دير دياري ~ يوميات

اليوم : السبت "البارحه"
المزاج : احم :fa41:

الموضوع

نشيت 8 ابوي يسألني شو مقعدج من أول الصبح، أقول باجر الاحد يعني لازم ارقد من وقت
عقب قالي اروح عنه الجمعيه بما انه ميهود رحت خذت الماجلة، الضحى العود دزيت مسج حق
وحده اني اريد اشوفها و ما ارح اطول معاها بس 10 دقايق، ردت عليه انه مش مشكله بس وين و متى؟
حددت لها المكان و الوقت و كان مناسب من 3ونص نزلت المطبخ كنت ارتب كم حاجه + اسوي كيكتين
حق نسيبي و اللي بشوفها بس صارت من نصيب خواتي و اخواني. بعد المغرب طلعت عشان اشوفها و تلاقينا
كنت موديتلها شيء "ان شاء الله" يكون عيبها صج و ما تكون مجاملتني بالمسج. و قبل لا نركب سياييرنا
قالت لي أسلم عليكم "عاد ان شاء الله يوصل سلامها للجميع" تقول للي سئل و ما سئل عن أنامل قلب

لقاء عـ السريع و حلو :fa41:الله يحفظ هـ البنت تدخل القلب والله
اول وحده من الواحات اخذ راحتي معاها من دون لا استحي

رديت البيت بركنت السياره توي بنزل ياني اتصال أونه الا نطلع نتعشى :mf_leia: أوني زعلانه عاد
نعم ؟! الحين قريب الـ 8ونص و بكره دوام ما ينفع بس ماشيء كلمتهم مشت عليّه بالاخير
من رديت من السفر و هم يحاولون معاي و أنا مش طايعه أطلع مكان، غيرت جو :inlove:

اليوم : من دون تحديد
المزاج : اممم عادي

الموضوع
استغفر الله يا رب و ربي يهديهم و يبعدهم عن هـ الفعل
و ربِ ياخذ حقنا من أي شخص تحجنا فينا من ورانا، عيب لمن فلان يستأمن عـ شخص
و يقوم يشهّر فيه "حسبي الله و نعم الوكيل" هل هذا مرض ؟ امبلا أكيد مرض
ينطبق عليهم هـ البيت "يعطيك من طرف اللسان حلاوة و يروغ منك كما يروغ الثعلب"

بعيد عن الموضوع اللي سبب لي أرق هـ اليومين ^^

البارحه استانست و أنا احفظ الكم كلمة من أختي و انقلها لـ رفيجتي، هزبتهم شوي
ليه انه دراستهم سهله و حلوه بس هم ما يذاكرون، عدهم حاجه تتسمى مقالي =) عبالي اختي تتريق
عليه يوم تقول تذاكر مقالي عباره عن نقطه و منها 10 بنود و تحت كل بند بعد كم نقطه !!

يقولكم في قانون الاقتصاد يكون للمدين احقية الاختيار في استرجاع الديّن للدائن بعد 15 سنه ام لا
يعني ربيعتي تسلفني و بعد 15 سنه تقولي ردي خردتي أقولها مالج حق عندي، بس طبعا فالقانون الشرعي واجب استرداد الديّن
و شي اسمه الوفاء الاعتياضي "الوفاء بالمقابل" يعني ان يتفق الدائن و المدين باستبدال العين بشيء آخر مثال انه بدال الخرده
اللي عطيتها فلانه تعطيني سيارة. التخصص احسه اي شي لو دارسين موارد بشريه، علاقات عامه أحسن لهم
أشتقت للدراسه والله =(

اليوم : الاثنين "البارحه"
المزاج : الحمدلله وايد حلو

الموضوع

رديت من الدوام قعدت مع خواتي و كلمت أمي و بعد صلاة العصر رقدت
نشيت 6 ترتبت و طلعت عند أخواتي اسأل منو من الصغاريه يانا ان جان حد من عيال اللي نعرفهم يعني
وصيت الخدامه تيب لي رطب بس قريب الاذان يوونا خالتي و مرت أخوي + الصغاريه وزعنا عليهم
بعد المغرب يتنا أم سيف و بابا رد من وقت تعشينا يميع و أخواني كذلك

احب أقعد اجابل ام سيف، ترد لي الروح هـ الانسانه

خواتي اللي اصغر مني وحده بالكليه و الثانيه اولى ثانوي
دوم يقولن لي مزن انتي تفكيرج شرات الرسوم المتحركه =)، مدري افرح و الا أزعل
ما راح اتعب عمري و اعطيهم من أفكاري مره ثانيه
ها يزا الاحسان ؟


