الوظيفة والعلاقات العامة

أنا أشتغل في دائرة حكومية صار لي أكثر عن خمس سنوات بدون ترقية، الي كل يوم والثاني يقولون
بتوصل ترقيتكم .. كأنها الترقية في مطار هيثرو :shocked: وإلا أنا من متى ودي أغير وأسير في مجال ثاني لعل إني أوصل لفوق .. مب شرط المنصب ..

هل في نظركم المنصب أهم وإلا المادة أهم .. ؟؟؟ أم العلاقات الطيبة مع الناس وتكون صداقات يديدة ..

والله سرت البنك وقدمت، وأنا وياكم في إنه وايدين يدورون على وظايف ومش محصلين، لكن الواحد
يحب يتطور من نفسه ... وأنا مهما عطيت في شغلي لكن ما أشوف غير إني أسوي عمل روتين
وخلاااااااص ..

وصح إنه الحين الشركات الخاصة قامت توظف مواطنين لكن المحتاج بيسير وغيرهم بيقول لااااا
دوامين وراتب ضعيف ..

همم شي مميزات ... أنا في خاطري أعرف لو اشتغلت من الساعه 8-1 ومن 4-8 يعني أكثر من 8 ساعات ..

خبرني واحد العام ... عن وظيفته في أحدى وكالة السيارات إنه المواطن الوحيد اللي يشتغل أكثر من 10 سنوات وحصّل انتقادات من ربعه .. كيف تتحمل هالشي .. :crosseyed

يكفينا نشتغل الصبح والعصر ........... أووووووووو ..
قالهم شو ووووووو .. يعني الستي سنتر :rock:


من فترة التقيت بالموظف نفسه ينصحني إني اشتغل في وكالة سيارات .. قال أنا أحب أنصح اللي أعرفهم
بالشي الزين .. شو رايك " المزوحي " تشتغل في أي وكالة .. طبعا علامة الدهشة على ويهي :wow:

قلت له طيب وبعدين هل في مجال اتطور ؟؟؟ قال شو تبغي غير تكون في المبيعات وتتعرف على الناس وتبيع كذا سيارة .. وتحصل كوميشن ... قال والله ربـعي لين الحين يحطون عليّه .. وأنا أشوف لو تتفرغ
وتسير تدور لك على وظيفة مثل هاذي ... بترتاح ..

قال ربعنا اللي في الوزراة واللي في الكهرباء واللي .......... منصب بدون ترقية ...
أنا ماعرف يمكن يتكلم بحكم واحد مش مكمل تعليمه واشتغل أكثر من 10 سنوات ...
قال تكوين العلاقات هاي أشوفها ضروريه وشغله مش ممله ..

امممممممممم الصراحه ذكرتني بنفسي
الصراحه القطاع الحكومي ما يطور الانسان لا , يعني الخبره الي عندك الحين هي نفسه الي بتصير عندك بعد 10 سنين اذا نطرتهم انهم يطورونك:sad:
انا من راي الشخصي انك تبقي بعملك الحكومي لانه مضمون لكن دور لك عن عمل بعد العصر تقدر فيه تحقق ذاتك وتطور من نفسك

والله يوفق الجميع

انا اشوف انه الدوائر الحكومية بتترقا فيها على حسب واسطتك :glare:

اذا ما عندك واسطه خيس مكانك لأنهم لازم يحطون ولد فلان الفلاني عسب ما يزعل البابا

و بالنسبه للعمل في الوكالات

اهم شي في هذه الوظيفه هو الشطاره و اثبات الوجود

بذكرلك على سبيل المثال قصة شاب سعودي كان موضف في شركه ( ساماكو) وكيل فلكسواغن و اودي و بورش في المملكه العربيه السعوديه,,

الشاب هذا كان مب محصل وظائف في الدوائر الحكوميه هناك
و حصل وظيفه في وكاله الفلكس واغن و اشتغل فيها على اساس انها وظيفه مؤقته و بيطلع منها متى ما يحصل وظيفه في الحكومه.
مرت سنه عليه و هو في هذه الوظيفه, و طبعا الريال كان شاد حيله,,
فصدر قرار بنقله الى فرع اودي بحكم انها الماركه "الافخم" في مجموعه ساماكو,,
و شوي شوي ترقا و صار مدير قسم المبيعات في اودي

و بعد فتره طلع قرار بوضعه مدير لبورش على مستوى المملكه

و حاليا راتبه ما يقل عن 25 الف و طبعا سيارة بورش مقدمه من الشركه :fa42:

يعني اهم شي هو اثبات الوجود,,
و التميز :fa42:

و الشغل في الوكاله مب عيب,, بالعكس هالشي بيخليك تحتك بشخصيات هامه و كبيره في المجتمع

انا عن نفسي, اتمنى اني اشتغل في احدى الوكالات, لأني احس انها وظيفه ممتعه و مب وايد متعبه
بس عيبها هو الدوام الطويل

و الله يوفقنا جميعا و نحصل الوظيفة الي نباها :)

المزوحي ..
اتذكرني اب شباب مواطنين من فترة اشتكوا في برنامج (( بو راشد ) قناة عيمان
والسبب في انهم لا حصلو لا ترقيات ولا شياته في منهم امكمل ال 4 سنوات وفي منهم ال 3 سنوات
وهم في نفس المكان وعلى نفس الدرجه
.
.
.
رد عليهم وقال : انهم كمواطنين من حقهم الترقيه ...
.
.
.
وعرفت عقب فترة ان صار اجتماع والسبه الشكوى اللي صارت ووصلت الاذاعه ..
ووعدوهم بالترقيات .. في اقرب وقت ..
.
.
.
والشي الجميل ان الترقية وصلتلهم ..
يعني ساعات الواحد يكرف كراف وما يحصل ترقيه .. واييك واحد وعنده الواو .. ويعطونه بارده ومبرده حتى لو مب هو على قد هالترقيه ..
.
.
.
لكن تدري قاموا الاداريين يخافون ان توصل اصوات الناس للاعلام ...
وتبيها نصيحه مني .. وصل صوتك .. ومادمت على حق لا اتخاف منه ..
لان مافي اداري بيتم على نفس الكرسي طوول عمره .. اكيد راح يخوز منه ..
.
.
.
لكن لو تميت ساكت راح يضيع حقك حتى من بعد 10 سنوات في المكان نفسه
..
خويتك/ الشوق

إبرز نفسك بطريقتك الخاصه .. ولا تعتمد عليهم ابدا .. وصدقني يوم بيشوفونك شغّول و آكتف بيلاحقونك لين باب بيتك

مشكلة عويييصه مثل ما يقولون بس لهاحل اكيد
مثل ما قال ذنيني الشغل في الوكاله مب عيب المهم انته مرتاح
ومقتنع في اللي اتسويه
وجان بتتريا شغل الحكومه يرضي طموحاتك هذا مستحيل
تبغي اطور نفسك لازم تتعب وادور الشي اللي يقدر ييطورك
لا تترياهم هم يطورونك
الله يوفقك في اللي بتقرره وان شاء الله تقدر تحقق طموحاتك

السلام عليكم ورحمة الله وبركاته ...

المزوحي أممم دام السالفه فيها دائره حكوميه عيل أقولك أنسى الترقيه وأحلامها ...

عليك بالقطاع الخاص فرصتك أكبر وخصوصا حاليا يحاولون يوطنون المناصب المهمه يعني في ظرف سنه او سنتين توقع اتصير مدير عام صدقني هذا مش حلم ولا مبالغه جرب وبتعرف الفرق بنفسك ..

بالنسبه للشغل في وكالات السيارات أشوف أنها شغله مضمونه والترقيه فيها مضمونه بعد نادر ما اتشوف مواطن في مثل هالاشغال بس ان وجد اتكون امتيازاته غير والاهتمام منصب عليه ولا تنسى أنه في هالمجال بتتعرف على أشكال و أنواع مختلفه من الناس وتقدر طبعا أتطور من نفسك بشكل كبير كفايه عليك راحه وروتين خمس سنين جرب القطاع الخاص وما بتخسر ..

أهم شي أتكون راضي عن الي اتسويه ومقتنع فيه ..

ختاما ً الله يجدم اللي فيه الخير ويوفقك ان شاء الله ...

المزوحـــي..

اظنك تشتغل في الدائره الحكوميه اللي انا اشتغل فيهـــا..

يقولك لازم اتكمل 6 سنين عشان ايرقونك.. إلا اذا كان ادائك الوظيفي ممتــــاز..

انا بعدني ما كملت سنـــه..

و بعدين اذا اتشوف نفسك اتروم اداوم دوامين.. و عندك وقت فاضي.. و مب مستغلنه... داوم .. و جرب.. و انا احس دوام العصر متعــــــــه.. و يكون الشغل اخف..
و وكالات السيارات.. اشوف وايد ناس يمدحونهم..


وبعدين مب مهم الدرجـــه الوظيفيه اللي انت فيها المهم الراحه النفسيه والقروب اللي تشتغل وياهم..
يعني مب لازم اتكون من اصحاب الدرجه الثالثــه..
صح؟!

كــل اللي تــفضـل بالــرد على المــوضوع أبـعثه لـه شــكرا ...
الـصراحة مـرات تــحتار مــن كـلام فــلان وفــلان .. لــكن الــقرار بـإيـدك ..
أنا اجتهدت ومــب يأي أقـول أمـدح نــفسي .. لــكن عـــشان أوضـح لــكم
إنه بالاجـتهاد " يــصدون عــنك " حـاولت أحــصل تقــييم مــمتاز ..
مـن أول ســنة اُُثبت لهم والـرد كــان مـايستوي لأنـك مــوظف يــديد وبــيحاسبونا
إن عــطيناك .. والســنة اللي بـعدها حـأولوا يــلعبون ورديـت عــليهم مـالك حـجه ..
( جــدمت ) :fa36: حـاولت وياهم لــين مـا اتخـبلوا .......قـالوا لااااااااا مـاشفنا
مـثلك تــستاهل ...،، لــكن مــوعد الــترقية الأسـاسي طـاف وقــته ...
ووعـدوني بالــصبر أول شي ..

" وي " في بالي إني أدور فــرصة أفــضل ..
لــكن مـن مــدة المــسوؤل قااال مـابتحـصل حـد أحــسن عــنا
قــلت له : هه
انــتوا مـابتـحصـلون حـد مــثلي ( دفـــــش ) :sad:

السلام عليكم ورحمه الله وبركاته...

أشوف أنه المكان الي ما ينمي قدرات الفرد ويتطوره...وما يعطيه حافز يشجعه تركه أخير...ومب عيب أنه الشخص يشتغل في وكالات سيارات بالعكس أنا أشوفه نوع من التميز أنه مواطن يشغل وظيفة إقبال المواطنين عليها ضئيل يقدر من خلال الوظيفة يثبت روحه وعقب كذا سنه يوم بيعم التوطين هالوظيفة بيكون هو من أوائل من عمل بها وهذا لوحده تميز ...

وفي البلاد ينتقدون كل شيء وبعدين يسووونه...

السموحة

بسم الله الرحمن الرحيم ..

غنتاي الدوائر الحكومية اذا كانت اتحادية فحقك ما يضيع او بالأحرى اتيك الترقيه كل ثلاث سنوات ..

وبخصوص الشغل فـ الوكاله او أي قطاع ثاني فمالي فيه أي علم ..

ربي يوفقك ويسعدك فـ الدارين ..

طير الحب .. صح ينتقدون وخلاااااااااف يسكتون ... واللي انتقدوه يكون متميز ..

محب الشيخين تسلم عزيزي واللع يوفقنا ...

برغم اني ما اتسلمت مقاليد وظيفتي الا من شهر و شوية و سوالف الترقيــات بعيدة عن عيني ،،

بخبرك ياخوي واقع أدهى و أمر في سوالف الترقيات ..
في مكــان عملي .. وضحولي من البدايـة ان ما عندهم نظام ترقيــات .. و عندهم فقـط شواغر متى ما حبيت اغير وظيفتي اقدم عليها اذا كانت تناسبني و بيسوولي مقابلــة و كل شي .. حالي من حال اي شخص ثاني مقدم ،، يعني تقدر تتخيل الحــال!

اللي احب اضيفه ..
برايي ان الترقيـــات ما تنعطى بحكم انا مواطنين .. لأن لو كان الحال مثل ما البعض قـال ... معناته الكــــــــل بيكونون في مناصب عاليـــــة لأن الفرد منا من يحصل وظيفة يلصق فيها بكل طاقاته و تمر عليه السنوات بدون تغيير .. و الغـريب .. إن نحن انـــادي بالترقيــات و تأخرهــا مع إنا من قوم " مكـانك ســر" يعني من يوم حصلنا على التعيين ما ضفنا شي على رصيد خبراتنا إلا الدوام اليومي و الخبرة اليومية اللي ما عادت تكفي بالمرة ...

عالمنــا اليـوم متغير .. و ما يعتمد على الناس اللي يداومون كل يوم من الصبح للظهر و بس .. الوظايف تبحث عن الأجدر و المتميزين منا .. اللي كل يوم يضيفون شي للمكــان مثل أفكــار يديدة أو ضافوا لرصيدهم الشخصي بدراسات عليــا و حصولهم على شهادات ماجستير أو دورات تدريبية في مجــالهم و موب بس اللي يوفرهــا الدوام ..

ابحث عن المتميز ياخوي ..
فكر تكمل دراستك و تحصل على شهادة في مجال عملك اذا حاب تكمل فيه او مجال ثاني اذا حاب تغير مكانك .. او دورات تدريبية في مجالك .. او ابسط شي .. شوف نظام شغلك .. هل تقدر اضيف فكرة و اطبقها على نطاقك؟

اما الوظيفتين فما اشوفهــا حــل .. لأن الوظيفـة موب كــل شي .. نحن بشر .. محتاجين نكون علاقات انسانية و نقضي وقت مع اهلنا و ربعنــا و نشوف حياتنا الخاصة ..

كــل التوفيق ياخوي ...

طفلة من هذا الزمان .. شاكر لج المشاركة والله يوفقج في عملج ..
حقيقة احترت والاستخارة افضل حل ..
لأنه مب كل موظف حكومي قادر يسوي اللي يباه .. خاصة وإنه وايد أشياء تتغير