" مجموعة متطوعي الواحات "

الـســلام عليــكم

ماجد العصيمي .. رئيس اتحاد المعاقين في دولة الامارات .. قال لنا مره انه كان في المانيا لحضور بطولة .. فـ كانو موفرين باص لنقلهم من الفندق للنادي الرياضي .. فـ كلم سايق الباص و قاله انت من متى تشتغل في سواقة الباصات .. قاله انا مش سايق باص .. انا متطوع عسب اسوق الباص .. انا في الاصل طبيب جراح و عندي اجازه الحين عسب اتطوع .. قاله مب هذيل اللي مب صاحين .. انت مب صاحي .. قاله بالعكس .. يكفيني كل يوم اشوف هالمعاقين و ازرع في ويههم الابتسامه بأي شكل من الاشكال و اقول الحمدلله على النعمه .. هذا و هو مش مسلم ! فـ كيف و الاسلام حثنا على مثل هالاعمال و اعتبرها من الواجبات !

و شي ثاني .. وصل عدد المتطوعين في بطولة العالم الاخيره للمعاقين في احد البلدان الاوروبيه لـ 190 ألف متطوع ! و نحن في بطولة الاولمبياد الخاص بالغصب وصلنا لـ 300 متطوع !
فرق في الاهتمام و فرق في التفكير !!

غير كأس العالم في ألمانيا اللي سجل رقم قياسي في عدد المتطوعين في بطولات كأس العالم !

و نحن كل ما قالو تطوع .. قال انا اداوم وشلي في التطوع ! و كأن التطوع فقط في وقت الفراغ و يوم اكون فاضي !

الوعي عن التطوع قليل عندنا .. لكن ان شاء الله راح يزيد مع الايام ..

فـأنـا في صدد انشاء مجموعة للمتطوعين تحت اسم "مجموعة متطوعي الواحات"

و هي بتكون مجموعة من مصورين و منظمين و فنيين و حتى مصممين و كل تخصص يقدر شخص ان يساعد فيه ..

و هالمجموعه راح تطوع في الفعاليات الي راح تكون لصالح المعاقين ( بشكل خاص ) و الفعاليات اللي تخدم المجتمع " من مهرجانات و بطولات و إلخ " ( بشكل عام )

مثال على كيفية قيام المجموعه بالتطوع ..

جمعية الامارات لمتلازمة الداون او الاولمياد الخاص الاماراتي او نادي الثقه للمعاقين او مهرجان صيف دبي او برنامج وطني او اي مؤسسة من هالمؤسسات محتاجين متطوعين لعمل ما او مؤتمر او نشاط رياضي او ندوة ..
ممكن يحتاجون متطوعين .. مثلا فنيين اضاءه او مصورين او كتاب للجرايد او منظمين ( يعني ينظمون القاعات و الترتيبات اللازمه للحدث اللي بيتطوعون فيه ) ..
يكون الكونتاكت وياي و يقولون لي مثلا محتاجين 3 مصورين و 2 فنيين اضاءه و واحد متخصص IT اقوم انا و اشوف شو عندي من متطوعين فاضين في هاليوم او عدد ايام الحدث و اكلمهم عن الموضوع و واذا وافقو اطرش اسماءهم و بيناتهم و يساعدون في انجاح هالحدث .. ( طبعا كل حدث بيحصلون عليه شهايد و في بعض الاحداث مكافاءات )

ان شاء الله المعلـومه وصلت ..

فـ اللي حاب ينظم للمجموعة او يستفسر بشكل اكثر انا حاضر سواء هني او ع الخاص ..

و اللي حاب ينظم للمجموعه يرسلي رساله خاصه و انا راح اعطيه التفاصيل عن كيفية الانظمام ..

علما بأن اول فعاليه راح تكون يوم الخميس القادم و هي عبارة عن محاضرة عن المعاقين في منطقة دبي التعليمية ..

للعلم ايضا ان في فعاليات سابقه تطوع فيها اكثر من عضو و عضوه معانا في فعاليات لصالح المعاقين و قدمو مجهود يشكرون عليه ..

بإنتظار استفساراتكم و اسئلتكم و انضمامكم ..

ســلام
كـلـكـلـووش

بسم الله الرحمن الرحيم ..

هلا بو شهبي ..

الله يرضى عليك ويسعدك شرات ما تحاول تسعد الناس :inlove: ! ..

اللي عليه هو التثبيت والبركه بأذن الله فيك وفي الأعضاء ..

دمت بحفظ الرحمن ..

