ايجابيات المجتمع ( نظرة يحذوها الامل )

السلام عليكم ..


كيف الحال يا اخوانيه هل الواحات ..

من ساعة كــنت يالس مع اخويه وكنا نسـولف ودخلنا عـرض في سوالف المغازل والمواعد والمغربيات .. واخويه يزن على راسي البلاد اختربت والناس استوو حثاله والخ .. ( ياخي انزين انا شو اسويلك ) رفع ظغطي :wacko:

وانا بصراحه طفــرت منه وقمت افكر بالاشياء اللي قالها ..

هل معقول مجتمع اصبح فاسد اخلاقيا ومنحط ??! .. مستحيـــل

بعد القليل من التفكير .. اكتشفت يا اخواني انه مجتمعنا من ارقى المجتمعات مش على وجه الارض .. بل في الكوووون كله .

هل معقوله كل شبابنا لاهيــن ورا البنات والسيايير ؟؟ مستحيــل .. شبابنا اكثــرهم خريجين جامعات ومثقفين ويمسكون اعلى المناصب في الدوله واثبتو جدارتهم فيها .. واكبـر مثال عندنا امارة دبي ومشاريعها ( اغلب المسؤولين عنها من المواطنين الشباب ) ونتمنى نشوف هالشي في سائر الامارات .

هل معقوله بناتنا تخلن عن عاداتهن وتقاليدهن واصبح همهن الميك اب والزينه بس ?? .. اللي اعرفه انه البنـات عندنا هن الاشطر في مجـال الدراسه و بنات حوى في دولتنا اثبتن جدارتهن في كل شي من الهندسه لين الطب الى التربيه وحتى التجاره .. والعـــسـكــريــه بعد :fa38: .

مجتمعنا لين اليوم ما زال محافظ على عاداته وتقاليده واصوله الطيبــه .. ونحمد الله على هالشي .. لو دولة ثانيه على الهجره اللي تزيد كل يوم على اماراتنا كانت ثقافتنا بتنطمس وبتستوي كوكتيــل ثقافات .. ولكن العكــس ثقافتنا لا زالت هي ثقافتنا .

بعد هالتفكير البسيط اقــول الحمدلله لا زال الخيــر يطغى في مجتمعنا على كل ما هو سيئ ..

كـلام كان في خاطري وقلته

اخوكم e-mail

و عليكم السلام اخويه بريد إلكتروني

رايي من رايك ياخوي الحمدلله شبابنا صارت اهتمامتهم ارقى من جيه صاروا يهتمووون بدراستهم اكثر من سوالف البنات و الخراابيط
و الدليل انه من 10او 20 سنه(بالضبط ماعرف) قليل من الشباب تكاد تكوون معدووومه و ماتنطرا يدشوون الجامعات و يكملونن دراستهم >>>>> نسبه كبيره اتجهت منهم للدراسه و مب بس جيه صارت طمووحاتهماكبر عن شهادة و بس صاروا يكملوون بعد الجامعهو يقدموون ماجستيير


والسمووحه اخوي e_mail
your sis

الاخ ايميل (بريد الكتروني )
اشكرك على حرصك وحبك لبلادك وغيرتك عليها وعلى شبابها .
اخوي الفاضل الحمد لله رب العالمين بلادنا فيها الناس الطيبين الاخيار اللي
متمسكين باخلاقهم الحميدة وعاداتهم العربية الاصيلة وشبابنا وبناتنا فيهم
الخير والبركة واثبتوا انفسهم ووجودهم في الكثير من الاماكن والميادين
العلمية و الثقافية و الاجتماعية واذا كان هناك البعض القليل من الفئات
المجتمع تسير وراء الموجة وتخلت عن الكثير من المبادئ والقيم والاخلاقيات
الطيبة فهذا الامر بسبب تطور الحياة وسرعتها جعلت البعض منهم يجري ويلهث
خلف أمور براقة لكنها خادعة و مزيفة .. وكل مجتمع ما يخلو من هذه الاشكال الشاذة
وهالفئة ولله الحمد قليلة وهناك الاغلبية العظمى اناس محافظين ومتمسكين بالفضائل
والسلوكيات الطيبة ويحافظون على سمعتهم وسمعة بلادهم نقية ناصعة البياض ونقول
الله يكثر من امثالهم ويوفقهم لكل خير .

السلام عليكم و رحمة الله و بركاته
الموضوع حلو و لكنه كثر الحديث عنه هذه الايام , و لكن ما أريد أن أقوله أن الشباب سواء البنات أو الأولاد قد تغيرت نظرتهم نحو الكثير من الأمور و إن رأينا فئة معينة فلا نستطيع أن نحكم على الفئات التي نراها بل مانرى من أعمال الشباب
خصوصا أن معظم السباب الآن يطمح للحصول على أعلى المراتب في مجالات شتى في المجتمع
أنا أعتبر أن المجتمع لا يزال بخير و أن شاء الله سوف نرى رفعة المجتمع بمساعدة هؤلاء الشباب
و لكم كل المحبة

السلام عليكم

ممكن اشارك ؟

السلام عليكم...

اسمحلي اخوي انا اخالفك ... بس قبل لا اذكر رائي حبيت انوه على شي ...

انت ذكرت بالبدايه ان اخوك رمس عن سالفه المغازل ,, ..و... اوكي
وانت بديت بهالشي بالموضوع وبعدين عفدت على سالفه ان الشباب مثقفين... ممكن اعرف شو علاقه هذا بهذا..

هل تقصد ان المثقف مايغازل والامي هو الي يغازل؟؟ ولا قصدك اهتمامات راعي العلم بعيد عن المغازل؟؟

المهم..

بالبدايه ابغي ارد على نقطه الي ماسكين مناصب...

واحد من الي ماسكين مناصب... زخته حرمته باللي وهو على الكومبيوتر ويالس يطالع افلام وصور جنسيه.. قالت له كلمه وحده.. اختار حبيبي.. اما انا او الصور الجنسيه ... الريال استحى طبعا..

هب شرط الي ماسك مناصب مايغلط او يغازل.. على العكس ان اشوف ان شهرته في مجاله تغطي على سلبياته وتهتم الناس فقط بنجاحاته .. لكن المسكين الموظف الي على قد حاله اقل شي يصدر منه نزلوه!!

اصابع يدينك هب شرات في الزين وفي الشين...

بس مستحيل ان الوضع الحالي من مجتمعنا افضل عن السابق!!! هذا اي عقل او منطق يصدقه!! المعروف ان كل مجتمع بالدنيا باي مكاان على وجه الارض .. الي الانحطاط مضطرد.. لكن هذا هب يعني الي التخلف لالا اكيد في بعض المجتمعات ومثال (الامارات) في تطور عمراني وثقافي..

يوم ارد البلاد واحوط فيها مع ربعي ويخبروني عن اخر الاخبار والسوالف .. ينعصر قلبي الم من الي اسمعه واوشوفه من انحطاط الي وصلت له بلادنا.. اتحرى بس الغرب الي عندهم السوالف البطاليه لكن للاسف حتى بلادنا فيها....

المجتمع بخير من ناحيه التطور في العديد من المجالات.. لكن.. هب بخير من ناحية الاخلاق لانها كل ماياها للاسوءومثل مايقولون ياما تحت السواهي دواهي وهاالمثل من ناحيتي اطبقه على مجتمعنا..

شكرا لاتاحة الفرصه للنقاش...

اخويه الحساس احسك طلعت عن الموضوووع
اللي يقصده e_mail انه قبل كان هم الشباب المغازل و هالسوالف بس الحين مابقولك كل شي تغير في الشباب بس اللي اتغير انه اهتمامهم بالدراسه زاد

المسامحه.. اذا فهمت الموضوع بشكل مختلف..

تحريت صاحب الموضوع يرمس عن هب كل الشباب هب مثقف .. شي المثقف وغيره ..

الي هب مثقف صايع.. والمثقف مستقيم..

فانا بينت انا هب كل مثقف مستقيم...

:)

الحمدلله وبالفعل بعدها البلاد بخير
ومثل ما تفضلت الشباب أثبتوا جدارتهم والدليل المناصب اللي ماسكينها وبعدين أهتماماتهم ما عادت تنحصر بالمغازل وملاحق البنات بالعكس زادت نسبه المنتسبين للجامعات وهالشي ان دل فأنه يدل على وعي الشباب وإيمانهم بأهميه الفرد والتعليم....
لكن لازال هناك فئة لا يستهان بها تشوه صورة شبابنا ومثل ما قال أخوك بالفعل البلاد أختربت يمكن هالفئه تمثل نسبه بسيطه من أفراد المجتمع بس المثل يقول السمجه الخايسه أتخيس السمج كله
يعني نظره متفحصه لحال الشباب وأييك الجواب ....

الله المستعان
تحياتي الجناويه