.. "الـتـفـوق" .. [الأرشيف] - -:: واحات بن دبي ::-

أحلى منصوري

22-02-04 ||, 01:06 AM

الســــــلاام علــــــيكم ورحمـــــة الله وبركــــــاته
أول موضوع يُطرح من قبل أخوكم احلى منصوري بهذه الواحات ،،، والهدف منه أن تعم الفائدة على جميع الطلاب.
لي خبره في هذه المرحلة ... ألا وهي الثانوية العامة.
ربما تكون الأولوية في هذا الموضوع لطلاب الثانوية العامة ... ولكن يمكن من الجميع الاستفادة.
الموضوع وايد متأخر وذلك بسبب أعطال فنية خارجه عن الإرادة<img src="http://oasis.bindubai.com/emoticons/tounge.gif" border=0>.
وموضوعي عبارة عن بعض الأشياء اللي اتساعد الطلاب على التفوق.
وراح يكون عبارة عن خلاصة تجربة يمكن أن تعتبروها ناجحة.
(النسبة في الثانويه العامه 94.3 علمي)
واي عضو عنده اي اضافة ارجوا أن لا يبخل علينا ابها من خلال هذا الموضوع.

والسموحه

اخــوكم
احلى منصوري

أحلى منصوري

22-02-04 ||, 01:18 AM

بسم الله الرحمن الرحيم
في بداية اي عمل يجب ان يكون العمل فيه إخلاص لله تعالى.
لازم يعرف الانسان بأنه كل شي في ايد الخالق الاحد.
قال تعالى:"انما امره اذا اراد شيئا ان يقول له كن فيكون" صدق الله العظيم.
ولكن لازم انعرف انه الله قال على لسان الرسول عليه السلام في الحديث القدسي:
(اسع يا عبدي وانا اسعى معاك).
خل ايمانك بالله قوي ،،، ما يهزك ريح.
واضب على العبادات ،،، انا ما اقول انه الانسان ما يعرف ربه الا وقت الامتحانات.
بس دائماً الانسان يلجئ لله تعالى في وقت المصاعب والازمات.
(الله يعدي عليكم هالفترة على خير)

شي شريط بعنوان:
طرق ابداعية في حفظ القرآن الكريم بواسطة NLP.
(NLP = البرمجة العصبية اللغوية)
للدكتور يحيى الغوثاني.
الصراحة انا من فترة اشتريته.
وما جربته خلال امتحانات الثانوية العامة.
وسمعته منذ فترة قصيرة ،،، راح يفيدكم لانه احد من عيال عمومي استفاد منه وخبرني عنه.
واللي يبغى يستفيد يسمعه.
<IMG src="http://oasis.bindubai.com/download/almansouri/Imagen039n.jpg">

ولي عودة متواصلة.

والسموحه

اخــوكم
احلى منصوري

دموع قلم

22-02-04 ||, 01:25 AM

السـلام عليـكم

مـوضـوع رائـع ومفيـد
وأتمنـى أن أستـفيد من نصـائحك الجميـلة
فليـس من المهـم أن أكـون في المرحلـة الثـانوية

.. أحلـى منصـوري ..
أشكـرك أخـوي على الفكـرة الرائعـة
وانتـظر بقيـة المـوضـوع <img src="http://oasis.bindubai.com/emoticons/wink.gif" border=0>

أحلى منصوري

22-02-04 ||, 03:05 AM

الســــــلاام علـــــــيكم ورحمــــــة الله وبركـــــــاته
عـدنـا ،،، ومع اضافة جديدة.
قبل بداية الدراسة ،،، سو لك جدول.
لازم يكون في شي ينظمك ويرتب وقتك لانه الوقت كالسيف اذا لم تقطعه قطعك.
اليوم راح ادرس مثلاً رياضيات .. احدد الفترة لهذي المادة .. واتحدد الكمية اللي تبغى تدرسها.
وقبل ما تيلس للدراسة ،،، زهب كل حايه.
القلم والكتاب والدفتر والاوراق الفاضية وكل شي يخص هذي المادة.
هب كل دقيقة ناش ورايح اتدور على حايه.
وايلس ذاكر في مكان هادي.
هب قدّام التلفزيون ولا في وسط البيت عند خوانك الصغار.
في ناس اتحب اتذاكر في وسط الاغاني الهاديه.(لكل واحد اسلوبه الخاص<img src="http://oasis.bindubai.com/emoticons/suspect.gif" border=0>)
لازم اتخلص الكمية المحددة في الفترة المحددة ،،، هب اتحط لعمرك ست ساعات لوحدة صغيرة ما يبالها ساعة او ساعتين.
...
اختيه دموع قلم:
اتمنى ان يحقق الموضوع الفائدة لتعم على الجميع.
شاكر لك على هذا التشجيع.
والله يوفقج ويحفظج.
...
ولي عودة.

