مادري بـ شو اوصف الحاله ..

بسم الله الرحمن الرحيم ،
السلام عليكم ورحمة الله وبركاته ..

,

بالسابق ، كنت دائما أتحدث عن جانب الرحمه من ربي / الرحمن ،
وكلما ننخرط بأحاديث وغيره متعلقه بالدين ، كنت دائما أميل لهذا الجانب ..

عفوه ومغفرته ، قربه ، حتى بانتقائي للأمور اللي اقراها ،
كان الغالب عليها هذا الجانب ، وحتى بي وبتفكيري !

,

مادري كيف أوصفها ، هي شغله المفروض نستشعر ابها بالدنيا ،
بس من فتره قامت مفاهيمي تتخربط ، وقمت أحس ابـ شغلات ماكانت بهذا الشكل ..

مادري هل بسبب قراءتي لبعض الأمور ، ولا كيف بالضبط ،
بس حاليا صايره العكس بشكل أبد ما أحبه ..

أميل لـ جانب التخويف لكن بطريقة غريبه ، وكيف إن امرأة دخلت النار بـ هرة !
شلون الموت إيينا فجأة ، وكيف إن كل اللي بالدنيا ولا شي ..

,

صايره غريبه بكل شي ، موحابه الدنيا ، والكثير من افكارت صرت اشوفها بشكل ثاني ،
ماقول إن غلط الواحد يفكر بكل هذا ، بالعكس ، بس أحسني أتعامل مع كل هالأمور بطريقة غير صحيحه ..

مو عارفه كيف أوصف حالتي ، أبجي وايد ، أضيج وايد ، حتى الاشيا اللي كنت اهتم لها ، صرت أخاف منها ،
كله أفكر بإني حتى لو سويت كذا وكذا ، تراه بينتهي ، وبالمثل أفكر باللي معاي ، هلي وكلمن احبه ،
أفكر هل بكون معاهم ، شوللي بيصير ، احس بأني مسؤولة عنهم كثر مسؤوليتي بـ نفسي ..



وفوق كل هذا ، أشوفني لازلت مقصره بكل شي ..

اختي أنامل، لو قلت لج إنه الحاله هاي أنا أمر بها ، بتقولين إني دخلت أجاملج ..!

وأنا عن نفسي مادري بشو اوصف هالحاله ؟؟!!

بس عن جد هالشي يتعبني ...

اللي اسويه اتعوذ من الشيطان ....

الله يعينا بس ...

انامل الغاليه ..

تعوذي من ابليس .. وجان تبين الصراحه .. نحنا المفروض نكون جي ما نحب الدنيا لان الدنيا ما هي الا دار اختبار :) والله مايبلينا بشي الا لان فيه لنا خير !

كلنا نمر بحالات .. والحلو ان بعد فتره بطالعين ورا وبتقولين الحمدلله على كل حال .. واهم شي انج تعلمين من كل اختبار تمرين فيه

وعليكم السلام والرحمه


اختي انامل

يمكن الانسان يمر في هالحاله .....يعني انا هالفتره امر بحاله تقدرين تقولين عنهاااا حزن بدون سبب جي من الله .. كله اكون مضااايجه واوسوس وافكر بأشياء مب زيييينه ...

بس والله عقب هالحاله احس براحه ماعرف لييييييييش ....احس اني قريبه من الله سبحاااانه وتعالى ..


حبيبتي لا تضااايجيييييييين بالعكس كوووني مرتااااحه مدام انج ترضييين الله ورسوووله ....

الله يسهل عليج اموررررج يارب ....

بسم الله الرحمن الرحيم

~

تذكري إختي الفاضلة أن الذي قال : [ إن الله غفور رحيم ] هو نفسه الذي قال: [ إن الله شديد العقاب ]
فلا تنظرون إلى جانب الرحمة وتنسون جانب العقاب
ولا تتفكرون في الجنة وتنسـون النار
ولا تغركـم الحيـاة فتهملـون العمل لآخرتكم

جميل ما أنتي فيه ، ويحسدك الكثير عليه إختي من غير أن تشعري ومن غير أن يشعرون
أنتي الآن تمرين بمرحلة الخوف من لقاء رب العزة والذي يلزمنا جميعا كـ بشر ومسلمين تذكر هذا الامر دائمًا
هذا أمر تختبرين فيه ، وقد ابتلاك لله به ، فأحسني العمل ، وشدي العزيمة ، وقوي الهمة ، وشمري عن ساعد الجد
وتزودي بالتقوى والعمل الصالح وقراءة القرآن والصلاة والصدقة والصيام ، وتذكري إختي الفاضلة هذه الاحاديث العظيمة وتفكري فيها

عن أنس رضي الله عنه قال: سمعت رسول الله صلى الله عليه وسلم يقول:
"قال الله تعالى يا بن آدم إنك ما دعوتني ورجوتني غفرت لك على ما كان منك ولا أبالي
يا بن آدم لو بلغت ذنوبك عنان السماء ثم استغفرتني إلا غفرت لك، ولا أبالي
يا بن آدم إنك لو أتيتني بقراب الأرض من خطايا ثم لقيتني لا تشرك بي شيئا لأتيتك بقرابها مغفرة"


عن أبي أمامة قال : قال رسول الله صلى الله عليه وسلم :"إن صاحب الشمال ليرفع القلم ست ساعات عن العبد المسلم المخطئ فإن ندم و استغفر الله منها ألقاها و إلا كتبت واحدة ".

..

أكثري من الاستغفار إختي الفاضلة ، وأكثري ذكر هاذم اللذات
واجعلي لسانك رطبًا بذكر في ديناك ، فيكون آخر كلامك من هذه الدنيا بإذن لله هو خير الكلام ، وترزقين بحسن الخاتمة
واسألها لي ولكم وللمؤمنين والمؤمنات جميعا هذه الخاتمة

ولا تكوني ممن يصرون على المعاصي ، ويأبون الاستغفار ، فتكون عاقبتهم الهلاك أعاذنا الله وإياكم

أبشري يا إختي ، فـ خوفك وحرصك ما هو إلا ثمرة لبذور الخير زرعت فيك واسأل الله أن يكون حصادها طيبًا مباركـًا

بارك الله لي ولكم جميعا ، واسأل الله لي ولكم جميعًا الهداية والصلاح
ونسأل الله أن يردنا جميعًا إلى دينه ردًا جميلاً من غير ضراء مضرة ولا فتنة مضلة

وجزاك الله خير

~

خطّاب، انا احس بشعور الاخت، وصح إنك تقول هذا شي طيب، بإنه نخاف، عشان نحاسب انفسنا، ما انكر هالشي !

لكن الجانب الثاني، إنه هالشعور يخلينا نكره كل شي، ونمل من كل شي، ومالنا صبر ... ونرفزه على كل شي .. الخ

أخوي المزوحي ، تدري إني مافكرت بالاستعاذة إلا لمن قريت ردك !
اكثر ذكر أحب الجأ له "الاستغفار" ، مادري بس احساس دايم بـ نفسي بـ حاجتي لهالذكر ..

وعن احساسك ، فـ ربي باذنه بيعينك ويبنور دربك للخير ،
بس جدد النية فيه دوم ، وخواتي + اخوي خطاب ما قصرو بإضافاتهم يزاهم الله عنا كل خير ..

,

عزيزتي تحفه ، اسعدني مرورج وحرصج ، بارك الله فيج ،
صحيح كلنا نمر بحالات ، وكلنا تستوقفنا لحظات صعبة مانعرف كيف نصرفها ،
بس لمن نوصل لمرحلة ماندري فيها ابـ محل الصح من الخطأ ، ونبدأ نسير أمورنا هكذا ..!

نعم المفروض نذكر كل هالأمور ، لكن مانبدي كثر القصور اللي ابديه ..

واكرر بإن ردج اسعدني ، احب القى الملاحظات والتوجيه من غيري ،
وربي يديمكم للي يحبه ، ويجعلكم من أهل الاحسان كله ..

,

امتناني ..

حاضرين أنامل قلب

يبالنا موضوع يفرفش هل الواحات كلهم، لانه فعلا مب شي مستوين ..... !

وإن شاء الله ربي يسعدتج ...

الطيبة عهد الوداع ، ربي يبعد عنج كل هم ، ويرزقج طيب المنزل بالدارين ..

ملاحظاتج اكيد اقدرها ، وماتقصرين فيني دوم ، بارك الله فيج ،
بس ادعيلنا نكون من اللي يرضي ربه سبحانه ، ونتبع درب حبيبنا عليه الصلاة والسلام ..

ترى اختكم مقصره جدا ، ولازالت على تقصيرها ،
حاليا أكثر ما يهمني واحاول اصلحه [ الصلاة ، خاصه صلاة الصبح ..
لمن نشوف أمثلة من الصالحين ، نحس بغربة لا طبيعية بالنفس ..

ربي يجزاج كل خير اختي ، وييسرلج كل أمرج / تقديري ..

,

أخوي خطاب / آميييـــــــــن ..

توني كنت اكلم دموع قلم بالمسن ، ونقلت لها خبر ردك ما شاء الله عليك ،
بس لي طلب من الكل ، صدق صدق صدق اتمنى محد يشوفني شي خير بزياده ،
او انه يحسن الظن فيني بشي ما املكه // مجرد شي بخاطري حبيت اوضحه ..

اضافتك مريحه بارك الله فيك ، وذكرتني بحديث قدسي جميل جدا ، يقول فيه سبحانه :
(( من عادى لي وليّاً فقد آذنته بالحرب ، وما تقرب إليّ عبدي بشيء أحب إليّ مما افترضته عليه ،
ولا يزال عبدي يتقرب إليّ بالنوافل حتى أحبه ، فإذا أحببته كنت سمعه الذي يسمع به ،
وبصره الذي يبصر فيه ، ويده التي يبطش بها ، ورجله التي يمشي بها ،
ولئن سألني لأعـطينه ، ولئن استعاذني لأعيذنه )) ..

من الاخوه اللي كذلك ما يقصرون فيني يزاكم الله كل خير ،
وثبتكم ربي على ما يحب ، وابعد عنكم السوء ..

احترامي ..

^

احم احم ,
المفروض اتحبين الدنيا لأني فيها .. :tongue:


اممم ادعييييلي أناااامل باجر امتحانا ..
وووتراني مو سهرانة .. ناشة عشان اذاكر ^______^

اممم و على طاري الجامعة ..
متى ياية إن شاءا لله ..؟!

^ باذنه تكونين من اهل الفردوس كذلك ،
ويجمعنا ربي بالآخره ، مثل ما جمعنا بدار الفناء ..

,

موفقه دوم حبابه ، ادريبج شطوره بس تدلعين !
وبعدين تبيني أييكم عشاني ولا عشان العلوج :bye2: ..

,

كلماتج للحين عالبال ،
+ تراني سيفت المحادثه =)

ودمتي بـ خير ~ ..

أنامل أمر بنفس حالتج ما ادري الغلط مني ولا من الدنيا الي تمشي بالعكس....ما عدت أقدر أفرح...مجهد تفكيري ولاذي الوحيد القرآن

هلا حبوبه
الدنيا ... حلوه... إذا نحن أحييناها بذكر الله
بس كل ما بعدنا عن الدرب الصحيح اللي نحن انخلقنا عسب نمشي فيه نحس بالضيقة
ليش لأن نفسنا البشريه اتعودت على ذكر الله وهي تشتاق انا نسجد ساعه لوجه الله
أدري هذا كلام مكرر ولكن للأسف نحن نتكلم ونسمع من غير ما ننفذ
غير المسلمين ينتحرون ليش؟؟!! بسبب بعدهم عن فطرتهم الإيمانيه
ونحن اذا ابتعدنا اكثر شوي بنستوي شراتهم ...
دمتم بود^^

الله يبعد الهم والضيق عن جميع المسلمين ..
أحس اني ما بقدر أكتب كلمات تواسي لأني أشعر بهذه الحاله بين فتره وفتره ..
عليج بالصدقات وإعانة المحتاجين .. تراه شعور جميل يتملك الشخص عندما يساعده غيره ويكون
سبب في سعادته


والله يكتب السعاده لج في الدنيا والآخره