
ساره: هيه ..
مي: بدقلها عيل
ساره: يمكن عندها حصه
مي: بدق بشوف..

اتصلت مي بامها .. بس ماردت .. فطرشتلها مسج ..

مي: بطرش اهني نعوم بعد
ساره: هههه نسيتها هاي
مي: تعالي اندقلها عيل..

اتصلت مي فناعمه وحطته سبيكر ..

ساره ومي فنفس الوقت: مبرووووك .. كل عام وانتي بخير
مي: بل عليج بدق الخشب
ساره: لاحبيبتي مخطوبه انا شو عبالج
ناعمه وهي تثاوب: شو صاير؟
ساره: ايه انتي راقده.. قومي قومي .. اليوم يوم الام .. لا ترقدين
ناعمه ابتسمت : هي نسيت .. الله يبارك فيكن ..
مي: ليش مرقده لين احين؟
ناعمه: قمت الصبح وعيت العيال وركبتهم السياره ورديت ارقد .. احس بتعب
مي: ياويلي عليج.. ماياج خير انتي من ها الحمال..
ساره: سكتي لا تذكرينها .. بتلوعنا بوحامها الحين
مي: هههههه حليلج يا نعوم
ساره: حليل الياعده لله ..
ناعمه: يا مسودة الويه ..
ساره: هههههه فديتني بيضا ..

انتبهت ساره لتيلفونها يرن .. وربعتله .. اما مي كملت سوالف ويا نعوم .. انتبهت لملامح ساره .. استغربت ليش مخلتنه يرن وماترد.. وشكلها امبين انه مختبص..
وبعد ما سكرت عن ناعمه ..

مي: شو بلاج صاخه
ساره: ها
مي: منو يدق؟
ساره: منو
مي: بلاااج مضيعه
ساره: لا .. بس غريبه .. ليش يتصل؟!
مي قامت من الفراش ويلست تستوعب..
مي: مروااان؟
ساره: في غيره!
مي: ليش مارديتي
ساره: ميوه تبين تسويلنا سوالف انتي!!
مي: انزين عادي خطيبج تراه
ساره: انا ما يعيبني جيه.. اذا الحين بنطلع كل اللي فخواطرنا شو خلينا لعقب العرس!!!

مي قامت من سريرها وتوجهت لكبتها .. طلعت فودة ويها وفرشاتها ومعجونها وغسول للويه.. طلعت من الحجره وخلت ساره فحيرتها ..

مروان ما يأس ورد يتصل مره ثانيه لكن ساره مب طايعه ترد .. وشوي وصلها مسج من مروان ..

" صباح الخير ..

ساره لو كنتي واعيه ردي عليه .. ابا ارمسج ضروري .."
عقت التيلفون من ايدها ولحقت مي اختها الحمام .. شافتها يالسه تفرش اسنانها..

ساره: ميووه .. مروان طرش مسج يبا يرمسني ضروري اونه
مي هزت راسها بالايجاب
ساره: افف بسرعه خلصي ..

بعد ما تغسلت مي وهي تنشف ويها ..
ساره: شو الحل الحينه
مي: رمسيه شوفيه شو يبا انزين
ساره: ميوووه استحي ..كيف برمسه
مي: اللـــه وأكبر ..ساروه البليوت تستحي
ساره: اف ميووه لاتمين تغصصيبي
مي: صخي انزين تعالي الحجره فضحتينا ..

ردن الغرفه .. وساره قبضت التيلفون وشافت مس كول ..

مي: دقيله ساروه ما بتخسرين شي
ساره: مي انتي تحبين تسوين شي من ورا اميه؟؟
مي: طبعا لا .. بس جبري بخاطره ها الفقير وشوفيه شو يبا.. بيتم ولد خالج تراه
ساره: ماعرف
مي: هاتي تيلفونج انا برمسه ..
ساره : هزرج؟
مي: هيه هاتي ..

زخت مي التيلفون .. اول ما بغت ادق ع رقمه اتصل ع طول ..

مي: يالله تستر علينا.. اسميه متخبل ها الريال ..
ردت مي: الوو
مروان: السلام عليكم
مي: وعليكم السلااام والرحمه
مروان وهو متردد: شحالج ساره!
مي: ههه انا مي .. وانا الحمدلله بخير
مروان وهو حايس بوزه: ثرج انتي
مي: ها بديينا
مروان: راقدات انتن؟
مي: هي .. قبل شويه ناشين.. عاد تعرف دواماتنا متأخره
مروان: اهاا.. عيل ساره وين؟!
مي: ممم
مروان: ها؟
مي وهي تتطالع ساره تباها ترمس . وساره متردده ..
مي: هاذيه هاه .. اندوك اياها شكلها تتغلى عليك ..

فرت مي التيلفون على ساره وخلتها فالامر الواقع .. رفعت ساره التيلفون .. حست بأنفاس مروان فالتيلفون وبدت تتوتر.. سحبت مي من بدي البيجامه من ورا وظهرتها برع الحجره وميوه تصرخ عليها .. قفلت الباب ويلست ع الشبريه ..

