من المنقذ ؟؟؟!!!

السلام عليكم ورحمة الله وبركاته ...


اشحالكم ان شاء الله بخير ونعمه ... الله يسلمكم من دون لف ودوران بدخل في صلب الموضوع مباشره ...
بذمتكم اذا نحن في بلادنا ومأكول حقنا وما نقدر نرمس او أنوقف حد عند حده بذمتكم بيتم خير في هالبلاد ؟؟؟!!
هي أدري أني محتشره وأنتوا للحين ما فهمتوا السالفه بس كنت افضفض عن خاطري والحين بتيكم السالفه ...
الله يسلمكم ويطول بأعماركم البارحه رحت السوق وعلى أذان المغرب حدرت واحد من المحلات وشفته الأخ مشغل المسجل على أغنيه هنديه تجدمت من الكونتر وباحترام قلت لراعي المحل لو سمحت طفي المسجل عشان الأذان ... قالي ما بطفيه أونه هذا أذانكم انتوا أنا مب مسلم يعني ما يخصني بكم ولا بأذانكم ... أنا تغصصت وحسيت أني بصيح يعني ما أعرف كيف أوصف لكم شعوري أنا شو كنت أقدر أسوي عشان أفهم هالتافه أنه أنا مب ضد ديانته أو رغباته أنا كل قصدي بما أنهم في بلاد مسلمه أقل شي يراعون مشاعر المسلمين وأهل البلاد الي ياكلون من خيرها ويكودون الملايين على جبودهم ...
ليش ما يكون عندنا قرار الزامي للمحلات أنه وقت الأذان أقل شي يسكرون مسجلاتهم وأغانيهم ما نبي نفرض عليهم ديانتنا بس أقل شي يحترمونها ...

يعني بلادنا الي فتحت لهم ذارعينها وعطتهم من خيرها ما لها حق عليهم انهم يحترمون ديانتها ؟؟؟ هالشي المفروض يكون من الشخص نفسه بس هذا ما يلغي دور الجهات المسؤله ... نحن ما نرضى على ديننا والمشكله ما نقدر انسوي شي لانه الجهات المختصه ساكته وحاطين ايدهم على خدهم ما جنه بيدهم الربط والفك ...


حــــــــــــــــــــــــ ــــــــــــــرام والله يوم خبرت أخويه بعد ما رجعت البيت قالي والله لو أنا هناك جان دفنته وكسرت المحل عراسه عشان يعرف يحشم مره ثانيه ...

هل أنا غلطت بأني أناشد المسؤولين أنهم يتحركون وما يسمحون لكل من هب ودب أنه يهين دينا ؟؟؟!!!! والله حاسه بغصه وأبي أصيح ما ادري لين متى بنتم جذه أغراب في بلادنا ...


الله المستعان والسموحه أخواني على المغثه

وعليـكم السـلام ورحمـة الله وبركـاته


نتعصـب كثيـرا عنـدما نـرى مثـل هـذه المـواقـف, فـ هذا الأرض هـو المكـان الذي ولـدنـا وتربينـا
وتـرعرعنـا فيـه, ولـن نرضـى بـأي مكـروه تصيبـه, فـمـا بــال ديننــا الكـريم الـذي يجـب علينـــــا
أن نحتـرمـه ونقـدره ونحبــه؟!! بـالفعـل هـو إحسـاس مـؤلم ومحـزن..

ولكــــــن.. مـا رأيـك عنـدمـا تـَرين أهـل بـلادنـا هم الـذين يفعلـون هـذه الأمـــور, ويسمعون الأغــاني
ويتـراقصــون عنــد الآذان؟! أليـس هـذا الأمــر أفــــزع من أن يحــدث مـن قبـل غيــر المسلميـــن؟!!
للأسف شبـابنـا وبنـاتنـا هم الـذين شوهوا مفهـوم ديننـا الكـريم العظيـم, وليتـهم يـدركـون مفهـومـه!!

:fa36:



أشكـركِ على سـرد هـذا الشعـور أختـي الجنيـة
ونحـاول بقـدر الإمكـان إصـلاح المجتمـــع..

:)

الــسلام عليكم ..

نفس الـموقف فــي الـقرية الــعالمــية، كـــانو مشغلين الأغــاني ف صـــاحبــنا هذا استغرب ليش انهم يشغلون الاغاني وقت الاذان، كلم الي يشـتغلون في المحلات و طبعا طنشــوه، فــعلى طول اتصل بإدارة القــرية و خبرهم، طبعا في البداية انكرو و قالو انته تقص علينا، نحن مانشغل الاغاني و هالأغاني الي نسمعها من تيلفونك اكيد برع مب من القـرية، لكنه أصر و قالهم انا واقف في المكان الفلاني تعالو و تأكدو، و فعلا ساروله و شافو و تأكدو و اتخذو الاجراء اللازم ضد المحل الي كان معاند ..
أنــا لو مكانج، و شفــته معــاند بــسير على طول عند الإدارة و بشرشحهم و اذا مـــا فــاد بســير عند راعي المركز ..

أذكر حتى مره كنت في دبن هامز، الي في الستي، أول مـــا حــدرت شــفت هالــمودل الي يلبسونها ثيــاب حق العرض و ملبسينها سلسله عليــها صـــليــب كبــير !!
ماسـويتلهم واحد ثنين، طــرشـت واحد يشــل السلسله من على رقــبة المــودل و عـــطاها الكاشير و قلتله يقــولهم مابا اشـوف الصليب هذا مره ثانيه، لأني اذا شــفته الــمحل هذا بيـتسكر و بتشوفون شي عمركم ماشـفتــوه :kkk: !!
هذا كل شي، و اتمنى انج ماتسكتين عنهم مره ثــانيه :)

الجنيه انتي لازم تعصبين له او تسوين اي شي مب تسكتين

نفس هالمواقف استوت فبوظبي سمعت هالموقف من ابلتنا تقول انها فمكان بس مخصص للحريم

منتزه اضني المهم فكانوا هناك مجموعه من الانجليز مطولين عالاغاني ويرقصون وكانت اشكالهم فيها جرأه فالابلسه سكتت عنهم لكن اختها من النوع العصبي وقالت بروح ارمسهم فالابله قالت خليهم
يولون لانها تعرف ماشي فايده فالبنت سكتت واذن الاذان وهم بعد مطولين فراحت البنت تتوضئ مع الابله فالابله خلصت وردت بتروح تصلي لكن البنت تاخرت والابله عرفت انها راحت لهم والبنت قالت لهم انتو مسويين ازعاج للغير فسكنتنا لكن الاذان ياذن وانتو مطولين عالاقل احترموا فقصروا وقالولها والله نحن وكيفنا انتو تخافوا من الله وتبون الجنه بس نحن نبا النار وبنسوي اللي نباه فبعدين الابله خذت اختها وراحت وهم تموا على رقصهم واغانيهم

يعني هاييل لازم نوقفهم عند حدهم والله لو كنت عندهم بصلبهم وبادبهم بس لازم اي حد فينا ما يسكت عن هالشي لانه بيتحاسب يوم الدين والله يعينا على هاييل

دموع قلم

صدقتي كثيرين هم من نفس الشاكله وللأسف من بناتنا وأولادنا المسلمين الله يستر عليهم ويهديهم ...

بالفعل حال يرثى له ...



لماح...ماشاء الله عليك شاب وجرأي ما يردك شي وزين سويت بهم مسودين الويه ...
المشكله أنا كنت مصدومه من الموقف أكثر من أي شي ثاني وايد تضايجت من الي صار يعني ما كنت متصوره أن ممكن يرفض أنه يسكر المسجل ويرد علي بهاي الطريقه للحين مقهوره من عمري أقل شي كنت أكسر المسجل والي فيها فيها بس ما ادري ليش تبيردت .. بس ماعليه المره اليايه والله لاكسر المحل عراسه مب الا المسجل ...


ريم العين

روحي مقهوره من عمري لا اتزيدوني هم بس فالج طيب المره اليايه بيصير شي يسرج وما يسر أمثاله

مرحبا ..

اختيه، في كل شي لازم تكون اعصابج بـــارده لأن اي فلتان أعصاب ممكن نتايجه اتكون ضدج ..

على سـبيل المثـال، الريال هذا عاندج جان تعاندينه و و تســبينه، أو كسرتي المسجل ..

بما انه حاقد عالاسلام، اكيد بيكون حاقد علينا كمواطنين و مسلمين ف هالشي الي سويتيه بإمكانه بكل بساطه يشتكي عند الشـرطة و بيكون هو على حق و انتي الــغلطانه و بيغرمونج و يمكن فيها توقيف (( الاعتداء على ممتلكات الغير )) و عادي توصل للــمحاكم و يطالبج بتعويض..!

ف دايما، الواحد يحاسب قبل لا يسوي الشـي و يكون أذكى، و اذا شفتيه امعاند، كوني اذكى و سيري عند الي فوقه و صدقيني مابيقصرون ..

و هالكلام مايبته من فراغ، على ايام الرســول حتى يوم كانو ياذونه، ماكان يرد الإسائه بإسائة، حتى اذكر قصـة ان قبيله من القبايل كانت تسكن بين جبلين و كانو دوم ياذون الرسـول ف نزل جبريل و قال للرسول آمرني عشان أطبق الجبلين عليهم، ف رد عليه الرسول و قال له لأ، يمكن ينتبهون و يردون لرشدهم و يسلمون !!

السلام عليـــكم...


اكتفي بقراءه الردود..

اخوووي الغالي لمـــاح..

((ف نزل جبريل و قال للرسول آمرني ))

حبيت اصحح لك هالمعلومه الغالي...

الي نزل ملك الجـــبال ...

والسمووحه:)

اخويه خيال الحــب . .

والله ياخويه انا كتبت الي سمعته من راوي القــصة و هــو قــال جــبـريــل، عالعموم شكرا و بخــبره عـــشــان يتــأكد :)

هلا لمـــاح..

ممم.. هذي القصه لما رجع الرسول عليه الصلاة و السلام من الطائف ، بعد ما دعاهم للاسلام و ردوه و آذوه... فنزل جبريل ومعاه ملك الجبال..

ما اذكر شوقاله بالضبط.. بس كانت في هالموقف.. :)

أيـــوه يعــني جــبــريــل فــي الــســالــفه !!

لأني متــأكد بـأني سمعت اسم جــبريل :nono:

عالعموم هاذي مجرد قــصة، عشان نقتدي بـــأفعال الــرســول . .

اسمحيلي

انتي استخدمتي معاهم اسلوب الامر.. وشي بديهي ان هذا الاسلوب اكثر البشر مايحبونه ويمكن يعاندون بسببه..

النصيحه احسن من الامر.. وشي ناس يمكن تتقبل نصيحتج وناس لا.. والانفعال هب لصالحج..

الله ينصرج دوم لفعل الخير

لمّــاح

تسلم أخوي بس الظاهر انتوا ما انتبهتوا اني قلت كان ودي اكسر مسجله يعني ما سويت هالشي بس هالشي كان في خاطري .. تراني أكتم غيضي فديتني ,,, وعمرها العصبيه ما نالت مني الحمدلله لو في خاطري شي بس الظاهر يكون غييييييييييير بالمره


تسلم على المرور ...


خيال الحب ، شوق القلوب ،،، تسلمون على التواجد ...

الحساس
مرحبا أخويه ،،، بالفعل اسلوب الامر محد يحبه ,, وأنا أبدا ما استخدمت هالاسلوب بالعكس كلمته بصوت واطي حتى لدرجه أنه أختي الي قريبه مني ما سمعتني شو قلت له وأنا أدري أنه هالاشكال ما ينفع وياها العنف او الغصب بالعكس أنا قلت له بكل احترام لو سمحت سكر المسجل لانه يأذن
(would you please switch off the recorder because it's athan time please ) بالحرف الواحد يعني ما اضني قلت له شي غلط ؟؟؟

ما عليه يا خوي الله ينتقم منهم ...