أفتقد شمعة أمل و أنامل قلب عن جد :heart:

اليوم : الخميس
المزاج : اتمنى يصير أحسن

الموضوع

من رديت من السفر لاحظت على عدد من الأعضاء ان يسون لي طاف =)
"يا ربي أنا شو مسويه، حد منهم دزيت لهم رسالة بـ هالخصوص -قبل السفر-و قالوا ماكو شي عادي"
عادي برايكم بس حبيت أقول اني أنا ما أوقف مع حد ضد حد، أنا ما اتحجى من
وراء ظهر فلان، لو يصير سوء فهم امبيني و بين شخص مستحيل أشيل بخاطري على الشخص والله

أحب أجدم الاحترام قبل كل شي و حسن الخلق
يقول الله تعالى : (ولا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ) فصلت:34
لو يظلون يسوون لـ ردودي طاف بعد بدز ويهي، يمكن اطيب خواطرهم
اذا كانوا زعلانين على فعل لابد انه بدر مني من دون قصد و لو اني عارفه نفسي
خاصه معاهم مستحيل أقط كلمة او أشد معاهم بالحجي.

أهل الواحات كثار منهم تغيروا :ohboy:
وين اللي كنا نقول عنهم اخوانا و خواتنا، ما يحتاي نشيل بخواطرنا على بعض
أنا ماريد أجبر أحد انه يرد عليه، بس هذي من مبدئ الاحترام انه إذا أحد يحاجيني
اني أرد عليه لو حتى انا انزعج منه.

كلامي هذا عن 3 أشخاص، وايد مضايقني هالشيء :bye2:

^ يمكن مشغولين أو ما شافوا رسايلج =)

و إذا مطنشينج عمداّ ، خلاص سويتي اللي عليج
بيي يوم و بيردون مثل ما كانوا و أحسن

لأن اللي معدنه طيّب لو زعل و تكلم بلسانه قلبه يبقى مثل ما هو و يرد مثل ما كان لو عقب سنيييييييين
لا تشغلين بالج ، الله أعلم بالنوايا =*

أصلا إلي يعرف انسانه مثل مزوووونه ما يزعل منها يالغاليه

أتشرف إني أكون إختج الواحاتيه يا أغلى مزووووونه :)

وكلام قصوده صحيح 1000%

الأغلبيه مشغولين هالفتره ودخولهم خطافي ....

اليوم : الثلاثا
المزاج : الحمدلله تمام

الموضوع

أخاف أموت من شوقي و أنت مطول غيابك "حق ماما و خواتي"
آخر مره أخليها تسافر و أنا اكون فالبلاد، المره اليايه بقولها يوم اسافر انتي تسافرين وين تبين
ما عندي مشكله تقعد زياده اسبوع و الا عشر أيام بس

امممم انا تقريبا انهبلت، البارحه كنت مع أبوي و أختي يالسه عادي
مره وحده ضحكت بصوت عالي، اختي تقولي تخبلتي أقولها لآ بس ذكرت أم سيف
والله مجرد ان تجي على بالي استانس، صج مودي يعتدل

أختي البارحه تروغني من البيت أونه مزن روحي الجم أقولها انتي شكو
تقول ان يات أم سيف ادري بج ما راح تروحين :blush: أم سيف مغناطيس تراها
من أشوفها الصق ابها، هالايام صرنا نتضارب وايد و السبه عيالها الحشاكل
اونه مزن لا تقعدين اطفرينهم اقولها حلوه هاي أغلب الوقت انتي معاهم بالبيت
و لما تجين عدنا يلزقون فيج بعد ؟!! ما صارت هذي أختي أبيها انزين

^ مشكوره مزن ، وللناس الطيبه كذلك وحشه ،
ربي يحفظلج هلج ، ويرد كل عزيز على قلبج سالم ..

/

اليوم : الثلاث اظن ..
المود : ..... ... .... !.
الموضوع :


ماكو قاعده مجابله شغل التدقيق من جهه ، ومن الجهة الثانيه اتابع مسلسل فريندز ،
ومن أقلب عالشغل أشغل الاناشيد اللي عندي ، اممم قاعده اسمع نشيدة شهر الوصال ،
مادري هالنشيده شلون ـ قشعريره ـ من يومين رديت اسمعها وليـ هاللحظه ، كل ما أحطها أرد أحس مادري كيف ،
اجواء رمضان على الاشيا اللي كنت اسويها وانا اسمع هالنشيده ، وكأني أرد أعيش كل تفصيله .!

