فـُـتات أوراقي

<font color='#000000'><p align=center>هاي القصة لصديقتي القلب الحزين حبيت أنقلها لكم

فتات أوراقي
للكاتبة: القـ الحزين ـلب</p>
<p align=center>*الناس في بسمتي بالحيل منخدعـة.. ياكـم وراهـا طفـيت النار بانفاسـي..
&nbsp; بعض المواجع لها ماتنفع الفزعة.. كلما جرعـت الحـزن رد امتلا كاسـي..
&nbsp;عودت نفسي اسـاير هزة الفجعـة.. وان دست جمر الزمن ماينحني راسي..
*" ذياب المزروعي"
رديت بذاكرتي 25سنة للورا قبل ميلادي حتى يعني ايام السبعينات
كلثم وهي حامل في شهرها الثاني يتها حمى ويتها بعد الحيّاطه " الربو" وكانت في هاي الفترة بعد تاخذ حبوب مهدية من كثر ماكانت عمتها مأذتنها ومطفرتبها حياتها من كثر حنتها على أبوي إنه يعرس وياخذ حرمه ثانيه ليش i don&#39;t know? المهم .. كلثم ماكانت تعرف انها حامل إلا بعد ماكملت الشهر الثالث إتفاجأت .. وعدت أيام الحمل بصعوبة وتعب وارهاق&nbsp; وآلام لا توصف على كلثم وهي ساكته وصابرة..
مبارك كان وايد يحب كلثم وكان يخاف عليها ومن كثر حبه لها كان يبا يسويلها اللي تبها يعني احلام كلثم كلها اوامر بالنسبة لمبارك وهي كانت عارفه ها الشي وهي بعد تحبه وايد وماكنت تحب تزود عليه وماكانت من النوع الاستغلالي ..مبارك أول ما بشروه بالبنت وربت حرمته زادت فرحته أكثر من اي شي لانها طلعت بنت وهو حلم حياته البنات يموت فيهن ويحب البنات وكان يتمنى ان عياله كلهن بنات بس مايقدر يعترض على القدر واللي ييي من الله حياه الله مع ان مبارك عنده ولدين أحمد وسعيد بس مافرح بيهم كثر فرحته بموزه بس الكل استغرب على مبارك وعلى ينانه .. واللي سواه والذبايح اللي انذبحت عشان هاي البنت اللي اتخيل انها كفت العين كلها حتى هل بوظبي اياميها وصلتهم من ذبايح موزه حبيبة ابوها وقلب امها .. مع العلم انه من زمان محد كان يداني البنت يعني يتحرونها مصدر شؤم.. وكثر كلام الناس عن ينان بو احمد على بنته واللي يقول عنبوه كل هاذا عشان بنت ليش مسوتله سحر عافانا الله الولد ماسلوه جي شو هي الا بنت ومن كثر الكلام والحسد اللي انقال على هاي البنت الظاهر يتها عين ولين يومها تعبانه من ها الشي لكن مانريد نلوم الحسد بس لكن هاذا قضاء الله وقدر هاي البنت..
عانت كلثم وايد ويا موزه كانت كله تعبانه من أول يوم وف أول شهرين لا حظت كلثم على بنتها اعراض المرض .. كانت كله تزرّق وتختنق يوم اتصيح وجسمة يتحول للون الأزرق وكل ماكانت ترضع كانت تختنق وماتروم تكمل .. كلثم ما عيبها الحال اللي كل يوم يزيد للأسوأ .. ثاني يوم سرحت وودتها مستشفى الجيمي
" على ايام الجيمي الجديم" وعرضتها على الدكاتره...
الدكتور: .. الصراحه يا مدام الحالة غريبة مش عارف اشرحها دلوقتي بس ياريت تعملي ليها فحوصات الاول وأشعة علشان نشوف فيها ايه بالضبط؟
الأم: بصدمة وخوف.. وويها انجلب اصفر وعيونها من الزيغه مارامت تبطلها: ليش يا دكتور بنتي شو فيها
الدكتور: يا مدام مانعرفش لسه بس خلينا نتاكد من التحاليل والشعة الأول وبعدين نتكلم إصبري..
الأم: بتنهيده حزينه .. الله يصبرني ان شاء الله يا ولدي.
وبعد ساعتين من الفحوصات والاشعات والام في حال لا يعلم بها الا الله وهي مب قادره توقف على حيلها وخلاص شوي وبتطيح على الارض من التعب .. ودخلت عند الدكتور.. وتوه بينطق الدكتور وبيتكلم الا وهي قاطعه عليه رمسته
الام.. وبكل خوف على ضناها .. ها يا دكتور طمني ارجوك شو فيها بنتي لا تغبي عني شي
الدكتور: ..بابتسامه .. اطمني يا مدام بنتك بخير والحمد لله
واتخر الام على الكرسي وتتحمد ربها وتشكره وبدن دموعها ينزلن
وكمل الدكتور كلامه: بس يا مدام..
وهني طاح قلب كلثم ثاني مره.. ونقزت من مكانها بس شو يا دمتور ليش ها الاذيه اللي تاذيني بها قول وخلصني تراني خلاص اكثر من جي ما اقدر اتحمل
الدكتور .. اهدي يا مدام مافيش حاجه بنتك بخير بس هي فيها ثقب بسيط وهيروح مع الايام ..
الام : ثقب وشو ثقبه ها وكيف فيها ثقب وبخير انت تخبلت ولا شو
الدكتور .. انا عاذرك بس صدقيني دا ثقب في القلب وبيروح مع الايام لانه لسه صغير ومع العلاج ان شاء الله بنت هتبقى بخير
الام : الله يطمنك يا دكتور ويسلم غاليك ولا يراويك فيهم ضيم ابد
الدكتور : ان شاء الله المهم انتي دلوقتي تهتمي بيها كويس وان شاء الله بعد شهرين تيجي علشان اكشف عليها واطمنك ان الثقب راح خلاص
الام : مشكور يا دكتور ماتقصر عساك سالم ف مان الله
وتطلع الام من عند الدكتور ماتدري تفرح ولا تحزن ولا شو بالضبط بس بعده قلبها ناغزنها ومقبوض ماتدري ليش بس قالت في خاطرها يمكن من خوفي ومحاتاتي حق بنتي</p>
<p align=center>الجزء الثاني
وبعد ماوصلت كلثم البيت لقت شيخه تترياها عند الباب وشكلها كان يخوف
وربعت على كلثم اللي كانت وايد خايفه من انه يكون شي استوا في غيابها حق عيالها ولا ريلها اللي مسافر ويا الشيوخ باكستان حق القنص هو وابوه..
شيخه: ها جلثم شو صار شو قال الدكتور شو فيها موزوه خبريني بكل شي ولا تغبين عني ؟؟؟
كلثم: الله يهديج يا شيخه يننتيني وخرعتيني انا قلت شي مستوي شوفي ويه شقايل اصفر وعينج مبلقات جي حرام عليج والله اني مب ناقصه مغثه ..
شيخه: جلثوم قولي لا تراج خرعتيني شوفيها موزوه
كلثم: مابلاه شي يا بنت الحلال الحمدلله بخير والدكتور طمني بس يقول ان فيها ثقب في القلب
شيخه: عوذ بالله انتي من صدقج الحين ها الكلام ولا شو..
كلثم: هي والله بس الحمدلله بيروح مع الزمن يعني مع نموها ومع الدوا اللي كتبلها اياه
شيخه: ربها الحالة مب جايده
كلثم : لا الحمدلله والا انتي تعرفيني مابخوز من المستشفى الا يوم بطمن على ضناي..
شيخه: هي والله ادريبج .. زين عيل يلا قومي خلينا نزهب الغدا..
كلثم: شيخوه الا قوليلي مبارك ما اتصل ولا ياه عنه خبر
شيخه : هي ماقلتلج ..
كلثم : ها شو اتصل
شيخه : هي اتصل وقال بييون قريب
كلثم : متى قريب يعني
شيخه: وانا شدراني شو قالولج عالمة بالغيب زين منه بعد يوم عرف يتكلم
كلثم : هي والله الحمدلله اني اطمنت والله يرده على خير ويهونها علي
شيخه بنظرة لؤم وغلاسه: وهي تغمز بعيونها: ها جليثم شو السالفه اقول تولهنا ولا ما نقدر على البعد
كلثم: وهي محمرة من المستحى : انزين وشو فيها ريلي ولا زم اتوله عليه وهي بعد ما اقدر على بعده عندج مانع
شيخه : لا ماعندي بس ..
كلثم وتقطع رمستها: بس شو يا الذكيه انا بس مب عارفه شقايل بخبره على موزه واللي فيها
شيخه: لا ولا يهمج انت قدها
كلثم: الله يسمع منج
ودشن ثنيناتهن داخل البيت
ومرت الايام والبنت على حالتها وكل يوم والثاني وكلثم تطمن عمرها وتقول باجر بتصح ولكن بدون اي نتيجه
وصل ابو العيال واليد من باكستان قبل موعد موزه بيومين ومن كثر ماكلثم كانت تهتم في موزه بدات تهمل عيالها الثانيين أحمد وسعيد ودوم عمتها تهزبها عشان العيال الا يوم ثيابهم خايسه ويوم مب مسحيه شعرهم ويم مب مسبحتنهم بس اللي كان في كلثم يهد جبال وكانت شيخه تحاول تهتم بقدر الامكان في عيال اخوها بس هي بعد ماكانت تحب وايد انها تشل وتحط العيال لانها بعد كانت تساعد في البيت من طباخ وتنظيف
اليوم السبت الساعة 12 ونص الظهر
شيخه وشمه في المطبخ وكلثم في البيت تنظفه من داخل الحجر والميلس والحوي والعيال ويا اليده في الحوي يالسين يلعبون وياها والبنت من التعب راقده على ريل يدتها
ويتبطل الباب ويدش مبارك وايوه ويربعون العيال على ابوهم وتقوم مريم" اليده" وتحط موزه على الارض وتنش صوب شيبتها تحبه على خشمه ويلوي مبارك عليها ويحبها على راسها وايدها وين البنات ركيض من المطبخ على صوت العيال باباتي يا ويدي بعد عموووووووه مامااااااااااااااااااتي تألوووووووووو
ويت شيخه وشمه وحبن ابوهن على راسه وايده ولون على مبارك&nbsp; وكلثم سلمت على ريلها وحبته على خشمه وسلمت على عمها بعد
ويم التفت مبارك على بنته لقاها نايمه على الارض ويروح صوبها وعيونه كلها حب وحنان ويشلها من الارض ويحبها على راسها ويحضنها واللي يشوف عيون كانن مغرغرين ومتروسات دموع بس بسرعه التفت صوبهم ويلسو كلهم رباعه وخلوا البشاكير يكملون الغدا ويزهبونه عشان يتغدون
يلس مبارك يسولف عن الرحله والعيال على ريله والكل كانو اذان صاغيه
مبارك: تعرفين امايه ابويه ثاني مره مابنشله ويانا
محمد " اليد " : باستغراب ليش؟
مبارك: ها ابوي تباني اخبرها شو سويت وهو يغمزله
محمد: قول يا مسود الويه شو سويت بعد
مريم والبنات مبطلين حلوجهن ومب عارفين شو السالفه
مريم: قول ياولدي شو مسوي ابوك بعد ادريبه سواياه قول بس قول
محمد: ايه يا حرمه شوبلاج انتي تصدقين ها الفرخ
مريم : وليش ماصدق ولدي
محمد : ها ولدج وانا منو
مريم: ريلي بعد منو
محمد : اقول يا حرمه خلي عنج على الهذره وتعالي اباج شويه
مريم: لا مابيي وياك الا يوم اعرف شو داسين عني
والعيال كلهم ميتين على عمرهم من الضحك ومب قادرين يرمسون ومريم ومحمد تقولون ديج وديايه يتناطحون
مبارك : امايا خلاص بخبرج بعدين روحي شوفي شيبتج شو يبا انا بعد بروح اتسبح لين ما تحطون الغدا
مريم: حشا ولا ماسرت الا يوم بعرف السالفه
محمد: ها ارتحت الحينن هكيت حلفت شوف منو بيقومك من هنيه الا يوم ماتقول سالفتك هاي الا مامنها فايده
مبارك: انزين انزين خلاص بقول ويتنهد مبارك وياخذ نفس عميق وبدا يتكلم
شوفي يا طويله العمر ريلج ها ما خلا حرمة الا وغازلها
والكل منصدم ويقوم محمد ويمسك ولد من ذنيه ويلويهن ومريم تزاعج عليه عشان يهد الولد
ياريال خله خله يكمل ولا انت خايف محمد حشه منج ياحرمه انتي تصدقين ها الياهل الله يا الدنيا الحين انا ياهل عيل منو هاي ومنو هاذيلا ياشر على حرمته وعياله مب جني ريال ومعرس وعندي عيال لا والله بعد ياهل اقول امي ابوي بعد بيعرس عليج وهني خلاص مبارك ماقدر يتحمل ومات على عمره من الضحك
