الجامعه الامريكيه في الشارجه ..

السلام عليكم ..

حابه اعرف اكثر على الجو الدراسي في الجامعه الامريكيه ....

وكيف نظام التوفل عندهم يعني إذا ما عديته شكثر بدرس انجلش عندهم ..

وعن الدراسه هناك .. شو رايكم بالبزنس ..؟! والهندسه المدنيه ..؟! والمعماريه ..؟!

يعني شو الاحسن وله مستقبل ..؟!

... بانتظار ردودكم ..

:laugh:

إختيه تريدين راي
لاتدرسين بالإمريكيه حولي عالجامعة الشارجه هب الAUS
جرد رااي ولو ناويه عالدرااسه انصحج بالمعمااريه>>>حلميه ان شاء الله يتحقق
ومجرد رااي
أما عن التووفل يريدوونه دولي وعلى ماظن فوق ال5OO مش متأكده,,وكم سنه يعتمد عليج واجتياازج للتحديد المستوى
والسمووحه>>اعرف ماأفدتج بحااجه:kcl:

هلا ؛؛ انا ادرس بهــا ؛؛ بجـاوب على أسألتــج باختصـــار عسب يكـون الجو صافي بالنسبه لج :

نظـام التوفــل : لازم اتيبيـن فوق ال 520 ؛ ( انا اول مادخلتها قبل ثلاث سنين كان على 500 بس الحين رفعـوه ) .

اذا رسبتــي ف التوفـــل بيسـوون لج امتحــان تحديد مستوى بس ف الانجلــش عسب يحطـونج في المستوى اللي يناسبج في برنامج اللغـه الانجليزيه المكثف intensive english program

ونظـام الدراسـه ف هالبرنامج عـادي يعني كلاسات تحضرينهـا ويتمـّـون يدربونج ع الانجلش و التوفـل
ليـن تطوفينـــه .... يعني عادي اتـّـميـن ف هالبرنامج سمستر واحد بس و عادي اتـّــمين فيه العمـر كله
هم مايطالعـون غير انج اجتزتي التوفـــل ولا يهمهم كم تميتي في البرنامج هذا .

نصيحــه : روحي الحيـن وادخلي لج أي دورة تــوفـــل ف المعـاهد الموجوده ف الامـاره اللي انتي فيها وحاولي تقدمين ع التوفـل قبـــل تاريخ 27 / 8 /2006 عشـان ماتدخليـن هذا البرنامج مال اللغـه الانجليزيه المكثـّــف وتختصرين ع الاقــل اربـع شهـور من عمـرج ؛؛؛

والتوفــل وايد سخيف بصراحـه يعني انا خذت لي سمستر ف هالبرنامج وخلاف خذت دورة توفـل ونجحت بسهوله. وفوق ال520
مـع اني خـرّيـج مدارس ( بدو ) يعني حكوميــّــــه وما كنت افقـه ف الانجليزي شي بالمره ميييييييح .


..... وان شاء الله نشوفج ف ستــار بكـس الجامعـــه ههههههههه .

اخوج
منشــوووووري ..


اوه نسيت موقع جامعتنا

banner.aus.edu

بالنسبــه للتخصصـات اللي ذكرتيهـــا :

المعماريــّـه : والله اكشخ شي والتخصص روووعه بكل ماتحمله الكلمه من معنى ؛؛
وهالكليـّــه كمبيوتراتها غيــر عن باجــي الكليــات ف جامعتنــا وحتى نحن مانختلط بهم وايد
وشغلهـم كله حلو وسهـر ف الليل ويباله مهـاره يعني مش لازم بس تكونين شاطره ودحـّــيـحــه ..
( انصحج بــه ) ... يناسـب طبيــعــة البـنـــت ...