وايد حلوه ، صافيه ..



ادعولي ،،،
اللهم انت ربي لا إله إلا أنت ، خلقتنا ، وحفظتنا ، ورزقتنا فيما نجهل ،
رحمتنا ، سترتنا ، جنبتنا الشديد علينا ، فأكرمنا اليوم ونحن نسألك ..

اللهم أنت ربي وأنا عبدك ، لا إله إلا أنت سبحانك إني كنت من الظالمين ..

اليوم : الاربعا ..
المود : ..... .... ~
الموضوع :


كلما أبي أبدا أكتب ، أحاول أجمع تفاصيل اليوم بذكر المهم بشكل مختصر ، أو إني أفصل ابـ ذكر المواقف اللي أحب أوقف عندها ،
بس مادري شلون ، لمن أيي بكتب ألقاني أسرح بيومي ، أبدي أستصعب ذكر أي شيء منه ، ماعرف شوللي حابه أكتبه ..

مزيج من الكثير من القفطات اليوم ، مع احساس غريب بتأنيب الضمير ، وأحيانا أقول ليش لاء ، بالعكس محد يدري .!
صدق صدق من أسوأ المشاعر إنك ملزم دائما لإظهار فعل حيال الغير ، وتظلك ماتدري كيف تتصرف ،
بالأخير تتصرف وتكمل تفاصيل حياتك من غير لا تدري إن كان الكثير مما يظهر منك عادي ، ولا مجرد أخطاء أخرى ..

مرات أشتهي أدخل بناس معينه ، أبي أعرف شنو أهو شعورهم حيالي ، أفكارهم عني وشوللي يظنونه فيني ،
اممم على الأقل تأثير تواصلي بالناس ، بس ، امممم أرجع أقول الحمدلله بإن الكثير مما نشتهي يظل بعلم الغيب ..

أول ما قعدت من النوم اليوم كنت ضايجه ، بس عقبها ليـ قبل لا اوصل عند رفيجتي تغير شعوري بشكل غريب ،
شليتها ورحنا الدوام عادي ، وهناك كذلك اممم زحمة مواقف اعتبرها ، اختصرها بخط عريض لكلمة [ قفطة ابـ ربطة ] ..

من شويه مريتهم الصالة ولقيت ابوي قاعد يكلم اختي ، مادري عن شو يتكلمون ،
المهم رحت صوبه "بابا حبيبي ـ وحبيته ع خده" ، صديت عقب صوب اختي وانا حاطه يدي ع خصري استهبل عليها ،
اونه "ها تغاريييـــــــــن ماترومين تبوسين بابا" ، كنت قابضه يده جي وكأني أسلم عليه وييت حبيت يده مره ثانيه وانا اغايظها ،
ترى بس حضرتي واختي الاصغر جي عادي نحب الوالد ونسوله سوالف ، بس اهي لاء جي من النوع اللي ينحرج والخ ،
قعدت تقولي اونه : انتي سيري نامي أحسنلج لول ، الدبه ..


على طاري الوالد ربي يحفظه ، حالتي تغيرت حيال أمور كثيره بشكل غريب ،
كل مره أقول بكتب عن هالحالات اللي ماحبها ، وأرجع أقول لا ما أكتب أحسن ،
أخاف أعيشه أكثر ..

اليوم : الخميس
المزاج : ملخبط
الإحساس بانك شخص "عادي" بعد كل اللي سويته و حققته ..شي صعب.. خاصة لو كان الاحساس موجه منك لنفسك ..
انا خذلت نفسي ولخبطت اولوياتي و اليوم اكتشفت اني ما اعرف انا وين من كل ها الاشياء ..انا وين من كل اللي يصير.. ليش تبلدت عندي اشيا كان المفروض تتفجر و تصنع مني الانسانة اللي دوم كنت اطمح اني اكون..
ما ادري شو استوى اليوم.. زحمة كلام و صداع لحظي لا يُطاق حسيته وهي تكلمني ..ضعت في كلامها و رحت بعيد .. " هذا اللي كنتي تبينه .؟"..
احياناً يوم اشوف نفسي بينهم ..ما احس باني انتمي لشي.. ما انتمي لافكارهم ..لمخيلاتهم ..واحياناً احس باختلاف يميزني .. و احياناً احسه يبعدني عن اللي ابيه ..بدون ما احس.. مثل اللي ضايع و يتعمد انه يفقد الامل بانهم يحصلونه يوم ..
ابني حواجز بدون ما احس.. اضيع فرص و اكتشف متأخرة ان الحياة هاي انا بعيشها مرة وحدة بس..

