.. مـامـات الواحات .. و .. بابات الواحات ..

يا اختي كم بيغيبون... بس مدرسته اتصلوا يسآلون عنه...

الله يحفظ لكم كتاكيتكم....

السلام عليكم

طمنونا على كتاكيتكم ٫٫٫ كم اعمارهم ٫٫٫ وفي اي صف ؟

اي كتاكيت .. خلاص كبروا ما شاء الله عليهم

فاطمة ٥ سنين
فجر ٤ سنين
محمد ٦ شهور

الله يحفظ لكم كتاكيتكم ..

حميد عمري 3 سنين ونص الحين " الله يحفظه "

يالله كيف كبرنا :)

تتوقعون عيالنا بيعرفون شي اسمه منتديات ؟

يوسف سنتين وثلاث شهور ودخلته الحضانة ينمي مهاراته .. أول فترة كانت صعبه بس عقب تعود ورابع زايد وكريم وأكبر وهاريسون وشنايا (ولا مواطن بينهم)

آنا صآرت بيشو ٣سنوات ..
سوآف توه يكمل سنه..

الله يحفظ هم ويبارك فيهم ويجعلهم من الذرية الصالحة..

آمين .. الله يخليهم لكم

ماشاء الله عليهم .. الله يحفظهم و يبارك فيهم...

سن ال٣-٤ سنين.. هذا سن الشطانه... الحمد الله انهم يدخلون المدارس بعمد ال٤ ... يهدون و يعقلون شوي من عقبها...

الاسطوري : بنتي مخبلتبي من سوالف ربعها.. لين قبل ما ترقد و هي اتسولف عن شما وشمسه و شيخه و سالم و عباتولا ( دلع عبدالله ) واللسته الي ما اتخلص :surrender:

بس بصفه عامه اتحملوا عليهم من كثره اللعب بالاي باد.... ترى والله يخبلبهم... خصه اذا تموا يلعبون فيه وايد في الليل...

حاولوا اتحددولهم وقت معين... وعقب تاخذونه عنهم

انا ولدي ملعوزني عشان براعم و الايباد مع انه عمره سنه و ٨ شهور و السبب كله مني انا اللي خليته يتعلق بالايباد عشان ما يلعوزني فالطياره .. و الحين يالسه أكلها بروحي ؛( .. ما اعرف شو أسوي به ابغيه يعافه ..

انا عندي احمد, 3 سنين ..
الله يخليلكم عيالكم

هلا مزايا...

حاسه بمعاناتج.. لانه للحين انا اعاني من هالشي ويا ولدي مع انه ماشاء الله صف اول ابتدائي... بس مثل ما اتقولين من كان صغير و عودناه ع الاي باد و براعم و الحين دزني جونيور... عااااادي استوى عنده اطلع عنه.. ولا يفتكر بحد دام عنده هالاثنين... وطبعا هالكلام يشمل البلاي ستيشن و حاليا الاكس بوكس ... !!!!

اللي رمت اسويله اياه الحين... قمت اخش عنه الاي باد.. عادي بالايام.. و خصوصا ايام المدارس... فالاجازات اعطيه بس احددله وقت... ساعه تقريبا واخذه..
واذا كنا بنسير مشوار طويل.. اعطيه في السياره عشان لا يحتشرون في الدرب...
يعني مجمل الكلام .. عطيه اياه في وقت الحاجه... بس مب دوم موجود جدامه..وخصوصا هو بعده صغيرون حبيبي...

حاولي اتخلينه يلعب برع.. وفريله بدائل يستانس عليهم... آلوان .. مكعبات وايد حلوه في سنه.. تطور قدراته العقليه.. سيكل.. كور .. سيارات.. وحاولي انت تيلسين تلعبين وياه.. وناستهم اتكون اكبر...

الله يعينا على تربيتهم التربيه الصالحه..
نفس الحال للتلفزيون.. اقوله هذا وقتك.. وهذا وقتنا...

لماح .. هلا والله ..

ماشاء الله ... الله يخليلك احمداني و يباركلك فيه... ^ـ^

شوق ..

ولدي من النوع اللي اذا بيعشق بيعشق أشياء معينه بس مش كل شي يشده
و الطامه الكبرى الايباد عشقه الابدي اتوقع ههههه ..
المشكله اني حاليا عايشه برع الإمارات و الجو ابدا مايساعد ع اللعب برع من كثر البرد
ف يكسر خاطري انه محكور و ما يطّلع طاقته الا ف براعم و الايباد ..
لدرجه انه وديناه ديزني عشان يحب ميكي و السفره كلها عشانه و فالأخير عطوني ايبادي ولا بغلس عليكم ..

الله يبارك فيه و يهديه يارب

هلا مزايا..

عيل انت وضعج غير دامج في غربه... محد بيلومج..
في مكتباتهم بتلاقين عندهم آفكار لالعاب و يوم بيكبر شوي ان شاء الله ..بتحصلين له جي العاب لصق و تركيب .. سوالف وايد يستمتعون بها اكثر من الموجود في البلاد...
يعني.. شوي شوي .. اخذيله العاب التركيب.. البزل.. او العاب حركيه ..كره سله.. بولنج.. من هالسوالف.. اللي ما اتخليه يالس طول اليوم و اتخليه يفرغ طاقته شوي..
الوحده في الغربه عندها مليون شغله اتسويها في البيت.. و تبا الفكه من حشره الصغاريه عشان اتلحق اتخلص..

الله يهون عليكم غربتكم و يردكم بالسلامه ان شاء الله .. :)

بنــاتي :heart: هنـد و مـريم و لطــيفة :heart:
الله يحـفظهم ويحفظ لكـم عيالكم ويخـليهم :fa35:

^ حبيباتي الله يحفظهم ويخليهم ...

الحمدلله الله رزقني ببنتي عائشة ..

ماشاء الله... والله يبارك فيهم
فيهم و يحفظ لكم عيالكم

حمد، بيكمل 4 سنوات
عبدالله، سنتين

الله يحفظ لكم عيالكم ويبارك فيهن ويجعلهم من الصالحين

وانا الحمدلله الله رزقتي ب ( صقر ) والحين عمره سنة واربع شهور الله يحفظه ويحفظ لكم احبابكم

السلام عليكم

ماشاء الله ... الله يبارك لكم في عيالكم ، يجعلهم من الذرية الصالحه ..

..

، الحمدالله ربي رزقني ببنوته .. عسى ربي يجعلها قرة عين لنا
و بدا عدنا مواااال السهر ^ـ^ ،الله يعين كل الامهات :)

الله يحفظهم يارب

رجعت قريت الموضوع من بدايته ، حبيت ،،،
الله يحفظهم لكم ويحفظلنا عيالنا وحبايبنا يارب ،

اليوم حبيبي يسوفي قارصته نمله
توهقت بعد قلبي اييني يبي يصيح ويتحجج ..

مادري بالاول حطيتله خل ، عقب دهنته بفكس ولبسته دلاغ
عن يتعبث بيده تالي يدق ويهه ولا عيونه !..

الله يحفظهم لنا ويعافيهم من كل شر
ويديم لكم ذريتكم كما يحب سبحانه ويسخرهم ..

(Heart)

'،
.

شو رايكم لو نقعد نكتب طرق تطوير مهارات الطفل وتعليمه بشكل عام وخاص سواء بطرق عمليه ، كتب مفيده لنا في التربيه ، برامج ، مقاطع فيديو ، ولهم بعد ملفات صوتية ومرئية تكون تعليميه وترفيهيه ينفس الوقت ، القنوات اللي تنصحون فيها ، أماكن الترفيه ، نوادي ومراكز تعليم خاصه ابهم من تعليم سباحه / رياضة / تحفيظ قران ، وغيره ..

بزمن تمكنت فيه الأجهزه منا مو غريبه ياخذونها اليهال متعه لهم كونهم يشوفونها بشكل مستمر ، والبديل هي الشغلات اللي بنقترحها ان شاء الله ..



^_^

^^ يحلييله الله يحفظه لكم ويبارك فيه

من الي لاحظته انهم ما يحبون التلفزيون الحين ويندمجون في الاجهزة الذكية الحديثة
بس لازم نحدد لهم اوقات معينة يلعبون فيها او يستخدمونها على اساس ما تأثر على صحتهم ونظرهم

ويحفظكم أخوي ويبارك لكم بذريتكم يارب ..

امممم انا مش من محبي الأجهزه لولا انها شر لا بد منه ، الأمراض اسم الله على عيالنا مو فقط على نظر ولا عدم احتواءهم بالشكل المطلوب وانما توصل لامراض عصبية وذهنيه عافانا الله واياكم يارب ..

حاولو لا تشغلونهم بالالعاب الخاصة بهالاجهزه ، وبرايي ممكن تكون المرئيات لها ضرر اخف جدا من الالعاب والبرامج الاخرى بالايباد والأيفون وغيره ..

الخطأ اللي يصير ان الأهالي احيانا يستانسون لمن الأطفال يكونون متمكنين بهالبرامج والالعاب الالكترونيه ، حلاتها الالعاب العملية واللي فيها حركه وأدوات يتم التعامل معها بشكل مباشر ..

؛

أتمنى من كل من له وجهة نظر يفيدنا ، ولكل من عنده أفكار وطرق وأماكن تنفع تعلم الطفل والاهم انها تونسه وتخليه عايش المراحل الاولى من عمره بأجمل وأطيب واسلم الطرق ^^،

السلام عليكم

شخبار العيال ؟؟

بالنسبالي برنامج جداً جميل اشتركت فيه و يساعد وايد .. هو برنامج معين المؤسس له د. جاسم المطوع ، خدماتهم حلوه و افكارهم و الاحلى وجود الاستشارات .. انصحكم فيه .

هلا ماماوات و باباوات الواحات

الصراحه عندي محمد عمره ٧ سنوات و مطلع عيني
عيالنا الحين بو سبع سنوات مب مثل قبل
يعني عيونهم مفتوحه ع كل شي ماشاء الله
يعنييييي جدا صعب التعامل وياهم
و برنامج معين صح مفيد وايد و يالس يساعدني

حاليا خشيت عنه الننتندو سويتش
و سويت كنترول علئ قوقل و سفاري و يوتيوب :shutup: لانه الحمدلله و الشكر شاف و عرف الاكو و الماكو .... ها كله وهو تحت عيني ماودره عند الخدم و طلعاتي وياه مول ماودره
الله يعين اللي يودرونهم عند الخدم و لاهين عنهم فالطلعات :shutup: