ليش اتحمل أخطاء غيري ؟؟

السلام عليكم ورحمة الله وبركاته ...

من فتره بسيطه بس انحطيت في موقف ابداً لا أحسد عليه وما كان لي ذنب بكل الي صار انهت وانسبيت من دون ذنب والله لليوم متضايقه من هالشي يعني اذا انا غلطانه ما برمس بس انا مالي ذنب بالي صار ...ليش اتحمل ذنب غيري ؟؟؟
انا بخبركم بالي صار وانتوا احكموا
في اخر اسبوع من رمضان كانت اتيني اتصالات من رقم غريب بشكل فضيع يعني عشرين مسد كول في اليوم وما ارد اتصل اشوف منو لاني ما احب بس مره كنت في الدوام وياني نفس الرقم جان ارد طلع واحد اونه مغلط المهم قلت له انت غلطان وسكرت عنه وحضرته استمر بالاتصالات بشكل يومي وانا ما ارد بعدها بيومين ياني بعد رقم غريب ثاني واتصالات بالهبل اربع وعشرين ساعه استغربت وفي الاخير وصلني مسج " ردي علي احسن لج والا تراني بتصرف تصرف تندمين عليه " انا هني استغربت قلت شو السالفه منو هذا ؟؟ والحمدلله واثقه من عمري مب مسويه شي يخليني اخاف وعشان جذي قلت برد واشوف منو هذا الي يهدد اونه ويوم ياني الاتصال رديت والا اني اسمع صوت وحده واااااااااااااااااااااااا اايد استغربت جان اتقولي انتي منو ؟؟ قلت لها انتي الي منو انتي المتصله مب انا .. قالت لي والله انتي وحده مب متربيه وما ادري شو وتغلط علي واتسبني واتسب اهلي في نهار رمضان وفوق هذا كله اتقولي والله اني واقفه ع السياده وادعي عليج ..
كل هذا الي قالته وانا فاجه عيني مندهشه ما اعرف شو السالفه اصلا هاي منو ؟؟ وليش اتسب وتغلط ؟؟ انا ما بغيت اخرب صيامي وارد عليها بس وايد كنت مصدومه لين في الاخير قلت لها شوفي يلا اتفهميني شو السالفه وترمسين حالج حال الناس من غير ما تغليطن واتسبين يا انج تتريني اتصالي عقب الفطور عشان ارد عليج صح لا انتي ولا عشره من أمثالج يسبوني انا والا اهلي هني الحرمه اشوي اصطلبت وجان اتقولي انتي اتعرفين محمد ؟؟؟
قلت لها لا ما اعرفه جان تقولي والله انتي جذابه انا شايفه رقمج في تلفونه قلت لها ما اعرف حد بهالاسم ما تفهمين وبعد مشاده كلاميه طويله عريضه عرفت أنه هالمحمد الله يسامحه يكون ريلها وراعي سوالف بنات ودوم اتجكه ويوم شافت رقمي في المكالمات الصادره ما جذبت خبر يت وصبت علي جام غضبها ع قولة القايل .. أنا ما أقدر ألومها يمكن اي وحده في مكانها تتصرف نفس التصرف واكثر بس بعد ما يحق لها تغلط علي المهم فهمتها الموضوع وخبرتها انه هو الي يتصل وكل السالفه وسكرت عنها ,, مرن يومين وريلها بعده ع اتصالاته هني انا قلت خلاص مصخها هو وحرمته الريل يتصل من صوب والحرمه اتدعي علي واتسبني من صوب خذت الرقمين وقبضتهم أخوي وهو تصرف بمعرفته ويريروهم المخافر ... أنا ما كان ودي بس الصراحه السالفه مصخت وما حد يرضى ع نفسه ..
واليوم اتصلت الحرمه تترجاني اتنازل عن البلاغ وكسرت خاطري وهي تبي تستر على نفسها وريلها وانا من الاساس ما كان ودي يوصل الموضوع لين هني بس قلت عشان خاطرها هي وعيالها والا الريال والله يستاهل الجلد .. ع كثر نذالته ولعبانه الا انه حرمته متمسكه فيه وتبي له الخير لو انا مكانها بخليه يلتعن وينسجن لين يصطلب ويغدي ريال ...

السموحه جني غثيتكم بس والله من قهري ليش جي الرياييل ؟؟ ليش يسون هالاشياء ما ادري يعني الحين هو كيف يجابل حرمته وعياله عقب سواد ويهه؟ ؟؟؟

كلام كثير في الخاطر لو بكتب من اليوم لين باجر اضني ما بخلص ..

هالشي يحصل ...

وهو سبب مشاكل لزوجتة ولج وفضح عمره بعد ... يمكن لو حده غيرج ماترحمهم وتبهدلهم
لكن هم اللي يابوا هالشي لعمرهم
نفس السالفة
هالشي حصل مع الرضيعة إنه واحد تم يتصل أكثر من عشرين مره
وماترد
وطرش مسج
لكن ماذكر شو يحتوي
واتصل ويوم ردت
قال انت اللي اتصلتي بي
يتهمها بهالشي
المهم فتنت عليه وقالت مابغي اشووف رقمك مره ثانيه وإلا
بتشتكي عليه عند الشرطة
وسلامتج
أقوول موووووووووول لاتتكدرين
الناس درجات في الأخلاق والظاهر هاذيل ...
المهم
لاتكدرين عمرج ولاتخافين من دعوتها
انت مظلومة والله الشاهد
لاتخافين من دعوتها عليج

والله صدقت وانا عن نفسي مب خايفه ولا همتني لا هي ولا ريلها الحمدلله عارفه نفسي زين وواثقه من عمري بس انا ضايقني انه كيف واحد متزوج وعنده بدل البنت هنتين لاطع حرمته بيت اهله في الشارجه وهو ساكن بوظبي يدوام هناك ؟؟ عشان ياخذ راحته بالتقردين واللعبان ...

وايد غمضتني حرمته حسيت لو كنت انا مكانها عادي اتطلق من واحد مثل هذا لانه ما يستاهلها ولا يستحق احترامها هي حاشمتنه وصاينتنه ومحافظه ع بيته وبناته وهو يلعب بذيله ليش ؟؟؟ مب حرام ؟؟

هذي الاشكال احيانا اتكون السبب في انحراف المتزوجات بعد يعني الوحده كم بتتحمل ؟؟ انا ما أأيد هالشي طبعا بس اقول انه هالشي يسبب الخيانه الزوجيه ويجبر الوحده احيانا تتصرف تصرف غلط عشان اترد اعتبارها بس للأسف الحرمه غلطها غير مغفووووووووووووور عند الناس والمجتمع عشان جذه الرياييل مستقويين ويسون الي يبونه كون انه الريال غلطه مغفور وكل شي عادي

الجنيه .. عيل ليش انا طرحت موضوع .. عن ارجو المعذرة .. وتقريبا كان كلامي عن نفس المشكلة
إذا في رايج بتتطلقين منه عسب هالحركة .. فمابغي اصدمج بإنه الكثير اصبحوا يسلكون هالدرب ..
وفي حريم يغفرون للزوج إذا كان يلعب ويعطونه فرصه فوق عشر مرات وتصونه
في منهم يدعون له بالهداية والبعض يدعون عليه او يطلبون الطلاق وفي فئة تسير تلعب وتدمر نفسها
لانها تكون مقهورة من الزوج ..

واللـه انها ناس فاضيـه وماعندهـا سالفـه..

خيبـه..
واللـه لاتندميـن اختيـه الجنيـه، احسـن شي سويـتيه انج حسستيهم انـه وراج حـد عسب محد يتجرأ عليج
والمسـامح كريـم..، اهـم شي انهم حسـوا بغلطـهم

واعتقد واحد مثل هالريـايل ماعندهم دم ، مايحسـون اليوم وياج وبـاجر مع غيرج


لاتتضـايجيـن..

واتركي كل شي ورا ظهرج

السلام عليكم ..

لا تتنازلين قبل مايكتبون الزوج تعهد بانه مايعيدها ولا ترا عادي يرد ينتقم
أو يضرج بأي طريقة لأنه مثل ماسواها بقواة عين أول مره
بيعيدها ثانيه وثالثه عادي مب خايف
من شي يعني
ماله رادع للحين إلا البلاغ وأمشي على القانون أحسن لا باجر يتصلون
فيج وتسبينهم ويبلغون عليج ويطلبون تعويض ترا كل
شي جايز ويمكن تكون السالفه
لعبـه مدروسـه
فبإختصار لا تطولينها وهي قصيره والتعهد كافي ولا تحرقين أعصابج
وإذا صـار في يوم إنج غيرتـي رقمـج لا تعطينـه
لكل حـد ترا مـب كل النـاس
ثقه والسموحه

الاســـطـــوري
أخوكم

مــهــابه
تدرين لو أقول ما بفكر بالسالفه بنساها ما ادري ليش من ايلس روحي ارد افكر فيها وصدق تيني ضيجه عاد الله لا يراويج ويتعكر مزاجي وخصه ان كان الصبح افففف
الله يفكني من هالبلوه وانسى للأبد ان شاءالله


الأسطوري ..لا اتحاتي الحمدلله سويت كل المطلوب يعني تنازلت بعد ما وقع الريال ع تعهد والسوالف الباقيه ...
بالنسبه للرقم انا مب من طبعي من الاساس ارد ع اي رقم غريب اذا حد يباني وبيتصل من رقم ثاني اول يطرش لي مسج يعرف عن نفسه غير جذه لو يحترق التلفون جدامي وبرقم غريب ما ارد *_*

السلام عليكم ورحمة الله وبركاته
اختي الكريمه تجاوزك وصفحك عن المخطا دليل على وعيك
الله عزوجل في هذه الدار يبتلينا ويختبرنا حتى نلجا اليه وما يصيب المسلم او المسلمة من نصب ولا وصب الا وياجر عليه
ليش اتحمل اخطاء غيري ؟
الذهب معدن ثمين ولكن لا يتم الحصول عليه عن طريق السهوله
يتم حفر مناجم في عمق الارض ليتم استخراج الذهب حيث يكون التنفس بالصعوبة والمخاطرة بالدفن احياء في حال سقوط المنجم وغيرها من المخاطر.
يتم اخراج معدن الذهب غير الصافي المختلط بالتراب وغيره من المواد ووضعه في حاويات كبيرة بدرجات عالية جدا حتى يصفى الذهب الثمين عن غيره من المواد.
ثم ناتي الى مرحلة جعل قوالب الذهب على درجات من النقاء ثم صياغتها باشكال جميله ثم وضعها على رفوف المحلات .
مقابل مبالغ غير بسيطة تصل المجوهرات على رؤوس الملكات والاميرات .
بعد الحفر والحرق والاذابة والصياغة تكون النتيجة هذه المجوهرات الرائعة في الجمال .
الله عز وجل يختبرنا ويبتلينا حتى تسمو اخلاقنا وصفاتنا ونكون من الصالحين الفالحين .
بني ادم ان سالته يغضب والله ان تركت سؤاله يغضب.

بن شداد

وعليكم السلام ورحمة الله وبركاته ...

تسلم اخوي الصراحه ردك اثلج صدري وبالفعل حسسني بقيمة نفسي والي سويته ...

الله يصبرنا ويثبتنا ع فعل الخير