ومسكته امه وابوه يضربونه&nbsp; وخواته البنات يحايزون امبينهم وكلثم تضحك عليهم وشوي الا دموعها نزلن وربعت على حجرتها قبل لا حد يشوفها والباقي ما حسوا بها وبعده يلعبون لقا حمد الغسول محطوط عداله ويمسكه ويجبه فوق راس خواته ويلحقنه ويربعن وراه لين المطبخ وكل وحده شلت كوب ماي عشان تفره على اخوها مبارك انتهز الفرصه وشرد على حجرته واندس وسكر الباب بالمفتاح عشان محد يروم يدش عليه وهو مب رايم يتنفس من كثر الضحك وهني يسمع صوت صياح في الحمام .. راح صوب الحمام يتسمع مبارك :منو هني
كلثم: وهي زايغه ومارامت ترمس
مبارك: منو هني جلثم انتي في الحمام
كلثم : ومب طالع صوتها وتون
مبارك: انزين بطلي الباب تراج زيغتيني
بدون رد
مبارك: جلثم الله يهديج بطلي الباب لاكسره
كلثم كانت تعرف انها لو ماردت على ريلها بيسويها وبطلت الباب الا عقبه انصدم مبارك من شكل حرمته عيونها حمر وويها اصفر ومب رايمه تشل عمرها وطاحت عدال باب الحمام ويربع مبارك ويشلها ويحطها على الشبريه وكان عداله كوب ماي صب منه شوي على ايده ومسح على وييهها وهي بعدها تصيح
مبارك: حبيبتي شو فيج انتي زعلانه مني
كلثم تهز راسها بلا
مبارك عيل شو زعلتي اني لعبت ويا هلي وانتي لا
بعد هزة راسها انها مازعلت
عيل شو فيج حبيبتي والله هميتيني عشان خاطري قوليلي
انزين مالي خاطر عندج وغلات موزوتي عندج قوليلي
وهني جنه بطل عليها كل الجراح وصاحت من الخاطر وهي حاطه ويها في صدره وتصيح وهي تقوله مبارك بنت موزه تعبانه وايد ومادري شو فيها ومب عارفه شو اسوي والله اني خايفه عليها دخليك مبارك طمنوني على بنتي حاسه ان قلبي مب مصدق الدكتور وانه يجذب علي مبارك دخييييييييلك ابا بنتي تعيش والله حرام مااروم انحرم منها
مبارك مبهت ولا عارف شو يقول مسك وييها وخلا عينها في عينه
جلثم شو فيها بنتي وشو قال الدكتور اهدي جي وخبريني بكل شي لا والله الحين اقوم اذبحلج ها الدكتور قولي
ردت عليه كلثم من بين دموعها وهي تقول مبارك الدكتور يقول ان موزه عندها ثقب في القلب وهني جنه حد صب ماي بارد على ويه مبارك وصخ وماعرف شو يقول وكملت كبثم ويقول انه صغير وانه مع الايام ومع نمو جسمها بيروح هني تنهد مبارك وقالها الحمدلله يعني مخاوفج هاي مالها داعي خرعتيني يا بنت الحلال والله ان قلب طاح في ريولي حرام عليج وهني يسمعون امه تزقرهم حق الغدا مبارك : يلا غناتي قومي غسلي ويهج وما عليها الا العافيه ويلا خلينا نقوم نتغدا تراني ميت من اليوع حبيبي بخبرج بشي بس مابا حد يعرف عنه شي
امر يا مبارك قول شوعندك سمعيني بس دخلج مافي على المشاكل بس بعد بيموت لو ماخبرت حد
قول انزين تراني فضوليه وتغمز بعيونها اللي كلها منفخه ومحمره وهو مات على عمره من الضحك لانها يوم تغمز ماتعرف تغمز بعين وحده ها عاد قول وبسك ضحك عليا اعرف اني مااعرف اغمز يلا افتي يا استاذ
انزين ابوي عرس وحده من باكستان انصدمت كلثم انت شو تقول والله نفس ماتسمعين ها اللي صار وهني سمعوا شموه وشيخه يدقون على الباب ويصارخون عليهم ايه انتوا بسكم حب الحين تراني بعد يوعا يلو شو انتوا ماتستحون وهني يتبطل الباب ويطيحون ثنينتهم لانهم كانو ساندين على الباب وفطسوا اربعتهم من الضحك المهم راحوا كلهم واتغدوا واتموا يسولفون عن شو سووا في الايام اللي طافت وكل يوم يعدي يقرب من موعد المستشفى وكلثم تحاول انها تكون طبيعيه ومع ذلك مب قادره لان قلب الام حاسس باحساس غريب ...
وبشويش وبصوت واطي دش سعيد حجرة اخته موزه اللي كانت يالسه عدال الدريشه تطال برع على الحديقة وهي سرحانه في عالمها الخاص ومب حاسه بان في حد وياها في الحجره ( سعيد اخوها اكبر عنها بسنه 26سنه) وانتفضت على صوت واحد يالس يشعر ويقول:
الزيــن هــذا حــلـو ٍ وزيــن .. ..&nbsp; خِصّه يَلِي لِبسْ القلايد
&nbsp;فـتـّان يســبي القلب والعـيـن .. ..&nbsp; به الحسن والزين زايد
&nbsp;ما شفت انا في وصفه اثنين .. .. ترف الصبا غض النهايد
&nbsp;من وين هذا الريم من وين .. ..&nbsp; لـي صـار لـلـغـزلان قايـد
&nbsp;مفنود عن كـل المـزايـيـن .. .. نـوره لـنـور الشـمس عايـد
&nbsp;في مبسمه در ٍ مـثـامـيـن .. .. يــك ٍ ودانــات ٍ فــــرايـــــد
&nbsp;عوده إذا هب الهوا يْلـِينْ .. .. فـــارع ومـيّــاس ونـــايـــد
&nbsp;تحلى به الأوصاف وِتْزيبن .. .. وتزين به حتى القصايد
وسلامتكم</p>
<p align=center>( موزه بطلة قصتنا 25سنه )
موزه : صح لسانك بوعسكور بس جنها هب غريبه علي ها الكلمات
سعيد : افا عليج عاد يا مويز ماتعرفين شعر اخوج افا والله ماهقيتها
موزه : خل عنك بس انت اونه شعر اخوج" وهي تقلد اخوها"
سعيد : عيل شعو منو بعد
موزه : طال عمره بوخليفه منو بعد الله يخليه لنا
موزه : امين يارب اسميج مب هينه
سعيد : قل اعوذ برب الفلق حشى بسك عيونك تراها صفرا وحاره
موزه : هههههه سمعوا منو يتكلم الليدي موزه بنت مبارك تفتي
سعيد : اقول سعود شو يايبنك صوبنا وشو ها المناسبة السعيده اللي حذفتك علينا مثل قنبلة هيروشيما
موزه : بسم الله منج ومن فالج عنبوه قنبلة اسميج ماتعرفين تشبهين روحي لا الغلط مني انا اني ياي ومتعبل واعبرج بعد مالت عليج
موزه : وتضحك على ويه اخوها اللي اغتاظ بس بعده ميود الضحكه تحت غيظه ويوم شافها ماروم يمسك عمره وضحك
سعيد: ها بعد شو تبين ليش تطالعيني جي الواحد مايعرف يعصب منج هب بنيه اسميج انتي شر
موزه: الحين يوم اني ماروم اخليك تعصب استوي شر نزين باباتي روح عصب على كيفك
سعيد سكت وتم يطالعها كانت يالسه وحاظنه ريولها تقول ياهل ويالسه عدال الدريشه ويوم شافها جي غص وجمده الدمعه في عينه وابتسم حق اخته
موزه مستغربه من اخوها اللي توه يالس يغايظها وينكت وياها
موزه: سيعيد شو ياك بسم الله توك ماشاء الله تنكت وتسولف والا انا حسدتك اقول اخوي صدق انا عيني صفرا واحسد
سكت سعيد وعقب طالعها وقالها: لا فديتج بسم الله عليج انتي تحسدين انتي بس تنحدسدين بسم الله عليج من عيوني ومن عيون كل البشر
موزه:احم احم لا اغتر بس وبعدين خل عنك شو فيك جي صخيت مره وحده وتقول جنك بتصيح
سعيد : نعم صاحيه انتي ولا شو في ريال يصيح
موزه: مادل يمكن ليش لا شو انتو هب بشر بعد ولا يمكن الحريم غير عنكم
سعيد مارد عليها وحاول يغير السالفه : اقول موازي يلا ترا امي تتريانا على الغدا
موزه: قول والله وانت يالس من الصبح تهذرب وتنكت وجلبتها في الاخر دراما وانا بموت من اليوع
سعيد: بسم الله عليج من طاري الموت يلا حبوبتي قومي نشي وخلينا ناكل تراه موزه وحده ما تسد يوعي بس يلا يمكن تنفع حق التحليه ويطالعها بنص عين ومغايض
موزه: تروم انت بس والله جان احمد قطعك ونتفك لا والا امي شو بتسويبك بتقطك حق السلطه نفس الخيار اللي يقطعونه حق التبوووووله وتطلع لسانها وتربع تشرد عنه عشان مايضربها
سعيد : ويربع وراها على الدري موزوه اقولج اتريي عنبوه شو ارنب يربع
وهني يظهر احمد من حجرته وهو نازل صوب الدري ويشوف سعيد يربع ورا اخته موزه ( احمد اخوهم العود 27سنه)
احمد: سعووووووووووووووود وصمخ ان شاءالله
وقف سعيد وفلخ من الزغيه
سعيد: عنبوه شوفيك ليش جي تزاعج وشو سعود بعد لا اكون اصغر عيالك وانا مادل
احمد: انت تخبلت ولا شو
سعيد: ايه شو فيك بسم الله خدتني بشراع وميداف شو فيك حلمان بي ولا شو
احمد: انت الحين من صدجك تربع ورا اختك انت ماتدري انها ماتروم تربع ولا انت تخبلت ولا شو سالفتك
سعيد وهو زايغ ومبعت وتوه تذكر: والله اني نسيت الله يلعني والله نسيييييت يابوك فديتها يالسه تلعب وياي وجان تربع وهي تسبني وتغايظني وقمت بليا حاسيه ارع وراها شرات اليهال اوني عاد العب وياها الله ينطب بليسها
وقبل لا يكمل كلامه انتبه احمد وسعيد ان موزه عند اول الدري وسامعه كل كلامهم ويصخون ثنينتهم ويحطون ويههم في الارض وهي هاييج الساعه تربع وتنخش في الميلس وتصييييح وزنل احمد وسعيد الدري ربع وهم يدورون على اختهم ودشوا المطبخ مالقوها وتفاجاوا بامهم واختهم الصغيره هند( هند 23سنه اصغر من موزه بسنتين ) سكتوا ثنينتهم واطالعوا امهم
الام : شوبلاكم تطالعون بعض شو مسوييين
الاثنين سكتوا وماعرفوا يتكلمون
احمد بعد شويه: امي ترا ممممم اوهوو مب عارف شو السالفه بس روحي شوفي بنتج كل بسبتك يا الهرم والله انك خبل وماتعرف شو تسوي في حياتك " وهو ياشر على اخوه سعيد
الام: وهي مب فاهمه شي : شو فيكم وشو فيها اختكم ووين هي الحين
احمد : امي مادري بس هي ربعت عنا وكانت يالسه تصيح
الام: ياويل حالي على بنتي شو سويتوبهابعد هي ناقصتنكم
احمد: انا مايخصني البركه في ولدج ماشاء الله عليه اللي تقولون عنه صار ريال
سعيد: اقول عن التطنيز تراني ساكتلك من الصبح
الام : اقول قومو اتكفخوا بعد تراكم ماتستحون ولا تخيلون مني
توهم بيتكلمون وتقطهم الام
الام: اقو وينها اختكم راحت
الاثنين يهزون جتوفهم ويقولون انهم مايعرفون وين
وهني هند بطلت حلجها وتكلمت : تراني شفتها سايره صوب الميلس تربع يمكن بتحصولنها هناك
الام وباستغراب تطالع هند : وانتي شعنه مارمستي من الصبح
هند وهي تطالع ظفورها وتجلبهم بدون اهتمام حتى انها تلتفت حق امها : وعقب يلست على الكرسي وخذت نفس عميق ماحيد حد خذ رايي او سالني عشان ادز بويهي واقولكم
سعيد وهو مفول ومسكر ايده على شكل بوكس وياي بكفخها الا احمد وقف جدامه وهو يدز اخوه ويقول : هدوني عليها هاي مسوده الويه شايفتنا كلنا متخرعين وزايغين وهي ولا جنه في شي مستوي عناللاتج زاد صدق انج ماتستحين ولا تخيلين
