:: .. الشبـاب في الخـارج .. ::

الثعــلب الرمــادي . . .
صح إني في الامارات ، بس ماشوف أهليه غير يوميــن في الاسبووع . . أدري حالتي أهون عن حالتك . . بس الحمدلله عكــل حــال . . نحـــن اللي إخترنــا هالشي . . انا أخترت ادرس في جامعه بعيـده عن اهليه . . وأسكن في سكـــن . . وإنت اخترت تدرس في ألمانيــا . . وماتشــوف أهلك إلا في الاجازات . . .يعني الواحــد يتحمــل نتيــجه قراراته . . . وبعــدين منو قالك مانحس بالملل والمسؤوليه اللي علينــا وايد كبيــره ؟ ؟ . . وبعدين هذا مب كلااامنا ولا موضووعنــا . . .
وهالشغل اللي تتكلم عنــه ( غسيل وتنشيف وكوااي و تنظيف) مب مسلنك؟؟ احس انا لو مكاانك بستااانس بهالشغل. . على الاقل لقيت شي تقضي فيــه وقتك . . بدال الخرابيط اللي يسوونها الشبــاب الثانيــن . . وإتقــول هالشي ياخـــذ وقتك ؟؟ ايواا . . إنزين ليش ماتنظم وقتك ؟؟ يعني لاتكود الشغل في الويك إند وبعدين يرووح الويك إنك إلا على هالشغــل . .
××××××××××××××××××××××××× ××××

وعن مراااكز الترفيـــه . . . معقووله مافيه مراكز ترفيــه عندكم .؟؟ غريـــبه ؟ ؟ عيل الناس يوم إتسير ألمانيــا وين إتسيــر ؟؟ مستحيل مافي مرااكز ترفيــه . . . يمكن المنطقه اللي ساكن فيها
مافيها مراكز ترفيــه . . ويمكن اللي تشووفه في منطقتك خرابيط مال الخماره والتعري والكازينوات . .
يعنــي لاتعمم على أوروبـا كلها . . . وبعدين هالــ supermarkets يوم مافيها اللي تحتـــاجه . . إشحن من بلااادك أغراااض عشان توفــر عنفسك كل ها . .
يعنــي يوم بترد العين مره ثانيــه إشتر كل أغرااضك منها وشلهـــا وياااك . . .لووول أحسن لك والله . .

واللي أفهم من كلااامك إنك مستغــل هالملل اللي يصيبك في شي زين إنك تدرس و هالشــي وااايد أوكي . . .:fa42: :fa42: :fa42: :fa42:
××××××××××××××××××××××××

وهالشبـــاب اللي يتبعـــون هالطريـــج يتحملوون اللي بيصيبهم . . وهاللي تطروونه مادري إنسجن ولا بينسجن مؤبــد يستاااهل اللي يـــاه . . ومايستاااهل حتى الواحد يشــوف ويــه . . هذيل مب سايررين يدرســون ، ،سايرين يلعبون ويسوون المنكر اللي ماسووه في بلااادهم . . والله مب زين عليهم . . شو ذنب أهلهم اللي يتريوونهم يتخرجوون وإلا امــه اللي تتريا ولدها يرد لها بالسلاامه وناجح . .إتم إتصيحيه دوووم . .هذيل يتحروون بينجحوون بالســاهل والله وهم يسووون كل هالخرابيط . . .
الله يحفظ عيــالنا والله من هالدمار اللي صايب الشباب هالوقت ..
ويحفظهم من كل سوء. . .
××××××××××××××××××××××××
شكــلك وايد إدووخ ووايد هامتنك هالزقاااير . . .

"في العين تبدأ الحياة الحقيقيه "
وينها الحياه الحقيقيه ؟؟ ماشوف شي انا . . كل شي فيها ملل

"في العين تبدأ الحياة الحقيقيه "
وينها الحياه الحقيقيه ؟؟ ماشوف شي انا . . كل شي فيها ملل


إنتي ما شفتي شوارع العين مثل ما أنا أشوفها ... شوارع مفتوحة على مدى البصر و شبكة طرق بدون نهاية ... العين فيها أحدث الشوارع و أفضل الطرق على مستوى العالم و حتى أحسن من كل شوارع الدنيا و حتى شوارع ألمانيا يكفي تكون معاك سيارة قوية مثل السكايلاين جي تي آر حتى تعيش الأجواء الحقيقية لشوارع العين و شي ثاني مهم لازم يكون معاك باكيت مارلبورو بـ 6 دراهم بس والله بلاش.

