خصخصه يدوو

تقول ( يدوه)، يا أبوية ما ادري متى بنعتدل ونستوي مثل الانجريز ( الإنجليز والغرب)، قاطعتها قائلا: نحن من وين يانا عوار الرأس، كله من الإنجليز، مشاكل الحدود منهم، مشكلة الشرق الأوسط منهم، بس آخر أيامهم تعلقوا بأمريكا وصاروا ذيلها، هزبتني يدوه قائلة: صا، خلني أكمل رمستي،  عندك شيء بتقوله  بعطيك الفرصة بعدين، طلع كل اللي في خاطرك، عبر عن شعورك، مرة لا تخلي شيء، حرية التعبير موجودة، محد  ويانا وإن دش حد الحجرة بنغير الموضوع، هذي الايام كل حد يدور عن الإرهابيين يمكن يبون يفتكون منا ويقولون إرهابيين، ويودونا منتجع ما  ناموا في كوبا!، بس تعال شيء عندهم مكان حق العيايز ولا المعسكر مختلط؟، تراني مب سايرة هناك بدون محرم.<?xml:namespace prefix = o ns = "urn:schemas-microsoft-com:office:office" /><o:p></o:p>
 <o:p></o:p>
رجعت يدوه إلى محور حديثها، يا أبويه نحن دوم نسمع عن الخصخصة، كل يوم يطلع واحد من قوم بالبشوت في التلفزيون والجرايد و يقول نحن لازم ندخل عصر الخصخصة، ونحن عشان نطور خدماتنا يبالنا خصخصة، وكل يوم والثاني رمسونا عن الخصخصة، وساعات ينقزون من الخصخصة لين المعلمة ( تقصد العولمة)، الحين نحن مب عارفين شو نبا، الخصخصة ولا المعلمة، عليكم بشيء واحد ويوم تخلصونه عليكم بالثاني، نحن يوم نشتغل نبغي كل شيء يستوي بسرعة ويزهب دهديه، شرات شركة معمار مال العقارات، ما خلص مشروعهم الأولي وكل يوم عافدين بمشروع جديد، بس قاهرني هذا مشروع (المرابع) اللي يطرونه من مدة، عنبوه جيه من قلة الأماكن يسوون مكان الناس ترابع فيه، والله  الحدائق  والشوارع تسد ، ما يحتاي نسير مكان بعيد نرابع فيه، وترى الناس مب هامدة من طلع البترول وهي ترابع، الولد نسى أبوه، والاخو باع أخوه، وأمريكا ترابع وراء العراق، كله من المرابع وراء بترول العراق.<o:p></o:p>
 <o:p></o:p>
هيه وسمعت إنهم بيخصخصون الكهرب ( الحديث ليدوه)، ويبغون يخصخصون أشياء وايد بعد، لكن يوم بيخصخصون الكهرب شو بتسوي الناس المعفاية من تسليم الفلوس، اسميهم بيتلعوزون، غصبن عن ابوتهم بيدفعون، وإذا ما دفعت بتستوي شرات الصخامة ( الجمرة) في القيض، وتغدي ريحتك من العرق شرات ريحة القطو الميت، يعني بتدفع وتنقلع عينك!،  بس أهل رأس الخيمة ما بيتضررون الكهرب في كل الحالات مقطوعة عنهم.<o:p></o:p>
 <o:p></o:p>
عيل زين جان بيخصخصون وزارة العمل والشؤون، وياها بعد وزارة التربية تراهم مقصرين في التربية، أولاد المدرسة يطلعون من المدارس ناقصين تربية هالايام، الله يذكرك بالخير يالمطوعة (بخيتة) ما طلع حد من عندج إلا متأدب ومتربي أحسن تربية، ما قصرتي بالخيزرانة اللي  نطقت على ظهورنا، و لو يحطون  وياهم هاي الوزارة المخططة عسب يخصخصونها يكون أحسن، ، لو حطوا شركة تخطيط تخطط أخير لهم من خطوطهم مب السنعة، وزير المخططة كمل عشر سنوات لين ما عرف عنوان المجلس الوطني، اسميها حالة، قاطعت ( يدوه ) لأوضح لها أن وزارة التخطيط تعنى بوضع ورسم الخطط للوزارات الأخرى من اجل الارتقاء بالعمل، ردت بثقة: محد في يوم من الأيام مدحهم، الشوارع مب عدلة وتصميمها غلط، يسوون شارع يديد وعقب شهرين بدلوه، أصلا يقولون هاي الوزارة حاطينها تكملة عدد، و أسميني ضحكت يوم كتبوا عنها في الجريدة اونها الوزارة تطبق معايير الجودة، أول مرة أشوف جودة على اليلسة بلا شغل و مشغلة.<o:p></o:p>
 <o:p></o:p>
لا و العجبة  في عجمان، من زود البوالبع الطافحة عندهم فكروا يخصخصون البواليع ، السكان لازم يدفعون من 10 آلاف لين عشرين ألف درهم ولا تراهم  بيقطعون الماء و الكهرب عنهم، شو هالظلم، في ناس ما عندها 20 ألف روبية هندية وين 10 آلاف درهم، في ذمتك يا أبوية مب ظلم يخصخصون البواليع على حساب الناس، بس يقولك لين الحين محد طايع يدفع لهم، يقولون بنشوف آخرتها وياهم شو بيسوون.<o:p></o:p>
 <o:p></o:p>
ادريبك يا ولدي بتقولي شو يخص هالرمسة كلها بسالفة ما نعتدل ونستوي شرات الانجريز، هيه تراها السالفة ياية في الطريق، لا تستعيل على رزقك ولا تاكل القرص وهوحار يمكن تحرق صوابعك!، قالتلي شيخة بنت يارتنا فطيم انه الخصخصة شيء زين حق فلوس البلاد، يعني هذيلا المخصخصين يسوون مثل التجارة، يتابعون شركاتهم عسب تستوي احسن واحسن عن قبل، ويحطون فيها ناس فاهمين عشان ما تستوي خساير ولا تتضرر الناس، وخبرتني كيف الناس تشغل فلوسها في الخصخصة، وهذا الشيء زين عن تطلع فلوسنا برع ويستفيد منها الانجريز.<o:p></o:p>
 <o:p></o:p>
عسب جيه شوف انت الانجريز، ما تم شيء عندهم إلا خصخصوه، شركاتهم تابعة للحكومة بس مخصخصة، المواني والمطارات كلها نفس الشيء، وحتى العراق بخصخصونه، منطقة حق الانجريز، ومنطقة حق الامريكان، واذا بقى شيء بيعطونه حق العرب،  و اذا نجحت السالفة ما يندرى يمكن يخصصون باقي الدول العربية، و يستوي العرب مخصصين، يقولون بولندا بعد تبا قطعة، من زمان ما سمعنا عنها و الحين داشة عرض في سالفة العراق.<o:p></o:p>
 <o:p></o:p>
الانجريز مول ما شيء لعبة عندهم، في البيزات والفلوس الواحد ما يعرف والديه، بس تعال عاده عندنا نحن العرب، كل شيء عندنا بالمقلوب، ما نعرف رأسنا من كرياسنا، صدق ولا يا أبوية، ادريبك بتقول لي كيف؟، عندنا يوم يخصخصون يحطون نفس المسئول، نفسه هذا الفاشل اللي ما يعرف يصرف الأمور يحطونه مرة ثانية، أصلا  لو فيه خير جان مشى الشغل عدل، ليش يخلونه رئيس المخصصة اليديدة، يعني بينزل عليه الوحي هالمرة وبيمشي على الصراط المستقيم، المخصصة عند الانجريز تسوي فلوس وتخلي الشغل يمشي تمام التمام، بس عند العرب المخصصة تسوي فلوس تدخل جيوب ومخابي المسؤولين، السائق و السكرتير و الموظفين كلهم يشتغلون حق المدير، شوف أنت كل هالمسؤولين اللي حطوهم في المخصصات، شوفهم قبل و الحين، الفرق وايد، شرات الفرق بين سكان السطوة ايام بيوت الصنادق و سكان الممزر الحين،  لو يطبقون قانون من وين لك هذا جان ناسوا طاحوا في السجون من زمان، مثل ما اقل ربيعك ابو بريص اللي يسرق خمسين درهم لص و اللي يسرق الملايين رجل اعمال.<o:p></o:p>
 <o:p></o:p>
يدوه  ( الحديث لي) شويخ ما سوت خير يوم رمستج عن الخصخصة، اشلج في البحر وأهواله وأرزاق الله على السيف، يدوه أنت الظاهر خرفتي وبديتي تتكلمين في أشياء مالج خص فيها، وشكلج ما بترتاحين لين ما تعقينا في مشاكل، أنت وايد عليج تقرضين براقع وتخورين سراويل. <o:p></o:p>
 <o:p></o:p>
فجأة احتدم النقاش بيننا بصورة لا يمكن وصفها، حدث تراشق بالألفاظ وانتهى النقاش بأن رمتني جدتي بفنجان قهوة قالت إذا فيك خير اكتب عن هذا الموضوع، فالح بس تكتب عن الحريم، و مخلي القراء كل يوم و الثاني يحطون عليك في المجلة!، و تم إبعادي لفترة لم تحدد حتى الآن عن منزل جدتي.<o:p></o:p>