:: .. توافق على اختلاط البنات مع الأولاد ؟؟ اقربوا انتوا بس ؟؟ .. ::

السلام عليكم ورحمة الله وبركاتـــه ..

شحالهم العرب .. عاده اسمحولي يالربـــع تراني مقصر فـحق الواحــه المفتوحه :kcl: .. وصارتلي فتره طويلــه ما كتبت فيهــا موضوع ، وهذا وكوني مرافق عليهـــا دايمــا كل ما اكتب موضوع امسحه اقول ما بيعيبكم .. :doh: بس آخر شي قلت خلني اتوكل على الله واكتب .

::: ..

بس بصراحه يبتلكم موضوع ، يمكن يسخن على حسب ظني .. :kcl: والله كشخه اقفط القى بس ردين .. المهم .. موضوع .. :doh: بس هاه لحد يدعي علي .. هاه كل يوم المدرّسه ( المس ) إلي عندنا تناقشنـا فيه .. بس نحن مخبلينها مره انقول هيه ومره انعارض الفكره .. وطال عمركـم الفكره أو بالأخص القضيه تقول :-

هل توافق على دراسة الفتيات مع الشباب في صف واحد في المدارس ؟؟

brgll: هاه اشوف كل واحد منكم اشتغل مخه ويفكر ويبا يكتـب رايـــه .. :kkk: بس إلي يوافق يكتب انا موافق ان الشباب يدرسون مع البنات .. مع ذكر الأســـباب .. و العكس نفس الشي .

طبعـــا دينيــــا .. لا يجوز .. والله أعلم .. بس حاليا مدارسنــا يالس يحصل فيها نوع من الاختلاط سواء جامعات - كليات - مدارس أو بالأخص صار وخلص بعد .. ( اختلاط كامل ) .. عذرا لمراقبي واحة المدارس بس افضل الموضوع يكون مفتوح .

:: ..

انقضي وقـــت في نقاش brgll: لعلّـــه مفيــــــد .. وإن كان العكس خلنا انقول ثرثره واحاتيـــة .. شرايكم .. ؟؟

تبون رايي ؟؟ بقولكم إياه عقب ما اسمع رايكـــم ؟؟ هاه وشقلتوا ؟؟

هو لا يجوز بس انا احسة شي عادي ^_^

بقرا الردود بعدين بقول رايي ^_^

وعليـكم السـلام والرحمـه

وأخيـرا ً مقاتلـنـا هنه
يامرحبابك ياخوي
وياحي بـ مواضيعـك
:fa38:
؛؛

اممم موضوعـك في غـايـة الخـطورة
انا مـن رأيـي وبصـراحـه ماا أوافـق على اختـلاط البنات والأولاد معـا ً
يعني مااتخـيل انهم يختـلطـون ويدرسـون ويأ بـعـض ؛ لأن وايـد سلبـيـات بيتعرضون ألهـا
مثـلا ً لأن عيـالنـا ( البعـض ) مب شايفـيـن خيـر فـ كيـف تبـاهم يدرسـون ويأ بنـات
هـذي بالنسـبـة ألهم حلـم حيـاتـهم ؛ وبيـخـلون الدراسـة وبيـجابلون البنات ؛ والبنات بيجابلن الشباب وبيتعدلن وبيتكشخن حـق شـوه ( حـق فـلان يشـوفنـيه ويـعـيـبـيـه :boxed: )
؛
بـس في الـبـعـض أنا أقـولك لأ يعني كـل واحـد ونيـتـه ياي يـدرس ولا يـاي يـتعـرف
وهـذا اللي نيتـه صـافيـه بيـجابـل دراستـه وما عليـه من فـلانه وعـلانـه ؛ بس يمكن اتيـه هفـات
والشـيطـان يلعـب بـراسـه ويـلف يـميـن ويلقـالـه مزيونـه ويـقـول ليـش لأ ؟!!
:nono:
؛؛
بـس تعـرف يـاخوي فـي فـي ايجابيـه وحـده لـ هالموضـوع كلـه
إن اللي كـان مـودر دراسـتـه ومب مكملـنـها بيـكملـهـا الحيـنه
brgll:
//

هـذا رأيي بـإختـصار ويعطيك العـافيـه ياخوي
ولـي عـودة إن شاءالله لمتابعة الردود
والسموحـه

بليا اي فلسفه....

مااوافق ولا نص يوم يدرسن مع الاولاد..

اما عن الاسباب من كثرها ماعرف اكتب شو واخلي شو...

وعليكم السلام ورحمة الله وبركاته ..

حيالله المقاتل .. زين يوم ما مسحت الي كتبته ها المره وتوكلت ونزلته brgll: ..

همم .. طبعا ضد ونص انا ..

ونفس ماقال الحساس .. الاسباب وايده .. من كثرهم مانروم نجمعهم ..

بس نفس ماتقول .. خلوة البنت ويا الريال اصلا حرام .. كيف يوم البنات ويا قروب شباب
يعني عنا نحن .. دكتور ايدش الكلاس يلغي المحاظره ونحن متلومين ومش ماخذين حريتنا
فما بالك لما يكون الكلاس خلط !

وبعدين .. ليش نفتح أبواب لانحراف الشباب والشابات .. ها الزمن كل شي ينخاف منه ..
وعند واايد ناس التهاون نشوفه .. والتساهل فأمور كثيره ..

ماعرف ضحكت ع شي تخيلته توي brgll: ..

تبون تعرفونه !

رفع شاب التلفون واتصل ع رقم بيت ..
الشاب: لو سمحتوا بيت فلانه!
الام: هي .. منو يتكلم ..
الشاب: همم خالوه انا زميلها فالكلاس.. بغيت أسألها عن كوز باجر..
الأم ::puppyeyes:

تخيلوا بس .. الله يستر .. عادي والله يصير ها الشي ع أيام عيالنا ..

وتسلملنا اخويه المقاتل ..
قو اهيد

http://upload.bindubai.com/download/asheq/salam.gif
شي اكيد اني ما وافق على الاختلاط
يقولون ان الدراسه المنفصله تخلف و نحن فعصر التطور ولازم نخلط ..
لكن بدون ذكر الاسباب الاختلاط له سلبيات مالها اول ولا اخر
و نحن جيه بدون اختلاط والدنيا خربانه
ومانبا انزيد الطين بله ،،
http://upload.bindubai.com/download/asheq/bye.gif

امممممممم ..
ما أدري .. أحـس انـه عادي .. انا شخـصيـا درست مع شباب .. وكـان الامـر عادي جـدا وبكـل بساطـه *ما يخـصنا فيـهم .. *
عندي وحـده من الاهـل كانت تدرس في الامـريكـيه والحـينـه هي متـخـرجـه وتشتغـل ..
تقول على أيـام الجامـعه الشبااب موول مـب متفيجـين حـق هـ السواالف وخـاصـه الامريكـيه يكرووفنهم بالبروجكـتات والاسايمنتس وجـيه .. تقول حتى نحن البنات لمـا ما نشتغـل زين يهزبونـا ..
لكـن الحـينه على أيـام الشغل تقـول الكـل مكـيف وعادي تحـصل الشاب في مكتب الموظـفه ويدقون سوالف عـ الصبـح .. أو في وقت البريك ..
أعتقـد انـه نحن بعد التخـرج أوردي هـ الاختلاط بنعيشـه .. والشغل أساسـا مكـان لاازم نبدع فيـه
ونكون واثقين من عمـارنـا .. فلازم من البدايـه أو من قبل نتعود على هـ الاختلاط عشان بعدين ما نواجـه مشاكـل ..
هذا رايي ومن وجـهه نظري انا ..
بس أكـيد ما أقـدر أنكـر هـ الزمــان اللي بيدرس مـع البنات أو العكـس ما بيفلح في المذاكـره الا اذا مخـه مشغول في الدراسـه لا غير..

انا عن نفسي قلت شي عادي

في ام تخلي بنتها ترمس وتلعب ويا اولاد ويوم سالوها ليش قالت اخاف تسوي شي من وراي هههههههههههههههههه

ندش في محور الحديث...

طبعا ما بخلي عيالي يدروس ويا اولاد >>>>>احم احم اوني عاد لين ما اعرس هههههه

لو كان المدرسة مشددة للاولاد والبنات يعني مراقبة عالخفيف ما بيستوي شي طبعا

وشي ثاني الواحد بيتنبة فالكلاس للاستاذ لانه هذا شي يخص مستقبلة فما بيتفيج للبنت طبعا مب عند الكل

والبنت بعد نفس الشي بتنتبة و بتسوي طاف للولد اذا كانت طبعا محترمه واذا الولد سوالها حركات تبلغ علية المدرس

ونفس الشي عند الولد

وبرع الكلاس كل واحد بطريجة الا المخترب لانه قبل لايسوون شي يكون السبب الاول التربية على حسب التربية يعني مثلا الولد اهله مربينه تربية مب اوكي بيخترب وتقدر المدرسه بنفسها توقفه او تسوي شي

واذا تربيته وايد حلوه بيحترم نفسة وبيخاف على بنات الناس مثل ما يخاف على اهله

وثانيا يرجع للصحبة يعني على حسب الربع ربع اوكي بيمشي وياهم ربع مب اوكي بيخترب وياهم والانحراف

وثالثا المدرسه هي وطريقتها بتوقف الاولاد والبنات عند حدهن لانه المدرسه بعد لها دور بهالشي

اما اذا كان عند الاثنين شي عادي فهذا شي عادي ههههههه

تفلسفت وايد ادري

تسلم عالموضوع الحلو ^_^

همم تعرفون وجهة نظر اختيه قرموشه حلوه .. شغلت لمبتيه الي فوق راسي ..

لكن .. بعده الاختلاط احس فيه شي ما ينبلع (بالنسبه لي)

يعني اختيه مهندسه كهربا .. وحاليا تشتغل بين مهندسين وشغلها اغلبه ميداني يعني
تزور مواقع وجي ..اقولها كيف تتعاملين وياهم .. انا لو كنت مكانها ماابعرف أبدا اني أتعامل
ويا أي ريال .. سواء مواطن .. أو وافد .. وفي الشغل نفسه .. ايوون المراجعين والعملاء
وطبعا اغلبهم رياييل .. وفي منهم الي نعرفهم وفي منهم الي مانعرفهم .. يعني احس صعبه
عليه أشوف ولد الجيران داش المكتب عندي يستفسر عن شي .. مابعرف أتعامل وياه ..


بس تدرون .. كل شي يعتمد ع الشخصيه .. والعزيمه .. وبعد تربية الأهل الها أكبر دور ..

تحمست للموضوع مادري شياني كخخخ ..

الله حيهم ..

رمسنا عن الشغل والموضوع الاختلاط فالمدارس .. معلشي .. تكملة موضوع ..

من واقع تجربتي احـس عادي وهذا اللي قااااعد يصيـر يعني اغلب الجامعات اللي بتفتح ف البلاد بتكون مختلطه وعباره عن فروع لجامعات كبيـره ف الخارج ؛ بس البنت لازم تتحمل الكلام اللي بييهـا والرمسات الزايده ؛؛ من اصحاب ( المخوخ ) المغلقـه ؛؛ وحتى الشاب يعني اذا كان من النوع الخجول تحصيلـه العلمي واايد بيقـل ؛؛ وفيه شباب اغبيـا ساعات يوم يشوفونك ترمس ويا الدكتور بزياده وتشارك ف الكلاس يقولون انك تسوي جذا عسب تغري البنات وتجذبهـن وتصيدهـن وتفر عليهن شباك ويطيحن ف المصيده ويدخل القفص حشا مب بناااااات هاييلا فيــران ...
مدري من واقع تجربه احس هذا اللي يصيـر ...

بـس الواحد شو يسوي اذا بغى يأمـّــن مستقبل لبنتـه يباها تشتغل احسن شغله ولازم يعلمها احسن تعليم ويمكن ساعتها يحطها ف جامعه مختلطه وعلى نيــّـاتـكم ترزقون ...


المقااااااتل : موضوعـك حلوووو والكلام فيه ذووو شجوون ...

واعتقد جامعة السلطان قابوس مثال ع الاختلاط المحترم.. وهالاختلاط زين احس به يقلل نسبة العنوووسه هههه شدخـّـل بس الموضوع والله ذوو شجون يخليك تفكر ؛ وتعقيبا ع كلام الاخت ريم ريم احب اقول لها ان الرقابه ماتفيد الله وكيلج حتى ف الاصانصيـر يقـع المحظور اذا لعبت ف مخ الاثنينه ؛؛ وقولو حق المزيونه ترى الكل عنده موبايل مافيه داعي الاخ يستخف دمه ويتصل ع البيت ...
الله يحفظنا جميعـا

موضوووع جمييل ..

انا اشووف لو خلو الأختلااط في البلاااد بتشووفوون الأولااد يدرسوون ويشدوون حييلهم عسب يجذب النظر ..
والبنت تشوفها كاااشخه وتبي تثبت وجودها
..

بس لو خلوا الأختلاااط لااازم يسوون مستشفى ولااده عند المدرسه او الجااامعه !!!!

الصراحة انا اشتغل بمكان خلط,,,,ما شفت شئ من حد الصراحه لانه معظم الي معاي 35 وطالع
يعني ناس ناضجه ويتعاملون بادب واحترام ,و الي يتجاوز حده يعرف ايش بيصير له :narr: , وفي النهاية هالشئ يعتمد وايد بعد علي شخصية البنت واحترامها لنفسها
وفعلا راح افضل اعمل بمكان ما فيه خلط بس علي حساب شهادتي :no0:

ام بالنالسبه للجامعه فالمنافسة علي اشدها بين الشباب والبنات ,,,,,يا الللللللله اشكثر الصبيان ينقهرون يوم نجيب حنا البنات grades اعلي منهم تقولون ذابحين حد من اهلهم هههههه,,فالتحدي يكون شديد:cop:

والخلط بالعمل او الدراسة مو قضية,,,,,,يعني الي يبي يلعب يقدر يخربط حتي لو كان مجتمعه كله من بني جنسة ,
هذا راي والسموحه ومشكور اخوي المقاتل :bye2:

السلام عليكم

همممم

انا ما أوافق ويا الخلط بين الأولاد والبنات في المدارس لانه في هالوقت:-
- هاليهال يالسين يكبرون والهرمونات تلعب دور .. ولا تي البنت وتنعجب في واحدbrgll:
- مابيدرسون عدل .. الولد لازم يخلي عمره غبي عشان يكون كوول .. والبنت لازم تتكشخ بزياده عشان ينعجب الولد فيها:hist:

باختصار .. وايد مشاكل واشيا مب زينه بتستوي:doh:


لكن

انا مع الخلط في الجامعه والأسباب
- كلهم أعقل في هالسن!
- البنت تكون مثقفه وتعرف الفرق بين الغلط والصح
- يعوّد البنت او الولد على الاختلاط عشان يوم يسيرون الشغل مايستحون
- يوم يكون الصف في بنات وأولاد وايد احسن عشان نحن البنات *غير شكل* مرات:harhar1: ومرات وايد نكون (مودي:boxed: ) ف يوم يكون شي أولاد البنت بتستحي على ويهها وبتيود عمرها وبتعق مودها في البيت < طاعو التفكير خخخخخخخ
- حلووو يوم يكون شي موضوع والبنات والأولاد يتناقشون فيه ويجوفون راي بعض .. مثلااااا اذا يرمسون عن "شو رايكم في البنت الى تسوق" البنت من هالموضوع تروم تعرف راي الريال في هالشي وهو بشو يفكر عن هالموضوع وvice versa .. يعني مثلا .. يمكن البنت ماتحط مخفي على سيارتها والريايل يجوفونه عيب لو البنت ماتحط مخفي لانه العالم كله يجوفها ف تعرف شو الغلط وراي الناس في هالشي << مجرد example:harhar1:
همممممم وانا عن نفسي بسير جامعة مختلطه مع انه كل هالأسباب من أسبابي بس عندي أسباب ثانيه .. بصراحه مرات يوم تدرسون في مدرسه بس فيه بنات تتعقدون نفسياَ وعقلياَ ... في مدرستنا نادراَ تحصلون بنت تبا تشتغل .. يعني كل سوالفهم تخص العرس والخطوبه والشوبينغ وكل سوالف البنات .. وانا بنت ممنوع أرمس عن شي يخص العرس لين ماخلص دراستي:harhar1: ..
يعني تخيلو انا سايره المدرسه ولو قلت حق البنات يوم بكون 18 بسوق كل وحده جي تجوفني >>O_o نعمممممم عيييييييب منقووود كيييف اهلج يخلونج!! ... كله ولا يوم قلتلهم بسير جامعه مختلطه .. خلو هالشي في صوب ... حصلت خمسين ألف محاظره .. كنت surounded by girls مب متفيجين يدرسون عشان في رايهم شو فايدة الدراسه اذا انا اخر شي بيلس في البيت ومابشتغل؟؟ :doh: *طبعا مب كلهم بس معظمهم*
ف مثل ماتجوفون .. تعقد نفسيا وبسير جامعه اعرف مستحيل يسيرولها لانها مختلطه:harhar1:

بس


بعد أجوف انه مب كل بنت يناسبها المختلط .. البنت الى شخصيتها ضعيفه والشخص يروم يستغلها بسرعه مالها مكان في الجامعات المختلطه .. وطبعا البنت الى تبا تلعب حطوو اكس عوود عليها ... صح انه في الجامعات الخاصه يمكن مانداوم كل يوم .. بس الشغل واااااااااايد:smartass:

انا اذكر ان مره صارت مجادله بيني وبيين وااحد على هذا الموضووع ..
ردييت رد وااحد

ما بني على بااطل فهو بااطل
والأختلااط اسااسه حرااام
وما اجتمع رجل بأمرأة اللا كان الشيطان ثالثهما ..

بس الحيين ما في مكاان ما في اختلاااط
!!

كل شي يؤدي الى الفتنه هو حرام
و الريال لو لقى البنت يالسه حذاله على كرسي الدراسه فهالشي فتنه
فالدراسه االمختلطه امر غير - عادي - مثل ما ذكر البعض

السلام عليكم ورحمة الله وبركاته

أخوي المقاتل ....

والله من وجهة نظري كفرد في هالمجتمع ... أشوف وأسمع وأعيش الواقع بكل أحداثه وتطوراته ...

أكيد ما أوافق ... مب لأني مال أول ! ولا لأني أحب أتفلسف ! ولا لأني معقده:doh:

لكن هالشيء ما ينفع بمجتمعنا بالذات ...

مع إنه الأيام اليايه تبشر بتغيرات كثيره ...بس بعد أرفض هالشيء ...

موضوع حلو وممتع ...واختلاف الرأي لا يفسد للود قضيه ... كل انسان له راي ...

واحترم وجهات نظر كل الأعضاء سواء مع أو ضد هالاختلاط

تسلم المقاتل على هالموضوع الحواري :yes:

:yes: اكتــفي بقراءة الردود..


واسجل اعجابي بالموضوع..

:shock: لا لا انا قلت بس بشوف ردين .. ماشاء الله وصل فوق الـ 10 .. :kcl: لا لا زين والله شكل الموضوع عيبكـــم .. وجان نشوف في تقدم في موضوعنـــا .

عالعموم .. من رأي ..

أعارض الاختلاط .. ولو إني في مكان مختلط .. ومكان فيه الروسيات والايطاليات والاستراليات والشاينيزيات .. إلي من يوم ما دشيت الكليه .. زين ما صارلي شي من كثر ما اتم مبحلق في البنات .. بس ربكم ستر .. مليت من كثر ما اشوفهن وعـ قولة الوالده يوم شافتهن ( خسهن الله مسودات لرقاع .. فاصخين الحيــا ) .. ههه هب جني ظهرت عن الموضوع .

نتائج الاختلاط :-

انعدام شي إسمه الحياء .. يعني نحن عندنا عادات وتقاليد وعندنا إسلامنـــا .. يوم انشوف بنت الناس نستحي ونصد .. وإلا يوم نبا نتزوجها ولا كذا ساعتها نتطالع .. وكل الموضوع نظره ونظرتين وبس .. بس إلي صار .. ان ويهنا صار لوح .. يوم اتمر البنت .. انشوف ويهها .. ونشوف عيونها ونحلل جسمها .. وما نخلي شي ما انشوفه .. يعني مخلصين الموضوع بالتمام 100 % .. ولا يوم بنسير عند الناس ويوم نبا نخطب لبنيه بتم تتطالعني ولا فيها ذرة حيا شبابها هاي :shock: الله يستر من إلي ياي .

الشي الثاني .. أسألهم وشـ فايدة الاختلاط .. يقولون يصير تنافس .. وان البنات شطار وإذا مزجنا البنات والشباب .. يصير في تقدم في الدراسه .. أنا بصراحــه ودي اعرف يعني بنخترع الذره يوم بحطونا ويا بعض .. ولا بنستوي علمــاء الأمــه ؟؟ :doh: للشباب إلي يدرسون في اماكن مختلطــه .. في يوم ما تكلمتوا عن وحـــده ؟؟ في يوم ما سرحتوا في وحــده وشفتوا مفاتن جسمهـا ؟؟ وبصراحه عندي سؤال لبعض من إلي ردوا .. البنت اتكون مثقفـــه فـ إيش ؟؟ :smartass: في الحب وعلاجـه .. ؟؟

لي عــــودة عقب لكلاس .. اتحمست للموضوع ( وإعذروني على الاخطاء اللغويه كتبته على الماشي .. هههه ) .

:puppyeyes: انا خلاص احتااج نظااره احتااجها

يابويه تسلم عالسؤاال والله يعين مستكم
عنيه اشوف بالمداارس لا..إلا إذ بدى بالخلط من الإبتدائيه أو روضه وماينطري عليه تغيير>>هاللي اشوفه الوحده تطري وااحد يوم اسألها من هذا تقولي كان وياي بصف رابع مثل أخويه:doh: خااوته البنت..المهم يعني مش فجأه..وعن الجامعاات مدري انا ارفض الفكره بكبرهااا لكن لونرجع للواقع الدنيا صارت خلط بلط,,يعني الخلط من ااياام الدرااسه يعود الواحد عالمستقبل الياي

ومتاابعه للردود :puppyeyes: اروح اتسلف ليه نظااره

اقتباس:

---

المشاركة الأصلية كتبت بواسطة المقاتل

:shock: عندي سؤال لبعض من إلي ردوا .. البنت اتكون مثقفـــه فـ إيش ؟؟ :smartass: في الحب وعلاجـه .. ؟؟

لي عــــودة عقب لكلاس .. اتحمست للموضوع ( وإعذروني على الاخطاء اللغويه كتبته على الماشي .. هههه ) .

---

طبعا السؤال حقي:fa35:

انته بنفسك قلت انكم انتو الشباب الى اتمون اتبحلقوون في البنت!! لكن في الأخير تلومون البنت... ليش انزين؟؟؟
وقصدت من مثقفه انتها تعرف الفرق بين الصح والغلط .. البنت المحترمه مهما استوى بتم محترمه! ونفس الكلام للشباب .. في الأخير كلحد عنده اختيارات .. وعلى الشخص يختار .. ومشكلته اذا اختار يسلك في الدرب الغلط ويسوي أشيا مب زينه .. بس مب معناته كلحد غبي وبيسلك الدرب الغلط