العين فيها كل شي حتى صابون لايف بوي الأصفر اللي أحب أستخدمه موجود في كل مكان في العين ... العين في أحدث و أفضل الأسطوانات الموسيقية من كل أنحاء العالم و بأسعار مناسبة و حتى مجموعتي الخاصة من الأسطوانات الموسيقية اللي يتجاوز سعرها ألـ 10.000 درهم كلها أشتريتها من العين ... العين فيها أحدث دور السينما و بأحدث التجهيزات و تعرض دايما و أبدا أفضل و أحدث الأفلام على مستوى العالم و العين فيها كل و أفضل أنواع الزقاير على مستوى العالم و بأسعار يحلم فيها المواطن الأوروبي ليل نهار و هي بالنسبة له مجرد حلم بعيد التحقيق.

في العين عندي تعرفت على أفضل مجموعة من الأصدقاء و أعتبرهم مثل الأخوان الروح بالروح مستحيل أحصل مثلهم بأخلاقهم و أفكارهم و طموحاتهم في أي مكان في العالم.

لهذا السبب أقول في العين تبدأ الحياة الحقيقية لأن العين ما تشبه أي مكان ثاني في العالم و العين ما تشبه إلا نفسها.

بس أرجع العين و تكون عندي أحدث سيارة سكايلاين جي تي آر ساعتها ماراح أحس بأي ملل:laugh:

العين أحسن من أي مكان في العالم اللهم أحفظ مدينتي العين ...

ها كله في العين . . ماشالله ماشالله . . يبالي آخذ لفه فيها . . .
السمووحه المقاتل شلكنا طلعنا عن الموضووع انا والثعلب الرماادي :)~

لقعــه لقــعه انا اشوووف ولد خـالتيه يوم رد من استراليا من اسبوعين ويهه وارم .. ثــره مضرووب هنااااك ..

يا جمــاعة الخيـر امافي داعي تسوون ليه افلاام رعــب :fa46:
.. تراا سفريه عقـب اسبوع بالظبـط .. تراني بويه صوب استراليا وتحديدا جامعة جريفث في برزبن .

وعلى فكره ترانيه دوم اتصـل بالشباب واهم باحسن ما يكوون وعلى قولة هل الشرطة ( الامور مستتبة ) ممكن الاشياء الليي صارت تكون حوادث فرديه ..

واذا عن الملل فاعتقد انه الانسااان بروحه يسوي جـوه ( انا مثــلا توني ما سافرت والشقه مرتبه احسن ترتيب .. تلفزيوون بلازما ونظام عرض سينمائي وكل انوااع الفيديو جيـم :fa34: ... والموستنج ســالين ياي في الطريج انشالله .. ) ((( اوني رايح ادرس بعد :fa52: )))

امـا عن اللي ما عندهم نظـر اللي يتحروون بنــات برع ابرك عن بنــات البــلاد .. هالفئه هذي سوااء كــانت خارج البلاد او داخلها ترااا عينهم زايغه ومصـيـره بيــاخذ انجليزيه ولا فلبينيه واذا عيـت بيــاخذ هنديه ( انزين شو فيها المصريه ) .. بس انا ما عرف كيف هم ياخذون اجنبيات اثناء الدراسه لانه قانون التعليم العالي للبعثات يقول انه اي طـالب ياخذ اجنبيه غيـر مسـلمه تنلغي بعثته .. وهذا يشمل بعثات جهاز بوظبي للاستثمار ووزارة الخارجية ..


لمهم يا جماعة الخيـر ادعولنا بالتوفيق انشالله وعن افلااام الرعب :fa46:

السلام عليكم ورحمه الله وبركاته ...