حلو ما شاء الله ..
بادره جدا طيبه منك أخي ..

بس مادري أحس لو انك تشرح الموضوع بشكل أكبر عساس يملك الاعضاء انهم يطلعون عالموضوع عدل ..
ويالتالي يشوفون اذا بمقدورهم الاعانه والتطوع أم العكس ..
خاصة للعضوات منا .. يكون الموضوع مربك ولو كنا حابين الاعانه .. !!

وبالكفة الثانيه أريح لك من إنك تشرح لكل عضو أو عضوه بالخاص .. ؟!
مجرد انك تذكر النقاط والشغلات المهمه بنظرك .. وان شاء الله بتلاقي منا اقبال طيب ..

ومثل ما قال أخونا ألم ترى ..
الله يرضا عليك ويسعدك شرات ما تحاول تسعد الناس .. ^_^ ..

أكرر جدا اعجبني فعلك ..
وجدا شاكرين لك هالطيبه ..

احترامي ..
والسموحه ..

ألم ترى

تسلم شيخي ع الكلام الطيب .. و ع التثبيت
و هذا واجب علينا

أنامل قلب ..

تم تعديل الموضوع ليتسنى للكل معرفة تفاصيل اكثر .. و شكرا لج اختي على الملاحظه ..
و هذا واجب يا خوج .. و مشكورة و ما قصرتي

ســـلام

مسا الخير

مو شي جديد عليك أخوي أحمد
سبّاق لـ فعل الخير، و ربي يوفقك بحياتك
و يحقق لك مبتغاك

و ان شاء الله نقدر نساعدكم

اشكرج اختي مزن هتان على التفاعل .. و انتي بعد ما تقصرين .. وحده من البنات اللي دايمن معانا تبذل مجهود لصالح المعاقين و الاشيا اللي تخدم المجتمع ..

و ان شاء الله تنضمين لنا و كلي ثقه انج بتكونين سباقه لهالاعمال ..

انت بس امر اخوي كلكلووش

فأي وقت نحن حاضرين بس نتريا اشارة منكم ،،

أخوي عندي استفسارات بعضها تفشل شوي .. يمكن ادزها بالخاص ..
وعن التفسير .. فيزاك الرحمن كل خير .. كفيت ووفيت ..

وربي ييسر لنا اللي فيه الخير إن شاء الله ..

:

احترامي ..
وربي لكم حافظ ..

راعي الزعامه .. اذا تبى تنضم طرشلي رساله على الخاص و بخبرك كيف .. و انت غني عن التعريف و كنت ويانا في بطولة الاولبياد الخاص ..

انامل قلب .. ممكن اطرشين لي الاسئله على الخاص .. و حاضرين بأي وقت ..

بو شهاب ..

بصراحـة انا عايبتني الفكرة ومن زمان ف خاطري اتطـوع
بس والله ما تصدق كيف انه صعب صعب جدا وخااصة انه إذا فاتتني محاضرة وحده تعتبر مصيبــة

بس ما اقدر اقولك اني بنضم .. لكن بنشووف الظروف ان شاء الله
وانت خبرني بكل جديد .. وانا بشوف شو الترتيب

خطاب .. محد قال ان بنظهرك من محاضراتك .. اصلا اغلب الفعاليات تكون في الويكند .. و المسا .. فـ اعتقد ان ما بتخرب جدولك الدراسي .. و اذا في شي فـ الايام العاديه و في وقت يصادف وقت كلاساتك انا بقولك لا اتي و ما نباك .. كلاساتك اهم .. ^_^

ههههههههه خلاص خبرني انت بالترتيب .. اهنه ما ينفع ..

كلكلوووش
أول شي ..
انا بس مشارك معاكم في تطوع واحد .. وكان أحلى يوم والله
والفضل بعد الله يعود لك لانك جمعتنا على الخير

وان شاء الله بطرش لك عالخاااص ..

تشكر أحمد

السلام عليكم / اول شي يعطيك العافيه / ثاني شي انا من زمان خاطري اطوع في اي مكان واساعد باي طريقه كانت علشان جيه حابه اكون مطوعه وياكم وانشالله الله يقدرني على فعل الخير وخاصه التطوع في التنظيم والترتيب للمهرجانات اواي شي يخص العلاقات العامه لانه ها نظام شغلي
اتمنى تقبلوني وياكم اتريا ردكم علي
حنين دبي

وعليكم السلام ..

"كلكلووش"

بصراحه أنا ماكنت عندي أي خلفية عن برامج التطوع ولكن مع أول تجربة لي في الاولمبياد الخاص
بدت الصورة تتضح لي مع اني كنت متخوف من الشغل والمسؤولية اللي
بتكون علي بس مع الوقت اكتملت الصورة
وخلال المشاركات
الثانيـة قدرت أثبت نفسي بالشغل اللي أسويه وخاصة لما أحس بأن النتيجة نالت رضى المسؤولين
والناس وأحلى مافي الموضوع إن الواحد من نفسه يقدم على هالشي
وماينتظر عائد في المقابل يعني يكون لوجه
الله ولو سمع كلمة
شكر أو ثناء تراها تغني عن كل شي ونصيحة مني كـ شخص مجرب التطـوع في أكثر من مجال ،
أي حد عنده فرصة وإمكانية إنه يشارك في أي برنامج تطوعي ويحس
إنـه بيخدمهـم في جانب معيـن لايتـردد
وصدقوني بعد التجربة
الأولى بتعرفون معنى التطوع أكثر وهاي بادرة طيبة منك أخوي كلكلوش وإن شاء الله تلقى
تفاعل من الأعضاء والله يقدرك على فعل الخير ولاتنساني وانت
تسجل الأسماء وإن شاء الله بنحاول نساعد
ونقدم اللي نقدر عليه
:yes:

الاســـطـــوري
أخوكم

ياحظ الاولاد >,>

أنـا بـودي . .
بس ~ الـهو ى ~ ضـدي . .

الله يـساعدكم ع فـعل الخير . .

واعـضاء الواحات ، اللي يـقدر لايـتردد ، تـراها فرصه :)

خطــاب

بينا كوول ..

مجموعة انسـان

وصلت الرساله .. و تم تسجيلك معانا

حنين دبي

اكيد ممكن تكونين معانا .. بخبرج ع الخاص بشكل اكبر عن برامجنا التطوعيه

الاسطوري

فـعلا انت واحد من اميز المتطوعين اللي كانو معانا .. نشيط ما شاء الله عليك و سباق لفعل الخير
و اكيد انت واحد من الاساسيين ويانا

تحفه

ليش الاولاد .. حتى البنات يقدرون ينضمون لنا .. الباب مفتوح للكل

مهـــابه

ما تقصرين اختي .. و ان شاء الله في الايام اليايه تساعدج ظروفج بالالتحاق بالمجموعه

ســلام

ما شاء الله الاقبال اكبر بوااايد من اللي توقعته .. الله يزيدهم

وعليكم السلام والرحمه

ما شاء الله عليك اخوي كلكلووش ..

الصراحه انا متوقعه هالاشياء الحلوه منك دوووم ..

ويزاك الله خير عالبادره الطيبه والعمل الرائع

وان شاء الله بطرش لك رساله :)

شكرا لك

مثل ما عرفناك سباق للخير ..
عمل هادف جميل .. وان شاء الله تستفيدون مني .. ^__^

تسلم

رائع هذا الحماس و هذا العدد .. ربي يوفقكم و يوفقنا ..

اول فعاليه راح تكون بتاريخ 25 / 10 ..

ان شاء الله في اجتماع بيكون بينا قبل ما نبدأ و المكان راح يكون في جمعية الامارات لمتلازمة الداون اللي في جميرا ..

رمستهم في جمعية الامارات لمتلازمة الداون و قالو بيعطونا غرفة الاجتماعات في اليووم اللي نحن نحدده ..

بشوف يوم يناسب الجميع سواء اللي داخل الواحات او اللي برع و بنجتمع

يزاكم الله كل خير ..

حلــو والله !

:fa51:

مــاشالله عليــك يـا كلكلــوش .. دووومــك رااعـي وااجب

الله يعطيــكم الف عــافيه ..

:fa41:

.
.

يزاك الله الف خير يا كلكلوش

بشوف الربع وبرد عليك خبر ان شاء الله =)

ماشاء الله عليك يا بوشهاب ..

الله يوفقك يا خويه دائما وعلى جهودك المبذوله ..
كم تسوى هالابتسامه اللي راح تلمسها على شفاه الناس ..
ربي يعطيك العافيه ..

اشكركم كلكم على ردودكم المشجعه ..

غير اللي كانو متطوعين ويانا من قبل واللي اسميهم متطوعين دائمين .. في حوالي 12 شخص جديد .. حاب ان يتطوع لأول مره و يدخل هالمجال .. و تم اعتمادهم .. و غير الاشخاص اللي انضمو للمجموعه من برع الواحات ..