وثاني شي والى يقهرني زياده

شمعنى .. انتو ك شباب .. تخلون خواتكم يشتغلون في مكان مختلط بس تعارضون فكرة الدراسة المختلطه في الجامعه؟؟؟ وشمعنى .. انتي البنت .. تعارضين الدراسة المختلطه لكن تشتغلين في مكان مختلط؟؟؟

وبعدين

انتو تقولون لانه شي رييايل وحركات تستوي وكل شي .. أوكي .. في الجامعات والكليات الى بس للبنات هني في الإمارات .. تستوي علاقات في الجامعه من بين البنات .. ولا نسيتو شي اسمه بويات؟؟

والله ارحملي أداوم في جامعة مختلطه ولا أجوف هالأشكال الى بتعقدني .. كله ولا يوم ودونا رحله التقنيه .. أعوذ بالله

ونفس الشي في الشغل .. اذا تقولون البنت يمكن تحب واحد في الجامعه .. عيل نفس الشي يستوي في الداوم ..كم قصه وقصه سمعنا من مدير ياخذ سكرتيرة ولا مادري منو ياخذ مادري منو في الداوم كم مره سمعتو من هالقصص؟؟؟



في الاخير
كل مكان فيه الشين والزين .. وكلحد وكيفه في وين يختار يدرس لكن في الاخير لازم يتحمل نتايج اختياره وعواقبه

والسموحه

امممممم على حسب التربيه .. اذا كانت البنت او الولد إمربايين عدل أوكي وبين قوسين بين ( الوااااااااااااااازع الديييييييييينيييييييي ) .. بس اذا لا .. بيتاثرون بمغريات وملذات وصداقات الزمن لومهما كيف كانو وعيال منو ومحتاجين حنان وهمتمام ولا لا..

على فكره ..ليش ماتقايسون هالموضوع ( موضوع العلاقات ) بالبيوت .. ترا بعد شي ملايين من البيوت الريّال يتزوج البشكاره او يسوي وياها علاقه .. ومب شرط دايما الحرمه اتكون امقصره .. ترا الريال مرات اذا الشيطان ركب راسه بيخون سواء بالحلال او بالحرام

من نظرتي الخاصه .. انا اقول ان الاختلاط هو مش سبب للخروج عن طاعة الله .. لان السبب هو ضعف الوازع الديني والاختلاط الي انتوا اعتبرتوه سبب .. بنظري هوّ مجرد ظاهره من الظواهر الاجتماعيه .. يجوز يكون موضوعها حلال الف بالاميه يجوز يكون موضوعها حرام الف بالاميه ..

فهمتوا شو اقصد؟

وعليكم السلام

انا عن نفسي لا أوافق >> والاسباب معروووفة >>>

والسموووحه



قايد الريم

أنا ضد هذا الشي ...

أحاول أتخيل هذا الشي في الثانوية إللي كنت أدرس فيها ... شو كانوا الشباب بيسوون في البنات بس :)

و لو كانت المدارس و الجامعات مختلطة ماكان في أحد بيخلي بنته أو أخته تدرس في هالأماكن ... نص الشباب منحرفين و في قتلة و مغتصبين و حرامية و حثالة المجتمع كلها في المدارس الحكومية و حتى في الجامعات ... فالواحد لازم يخاف على أخته أو بنته من هالأماكن أو غيرها إذا كانت مختلطة ... و إللي بيقولي نحنا دولة إسلامية و مادري شو الواحد ما يخاف على بنته وين ما تكون بقولة قول هالكلام حق إمام خطبة العيد و لا تنسى تاخذ العيدية :)

بنات أو أولاد أو شاذين جنسيا أو حتى حيوانات هالشي ما يهمني المهم إني أدرس و أكون الأول ...

أعــارض وبـ شدة .. والأسبـاب معـروفة وغنية عن التعـريف ..

بسم الله الرحمن الرحيــم
.
.
بالنسبـة لي .. فـ المدرااس اعارض الاختـلاط لان و ماشالله اليهال
هالايـااام مشتطيين أكثر من الكـبااار ..
وعيـال المدارس تكون عقولهم مب ناضجه لـ هاك الزود .. الا القلة القليله
فـ بهالمرحلـة الاختلاط صعــب ويفتح عيونهم عـ أشيا وايد
عندي وحده من الاهل فـ صف 6 تدرس فـ مدرسة مكس ..
يوم سألتها شـ حال المدرسه \ بطيب نيه .. قالت لي كشخه ، عدنا أولاااد ..
يعني طاعوا اليهال كيف صار تفكيرهم فـ المدرسة المختلطه !!

أما فـ الجامعــات ممكن ان النسبة الكبيرة تكـون للـ عاقلين و اللي نضجـوا ..
صح بتـم في نسبه تفكـيرهـا بيكون منحصـر فـ الاختلاط من ناحيه سلبيـه ،
لمـجرد علاقااات وضحك وو و الخ .. ،

بس فـ معظم مجالات العمل الاختـلاااط موجوود موجووود ..
يعني اذا ما كان في الدراسه ـ في الشغل لااازم في .. الا فـ مجالات تنعد ع الاصابع ،

لكن اللـي يصير فـ بعض الجامعــات فـ البلاااد .. يخلي سمعة الاختلاط فيهـا فـ القااااع !!
لان وايد مب شايفين خير \ ولان وايد يفسرون الاختلاط بـ هالطريقة فـ يتوقعون وينشرون اشاعات
و الخ من الأسبـاااب

واللي بيدخل مكان مختلــط .. لااازم يتحمل الرمسه اللي بتيـه \ منصوري الدوله اتوقع طرى هالنقطه
لان البنـت وهي قاعده فـ بيتها اتييها الرمسه ، كيف اذا كانت فـ جامعة ولا بعد مختلطه ..!
وها كله من أصحـاب العقـول المتحجـره ، يعني ان شافوا البنت تتعامل ويا واحد ف الجامعة
أو ابتسمت له ، طلعوولهـا قصــص و اساااطير !!

،

المحترمه محترمه لو وين سارت
يمكن مراات تخضع للمغريـااات أو ما شابه
بس فـ النهايه أكيد بتصـحى وبترجع عن غلطهـا

،
وبعدين الاختلاااط فـ كل مكااان حتى فـ المولات و الاسواق
يعني يت على اختلاط المداارس والجامعاات ؟
يا ما سوالف وخراب بيوت صااار من ورى المولات والأسواق و الخ ؟!
يعني ان مادرسوا فـ مكان مختلط ، وكان فـ خاطرهم ينجرفون ورى هالسوالف والانحراف
تـرى الخيـاارات متوفره مني ومناااك
!!

بالنسبـه إلي ..
كنت بـرووح جامعة مختلطــه ، والأهل موافقين كلهم
وسجلت وجـييي
بس ماصار نصيب لول ، زواج مب جامعه ههه
فـ حولت الحيــييين مكــااان ثاني ،

أحس فـ بالي وايد كلام بس مش مرتب لول ، وأحس ها يكفي
والسمــووحه لو طولت

اختكم
الشيــن

.
.
.

^
تسلميييييييييييييين على هالرد العجيييييييب بصراااحة:fa35:
واخيرا حصلت حد راييه في هالشي نفسي!

لي عودة بإذن الله

اقتباس:

---

المشاركة الأصلية كتبت بواسطة هواجيس مشتاق

انا اذكر ان مره صارت مجادله بيني وبيين وااحد على هذا الموضووع ..
ردييت رد وااحد

ما بني على بااطل فهو بااطل
والأختلااط اسااسه حرااام
وما اجتمع رجل بأمرأة اللا كان الشيطان ثالثهما ..

بس الحيين ما في مكاان ما في اختلاااط
!!

---

أخوي "هواجيس مشتاق" ممكن افتح معاك حوار؟ .. واتمنى نكون ثنينتنا موجودين online في الواحات علشان اناقشك اثناء ما احاورك بنظرياتي الشخصيه ..

بس قولي لوسمحت متا يناسبك تدخل الواحات .. لأني طول اليوم فاضيه في البيت

أوه ماشاء الله توني الاحظ الاخ موجود في الواحات .. أتمنى انه ينتبه ويدخل الموضوع ..

مابي اتريا لين ماحد يلاحظ ان شي رد على رده . . ابي اقول الي ابا اوضحه >.<

ليش تعارضون على الاختلاط اذا كان له سبب مفيد وواثقين بالاشخاص ؟!

شو الي يمنع؟

الدين ما منع الاحتكاك .. بالعكس وضع له شروط مفهومه لكلا الجنسين ( بنات وللاولاد .. لا بعد ما اكتفى بالاشخاص . .إنما للمكان نفسه بعد )

سمعتوا عن الصحابيات؟ .. كيف صارو صحابيات وهم ما انتقل علمهم من الرسول صلى الله عليه وصلم لـ هم شخصيا "مباشره؟ .. الحرام هو سوالف الدلع والتمييع فالبنت .. وحركات الشباب .. اذا كان المكان فاضي مافيه الا هما او اذا كان مشبوه ..

صراحه انصحكم تفكرون بهالسالفه اكثر ..

ياما بنات من جامعات مختلطه ما عندهم سوالف ..
وياما بنات مدارسهم وجامعتهم مسوين سكشنات او فروع مخصصه لكلا الجنسين حالتهم قايمه ..

دينا حضاري .. قبل لا لا نستلم هالانماط الدراسيه من الغرب ..

peace

اقتباس:

---

المشاركة الأصلية كتبت بواسطة بوظبي

مابي اتريا لين ماحد يلاحظ ان شي رد على رده . . ابي اقول الي ابا اوضحه >.<

ليش تعارضون على الاختلاط اذا كان له سبب مفيد وواثقين بالاشخاص ؟!

شو الي يمنع؟

الدين ما منع الاحتكاك .. بالعكس وضع له شروط مفهومه لكلا الجنسين ( بنات وللاولاد .. لا بعد ما اكتفى بالاشخاص . .إنما للمكان نفسه بعد )

سمعتوا عن الصحابيات؟ .. كيف صارو صحابيات وهم ما انتقل علمهم من الرسول صلى الله عليه وصلم لـ هم شخصيا "مباشره؟ .. الحرام هو سوالف الدلع والتمييع فالبنت .. وحركات الشباب .. اذا كان المكان فاضي مافيه الا هما او اذا كان مشبوه ..

صراحه انصحكم تفكرون بهالسالفه اكثر ..

ياما بنات من جامعات مختلطه ما عندهم سوالف ..
وياما بنات مدارسهم وجامعتهم مسوين سكشنات او فروع مخصصه لكلا الجنسين حالتهم قايمه ..

دينا حضاري .. قبل لا لا نستلم هالانماط الدراسيه من الغرب ..

peace

---

أم خدود أول مره احس اني اتفق وياج ههه

هلا و الله المقاتل الموضوع وايد حلو

انا اشووف انه عادي يكون في اختلاط :kkk: بس لازم يكون في وعي بين البنات و الاولاد ان يعامل الولد البنت زي اخته :fa38: و البنت نفس الشي:daleel: ..و البنت اكثر شي لانه اذاهي احترمة عمرها الكل بيحترمها:negab: .. و بعدين حتى اذا ما كان في اختلاط في الكوليج او المدرسة لازم بنشتغل بعدين و بنتعامل مع شباب حتى اذا مكان خاص للحريم لازم يكون في كم ريال .. فنكون متعودين من قبل احسسن من انه ننصدم عقب و ما نقدر نتاقلم ..
بس عني انا شخصياً يللا يللا اتحمل كلاس في سير تبون بعد مخطلت :nono: مب عشان شي بس عشان الشيلة اتلعوز brgll:
و دمتم سالمين:fa34:

بسم الله الرحمن الرحيم
في البدايه احب اشكرك لطرحك مثل هالموضوع

بالنسبه لي
ما اوافق على الاختلاط
لاسباب وايد ومنها
اولا ان البنات يكونن في سن مراهقه ولا يقدرن يتخذن اي قرار يكون صايب
وبعدين الشباب نفس الحال

ثانيا الحين البنات ما ينقبظن لاني شفت وايد مواقف مب عدله يعني بنات صغار ما يتعدن ال17 وفي سناتر لين الساعه 1 او 2 وبدون ريال
وغير هذا المواعد شغال 24 ساعه


والشباب ما يقصرون من يشوفون بنت كانهم اول مره يشوفون هالكائن يعني الحق ما تلحق منو بيسبق
والبنات نفس الشي بعد الحين (راح الحيا)

وبعدين تخيل /تخيلي
بنتك/ج متصل واحد ويقول لو سمحت/ي ممكن اكلم فلانه
تسال /ين انت منو يرد انا زميلها في الصف وابا اسألها عن الواجبات لاني غايب اليوم
ويالله اسمع منهالاعذار لين ما تشبع



وفي النهايه اتمنى انه محد يزعل من كلامي

والسموحه ان غلطنا في حق حد

سلاااام

قضية الاختلاط كانت الشغل الشاغل عن أهل الدين أن كان في وسايل الاعلام
والمحاضرات وغيرها !!


وأغلبهم يكتفي بكلمة ( حــــرام ) :boxed:

ويرفضون أي رأي يخالف رايهم .. على أساس الفتاوي اللي كانت قبلهم


خل نرجع ورا شوي على ايام الصحابه ؟ عندهم الحرمـه كانت تركب الخيول وتحارب وكان لها دور بارز ,, تختلط بالرياييل من دون ما حد يقولها > حرام تسوين جي !


أنا من مؤيدي الاختلااط
اصلن ما احس ان الاختلاط حــرام .. بس حرموه لانهم جافو أسباب كثيره ممكن تخليه حرام ..

:kkk: تدرون ؟

كل شي في الحياه أو أغلب الاشيا اللي نسويها ممكن تكون حـرام
فـ ليش نخص سالفة الاختلاط بالذات .. صح أن في ناس (ماعندها دم) ماينفعلهم هالشي
بس بعد البنت اللي تكون في مكان مختلط مب يعني هاي ( Free ) وبنت مش اوكي :smile:

دام البنت صاينه عمرها ومتربيه تربية سنعه
ماعليها من شي :fa38: لانها عارفه حدودها وين ؟


وسمحولي


.
.
.:fa38:

بـــراااافو .. كـــلام جميــل ^^

أعارض الإختلاط ،،

خصوصا للى يدرسون