مشاركة: ما عدت بحاجه لشهادتي
تسلمين يالشوق على طرح هالموضوع المهم...
بالنسبه لاسئلتج راح اتركها لغيري يجاوبها بس احب اضيف على ماتفضلتيبه..
وبقتبس مثال..
نحن الي درسنا الطب اما بالخارج او الي بداخل البلاد... عند قرب نهاية مرحلة دراستنا وقرب التخرج وبعد التخرج قبل التوضيف... نفكر بشئ لا يخطر على البال.. وهو
رغم ان استثمرنا 7 سنوات في دراسة الطب الا اننا نفكر وجديا بعد ان ننهي دراستنا فقط نعلق الشهاده على الحائط ونسلك طريق اخر للحياة العمليه.. السبب...
ان الدوله لا تقدر جهودنا بحيث لا توجد امتيازات ((((( تفضلنا )))) على غيرنا.. والسبب اني قلت تفضلنا لاننا بذلنا مجهود اكبر في العلم عن غيرنا وبالتالي نستحق الافضل وعلى حسب الاولويه..
لكن للاسف الي يتخرج من بزنس من اي جامعه في البلاد ويشتغل يحصل كثر الي يحصله الطبيب اول مايشتغل وتكون هاي بداية احباطات الدكتور في مجاله العملي
طبعا كل فتره يرفعون الدكتور درجه لكنه لا يتعدى كثيرا عن اي تخصص ثاني..
ربيعي تخرج هندسه اللكترونيات واشتغل في داس ويحصل 18 انا مااظن راح اوصل لهذا المعاش الا بعد 20 سنه او اذا فتحت عياده خاصه..
طبعا يمكن البعض يقول اني افكر من الناحيه الماديه .. وارد اقوله انا ماتهمني الماده .. كثر مايهمني ان الدوله تعطيني القدر الي استحقه من تقدير معنوي او مادي.. عسب اكمل مسيرتي الي بدات لها..
وعن نفسي ماخبي عليكم شقيت لي طريق يديد واعتبر نفسي مبتدا فيه.. لكن بحاول اتمرن عليه اكثر عسب يكون الخط الاحتياطي البديل عن الطب... والي الان الحمدالله فالح فيه..
ماسردته فوق يشابه ماتفضلتيبه في نقطه وهي..
ان المسؤول الاول هي الدوله.. عدم وجود قوانين ولا دراسات استراتيجيه والكل فكره نفسي نفسي .. هي من دفعت عجلة سقوط الطلاب في شرك الانقطاع عن الدراسه والالتحاق بالجيش..
وسلمتي..
مشاركة: ما عدت بحاجه لشهادتي
السـلام عليكم ورحمة الله وبركاته
الصراحة أنا أشوف إن اذا الواحد مب فالح في دراسته 4 أو 5 سنين رسوب في نفس الصف ..
بعد شله يكمل الدراسة وهو واقف في نفس النقطة ما تحرك !!
يسيـر الجيـش .. تراه يرحب بمثل هالناس تفيد وطنها وتحميه
وفي نفس الوقت ما يسبب خساير للدولة اللي كل سنة توفر له مقعد دراسي وكتب غيره يحتاجونها أكثر منه
وبعـد عشان يعتمد على مصروفاته بروحه بدل ما يكون عاله على اسرته والمجتمع
يعني وايد فوايد بتي من ورا هالجيش بالنسبه لطالب فاشل دراسيا
أكيد الجيش ما بيشجع الجنود على اكمال الدراسة لانهم بيطالبون بترقيه بعدها
فاللي يبا يكمل ، يكمل لانه طموح .. اما الباقي مستانسين لهالمستوى اللي وصلوا له
وبالعكس وايدين مب جيه يالسين .. صحيح جنود لكنهم يشتغلون شغل ثاني مصدر للماده .. البورصه أو العقارات مثلا ..
أعرف واحد عميـد في الجيش .. يقولج دخل الجيش وكان فـراش يصب شاهي وعنده شهادة صف
خامس .. الحين سيري شوفي وين مكانه وويا منو .. والا شوفي نادي ضباط الجيش وين مكانه فيه ..
بعد في بعضهم ما يكملون أول ثانوي يسيرون الشرطة .. ويا سلام على كلية الشرطة .. ما تقصر فيهم .. اتردهم وكل واحد عنده رتبه محترمه ..
يعني نقدر نقول ان الدولة هي اللي تجذب الشباب للجيش والشرطة .. تسهيلات وامتيازات تعيبهم ..
تعالي صوب الجامعي اللي يهلك عمره سنين وهو يدرس ..
بالواسطة بيحصل مكان يقبله .. أو يمكن ما يحصل .. وها اللي حاصل عند وايدين
ولو حصل .. بتكون امتيازاته عادية محد يقـدر فيها شهادته .. عادي يحطونه مجرد موظف واللي يترأسه وافد .. مثل ما يصير في أدنوك مثلا ..
أنا مب ضد الدراسة .. لا لا بالعكس .. الأفضل انه الواحد يكمل ..
بس لو فاشل نصيحة ما يكمل الا اذا كان عنده عزيمة واصرار لتخطي مرحلة الفشل ..
وأكيد ما نقدر نكون بدون شهادة جامعية
لانه لو كل واحد بيدخل الجيش .. بترد البلاد مثل ما قبل النهضة
وووشكلي وايد ارمس
شكرا لج يالشوق ..
والسموحه
بايوو
مشاركة: ما عدت بحاجه لشهادتي
دكتورنا الحساس ..
اتفق معاك في نقطه مهمه ذكرتها .. الا وهي ان الدوله احيانا لا تقدر جهود الطلبه اللي تدرس وتتخرج وتحمل شهاده بكالوريوس ومماجيستيرودكتوراه ايضا ..
لكن !!!! عندي لك نقطه مهمه حابه اثريها لك
ان الشهاده هو سبيل نجاح كل شخص .. لان يولده طموح في حياته .. رؤية مستقبليه لينظر للامام ..
كثيرون منا لم نحصل على ذاك العمل الذي نريده ، وهناك الكثيرون ايضا الذين مازال البحث عن الوظيفة جاريا ...
فالانسان ان لم يحصل على العمل الذي يريده من وراء شهادته ..
فقد يفكر في عمل اخر ليبني فيه مستقبله ..
فقد تفيده شهادته ..
لكن !!!! الانسان الذي يحمل الشهاده الاعداديه اي طموح قد يعتريه .. وهو لا يملك اي نية لاستكمال دراسته ..
قد يحصل على المعاش والراتب ..
وقد يشتري فيه ما يريد شراؤه .. لكن يبقى هناك .. نقص ..
فقد واجهت الكثيرون من تلك الفئة الذين حتى فقدوا فيهم روح .. القراءة .. والمطالعه .. لدرجة ان قراءة بعض الاوراق لا يستطيعون قراءتها لانهم توقفوا عن استكمال دراستهم ..
على العموم ..
تسلم يا دكتورنا على المشاركه الرائعه منك
وسلمت
الشوق
مشاركة: ما عدت بحاجه لشهادتي
العجيبه ...
هلا الغاليه احترم رايج .. عزيزتي ..
لكن لو حللنا بقاء الطالب اربع او خمس سنوات في نفس الصف ..
تقريبا اعتقد بيكون من سنتين او ثلاث في تكرار كل صف ..
لكن شو سبب بقاء هذا الطالب في نفس الصف على فصول متتاليه ..
بنقولج اهمال الطالب نفسه .. او لا مبالاته ..
الاهمال اما يكون من الطالب نفسه .. ولا مبالاة الاهل بتدريس الطالب ومتابعة دروسه ..
فالاهل لهم دور كبير .. في حياة ابنائهم من الناحية التعليمية ..
عزيزتي العجيبه ..
الشهاده تلعب دور كبير في ترقية الطالب ... من رتبة الى رتبه ..
يعني بالنسبه لجيلنا الحالي الطالب اللي في المرحله الاعدادية .. لو تم بين خمس الى عشر سنوات في الجيش .. الرتب اللي بيحصلها بين الجندي والعريف ..
ولو اتكلمنا عن الجيل السابق .. بقولج حتى اللي ما خذو الشهاده او كانو عندهم شهاده اعدادية .. يمكن في الفترة الحاليه وصلو لرتبة وكيل وملازم .. وغيرها من الرتب ...
يعني لو قارنتي بالسنوات اللي عاشوها هم والسنين اللي عايشينها جيلنا الحالي .. بتحصلين ان مازالت لديهم مشاوير طويله للحصول على الترقيه ..
انا معاج .. ان الدولة تجذب الشباب للالتحاق الى الركب العسكري ..
لكن ليش الدوله ما تجذبهم انهم يتعلمون .. يشجعونهم على التعليم ... فالتعليم ..
انا ما اعارض التحاق الشباب الى الركب العسكري .. لكن يلتحقون وهم على مستوى عال من التعليم .. يلتحقون للجيش او الشرطه .. علشان يكون لهم رؤية مستقبليه والى الامام .. انهم ممكن من خلال شهاتهم اللي يمتلكونها .. راح يحصلون ويوصلون الى اعلى الرتب .. واعلى مستوى حتى من الناحية المادية ..
ليش رؤيتهم للشهاده مقصورة ومحدده بالنسبه لهم ..
لانهم يشوفون ان هناك شي بديل ممكن يعوضهم ويوصلهم باسرع الطرق الى ما يريدون شراءه ..
انزين .. ليش ما يكون طموحي اكبر من كل هذا .. اكمل تعليمي .. والتحق في الجيش واحصل على اعلى الرتب . وارتقى الى احسن المستويات ..
في النهايه الشهاده لها دور كبير في تغيير مسار حياة الانسان ..
وتسلمين الغاليه على المساهمه والمشاركه
خويتج/ الشوق
مشاركة: ما عدت بحاجه لشهادتي
المشكلة هي في إفتقاد الدافع للدراسة و مثل ما نعرف الدراسة مب شي سهل أبدا أو مجرد رحلة لكن هي رحلة و نهايتها مفتوحة على كل الاحتمالات بتكلم عن نفسي لأني طالب في بداية دراستي الجامعية معظم الأوقات أفكر بالمستقبل أن تكون عندي سيارة لامبورغيني مثلا لكن هذي كم جيمتها فوق المليون أحاول أطرد عن نفسي هالأفكار و أركز على دراستي أكثر لكن متأكد إني لو فكرت في أشياء إلي ممكن أسويها في حالة تركت الدراسة الجامعية مثل سيارة الكورفيت و بالمناسبة هذي سعرها أي شخص يقدر عليه فأعتقد ساعتها إني بترك الدراسة الجامعية ...