ساره: الو
مروان: اخيرا تكرمتي علينا!!
ساره: ها.. لا سوري كانت ميوه مسويه حشره
مروان: هي.. شخبارج
ساره: الحمدلله تمام.. شحالك انته
مروان: يهمج حالي!
ساره تمت ساكته يبين على لهجته انه عتباان واايد.. لكن هيه شو بايدها تسوي ..
مروان: ساره انا داقلج وابا اقولج سالفه
ساره: شو مستوي؟
مروان: سمعيني زين .. ماباج تاخذين قرار متسرع.. ساره الصراحه بيني وبينج انا عيزت من صدودج الدايم .. خلاص ماروم اصبر ابا املج ..
ساره انصدمت من قرار مروان وتمت ساكته ولا تنطقت بشي..
مروان: ساره الله يخليج لاترديني .. انا محتاجنج..بس ماروم اصبر بدونج.. فخاطريه اخذ واعطي وياج بدون قيود.. انتي تحججين انه ما في بينا شي رسمي .. وانا الحين بسوي ها الرسمي وبملج .. قولي شو رايج
ساره: مروان
مروان: عوون مروان
ساره وبدى صوتها يتغير ومب قادره انها تتمالك اعصابها
ساره: انا بعدني .. كيف تبى تملج
مروان: ساره قلت ملجه هب عرس
ساره: ولو
مروان: يا ساره فهميني
ساره تمت ساكته
مروان: ساره لا ترديني ..
ساره: مروان لو انا وافقت عبالك الاهل بيوافقوون!!
مروان: لا تحاتين الاهل ولاتاخذينهم علثه.. انا رمست الكل عن ها السالفه .. حاولت قد ما اقدر اني اقنعهم .. وقلتلهم اني بقدم لصندوق الزواج وقرض الاسكان وشكلهم مقتنعين لانهم يعرفون كيف ها الامور تبطي.. ساره خلي كل حد عنج .. سمعي لقلبج يا ساره .. بتريا منج الرد ..
ساره: بس
مروان: اكيد امج بتشاورج .. وانا بتريا ردج لين هذاك اليوم .. خلاص مابضغط عليج اكثر وما بقنعج اكثر.. اذ وافقتي تراه يوم عيدي واذ لا تراني مالي غير الصبر .. فكل الحالات تراج لي ..
ساره حست بحراره تسري فويها .. استحت وايد .. ماتوقعت ها الجرأه كلها من مروان .. وما ردت عليه بشي ..
مروان: خلاص انا بخليج الحين.. وسلمي على ميوه ..
ساره: يوصل ..
مروان: فمان الله
ساره: الله يحفظك

سكر مروان عن ساره .. وهو مب مطمن ابدا .. شكلها مب مقتنعه بالملجه مول..
اما ساره بدت الافكار تسيطر عليها.. سمعت دق ع الباب .. فتحته وردت طاحت ع الشبريه..

مي: سكرتي؟
ساره: هي
مي: شو يبا؟؟
ساره: يسلم عليج
مي: لا والله . يبى يسلم عليه
ساره: غبيه.. لاتميلي زنه..انا برقد
مي: غربلج الله .. والدواام
ساره: مالي بارض..
مي: مادري شو قالج خلاج مختبصه جذه ..

ما ردت عليها ساره .. وغطت نفسها باللحاف .. رمسة مروان تمت ترن فاذنها.. هو شاور الكل واقنعهم .. رمسها وحاول وياها .. لكن هي ما تبى تملج الحين.. بعدها تحس عمرها صغيره على ها الخطوه.. ما تبى تلتزم من الحين ..
لكنه يحبها.. يباها.. ويحس بتصرفاتها انها تصده ..هي ما تقصد تصد حبه .. لكن بالنسبه الها سابق لاوانه .. كل شي في وقته حلو .. ليش هو مستعيل..
حست بنفسها ضعيفه فوسط ها التفكير .. بدون ما تحس دمعت عينها .. مسحتها على طول وقاومت مشاعرها اللي تقصف بها ..

أما مي.. فطنشت الموضوع ولبست للدوام وطلعت من الحجره .. كانت تمشي وهي عيونها ع التيلفون تقرى المسجات الي واصلتنها .. تأففت من خاطرها .. رفعت تيلفونها واتصلت فأسما بنت عمتها..

مي: مرحب
أسما: مراحب
مي: وينج انتي؟
اسما: فالمبنى اليديد
مي: ومنو وياج
اسما: ربعنا..
مي: منو انزين
اسما: قوم عواش العين
مي: اهاا.. زين بمر عليكم اسلم.. انا طالعه قبل دوامي بوقت
اسما: زين تعالي
مي: يلا حبيبتي طلبيلي شي اكله لين ما اوصل
اسما: لاااوالله
مي: خخخ يلا ماشي.. ماعندي وقت اطلب .. بيي باكل وبسير اداوم
اسما: اف منج.. يلا انزين تعالي..

كملت مي دربها لين وصلت مبنى80 ودشت صوب الانشطه الطلابيه وهي عباره عن مطاعم وكافتيريات .. اتصلت فاسما تبى تعرف وين هي يالسه .. دلتها ع الطاوله اللي يالسه عليها وسارت صوبهم ..

مي: سلامو علييكو ..
عايشه: وعليج السلااام والرحمه .. مرحباااا السااع مرحبا ملايين فذمتيه ولايسدن..
مي: هيهي اخجلتي تواضعي ..
أسما: قربي حياج..
مي: وين ربعكم عيل ..
اسما: من شوي مروحين كلاساتهم ومحد تم غيرنا انا وعواش
مي: اهاا.. واشحالج يا عواش؟
عايشه: الحمدلله بخير وسهاله الغاليه.. انتي اخبارج؟
مي: والله تمام .. من متى مخلصين دوامات
اسما: من ساعه تقريبا
مي: زين يحظكم .. مب انا توي ببدى دواماتي
عايشه: والله بنات السكن ما يبن الا الرقاد.. مريحات عمارهن كله ياخذن دوام مسائي
مي: خخخ مب من شي .. نسهر الليل ونرقد النهار
عايشه: والله ماعرف كيف عيشتكم فالسكن..
اسما: وناسه السكن والله
مي: مب للكل اسوم..
اسما: صح انزين .. بس بعد لمة البنات وناسه
عايشه: يا انه فخاطريه اتم ليله وحده بس فها السكن.. لكن بينقدون عليه
مي وهي تتطالع عايشه باستغراب..
مي: وليش ينقدون علييج؟؟؟
عايشه: عاده تعرفين انتي.. اهلنا ما يواطنون السكن
اسما: وليش ها الكثر متحاملين ع السكن؟؟ شوفيه ثره ينانوه؟؟
عايشه: شدراااني يا اسوم .. تخيلي في وحده من ربعي اخوها ضربها ضرب يوم عرف انها سارت السكن عند ربيعتها
مي: حشى .. وليش ها كله..
عايشه: ماخذين فكره عن السكن والبنات اللي فيه
مي: شو الفكره عاد
عايشه: يعني
مي وهي تستعبط: هو صح السكن مسكوووون بس بناته زينات ماعليج
عايشه: ههههههه الا مسكونات بناته
مي: حرااام فديتنا والله..
اسما: بسم الله علينا.. الا جناحهم هاذيل ولا نحن الحمدلله مرتاحين
مي: يلا عاد فكل مكان تراهم متواجدين..المهم ردينا للسالفه..ليش ماخذين فكره؟
عايشه: عاد تعرفينهم عبالهم انه بنات السكن مب اوكي
مي: بس لاه .. والله ماعندهم سالفه بنات السكن حالهم حال البنات اللي برع السكن يسد انهن متغربات عن اهاليهن ومتحملين معاناة السكن عشان الدراسه
اسما: ترا اللي ما يعرفك ما يثمنك
عايشه: اجل اجل
اسما: هههههههه هاي مالتي اجل اجل
عايشه: بس والله من رابعتكم بالعكس وايد حببتوني فالسكن.. احس صدق فرق بين افكارنا قبل والحين ..
مي: احم احم شي طبيعي.. عرفتي بنات مو حيالله
عايشه: يالله عاد..
مي:هههههه
عايشه: الا تعالي ميوه بتخبرج
مي: هاه
عايشه: شحالها فطيم وياج..؟؟
مي: فطييم؟!
اسما وهي تتطالع مي وتبتسم..
اسما: هي فطييم
مي: اي فطيم؟
عايشه: اونج عاد الحين
مي وهي تطالع اسما.. وكأنها فهمت منو يقصدن ..
مي: فاطمه؟!
اسما: هي فاطمه
مي: بلاها
عايشه: ماشي نقولج اخبارج وياها
مي: عادي
اسما: والله ميوه تجلط الواحد من برودها..
مي: ليش شو سويت
اسما: الحين البنت متخبله الا تكون وياج وانتي طااااف
مي: اسموه كم مره بقولكم اني مب مال ها السوالف
عايشه: انزين ميوه البنيه الا تبى تكون ربيعتج
مي: لاوالله.. عادي انزين من الله امشيه وياها ربع عادي.. بس هي وايد تبالغ..بس طفرتني مسجات كل شوي وينج وين سرتي وين ييتي شو سويتي.. تيلفونات ماتوقف.. والله شي يطفر الواحد
عايشه: خيييبه يا ميوه ..
مي: هي والله.. انا من قبل قايله لساروه واسوم ربيعتكن لاتعطنها أمل اني بكون وياها قو
اسما: انزين ميوه ليش يعني ماتكونين وياها ربيعه قو
مي: ليش هو بالغصب؟!
اسما: لا مب جيه.. بس فطوم وااايد اووكي
مي: اف اسوم بس لاتلعوزوني.. انا الكل عندي ربعي وكلهم نفس الشي..
عايشه: الا ماتحتايين تكون عندج وحده وااايد وياها فالسكن
مي: مب لازم ..
اسما: راسها يابس هذي
مي: خخخ شو بسوي ..

اطالعت مي ساعتها وصرخت ع البنات ..

مي: كله منكن اتأخرت
اسما: وين كلاسج؟
مي: هنه فوق..
اسما: يلا سيري سيري يا الدحدح
مي: الله واكبر.. يلا سي يو .. بباي عواش
عايشه: تبيني اوصلج غناتي
مي: لا فديتج تسلمين.. خلج ويا بنت العمه
عايشه: خلاص عيل..
مي: باي
عايشه: الله يحفظج

وسارت مي صوب القاعه اللي فيها محاظرتها .. وهي فبالها الرمسه اللي دارت امبينهم توه.. بس حاولت تتجاهل الموضوع وكملت دربها ..



