حقيقة ام خيال ؟

بسم الله الرحمن الرحيم

موضعي يتكلم عن حملة المقاطعة لـ المنتوجات الدنماركية ومايدور حولها
رسايل بالهبل توصلني عن هالخصوص ومايدور حوله ومصيرها الحذف !
انا بحطي لكم الكلام و المسج باللون الأسود وبعلق عليه باللون الأحمر
،

يقول المسج الأول
فتوى اللجنة الدائمة للبحوث العلمية والأفتاء حول التعدي الدنماركي فتوى رقم 20216
قامت 17 صحيفة دنماركية بإعادة نشر الرسوم المسيئة لـ رسولنا عليه الصلاة والسلام
وعليه صدرت فتوى بتحريم التعامل مع الدنمارك والسفر إليها واستقبال مواطنيها وشراء
بضاعتهم والتعامل مع كل ماله علاقة بالدنمارك ومنتوجاتهم تبدآ بالرقم 000076 .

وين المصدر اللي نتبعه لجل نقاطع ؟
يعني فتوى مرقمه بدون دليل ولا سند وحديث !
هل الرسول عليه الصلاة والسلام قاطعهم عندما كفروه وقالوا عنه كاهن ألخ ؟
،
يقول المسج الثاني
الرجل الذي رسم الكاركتير مات محترق والدنمارك متكتمة على الخبر
أنشر الخبر لئن اخت لنا في فلسطين رأت رؤيا إن من ينشر هذا الخبر
سيفرح الله بعد أربع ساعات وتلك أمانة بذمتك أرسلها الأن بقدر أستطاعتك

عجيب هالمسج الصراحه !
يعني لو مارسلنا هالمسج الله مابيفرحنا ؟
لكم الحكم
،
يقول المسج الثالث
سفير الدنمارك ورئيس الوزراء والقناة الدنماركية يسعون لـ إيقاف المقاطعة
وصلت الخسائر لـ 2 مليون يورو وإذا استمرت لـ 7 اشهر ستصل لـ 40 مليون يورو
أنشر لـ رفع معنويات قدر ديننا أنشر ولا تبخل على رسول الله صلى الله عليه وسلم

لا تعليق
،
فهل هالمسجات حقيقة ام خيال ؟
نوروني الله ينور قلوبكم

الصراحه ما أصدق هالمسجات

خصوصا المسج الثاني.. هذا وايد منتشر بس كل مره بشكل :glare:

بس بعد هذا مب معناته أني ضد المقاطعه

لانه أكيد لها تأثير على اقتصادهم

أتمنى نحصل إجاابة مقنــعة ...

لأني عندي نفس الاستسفســار
وصلي مسج قبل يومين عن الخساير الي نتيجة المقاطعة ..

ونفس الشي .. بغينا الأدلة !

السلام عليكم ورحمه الله وبركاته

انا اصدقائي الي فالدنمارك اول مرة صارت هالسالفة كانوا وايد متأثرين ومتعاطفين معانا على عكس اعلامهم .. ثاني مرة ( الموضوع الي صار من فترة قريبه) محد مفتكر فيه واغلب المسلمين كأنهم ما يبون يقاطعون وفي ناس مستغلة الوضع تنشر خرابيط وهالمسجات انشريها وخلال 10 ساعات 10 عرسان بيتقدمون لول انشريها وسوف تحصل على ترقية .. انشرها ومرت ولد عمت خاله ابوك بتنجح فالثانوية العامه :a046:يبيلهم طق واحد يشق حلجهم

انا مقاطعة مقاطعة يعتذرون ولى ما يعتذرون :fa38:

انا ما اصدق ها المسجات ..
ومثل ما قلت ان الرسول عليه افضل الصلاة والسلام ما قاطع الكفار ..

برأيي .. المفروض ان نحنا انور وانعرفهم امنو ها الرسول الاعظم ..
وكيف حياته .. وشو صفاته .. وشو شخصيته ..

اهل الدنمارك ما يحملون اي ضغينة على المسلمين ..
يعني خلنا انشوف تاريخ الاسلام والدنمارك .. مافي اي صلة ..
لا في حروب ولا تعهدات ولا اي شيء .. فاكيد ان هم ما يعرفون اي شيء عنا ..

فالاصح ان نحنا نرد عليهم بالكلام وانفهمهم امنو ها الرسول الكريم ..
والغريب بعد الاعلام .. يعني انا سمعت ان في ناس مش مسلمين يعتذرون على نشر
الصور المسيئة .. ليش ما يحطون في الاعلام ها الشيء .. ليش يورونا الجانب السيء ..

الله المستعان .. وتسلم على الموضوع ..
والافضل ان محد يصدق اي شيء من هاي المسجات ..
الا طبعا بدليل ..

السلام عليكم و رحمة الله وبركاته

والله ما جات على الدنمارك بس، مره
سالفة حامل مفاتيح المسجد النبوي
انشرها و الا ...، و تاره لا إله إلا الله أرسلها
لـ عشره و ستسمع خبر يسرك او شي
من هذا القبيل.
فوق هذا يكتبون (بذمتك إذا ما أرسلتها)

أنا بالبدايه كنت زي ما يقولوا -مع القوم يا شقرا-،
لين ما شفت ان السالفه امصخت و صرت امسحن.

تسلم معاذ

السلام عليكم ..

"ألم ترى"

بصراحه أحسها سوالف ماصخه لهدف مجهول والناس تصدق والمستفيد طبعا إتصالات ومحد عرف
يرد على هالسوالف إلا اللي طرشوا (جمله ... وعقبها أرسلها لـ 8000
شخص وإن شاء الله بيقطعون رقمك) قبل إنتشرت
سالفة الاوراق بان واحد حلم
انه شـاف في المنـام الرسـول (ص) وقالـه يخبر الامـه عن الصلاه مثلا او الصيـام ويكتبـون لك إذا
مانسختها ونشرتها لـ 10 بتأثم وبيصير لك شي مب زين عشان ينشرون
الفكرة اللي يبونها مع ان الكل عارف الصلاة
والصيام مب انه شي
ناسينه او يديـد وحتى الايميـل هالشي منتشـر وايد وعلى سبيل المثال الايميـلات اللي تقول
راح يسكرون المسنجر إذا ماوصل عدد المحتجين 200,000 أو إذا ماتبى
إيميلك يتسكر طرشه لكل اللي تعرفهم ومن
هالرمسه اللي كلها
جذب في جذب انا على طول أمسح ولا أعور راسي شو ماكان وإذا كان في شي صدق تراه بيكون
من مصدر رسمي مب بالطريقة هاي ونصيحتي ياألم ترى لا تاخذ على كلام
هالمسجات لو في شي بتاخذه من مصدره والكل
بيعرفه والسموحه
:bye2:

الاســـطـــوري
أخوكم

كلام فاضي !!

اذا كل مسج يوصل يقولون زطرشه ل12345 شخص
الكوره اللي فوق الإتصالات بتكبر
وبنسوي كنادير بدون مخابي لاخر الشهر

واصلا انا ابد ما اطرش هالمسجات
حدي مسجات يوم الجمعه
والنكت اللي اطرشها حق الجماعه اللي يعرفوني ويعرفون نكتي

:

السلام عليكم و الرحمه ..

بالبدايه اممم ..
المسج الثاني اللي يحطون ابها شغله بذمتك والخ ..
فهي ومشتقاتها غير صحيحه والأمر واضح ..
كما إني سبق وسمعت بخصوص عدم جوازه
من أحد المشايخ .. !

بخصوص المسج الأول والثالث ..
أو بالاحرى الامور المتعلقه بمسألة الدنمارك ككل ..

فمع التنبيه لكوني أجهل رأي العلماء والمشايخ ..
كما لم يصلني من طرفهم الحكم الثابت وما إلى ذلك ..

لكن برأيي والله أعلم وأحكم ..

لو المرء يبادر يمقاطه "نفسه الغافله" ..
يبدأ يصلح الغفلة اللي بنفسه ويسعى لتطييب سير دربه ..
أخير له من المقاطعه وما إلى ذلك من أمور ..

ورب العالمين بيهديه لرد الفعل اللي يرضيه ..
ويجعل من ظنه ورأيه الخير إن شاء سبحانه ..

:

عساه جل شانه يصلح نوايانا ..
ويغفرلنا ويجعلنا ممن هداهم خير دربه وإحسانه ..

المعذره إن كان ردي مشتتا ..
ولك مني فائق التقدير وجزيل الاحترام ..

اختك أنامل قلب ..

:..

انا من توصلني هالمسجات انشر ولا مادري كيف على طوووووووول ديليت

نفس ما قال اخوي الاسطوري عن سالفة الايميل وجي,, انا على طول ديليت ما سويلهم سالفه


المشكله محد يعرف منو ورا هالسوالف@__@,, هل هي الاتصالات( مب اتصالات الامارات شركات الاتصال بشكل عام) تطلع نفس هالمسجات عسب تستفيد!!

الله المستعان

انا بعـمري ماوصلني مسج مال قوم بو [ انشر ] ونشرته !

احس خراااابيط .. !

وماعور راسي وأفكر صدق ، لا ، يمكن ، كيف .. دلييت وانت والخير رباعه B-)