والسموحه

اخــوكم
احلى منصوري

أحلى منصوري

22-02-04 ||, 10:40 PM

الســــــلاام علــــــيكم ورحمـــــة الله وبركــــــاته
عـدنـا ،،، لكن من بوابة أخرى ودعوة جديدة للتفوق.
الثقة:
دائماً يشوف الانسان عمره بانه اقل من غيره ،،، ينقصه شي.
ولكن ... شو الفرق اللي بينك وبين اللي ياب نسبة أكثر عنك؟؟
(فكر فيها ما راح تلقى اي فرق)
شرات هو ما عنده ذاكرة فأنت عندك بعد ،،، بس للأسف ما نستخدم هذه الذاكرة وخلاف انقول نحن ما نقدر نتفوق.
ازرع الثقة في نفسك.
اخويه ولا ولد عمي ولا فلان ياب النسبة الفلانية ،،، انا بييب اكثر عنه.
اذا كان هو ذكي فأنا اذكى عنه.
دوم خل كل شي عندك سهل.
احيد واحد من ربعنا كان دوم يقول حق اربيعه.
شو اصعب مادة عندك؟؟
قال له : الرياضيات.
قال له قبل ما اتنام وانت على السرير.
(في ناس ينامون على الارض<img src="http://oasis.bindubai.com/emoticons/tounge.gif" border=0>)
قول : الرياضيات سهل ، الرياضيات سهل ، الرياضيات سهل ، .......
يمكن اتقولون هذه معقد لكن انت تزرع الثقة في نفسك واتخبر عمرك بانه هالشي سهل.
هب معناه انه سهل ،، خلاص ما راح اذاكره.
ولا اذا هو صعب بعد ما بذاكره لانه يعقد بي.
لااا
ما فيه شي صعب على الانسان دام ربك ميزك بالعقل.
...
ولي عودة أخرى.
...
والسموحه

اخــوكم
احلى منصوري

أحلى منصوري

23-02-04 ||, 06:04 PM

الســــــلاام علــــــيكم ورحمــــــة الله وبركــــــاته
عـدت ،،، ومع إضافة جديدة.
التركيز:
اهم شي هو التركيز.
انا الحينه يالس اذاكر.
ممنوع تاكل العلك<img src="http://oasis.bindubai.com/emoticons/tounge.gif" border=0>.
لانك اتكون مشغول بحايتين ،،، الدراسه والاكل.
وبعد لا تاكل المكسرات وانت اتذاكر ،،، صدق انهى تلهيك عن الدراسة.
وخاصة الحَبَ(هب الحُب<img src="http://oasis.bindubai.com/emoticons/tounge.gif" border=0>).
الدراسة يبغالها كوب عصير طازج من ايد الوالدة هب ايد السيلانية<img src="http://oasis.bindubai.com/emoticons/laugh.gif" border=0>.
المفروض من الاهل انهم يوفرون الاكل المناسب لك.
قول الهم انا ابغى اليوم الاكله الفلانيه مع الالكله الفلانيه.
ترى التغذية مهمه خلال هالفترة.
حافظ على الوجبات الثلاثة.
وبين الوجبات كل اشياء خفيفة في اوقات الراحة.
ذاكر ساعتين وخذ لك ربع ساعة راحة.
عشان اتنشط مخك ويوم ترجع تدخل المعلومات بسرعة.
لا اتحاول تشغل نفسك في المادة الفلانيه وانت اتذاكر اللي بين ايدك.
خلك مع اللي تدرسه ،،، كل مادة لها وقت على حسب الجدول.
...
طرقتي انا في المذاكرة:
طاولة مع كرسي لانه يسلت الارض تكسر الظهر.
اوراق فاضية مع قلم رصاص.
اكتب كل شي مهم في الورقة لانه الحفظ عن طريق الكتابة اخير وله فايدة اكثر من الحفظ عن طريق الحفظ الشفوي.
اتخيلوا ... استخدمت اكثر من 100 ورقة فاضية للمذاكرة.
بس الصراحة تتعب ايدك<img src="http://oasis.bindubai.com/emoticons/laugh.gif" border=0>.
...
ولي عودة ان شاء الله.

