الامــــل

<font color='#000000'>اقروا القصة .. و ان شا الله تعيبكم

بس ما ادري اذا كانوا حاطينها من قبل <img src="http://oasis.bindubai.com/emoticons/biggrin.gif" border="0" valign="absmiddle" alt=':D'>




الأمل


شخصيات القصة:
نوره: عمرها 18 سنة..ثالث ثانوي أدبي..وهي رقيقة لأبعد درجات الرقه وعلى نياتها.
حمد: أخو نوره الوحيد...وهو أكبر منها بست سنوات...عازب ويسكن في بوظبي ويشتغل في شركة زادكو البترولية.
خليفة: أعز ربع حمد..ومن أقرب الناس له...عمره 25 سنة..وهو أصله من العين..بس يسكن في بوظبي..ويشتغل ويا حمد في نفس الشركة.
شيخة: حرمة أبوحمد ونوره..إنسانه متسلطه لأبعد الحدود..وهي في 37 من عمرها .
موزه: خت خليفة..عمرها 22 سنة..مخلصه كلية..ويالسه في البيت.
خوله: ربيعة نوره..وهي ربيعتها من أيام الروضه.
سعود: أخو شيخة..شاب يتميز بالوسامه والغنى..وفي نفس الوقت إنسان مستهتر..تزوج مرتين وطلق.

في مدرسة الزايدية ثانوية بنات..في وقت الفرصة..كانت مجموعة من البنات مسويات شلة ومتيمعات يأكلن ويا بعض ويسولفن..وكانت يالسه وياهن بنت سبحان ربي الخالق..خلق فأبدع..كان الشعر مثل الليل في سواده مع كل همسه أو نسمة هوى تحركه من نعومته..مع بشره بيضى بياض الحليب صافية ناعمه..وحمرة خدود طبيعية..والعيون بروحن قصيدة.. كل ملامح هالبنيه تدل على الجمال..هذي هي نوره علي محمد..و أي حد يمر على هالشلة من البنات يلفت إنتباهه هالبنت..من غير ملامح الجمال إلي تمتلكها..كان في شيء خفي يجذب أي حد يعرف نوره وإلي مايعرفها..كل بنات شلتها يحبنها..طيبه خدومه..وهي من طالبات التفوق رغم ظروفها الأسرية..وتساعد أي حد يطلب مساعده في الدراسة..
وضحى: هيه صح سمعتن عن الرحلة
نوره: أي رحلة؟
غبيشه: رحلت دبي
خوله: حلفي..
وضحى: والله سمعت من أبله نوال..قالت بيشلونا رحلة دبي الخميس الياي
غبيشه: زين والله
خوله: نواري لاتقولي مابتروحي كالعادة
نوره: زين إنج عرفتي
وضحى: زين ليش .. حرام نحن هالسنة أخر سنة ويا بعض في المدرسة
نوره: ياريت والله أقدر
خوله: انزين حاولي..
غبيشه: والله موب حاله هذي..نواري عشان خاطرنا على الأقل
نوره: انزين أنتن متأكدات إنه في رحلة
وضحى وغبيشة: هيه
خوله: نواري إن مارحتي أنا بعد مابروح مكان
نوره: بحاول..مع إني عارفه النتيجة
غبيشه: هيه حاولي وإن شاء الله يوافقوا
وضحى وهي مسويه حركه إشمئزاز: شفتن بدريه اليوم
نوره: شبلاها
وضحى: زاخينها في الأداره..وماخذه هزبه محترمه من الأخصائية
خوله: ليش..شو سوت
وضحى: جنج ماتعرفيها
غبيشه: شو سوت بعد
وضحى: زاخينها عندها موبايل
خوله: خييييبه
غبيشه: هذي البنت ماتوب أبد..كل يوم مشكلة
وضحى: نفسي أعرف وين هلها عنها
خوله: والله أنا شايفه أمها إلا من نفس الطينه
نوره: عيل يحليلها ماتنلام يوم أمها جيه
خوله: ماعلينا منها نحن..تسوي إلي تبيه..رجعنا للسالفة الأصلية
وضحى: الرحلة
خوله: نواري أنا عندي حل لمشكلتج
نوره: شو هي؟
خولة: أنا أعرفها حرمة أبوج شيخوه..لو أنا مثلا رمستها عن السالفة بتوافق..تعرفيها عاد جدام الناس غير
نورة: يمكن والله
غبيشة: عيل رمسيها..وإن شاء الله توافق
................
في منطقة زاخر..وبالتحديد في بيت بوحمد...كانت شيخة حرمة أبو حمد يالسه في حجرتها..وحاطه في ويها روب وعسل"أونها عاد تبى ترد شباب" وسمعت تلفون حجرتها..ويوم شافت الكاشف ماعرفت الرقم..
شيخة: ألووو
خولة: السلام عليكم
شيخة: وعليج السلام...منوه
خولة: شحالج عموووه شيخة..أنا خولة ربيعة نوره
شيخة لويه بوزها: هلا والله بخولة..شحالج حبوبه وشحال أمج
خولة: بخير ونعمه .. وأمايه الحمد لله يسرج حالها
شيخة: ها حبوبة تبيني أزقر لج نوير
خولة: لا عمووه أبى أرمسج أنت
شيخة عاقده حياتها: رمسي أسمعج
خولة: يوم الخميس عندنا رحلة دبي..فالله يخليج عمووه شيخة خلي نواري تروح ويانا
شيخة ميته غيض: بس حبيبتي أنتي تعرفي نوير ماتروح رحلات
خولة: بس عمووه هالسنة أخر سنة نكون ويا بعض في المدرسة..وهي يحليلها ولا رحلة راحت ويانا..الله يخليج خليها تروح هالمرة بس..
شيخة: انزين خلاص بخليها تروح..هب مشكلة
خولة مستانسه: تسلمي عموووه كنت متأكدة إنج بتخليها تروح ويانا..
شيخة: انزين حبوبه أنا بخليج الحين..وسلمي على أمج
خولة: يوصل إن شاء الله..فوداعة الله
شيخة: الله يحفظج
وبندت التلفون وهي ميته غيض...
شيخة: ماعليها مسودت الويه نوير..تبى تهيت في دبي..يصير خير...
قامت شيخة تغسل ويها..وبعد ماغسلته نشفته..ظهرت من الحجره..وراحت صوب حجرة نوره إلي كانت يالسه تذاكر...وفتحت الباب بقوى ...وشافت نوره يالسه فوق شبريتها تقرأ كتاب ...
شيخة: يامسودت الويه وين تبي تروحي
نوره وهي متفاجأة: شوو
شيخة: لا وسوي عمرج ماتعرفي السالفة
نوره: أي سالفة عمووه
شيخة: عمى يعميج قولي آمين..بعد هذا إلي ناقص هياته في دبي
نوره: إذا كنتي ترمسي عن رحلة دبي فهذي موب هياته..
شيخة: وعندج ويه ترمسي بعد..يوم موب هياته شو تسميها
نوره: عمووه كل المدارسة تشل رحلات دبي وبوظبي .. لو كانت الرحلات شرات ماتقولين ماكانوا شلوا البنات رحلات من الأساس
شيخة: لا وبعدها ترفع صوتها مسودت الويه
نوره: أنا ما رفعت صوتي
شيخة: الله يأخذ هالويه..متى بنيوزج ونفتك
نوره في بالها "والله موب يالسه فوق رأسج"
وتظهر من حجرة نوره وتبند الباب بقوة...ونوره في بالها "غريبة شمعنى هالمرة ماعطتني كم كف كالعادة..لاه حدث تطور...اها احين عرفت..أكيد أبويه في البيت..برمس خوخه بعدين بروح أيلس ويا أبويه شوي"
..وتشل التلفون إلي في حجرتها وتتصل بخولة..
نوره: ألوو .. السلام عليكم
أم خولة: وعليكم السلام
نوره: شحالج عمووه..عساج بخير
أم خولة: بخير يعلج الخير..شحالج بنيتي
نوره: الحمد لله عمووه..عايشين في هالدنيا
أم خولة: الله يعينج الغالية..على الدنيا وعلى حرمة أبوج..أزقر لج خويل
نوره: هيه
راحت أم خولة تزقرها..
خولة: السلام عليكم..شحالج نواري
نوره: وعليج السلام..ها خوخه بشري
خولة: ماأعرف شقولج..
نوره: قولي ماوافقت وبس..أنا قلت لج لاتعبي روحج..أعرفها مابتوافق
خولة: حلفي أنتي بس
نوره: شووو&#33;
خولة: ها شو بتلبسي يوم الخميس..ترانا نبى نطقم
نورة وهي مستانسه: هههههههههههههههه فديت روحج يعني وافقت..موب مصدقه
خولة: والله وافقت..أصلا أنا كنت متأكدة إنها بتوافق..هي تحاول تظهر غير جدام الناس
نورة: الله يأخذها ويفكني منها
خولة: الله يعينج عليها..المهم نواري بنتكلم باجر عن الرحلة..احين بظهر بروح السوق..خاطرج في شيء
نوره: سلامتج الغالية
خولة: الله يسلمج..يلا باي
نوره: باي
عايلة خولة تعرف عايلة نوره من زمان..من أيام أم نوره الله يرحمها..وعلاقتهم ببعض قوية من زمان...ويسكنوا عدالهم ...
بعد مابندت عن خولة ظهرت من حجرتها ونزلت تحت في الصالة..ولقت أبوها وحرمته شيخة...
شيخة: هلا والله بنواري..تعالي يلسي ويانا
نوره في بالها "يالله يالنفاق" : مساك الله بالخير يبه
بوحمد: الله يمسيج بالنور نواري..وينج محد يشوفج
شيخة ترز بويها: هيه والله كله حابسه عمرها في الحجره
نوره: كنت أذاكر .. عليه باجر إمتحان
بوحمد: الله يوفقج الغالية
شيخة: آمين..عسب نيوزج
بوحمد: نيوزها شو حرام عليج ياهل
شيخة: 18 وياهل الله يهديك.. حرمه .. وألف من يتمناها
نوره: أنا مابتيوز الحين..بكمل دراستي
شيخة: لا دراسة ولا شيء...الحرمة في بيت ريلها أحسن لها..بعدين شو بتأخذي من هالدراسة
نوره وهي متضايجة: بس أنا أبى أكمل دراستي
بوحمد: طبوا هالسالفة..وخلوني أتابع الأخبار
يلست نوره مع أبوها وحرمته نص ساعة...بعدين راحت حجرتها تكمل مذاكره...من ظهرت نوره من الصالة ألتفتت شيخة على بوحمد..وبوحمد كان يتابع الأخبار..
شيخة: بوحمد
بوحمد: عيون بوحمد
شيخة: تسلملي عيونك..بس بغيت أرمسك في سالفة
بوحمد: رمسي الغالية أسمعج
شيخة: شو تسمعني وأنت مطلع عيونك على التلفزيون
لتفت بوحمد صوبها: ها رمسي أسمعج
شيخة وهي مبتسمه: الله يسلمك السالفة تخص نوير
بوحمد: شو فيها نواري؟
شيخة: مافيها شيء..بس
بوحمد: بس شو..؟
شيخة: في حد رمس عنها ويبى يخطبها.."وهي عاقده حياتها تتريا ردت فعل بوحمد"
بوحمد: انزين هذي موب أول مرة حد يبى يخطب بنيتي..من يوم هي عمرها 15 ماوقفوا الخطاب إلي يبوا نواري
شيخة: بس هذا غير عن إلي خطبوها قبل
بوحمد: جيه يعني غير؟
شيخة: ممممممممممم يعني غير عنهم..لأنه
بوحمد: لأنه شو؟
شيخة: لأنه أخويه سعود
بوحمد: أخوووووووج&#33;&#33;&#33;&#33;&#33;
شيخة: شووووو ماعيبنك أخوي
بوحمد وهو مرتبك: لا ماقلنا شيء بس...
شيخة: بس شوووو
بوحمد: بس الله يهديج البنيه عمرها بعدها 18 وهو عمره 29 سنة
شيخة: ونزين شو فيه..أنا متيوزتنك وأنت أكبر عني 19 سنة
بوحمد: بس هذا غير
شيخة وهي معصبة: جيه يعني غير
بوحمد: وبعدين أخوج الحين متيوز مرتين..ومطلق
شيخة: ماأعتقد إنه فيه شيء..كل الناس تتزوج وطلق..وبعدين أخوي مايعيبه شيء..حسب ونسب وفلوسه ماليات البنوك..ومزيون
بوحمد: بس حتى لو .. البنيه صغيره الله يهديج
شيخة: لا صغيره ولا شيء.. أخوي سعود يباها..وباجر ترمسها عن السالفة..انزين
بوحمد: بس بعدها ماخلصت دراسة
شيخة: ماباقي شيء شهرين وتخلص..مابيفرق
بوحمد: انزين شرايج الغالية أرمسها عن السالفة بعد الإمتحانات..عسب مايكون شيء ثاني يشغلها عن مذاكرتها
شيخة: شو بعد تفكر..هاإلي قاصر بعدك تشاورها
بوحمد: لا ماقلت جيه..بس أرمسها بعد الإمتحانات
شيخة: انزين..بعد الإمتحانات..أمرنا على الله
.................................................. .......


كان بوحمد شخصيته ضعيفة وايد...بعد ماتوفت أم حمد "سلامة" يلس خمس سنوات من دون مايتيوز...بعدين نصحه أعز ربعه أنه يعرس...وبعد محاولت إقناع وافق...فتزوج شيخة إلي كانت يارتهم...وهي أصلا مطلقه وعمرها 29 سنة...وهي طبعا بشخصيتها القوية المتسلطه...قدرت بكل بساطه إنها تسيطر على بوحمد إلي كان بشخصيتة الضعيفة...وقدرت تخليه مثل الخاتم في أصبعها...كان مايقدر يرفض لها أي طلب...طلباتها أوامر...وبسبب هالشيء والظلم إلي يوقع على حمد وأخته نوره...من خلص حمد الدراسة أنتقل يسكن في بوظبي عسب يبتعد عن مشاكل حرمة أبوه إلي من يوم يومها مأذتنه...ويي كل نهاية أسبوع العين...بس علشان أخته الوحيده...
في بوظبي...وبالتحديد في شقة حمد...كانت الفوضه تعم المكان...وصراخ الشباب "مسوين إزعاج لشقق الثانية" هالشيء تقريبا يومياً...مجموعه تلعب ورقه...ومجموعه يالسين يتابعوا مباراة العين والأهلي "ضمن الدور الإماراتي" وكان حمد منهم...لأنه موته العين...وإلي يالس على الكمبيوتر مطيح في الشات...وكان ربع حمد الإ ايوه الشقه معروفين "خليفة وهذا طبعاً أعز ربعه وهو عيناوي حتى النخاع...ومحمد و مبارك الزعابي وهذيلا وحداويه وطبعاً يشجعوا الأهلي اليوم...وفهد إلي كان حيادي مايهمه من يفوز لأنه يشجع الأتحاد...سعيد وأحمد هذيلا مدمني شيء أسمه شات وطايحين في خلق الله سب وشتم...خالد، جمعه، حميد، راشد هذيلا جماعة الورقه كله إلا منازع "يالغشاش...يالهرم...لعب شرات الناس أحسن لك...تراه بلمك كف" ماعندهم غير هالألفاظ...
حمد: بتشوفوا اليوم إن مافاز الزعيم وغسل الأهلاويه
خليفة: أكيد....منهو الزعيم
حمد: عيناوي
محمد: لاتستعيلوا وايد المباراة في بدايتها بعدها
فهد: تصدق حمد
حمد: شووو
فهد: أنا والله ماأدانيكم يااهل العين..وايد تراكم رافعين خشومكم
حمد: لازم...موب نحن من دار الزين
مبارك: مايهمنا...المهم في النهاية الدرع بيكون في خزينة العنابي
خليفة: هههههههههههههههههه تخسى..عاد مالقيت منوه بيأخذه غير أنتوا
فهد: المهم من ها كله.. إذا فاز اليوم العين العشى على محمد ومبارك وإذا فاز الأهلي على حمد وخليفة..
حمد: ههههههههههه أنت هذا إلي هامنك..بطنك..ولا يهمك اليوم العشى على بوجسيم
محمد: لا تحلم وايد
حمد: انزين المهم من بيضحك في الأخر...
بعد شوي دخل عليهم أحمد وهو ميت ضحك...
حمد: شو فيك..ضحكنا معك
أحمد: ههههههه والله حاله
خليفة: شو السالفة....؟
أحمد: سعيد ويا رأسه طايح سب في الناس من ساعة..وماأعرف من شوي وصله مسج صغير مكتوب فيه"تأدب يالحمار أحسن لك" إلا نسمع نقعه في الكمبيوتر ويبند في ويهنا
حمد وهو مبطل حلجه: شوووووووووووو
أحمد: هههههههههههههه شكله جهازك راح...أنصحك بمحل يبيعوا فيه كمبيوترات روعه وسعرهن ممتاز
حمد وهو معصب عليهم: لاه زين..خربتولي جهازي..
رغم كل هذا إلا إن حمد يحب ربعه ويعزهم..لكل واحده منه ميزه..وبعضهم ربعه من أيام المدارس..وبعضهم من أيام الكلية..بالذات خليفة إلي كان ربيعه من أيام المدرسة..لأنه كان يسكن في العين..بس الحين أنتقل هو وأهله بوظبي..
أما بالنسبة لأخته الوحيده نوره..فهي شغله الشاغل..هي أعز إنسان في الوجود إلي بقت له في هالدنيا بعد أمه الله يرحمها..أما أبوه فهو في خلاف دايما وياه وعمرهم مااتفقوا...وطبعا السبب دايما في هالخلافات إلي بين حمد وأبوه شيخة...إلي كانت مااطيقه ...وفتكت منه بعد ماسكن في بوظبي...

يوم الخميس...
طبعاً شالين صف نوره رحلة دبي..وصلوا هناك الساعة 10 ونص..وعلى طول من وصلوا دبي البنات طلبوا يروحوا مركز وافي..كانت نورة وشلتها يتمشن بروحن في المركز..ومامغطيات ويوهن..لأنه في هالوقت مافيه زحمه..المكان تقريباً فاضي..وكل مايمر ريال سوى هندي ولا بتاني ولا زلمه...يغطن نص ويهن بالشيله..إلا غبيشة..هاي عاد بروحها سالفة..شخصيتها قوية غير عن ربعاتها..وتتصرف شرات الريال لأنها ماعندها خوات..عايشه بين 8 خوان شباب "يعني لازم تتأثر"
غبيشة: شبلاكن .. حشى ماصارت كل مايمر علينا هنيدي مايسو بيزه غطيتن ويهكن
نورة: موب ريال
غبيشة: لا موب ريال هندي
الكل يضحك على غبيشة...
نعيمة: لا زين هندي موب ريال...عيل حرمه ههههههههههههه
وضحى: تعرفن شيء
خولة: شو
وضحى: تصدقن إني أول مرة أيي دبي..خواني كل ماأقول لهم شلوني وياكم دبي..يقولولي منقود..هذا بعد نشل بنات
نورة: حشى عاد موب جيه...أنا الحمد لله عندي أخو يسوى الدنيا بما فيها..طلباتي أوامر
وضحى: أحسدج على هالأخو
نورة: ههههههههههههه ذكري ربج يالدبه
يلسن يتمشن في المركز...لحد ماوصلن عدال محل للمجوهرات...
خولة: تعالن وياي..أبى أشتري شيء حق أمايه فديت روحها
نوره: يلا حتى أنا بشوف يمكن يعيبني شيء..
بعد ماظهرن من المحل .. شافن شلة شباب توهم داشين المركز..يتلفتوا يمين وشمال "حشى رادار" يوم شافوا نورة وربيعاتها..راحوا صوبهن..فيوم شافوهم يايين صوبهن تغشن بسرعة إلا غبيشة طبعا...
وتموا يلاحقوهن من مكان لمكان...لحد ماوصلت غبيشة حدها..ولتفتت صوبهم ووقفت عن المشي..وحطت أيديها في خصرها...حتى ربيعاتها إنصدمن يوم شافنها وقفت وسوت جيه...
غبيشة: وبعدين معكم...شو هاقلة الأدب
فيصل وهو يغمز لها: ياويلي أنا على الخصر
نصدمت غبيشة وفولت على الأخر: عن الله هالشيفة.. جلب ويهك لاه
فيصل: على أي صفحة
تم يضحك هو وربعه على غبيشة إلي كانت صايره حمره من العصبية...
بعدين سحبتها نورة من جتفها: لبسيه..لا تعطيهم ويه..الناس يطالعونا
غبيشة: والله قاهرني..نفسي ألمه كف ماينساه
نعيمة: غبووش..قلنا بس..مافينا على الفضايح
غبيشة: انزين حشرتوني..يلا نروح الباص بيتحرك بعد شوي
وضحى: يخييييه..بعدهم يلاحقونا..شو هذيلا ماعندهم دم
غبيشة: بعد هالأشكال عندهم دم
وتموا الشباب وراهن..ويرقموهن..لحد ماوصلن من وين بقية البنات..طبعا يوم شافوا الشباب إنهن وصلن لربعاتهن لفوا صوب ثاني ويلسوا يراقبوهن من بعيد...
بعد ماتجمعن البنات كلهن..ركبن الباص..وراحن مطعم وتغدن تقريبا كان عصر..وبعدين راحن على طول وندرلاند..
كانت نورة وشلتها واقفات عدال الطلقة..ويالسات يحاولن في نورة إنها تركب معهن..وهي موب طايعه..لأنها تخاف من الأماكن المرتفعه.. ركبن كلهن ماعدا نورة وخولة.. فجأة تصرخ خولة...
خولة: بنات بنات
نورة: شبلاج
خولة: طالعي هناك "وأشرت على مكان"
نورة يوم طالعت من وين خولة تأشر..أنصدمت..لأنها شافت نفس الشباب إلي كانوا يلاحقوهن في وافي...
نورة: يالفضيحة..يالسين يراقبونا
خولة: بروح أخبر هالخبلات
والشباب كانوا يالسين يطالعوا شلة نورة ويضحكوا عليهن...
نورة صاير ويها أحمر..لأنها تذكرت اللعبات الثانية إلي ركبتهن..وهي أصلاً ماكانت متغشية"يالفضيحة شافوا ويهي..وشافونا ونحن نصارخ"تقول في بالها
كل البنات ربيعاتها نزلن من الطلقة..إلا غبيشة قالت ماعليه أنا منهم..
نعيمة: نفسي أعرف ليش الشباب جيه دايماً..يوم يشوفوا بنات وكأنهم موب شايفين خير
خولة: هيه والله
وضحى: وياريتهم يتشاهد في ويهم..كل واحد أخسف عن الثاني
يلسن يضحكن على رمسة وضحى..ويطالعن غبيشة
نورة: نفسي والله لو أكون بجرائة غبوش
بعد ماظهرن من وندرلاند المغرب..مروا على مطعم وخذوا وجبات سريعة..وعلى طول على العين...
كانت هالرحلة من أجملة الرحلات إلي راحتهن نورة..لأنها غير.. مع ربعاتها..كانت حرمة أبوها تمنعها تروح أي مكان..حتى المناسبات من عروس وحفلات ماتروحن..فكانت نورة تحس إنها معزوله عن المجتمع..المكان الوحيد إلي تتحرر من قيود حرمة أبوها..مدرستها..
.................................................. ...