الصراحه شي فضييييع ,, صحيح أنه الغربه شي مب هين وما يعرف شعور المغترب غيره بس هذا مش عذر أنه يروح يسكر ويورط نفسه بمشاكل وقبل كل شي لا تنسى انه الشرب حرام ..يا أخي أنت رايح تدرس و تاخذ الشهاده شو يخليك تسلك مثل هالطرق ؟؟!!!! هل هي للتسليه ؟؟؟ والا من قلة الشغل ؟؟؟
متملل قم ذاكر لك كمن كلمه واذا مليت اطلع اتمشى واذا كلش كلش ضايق خلقك افتح المصحف واقرا منه تقرب من ربك بدل لا اتلوث في المراقص ...

هذا أخوكم الثعلب الرمادي عايش ماشاء الله عليه احسن عيشه مستغل وقته بشي يفيده ويرجع له بالنفعيه كل شي أوكي فيه الا سالفه السجايره الله يبعده عنها ان شاء الله ...


الصراحه مافي أحسن من شمس بلادي وحرارتها .... لو خيروني بين بلادي وأحسن بلادين العالم ما بختار الا بلادي بحلوها ومرها *_*


المقاتل ... تسلم أيدك

:: .. الثعلب الرمادي .. ::

:fa55: من الخطـأ تدخين السيجـارة وقـت الملل والفراغ .. 1- مضيعه للوقت 2- مضره للجسد .

:fa42: وطريقتكـ في القضاء على الملل بالدراسه المكثـفه شيء جميـل .. والأجمـل لو عملت على تنظيم وقتكـ .. دراسه - رياضه - تنظيف البيت - الخروج مع الأصدقاء في مناطق بعيـده للترفيه وتغير الجو .. للقضاء على الضغط النفسي وضغط الغربه وضغط الدراسه :: كما اشارة اختي الكريمـة / المتفيزرة عالعرقوووب بالفعل فهو الرأي الأرجح .

استراليـا .. نعـم .. قارة رائعه بالفـعل بغض النظـر عن بعض المساوئ التي بهـا .. وبالتأكيد اوروبا متميزه عن استراليا بكثير وبلا شك تطور اوروبا افضل بكثير عن استراليا بصفتي ذهبت إلى ميونيخ .

الشعور بالوحـدة شيئـا مريـع وعليك ان تبحث عن اصـدقاء عرب أو مواطنين في مدينتكـ .. :fa51: ويمكنكـ الاستفسار عن طريق المكتب الثقافي الخاص بألمانيا .. أو .. المسؤولين عن الطلاب في المنطقـه التي تدرس بها ..

:fa54: نصيحتي لكـ .. :fa38: اعمل على التقليل من تدخين السجـائر :crazy: فهي وسيلة قاتله بدلا من ان تكون وسيلـة للـــقضاء على الملل .

:woot: ( أشترلك بلاي ستيشن وفكـ عمركـ مثل اخوك المقاتل هيهيهيهي ) شاكر لكـ حضوركـ عزيزي :fa41: حفظكـ الله من كل سوء ووفقكـ لما يحبه ويرضاه .

.. لي عـوده مع البقيــــه ..

:fa51: عــدنـا والعود احمـد مع مرافقتنـا / المتفيزرة عالعرقوووب .. :fa56:

:fa42: كلامـــكـ ِ صحيح بالفعـــل ، ولدي نقطـة احببت أن اناقشكـ ِ بهــا ، في الحقيقـة ما الغرض من ذهاب البنت للدراسه في الخـارج ؟؟

للحصول على شهــادة من الخارج ؟؟ زيادة الخبرة ؟؟
بإعتقـادي هذه مجرد آراء ثانويه ، :Oo: والرأي الاساسي يبحث عن نفســـه ، وليس لدي مـانع من دراسة البنت في الخارج مع محرم .

:fa38: شاكر لج تواجدج العطر والرائـــع :fa41:

.. المقاتل ..

المقاتل ..

تسلم اخوي على طرحك للموضوع

عجبــني موضوعك ممتع ..