الهندســه المدنيــّــه حلـو التخصص ..
واسهل تخصص ف الهندسـه بشكل عام
وهالتخصص يتبـع لكليــّـة الهندسـه غيــر عـن تخصص الهندسه المعماريه اللي
يتبع ( الاركتـكشــر ) ...
شوفـي احس للبنــات هالتخصص مش حلـو يعني فيه مواد مثل ال( Survying ) والـ Urban
هالمواد كله تتكلم عن الشوارع واشارات المرور ومسح الطرق ومدري شو ؛؛
غيـر على ان متطلبـات كليـة الهندسـه وايد صعبه يعني لازم تخلصيـن كورسيـن فيزيا و كورسات الرياضيات الخمس ؛؛وكم كورس ف الهندسه مالهم خص ف الهندسه المدنيه ؛؛ عباله بصراحه
بس التخصص وايد وايد سهل و ف نفس الوقـت وايد حلو يعني بناء الجسـور والعمـايـر وتخطيط الطرق والانفـاق شي وايد روعه والاشيا اللي انتي تبدعينها تشوفينها شوووف عينج مب نفس اللي يدرسون كيمكال او ميكانيكـال او كمبيوتر وجيـــــــــــــــه ...


البزنـس : يعني وايد حلو وفيه تخصصات وايد انا ماعرف عنها شي لاني مالي خص فيها ؛؛

الجـو الدراســي : رووعــه يعني نحن ف الجامعــه نسوي اليوم العالمــي يعني احتفاليــّـه تكون تقريبا مثل القريه العالميـّــه هذا غيـر استضافتنــا بيـن فتره وفتـره لشعراء معروفيـن من الجامعه وخارج الجامعه يعني آخر مره يابـو خالد المريخي وغير استقبالنــا لمحاضريين دينيــّــيــن وندوات اسلاميـّــه
يعني نحن يمكن ف الجامعه يقولون هاييلا عيال الامريكيه ومايعرفون للسنع والسنه والاسلام بس نحن والله عكس واشوف جامعتنا تستضيف العلماء المسلميين أكثـر من جامعات غيــر ؛؛

وايضا نستضيف الشخصيات المشهوره آخـر مره يابــو ( محمد العبــّــار ) مديـر شركـة ( اعمـار ) ..

و والله عادي حتى ( محمد بن راشد ) يحـاضـر عندنـا لانـّــا نحـن نسعـى ورا النـاس الناجحيين والاذكيا.

عسب يلقون محاضرات يعنـــي ...


غير ان جامعتنا فيها تنوّع يعني فيه وايد من دول الخليج وافريقيا والهند وباكستان وايران و امريكان و اوروبييـن ... يعني تقدرين تاخذين راحتـج ف اختيار الناس اللي تبينهم يماشوونـج ...

الجو وايد حلو ف الجامعـه والنـاس جدا محترمه وماحد له خص ف الثاني ؛؛؛ انا ابصم لج ع العشره.

شي ثاني يخليج تختاريين الهندسه المعماريه
ان اغلب المدرسين والدكاتره هناك مش من العرب

اما الهندسه المدنيه اغلبهم من العرب ومن ( فلسطين ) وبعضهم عافانا الله يتعامل بحقد او يطالعج على انج دلـّــوعــه وجيــه ....

التعامل مع غير العرب اسهـل ؛؛؛ لان سياساتهـم واضحـه ومافيه مجال للعاطفه وياهم
بس العرب لا والف لا ...


وف النهايه كل شي يعتمد عليج ...

اشكرك يا منصوري الدوله الصراحه كفيت ووفيت وإن شاء الله المعماريه بإذن الله .. الكل مدحلي اياها ..

تسلم ويعطيك العافيه ..

بتداومين قبلنا بسبوع .. الله يوفقكم ان شاء الله

الله يوفقنا جميعاً إن شاء الله . .

والله زين ما اخترتي ؛ ترى الكليـّـه اللي اخترتيهـا صعبـه ولازم معدلج يكون دوم فوق الـ2.5
ولازم تتميـزيـن هالكليـه ربيعي من نيجيريا كان فيهـا ويقول انها من الاقـوى عالميـــا ؛؛
قلوبنـا تدعي لج .

منشووووري.

بالتوفــــــــــيق حياااتــــــي

خلااص انا حاجزتنج من الحـــين
اباج تصممينلـــي بـــــيت لاصار ولا استوى ^^ وكل شي على ذوقج

---------------

استويتي من قوم الامريكيه عيل
خلااص في البريك بمر عليج اعزميني في الكوفي شوب الي عندكم p:

الله يوفقــــج حبوبة ..

منصوري الدوله .. اشكرك على التوضيح وما قصرت ..

بوظبي + الشحيه ... الله يوفقنا جميعاً إن شاء الله ..

بنت الدلع .. افا عليج ما طلبتي ربع ما نستغنى عن بعض وإلا شو رايج ..