السلام عليكم ورحمة الله وبركاته
في تاريخ 25/09/2010 سافرت لإيرلندا عن طريج مطار ابوظبي الدولي لانه طيران
الامارات للاسف ما عندهم رحلة مباشره
الرحلة خذت سبع ساعات ونص تقريبا :d010: اصيح عشان طول المده وكنت مريضه بعد. لكن البلاد تستاهل العنوه
تقع ايرلندا في شمال جنوب القاره الاوروبية وتحديدا جنوب بريطانيا. كانت مستعمره بريطانيه وبعد التحرير ظلت شمال ايرلندا تابعه لبريطانيا
شعب ايرلندا مختلف تماما عن البريطانيين. ناس في قمة الذوق وحبوبين وايد :2:
بالنسبة لدرجة الحراره اول ما وصلنا كانت تقريبا في حدود 15 لين 17
و في اخر اكتوبر وصلت 10 في النهار وفي الليل وصلت 7
تمينا هناك لمدة شهر بالضبط :fa34: في مدينة دبلن
سكنا في فندق ميريون (خمس نجوم) وهو من الفنادق العريقه عندهم وتم بناه في
1769
ادمنت على اكل الاسكريم في الفندق. ذكرني بالاسكريم مال اول
لكن للاسف الهوت شوكولا عندهم مب دوم مضبوط بس عموما لاباس فيه
وطبعا عندهم الكب كيك لذيييذ
قريب من الفندق حديقة ستيفن جرين (Stephen's Green Park) وهي كذلك قديمه اتبرع بارضها واحد من اثرياء ايرلندا. الحديقه موجوده من سنة 1664. هاديه وحلوه وروعه خاصه في الجو البارد
هجوم عالاكل
----------
عيبني وايد شارع للتسوق اسمه كرافتون، الشارع حي وايد، عالم سايره يايه وهذا مدخل الشارع
وفيه ناس من اهل الفن
وفيه مركز مشهور اسمه براون توماس، فيه الماركات العالميه وقسم العطور والمجوهرات وقسم للبيت. وايد عيبني المركز :a049:
الشارع فيه الكوفي شوبس طبعا ومن بينهم كوفي شوب اسمه بيولي وشكله معروف لانه مذكور في قصه اقراها هاي الايام وبعد دومه زحمه رغم انه دورين ومكان وسيع.
فيه محل للصناعات المحليه اسمه افوكا. عندهم اكثر من فرع. فيه كتب طبخ، صابون، عطور، ادوات مطبخ، بذور وادوات للحدايق
واكلهم لذيييييييييذ
----------
زرنا متحف الشمع عيبني مع انه مب كبير وايد. فيه شخصيات سياسيه وسينمائيه وكارتونيه بعد
في دبلن توجد ثلاث متاحف غير الشمع. متحف الرسم، متحف التاريخ الطبيعي ومتحف الاثار. ماصار لنا نصيب انزور المتحف الاخير ومتحف الرسم ممنوع التصوير فيه. هاذيل صورتين من وايد صور خذيناهم من متحف التاريخ الطبيعي
----------
حديقة الحيوانات عندهم وايد كبيره وفيها طبيعه حلوه. اليوم اللي سرناه كان الجو وايد بارد طبعا ابرد عن المدينه لان الحديقه في منطقه مفتوحه.
كنت خايفه من الاخ في الصوره اللي تحت وبالزور وقفت اصور عداله
----------
سرنا منطقه اسمها مالاهايد يسكن فيها الاغنياء وحد من السفراء. مثل ما قلت الجو روعه في دبلن لكن الاروع وسبحان الله الغيم كانه رسم وقريب والسما عندهم صافيه وزرقا بمعنى الكلمه.
----------
مره خذنا باص مال السياحه ويلسنا فوق وطبعا الباص مكشوف. ايدي اتيبست من البرد لكن مابغيت انزل تحت عشان احب اشوف المنطقه بوضوح. الجوله طبعا كانت في دبلن وخذت ساعه بعشرين يورو للشخص.
----------
حضرنا مسرحية روميو وجوليت بالصوره الحديثه وكانت مسرحيه تمثيليه صامته
----------
وهاذي ركشة دبلن :10:
----------
مرينا على منتجع ماكردين وهو يبعد عن دبلن حوالي ساعه. المنطقه وايد حلوه محاطه بمزارع
----------
بالنسبه للمطاعم، كلنا في مطعم هندي، لبناني ومغربي. احلى اكل ذقته المغربي ولين اليوم خاطري فيه :ohboy:
واحلى حريره
-------
في النهايه ان شا الله التقرير عيبكم، ادري انه مختصر وايد وحتى الصور مب معروضه بالصوره المطلوبه بس السموحه. واغلب الصور نحنا فيها فما قدرت احطهن. وهذا احلى غروب شفته في حياتي على نهر ليفي في دبلن