و عيبتني ردود الاعضـاء بعد

شكرا ^_^

الســلام عليــكم ورحـمة الله وبـركـاتـه

،,ـ

ذكـرتـنـيـه بأيـام أول ،،، وذكـرتـنـيه بالـمشـاكل اللي صارت أليـه طوول السنتيـن اللي عشتـهم في لـنـدن
الله يسلمك هـو صـح فـي نـاس والنـعم فيـهـم مثـلا ً نحن يوم كنا برا كانت يارتنا انجليزيه
وكانت والنعم فيـها هي وعـيـالهـا الصراحه ما شفنـا منهم شي شـين بالعـكس
أتيـنا وتـسـتفـيد منـا وتسـألـنا هي بـروحـها عـن الإسـلام وأحسـها تبـا تعـرف أي شي ،، نحن ما قصـرنا من صـوبـها ،،، بس هالحـرمـه كــانــت كيــــــــــــــه
:fa42:
،.ـ

بـس في مجموعـة ثـانيـة عـوذ بالله منـهم اسميني احاول أتذكرهم بـالخيـر بس ما أقـدر
في الـمـدرسـة كـانـت هـناك إهانـات من قـبل الطـلاب بس يمدحونـه الـ طــاف
وأذكـر مـره كان عليـنا كلاس( الـديـانـات ) وكـان يـتـكلم عن الهـنـدوس والكاثولـكيـين ،، ويـقول ان هم يحترمون الحيوانات وما يجتلـونـهـم عـلى عـكـس الـعرب
:crosseyed
هـنـيه أنـا ظربـن عنديه وقمتله وقتله لااا أصلن الاسلام يحترم هالشي ومايجتلها منيه والدرب
بس بـغـرض الـحـاجـة وعطيته كمن كلـمه ،،، وقامتله وحده ثانيه وكلـتـه بـرمسـتـها،،
:fa56:
والله ويـه أسـتواااااا احمـر من القـفـطـه
:fa39:
يسـتـاهل مسود الـويـه
،.،

وعـن الـبنــات اللي يـسـافـرن يـدرسن بـرا اففف هـاي السـالفـه مسكـتـه لانهـن فـالتـووو
أنا شفـتـهـن بـعـويـنـاتـيه ،،، كانت الله يسـتر عليـهن كانن يـتـمـشـن طبـعـا ً ماشي لا شيله ولا شياته
مره جيـه بـنـاطلـين والشـعر بـرا ،، الموهيـم أنا لمحتـهـن بس ما اهتميت ،،، بس خطفن عداليـه انتبـهـت لـرمســه ،، رمسـتـهـن جيه خليجيـه ،،..!!
شـفـــتـهـن ويـن رايـحـات وأثـاريـهـن رايـحـات صـوب الـبــار ( الـمسكـر )
:fa55:
طبـعـا ً أنـا ما أعـمم بعـض الـبنات ،، والـي حاشـمه عمرها من الأصـل بتحشـم عمرها من ويـن ما راحــت ،..!!
،/،

والله يـهـدي الـجـميـع إن شااءالله
وسمـحليـه يـاخوي شـكليـه هذربت وايـد
وأشكـرك على هالموضـوع الـترتـوب
،.،

مرحبــــــــــــــــانـــ ــــي

أخوي المقاتل الدولة تخسر فلوس على الطلاب حتى يدرسون برع و يرجعون بعدين لبلدهم ... مقابل هذا الشي لازم الطلاب يضحون بوقتهم و حياتهم و كل شي و يضغطون أنفسهم في الدراسة لساعات متواصلة حتى يحتقن دماغ الواحد منهم في آخر اليوم و توصل طاقته للصفر.

صرت أقلل ساعات نومي لأقصى درجة ممكنة و لو كنت أقدر أظل صاحي طول اليوم و طول الأسبوع صدقني ما راح أوفر هذي الوسيلة أبدا في ألمانيا التحدي ياخذ شكل ثاني ففي طلاب من الصين و اليابان و كوريا و قدراتهم الدراسية مرعبة أعتقد أشرف شي لي على الأقل إني ما أكون أقل منهم في المستوى.

الزقارة يا المقاتل شي صعب جدا أوصفه لك ... بعد جلسة مذاكرة متواصلة لمدة خمس ساعات الزقارة اللي أدخنها في فترة الإستراحة تخليني أعيش أجمل اللحظات في اليوم بأكمله ... أحس بنفسي فوق السحاب و إني أسيطر على العالم و أنا أدخن هذي الزقارة في فترة الإستراحة أرجع أرتب أفكاري الأشياء اللي درستها و شو الأشياء الباقية اللي ما سويتها و شو لازم أسوي بكرة أو بعد بكرة.

