يعني شو اسوي ؟

السلام عليكم نقولها يوم ندخل المكتب الصبح ،، والسلام مب الصبح بس واللي يدخل يقول صباح

الخير، مب هذا موضوعي، ولكن في شي أكبر من السلام عليكم .. حبيت أوضحه من خلال طرحي

للموضوع ...

نحن نعيش حياة عملية واجتماعيه، فبمجرد ماتترك بيتك متجه صوب العمل،فأنته تدخل في عالم

ثاني أو خلنا نقول بيئة ثانية وبالأصح عايلة ...

يعني إذا انته بتشاهد كذا جنسيه وبتتعايش مع مجموعة ومب فرد واحد فقط ... وكيف تتعامل

مع الناس هاذيل ...

مرت السنوات اللي اشتغل فيها، أكيد وأكيد بعد ، إني مابكون يوميا نفس الشي، المقصود

من كلامي ، إنه أنا مزاجي مب كل يوم نفس الشي، مرات الواحد يسير الدوام يحس بنشاط

يحس بسعادة من دون سبب، ومرات عندك مشكلة او تمر بشغله، بحيث تدخل الدوام وتخلي

هالشي يبين عليك وعلى ويهك ،،،

أنا من النوع اللي يبين عليّه لو فيّه شي، ومب قضية أبالغ أو أحب ألفت انتباه الغير، عسب ينشدوني

بلاك فلان .. لا

بس انا تعلمت وايد اشياء، وأيلس مع شخصيات مختلفه ...

ربعنا اللي في الدوام، نشوف منهم تصرفات نستغرب منها أحيانا، ونقول طبعا كل واحد فينا ظاهر

من بيئة معينة، ونلتقي في هالمكان، فليش أحاسب هذا وهذاك على تصرفاتهم ..

خلهم، ليش اتدقق على كل شي يسوونه، ليش تنتقد ؟؟؟؟ ليش وليش ؟؟

لكن انا في النهاية لي مشاعر وأحس وأحب اللي حولي يحاسبون على الرمسه، تراني أنا بعد

تارك بيتي وياي الشغل، لكن في نفس الوقت أحب الموظفين يبتسمون في ويهي ... نحن ما اختلفنا

على هالنقطه ... بس انته في البداية قلت إنه المزاج يتغير، مب كون فلان مزاجي، بس لأنه هذي

فطرة في الانسان، بس بيني وبينكم بخبركم عن عمري ... أنا صدق أحاول اتغير للأحسن ..

ومرات الواحد يتقبل النقد عسب تنصقل شخصيتي ... زين ...

يتني فترة .. مريت في ظروف ... صح الربع لاحظوا، بس حاولت عقبها إني ما أكون يوميا امبوز

لأنه مهما كان في الأخير بيملون مني ...

كل منا يدخل المكتب يسلم وعلى طول تقدر تقول هو شو اليوم شو مزاجه ... احيانا ماتبغي تكلم

أي شخص حتى لو مدة نص ساعه كونك توك ياي وعقب الأمر عادي ...

بس الغريب في الأمر ربيعنا صار له اسبوع متغير ... وهو من النوع اللي مايحب يوضح شو بلاه

حتى لو سألته أكثر عن مره ونحن مانحب انصر عليه ...
تحس الجو متكهرب، كونك تشوفه يوميا ومن كذا سنه، صح مابتدخل في أموره الشخصيه وخاصة إنه

نحن نعرف هو من النوع الكتوم .... بس الكل ملاحظ عليه تغير الأخ ... قمنا نسأل بعضنا .. شو اللي

مهتم منه أخونا ؟؟؟؟

صح نحن نعرف عن شيئين تقريبا،،، بس هو مب حاب يتكلم ...

اليوم وصلنا لسالفة إنه خلاااااااااااص stop لي متى، لكن ما قلنا له هو ، بعد هذا الكلام يدور من بينا

بس نصيحتي مني لكم إنكم يوم عندهم مشكلة في البيت من تدخلون الدوام تسوون كل شي

والعكس كذلك، يوم عندك شي في الدوام لاتنكد على اللي في البيت ...

حاولوا ...

انا أحاول أسوي جيه، لأنه نحن يوميا نمر بمواقف تخلي الواحد يتنرفز، ويمكن موقف ربيعنا يكون شي

كبير الله يعينه ... بس صدق مب حلو اللي يالس يستوي ...

في نفس الوقت مانقدر نكلمه كونه حساس مستوي ...
الصراحه هالشي أثــّر عليّه، أنا مادري ليش الشي ينتقل لي،،، كفايه الواحد اللي فيه يكفيه

يعني انا ماحب اتم مع ناس مكتئبين ولا فيهم شي بسرررررررررعه أتأثر .. هاااااا مب لأني ضعيف

الشخصيه :a046: بس صدق ...

شو رايكم عاد في كلامي ... والله ابغي اتونس .. مابغي الجو هذا ...

هيه صح مب انا قلت إني لازم اطنش كل شي :fa56:

ماعرف قلت بفضفض عندكم والله يعينكم عليّه الصراحه ............ :look:

حد منكم مر بموقف جيه سواء انتوا في مكانه او مكاني انا

انا من النوووع اللي عكسك

ما يهمني اللي جدامي زعلان مضايق مستانس
انا يهمني بنفسي !!
يعني كيف بشرح هالشي

مثلا لو دخلت مكان وانا مضايق
تشوفني ساااكت وما اتكلم اللا حسب اذا حد سألني
بس اذا مستانس
ادخل بحشرتي واضحك واتمصخر واسوي زوبعه



بس انا عندي مشكله بعد
اني مرات اكون مو محترم !!
يعني اعامل الشخص على حسب نيته
الجلب اكون اجلب عنه
النذل اكون انذل عنه خاصه اذا ما ارتاح للشخص
تشوفني انغزه وانغزه بالكلام لين يعصب عسب اعطي على مخه عقب
ههه

الدنيا جذي ماشيه
اللي يشوف نفسه عليك اشوف نفسي عليه !!

مجموعة انسان حلو إنك ماتهتم،، بس مب دوم هالشي ينفع إني أكون جيه

بس من ناحية اللي يكون جلب تكون مثله ،، بالعكس

عيل شو رايك لو أقولك عندنا واحد من شكله مايطيقني مووووووووووووووول ومع هذا اخليه يحترمني واحسسه

بإني احسن عنه، يعني مايقدر يود عليّه شي

عيل نحن مب توم وجيربي هو بيقول كلمه وانا ارد عليه

شكرا لك على المشاركة ^_^

تدري اني اتغير بين ليلة وضحاها .. o,0 يمكن بعد بين ثانيه والثانيه .. مرات تكون الصفه سلبيه ومرات +

عادي يعني لوكان الويكند ممل اسير الجامعه واكون ربشة وعادي العكس! الويكند يكون وناسه واول يوم دوام مايكون لي بارض.. وبعد يمكن يستويلي العكس! :S

انا وايد مووووووووووووودي

مرات اعصب واتحرطم وبسرعه اهدا واستوي اوكي ومرات يوم اتضايج من شي اتم متضايجه منه الف قرن

يوم احس اني مووووووووووووووول مالي بارض بشي احاول اسوي شي يغير لي مزاجي ......اخر مره كنت متضايجه سرت ارقد :S لوووول

الرقاد احسن شي فالدنيا

p;تصبح على خير

..

انا جذي ...

وايد مزاجيه ..
واوقات ايلس الوم عمري لأنه يوم اكون مزاجيه اصير وغده .. ما ارد عدل مع ال يكلموني ويوم يسالوني ماسوي لهم سالفه ولا انرفز .. واتم ساااكته .. .!!!

تييني فترات اتم ساكته .. ومرات اسولف وما اسكت ..!!
اوقات ابغي احد يسالني .. واوقات لا اتهرب منهم عشان ما يسالوني ..^

بس اني يوم اكون متضايجه بالبيت مثلا .. ما ابين هالشي بمكان ثاني بالعكس انسى .. والعكس مع الكليه يوم اكون متضايجه منها .. ما ابين هالشي بالبيت ..**

بس صج الل ه يعين الي طبعه مزاجي ..
لأنه صج صج ابغي افتك من هالشي الي فيني .. وايد مزاجيه لدرجه اني اكره عمري حزتها ..^^

...الله يعينى ويعينكم .. يالمزوحي ..
بس سالفة ربيعك .. وايد ناس مثله .. بس يباله واحد اسلوبه حلو بالكلام .. وسياسي بالاخذ والعطى ..
ويقدر ياخذ منه او يعرف منه شي ... ^^
حاول .. شوي شوي وحبه حبه .. بروحه بيتكلم .. **

هلا تحفه

خلنا نقول إنج مودي .. أوكي بس الواحد يحاسب على الغير ... وما انكر إني مريت بفترة كنت متضايج فيها

بس بعد الواحد يحاول إنه مايشمل ربعه ... حتى لو هو مايبغي يقول شو منه متضايج !!

بس هذا انعكس علينا نحن ... من يدخل لين يسير بنفس الشكل اللي هو متضايج فيه

صح انا ماقدر اغيره ...

الا انا

اليوم تركناه مثل كل يوم وهو تكلم .. صح مي شرات أول، بس احسن عن هالايام اللي فاتت

طيب ونحن ليش مهتمين منه ومسوين له قدر ...

بس توو متش الصراحه اللي هو فيه

:

السلام عليك المزوحي ..

:

امممم

أنا عن نفسي .. ما أحب أتعامل مع شخص مودي ..

يمشيني على مزاجه ..

وقت ما يكون مستانس .. يسولف ويضحك وياي ..

و وقت ما يكون متضايج ولا معصب .. يطلع حرته فيني ..

طبعاً أنا أتكلم عن بيئة الشغل ..!


يعني الواحد المفروض يفصل الأشيا الشخصيه .. عن الشغل ..

اللي يصير في البيت يتم في البيت ..

ما ايي الدوام .. وهو تفكيره ف أشيا بيرسونال ..

ويطلع حرته مثلا في الموظفين ..



وحده متضاربه ويا ريلها .. اتي اتزاعج علينا ..

واحد خسران ف الاسهم .. ايي ويتحرطم علينا ..

واحد مو محصل شقه .. ايي ويصرخ ف ويهنا ..

وحده مو محصله معرس :biggrin: اتي واتنكد علينا !!


صرت ما احب أحتك فيهم في الشغل ..

لأنهم يعكرون لي أنا مزاجي ..


شي طبيعي .. انه الواحد تستوي له ظروف أو مشاكل في البيت

تخليه يتضايج .. وما يكون لك بارض اتداوم أحياناً ..

بس انت مضطر انك تسير الدوام ... واتسوي شغلك ..

واتمه على أحسن ما يكون ..


بس اني أسير وأنا مويّم .. وأنكد ع الخلق .. وأشغل بالهم ..

ليش كل هاه !!

ترى الدنيا ما تسوى والله ..

:

أنا الحمدلله في الدوام .. كله مبتسمه .. ومتفائله ..

أسوي شغلي وأنا أضحك ..

كله ضحك وسوالف ..

والواحد يوم جيه يكون .. فيه طاقه ايجابيه .. يقدر ينقلها حق اللي حوله ..

ويحول بيئه ومكان الشغل .. حق مكان حلو .. ومريح للاعصاب :biggrin:

مب كل حد يكون سترسد ويالس على اعصابه ويسوي شغله وهو ملان ومتضايج ..!!

:

جني رمست وايد !!

السموحه منك ..

بس حبيت ابين وجهة نظري في الموضوع !!

صدق حبيت وجهة نظرج اختي ..

وبرد اعيد للمره المليون، كلنا نمر بحالة ضيج وإلا نمر بموقف برع الشغل، يخليك مالك بارض، مب معقوله بتاخذ

إجازة، ويمكن ماتكون مثل قبل تسووولف وتكون دوم مبتسم .. لكن بعد الواحد يحاول يكون كووووووووووول

ويفصل مشاكله مثل ماذكرتي ...

فعلا ملااااااك هالشي ينتقل لي بالاشارات ... مب معقوله واحد يتم 10 ايام صاد عنك

صح نحن مب خسرانين شي، بس تخيلي اي موظف وياكم، دخل الصبح مكتبج وسلم وحتى ندمان وهو يسلم

وطلع عنج ومووول ماتشوفينه، وهو متعود يمر ف ياليوم 10 مرات وإن دخل مايبغي يكلم الكل ...

ماتتخيلون كيف الجو ...

:
.

السلام عليكم ورحمة الله وبركاته ..

مثل ما سبق وذكرت أخوي ..
سواء بالبيت أم العمل أو حتى الجامعه .. !

بكل محل من هالمحال يكون له المرء بيئة خاصه واسره اعتاد ان يبدي لها كما ياخذ منها الكثير .. !

اممم .. البعض يملك التفريق بين كل بيئة وأخرى ..
والبعض يعجز بحيث تلاقيه يمزج أمور بيئة المنزل بالعمل والعكس وهكذا ..

كلنا نتضايق وكلنا نتأثر بالغير ..
لكن مش الكل يملك اخفاء المود اللي أهو فيه وإن فلح بالبدء ..

البعض منهم تغير موده يأثر عالغير لكونه ما يملك التحكم بمظهره وفعله الخارجي ..
والبعض الآخر العكس تماما .. وإن كان لابد أن يأتيه يوم يضعف به أمام نفسه .. . !

بحالة أخونا المعني بطرحك أخي .. فهو شكله من الصنف اللي ما يملك اعفاء عمله من مشاكله الخاصه
وقد يكون الإشكال اللي يواجهه أكبر مما يملك كبته ..

اللي فهمته من طرحك بإن زملاءه بالعمل يكثرون السؤال عنه وهو فعل إن دل على شيء فهو يدل على اهتمامكم به ما شاء الله ..
لكن بما انكم لقيتو ردة الفعل منه الصمت والاستمرار بالكبت وسوء حال النفس ..
حاولو تخففون من طرح الاسئلة والشكوى .. وأهو بييكم تالي إما للافصاح ولو بشكل بسيط يريحه ..
أو للابتسام بعد ما يكون طاب باذن الرحمن ..

بس عطوه متنفس ..
وبينوله الفعل الصائب من الخاطئ بالفعل الطيب دون كلام صريح مباشر .. !

:

ويخصوص الموديين بشكل عام ..
فليس العيب بالسمه هنا .. بقدر أنه بـ طريقة ابداء مدلول الـ "مزاجيه" للغير .. !

.......

أخوي مجموعة إنسان .. غريبه .. !

:

ربي يعافينا جميعا وإياكم أكان بما يضمنا أم يضم غيرنا ..
ورزقنا الاسلوب الحسن بجذب الغير لا العكس ..
فنملك أن نكون لهم كـ ماء من الورد يسكنهم ..

احترامي لشخصك أخي المزوحي ..
كما فائق المعذره ..

اختك أنامل قلب ..

:.

مرحبا اختي

هممم لا نحن مب من النوع اللي يزن ، وعلى رمسة واحد من المجموعة، يمكن هو متضايج لأنكم ما تسألون

عنه، شو منه متضايج !! قلت له كيف نسأل عنه وهو يدخل ويطلع ولا كأنه نحن موجودين بالأساس ..

التصرف هذا يخلينا لو بغينا نسأله ، نحذر إنه ننطق بكلمه ...

بس أفعاله كانت واااااااااايد مأثره عليه ربي يعينه ..

والحمدلله إنه اليوم كان غير عن المرات اللي فاتت ...

^

الحمـــدلله ..

:

زين الحمدلله انه شوي تغير ..

ومع الوقت بيرد حق حالته الطبيعيه ..


كان في واحد ويانا في الدوام .. الله يستر عليه ..

دوم وسالف وضحك ..

ويا عقب فتره .. متضايج وما يرمس حد ..

بس يسلم .. وييلس مكانه .. وما يخصه ف حد

سالوه الشباب شو فيك وجيه .. قالهم مافيني شي ..

أصروا عليه .. قالهم مافيني شي لا تحاتون ..


عقب اسبوع وكمن يوم ..

والله رد شرات ما كان وأحسن ..


يمكن كان عنده شوية ظروف ..

وانحلت الحمدلله ..


صح الواحد أحيانا شرات ما قالت أنامل .. ما يقدر يفصل الامور الشخصيه عن الشغل ..

بس مردهم بيردون شرات ما كانوا قبل ..


ف لا تحاتي ولا تشيل همه ..

بس ادعوا له بالتوفيق .. :m_9afgah: وانه يرد شرات ماكان

الحمدلله انامل

ملاااك فعلا اليوم سوالف وغيره، حتى قلت وييييييه كيف كان كان ... مب عسب شي، بس مهما كان تحسين

في شي غلط .. حتى انا نفسي يوم اكون متضايج احاول اكون عادي، لكن احيانا واحد منهم يكشفني ويحس

في شي حتى لو اتكلم .. مع هذا احاول ما اتصرف هالتصرف، اللي كأنك تتذمر من الكل، وتخلي عمرك ماتشوف

فلان .. حتى صدق تشك بعمرك قلت كلمه مني مناك