الخير منكم وفيكم

[حلم الطفوله]

السلام عليكم ورحمة الله وبركاته

يا أهل الخير ... يا شباب الواحات

عيال بلادي ... وإماراتي .. . وأحفاد زايد بن سلطان :1:

كل واحد يتخيل نفسه

قابض الخط ( الطريج ) :6:

في عز الضحى العود

أو

تخيل نفسك

راكب السياره وحاس بلهيبها الحارق

لدرجة إنه السكان يلسع شرات لسعة التنور ( كأنكم تسوون خبز ايراني ) :k_icon28:

أو

تخيل نفسك

وقفت عليك السياره في يوم مشمس ، درجة الحراره فيه وصلت 55

ولا ونيس ولا منقدذ لك في الطريج :pullhair:

ولا دبة ماي تشربها عشان تخفف عليك سهام الظهر


تخيلتو !!


زين :a116:



تخيلو هالعمال ... صح نحن مب امكلفين انكد عليهم لأنهم يشتغلون في شركات المفروض توفر لهم كل سبل الراحه أثناء العمل ( تماما مثل اليابان)

بس بما إنهم بشر ...

مثلي ومثلك

وكلنا عيال آدم وحواء

المفروض نفرج عليهم في الدنيا وخصوصا في ظل اللاهوب إلي تتقطع فيه الأنفاس


الزبده يا حلم :k_smile2:


حسيت إني وايد لعوزتكم من كثر ما أرمس بس اتحملوني إشوي :mf_leia:


الخير منكم وفيكم :inlove:

حملة الواحات الخيريه أطلقت عليها هالعنوان

وكل شخص يقدر يساهم فيها بيلقى الأجر والثواب من الله سبحانه وتعالي


فكرة الحمله تتلخص بالآتي : إحضار

1- درزن أكياس بلاستيك ( مع إنه البلاستيك مضر بالبيئه بس شو نسوي )

2- درزن دبات مسافي ( صغار )

3- جيسين صمون وكرتون جبن مثلثات

4 - درزن عصير

5- وجان نزل الكرم الحاتمي لا مانع من بعض الإضافات :icecream:

الطريقة : :fa54:

1- تحط في كل جيس شيء من هالأشياءات

2- خلال وقوفك عند الإشاره أو مرورك بالشارع أو بجانب مشروع بناء تعطي هالعمال التعبانين من هالأكياس وإنته تبتسم ( من خاطر خاطرك )

3- سبحان الله إذا كان العمل من قلبك وبنيه صادقه بيكون كله في ميزان حسناتك


يمكن الفكره تكون بسيطه ... بس من خلال مشاهداتي لهالفئه من هالعمال حسيت بأنه الله منعم علينا بخير كبير وشغل مريح ( صح نتذمر من الحر ) بس بعد الحمد لله على كل حال



يالله شباب وشابات الواحات ... نشد الهمه ونخلص النيه ونتوكل

ما أقول كل يوم بس حتى ولو أسبوعيا كدفاعة بلا عن نفسكم وأهلكم

وفي ذلك فليتنافس المتنافسون


وربي يبارك فيكم ويجعله في ميزان حسناتكم


يالله !! منو بيشارك ويانا بالحمله ؟

نريد نماذج وصور من الأشياء إلي بتوزعونها في هالموضوع

مب من باب الخقه لا سمح الله ...بس من باب التشجيع للباقين


اموفقين :k_smile2:

[فرفوش]

اليوم حلم الطفوله دايره مع حقوق العمال
على أمرج
فهم جزء لا ننكره بأهمية وجودهم لبناء البنيه التحتيه
وراحة المواطنين
نجدهم في كل مكان
فهم يستحقون المعامله الطيبه
والبسمه
وشكرهم
وان شاء الله سأكون من ظمن الحمله
^_^
الخير منهم وفيهم
ما اتصور القى مواطن يتجرأ يكون مكانهم
وان شاء الله
أحاول اكون مكانهم ولو ساعه في حياتنا

يكون احسن لو نلبس قمصان وعليه شعار الواحات ونتصور معاهم
^_^

[طفلة من هذا الزمان]

فكـرة راقيــة يا راقيــة ..

الله يجعلـه في ميزان حسناتج

و خلوونــا نشوف التطبيــق ...........

[مزن هتان]

عليكم السلام و رحمة الله و بركاته أختي حلم
يزاج الله خير و أحسنتِ

بإذن الله تعالى بشارك وياكم بالحمله
و اللي أساساً رفعنا شعارها "خالاتي، عيال خوالي و خالاتي شباب و بنات وأنا و خواتي"
بس للحين ما طبقنا حاجه، راح اذكرهم الحين

و ربي يجزي الجميع خيراً

[قصايد غلا]

شكرااااااااااااً من القلب يا أطيب قلب


الحمدلله الحمدلله هذا من الأشياء اللي وااااايد أحبها و كلنا في البيت نسوي هالشي

يوم اييونا العمال مال البلدية أو العمال اللي يشلون السيايير من البيت أو اللي يبنون بيوت حذالنا ===> لازم أبويه قبل كل شي يكون مزهّب جيس و فيه البارد و العصير و الماي و الصمون أو البسكوت أو اللبن و أحيانًا خردة :k_smile2:



و مرات الظهر يوم نمر الدكان و نشوف العمال يايين يشترون ، نزقر راعي الدكان و ندفع عنهم الحساب لأنهم أصلا فقرا و اللي يشترونه حبة خيار حبة طماط و جيس خبز
يعني ما بنخسر شي غير مبلغ ما يزيد عن الـ5 دراهم للشخص ، و ما تتخيّلون كيف فرحتهم لأن هالـ5 واااايد لها قيمة



أحيانا حتى في الليل نشتري عشا من برع و يكون فيه أشيا زيادة و محد هبشها ، يوم نشوف عمال البلدية نزقرهم و نناولهم الجيس
ما تتخيلّون اشكثر يفرحون


هالشي وااااااااايد يرد البلا عن الإنسان و يدفع الشر عنه و عن أهل بيته =)

و لا تنسون إن الرسول عليه الصلاة و السلام قال: في كل كبد رطبة "أجر"

هاييلا ناس يتعبون عشانّا و يبذلون أضعاف الجهد اللي نبذله


يزاااااااج الله 1000 خير حلم =*

[المزوحي]

السلام عليكم

انا بشارك لكن من غير صور وبخبرج يتني فكره إني اعطيهم " يــــح "

لاتضحكون صدق بيروي عطشهم :fa34: شو قلتوا :a018:

[مزيونه العرب]

^
حلوه .. بس يكون بااااااارد ^^"




وانا معــآكم في هالحملــه .. منو ما يبي يسوي الخير فحياته،، منها تحصل اجر ومنها ابتسامه ترسمها على ويه الغير وسعآده تنبعث فقلوبهم ويمكن تلآقي من وراهآ دعوه صآدقه تحميك من الشـر ..
الله يجعله في ميزان حسنآتج يآ حلم =)

[دمعة شوق]

يـزآج الله خــير يـ حـلم

هآلفكـرة لازم آلـكــل يطبقـهـآ وآذا الواحـد تهـآيـز ومآفـيه يتشرا ويحط في الأكيآس
على الاقـل يشتري كرتون مآي ويوزع على العمال اللي يشوفهم وحتى يقدر يشتري كيمة من الخبر
ويوزعه مع الماي
~

أو حتـى يقدر الواحد يعطي العمال اللي في البيت اللي هم الخدم
ولو بـشي بسيط
:)
~

في ميزان حسناتج يـ حلـم
وآن شآءالله نطبقها
~


صـح !

فـرفـوش
حلوة فكرة القمصان والتصوير ويآهــم
نقدر نحط شعار الواحات على القمصان
:police:

[غرور أنثى]

اّلْلـْْ♡ـْْہُ يقدرنا ‘عٌَّ‘ٍٍـَِلِّْـَِۓ فعل الخير

[الـمـسـتـانـس]

فكرة جميلة جدا

[ريف المشاعر]

الفكرة وااااااااايد فنااانة ... من فترة قمنا نسمع عن تكاتف والعمل التطوعي ليش ما ايشاركون شبابنا الله يعاافيهم :whistling: وفد من شباب الواحات مع وفد من تكاتف و ينفذون هالفكرة و يتصوروون عشان ابالمرة انشوفهم خخخ فضووول يعني فقط لا غير :tongue: ونحن الإنااث بنشارك في تجهيز التوزيعات ... وايد علينا صح؟ خخخخخخ

صدق اختيه حلم قلبج مرهف وانتي راقية الله يحفظج