*************************
(الأربعاء) 23 مارس 2005
*************************

فجر كانت قاعده في محاضرتها في جامعه الكويت من بعد ماسحبت اوراقها من الامارات ورجعت تكمل فالكويت.. كانت تفكر في الامارات .. والدراسه هناك ..كانت حابه الوضع..لو ما اللي صار وعكر عليها كان ممكن تكمل حياتها هناك..لكن صار اللي صار ..
حاولت انها تبدى من اول ويديد.. حسنت من علاقتها بمرت اخوها ..حاولت تكون حياديه في البيت .. عشان ماتسوي لنفسها مشاكل .. لانه خلاص ماعاد عندها حل بديل الا هالبيت وهالدراسه..
انتبهت وهي فوسط تفكيرها لحد مركز نظره عليها .. التفتت لقته يالس يطالعها واول ماشافته اختبص ورد اعتدل في يلسته ..
طنشت فجر .. وحاولت تركز ويا الدكتور لكن المحاضره خلصت ..
لمت كتبها عشان تطلع تسير البيت .. جيكت على تلفونها لقت ربيعتها زهره مطرشتلها مسج .. ابتسمت فجر للمسج اللي وصلها .. ويوم يت بتقوم لقت حد واقف جدامها ..
ماتعرف ليش اطالت النظر فيه .. الريال تم يطالعها يبا يستأذنها فشي.. وفجر عقدت حياتها وهي تشوف صورة أحمد فها الشخص.. نزلت عينها ولملمت اغراضها وهي مستغربه من اللي صارلها توه..

الولد: لو سمحتي
فجر: نعم
الولد: ممكن انقل عنج المحاضرات اللي فاتتني ؟
فجر: انا مو مسجله شي
الولد: شدعوه
فجر: صج انا ماعندي تقدر تسال أي احد بالمحاضره
الولد: اوكي شكرا ..
فجر: العفو ..

شلت كتبها ومشت عنه .. خلاص بعد كل اللي صار .. عاهدت نفسها ماتعطي لنفسها او لغيرها مجال انه يتقرب منها او تتعلق بحد.. مشاعرها مب بالشي الرخيص عشان انها تفتح المجال للعب بها ..

وصلت للموقف وركبت سيارتها وحركتها متوجهه للبيت .. ابتسمت وهي تسوق .. من شهر وهي فالكويت تحس صارلها فتره ما خطت ها الشوارع وما سارت وردت..كانت تحس انها مقيده عمرها باخر احداث صارتلها في الامارات منعتها من انها تونس عمرها .. لكن اليوم في شي تحسه قوى عزيمتها ..
صدق تولهت على بلادها وايد ويا فبالها انها تقترح على بشار انهم اليوم يروحون البحر ..

****

بدريه كانت يالسه مع عمتها بعد الغدى تقرا وتكتب رؤوس اقلام للدرس اللي بتلقيه اليوم .. اما عمتها كانت يالسه تتقهوي ..بعد ماخلصت بدريه من اللي تكتبه صدت لعمتها

بدريه: عموه
ام عدنان: ها امي
تنهدت بدريه ورمست: العرب ماردوا عليج جان يبون الملجه الاسبوع الياي والا لا
ام عدنان: لا والله يا امايه لكن امها ردت عليه انهم موافقين وماظن بيمانعون تكون الملجه الاسبوع الياي .. البنت مطلقه وماتبى عرس ودق ولا حتى عدنان يبى
بدريه: سألي ام البنت عقب الدرس اليوم
ام عدنان: ان شاء الله
بدريه: الله يجدم اللي فيه الخير ان شااء الله ..
ام عدنان:ان شاء الله.. انا بعد سالت اكثر وتاكدت عن سبب طلاقها حليلها خذت ولد عمها بهدلها .. ماخذ انجليزيه ومادرت الا عقب العرس وطلبت على طول منه يا يطلق ذيج او يطلقها .. واللي مايستحي على ويهه بدى بنت الحمرا على بنت عمه..
بدريه: غلطه اهلها ماسألوا اكثر عن الولد .. بس عشان ولد عمها يوزوها اياه جنه عيال العم ملايكه استغفرك ربي مب اوادم
ام عدنان: صدقتي .. عاد حليلها تكسر الخاطر بنت بعدها شابه 27 سنه
بدريه ابتسمت بحسره: الله يعوضها في عدنان ..
ام عدنان ربتت على ركب بدريه اللي كانت يالسه ع الكرسي : فيج الخير يابنتي انتي ماقصرتي ويا عدنان ابدا وتراج لعدنان عيونه المركبه ولا بيقصر ان شاء الله الله يوفقكم ان شاء الله اجمعين وياجرج على كل شي فديتج
بدريه ابتسمت ابتسامه باهته ماتعنى شي : امين
ام عدنان: انا بسير اطيح شوي لين الصلاه .. اسمحيلي فديتج ..
بدريه: مسموحه عمتي ..
نشت ام عدنان عشان تخفي دموعها عن مرت ولدها..كسرت خاطرها بس ما بايدها شي .. اما بدريه تعوذت من بليس ورجعت تقرا اللي كتبته عشان تراجعه قبل الدرس ..