وقتي مخصص للدراسة و بس أنا مب ياي سياحة حتى أسير أتحوط أو أرابع لي شوية ناس دون المستوى و ماوراهم غير المشاكل و ضياع الوقت.

أشتريت تلفزيون إل سي دي و أهلي طرشوا لي البلاي ستيشن و معاها الأعاب المطلوبة و بتوصل خلال أيام :)

بس أكيد ما بلعب فيها غير أيام الإجازة.

الثعــلب الرمــادي . . .
أحــس إنك اتســوي دعايــه للزقــاره . . .

مايحتــاي اوصي عيــال زايــد على عمارهم وعلى دراستهم . .
:fa42: بالتوفيـــج :fa42:
:blush: :blush:

اللــه يحفظهم شباب بلادنا فالخارج، ويبعد عنهم الشر..

صعبة الغربة ،، خاصة فبلاد ما ينذكر فيها اسم الله وما فيها مساجد ،،

كل اللي حولك مكان غريب، ناس غرب ولغة غرب ،،

مكـان مغرياته الدنيوية كثيرة لأبعد الحدود، لا تعد ولا تحصى ،

بلا حسيب أو رقيب ،، أنت رقيب عمرك ساعتها ،،

الله يحفظهم ،،

بـــس عندي لفتة ،، بعض الشباب اللي يدرسون بالخارج يردون البلاد أناس ثانيين،،

يتغيرون على خواتهــــم لأبعد حــدود ،، وتنعـــدم الثقة بخواتـــهم .. حتى الروحات والييات يحسبوها

عليهم، استخدام الموبيل ،، روحة الكلية ... الخ

أكــــيد الخلل فيهم ، باللي شافوه برع ،

بس هذي أختك وأنت تعرفها من زمان مب توك تتعرف عليها، أنت بالطــريقة هذي تنفـــرها عنك، بدال

لا تكسب ثقتها وتحــاول أنك تبعد عنها السوالف اللي ما ترضيك،،

المغتربــين ،، بـرايكم ليش نظرتهم لاخواتهم تختلف بعد الغربة؟

لما أرد عليج أسوي كوبي و بيست لاسمج لانه فعلا صعب علي اكتبه بس الحين باتحدى نفسي و بكتب اسمج ...

المتفيزره على العرقورب :)

في البداية أختي أنا مب الشخص اللي يسوي دعايات حتى أسوي دعاية للزقاير و إذا كنتي تعتبرين رأي الشخصي و نظرتي الشخصية للزقاير على أساس إنها دعاية فوجهة نظرج خاطئة من الأساس.

محد يقدر ينكر ضرر التدخين الفادح على الصحة و الأمراض اللي يسببها مثل أمراض القلب و الرئة و السرطان و أنا ما أحب أكرر التحذير الصحي المكتوب على علب السجائر لأن كل كبير و صغير يعرفه لكن أنا ما أسوي دعاية للزقاير كنت فقط أعبر عن رأي فيها صح يمكن أكون بالغت في التعبير لكن هذا مب معناته دعاية لأن الدعاية تختلف إختلاف جذري عن الكلام اللي أقوله أنا أعرف أضرار التدخين لكن في نفس الوقت ما أقدر إنكر المشاعر إللي أحس فيها يوم أدخن في أوقات معينة الأخ المقاتل عرض علي في رده أضرار التدخين و أنا في ردي عليه ما حاولت أنكر كلامه لأن كلامه صحيح في المقابل عبرت بكل صراحة عن رأيي فيها و هذا من حقي طبعا و في الختام أنصح كل واحد ما يدخن إنه ما يجربها و يبتعد عنها قدر الإمكان. (أتمنى ما تعتبرين هالشي دعاية بعد) :)

