المساعد الشخصي الرقمي

مشاهدة النسخة كاملة : هند و حمد



السفاح
02-06-03 ||, 08:56 PM
<font color='#000000'>هند بنت متوسطة الجمال واحلى ما فيها عيونها تدرس في التقنية اخر سنة حقها طيبه وحبوبه بس شديده اف بعض الاحيان ، اما حمد انسان جميل كل البنات يتمنونه عسب جي يستغل هالميزه فيه حاله حال الشباب هالاياام كل يوم يرمس وحده ما يحب يتم على وحده يحس بالملل ويحب التجديد وما يهم من وين ومتى ومنو تكون البنت ،المهم يكلمها ويقضي وقته ويفتخر بين ربعه انه عق وحده ، بس يحرص كل الحرص انه ما يوعدهن بشي ..عسب يودرهن بكل سهوله .


اول يوم في الاسبوع الكل يتحرطم ويقول جيه ما خلوا يوم السبت بعد اجازه ....هند متحمسه اول وحده ناشه من اهل البيت ، ادور بدلتها اليديده اللي شرتها البارحه بس عسب تلبسه اليوم ...اخت هند مريم اصغر عنها وهي تقوم من النوم بكل كسل .
مريم :هندووه شو هذا ؟ شوي شوي ..كل شوي اسمع طاااخ وطاااخ ..جيه ترقعين الكبت جذه ؟
هند :مارووم ريم بتاخر عالدوام ،نسيتي اليوم اول يوم حقي اف وورك بليسمنت هيه تراج ما تدرين الكلية كيف مشدده علينا ،بيكتبون فيني تقرير وبيقولون من اول يوم متاخره وعقب بيعطوني يا سي او دي .
مريم :هيه ادري بج دحاحه لازم يا ايه او بي واقل عن جي ما ترضين .
هند :لج بارض ترمسين ....وترووح عنها هند .
وتروح هند وتحب راس امها بس مستعيله ...
ام هند:الريووق ، لاتروحين وانتي على لحم بطنج .
هند :بشرب الحليب بس عسب خاطرج، ادعي لي امايه .
ام هند :موفقه انشا الله يارب .. سوقي اشوي اشوي ...درب السلاامه يارب .
هند متوتره تبي توصل البنك ،باقي نص ساعه عالوقت وتاخذ الطريج المختصر عسب توصل في الوقت المحدد، وفجاه تحس بالسياره تتمايل يمين ، وقفت السياره نزلت تتتطالع ويوم طلت شافت تاير السياره امبنجر عليها .
هند: هذا اللي كان ناقص،ياربي شو هالنحاسه ،ليش اليوم بالذات ؟ شو اسوي الحين ...هيه ما شي غير سعيد اليوم اجازه بدق عليه بس يارب ينش من الرقاد .
سعيد اخو هند يكبر ها بسنتين واليوم اجازته لانه يشتغل اف قطاع خاص عسب جي .
سعيد وصوته ثقيل : الووه
هند: هلا سعيد ، تعال بسرعه انا اف شارع جمال عبدالناصر وتبنجر علي التاير ولازم الحق عالشغل اليوم اول يوم حقي دخيلك سعيد .
سعيد:خلااص انا ياينج ،انتي قعدي في السياره والحين بوصل .
هند قاعده تتريه في السياره وتتحرطم ومعصبه وتدعي يارب يوصل اخوها عسب تلحق الدوام .

حمد مشغل الراديو يسمع اغاني وكاشخ اخر كشخه ، ترى اليوم اول يوم في الاسبوع ،لازم كندوره يديده ،وغتره يديده وعطر يديد..والسياره مغسوله (مرسيدس بوعيون ) تلق من بعيد .
ياخذ حمد الموبايل ويدق على ربيعه سالم في الشغل .
حمد:مرحبا مليوووووووووون ولا يسدن ، اش حالك الغالي ؟
سالم :هيه هيه ،ادهن سيري ، ادري شو عندك تبيني اوقع عنك واغطي علييك لحد ماتوصل هااااااااا؟
حمد: ههههه والله اللبيب بالاشارة يفهموا ،تدري لازم اخذ لفه عكورنيش بحيره عقب اداوم .
سالم : شوف اذا تاخرت زياده مالي شغل فييك انت تصرف عقب .
حمد :اوكي اوكي ، ما بتاخر .
حمد وهو في السياره لمح وهو عالشارع الثاني سياره موقفه وفيها بنت والتاير امبنجر ..ويكلم نفسه (هاي فرصتك حمد صيده عالصبح ،بس ياليت تطلع حلوه مب خسفه ما تتشاهد شرات اخر وحده) ويسوق حمد ويوصل عند هند ،قبل لاينزل يعدل اف كشخته ويتعطر ،ويروح صوب هند ويدق عليها جامة السياره .
تنزل هند جامة سيارتها ....
حمد :سلاام عليكم ،ويكلم نفسه (زينه مب خسفه واحلى ما فيها عيونها ،بس يمكن عسب مجحلتنهم )
هند :وعليكم السلاام .......نعم ؟
حمد: الغاليه اشوف التاير امبنجر علييج وحبيت اساعدج ؟ اذا ما في مانع ؟
هند : لامشكووور اخوي ما في داعي .
حمد: لا بس مب حلوه يعني تعرفين .................
هند ما تخلييه يكمل رمسته
هند:لا اخوي قلت لك مشكوور .
حمد : مصممه يعني ؟
ما قدرت تتحمله هند اكثر من جي عصبت عليه وقالت
هند: انت ماتفهم قلت لك مشكوور وخلااص مب غصب .
حمد وهو قافط: انزين انزين..برايج الغاليه اسمحيلي انا اسف صدق لا قالوا خيرا تعمل شرا تلقى .
هند سكرت جامة سيارتها مب معبرتنه ،وحمد يروح يركب سيارته .
حمد:بل عليها حشى مب لسان كلتني ، وايد شايفه نفسها على شو ما ادري ؟
ثواني بس بعد ما يرووح حمد ..يوصل سعيد عند اخته هند.
سعيد :اقول انا مطول انتي خذي سيارتي وتوكلي ..وانا بصلح سيارتج وبردها البيت .
هند: تسلم اخوي سيعيد.
هند تاخذ سيارة اخوها ويوم وصلت تاخرت عالدوام ،وراحت عند المسؤوول واحد مصري اسمه فؤاد وهي مرتبكه تشرح له الظروف ،بس فؤاد طيب وكبير في السن والكل يحبه .
فؤاد :معلش يابنتي حصل خير،طبعا انتي عارفه اليوم اول يوم في الاسبوع ،والشغل حيكون متكدس ،معلش مش حكون فاضي اليوم ،حعرفك عالمودفين وعالاقسام وحكمل معاكي بكره ، حلو الكلاام ؟
هند وهي مبتسمه وارتاح قلبها : حلو .

انرووح حق حمد بعد ما خذ لفته عالبحيره بركن سيارته ،ويدخل المبنى ويرووح سيده عند ربيعه سالم عسب يتاكد محد سال عنه .
حمد: سلاااااااااااااام....سلوووم .
سالم :جيه اصغر عيالك ريال متزوج وعندي ياهل تزقرني سلووووم كان اول حبيبي ايام العزوبيه .
حمد :ههههههه اقول سلووم جيه ما ييت البارح سالوا عنك الربع ؟
سالم :لا اسمحلي ما قدرت وديت الاهل اشوي .
حمد : من يوم ما تزوجت ونحن ما قمنا نشوفك .
سالم: انتوا عزوبيه ما وراكم شي ...تزوج عقب بتعرف المسؤوليه .
حمد : لا لا ،شو تقول انا بعدني صغير ، ومثل ما قالوا ابعد عن الشر وغني له .
سالم :اي صغير ،قاص على عمرك بتكمل 26 وتقول صغير .
حمد: اسكت سلووم ما خبرتك شو صار قبل لا ايي الدوام ،شفت وحده امبنجر عليها تاير سيارتها ،قلت بساعدها وبالمره اقردنها ...
سالم :حلوه؟
حمد: اي حلوه ،اي خرابيط ،الله لا يراوييك ،سرت اساعدها بلعتني بلسانها ياريال ،ومبوزه واشوي بيطيحن براطمها عالارض .....ههههه.
سالم :هههههههه ....لا تقول ؟
حمد:ولا عيونها ههههههههه.
سالم : بلااااها طلعت حوله ......هههههه.
حمد:ههههههه لا لاهههههه.
سالم : قول وفكني .
حمد :عيونها مغرزات بالجحال هههههههه جنه حد مخمس فيهم هههه.
سالم:ههههههه انت وسوالفك .....اسكت اسكت .
حمد:جيه تخاف فؤادووه يسمعنا ،عادي طيب ما بيقول شي .
سالم :لا عندنا وحده متدربه قاعده اف مكتب فؤاد ...الباب مفتوح على الله بس ما سمعتنا .
حمد:شو تقول ؟ عندنا وحده وما تخبر؟
سالم :انت وسوالفك نسيتني اخبرك، بس تحمل اطلع لها حركات بتكون ويانا اسبوع وعقب بينقلونها مكان ثاني .
حمد:افا علييك ماتعرف اخوك حمد،تعال عرفني عليها.
سالم :بس بشرط ما ابي حركات ...وعقب اتوهق انا ويا الحرمه .
حمد: تعال انت بس تعال ،قال الحرمه قال.
ويروح حمد مع سالم لغرفة فؤاد اللي اطل على مكتب حمد وسالم ،ويدق سالم الباب عليها ،بس اصلا كان الباب مفتوح ويدخلون سالم وحمد ويا بعض .
سالم:العفو اختي بس حبيت اعرفج على حمد ويانا في القسم ،اذا بغيتي منه اي شي تراه هو حاضر ،حمد اعرفك على .......
وما تخلييه يكمل ......
هند:العفو اخ سالم انا بعرف نفسي عليه ، انا اللي براطمي بيطيحن عالارض وعيوني ،الله لا يراوييك حد مخمس فيهم .
حمد احمر ويهه ومنزل راسه وقافط ومب عارف شو يقول سالم مستغرب وقافط بعد،حمد ما تحمل الموقف وطلع من المكتب .
سالم :اسمحيلنا ،ترى حمد ما يقصد وهو انسان طيب .
هند:لا عادي اخ سالم حصل خير انا الا ضيفه عندكم .
سالم وهو طالع من المكتب :حمد خسك الله ،فشلتنا .
حمد:مب فايج لك سلووم، وانا اش دراني بتطلع هي نفسها.
سالم :سر اعتذر من البنت .
حمد:شو تقول انت ،وبعدين انا ما غلطت على شو اعتذر منها .
سالم:شو ما غلطت ما خليت عيب ما طلعته فيها ،عيب حموود البنت سمعت كل شي فشلتنا ياويه المصايب .
حمد:انسى سالم ما بعتذر.
سالم:برايك حمد ،انا اعتذرت والباقي علييك ،ترى البنت مب من اللي اف بالك.

حمد طوول اليوم في اللي سواه واول مره يحس بالندم ..وهند ما طلعت من المكتب لحد اخر دوام ،حمد وهو في الباركينغ قاعد يكلم نفسه (كيف وهي سيارتها معطله وصلت الدوام ، بس وين سيارتها ؟) لمح وحده طالعه من مبنى البنك ز
حمد: هذي طلعت براقبها وين بتسير.
هند وهي تمشي وصلت عند سياره اخوها البيم السوده وتوها تفتح الباب ، والا تسمع صوت واحد حذالها يقول انا اسف .
حمد: انا اسف اسمحيلي .
هند: لا حصل خير .
حمد:احس تقولينها من ورى الخاطر، يعني ما في داعي ونحن زملااء في الشغل اتحطين اف خاطرج من صوبي .
هند وهي تبتسم : انا مب زميلتكم ،انا مجرد ضيفه كم يوم وبرووح عنكم ..وصدقني انا انسانه ما اشيل اف خاطري على حد .
حمد: اشوه ريحتيني ،انشا الله نشوفج على خير باجر .
هند:مع السلاامه .
حمد: وداعة الله .
وتوصل هند البيت وهي تعبانه ، وتسال الخدامه عن امها ،وتقول الوالده في المطبخ وتنبه عالخدامه محد يوعيها حق الغدى لانها بتنام .


_حزة العصر اف بيت هند_


تقوم هند من النوم وتتغسل وتصلي العصر وبعد ما خلصت من الصلااة تدخل عليها اختها مريم .
مريم: ها هندوووه خبريني شو صار اف اول يوم دوام ؟
هند: تعرفين اختج من يومها منحوسه .
وخبرت هند مريم باللي صار ...بس ما يابت طاري حمد ،لانها ما اهتمت بالموضوع وايد.
مريم :صدق هند نسيت اخبرج ترى اتصل بج حسين وخبرته انج نايمه .
هند: اويييييه ، نسيت ادق عليه برووح اتصل به الحين .
حسين ولد عم هند مالج عليها من 4 اشهر ، هند متعلقه بحسين وايد مع انه حسين يوم زين وياها وعشره لا، بس هند مستحملتنه لانها تبيه من يوم وهي صغيره ..هند ادق على تلفون حسين بس تحصله مشغوول ، وترد ادق عليه مره ثانيه ويرن .
هند: سلاام عليكم ، اش حالك حسين ؟
حسين :تمام ، تو الناس ، من متى اترياج انا ؟
هند:اسمحلي حسين انا كنت تعبانه وييت نمت على طوول وتووي ناشه .
حسين : ما علينا شو كان دوامج اليوم ؟ اكيد في شباب ؟ حد تحرش بج ؟
هند : شوي شوي حسين وحده وحده .
حسين: ترى انا مب فاضي ربعي يتريوني .
هند: شكلي معطلتنك ،بس ما صار شي ،تعطلت علي السياره و.......
حسين : اقول انا بسكر عنج الحين ربيعي يترياني ، اوكي. باي.
هند:حسين انت متى بتفضى لي ، دوومك مب فاضي لي ،وقتك كله حق ربعك.
حسين : بدينا ....يعني لازم تعكرين مزاجي ، انتي دووم جي .
هند:اسفه حسين ، يوم بتحس لك بارض حزتها رمسني ، باي.
كانت مريم واقفه حذال اختها هند وسمعت رمسة هند كلها .
مريم : عفان الله ،اسمحيلي هند اقول هذا الانسان مريض ، انتي كيف مستحملتنه ؟
هند: لاتقولين عنه جي، من حقه يسالني ياللي يباه .
مريم :انتي تعرفين انه ما يسال مني والدرب ،هذا انسان مريض بالشك الله يعينج كيف بتعيشين وياه عقب .
هند: الله كريم عقب الزواج بيتغير .
مريم : بنشوف وبتقولين ريم قالت .


اليوم الثالث


هند ردت البيت وتغدت ويا اهلها طبعا كالعاده ،اتحرش فيها اخوها سعيد وتضحك مريم ، وتشتكي هند عند ابوها والام تضحك وقبل لا ايسير كل واحد على حجرته وياخذ قيلولته قعدوا يشربون الجاي .
مريم :هندووه اتصلوا فيي بنات عموه وقالوا بيسيرون القريه العالميه اليوم يوم خاص للحريم خلينا نسير رباعه وياهم .
هند:لا دخيلج ريم اليوم ما اقدر عندي شغل وايد حتى يبته البيت عسب اخلصه ..بس وعد مني لج باجر اوديج .
هند ادق على حسين عسب تخبره انها بتسير باجر القريه .
هند:حسين تعال ويانا باجر القريه ،باجر يوم العوايل .
حسين : لا سيري انتي انا مواعد الربع بسير وياهم شارع الرقه ،بس منو بسير وياكم
هند:انا وريم اختي والوالده .
حسين : وجيه ما يرووح وياكم سعيد ؟ انتوا الحريم رواحكم بتسيرون بس ؟
هند:سعيد عنده اجتماع العصر وما يقدر ايي ويانا .
حسين : عيل شلي سيارة اخوج لانها مخفي واظمن .
هند وهي مكسورة الخاطر :برايك حسين ، مع السلاامه .


[[يتبع]]

اليوم الرابع في الدوام


هند تاخرت عالدوام لانها تريت سعيد تاخذ منه السياره .
حمد اول الناس قاعد عالمكتب يتريه ويحاتي هند،وصل سالم .
سالم :سلااام حموود.
وحمد سرحان ما يرد على سالم .
سالم : ارمسك حموود رد السلااام.
حمد:هلا هلا سالم ، سوري ما سمعتك .
سالم : بلااك زعلاان ومتضايق ، البارح ترييناك انا والريع .
حمد: هيه ، كنت تعبان اشوي
سالم : انت مو ملااحظ انك متغير ، يعني مصطلب زياده عن اللزوم وبالذات هالاسبوع .
حمد : اعتقد ما فيها شي اذا الواحد عقل .
سالم : ومنو خلتك تعقل هند؟
حمد:سلوووم اسكت عن يسمعك حد ، ياخي لا تطري اسم البنت ، انت تعرف هي مب مال هالسوالف .
وفجاه تدخل عليهم هند ويسكتون عن الموضوع ويغيرون السالفه .
سالم : خير انشا الله ، عسى ما شر اخت هند.
هند:اسمحوا لي تاخرت اشوي عندي ظروف .
حمد وهو مستانس :لا حصل خير ، المهم انج ييتي .
ويدخل عليهم كومار واف ايده ثلااث عصاير وحده لسالم والثانيه لحمد والثالثه لهند.
سالم : كومار منو قالك اتييب لنا عصير ..لا وكوكتيل اسبيشل بعد.
كومار: اراب همد يقول جييب انا يجييب .
سالم : شو المناسبه ؟
حمد:استويت خال (وهو يضحك مو مصدق ).
سالم : احيدك من شهر استويت خال والحين تشربنا حلااوة الياهل يالبخيل .
هند: ما شا الله ، الله يجعله من الذريه الصالحه انشا الله .
حمد: تسلمين هند.
سالم :يا الله عقبالك يالشيبه ، استويت خال وللحين ما شفنا عيالك .
حمد يطالع اف هند مستحي ، بس هند مو مهتمه ، مشغوله ، تضايق حمد وانتبه سالم حق حمد وحب ينتهز الفرصه ويتحرش فيه .
سالم : حموود ، تشييييييييييز.
يعصب حمد زياده ويظهر من المكتب .
هند : اش فيه حمد زعل ، ما احيد حمد يزعل منك .
سالم : لاما علييج منه ، ما زعل دقايق وبتشوفينه رد المكتب . دخل حمد المكتب مره ثانيه وقعد وهو مبوز .
سالم : شو قلت لج ، بس طلعوا مو دقايق ثواني ههههههه.
يضحك سالم وتضحك هند ،ويغار حمد ليش يضحكون .

اخر الدوام كالعاده ظهرت هند وظهر حمد وراها ، وهو يراقبها شاف واحد من قسم المحاسبه يكلم هند .
طار عقل حمد منه وراح بسرعه صوبهم ، بس قبل لا يوصل حمد عنهم اللي كانت ترمسه هند راح .
حمد: شو بلااه هذا ؟ كان يتحرش فيج ؟
هند: لا هذا واحد من الاهل شاف سيارة اخوي وبلغني اسلم عليه .
حمد :اوكييه خلااص روحي مب حلوه حد يشوفنا ونحن في الباركينغ عقب حد ياخذ فكره عنج و انا ما ارضى علييج ... مع السلاامه .
راح حمد وخلااها وهند مستغربه من ردة فعل حمد.
حمد وهو اف سيارته : يا ربي انا شو سويت ؟ اندفعت اف عواطفي زياده عن اللزوم ، لازم اتحكم اف نفسي اشوي ،بس انا هالمره متاكد من نفسي اني معجب اف هند ولازم اصارحها ، بس لازم اتاكد منها ومن مشاعرها ، البنات كانوا يركضون ورى حمد والحين حمد يركض ورى وحده ، بس ياليت تحس فيه .صدق يوم قال حمد اني تغيرت وتغيرت وايد بعد.


_


هند واختها مريم والوالده في القريه ، تصر مريم انها تروح صوب الالعاب ويروحون وياها ، صدفه شافت هند ربيعتها حصه اللي افترقوا عن بعض من ايام الثانويه .
هند: .......حصه ؟
حصه : ........هند؟
ويحظنون بعض ويسلمون ،ويسولفون ويضحكون ، حصه اخت حمد وحمد كان اهناك ( فيلم هندي ) بس حمد كان بعيد عنهم يشتري بارد وذره ،يوم شاف هند ترمس اخته حصه ،خاف وحب انه يكون بعيد .
حمد: اكيد هند تخبر علي باللي قلته عنها اول يوم ، وحصووه ما بتيود لسانها بتخبر الوالده وعقب شو اللي بيفكني من لسان الوالده .
راحت هند وسلمت على حصه ، ويه حمد يسال حصه .
حمد: انتي تعرفين هند؟
حصه : هيه ربيعتي من ايام الثانويه ، وانا اشرت علييك وقالت انه تعرفك واداوم عندكم في البنك .
حمد: وبعد ماقالت شي ثاني بعد .
حصه : حمد اش فييك ؟ لا ما قالت . يود ولد اختك ، عيل انت خاله عالفاضي ههههههه.
حمد: ادري بج يايبتنييه بس عسب ايود ولدج .


_


حمد متاخر عالدوام مب عسب ياخذ لفته كالعاده لا،هالمره راحت عليه نومه ، حمد يلبس بسرعه ويسوق عسرعة 120بس عسب يوصل ويشوف هند.
حمد: اش حالك سالم ؟ وينها هند عيل ؟
سالم : هلا حموود ، والله خبرني فؤاد اخوها رمساه وقال خلااص هي ما بدوام بعد ،يوم سالته ليش ؟ قال ما بعرفش ،حتى اوراقها ما يت تاخذهم.
راح حمد صوب مكتب هند وقام يفتش اقفا اوراقها يمكن يحصل على رقمها او رقم بيتهم ويعطيه حق حصه عسب ترمسها ويطمن عليها .
وهو يدور اوراقها شاف (السي في ) مالها بس وهو يشوف ما همه الرقم كثر ما همه اللي مكتوب بالسطر الثاني ، الحاله الاجتماعيه متزوجه ، تم حمد ساكت ودموعه في عيونه .
سالم : لا تسوي بعمرك جي حمد ، اذا تبي البنت رووح اخطبها من اهلها ، ترى انا لاحظت انك متعلق فيها واايد .
حمد: لا سالم ما اظن اني ابيها بعد اليوم خلااص .
وطلع حمد من المكتب ويركب اف سيارته ومب عارف ولا حاس هو وين رايح ؟بس السؤال الوحيد اللي كان يسال نفسه ودموعه في عيونه ( ليش من دوون هالبنات كلهم هند ليش ؟)


_


من يومها وحمد قرر انه ينسى هند، واف ها3 اشهر سافر فيهم حمد اف دورة عمل ، بس مع ذلك ما قدر ينساها .ورد البلااد وهو انسان ثاني .





نش حمد على صراخ ولد اخته ، وطلع لهم في الصاله .
حصه : هلا حمد ،وينك اخوي ما تزورني ولا تسال عني ؟ والوالده تقول انك ما تظهر من البيت ، من البيت للشغل ومن الشغل للبيت ، شو سالفتك حمد؟
حمد: ههههه ، يعني يوم اصييع تقولون عني صايع ،ويوم الله هادني تستغربون والله ما عرفنالكم .
حصه : سبحان من غير الاحوال ،تم جي احسن .
حمد واف خاطره يسال عن هند، وقرر انه يسال .
حمد: حصه ، اشحالها ربيعتج هند اللي كانت عندنا اداوم وفجاه اختفت .
حصه : هيه ربيعتي هند، الله يساعدها .
ام حمد : هيه صدق الله يساعدها ، بنت طيبه وحبوبه وما تستاهل اللي صابها ، يحليلهاما تستاهل .
حمد ويحس قلبه بيطلع من جسمه : ليش شو بلااها ؟ شو صار لها ؟



[[يتبع]]

حمد ويحس قلبه بيطلع من جسمه : ليش شوبلااها؟ شو صار لها ؟_ يوم الخميس _بعد 6اشهر


يدخل حمد القاعه بكامل كشخته ، والبنات يطالعون بحمد ويحسدون هند .
يوقف حمد حذال هند وهو فاتح حلجه ومو مصدق .
هند: حمد.
حمد: عيون حمد.
هند: سكر حلجك اشوي فشلتنا .
حمد :ههههههههه ما اقدر ، اقول عمري ، بلااهم عيونج ؟
هند وهي خايفه على كشختها : جيه شو فيهم ؟
حمد: الله لا يراويج ،جنه حد مخمس فيهم هههههههههههه.
هند:هههههههههههه.
حمد:مبروك علييج انا ههههههه.
هند وهي مستحيه :ههههههههه لله يبارك فيك
هذي القصه وصلتني على الايميل وياريت تنال اعجابكم والسموحه على التاخير كل هذي المده بس ان شاء الله اعوض عن الايام التي راحته

تقبلوا تحيات اخوكم : السفاح &nbsp;<img src="http://oasis.bindubai.com/emoticons/wink.gif" border="0" valign="absmiddle" alt=':;):'></font>

القلب المحتاس
03-06-03 ||, 02:49 AM
<font color='#000000'>مشكور اخوي السفاح بس القصه مكرره <img src="http://oasis.bindubai.com/emoticons/biggrin.gif" border="0" valign="absmiddle" alt=':D'></font>