****


المغرب نزلت مي من فوق من بعد ما ماخذتلها دش سريع من عقب تعب درب العين .. يلست ويا يدتها تسولف .. شوي حسوا بدردشة خفيفه عند باب الصاله .. شوي دخلوا جاسم ومايد وهم يزاقرون ..

ام سيف: ها بلاكم تزاعجون
جاسم وهو متحمس: امايه طلابه يايه هاكيه واقفه عند باب البيت
ام سيف: صه عيب عن تسمعك..حرام هاي مسكينه شو طلابه!
مايد: انزين امايه شو نقولها
مي: سيروا خلوها تدخل ..

تراكضوا جاسم ومايد برع وهم مستانسين .. اما ام سيف بطلت صرتها الي ع طرف وقايتها وطلعت منها بيزات..

مي: اسميج عيوزي ما تمين خالية اليدين
ام سيف: هي يا امايه ضريت الا دومي صاره البيزات فطرف الوقايه..نحتاي ولا شي ..
مي: يحيج ..

شوي دخلت وحده لابسه عباه ع الراس ونقاب وقفازات .. وكانوا جدامها مايد وجاسم يدلونها الدرب.. اما عند باب الصاله كانن مهره ومها واقفات يوايقن ويتضاحكن..


ام سيف: قربي قربي امايه

الحرمه تمت تهز راسها .. وقربت .. وتأشر ايدها للسما تدعي وحبت راس ام سيف ويلست ع الأرض مجابله ام سيف..

ام سيف: ها اميه شحالج!
الحرمه حبت ايدها من ورا وجدام واتجدمت بتحب ايد ام سيف لكنها بعدتها عنها ..

ام سيف: يلسي يلسي.. تبين قهوه تبين تمر
الحرمه هزت بالنفي .. ومي كانت تتطالع الحرمه مستغربه منها .. وتطالع جاسم ومايد اللي كانوا واقفين وعيونهم ع الحرمه ..
اما ام سيف غمضتها عبالها ما ترمس .. وردتها الحايه للناس ..

ام سيف مدت ايدها وهي ملحفنتنها بطرف وقايتها بتعطي الحرمه البيزات .. خذت الحرمه البيزات وخشتهم ع طول .. وقامت بتترخص من ام سيف..

ام سيف: يلسي يا امايه بنيبلج اكل واكياس طحين وتمر جان تبين ..

هنه الحرمه ما قدرت تقاوم .. وهي واقفه مجابله ام سيف حبتها ع راسها وعطتها المقفى .. ماسمعوا الا قهقه وضحك يتعالى ولفت الحرمه براسها وبطلت النقاب ..

" صاااادوووه"

قفزت ام سيف من مكانها وهي تشوف عمار جدامها .. تموا الكل يتضاحكون حتى انه مي دمعت عيونها من كثر ما تضحك .. وجاسم ومايد وعمار ميلسين ع الارض من كثر الضحك .. مها ومهره دشوا يشاركون الاجواء ..
اما ام سيف من الصدمه تمت صاخه وتتطالعهم بنظرات .

ام سيف وهي محمقه عليهم: سود الله ها الويووه جنكم تخلوني متولمه مب عارفه ارمس الحرمه عبالي بكمه ما ترمس .. عنبووكم زاد ..
عمار: هههههه الله حصلنا بييزااات .. يلا ميود وجسوم نسير ناخذ افلام بلي ستيشن..
ام سيف: غيركم الله من فريخات.. ميوه هاتي عنهم البيزات.. ما يستاهلونها قصوا عليه ..
مي: هههههههه حليلهم.. يلا ماعليه امايه صدقه عليهم..

وفوسط ها الاجواء والضحك .. دش سيف هو وناعمه الصاله الي كانوا رادين من العياده ..

سيف: ماشالله شو ها الضحك .. شالين الدنيا ..
مايد: فاااتكم والله .. سوينا مقلب لامايه
ام سيف: قصوا عليه عيالك وعمار ولد اختك
سيف انتبه لمي يالسه وتقرب صوبها
سيف: ميوه .. ييتو من العين ..
قامت مي ببرود وسلمت على ابوها.. اللي يلس حذالها ..
ناعمه: ليش شو سوولج؟ وعمار ليش لابسلك عباه!
عمار: هههههههه ترا قاصين على امايه .. سويت عمري مسكينه
سيف: ههههه والله انكم مب سهلين
ام سيف: يا الهروم يا الهروم ..

مي كانت مب مرتاحه فاليلسه حذال ابوها .. قامت من محلها تبى تظهر ..

سيف: مي ليش سايره!
مي اطالعت ابوها ولفت عنه: بسير ارقدلي ساعتين .. امايه خليهم يوعوني حق صلاة العشا ..
ام سيف: ان شالله امايه .. سيري ارتاحي

طلعت مي من الصاله .. محد اعار الموضوع اهتمام كثر سيف.. يشوف بعيونه ويحس كيف مي طفرانه منه .. من دروا بالسالفه وهي ما تقرب صوبه .. كلامها جدا سطحي وياه .. ماتعود عليها جذه!
ليش عيل ساره ما تغير فيها شي .. ريم امبونها سطحيه ويا ابوها .. والحين من عرست ما يشوف منها غير واجب الاحترام كونه ابوها .. بس مي طبيعتها مرحه .. لكن تغيرت صوبه .. تم فكره حيران .. ومب قادر يركز ويا امه ومرته فالرمسه..

دايما عقب كل يلسه وكل رمسه بينه وبين مي ها الافكار وها الهواجيس ادور فباله ومب لاقي حل لها الموضوع الي معقدنه ابدا.. ع الاقل ترمس وتقولها هي شو تبى يسويه وبيسويه .. لكنها حاقرتنه ..

اما مي فصدعت فوق .. دشت على ساره الحجره لقتها طايحه ع الشبريه ومسنده راسها على ايدها وتناظر السقف ..

مي: غريبه ما رقدتي
ساره: ما غريب الا الشيطان
مي: انتي حالج مختبص من عقب رمسة مروان.. قوليلي انزين شو قالج.. فضفضيلي انا خويتج ..

تجدمت مي من ساره ويلست حذالها ..

ساره: مااشي .
مي: قووولي ساروه ..
ساره تنهدت وغيرت من وضعية طيحتها وطاحت ع ينبها ويرت اللحاف..
ساره من غير سابق انذار: مروان يبى يملج
مي وهي متفاجئه: شووو
ساره: اللي سمعتيه
مي: بلاه ها استخف .. عنبوه ليش جي مستعيل
ساره: راسي يعورني بس ماروم ارمس ..
مي: انتي شو قلتي
ساره: ماعرف ميوه .. من يومين وانا ادرس الموضوع ..
مي: يعني شو تحسين
ساره: ماعرف ماعرف ..
مي: ما رد يرمسج انزين؟
ساره: لا بس طرش مسج انه يتريا ردي ..
مي: اميه تدري؟
ساره: هيه .. بس ما رمستني عن الموضوع
مي: ولو شاورتج؟
ساره: ميووه بس الله يخليج .. خليني احاول ارقد .. لكل حادث حديث ..
مي: مم .. الله يعينج ..

قامت مي من مكانها وسكرت الليتات عشان ترقد اختها الي من يومين يبين عليها التعب من التفكير وراسها وايد يعورها.. طلعت من الحجره ويلست فالصاله.. شغلت التلفزيون .. تمت تبدل ع القنوات وانتبهت لبرنامج يعرضون فيه جلسات شعرا .. استانست عليه وتمت تتطالع ..


*************************
(الخميس) 24 مارس 2005
*************************

طلعت عليا من غرفتها على صوت بناتها فالصاله .. طار قلبها من الوناسه اول ما شافتهن .. الاسبوع اللي خطف مازارنها .. تولهت على مي وساره واايد .. مها ومهره وياها فالمدرسه تشوفهم كل يوم لكن مي وساره اللي صدق تحن الهن وايد.. ريم من عرست قامت تزور امها اكثر عن قبل .. حتى لو فنص الاسبوع اتيها شوي يسلمون هي ونايف ويروحون ..جاسم كذلك يوم تباه طرشت له الدريول واييبه عندها ..

عليا: ميوه فديتج ليش ضعفانه ها الكثر ..
مي: مب ضعفاااانه
عليا: امبلاا ..
ساره: هي امبلا ميوه .. اميه تراها كله جبدها لايعه وما تشتهي تاكل شي .. استغفر الله ما جنه نعوم هي اللي تتوحم انتقل الوحام لميوه ..
عليا ابتسمت ع تعليق ساره : عيب ساروه
مي: اميه حتى ساروه تراها ادّوخ واايد
ساره: لا اميه مب وايد .. ساعات يوم اتعب من الدوام
عليا: ياربي يا بناتي شو غادي عليكن وحده تصدع والحمدلله الله شافاها والحينه هاي اتيها دوخه والثانيه جبدها لايعه..شو هناك
ساره: اميه ماعليج مني انا .. عادي بصحه وسلامه بس هاي ميوه
عليا: انزين ميوه وشله عاد لايعه جبدج وماتشتهين الاكل
مي وهي تتطالع ساره وحايسه بوزها..
عليا: شوفيج ميوه
مي: ماشي اميه .. بس جذي..دوام وكراف
ساره: اميه تقص عليج تراها .. تعرفيين حتى يوم نسير الجامعه ماتطيع تاخذ بيزات من ابويه تقوله عندها ..

عليا عقدت حياتها ولفت ع مي .. فهمت انه فالموضوع ان .. سوت حركه لساره انها تسكت عن الموضوع ماله داعي ترمس جدام خواتها ..
ساره: اوبس .. سوري..
عليا وهي ترمس التوم: سيرن طالعن احلام ومدوي وين .. خلهن ين بنتريق..
مها: سيري مهروه
مهره: مابسير بروحي.. تعالي ويايه
عليا: سيرن ثنتيناتكن اشوف
مها: مممم انزييين

قامن مها ومهره وسارن صوب حجرة احلام ومديه .. اما عليا فانفردت ويا مي وساره ..

