مستحيل احب احد بعدك ( قصة حب )

في احد دول الخليج وفي احد الايام اشرقت الشمس كالمعتاد ولكن هذا اليوم بالتحديد اشرقت الشمس غير بنسبة لأحمد& أميرة ...
كان السبت 7/9/2002
ام احمد : احمد يبه الباص الحين راح يمر عليك ..
احمد : ان شاء الله يمه .. كاني ياي
وهو ينزل من على الدرج والابتسامه على وجهه .. احمد طالب مجتهد دوم الاول بالكلاس .. وهالسنه هي اخر سنه له ثانوي .. وفرحان لانه اخيرا راح يحقق حلمه .. ويدش ان شاء الله الجامعه ويصير .... مهندس

ونزل احمد وراح صوب امه اهداها بوسة الصباح وقال لها يمه ادعيلي اول يوم لي بالمدرسة واخر سنه ان شاء الله ..ابي افتك يمه ما تدرين شلون انا فرحان .. الام وهي مستانسه على ولدها الله يحفظك يا ولدي ويبعد عنك كل سوء..
ويخرج احمد وبيده كتبه ويروح خارج البيت ينطر الباص .. واول ما طلع شاف بنتين كل وحده احلى من الثانية بس وحده جاعده اطالع فيه من فوق لتحت ..كأنها اول مره تشوف ولد .. والثانيه شكلها منهمكة في شيء يأيدها .. راح احمد ونسى البنات .. بس وهو نص الطريق تذكر انه نسى محفظته داخل البيت ..كان يرجع ويدخل الييت ويجيب المحفظة .. وهو طالع المرة الثانية كان اطيح عينه بعين البنت اللي كانت تقرأ الكتاب .. واحمد سرح في عيونها السود الواسعة وهي علقت عينها بعين احمد بعد ..
احمد: يا ويلي انا من العيون السود.. (يكلم روحه)
اميرة ( من دون احساس): شو؟؟؟؟
احمد : صباح الخير.
اميرة بتكبر :صباح النور.
وتركب اميرة السيارة وهي وفطوم صديقتها .. ويروحون للمدرسة وفي الطريق..
فطوم: اموره اشفيج ساكته؟
اميرة: ولا شيء .. بس ..وتسكت
فطوم: شو ؟ وبس؟ اصلا انتي من اول ما شفتي الولد وانتي سرحانه..
اميرة: شو قصدج يعني ؟
فطوم وهي تضحك: ولا شيء .
اميرة: اقول فطوم.. انتي تعرفين من هالولد ؟؟ انا اول مره اتشوفه بالمنطقة..
فطوم: هالولد توهم منتقلين منطقتنا .. ويسكنون بالبيت اللي يقابل بيتكم .. كانوا في (.......) منطقة تبعد عن منطقة اميرة بـ 13 ساعة .
اميرة : يعني اول مره يسكنون العاصمة.
فطوم: لا هم اصلهم من العاصمة بس ظروف شغل والده اضطروا يتركون العاصمة.
اميرة: يا عيني عليه.. وسيم وايد..(بدون شعور.)
فطوم وهي فاتحة عينها للأخر: شو؟؟؟؟؟؟؟ اميرة لا يكون حبيتي الولد من اول نظره؟
اميرة: لالا بس اعجاب .. ما شفت ولد بقد وسامته..
ويوصلون المدرسة .. ويمر اليوم ثقيل على اميرة ..تبي ترد البيت علشان تشوف الولد اللي حبته من اول نظرة ..
في مدرسة احمد..
احمد جاعد وسرحان بالبنت اللي شافها وسحرته بجمالها .. واول ما رد البيت جعد بحديقة البيت ينطر البنت.. واول ما وصلت سيارة البنت ..كان يدخل احمد البيت.. وتم يطالعها من الشباك .. واميرة عيونها على بيت احمد بس ما شافته..
احمد: يا ليت اكلمها .. او اعرف عنها شيء .. يا ويلي انا من جمالها .. بس والله شكلها وايد حبوبه انا لازم اتعرف عليها ..بأي طريقة ..
اميرة: اكيد بعده بالمدرسة .. انا بنطره بالحديقة ..و
وتقاطعها فطوم: شو يا سلام على بنت الاجواد ..شو تبن تنطرين الولد .. ياعيني عليج يالله اتشوف دشي البيت .. وخلي عنج هالولد ..ترى يمكن يكون عنده وحده لان ولد بوسامته مستحيل مو عنده جيرل فريند ..
كان تدخل اميرة البيت وعينها على بيت احمد ..
واحمد يشوفها من الشباك.. ودخلت اميرة البيت .. وجعدت بالغرفه طول الوقت سرحانه وتفكر بالولد اللي تشافته.. واحمد بعد كان يفكر فيها ويسال نفسه انا دوم اتشوف بنات اشمعنى هالبنت بالذات شاغله بالي .. لا يكون حبيتها ؟؟ ... وليش اول ما علقت عيني بعينها قلبي فز من مكانه ؟؟
ومر اليوم ..
وفي صباح اليوم الثاني ..