والسموحه

اخــوكم
احلى منصوري

بن دبي

23-02-04 ||, 06:20 PM

الموضوع واااااااااااااااااااااااا ااااااااااااااااااااايد حلو ومفيد<img src="http://oasis.bindubai.com/emoticons/inlove.gif" border=0><img src="http://oasis.bindubai.com/emoticons/inlove.gif" border=0><img src="http://oasis.bindubai.com/emoticons/biggrin.gif" border=0><img src="http://oasis.bindubai.com/emoticons/biggrin.gif" border=0>

انامل

23-02-04 ||, 06:46 PM

احلى منصوري
سلام الله عليك وعلى خلانك
و
ما شا الله عليك
واعوذ بالله من شر الناس
بارك الله فيك اخي المجتهد
وربك بياجرك على ها الاعمال
عسى طلابنا يستفيون ان شا الله
رعاك الله للخير
وحفظك من كل مكروووه
موضوع اهنيك عليه
وبالفعل مب غريب عليك يا مستر استايل
ما شا الله عليك
تقبل اعجابي مكلل باحترامي لشخصك وفنك
<img src="http://oasis.bindubai.com/emoticons/blush.gif" border=0>انامل<img src="http://oasis.bindubai.com/emoticons/blush.gif" border=0>

تويتي

24-02-04 ||, 02:08 AM

مرحباااااااا مليون وفي ذمتيه مايسدن

احلى منصوري والله انك فناااان انا ثانويه عامه وان شاء الله بمشي على الخطوات الي قلتها والي بعدك بتقولها <img src="http://oasis.bindubai.com/emoticons/blush.gif" border=0>
واذا يبت نسبه حلوه بعزمك انته اول واحد لووول  <img src="http://oasis.bindubai.com/emoticons/blush.gif" border=0>

من زمان ارقب موضوعك واليوم دشيت وحصلته <img src="http://oasis.bindubai.com/emoticons/smile.gif" border=0>

يالله نتريا التكمله الغالي <img src="http://oasis.bindubai.com/emoticons/sleeping.gif" border=0>

أحلى منصوري

24-02-04 ||, 04:27 AM

الســـــــلاام علـــــــيكم ورحمـــــــة الله وبركـــــــاته
ومع خطوة جديدة من خطوات التفوق.
...
يوم اتذاكرالمواد العلمية الصعبة شرات الكيمياء والاحياء والجيولوجيا والمواد الادبية شرات علم النفس والتاريخ.
دوم اربط الاشياء في بعضها في المادة.
يعني فيه مسميات صعبة إنّا نحفظها.
المشتقات الكيمائية واسماء بعض اجزاء الجسم وبعض الامراض و و و و.
اربط الاسم في اكله ، في اسم حد من اهلك ، في شكل مدرس ، في اجزاء السيارات ، في ممثل في ممثله ، لاعب كوره ، .... .
انا كنت دوم اسوي هالحركة واللي ينحفظ بهالطرقة صعب انك تنساه.
ولا تنسى اتقسم الكلمة والمصطلح العلمي او الادبي الا اجزاء وخلاف تربطها مع بعض.
...
اذا ما كنت بادي بالمذاكرة لا اتخاف ،،، ابدأمن الحينه ،،، بس لازم اتكون عندك العزيمة والارادة.
سو لك جدول ،،، اليوم راح اذاكر 4 ساعات او 5 ساعات.
راح ابدى باللي خذته اليوم وبعد ما اخلص منه احاول اني اخذ ساعه وحده في مواد الفصل الاول.
اكيد اشياء وايد طافتك بس اذا كنت منضبط في هالفترة ولو انها قصيره راح تتفوق.
...
اختيه الخيماويه:
تسلمين على هذا المرور.
واتمنى انج تستفيدين.
والله يوفقج ويحفظج.

والسموحه

اخــوكم
احلى منصوري

شوق القلوب

24-02-04 ||, 04:47 AM

ماشاء الله...

مجـــهود وااااااااااااايد حلو...

والاحلـــى انه ننقل تجاربنا الناجحه للاخـــرين... <img src="http://oasis.bindubai.com/emoticons/smile.gif" border="0" valign="absmiddle" alt=':)'>

***

موفق...

وربي يوفقك كل الطلاب المقبلين على شهادة الثانويه... <img src="http://oasis.bindubai.com/emoticons/smile.gif" border="0" valign="absmiddle" alt=':)'>

المحاق المشتعل

24-02-04 ||, 04:51 AM

السلام عليكم ورحمة الله وبركاته


اخوية الكريم احلى منصوري

موضوعك عجيب وروعه

اشكرك على كل الي قدمته للطلبة وان شالله يستفيدون من كل هاي المعلومات الجداً مفيدة

بالنسبالي انا

كنت اول ما ارجع من المدرسة على طول اصلي الظهر وعقب ادرس على طول وأخلص كل الي عليه

وآخر شي اعتبر باقي اليوم اجازة

اما اذا اتذاكر العصر او فليل بتم اتوسوس

وبتقول

اووووه
انا ما ذاكرت هل بلحق اخلص مثلا ً الحفظ اليوم

هل بفهم الماده الفلانيه
هل وهل

لكن لو اتذاكر اول ما ترجع احسن شي

وباقي اليوم اجازه

وعن موضوع الاكل ترى الاكل فعلا مثل ماتفضل اخويه احلى منصوري له دور كبير في المذاكرة

وخاصتاً الريوق

اهم وجبة الواحد لازم ما يفوتها

لانه في هالوقت الي هو الفجر

اتكون كل الخلايا في الجسم تقريبن شغالة وتستهلك اكبر قدر من الغذاء

اما في فترة ما العصر وانته ساير

فالخلايا نصها توقف عن العمل وعلى هالاساس يفضل في تخفيف نسبة الطعام في الفترة المسائية

....

وعن المذاكرة في مكان منعزل

هي بلا ادنا شك افضل شي الواحد يسويه لكن المشكلة

وخاصة في الثانويه العامه

الواحد اول ما ييلس روحه في الغرفة يذاكر يتخبل اول شي

والشي الثاني اول ما يستلم كتابه يرقد عالكتاب

لانه يمل من زود ما يجابل هالكتاب

فمن الافضل انه بين فترة وفترة بعد المذاكرة الجدية كل ساعة او ساعة ونص يريح نفسه 10 دقايق على الاقل

وما يزيد ولا ينقص لانه لو زاد بيمل واذا قلل ما بيقبض شي يوم بيسير يذاكر

....

مشكور اخويه على مادتك الحلوة المطروحة
وان شالله يستفيد كل الطلاب منك
مع خالص التقدير

اخوك المحاق

شرجاويه

24-02-04 ||, 10:41 AM

تسلم يا أحلى منصوري على مشاركتك المفيدة ..

وان شاء الله يستفيدون منها الأعضاء ..

انا الحمدلله خلصت الثانوية بتفوق .. الفال لباقي الأعضاء..

تحياتي لكم..

أحلى منصوري

25-02-04 ||, 03:11 AM

الســــــلاام علــــــيكم ورحمــــــة الله وبركـــــــاته
وطريقة اخرى من طرق التفوق:
الراحة النفسية ضرورية.
لا اتفكر الا في مستقبلك.
وكيف اتبيّض ويه ابوك واهلك كلهم.
الكل عاقد الامل عليك انت ،،، هيه لا اتقلل من عمرك.
...
ولا تنسى النوم.
نام بكير ، تصحى بكير ، واتشوف الصحه كيف بتسير<img src="http://oasis.bindubai.com/emoticons/laugh.gif" border=0>.
نام من وقت ،،، الساعه 12 اوكيه.
وافضل وقت للمذاكرة هو وقت صلاة الفير.
نش الساعه 5 واتسبح وصل واتوكل على الله وذاكر.
وبعد الغدا حط راسك وارقد لك ساعه او ساعتين للراحة.
اذا كنت تعبات ما راح اركز وما راح تفهم وراح تتضايق من المذاكرة.
...
اختيه انامل:
تشجيعك المتواصل لي يبهجني.
كنت اتمنى اني اشوف بعض الاضافات من شخصك.
دمتي لنا.
وجزاك الله خيراً.
وربي يحفظج ويوفقج.

والسموحه

اخــوكم
احلى منصوري

المزيوونه

27-02-04 ||, 05:16 AM

احلىىىىى منصووووووري .. ياخووي والله موضوعك فن .. بس المشكله فيينا ..
والله انا يوم ابى اذاكرلي شي ماروم .. احس اني متعايزه .. ويوم الاجازات ما استغلهن كله لعباان
شو ها الحاله ..

... عن ربط الكلمات بشي.. ها الطريقه وايد اوكي انا اتبعها .. اذكر فالاحياء ماخذين اسامي
مارمت احفظهن لين ما جزئيتهن .. مثلن دوبامين >> الحلوه شو قالت .. الدبه ميين خخخخ
واذكر بعد سيروتنين >> خليتها بالهندي سيرو  تنينه  هيهيهي ..

الله يوفقنا انشالله .. بس يا خويه بغينا جدولك انزييين .. بمشي عليه اذ شفته يلايمني
جدول شهر 5 مال المذاكره ... اعصر مخك واذكره ..

ابى اييب اعلى عنك <img src="http://oasis.bindubai.com/emoticons/tounge.gif" border=0> 

 

الله حيه

رسالة شوق

27-02-04 ||, 04:05 PM

ثانكيووووووووو على الموضوع

الله يعنينا بنبدع في الامتحانات

بس انا متأكده انشاء الله الامتحانات بتكون سهله

وانشاء الله بخبركم عن النتيجه اول ماتوصلني<img src="http://oasis.bindubai.com/emoticons/blush.gif" border=0>

اذا كانت تفشل مابقول <img src="http://oasis.bindubai.com/emoticons/tounge.gif" border=0> 

بس انا متأكدة أنها بتكون اوكى لاني مب خايفه من الامتحانات مووووووووول

وانا ادبي يعني اهم شي اني احفظ واحفظ واحفظ

الله يوفقني ويوفق الجمييييييييييييييييييييي يع <img src="http://oasis.bindubai.com/emoticons/blush.gif" border=0>

وشكرا مرة ثانيه على الموضوع

أحلى منصوري

28-02-04 ||, 01:50 AM

الســـــــلاام علــــــيكم ورحمــــــــة الله وبركــــــــاته
وعاد اليكم احلى منصوري<img src="http://oasis.bindubai.com/emoticons/cool.gif" border=0>.
...
المنبهات:
يوم تيلس اتذاكر ابتعد كل الابتعاد عن المنبهات.
لا اتقول بطوّل في المذاكرة وبشرب القهوه ولا الشاي ولا حتى الرد بول.
المواد اللي تحتوي على الكافيين ابتعد عنها واتجنبها.
اذا بغيت تشرب حايه اشرب عصير ،،، ويكون اخير اذا كان طبيعي.
شي ناس يسهرون بسبة القهوة.
وشي دراسة اتقول :
اللي ينحفظ بواسطة المنبهات يوم تبغى تسترجعه ما تقدر الا اذا تناولت لك شي من المنبهات.
وانت في الامتحان منو بييب لك قهوة<img src="http://oasis.bindubai.com/emoticons/tounge.gif" border=0>.
عن عمري ابتعدت عن المنبهات وعن الغازات وعن المكسرات وعن العلك.
تجنب هالاشياء افضل لك ولدراستك.
...
اخويه تويتي:
صقدك شي عزيمة<img src="http://oasis.bindubai.com/emoticons/biggrin.gif" border=0>.
خلاص عيل : ان شاء الله تتوفق واتيب النسبه اللي بخاطرك.
الله يوفق الجميع.
وربي يحفظك.
شد حيلك<img src="http://oasis.bindubai.com/emoticons/cool.gif" border=0>.

والسموحه

اخــوكم
احلى منصوري

العيناويه

28-02-04 ||, 01:16 PM

والله اتطورت عزبة المناصير
قاموااااااااااااا يحطون مواضيع عن التفوق
منوووووووووووووووووووه قدكم والله <IMG src="http://oasis.bindubai.com/emoticons/tounge.gif" border=0>
احلى منصوري
ما بجاملك
اسلوووووووووووووووووووووب ك يجنن في طرح المواضيع
ماشاء الله عليك
عيني عليك حاااااااااااااااااااااااا ااااااااره <IMG src="http://oasis.bindubai.com/emoticons/biggrin.gif" border=0>
وجاااااااااااان فلعتك بعين ( بتخبركم العين تفلق )
تسلم اخويه ع الموضوووووووووووووووووووو وووع خساره خلصت الثانويه العامه والا جاااااااااان حطيت موضوعك خريطه جدامي <IMG src="http://oasis.bindubai.com/emoticons/biggrin.gif" border=0>
يعطيك العافيه ع الجهد المبذول وما قصرت
عيناويووووووووووووووو طويلة العمر تنتظر يديدك

والسموووووووووووووووووووو ووحه <IMG src="http://oasis.bindubai.com/emoticons/smile.gif" border=0>

قلوب دبي

28-02-04 ||, 04:41 PM

<img src="http://oasis.bindubai.com/emoticons/smile.gif" border=0>
السلام عليكم

موضوع بالفعل مفيد ما شاء الله عليك احلى منصوري

اسمحلي على بعض الاضافه البسيطه ..

- التهيأه النفسيه الله يسلمكم اهم شي بالمذاكره انك اتكون هادي و مرتاح يعني ما اتفكر بأي شيء غير انه عندك وقت و تريد اتاكر فيه يهني أتهيأ نفسك له .
- التلفون ان امكن حاول اتحطه على السايلنت و الا اتصكه عسب ما يغثك و انته اتذاكر .
- حاول ايكون المكان اللي يالس اتذاكر فيه اجوائه مريحه لك بقدر الامكان .
- الخوف امر طبيعي من الامتحان و لكن بأسلوبك وارادتك بتقاومه و بتتغلب عليه .
- رضاء الوالدين اهم شيء و دعائهم لك .
- حاله عدم التركيز بالماده ريح خمس دقايق اطلع روح اشرب ماي و ارجع .
- اسلوب المذاكره يختلف من شخص لاخر كل بطريقته و لكن الطريقه العلميه الجلوس على الكرسي و الطاوله .
- اذكر اني كنت بعد نهايه الدرس اللي ذاكرته اكتب على هامش الكتاب رؤس اقلام الموضوع حيث اني يوم اراجع و نسيت شي اطالع رؤس الاقلام اذكر الدرس . 
- تلخيص الدرس يعطيك نوع من الفكره الموجزه عن المضمون حيث لا يمكن الاعتماد الكلي على الملخص بل لا بد من المضمون و من ثم نستند الى الملخص كمراجعه رؤس الاقلام .
- الثقه بالنفس تتولد من تلقاء نفسها و جراء الدراسه اليوميه و الاستعدادات للامتحان .

ولنا عوده بأذن الله

قلووووووب دبي

الشوق

01-03-04 ||, 01:37 AM

موضوع جميل وملفت من قبل اخونا احلى منصوري
يعطيك العافيه ..
يستحق التثبيت عل وعسى يحصلون الاعضاء خبره من النقاط اللي طرحتها
ولي عوده ثانيه للتعليق ...
اختكم : الشوق

أحلى منصوري

02-03-04 ||, 02:26 AM

الســـــــلاام علـــــــيكم ورحمـــــــة الله وبركـــــــاته
تلبيةً لطلب اختيه المزيوونه ،،، هذي هي النسخة الاصلية من جدولي.
(الحمد لله اني محتفظ به<IMG src="http://oasis.bindubai.com/emoticons/tounge.gif" border=0>)
بس هو متلخبط لاني بعد كل امتحان كنت اعوّد واكتب عليه العلامة اللي متوقع اييبها.
واذا ما فهمتوا منه اي شي ،،، بكتبه وبحطه بطرية أوضح.
بس لاحظوا كيف اللغة العربية في خطر<IMG src="http://oasis.bindubai.com/emoticons/laugh.gif" border=0>

<IMG height=730 src="http://oasis.bindubai.com/download/almansouri/nnnnnn3.JPG" width=616>

وراح اقولكم كيفية ترتيب الجدول ان شاء الله.

والسموحه

اخــوكم
احلى منصوري

عافك الخاطر

02-03-04 ||, 03:12 AM

ما شاالله <img src="http://oasis.bindubai.com/emoticons/smile.gif" border=0> ، شي طيب ... سيفت الجدول حق السنة الياية ان شا الله <img src="http://oasis.bindubai.com/emoticons/blush.gif" border=0>

الله يوفق الجميـــع ، ويوفقني <img src="http://oasis.bindubai.com/emoticons/smile.gif" border=0> أهم شي الراحة النفسية ...

تحياتي ...

أحلى منصوري

02-03-04 ||, 03:50 AM

الســـــــلاام علــــــيكم ورحمـــــة الله وبركــــــاته
عدت لأشرح كيف سويت الجدول.
...
يوم تبدى في كتابة جدولك.
ابدى في اول مادة راح تاخذها في اول امتحان من امتحانات الثانويه العامة.
نحن كان عندنا رياضيات ،، فاول مادة ذاكرتها في بداية شهر خمسة الرياضيات.
وبعدها المواد اللي بالجدول ،،، مرتبة شرات ترتيب الوزارة للامتحانات.
بسبة انك ما تنسى حايه.
يعني لو بديت بالفيزياء وهو دومه آخر امتحان عندك.
لين ااي امتحان الفيزياء بيكون مار على المذاكرة مالتك شهرين.
يعني راح تنسى اشياء وايدة.
اتمنى انه الفكرة وصلت لكم.
...
اختيه شوق القلوب:
شكراً على المشاركة.
...
وربي يحفظكم ويوفقكم.

والسموحه

اخــوكم
احلى منصوري

أحلى منصوري

02-03-04 ||, 04:43 AM

الســــــــلاام علـــــــيكم ورحمـــــــة الله وبركــــــاته
عدنا ،،، بس أتمنى منكم انكم اشتريتوا الشريط اللي خبرتكم عنه.
...
جميع الأسئلة في امتحانات الثانوية العامة متكررة.
هيه متكررة.
تبغى اتيب نسبة عالية ،،، بعد ما اتخلص من المذاكرة حل لك كم نموذج من امتحانات ثانوية عامة سابقة.
احيد استاذ الاحياء قال النا ،،، حل لك 5 امتحانات وراح اتييب فوق ال 95 .
بس قال لازم اتكون فاهم معنى السؤال لانهم في كل مرة يصيغونه بأسلوب يديد.
في الكيمياء ،،، الاسئلة معروفة.
معادلة مزونة ومسائل و و و و .
نصيحة :
حل اكبر عدد من الامتحانات وراح اتقول احلى منصوري قال.
واتوقع انه بالادبي نفس الشي.
بس افهم قبل ما تحفظ.
...
والسموحه

اخــوكم
احلى منصوري

المزيوونه

02-03-04 ||, 05:36 PM

مشكوور والله ماتقصر يا اخوي .. بس المكشله انا ها الايام ما بسدني مذاكرتيه وايد بطيئه <img src="http://oasis.bindubai.com/emoticons/glare.gif" border=0> الله يكون بالعون بس ..

ووو خلاص انشالله بناخذ بنصيحتك بس انا قلت بدرس للرياضيات اخر شي لانه بخليله اسبوع وعلى طول الامتحانات مب احسن!!!

بن دبي

12-03-04 ||, 01:23 PM

كلام يرفع المعنويات..خصوصا للي في حالتي.<<<ثانوية عامة الإستاذ <img src="http://oasis.bindubai.com/emoticons/biggrin.gif" border=0>

مع اني مجرب كل الطرق اللي تحببني في الدراسة بس بعد مو قادر احبها..تدري اني ناوي اييب نسبة 5و94 انسان طموح زيادة.. وتراني علمي..

وانا حاط في بالي خطة ناوي اطبقها في شهر المذاكرة..وعن الإمتحانات السابقة نفس الكلام اللي قاله استاذنا..بس مو استاذ الاحياء..استاذ اللغة..

يالله الله يفرجها للجميع ان شاء الله..سنة وتعدي..

تحياتي
غريب

أحلى منصوري

02-09-04 ||, 05:48 PM

:: اخويه المحاق المشتعل ::
مشكلة الرقاد أكثر الناس يعانون منها بس الحمد لله أنا إذا فتحت الكتاب الإرقاد يشرد وما خليه يفوز عليه
( هذه الناقص الإرقاد يغلبني <img src="http://oasis.bindubai.com/emoticons/fa32.gif" border=0> )
وشرات ما قت إنته أهم وجبــــة الريوق <img src="http://oasis.bindubai.com/emoticons/fa42.gif" border=0>
والراحة بعد كل جرعـه دراسيـــة مطلوبــه بس في ناس يذاكرون ساعه وياخذون راحة ساعتين <img src="http://oasis.bindubai.com/emoticons/fa55.gif" border=0>
لكل ساعه 5 دقايق إلى 10 دقايق راحــة ,,
تسلم على هذا المرور وعلى تلك الإضافــة .
وربي يوفقك .

والسموحه

أخــوكم
أحلى منصوري

نبى اتقولون لنــا تجاربكم يالخريجين لطلاب الثانويه العامه اليداد <img src="http://oasis.bindubai.com/emoticons/fa51.gif" border=0>

الدلووووعة

02-09-04 ||, 08:50 PM

مشكور اخويه على هاي النصايح
اكيد بتكون مصايح اوكي دام اللي كاتبنها
يايب 94ومعرف كم من عشرة
والسموحة

ابتسامة الروح

03-09-04 ||, 12:48 AM

تسلم اخوي ع النصائح<img src="http://oasis.bindubai.com/emoticons/fa34.gif" border=0>
و ان شاء الله بنجربها السنة<img src="http://oasis.bindubai.com/emoticons/laugh.gif" border=0>
و الله انا كل بداية سنة احط لي جدول
اتم اتبعه بس اول شهر
وبعدين.....<img src="http://oasis.bindubai.com/emoticons/fa49.gif" border=0>
املللللللللل من الروتين<img src="http://oasis.bindubai.com/emoticons/fa55.gif" border=0>
خصوصا أيام اختبارات منتصف الفصل
لانا ما ندري نراجع حق شنو و نخلي شنو
اما جدول الامتحانات اذا ما سويته مااقدر اذاكر
تتشتت المعلومات<img src="http://oasis.bindubai.com/emoticons/rock.gif" border=0>

بس انا هالسنة متفائلة<img src="http://oasis.bindubai.com/emoticons/fa50.gif" border=0>
و ان شاء الله يستمر هالتفاؤل <img src="http://oasis.bindubai.com/emoticons/fa35.gif" border=0>
و ترتفع النسبة <img src="http://oasis.bindubai.com/emoticons/fa31.gif" border=0>

و السموحة،،،
ابتسامة الروح،،<img src="http://oasis.bindubai.com/emoticons/fa33.gif" border=0>

ظبيه الدار

03-09-04 ||, 11:51 PM

احلـى منصـوري :
ان شـاء الله السنـه بكـون ثـانويـه عـامه واكـيد بتبـع خطـواتـك (( وان شـاءالله ايـب سنـبه شـراتـك <!--><img border=0 src=http://oasis.bindubai.com/emoticons/biggrin.gif> ))
وتسـلم أخـوي على هذا المجهــود .

صمت الدموع

04-09-04 ||, 05:22 AM

..:: أحلى منصوري ::..

جزاك الله بالف خير اخوي<img border=0 src=http://oasis.bindubai.com/emoticons/fa42.gif><=== الاخت ثانوية عامه<img border=0 src=http://oasis.bindubai.com/emoticons/fa50.gif>

وانشالله ايييب نسبة تبيض الويه<img border=0 src=http://oasis.bindubai.com/emoticons/fa35.gif>

الدلووووعة

09-09-04 ||, 06:35 PM

السلام عليكم
انا اسوي شرات ماتقول بس ماكتب في الورقة في كل المواد بس في المواد العلمية اما الادبية لا لنها حفظ فمايبالها ورقة وقلمانايوم اذاكر خاصة ايام الامتحانات ماسير صوب الاكل ولادلة لني ماحب اكل يوم اذاكر انا ماخذ ابريك الا حق الصلاة ورد اذاكر مرة ثانية يوم اريد اذاكر اذاكر اول مارد من المدرسة عسب اخلص ابسرعة لني ماعرف اذاكر في الليل
حدي الساعة 8 الليل احس عمري ماستوعب عقب ها الوقت
وايد اتفلسفت
والسموحة