منع المرأه من القياده بالنقاب ..

الســلام عــليكم

اليوم و في الصفحه الاولى من جريدة الامارات اليوم منزلين خبر ان شرطة ابوظبي تمنع المرأه من قيادة السياره و هي منقبه .. !

القرار اتى بعد ما اكتشفت شرطة ابوظبي عدة حالات بأن سائق المركبة ( المنقبه ) هي ليست نفس الشخص اللي في الرخصه ..

و من الحالات ان طفل عمره 14 سنه سرق السياره و اتنقب و لما وقفته الشرطه اكتشفت بأن صوت هالطفل مش صوت امرأه كبيرة منقبه ! و ايضا حالة اخرى و هي ان امرأه عندها فحص قيادة راحت بنتها بدالها و ادت الفحص !!

و قال المقدم احمد الشحي رئيس قسم المرور و دوريات الشرطة في شرطة ابوظبي ان القانون اللي الزم المرأه بكشف وجهها اثناء التصوير لرخصة القياده ملزم ايضا بعدم تغيير اي شيء بالوجه اثناء قيادة السياره ليتعرف رجال الامن هل هي صاحبة الرخصه ام لا !

ما اعرف هل القرار صحيح ام لا ! و مهما يكون في ناس يستخدمون النقاب بشكل سلبي لكن في ناس تستعمله لتستر !

فـ هالفئه من الناس ما يخصها اذا في فئه ثانيه اسائت استعمال النقاب !

انتو شو رايكم !؟

ســلام
كـلـكـلـووش

على فكرة نسبة المواطنات اللي يسوقون عندنا في الدولة هي 18% من مجمل السائقين في دولة الامارات

بس سخافه صراحــه ..
يعني كل هاييلا المتنقبات لازم يعقون النقاب يوم يسوقون ! شو ها .. وكله عسب هالفئة اللي سوت جي

احين المب متنقبه يوم تسوق مايتم حد مايلعوزها
ويبون هايلا يعقون النقاب فـ بتستوس مشاكل من صوب ثاني .. يعني ها مب سبب عسب يحد للمواقف
اللي نذكرت (أبـد) .. لانك تخفف من شي بس يطلع شي ثاني

صح إني ما أتنقب
لكن صراحــه أشوف فيه تعدي على حقوق المرأة أكثر من ماهو إيجابي

ومشكوووووور كلكلوش ..

احس ان هالفئة اللي تتنقب و تسوق قليله بالنسبه للناس اللي تسوق عندنا في الشوارع ..

و بعدين اللي يبى يسوق تراه بيسوق سواء بنقاب و لا بدونه ! فـ يوم بيطلع هالقرار ما بيمنع المخالفين من السواقه و مثل ما يقول المثل .. اللي يبى الصلاة ما تفوته و بيطلعون اشيا يديده و بيسوقون و بنفس الوقت المظلوم هي الحرمه اللي تبى تتستر و تتنقب !

انا بصراحه مع الشرطه
صدج في شوية تعدي بس هذا في مصلحة الجميع
يعني لو الحرمة عقت نقابها لثانيتين ماراح تموت
اما في لو تم الحال جي ففي حوادث ممكن تستوي

هذا رايي من دون مجاملات وسوري اذا اهنت احد

ترا جي .. اللي بيسوي شي ما بيمنعه هالقرار ! مب حل هو

نحن نقول جي .. أنه عادي عندها ما بتلبسه في السياره بس بالنسبة للمتنقات يحسون أن هالشي وايد كبير .. بس امبلا نسبة المتنقاب وايده بالنسبة للحريم ( اللي يسوقون طبعا ً ) خاصـة قوم التربية وشوف كم عاد أنت


لا وبعد وين مانعين هالشي .. في بوظبي .. عز الله فلحوووا لول

شرطة بوظبي روحها مب عارفه شو تسوي بشبابهم عفاني الله ( سوري لمال بوظبي يعني ) لول بس هاي حقيقه ! مافي شي يوقفهم
آخر شي بيصدرون قرار بمنع إنجاب الأولاد

اتمصخر ههههه

هي فئه كبيرة .. لكن اذا بتقارنينها باللي يسوقون في الشارع فـ بتلاقينها صغيره .. نسبة المواطنات اللي يسوقن 18% .. يمكن المتنقبات يكونن 10% او 9 % فـ تعتبر نسبة صغيره ..

احسه قرار مستعجل فيه .. يباله دراسه اكبر و لازم يشوفون حلول افضل ..

مع احترامي الشديد للبس النقاب كـ وسيله للتستر وجيـه . . .