اليوم : السبت ..
المود : ..... .....
الموضوع :

من الخاطر ، الحمدلله انه ما تم الا ايام وبندخل بإذن الرحمن بشهر الخير ،
ابد ما صورت نفسيه كهذي ، لا وصف يفيد ، ولا حتى نفسي عارفه افسرني ..




ربي إني لما انزلت الي من خير فقير ،
ربي اني لما انزلت الي من خير فقير ،
ربي اني لما أنزلت الي من خير فقير ،
ربي إني لما أنزلت إلي من خير فقير ..

..

اليوم : الاثنين
المزاج : CooL

الموضوع

من أول الصبح و أنا متفائله الحمدلله، نشيت تجهزت شليت ريوقي لفيته "صايمه من البارحه الساعه 10"
نزلت ادق الموتر سلف ما يشتغل الموتر، نششت أبوي يقوم يجيك عالموتر قالي شي ما فهمته
قلته بشل موترك بروح العياده و برجع، وصلت العياده 8 الا ربع سحبوا مني دبي
أول مره اكون شجاعه شوي، شكلي كل مره بروح بروحي عشان ما دلع و اسوي حركات
كلش ما لعوزتهم، شفت ربيعتي آخر مره شابفتنها قبل سنه و 4 شهور
هاي كانت تكلمني يوميا من 10 لين 3 الفير مره وحده قطعتني من دون سبب، حتى اليوم يوم لمحتها
قلت ما بحرجها و اسلم بروحها سلمت تكملني و أنا جامده "ما شاء الله تزوجت و الحين حامل :fa41:"
ربي يسهل عليها و تولد بالسلامه

رديت البيت قلت لابوي وصلني سوى لي طاف، قالي تبين تروحين شلي سيارتي
خذت سيارته وصلت الدوام جان اكتشف اني ناسيه مبايلي و ابوي ما يعرف رقم البلاك بيري
رحت السياره شفت مبايله شليته و اتصلت فيه قلت له لو تبيني دق على هالرقم
من شوي جاء و اخذ سيارته و خلى مبايله عندي =)
الله يعطيه الصحه بو فاطمه لعوزته معاي من أول الصبح

اليوم : الثلاث ..
المود : .... ... .. .... !
الموضوع :





بعد !

اليوم : الاحد
المزاج : Sleepy

الموضوع

اتعرض لـ ازمة رقاد هالفتره، كل ابّي أرقد
ناشه الصبح زعلانه حسيت اني ياهل، الوقت اللي يفضل ارقد فيه "الظهر" اقعد
مبققه عويناتي فيه. من توصل الساعه 11:30 اسطل خواتي اونه رمضان قعدي معانا
حدي لين 12ونص بعدها لازم ارقد. واصله الدوام 7 و خمس

يارب يصير اللي في بالي

^ أنا عكسج يا مزن .. جنّي جنيّــة

أهلي مخليني منبّه لهم حق السحور و الصلاة لأني ما أرقد
أكره السهـرررر >.<

الله يحقق لج ما تتمنين ياااا رب :*

:fa43:^
آنا الجنيه الثانيه لوول ، ليل ونهـار بتحصليني واعيه لوول ..


اليوم :
دخلنآ بالخميس ..


المزآج :

مستآنسه ولله الحمد =)



الموضوع :

آحب خــوآتي آنــــا :heart: ، الله لايحرمني منهن يـــااارب ..

ختيه ام خليفه من ظهروها وهي عندنا ، وختيه العوده صايره تبات طول الاسبوع عندنا ومن يرد ريلها من الجزيره تروح ..

يعني البيت صايره فيه لمه حلوووه ، وسوالف وحط على بعض وقراض من الصبح يلين نرقد ..

رمضـان هالسنه غيير ، حلـوو لكن احس اني مول ماتفيج لـ شي

يعني لآ اطبخ ، ولا آطالع التي في ، ولا شي ، يـا ميوده خليفه واتريا مواعيد ادواه ، يا يالسه عند خواتي ..

عـاد انا وختيه العوده معروفات ف البيت عدايل لوول ، رغم اني انا وياها من نفس البرج لكن اكثر هنتين نتناجر لوول ..

آحس اني مقصره ف حق كل حد ، لا اسأل ولا ادق ل ربيعاتي ولاتواصل وياهن حتى بالمسجات ..

طيحه ختيه قلبت كل الموازين

وعلآقتي بـ بـومبا صايره قويه نوعـاً ما " الله لايغير علينا "

يقـولون لي اني تغيرت وصرت طيبه ==> يعني انا قبل كنت شـريره مثلاً ؟!

لآ بس يعني ماصرت اعصب عليهن شرات قبل ، وانا محصله وقت عسب اعصب ؟ لوول

شـي ثاني جايستني حاله اكتئاب ، كل حد كل حد يشوفني يقول لي وحده من الثنتين يـا انتي ضعفــانه يــا اللي لابستنه واااايد وسيع ..

ملابسي الجدام صرت اغوص فيهن ، يعني بشكل ملحوووووظ >< وانا هالوقت بالذات كنت ابغي احافظ ع وزني :fa43:


اليوم حماده ولد خويه رقدوه ف المستشفى بعد ، ريله مايروم يمشي عليها ، والله مادري شو صاير عندنا ف البيت ، كل يوم حد يطيح مريض

ختيه ام خليفه وولدها ، خلاف بومبا ،والحين احمدووه

الحمدلله ع كل حال ..




همسه خاصه :

لو ~ في يدي اصرخ وأعلن[ بحبك ] على كل هاالكون ..
~ بس المصيبه [ الصمت ] اكبر صفاتــــي



آلـف الحمدلله ع هالنعمه =)

اليوم : خلاص صرنا بالأحد ..
المود : ..... .... .....
الموضوع :


دخلنا باليوم الاثنعش !.

~

أحسني بكلي جالبه على عمري ، كل شي متداخل ،
وبالكفه الثانيه مادري اشـ ياينها صحتي كله جايستني لوعه ..

~

غصبن علي الموضوع شاغل تفكيري ،
مره أقول يمين ، ومره أقول يسار ..

~

غريبه شلون نكون نظن بنفسنا شي أو اممم مو ظن بنفسنا بس إن يعني متخيلين الصورة جذي ،
وبلحظة الصج تلقاك تحس وتتصرف بشكل مختلف بشكل كبير ..

ودي أبعدني عني !.

اليوم : الاحد
المزاج : sick

الموضوع :

راقده 5 ونص و ناشه 8 كلمت زميلتي تخبرهم اني بداوم 9
بروح العياده بعد الدوام، بشوف شو السالفه. ربي لا يواري عدو اللي اشوفه

ارد اقول يمكن النفسيه مأثره بما اني صرت تقريبا اشوف المدير يوميا :a116:
حليله هالريال مادري بلايه أنا قلبي صاير اسود عالخليقه :ohboy:

ودي أسافر :whistling:

مساء الورد

سلامات مزووونه ما تشوفين شر الغاليه

جان عالمدير ولا يهمج أخونا روز شو خانته !! بنوصيه عليج

الله يعافيج مزونه ويسهل كل امورج يارب

أهلا حلم

ربي يسلمج أختي و الشر ما ييج
ما يقصر أخونا روز =) من دون توصيه

شكرا عـ الدعاء الحلو و يسهل لج أمورج يا رب

مزن ،،، بالبركة عليكم المبنى اليديد ،،،

ربي يبارك فيك أخوي روز

اليوم : الاحد
المزاج : اممممم

الموضوع

ربي يسهل و توصل بنتنا بالسلامه :fa41:
يا الهي مستانسه قد الدنيا و ربي يتمم علينا الفرحه

اليوم : الاربعا اظن
المزاج : الحمدلله تمام

الموضوع

امممم دوامي 7ونص و أنا طالعه اليوم من البيت 7ونص
وصلت 7:40 ما كنت اسوق كنت اطير =) استحيت يوم شفت المدير داخل وراي
أكيد شافني و انا اجاوز الشاحنه و الباص :a116:

نفسيتي اليوم الحمدلله يا رب أحسن عن البارحه
علقت اللقمه بحلجي البارحه عالفطور أعوذ بالله، كانت فيّه غصه
ما تهنيت بالافطار نشيت عن يفتحون لي تحقيق عمي و أخوي

من كلمت أمي ارتحت "فديتج يا ليلى" يا علني ما اذوق حزنج

اليوم : ...
المزاج : الحمدلله تمام

الموضوع

تضحكني تعليقات أمي لو أكون ماطه البوز من تنطق بكلمه اضحك
يوم الاربعا ابوي راح العمره و رجع البارحه =) يوم الخميس رقدت مع امي
لو عليّه ما افج عنها

باليمعه و نحن رادين من راك اختي ام سيف تقولها شـ راح تسوين لمن تتزوج مزن
اونه لازم تتعودين تطلعين مع حد غير مزن، ردت عليها ما عندي مشكله راح اترياها
كل نهاية اسبوع و بطلع وين ابيّ و اقضي مشاويري
تقولها راح نسوي لج جدول يا يمه ان كل مره وحده منا اطلعج و اهي معانده الا مزن

ان شاء الله اليوم يصير شي و تستانس عليه ليلى :fa41:

اليوم : الثلاثا "اخيرا"
المزاج : حلو الحمدلله يا رب

الموضوع

من يصدق انو اليوم 28 من رمضان ما شاء الله، ربي يتقبل طاعتنا و صالح أعمالنا
الحمدلله الوالده استملت سيارتها قبل بارحه، فيني طاقه اليوم ودي اظهر شري =)

"ربي لك الحمدلله كما ينبغي لـ جلال وجهك و عظيم سلطانك"

اليوم : .....
المزاج : الحمدلله يا رب

الموضوع

امممم السنه بعد لعبنا تهادوا تحابوا برمضان =)، من بدت توصلني الهدايا برمضان
و أنا كنت شاكه باثنين و بيوم المصارحه "اول يوم العيد" طلع واحد من اللي كنت شاكه فيهم "ولد خالي" بو يحيى
قبل لا يقول هو عنده اسم منو قلت لهم انا حاسه انه اسمي عند مطر =) اونه تامي اعترفي منو خبرج
قلت له مطر انت نفس أخواني بالضبط أعرف ذوقك ههههههههه
وايد استانست عالهدايا اللي وصلتني منه

آخر هديه بيوم المصارحه وايد وايد عيبتني "عقد بـ حرفي" عاد الحريم و الذهب :blush:
و عطر جفنشي بلاي النسائي

اليوم من أول الصبح و أنا مرتاحه من عرفت ....

أخيراً الخميس
الحمدلله تمام

اممم احس اني ضايعه، مش عارفه شو اللي احتاجه بالضبط....

عندي حاسه سادسه ما تطلع الا لـ شخص معين، من البارحه و انا اقول انه
مش بخير و الضحى تأكدت، ربي يحفظه و يهديه و يتزوج و أرتاح أنا =)

اليوم : امممم الثلاثا
المزاج : أي شيء

الموضوع

اليوم عرس بنت عمي و مالي خلق أحضر الصراحه
لما خبرت امايه تقول بتقعد معاي !!

مشكلتي بالحياه اني ما عرف أجامل، و مستحيل اقعد
اتبسم بوجيه كلش ما اتقبلها ماحب انافق بمشاعري، استغفر الله يا رب
مادري بلايه انا بعد كنت متحمسه من الباديه و بردت البارحه :a116:
حليلها من بد خواتها هي الوحيده كلش ما قطعتنا من بعد وفاة عمي الله يرحمه
تستاهل عواش

اليوم : الاحد
المزاج : حلو

الموضوع

امممم مادري شلون بس صج أحس انهم مو خواتي، هاييل بناتي
ما عرف كيف اوصف بس من اتكلم عن مرضهم و الا تعبهم دموعي تنزل
بتخبل ان ياهم شيء، ماحب اشوف الوحده منهم متكدره

بس شوق البارحه طلعتني من طوري عصبت شوي عليها لان لسانها صاير طويل و ضحكتني وايد
تمت تدعي تقول ان شاء الله فلوسج تحترق و ان شاء الله ينسرقون صج ضحكت
و بسبب لسانها اللي طايل هاليومين و دلعها، بدينا معاها باسلوب العقاب
1. لو تحاجينا ما نرد عليها
2. لمن نطلع ما ناخذها معانا "عاد عوقها الطلعات"

و كل كلمه و الثانيه تهددنا بـ ابوي :whistling:

اليوم، الخميس
المزاج، ان شاء الله يعتدل للمسا

الموضوع

ودي أخذ اجازه يومين بس متردده، مادري بلايه حابه الدوام هـ الفتره
ربي يدوم هالحاله و ما يصيبني ينون و اعاف الدوام =) الحمدلله يارب
كل ما اذكر ان اليوم الخميس استانس لـ سبب واحد :a068: اني بصلي العصر و برقد
اليوم الوحيد اللي ارقد فيه :fa34:بعد الدوام

الفتره اللي فاتت انضغطنا شوي، أشياء تكدر الخاطر... بس الواحد مو بـ ايده شيء
ربي يهدي سرهم و الحمدلله عـ كل حال و الله المستعان

في خاطري شيء :ohboy:

اليوم الخميس: اممم هاليوم يوم راحتي :a049:

يوم يمعتنا (3 من ربيعاتي من أيام الثانوية + أنا) نتيمّع كل مرة في بيت وحدة من صلاة العشا لييييييين الساعة 12 :fa34:
صدق صدق نتريا هاليوووم ايي، و نيلس نخطط شو بنلبس و كل وحدة شو بتبدع و بتطبخ لنا لووول :wink:
فديييييييييتهن والله .. الله لا يغير علينا


المزاج : نص نص لأنه موسم امتحانات :crazy:

الموضوع:

بما انه وقت امتحانات يعني خلاص الويك اند ضايع ضايع و تتكنسل طلعة الجمعة اللي ويا ابويه و اميه :fa43:

عندي كويز و امتحان و تسليم اسايمنت في يوم واحد :fa39:.. كيف برتب وقتي و بخلص كل هالأشياء الله يعلم :d010:

ياااااااااا رب باجر أنش من وقت و فيني طاقة وأخلص مذاكرتي و المسا ياااا رب يااا رب يا رب أخلص الاسايمنتس الـ2 :fa45:


اليوم عندنا ملجة وحدة من أهل أميه ، يعني بتتكنسل يمعتنا :sad:
و أنا لازم أسير لأنه حرام أميه تسير و ترد في الليل روحها :fa52:



الشي الحلو اللي استوا اليوم هو انه كان عندي امتحان بالخميس الياي لكن تكنسل
و استوت حشرة في الكلاس، كل ما تقول الدكتورة تاريخ، قالوا البنات : لااااااااااا ما نبا عندنا امتحانات

ليييين تأجل الامتحان لبعد العيد :11:فكـــــــــــــــــة منه:tongue:

امممممم شو بعد استوا


سألت ربيعتي لو تعرف حد ماخذ ترجمة، أبا أصور عنهم كمن ورقة ناقصتني يوم كنت مريضة وغايبة
جان تقول ربيعتي: انه ربيعتها "ث" ماخذتنها

المهم يابت لي الأوراق
و انا خلاص صورتهن و بردهن على "ث" اللي اعرفه ويهها و هي ما تعرفني شخصيا بس تشوفني في كليتنا

يوم سرت عطيتها الاوراق و شكرتها وايد لأنها نفعتني

يوم روّحت عنها، كتبت لي على البي بي مسنجر: أوويييه هاي انتي !!
تدرين اني ما أدانيج ههههه
عقب قالت: بتقولين اني وقحة صح !!


و أنا جي :huh: .. قلت في خاطري: كلت حلالج و أنا مادري؟!

بس بعدين قلت: عيب أكون ناكرة معروف لأنها عطتني أوراقها و سوت فيني خير

بس ما بسكت لها لووول

قلت لها: لا تحكمين على الشكل
أنا ما يهمني رايج ولا راي غيرج طالما ما أغلط على حد ولا لي خص بحد
بس يمكن لأني ما أحب أعطي اي حد ويه إلا اللي أحس بهم يناسبوني :tongue: عشان جي تتحريني وغدة ولا متكبرة

==========

حسيييييييت انه كسرت خاطري قصايد "اللي هي أنا =p"
كل ما أتعرف على حد يديد يقولون لي: أووووه فرررررررررق بين شكلج يوم بس كنا نشوفج و فرق بين شخصيتج اللي أحين عرفناها
حد يقول خقاقة و حد يقول متكبرة و حد يقول لي: كنا نحس بج تطالعينا بإحتقار :k_special2:
حليلي والله :h_waa:


يعني ضروري أكون سخيييييييفة و ماصخة و أضحك وايد جدام الناس عشان أكون فنانة و حبوبة :fa44:

قصوده ... أصلا لنا الشرف إنه نعرفج :)

اليوم، الثلاثا
المزاج، الحمدلله تمام

الموضوع

أحيانا أبط الجبد ماما تقول =)
اونه كيف بارده حتى لمن تسولفين، انزين شو أسوي أنا جيه أماه
عشان جي مستحيل أخذ و أعطي مع أحد غير هلي، حد يتحراني اني اتدلع

محتاجه دعواتكم لي بالشفاء من كل بأس

اليوم، الأحد
المزاج، الحمدلله تمام

الموضوع

ناشه الصبح أقول حق أختي ما يصير أخذ اجازه اليوم بعد ؟
يوم الاربعا تعبت زياده بعد الدوام، كانوا رقود الظهر ما قدرت أصبر تلبست و رحت المستشفى
رايحه عشان العوق اللي فيني و طلعت انه فيني حراره، امايه متصله اونه شلون تروحين بروحج
و انتي مو قادره تصلبين عمرج، اقولها ما قدرت اصبر اوني قلت برقد كود انه العوق يخفف بس ماقدرت

الحمدلله خذت العلاج و لو انه الدكتور صدمني، بس الحمدلله عـ كل حال
أحس اني طحت مره وحده 3 أشياء مره وحده، مستحيه انه راح يزيد غيابي على هيك

اون يوم الخميس معطيني اجازه و لازم راحه تامه و ما تحرك كلش
بس فزعت لـ رفيجتي بالبديع :redface: من أول الصبح غيرت جو

اليوم، الثلاثا
المزاج، الحمدلله ان شاء الله دائما و أبدا أكون مرتاحه

الموضوع

قرأت بـ مدونة إحدى الأخوات حجي عجبني كتبت فيه "كوني مؤثره لا متأثره أينما كُنتِ، و توكلي
على الله مستعينه بقول الرسول صلوات ربي عليه : (لو أنكم تتوكلون على الله حق توكله لرزقكم
كما يرزق الطير تغدو خماصا وتروح بطانا) رواه الإمام أحمد والترمذي
والنسائي وابن ماجه وابن حبان والحاكم‏,‏ وقال الترمذي‏:‏ حسن صحيح‏.‏
أجعلي عملك لله و في الله، و من كان مع الله كان الله معه.

اليوم : الاربعا
المزاج : عال العال و لله الحمد

الموضوع

من وصلت الصبح مر علينا مسؤولنا أونه فاطمه سلامات شكو مداومه اليوم جان خذتي
أجازه اليوم :crazy: استحيت و أنا اتذكر البارحه عـ الساعه عشر تعبت و رخصوني من الدوام
:a116: رحت العياده و رديت البيت
الاسبوع اللي طاف يومين و هالاسبوع بعد يومين ؟!! يسمونها مصاخه أحس
عندي موعد بعد كم ساعه يعني بعد بترخص

ابوي اونه شـ ياج يا بنت، كل يوم و الثاني طايحه.. مأجوره ان شاء الله =)

ربي يعوضج يـ أم سيف ان شاء الله، أنا تعبت من هـ الحرمه على قولت ناس متأكده انها أكبر عنج ؟
شـ كثر أقولها لا تتحركين و لا تسوين بس عنيده أون أنا ما أرهق نفسي كأني أنا المتزوجه و اعطيها
نصايح !!

اليوم : السبت

التاريخ : 6 نوفمبر

المزاج : مكتئبة


السالفة :

عندي امتحان بعد ثلاث ساعات ومالي نفس اروح بس لازم اروح
ويوم انه فخاطري ارجع البيت ما اقدر
ليش يعني؟
الحياة تمشي عكس ما نبا لييش ؟

والله مـلـل وكآبــة

ان شاء الله كان امتحانج سهل...
الله يسهل عليج دراستج و يعينج على غربتج...

اليوم، البارحه الاثنين
المزاج، وحشني واحد
الموضوع

كنت متمدده و ملانه دخلت عليّه أختي تقول مزن ينزل مطر =)
سحبت البردّه و فتحت البلكونه أشوف شوق و شريفه مستمتعين باللعب تحت المطر
سحبتي وقايتي و نزلت الصاله تحت اول بادي لعبت مع امونه بنت أخوي
عقب طلعت الليوان مع خواتي...


عندما يرحل الذين نحبهم، يأخذون معهم كل أشيائهم الصغيره
إلا إبتسامتهم !! فـ هي تبقى معنا "واسيني الأعرج - طوق الياسمين"

اممم وايد وايد أفتقد خالي الله يرحمه، عسى الجنة مثواك و تسقى من أطيب نهر