بشو تنصحون ؟؟ ..

ويه سامحنى يا حصان عطلنك
يالله مشكوره وموفق انشالله

حصان طرواده عندنا asus لمبرغيني الاسود
فعلا من اجمل ما يمكن،، الجرافيكس فيه مب طبيعي "بالنسبة للـ لابتوبات"
و اداءه رائع جدا ً

اسميني حاقد على اخويه بسبب هاللابتوب،، اخاف يستويبه شي من كثر ما هو في خاطري لوول
=======

الاهل عندي يستعملون asus بو الجلد
شكله وايد انيق و جي مال دلع،، بس عيبه الشاشة الصغيره

شوفي LG مشكلتهم أنهم يبون يدخلون في كل شي حتى في صناعة الكمبيوتر ... وطبعا افشلوا من ناحيتي .. لان أغلب اللي عندهم كمبيوترات LG
يعاونون من نفس المشاكل .. ودوم بتحصلينهم يودونه المحل .. لانه حساس وتعبثي فيه شوي بتحصلين انج عفسي الدنيا ومب رايمه تصلحينه.. ( لاتشترينه ولاتفكرين) سوي ignooooooor عليه :)

ممم Acer انا احب هالماركه وااايد ارتاح لها ..اول كمبيوتر لاب توب شريته فحياتي كان Acer وكنت متعلقه فيه واااااااااايد .. لكن بعد ما تكسر من كثر ما كنت افتحه.. غيرته وخذت toshipa وبالنسبه لي كرهت التوشيبا مش من ناحية المواصفات لكن من ناحية الشكل .. قببيييييح .. وبعدين جربت الـ Hp وطبعا هذا من ناحية المواصفات والشكل والمضمون موووووووووول مايعيبني .. وأخيراً حنيت على الـ Acer وخذت الـ Ferrari .. وطبعا مايحتاي اقول شو شعوري لانه اولا شكله جدا رائع والمضمون ماعليه كلام .. وعلى فكره لين الحين عندي الـ Acer الجديم ويفتح وغالي وااايد عليه .. ( وهااي قصتي مه الAcer :)

فولد اختج سكر الكمبيوتر عنه اكيد في سبب وأغلب الظن فيروسات مش فيروس وااحد .. لانه الكمبيوتر مايسكر إلا إذا في خلل او فيروس قوي.

حصان ..شكرا على وقتك في الإجابه عن استفساراتنا..

حصان يوم بترد شوف هذا وقولي شو رايك فيه
http://www.shoplaptop.co.uk/scp/Asus...W5_Series.html

وهذا
http://www.shoplaptop.co.uk/pp/Sony_...2S/P_Pink.html

وهذا
http://www.shoplaptop.co.uk/scp/Sony...X5_Series.html

ذنينيييييي انا ابي شاشه صغير
عطني الله يخليك الموديل نمبر

طعون يعني بينج وبين الأيسر قصة حب من ورانا هاه لوووول
بشوف شو احسن لاب نزل عندهم انا بعد افكر فيه بس ابي راي الناس عنه

أوكيك .. يالله عودي ادراجج إلى مخبأنا دكان المسلسلات :)

انشالله عمتي XD

سلاام !

أحسن لاب توب جربته شخصيا ً .. هو اللي عندي حاليا ً
فـ أنا بعد انصحج بالـ sony vaio اجوفه عملي وخفيف .. ومواصفاتهم زينه بشكل عام ..

هلا الياه
اي موديل تقصدين ؟

ايه احبك :

بالنسبه لـ لاب توبي هو Sony vaio PCG-TR1 بصراحه اشوفه احسن لاب توب جربته للحين
مع اني قبله كنت استخدم توشيبا .. لكن هذا عيبني استخدامه اكثر ..

ووحده من بنات عمي عندها الـ Sony vaio VGN-SZ140 بعد وايد تمدحه ..

لكن ماندري
انتي ورايج =)

شكلي انا على السوني مياله اكثر بس يوم سرت جمبو شفت انه كتبته مب عربي هذذا الي خلني اتردد

شوفي اول واحد و آخر واحد

http://www.asus.com/products.aspx?l1=5&l2=25&l3=283

حلووووين بس متجوزين لمت البدجت
تقريبا سعرهم سبعه وشي

ايه أحبك

السوني اللي سألتي عنه في جامبو ، مثل ما قلت لك سابقا رجعت للتقييم العام وكان تقييمه ضعيف جدا فأنسيه .

أما بخصوص الوصلات اللي حطيتيهن ، أقدر أاكد لك إن البحث عن لاب توب في الإنترنت وشرائه من الإمارات أمر صعب للغاية ، لأن أغلبهم مب متوفر عندنا في السوق .

أول وصلة حطيتيها ، الصورة الأولى ، هذا موجود لكنه فوق 6500 درهم .

والمشكلة ألحين في السوق إنهم مركزين بشكل كبير على الشاشات الكبيرة ونادرا ما تحصلين شاشة متوسطة ، يعني 12 إنج أو 13 وفي الغالب إذا حصلتيهن بتكون المواصفات دون المستوى .

وأفضل نصيحة أقدر أقدمها لك هي كالآتي :

خذي المواصفات اللي عرضتها سابقا ، وإذا كنتي من دبي مري على محل (شرف دي جي ) في الستي سنتر ، قولي لهم أبغي هذي المواصفات وحددي نوع اللاب توب أو على الأقل شوفي المتوفر عندهم .

اللاب توبات اللي عرضتهن من أفضلهن في السوق حاليا ، ومثل ما قلت لك استعمالك له بيكون لمدة سنة فقط فعندك أمور :

يا توشيبا (وهو مناسب جدا للميزانية اللي حاطتنها وفي منه حجم متوسط) ، أو إسوس ، السوني غالي نوعا ما ، شوفي الإيسر ولو إني أحط عليه علامات استفهام أحيانا ومش كل الأنواع جيدة ، كذلك الآي بي أم ممتاز لكنه يتخطى ال6000 .

الأمر كله ألحين متعلق بج وبذوقج في الاختيار ، المواصفات عندج وما عليك إلا تمرين بنفسج وتشوفين على الواقع .

وخبرينا بالنتايج .

ذنيني

إلى الآن وبصراحة ما شفت شي تفوق عليه ، ومخبل فيني ها النوع لكني ما باخذه لأني مب محتاجنه .

الإيسوس عموما من أقوى اللاب توبات ، وجودة التصنيع عالية جدا جدا ، وغير عن جذه شركة الإيسوس معروفة إنها متخصصة في تصنيع المذر بورد ، وهي أقوى ما يمكن .

كانوا قبل يستخدمون المعالج نوع AMD ، لكنه فشل وما مشى في السوق الآسيوية ، وألحين حولوا على الإنتل وحققوا نجاح ماله نظير .

فعلا لاب توب إيسوس يستحق كل تقدير ، وراح آخذ واحد عما قريب إن شاء الله .

طعون قلب

الإيسر مش كل الأنواع عندهم جيدة ، و موديل عن موديل يختلف ، أحيانا يصعدون للمرتبة الأولى وأحيانا الأخيرة .

كذلك الديل ، وآي بي أم .

حاليا اللي ماشي في السوق العالمية بشكل كبير التوشيبا ، صحيح إني أحيانا أحط علامات استفهام على منتجاتهم ، لكن في الآونة الأخيرة تطوروا بشكل كبير .

في النهاية الأمر يرجع للمشتري ، إذا كان استخدامه للاب توب ما بيتعدى سنة أو سنتين وبعدها بيغيره فلا يروح للغالي ، أما إذا كان استخدامه لثلاث سنوات وما فوق وما راح يبدله ياخذ له شي محترم وغالي ويدوم مثل السوني وغيره .

كذلك يعتمد على نوعية الإستخدام هل هو استخدام ثقيل أو خفيف .

هناك عوامل كثيرة جدا في اختيار اللاب توب المناسب ، أغلب الناس ألحين يشوفون الشكل والحجم بغض النظر عن النوعية والجودة و المواصفات وطريقة الاستخدام .

هناك كثير من المنتجات ما تتحمل الاستخدام الثقيل كتنزيل ملفات بأحجام كبيرة جدا ، ومثال على هذا لاب توب آي بي إم T40 ، أبدا ما يتحمل التنزيل الكبير .

فالأمر كله راجع للشخص .

مشكور أخوي صدق استفدت ^_^

اتمنى إنج استفدتي

لكن الأهم تخبرينا عن الاختيار

انشالله
بس ابي اسألك الفوجي مال السمنس مب شي؟

السوق ألحين مليان ماركات ، كل من هب ودب فتح له شركة وصنع لاب توب

لا تقربين صوبهم :d014:

وللأمانة ، ما جربت الفوجي .

لوووول انا الاب توب الي استخدمه الحين فوجي
بس مادري اخاف اخذ منه وما يتحمل الكراف والطيحات
حصان عادي يطيح فا شو احسن فابرك تستحمل غير الأي بي ام

دايما أي براند عالمي مثل الآي بي إم والسوني والإيسوس مرورا بالتوشيبا والإيسر والديل ، دايما بتحصلين فيهم نوع من السماكة اللي تقاوم الصدمات .

الصدمات تختلف ، والطيحات بعد تختلف ، يعني لو أعق أي لاب توب من الطابق العاشر مب مثل لما يطيح اللاب توب من الطاولة !!!

الأمور هذي ثانوية أكثر من كونها أساسية في الاختيار ، لأنه الواحد في الغالب لابد أنه يحافظ على اللاب توب قدر المستطاع .

كذلك لو قمنا نفصفص في قوة تحمل اللاب توب ، لابد أن جسمه يكون سميك ، فبالتالي بتحصلين وزنه ثقيل ، وهذا أمر غير مرغوب فيه أبدا .

الوزن أمر أساسي في الاختيار ، وكل ما كان الوزن أقل كل ما زادت نسبة شراء اللاب توب ، وهذا لأنه يعتبر كمبيوتر محمول ، فمب معقول بتم شال لاب توب وزنه 5 كليو على ايدي على طول مطار دبي !!!!

أقدر أقول الأمر هذا ثانوي أكثر من كونه أساسي في اختيار اللاب توب كون الإنسان يحافظ على أغراضه .

لا شوف انا مب مهمله
لكن البيئة الي انا فيها يهال وربشه وخاصه اني اركض فيه في الكليه من بلوك لا بلوك ما استقر وركبت ونزلت دري ففي احتمال انه يولي
انا ادور هالخاصية لني ااحس السوني مال دلع اكثر شي واناقه اخاف اخذه بعدين يولي وما يستحمل
انا قصدي في جودة السماكه شرات الاب توب اأي بي ام

الآي بي إم معروف بصلابته ، وهذا يميزه عن بقية اللاب توبات ، وعشان جذه مب راضي اتنازل عن لاب توبي

كذلك اللاب توبات الثانية صلبة ومب سهلة التعرض للكسر ، تطمني من هذي الناحية :thumbup1:

وايد محتاره

الاي بــي ام ينفــع لــج حق الكليــة

:fa51:

.
.

ايه احبك

اختيه اول شي كان عدها اي بي ام بس بعدين

وخذت لها ايسر من برع الكليه طبعا


وبعد ما اخترب عنها الايسر ردت لل اي بي ام

يعني اشوف حظي ويه الأي بي ام اخاف ابتلش فيه مثل ما بتلشت في هذا !!!

مريتي السوق ولا بعدج .؟؟؟

لا بعدني في شي يديد يا حصان

تراج تعبانه وايد ، ربشتينا ربشه وآخرتها ما مريتي السوق !!!

ولين ألحين مافي أي شي يديد

ههههههههههههههه
مريت السوق بس ما اشتريت ي بعدين يالسه افكر اتريا لين جيتكس لينه عندي شي يسد الحين

جيتكس مب مثل قبل للأسف

لكن شي أحسن من لا شي

وأنا بعد انتظره بفارغ الصبر

ويييه شكلك مدمن كومبيترات وسالفهم
انا جيتكس ما سرته الا مره في حياتي بنشوفه هالسنه شو بيطلع لنا فيه

إلا مدمن كمبيوترات

عمري ما خسرت في شي كثر ما مخسر في الكمبيوترات وحاجياتها وسوالف الإلكترونيات

اللي في السوق بتحصلينه في جيتكس ، بالنسبة لي مافي شي يديد

لووول عندي نفس الهوايه بس انا على أخف
عيل ليش ايسون لهم معرض دامه كل شي في السوق

المعرض كان في السابق لجلب الأسواق العالمية ، أو بمعنى أصح الشركات العالمية عشان تعرض بضاعتها وأحدث ما وصلت له التكنولوجيا لهذا الوقت ، لكن للأسف الشديد "الآسيويين" دمروا الدنيا وخذوها من باب " فرصة واربح فيها " .

لذلك أغلب الشركات العالمية اللي كانت اتيي لعرض المنتجات "الجديدة" انسحبوا فصار معرض جايتكس للشراء فقط لا غير وللعارضين المحليين .

اللهم الشي الوحيد الزين فيهم وجود معرض للshow في المركز التجاري واللي أقول أنا عنه "ما بيصير مثل قبل " .

هيه الحين فهمت ليش اتقول قبل غير والحين --هذا الشي طبيعي عفكره مب بس في سوق الألكترونيات بس في الأسواق الثانيه بعد جي حالتهم .. الله يعين

هذي مشكلة كلنا نعاني منها

الله يعين