وتهدهم الام يتضاربون وياي بعض وتروح صوب الميلس وتحصل موزه ملتويه على الارض وتصيح بسكوت بس دموعه اللي تنزل وعيونها مغمضه بكل قوتها ويت ويلست عدالها وحطتها في حظنها وتمت تمسح على راسها وتسمي عليها :" قل اعوذ برب الفلق من شر ماخلق ومن شر غاسق اذا وقب ومن شر النفاثات في العقد ومن شر حاسد اذا حسد وتمت تعيد ومن شر حاسد اذا حسد ومن شر حاسد اذا حسد " صدق الله العظيم شوفيج يا حبيبتي موزوتي قوليلي غناتي شوفيج شو سوابج سعود واحمدوه وهني موزه تنبق في الصياح وتصيح بصوت عالي وتشهق من كثر ما انها ماتروح تصيح وهي تقول مبين دموعها : امايه والله اني مليت .. والله تعبت .. شو ها الحال.. كل ماواحد فيهم لعب وياي ولا تكلم... خاف ولا زاغ انه حتى يكمل .. خايفين تضحكوني لا اتعب.. خايفين تضايقوني لا يزيد علي التعب.. خايفين تزعلوني لا امرض.. خايفين تتكلمون وياي عشان ما تعب .. والله انها هاي هب حاله .. شو انا ناقصه ايد .. و لا ريل .. عن الخلق.. امي .. والله اني مليت .. وحتى كرهت المرض .. كرهته والسبه انه.. حرمني من اللعب وياي .. خواني.. امايه قوليلي .. انا هب طبيعيه.. ولا شو .. والله حرام .. اااااااااااااااه يا امي.. تعــــــــــــــــــــبت ومليت والله هب حاله .......
الام: استغفري ربج يا موزه حرام جي هذا كفر بالله وانتي مؤمنه بربج ولا شو
موزه مبين دموعها : استغفر الله العظيم واعوذ بالله من الشيطان بس يا امي والله تعبت من كثر ماتحسسوني اني ما اروم اسوي جي ولا حتى اي شي
الام: يا بنتي انتي احسن عن غيرج الحمدلله انتي كامله والكامل الله يكفي الخلقه الزينه ويكفيني شوفتج كل يوم وشوفت ابتسامتج اللي تخوز الذيق ويكفي انج الحمدلله تمشين على ريلج وعايشه مبين هلج غيرج يا موزه عايشين في المستشفيات ولا يرومون يحتركون من شباريهم هذيل شو نقول عليهم
موزه : ماقول شي بالعكس احمد ربي اني احسن عن غيري بس بعد كلكم تحسسوني بالضعف بعد انا انسانه ليا مشاعر وخصه هند اللي ماتحترم حد ماتخليني في حالي
الام: وانتي شعبيج منها خلها تولي هاي حماره ولا تسواج بس انتي استهدي بالله خوانج ملومين عمارهم داخل ولو تشوفين حمود شو مسوي في سعيد ليش صدق سعود شو سوابج
موزه : والله فديته ماشي ياي يقصدلي بعد ها يزاته وانا سبيته وضحكت وياه وهديته وربعت بس
الام : هي جي السالفه عشان جي حمود شاب ضو ماعليه خلينا نروح الحين نتغدا ونعين خير وعقب الغدا بنتفاهم انزين
&nbsp;موزه وهي تلوي على امها : يعلني ما اخلى منج يا اطيب قلب في الدنيا منلي غيرج الله لا يحرمني منج ان شاء الله
الام: امين يارب ولا يحرمني منكم يلا قومي


في انتظار ردود افعالكم
تحياتي لكم
اختكم
&nbsp;دموع <img src="http://oasis.bindubai.com/emoticons/fa41.gif" border=0>القلب</p></font>