عليا: شو ها الكلام الي اسمعه مي!
مي: شووو
ساره: احسن خل اميه تأدبج
عليا: ميوه حبيبتي ماقلنا انا بننسى السالفه..
مي: اميه ماارمت والله.. احس كل ماشوف ابويه جنه شيطان جدامي
عليا: ميوووه شو هالرمسه
مي: والله اميه شهر وانا احاول اني اكون عاديه وياه شرات قبل بس ماروم
ساره: ميوه انتي بروحج شفتي انه الميلس هشوه..يمكن ابويه ندم وتاب من افعاله خلاص
مي: مب بيوم وليله ..
ساره: انزين ولو ..
مي: ماروم والله احاول بس ماروم
عليا: ماعليه يا بنتي .. الابو لو هو مجرم بيتم ابو .. احترامه واجب علينا
مي: بس هو يمشي بدرب غلط .. ليش انتم ساااكتين.. ما يكفيكم سكوتكم طول ها السنين.. انا مابا ابويه يتعذب فالاخره ..

نزلت مي راسها تحاول انها تخفي عنهم دمعتها الي نزلت .. عليا غمضتها بنتها اللي تحاتي ابوها وماتقدر انها تتجاهل تصرفه هذا ..قربتها منها وحضنتها تخفف عنها ألم قلبها على ابوها..
اما ساره تمت تتطالع امها واختها .. حست بضيجه فصدرها .. شلت بعمرها وسارت حجرتهم ..

عليا: بلاها ساروه روحت
مي: مادلها..
عليا: وجسوم ليش مايبتنه
مي: قال بيي خلاف .. يالسين هو وميود يعابلون بتلفزيونهم خترب
عليا: واونهم بيعدلونه
مي: ههه شدراني ..

وبعد ربع ساعه يت ام راشد وريلها من الزرب ويلسوا ويا عليا وبناتها وبنات محمد وامهم .. حطولهم ريوق ويلسوا البنات وعليا وعبير يتريقن ..

ام راشد: يالله حد يتريق الضحى
عليا: ههههه شو نسوي يا اميه نرقد لين تسع ولين نلتم
ابو راشد: ريوق عقب الساعه ثمان مايتسمى ريوق
احلام: يالله يا ابويه تبانا نقوم ثمان لا حشى بنرقد نرتاح فها اليوم
مي: خوالي وين عيل.. ها وقتهم يلتمون فيه
عبير: محمد طالع من الصبح .. بيرد عقب شوي .. ما بيفوت لمة ها الخميس
مي: ومانع؟
احلام: هذا اكيد راقد لين الحين ..

قامت ساره من على الريوق .. تغسلت وردت تيلس حذال يدتها.. وشوي خلصوا الكل من الريوق وبدوا ياخذون ويعطون فالسوالف مع بعض ..
وعلى سوالفهم هذي دخل راشد البيت هو وحرمته ميره .. سلموا ع الموجودين ويلسوا .. شيخه دقلتلها عليا تشوفها ليش اليوم ما يتهم .. وشوي يت هيه الثانيه وكل شوي حد يا وكعادتهم الضجيج فالصاله ما يوقف ..

ساره كانت تشوف خالها وحرمته وتحس انها مستحيه تيلس فنفس المكان وياهم..تخاف فأي لحظه مروان يدش وماتعرف هذيج الساعه شو بتسوي ..
مي كانت حاسه فساره .. أشرتلها انهم يدخلون داخل .. وافقتها ساره وقامن مي وساره واحلام ..

راشد وهو يكلم عليا اللي كانت يالسه حذاله: ها ما شاورتيها بنتج؟
عليا لفت ع راشد: لا بعدني
راشد: ما بترمسينها!
عليا: امبلا.. بس يوم بحس انه الجو يساعد .. ماباها تحس انه نحن نجبرها ع شي
راشد: هي يا ختيه .. بعد وياها حق هيه لو ماطاعت.. الا ها مروان مستعيل
عليا: ههههه فديت روحه.. يوم اشوفه اطمن على ساره اكثر .. مروان ولديه وغلاته من غلات ساره ..
راشد: الله يحفظهم ويكتبلهم نصيب ان شاء الله .. وعقب عاد بنخطب لفارس من عندكم..
عليا ابتسمت لراشد: عاد خله على هواه .. مروان بروحه رمسك وقال انه يبا ساره..
راشد: لا ماعليج.. بعد فارس ما بياخذله حد من بعيد ..
عليا: بعدهم صغار .. خلهم فدراستهم ..
راشد: ان شاء الله خير ..

كانت شيخه اللي يالسه ع طرف شوي عنهم تسمع تهامس راشد وعليا .. تضايجت.. كان فخاطرها ترمس عليا عن سلطان .. بس شكله راشد سد الباب فويها..

وقبل اذان الظهر بشوي .. اندق باب الصاله .. وصوت ريال ..

" هوووود "

ميزت شيخه الصوت وقربتبه .. كان سلطان ياي يسلم على ها اللمه اللي تعود يشوفها كل خميس تقريبا .. وكان وياه مروان ..
يلسوا شوي لين ما اذن الاذان وقاموا كلهم عشان يصلون ..