فـ الاجمالي تقريبا 26 شخص و بيزيد مع الايام اليايه ..

طبعا مثل ما قلت قبل بنحدد يوم و وقت للإجتماع مع كل المتطوعين في جمعية الامارات لمتلازمة الداوم .. و بنستضيف في اجتماعنا الاخت ام سيف اللي نائبة رئيس جمعية الامارات لمتلازمة الداون عسب تعطيكم نبذه عن العمل مع العاقين و الفعاليات اللي بتسويها الجمعيه .. و طبعا الاجتماع بيكون تعريفي و بنفس الوقت بنسمع اقتراحات للمجموعه اذا وجدت ..

و بنتكلم معاكم عن الترتيبات اللي بنسويها عسب ننجح هالفعاليات اللي هي لصالح اخوانا المعاقين .. لإن مثل ما قلت المجموعه تخدم بشكل اساسي هالشريحه و بشكل عام المجتمع ..

للمتطوعين اللي سجلو في المجموعه .. انا بقترح وقت و تاريخ و بطرشه لكم على الرسايل الخاصه عسب نعقد الاجتماع .. و انتو شوفو اذا يناسبكم ولا لأ ..

ســلام

يعطيـك العافية ياخويه ويزاك الله خيـر
بوديه أشـارك ويـاكم بس لظروف أحـكام
بس تبون شـي غير أنيه اتواجـد عندكم ترانيه حاضـره :)
ويزاكم الله خيـر
وشكرا ً يـ أحمـد وفي ميزان حسناتـك

السلام عليكم ...

الله يعطيك الصحة والعافية على المجهود الجميل

وانا احيي كل اللي شاركوا معاك قبل وكل اللي شاركوا الحين ... لان هذا عمل انساني جداً راقي ويعود بالنفع على الكل ...

واللي متردد اقوله توكل على الله وشارك ولا تتردد ...

اتمنى صدى صوتك يا اخوي احمد يوصل حتى خارج الواحات ولكل الناس ...

موفق ان شاء الله وشد حيلك ...


تم تمييز الموضوع ليأخذ كفايته من النشر ...

والسموحه ...

يزاك الله خير اخويه احمد
ونحن في الانتظار بإذن الله :)

السلام عليكم...

هذا حلم كنت اود ان احققه وفعلا من اكثر من اربع سنوات انضممت لجمعيه متطوعي الامارات...بس ما لقيت الشيء الي كنت اتخيله يعني المشاوير الي كانوا يطرشونا لهم عادية محاضرات وبعدين الفكرة ما لقت استحسان الاهل هاذيج الفترة ... بس ابا اخذ فكرة كاملة عن الموضوع واذا ممكن اساعد بشيء من خلال تواجدي بالمنزل .

أنا تطوعت مره معاكم . . وماشالله عاد عليه هذا التطوع بالفائده والإجر بإذن الله

واتمنى الاستمرار معاكم . .

وفقك الله اخويه أحمد . .

غــادرت .. و لم أستطع أن أترك المكـان خالي خلفي منــي..
فعدت لبضع كلمات علقت في حلقي..

فكــرة راقيـــة أخي الكريم من فكــر أرقــى ،،
وفقك الله لما يحبه و يرضــاه ..

طفلـة

كل الشكر ع ردودكم و تشجيعكم و مآزرتكم لي ..

الحين يالسين نصمم شعار خاص بالمجموعه و بإذن الله بس يخلص و نخلص من بعض الامور العالقه بنعلن عن اول اجتماع للمجموعه ..

يعطيكم العافيه و ما قصرتو .. لو لاكم ما بيستوي شي ..

ســلام

الله يعطيييك العافية أحمد ..

السلام عليكم والرحمـه ؛

ماشااء الله مجهوود تشكر عليه ياخوي كلكلوووش :a034: ؛ والتطوع من التجارب الرائعه جداً اللي أول مره جربتها مع نادي الاحتياجات الخاصه :a034:؛


يعطيكم الف عافيه والله يوفقكم :1:

بسم الله الرحمن الرحيم ..

بارك الرحمن فيكم وفي اعمالكم الطيبه :smile: ..

ينزل من التثبيت ..

ربي لكم حافظ ..

شو صار بخصوص التطوع؟؟

الموضوع وااايد اتشربك و استوت تعقيدات مع جمعية الامارات لمتلازمة الداون ..

بس يالس احل هالمشاكل و هالاختلافات ..

السموحه منكم

كلكلووش
في شي يخصنا بخصوص المسجاات اللي اطرشت لنا ؟؟

اي مسجات؟؟