بعد أسبوع من الرحلة..يوم الأربعاء في المسا..كانت نورة يالسه في حجرتها تذاكر..وسمعت دقات خفيفة على الباب..
نورة: أدخل
أنفتح الباب..ودخل حمد..يوم شافته نورة..قامت بسرعة وراحت صوبه ولوت عليه...
نورة: حرام عليك..ليش ماييت الأسبوع إلي طاف
حبها على رأسها: والله كنت مشغول يالغالية..
نورة: انزين في أختراع أسمه تلفون
حمد وهو يبتسم لها ويمسح على رأسها: تعرفيني ماأحب أتصل تلفون..مافيني ترمسني شيخوه
نورة: المهم شحالك أنت وشعلومك
ويلسوا على شبريتها
حمد: يسرج حالي...شحالج أنتي وشخبار الدراسة وياج..تذاكري
نورة: دامك أنت بخير أنا بخير ..والدراسة تراني أذاكر
ويلس حمد يرمس ويا أخته نص ساعة...
حمد: يلا غناتي أنا بظهر الحين
نورة وهي عاقدة حياتها: وين
حمد: ربيعي عازمني على عرسه..وهب زين ماأروح
نورة: انزين بس لاتبطي..بترياك
حمد: انزين الغالية
........
في بوظبي وبالتحديد في بيت خليفة...كان يالس وياأمه وأخته موزة وأخوه الصغير ناصر...
موزة: ياناس والله مليت من يلست البيت أبى أشتغل
خليفة: ههههههههههههههههه يعني شو أسويلج..ماخليت مكان إلا وسجلتج فيه
موزة: مايخصني أبى أشتغل
خليفة: ويوم حظج مقرود .. محد يباج تشتغلي عنده
أم خليفة: لا شغل ولا شيء ايلسي في البيت أحسن لج
موزة: أمايه ... والله حرام بعد هالسنوات 12 سنة في المدرسة..3 سنين في الكلية..وتبيني أيلس في البيت
ناصر: لو الشور شوري ماأباج تشتغلي
موزة: وليش إن شاء الله
ناصر: يوم بتشتغلي منوه بيذاكرلي
موزة: يالله يالأنانيه إلي فيك يانصووور
أم خليفة: هيه صدج يوم بتشتغلي منوه بيجابل نصور في مذاكرته
خليفة: إلا أقول أمايه بيونا باجر قوم عمي مبارك
أم خليفة: حياهم الله
خليفة طبعاً ساكن بوظبي عسب يكون جريب من شغلة..وبما أنه هو المسؤول عن أمه وأخته وأخوه بعد ماتوفى والده..أضطر يأخذهم معه بوظبي..وعلاقته بعمامه إلي في العين موب لين هناك..والزيارات بينهم نادرة..
......
مرت الأيام...وبدأت إمتحانات أخر السنة...وحمد يومياً يتصل بأخته يطمن عليها وشو سوت في الإمتحان...وخلصت الإمتحانات...ويا وقت النتايج...
في يوم كانت شيخة يالسه في الصالة اتابع مسلسل خليجي..سمعت التلفون ويوم شلته لقته أخوها سعود..
سعود: هلا والله بالغالية..إلا ماعطنا ويه
شيخة:ههههه هلا بك..يعني أنت إلي عاطني ويه..أعرفك ماتتصل فيه إلا إذا تبى شيء..صح
سعود: مممممممممم هيه
شيخة: ها شو تبى خلصني
سعود: حشى...انزين كنت ابى اسئلج عن سالفتي أنا ونورة
شيخة: شفيها؟
سعود: شو بعد شفيها..موب أنت إلي قايله إنكم بترمسوا البنيه بعد الإمتحانات..والإمتحانات خلصت..وماسمعت شيء منكم
شيخة: نفسي أعرف مالقيت غير هالخبله..تعدمن بنات الناس
سعود: تعيبني كيفي
شيخة: هالرمسه دايماً اسمعها منك.. يوم شفت هدى قلت نفس الرمسة..وحصة نفس الشيء..أنت متى بتعقل..
سعود: لا صدقيني نورة غير...والله أحبها من يوم طاحت عيوني عليها
شيخة: أمحق حب..من حلاتها
سعود: هههههههههه أعرفج غيرانه
شيخة: وووووووووع مالقيت من منوه أغار...يغير نوير
سعود: فديتها..قمر يمشي على الأرض
شيخة: انزين جلب ويهك..برمس بوحمد اليوم
سعود: فديت ختيه والله..ومتى بتردي عليه
شيخة: بشوف..يلا باي
وبندت التلفون في ويهه...ويلست تفكر "بوحمد سهل..بس المشكلة العوده حمد..الله يأخذه ويفكني منه"
بعد مابندت شيخة عن سعود..تذكر أول مرة شاف فيها نورة..عيد الأضحى إلي طاف..كان بالصدفه ياي يسلم على أخته وريلها..فدخل صالة بيتهم من دون مايستأذن..فأول مادخل الصالة طاحت عينه على نورة إلي كانت فاله شعرها الأسود الحريري ومتعدله..إنصدم..وتيبس مكانه..معقولة هذي هي نورة..إلي أخته مابقت مذمه ماحطتها فيها..عمره ماتصورها جيه..كانت آيه في الجمال..
كانت نورة منصدمة ساعتها..موب عارفه شو تسوي..فركضت بسرعة من الباب الثاني.. ومن يومها وهو مايفكر في أي وحده ثانية غيرها..أحتلت فكره وقلبه وأحلامه..
في بوظبي
في شركة زادكو..حمد يالس في مكتبة يشيك على إميلاته..ويتريا نورة تتصل فيه عسب تخبره عن النتيجة...سمع تلفونه..وشله بسرعة لأنه شاف على الشاشة "البيت"...
حمد: ها بشري
نورة: هههههههه الناس أول تسلم
حمد: ههههههه السلام عليكم.....النتيجة؟
نورة: مممممممممم حمد أنا شديت حيلي..وذاكرت..بس
حمد وهو متضيج: بس شووو؟ لا تكوني بس...
نورة: ههههههههههههههههههههه نسبتي 96% بس
حمد: هههههههههههههه خرعتيني ويا رأسج..ألف ألف مبرووووك الغالية
نورة: الله يبارك في عمرك
حمد: بصراحة نسبة ترفع الرأس..فديت نواري والله
نورة: فديت من تفدى نواري...يلا تراني أتريا الهدية
حمد: إنتي بس إطلبي إلي تبيه..مايغلى عليج شيء يابنت علي
نورة: ماتقصر والله يالغالي
حمد: ها ماطلبتي بعدج
نورة: يوم الأربعاء تي بخبرك شو أبى هدية
حمد: أوكى غناتي..أنا بخليج أحين عندي شغل
نورة: أوكى...فمان الله
حمد: ربي يحفظج
بعد مابندت عن حمد...شلت التلفون وأتصلت في أبوها إلي كان في المزرعة...وبشرته على نجاحها ونسبتها الحلوووه..وفرح لها أبوها ووعدها بهدية يوم يرد من المزرعة...
في نفس اليوم المسا..بعد مارجع بوحمد من المزرعة..رمسته شيخة عن سالفة أخوها..وتضايج بوحمد..بس كان مايقدر يقول "لا" حق شيخة..فوعد حرمته إنه يرمس نورة عن سالفة الزواج من سعود في اليوم الثاني..لأنه في باله قال"حرام أخرب فرحة بنيتي بنجاحها بهالخبر"
في اليوم الثاني..كانت نورة متسدحة فوق شبريتها تقلب مجلة..سمعت دقات على الباب..
نورة: أدخل
أنفتح الباب ودخل أبوها..
بوحمد: شحالج حبيبتي
نورة: دامك بخير أنا بخير
بوحمد: دوم إن شاء الله...نواري أباج بسالفة
من شكل أبوها وهو عاقد حياته..خافت
نورة: خير يبه..رمس أسمعك
بوحمد: نواري أنت الحين خلصتي مدرسة..وأنت كبرتي موب ياهل شرات أول..
نورة: شو السالفة ؟؟
بوحمد: لا تقاطعيني..خليني أكمل كلامي..وأنت ما شاء الله عليج الخطاب من يوم صغيره مانقطعوا عن بيتنا..وكان لرفضنا سبب..وهو إنج ياهل بعدج..بس الحين شو بيكون سبب الرفض..ولا شيء
الحين فهمت نورة الموضوع..الأمر فيه زواج.."وأكيد المسئلة من ورى رأس شيخوووه" تقول في بالها
بوحمد: وتراه يابنيتي الزواج ستر للبنت..وأعرف بتقولي أبى أكمل دراستي..هب مشكلة..إلي بيأخذج بنشرط عليه إنج تكملي دراستج...
نورة وهي متضايجه: بس يا بويه أنا ماأبى أعرس احين
بوحمد: انزين ليش
نورة: أنا ماأفكر احين بهالشيء
بوحمد: سمعيني زين..خلي عنج ماتفكري بالزواج احين..والريال إلي متقدم لج مافيه شيء سعود جه تعرفيه..أخو عمتج شيخة..ألف من تتمناه..وبيي يوم الخميس يخطبج..وأنا بقربه
قام أبوها وظهر من الحجرة..ونورة تحس الدنيا أدوربها.."معقولة أبويه بيوزني سعود..أخو شيخوووه..عاد تعدموا الريايل عسب أتيوز أنا هذا..ومعقولة أبويه يرضالي بواحد جيه" وتمت اتصيح على حظها..
.................................................. ...........


في اليوم الثاني "يوم الأربعاء" كان بوحمد هو وحرمته يالسين في الصالة..وشيخة تبى تعرف شو قال حق بنته..لأنه يوم رمس بنته..بعد ماظهر من عندها كان متضايج وايد فراح يرقد على طول..
شيخة: بوحمد
بوحمد: لبيه
شيخة: شو صار أمس؟
بوحمد: شو بعد صار..تراني رمست البنت..وخبرتها إنه أخوج بيي يخطبها باجر
شيخة وهي مستانسه: فديت روحك والله..جيه أباك
بوحمد وهو متضايج: بس والله حرام
شيخة وهي عاقدة حياتها: شوووو هو إلي حرام
بوحمد: البنت صغيره عليه
شيخة: لا صغيره ولاشيء...جيه هي شو قالت
بوحمد: شو بعد يحليلها بتقول..متضايجة
شيخة: بنتك شايفة نفسها وايد..هي تحمد ربها إنه أخوي يباها
بوحمد: انزين أنا بروح المزرعة
شيخة: روح...بس لاتنسى اليوم معزومين على عرس في المقام
بوحمد: يصير خير
بعد ماظهر بوحمد..راحت شيخة حجرة نورة..إلي من أمس ماظهرت منها..وفتحت عليها الباب..لقتها يالسه فوق شبريتها وعيونها حمر..
شيخة: شووو مات عليج حد
نورة:.......
شيخة: شو فيج ماتردي يامسودت الويه
نورة ماتتكلم يالسه بس اطالع شيخة إلي كانت تتقرب منها...
شيخة: ولا هذي دموع الفرح..لأنه أخويه فكر يأخذج أنت
نورة ماستحملت تيلس ساكته: وعلى شو ياحسره أفرح..لأني بتيوز واحد شرات أخوج
مسكتها شيخة من شعرها: وشو فيه أخوي..عمج وتأج رأسج ياقليلة الأدب
نورة: أنا انزين مايشرفني
شيخة: والله ولسانج طال يانوير"وعطتها كف..من قوته طاحت" بنشوف هذا إلي مايشرفج..بتتيوزيه وغصباً عنج
خلتها وظهرت من الحجرة..وتمت نورة تصيح وهي حاطه يدها على خدها إلي أثر الصفعه مبين بكل وضوح..فجأة يصيح التلفون إلي في حجرتها..وقامت ترد عليه وهي تمسح دموعها..
نورة: السلام عليكم
خولة: وعليج السلام والرحمه..شحالج "وهي حاسه من صوت نورة إنها صايحه"
نورة وهي تمسح دموعها: بخير يعلج الخير..شحالج أنت
خولة: نواري شو فيج
نورة: مافيني شيء
خولة: نورة أنتي تصيحي صح
نورة: لا
خولة: أكيد إلي ماتخاف ربها ضربتج
نورة: قلت لج مافيني شيء
خولة: تخبي عليه أنا..نورة أنا أعرفج أكثر من نفسج
نورة:......."ساكته"
خولة: أقولج بيج احين
وبندت التلفون..
بعد ربع ساعة وصلت خولة..وكانت شيخة في حجرتها تتعدل عشان العرس إلي بتروحه..فعلى طول راحت خولة حجرة نورة..ودخلت عليها..ويوم شافت نورة حالتها جيه ركضت صوبها..
خولة وهي تتلمس مكان الضربة على ويه نورة: الله يأخذها هذي ماتخاف ربها
ونورة تصيح: يبوا ييوزوني بالغصب
خولة: شووووووو..ايوزوج
نورة: هيه
خولة: وأبوج راضي
نورة: وهو يقدر يتكلم
خولة: حسبي الله عليها..انزين نواري حبيبتي فديتج روحج بس..والله موب قادرة أشوفج جيه
نورة: لا وأكثر من هذا..إنهم بيوزوني سعود
خولة: منوووه سعود؟
نورة: أخو شيخووه
خولة: معقولة..هذا إلي يتيوز ويطلق
نورة: هيه
خولة: لا ماعليج الغالية..إذا أبوج وافق..حمد مستحيل يوافق على واحد جيه
نورة: ويه
خولة: شو فيج
نورة: تذكرت حمد اليوم ايي..ماأباه يشوفني وأنا جيه..بروح أغسل ويهي
خولة: خليه يشوف إلي تسويه فيج شيخوووه
نورة: مافيني أضيج عليه
خولة: نواري إن تميتي جيه محد بيوقفها عند حدها
نورة: يصير خير "وراحت تغسل ويها"
بعد ماغسلت ويها..يلست عدال خولة..
خولة: ولحين على بالج حمد مابيعرف إنها ضاربتنج
نورة: وكيف بيعرف؟&#33;
خولة: نسيتي خدج المورم..وعلامة الضربة والله بعدها مبينه
حطت نورة يدها على خدها..ويلست تفكر..هي على كثر ماتضربها حرمة أبوها بس عمرها ماخبرت حمد عن شيء..ماكانت تريد تشغل بال حمد عليها..
خولة: انزين الغالية أنا بروح احين عندنا ضيوف
نورة: ماشاء الله عليج..عندكم ضيوف..وحضرتج يالسه مجابلتني
خولة: نواري أنا يوم سمعتج في التلفون تصيحي ماقدرت..وأستاذنت من أمايه..قلت لها بروح أشوفج..وبرد بسرعة
نورة: تسلمي الغالية ماتقصري..صح أنا ماعندي خوات..بس والله أنت عندي في مقام الأخت وأكثر بعد..وأنتي تعرفي معزتج عندي...
خولة: والله نفس الشعور يالغالية..المهم نواري أنا بروح احين وبتصل بج أوكى
نورة وهي تبتسم: أوكى
كانت علاقة نورة وخولة قوية..كل وحده بالنسبة للثانية مثل الأخت وأكثر وأسرارهن ويا بعض..ومن أيام الروضه ماافترقن عن بعض..بعكس ربيعاتها الثانيات..كانن صح يعرفن إنها تعيش ويا حرمة أبوها وأنها موب مرتاحة..بس ماكانن يعرفن أكثر من جيه عن حياة نورة ومعاناتها ويا حرمة أبوها...
بعد ماراحت خولة قررت نورة ترقد..وما مر ربع ساعة إلا وهي راقد من التعب..
في المسا الساعة 9 بعد ماظهر بوحمد وحرمة..وصل حمد البيت..وأول مادش البيت..شافته لين "بشكارتهم" يت صوبه...حتى حمد مستغرب..
لين: بابا همد
حمد: خير شو فيج
لين: ماما نورة في أسنين يوم مافي يوكل
حمد وهو عاقد حياته: ليش..جيه شو صار
لين: أنا مافي يأرف..بس ماما سيخة اليوم يذرب نورة
حمد: شوووو
على طول ماخلاها تكمل رمستها..راح حجرة نورة ودق الباب..بعد شوي سمع صوتها تقول له يدخل..أول مادخل شافها يالسه على طاولتها ترسم..يوم ألتفت صوبه لاحظ شيء موب متعودنه في نورة وهو إنها كانت منزله خصلة كبيرة من شعرها على خدها فشك على طول..
حمد: السلام عليكم
نورة وهي تقوم من على الكرسي وتسلم على أخوها: وعليكم السلام
حمد: شحالج غناتي
نورة وهي تبتسم له: يسرك حالي..شحالك أنت
حمد: بخير..شو فيج نواري
نورة: ولاشيء
حمد مد أيده ووخر خصلة الشعر إلي على خدها..ونصدم يوم شاف خدها مورم وملتهب: عيل شو تسميه هذا؟
نورة ماقدرت تمسك نفسها أكثر من جيه فدمعت عينها..
حمد وهو معصب: أكيد شيخوه محد غيرها يسوي جيه..بس ممكن أعرف ليش..شو سويتي عسب تستحقي هالي على ويهج احين...
نورة قررت تصارح أخوها وتخبره كل شيء: لأني مابى أخوها
حمد: شوووووو أخوها..شدخله
خبرته بالسالفة كلها..وعصب حمد من الخاطر..وقال في باله"زين إنها شيخوه احين موب في البيت وإلا كنت أرتكبت فيها جريمة" وقام وظهر من حجرة أخته وهو معصب..ويفكر شو بيسوي..فقرر يسوي شيء..وتصل بأبوه...
حمد: السلام عليكم
بوحمد: وعليكم السلام..شحالك حمد
حمد: يسرك حالي..شحالك أنت
بوحمد: بخير ونعمه..ها وصلت البيت
حمد: هيه من نص ساعة
بوحمد: اها زين...
حمد: أبى أرمسك في شيء
بوحمد: أنا احين في العرس..يوم أرد البيت بنتكلم
حمد: لا أبى أرمسك الحين وبسرعة
بوحمد: خير شسالفة؟
حمد: نورة
بوحمد: شبلاها
حمد: بأخذها معي بوظبي
بوحمد: شووووو.. وليش إن شاء الله
حمد: أبويه أنت اليوم شفت نواري
بوحمد وهو عاقد حياته: لا ماشفتها.. ليش شو فيها
حمد: حرمتك ضاربتنها..وويها وارم..والله حرام إلي يصير بنورة
بوحمد وهو منصدم: شيخة ضاربه نورة..معقولة
حمد: وليش موب معقولة..وهذي موب أول مرة..
بوحمد: شيخة تسوي جيه
حمد: هيه..أما عن سالفة سعود..يوم أشوفك الأسبوع الياي بنرمس فيها
بوحمد: جيه أنت اليوم تبى تشل نورة بوظبي
حمد: هيه
بوحمد: وربعك إلي دايماً مطيحين في شقتك
حمد: محد الحين..كلهم مسافرين عندهم إجازات
بوحمد: اها...زين..عيل شلها معك بوظبي أحسن..بعدها شوي عن البيت
حمد وهو مبتسم لأنه أبوه وافق: وأنا قلت جيه..المهم أبويه أنا احين بخليك..أشوفك الأسبوع الياي
بوحمد: سلم على نواري..وربي يحفظكم
بوحمد كان في باله نفسه لو حمد يشل أخته بوظبي وتيلس هناك كماً أسبوع..منه يحاولوا يحلوا مشكلة سعود..ومنه ترتاح من شيخه..
بعد مابند حمد عن أبوه راح حجرة نورة ولقاها ردت ترسم مرة ثانية..وحمد يعرف نورة زين يوم تكون ترسم معناها إنها متضايجه..وهالعادة عندها من يوم هي صغيره...قترب منها..وحط أيده على جتفها...
حمد: غناتي تقومي جهزي جنطتج
نورة تلتفت على أخوها وهي مستغربه: ليش..جيه وين بروح
حمد: مع بوظبي
نورة وهي تبتسم: جيه أبويه وافق إني أروح وياك
حمد وهو يبتسم لها: هيه وافق..يلا نشي بسرعة ورانا درب
نورة: أوكى..نص ساعة بس وبخلص
حمد: أوكى أترياج في الصالة
نورة: حمد وأنت نازل تحت زقر وحده من البشاكير تساعدني
حمد وهو طالع من الحجرة: إن شاء الله
.........................................


بعد ساعة ظهروا من البيت...وخذ منهم في الطريج لأبوظبي ساعة ونص.. وحمد يسولف وينكت يحاول يضحك أخته..فجأة تذكرت نورة شيء...
نورة: حمد صح بسئلك
حمد: شو..سئلي
نورة: جيه أنت هالسنة مابتسير مكان..مابتسافر
حمد: ممممممممممم شكلي مابسير مكان
نورة: ليش..أكيد بسببي
حمد: لا مابسببج
نورة: عيل
حمد: ماعندي إجازة جريب
نورة: اها..انزين بسئلك سؤال ثاني ممكن
حمد: ههههههه فديت روحج ممكن ليش لا
نورة وهي عاقدة حياتها: أبى أدرس في جامعة زايد
حمد: شوووووو..وجامعة الإمارات شو فيها
نورة: مابى أدرس في جامعة الإمارات
حمد: انزين ليش
نورة: أبى أسكن معك في بوظبي
حمد: ياريت والله الغالية..بس صعب
نورة: ليييييش
حمد: نواري حبيبتي أنا عايش عزابي..وعندي ربع 24 ساعة في شقتي..يعني صعب غناتي تسكنين وياي
نورة: حمد أرجوك..مابى أتم أكثر من جيه عايشه ويا حرمة أبويه والله تعبت
حمد: أوكى الغالية..بفكر وبرمس أبويه
نورة: حاول تقنعه
حمد: يصير خير
يوم وصلوا الشقة..أول مادخلوا انصدمت نورة من منظر الشقة على فخامتها..إلا إنها كلها فوضه...
حمد: هههههههههههههههه شفيج فاجه حلجج جيه
نورة: معقولة عايش في هالمزبله
حمد: هههههههههههه الله يأخذه الهندي اليوم مايى ينظفها
نورة: أي هندي
حمد: إلي يشتغل عندي..تراه أيي كل يوم ينظف الشقة ويطبخ لي
نورة: اها
حمد: ماعلينا..المهم تعالي بوصلج حجرتج..مبين عليج بترقدي وأنت واقفه
نورة: هههههههه هيه والله تعبانه موت
بعد ماوصل أخته غرفة عدال غرفته..وهي الشقة في الأصل مكونه من 5 غرف نوم وميلس..سار الميلس وفتح التلفزيون ويلس يتابع مباراة من الدور الإيطالي لين وقت متأخر من الليل وهو يفكر في مشكلة أخته ونفسه لو يقدر يسكنها وياه في شقته بس يحس إنه صعب..
في العين..وبالتحديد في بيت بوحمد..بعد ماردوا من العرس..خبر بوحمد حرمته بإنه حمد شل أخته وياه بوظبي..وخبرها تخبر أخوها مايي في اليوم الثاني..ويلس يعاتبها على إلي سوته بنورة..بس شيخة ماتابت…
شيخة: هيه أعرفك..قول يابوي من الأول إنك ماتبى أخوي..ولاتيلس تلف ودور
بوحمد: أنا ماقلت جيه..بس لو أنا وافقت عليه..حمد مابيوافق
شيخة: منوه أبوها أنت ولا حمد
بوحمد: أنا طبعا
شيخة: عيل..شدخله حمد..إذا أنت ولي أمرها
بوحمد: الغالية أنا ماأبى أسوي مشاكل..وبعدين البنيه موب راضيه..وأنا ماأقدر أجبرها على شيء ماتباه…
شيخة طالعته بنظرات..وقامت عنه وراحت حجرتها….
…….
في اليوم الثاني في شقة حمد الساعة 8 .. نورة نظفت الشقة كلها وخلتها تلمع من النظافه وسوت الريوق..وأخوها بعده راقد..وحطت الريوق في صاله صغيره مخصصه للأكل…وقالت في بالها"احين عاد دور توعي حمد..أعرفه نومه ثجيل"…راحت حجرته ولقتها فوق حدر يوم شافت الحجرة جيه عقدة حياتها"حشى جيه يستحمل يرقد في حجرة تقول مزبله"...ويلست عداله وتمت تضربه على جتفه..
نورة: حمد حمد يلا نش بسك رقاد
حمد وهو يغطي عيونه بأيده: خليني أرقد شوي
نورة: لا مافيه رقاد..يلا نش الريوق بيبرد
حمد: آوووف أبى أرقد تعبان
نورة وهي تسحب لحافه: قلت مافيه..يلا بلا كسل
حمد يآس من النوم..لأنه نورة مابتخليه لين مايقوم: انزين أنت سيري لين ماأغسل ويهه..
نورة وهي اطالعه وتغمز له: نوووو وي..مابظهر لين ماأشوفك نشيت من فراشك وتوجهت صوب الحمام..يلا
حمد: هههههههههههههه والله قايم
نورة بعد ماشافته قام: أوكى أترياك لاتبطي..تراني من زمان حاطه الريوق
حمد: إن شاء الله..10 دقايق بس
نورة: أوكى أترياك
بعد ماظهر حمد من حجرته..وشاف الشقة جيه نظيفه…
حمد وهو يصفر: هذا كله سويته أنت
نورة: طبعا
حمد: حشى متى ناشه
نورة: الساعة 5 ونص
حمد: ياسلام شو هالنشاط كله..بصراحة الشقة أول مرة تكون جيه نظيفة..حتى عبدالسلام الله يخسه ماينظفها جيه
نورة: عبدالسلام هنديك
حمد: هيه .. والأكل طبعا حدث ولا حرج..كله فلفل
نورة: ههههههههههههههههههههه يحليلك
حمد: ماأعرف ليش أمس مايى..يمكن مريض ولا فيه شيء
نورة: يمكن
ويلس هو وأخته يتريقوا ويسولفوا…بعد ماخلصوا ريوق..راحت حجرته ونظفتها..كانت أوسخ مكان في البيت لأنه كان يوم يظهر حمد من الشقة يبندها فالهندي مايقدر يدخلها وينظفها..بعد ماخلصت كانت الساعة 10 ونص..وراحت الميلس من وين أخوها يالس يجلب في القنوات…
نورة: حمد
حمد: عونه
نورة: ماعندك تلفون هنيه..أبى أتصل بربيعتيه
حمد: عندي..بس عادي خذي تلفوني
نورة: لا ماأبى تلفونك لأني بيلس أرمس ربيعتيه وايد وبخسرك
حمد: انزين بتلقي التلفون في حجرتي في كبت المكتبه..لأني ماأستخدمه..
نورة وهي تبتسم له: أوكى أشوفك بعد ساعة
حمد: هههههههه حشى جيه ناويه تخبريها عن الأخبار المحلية والعالمية
نورة: هههههههههههه فديت روحك هذي أعز ربيعاتي..بطمنها عليه..
حمد وهو يغمز لها: انزين ماأوصيج..وصلي سلامي
نورة: ويا رأسك..روح لاه
وراحت تتصل بخولة..وخبرتها بإنها الحين في بوظبي ويا أخوها..وتخبرتها عن أخبارها.. وبعد خولة أتصلت بغبيشه..وغبيشه عندها موبايل..
نورة: السلام عليكم
غبيشة: وعليج السلام نواري..شحالج يالقاطعه
نورة: يسرج حالي..شحالج أنت..شو هالحشره إلي أسمعها
غبيشة: ههههههههههههههه بخير يعلج الخير..أنا احين في الرمله
نورة وهي مستغربه: شو تسوي هناك
غبيشة: أسوق كروزر أخوي مبارك
نورة: شووووووو...في الرملة
غبيشة: هيه شو الغريبة..ياريتج وياي والله وناسه
نورة: هههههه لا ياحبيبتي خليني بعيد..بعدني صغيرونه
غبيشة: ههههههههههههههههههههه انزين شدخله هذا في العمر يافالحه
نورة: شو بعد شدخله..أعرفج متهوره..وتنجلب السيارة..عاد منوه بينفعني..
غبيشة وهي ميته ضحك على نورة: فديت نواري والله..أنت بس يربي مرة وحده..والله سواقتي روعه..وبعدين الحين عدالي مبارك..شراتج يقول عني متهوره ويخاف على سيارته ويا رأسه مايقول أيخاف عليه.. "وهنيه ضربها أخوها مبارك بكس على جتفها"
مبارك: حمدي ربج إني خليتج تسوقي سيارتي يالدبه
غبيشة: تسمعيه شو يقول..والله يابوج مانين عليه بسيايرهم
نورة: هههههههههه يخافوا عليهن منج
غبيشة: سمعوا الثانية..هب مشكلة..بس أوصل البيت على طول بسير أطلب من أبويه يشتري لي بعد أنا كروزر
نورة: ويا رأسج شو تبي فيها الكروزر.. مايسوقها غير الشباب
غبيشة: هههههههه وأنا شباب
نورة: هههههههههههههههه المهم الغالية أنا بخليج احين..وبتصل فيج في وقت ثاني
غبيشة: صح صبري شوي
نورة: شو
غبيشة: من وين متصله..توني أنتبه للرقم
نورة: من بوظبي..من شقة أخويه
غبيشة: شو تسوي هناك
نورة: ولا شيء..حرام أروح مع أخوي
غبيشة: ههههههه لا بس مستغربه شوي..لأنه ماعمرج رحتي شقته
نورة: ههههههههههه انزين انا الحين في شقته..سلمي على وضحى "وضحى بنت عم غبيشة"
غبيشة: يوصل
نورة: فمان الله
غبيشة: الله يحفظج
.......
في اليوم الرابع من يوم يت نورة بوظبي..المغرب كان رأسها يعورها فقالت حق أخوها إنها بتسيرترقد..بعد ماراحت حجرتها حاولت ترقد بس ماقدرت..فقررت أطلع مذكراتها وتيلس تكتب أي شيء....
الساعة سبع ونص أتصل خليفة بحمد وقال له يفتح له الباب لأنه في اللفت..فقام حمد بسرعة يفتح الباب..عن يدق خليفة الجرس أو الباب ويزعج نورة إلي دخلت حجرتها تنام..وأول مافتح الباب لقى خليفة في الويه وأيده توه بيحطها على الجرس..
خليفة: بسم الله ... خرعتني الله يهديك
حمد: ههههههه قلت أفتح لك الباب قبل ماتسوي أزعاج كالعادة
خليفة وهو يدخل: شحالك يالقاطع محد يشوفك ولا تتصل
حمد: يسرك الحال..كنت مشغول شوي
خليفة: أكيد في الشركة..ياخي رحم نفسك..وعاد هذيلا مايصدقوا يلقوا واحد جيه يستغلوه
حمد: لا يستغلوني ولا شيء..الشغل شغل..وبعدين أنت مريح احين لا تحضر الدوام ولا شيء...
خليفة: بعد هذا إلي ناقص أروح الدورة وتباني أحضر الدوام...روح لاه
دخلوا الميلس وبند حمد الباب..ويلسوا يتابعوا مباراة..وبعد ماخلصت المباراة...
خليفة: شرايك ننزل تحت نركض على الكرنيش..من فترة ماركضنا
حمد: فكرة والله
خليفة: روح غير ملابسك..لأني أنا لابس ملابس الرياضة تحت الكندوره
حمد: أوكى
قام حمد وظهر من الميلس وراح حجرته يلبس ملابس رياضية..وفي هاللحظة بالضبط ظهرت نورة من حجرتها..رايحه تسئل حمد شو يريد على العشى اليوم..فقالت فبالها أكيد بعده في الميلس...فتحت الباب وهي تتكلم...
نورة: حمد شو تبى اليوم على العــ "ماكملت رمستها من الصدمة..لأنها واقفه جدام ريال غريب..كان يالس في الكنبه المجابله الباب..وهي بعدها ماستوعبت ومن الصدمة واقفه اطالعه وهو يطالعها..بعد ما أنتبهت لوضعها بندت باب الميلس بسرعة وركضت على حجرتها..ويلست ترمس نفسها" ياويلي من حمد أكيد هذا ربيعه..شو هالحاله أنا دايماً أطيح في مواقف جيه أول مع سعود واحين مع هذا..الحمد لله إني لابسه شيلتيه" بعد شوي سمعت دقات على الباب..ورتبكت "أكيد حمد..ياويلي"..
نورة: أدخل
فتح حمد الباب ودخل وكان لابس ملابس رياضة وكان يبتسم لها : ها نواري شحال راسج احين
نورة ارتاحت بعد ماشافته يبتسم: الحمد لله احين خف شوي
حمد: انزين غناتي أنا بظهر تأمرين بشيء
نورة: وين
حمد: بروح أركض على الكرنيش ويا ربيعي
نورة: اها...انزين شو تريدني أسويلك على العشى
حمد: ولا شيء..وأنا راد بيب عشى من الكفتيريا إلي تحت
نورة: والله أحسن لأنه بعده رأسي يعورني شوي
حمد: سلامتج الغالية
نورة وهي تبتسم له: الله يسلمك
بعد ماظهر حمد وخليفة..وراحوا يركضوا..وخليفة إلي يفكر في البنت إلي شافها في شقة ربيعه..ويتسائل عن شخصيتها"معقولة حمد يسوي جيه..أنا أعرفه مستقيم..لدرجة إنا مرات نسميه المطوع..لا لا موب معقوله حمد يسوي جيه..أكيد هذي أخته..لا ماأخته لأنها مافيها ولا شبه منه" وفعلاً نورة كانت مافيها شيء يشبه حمد..كانت نسخه ثانية من أمها..أما حمد فكان نسخة مصغرة من أبوه....
حمد: حوووووووووووووه
خليفة: ها .. شو عندك
حمد: ههههههههههههههه وين وصلت
خليفة: وين وصلت&#33;
حمد: هههههه أنا من ساعة أرمسك وأنت موب معي
خليفة: لا أنا معك شو كنت تقول
حمد: لا مبين إنك معي
قرر خليفة يكشف حمد..ويعرف هوية البنت إلي شافها في شقة ربيعه: إلا أقول حمد شرايك نروح نكمل السهره في بيتنا..وتتعشى من طبخ أم خليفة...
حمد: لا بصراحة ماأقدر..خلها مرة ثانية
خليفة: انزين ليش..يلا ياريال
حمد: ماأقدر باجر وراي دوام طويل
خليفة: خل عنك الدوام ياريال وتعال أسهر وياي
حمد: لا ماأقدر خلها مرة ثانية..عندي الأهل في الشقة من أربعة أيام..هب زين أخليهم بروحهم...
خليفة: اها....إذا جيه برايك..صدج موب زين تخلاهم بروحهم "هنيه استانس خليفة لأنه عرف هوية البنيه إلي شافها في شقة حمد..وهو يعرف إنه حمد ماعنده غير أخت وحده..حتى تذكرها احين يوم كان حمد اييبها وياه يوم كانت صغيره..ويلس خليفة يحاول يتذكر أسمها"
حمد: عيل يلا بخليك..وبشوفك باجر في الشركة.."أنتبه حمد إن خليفة سرحان" باجر بداوم في الشركة صح...
خليفة:آه..شو قلت
حمد: ههههههههههه وين سرحت..كنت أقول باجر بداوم في الشركة ولا
خليفة: ههههه لا بس راسي عورني شوي..هيه خسارة الدوره خلصت باجر بتشوفني في الشركة..
حمد: أوكى..عيل أشوفك باجر..تصبح على خير
خليفة وهو يلوح بإيده لحمد: وأنت من هله
طول الطريج وهو راد البيت..وخليفة يفكر في أخت حمد ويحاول يتذكر أسمها..تذكر إن حمد أيبها وياه وكان عمرها تقريبا 5 أو 6 سنوات..في هاللحظه أبتسم خليفة لأنه تذكر شيء" مرة كان هو وربعه متفقين يتلاقوا عدال مسجد في حارتهم..وكان حمد أخر واحد واصل ونصدموا كلهم يوم شافوه ماسك بنت صغيره..وكانت دبدوبه..بعدين عرفهم عليها وقاللهم إنها أخته نورة "احين تذكر خليفة أسم أخت حمد نورة" حتى تذكر خليفة يوم يلس يضايجها ويزخها من خدودخها كانت دبدوبه وايد..ويلس يضحك عليها لين ماصيحها..بعدين عسب يراضيها أشترى لها آيس كريم..حتى أنها صارت ترتاح لخليفة أكثر واحد من ربع حمد..
يلس خليفة يرمس روحه"معقولة هذيج الدبدوبه هي نفسها الملاك إلي شفتها اليوم..هيه ليش موب معقولة البنات يكبرن بسرعة..بس في حياتي كلها ماشفت ويه برئ شرات ويها..كانت غير..صح شبلاني يالس إلا أفكر فيها"
..................................................


أول ماوصل حمد الشقة وكان شال العشى..يلس يدور نورة..بعدين يوم مالقاها تم يزقرها...
حمد: نوراي نواري وينج
يوم دخل الميلس شاف شيء يتحرك في البالكونه..عرف إنها نورة هناك..وراح صوبها..بعدين عرف إنها كانت سرحانه..لأنها ماحست فيه وهو وراها..ومسها من جتفها...
نورة تلتفت صوبه بسرعة وهي حاطه أيدها على قلبها: بسم الله..خرعتني
حمد: هههههههههه زقرتج وزقرتج وأنتي خبر كان..وين الحبيبة وصلت
نورة: هههههههههههههه وصلت المبزرة ويبل حفيت
حمد: فديت العين وطاريها
نورة: هيه والله..تصدق
حمد: شو
نورة: أحلى مكان في شقتك..هالبالكونه
حمد وهو يبتسم: وليش عاد
نورة: موقعها حلوو أطل على الكرنيش..البحر والشارع والناس
حمد: هيه أنا معج في هالشيء..منظر يرد الروح
نورة: حمد ظهرني والله مليت محبوسه في هالشقة
حمد: هههههههههههههههه وأنا قلت في بالي غريبة نواري ماطلبت تظهر
نورة: هههههههههههه كنت أمهد للموضوع
حمد: ويا رأسج..المهم سيري احين وحطي العشى إلي أنا يايبنه بتلاقيه في المطبخ..وعن الطلعه مايكون خاطرج إلا طيب..ماطلبتي بس يابنت علي
......
في المناصير..وبالتحديد بيت خليفة..كان خليفة وأمه وأخته وأخوه فيصل يالسين يتعشوا..
أم خليفة: وين كنت ياولدي..ندق عليك ولا ترد
خليفة: كنت ويا ربيعي حمد..طلعنا نركض على الكرنيش..والتلفون مبندنه
أم خليفة: على طاري حمد وينه محد يشوفه..أمبونه أيي يتعشى ويسهر وياك
خليفة: مشغول شوي..وهاليومين عنده أهله يايين من العين
أم خليفة: آفا ياخليفة أهله من العين هنيه..وماتعزمهم عندنا
خليفة: والله اليوم أمايه أعرف..بس مايكون خاطرج إلا طيب..أحين بعد ماأتعشى بتصل بحمد وبعزمه هو وهله عندنا
أم خليفة وهي تبتسم لولدها: جيه أباك
موزة: انزين خليفة ماعندك إجازة جريب
خليفة: خير شو فيه
موزة: من زمان مارحنا العين..
خليفة: لا حد يرمسني عن الطلعات والروحات لين خمس طعشر سبعة
موزة وهي مستانسه: يعني بتأجز..زين والله أبى أسير العين..أشتقت لبيتنا وحارتنا والعزبه...
فيصل: ههههههههههههههه بعد منوه يشتاق للعزبه غيرج..شوو أشتقتي للبوش..أنا إلي أذكره زين حتى تخافي أتيي صوبهن..
يلسوا كلهم يضحكوا على موزة إلي صار ويها أحمر من القفطه..
موزة: صح أخافهن..بس حتى لو أشتقت لهن وايد "وهي مطلعه لسانها"
خليفة: ههههههههههههههههه حتى هن مشتاقات لج وايد..كل ماأسير هناك يسئلن عنج
موزة: ههههههه ويا رأسك عاد قلت شيء..بيتموا ماسكينه عليه
أم خليفة: نفسي أعرف متى هالبنيه بتعقل
موزة: يعني أمايه أنا أحين جدامج خبله
أم خليفة: ههههههه هيه
موزة وهي مبوزه: خلاص أنا زعلت
تموا يضحكوا على حركات موزة..
خليفة: بأمانه موزان هي فاكهة البيت..ماأعرف يوم تعرس جيه بيصير البيت
موزة: فديتني والله..أعرف هالشيء
فيصل: لا تصدقي عمرج عاد..تراه يمزح وياج
موزة: روح لاه
............
الساعة وحده ونص في حجرة خليفة..بعده موب راقد..منسدح في شبريته وحاط أيدينه ورى رأسه والحجرة كلها ظلام..ويفكر في نورة يوم دشت عليه في الميلس..طرى على باله أبيات قايلتنهن"فتاة العرب" توصف فيها نورة خير وصف:
بوحــاجبين اعقــادي..شــروات خط النـون
جاسي عينه ســوادي..والها الهدب مزفــون
غض الشباب الهادي..حسن أو نضارة لـون
هبـــه نفـــح البرادي..واتمـــايلت لغصــون
شفتـــه وهـو متبادي..يتهـــادى بـالسكـــون
مشي القطا في وادي..تــوح إجدمــه بالهون
ملحـج روحي نفادي..وين اللــي يرحمــون
تذكر فجأة إنه مارمس حمد..علشان العزيمة "شو هذا من كثر ماأفكر في البنيه نسيت أعزمهم باجر عندنا..هب مشكلة برمس حمد باجر في الدوام".."والله حالتي حاله من يوم شفت نورة..أبى أشلها من تفكير ماأقدر..شو هالحاله" وتم خليفة يرمس عمره لين مارقد..
.......
في العين في بيت بوحمد..تمت شيخة كماً يوم ماترمس ريلها بسبب سالفة نورة..وهالشيء مأثر على بوحمد..وطبعاً سعود ماخلى شيخة في حالها كل يوم والثاني متصل فيها..مرة كانت شيخة يالسه في الصالة أتجلب في القنوات..إلا تسمع صوت أخوها سعود..
سعود: هود هود
شيخة: هدى ... قرب "ونشت تسلم على أخوها" شحالك
سعود: حالي عليل ياخويتي
شيخة: هههههه الحمد لله أنا أشوف مافيك إلا العافية
سعود وهو ييلس عدالها: العله في القلب ياشويخ
شيخة: وابوي عليك..ريال شطوله وعرضه وترمس هالرمسه الماسخه..
سعود: أعرفج عمرج مابتفهميني..نورة مايت من بوظبي
شيخة: لا مايت ويعلها ماترد قول آمين
سعود: حرام عليج..تعرفي شيء
شيخة: شو بعد عندك
سعود: أنا متأكد من شيء الحين..
شيخة: شو هو؟
سعود: إن نورة رفضتني بسبتج
شيخة: هي مسودت الويه مالها شور..بس السبه أخوها..محد مخرب عليه ريلي ونوير غيره..مايستويله شيء ويفكني منه...
سعود: خافي ربج ياحرمه..دومه قلبج أسود جيه...
شيخة: قلبي أسود..عيل لا تطلب مني شيء..تراه تعودت على هالرمسه يوم ماأحقق لك إلي تباه..بس يصير خير سعووودوه..إلي يعطيك ويه..
سعود: لافديت روحج..منوه لي غيرج..أنتي هلي وكل إلي بقالي في هالدنيا..يرضيج ألحين حالي جيه..
شيخة: لا مايرضيني .. بس يعني شو تباني أسوي..سويت إلي قدرت عليه..تراه مالك نصيب معها..وأنا مستعده أخطبلك شيختها
سعود وهو منزل رأسه: مابى غيرها..حاولي..يمكن ربج
شيخة: انزين حشرتني..بحاولي مرة ثانية
سعود ماسك أيد شيخة ومبتسم لها: فديت شويخ والله..
..........
في اليوم الثاني
في بوظبي كانت نورة يالسه أتابع فيلم رسوم من ضمن الأفلام إلي عند أخوها..وكانت الساعة تقريبا 3 ونص قرب العصر..الوقت إلي يرد فيه حمد البيت من الدوام...دخل عليها وهي مندمجة مع الفيلم وميته ضحك....
حمد وهو يعق الغتره والعقال على الكنبه: فديت أنا إلي يضحكوا...سلام
نورة: وعليك السلام..شحالك وشخبار الدوام وياك..تغديت ولا بعدك
حمد: هههههه شوي شوي علينا..الدوام كالعادة زفت..أما عن الغدى فعصافير بطني تصيح..يعني ميت يوووع
نورة وهي تنش من مكانها: ولا يهمك يالغالي 10 دقايق بالأكثر ويكون الغدى جاهز
بعد ربع ساعة كان حمد يتغدى ويالسه مجابلتنه نورة...
نورة: حمد
حمد: عونه
نورة: ممممممم بتودني اليوم المول
حمد: إن شاء الله..بس تراه قبل المغرب يعني على الساعة 5 بنظهر
نورة: انزين ليش..موب أحسن في الليل
حمد: لا .. لأنه اليوم ربيعي عازمنا على العشى في بيتهم
نورة وهي عاقده حياتها: شووو عازمنك على العشى
حمد: أنا قلت عازمنا..يعني أنا وأنت
نورة: مابى
حمد: وليش إن شاء الله
نورة: بس مابسير وياك لا تحاول
حمد: نواري أعرفج تستحي..بس هب زين جيه عاد..الناس عازمينا ومانروح
نورة: حمد أنا مابروح مع ناس ماأعرفهم..
حمد: نواري حبيبتي..عقلي وتصرفي شرات الكبار..الناس مابيأكلوج..وعلى فكره هذيلا من العين وأنا أضمن لج إنج بتحبيهم...
نورة وهي متردده: انزين شدراهم إني أنا موجودة هنيه
حمد: عاد عرفوا..نواري علشان خاطري
نورة ماتبى تكسر بخاطر أخوها أو تزعله منها: انزين
حمد وهو يبتسم لها: والله مابتندمي ناس طيبين
........
بعد ماردوا من المارينا مول الساعة 7 ونص..تجهزوا وعلى طول راحوا بيت خليفة علشان العزيمة..يوم وصلوا بيتهم حمد راح ميلس الريال..ونورة في الصالة مع أم خليفة وموزة..بعد ساعة حست نورة وكأن هالناس تعرفهم من قبل وأرتاحت لهم وايد...
موزة: وشو ناويه تتخصصي أحين يوم أدشي الجامعة
نورة: على حسب الجامعة إلي بدشها
موزة: جيه يعني؟
نورة: إذا وافق أبويه بدرس هنيه في بوظبي في جامعة زايد..وإذا ماوافق تراني إلا بدرس في جامعة الإمارات..
موزة: ونزين غناتي شو فيها جامعة الإمارات..
نورة: مافيها شيء..بالعكس ربيعاتي كلهن تقريبا بيدرسن فيها..بس عسب أكون جريبه من أخوي..
موزة: اها
أم خليفة: انزين الغالية أنا بسير عنكن شوي..بروح أسلم على حمد..تراه بحسبت ولدي..ومتعوده عليه من يوم كان صغير مايخوز عن بيتنا..وبالمرة نحط العشى..
بعد ماظهرت أم خليفة تمت موزة تتخبر نورة عن أخبارها ويتعارفن على بعض أكثر...
موزة: تعرفي نورة..والله حبيتج
نورة وهي مبتسمه: وأنا أكثر
موزة: متى بتردي العين
نورة: والله ماأعرف..يمكن هالأسبوع أسير..عسب التسجيل في الجامعة إذا ماوافق أبويه أدرس هنيه...
موزة: الله يحفظج...هيه صح تذكرت ماعندج تلفون عسب أتصل فيج
نورة: ياريت والله..كل ماأقول لهم يسوا لي تلفون يقولوا إني بعدني صغيره
موزة: لا الحين أصلا يوم أدشي الجامعة ضروري يسون لج تلفون
نورة: ياريت..انزين عطيني رقم تلفونج..
فجأة ومن دون أي مقدمات أنفتح الباب..وكان خليفة..هو أرتبك يوم طاحت عينه على نورة إلي نزلت رأسها على طول...
خليفة: السموحه منكم..على بالي إنكن يالسات في ميلس الحريم
موزة وهي رافعه حاجب: لا مايلسن هناك..قلن هنيه أحسن..
خليفة: وين أمايه
موزة وهي معصبه على خليفة لأنه طول بالوقفه على الباب وكان يالس يطالع نورة: بتلقاها في المطبخ..
خليفة لاحظ إن أخته معصبه عليه..فبند الباب بسرعة..وسار المطبخ..وهو إلا يفكر بنورة "يالله ياهالصدف..وأحلى صدف"
ظهر حمد وأخته من بيت خليفة الساعة 10.. وتم خليفة هو وأمه وأخته وأخوه فيصل في الصالة...
موزة: هيه صح تذكرت..خليفوووه شو هالتصرفات النص كم إلي سويتها اليوم
وهو يالس يغمز حق موزة علشان تسكت...
أم خليفة: جيه شو سوى
خليفة: ولا شيء أمايه..موزة عاد ماتعرفيها وسوالفها
موزة: سوالفي اه .. ماعليه
فيصل: صدج خليفة شو سويت
خليفة: ولا شيء..
.........
..............................................


يوم الاربعاء..من خلص حمد دوامه ساروا العين..كان لازم يرمس أبوه عن نورة..عن دراستها..وطبعا حمد يوم رمس أبوه إنه يبى نورة تدرس في بوظبي..رفض على طول..
بوحمد: بعده هذا إلي ناقص..جيه أنا بعدني عايش وأنا أبوها وولي أمرها موب أنت
حمد: أبويه أنا ماقلت شيء..بس نورة تبى تدرس في جامعة زايد
بوحمد: لا زين..تبى تدرس في جامعة الإمارات تدرس..ماتبى تيلس في البيت أبرك لها..
حمد: يعني هذا ردك الأخير
بوحمد: هيه وماعندي غيره..
طبعاً بعد مارفض بوحمد إن نورة تدرس في بوظبي راحت يوم السبت أتسجل في الجامعة..ووعدها أخوها إنه أيها في الليل علشان أيشلها معه بوظبي..ومرت الإجازة الصيفية ونورة يالسه في بوظبي ويا أخوها ومرات تسير وياه دبي..وطبعا علاقتها بموزة توثقة..ومايمر يوم إلا وتتصل فيها..ومرات ينزلنا السوق ويا بعض..
ويوم قربت الإجازة الصيفية تنتهي..راحت نورة وموزة السوق ويا بعض في سيارة موزة لأنها تسوق..علشان تشتري نورة ملابس وتتجهز حق الجامعة..
في المارينا مول..نورة وموزة في محل عطور...
موزة: تعرفي نواري
نورة وهي يالسه تشم عطر: ها
موزة: بشتاق لج وايد يوم تردي العين
نورة: حتى أنا والله
موزة: يحظج بداومي في الجامعة..موب شراتي أنا في البيت
نورة: تفألي خير..إن شاء الله يظهر أسمج جريب وتشتغلي
موزة: شو أشتغل الله يهديج..هذا أخويه خليفووه كل مايظهر لي شغل في بنك ولـ شركة قال مافيه..ماعندنا بنات يشتغلنا في هالأماكن..
نورة: انزين شو فيها هالأماكن..أنا أسمع أخويه يوم يرمس عن بنات مواطنات يشتغلن عندهم في الشركة..وايد يحترمهن لأنهن محترمات نفسهن وحشيمات
موزة: انزين حتى خليفة..بس إذا يت عندي ممنوع
نورة: ماعليه مع الوقت بيقتنع وبيوافج..
موزة: الله يسمع منج..ياريت والله..مليت من البيت
بعد ماردت الشقة لقت أخوها يالس يتابع فيلم أجنبي...
نورة: السلام عليكم
حمد: وعليكم السلام.. وينج كل هالوقت
نورة: السوق..
حمد: حشى موب سوق هذا أربع ساعات
نورة: لاتنسى إني أشتري حق الجامعة..يعني وايد أشياء
حمد: الحمد لله إنج سرتي ويا أخت خليفة..بصراحة مافيني عليج
نورة: ههههه عيل يوم تعرس منوه بيودي حرمتك السوق
حمد: هب مشكلة بسوي لها دريوليه تشلها السوق
نورة: لا زين
حمد: انزين نواري خمني شو أشتريت لج
نورة وهي مستانسه: شوووو
حمد: ممممممممم تلفون
نورة: وأخيراً..صار لي تلفون شرات ربيعاتي
حمد: والله لو مالحايه ولا ماسويت لج تلفون
نورة: المفروض تثق فيه
حمد: موب مسئلة ثقه..بس
نورة: بس شو
حمد: ولا شيء..المهم باجر بنسير العين الصبح..يعني رقدي لا تيلسي مطلعه عيونج على التلفزيون..
نورة: وليش تروح الصبح..نروح العصر ولا المغرب
حمد: لا لازم أنسير الصبح..عندي شغل وايد باجر
نورة وهي مبوزه: أنزين
حمد: أعرفج تبي تتأخري عن تشوفي شيخووه..بس رحنا بوقت ولا متأخرين تراج إلا بتشوفيها..
نورة: أعرف..المهم الغالي تصبح على خير..بروح أرقد أبرك لي
حمد: وأنتي من هل الخير
.......
مرت الأيام وبدأت الدراسة في الجامعة..وطبعا موب كل ربيعات نورة دشن الجامعة..نعيمة هذي موب ويه دراسة وحتى هي أصلا ما تبى تكمل..وكانت مخطوبة لولد خالها..وفي الإجازة الصيفية عرسة ونتقلت تسكن وياه في دبي..وضحى نسبتها في الثانوية أقل من إنها أدخلها الجامعة..فدشت كلية التقنية..أما إلي دشن الجامعة ويا نورة خولة إلي كانت نسبتها وايد حلوه..وحلم خولة من أيام المدرسة تتخصص أدب
إنجليزي..غبيشة يابت نسبة في السبعين.. يعني تمشي الحال..المهم أدش الجامعة ويا ربيعاتها...
في الجامعة..وبالتحديد في مكتبة الأداب..يالسه نورة وغبيشة وخولة ويا بعض بعد ماخلصن دواماتهن...
نورة: والله تعب الجامعة..كله مشي ريولي عورني
خولة: حتى أنا
غبيشة يالله يالحساسات..جيه بعدكن ماخذيتن الكتب وأنتن عاد تتشكن..شو بعد مانأخذهن
نورة: هب مشكلة الكتب..المشكلة هالشمس إلي حرقتني والمشي
خولة: بوج أيام المدرسة أرحم بوايد
غبيشة بصوت عالي: حشى .. الله لا يردها من أيام
وحده من المشرفات في المكتبه: وبعدين معكن..يعني كل شوي أقول خفضن أصواتكن
غبيشة وهي مبتسمة للمشرفه: أسفة..نسيت عمريه
المشرفة: انزين لا تنسي عمرجش مره ثانية..ولا والله بظهرج أنتي وياهن برى المكتبه
غبيشة: إن شاء الله .. ولا يكون خاطرج إلا طيب
نورة وهي تضحك بصوت واطي: ههههه قومن نشن نظهر من هنيه..
خولة: هيه والله نظهر بكرامتنا
غبيشة: هي أصلا تتجرئ وتطردني..بتشوف شو بسويبها
نورة: هههههه وشو بتسويبها يعني
غبيشة: هي إلا وحده مصرية..لابسه مواطن..تتجرئ وتسوي شيء..بسفرها بلادها في قوطي صلصل...
نورة: هب زين هالرمسه..يلا نروح مكان ثاني
خولة: شرايكن نروح المطعم نتغدى..بطني يعورني من الصبح ماذقت شيء
غبيشة: حتى أنا..يلا قمنا
كانت الجامعة بالنسبة لنورة غير..حياة يديده..صح كان أول يوم تعب وأرهاق..بسبب تنقلها من مبنى لثاني..بس مع الأيام تعودت على هالتعب وحبته...
ومن ناحية ثانية..نورة لاحظة شيء في حرمة أبوها شيخة..من يوم ردت من بوظبي وهي تعاملها غير عن أول..تغيرت معاملة شيخة لنورة 180 درجة..كل ماتشوفها تبتسم لها..وتيلس وياها وايد في حجرتها وتسئلها عن دراستها.. عمرها شيخة ماعاملة نورة بهالطريقة..طبعاً نورة أستانست وايد على التغير إلي صار لحرمة أبوها...
مرة نورة كانت يالسه في حجرتها ترمس حمد..
نورة: صح اليوم أتصلت فيك العصر ليش مارديت عليه
حمد: هههههههههه قصدج سويتي رنه..ياأم رنه
نورة: هههههه لازم أنا يحليلي عندي بطاقة..موب شراتك خط..أخاف على رصيدي يخلص...
حمد: لا تقولي تخافي على رصيدج..قولي البخل
نورة: هههههه والله موب البخل..يوم تسوالي خط..مابسوي رنات
حمد: هههههههه هذا إذا سوينالج
نورة: عيل بتم أسويلك رنه
حمد: ههه هب مشكلة ياأم رنه..صح باجر هل ربيعي خليفة بيوا العين..
نورة وهي مستانسه: حلف
حمد: والله
نورة: والله زين..عيل يلا حمد باي
حمد: ههههههه انزين..أنا باجر تراني مابيي العين
نورة: ليش
حمد: بسير دبي عندي شغل
نورة: حشى هالشغل مايخلص
حمد: شو أسوي عاد
نورة: الله يعينك
حمد: أوكى غناتي بخليج الحين..فمان الله
نورة: الله يحفظك
بعد مابندت عن أخوها..أتصلت بسرعة بموزة..
نورة: السلام عليكم
موزة: هلا والله .. وعليكم السلام يالقاطعه
نورة: باين منوه قاطع الثاني
موزة: هيه لازم من لقى أصحابه نسى أحبابه
نورة: فديت روحج والله الدراسة مأخذه وقتي كله
موزة: الله يعنيج ويوفقج
نورة: تسلمي الغالية..صح سمعت إنكم بتيوا باجر العين
موزة: شدراج
نورة: حمد خبرني
موزة: هيه بني باجر..والله أشتقت للعين وهلها
نورة: أنزين أقدر أشوفج باجر
موزة: إن شاء الله بحاول
نورة: شرايج في حديقة الهيلي
موزة: هيه والله زين..من زمان مارحتها
نورة: أوكى..أتفقنا..وبيب وياي خولة ربيعتيه
موزة: أوكى..باجر بشوفج في الهيلي.
في اليوم الثاني يوم الخميس...راحت نورة وخولة وأتصلوا بغبيشة عسب تلاقيهن في الهيلي..يوم وصلن في نفس الوقت...وأول مادشت نورة الحديقة شافت موزة تترياهن..وراحت تسلم عليها وعرفتها على ربيعاتها...
وتمن في الهيلي لين الساعة 10 ونص..وفي الطريج نورة وخولة طبعا ويا بعض..
خولة: تصدقي نواري..بصراحة حبيتها موزة..طيوبه
نورة يالسه أطالع تلفونها وعاقده حياتها: هيه وايد
خولة: شو فيج
نورة: في حد يطرش لي مسجات كل يوم
خولة: منوه
نورة: ماأعرف..رقم غريب..وأنا ماأرد على الأرقام الغريبة
خولة: هاتي أشوف
نورة: هاج
خولة يلست تقرأ المسجات إلي في تلفون نورة
خولة: انزين هالمسجات مافيهن شيء..إذا كان هالشخص مايتصل فيج
نورة: لا ماقد أتصل..بس مستغربه منوه هذا..ولا يمر يوم مايطرش لي مسج
خولة وهي تغمز بعينها حق نورة: لا يكون بس واحد معجب
نورة: في عينج..أصلا رقم تلفوني محد يعرفه غيركن وأخويه وموزة وأهلي إلي في البيت..
خولة: هذا أكيد واحد مغلط بالرقم..مايضر دامه مايتصل
نورة وهي رافعه حاجب واحد تفكر: مممممممم برايه صح شو يضر
بعد كم أسبوع، في بوظبي وبالتحديد في بيت خليفة..كان يالس في حجرته..على مكتبه..ويفكر "والله وصرت تحب ياخليفة..ومنوه أخت أعز ربعك..والحل..ماشي حل إلا إني أسير عند أهلها وأخطبها..هذا الحل الوحيد لكل هالمشاكل القلبية إلي عايشنها..هههههه حلوه هاي القلبية..يارب تكون من نصيب" وفجأ يسمع دقات قويه على الباب...
خليفة: دشي يالدفشه..أعرفج محد غيرج يدق الباب جيه
دخلت موزة..وهي مكشخه ضروسها...
موزة: سوووووري خلووفه..قطعت عليك خلوتك..بس عاد فضولي بيقتلني..اسئل عمري من ساعة..أقول خليفة شو يالس يسوي في حجرته من كم ساعة..عاد تعرفني أحبك وأخاف عليك..ييت أشيك
خليفة: ههههههههههههههههه والله إنج ملقوفه..
موزة: ههههههه طالعه عليك
خليفة: حشى
موزة تحاول تسحب الدفتر إلي تحت أيد خليفة: شو يالس تكتب أه
خليفة وهو يبعد الدفتر عنها: وأنتي شو لج..هذي أشياء خاصة
موزة وهي تخطف الدفتر من أيده وتركض صوب الباب: إلا بقرأ شو كاتب فيه
خليفة: ويا رأسج يالدبه..حشى عاد اللقافه موب جيه
موزة مطلعه لاسانها ويالسه تقرأ الصفحة إلي كان خليفة يكتب فيها: كيفي..أونه أونه..في منوه الحبيب تتغزل..آه أعترف..فمنوه تقول هالأبيات:
يا بو عيون فيك سودٍ وسيعه ... تجرح قلوب الناس برموش وأهداب
مالي قوى عالحب عقب القطيعة... قلبي تعنى في الهوى و ما طرق باب
هذا حكم الأقدار فيني و أطيعه ... ترمي بي في الأشواك من غير أسباب
ولا مكملنها بعد..كملها بسرعة..حلووه..بس عاد في منوه كاتبنها "وهي تغمز له"
...........................................


كان خليفة يأخذ كل أخبار نورة من أخته..دايماً يحاول يستدرجها في الكلام..حتى موزة بدت تشك في أخوها..لأنها إذ يابت طاري نورة يتغير شكله..وتحس في عيونه نظرات متلهفه..
في العين في بيت بوحمد..كانت شيخة يالسه في الصالة ترمس أخوها..ويوم دخل عليها بوحمد..
شيخة: بوحمد وصل..يلا بخليك أحين
بوحمد: السلام عليكم
شيخة: وعليك السلام
بوحمد: منوه يالسه ترمسي
شيخة: سعود يسلم عليك
بوحمد: الله يسلمه ويسلمج من الشر..شحاله
شيخة: الحمد لله بخير
بوحمد: وينه محد يشوفه
شيخة: مشغول هاليومين..داخل في مشروع ويا ربيعه
بوحمد: اها..الله يوفقه
شيخة: بوحمد
بوحمد وهو يجلب في القنوات: لبيه
شيخة: أبى أرمسك عن نورة
بوحمد: شو فيها
شيخة: سمعني أنا بقول هالشيء من خوفي عليها..وهي بحسبت بنتي وتهمني مصلحتها
بوحمد: خير شو فيه
شيخة: ماأعرف شقول لك
بوحمد عاقد حياته: شو فيه الله يهديج رمسي
شيخة: بتكلم وأمري على الله..هاليومين موب عايبتني حال نورة
بوحمد: ليش
شيخة: كل ماأمر عدال حجرتها أسمعها ترمس حد في التلفون..ويوم أدش عليها تبند التلفون بسرعة..وتراه يابوحمد نورة صغيره وفي سن خطير..
بوحمد: شو قصدج من ها كله
شيخة: أنت تعرف قصدي زين..موب لازم أوضح لك أكثر
بعد ماسمع هالكلام من حرمته..والشكوك تلعب براسه..قام من مكانه
شيخة: وين
بوحمد: بسير أشوف نورة
شيخة: ها شوي شوي عليها..لاتنسى إنها بعدها ياهل..وينضحك عليها بكل بساطة
ومارد على شيخة..وراح فوق حجرة نورة..كانت منسدحة فوق شبريتها تقرأ كتاب..فجأة سمعت نغمة المسجات..وقالت "مافيني بشوفها بعدين" وكان تلفونها بعيد عنها..فوق المكتب مالها..وفي هاللحظه أنفتح باب حجرتها من دون استأذان..ستغربت نورة كان أبوها..وهذي أول مرة يدش عليه حجرتها بهالطريقة..وكان شكله معصب من شيء..
بوحمد: السلام عليكم
نورة قامت وعدلت يلستها: وعليكم السلام والرحمه..شحالك أبويه
بوحمد: بخير..شو يالسه تسوي
نورة: أذاكر
بوحمد: اها...وين تلفونج
نورة: فوق المكتب..ليش تسئل عنه
بوحمد مارد عليها وراح صوب تلفونها وشله..ويلس أيطالعه ويسوي فيه شيء..ونورة أطالعه ومستغربه من تصرفات أبوها..وشو يالس يسوي في التلفون..في هاللحظه أتذكرت المسجات إلي توصلها كل يوم من رقم ماتعرفه..وخافت..لأنه أبوها أكيد بيسئلها من منوه هذي المسجات..بعد شوي ألتفت أبوها صوبها وويهه مظلم ومعصب..فخافت نورة من شكل أبوها وحست جسمها يرتجف من الخوف..اقترب بوحمد منها ومسكها من جتفها بقوة عورتها..
بوحمد: بسئلج أنت ناويه تنزلي رأس الأرض يالخايسة"وقرب منها التلفون..وخلها تشوف مسج ماشافته من قبل ومن نفس الرقم إلي يطرش لها كل يوم..وتأكدة إنه هالمسج إلي واصل من شوي..بس يوم شافته أنصدمت أكثر..كان مكتوب فيه "نواري حبيبتي ممكن أشوفج باجر في حديقة السليمي..والله مشتاق لج موووت..حبيبج ذياب" من الصدمة نورة يبست مكانها وماقدرت تنطق بكلمة..ومسكها أبوها من شعرها
بوحمد وهو زاخنها من شعرها: خسارة التربية إلي ربيتج أياها يامسودة الويه..على أخر عمري تبي تفضحيني..
نورة حاولت أدافع عن نفسها..بس ماخلالها مجال إنها تتكلم..وفسخ العقال من على رأسه..وطلع كل حرته فيها..ضربها ضرب عمرها مانضربته..وقبل لا يظهر من الحجرة خذ تلفونها والمفتاح..وقفل عليها الباب من برى...
بعد ماظهر أبوها من الحجرة..تمت تصيح من الخاطر..رغم الآلام الجسدية..لأنه نورة حساسه وايد وعمرها مانضربت بهالطريقة..صح كانت شيخة تضربها بستمرار..بس ماتوصل لهدرجة..ومع هذا كان أكثر شيء يصيح نورة إنه هالضرب يا من أبوها..إلي عمره مامد أيده عليها..وإلي زاد إنها أنضربت ظلم وهي برئه.."يارب أنا شو سويت علشان أستاهل كل هذا..والله ماسويت شيء..يارب منوه هذا إلي كان السبب في إلي أنا فيه الحين" وتمت أتصيح طول الليل..ومن التعب رقدت الساعة 2 ونص...
مرت ثلاثة أيام ونورة محبوسه في حجرتها..في وقت الأكل يطرشوا لها لين "البشكارة" أدخل لها الأكل وتقفل الباب وطبعا ماتذوق شيء منه اللهم تشرب ماي..حتى حرمة أبوها ماشافتها ولا يت صوب حجرتها..وخولة ربيعتها تتصل بتلفونها وتحصله دايماً مغلق..وتتصل في البيت وكل ماتسئل عن نورة يقولوا لها إنها يا راقدة ولا تتسبح..خولة طبعا ماتصدق هالحجج لأنها نورة غايبه عن الجامعة من ثلاثة أيام..وهذا غريب..لأنها ماعمرها غابت سوى في المدرسة ولا في الجامعة..حتى وهي مريضة أتيي..
كانت خولة يالسه في الصالة وماسكه التلفون بيدها وسرحانه..ودشت عليها أمها..ولاحظت إنها سرحانه..
أم خولة: خولووه..خولووه "وضربتها على جتفها"
خولة أنتبهت: أه شو أمايه تبي شيء
أم خولة: لا بس شفتج سرحانه..شو فيج
خولة وهي متضايجة: نورة
أم خولة: خير شو فيها
خولة: من ثلاثة أيام ماشفتها..حتى الدكتور في الجامعة يسئل عنها..
أم خولة: أنزين أتصلي فيها وسئليها ليش غايبه
خولة: حاولت..تلفونها يعطيني مغلق..ويوم أتصل في البيت يقولوا لي مرات راقده ومرات تتسبح..ومرات موب موجودة..أنا حاسه إنه فيه شيء
أم خولة: لا خير إن شاء الله..أنزين بنيتي بدل ماأنتي جيه يالسه أتحاتي نورة..سيريلها بيتهم..
خولة: هيه والله..أحسن لي أسيرلها وأشوف شو فيها بالضبط
كان في بوظبي نفس الشيء..حمد كل مايتصل بنورة دايماً يعطيه مغلق..وستغرب...بس قال هب مشكلة باجر الأربعاء وبسير العين..وبشوف شو المشكلة...
يوم وصلت خولة بيت ربيعتها..مالقت حد غير البشكارة وسئلتها عن نورة وقالت لها نورة موب في البيت..وحاولت معها يمكن تجذب عليها..بس ظل ردها مثل ماهو إن نورة ظهرت ويا أبوها وهي ألحين محد في البيت...ردت خولة بيتهم حيرانه ومتضايجة أتحاتي نورة...
ونورة المسكينة محبوسه في حجرتها..ومن قلة الأكل صاير لونها أصفر..كانت نورة في خاطرها تقول"بتريا حمد..محد غيره بيساعدني"
في الليل يا حمد..وأول مادش البيت شاف أبوه وحرمته يالسين في الصالة..مع إنه مايحب شيخة..بس قال موب زين أمر جيه على أبويه ولا أسلم عليه..
حمد: السلام عليكم
بوحمد وشيخة: وعليكم السلام.."وقامت شيخة وظهرت من الصالة..تموت ولا تيلس في مكان فيه حمد"
حمد: شحالك أبويه
بوحمد: بخير..شحالك أنت
حمد وهو يبى ينش: يسرك حالي..انزين أبويه خاطرك في شيء..
بوحمد: وين مايلست
حمد: بروح فوق..أشوف ختيه
بوحمد: لا..يلس أباك في سالفة
يلس حمد مع أبوه وخبره بكل شيء..وحمد أنصدم من إلي سمعه عن أخته..لو شك في الناس كلهم..إلا نورة كانت عنده في محل ثقة..
حمد: أنزين يابوي..يمكن حد متعمد يسوي لها جيه
بوحمد: لا متعمد ولا شيء..جيه بيكون حد متعمد يسوي لها هالشيء..وتلفونها كله رسايل من هالشخص..ومتصلة فيه أكثر من مرة...
حمد: شدراك
بوحمد وهو معصب ظهر تلفونها: شوف بنفسك
بعد ماشاف حمد بنفسه الرسايل..وبالذات أخر وحده أنصدم..وصدق إنه أخته سوت هالشيء..
بوحمد: وشيء ثاني لازم تعرفه
حمد: شو بعد
بوحمد: سعود أخو شيخة خطبها وأنا قربتبه
حمد: وليش ماخبرتني قبل
بوحمد: تراني أخبرك الحين
حمد مارد على أبوه..بس هز رأسه إنه موافق..وطلب منه أبوه يخبر نورة بالخطبة..والملجة بتكون بعد أسبوع..لأنه أبوها مايبى يشوفها..وقام حمد راح حجرة نورة..وأول مافتح الباب شافها يالسه على شبريتها..كان أي حد يشوفها في هاللحظه يقول إنها مريضة..نورة أول ماشافت أخوها عرفت إنه عرف السالفة لأنه كان معصب..ومتضايج وايد..قامت بتسلم عليه..ويوم شافها قامت..
حمد: أنا ياي هنيه أقولج بس إنه سعود خطبج..والأسبوع الياي بيملج عليج
نورة من الصدمة ماقدرت توقف..فيلست على الشبرية: شو قلت
حمد: أعتقد سمعتيني زين شو قلت
نورة: معقولة صدقت إني أنا أسوي هالشيء
حمد وهو ماسك الباب يبى يظهر: مايهمني صدقت ولا لاء
وظهر وبند الباب وراه..وتمت نورة تصيح.."ياربي شو هالظلم..حمد إلي كنت أباه يوقف وياي أنجلب ضدي..كل ماأقول في أمل..وبعيش شرات الناس..أيي شيء يديد ويدمر لي حياتي"
.................................................. ..


و للقصة بقية..</font>

<font color='#000000'>تسلمين اختي مزيونة الشارقة وننتظر البقية..

&nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; <img src="http://oasis.bindubai.com/emoticons/suspect.gif" border="0" valign="absmiddle" alt=':sus:'> &nbsp;اخوك البحار9 <img src="http://oasis.bindubai.com/emoticons/suspect.gif" border="0" valign="absmiddle" alt=':sus:'></font>

<font color='#000000'>تسلمين المزيونه نتريا التكمله بسرعه الله يخليج

درة الشرق</font>

<font color='#000000'>السلام عليكم
القصه فظييييييييييييييييييييييي ييعه بس الله يخليج كمليها ابي اعرف شبيصير<img src="http://oasis.bindubai.com/emoticons/biggrin.gif" border="0" valign="absmiddle" alt=':D'></font>

<font color='#000000'>مشكووووووورة اختي المزيونة على القصة الرائعة ونتريا التكملة بسررررررعة وارجوج انج اتخلصينها خلال هذا الاسبوع بليييييييييييييز
<table border="0" cellpadding="0" cellspacing="0"><tr><td bgcolor="#000000" valign="middle" align="left"><font color="#000000" size="1">Spoiler (Highlight to Read):</font>
</td></tr><tr><td bgcolor="#ffffff" valign="middle" align="left"><font color="#ffffff" size="1">[/spoiler]<img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> <img src="http://oasis.bindubai.com/emoticons/sad.gif" border="0" valign="absmiddle" alt=':('> [spoiler]</td></tr></table></font>

<font color='#000000'>انا عندي النكمله تبونها ولا تتريون اللي محطيه الموضوع.........واسفه اختي المزيونه........:D</font>

<font color='#000000'>فديت عمرج آنه خلي التكمله بليييييييييييز

سوري المزيونه بس وايد تاخرتي علينا


درة الشرق</font>

<font color='#000000'>القصه رووعه ..
ياليت اختي تحطين التكمله ولا تتأخرين علينا &#33;&#33;
<img src="http://oasis.bindubai.com/emoticons/suspect.gif" border="0" valign="absmiddle" alt=':sus:'></font>

<font color='#000000'>اقولكم............اللي يبغي يعرف التكمله...يدخل على موقع
www.ozq8.com &nbsp;وافتحوا منتدى اوز قسم القصص بتحصلونها



وادعولي...........سلامي<img src="http://oasis.bindubai.com/emoticons/biggrin.gif" border="0" valign="absmiddle" alt=':D'></font>

<font color='#000000'>انا روحك اشكــــــــــــرك /اشكرج

و اسمحولي لاني ما كملت القصة و اتأخرت عليكم

وادخلوا الموقع و كملوا القصة..

و اكرر اعتذاري<img src="http://oasis.bindubai.com/emoticons/smile.gif" border="0" valign="absmiddle" alt=':)'></font>

<font color='#000000'>لو سمحتو ممكن اعرف شسم القصة بمنتدى اوز ؟
<img src="http://oasis.bindubai.com/emoticons/rock.gif" border="0" valign="absmiddle" alt='???'></font>

<font color='#000000'><img src="http://oasis.bindubai.com/emoticons/smile.gif" border="0" valign="absmiddle" alt=':)'> <img src="http://oasis.bindubai.com/emoticons/smile.gif" border="0" valign="absmiddle" alt=':)'> <img src="http://oasis.bindubai.com/emoticons/smile.gif" border="0" valign="absmiddle" alt=':)'></font>

<font color='#000000'>بس خلاص ما يحتاي تروحون هناك انا بنقلها لكم</font>

<font color='#000000'>يوم السبت..في بوظبي وبالتحديد في شقة حمد، كان هو وربعه متيمعين كالعادة يتابعوا مباراة..والشباب متحمسين مع كل هجمة إلا أثنين..كانوا في عالم ثاني..خليفة إلي من يوم طاحت عينه على نورة وحالته حاله..يحاول يفكر بأشياء ثانية..بس دايماً صورة ويه نورة البرئ تبرز جدامه..والحين تفكيره فيها زاد..بعد ماقرر يفاتح أخوها في الموضوع ويخطبها...ومن جهة ثانية حمد كان في عالمه الخاص..من يوم ماعرف إلي سوته نورة وهو موب طبيعي..في حزن دائم..أنتبه محمد الزعابي إن حمد وخليفة موب طبيعين..رغم محاولات حمد إنه يكون عادي..بس مع هذا مبين عليه..ونش محمد من مكانه وراح ويلس عدال حمد إلي كان يالس بعيد عن الشباب شوي...
محمد: حمد..حمد..حووووووو
حمد: ها..شو
محمد: توه الناس...أنا من ساعة أزقرك..والحبيب في مكان ثاني
حمد: شو فيه
محمد: حاس إنك موب طبيعي...كله سرحان
حمد: لا ... أنا موب سرحان ولا شيء..يعني لازم أصارخ شراتكم عسب أكون طبيعي
محمد: هههههههه هيه لو إني ماأعرفك زين
حمد وهو يبتسم حق محمد: هيه ماتعرفني
محمد: لو موب سرحان جان أنتبهت لخليفة
حمد وهو يلتفت صوب خليفة: شو فيه
محمد: تراني قلت لك إنه بالك موب معنا..خليفة من كم يوم موب عايبني حاله
حمد: ليش
محمد: كله إلا يفكر وسرحان..
حمد: ههههههههههههه يمكن الريال يحب
محمد: ههههههههههههه هيه والله مايندرابه
حمد نش وراح صوب خليفة ويلس عداله وضربه على جتفه: وين وصلت
خليفة: هههههههههههههههه مطبات البريمي..وين بعد وصلت..
حمد: انزين ليش ماتسمعنا قصيدة من قصايدك..ترانا من زمان ماسمعنا منك شيء
محمد: هيه والله..بدل هالحشره إلي مسوينها الشباب
خليفة: ماكتبت شيء يديد..بس إذا تبى قصيدة من قصايد فتاة العرب..أنا حاضر
حمد: ونحن نقدر نقول لا
محمد: يالله سمعنا
خليفة: أوكى..هالقصيدة مالت فتاة العرب..من شوي طرت على بالي..تقول فيها:
برقـــا روس الشــرايف...مابنــــــــزل للوطــــاه
حيــد الطـــويل النــايف...له في النظـره حـــــلاه
راعي الشيـل الــرهايف...لَي لِي جـــــدد غــــلاه
لــي شوفـــه بالكـــلايف...عينـــــــاو� � منتهــــاه
ريـــم يرعى الجفــــايف...شــربك قلبـــي هـــواه
عين العنـــود الخــــايف...لـه في اللفتـــه وعـــاه
غصـــن شبابـه زايـــف...لون أو حسن أو صفاه
متعــزل م النصـــايـــف...كتف أو ردف أو قطاه
مـــاشبه به وصــــــايف...لا والـــــذي ســــــواه
نايـــف أو قــدره نايــف...وكل العرب ترضـــاه
وسلامتكم
حمد ومحمد ومبارك وفيصل: تسلم الشاعر..وصح لسان القايل
محمد بصوت واطي في أذن حمد: شكله يحب الريال
حمد يضحك بصوت عالي
خليفة: ممكن أعرف شو يضحكك
حمد: سلامتك ولا شيء..حرام يعني أضحك
خليفة: لا هب حرام..بس أنا حاس إنه هالضحك عليه
محمد وهو يغمز بعينه حق خليفة: يمكن
........
وفي العين..بعدها خولة مشغول بالها على نورة..وقررت تسير بيتهم مرة ثانية..ويوم راحت..لقت شيخة وبوحمد محد في البيت..وإلي فتحت لها الباب شغالتهم لين "ولين تحب نورة وايد..لأنه نورة تعاملها وايد أوكى..ولين عندهم من سنوات" فأول ماشافت خولة دخلتها..مع إنه شيخة محذرتنها مادخل أي حد على نورة..ومع هذا خالفت أوامر شيخة..وهم في الممر لحجرة نورة..
لين: نورة مسكين واجد
خولة وهي عاقده حياتها: ليش جيه شو صار لها..أكيد شيخوووه سوتلها شيء مرة ثانية
لين: لا مافي شيحة هزي مرة..بابا يزرب نورة واجد..ويبند باب..نورة مايقدر يطلأ برى
خولة حاطه أيدها على خدها: شو تقولي..يعني أبوها ضربها..أنزين ليش
لين: مايأرف..مسكين نورة
أول ماوصلت عند حجرة نورة..فتحت الباب ودخلت على طول..أول مادشت عليها لقتها يالسه تحت على السجاد..ونايمه على بطنها ترسم..فأول ماشافت خولة نشت بسرعة وركضت صوبها ولوت عليها..
نورة وهي تصيح: وينج عني خوخه..والله أشتقت لج وايد..وأشتقت لغبووش والجامعة..وكل ربعاتي
خولة وبدت عيونها أدمع: والله أنا أكثر فديت روحج..دايما أتصل..ويردوا عليه إنج محد..حتى يت يوم الثلاثاء..وقالوا لي إنج محد في البيت ظهرتي..
نورة تمسح دموعها: وين ظهرت..وأنا محبوسه في هالحجرة من أسبوع ألحين..
يلست نورة وخولة على الشبرية..نورة موب قادرة أتسيطر على دموعها...
خولة: فديت روحج بس..والله ماأقدر أشوفج وأنت على هالحاله..شو صار خلاج جيه هيكل وويهج أصفر..
نورة: تذكري المسجات إلي توصلني من رقم ماأعرفه
خولة: هيه
خبرت نورة خولة عن كل شيء.. وعن الرسالة الأخير إلي كان مذكور فيه أسم نورة..
خولة: خيبه.. عاد نذاله أكثر من جيه ماشفت..حشى منوه يحقد عليج هالكثر
نورة: شدراني
خولة: وحمد شو قال
نورة: شو بعد قال..مضيج مني على الأخر..هيه صدج ماقلت لج
خولة: شو بعد
نورة : يوم الخميس هالأسبوع معزومه على ملجتي
خولة: شوووووو
نورة: ملجتي من سعود
خولة: وهالسعود ماخلصنا منه..معقولة حمد وافق بعد على هذا
نورة: للأسف هو إلي خبرني عن الملجة
خولة: الله يعينج نواري..كل هذا يصير وأنتي متحمله..انزين وشيخووه شو سوت؟
نورة: تصدقي ماشفتها من يوم أبويه ضاربني
خولة: تعرفي نواري..أنا شاكه في حرمة أبوج هالنسره..والله موب بعيده يطلع كل هذا إلي أستوابج من ورى رأسها
نورة: المشكلة محد مصدقني..وأبويه خلاص حدد موعد الملجة وعزم عمي وعياله..وخالتيه وعيالها "نورة عندها عم واحد.. وعنده ولدين وهم ضعف عمر نورة..و4 بنات وكلهم معرسين وعندهم عيل..وبعض عيالهم بعمر نورة..وعائلاتهم متباعدة..ولا يتزاوروا إلا في المناسبات مثل الأعياد والعروس بس"
خولة: انزين والجامعة
نورة: يعني خوخه إنتي ماتشوفي إني ممنوعه إني أظهر من البيت..حتى الجامعة أبويه حرمني منها
خولة متضايجه من الخاطر: يالله ..تعرفي حرام تحرمني هالكورس في كل المساقات وينزل معدلج..
نورة: انزين والحل
خولة: الحل إني باجر أسير أنا وغبووش الأرشاد..ونوقفج هالكورس..يمكن ربج تقدري تدرسي الكورس الياي
نورة ردت تصيح مرة ثانية: تعرفي مرات أتقبل هالواقع إلي أنفرض عليه..وأقول شو يعني سعود ريال مثله مثل غيره..ومابيفرق..على الأقل بفتك من حرمة أبويه..وشكله يحبني..يعني برتاح على الأقل وياه
خولة وهي تلوي على نورة: والله ماأعرف شو أقول لج وإلا بشو أنصحج..غير الله على الظالم..وإن شاء الله بينكشف إلي سوابج جيه
نورة: آمين..الله يسمع منج
تمت خولة ويانورة ساعة..
خولة: يالله حبيبتي نواري أنا بخليج أحين..أخاف أتي حرمة أبوج من برع وتسوي لي مشكلة..
نورة: أوكى الغالية..بس بطلب منج طلب
خولة: أنتي تأمري
نورة: بعطيج رقم موزة..أباج تتصلي فيها وتخبريها إني ماأقدر أتصل فيها..يحليلها أكيد حاولت تتصل فيه وايد..
خولة: إن شاء الله..اليوم بدق لها وبخبرها عنج
..........
في بيت خليفة في بوظبي..كانوا يالسين يتغدو..والكل سوالف وضحك إلا موزة..إلي كانت متضايجة..ولاحظت أم خليفة هالشيء..
أم خليفة: موزان شو فيج
موزة: ماشيء
أم خليفة: شو إلي ماشيء..وأنت من نيلس على الغدى جنج بالعه راديوا..واليوم ولا كلمة
موزة: شو متضايجة
أم خليفة: خير إن شاء الله..شو مضيجبج أمايه
خليفة: أعرفها..أكيد عن الشغل
موزة: لا
خليفة: عيل
فيصل: غريبة
أم خليفة: صدج حبيبتي شو فيج
موزة: ربيعتيه
أم خليفة: شو فيها
موزة: من أسبوع وأنا أحاول أتصل فيها..بس من دون فايدة يعطيني مغلق..واليوم عرفت السبب..
أم خليفة: شو السبب
موزة: أهلها يبوا أيوزوها بالغصب..وملجتها هالأسبوع
خليفة: وأبوي على بنات هالأيام..هذا تباه وهذا ماتباه..والله يبالكن عصى
موزة: شو أنت الثاني عصى..بس والله حرام..أيوزوها واحد ماتباه ومعرس من قبل أكثر من مرة
خليفة: أنزين هذا مايعيبه
أم خليفة: هيه بنيتي الريال مايعيبه هالشيء..والشرع محلله أربع
موزة: بس أمايه نورة صغيره عليه وايد
يوم سمع خليفة أسم نورة..حس وكأنه حد طعنه بسكين في قلبه..ووقف عن الأكل..
خليفة: منوه نورة؟
موزة: أخت ربيعك حمد
خليفة: شوووو؟&#33;

الجزء الحادي عشر

في اليوم الثاني المغرب..في حجرة نورة..كانت يالسه على طرف شبريتها وعدالها خولة ومن الجهه الثانية غبيشة..كانت نورة بينهن قمر..رغم مسحت الحزن إلي ظاهره بكل وضوح على ويها...
غبيشة: نواري حبيبتي فجي عنج هالحزن..صار إلي صار وخلاص.."وعسى أن تكرهُ شيء وهو خيراً لكم"
خولة وهي ماسكه أيد نورة: هيه صدج نواري..
نورة من الضيج مالها نفس حتى تتكلم
خولة: يعني حبيبتي شو بتسوي..شيء مكتوب ومقدر..ماقدرتي تسوي شيء أو حتى تقنعي هلج..خلاص أرضي..وإذا كان الريال موب زين..أنت بروحج تقدري تعدليه دامه يحبج..أكيد بيكون مستعد يسوي لج أي شيء تبينه..
نورة: أمري على الله
بعد شوي سمعن حد يدق على الباب..
إنفتح الباب شوي..كان حمد: نواري لبسي عبايتج وتغشي..لأنه المليج وصل..نترياج برع في الصالة "وبند الباب"
نورة أول ماسمعت كلامه قامت تتنافض..
نورة بصوت واطي: مابى
خولة: نورة شوو قلنا من شوي
نورة شوي وبتصيح: بس والله حرام أتيوز غصباً عني..
غبيشة: أحذرج..كله ولا الصياح..حرام تعب الحرمة مالت الصالون يروح هدر..لو شفت دمعه وحده..بضربج صدقيني"كانت غبيشة تحاول تضحك نورة"
وقامت خولة ولبست نورة عبايتها و شيلتها وغشتها..ووصلتها لين الباب...
خولة: يلا نواري خلج حرمة..الناس يتريوا برع..
نورة ماردت عليها...
أول ماظهرت من حجرتها لقت أخوها برى يترياها...ومسكها من أيدها ولا نطق بحرف..لحد ماوصلوا من وين المليج..كان هناك طبعا سعود إلي موب قادر يتماسك ومتشقق من الوناسه..وأبوها..وأثنين من عيال عمها مبارك وسيف كانوا هم الشهود..كانت نورة تقول في خاطرها " زين أحين لو أقفط سعووودوه وأقول إني موب موافقه..بس لا ماأقدر أفشل أبويه إلي بعده لحد هاليوم موب راضي عني..يابوي أنا بنتك والله حرام إلي تسوه فيني"
الساعة 9 كانت نورة يالسه على الكوشه وتحاول تبتسم في ويه الناس إلي حاضرين..ومعظمهم طبعا من العايلة..وشيخة حرمة أبو نورة يالسه ترقص هي ووحده من بنات عم نورة وغبيشة..في هاللحظة يت صوب نورة وحده من بنات عمها ويلست عدالها..وتمت أطالع خولة إلي كانت يالسه عدال نورة من الجهة الثانية وتبتسم لها..وكأنها تقول لها تروح لأنها تبى ترمس بنت عمها..وفعلا خولة فهمت ونشت بتروح..
خولة: نواري حبيبتي أنا بروح أرقص وياهن..
نورة : أوكى
بعد مابتعدت خولة...حمدة بنت عم نورة: بسئلج نواري
نورة: سئلي
حمدة: جيه توافقي على واحد أكبر عنج بوايد
نورة: العمر موب بشكلة بين الزوجين..
حمدة: بس أنا سامعه إنه متزوج من قبل مرتين
نورة وهي متضايجة: هيه
حمدة: وتعرفي ومع هذا وافقتي عليه
نورة: عايبني عندج مانع "نورة من ردها هذا كانت تبى تفتك من بنت عمها..لأنها مالها خاطر ترمس"
حمدة: لا ماعندي..بس كل العايلة موب موافقه على هالزواج من أساسه
نوره تقول في بالها" عيل ليش ماتكلموا..ولا صدج نسيت أهلي شيطان أخرس..هم يراقبوا من بعيد وبس"
حمدة: نورة .. حووووووووووووو "تضربها على جتفها"
نورة: ها شو عندج
حمدة: أنا أرمس من ساعة وأنت موب معي
نورة: لا معج..شو قلتي
حمدة: كنت أقول موب جنج ضعفتي وايد..عن أخر مرة شايفتنج فيها...
نورة: أسوي رجيم
حمدة: هههههه الله يهديج أي رجيم..بتختفي من الضعف
نورة: شو أسوي عاد..
الساعة 12 بعد ماراح كل المعازيم...كانت نورة ناويه تروح حجرتها بسرعة..لأنها ماتبى تشوف سعود..بس حرمة أبوها يوم شافتها تبى تشرد فوق..زختها من أيدها وراحت بها الصالة من وين سعود يالس..إلي كان محتشر يبى يشوفها...دشت نورة الصالة ولا نطقت بحرف..وأول ماشافها سعود وقف وتم يطالعها...
شيخة: وهذي حرمتك إلي حاشرنا عليها..عندك نص ساعة ومن غير مطرود
سعود: حرام عليج نص ساعة شو
شيخة: أنت حمد ربك خلك بوحمد تيلس وياها في هالوقت
سعود: انزين خلاص خلاص..فارجي
شيخة وهي تظهر من الصالة: نص ساعة بس
سعود: أوكى
كانت نورة منزله رأسها..ويلست على كنبه ويا سعود ويلس عدالها...
سعود وهو يرفع رأسها: نواري
نورة طبعا ماردت عليه
سعود: أعرف إنج زعلانه مني..وأعرف بعد إنج مادانيني..بس يانورة لازم تعرفي شيء واحد..وهو إني أحبج..وسويت إلي أقدر عليه بس علشان تكوني من نصيبي..حبج يانورة غير حياتي..أنا موب سعود إلي تسمعي عنه أول..تغيرت من يوم ماشفتج..صرت إنسان ثاني..ومستعد أسوي أي شيء علشان أسعدج...
مر الوقت وكله إلا سعود يتكلم..ونورة ساكته ماترد عليه..كان سعود مبهور بجمالها..وعوره قلبه يوم شافها صايره بشرتها لونها أصفر من الضعف..وقال في باله"بتردي إن شاء الله شرات أول وأحسن"
في بوظبي.. طبعا خليفة خلاص فقد الأمل..لأنه عرف إن نورة خلاص ملج عليها سعود..يعني صارت حرمة غيره...أنقطع عن حمد فترة..بس بعدين رد شرات أول..ومع هذا عمره مانسى نورة..لأنها خلاص سكنت قلبه وأسرت تفكيره مستحيل تطلع منه..وأكثر شخص حاس بمعانات خليفة..موزة بس ماحسسته إنها تعرف..كل مادش حجرته..تلقاه يكتب قصيدة..ويوم تقرأهن..قصايد تعبر عن مشاعر خليفة..وأكبر دليل على حزنه..
أتفقوا إنه يكون العرس..في الإجازة الشتوية..يعني على شهر واحد..بيكون بعده جدامهم 8 شهور..ويقدروا أيجهزوا حق العرس على راحتهم..
سعود طبعا يوميا أيي يشوف نورة..كانت ماتعطيه ويه..بس مع الأيام تعودت عليه..ورتاحت له وايد..لأنها حست إنه الإنسان الوحيد إلي يهتم بها..حمد إلي هو أخوها وأعز الناس عندها وأقربهم أنقطع عن العين..صار يمر عليه أسبوعين وثلاثة مايشوفوه..
مره يا سعود بيتهم..ويوم طلب من البشكاره تزقر نورة..قالت له إنها راحت مع ربيعتها خولة..كان ناوي يروح..بس شاف أخته شيخة توها نازله من فوق..
شيخة: هلا والله بسعووودي..
سعود: هلا فيج الغالية..شحالج عساج بخير وعافية
شيخة: بخير دامك أنت بخير"يلست أطالعه بستغراب"
سعود: شو فيج أطالعيني جيه
شيخة: موب جنك ضعفت؟؟
سعود: ههههههههه من الحب
شيخة: عشنا وشفنا..يابوك يوم أتيي بيتنا..بس تي تشوف نوير..ونحن مالنا رب
سعود: شو أسوي..كل ماأيي ماألقاج..يامعزومه عند ربايعج..ولا في العروس..أنا متأكد إنج ولا عرس في العين إلا وحضرتيه..رحمي نفسج
شيخة: ههههه مشكلة يوم الواحد يكون مشهور..وكل الناس تعرفه
سعود: لا والله..قصدج مشكلة يوم الوحده ماتبى تيلس في بيتها أربعه وعشرين ساعة برع البيت...
شيخة: انزين كيفي..أنا مبوني جيه ولا بتغير
سعود: المهم أنا بسير أحين..يوم أتي نورة سلمي عليها
شيخة: وين توه الناس ماشبعة من شوفتك "مسكته من أيده" تعال نيلس في الصالة والله أشتقت لك يالهرم..ماتقول عندك أخت وبتي تسلم عليها..
سعود: والله مابأيدي طول الوقت مشغول..ويوم أيي أشوف نورة تكوني أنت موب موجودة في البيت...
شيخة: ولا نوير نستك أختك..خلاص يابوي أنا مالي فايده بعد ماخذيتها..
سعود: هههههه لا والله ... أنت البركه
شيخة: لا واضح
............
في بيت قوم خولة..كانت خولة يالسه في حجرتها ووياها نورة..
خولة: غريبة خلوج تظهري من ا لبيت
نورة: فديته سعود توسط لي عند أبويه
خولة: ههههههههه أحين فديته
صار ويه نورة أحمر من المستحى: خوخه أحسن لج..وأبوي ريلي أنا ماأتفدى واحد غريب...
خولة وهي تغمز حق نورة: أحين صار ريلج بعد ما كنت ماطيقين تسمعي إسمه...
نورة: كل شيء يتغير..سعود الحين أشوفه كل يوم تقريباً..وعرفته زين..وعمري ماتوقعت إنه إنسان قلبه كبير جيه..وفوق هذا كله إنه يحبني..
خولة: وأنت تحبيه؟
هنيه سكتت نورة .. وماقدرت ترد على ربيعتها..
خولة: ليش سكتي..جاوبي
نورة: مع الوقت بحبه
خولة: إن شاء الله..
في بيت خليفة في بوظبي..كان يالس يتقهوى العصر ويا أمه..
أم خليفة: خليفة
خليفة: عونه
أم خليفة: أبى أرمسك بسالفة
خليفة: رمسي..أسمعج يالغالية
أم خليفة: سمع ياولدي..أنت الحين هب صغير..وكل ربعك إلي في عمرك عرسوا وعندهم عيال..إلا أنت حشى ولا مرة قلت يامايه خطبي لي..أبى أتيوز
خليفة: محد يامايه مايتمنى يتيوز ويكون عنده عيال..بس أنا ألحين ماأفكر في هالموضوع..ويوم وقته بقولج
أم خليفة: متى وقته ياوليدي..تراني قلت لك أنت ألحين هب صغير..وإلي أصغر منك معرسين..أبى أشوف عيالك قبل لا موت
خليفة: بعيد الشر عنج..والله يطول بعمرج يالغالية..بتشوفيهم إن شاء الله وبتشوفي عيالهم بعد...
يأست أم خليفة من ولدها..مابيسوي إلا إلي فراسه..وهي عمرها ماغصبته على شيء..ولاناويه الحين تغصبه على شيء مايباه..بالذات الزواج..لأنها مسئلة حياة..فخلته على هواه..
مر شهرين على ملجة نورة..في هالشهرين إلي مرن..تغيرت حياة سعود..كان كل يوم يشوف حبه نورة..أول مرة في حياته يلقى حد يفضفض له بهمومه ومشاكله..كان قبل معظم إلي يعرفهم هدفهم الأساسي المصلحة..وهو يعرف هالشيء ومع هذا يسايرهم..ولا من وين بيكون عنده ربع..حتى البنات إلي تعرف عليهن أو بالأحرى إلي تعرفن عليه..كان هدفهن الأساسي جيبه..صح سعود من أوسم الشباب وأغناهم في العين..لأنه يوم توفى أبوه..ماكان عنده غير سعود وشيخة..وشيخة ماكان يهمها الثروة..لأنها متزوجه وبوحمد مامقصر معها بشيء..فتنازلت عن معظم نصيبها من الورث..إلا القليل إلي ممكن في يوم تحتاج له..وسعود بالنسبة لشيخة..في مقام الأبن..لأنها نحرمة من هالأحساس..وهو إحساس الأمومة..
مرة كان سعود يتريا نورة في الصالة..ونزلت شيخة وهي صار لها أسبوعين ماشافته..أول ماطاحت عينها عليه أنصدمة..وراحت صوبه بسرعة..ويلست أطالعه بنظرات غريبة..وقتربت منه ويلست تتحسس ويهه بإيدها...
سعود: هههههههههههه شو فيج..لهدرجة متولهه عليه
شيخة وهي عاقده حياتها: سعود شو فيك صاير جيه..حرام عليك مستوي هيكل
سعود: هههههه تراني قلت لج من قبل من الحب
شيخة: لا ماله الحب دخل في إلي مستوي لك..أنا أول مانزلت وشفتك والله ماعرفتك..أنت أطالع نفسك في المنظره..
سعود: هيه.. وعايبني شكلي
شيخة تمت أطالع أخوها وهي عاقده حياتها

في بوظبي وبالتحديد في شقة حمد..كان يالس بروحه العصر في البلكونه.. يطالع الكرنيش ويفكر .. " ألحين نواري وخذها سعود..يعني خلاص ماعندي حد أحاتيه..بس هل كان تصرفي ويا ختيه صح..ماأعرف ليش أحس بتأنيب الضمير وكأني أرتكبت أكبر خطأ في حياتي..بس كان كل شيء واضح وضوح الشمس..عيل ليش كانت مصره إنا نسوي لها تلفون..رغم ثقتي فيها..إلا إنها خانة هالثقة إلي عطيتها لها..ماعليه صار إلي صار..وبعدين أنا هب زين مني ألحين من ثلاثة أسابيع ماسرت العين..مهم تكون هذي أختي ولا أنسى أبويه..باجر الأربعاء بإذن الله على العين.."
فجأة سمع باب البلكونه يتبند بسرعة..ويوم لتفت لقاه ربيعه محمد الزعابي كان عنده نسخة من مفتاح الشقة..وتم يطالعه ويضحك...
محمد: بات الليل هناك..محد بيفتح لك
حمد يسوي عمره معصب: بتفتح الباب
محمد: بفتح..بس بشرط
حمد: شو هو خلصني
محمد: تقولي في شو كنت سرحان "وهو يغمز له"
حمد: ومنوه قال لك إني سراحان..يالس أطالع الناس في الشارع والكرنيش
محمد: حلف
حمد: مابحلف..بتفتح ولا أكسر هالجامه وأكسر رأسك وياها
محمد: هههههههههههههه أصلا مابتهون عليك تكسرها
حمد وهو يرفع أكمام كندورته: تبى تشوف
محمد: والله بيسويها..
حمد: عيل أضحك وياك
محمد: انزين يابوك بفتح..بس سير بعيد..عسب أفتح والشرده
حمد: هههههههههههه يالجبان
محمد: الشرده نص المريله
في هاللحظه دخل مبارك وفهد وخليفة..
خليفة: شو مستوي هنيه
محمد: دشيت عليه وهو سرحان..وقلت أسوي فيه حركة عسب ينتبه..وألحين متحلف إنه يضربني..بصراحة أنا مافيني على ضربه..ضربته عن حديده
حمد: هب هباك الله..ذكر ربك..بتظهرني من هنيه ولا
محمد: أنا أخاف هذي ولا
حمد: يابوك فتح..مابسويبك شيء
محمد: شهدتوا..
الكل يضحك على محمد وحمد..وهالمقلب موب أول مرة يسويه محمد في حمد..حبسنه في البلكونه أكثر من مرة...
وهم يالسين في الميلس يتابعوا مباراة..وخلص الشوط الأول...
حمد: خليفة
خليفة: عونه
حمد: تراني من زمان ماسمعنا من قصايدك شيء
فهد: هيه والله..يالله سمعنا من ذاك الشعر الزين
خليفة: ماطلبتوا بس...هذي أخر قصيدة كتبتها..أقول فيها
عقلي وروحي داخل العين...والا هنـــا جثـــه بــــلا روح
مسكين عشــاق المــزايين...مثل الغــريق اللي على لــوح
الحب كــم طبــع مــلايين...راحــوا وانا بالمثــل بــا روح
يا من سقاني كاس حرفين...واصبحت في لفراش مطروح
ان غثتني يا كامـل الــزين...نلت الأجـر وانقـذت لك روح
وسلامتكم
الكل: صح لسانك الشاعر..وماعليك زود
.............
مرات الأيام..وكل يوم علاقة نورة بسعود تقوى..لدرجة إنها حبته..بس موب الحب إلي نحن نعرفه بين الأحباب..لا..حب نورة لسعود كان حب أخوي..صارت غلات سعود بغلات حمد..من كثر مارتاحت له صارت تخبره بكل صغيره وكبيره في حياتها..وهو نفس الشيء..ومن باب حبها الأخوي له..لأحظت تدهور صحته..وتمت تحاتيه وخايفة عليه..وكل ماترمسه عن هالشيء..يغير السالفة ويقول ماعليج مني..أنا مافيني إلا العافية..فقررت نورة تسير عند حرمة أبوها إلي نادر ماتشوفها وتخبرها عن حالة سعود..وبالأخص لأنه هذاك اليوم مايي كالعادة..وهي متعوده تشوفه كل يوم..وتصلت فيه من تلفون البيت بس مايرد..وزاد خوفها عليه..فقامت وراحت حجرة حرمة أبوها إلا من حظها إنها اليوم موب ظاهره مكان..ودقت عليها الباب...
شيخة: يانعم..إذا أنت يالينوووه مرة ثانية والله لعطيج بنعال على رأسج
نورة: أنا نورة
شيخة: شو تبي أنت الثانية
نورة: أبى أرمسج في شيء مهم
شيخة: في وقت ثاني أنا ألحين هب فاضيه لج
نورة: والله ضروري..يخص سعود
نشت شيخة من مكانها كانت حاطه خيار على عيونها وقناع في ويها، وحطت أيدها على صدرها: شو فيه سعود
نورة: أنت فتحي وبخبرج
شيخة: صبري شوي "سارت الحمام بسرعة تغسل ويها ونشفته بالفوطه...وفتحت الباب حق نورة"
شيخة: دشي.. يالله رمسي شو فيه أخويه
نورة: شو ناويه تظهري
شيخة: هيه بظهر..يالله خلصيني شو فيه سعود
نورة: يمكن أنت لاحظتي جيه صاير ضعيف
شيخة: هيه فديت روحه..ماأعرف شو صار فيه جيه فجأه ضعف
نورة: ماأعرف إذا تعرفي بعد إنه ألحين مايسوق السيارة
شيخة وهي منصدمة: شووو وليش مايسوق
نورة: والله ماأعرف..ألحين يوم أيي بيتنا أيبه الدريول ماله..هو مايسوق..وشيء ثاني يمكن هو سبب إنه مايسوق...
شيخة: شو هو
نورة: أمس يا العصر ويلست وياه نرمس..لين جيه نص ساعة..ويوم بغى يسير يا بينش من مكانه..إلا أشوفه يبى يطيح وبسرعة يودت أيده عن يطيح..ويوم سئلته شو فيه..قال لي إنه هاليومين يحس مرات إنه الدنيا ظلمت ومايشوف شيء أبد..وستغربت من رمسته وخفت عليه..واليوم مايي..اتصلت فيه ومايرد عليه
شيخة عاقده حياتها وحاطه أيدها على صدرها: ياويلي أخويه..شوفيه
نورة: شو بتسوي ألحين
شيخة راحت بسرعة صوب الكبت وطلعت عبايتها وشيلتها: شو بعد بسوي .. بسير أشوفه...
أول ماوصلت شيخة بيت أخوها..دشت بسرعة وأول مادخلت البيت شافت بشكار سعود..عبد الكريم...
شيخة: عبدالكريم تعال هنيه
عبدالكريم: شو فيه ماما شيحة
شيخة: وين سعود
عبدالكريم: بابا سعود اليوم مافي يطلع من حجرة ماله..كله في نوم..أنا يروح ويسئل هو إذا يبى يوكل..وهو يقول مايبى شيء..مسكين بابا سعود يمكن في مريز...
شيخة ماردت على عبدالكريم..سارت بسرعة فوق تشوف أخوها .. وميته خوف عليه..وأول مافتحت باب الحجرة من دون مادق الباب..أنصدمت من حال أخوها..إلي كان منسدح فوق شبريته..وويه غارق بالدموع..أول مرة في حياتها كلها تشوف سعود يصيح..كان شكله فضيع..وراحت صوبه بسرعه ولوت عليه..وهو ماصدق يلقى حد يواسيه ويخفف عنه..بعد مالوت عليه أخته تم يصيح شرات اليهال..وشيخة ماقدرت تشوف أخوها على هالحاله وموب عارفه بالضبط شو فيه...
شيخة وهي تحاول تتماسك وتمسح على شعره: فديت روحك..بس..سعوودي حبيبي والله ماأقدر أشوفك على هالحاله..شو فيك..
بس سعود مارد عليها..موب قادر يمسك نفسه من الصياح..لدرجة إنه عيون شيخة دمعت"ياربي شو فيه..وليش يصيح جيه..مستحيل سعود يصيح بهالطريقة إلا في شيء كبير خلاه على هالحاله.."وهي ترمس نفسها..
تموا على هالحاله..هي لاويه عليه وتحاول تخفف عنه..وفضلت تسكت ولا ترمسه لين مايهدى شوي..وتعرف بالضبط شو فيه..وهي متأكدة ألحين إنه مريض..لأنه مظهره العام أكبر دليل على مرضه..بس شو بالضبط..الله وأعلم.....
في بيت بوحمد..نورة كانت وكأنها يالسه على جمر..من كثر ماتحاتي سعود وشو فيه بالضبط..في هاللحظه دخل أخوها حمد..وشافها..وكان في باله وهو في طريج بوظبي العين..يريد يرمسها..وينهي القطيعه إلي كانت بينهم..لأنها مهما غلطت أخته من دمه ولحمه..وماعنده غيرها..فماقدر يصبر أكثر من جيه مقاطعنها..
حمد: السلام عليكم
نورة: وعليكم السلام
حمد أنتبه إن نورة موب طبيعيه..في شيء مضايجنها: شو فيج؟
نورة: مافيني شيء "نورة من يوم سالفة الموبايل ماتخبر حمد أي شيء..وقالت مثل ماطنشني بطنشه"
حمد: لا فيج شيء
نورة: تراني قلت لك مافيني شيء
حمد: نواري حبيبتي أعرفج زين..كل إلي فيج يبين على ويهج
نورة: غريبه..من وين الشمس اليوم طالعه..علشان ترمسني..أعرفك مقاطعني...
حمد: الكل يخطأ..وبعدين أنت أختي..وماعندي غيرج..لمتى بتم ماأرمسج
نورة ماردت عليه...لأنها مالها نفس تتكلم في هاللحظه وهي تحاتي سعود...
تمت نورة ساكته ومطنشه حمد إلي يلس يتابع مباراة في قناة دبي الرياضية...وتموا جيه مده..هي كل تفكيرها مع سعود إلي بعدها ماعرفت عنه شيء...
وحمد يتابع المباراة ويفكر كيف يراضي أخته..مايقدر تستمر الحاله بينه وبينها جيه...بعد ماخلصت المباراة...
حمد: انزين برايج..أنا بسير فوق ارقد...ويوم يأذن المغرب وعيني
نورة: انزين
حمد: صح وين أبوي
نورة: في المزرعة
حمد: متى بيي
نورة: مااعرف
حمد: وشيخوووه
نورة: ماأعرف
حمد: أنت كله ماتعرفيه...عيل شو تعرفي في هالبيت
نورة يالسه تقرأ في مجلة وماعاطنه ويه: ماأعرف شيء
حمد: والله حاله..المهم أذان المغرب وعيني...باي
نورة في بالها" والله موب هاين عليه ماأرمسه..بس دواه..تخلى عني وأنا كنت في أمس الحاجه له..بخليه يحس بلي سواه..أوووووووه صح نسيت سعود يحليله..أحسن لي أتصل بشيخة وأتخبرها عن أخوها بدل ماأنا يالسه هنيه أحاتيه"
نشت من مكانها وشلة التلفون وأتصلت بتلفون شيخة...ورن لين مابند..وأتصلت مرة ثانية ونفس الشيء..بعدين فكرة تتصل بتلفون سعود..نفس الشيء محد يشله.."ياربي شو صار ليش مايردوا"

في هاللحظه في بيت سعود..كانت شيخة يالسه عدال أخوها..بعد ماهدى..وتحاول تتخبره شو فيه بالضبط..
شيخة: سعود حبيبي والله يوم شفتك على هالحاله قلبي بيوقف..شو فيك..وليش تصيح..أنا في حياتي كلها ماشفتك تصيح جيه..إلا يوم كنت ياهل.."وهي تمسح على شعره"
سعود صح ألحين ريال..بس يوم يكون في هالحاله يكون شرات الياهل وأخس بعد..مايقدر يمسك نفسه..
شيخة: ياربي ياسعود تكلم فديت روحك..لاتم جيه صاخ
سعود وصوته متغير من الصياح: شو تبيني أقول
شيخة: شو بعد تقول...قولي شو فيك..
سعود: مافيني شيء
شيخة: بالله عليك تصيح جيه وتقول مافيك شيء
سعود: أنا مريض
شيخة: بعيد الشر عنك
سعود: قلت لج أنا مريض
شيخة: أنزين نش بوديك المستشفى
سعود: لا مابسير
شيخة: سعود تراه رأسي عورني منك..شو هالتصرفات..إلي يسمعك ألحين يقول ياهل موب ريال خاط شاربه
سعود: أنا عارف شو فيني..ماأبى أسير مستشفيات
شيخة وهي عاقده حياتها: شو فيك
سعود: مريض وبس
شيخة: سعودوووه لا تعور لي قلبي.. شو فيك بالضبط
سعود: تعرفي ربيعي سلطان محمد
شيخة: هيه أعرفه..منوه مايعرفه هالصايع الضايع
سعود: المهم هو ربيعي
شيخة: وأنت أصلا حد من ربعك زين..كلهم إلا من نفس الطينه
سعود: المهم سلطان الله يكون في عونه ويرحمه برحمته لقوا فيه إلتهاب الكبد الوبائي هذا الخطير إلي شرات الإيدز
شيخة: الله يعينه..لازم من هياته في بلاد برى...انزين شدخل هذا بصياحك....هيه أكيد مأثر فيك إلي صار بربيعك..طلب له الرحمه
سعود: أكيد بيأثر فيه...بس إلي أبى أقولج عنه هو إني أنا بعد فيني نفس مرضه
شيخة وهي مصدومه: شووووووووووووووووو
سعود مارد عليه..وتم ساكت ومنزل رأسه
شيخة حاطه أيدها على خدها: شو قلت..سعود رد عليه..أنت متأكد من إلي تقوله..ولا بس يالس تضحك عليه..سعود حبيبي أنا ماعندي حد في هالدنيا غيرك..أنت أخر هلي..رد عليه
سعود: هيه متأكد..
شيخة: جيه تأكدة وأنت أصلا ماسرت المستشفى ولا سويت فحوصات
سعود: شيخة..أنا من صغري وأنا ضايع..أنت صح تحبيني وتنفذين كل طلباتي..بس عمرج ماسئلتي منو ربعي..ولا وين أروح ومن وين أيي..أسافر من وين ماأبى...ولا حد منكم أهتم..وأسوي إلي أباه...من شهر عرفت إنه ربيعي سلطان وهو رفيق دربي..ومن وين مايسير أسير وياه...مصاب بهالمرض إلي ماله دو..ونهايته جريبه..والله ياشيخة بعد ماشفت سلطان...طبعا هو حاطينه في عزل صحي..وأنا أفكر من يومها وأتلوم على كل لحظه قضيتها في حياتي ألعب وأشرب.."وشيخة منصدمه" أعرف أعرف زين إنج بتنصدمي بهالكلام إلي أقوله..بس والله بعد ماشفت سلطان وتعرفت على نورة أكثر تغيرت..صرت إنسان ثاني..تبت عن كل إلي كنت أسويه..بس بعد شو...
شيخة تحاول تتمالك نفسها: انزين سعود...نرد للمرض...شدراك إنه فيك
سعود: لأنه نفس الأعراض إلي يت لسلطان
شيخة: ماعلينا من إلي يت لسلطان...نش بوديك المستشفى..لازم تسوى فحوصات...وإن شاء الله يطلع كل إلي تقوله موب صح
سعود: لا مابى ... تراني عارف شو فيني
شيخة وهي معصبه عليه: سعود..بتقوم
سعود: انزين لا تعصبي خلاص بقوم
نش من مكانه..كان شكله تعبان وايد..وراح يغير ثيابه عسب يروح المستشفى ويا أخته....
الساعة 9 المسا ردت شيخة البيت..وأول ماشافتها نورة ركضت صوبها... وسئلتها عن حالة سعود..شيخة ماكان لها نفس تتكلم..بس تعرف إن نورة مهتمه بأخوها.. فخبرتها إنه مريض..وسارت وياه المستشفى وسوى فحوصات..بس شو المرض بالضبط ماخبرتها لأنه نتايج الفحص أصلا باجر بيظهرن..بعدين سارت فوق ترقد.. في هاللحظه أنتبهت نورة إنه محد تحت غيرها..حمد بعد مانش المغرب صلى وظهر مع ربعه..وأبوها طبعا بعده مارد من المزرعة.. فقررت تتصل بموزة إلي من كم شهر مارمستها..لأنها ماتقدر تتصل بأي حد من يوم سالفة الموبايل إلا خلسه...أتصلت برقم البيت ...رن التلفون..بعدين حد شله...
نورة: السلام عليكم
خليفة: وعليكم السلام والرحمه
نورة: موزة موجوده
خليفة يوم سمع صوتها حس بنبضات قلبه تزيد: هيه منوه أقول لها
نورة: ربيعتها
خليفة: وربيعتها مالها إسم
نورة وهي مرتبكه: ممم موب لازم..بس ربيعتها وهي بتعرفني يوم أرمسها
خليفة: لحظه بزقرها لج "كان قلبه يقول له إنها نورة"
راح يزقر أخته عسب تشل التلفون إلي في حجرتها..وقرر يسوي شيء ماسواه من قبل..نزل تحت وشل السماعه..كان يعرف إنه إلي يسويه خطأ بس غصباً عنه يلس يسمع...
موزة: ألو
نورة: هلا والله بموزان
موزة: نواري&#33;
نورة: لا بنت يرانهم
موزة: فديت نواري والله..وينج يالقاطعه لا حس ولا خبر
هنيه تأكد خليفة إنها نورة..كان لحظتها سرحان مع صوتها..حتى بعد ماتأكد إنها هي ماقدر يرد السماعه مكانها..حس فيه شيء يجذبه لاشعوريا لصوتها..قال في باله "ياربي لمتى بتم متعلق بوهم..خلاص نورة موب لك..بسك من الأحلام..البنت بعد ثلاث شهور وبتكون في بيت ريلها" في هالحظه رد السماعه مكانها..وحس بذنب على إلي سواه...
بعد ماخلصت موزة مرمسه نورة..نزلت تحت ولقت خليفة يالص في الصالة...
موزة : إلا أقول خلووفه..منوه كان شال السماعة وأنا أرمس ربيعتيه.."ويالسه أطالعه بنظرات"
خليفة: شدراني
موزة: متأكد ماتعرف
خليفة يسوي عمره معصب: هيه متأكد..ولا لاتكوني بس شاكه فيه أنا..
موزة: أنت قلت..أنا ماقلت شيء
خليفة: بالله عليج تشوفيني أنا ريال طول وعرض أسوي هالخرابيط
موزة: كل شيء جايز "وهي متأكدة إنه هو..لأنه محد تحت غيره"

خليفة تعود كل يوم بعد مايرد من شقة حمد..يسير ييلس على الشاطئ ساعة ومرات ساعتين..حتى لو كان الوقت متأخر..هالشيء يريح خليفة..بالذات في هالوقت..يكون الشاطئ فاضي من الناس وحشرتهم..صعب على الإنسان إنه يفقد حب حياته..ونورة في نظره حب حياته..في أيام المراهقة كان كل يوم والثاني يحب له وحده..يمكن الجمال هو الشيء الوحيد إلي كان يجذبه..بس يوم شاف نورة..المراهق صار ريال..وفاهم الحياة..وخليفة مانقدر نقول إنه كان مطوع..بالعكس تعرف على بنات..وكان كل مايشوف بنيه حلوه يقول هذي حب حياتي وملهمتي في قصايدي..وإن شاف وحده أحلى منها بدلها..بعد نورة تغيرت كل مفاهيمه للحب ونظرته له..ومع هذا فقدها..وكل يوم والثاني يحاول يمسح صورتها من مخيلته..بس صعب..حتى مرة حمد إلي هو أقرب إنسان لخليفة..سئله إذا كان يحب..هو ماتكلم مع أي شخص عن هالحب الصامت إلي يعيشه مع نورة..بس قصايدة هي إلي تتكلم عن حاله وتفضحه..رد على حمد ساعتها "وأنت ماتعرف ربيعك..كل يوم والثاني عشق له وحده"
.....
في اليوم الثاني في المستشفى..سعود وأخته شيخة..يتريوا دورهم علشان يدخلوا على الدكتور..عسب يعرفوا نتايج الفحوصات..كان سعود ميت من الخوف ويتنافض..هو صح يعرف إن أعز ربعه سلطان أصيب بمرض إلتهاب الكبد الوبائي من شهر..بس لاحظ على نفسه إنه أتييه نفس الأعراض إلي يت لسلطان..وتأكد من يومين..لأنه صار أييه دوار وايد..
شيخة: سعودي حبيبي بسك عاد..مابيقول الدكتور إلا كل خير
سعود: بس أنا متأكد
شيخة: أنت تتخيل
سعود: بتشوفي
شيخة: فديت روحك لا تم تفاول على روحك جيه
سعود: أنا ماأفاول..بس حاس إنه فيني
شيخة: عيل شو بقيت حق الشواب..مافيك إلا كل خير
بعد شوي سمعوا يزقروه..فقام بصعوبه وهو ميود بأيد أخته..لازم يخاف جيه..إلتهاب الكبد الوبائي موب سهل..وبعد ماشاف حالة ربيعه سلطان..تندم على كل لحظه قضاها في اللعب والحرام..دخلوا غرفة الدكتور وكان سعود سرحان..ضربته شيخة على جتفه...
شيخة: سعود..ماتسمع الدختور شو يقول لك
سعود: ها..شو
الدكتور: أجلس يابني
شيخة: ها يادختور شو فيه أخويه..
الدكتور: مافي هوش إلا كل خير..
سعود هنيه أنتبه لرمسة الدكتور: أي خير ترمس عنه أنت وأنا فيني ألتهاب الكبد..
الدكتور: بعيد الشر عنك يابني..مين ألك إنه فيك؟
سعود: والأعراض إلي تيني
الدكتور: يعني بالله عليك..أنت مسوي رجيم..مش عاوز تجيلك دوخه وتوابعها؟
سعود: أنا مامسوي رجيم..بس والله نفسي مسدوده..
الدكتور: دي مشكلتك..
شيخة وهي مستانسه إنه أخوها طلع مافيه إلا كل خير: يعني يادختور ألحين سعود مافيه شيء..عيل شو هالدوخه..وضعف جيه فجأة
الدكتور: أسمعي ياستي..سعود في رأسه فكرة المرض..ودي الفكرة مأثره عليه كتير..وإحنا سوينا له فحوصات..وكلها تأكد إنه خالي من الأمراض..يعني لا فيه إلتهاب الكبد C ولا B ولا غيره..أنت ساغ سليم..أما عن الدوخه إلي تجيك دي سببها إنخفاض في نسبة الهيموجلوبين..يعني متخفشي..لازمك نظام غزائي وبترجع زي الفل...
سعود بعد ماسمع كلام الدكتور فرح من الخاطر رغم التعب إلي بادي عليه: ياعني يادكتور أرتاح
الدكتور: أرتاح وحط في بطنك بطيخه صيفي كمان...
بعد ماطلعوا من المستشفى وطول الطريج وشيخة طايحه نصايح في أخوها..وأول ماوصلوا البيت..سارت عند عبد الكريم وعطته أوامر شو يسوي من الأكل حق أخوها كل يوم..بعدين راحت الصالة من وين يالس أخوها وسلمت عليه وراحت بيتها..ومن ظهرت شيخة قام سعود وراح حجرته..لأنه قرر يسوي شيء..مايذكر متى أخر مرة مسونه..دش الحمام..وبعد ماظهركان متيدد.. فتح كبته في درج صغير شاف سجادة عمره ماستخدمها..ومسكها بإيده في هاللحظه بالذات نزلت دموعه مثل المطر.."ياربي كيف كنت أنا عايش حياتي لاشهاده ولا عباده..حياتي كلها لعب وشرب وحرام"فرش السجادة وستقبل القبلة ويلس يصلي..وطول ماهو يصلي ماوقف سيل الدموع من عينه ندم على مافرط وعلى كل شيء سواه في دنياه...

في بيت بوحمد..في الصالة كان يالس بوحمد وحمد يتابعوا الأخبار..نورة كانت يالسه وياهم..بس بعدين قررت تروح حجرتها بدل هالصمت إلي يسود الصالة..وطبعا هالشيء عادي..لأنه مبونه مافيه أي سوالف بين حمد وأبوه..وإن إجتمعوا يكون الصمت هو سيد الموقف..ويوم يت الساعة عشر..سمعوا صوت جرس الباب...
بوحمد هو مستغرب: منوه ياي في هالوقت
إلا يشوفوا سعود يدخل من الباب...والكل أستغرب..
سعود: السلام عليكم
حمد وبوحمد وهم يقوموا من مكانهم: وعليكم السلام والرحمه
سعود: شحالكم
بوحمد: بخير يعلك الخير
حمد: الحمد لله..بسم الله سعود شو ياك صاير جيه
سعود وهو يبتسم حق حمد: شوي تعبان
حمد وبوحمد: سلامات سلامات..
سعود: الله يسلمكم
بوحمد: حياك الله..قرب
سعود: لا قبل ماأيلس عندكم..أبى أيلس مع نورة
بوحمد: انزين ولدي يلس وبيسير حمد يزقرها لك
سعود: عمي إذا ماعندك مانع أقدر أيلس وياها بروحي
بوحمد: ليش
سعود: بس عندي شيء مهم أبى أخبرها عنه..ربع ساعة بس
بوحمد: وشو هالشيء الضروري إلي موب قادر يصبر لين باجر
سعود: بخبرك عنه..بس موب ألحين
بوحمد: انزين..حمد روح زقر أختك
راح حمد وزقر نورة من فوق..ويوم نزلت وشافته أستانست لأنها من يومين ماشافته وهي كانت تحاتيه وايد...
نورة: السلام عليكم
سعود وعليكم السلام..شحالج نواري
نورة: بخير دامك بخير
كان واقف عدال باب الصالة..فمسكها من أيدها وراحوا غرفة الأكل إلي عدال الصالة...
نورة وهي مستغربه: ليش ماتبانا نيلس وياهم
سعود: عندي كلام مهم لازم أخبرج عنه..وماأقدر أقوله ألحين جدام عمي
نورة وهي عاقده حياتها: خير إن شاء الله..شو هالشيء المهم
يلس سعود ويلست هي على الكرسي إلي مجابلنه...
سعود: نورة أنا اليوم ياي أعترف لج بشيء..ماأقدر أخبيه أكثر من جيه..وهالشيء مسبب لي ضيج
نورة: شو هو
سعود: والله ماأعرف جيه أخبرج عنه..بس أمري على الله..ويصير إلي يصير...سمعي نواري..أنت تعرفي زين إني أحبج..وقلت لج قبل أنا مستعد أسوي أي شيء في سبيل إنج تكوني من نصيبي..أعرف إنه أنانيه مني..بس والله غصباً عني...
نورة: شو هو إلي أنانيه وغصباً عني..شو السالفة بالضبط
سعود وهو يأخذ نفس: من كم يوم لاحظت عليه أعراض مرض..بعدين صرت شبه متأكد إن هالأعراض..هي نفسها أعراض مرض إلتهاب الكبد الوبائي..
يوم قال جيه شهقت وحطت أيدها على صدرها: شووو
سعود: صبري عليه شوي..قلت لج كنت شبه متأكد..ويوم سرت أنا وختيه المستشفى وسويت فحوصات الحمد لله طلعت مافيني شيء...
نورة: الحمد لله
سعود: المهم يوم كنت شاك إني مريض..وكان الموت جدام عيوني..تذكرت كل شيء سويته..وإلي سويته لج...
نورة عاقده حياتها ومستغربه من رمسته...
سعود يكمل كلامه: نورة بعترف لج بشيء..أعرف بعد ماتعرفيه يمكن تكرهيني..مابلومج..لأني أستاهل وزود..تعرفي سالفة الموبايل..إلي بسببه ضربج أبوج وغصبج عليه
نورة وهي أطالعه بنظرات إتهام: شبلاها سالفة التلفون&#33;&#33;&#33;
سعود وهو منزل رأسه: أنا كنت ورى هالمشكلة...
نورة: شووووووووو
سعود: أرجوج خليني أكمل رمستيه
نورة ماردت عليه
سعود: كانت خطت شيخوووه الله يهديها..هي حاولت وياي عسب تخطب لي وحده غيرج..بس أنا رأسي وألف سيف ما أخذ أي وحده غيرج..وطبعا شيخة ماترفض لي طلب..وقالت بتسوي المستحيل علشاني.."كان سعود يتكلم ونورة صاخه وهي منصدمه" المهم في يوم تنفيذ الخطه كنا متفقين إنه يوم أيي أبوج من المزرعة..تحاول هي تملى له رأسه من صوبج..عسب يشك فيج زياده..ويوم يروح حجرتج تسوي لي هي رنه..وأطرش الرساله إلي كانت سبب كل إلي صار..وهي طبعا مرات يوم تكوني أنت موب موجودة في حجرتج..ولا مثلا في الحمام تتسبحي..تروح هي وتسوي لي رنه من تلفونج...وبجيه تثبت التهمه فيج..وأنتي بما إنج توج بس تستخدمي الموبايل ماتعرفي له لين هناك...."وهنيه سكت سعود بسبب نظرات نورة"
نورة: معقوله يطلع منك كل هذا&#33;&#33;&#33;
سعود: والله غصباً عني
نورة: قصدك عسب ترضي غرورك وأنانيتك
سعود: إعتبريه أي شيء يانورة..بس أرجوج..إبعدي شيخة عن هالسالفة..أكيد لو عرف أبوج..ماأعرف شو بيسوي بها..وهي والله تحبه وتعزه وايد..أنا المسؤول الأول عن كل إلي صار..حتى لو تبي الطلاق بطلقج..بس علشان ترضي...
نورة وهي مصدومه من إلي قاله أخر شيء: ألحين تبى أطلقني..بعد شو..وعلشان أنفضح بين العرب...
سعود: المهم نورة أنا ألحين أطلب منج السموحه..أعرف إنج عمرج ماحبيتيني ولا بتحبيني....
نورة: بالعكس حبيتك..بس كأخ
سعود: أعرف..نورة وغلاة كل غالي عندج تسامحيني..وتسامحي ختيه على كل إلي سوته فيج..والله قلبها أبيض..
نورة وهي تنش من مكانها: يصير خير
سعود: وين؟؟&#33;&#33;
نورة وهي تمشي صوب الباب: بروح فوق..تصبح على خير..ومع السلامة
يلس سعود يطالعها..وهو حاس إنه أخر مرة يشوفها فيه

تمت نورة طول الليل وهي تتجلب في فراشها..موب قادرة ترقد..كله تفكر بالي صار..هي كانت من البداية شاكه إن ورى هالسالفة شيخة..بس أبداً ماشكت في سعود..يوم هو أعترف بكل شيء أنصدمت..طول هالأربعة أشهر من يوم إنملجوا..عرفته أكثر ورتاحت له وتعاطفت وياه وايد..كان يوم ييلس وياها يبين من نظراته من كلامه إنه يحبها..وعلشان جيه كانت نورة وايد تتعاطف وياه..لأنها موب قادرة تبادله هالشعور..أو حتى تحسسه إنها تحبه..كان سعود في نظرها أخ كبير..بس هالأخ الكبير كان عكس أخوها حمد..الإنسان الهادي الملتزم..كان سعود عكسه تماماً..شاب متهور ومغامر..لدرجة إن سعود يخبرها مرات عن صولاته وجولاته في أيام المراهقة وحتى بعد ماكبر..
نورة في هاللحظه موب عارفه كيف تتصرف..وبعد تفكير عميق..عذرة سعود على كل إلي سواه..صحيح أذاها بفعلته..بس تعرف إن ورى هالتصرف حبه العميق لها..
الساعة 8 الصبح..نشت نورة على صوت دق الباب.."ياربي منوه هذا إلي يدق الباب من صباحيه الله خير"
نورة: منووووه
حمد: أنا فتحي الباب
نورة وهي تقوم من فوق الشبريه: انزين صبر شوي "تمط أيديها..وموب قادره تفج عيونها بسبب سهر أمس"
أول مافتحت الباب شافت أخوها حمد وهو لابس..بيسير بوظبي..
نورة: خير شو فيه
حمد: خير...بس تعالي نواري"وهو يمسك أيدها ويرها داخل الحجرة" أبى أرمسج بشيء مهم..
ستغربة من تصرف أخوها..ويوم يلسوا على أطراف الشبريه...
حمد وهو منزل رأسه: نواري أنا ألحين ساير بوظبي..وقبل لا أسير يت أعتذر لج..لأني شكيت فيج..وصدقت كل إلي نقال عنج..
نورة: شو سعود خبركم
حمد: هيه خبرنا
نورة: أمس&#33;
حمد: لا .. النذل شرد..ماقدر أيواجهنا..أتصل بأبوي وخبره بكل شيء
نورة وهي عاقده حياتها: جيه يعني شرد
حمد: بعد ماظهر عنج..يانا الميلس..وسلم علينا وستأذن يبى يروح..حتى نحن أستغربنا منه..قلناله أيلس سهر ويانا..بس ماطاع..وسار..وبعد ساعة أتصل بأبوي وخبره عن كل شيء..طبعا أبوي عصب عليه وايد..ألحين الله أعلم شو بيصير..حتى أنا اليوم عندي شغل بس تأخرت وايد عليه..يمكن بعد الدوام برد العين..
نورة ماردت عليه..فسلم عليها وظهر من عندها بيسير بوظبي..وتمت هي في حجرتها تفكر بكل إلي صار..في هاللحظه بالذات حست بوحده فظيعه..لا أخت تشكي لها همومها ولا أم توقف وياها في مثل هالظروف..تذكرت شيء وراحت بسرعة صوب الكبت مالها وفتحته..في درج تحت كانت تحتفظ بأشياء جديمة وايد..ومن بين هالأشياء صورة حرمة كانت نسخة ثانية من نورة..وشلتها وراحت ويلست على شبريتها ويلست أطالعها وترمسها" ليش خليتيني بروحي يالغالية..أنا من يوم عمري 5 سنين وأنا محرومه منج..ليش يامايه..حق منوه أنا ألحين عايشه كلا لاهي بحياته وأنا بروحي.."كانت دموعها مثل المطر" .... طول السنوات إلي طافن ونورة راضيه بحياتها رغم قسوتها..إلا شيء واحد..وهو فقدانها لأمها..كانت تحس بحرمان وحزن فظيعين يوم تشوف أمهات ربيعاتها..وتتمنى تكون مكانهن..
في هاليوم تمت نورة في حجرتها ماظهرت منها ولا شافت حد..إلا في المسا الساعة 8 ونص سمعت حد يدق بابها..
نورة: منوه
حمد: أنا حمد فجي الباب نواري
نورة: شو تبى
حمد: أبى أرمسج في شيء ضروري..فجي
نورة وهي تنش من فوق شبريتها: أنزين
فتحت له الباب وعرفت على طول إنه متضايج من شكله ...
نورة: شو فيك
حمد: تعالي أيلسي وبخبرج بالي صار..
يلست نورة عداله..وخبرها إنه سعود طلقها..هو كانت متوقع ردت فعل أكثر من جيه..بس نورة فاجأته بكل معنىالكلمة لأنها يلست أطالعه بس من دون مايظهر عليها أي شيء..وكأن الأمر مايعنيها هي..
حمد: نواري حبيبتي تراني قلت لج سعود النذل طلقج..شو فيج
نورة بوجه مافيه أي تعبير: ولا شيء
حمد وهو مستغرب أكثر وأكثر من ردت فعلها هذي.....
تمت نورة أطالعه بنظرات كلها أتهام...
هنيه حس حمد بالذنب إنه وافق من الأساس على سعود..ماعرف ليش هذاك اليوم ماقدر يعارض ويوقف بويه أبوه..ووافق بكل بساطه..مع إنه يعرف سعود زين..واحد لعاب..يبدل في الحريم شرات مايبدل ثيابه..
مرت أيام ونورة ماتظهر من حجرتها..بعد ما وصلها خبر طلاقها..صح هي عمرها ماحبت سعود إلا كأخ..بس بعد كل إلي مرت فيه..خلاها تشعر بكأبه فضيعه..ويتها خوله أكثر من مرة وحاولت تخفف عنها...
وفي نفس الوقت كان بوحمد متضيج وتعبان بعد ماوصله خبر طلاق بنته..وقال وين بودي ويهي ألحين من الناس..بنتي تطلق جيه..يافضيحتنا بين العرب..بوحمد صدج عصب وايد من سعود على إلي سواه..بس أبد ماكان يبى توصل المسئلة لدرجة الطلاق..وهو حاول يحل المشكلة..وراح يدور سعود..بس سعود للأسف أختفى..لازم يختفى بعد سواد ويهه...
سعود في هاللحظه كان في دبي..عند واحد من خواله..وهذا إن دل على شيء فهو يدل على ضعف شخصيته..وإنه إنسان جبان..من أستوت المشكلة قرر إنه ينسحب..أبد ماحاول يحل المشكلة..حتى إتصالات أخته إلي ماوقفت مارد عليه..قرر ييلس في دبي جم أسبوع لحد ماتهدى الأمور..بعدين يرجع لحياته الطبيعية من دون نورة..رغم حبه الكبير لها..
أما شيخة إلي عايشه بين نارين..نار أخوها إلي ماتعرفه وين..ونار ريلها إلي مارمسها من جم يوم..وهي رغم كل إلي تسويه تحبه..وكل خوفها بإنه يعرف بالي سوته..وإنها هي ورى كل إلي صار..بس إلي أستغربته سعود قبل مايختفي خبرها بإنه خبر نورة بكل شيء..والغريبة إنها لحد ألحين ماخبرت أبوها أي شيء.."معقوله بعد إلي سويته فيها ماتخبر عني..وأنا طول هالسنين أعذب فيها..وعمري ماعملتها زين شرات الناس..كله مزاعج وضرب..معقوله تسامحني على كل هذا" شيخة في بالها...
مر شهرين ونص على طلاق نورة..رجعت الأوضاع على ماكان عليه..رغم حزن بوحمد على بنته الوحيده..وعلى كل إلي صار لها بسببه..بس مع هذا ردت علاقتهم شرات أول وأحسن بعد..ونورة قلبها أبيض مايشل على حد..وهي تباها من الله ترجع علاقتها ويا أبوها على ماكانت عليه..وقرر بوحمد يطنش كلام الناس..لأنه ماوراه إلا عوار الرأس..ولاحظ شيء ثاني بعد..وهو إن شيخة تغيرت وايد..لاحظ إنها في البداية تتفادى تجابل نورة..قال بوحمد أكيد مستحيه منها بسبت إلي سواه أخوها..وبعدين صارت تسئل عن أحوالها وتهتم بها وايد..نورة طبعا كانت عارفه السبب..بس مستحيل تخبر أبوها لأي سبب من الأسباب..خولة طبعا تزور نورة بإستمرار..وأمها دايماً تسئلها ليش نورة أطلقة..وترد عليها بإنه سعود موب زين..وعرف بوحمد عنه شيء..فطلب منه يطلق نورة..
مرة نورة كانت يالسه في الصالة ويا أخوها حمد يتابعوا مباراة...فتذكرت شيء ونشت من مكانها وراحت صوب التلفون...
حمد: بمنوه بتتصلي ألحين
نورة: ربيعتيه
حمد: بسم الله الرحمن الرحيم..منوه يتصل بالعرب نص الليل
نورة: شو نص الليل بعدها 11
حمد: انزين 11 شوي..ردي السماعه مكانها أحسن لج
نورة: انزين ربيعتيه أعرفها ماترقد بوقت..وأنا من زمان مارمستها بسبتكم..
يوم قالت جيه..سكت حمد وماقدر يمنعها..وأتصلت بموزة..رن التلفون فترة بعدين من حظها ردت عليها موزة..
موزة: ألو
نورة: السلام عليكم
موزة وهي مستانسه لأنها عرفت منوه: وعليكم السلام والرحمه.. ياحي الصوت وصاحبته..
نورة: الله يحيج الغالية
موزة: شحالج حبيبتي..وين مانسمع هالصوت..والله تولهت عليج وايد غناتي
نورة: يسرج حالي..وأنا أكثر والله..شحالج أنت وشعلومج
موزة: بخير يعلج الخير..عايشين في هالدنيا
نورة: ها بعدج ماشتغلتي
موزة: لا..بعدني عاله على المجتمع
نورة: ههههه شراتي يعني
موزة: شو شراتج الله يهديج..حمدي ربج إنج تدرسي..موب أنا يحليلي خلصت..وألحينه بكمل السنة الثانية وأنا في البيت بطاليه..
يوم سمعت نورة سيرة الدراسه تضايجة: ماعليه الغالية..كل تأخيرة وراها خيره..
موزة: إلا أقول نواري
نورة: قولي
موزة: إلي أعرفه إنه ماباجي شيء عن عرسج..إلا كماً يوم..ها شو المعنويات
أتضايجة نورة: ماشيء عرس
موزة موب فاهمه: شوو قلتي
نورة: مابعرس
موزة: جيه يعني
ماردت عليها نورة..لأنها ماعرفت شو تقول..
موزة وهي عاقده حياتها: انزين غناتي هب مشكلة..باجر نحن أصلا بنيي العين..ولازم أشوفج..ولاتتحجج بأي شيء..وين بشوفج
نورة: أوكى...ممممم شرايج بحديقة زاخر لأنها عدال بيتنا
موزة: زين..أتفقنا
نورة: أوكى..أشوفج باجر
بعد مابندت عن موزة راحت ويلست عدال أخوها..
حمد ألتفت صوبها: منوه من ربعاتج هذي؟
نورة: ليش تسئل
حمد وهو يبتسم: بس فضول
نورة: أخت ربيعك
حمد عقد حياته يفكر: اها أخت خليفة
نورة: هيه هو
حمد: جني سمعت إنهم بيوا العين..صح
نورة: هيه باجر..

حمد: غريبه خليفة ماخبرني إنه بيي..بس بعد زين علشان نسير مع الشباب من زمان ماتيمعنا..
......
في اليوم الثاني..بعد ماتجهزة نورة علشان تسير الحديقة وكانت نازله من فوق..شافها أبوها...
بوحمد: على وين
نورة: بروح الحديقة
بوحمد: أي حديقة
نورة: زاخر
بوحمد: منوه بيروح وياج
نورة: بروح أشوف ربيعتيه
بوحمد: وهو عاقد حياته: نواري حبيبتي خفي شوي من الطلعات..تراه مافينا على رمسة الناس..
نورة: بس أنا يابويه ماأظهر أبد من البيت..اللهم اليوم بس بروح أشوف ربيعتيه من زمان ماشفتها..
بوحمد: انزين..بس لاتبطين وايد
نورة: إن شاء الله..شيء في خاطرك
بوحمد: سلامتج
نورة: عيل يالله فمان الله
بوحمد: ربي يحفظج
...
في حديقة زاخر..كانت نورة يالسه ويا موزة...
موزة: معقوله نواري يصير فيج كل هذا ولا تخبريني..وأنا إلي أعتبرج حسبة أختي..
نورة: والله يالغالية تمنيتج تكوني وياي..عاد أنا لا أم تحتضني وتواسيني..ولا أخت أبث لها همومي..
موزة وعيونها مليانه دموع: فديت روحج..ليتني ساكنه العين..ولا ماخليتج بروحج..
نورة وهي تحط أيدها على أيد موزة: أعرف والله..أنت مابتقصري يالغالية..المهم ألحين عرفتي كل شيء..
موزة: بعد شو..بس الحمد لله..فتكيتي منه
نورة: ماأقدر أقول ألحين غير الله يهديه ويوفقه
موزة: بعد كل إلي سوابج
نورة: هيه...صح هو فيه أنانيه..بس والله طيب
موزة: خلينا منه ألحين..وشخبارج بعد
....

يوم ردت موزة البيت كانت مستانسه بإن نورة أطلقت..صح زعلت عليها من الخاطر على كل إلي صار لها..بس في نفس الوقت أستانست لأنه ألحين فرصة أخوها خليفة..إلي حاله إنجلب من يوم ماعرف خبر ملجتها..بس عاد كيف توصل له هالخبر وبأي طريقة..
أول مادشت البيت شافتها أمها...
أم خليفة: ها موزان رديتي..شحال نورة عساها بخير وعافية
موزة: الحمد لله .. بخير يسرج حالها..وتسلم عليج
أم خليفة: يحليلها من زمان ماشفتها..وأخوها ألحين مايبها بوظبي
موزة وهي تغمز حق أمها: يمكن بعدين بتملي منها
أم خليفة وهي عاقده حياتها ومستغربه من رمسة بنتها: جيه يعني
موزة: ولا شيء فديت روحج..بسير حجرتيه
أم خليفة: وين سايره..تعالي هنيه أبى أرمسج في موضوع
موزة: خير أمايه شو فيه
أم خليفة وهي تبتسم حق بنتها: خير فديت روحج..عاد أنتي حبيبتي ألحين موب صغيره..حرمه وألف من يتمناها..
موزة وهي رافعه حاجب واحد: مممممممم جني عرفت السالفة..
أم خليفة: ههههههه زين..قصرتي عليه الدوب
موزة: منوه عاد هالمرة
أم خليفة: لا عاد هالمرة ماينرفض..
موزة: انزين منوووووه
أم خليفة: اليوم عمتج فطيم يت..وطلبتج حق ولدها ذياب
يوم سمعت موزة أسم ذياب صار ويها أحمر شرات الطماطم..
أم خليفة: فديت أنا إلي يستحون...ها شو نرد عليهم
موزة وهي منزله رأسها: الشور شورج أنت وأخويه خليفة..وإلي تقولوه أنا راضتبه...
أم خليفة: ههههههه من متى الشور شورنا..وإلي قبل طلبوج قلبتي الدنيا واحتشرتي...
موزة وهي مستحيه: بس عاد هذا ولد عموتي فطيم..
أم خليفة: انزين وإلي قبله..موب ولاد عمامج
موزة: حتى لو..هذا غير
أم خليفة وهي تبتسم: أونه غير...المهم مايصير إلا إلي تبيه..ويوم يرد أخوج من برع برمسه..
موزة: انزين الغالية أنا بسير حجرتيه..تصبحي على خير
أم خليفة: وين تصبحي على خير...جيه ماتبي عشى
موزة: لا مابى
وهي رايحه حجرتها تفكر"يالله شو هالأخبار الحلووه إلي تيي مرة وحده..وأخيراً الله بيجمعني ويا ذياب" كانت موزة تحب ولد عمتها ذياب..نقدر نقول حب صامت....
وبعد تفكير طويل..قررت موزة إنها تيب سيرة نورة على الريوق في اليوم الثاني..وكأنها تخبر أمها..وفي نفس الوقت تخبر خليفة بطريقة غير مباشره....
في اليوم الثاني نزلت موزة تحت ولقت أمها وأخوها خليفة يالسين يتريقوا..وفيصل طبعا كالعادة ينش متأخر..بعد ماسلمت عليهم وحبت أمها على رأسها يلست تتريق وياهم...وقررت تفتح سالفة نورة..
موزة: إلا صح أمايه ...والله أمس نواري كسرت خاطري
أم خليفة: ليش
موزة: موب هالشهر المفروض يكون عرسها..
كانت خليفة هادي..صح هو الصبح يكون مزاجه موب لين هناك..وشويه مسطل لأنه متأخر في النوم أمس..بس يوم سمع أسم نورة فج عيونه على الأخر..ويلس مركز على رمسة موزة إلي لاحظت هالشيء..
أم خليفة: هيه..جيه شو صار
موزة: طلع هالريال إلي كان بيأخذها ماينفع..وطلقها
هنيه بانت الصدمه على خليفة بكل وضوح..لأنه ماقدر يخبي أكثر من جيه..وكان في أيده كوب حليب..وأول ماسمع خبر طلاق نورة أهتزت أيده وجب شوي من الحليب..طبعا أمه مالحظت هالشيء..لأنها هي بعد صدمها الخبر..
أم خليفة: فديتها وهي شخبارها ألحين
موزة: الحمد لله..أهم شيء أفتكت منه..وبعدين هي أصلا كانت ماتباه..
أم خليفة: الحمد لله إنها أفتكت منه..قبل مايفوت الفوت
موزة وهي يالسه أطالع أخوها: هيه والله أفتكت
في هاللحظه كل التعب إلي كان في خليفة طار مع هالخبر إلي ماتوقعه أبداً..صح الخبر صدمه..بس أعتبره أحلى صدمه في حياته..معقولة ألحين في أمل إنه نورة تكون من نصيبه..بعده تأثير الخبر عليه..خلاه في ذهول..لدرجة إنه أمه يالسه ترمسه وهو مايسمعها...
أم خليفة: خليفة
أخيراً أنتبه: ها..شو
أم خليفة: فديت روحك شو فيك حبيبي
خليفة: ولا شيء
أم خليفة: شو ولاشيء وأنا أرمسك من ساعة وأنت بالك في مكان ثاني
نش خليفة من مكانه وعلى ويهه أبتسامه حتى أمه أستغربت لأنها من فترة ماشافته يبتسم جيه..وراح صوبها..
وهو يحبها على رأسها: مافيني شيء الغالية..بس تذكرت سالفة وخلتني أسرح شوي
أم خليفة: شو هي
خليفة وهو عدال الباب يبى يظهر: بعدين بتعرفيها..ألحين أنا بظهر..حتى يمكن مابتغدى هنيه..المهم العصر تكونوا زاهبين علشان نروح بوظبي..
أم خليفة وهي عاقده حياتها: إن شاء الله
كانت موزة طول هالوقت ساكته وعلى ويها إبتسامه..
أم خليفة تلتفت صوب بنتها: شو فيه أخوج؟
موزة: علمي علمج
.....
بعد ماظهر خليفة من البيت بيطير من الوناسه..كان بيسير عند حمد..بعدين قال في نفسه..وين أسير ألحين من صباحية الله خير..أكيد حمد بعده راقد..فقرر يروح يتمشى صوب جبل حفيت بما إنه جريب..في هالوقت بالذات يكون فاضي من الناس ومافيه زحمه..
راح أول فوق الجبل..ونزل وتم يفكر"معقوله كانوا بيوزوج بالغصب..أكيد تلعوزتي وايد..بس نفسي أعرف حمد شو فايدته..ومعقولة يوافق على هالشيء..الحمد لله رب العالمين إنه ماتمت هالزواجه..ألحين عندي أمل تكون غناتي نورة من نصيبي..فديت روحها أنا..بعوضها عن كل لحظة ضيج مرت عليها" كان من برودت الجو وحلاوته في هالوقت المبكر من الصبح..قرر ينزل تحت صوب المبزره..ويتسبح في الماي الحار..كانت نفسيته منشرحه على الأخر..وهدو المكان يزيده جمال وجاذبية وتحسس أي شخص بالراحه...
....
بعد مارد خليفة وأهله بوظبي..قرر إنه خلال هالأسبوع يرمس حمد بالموضوع..ومثل ماقال خير البر عاجله..لأنه مابيقدر يتحمل يفقدها مرة ثانية..ونورة طبعا مالها عده من هالطلاق شرعاً..وفعلاً يوم الأثنين في مكتب حمد خبره..وطبعا حمد أستانس من الخاطر لأنه يعتبر خليفة في مقام الأخو وأكثر..بس طبعا مابين له..وقال له يصبر شوي لين مايروح العين ويخبر الأهل ويشوف رأيهم..حمد كان واثق إنه أبوه بيوافق..بس نورة محد يدريبها..ويمكن تكون التجربة الأوليه أثرت عليها..
أول مارد حمد شقته أتصل بأبوه وخبره إنه ربيعه خليفة يبى يخطب نورة..أبوه وافق طبعا مثل ماكان حمد متوقع لأنه بوحمد يعرف خليفة زين..بس هو رفض يرمس نورة في هالسالفة..وقال إنه بيترياه لين مايي من بوظبي ويرمس أخته بروحه عسب يقنعها..
نورة كانت يالسه في حجرتها ومنسدحه فوق الشبريه تقرأ ديوان الشاعر سالم الجمري..عاد هي تموت بشعره..سمعت دقات خفيفة على الباب..
نورة: منوه
حمد: أنا
نورة: صبر شوي..." نشت من فوق شبريتها وراحت تفتح الباب حق أخوها..وأول مافتحت الباب شافته وعلى ويهه إبتسامه"
حمد: السلام عليكم
نورة: وعليكم السلام والرحمه..شحالك
حمد: بخير يعلج الخير.."وهو يدش الحجرة ويروح ييلس على طرف الشبريه" وشحالج أنت
نورة تبند الباب: الحمد لله عايشين في هالدنيا
حمد: تعالي فديتج يلسي عدالي..أبى أرمسج شوي.."سارت صوبه ويلست عداله"
حمد: سمعي نواري..نحن صح خطينا في حقج..ووالله أنا متلوم فيج وندمان إني في يوم وافقت على المهزله إلي صارت..بس غناتي كل الناس تخطأ وتصحح خطأها..وهالي صار كانت تجربة بالنسبة لج..أعرف إنها أثرت عليج..بس أنا أعرفج زين..قوية تقدري تتخطي كل هذا.."وقف عن الكلام وخذ نفس"
نورة وهي رافعه حياتها بطريقة شك: ماأعرف ليش أنا حاسه إنه ورى هالكلام كله شيء مابيعيبني
حمد: لا إن شاء الله بيعيبج..وأنا مابطول عليج..السالفة ومافيها إنه في معرس يديد
نورة وهي منصدمه: شووووووووووو
حمد وهو أيودها من أيدها: هدي شوي حبيبتي..أعرف إنج بتتضايجي من هالشيء..بس نحن غناتي ندور مصلحتج..والريال مايعيبه شيء..وأنا أعرفه شخصياً..
هنيه قاطعته نورة: بس أنا ماأفكر في الزواج ألحين..كافي إلي أستوى مع سعود..دخيلك حمد ماأبى أتزوج..
حمد وهو يبتسم حق أخته يحاول يخفف التوتر: أنزين أنت فكري في الموضوع..لا تتسرعي..وبعدين أنت ماعرفتي منوه إلي خاطبنج
نورة: مايهمني منوه..المهم إني ماأبى
حمد: أنزين أنا بقول لج منوه..وفكرين في الموضوع زين علشان خاطري
نورة: انزين..منوه
حمد: خليفة الكعبي أخو ربيعتج..
يلست نورة أطالعه: أخو موزة إلي من بوظبي..ربيعك
حمد: هيه.. فكري زين..واستخيري ربج..وإن شاء الله تحسني الإختيار
بعد ماظهر حمد عنها تمت تفكر في خليفة..هي تتذكره زين..تذكرت سالفة الميلس يوم دشت عليه وكان حاط ريل على ريل..وبعد ماشردت حجرتها..وتمت تفكر فيه..عن الوسامه ماشاء الله عليه..لو شافته غبيشة إلي مايهمها الشباب ولا تعطيهم ويه كانت بتتخبل عليه من وسامته..طويل وايد عريض..فيه لحيه خفيفة..بس أكثر شيء تتذكره فيه شواربه..يومها قالت ليش هذا مسوي جيه بشواربه..تقول سفاح..بس مع هذا وسيم.."أما عن الأخلاق فأكيد هو ربيع حمد ويعرفه زين..لو فيه شيء هب زين..مستحيل يوافق بس لأنه ربيعه..لأني مهما يكون أنا أخته..أنا الأهم" كانت يالسه تقول في بالها"وبعدين هو أخو موزة..وشو أحسن من إني أسكن ويا موزة في نفس البيت ويا أمه إلي حبيتها من كل قلبي"...تمت نورة طول هذيج الليل تفكر بالموضوع..وهي حيرانه توافق ولا لاء..تبى توافق وفي نفس الوقت تخاف تندم على هالقرار..وقبل لا ترقد صلت ركعتين أستخاره ودعت في صلاتها" اللهم إني أستخيرك بعلمك، وأستقدرك بقدرتك، وأسألك من فضلك العظيم، فإنك تقدر ولا أقدر، وتعلم، ولا أعلم، وأنت علام الغيوب، اللهم إن كنت تعلم أن هذا الزواج خير لي في ديني ومعاشي وعاقبة أمري، فاقدره لي ويسره لي ثم بارك لي فيه، وإن كنت تعلم أن هذا الأمر شر لي في ديني ومعاشي وعاقبة أمري فاصرفه عني واصرفني عنه واقدر لي الخير حيث كان ثم أرضني به"..ورقدت بعد تفكير طويل..
في اليوم الثاني الظهر كانوا بوحمد وحرمته شيخة وحمد ونورة يالسين يتغدوا..وهدو محد يتكلم..فجأه ومن دون مقدمات..
نورة: أنا موافقه
الكل يلس يطالعها ومستغرب..
شيخة: على شو موافقه..بسم الله عليج
نورة: على الزواج
شيخة: شووووو..يواز منوه "بعدها محد خبرها عن شيء"
كان حمد وأبوه يبتسموا..مستانسين إنه نورة وافقت...
بوحمد: خليفة الكعبي ربيع حمد يمكن تعرفيه
شيخة: هيه أعرفه..شو فيه
بوحمد: تقدم حق نورة..ونحن بنقرب به
شيخة وهي أطالع نورة..وويها خالي من التعبير: مبروك..والله يوفقج
نورة: الله يبارك في عمرج..
شيخة من يوم سالفة أخوها وهي متغيره معاملتها ويا نورة..وأخوها أتصل فيها أكثر من مرة وطمنها إنه مع خواله وإنه بخير ومستانس عندهم وايد..
مرت الأيام ونخطبت نورة حق خليفة..وفي الإجازة الصيفية 12/7 كان موعد العرس يعني بعد 5 شهور من الخطبة..وكان ملجة في نفس الوقت..كانت موزة هي حلقة الوصل الوحيدة بين خليفة ونورة..لأنها بعدها ماصارت حرمته..وفي يوم العرس كانت أحلى ليلة مرت على نورة..صح افتقدت الأم إلي بتوقف معها في هاللحظه..بس شيخة رغم كل إلي مضى ماقصرت وياها وعاملتها بكل حنان وحب..وساعدتها في فترت التجهيزات..ونصحتها في ليلة عرسها..ومنوه بيكون في هالليلة يساوي سعادة نورة أو يمكن يكون أكثر منها بدرجات..طبعا خليفة..إلي أخيراً تحقق حلمه..ونال مراده بزواجه من غناته وحبه نورة..وبما إنه شاعر..كتب قصيدة في حبيبته نورة..وسجلها بصوته مع موسيقى كلاسيكيه..وحطوها يوم دخلت نورة الخيمه بفستان العرس الأبيض..كانت آيه في الجمال ذيج الليله..

شهر فبراير كان الجو بارد شوي في العين.. في منطقة زاخر بيت خليفة بالتحديد..جدام البيت خيمه كبيرة وبعيد شوي عن البيت خيمة ثانية عدالها عياله وشباب يرزفوا ويولوا..في هاليوم عرس موزة أخت خليفة والكل مستانس..وزحمة المعازيم والحشرة..
في حجرة خليفة كانت نورة واقفه جدام المنظره أطالع نفسها ولاويه بوزها بحركة إشمئزاز..في هاللحظه دش خليفة عليها الحجرة..ويلس يطالعها ويتأملها لحظات بعدين أقترب منها..
خليفة وهو يضحك: فديت أنا الحلوين..شو يالسه أطالعي عمرج..والناس كلهم تحت
نورة وهي مبوزه وماسكه فستانها من الخصر: طالع طالع..بالله عليك هذا فستان ينلبس حق عرس
خليفة مبتسم: يحليله الفستان شو فيه
نورة: وايد واسع
خليفة: هههههههه واسع ولا قصدج أنت إلي دبدوبه
نورة: خليفة حرام عليك..تراني بصيح صدج..شو دبدوبه لا تقهرني أكثر من جيه
خليفة: هههه فديت الدبدوبين أنا
نورة ويها صاير أحمر من المستحى: خليفه بس عاد
خليفة: ياويل حالي أنا
نورة: والله صدج..أنا متأكدة إني بكون أخسف وحده في العرس
خليفة: ليش عاد..حياتي كل الحريم يحملن..وبصراحة في حياتي كلها ماشفت حامل بحلاتج...هو صح صايره دبدوبه وايد ههههههههه بس والله حلووه..حتى سيري عند موزة وسئليها..
نورة: آوهو موزان ألحين أكيد مالت الصالون بعدها ماخلصتها..
خليفة: والله أنتن الحريم موب قانعات بشيء..عيل الوحده بهالحلاه "وهو زاخ خد نورة" شو هالأحمر والأخضر والخرابيط...
نورة: خليفة شو ها تراك تعورني..أنا نفسي أعرف ليش دايما تزخني جيه من خدودي..
خليفة: هههههههههههههههه معقولة ما تتذكرين
نورة: شو إلي موب متذكرتنه
خليفة: أنا الله يسلمج..يوم كنتي ياهل..أنا طبعا أكبر عنج بكم سنة..وكنتي دبدوبه وايد..
قاطعته: ومن وين تعرفني يوم أنا ياهل..
خليفة: أعرفج عز المعرفه..أصلا كنت ربيعتيه..وأنا كنت دوم أزخج جيه من خدودج..وأنتي أتمي تصيحي..
نورة وهي عاقدة حياتها:أنت ألحين من صجك ولا تضحك عليه
خليفة: ههههههه والله ماأضحك عليج..حتى تخبري بوشهاب بيخبرج
نورة: غريبه حمد ماقد خبرني عن هالسالفة.."وهي تبتسم" يعني أنت تعرفني من يوم أنا بعدني ياهل..والله إنك من هذاج اليوم وأنت حاط عيونك عليه
خليفة: ههههههههه منوه أنا..حشى..كنتي وايد دبدوبه شرات كرة البولنج
نورة وهي حاطه أيدها على خصرها: نعم نعم..شو ها بعد كرة البولنج..أنا ماكنت وايد دبدوبه..أنزين
خليفة: أنزين بوج كليتيني
ماردت عليه مسويه عمرها زعلانه..
خليفة: فديت أنا إلي يزعلون والله..خلاص فديت روحج..ولا تزعلي كنتي غزال
ياحبيبه تعالي...واشرحي هم بالي
ما عليه ملامه...في ودادك تعالي
انتي اللي احبه...انتي كل المحبه
من يلاقي محبه...له تطيب الليالي
القمر زان نوره...عندي الزين نوره
طاب قلبي سروره...دام نوره اقبالي
بعد ماعد عليها هالأبيات أبتسمت له..ويودها من أيدها ونزلوا تحت عند المعازيم...


النهاية


ان شاء الله تعيبكم القصه</font>