الدقيقة اللي فاتت !

روتين روتين روتين

زين وعقب ...

مليت من كل شي ومب أول مره اكتب وأنا في حالة ملل !!

وكل واحد يضيف رد .. أطلع .. اشترك في نادي .. سافر .. الــخ

والأيام تطوف ...

ومرات يوم أمر بحالة ضيج من أمور الحياة اللي تهم ... أقول وبعدين يعني لي متى بتم جيه ..

يومين أقصد ساعتين وأرد ... بس صدق الوقت يمر والعمر يطوف ونحن نزيد من انفسنا

بالأصح " أنا "

تدرووون من أصبح أقول عسى يكون يومي خير ويبعد الشر ... أبدا أسير الدوام ..

ونرد نشوف هذا وهذاك ونتنرفز على كل شي يحصل في المكتب وبرع ونحن رادين البيت ..

شو هالدوامه ...

كلمه عوده هااي الدوامه ... لازم أقضي عليها ...

بس فعلا

شي في صدري ودي أعبر عنه ...

أقول خلاااص من هاللحظة بكون أحسن الناس ...

وقصدي اتغاضى عن وايد أمور ... ما اتنرفز .. أسامح .. ما أشل شي في قلبي ..

يمكن ما أرد الدوام باجر ومن يعلم لحظة وفاته ...

زين وشي ثاني بخبركم عنه ...

اليوم وأنا في المكتب ومندمج في الشغل اللي عندي، عيوني سارت على الساعه اللي معلقة

على اليدار ... وأشوف عقرب الثواني ... وكانت بالتحديد على الرقم 9 ودارت دوره وحده وردت

على 9 مادري ليش الدقيقة حسيت بها ثانية ....

قلت صدق في هالدقيقة ما اقدر أرد أي شي استوى ... ليش نسوي بعمارنا جيه ؟؟

نزعل .. ونكدر وننتنرفز ... صح هاي حالات نمر بها .. الواحد مابيكون كله في فرح

لكن ليش اخلي شغلات بسيطة تعكر حياتي ... ليش اشل في خاطري على هذا وهذاك ..

شو بيرد الدقيقة اللي فاتت ... تميت فعلا افكر .. يوم انتبهت وصديت على يميني

شفت ربعي والاوراق في إيدهم وهو مشغولين .. كنت بفتح الموضوع

موضوع الدقيقة اللي فاتت .. لكن سكتت ...

وانا اكتب لكم اللي فوق .. مرت دقايق مستحيل إني أرجعها، لكن اتمنى تسفيدون من

اللي انكتب ...

واااااااااااااااااايد جي يستويلي < بس مشكله الي ما يتعلمون XS

حلو انك جيه تفكر
وتحاسب نفسك
وتذكر عمرك ان الدقيقه مابترد للأبد
انسى الي فات
وابدا الحين
لاتفكر فاللي مضى
فكر في الحاضر
ولاتعور راسك وتفكر في المستقبل
صحيح التفكير في المستقبل مهم
بس الاهم حاضرك
خطط الي تبا تسوي
وامشي على هالمنوال

والله يخفف عنك همومك وضيجك
لاتنسى القرآن ^_^

صباحكم سكر *_*

المزوحي اتصدق اني احتجت لدقيقه كامله عشان افكر بالرد عليك وطبعا هذا مغاير لطبعي وعاداتي بشكل عام ... انا كنت مثلك أعاني من نفس هاي المشكله وبالاخص بالنسبه لضبط الاعصاب واني احاول اغير من نفسي بديت استخدم سياسة العد للعشرين قبل ما اجاوب على اي سؤال سواء كان وجه لوجه او كتابه مثل الحين ...

الشي الثاني كل ما اتيني هاي الحاله ابتدي بالاستغفار مية مره وعقبها سبحان الله وبحمده نفس الشي صدقني جرب هالشي وعقب بشوف موضوعك *_*


الله يوفقك وينولك مرادك

مرحبا تحفه

هممم متى بنتعلم عيل .. واحسن مانضيع وقت

بنت الدلع أحاسب نفسي ... ونرد نغفل .. خلنا نسى الهم .. ومحد منا خالي منه ...

يعني لو قلت لج اليوم 28/6/2007 هذا مابيرد لكن ممكن نعيش لين 28/6/2008

الله يطول بعمركم ...

بس مانقدر نرد لهذا اليوم

هلا الجنيه

موضوع العد ماداومت عليه، يمكن نسيته .. بس النرفزه ... هه ملازمتني ...

ليش دقيقة تفوت بالزعل مب بالرضا ... أسأل عمري !

الاستغفار زين في كل حال ... والحمدلله إنه طافت دقايق تعلمت منها شي