في حجرة البنات .. كانن مي واحلام وساره يالسات يسولفن عن الجامعه .. دشن عليهم مديه ومها ومهره .. اطالعن ساره بمكر وتمن يتضاحكن ..

ساره: بلاااكن!!
مها: الزوج المصون توه فالصاله كان خخخخ
ساره: سخيفه
مي: اووه فاتنا .. ليش خليتونا انرد دااخل ..
احلام: بروحه ياي؟
مديه: هو وسلطان ولد عموه
مي: افف ما خليتونا نيلس شوهااا
احلام وهي تتطالع ميوه: ها شو بلاج تأففين .. ها كله عشان سلطان
مي: والله ماتعرفين كيف بخاطري ايلس واراقبه .. يعني صدق صدق فخاطريه اعرف مدى التحول اللي صاير فيه !
مهره: خييبه .. شو دكتوره نفسيه انتي
احلام: هههههه والله ميوه تحفه..
ساره: هذا سلطان ان مارد وصاع نفس قبل .. ها ويهي
احلام: بسم الله عليه . لييش يعني
ساره: ميووه دومها حاشرتنا مب مستوعبه التغيير اللي صار فسلطان
مي: هههههه والله حرام مب جي .. بس يعني احس الموضوع في ان
احلام: يالله يا ميوه ..الواحد يوم الله بيهديه لازم يباله ان .. عيل محد التزم فها الدنيا مول لين ما تستويله الان هاي
مي: مب فاهمين عليه انتو ..
ساره: ميوه حولي علم نفس والله اصلحلج
مي: تتطنزين يا الجلبه

وتعالت ضحكات البنات فالحجره .. دشت عليا عليهم وشافتهم بها الوضع.. ابتسمت وزقرت ساره تباها بموضوع.. بدى دقاق ساره يشتغل .. وحست بالموضوع اللي تباها فيه امها .. مي هي الثانيه حطت فبالها انه امهم شكلها بتفاتح ساره فالموضوع .. ودعت من كل قلبها انه مروان وساره يتوفقون فحياتهم..

أما بطلنا الثاني فالموضوع هذا .. كان توه ظاهر من المسيد وهو يوازي ابوه فمشيته .. وحذالهم كان سلطان ..

مروان: ها الشيبه
راشد: شاب شعرك .. منو شيبه!!
مروان: هههههه سوالف شو بلاك شبيت
راشد: الجو حلو اليوم
مروان: ان شاء الله نسمع عيل الاخبار الطيبه
راشد لف على ولده: ليش شو متأمل انته
مروان: ماعرف
سلطان: هههههه ما تخيل مروان يقفط ..
راشد: ليش ما قالتلكم عليا انه ساروه ماتبى الملجه
مروان وجنه حد صب عليه ماي بارد: شووو
راشد: هي
مروان: لاتقول ابويه.. صدق صدق ماطاعت
راشد: يابويه شو بتسوي مالك غير الصبر ..
سلطان: يا حليلك يا مروان.. خلك خلك .. املج مره وحده ويايه
راشد: الا منو بتعايي انته .. راكب راسه الا يبا يملج

مروان تم صاخ عن ابوه وسلطان وهم يرمسون .. ويفكر.. ليش يعني ما وافقت .. كان متأمل خير من بعد ما كلمها ويتريا ها اليوم بفارغ الصبر عشان ترد عليه خبر .. وفالأخير ترفض .. تم متضيج واايد .. وهم يمشون يا اتصال لراشد ..
راشد شاف الرقم وابتسم ورد على طول ..

عليا: هلا اخويه
راشد: المهلي ماايولي .. هااا بشري
عليا: بالبركه ان شاء الله .. تراني توني مرمستنها .. ومن نفسها عطتني قرارها وهي موافقه
راشد: لاتقولين ..
عليا: الله يجدم اللي فيه الخير يا خويه.. طمن مروان تلقاه متحرقص من اسبوع
راشد: هههههههه هي والله ..

عيون مروان وسلطان كانت على راشد اللي يضحك ويبين على شكله انه متلقي خبر حلو .. اول ما سكر ..

راشد: ها مروان شو النفسيه
مروان: شو تتراياها تكون ..
راشد: ابشر عيل يا وليدي . كنت مساعه اسولف وياك .. وتراها توها عمتك تبشرني انه الخطيبه موافقه ع الملجه

مروان وقفت محله وهو يشوف ابوه وسلطان .. وعلى طول لوى على ابوه وحبه ع راسه .. وسلطان هو الثاني سلم على مروان ويباركله ..
فرحة مروان ها الوقت كانت مالها حدود .. ماعرف شو يسوي وده يرتبش ويخرش العايله كلها ها اليوم ..
قبض تيلفونه وطرش مسج لساره

" موافقتج تشرح الخاطر .. الله يتمم على خير"

قرت ساره المسج اللي واصلنها.. استانست وايد لوناسة مروان.. ماتوقعت انه يكون ها الكثر مشتط على السالفه .. حست انها فايد امينه وهي تتخيل عمرها بفستان الملجه وحذالها مروان ..
حمرن خدودها على ها الخيال اللي زارها وابتسمت..

السموحه ع التأخير .. رايــــــــكم !