سلام

صــدى جوفــي :
انا بقولج ليش بعـض الشبــاب تتغير نظرتهم لخواتهم بعد الغربــه . ؟ ؟
أول شي من البــلاوي اللي شافوها برع البلاااد . . . شافوا بنــات البلاااد فاصخــات الحيــى. . .
العباه والشيــله تنلف في الشنطه أول ماتدخل البــلاد اللي متوجهه لهــا . . واللبس مادري كيــف . . .
وماتلقـاهــا إلا ويا شلـــة شبــاب وإذا سألتها عنهم بتقــولك : بتقول هذيــل زمايلي في الدراســه . .
وهيه تطلع وتدخــل و تسهــر وياهــم . . . أنــا ماتكلم عن كل البنـــات بس في فئــه من هالاشكــال . . . تشــوف نفســها متحرره من كل شي . . حتى من دينهــا هنــاك . . .
ولــم يحيـــن الوقت اللي بترجع فيه البــلاد . . بطلع العبــاة والشيــله و بدوّر لها لبــس حشيـــم تستر فيــه نفســها . . . وبتقــول انا :fa42: :fa42: :fa42:

وبعــدين مب تنعــدم الثقــه . . . تقدريــن إتسميــن حركاااتهم وتصرفــاتهم خووف عليهم من اللي شافــوه برع البلاااااد . . . يعني أختيه لاتلوومينهم . . اللي يشووف البلااوي اللي تصيــر برع ، يبيّــض شعره . . . ويستغــرب إنه البنــات جــيه يسوّن . . . فكيــف الشبـــاب ؟ !

عيبــتيني يوم قلتــي بعض الشبــاب يتغيروون في تعاملهم ويا خواتهــم بعد الغربــه . .
لانــه لو قلتـــي كل الشبــاب . . الكل بيهّــب في ويهج . . :fa42: :fa42:
ماشالله على إخواني - تراني ما امدحهم - على كثر مايسافروون عمرهم ماتغــيروو علــي . .
يعني إخوي بين فتره وفتــره يرووح ألمــانيا عشــان المؤتمــرات اللي عنــده . . عمره ماتغيــ ر علينا . .
بس اللي يتغــير إنه الصووغــه اللي ييبها ويــاه تتغيــر كل مره :tounge: :tounge: :tounge:
××××××××××××××××××××××××× ×
الثعــلب الرمــادي :
إستغــربت لما قلت وقتــك للدراســه وبس. . . إنت كـــيف عايش؟؟
اوكــي إنت ياي للدراســه . . . بس الواحد كم بيتحمـــل برووحه في غربــه ولا يعرف حد . . حتى لو كونــت صداقاات . . إنت مب ياهــل عشان ماتعرف الزيــن من الشيـــن . .
اسمحلي على هالمثــال :
كانــت عند ربيــعتي قطوه وحــيده يعني برووحها مب وياها حد هالقطــوه . . بعد فتره ماتت لانها عايــشه برووحها. . . يعني حتى الحيوان مايقدر يعيــش برووحه لازم حد ويــاه . . .
----------------------------
اللــي أقصده من كلامــي أنه الواحد مايقــدر يعيــش برووحه . . . ولازم يكون له صداقــات . . حتى يعيــش براحــه . . .
حتـــى الحواطــه ماعتقــد بيكــون لها تأثيــر سلبي على دراستك؟؟. . . يعني إنت لو كنت تدرس في العيـــن مابتطلع من البيــت ولا بتشووف ربعك ولا بتطــلع ويااهم . . ؟؟ طبعــا بتقول لي مستحيــل أكيد بتطلع وبتستاانس . . فليــش تحرم نفســكـ من هالشي وانت في الخارج . وانت بحاجـه لهالاشيــاء اكثر من لو كنت في العيــن . . .
على العمــوم إسمحلي أدخلت في اشيــاء ماتخصنــي . . . بس حبيــت اتكلم في هالنقطــة . .
والسمووحه الثعلب الرمادي . . .
:blush: :blush: :blush: :blush:

اقتباس:

---

المشاركة الأصلية كتبت بواسطة الثعلب الرمادي

(أتمنى ما تعتبرين هالشي دعاية بعد) :)

---

إنزيــن انا كنت اسوولف وياك يوم كنت أقولك عن الدعايــه وإنت خذتهـا جد . .
:blush: :blush: