مجلس الأصدقاء ،،

ليكون نااويه تغييبيين فتره .. يااويلج مني ..

ما عليج انتي من ردودهم كم يسوى بس يوم نشووف ردج من بين هالردووود ... صح غناتي ...

تسوييين خير لو تفتحييين موضوع خااص للتذمر ^_^

تصدقين انامل دووم ارسمج في بالي ..واحسااسي يقولي انج انتي نفس الي في بااالي ماعرف ليش ... !!

لول عهد لمن قريت ردج ذكرت وحده ، جي كانت تكلمني ^^"

وان شاء الله اذا المزاج ساعد ، بنزل موضوع نتذمر فيه ليش لاء =]
احم ، كح كح / انزين ، قوليلي شلون راسمتني بذهنج وانا بقولج صح أم خطأ P=

وبعدين مادري احس التواصل الكتابي غصب يخلينا نشكل صور ذهنية للناس اللي نتعامل معاهم ،
حتى لو ماكان بقصد ، وأحيانا حتى مانكون حاسين بإن نحن فعلا مكونين صورة عن كل شخص !

,

انزين ، وشسمه / ملانه بس مو حابه أجابل شي :surrender: ..

مسـآكم " جوري "

~ خطـآب :

مبـروووك مقدمـاً
الله يعطيك خيرها ويكفيك شرهـآ يـآخويه


~ عـهد :
آمس جـآن آسويلي ريوق " كورنفليكس " لوول ~ !*

وبـعدين انا مب يـآبسه آنتي اليـآبسه زيييين


~ رمش :

الله خلقنا بأحسن خلق

لكن النـآس مايفهمون ~ !


الله يهدييييهم ~ !

عهد الوداع ، رمش الغلا ، أنامل قلب ، مـهـابه ..

الله يباارك فيكم ، وآمين يا رب .. بس مب حقي .. حق أخوي عبدالرحمن ..
أنا ما اودر حبيبتي ، وفي لها .. ما آخذ وحده ع راسها .. لول

^
خطـآب :
~ أن شاء الله مب بس السيـآره ، حتى حرمة المستقبل يكون تفكيرك جيه ومايتغير =P

يعتمـــد مهــابه ... إذا كانت حبوووبه وخلوووقة وهااادية ومثل ما انا اباها ، ما بفرط فيها لو شو ما يكون ..

^ ذكرتني ابـ أحدهم !

يا إلـــهي ... !

^ فعلا يا إلهي ..!

هالشخص صارت عليه سالفه عبيطه ،
فمن شفت تعليقك ذكرته وابتسمت ..

باذن الله تكون أحسن عنه ..

إن شاء الله ..

دخييلج أنامل ،، لا تجلبين المواجع .. وتفتحين سالفة العروس ..
على قولت الوالدة تقووولي انت اختيااارك صعععععب جدااااااا ..

جنها سوالفكم نفسها اللي تصير عدنا ،
ونفس الكلام ينقال لأخوي ، بس أهو أحسه دلوع وروحه مو عارف شو يبي يسوي ..

وبعدين إهي مو سالفه اختيار أخوي وخلاص ، لأن مهمن كان حتى لو قضيت مع اللي عقدت عليها بفترة الملجه سنه وزياده ،
أكيد بتظل الحياة معاها عقب ابـ بيت واحد غير ، بتكشف عن أشيا أكثر ، وبتبين لكل منكم طبيعته بشكل كامل ،
واهني الواحد ما يفكر باللي أهو شو كان يبي وخلاص ، لكن يحاول يستوعب الطرف الآخر قبل !

بس عشان ماكون ظالمه رياييلنا ، ترى حتى البنات عدنا دلوعات ، ومع انه مو زين بس وايد يردون ، البنات نفسهم مش الاهل /
مع ان ماعدنا خرابيط الاستهبال ، لكن مادري هل هو الشعور بعدم الارتياح لكونها بالنهايه مسألة كبيره ، مش هينه انك تختار شريك الحياة ..

,

سؤال خارج الموضوع شوي ، ليكون ربيع أخوي وانا مادري !

بعلـق .. بس بعد الصــلاة ..
بسيــر المسيــد ، وإنتـــوا صلــوا بارك الله فيـكم ..

تقبل الله منا ومنكم ، والله يهداني ،
مرات مادري شوللي يصير فينا ، مادري صدق نستخف ولا نستخف !

كنت مذكره اني ما وترت ، واشوف ساعة اللاب ان يعني الوقت تأخر وماصليت ،
وياريت لو عندي شي مجابلته ضروري ، وبالاخير أذن طبعا ..!

طال عمرج موضوع الزواج موضوع متشعب شوي
بتكلم عن نفسي ، وهي وجهة نظر متواضعة ..

انا عن نفسي حاط مواصفات في بالي لشريكة حياتي ، وإلي أنا أشوفها ضرورية عشان تستمر حياتي مع إلي بختارها كوني عارف رغباتي وأطباعي .. وضروري إن فـلانة اتكون تمتلك هالمواصفات عشان تناسب اطباعي وتفكيري وعشان تستمر الحياة بشكل سلس وسهل ..

بغض النظر لازم بتكون هناك اختلافات وفروق ، بس في أشياء كثيرة نقدر نتنازل عنها او بمعنى أصح نتأقلم معها ونتكيف بها ، لكن في أشياء تظل مبادئ وضرورية للاستمرار ..

أبسط مثال ..
كون خطاب يميل للعصبية شوي ، فـ أنا أحبذ وبشدة إنه شريكة حياتي اتكون إنسانة هادية ، ولا بتكون العلاقة صعبة جدا .. هذا بالنسبة لي .. واعتبره شي جميل إني أعرف شو إلي يناسبني ..

وأمثلة عندي كثيرة .. وما با أعددها ، اخاف باجر صندوق الرسايل يمتزر .. وكل وحده تقدم عرضهاا .. لوول ( واايد واثق من نفسك )

~

جواب خارج
والله لي الشرف إذا ربيعي عنده إخت شراتج ..

امبلا حلو ان الواحد يعرف شوللي يناسبه ، وكلامك احسبه سليم ، فعلا في أمور تخص كل فرد
"قد تكون مثل ما وصفتها مبادئ" بحيث ان غياب شيء منها قد يوتر العلاقه جدا ..

ربي يوفجك أخوي ، ويحفظ لكم الوالده ~ ..

اذا كل واحد يختار شريكة حياته بالمواصفات اللي يبيها
يسير يتزوج سيارة احسن له ,, " بو عمار" هههه

هذي اقوال ابوي

ماشاء الله الجماعه في الميلس ... صبحكم الله بالخير

وش حالكم

منو بيتزوج ماشاء الله بالبركه

خطاب ... فهمت عليك بس صعب تحصل كل شي

يعني النظره غير والواقع عقب يكون غير

بس حلو تختار اللي في بالك واللي تباه انته ...

التنازل جميل من الطرفين

نحن غاسلين ايدهم منها بالزواج هههههههه



شو اخباركم ؟
شو مسوين ؟
شو مشاويركم اليوم ؟

مجموعة انسان لحد الحين ماعرف مشواري لكن الحينه في الدوام

الله يعينك


انا توني مخلص هالريوق السنع مع الوالده
وشارب شاي الورد

والحين نحوط في النت شوي



والجو حااااااار برع

إذا نسنس هوا الناسم ، معطر بالندى ريان
اراقب نجمـة النـادم ، مفارق شوفة الخلان


الجو برع جمييل و شاعري
:biggrin:

هييه

جو ليوا من جو لبنان هههه

لا من سهام ولا رطوبه

إن كنت متفرغ وطربان... لا بد يوم أتسير صوبه

:love:

ههه

تصدق اخوي يداوم قريب ليوا
يقول جوها صدق نفس جو لبناان
مافي رطوبه
واخر الليل هوا بارد

شدني موضوع مواصفات شريكة الحياة او الزوجه


اولا اكبر غلط انه الواحد او الواحده .. يحط مواصفات معينه في باله .. ( طبعا نستثني الدين و الاخلاق و حسن المظهر )
لانه اكثر عن 60% من المواصفات المطلوبه غالبا ما تكون موجوده في الطرف الاخر
و كل الاشياء مع العشره تتغير و تتحسن


اهم شي التوافق الفكري بين الشخصين و هو الاساس اللي بتنبي علية كل الاشيا الباقيه ( التنازلات بين الطرفين ، تقبل طباع كل شخص الخ.. )


الزواج استقرار و راحه نفسيه و سعاده،
بس بتكون فيه مشاكل و زعل و ضرايب على اشياء كبيره او تافه
هاي الحياه طبيعيه و ما فيه علاقة زوجيه بدون مشاكل بختلاف حجمها

اذا تضاربتو بتتصالحون، و اذا اختلفو واحد بيقنع الثاني او واحد بيتنازل لثاني
و اذا تزاعلتو بتتراضون .. و الحيااه مستمره و ماشية

و الحياه الزوجية الفعليه تبدا بعد اول ياهل .. لانه المسؤوليات بتكبر
و بتقولون صريح قال لول


الكثير يتصور الزواج مثل الافلام حياه سعيده و رومنسية للابد
و ينصدم بعد الزواج بالمشاكل و الخلافات و مرات ما يستحملها الشخص
لانه ما افكر فيها او توقعها قبل الزواج

::
:


برمس عن عيال ادم او مثل ما تقول انامل قلب "الجنس الخشن" مع اني اختلف على هالتسمية

و كيف يبغون حريمهم و بختصار في 4 كلمات:

1 - الام
2 - حبيبة
3 - صديقة
4 - خادمه

و في هالاقتباس "المنقول" مفهوم كل كلمة

اقتباس:

---

¤§© الأولى : الأم ¤§© :

انه يحب الام . الام فى حنانها, فى عطائها اللامحدود,
عطائها الصامت الذى لا يتبعه من و لا اذى
يريد اما فى سعة صدرها معه وفى تسامحها و عفوها ان هو اخطا
و فى قبلتها و تشجيعها ان هو اصاب
فى تسليتها له و الاخذ بيديه فى الضراء والفرحة و البهجة فى السراء
فى سهرها بجواره عند مرضه او اثناء عمله و فى بشاشتها
و سعادتها عند حضوره و قلقها و لهفتها عند غيابه
انه يريد امه التى فقدها بعد زواجه و يظل يحن اليها كلما احس بحاجته لها

¤§© الثانية : الحبيبة ¤§© ::

ثم هو يريد الحبيبة العاشقة التى تتفنن فى سرقة قلبة وفى اثارة رجولته
يريد امراة لعوب تبهره بقوامها و عطرها كما تبهره بانوثتها و سحرها
يريد على فراشه انثى تثيره و تمتعه بمنظرها و عطرها و لين جسمها و كلماتها
يريدها ان تذوب بين يديه عشقا و شوقا و هياما

¤§© الثالثة : الصديقة ¤§© ::

ثم هو يريد الصديقة التى يبث اليها همومه و يستشيرها فى اموره
يريد صديقة تحفظ سره و تستر عيبه لا زوجة تفشى سره و تفضح عيبه بين جاراتها و صديقاتها و اهلها
يريد عقلك و حكمتك و مشورتك لا لسانك و ثرثرتك فيما لا يهمه
يريد ان يتكلم فتحسنى الاستماع لا ان تتكلمى فتكثرى الشكوى من اعباء المنزل
و مشاكل الاولاد فيلجا الى الصمت المنزلى او الى ترك البيت و قضاء معظم الوقت مع اصدقائه الذين يفهموه و يسمعوه

¤§© الرابعة : الخادمة ¤§© ::

ثم هو يريد الخادمة- نعم خادمة -
يريدك ان تعدى له الطعام بيديك حتى و ان كان لديك خادمة
يريدك ان ترتبى اغراضه بنفسك
يريد ان يرى لمساتك انت فى اركان البيت
يريدك ان تعتنى بملابسه و مظهره و مظهرك و مظهر اولاده

---

صح هالشي مب سهل انه الحرمه تسويه كله بحذافيره بس لو الحرمه تسوي 70% من هالكلام
الريال ما بيشوف اي حرمه ثانيه غيرها .. لو ان شاء الله الحرمه ما كان فيها جمال نهائيا بيشوفها اجمل انسانه فالكون
:fa41:



تعبت من الكتابه
من زمان ما تفيجت اكتب رد طويل لوول
:14:

صريح

في حرمه الحين فيها كل هذا !!!


احسن شي انك تتزوج وحده عمرها 10
وتقد تربيها مثل ما انت تبيها

مجموعه


الكمال لله ... و ما فيه انسان كامل


و انا اقولك فيه حريم فيهن 50% و اكثر من هالاشياء
و الحرمه اللي فيها نص هالاشياء .. تعتبر حرمه كاملة

و الحريم الزينات و اللي يبغن الستر موجودات في كل مكان بس لازم الواحد يسأل و يدور
مب بس شافها ولا شاف صورتها قال اهنه الزين كله و يوزوني و نسى الاخلاق و البيئة اللي هيه طالعة منها


بعد الواحد لازم يكون قنوع فهالاشياء ....
مثل ما يقولون الواحد ما يطلب كل الاشياء و هو نص الاشياء اللي طلبنها مب موجوده فية
:biggrin:

ترا انا جذي قصدي

وفي الأخير الزواج كله تنازلات
وبدونها تكثر المشاكل
مثلا لو الزوج عنيد والزوجه عنييده
شي اكيد بعد اسبوع بيضاربون بعض

السلام علييييييكم


يقول المثل : البقرة ما تشوف ذيلها :tounge:



دوووووووومهم الشباب حاطّين الضو على البنات بشكل عام:pullhair:


مجموعوه : ترى كلهم و الخيبتين .. الشباب و البنات إلاّ اللي متربّي صـــح :k_blush-anim-cl:

قصايد

مثل ما نعرف ان عدد النساء اكثر من الرجال
صح؟

زيين

بس تراه الريال هو اللي يتزوج الحرمة مب العكس
واذا كان العكس على الدنيا السلام ,,,,

مثلا الريال لو وصل عمره 50 يقدر يتزوج وحده عمرها 20 صح ولا انا غلطان !!!

في مقولة قريتها في مكان
ماذكر منو قالها بس تقول : في العشرين تقول المرأة:كيف هو؟
وفي الثلاثين تقول:مَن هو؟
وفي الأربعين تقول: أين هو؟

,,,


بس الغلط ان الريال هو اللي يحدد مواصفات ومادري شو
قبل دقيقه قلت لامي عن " اذا يبي مواصفات خاصه خل يتزوج سيارة "
قالت وحتى سيارة ما بيحصل هههه


بس كنصيحة من ناس كبار .. ومن اشياء نشوفها دايما جدامنا

اذا الواحد بيخطب خل يشوف اول منو خوال عياله في المستقبل!!

أأيد كلام صريح 100% ...

=)



فالنهـآية لازم الواحد يعرف منو يختـآر منو أهل البنت اللي بيناسبهم

مش أي بنت حلوة شـآفها وحبهـآ قال هي هاي اللي أبـآها

لازم يحط في باله باجر بتعيش العمر وياه كله بيربي عياله واحفاده وياهـآ ..

.
.

حلو الواحد اتكون في باله مواصفات معينة ..، بس اذا لقى 50% او اقل حتى من الاشيا اللي يبااها يتوكل

لانه فهالزمن وايد صعب الواحد يحصل شرات ما يبا ، الا جان بيفصل البنت تفصيل!!*

وشرات ما قال مجموعة حتى سيـآرة ما بيحصل لول ..

.....


فالنهـآية كل شي قسمة ونصيب .. ياما ناس خذوا بنت بكل المواصفات اللي بغاها ..، بس ما قدروا يتوافقون !

وكل عايلة وكل بيت وكل زوجين بينهم مشاكل سواء تافهة او كبيرة

بس الاهم ان الواحد يعرف كيف يتصرف ويتغلب على هالمشاكل

والعلاقة الزوجية لازم تكون فيهـى تنازلات من كلا الطرفين =)

[ وجهة نظر ] .. =)

مجموعة : كلامك أأيده بس مب 100% .. يمكن يكونون أخوان الحرمة طالحين بس هي زينة :smile:
و يمكن العكس



أنا من رايي : أهم شي الأم .. لأن البنت أكثر شي تكون قريبة من أمها =)

و دايمًـــا تحاول تقلّد أمها

هـذا تعليـقي ،، مثل ما قال صريح

اقتباس:

---

بس لازم الواحد يسأل و يدور

---

ولهالسبب ، أنا من البدايـة قلت يالمزوحي إنه لازم اتحط في بالـك مبــادئ تكون ضرورية بالنسبة لك ، وتتغاضـى عن أشياء أخرى كونـها مش ضرورية بالنسبة لك ..

لأنك لو حطيت كل المواصفات كـ مبــادئ وضرورية ، بتكون فيها صعوبة مثل ما قال صريح ، وما بتحصل إلي تباه ..
ولكـن ما يمنـع إنه يكـون كذا شي ضـروري ،، على سبيل المثـال " متدينة ، بنت ناااس ، هــادية ، جميلة "

اهنه أهم شي الدين ،، ولازم كذلك البنت اتكون بنت نسب وحسب ، ما آخذ أي وحدة ، واتكون هاادية كون هالصفة لازم تتوافر لأنها تناسب طبعي على سبيل المثال

وجميلة ، عاد الجمال درجاات .. ما أيي أحط مواصفات تعجيزية .. شعرها جي ، وبطنها جي ، وخشمها جي .. ترا ما بنخلص ..

وفي الأخير ومن خلال إلي شفناه وسمعناه والكل يعرفه وفي كل انواع العلاقات مب بس الزوجية ، حتى علاقات الصداقة ، لازم الطرف الآخر يتنازل عشان تستمر العلاقة ..
يعني مرة هذا يشد والثانية ترخي ، ومرة فلان يرخي ، وفلانة تشد ..

~

وفي مقولة دوم تلفتني من بعض الشباب .. يقولي أنا باخذ البنت وبصلبها ..
تعال خبرني فديتك شو بتسوي فيها .. بتعلقها من شعرها يعني !!
خلك عاقل من البداية واحسن الاختيار عشان ترتاح إنت وتريح بنت الناس وياك ..

هالبنت سواء كانت فيها أشياء سلبية أو إيجابية تراها طالعة من بيت ناس ، وعندها ام وأب وأخوان وأهل .. مب منه والدرب بتصلبها ع كيفك ، والشي إلي هي تربت عليه سنين صعب إنك بتغيره ..

على سبيل المثال في عوايل ما عندهم مشاكل بناتهم ييلسون ويا عيال عمومتهم وسلام وضحك وحتى توصل في بعض الأحيان لـ سلام باليد ..

يوم إنت كـ رجل ، ما تعرف هالشي في هالبنت أو هالعايلة ، وخطبت من عندهم ، وتفاجأت بموقف إنه ولد عمها دخل وهي سلمت عليه بهالطريقة مثلا ، بتي بتقولها ، شو بترد عليك !!

بتقولك فديتك ترا نحن متعودين جي يوم كنا صغار ..
بتقول في خاطرك ، يلللعن أبو الساعة إلي اخترتج فيها ..

عشان جي أحسن اختيارك من البدايية .. وفكر عدل واسأل وشاور واستخير وتوكل على الله ..
قال تعالى : وشاورهم في الأمر فإذا عزمت فتوكل على الله

الواحد مهما سأل، في شغلات تكون مخفيه، ما تبين إلا من خلال العشره، فعشان جيه ما اتم على الحرف

لأنه بتستوي مشاكل

ولنفرض مثل ما قال خطاّب اللي ماخذنها من النوعيه اللي يسلمون، وهو ماكان يعرف قبل ما يخطبها وصار

الموقف عقب، يقدر يكلمها بعقلانيه، هي روحها بتعرف إنه هو ما يحب هالشي، مب يعصب ويقول

ليش هيه جيه وانا ما كنت اعرف عنها هالشي .....

عيل نفس الشي، يمكن الريال فيه اشياء هي ماتعرفها وتنصدم بها ....

ما شاء الله ، زين زين خل سوالفكم دومها جي ، يعني انكم تدخلون بنقاشات =)

مبين الكل متفق مع الكل ، بس الاختلاف عالأغلب يكون بطريقة التعبير وشلون تسعفكم الكلمات ،
مثل ما بينتو الكل عنده أمور ما يقدر يتخيلها "غير موجوده" بشريك الحياة لكونها من الأساسيات عنده ،
لكنه كذلك مثل ما قلتو ، اسمها شراكة بالنهايه ، والخلافات والحده تعد أمور تثري العلاقه لا العكس ،
وبالمثل التنازلات تكون دائما مطلوبه ، والتفكير بوعي واستيعاب ..

,

أخوي صريح ، ان شاء الله تكون فاهم بإني كنت أسولف لمن طريت الجنس الخشن بردي ككل ،
لكن بس حبيت أوضح ، لمن نقول الجنس الخشن فنحن اهني مانعيب عالذكور ولا نذكره كـ سلبية :yes: / بالنسبه لي عالأقل ..

الريال طبيعته وفطرته وجماله وفلاحه يرتبطون ابـ أمور ماقمنا نشوفها للأسف عند كثر من ذكور اليوم !

وبما إن نحن نتكلم عن شريك الحياة ، فخلنا نطري من أكبر المشاكل عدنا بالدوله وهي زيادة نسبة الطلاق عدنا ،
ما ألوم الرجل اهني ولا ألوم البنية ، كثر ما ألوم الإنسان كلن حسب فطرته وطبيعته وإنسانيته ..

ما قاموا يعرفون شلون يبدون ببناء بيت وأسره ، وتالي نشوف نتايج ماتسر ..!

~ ليـت كل ريـآيل الكون يفـكرون شرآت تفـكيرك آخويه صـريح

ومب بس يفكرون آو يقولون آهم شي يطبـقون ~ !* . .


فـعـلاً جيـل الحين بشكل عـام " يحلم " بـ حب شرآت آفـلآم مهند ونـور لكن يوم يجرب ينصدم فـ الواقـع

دايـماً البدايه تـكون صعبه ،خصـوصـاً لـو كان الريـال من بيئه والبنت من بيئه ثـانيه


في عـوامل خارجيه غير الدين والاخلاق وووو تأثر عـلى " العـلاقة الزوجيه "

هي عـلاقه بين اثـنين ، لكن تتأثر بـ أشيـا خـارجيه

وخصـوصـاً هالآيـآم مب سهل الريال يحصل البنت اللي يبغيهـا شرآت امه ، ولآ سهل الحرمه تحصل الريـآل اللي تـشوفه شرآت آبوهـآ آو اي شخص ثـآني ويكون " مثـآلي "

كـلن يبحث عن المثـآليه فـ الطرف الثـآني ويتـنـآسى نفسه فـ البدآيه ~ٍ !* . .


فـتره الخطبه ، أو الملجه ، أو حتى قبل يمكن الطرفين يتوقعون انهم ماينسجمون مع بعض لكن مع العشره الريـآل يقدر يغير ف الحرمه والحرمه كذلـك

يعـني بعض الشبـاب ومع آحترآمي يتشرطوون نباها فيهـا وفيـهـآ يبحث عن " الكمال " وينسى انه مافي انسـآن كامل

وآنه هو بذآتـه آصـلاً مش كـآمل

آختيـآر شريك الحيـآه من آصعب قرآرآت الشخص ومحتـآجه لـ " عـقل " قبل آي شي


وحتى لو الشخص اختار شخص وكان فيه سلبيات لازم يكون قنوع انه يقدر يغير ف الطرف الثاني


أو حتى " يـنولد شخص يديد " بـعد الزواج وانا ما ابــآلغ في كـلآمي ، تـرآ العرس " يعّــقل "

والبيت لـه دور آسـآسي ، تربيه الآم والآبـو " اثنينهم " تـأثـر في شخصيه البنت أو الريال

وشي ثـاني وواقـعي آغـلب شبـآبنـاً " مش الكل " يفـكر فـ المظــهر وينســى الجــوهر


وووووبس !


تحمست يوم شفت الردود

^انا معاج في كل نقطه ذكرتيها!

الحينه ماشي رياييل مثل رياييل زمن اول! اذا حصلتوا ريال في هالزمن يودوه من ايده وريله XD!!!

اقتباس:

---

^انا معاج في كل نقطه ذكرتيها!

الحينه ماشي رياييل مثل رياييل زمن اول! اذا حصلتوا ريال في هالزمن يودوه من ايده وريله XD!!!

---

نفس الشي بالعكـــس .. ما شي حريـم شرات حريــم أول ..

نباا حمااس اكثر (:

مافي شي اسمه مافي ولا في !

في قناعة المفروض انها تنبني قبل عند كل طرف لحاله قبل لا يفكر ابـ محله ومحل الشريك بالعلاقة ،
في وعي المفروض ينوجد ، والعلاقة الزوجيه حالها من حال أي علاقة بالنهايه نجاحها من نجاح اللي بنوها ،
وتدهورها وسوءها من تدهور حال أحد أو كلا الطرفين على الأغلب بالمثل ..

وتعليقا على رد اختي مهابه ، من الأساس اللي يبحث عن علاقة بالصورة اللي تشكلها الأمثلة اللي ذكرتيها اختي ،
فهؤلاء ابهم خلل فكري وقلة وعي / لأن المعاني اللي طريتيها ما رقيت عند هؤلاء أبدا ..!

بالعكس ، أشوفهم مثل اللي يستنزف الشي ويصوره بشكل مبتذل ،
والله يبعد عنا محبه شبيهه بقصص هذي الأفلام ..

,

اختي تحفه + أخوي خطاب ،
ردودكم نرفزتني ..