قرر احمد انه يكلمها .. على اساس انهم جيران .. وقطف ورده من حديقة البيت وراح صوب البنت .. وهي جاعده تنتظر صديقتها فطوم عشان يروحون المدرسة ..
واول ما وصل جنبها .. ما عرف شو يقول لها او شلون يبدأ .. وبعدين اميرة كانت منهمكه بشيء كان بأيدها يعني ما شافت احمد وهو واقف جنبها ..قام احمد ورد خطوتين ورا .. وقرر انه خلاص يرجع لانه قال اكيد بتعصب وراح تزفه من الصبح .. ورد احمد خطوة ورا خطوة.. وهو راجع سمع صوت عذب ..
اميرة: صباح الخير ..
احمد ( وهو ما مصدق شو اللي سمعه): صبااااااااح النور ..
وصوت فطوم جنب اميرة: صباح النور اميرة..
كان تضحك اميرة وفطوم على موقف احمد ..لان احمد رد عليها وهي كانت تقصد فطوم ..ويضحك احمد رغم انه تفشل قدام البنت .. وراح وعيونه على اميرة ..
ووصل باص احمد .. واحمد بأيده الورده.. ما عرف شو يسوي خاف من تعليقات الشباب عليه.. راح وحط الورده على السيارة اللي اميرة تروح بيها المدرسة .. وكل هذا واميرة وفطوم يطالعون احمد .. واول ما ركب الباص وراح .. مشت اميرة وراحت صوب الورده واخذتها وحطتها بالكتاب اللي كان بأيدها ..
واحمد طول الطريق يفكر ..أميرة .. والله انها اميرة .. اسم على مسمى .. اميرة بكل شيء .. وهو يفكر يا ترى اميرة خذت الورده او لا؟؟
واميرة تفكر ..يا ترى شو اسمه ؟ وليش حط الورده عالسيارة .. الورده لي انا او لفطوم ..و ..( تقطع فطوم حبل افكار اميرة)
فطوم: اميرة .. تظنين ان هالولد معجب فيج؟
اميرة : ما ادري ..بس والله احس احساس غريب صوب هالولد من اول نظره شفته..
فطوم: خلاص يا احلى .. واطيب اموره .. انا اليوم العصر بحاول اعرف عنه كل شيء وراح اقولج..( ترى فطوم بنت اجتماعية وكل اللي بالمنطقه يعرفها لانها حبوبه وايد) ..
واميرة اطالع الشارع وكانت تسمع اغنية عبدالكريم.. لا قبلكم احد .. ولا بعدكم احد.. انتوا الحبايب عندنا للأبد..
ويمر اليوم الدراسي لأحمد واميرة.. وكل واحد في داره جاعد يفكر في الثاني .. وكان تدخل فطوم على اميره وتشوفها جاعده على سريرها وحاضنه المخده وسرحانه.. وقامت فطوم تضحك على حالة اميرة ..
اميرة : فطوم .. حرام عليج خوفتيني انتي من متى هني ؟
فطوم: توني بس .. والله حالتج تكسر الخاطر.. (وفطوم تضحك )
اميرة: بشري فطوم شو عرفتي عن الولد الوسيم ؟
فطوم والابتسامه على وجها: احمد .. اسمه احمد .. يدرس بالمدرسة الثانويه .. وهالسنه اخر سنه له .. يعني مثلنا ..وهو طالب مجتهد دومه الاول بالصف .. وعنده اخوات .. واكبر وحده تدرس في لندن طب ..
اميرة: يا بعد عمري يا احمد( وتنرسم ابتسامه علة اميرة)
فطوم: اميرة دخيلج لا تنسين ان نحن ما نعرف شعور الولد اتجاهج لا تفكرين فيه وايد..
اميره : خلاص ما راح افكر .. والله احبج فطوم ..انا من دونج ما ادري شو كانت حالتي ؟( فطوم&اميرة صديقات من وهو صغار )
فطوم : يالله اميرة لازم ندرس عشان ندش الجامعه ويا بعض ....
اميرة : ايه خلاص لازم نشد حيلنا وندش الجامعه .. ان شاء الله ..
احمد جاعد في داره يكتب ويكتب رسالة حق اميرة لان خلاص تعب يكتم احساسه .. وتعب من التفكير .. واقرر ان يعطيها الرساله .. لان احمد صار يحبها .. من اول نظرة حب اميرة ..
اليوم الثاني ..
اميرة وفطوم يبون يركبون السيارة ..وسمعوا صوت احمد..
احمد: صباح الخير.
اميرة وفطوم طالعون بعضهم بعض: صباح النور.
احمد: اميرة ارجوج تقبلين هالرسالة من عندي ..بس لا تفهميني غلط ..
اميرة:................
فطوم تاخذ الرسالة وتركب السيارة وتسحب اميرة من ايدها لداخل السيارة..
وراح احمد المدرسة ويفكر شو صار مع الرسالة واميرة؟ وكان خايف من رد اميرة وايد ...
اميرة: فطوم دخيلج اقريها ما اقدر وما اقوى على فتحها..
فطوم: خلاص راح اقراها لج..

حبيبتي اميرة.. والله اول مره اقولها لبنت .. انا اول ما شفتج وانا حالتي مقلقه .. والله ما عرف اكتب رسالة حب ..لكن ارجوج .. انا حبيتج من اول نظرة.. اميرة انت اميرة في نظري واحلى اميرة .... اميرة انا احبج .. والله هذا احساسي .. وصدقيني انا ما العب عليج والله احبج .. ارجوج ابي اعرف شعورج .. بليييز ردي على رسالتي ..
المخلص احمد

كان يحمر ويخضر وجه اميرة..ما تعرف شو تقول.. وفطوم ساكته ما عارفه شو تقول..
فطوم: اميرة ردي عليه .. والله شكل الولد من اول نظرة حبج..
اميرة: لكن شلون .. وشو اقول؟
فطوم: خلاص انا بساعدج ..
ويكتبون رسالة حق احمد.. واحمد جاعد على جمر يبي يعرف رد اميرة .. واليوم الثاني تروح فطوم توصل الرسالة حق احمد .. واحمد كانت عينه بعين اميرة.. واميرة عينها عالارض مستحيه ..
وتسلم فطوم الرسالة حق احمد .. واحمد حس وكأنه اميرة رافضة الفكره من شكلها وشكل فطوم ..
ويفتح احمد الرسالة ومكتوب فيها ..

احمد................. احبك موووووووووووت

اميرة

كان ينقز احمد من الكرسي اللي كان جاعد علية بالحديقة ... وكأن احد صب على احمد ماي بارد .. ومن الفرحه ما عرف شو يسوي ..
ومرت الايام وصار كل يوم احمد يوصل رسالة حق اميرة ومعاها ورده .. واميرة بعد تسلمه رسالة .. وبعدين تطورت الامور .. وصاروا يتكلمون بالتلفون.. ولساعات طويله ..لكن ولا واحد مقصر بالدراسة .. معطين الدراسه حقها .. واحمد واميرة يزداد حبهم يوم ورا يوم .. واتفق احمد ويا ااميرة على انهم يدشون الجامعه ويا بعض ..عشان ما يفترقون ابد ..
ومر فصل كامل على الدراسة وكل واحد على جمر يبي يعرف النتيجة..
احمد: الو .. حبيبتي امورة..
اميرة: هلا .. عمري
احمد: كم تتوقعين نسبتج ؟
اميرة: حمودي انا وبكل صراحه اقولك .. انا الاكيد الاعلى منك.. وتضحك
احمد: هههههه انشوف يا اميرتي
اميرة: انشوف احمد .. اذا يبت اعلى منك شو تعطيني هدية؟
احمد: قلبي يا بعد عمري اعطيج قلبي ..
اميرة: سلامة قلبك يا بعد عمري ..
احمد: حبي .. انتي شو بتعطيني اذا كنت انا اعلى منج؟
اميرة : انت امر وانا اعطيك اللي تبيه...
احمد : ابيج تصرخين وبأعلى صوت وتقولين احمد احبك حق كل اللي بالمنطقة... ويضحك
اميرة : والله لو اقدر بصرخ .. بس حمودي فضيحه..
احمد : لا بس امزح ..
اميرة عيل شو تبي هدية تدلل .. امر ؟
احمد : ابي منج توعديني انه ما في شيء يفرقنا ابد مهما يصير ..
اميرة: اوعدك يا احمد اني مستحيل انساك .. وانت الاول والاخر بقلبي
احمد : يا بعد عمر احمد
اميرة : تسلم يالغالي .
ويسدون السماعه وتمر الايام وباقي يوم واحد على النتائج واحمد واميرة على جمر ..
ابو احمد وعد احمد انه اذا ياب نسبة حلو يعطيه سيارة ..اي سيارة احمد يبيها..( احمد عنده رخصة سياقة بس من دون سيارة )
واحمد كان دوم يفكر في سالفة السيارة .. ودوم يقول حق اميرة اذا حصلت السيارة .. انتي اول وحده تركبينها..
وبعد يوم .. وتطلع النتائج .. واحمد فرحان وكل اللي بالبيت مستانسين على ولدهم الوحيد وعلى النسبة الحلوة اللي يابها ..
واميرة بعد بالبيت كلهم مستانسين عليها وكل صديقاتها يدقون يباركون لها عالنسبة الحلوة ..
ويدق احمد حق اميرة يبي يطمن على النتيجه ...
احمد: هلا عيوني
اميره: هلا حبيبي... مبروك عالنسبة الحلوة..
احمد : الله يبارك فيج .. وانتي بعد مبروك..
اميرة : يا حسرة على شو ؟
احمد ( خاف على اميرة): خير شو صار ؟
اميرة : احمد كم نسبتك ؟
احمد: اميرتي .. انتي كم يبتي ؟
اميرة: اقل منك ....
احمد: ههههههه.. يعني عشان جي زعلانه
اميرة: وهي تضحك .. تحلم يا حلو
احمد: شو تقصدين..
اميرة: انا يبت 97%
احمد: يعني تطنزين علي
اميرة : ما عاش من يطنز عليك
احمد : تسلمين.. انا يبت 95%
اميرة : مبروك حبي .. المهم ان كل واحد منا راح يحقق حلمه
احمد: اميرة .. ترى بكره انا وانتي بنروح مشوار .. نحتفل بالنسبه
اميرة: وين ؟ مشوار؟
احمد: ايه .. مشوار .. انا وعدتج انج انتي اول وحده تركبين سيارتي ..
اميرة: بس احمد ..قدام البيت اخاف ابوي يذبحني
احمد: لا تخافين يا بعد عمري .. اساسا نحن ما راح نتحرك بالسيارة بس بالكراج ..
وتضحك اميرة من الخاطر ويضحك احمد بعد .. ويقفلون السماعةوكل واحد فيهم الدنيا ما سادته من الفرح ..
واتفقوا احمد واميرة انهم يتلاقون عند السيارة الظهر الساعة 2 على اساس محد يشوفهم لا اهل احمد ولا اهل اميرة.. وتركب اميرة السيارة .. ومثل ما قال احمد هي اول وحده تركب السيارة .. ويقعد احمد جنبها ويقعدون يسولفون ..
احمد: يا اميرتي .. الامورة.. يا حبي انتي
اميرة .. يحمر وجهه وما تدري شو تقول ..
احمد: اميرة اشفيج مستحية..
اميرة : احمد .. انت صدج تحبني ..
احمد: طبعا عيل العب عليج.. لو كنت ابي العب عليج كان من زمان ..لكن والله يا اموره عمري ما حبيت واول ما حبيت شفتج انتي .. انتي اول وحده تدش قلبي وتحرك احساسي ..
اميرة: والله حمودي انا بعد انت الوحيد اللي حبيته.. واتمنى من الله يجمعنا وللابد مع بعض ..
احمد: ان شاء الله .. في الدنيا والاخرة
اميرة : امين .. بس قبل بالدنيا .. وتضحك ..
احمد: يالله امورة لازم تروحين البيت الحين لا يحسون هلج بأنج مو موجوده..
اميرة : يالله حبي اشوفك على خير
احمد: اموره....... ويسكت
اميرة: هلا عمري .. وتشوف بعيون احمد نظرة حزينه..
احمد: احبج .. احبج مووووووووووووت
اميرة : انا اكثر يا بعد عمري ..
احمد: راح ادق عليج بالليل.. وعندي هدية لج
اميرة: انطرك .. وتطلع من السيارة ودش بيتها وهي واحمد عيونهم بعيون بعض
وتروح غرفتها وهي فرحانه .. واحمد من زود الفرحه دق على رفجانه وقال لهم اليوم عازمكم يالله الحين راح امر عليكم وراح احمد ومر على رفجانه واحمد دوم متهور بالسياقة .. وراحوا المول واشترى احمد هدية حق اميرة وهي عبارة عن قلب من كرستال محفور فيه حرفه .. واول ما طلعوا من المجمع قرروا انهم يحوطون شوي بالسيارة الجديده ..
كانت الساعة 5 العصر وكان يوم الثلاثاء 21/يناير/ 2003....
صار اللي مو متوقع .. حادث فضيع لأحمد ورفجانه.. احمد في العناية واهله حواليه.. ورفجانه مصابين .. واميرة بالبيت تكتب مذكراتها ما تدري شو صار لحبيب قلبها.. وبعد كم ساعة تطل من الشباك .زكان تشوف سيارات كثيره قدام بيت احمد وامه نازله من السيارة وهي على كرسي المعاقين ما قادرة تمشي .. خافت اميرة وما عرفت شو اللي صار وحست احساس غريب .. كان تركض برع البيت وتشوف ناس عمرها ما شافتهم ..كا تسأل واحد منهم ..
اميرة: اخوي لو سمحت شو السالفة .. عسى خير ؟
وتمنت اميرة ذيج الساعة ما طلت من الشباك ولا نزلت ولا سألت شو السالفة .. لانها .. كانت اخر مره سمعت فيها اسم احمد ..
قال لها الشاب ان احمد ولد ابو احمد من ساعة توفى في حادث .
اميرة من هول اللي سمعته اغمى عليها .. واخذوها للمستشفى وتمت هناك اسبوع وهي كله تهاذي بأحمد .. لكن بعد فترة تقريبا شهر بدت اميرة تتحسن من هول اللي صار لانها حبت انها تكمل دراستها وتصير طبيبه وتحقق حلم احمد حبيبها وعلى فكرة ترى اميرة من يوم الحادث لمده شهر ما نطقت ولا كلمه يعني صابتها صدمه..
وبدت اميرة الحين صفحه جديده وما زال احمد في قلبها وعقلها مستحيل تنساه لان احمد حبها الاول و الاخير ..
واخر صفحة كتبتها اميرة في دفتر مذكراتها بتاريخ 28/يناير/2003 وكان مكتوب فيها :

اشوف اللي احبه .. مات عني .. وخلاني وسط شكي وهمي .. مصيبه يوم يبعد من تحبه.. يا كيف تعيش بس من دون حبه .. تبات الوقت تتمنى قربه.. صحيح ان الهوى لا ماله قياس ..
مستحيل انساك يا من عشت احلى ايامي واجمل اوقاتي وياك ومستحيل احب بعدك .. يا احمد يا بعد عمري ..

اميرة المرحوم احمد

والحين اميرة تدرس لان بعد اسبوعين تبدأ امتحانات الفاينل وارجوا من كل واحد قرا القصة يدعي حق اميرة عسى الله يسعدها ويحقق لها امنياتها وتصير طبيبه .. وخفف عنها ألمها .. وانا بدوري اقول عمري ما بخليج بروحج يا صديقتي الغالية ...

منقول<img src="http://oasis.bindubai.com/emoticons/inlove.gif" border=0>
اختكم حلوة و دلوعة