<font color='#000000'>قصـــــــة حب تبكــــــي لها العينـــــــــان
قصة حب تبكي لها العينان
ودعنـــــي لو بكلمة حنونه
قامت من نومها كعادتها بوجهها الملائكي البشوش وبدأت يومها زي دايم توضت وصلت الفجر ونزلت تسلم على أمها وتفطر معها ((للمعلومية :أم و أبو الجوهرة مطلقين من أيام ماكان عمرها 6 سنين وهي عايشة مع امها وفي الإجازة تروح لأبوها))
الجوهرة :أحلى صباح لأحلى أم في الدنيا
الأم :هلا يمه صباااح النور كيفك اليوم عساكي نمتي زين ؟
الجوهرة :والله يايمه مادري وش أقولك ..
الأم :خير يالجوهرة فيك شي تبين شي ناقصك شي يمه ؟
الجوهرة :لا يمه طول مانتي معي ماني محتاجة لشي الله لايحرمني منك بس أنا
شايلة هم النتيجة والله أمس ما قدرت أنام بس أفكر فيها ...إدعيلي يمه الله يوفقني وأجيب النسبة اللي تبينها
الأم :الله يوفقك يايمه ولا يحرمني منك ولامن رضاك والله ماحد مالي علي البيت غيرك
الجوهرة:تسلمين لي يمه والله مادري شلون كنت بعيش من دونك .
ومر اليوم واليومين والجوهرة على أعصابها ..
دقت الجوهرة على صديقتها وهي من أعز صديقاتها
الجوهرة :أهلين نهى كيفك؟
نهى : هلاااا والله عاش من سمع صوتك وينك اليوم الصبح دقيت عليك مقفله الجوال؟
الجوهرة:إيه نهى تكفين إسكتي لا تذكريني
نهى :خير الجوهرة ؟
الجوهرة : يعني مانتي عارفة ياحبك للإستهبال
نهى:الجوهرة لو تقولين لي إنك شايلة هم النتيجة بجيك الحين أتوطاك..
الجوهرة :إيه وليش مأشيل همها هذا مستقبلي ولازم أخاف وأشيل همه
نهى :الجوهرة لو الناس كلها تخاف الا انتي ماشاءالله عيني عليك باردة أكبر دافورة بالشلة وليته بالشلة بس إلا المدرسة كلها ..يعني الناس كلها تخاف إلا انتي ..
الجوهرة : ولو يحق لي
نهى : الكلام معك مامنه فايده المهم وش أخبار الوالدة ؟؟
الجوهرة:ماعليها والله الحمد لله بخير
نهى :أقول الجوهرة
الجوهرة :هلااا حبيبتي
نهى :عندك شي اليوم ؟؟؟
الجوهرة :لاوالله اليوم ماوراي شي ليش؟
نهى :والله انتي صديقتي وحبيبتي وصندوق أسراري وش رايك....
الجوهرة مقاطعتها :أوكي أوكي بمر عليك اليوم ونروح السوق وش تبين بعد (((عارفة سوالفها)))
نهى:ياااااعمري الله لا يحرمني منك وين ألاقي وحدة زيك فاهمتني وعارفتني
الجوهرة :ههههههههههه تسلمين والله خلاص جهزي نفسك الساعة 8 بمرك أوكي ؟
نهى :من الحين أجهز نفسي افااا عليك
الجوهرة :ههههههههههه خلاص اوكي يالله بااااي
نهى:باااي
راحت الجوهرة أستاذنت من أمها ومرت على نهى وراحوا السوق ووسعوا صدورهم ..وفي الطريق دق الجواال..
الجوهرة : هلااااا يبه
الأب:هلااا ببنتي كيف عساك بخير؟
الجوهرة :بخير دامك بخير
الأب:كيف الإجازة معك عساك مستانسة ؟
الجوهرة :ايه يبه الحمد لله ولو إني مارتاح لين اشوف النتيجة ؟
الأب:يابنتي لا تشيلين هم المهم لا تنسين بعد 3 أيام طالعين المزرعة كالعادة تعرفين ناخذلنا شهر فيها وبعدين نسافر..
الجوهرة :إن شالله يبه
الأب:وشلون أمك وخوالك كلهم بخير؟
الجوهرة : كلهم بخير ويسلمون عليك.
الأب :الله يسلمك ويسلمهم خلاص يابنتي ماطول عليك بس زي ماقلتلك لا تنسين جهزي نفسك..
الجوهرة :إن شالله يبه إلا يبه وشلون خالتي هيا عساها بخير والله اشتقت لها؟؟(((هيا هذي زوجة أبوها الثانية)))
الأب :ماعليها والله تسأل عنك حتى هي مشتاقة لك ...
الجوهرة:تكفى يبه سلملي عليها ..
الأب :يبلغ إن شالله هاا يبه تبين شي؟؟
الجوهرة :سلامتك يبه
الأب:الله يسلمك في امان الله
الجوهرة: مع السلامة هلا.
========================
ورجعت الجوهرة للبيت وقالت لأمها إنها بعد يومين ماشية وقالت لها إن أبوها اتصل وقعدت مع أمها شوي وراحت نامت ...
الساعة9الصبح والجوهرة نايمة غريبة بالعادة ماتوصل الساعة 6 إلا هي صاحية وترسل جرايد وتفتح النت تشوف النتيجة ...المهم دقت نهى على البيت قالوا لها نايمة ودقت عالجوال وردت الجوهرة بعد وشو
الجوهرة :ألو
نهى :أهلين الجوهرة معقولة الى الحين نايمة؟
الجوهرة :وش أسوي أمس كنت سهرانه قاعدة أجهز أغراضي تعرفين بعد بكرة ماشية..
نهى : المهم كيفك ؟
الجوهرة :تماام نهى تكفين ودي أنام شوي ممكن تتصلين بعد ساعة تصحيني ؟
نهى : هيييييييي انتي في أحد ينام ونتيجته طالعه؟
الجوهرة :..........
نهى : ألووووو الجوهرة
الجوهرة : نهى تكفين والله ماني ناقصة مقلب من مقالبك اللي دااايم ؟
نهى :لا والله أتكلم من جد وش فيك انتي مبروووووووك عشر طعش ألف مبروك .
الجوهرة :نهى صدق تتكلمين ؟
نهى :روحي شوفي الجرايد ولا بعد 97% من قدك
الجوهرة :لا..لالالا..لالالالالالا مستحيييييييييل ..
وياعمري الجوهرة رمت الجوال ونست نهى عالخط..عااادي عند نهى مقدرة موقفها
وراحت تصارخ في البيت يمممممممممه نجحت نجحت
أخيييييييييرا نجحت جبت 97%
الأم : مبروووووك يمه الله يوفقك ويحقق لك اللي في بالك ألف ألف مبروووك..
الجوهرة :والله يمه هذا كله من رضاك علي ودعاك لي الله لايحرمني منك ولا من دعاك.الأم :الله يسعدكِ والله محد رافع راسي غيرك اتصلي على أبوك بشريه ..
واتصلت الجوهرة على أبوها ..
الجوهرة :يبببببه 97%
الأب:خير يمه وش فيك ((( ماستوعب ))
الجوهرة :يببببببببببببه اقولك نجححححححححححت أخييييييييييراً
الأب: ألف ألف ألف مبروووووووك ..
الجوهرة :الله يبارك فيك يبه وأخيرا ارتحت ..
الأب :الله وش هالخبر الزين عاد خلاص يمه لازم نحتفل فيك
الجوهرة :لا يبه وش دعوى مو ضروري أهم شي اني أرضيك أنت والوالدة
الأب :لالالالا انتي وش تقولين بنتي الوحيده تتخرج مااحتفل فيها وش هالكلام ..
الجوهرة :تسلم لي يبه والله ماتقصر بس ماله داعي..
الأب :أقول خلاص أول يوم لنا بالمزرعة اسوي لك حفلة ماحصلت ونادي اللي تبين من صديقاتك ...
الجوهرة :بس يبه ...
الاب :بس خلاص يمه انتهى الموضوع ومن الحين بجهز لك الحفلة وخليني أبشر خالتك هيا ..
الجوهرة: خلاص يبه اللي تشوفه .
وراحت الجوهرة تجهز نفسها وجاها أبوها في البيت وسلم عليها وبارك لها ..
ويوم جا يوم الحفلة اتصلت عليها خالتها هيا
الجوهرة: ألووو
الخالة:هلااا الجوهرة مبررروووك ألف ألف مبررووك حبيبتي وعقبال ماتتخرجين من الجامعة ان شالله..
الجوهرة:هلا والله خالتي هيا الله يبارك فيك
الخالة :كيفك عساكِ بخير؟
الجوهرة :الحمدلله تمام كيفك انتي ؟
الخالة :الحمدلله بخير دامك بخير..يالله يمه متى بتجينا وحشتينا من زمان ماشفناك أول كانت الامتحانات ملهيتك الحين ماعندك شي لاتبطين علينا ..
الجوهرة:وانا بعد والله مشتاقة لك بس هانت اليوم ان شالله جايتكم..
الخالة :إيه على طاري الحفلة ترى اليوم بمر عليك وأوديك الكوافير ..
الجوهرة :خالتي من صدق تتكلمين وش دعوى الله يهديك ماله داعي ..
الخالة :وش اللي ماله داعي خلاص اليوم العصر امر عليك جهزي نفسك أوكي
الجوهرة :مشكورة خالتي ماتقصرين..
هيا: حبيبتي خذي مشاري بيسلم عليك..
مشاري:هلاااااا الجوهرة ألف ألف ألف مبرررووووك وعقبالي ...
الجوهرة :هلااا أخوي الله يبارك فيك وعقبالك إن شالله يالله عاد السنة الجاية مافيها لعب شد حيلك ...
مشاري:إيه الله يعين ..شلونك وشخبارك وش مسوية عساكي تمام؟
الجوهرة :تمام والله كيفك أنت ؟
مشاري:بخير دامك بخير أقول الجوهرة متى جاية اشتقنالك يالشينة؟؟؟
الجوهرة :وأنا بعد اشتقت لك يالزين خلاص اليوم أن شالله جايتكم.
مشاري:والله زييييييين خلاص أنا بجي أخذك ..
الجوهرة :لاما في داعي لا تعب روحك خالتي جاية تاخذني..
مشاري :طيب مو مشكلة نجي أنا وأمي ناخذك...أوكي
الجوهرة :أوكي.
=========================
ومرت هيا على الجوهرة وأخذتها الكوافير وسوت شعرها وسوت ميك أب خيااااالي طلع شكلها يهبل ويوم خلصت أخذتها خالتها لمكان الحفلة بالمزرعة وهناك تفاجئت بالأشياء اللي مسويها لها أبوها وش طاولات وش حركتات وش بوفيه وش أغاني وطق على مستوى..
وبعدين دخلت الجوهرة وطبعا كل العائلة مجتمعه هناك حريم ورجال ..بنات وشباب ..
سلمت الجوهرة على بنات عماتها وبنات عمها
وعلى عماتها وعمانها كلللللهم ..
وطبعا العيال أنواع القز على البنات ..العيال كانو كلهم موجودين إلا ولد عمتها فيصل مسافر للشرقية مع خوياه ..
أنتهت الحفلة ..... ========================
في اليوم الثاني قامت الجوهرة كالعادة مبكرة وكلها نشااط ونزلت وسلمت على ابوها وعمها وافطرت معهم ..وبعدين طلعت تتمشى شوي في المزرعة وقامت تسقي الورود وتنسقهاورايحة في تفكير عميق تعرفون هي توها متخرجة وتفكر وش الاقسام اللي تبي تسجل فيها مع ان نسبتها تدخلها القسم اللي تبي ومع الواسطات اللي من طرف أبوها وخوالها وعمانها بس هي تبغى قسم تلقى نفسها فيه.. وفي هذا الوقت رجع فيصل من الشرقية وجا على المزرعة دخل المزرعة وهو داخل كانت الجوهرة قدامه بس معطيته ظهرها وكان يحسب أنها أخته سارة وجا بيستخف دمه على أخته دقها على ظهرها وقالها أنااا جيييت ..
إلا الجوهرة تلف عليه ومعها ليّ المويه ورطشت أبو جد ملابسه وهو من الروعة مو مميز منهي هذه وهي ماتدري وش اللي صار .
وفيصل طبعا تروش بالمويه أخر شي..
الجوهرة :هيييييي مين أنت ؟
فيصل: ممكن تنزلين الليّ أول ..
الجوهرة:أوه.....
وراحت وخلت فيصل من غير حتى إعتذااار أو أنها تحاول تعرف منهو .
======================
وفيصل أنواع رفعة الضغط وشلون تسوي فيه كذا وتروح من غير ماتقوله شي حتى لو تعتذر وحس بنفسه إنها شايفته بزر ...ومنهي هي وجهها اللي تتجرأ تسوي كذا معاه مع أنها ماكانت قاصدة..بس العناد ركب راسه ..
والجوهرة عادي ماكنه صار شي بس انها ارتاعت وماميزت منهو هذا اللي جاها ...
دخلت البيت وراحت عند البنات وقعدت معهم شوي إلا دق جوال سارة ..
سارة:هلااااااا فيصل وينك يالقاطع اشتقنالك يالشين متى جاي؟؟؟
فيصل:هلا سارة شوي شوي ..أنا هنا بالمزرعة وصلت قبل نص ساعة تقريباً..
سارة : نعم وش تقول ؟؟ أنت هنا الحين نازلة لك أوكي ..
فيصل :خلاص أوكي أنا ببيت الشعر..
وقفلت سارة وقالت للبنات إن فيصل جا وبتنزل تسلم عليه..لحظتها عرفت الجوهرة ان اللي جاها هو فيصل ..بس عادي ماهمها..واذا كان فيصل يعني بيدخل الجنة وحنا بندخل النار ..
======================
وراحت سارة وشافت فيصل بحالته المهينه
سارة:فيصل!!!! خير وش فيك مامداك تشتاق للبحر توك جاي..
فيصل : أبد بس رحت أسلم على العيال وكانوا عند المسبح وكالعادة رموني فيه..المهم كيفك وش أخبارك وأمي وش أخبارها.؟؟
سارة :ماعلينا كلنا بخير ..
فيصل :والله ودي أناااام وصحوني الساعة 4 العصر أوكي
سارة :أوكي .
فيصل : أقول سارة في أحد جديد جاي عندكم هنا؟؟
سارة :لا مافي أحد ..ليش؟
فيصل: مجرد سؤال..
سارة :يمكن بس اللي جات الجوهرة بنت خالي عبدالعزيز..
فيصل: والله متى جات ؟
سارة:أمس وفاتك نص عمرك خالي سوا لها حفلة ماحصلت..
فيصل:وش المناسبة؟؟
سارة :تخرجت من الثانوي وماشاءالله عليها جايبة نسبة حلوة..
فيصل:كم جابت؟
سارة: 97%
فيصل :ماشاءالله..المهم أنا بطلع أنام الحين لاتنسين تصحيني أوكي ؟
سارة :أوكي ..
=====================
طلعت سارة عند البنات وكانوا مجهزين الفطور وأفطروا وعينوا خير ...إلا الجوهرة تذكرت زواج صديقتها نهى وإنها ماشترت شي تلبسه والزواج باقي عليه 3أيام ..وسرحت الجوهرة ..
غادة:الجوهرة خير وش فيك ؟
الجوهرة :والله شايلة هم زواج صديقتي مابقى عليه الا كم يوم ومااشتريت شي ألبسه..
غادة: ولايهمك حنا بعد بكرة طالعين الفيصلية مع فيصل وضاري (((ضاري يصير عمهم من الرضاعةولاهو في الاصل ولد عمتهم)))
الجوهرة :بس الزواج بعد 3 أيام ولو طلع في الفستان شي مايمديني أرجعه..
غادة :حنا رايحين نفطر الصبح خذي الفستان وإذا صار فيه شي بدليه العصر..
الجوهرة:خلاص أوكي ..أنا شايفتلي فستان خطيير قبل كم يوم رحت بس على الله القاه..
غادة :إن شالله تلقينه وتاخذينه ..
=======================
بعد شوي دقت الجوهرة على صديقتها نهى..
الجوهرة :أهلييييييييييييييين نهى
نهى:هلاااااااا والله
الجوهرة :كيفك وشخبارك وكيف النفسية قبل الزواج؟
نهى:والله الحمد لله ..الله يعين كيفك انتي وش أخبارك؟
الجوهرة :والله تمااااااام
نهى :وكيف الأجواء عندكم؟
الجوهرة:اسكتي يانهى صار لي موقف مع ولد عمتي فيصل خطييير
وحكت الجوهرة الموقف بالتفصيل لنهى
نهى:طيب وش قلتيله؟
الجوهرة:ماقلت له شي رميت الليّ ومشيت ..
نهى:ههههههههههه الله يقطع سوالفك
الجوهرة :خليه يستاهل صح اني ماكنت أقصد بس جات في محلها..وشلون يتجرأ يطق ظهري وعلى أنااا جيييييييت ..وش هالحركة السخيفة..
نهى:الموضوع انتهى ماعلينا ..المهم أبغاكِ تكونين أول وحدة تدخل القاعة يوم الزواج ولا أوصيك أبغاكِ تكونين أحلى وأشيك وحدة..
الجوهرة:ولا يهمك أفااا عليكِ بس ..
=======================
ومرت اليومين وجا يوم طلعة الفيصلية والبنات كلهم جاهزين ويوم جات الساعة 9 جا عمهم ضاري سلم عليهم وقالهم يكونون طالعين برى بعد ربع ساعة بس على مايجيب السيارة فيصل..
وطلعوا البنات وركبوا السيارة ويوم جات بتركب الجوهرة لحظتها كان فيصل بيفتح باب السيارة اللي قدام وبيركب...ويوم شاف الجوهرة أرتفع ضغطه وقال لازم أرد لها حركتها اللي ذاك اليوم..
فيصل :انتي رايحة معنا..
الجوهرة:أنا ؟؟؟؟؟!!!!
فيصل :ايه في أحد غيرك ؟!!!
الجوهرة:إيه رايحة عندك مانع..
فيصل :إيه عندي مانع صراحة ماودي تروحين معي ..بالسيارة خلي السواق يوديك..
الجوهرة : اها..شكراً فيصل يجي منك أكثر..
ورجعت الجوهرة وضاري كان يناديها وراح كلمها حاول فيها انها تروح معهم وان فيصل ماكان يقصد اللي قاله بس رفضت وقالت إنها أصلاً تعبانة وماودها تروح إلا عشان البنات ..
وفي السيارة أنواع التهزئ لفيصل سواء من البنات أو من ضاري وهو حس بتأنيب الضمير بس كان يكابر..
وبعدين يوم دخلت البيت شافتها خالتها هيا واستغربت انها ماراحت وقالت لها اللي صار وطبعاً الجوهرة علاقتها مرة حلوة مع خالتها المهم خالتها قالت لها أنا أوديك ولا يهمك وراحوا مع مشاري ...وراحت الجوهرة واشترت اللي تبغاه وقبل مايطلعون ..
هيا :وش رايك يمه الجوهرة تروحين تجيبين لنا فطور خلينا نفطر؟
الجوهرة:طيب خالتي وش رايك نطلع فوق نفطر وبعدين نمشي؟
هيا :لا معليش حبيبتي والله ماقدر أطلع رجولي بدت توجعني ..
الجوهرة :خلاص خالتي أطلع أنا ومشاري نجيب الفطور أوكي
مشاري :لا معليش أنا ودي أروح أشتري لي coverللجوال شفت لي محل هنا عنده أشيا حليوة..
الجوهرة:خلاص مو مشكلة أنا أروح أشتري الفطور..
وراحت الجوهرة تشتري الفطور وكانت حاسة إنها راح تشوف البنات والعيال فوق عند المطاعم ..وحبت تظهر نفسها عشان اللي يشوفها يعرف إنها الجوهرة طبعاً أكثر شي كان ودها تقهر فيصل .. وفعلاً في هالوقت كانوا فوق عند المطاعم وليت فيصل لوحده لا..معه خوياه ..البنات راحوا مع ضاري ..وجلس فيصل يفطر مع خوياه ...وراحت الجوهرة وزينت نفسها وتلثمت..واشترت الفطور ..وهي ماشية.. شافوها أنهبلوا وش جمال وش زين وش عيوووووون تطير العقل ..
عبدالله:يوووووووووووووه شباب لا تفوتكم بنت ولا كل البنات ..فيصل شوفها لاتفوتك
يوم التفت فيصل وشافها وعرف انها الجوهرة انهبل وده يقوم ويتوطاها وسوا نفسه عادي ..
فهد:فيصل وش فيك مطنش بالعادة تسبقنا عليها..
فيصل:يعني بالله هذي عاجبتكم ..؟؟
عبدالله :لافيصل أكيد فيك شي أنا عمري ماشفت مثل هالبنت ..
فيصل:أقول شباب تبون شي تأخرت عالأهل ؟؟
عبدالله :لا سلامتك بس وش رايك تمرني اليوم ..؟؟
فيصل:أوكي أحاول..يالله سلام...
وطلع فيصل من عند خوياه وراكبة راسه أم العبيد..و أخذ البنات وراحوا البيت ....والجوهرة مااتنبهت إن فيصل شافها ..وفيصل طول ماهو ماشي في الطريق مانطق ولاكلمة..معصب عالأخيـر..بعد ماوصلوا البيت..طبعا الجوهرة كانت هناك قبلهم .ويوم جا بيدخل الصالة..كانت أمه والجوهرة موجودين وأمه كانت تكلم تلفون ..
فيصل: فيه أحد ...ياهوو
أمه طبعا ماانتبهت له والجوهرة ماردت عليه..
ويم شاف أن ماحد رد عليه ومافي غير صوت أمه دخل ..وشاف الجوهرة موجودة أنواع طيحة الوجه قدام أمه...والجوهرة في قمة الوناسة..
وطلع طبعاً من الصالة ..والجوهرة على طول من فرحتها ياعمري دقت على صديقتها نهى وعلمتها على اللي صار...
=========================
وبعد شوي اتصلت الجوهرة على أمها تسلم عليها ..
الجوهرة:هلاااا يمه..
الأم :هلاااااا والله بنتي شلونك ..؟
الجوهرة :بخير يمه ..شلونك إنتي عساكي بخير..؟
الأم :بخير دامك بخير يمه..
الجوهرة:يمه وصلت بطاقات الزواج؟؟
الأم :ايه اليوم أرسلتها نهى الصبح..
الجوهرة:ايه زين أنا إن شالله بكرة الظهر جاية عندك يصير نطلع من هناك على القاعة ..زين ؟
الأم :زين ..بس من اللي جايبك هنا ..
الجوهرة :يمكن مشاري أو خالتي هيا مع السواق..
الأم :خلاص يمه يصير خير ..
الجوهرة:يالله يمه حبيت أطمن عليك تامريني بشي..؟؟؟؟؟؟
الأم:لا يمه سلامتك...
الجوهرة:الله يسلمك مع السلامة.
وقعدت الجوهرة مع البنات طلعوا يتمشون شوي بالمرزعة وهم يتمشون تعبت عليهم غادة وقالت لازم أرجع البيت انتم خليكم كملوا تمشيتكم ...وراحت الجوهرة معها لم البيت..وبعد شوي نزلت الجوهرة المطبخ تجيب أكل لغادة ..وهي بالمطبخ جاء فيصل ..
فيصل:فيه أحد..؟؟؟؟
الجوهرة طبعا ماردت عليه ..ودخل فيصل ويوم شاف الجوهرة ارتفع ضغطه وقال في نفسه وشفيها ذي شايفتني بزر من جد ((طبعا ماشافها كلها لانها كانت فاتحة الثلاجة والثلاجة مغطية عليها))..وطالع الجوهرة بنظرات استحقار من فوق لتحت وطلع من المطبخ ..وفيصل خلاص وصلت معه قال لازم اوقفها عند حدها مع انه حس انه بدى يجيله شعور غريب تجاه الجوهرة ..يمكن عجبته شخصيتها القوية وكبريائها وعزة نفسها.وإصرارها عالى إنها تاخذ حقها بيدها..أو طموحها مايدري المهم طنش هذي المشاعر وقال أكيد من القهر اللي أنا فيه..وفي أخر الليل والكل كان نايم ..إلا فيصل ماجاه نوم بس يفكر بتصرفات الجوهرة ويحاول يفسرها..ماعرف إن كل المعاملة هذي اللي من الجوهرة هي بس من حركته ذاك اليوم يوم عيا تروح معهم للفيصلية..المهم فكر ..وفكر..
آخر شي قال لازم أختي سارة تكلمها ..ولا لا مايصير أخاف يصير بينهم شي أو سارة تفهمني غلط ..لازم أنا اكلمها بنفسي..أشوف وش عندها بدل كل يوم وهي مطيحة وجهي عند أحد أمس عند أمي واليوم بالمطبخ عند الشغالات بكرة مادري وين..وفعلاً دخلت الفكرة مزاجه ..بس شلون يجيب الرقم....قال مافي غير أختي سارة..وماقدر ينتظر لليوم الثاني ..راح لغرفة سارة وطق عليها الباب ..وقامت له سارة..
سارة:مين؟؟
فيصل:سارة معليش أسف على الإزعاج بس أبيك شوي ممكن ..
سارة بعد مافتحت الباب :خير فيصل فيه شي ؟
فيصل:لا تخافين مافي شي بس أبغى جوالك شوي إذا ممكن ..
سارة:أوكي بس وين جوالك؟
فيصل:جوالي خربان..
سارة :بس رجعه لي اليوم الصبح ضروري ..أستنى وحدة من البنات تتصل علي ضروري .
فيصل:أوكي ..مشكووووووورة أختي ..
============================
وراح فيصل يدور رقم الجوهرة ويووم لقاه على طووول حطه في جواله ..وارتاااااح ..كذا تقريبا راح نص الهم اللي شايلة ..أما باقي وش يقول للجوهرة وشلون هي بترد عليه هذا اللي كان شاغل باله أكثر شي .
وكان ينتظر الصبح على ناااار ..ويوم طلع الصبح كان بيتصل بس قال ياولد أركد مايصير على طوول استنى شوي..وانتظر ..يوم جات الساعة 9 الصبح ..اتصل ..
الجوهرة ماعرفت الرقم وماردت ..اتصل مرة ثانيه والجوهرة نفس الشي ماردت ..أما المرة الثالثة ..ردت قالت يمكن أحد ضروري..
الجوهرة:ألووو
فيصل:أهلين الجوهرة كيفك؟
الجوهرة:تمام من معي لو سمحت؟
فيصل :أنا فيصل..
الجوهرة:نعم..وش تبي..
فيصل:الجوهرة ممكن أكلمك بموضوع..؟
الجوهرة :آسفة ..أنا مشغولة الحين تبي شي..
فيصل:لا سلامتك..
الجوهرة :يالله باااي
فيصل انكسر خاطره واحتار وش يسوي مع هالبنت .. ونفس الشي حس انه بدا يميل لها..وبعد ماانكسر خاطره بعد ماصرفته..فقد الأمل بأنه يقدر يوصل لها..
أما الجوهرة حست أنها كانت قاسية عليه بالرد ..بس كبريئها كان يمنعها إنها تعترف بهالشي ..وراحت الجوهرة عند أمها عشان تحظر الزواج ..وراحوا واستانسوا لكن الجوهرة كانت طول الوقت تفكر بالكلام اللي قالته لفيصل ..وكانت تلوم نفسها على اللي سوته ..وصارت الجوهرة طول الوقت تفكر فيه..وبعد ما رجعوا من الزواج ..طبعا رجعت على بيت أمها واليوم الثاني الصبح راحت للمزرعة ..
ويوم وصلت البنات كانو ينتظرونها على الفطور ..وقعدت وافطرت معهم وحكتهم وش صار بالزواج ..وضحك ومزح ونااااسة يعني ..
وسالفة ورا سالفة لين دخلوا بسالفة العرسان ((الرجال يعني ))وكل وحدة وش تتمنى يكون زوجها وش شخصيته وش اسلوبة بالحياة ..
سارة :أنا ابي واحد يمووووووووت فيني ..ماعنده حركات الغيرة الزايده .يحب السفر..والتمشيات ..اممممممم وش بعد ..ايه ومتى مابغيت اطلع مع صديقاتي يوافق مو يقول ماله داعي وحركات مالها داعي ..
................
غادة :أما أنا ابي وااحد على كيفي وش ماقوله يقول حاظر..بس مو معناه ان ماله شخصية ..لا يكون له شخصية بس على غيري ..واهم شي طبعا يحبني واحبه..
..................
والجوهرة سكتت..ماتكلمت ..
سارة :الجوهرة وش مواصفات فارس احلامك..ولا ماعندك ..
............
الجوهرة :انا ماعندي مواصفات محددة لكن أهم شي عندي انه يحبني واحبه ويخليني اسعد أنسانه في هالكون عشان اقدر اسعده ..ايييييييييه واهم شي يكون رومانسي ..مو يجيني واحد عربجي ماعنده ماعند جدتي..
..................
غادة:ممكن كل شي يتوفر الا اخر واحد ماهقيت ..
سارة :ياساتر وليش؟
غادة :حنا 99% من شبابنا عربجي ماعنده سالفة يحب التصنع ولا هو ماعنده ماعند جدتي ..يعني وين ووين يجيك واحد رومانسي عاطفي ..هادي ..
سارة:بالعكس الناس تغيروا الحين هذاك زمان اول اللي ماعندهم غير العربجة على بالهم بيسوون رجولة ..
واستمر النقاش بينهم ..وقاموا يتكلمون عن صفات عيال العايلة عندهم ..وتكلموا عنهم كلهم تقريبا ومنهم:
غادة:أما عمي ضاري خطيييييير ..ياحظ اللي بتاخذه يونس اللي مايتونس ..ماعنده حركات التعقيد والخرابيط الزايده..واخلاق ..ورزانة ..ووسيم ..وش تبي بعد اللي بتاخذه..
سارة :أما فهد ولد عمتي نورة مصرقع ..بس ولو يهبل ..فرفوش..صحيح انه احيان يرفع الضغط ببرودته الزايده ..بس كل شي منه حلووو..
الجوهرة:وش الطاري على فهد ..ماحد جاب سيرته غيرك ..؟؟؟
سارة بعد ماحمرت خدودها:عادي أصلا حنا قاعدين نسولف
غادة :نسوووووووولف ..علينا هالحركات..
الجوهرة :اعترفي اعترفي ..
غادة :عادي مابينا شي ..
سارة((وصل ضغطها الالف)):ايه واذا اني احبه عندكم شي ...
الجوهرة :لا ابد سلامتك..بس تصدقين لايقين على بعض..
سارة طبعا انهارت ..وانواع رفع الضغط..
الجوهرة :خلاااااص خلونا نكمل من باقي بعد..اييييييييه أخوي مشاري
حياته الكمبيوتر الله يعين اللي بتاخذه شكله بيهكر على دماغها ..ههههههههههههههههههه
غادة:هههههههههههههههههه الله يقطع سوالفك ..والله انك صادقة مادري لو ان منعوا الكمبيوتروالنت وش بيسوي؟؟!!!
سارة :يروح فيها الولد يجيله انهيار فيروسي..ههههههههههههههههه
سارة :خلاص خلصوا ..
غادة :هيييييييي نسينا فيصل!!!!!!!
سارة:يابعد عمري ياخوي والله اني خاينه تكلمت عنهم كلهم حتى عيال الجيران ونسيته صدق ماعندي قلب
غادة :ايه عاد جتنا راعيه الاخوة ..خلصينا بس ..
الجوهرةسااااااااكته ماتكلمت ولا نطقت ..
غادة :المهم خلوني اقولكم مواصافته ..آآآآآه وش اقول وش اخلي ياسويير اما عندك اخ كامل والكامل الله..وش زين وش وسامة ..وش جسم ..وش اخلااااااااااااااق..بس هذا مايمنع اني اقول انه عليه تصرفات ترفع الضغط وخاصة اذا عصب لا تقربين منه ..لكن قلبه ابيض..وينسى على طووول اللي سواه ..ولا يحقد.. ولا يكره احد ..وازين مافيه انه اذا غلط يحاو قد مايقدر يصلح غلطه.. وش بعد ..اممممممم ..ايييييييييه هاااااااااادي ورومااااانسي وعاطفي لأبعد حد..
يصلح لك الجوهرة ..اخخخخخخخخخ
الجوهرة: ياملحك اذا بديتي تخففين دمك..
سارة:ايه والله وين بنلاقي احسن منك؟؟؟؟؟؟؟؟؟؟؟؟
الجوهرة:أقول ..اعقلوا اصلاً أنا مافكر بهالأشياء الحين ..
غادة:أحلى يامصرية...هههههههههههههههه
الجوهرة:تدرون الكلام مامنه فايده معكم مع احترامي الشديد...
غادة:سويير والله وعرفنا نرفع ضغطها..اخخخخخخخخخخخخ
الجوهرة:أنا اقوم اروح اشوف خالتي ابرك لي ..
وراحت الجوهرة تسلم على خالتها هيا ..وقعدت معها شوي ..بعدين راحت على غرفتها .
وطووول الوقت والجوهرة تفكر بكلامهم وسواليفهم وخاصة الكلام اللي قالوه عن فيصل..وحست ان اهتماهها بفيصل زااد..لكن الحركات اللي كانت تسويها بفيصل تشوفها قدامها طووول الوقت في هاللحظه كان ودها توقف الزمن وترجع وراااا وتمسح كل اللي سوته معه..بس شوي قامت تكلم نفسها وتقول:وش اللي جاني وش مسوي لي هالولد ماادري وش هالشعور الغريب اللي احسه تجاهه ..هل هو قهر منه ..شفقة..او ..او..حب..ويوم قالت هالكلمة كان قنبله انفجرت فيها..اعقلي يالجوهرة وش حب وش خرابيط وشلون تسمحين لنفسك تحب واحد زي هذا ..بعد كل اللي سواه فيني واللي سويته فيه ..احبه..لاااااااااااااا وش اللي قاعدة افكر مستحيل اني اكون حبيته..واستدركت نفسها ..وقالت :طيب ليش مااحبه..كل المواصفات اللي ابيها فيه ..ويكفي ان قلبه ابيض..
وفجأة تذكرت الجوهرة يوم اتصل عليها فيصل ..وتذكرت كلام غادة يوم تقول ان احسن مافيه انه يعتذر..في هاللحظة ودها ان الارض تنشق وتبلعها وين تودي وجهها ..هو كان متصل بيتفاهم معها ..ويعتذر لها على اللي صار منه..وهي على بالها بتسوي ثقل..
شوي الا صوت ماسج على الجوال يقطع حبل افكارها..
أخذت الجوال وشافت الماسج ..الرقم مو غريب ..تذكرت انه رقم فيصل ..ايه فيصل ..مافقد الامل أرسل لها ماسج قال يمكن تعطيني وجه تحس فيني ..وتعرف اني بس ودي اعرف وش سر حركاتها البايخة معي..ويمكن اقدر افهم شخصيتها ..
الماسج يقوول:الثقل عمره ماكان للغلا باب ***والصد يطعن طعن الخناجر..
الجوهرة بعد ماقرت الماسج انقلب حالها وحست انها اتفه انسانه واستحقرت نفسها..لكنها ماطاوعت قلبها ومشت مع عقلها ..عقلها يفرض عليها الكبرياء..وعزة النفس..
اذا رديت عليه وش بقوله وش وجهي عنده..واصلا ليش اكلمه..
وياعمري الجوهرة صارت مابين نارين ..قلبها وعقلها..فجأة مادرت الا ودموعها على خدها ..يارب ساعدني ..يارب وش سويت عشان يصير فيني كذا..طيب ابي افهم وش اللي صاير فيني ..وقعدت الجوهرة على هالحال طووول الليل ولانامت ياعمري بس تفكر ..
=================
أما فيصل الله يلطف بحاله هو الثاني بعد ..توقع ان الجوهرة بترد عليه لو بتهزئ بس اهم شي ترد..لكن صار العكس تماما وحس انه غبي وتسرع يوم أرسل الماسج للجوهرة يقول في نفسه :الحين تحسبني راعي حركات وأنا والله ماسويت كذا الا عشان اعتذر لها بس عارف ان كل هذا من حركتي البايخة ..وصار فيصل يلوووم نفسه ..مايدري إن الجوهرة تلووم نفسها بعد..لكن محد داري عن الثاني..وقعد فيصل طووول الليل سهران ماجاه نوم طول الوقت يفكر ..لكن مايدري بالضبط هو يفكر في ايش ووش هدفه من التفكير هذا كله..هل هو يحبها ..أو بس حب انه يعتذر لها عشان ماتاخذ عنه فكرة..اوعشان شخصيته كرجل لازم يعترف بأخطائه ويحاول يصلحها..
وهذا حالهم طوول الليل ..
ومر اليوم على هالحال..ويوم جا الصبح قاموا غادة وسارة ..وكانوا ينتظرون الجوهرة ..متفقين يطلعون يتمشون بالمزرعة ..ويوم طولت عليهم الجوهرة..
غادة:غريبة وش فيها الجوهرة ماهي بالعادة تتأخر لهالوقت..
سارة:ايه والله غريبة ..دايم تقوم قبل الشغالات بعد..
غادة:عساه خير بس ..
سارة :أنا طالعة أشوفها الحين ..
وراحت سارة لغرفة الجوهرة ..دقت الباب ماحد رد والباب مقفوول..خافت سارة وحست انه صاير لها شي..راحت نادت غادة ..ويوم جات غادة ودقوا الباب عليها قامت الجوهرة..وفتحت لهم الباب..عاد البنات يوم شافوا شكل الجوهرة..ارتاعوا..وجهها صاير أصفر وذبلان..وعيونها حمراء..
غادة:الجوهرة فيك شي خوفتينا عليك وبعدين وش فيه شكلك ..تعبانه فيك شي تكلمي..
الجوهرة:لا أبد غادة لاتخافين ولا شي بس امس مانمت بدري ..
سارة:خير صاير لك شي..تعبانة من شي..؟؟
الجوهرة:بنات الله يهديكم يعني وش بيكون فيني ..بس أمس جاني صداع وماقدرت أنام ..
غادة:أكييييد .؟
الجوهرة:أكييييييد
سارة :طيب صار خير تنزلين معنا ولا تكملين نومك..
الجوهرة :لا أنزل معكم ..ماودي أنام يصير أرجع أنام اليوم بدري..
سارة :خلاص أوكي ننتظرك تحت في الصالة على مانجهز الفطور الا انتي نازلة أوكي..
الجوهرة :أوكي عشر دقايق وأنزل لكم..
وبعد ماخلصت الجوهرة وجات تنزل قابلت أبوها ..سلمت عليه ..أبوها يوم شاف شكلها ارتاع..
الأب :الجوهرة ..وش فيك يمه وجهك مبين انك تعبانة..
الجوهرة:لا يبه أبد ..بس امس مانمت زين تــ...
الأب :خيييييير فيك شي تشتكين من شي..اوديك المستشفى..
الجوهرة:لاااااااا يبه الله يسلمك مافيني شي بس اقولك تعرف امس كنت سهرانة مع البنات..وراح وقت نومي وعيا يجيني مرة ثانيه الا متى..
الأب :اييييه بس يمه لا تسهرين شوفي شكلك وشلون صاير بعدين السهر في المزرعة ماينفع ..نامي بدري وقومي بدري يصير تطلعون تتمشون الصبح وانتم رايقين..
وبعدين انا محضرلك مفاجأة ..
الجوهرة:خير يبه؟
الأب :جبت لك المرسم اللي تبين..والحين بيجون العمال يحطون أغراضه..خليته تحت في البدروم..
الجوهرة:صددددددددق يبه..
الأب :ايه صدق وبعد فيه مفاجئة ثانية بس بعدين أقولك وش هي..
الجوهرة:تسلملي يبه الله لا يحرمني منك ولا من طيبك..وحبت على راس ابوها..
الأب :تستاهلين أكثر يابنتي..مادري وشلون أعطيك حقك..انتي اللي رفعتي راسي فوق..
الجوهرة:تسلملي والله هذا كله من تربيتك لي انت والوالدة ولا من غيركم وش كان بيصيرلي..
الأب :الله يوفقك ..ويسعدكِ..ويحقق لك كل أمانيك..
الجوهرة :الله لا يحرمني منك انت والوالدة..
وراحت الجوهرة للبنات وطلعوا وتمشوا . وقالت لهم وش اللي جابه لها ابوها.وباركوا لها ..
أما فيصل نفس الشي حاله تغير صار بس شارد في التفكير حتى لو كان جالس مع العيال ..واليوم وهو جالس معهم حس عمه ضاري أنه فيه شي..
ضاري:فيصل...فيصل؟؟؟
فيصل:هلا
ضاري :وش فيك شارد منت معنا..
فيصل :لا أبد بس تعبان شوي..
ضاري :خير وش فيك...
فيصل:مافيني شي لا تخاف بس امس كنت سهران على فلم وماخلص الا على صلاة الفجر..
ضاري:اهااا ..احسب فيك شي
فيصل:لا لاتحسب..
ضاري:الشره مو عليك على اللي يسأل عنك وخايف عليك..
وقعد فيصل شوي معهم بعدين استأذن منهم بيروح يبدل ملابسه..ودخل البيت..
والبنات رجعوا من المزرعه وراحت الجوهرة تشوف المرسم اللي جابه لها ابوها..
وفيصل وهو نازل من غرفته..سمع البنات غادة وسارة وهم يتكلمون..
غادة :الله من قدها الجوهرة مرسم وحركتات..
سارة:ايه والله شي ..عاد هي رسمهاا خطير..تذكرين العام اللوحات اللي جابتها..
غادة:ايه والله ماشاءالله عليها ..بس لوانها حطت المرسم فوق في الصالة مو أحسن لها من البدروم؟
سارة:لا بالعكس شين لو انه في الصالة ماراح تاخذ راحتها العيال طالعين نازلين تحت اريح لها ..
وفيصل طول الوقت قاعد يسمع وش يقولون..في هاللحظه جات لفيصل فكرة مالها داعي بس وش يسوي ماله غير انه يكلمها وجهاً لوجه..
ونزل فيصل للبدروم وشاف الجوهرة ..قلبه صار يخفق بسرعة ..وصاريتنفس بسرعة..وكان يحس ان الجو بارد وجسمه حار..وهو قاعد ينزل درجة درجة..لين وصل ودخل على الجوهرة..
فيصل:السلام عليكم..
الجوهرةبعد ماطالعت فيه وهي مرتاعة ولوحدها بعد كانت بتروح فيها..ومن الروعة ماتكلمت صارت مبلمه..
فيصل:أنا عارف وش بتقولين عني أنا حيوان وحقير اللي تبين بس ممكن سؤال..
الجوهرة:انت شلون تسمح لنفسك تدخل على بنت ماتصير لك.. ولا ولوحدها بعد ..ماعندك دم ماعندك ضمير ..ماعندك شي اسمه غيرة..
فيصل مقاطعها:الجوهرة لو سمحتي افهميني ..بتفاهم معك ممكن ..؟؟
الجوهرة بعد مارتفع صوتها:وش تتفاهم فيه ممكن تقولي على حركاتك البايخة ..على بالك انك مسوي فيها رجولة يوم أنك ترد الحركة لي مع اني ذاك اليوم ماكنت قاصده وانت عارف هالشي..
واصلا على بالك شطارة يوم انك تتشطر على بنت ..لو بغيت تتشطر تشطر على اللي مثلك..
فيصل:الجوهرة لوسمحتي بهدوء أنا ماأنكر اني غلطت لكن حاولت اصحح غلطي لكن انتي مااعطيتيني فرصة حتى للإعتذار..وبعدين اذا انا غلطت غلطة ممكن تقولين لي انتي وش سويتي فيني وانا ساكت ..ساكت لكن موعشان شي..ترى لولا حشمة خالي عبدالعزيز وهو اللي مربيني كان صار شي ثاني..وش اقولك وش اخلي من حركاتك اللي سويتها فيني ..
الجوهرة:جاي عندي ومتهجم علي وتهدد بعد ..
فيصل مقاطعها خانقته العبرة:الجوووووهرة الجوهرة الجوهرة..لوسمحتي افهميني حرااااام عليك تسوين فيني كذا.
الجوهرة:لوسمحت اطلع برا..وش يقولون لو جا احد شافك هنا..
فيصل:انتي ليش تحاولين تطلعيني انا الوحيد اللي غلطان..ليش منتي راضية تعترفين بغلطك..
الجوهرة:شوف لا تحاول تبرئ نفسك وتقول انك ماسويت شي اصلا لولا حركتك السخيفة اللي ذاك اليوم كان كل واحد في حاله ..وزي مايقولون البادي أظلم ..
فيصل :ايه انا مانكر بس حاولت اصحح غلطي لكن انتي اللي ماتقبلتي ..
الجوهرة:اتقبل ولا ماتقبل هذا شي راجع لي ..
فيصل :الجوهرة اعقلي ..كبري عقلك شوي الى متى بتستمرين بعنادك وكبريائك اللي ماله داعي.وبــ...سمع فيصل صوت ويوم رفع راسه وناظر في الجوهرة لقاها تصيح..
فيصل :.....
الجوهرة:يكفي ..يكفي انت اصلا ماتدري وش صار لي بسببك ولا ماكان تجرأت تقول كذا ..
فيصل :الجوهرة ..أنا آ..آآسف إذا كنت جرحتك بالكلام او...وسكت..
وناظرته الجوهرة إلا الدمعة نازلة من عينه..
صاروا الاثنين يطالعون بعض وكل واحد يدمع من جهة ..طلع فيصل وترك الجوهرة.وقعدت الجوهرة تفكر باللي صار هو حلم ولا علم .وصارت تكلم نفسها.وش هذا اللي صار أكيد انه حلم ..وش ذا يالجوهرة..وش اللي قلتيه وش اللي سويتيه..إلى متى بتتعاملين بهالإسلوب ..متى بتتركن عنادك وغرورك وكبريائك المزيف..ايه انا احبه ليش أنكر..صح اني كنت ماأطيقه في البداية لكن الحين غير..بس وشلون حبيته.يعني اذا حبيته مستحيل هو يحبني ..يكفي اللي سويته فيه ..يعني معترفة بغلطي..
قعدت الجوهرة تفكر ..وتفكر..
.................
أما فيصل ياعمري مايدري وش يسوي بعمره..وكل همه انه شلون جاته الجرأة يسوي كذا ..وقعد يتخيل شكله ..عصب فيصل ووصلت معه..وطلع من المزرعة..وماحد شافه..ودق على صديقه فهد (فهد هذا صديق عمره اي شي يصير لواحد فيهم يشكيه للثاني)..
وطلب انه يقابله وراح له وقاله وش صار ..
فيصل:وهذا اللي صار معي ..
فهد :فيصل ..انت تحبها صح..؟
فيصل :فهد انت ماتدري وش معنى اني تعلقت بهالبنت مع ان اللي مكاني يذبحها مو يحبها..
فهد:خلاص قولها انك تحبها ..
فيصل :فهد انت وش قاعد تقول انا بس بغيت اتفاهم معها سكتتني انلطمت مادري وش اقول مو عاد اجي اقولها انا احبك قسم بالله تخليني جنازة مايصلون عليّ فيها..
فهد :فيصل استح على وجهك شين وقوي عين هي صادقة بكل اللي قالته واللي سوته داخل عليها وتبي تهزءها ماصارت ..اسلوبك الشين هو اللي خلاها تتعامل معك كذا
فيصل:الله يعافيك هذا اسلوبها من عرفتها ..
فهد:يابن الحلال الحين موقفك انت تغير..انت الحين تحبها حاول توصلّها باي طريقة مقنعه ..
فيصل :شلون يعني ..؟
فهد :مثلا كلم اختك تتوسط لك وبعدين احمد ربك انها قريبه لك وابوها خالك ولا تنسى انه هو اللي رباك بعد وفاة ابوك الله يرحمه..يعني فيه أمل ..
فيصل :تصدق جبتها ..اكلم اختي واشرح لها الوضع..
فهد :ايه بس انتبه لا تقولها وش اللي صار ..
فيصل :ليه وش قالوا لك عايف عمري..
فهد:خلاص توكل على الله وقول لأختك تكلمها ..
فيصل :بس أخاف ماتوافق بعد اللي صار ..ترى تسويها
فهد:انت ليش معقد المسألة..جرب ومنت خسران..
فيصل :نشوف..
===============================
راحت الجوهرة لغرفتها وقفلت على نفسها وقعدت طبعا أنواع الصياح وضيقة الصدر..وشوي دقت عليها صديقتها نهى..
نهى:أهليييييييييييين ياعمري وحشتيني وينك من زمان ..
الجوهرة:هلااااااا وغلااااااوالله شلونك ..يالقاطعه..
نهى:الحمد لله بخير كيفك انتِ وش اخبارك ..؟
الجوهرة:تماااام الحمد لله مشتاقتلك مرررررة..
نهى :وأنا أكثر ..الجوهرة وش فيه صوتك ..عسى ماشر..
الجوهرة:لا أبد مزكمة وحالتي حالة ..
نهى:سلاامات ياعمري ماتشوفين شر ..وش اخبار الوالده ..
الجوهرة :ماعليها بخير تسأل عنك ..
نهى:الله يسلمها تكفين سلمي عليها ..
الجوهرة :إن شالله يوصل..وش اخبارك واخبار العريس وشهر العسل ..
نهى:الله يالجوهرة وش ونااااسة وسعة صدر..
الجوهرة:الله يهنيكِ..
نهى :يالله الجوهرة ماطول عليك حبيت اسلم عليك وأخذ اخبارك..
الجوهرة:الله يسلمك ..ولا تقاطعين واذا كنتي فاضية او زوجك مو عندك ارسلي لي ماسج وانا ارجع ادق عليك ..اوكي..
نهى:إن شااالله..يالله مع السلامة..
طبعا الجوهرة ماقدرت تقول لنهى على اللي صار لانها ماتبي تضيق صدرها وهي في شهر العسل ..وقالت مالي غير ادق على امي أسلم عليها..
وبعدين دقت الجوهرة على أمها تسلم عليها ..وقعدت تسولف معها شوي وقفلت .
البنات غادة وسارة فقدوا الجوهرة وراحت سارة تشوفها دقت عليها الجوال ماردت عليها ..قالت غادة أنا اروح لها في غرفتها اشوفها..
وراحت دقت عليها طبعا الجوهرة ماردت عليها لأنها ماهي رايقة..
وقالت غادة اكيد انها نايمة لانها مانامت اليوم بس غريبة ماقالت لنا شي أكيد فيها شي وراحت قالت لسارة ..ويوم راحت لسارة قالتلها عاد سارة قالت انه الامر عادي يعني يمكن مامداها تنزل المهم
الحين خلينا نروح نشوف الفيلم لا يفوتنا..
شوي الا فيصل جاي ..نادى سارة وراحت له ..
سارة :هلا فيصل ..
فيصل :أهلين ..كيف الحال ..((وباين عليه انه مرتبك))
سارة:الحمد لله بخير وينك اليوم بعد المغرب امي كانت تبيك مالقيناك والجوال ماترد عليه..
فيصل :كنت عند واحد من خوياي والجوال حاطه عالسايلينت..المهم..أنا ..ودق جواله..
وقعد يكلم ..ويوم خلص ..قعد ساكت ..
سارة:كمل..
فيصل :وش أكمل ..
سارة :وش تبي ..أنت وش فيك..
فيصل :إيه ..أنا..رايح أجيب عشا تبون شي اجيب لكم ..
سارة لامشكور تعشينا أنا وغادة أول ..((علامات تعجب ))
فيصل:والجوهرة..
سارة:لا طلعت تنام بدري..
فيصل :ليه فيها شي..
سارة :مافيها شي وبعدين انت وش عليك وش ورا هالأسئلة ..
فيصل:مافي شي يعني الواحد مايسولف ..
سارة:لا عادي بس الغريبة انها ماهي بالعادة انك تسولف وخاصة عن الجوهرة..
فيصل :أقول عاد فكينا.. الشره مو عليك على اللي جاي يسأل عنكم..
وطلع فيصل وسارة علامات التعجب ماليه راسها..
وراحت عند غادة وقالت لها اللي صار ..
غادة:غريبة وش قصته ..لايكون الولد مغرم وحنا ماندري..
سارة:وش قاعدة تقولين..يحب الجوهرة انتي ناسية وش سوا فيها ..
غادة :لا مانسيت بس مو معناه انه مايحبها يمكن مايبي يبين...
سارة:والله مادري عنه المهم وش رايك نطلع ننام عشان نقوم بدري بكرة ترى مالي خلق للسهر..
غادة :إيه والله أزين وبالمرة نقوم مع الجوهرة..والفيلم مو مشكله نشوفه بكرة..
==========================
وياحياتي الجوهرة على بالهم انها نايمه مايدرون إنها شبه منهارة..ومر اليوم على الجوهرة كأنه سنه من ثقله عليها..وصارت بس تهوجس وتفكر..
==========================
أما فيصل:نفس الشيء هو الثاني قاعد يكلم نفسه ويعاتب نفسه ليش ماكلمت سارة أنا كنت رايح عشان أقولها
..وبعدين ليش سألتها عن الجوهرة الحين أكيد بتألف لي قصة..وبعدين الجوهرة ليش ماكانت معهم ..تكون متضايقة من اللي صار..يووووووووه اكيد متضايقة ورايحه فيها هو اللي سويته سهل ==========================
وطووووول الليل وهم على هالحال ..لكن القهر ان كل واحد يحسب ان الثاني مطنشه..ومو حاس فيه..وقعدوا على كذا الى الصبح ..
وأصبحوا الناس على خير لكن الجوهرة وفيصل توه يبدا ليلهم..
يوم جا بعد الظهر الا البنات غادة وسارة يقومون وطبعا متوقعين مليون بالميه انهم راح يلقون الجوهرة صاحيه..من بدري..وياعمري الجوهرة مايدرون عنها ولا على اللي صار لها..
ويوم نزلوا البنات ودروا ان الجوهرة ماقامت..قالوا لا البنت أكيد فيها شي ..وراحوا عندها في الغرفة دقوا عليها طبعا ماردت لإنها مامداها تنام وهي سهرانه وتعبانه وأكيد ماراح تحس فيهم..
غادة:غريبة ..لايكون البنت صاير لها شي وحنا ماندري ..
سارة:فاولي خير..يابنت الحلال بس يمكن تعبانة ..تعرفين لها يومين ماتنام زين وتجمع عليها النوم..
غادة:شوفي نتركها ساعة ونرجع اذا ماردت علينا نروح نقول لخالتي هيا..
=========
وبعد ساعة ونص تقريبا رجعوا البنات للجوهرة ودقوا عليها وماردت ..
وبعد معاناة ردت عليهم الجوهرة..وتعرفون الواحد اذا كان نايم وهو تعبان وسهران اذا قام مايدري هو حلم ولا علم ..المهم يوم قامت ماتدري وش السالفه وشكلها رايح فيها من الارهاق..
غادة:الجوهرة منتي صاحية فيك بلا..وش ذا كل هالطق وماتسمعين..
الجوهرة:أي طق ..؟؟!!
سارة:لا باين عليك غارقة في النوم..
الجوهرة:معليش تراي أمس مانمكت زين تعرفون نومي صاير حوسة هاليومين..
غادة:وشلون مانمتي بدري وحنا أمس دقينا عليك ومارديتي ..
الجوهرة:لانمت ..بس ماطولت رجعت قمت بأخر الليل ..
سارة:أكيد الجوهرة ..الجوهرة إذا عندك شي متضايقة من شي تكلمي ترى حنا خوات مابينا شي .طلعي اللي في قلبك أنا عندي إحساس كبير إنه عندك شي وشي كبير بعد ولا ماكان انقلبتي 180درجة في يومين ..
غادة:لا حنا يبيلنا قعدة خلونا ندخل ..ايه يالجوهرة أنا وسارة لا حظنا عليك هاليومين انك متغيرة ونفسيتك تعبانة لاتحاولين تنكرين ترى مهما حاولتي تكابرين يبان عليك وين الجوهرة الاولى اللي كلها نشاط وعفوية أول من يقوم أنتي وتقومين البيت كله وتسوين الفطور والغدا واحيانا العشا ونطلع نتمشى ونروح ونجي لكن الحين غير..صحيح انه مالك الا يومين بس يعتبر بالنسبة لنا....
الجوهرة:خلاص يكفي..تكفون بنات أنا محتاجة أقعد لوحدي ..إذا ممكن..
سارة:لاااااااااه ..باين ان السالفة صدق الجوهرة أحد مضايقك ..متضايقة من شي تكلمي حنا ضايقناك في شي..أمك فيها شي ..ودك تروحين لها..
الجوهرة:بنات لاتفسرون الموضوع غلط انا مافيني شي بس..وياعمري الجوهرة ماقدرت تمسك نفسها وقامت تصيح..صياح وحدة متعذبة..متألمة محد حاس فيها..ماعندها أحد تشكي له ..ولاعندها احد يوجهها ويقولها الصح من الغلط..ماعندها أحد يبادلها همومها..ماعندها أحد تقوله أنا ..أحب..
سارة:الجوهرةأنا أسفة إذا كنت ضايقتك..
غادة:لا ياسارة الجوهرة ماهي متضايقة لامني ولامنك ..الجوهرة متضايقة من شي أكبر من كذا..لكن رافضة تتكلم..
سارة:معقولة يالجوهرة كل هذاولا تقولين لنا شي كل هالضيقة كاتمتها في قلبك ولا تشكين..ليش ماتفضفضين اللي في قلبك ..مايصلح لك الكتمان والله مايصير..
والجوهرة كل ماقالوا كلمة يزيد نزف الجرح اللي في قلبها ودها تتكلم وتصارخ بأعلى صوت وتقولهم الحقيقة لكن صعبة ودها تقولهم وش فيها ومنهو السبب في حالتها لكن نفس الشي مستحيل وكل ماتكلمت سارة تناظر فيها نظرات كلها ألم. كأنها تقولها اللي أنا فيه الحين بسبب أخوك ..اللي حبيته..واللي معذبني ليل نهار..ومادرى عني..ودها تتكلم وتقول ياناس ترى أنا أحب فيصل قولوله هالكلام وصلوه له ..قولوله أني أبيه ..قولوله إني آآسفة على كل اللي صار مني ..ومستعدةأسوي اللي يبي بس يسامحني..أنا مسامحته عن كل اللي صار.......!!
غادة ياعمري يوم شافت حال الجوهرة قامت تصيح ..يوم طالعت فيها سارة..
سارة:هييييي أنتي حنا جايين نهديها ولا نزيدها..
الجوهرة يوم طالعت غادة قالت:لا لا غادة تكفين..((وارتفع صوتها))أنا مابي أحد يشفق علي أنا مابي أحد ينظر لي نظرة شفقة..
سارة:الحين انتي قولي وش فيك بعدين يصير خير وبعدين انتي بعد ياغادة ماله داعي اللي انتي قاعدة تسوينه ..
غادة:سارة انتي تعرفيني مااتحمل يعني وخاصة الجوهرة أول مرة أشوفها بالموقف..الجوهرة اللي تعودنا عليه إنسانة متماسكة قوية مايهمها شي جدية في حياتها..يطلع منها كل هذا ..
الجوهرة:بنات لو سمحتوا ممكن تطلعون متضايقة ودي اقعد لحالي ممكن..
سارة:خلاص الجوهرة ماراح أضغط عليك لكن إذا تبين أي شي ناديني..
بعدها الجوهرة قفلت الدنيا بوجهها وشلون ماقدرت تمسك نفسها وشلون ماقدرت تتحمل ..وقعدت الجوهرة طووول اليوم بغرفتها.
=============================
وفيصل خلاص وصلت معه انشل تفكيره مايدري وش يسوي لكنه يعرف إنه يبي شي واحد..
يبي الجوهرة ..ايه يبيها بزينها وبشينها..وقرر فيصل إنه يكلم عمه ضاري بماأنه المستشار الأول للشباب في العيلة..وفعلا دق على عمه وقاله انه يبيه بموضوع ضروري لكن ضاري كان مشغووول وعنده رحلة عمل لمدة يومين وقاله إنه بعد هاليومين يفضي نفسه له..
لكن فيصل اليومين هذي بنظره شهرين ..لكن وش يسوي ماله إلا كذا..
==================
غادة وسارة قاعدين في الصالة وأنواع الكآبة ماهم قادرين يستوعبون اللي صار للجوهرة..الا شوي دخل ابو الجوهرة عاد البنات أنواع الارتباك وش بيقولون له ان سأل عنها وأنواع الإشارات والغمزات..
وبعد ماسلم عليهم..وين الجوهرة عنكم أكيد طالعة تتمشى عندي لها موضوع ضروري..
غادة:لا لا ياعم الجوهرة نايمه ..
سارة:ايه ياخال ياحليلها نايمه ياعمري متى نامت أمس بس تفكر..تعرف تسجيلها قرب.. وش الأقسام اللي تبيها وماتبيها ..
أبوها :الى الحين نايمه وانا قايلها ماتسهر المهم اذا قامت قولولها ابيها ضروري ..
غادة:إن شالله ياعم ..
=========
ومر اليوم كئيب ممل ..وثقييييييل ..
وفي اليوم الثاني العصر جا أبو الجوهرة يسأل عنها وطبعا الجوهرة في غرفتها..وقالوا لها انها في الغرفة وطلع لها..ودق عليها الباب وفتحت له الجوهرة ..
الجوهرة :هلا يبه شلونك ..
الأب: الحمد لله بخير شلونك انتي وشخبارك وينك يابنتي ماتنزلين مع البنات قاعده بغرفتك ليش مليتي..
الجوهرة:أبد يبه بس اليوم مانمت زين ..
الأب :إيه ..أقول يمه وش أخبار المرسم وش سويتي لنا من لوحات ..على فكرة أول لوحه بتسوينها بحطهاعندي بالمكتب..
الجوهرة:إن شالله يبه..
الأب :وش يبه كأنك متضايقة أوشي عاد أنا جايبلك المفاجأة اللي وعدتك فيها ..
الجوهرة:خير يبه..
الأب : كل الخير بس جهزي نفسك بعد أسبوع بنسافر ..
الجوهرة:صدق يبه..
الأب :ايه أن شالله بنروح أول شي إيطاليا وبعدها سويسرا وألمانيا تقريبا كل مكان بنقعد فيه اسبوع يعني الرحلة 3 أسابيع ..
الجوهرة:مشكووور يبه ماتقصر الله لا يخليني منك..بس يبه مين اللي بيروح ..؟
الأب:أكيد كلنا..إن شالله تكون المفاجأة عاجبتكِ..
الجوهرة:أكيد يبه كل شي يجي منك حلو..
الأب:تسلمين لي يمه..بس بلغي أمك لا تنسين ..
الجوهرة:إن شالله يبه ..
===================
والجوهرة ضاق صدرها يوم قالها أبوها انهم كلهم بيروحون وصار كل تفكيرها وش بتسوي اذا راحوا هناك أكيد بيكونون كلهم مع بعض وين ماراحوا ووين ماجو..
وخلاص ياعمري وقف تفكيرها ماتدري وش تسوي ..أخر شي قالت خليني أنزل عند البنات أزين لي بدل ماأقعد لوحدي وأقعد أهوجس..
ونزلت الجوهرة عند البنات وقعدت معهم وقالت لهم انهم بيسافرون عاد قعدوا كلهم وأنواع التخطيط وش بيسوون اذا سافروا وش بيلبسون وش بيحطون....إلخ.
ويوم جا الليل وكل مين راح ينام الجوهرة غارقة في التفكير وش بيكون موقفها من فيصل اذا راحوا ..وقررت انها بتعتذر له عن اللي سوته أخيرا..وتقريبا ارتاحت الجوهرة بس الباقي على فيصل هو بيقبل اعتذارها أو لا..؟؟؟
============================
وفي اليوم الثاني الظهر قامت الجوهرة مصحصحه ومرتاحة وحست انها من زمااااااااان عن هالشي وراحت قومت البنات عشان يجهزون أغراضهم واذا في شي ناقصهم يطلعون السوق ..وقاموا البنات وقعدوا يجهزون أغراضهم واتفقوا انهم يطلعون للسوق بعد العصر..
=========
وفيصل طول هالوقت ينتظر رجعة عمه ضاري عشان يكلمه بالموضوع ..فيصل كان يتمشى حول المزرعة ينتظر عمه ضاري ويوم جا ضاري كأنه شايف له أمير أو مسؤول على غفلة ..وش ترحيب ويحب على راسه ووحشتنا ياعم وكيف الحال ..طبعا ضاري علامات التعجب ماليه راسه بس تذكر ان فيصل كان يبيه بموضوع واستنتج ان ترحيب فيصل ماهو إلا من أجل مصلحة ..
ويوم قعد معاه ..
فيصل:وش أخبارك ياعم عساك بخير..
ضاري :فيصل عن اللف والدوران دوختني من اليوم وانت كيفك وش أخبارك والله لو أني غايب عنك شهر هي كلها يومين اللي سارفتها وجيت الحمد لله ..خلصني وش عندك ..
ودي إنك تساعدني فيه
ضاري:خير وش عندك
فيصل:بصراحة ياعمي أنا ودي أخطب
ضاري:نعم ..وش تقول ودك تخطب
فيصل:إيه ياعمي أنا ..أنا
ضاري :إنت وشو
فيصل:أقولك بس ماتستحقرني وتقول عني لعاب وماعندي سالفة
ضاري :لا السالفة شكلها ماراح تنتهي على خير ..قول ماراح أقول عنك شي
فيصل :أنا أبي الجوهرة
ضاري :أنت صاحي ولانايم
فيصل(بنبرة صوت منكسرة):عمي أرجوك أنا عارف وش بتقول ووش بيكون ردك لكن رجاءً لاتحاول تعايرني على اللي سويته لإني فعلاً حبيت هالإنسانه وأحسها هي اللي تناسبني
ضاري:فيصل افهمني أنا مو قصدي أعايرك أوأهزئك أو شي لا بس الواحد يفكر بالعقل ..أولا انت توك عالزواج أسس نفسك وبعدين يصير خير ..ثانيا ..إنت ضامن ان البنت تبيك وبصرحة أنا ماتوقع بعد اللي سويته فيها ..وإذا قالت شي أنا بوقف معها وبأيدها ..
فيصل:أرجوك لاتحاول تذلني باللي سويته فيها.. غلطة والواحد مو معصوم من الغلط ..وبعدين مو اذا انا قلت بخطبها أو أبيها معناه إني بتزوج الحين ..و..
ضاري:معنى كلامك أنك تو تعرف قيمة البنت بس بعد وشو بعد ماأهنتها قدام اللي يسوى واللي مايسوى أنا مأقولك كذا عشان أذكرك بشي أنت ماتبيه وبعدين على قولتك إنها غلطة لكن مو أي غلطة..
فيصل:ياعمي ياعمي افهمني الله يخليك.. خلاص انسى اللي فات المهم وشلون أوصلها وشلون..
وقعد ضاري يفكر بالموضوع وحس إن فيصل ندمان ومتحسف على اللي سواه ..
فيصل:عمي وشلون أثبت لك إني أحبها وأبيها ..إنت لو تدري العذاب اللي أتعذبه من كثر ماني متندم كل يوم على حسابها عمي أنا لو بيدي كان رجعت دايرة الزمن ومسحت كل اللي سويته معها وودي أصيح بأعلى صوت وأقولها الجوهرة سامحيني على اللي سويته أنا أعترف بغلطي وأسوي اللي تبيه عشان تغفر اللي سويته فيها ..بس المهم تقبل فيني ..
عمي أنا ماكلمتك بهالموضوع الا وأنا واثق فيك وعارف إني بالقى حل عندك والشور عندك عمي تكفى لاتردني خايب..
ضاري يوم شاف إن الرجال من جده يتكلم ومافيها كلام إنه يبي البنت ..قاله :شوف يافيصل أنا بحاول أساعدك باللي أقدر عليه والله يقدم اللي فيه الخير.. وعلى العموم الأمر كله قسمة ونصيب وبيد الله سبحانه يعني اذا الله كاتب انك بتاخذها بتاخذها لو أبوها نفسه رفض وإذا الله ماكتب لك معها نصيب ..عاد هنا أقولك الشكوى لله
فيصل:كلامك ياعمي على عيني وراسي بس تكفى حاول عشاني..
ضاري عصب ووصلت معه :أقول عاد عطيناك وجه بزيادة قلنالك نشوفلك الموضوع خلصنا عاد..
فيصل طبعا انطم وانكتم أكيد مايقدر يسوي اي شي..
شوي جاهم مشاري طاااااير ومصفي الطبلون مرجوج كالعادة ..
مشاري:عمي ضاري شلونك شخبارك شمسوي الله يسلمك ..
ضاري:أقول عاد ماني رايقلك إنت وخفة دمك اللي أحيان مالها داعي خير وش تبي..
مشاري :خير عمي وش فيك جاي أسلم عليك واتحمد لك بالسلامة..
ضاري:خير وش عندك انت بعد لا يكون عندك مشروع زواج انت الثاني.............؟.
مشاري:ههههههههههااااااااي حللللللزوة منك ياعمووو خطيييييرة ..المهم بطلبك طلب وقل تمممممممم......
ضاري:إنا لله وإنا إليه لراجعون..اللهم طولك ياروح.. وش عندك خير قول ..
مشاري :عمي أبحجزك لي هالمرة تكفىىىىىىىىى..
ضاري:!!!!!!@@!! ;!!
مشاري:وش الله يهديك مطير عيونك كأني قلت شي غريب ..
ضاري:فيصل فهمت شي من اللي قاله..
فيصل:إذا فهمت أعلمك..
مشاري:يووووووووووه لازم الواحد يشرح يعني أنا أقولك مو حنا الأسبوع الجاي مسافرين..وأنا أبيك تكون مرافقي في السفر..
ضاري:اهاااااااا كان قلت يابن الحلال من أول غنها سفرة وأنا على بالي معادلة كيميائية قاعد أوزنها..
فيصل:لحظه لحظه ..أي سفرة وأي خرابيط..وش السالفة ..
ضاري:انت ماتدري..الأسبوع الجاي ان شالله بنسافر للخارج نقضي الصيفية ..
قيصل:من جدكم انتم ..متى طلع هالكلام ومن اللي بيروح ووين وكم بنقعد....؟؟؟؟!!!
ضاري:لاااااااااااااا انت مانت مع الناس أبد أنا ياللي كنت مسافر دريت وانت اللي هنا ماتدري عن شي ..عبد العزيز أخوي هو اللي رتب السفرة كلها وكل العيلة بتروح وبنقعد تقريباًشهر..
مشاري:لااااااا مو شهر بس 3 أسابيع..
ضاري:على بالك غيرت شي يعني وش اللي فرق اسبوع ..
فيصل:كلللللللل العايلة بتروح ..
مشاري:اييييييييييييه كلهم بنات وعيال حريم ورجال بسط ياعم..
فيصل:صدق انك رايق ..
مشاري:أكيد رايق المهم انا طالع الحين بروح مع أختي السوق تبون شي..
ضاري:فرقاك ..
مشاري :مقبولة منك.. يالله سلااااااااام
فيصل:شفت ياعم تكفىىىىىىىىى عجل بالموضوع قبل السفر..
ضاري:سؤال يطرح نفسه ..إنت ماتفهم ..خلاااااااص يبه قلت لك أنا أهتم بالموضوع......
=============================================
وراحوا البنات السوق وهم في السوق دقت أم الجوهرة عليها ..
بعد ماسلمت عليها ..
الجوهرة:إيه يمه وش بغيت أقولك..ترى الأسبوع الجاي إن شالله مسافرين مع أبوي..
الأم:صدق والله ..ومتى بترجعون..؟
الجوهرة:بعد3 أسابيع إن شالله ..
الأم :ومتى ماشيين؟
الجوهرة:نهاية الأسبوع..
الام:يوووه أنا بغيتهم يجون نهاية الأسبوع بس مو مشكلة نقدم الموعد ..
الجوهرة:موعد وشو يمه..خير ..
الأم :كل الخير يالجوهرة..في ناس جايين ودهم يشوفونك..ولازم تجين عندي عشان تستقبلينهم..
الجوهرة طاح قلبها أي ناس هذولا اللي يبون يشوفونها..
الجوهرة:يمه منهم ووش عندهم..
الأم :هههههه ياحليك يعني مانتي عارفة هذولا بيت أم تركي ولد خالتي جايين يشوفونك بيخطبونك لولدهم تركي والله كبرتي وصرتي عروس يالجوهرة..
الخبر هذا جا على راس الجوهرة زي الصاعقة صارت الدنيا تلف وتدورفيها وماتحس باللي حولها وكأنها وسط دوامة لوحدها ومامعها أحد ..
الأم:خلاص تجين عندي بكرة ان شالله بدري يصير أقولهم يجون المغرب طيب يمه..بس تكفين لا تأخرين..
الجوهرة ياحياتي راحت فيها ماتدري وش تقول لأمها ..يعني لو جو قبل بشوي كان ممكن لكن الحين وبعد ماحبيته لا..لا مستحيل
وانقلب حال الجوهرة فوق تحت وش تسوي وش تقول ..جو عندها غادة وسارة وطلبتهم انهم يرجعون للمزرعة بسرعة لانها تعبانة..وودها تروح ترتاح..
البنات طبعا استغربوا حالة الجوهرة اليوم الصبح كانت زي الوردة والحين كأنها مصفقة على وجهها ..وفي الطريق طول الوقت وهي ساكتة ماتتكلم واذا سألوها البنات عن شي شافوه أوي شي عجبهم ترد من غير نفس مادري أو ماشفته يعني ماكانت رايقة لهم مررة
وهي ياعمري تقول في نفسها هذا أنا وحظي ليش كذا ياربي انا وش سويت يعني ماصدقت ان الباب انفتح بوجهها رجع انسد مرة وحدة يعني الحين وش ابي اقول لامي أقولها مابي تركي
طيب ليش مستحيل تقبل مني اي سبب لأن ولد مثل تركي ماينرفض لكن أنا مابيه ..أبي شخص واحد بس ..أبي فيصل إيه أبي فيصل ..
فيصل تكفى تكلم سوي أي شي ......وش يتكلم وش خرابيط ياااارب ساعدني يارب وقدم اللي فيه الخير يارب ...أنا دايم كذا حظي زفت ..
وصارت تقول كلام وكلام ماله لاأول ولاأخر..ويوم وصلوا ونزلوا من السيارة إلا الجوهرة نست لها أغراض في السيارة وراحت تجيبها وهي راجعة كان فيصل طالع وشافها ويوم شافته الجوهرة قعدت واقفة وبس تناظر فيه من غير شعور ودها تكلمه وتقوله كل اللي في قلبها لكن..
وفيصل نفس الشئ يوم شافها قعد يناظرها ..الإثنين واقفين وكأنهم ينتظرو حكم المحكمة بينهم ..
الجوهرة تذكرت كلام أمها واللي بيصير لها وانها بتنخطب..و..و..و...قعدت تصيح الجوهرة وراحت على طوول دخلت البيت وهي رايحة فيصل ناداها..والتفتت كأنها كانت تنتظر تسمع صوته يقول أي شي..فيصل ماصدق اللي قاعد يصير الجوهرة عطته وجه الجوهرة التفتت عليه وصارت الفكار تدور براس فيصل ..وانتبه إن الجوهرة قاعدة تصيح وده يتكلم ويقول الجوهرة أنا جايك الجوهرة أنا أبيك
والجوهرة تنتظره يتكلم ..ناظرت فيه نظرات يتيمة نظرة غريبة وكأنها تبين الصراخ اللي داخل الجوهرة..نظرة كلها خوف من الجاي..واللي بيصير....
لكن هالمرة فيصل اللي راح ركب سيارته وترك الجوهرة..
وفيصل مايدري وش ينتظره ..مايدري وش اللي صاير للجوهرة وكلها 24ساعة وبتنخطب الجوهرة ..
============================================
ضاري قرر يكلم الجوهرة أو يقيس النبض عندها أول بعدين يفاتحها بالموضوع ودق عليها وقالها وش رايك نطلع نتمشى اليوم الجوهرة طبعا ماهي رايقة فرفضت وهو مصر انه يقعد معها أخرشي قالها خلاص نتمشى بالمزرعة بس ودي
أقعد معك شوي ..الجهرة استغربت إصرار عمها ضاري على إنه يقعد معها ..ولا جا ببالها أبد سالفة فيصل المهم ططلعت وقايلت عمها وقعدت معاه وقعدوا يسولفونوهم يسولفون دخلوا بسالفة الزواج عن حب وقناعة..
هنا الجوهرة ماقدرت تتحمل وبان عليها انها متضايقة..
ضاري:الجوهرة فيك شي قلت شي يزعلك..
الجوهرة:لا ياعمي أبد بس....ودمعت عينها ..
ضاري:الجوهرة خير يمه فيك شي..
الجوهرة:لا ياعمي بس متضايقة شوي..
ضاري:خير وش اللي مضايقك..
الجوهرة:ولا شي عادي
ضاري:أفاااا يالجوهرة ماهقيتها منك بعد هذا كله تقولين مافيني شي لهادرجة مافي ثقة..
وقالتله الجوهرة على سالفة الخطبة وانها بكرة بتروح لأمها وحتى أبوها موافق ماقال شي وبيروح معها ..
ضاري كأن أحد صافقه على وجهه كل اللي جا في باله فيصل وش بتكون ردة فعله ..
ضاري:طيب يالجوهرة اعتقد ان هالموضوع مايضيق الصدر بالعكس انتي ماشالله كبرتي الحين وعلى وجه الزواج واللي أعرفه عن تركي ان رجال زين ومحترم
وعلى الأقل ترتاحين وتكون لك حياتك الخاصة..ولا تكونين مقيدة بأحد..
الجوهرة:أنا معك بكل اللي قلته بس هذا اذا كان مع اللي أبيه واللي راسمته ببالي ..
ضاري :ليه انتي عندك أحد معين ..حاطة عينك على أحد مثلا..الجوهرة تكلمي وبصراحة ترا سرك في بير ..
الجوهرة:عمي أنا ماراح أسوي مثل بعض البنات أو أرد مثل ردودهم اللي دايم وأقولك أني ماحب ....لا ياعمي إيه أنا أحب وأحب واحد بس ..
ضاري:كبرتي بعيني يالجوهرة ..وأنا ماراح أصير ملقوف وأسألك من اللي تحبينه لإن هذا الشي راجع لك انتي لوحدك ..
ومحد يقدر يتدخل فيه..
الجوهرة:معليش عمي ودي أقعد معك بس الوقت تأخر وبكرة وراي قومة من الصبح ..
ضاري:بصراحة القعدة معك ماينمل منها ويني عنك من زمان ..خلاص أوكي مرة ثانية ان شالله يالله انتي روحي نامي وزي ماقلت لك لاتفكرين بالموضوع كثير الله يقدم اللي فيه الخير..
الجوهرة:الله يعين يالله عمي تصبح على خير.
راحت الجوهرة وقعد ضاري يفكر وشلون يعلم فيصل ويمهده للي بيصير أكيد فيصل بيحطها فوق راس ضاري وبيقول إنه هو السبب لأنه ماكلمها من بدري ..و..و..
============================
الجوهرة ليلها صار كله أهات ودموع وندم على اللي راح وحسرة على اللي بيجي...
لكن وش بيدها قدر ومكتوب ..لكنها مايئست وقعدت طول الليل وهي تدعي إن الله مايتمم خطبتها من تركي ويجعل نصيبها مع فيصل ..بأي شي ..
حتى إنها صارت تدعي على نفسها يصير لها أي شي بس ماتصير الخطبة..الله يالجوهرة كل هذا عشان فيصل..
==================
وفيصل كان كل تفكيره إنه يفسر رد فعل الجوهرة يوم التفتت عليه أول ماناداها وهو في ذروة التفكير جاه إلهام بأن الجوهرة تحبه ..
وهذ هو سبب تصرفها وردة فعلها معه ..لأنها لو كانت تكرهه مثل أول كان أقل شي سوته ماردت عليه وطنشته..لكنها التفتت عليه ووقفت كأنها كانت تنتظره من زمان
فيصل انهبل مايدري وش يسوي خلاص ثبتت المعلومة براسه ((((الجوهرة راضية عني)))) وكان ينتظر بس متى الفجر يأذن عشان يدق على ضاري ويقوله على اللي صار..
ويقوله ان الوقت مناسب عشان يكلم خاله عبد العزيز على الموضوع..
لكن فيصل تأخر.. بقوووة تأخر ..
بعد الفجر فيصل ماقدر يصبر راح لضاري في غرفته وضاري كان توه جاي من المسجد ويوم شاف فيصل عند غرفته ارتاع وش عنده فيصل ماهي من عوايده..
فيصل يوم شاف ضاري انهبل وده يحطه فوق راسه ..
فيصل:هاه عمي وش سويت بالموضوع..
ضاري تقلب لون وجهه وش يقول لفيصل ..يقوله ان الجوهرة اليوم بتنخطب ..الجوهرة بتروح منك يافيصل ..
ضاري:والله يافيصل مادري وش أقولك بس أنا اليومين اللي راحت كنت مرة مشغول وماسويت شي لكن إن شالله اليوم بشوف .....
فيصل:زين بس تكفى لا تطول ...
ضاري :تتكلم يافيصل وكأنك واثق إنها بتوافق..
فيصل:لا من هالناحية اطمن الموافقه مضمونة ..
ضاري ماحب إنه يأخذ ويعطي بالكلام مع فيصل وقاله انه بيشوف الموضوع..
وبعد ماراح فيصل ناظره ضاري نظرة شفقة راحمه وراحم حاله وحال الجوهرة..
=======================
باقي 5 ساعات على موعد الجوهرة مع أمها ..والجوهرة بنظرها هالموعد موعد هلاكها..
راحت الجوهرة عند سارة عشان تقولها انها راحة ..ويوم راحتلها وقالت لها ..سارة حست إن الجوهرة ضايق صدرها وكأنها مغصوبة على اللي الخطبة..
وتناقشت معها وقالت لها الجوهرة إنها ماتقدر ترفض لأمها طلب ..تذكرت الجوهرة أخوها مشاري وإنه لازم يروح معها ودقت عليه مارد على الجوال..
الجوهرة:غريبة ليش مايرد ..د
سارة:على مين تتصلين..؟
الجوهرة:أخوي مشاري لازم يروح معي أبوي طالبه..
سارة:ياحليلك العيال طالعين الإستراحة ويالله العافية متى بيرجعون ..
الجوهرة:كيف أكلمه الحين ..إيه أدق على عمي ضاري..
ودقت عليه وقالت له ..
وراحت الجوهرة تتجهز وتلبس وتتكشخ لزوج المستقبل باقي ساعتين ويالله يكفي الوقت..كانت الجوهرة تتزين ودمعتها على خدها ..أي عروس هذي اللي تصيح يوم شوفتها..
وكانت ملامحها غاية في البرود ..وجهها صاير شاحب يعكس اللي داخلها..
خلاص اقتنعت بالأمر الواقع ومافي قدامها مفر ..
==================
يوم خلصت الجوهرة دقت علىأخوها مشاري تشوفه متى بيجي..ودقت عليه وقالت له
الجوهرة:مشاري وينك شكلك ماعندك نية تجي ..
مشاري:أجي..وين؟!!!
الجوهرة:عمي ضاري ماقالك..
مشاري:لا ماقالي شي..
وفهمته السالفة ..
مشاري:خلاص مسافة الطريق..
======================================
مشاري:يالله شباب أستأذنكم أنا طالع ..
فيصل :من صدقك انت وين رايح..
مشاري:أختي الجوهرة اليوم جايين ناس بيخطبونها من أهل خالتي ولازم أكون معهم..يالله سلااام
فيصل كأنه تصفق خمس كفوف على وجهه وأول ماناظر ناظر ضاري ضاري ماله وجه يطالع فيصل ..وطلع فيصل والدنيا ماهي شايلته من الضيقة اللي فيه..
طلع على أمل إنه يلحق الجوهرة ويقولها ..يقولها بنفسه اللي بداخله أحسن من أنه يعتمد على غيره ..لكن خلاص لا فات الفوت ماينفع الصوت..
الجوهرة رايحة لأمها ودمعتها على خدها ..فيصل رايح للجوهرة ودمعته على خده ماينلام الحب يسوي أكثر..
فيصل كان مسرع ياعمري بيلحق على الجوهرة..لكن صار اللي مايخطر عالبال..
صار له حادث..وماحد درى عنه..
بعد نص ساعة تقريبا اتصلوا المستشفى على خاله عبد العزيز اللي كان رايح مع الجوهرة..
المستشفى:يالأخو عندنا ولدكم فيصل بالمستشفى ممكن تجي حالاً..
عبد العزيز:نعم ...فيصل ..خير عسى ماشر..
المستشفى :بسيطة إن شالله بس كان مسوي حادث ونقلناه المستشفى بس ضروري تجي الحين..
عبد العزيز:وش تقول حادث ..وينه هو الحين..
الجوهرة يوم سمعت ان فيصل سوى حادث انهبلت راحت فيها ..
المستشفى:انت تعال ويصير خير..
عبدالعزيز:لا حول ولا قوة إلا بالله ..مسافة الطريق وأناعندكم..
الجوهرة قامت تكلم أبوها من غير عقل:يبه فيصل وش فيه تكفى تكلم ..صار له شي..
الأب:الجوهرة يمه شوي شوي اتصلي على أمك قوليلها على اللي صار خليها تعتذر من الجماعة ماقدر أقابلهم..
الجوهرة:يبه تكفى بروح معك المستشفى (((قامت تصيح)))تكفى يبه الله يخليك أبي أشوف فيصل ..أبي أطمن عليه ..
الأب:يايمه مايصير تروحين الحين..وبعدين تعالي وش يوديك ووش مستفيدة..الحين أوصلك البيت ولا تقولين لعمتك شي زين..
الجوهرة:اللي تشوفه يبه..
ووصلت الجوهرة البيت ودخلت وهي منهارة وأول من شافها سارة ..سارة على بالها أنا الجوهرة صار لها شي مع أمها أو أبوها بس قالت أنها مايمديها طلعت مو معقولة تكون وصلت لأمها ورجعت مرة ثانية..يكون خالي عبدالعزيز قالها شي..وراحت وشافتها ..
الجوهرة مقفلة على نفسها الباب وصوتها واضح أنها قاعدة تصيح سارة ارتاعت ماتدري وش تسوي راحت قالت لخالتها هيا..وجات هيا عند الجوهرةومافتحت لها الجوهرة والجوهرة تصيح وتقول ((أنا السبب))..
الكل واقف عند غرفة الجوهرة ولا يدري وش السالفة ..دقوا على جوال أبوها مقفل..م بالعادة يقفل الجوال أكيد صاير شي ..دقوا على جوال ضاري نفس الشي وجوال فيصل ماحد يرد..قالت هيا مافي حل غير إننا نكسر الباب ..وكسروا الباب ودخلوا على الجوهرة والجوهرة ضايعة ملامحها من الصياح..
وتطالع سارة بحسرة وهم يهدون فيها مافي فايدة ..
هيا:بسم اللع عليكِ ياحبيبتي قولي لي وش فيك تكلمي ..
الجوهرة:وش أقولك ياخالة ..آآآآآه...آآآآه..ياحسرتي ..أنا السبب الله ياخذني وارتاح الله ياخذني وارتاح..
هيا:ياعمري قولي وش السالفة لا تطيحين قلبي والله ماتحمل أشوفك كذا ..أمك فيها شي ..
سارة :خالي عبدالعزيز قالك شي ..أحد ضايقك ..الجوهرة تكفين واللي يسلم عمرك ترى بديت أشك بنفسي..
الجوهرة كل ماقالو لها كلمة تزيد صياح ولو بتتكلم وش بتقول..
سارة :خالتي دقي على خالي مرة ثانية يمكن يرد..
ودقت ماحد رد أخر شي دقوا على مشاري ومارد عليهم..
سارة انهارت:يعني وشو مايردون ..أكيد في شي ..خالتي تصرفي شوفي أي أحد ..
هيا:وش أسوي ياسارة مابيدي شي..
وقعدوا على هالحال يمكن نص ساعة وأخر شي دق ضاري عليهم..
سارة:هلا خالي وينك من اليوم ندق عليك مقفل الجوال خير فيه شي..
ضاري:والله ياسارة مادري وش أقولك..
سارةساكتة ماتكلمت .....وقلبها صار يدق بسرعة..وأنفاسها سريعة..
ضاري:سارة..أخوك فيصل بالمستشفى..صار عليه حادث بس الحمدلله هو بخير الحين طمني اللي عندك..سارة ..ألوووو
سارة ماصدقت اللي سمعته وصارت عيونها تدمع وهي ماهي حاسة بشي جاتها خالتها هيا..وشافتها ..
هيا:سااارة وش فيك صار شي ..
سارة:خـ..خالتي..فيصل..فيصل وراحت تركض عند الجوهرة ووقفت عند باب غرفتها وقعدت تناظر الجوهرةوتصيح الجوهرة فهمت إن سارة درت عن اللي صار وقامت الجوهرة وضمت سارة وقعدوا الثنتين يصيحون..
جات هيا بنات وش فيه فيصل سارة تكلمي وش اللي صار له..
سارة:خالتي فيصل بالمستشفى..
هيا:نعم وش تقولين..بالمستشفى..وش اللي صار له..
سارة:صار له حادث ..
هيا:أي مستشفى ..وكيفه الحين..
سارة:خالتي خالي ضاري يقول لاحد يجي المستشفى..
الجوهرة يوم سمعت هالكلمة طاح قلبها ..وصارت ماتدري عن اللي حولها ..
وبعد شوي ..سارة ماقدرت تتحمل..
سارة:أنا بروح أشوف أخوي واللي يصير يصير ..
الجوهرة:سارة تكفين خذينيي معك تكفين أبي أشوفه وأطمن عليه ..
سارة:الجوهرةأنا لو رحت بيقولون أخته لكن أنتي وش يفكك من كلامهم ..
وراحت سارة المستشفى..وسألت عن اغرفة اللي موجود فيها فيصل ..وقالوا لها إنه بالعناية المركزة..سارة راحت تركض زي المجنونة بين الأسياب تدور على الغرفة..
ويوم لقتها كانوا موجودين كلهم خالها عبدالعزيز وضاري ومشاري وفهد صديق فيصل وعبدالله..وقفت سارة بينهم ماتدري وش حالته وناظرت أخوها مع الشباك على السرير الأبض وحواليه عشرات الأجهزة وأسلاك وخرابيط
وهو مايدري عن اللي حوله..لا يسمع ولا يتكلم ولا يحس..وصارت تصارخ بدون عقل:ياحسرتي عليك ياخوي من لي غيرك ياخوي تكفى قوم ..أبي أكلمه ..أبي أدخل عنده..آآآه ياويلي عليك يافيصل ..لااا مستحيل يصير فيك كذا
ليش أنت وش سويت ..تكفى ياخوي لا تروح وتخليني بروحي..فيصل أنا أكلمك..وخالها عبد العزيز يحاول يهدي فيه ..اتركوني معه أنا مالي غيره وجا ضاري أخذ سارة ورجعها البيت..وطول الطريق وهي تصيح ..ويوم وصلوا البيت كانت شبه منهارة ومتسنده على خالها ضاري ..يوم دخلوا لقوا الجوهرة تنتظرهم..
الجوهرة يوم شافت حالة سارة قعدت تصفق بوجهها :لاااا..لاااا ..لاتقولين..فيصل صار له شي ..تكلمي ..عمي ضاري تكلم ..تكلمو وش فيكم ساكتين..
ضاري كان يطالع الجوهرة بنظرة شفقة بالحال اللي هي فيها ..والحين بس تأكد من كلام فيصل ..خلاص ياجماعة صلوا عالنبي الرجال طيب إن شاالله هو صحيح داخل بغيبوبة لكن هذا مو معناه اننا نقطع أملنا بالله عز وجل.. بس ادعواله..ماله غير الدعاء..
ومر اليوم كأنه سنه ..كئيب..وثقيل..وحزين..
=============================================
ونفس الشئ في اليوم الثاني لا جديد..وفي اليوم الثالث..قرر الأطباء إجراء عمليتين لفيصل الأولى في النخاع الشوكي والثانية في العمود الفقري ..وكل وحدة أصعب من الثانية..
طلب عبدالعزيز من المستشفى إنهم ينقلون فيصل للعلاج بالخارج..ووافقو الدكاتره..وقرروا ينقلونه لندن..
وصار..نقلوا فيصل للندن..وراح معه عبدالعزيز وضاري ..وقعد هناك أسبوع عشان التحاليل والأشعة وحددوا موعد العملية..أم فيصل طلبت من عبدالعزيز إنها تكون مع ولدها قبل ما يسوي العملية..هي وسارة..
ويوم درت الجوهرة إنهم رايحين لفيصل أصرت إنها تروح معهم..إيه أروح ليش لا..خلاص ماعاد في شي يتخبى..يكفي اللي تحسفت عليه..وكلمت الجوهرة أبوها في البداية رفض وقال إنه مو وقته..
الجوهرة:تكفى يبه مو انت وعدتني اننا بنسافر والظروف ماسمحت ..خلاص أجي مع عمتي منها أطمن على فيصل ومنها تمشية..
الأب:خلاص تعالي انتي ومشاري..وأنا بحجز لكم معهم ..
الجوهرة:مشكووور يبه..
الجوهرة بتطير من الفرحة ..وأخيرا بروح بشوف فيصل..
وجا يوم السفر وهم في المطار حست الجوهرة بشي غريب ..وتعوذت من إبليس ومشوا ..وهم في الطيارة بس تتخيل وشلون بتسوي في اللحظة اللي بتشوف فيها فيصل وش بتقوله وش بيقولها..وش بيصير ..
وصلوا بحمد الله للندن..وكان ضاري مستقبلهم في المطار .وطمنهم على فيصل وقال ان شالله انه أحسن الحين..ووصلهم الفندق واتفق معهم انه بكرة الظهر ياخذهم على المستشفى..عاد الجوهرة مانامت طول الليل وليتها يوم نامت ارتاحت إلا كل أحلامها كانت عن فيصل وإنه جا يسلم عليها..وقالها:الجوهرة بقولك كلمة حطيها في بالك على طول أنا أحبك الحين وبكرة وإلى مالا نهاية ..ومهما صار وتم تبقين لي أول وأخر حبيبة..
الجوهرة قامت مبسوطة وقالت خلاص بقول لفيصل على كل شي بقوله حتى عن الحلم بس يارب انك تشفيه وترجعه أحسن من أول ..يارب..
وجا الوقت اللي بيروحون فيه لمستشفى لكن ضاري تأخر عليهم..ساعة عن الموعد اللي اتفقوا عليه.. أم فيصل خافت إنه يكون صار له شي ..ودقت على ضاري مايرد..ونفس الشي على عبدالعزيز..
سارة:يمه انتي ماتعرفين إسم المستشفى..
الأم:إلا أمس عطاني هو ضاري..
سارة:خلاص ناخذ تاكسي ونروح..
وراحوا المستشفى ..وطول الطريق أم فيصل تردد اللهم اجعله خير يارب عسى ولدي مافيه شي ..يالله ياكريم انك تشفي لي ولدي وتخليه لي مالي غيره يارب..
والجوهرة علىأعصابها..ويوم وصلوا المستشفى..أول مادخلوا..حست الجوهرة بضيقة فظيعة..وصارت تركض تدور على الغرفة اللي فيها فيصل..ونست إن معها سارة وأمها..
وهي تمشي تدور على الغرفة ..تدخل غرفة غرفة ..وكأنها مضيعة ولدها ..ودخلت واحد من الأسياب وشافت عنده زحمة دكاترة وممرضين حست ان هذه هي غرفة فيصل..ودخلت الغرفة
مع انهم حاولوا يمنعونها ..وشافت الحالة اللي فيها فيصل جهاز فوقه وجهاز جنبه والثاني وراه ..وقفت تناظر فيصل ..تنتظره يفتح عينه عشان يشوفها..وتكلمه ويكلمه..
نادته بصوت خافت..والعبرة خانقتها..فيصل أنا الجوهرة ..جيت علشانك..وفتح فيصل عينه..وقربت منه الجوهرة ..فيصل بقولك شي ..أنا عارفة انه جا متأخر ..أنا أسفة..
وطلع صوت إنذار من واحد من الأجهزة وجو الممرضين لكن الجوهرة مابعدت عنه..ودموعها تبين وش اللي بداخلها ..وهي تهااوش الممرضين شوفوه عالجوه سووا له أي شي ..لا فيصل ماراح يموت ..توه ماسوا العملية ..
وقربت من فيصل ومسكت يده..ودموعها تسيل على يد فيصل وكأنها آخر شي بيكون بينهم...
وتكلمه تقوله فيصل تكلم قولي أي شي بس لاتتركني كذا الله يخليك..فصيل كان يحس بالجوهرة ويسمع اللي تقوله لكن مايقدر يرد عليها..خلاص الوقت راح..
فتح فيصل عينه وناظر الجوهرة ...نظراته كانت تحمل الكثير من الكلام..والملام..كانت بالنسبة لغيره يحتاجلها مترجم يترجمها ..لكن الجوهرة فهمت كل شي..
وكانت هالدقايق تمر على الجوهرة ساعات..
حست الجوهرة إن الغرفة صارت هادية مافي لاصوت أجهزة ولاشي..ناظرت حولها ..الممرضين بكل برود يشيلون الأجهزة عن فيصل..وكانت تطالع خارج الغرفة شافت أم فيصل وسارة منهارين..
وحست د فيصل كانت باردة..لا ..لا فيصل تكفى قوم ..تمزح معي صح..بتعرف أنا أحبك ولا لأ..ليش منت مصدقني ..والله أحبك بس قوم تكفى ..وبد صوتها يعلا ..لاااا..يمه لحقي علي..أبي فيصل ..ماعلي منكم بس خلوه يقولي أي شي بس مايروح ويتركني من غير شي..والممرضين يحاولون يهدون فيها ..
ويطلعونها برا الغرفة..لا ماطلع إلا معه ..فيصل ..تكفى ..يعني وشو مات ..ماهو راجع مرة ثانية..خلاص ..راح..طيب توه ماكلمني...آآآه يايمه..
والكل كان يناظرها شافق بالحال اللي هي فيها ..أما ضاري كان يتقطع من داخله..وكان يلوم نفسه..بس بعد وشو..
يــــاأغـلــى حـب فـي قلـبي وياعــينـي
قـــوم كلمنـي ..قـوم يـاروحـي تـكلم
قــوم يـاعــينـي لاتـمـازحـني وتـبـكيني
قــوم ماعـدت أقـوى علـى شوفتك تّألـم
ولاعــدت أكـابــر حــب ســكــن فـينـــي
أحــبك مـــوت وقـلــبي بات مـغـــرم
بادلني إحساسك الصادق هات كفك هاك يميني
عـسـانـي مـنـك لاأخـلـى ولا أعـــــدم
سـولف لي عن أيامك وأسولف لك عن سنـينـي
بسك سكوت وصمت شوف الناس عنك وش تكلم
تقول الخلايق مـــــات..ونظراتهم تواسيني
قـوم كـذبهم عواذلنا أو قول إني أحلم
كــيف تـــمــوت وتــرحل ووحدي تــخليني
كيف تموت قبل أحكي حبي لك وعنه تعلم
في وفاتك ياحياتي يموت الورد في بساتيني
وحتى الكون بعد عـينك وصــوتك..أظلم
في وفاتك يضيع العمر وتتوه أجمل عناويني
لا..ولايـعني لـي ثغـر ضـاحك أو تـبسم
ارحمني ..خلاص أرجوك..جف دمـــعي بشرايني
قم ..داوها جروحي..شوفها مالها بلسم
==================================================
======
وصار اللي صار ..وبعد هذا كله قررت الجوهرة انها تدخل كلية الطب..وتتخصص بجراحة الأعصاب..عشان تعالج الغير..وماتضيع عليهم حياتهم مثل ..ماصار لها
مما كتبه قلم الجوهرة
آه ياحسرتي عليك حبيبي.... آه من كل شيء لم أفعله لك ..
آه من حيائي الذي منعني من أن أبين حبك بقلبي .. وغروري الذي أبعدني عنك..
آه ياجبينك الطاهر ليتني قبلتك قبلة الوداع .. ليتني قبلت قدميك ..
ليتني أشبعت عيناي منك بنظرة أخيره تشفي غليل المحروم..
ليتني أبتسمت لك أبتسامة الوداع المشؤوم... ليتني لم أقسوعليك ..
آه من قسوتي على روحي وحبيبي الغائب.... ليتني رجلا فقط حتى أقبل ترابك وأصلي عليك ..
سأقطع المسافات لأدعو لك بجانبك وأبكي عندك عليك .... ياحبيبي المهاجر للأبد ..
ياعشقي الطاهر الذي غطاه التراب .. أنا سأبقى أحبك وأدعو لك طول حياتي ..
فأنت الحبيب الذي لن يعوضني عنه بشر ..
========================================
آه مأقسى طيفك .....
آه ماأقساه .. حبيبي كم أتمنى أن أسعدعيناي بنظرة إلى طيفك..
أروي عطش النظر ولوعة السهر ومرارة الهجر .. آه ليتك أمامي ياطيفه ..
لن أطمع بأكثر من طيفه .. طيفك حبيبي بكل قناعة المحرومين يكفيني ..
فقناعتي برؤياك كقناعة العطشان بقطرة مطر... سأقبل يديك التي عانقت يداي يوم وداعك ..
واسجد لله شكرأ لأنه تفضل علي برؤياك ولوكان بمنامي وبين أحلامي ..فالله يستحق الشكر مني دائما وعل كل حال .. ودوام الحال من المحال..
=====================
انتهت القصه</font>