بس احس ان مادام البنت مب متمكيجه ومتحجبه النقاب مابيكون له لزمه ..

وهالشي مش مشكله للمتنقبات الي ما يحطون ميك اب فليش مسوينها قضيه

يا تحفه .. يمكن ما تكون مشكلة لج و هذا رايج ,, و احترمه لكن .. في ناس متعوده على شي اسمه نقاب ,, و ما تتقبل ان تفصخه ..

القضيه مب هني يا خوج .. النقاب يعتبر لبس و من حق كل انسان ان يختار لبسه .. على حسب تفكيره و عقليته و تربيته و دينه .. فـ هالقرار ما راح يكون رادع للناس اللي تتخفى بالنقاب تهربا من القانون !في وسايل افضل لهالشي .. و المفروض ان يفكرون فيها و يدرسونها اكثر ..

و تبقى وجهة نظر ..

ما يستوي يقول لها الشرطي تكشف عن ويهها عشان يتأكد.. إذا كان شاك فالسالفه يعني

ولا لازم يمنعون النقاب ؟! :fa55:

(( الله يكون فالعون ))

اللى يقهر انه محد يقول شي لهالأجانب اللى وايد ماخذين راحتهم فاللبس :mad:

.
.

يعني نفس ما منعـوا الموظفـات من النقاب في مقر العمـل ..

أشوف هالشـي عـادي دام يصب في المصلحة العـامة ،

ودام الوحدة قبلــت تصور صورة الليسـن بدون نقاب ، خلهـا تسوق بدون نقاب بعـد ..

وأصلا مب فارقة .. يعني اذا وقفها شرطي بيشوف ويهها في الليسن ، وشو المانع انه يشوفه عالطبيعة بعد ؟ عادي ترا الويه هو نفسه ما بيتغير..

وأســاسـا الويـه مب من العـورات ..! فـليش من الأساس هالتشدد في لبسه ؟

وبس .. خطوة موفقة من شرطة أبوظبي أحييهم عليهـا ..،

.
.
الموضوع طرح للنقاش.. و احترام الأعراف الخاصة بأي مجتمع واجب
و مسألة أن كشف الوجه حلال.. فلا خلاف
و لكن للنقاب عند بعض الحمايل من المذاهب..
خطأ أو تجاوز البعض و استخدامه ممكن يتعالج باستصدار دوريات نسائية مثلا أو أي حل آخر لا يثير تحفظ أصحاب هذه المذاهب..
.
.
تحياتي

العجيبه

اللى تتنقب تستحي تكشف ويهها جدام الرياييل

و شي أكيد انه يفرق .. يعني إذا كشفت ويهها جدام واحد غير عن يوم انها تكشفه جدام الكل

هذا اللى أتصوره

.
.

بس طبعا ما أنكر أنه شي منهم يستغلون النقاب لأشيا مب زينه

..

و عليكم السلام و رحمه الله و بركاته
أنا قرأت الخبر مثلك اليوم في الجريدة
بصراحة انصدمت و أنا أقرأ التحقيق
أنا مش منقبة بس مرات لما أسوق ألبس النقاب
لوجود الشباب في المكان اللي أروحه

بس الامر معي عادي
بس مثلا زوجات اخواني متنقبات
من المستحيل انهن ما يلبسن النقاب و يلبسن النقاب لما يسوقن و في المدرسة
فصعب القرار عليهن

في الأخير هذا يعتبر حرية شخصية
بس بعض الناس استغلوه بشكل خاطىء
فيحاسب الجميع على ما فعلت هذه الفئة

قرارات لا نعرف هل هي صحيحة اما لا

الســـلام عليــكم..

قرار جــــــــداً متسرع..

الحين .. غالبيه اللي متنقبات و يسوقون اسمحولهم اهلهم / ازواجهم بالسواقه بشرط انهم يتنقبون و ذاك حفظاً لها و لسمعتها.. بس الحين شو بيسوون هالبنات..! يعني خلاص.. ماشي سواقه ..؟؟

..

النقاب بصفه عامه هو ستر للمرأه.. صح انه مب واجب و كشف الويه مافيه اي مشكله بس في تفكير البعض يعتبرونه شي كبير و مهم و مستحيل يتخلون عنه سواء من البنت نفسها أو من أهلها.

و بعدين يعني هم لو هالكثر متأزمين انه صارت كم حاله في اشخاص اتنقبوا منتحلين شخصيه غيرهم.. ليش ما دوراو حل للشبـــاب قوم بــو 17 سنه و تحت اللي ما يخلون مكان مايسيروله بدون لياسن ..؟؟؟

..

للاسف.. حتى القوانين صارت ما اتراعي المرأه
:smile2: