خبرات منزلية

[طير الحب]

السلام عليكم ورحمه الله وبركاته...

نستعرض من خلال هذا الموضوع خبرات ربات البيوت في الأمور المنزلية ونرحب جدا بمشاركة الفتيات...

يعني شو أنواع المساحيق الي ممكن نستخدكها للمنزل...؟

كيفية التعامل مع الخدم....الخ

[أمطار]

وعليكم السلام ورحمة الله وبركاته~

صــار لي فتــره منقطعه عن نقاشات "الخبرات المنزلية" ~
بصـراحــة أنا يهمني "الريحــة" في كل مسحوق استخدمه في البيت ..

سواء تنظيف أرضيات البيت
أو تنظيف المطبخ
أو الحمام "وأنتوا بكرامه"

أما البشاكــيـر فـ أبد ما أحب اتعامل وياهم

مــره وحده من البشاكيــر ما خبرتني أنه منظف الأرضيات خلص..
وأول ما رجعت البيت .. إلا يصكـّني صداع وصدري انقبض من ريحــة الكلور!

سارت الدكان ويابت كلور ونظفت به الأرضيــة
يومين وأنا مخليه كل شي مفتوح .. الدرايش والبيبان ..
بس عشان يتهوّى البيت عقب الريحه!

ما كلمتها ولا قلت لها شي..
سرت اشتريت لها منظـف الأرضيات "سمر" بدون ريحه
وشليت الكلور عنها وعطيتها "سمر" بداله~

أحس خلاص فهمت أنه "الكلور" ممنوع تستخدمه كـ منظف للأرضيات!


ومره لقيتها تنظف عباتي بـ "لوكس" غسول اليدين!
مع أني دوم أييب لها غسول خاص للشيل والعبايا ..

ما أعرف هي تستهبل ولا ما تبا الشغل؟!

شو الحل ويا البشكارة اللي "تستهبل" وتستخف دمها شرات بشكارتنا!؟!

[فرفوش]

مشكلة الحريم مع الخدم ومشكلة الخدم مع الحريم لن تنتهي :a058:- يعني علينا أن لا نتوقع عند جلب أي خادمه بتكون كامله 100% - يعني بنلقى فيها عيوب - بس المهم أسلوبنا وتعاملنا مع الخدم وأسلوبها وتعاملها معنا ونضع في الحسبان قد تكون الخادمه هدفها القدوم للدوله فقط للهروب والعمل في مكان آخر وأيضا التعرف على الغرباء أو تريد فقط التجربه - وقبل كل هذا يجب مراعاة ووضع معايير أختيار الخدم من حيث :

1- سمعة المكتب المتعامل في جلب الخدم وتاريخه (يعني مب أي مكتب عشوائي) لازم نعرف من حيث الضمان في حين الهروب أو عدم الرغبه في العمل
2- يتم أختيار الخادمه في المكتب دون أستعجال - لازم يكون الأختيار بعد نقاشات مع أكثر من فرد من البيت
3- مكالمة الخادمه بالهاتف قبل جلبها وأختيارها بحيث نعرف أسلوبها - وبحيث نعطيها الصوره المطلوبه حين جلبها وبحيث نعرف ردة فعلها من الواجبات المطلوبه منها حين قدومها - ومعرفة حياتها في بلادها- كما يستحسن تبين لها بأن عملها سيكون كثير في المنزل - وعلينا أن نخبرها بأن الأتصال مع الغرباء ممنوع - كما يفضل حتى لو لا مانع لدينا ولكن فقط للتجربه من ردة فعلها أن أستخدام الهاتف ممنوع
4- يستحسن أن تكون الخادمه متعلمه ومتزوجه ولا هي صغيره ولا هي كبيره ولها خبره في العمل سابقا
5- يفضل جلب خادمه لم تعمل سابقا في الدوله نفسها حتى لا يكون لديها معرفه لأي فئه في الدوله
6- يجب الـتأكد من خلوها بأي أمراض مهما كان المكتب ضامن ذلك
7- يجب تفتيشها تفتيش دقيق في المكتب قبل أخذها سواء أغراضها وأوراقها وهواتفها

==============================================

برأيي الخادمه لها مشاعر كالبشر تكره تحب تحقد ولازم نتوقع أن فيها عيوب وأخطاء - في البدايه لازم المرأه أن تكون مهتمه ومراقبه لها وتنصحها وتوجهها لأن الخادمه في بداية أيامها بيكون بعدها غير متأقلمه مع الوضع وبنحس أنها غبيه - ونحط في بالنا أن الخادمه مب متعلمه شراتنا يعني الفهم والاستيعاب مب لازم يكون مثل فهمنا وأستيعابنا - فالمطلوب الصبر معاها وتوجيهها وتعليمها أسلوب عادات البيت حتى تتعود - أغلب البيوت عند جلب الخادمه في البدايه يظنون أنها خبيره وذكيه وما يحاولون تعليمها وهذا غلط لأن الأهم البداية عشان الخادمه تعرف الطريق ألي لازم تمشي عليه - كما أن يمكن الخادمه أن تكره ولكن ما تبين هي ذلك لأن تفكيرها معتمد على الرزق - لذلك يجب أن نضع في الحسبان حين أبداء أي أسلوب غير محبب لها فهذا لا يعني بأن سكوتها رضى منها فعادي غدا أنشوفها تنتقم في معاملتها مع الأطفال مثلا أو في الخفاء - كما المطلوب أن لا نحرمها حقها في مكالمة أهلها - ونعاملها على أنها من آل البيت -

في حين وضعنا لها هاتف خاص يجب أن يكون مراقب بحيث أن هناك عدة شركات تقوم بأرسال كود كرساله خاصه للهاتف لآولاءك الخدم لمن يطلب العمل - يعني نتأكد من الرسائل الخاصه ومن الأرقام ونسألها عن ذلك



ونصيحتي:
- أذا شفتوا أن الخادمه غير طيبه ومب مرتاحيلها وأخطاءها كثيره ومكرره فالأفضل تسفيرها على طول بدل الصدعه معها لأن يمكن من كثر الشجارات أن تسويلنا مشاكل كبيره في غنى عنها
- أذا هددت بأن ترجعوها المكتب فرجعوها على طول بدون تردد لأن بهذا هي تستعمل أسلوب التهديد وتجربكم

- حاولوا أتكونون قريبين منها يعني الخادمه يايه تشتغل عشان تصرف على بيتها أو على أهلها وأكيد لها مشاكل فله فايده أن كانت ربة البيت تحاول تعرف مشكلاتها وشو حياتها مع اهلها باسلوب سياسي وطيب

- وقت ما تخطئ لازم نبين خطأها وأن لا يتكرر ووقت لازم ربة البيت تضحك شوي معاها لأن هذا الشيء يجعلها تتحمس للشغل

-أبدا مهما كلف الأمر يجب أن لا نضع الخدم وحدهم مع الأطفال وأن لزم لازم يكون شخص من أهل البيت متواجد ولأن الخادمه لن تكون أحن وألطف عن الأم
وبالأخير لا ننسى قول الرسول صلى الله عليه وسلم :

1) «اتق دعوة المظلوم فإنه ليس بينها وبين الله حجاب» [متفق عليه].


2) «قال الله تعالى: ثلاثة أنا خصمهم يوم القيامة:

رجل أعطى بي ثم غدر، ورجل باع حراً فأكل ثمنه، ورجل استأجر أجيراً

فاستوفى منه ولم يعطه أجره» [رواه البخاري].


3) «أعطِ الأجير أجره قبل أن يجف عرقه» [رواه ابن ماجة والحديث حسن].


4) «ولا تكلفوهم ما يغلبهم، فإن كلفتموهم ما يغلبهم فأعينوهم» [رواه البخاري].


5) «فليطعمه مما يأكل» [رواه البخاري].


6) «و ليلبسه مما يلبس» [رواه البخاري]،


7) «ليس المؤمن بالطعان ولا اللعان، ولا الفاحش، ولا البذيّ» [صحيح الجامع].


8) «من استطاع منكم أن ينفع أخاه فلينفعه» [رواه مسلم].

9) «كلكم راع، وكلكم مسؤول عن رعيته» [متفق عليه].

10) «من لا يَرحم لا يُرحم ومن لا يَغفر لا يُغفر» [صحيح الجامع].

11) جاء رجل إلى النبي صلى الله عليه وسلم

فقال: يا رسول الله كم نعفو عن الخادم؟، فصمت، فلما أعاد عليه الكلام فصمت فلما

كان في الثالثة قال: «اعفو عنه في كل يوم سبعين مرة»[السلسلة الصحيحة]


12) فعن أنس بن مالك رضي الله عنه قال: " خدمت النبي صلى الله عليه وسلم عشر سنين فما قال لي: أفٍّ، ولا لمَ صنعت؟ ولا ألا صنعت " [رواه البخاري].


13) «إذا صنع خادم أحدكم طعاماً فولي حرّه ومشقته فليدعه،

فليأكل معه، فإن لم يدعه فليناوله منه» [الصحيحة].


14) «المملوك أخوك؛ فإذا صنع لك طعاما فأجلسه معك، فإن أبى فأطعمه،ولا تضربوا وجوههم» [الصحيحة].


15) جاء رجل فقعد بين يدي رسول الله صلى الله عليه وسلم فقال

: يا رسول الله إن لي مملوكين يكذبونني، ويخونونني، ويعصونني وأشتمهم وأضربهم، فكيف أنا منهم؟!

فقال النبي صلى الله عليه وسلم: «إذا كان يوم القيامة يحسب ما خانوك

وعصوك وكذبوك، وعقابك إياهم، فإن كان وعقابك إياهم بقدر ذنوبهم كان كفافاً، لا لك ولا عليك،

وإن كان عقابك إياهم دون ذنوبهم كان فضلاً لك، وإن كان عقابك إياهم فوق ذنوبهم

أقتص لهم منك الفضل، أما تقرأ كتاب الله: {وَنَضَعُ الْمَوَازِينَ الْقِسْطَ لِيَوْمِ الْقِيَامَةِ} » [المشكاة].

[مزن هتان]

أحب هالمواضيع و دايما اخطط و ادعي ربي يكون لي منزل خاص بالمستقبل
راح أعمل كذا و كذا "ربي يحقق لي أمنيتي"

على طاري الخدم تدري نحن ابيتنا نفضّل يكونوا خداماتنا مش مشتغلين قبل
ما عدنا مشكله نتعب معاهم بـ اول فتره بس المهم يعرفون شلون طبيعة البيت

مثال اكو خدامه اشتغلت عدنا ما كنت ترقد الا الساعه 12 ليش لأن المكان اللي كانت
تشتغل فيه ما يخلونها ترقد قبل الـ 3 !! و تخاف ترقد عدنا 10 و نص و حد يناجرها !!
و شكثر كلموها امي و ابوي ماكو فايده الا بالاخير سكتوا عنها

======

أحب ينظفون و يمسحون السراميك بـ الديتول
شي ما يعيبني بـ خداماتنا لازم اقولهم نظفوا الشي الفلاني و امسحوا الطاوله
و الا رتبي الادراج غير ذلك الحمدلله وايد زينات "حبابات" باردات بس يسوون شغلهم

باجر برجع اكتب عن تنظيف الاطباق

[أنامل قلب]

بالنسبه للخدامات ، توها يايتنا من قريب يديده والحمدلله من البدايه شغلها حلو ،
بس بعيد عن سوالف المطبخ ، يعني ممكن تجابل أي شي بس ما تطبخ ، أساسا ماظنها تعرف تطبخ !.

روحها تسو كل شي من غير لا نقولها ، بس بعد يعتمد ع طبيعة المرا ،
في منهن اللي ما يحب الشغل ، وفي العكس تماما ما يحب القعده من غير شغل ..

بنظري أحس المفروض نبتعد عن أسلوب [ الأمر ] ، ممكن نقولها سوي كذا وجابلي كذا ،
بس من غير لا انييبها باسلوب كريه ، ونحاول نخليها مرتاحه ، نشوفها شو تحتاج وإذا في شي مضايقنها ..

+ بالنسبه لـ أدوات التنظيف وغيره ، نحاول دوم نوفرلها أجهزه وأدوات عمليه وتعينها ،
مثلا : ما نخليها تقعد تمسح الأرضيه ايـ أجهزه تحتاج انها تحني ظهرها وايد ولا تقعد تمسح بيدها مثلا ..

+ اللي عدنا ماتاكل أي شي ، وتحب تاكل من وقت ،
ف عادي ناخذلها اللي تحب ونخليها إهي ع راحتها وقت ما تبي تاكل بتاكل ..

وبس هيك حاليا ، احتمال أرجع ..

[مزن هتان]

السلام عليكم



شلون تحافظون على الاواني المنزليه:

الاكواب و الكاسات "اسفنجه خاصه لهم، عشان ما تاخذ ريحة الصحون بعد"
الاكواب المزخرفه و المطليه بالذهبي و الا الفضي
نستخدم الاسفنجه المربعه و غالبا تكون صفرا و رفيعه مع صابون سائل
ناعمه وايد عـ الاكواب و ما تخدشها او تشيل الوانها، و الكاسات الشفافه بعد

الجدور
نستخدم لها الليفه المعدنيه

غواري الجاهي، الملاعق المعدنيه و قليات تيفال أقصد "التاوه" ما عرف شو ينقال لها بعد
نستخدم الاسفنجه المستطيله في جزء خشن و جزء اسفنجي

و لـ مسكات الغوري و القليات
نستخدم بروش صغير بحاول ادور لكم صوره له "مكشش من جميع الجوانب هو"



ان ذكرت شي برجع لكم :bye2:

[الجديدة]

بالنسبة لي أحس مواضيع البيت ما تخلص

عن نفسي استخدم الديتول و ماركة كيوي للأرضيات و الحمامات و انتم بكرامة

اكثر استخداماتي يكون لكمفروت للغسلة النهائية يعطي ريحة تبقى في الملابس

و احب انظف كل شي حين بحين

مع اني موظفة بس قادرة ارتب بيتي
فكرة الشغالة مؤجلتنها لفترة طويلة

لاني ما احبهن و احب اشتغل في البيت بروحي

موضوع حلو و مفيد لنا نحن الحريم

[طفلة من هذا الزمان]

أمطــــــــار // أشاركج الشعوور ..

حااسة الشم عندي من أكثر الحواااس تأثرااا و تقلبـا .. يعني اي ريحة ما اتعيبني ممكن بسهوولة تلووع بجبدي
ما يعدل مزااجي الا الديتــول في البيت للأرضيات و الحمــامات .. أحس بالنظافـــة :laugh: ..

و الكومفوورت لااابد منه // آآخذ منه بالكميااااات كل سيرة الجمعية .. احب ريحته في لثياب ..

والحل مع الـ(مستخدمة) :k_harhar1: اللي تستهبـــل .. مرت علي وحده جي و بصرااحة تحملناها لين ما ارتكبت جرم فضيييييييع و اضطريت غير آآآسفة امد ايدي عليها و اسفرهااا على طوول :mad:

بس الحمدلله الله راحمنا في البيج بوس (عشرة عمر و سنين ) اللي عندنا إتأدب الشغالات و اتسنعهن و تعلمهن و تمشيهن أحيانا على عجين ما يلخبطهووش :a033: ربي لا يغير عليج يا فلانـــة ..

لي عودة اذا اذكرت سوالف بيتوتية تنفعكم .. ترى مالي بعوار الراس وااايد :birgits_giggle:

[العجيبة]

أنا كسـولة الصـراحـة ما أسـوي شي في البيـت ، لا انظف ولا اطبخ ولا اغسـل ولا غيـره .... ولا حتى أكتـرث بأمـر ونهي ... كل شي يوصلني جاهـز ومعـدل .!!

بس في السكـن اتأدبـت شوي... بروحي اغسل ملابسي وأكويهن وانظف غرفتي يوم العاملة ما اتيي .... باقي يحطولنا مطابخ وبتعلم عالطبخ بس الحمدلله شي مطاعم خخخ

استخـدم تايـد المـركـز في غسيل الملابس
ومخمـة مصنـوعة من سعف النخيـل في خم الغرفـة ههه



بالمختصــــر : ومنكم نستفيـــــد ...



صح بسألكم شو رايكم في النشافـات الكهربائية .. اللي تنشف الملابس بعد الغسيل بدال ما تنشـرونهـا تحـت الشمس؟!

[عهد الوداع]

انا تعقدت من سالفة الكوي

ملابسي وعباياتي كلهن اختربواا والسبه هالشغاله والله يدااااد مب ملبوسين تعالوااا شوفوا العلامات الي عليهن من الكوايه ماعرف كيف اتصرف وياها كل مره اهزبهاا بس ما شي فايده ..
مع اني شاريه كواية البخار خصيصا للعبي ..تخلي هالكوايه ع صووب وتسير تكوي العبي في الكوايه العاديه ..نفس ماقالت امطار يستهبلون او ما يبون يشتغلووون !!


وراجعه لكم ..^^

[أمطار]

باجــر بتفيج وبكتب لكم رد هالطــول ..
ولا إذا تحمـّست برجع أكتب تالي قبل ما أبند ليتات الواحات ~

[مزن هتان]

العجيبه تقصدين الغساله الكهربائيه تغسل و تنشف لـ حالها ؟
الصراحه احسها ما تنفع اذا كانت عندج كمية غسيل كبيره لأنها تاخذ وقت
اما اذا غسيلج قليل فـ مش مشكله و تريحج من عناء النشر على طول تكوين الملابس

الجديدة ما شاء الله عليكِ ان شاء الله اصير زيّك بالمستقبل :blush:


مطبخنا كبير و غسيله تعب
خدامتنا ما يغسلوه يوميا بس يمسحونه
و اظن يغسلونه بالاسبوع مرتين، انكتم لمن ادخله
أخليهم يفتحون الدرايش و فيه ريحه غريبه اونه ريحة المنظف هذي
شكلي بزخهم آخر الاسبوع بعلمهم شلون التنظيف الصحيح :devil:

في شي ابد ما يعيبني فيهم، بقايا الاكل عادي تظل يومين بالثلاجه
مادري هيازه عن الغسيل و الا ايش :fa52:

[طفلة من هذا الزمان]

صح بسألكم شو رايكم في النشافـات الكهربائية .. اللي تنشف الملابس بعد الغسيل بدال ما تنشـرونهـا تحـت الشمس؟!


هاي جربتها لما سكنا مرة شقة في السفــر .. صراااحة رااحة ما بعدهــا راحـــــة .. وتخلصين كل شي بسرعـة بدون ما تتريين او اضيعين وقــت ..

ونفس الفترة جربت الدش واشر Dish washer .. ياا ربي كيف ونــــــاسة ..


و الله التكنولوجيــــــا نعمـــة يا نـــــــاس :yes:

[طفلة من هذا الزمان]

انا تعقدت من سالفة الكوي

ملابسي وعباياتي كلهن اختربواا والسبه هالشغاله والله يدااااد مب ملبوسين تعالوااا شوفوا العلامات الي عليهن من الكوايه ماعرف كيف اتصرف وياها كل مره اهزبهاا بس ما شي فايده ..
مع اني شاريه كواية البخار خصيصا للعبي ..تخلي هالكوايه ع صووب وتسير تكوي العبي في الكوايه العاديه ..نفس ماقالت امطار يستهبلون او ما يبون يشتغلووون !!


وراجعه لكم ..^^

كنت يايه ركض اقتررح عليج كواية البخار .. بس طلعتي مكتشفتنها ..

انزين حل ثااني ..

العبي غلط تنكوي من جـدام .. لااازم تجلبينهــا على داخل و تكويهــا الست الهانم اللي ما تبا الراااحة ..

بس صرااحة شغاالتكم هب ريييح ماشالله .. و لا مافي أريح عن كواية البخـار .. :pullhair:

يوم خذتها حق شغالاتنا حسيت انهن شوية و بيبووسوني ع رااسي .. الحباايب يكوّن و هن يااالسااات و مريحات شو أحسن عن جذه !! :tounge:

ان شااء الله ينفعج الحــل .. ولا السمووحة ع الفلسفـة الزاايدة .. تراني أخس عن العجيبــــة (أحلى صفقة حقنا :a036: )

[شوق القلوب]

السلام عليكم..


كوايه البخار الزين فيها انج تضمنين انه عباتج ما تحترق !! بس المشكله في الشيل الساري.. يتعفصون من الخاطر اذا انكون بالبخار.. لازم الكوايه العاديه

[تحفه]

انا بتكلم عن الخدامات وكيف سياستنا نحن في بيتنا :

اولا نحن دايما نييب فلبينيه و الثانيه سرلنكيه .. ليييش؟

لان لو يبنا ٢ من نفس الجنسيه بيترابعون و بيتصادقون وبيعاونون بعضهم على الاثم والعدوان لول! يعني بيخشون على بعض و بيسرقون!

اولا في عالم "البشاكير" المسيحيات ايون وايد انظف من المسلمات :S معنه المفروض العكس!! فشو نسوي!؟

تتوزع المهام كالتالي :

الفلبينيه "مسيحيه" تنظف الحمامات + الغرف + الصاله + تغسل الثياب و تكوي + تسويلنا كيك و عصاير وفواكه و حلويات وجاي اخضر وجي العصر

السرلنكيه "مسلمه" تطبخ الريوق الغدا والعشا + تنظف الصحون + السيايير + تخم الحوي .. و بشكارتنا موتها وحياتها الزراعه .. تزرع خضار ودايما تضارب وي المزارع لانه يسرق لول

وبس :)

[طفلة من هذا الزمان]

اوبيعاونون بعضهم على الاثم والعدوان لول!

و الله انتي عســـل :hysterical:

[مزن هتان]

تحفه

نحن في بيتنا ما نجيب الا اندونيسيات، أغلب اللي نعرفهم مستغربين و زي ما يقولوا ماكو أحسن من الفلبينيات
الحمدلله اللي مروا علينا كلهم ما عليهم قصور شغولات و حبابات الحمدلله يا رب

تدرين عن خداماتنا صرت أخاف ينظلونهم بـ عين، أنا و أم سيف نبهنا على أمي
ما تطري خدمتهم جدام البعض، وحده تقول اونه كيف تلاقون اندونيسيات هيك قلت في خاطري
لو تعاملينهم بـ سنع بتعرفين ليش خدامتنا هيك "الحمدلله يا رب" فديت ليندا و ديفي :fa41:

و نفس توزيعكم وحده لـ التنظيف و الثانيه للطبخ، حق الحوش و السيايير و الزراعه عدنا بشكار

[طفلة من هذا الزمان]

أواافق مـزن هتـان في التجربــة //

متعودين انييب اندونيسيـات و الحمدلله قلما واجهنـا مشـاكل وياهن ،، و تبوون الصدق انا اللي عيني حاارة و حسدت بيتنــا .. :fa46:

مرة في الدوام عندنا وحده ما تتوفق موول في اختيارها للـ(مستخدمـات) .. فقالت انها ما تتوفق مع الاندونيسيات و ما تحب شغلهن و من هالرمسة .. عــاد انا كان قصدي انصر الشعب الكادح الاندونيسي و اشهدلهم بالخدمة الممتازة وحسن الأخلاق .. فقلت بيتنا عمررررنا ما يبنا شغالة و رجعناها المكتب عشان ما عيبتنا :tounge:

و هي كلمــة قلتها انا من اهني .... واخترب النظااام في البيت لفترة من اهني .. كل ما انييب وحده / تعاون الأولى / يطلع فيها ألف عيب و عيب .. تمينا شهر يمكن و طافن علينا 3-4 نجربهم يوومين و نردهم .. :fa54:

جان اجرب افتح نفس الموضوع في الدوام عشان ارد اقوول جدامهم ان حالنااا اخترب ،، و فجأأأة جان ترجع الأمور لمجاريهااا و توفقنا بوحده طيبة زينة ربي لا يغير عليها و عم الأمن و السـلام في بيتنا الحمدلله ......... :fa35:


اذاا رد اخترب الوضع ترااني بقووول من الوااااحات :whistling:

[أمطار]

كنت كاتبـه رد اشـ طوله بس انمسح بالغلط!

^

باخــذ لفــه في الواحات ويمكن ارجع اكتب الرد اللي كنت ناويه اكتبه مره ثانيه!
يعتمد ع المزاح خخخ

[طفلة من هذا الزمان]

سؤال بيتـــوتي بحــت //

أختي الذكية الله أعلم كيف لصقت لبانة في عباتها اليديدة (الشيلة) ، بكلمات أخرى ما اتهنت فييها ف يا ويلها اللي بتقول خل تفصل غيرهااا

الحين انا اقترحت اقتراااح و اختي اقترحت اقترااح و بنشووف باجر تجربة منوو اللي بتنجح ،،،

بخبركم شو الاقتراحااات عقب // ابا اسمع آآراااءكم و خبرااتكم ،،

كيف انخوز للبــان الحين عن الشيلة ؟

[حلم الطفوله]

الغاليه ...طفله

للبان حطي عليه عطر أو ( بف باف ونتيجته فتاكه ) وبتتجمد للبانه وبتتكسر بسهوله :)

[أمطار]

خليها تحط الشيله في الفريزر بعدين بتطلع بكل سهوله ^^~
^
عن تجربــه ~

[طفلة من هذا الزمان]

صــــح // انتو الهنتين رباات بيوت من الطـراز الأول ،،

اقتــراحي كان نحط الشيلة في لفريزر عشان تتكسر بسهوولة و هذا اللي صــار

اقترااح اختي كان تنرش ابـ بف باااف // بس ما لجأنا لهالحل

[حلم الطفوله]

زين ما لجأتوله !!! شو بيخوز ريحة البف باف من العباه !! في الحالتين بتخسرها بلبان أو بريحة البف باف

فكرة امطار عبقرية ...بس الله لا قال تعلق لبانه بعباتي :)

[أمطار]

هههههه
ياما علق لبان بعباياي وخربهم!!
تعلمت درسي وقمت أحطهم بالفريزر عشان تتكسر اللبانه وما يستوي شي بالعباه او الشيله ^^~

بس بصراحه سالفة البف باف أول مره أسمع بها ..

[قصايد غلا]

و منكم نستفيييد .. حبّييييت سالفة الفريزر هههههههههه
احين أتريا عباتي ولا عباة أميه تلصق فيها لباااااانة عشان أجرّرب =D

[مــهــابه]

^
كنت آعـرف مـآلت " البف بـآف " بس الفريزر يديده =P

.

.
بالنسبه للبشـآكير آحنـآ ف بيتنـآ مـآقد يبـنـآ اندونيسيه غير مره وسوت لنـآ فلم هندي،

آميه عندهـآ سيـآسه انها تـييب خّـوآت ، يعني تطلب 2 خوآت عشـآن المشـآكل ووو .. ، والضرآيب بين البشـآكير

لكـن آخر 2 يـونـآ خوآت ولآجنهن خوآت ، بدينـآ آنشك وجيكـنآ ع جوآزهن اذا هن خوات ولآ ، كلـهن يتنـآجرن ومـآيتعـآونن مع بع

[مزن هتان]

لما اللبانه تلصق عـ العباه و الا الشيله، قبل كنا نرش بف باف
بس عقب اطورنا نفرك عليها مكعب ثلج تيبس اللبانه و تتكسر =)

الفريزر اهون بعد ماكو تعب :fa42:

[سبيجة]

السلام عليكم


ويني عن هالموضوع الغاوي :fa34:


انا خبرتي مع البشاكير بدأت من فترة بسيطه جداً ..وطبيعتي ما اعرف اعصب .. ولو عصبت محد ياخذ عليه :argue:


امس البشكاره نست تحط ملح أو فلفل في الغداء .. وكنت وايد يوعانه .. قلت لازم انازعها شو هالاكل التهم :k_mad_argue: يوم زقرتها قلت لها .. ليش ما حطيتي ملح وفلفل ؟؟؟ جان تقول حطيت بس مب وايد ...قلت لها : من باجر حطي اكثر لأنه الاكل تهم ومووول ماله طعم ... :mf_leia: وتموا يطالعوني جييه :crazy: وين اللي محرج واللي بيهزب .... بصراحه ما اعرف اهزب وتغمضني ... احس انهم بعيد عن اهلهم ..وبعد نعصب عليهم ...:ohboy:

بشكارتي فيلبينيه ..وكبيره وكانت مشتغله في الكويت ..وهي وحده للتنظيف والطبخ .. بس العشاء انا دايما اسويه ... :whistling:طبعا اشياء خفيفه ..

وعندي الغساله اللي تنشف ..من خبرتي ... هيه زينه بس لازم ما تكون عندكم كميه كبيره والابتاخذ وقت طويل ..بس عندي استفسار ؟؟؟!! شو عن كنادير الرياييل ..انا لاحظت انه الكنادير العربيه تخترب منها .. مكان الفروخه يتم جيه ناقز :k_puppyeyes:ما اعرف كيف اشرح ... حتى اخترت بدون كوي ..وتم نفس الشيء..

[حلم الطفوله]

سبيجه ....ما شاء الله عليج مستويه ست بيت شطوره


الشغالات مهما فاتنتي من اليوم لباجر ...القجه بعدها قجه ...مهما عصبتي وإلا تحرطمتي عليها!!


بالنسبه للغساله إلي تنشف ومن خبرتي فيها لاحظت انه الكنادير ( يكرن = يقصرن ) من البخار الحار فيها

وايد عانينا من هالسالفه واخواني كل مره يتحرطمون على كناديرهم

فالغساله العاديه وايد أهون والمصبغه ( الدوبي ) أحسن مكان لغسيل كنادير الرياييل ففكي راسج من الصدعه

صح سبيجه ... لثياب يوم بتغسلينهم ...اغسليهن مجلوبات أحسن عشان ما تبهت ألوانهن

حسيت إني وايد رمست بس إن شاء الله فدتج بشيء

[مــهــابه]

^
عآشت حّلوم

بس ع سآلفه كنآدير الريآييل ممكن تشرحين آكثر ؟
شو يعني تتكرسف وتستوي قصيره ومآدري شو ؟

آحنا يكّوونهن ف الدوبي لـكن كـ غسيل آظن ف البيت


آكره شغله عندي ف الحيآه الكوآي والغسيل


قولولي آغسلي صحون ، حمامات " عزكم الله ، آطبخي ، يودي يهال ، بسوي كل شي ><


إلا هالشغلتين فـاشله فييييييهن من الخاطر =(


بس اللي آعرفه يعني عشآن الملابس مآتصبغ ، لآزم اغسل البيض روحهن والملونات روحهن صّح ؟

وشسمه في ملآبس مب لآزم احطهن ف الغسآله بس آحطهن ف المآي وآحط دآوني وجيه صح ولآ ؟

[سبيجة]

صباح الخير


اختي الغاليه حلم ,,, تدرين انا سمعت شكاوي وايد على الكنادير ... وعلى الخاياط اللي سواهن قصار :a018: الحين عرفت السبب ,,, وعلى فكره ترى اغسلهن مجلوبات .... والغساله اللي خذتها نفسها عند اختي ..واختي مول ما تشتكي من شيء ...وهي LG بس انا اللي خذتها الحجم الصغير ... تصدقين احس الحين اني خذتها على الفاضي ...لأنه الكنادير قامت البشكارة تغسلهم بديها ... ولبسي انا بديات ..أو جينزات أو حتى مخاوير أو جلابيات ما تنفع في هالغساله ... :d010:يا خسارة الفلوس ... لازم اسأل البشكاره اذا تستعملها أو لا .. لأنه في هالحاله .. بشتري العاديه وافك عمري من الصدعه ..وهالغساله بعطيها أي حد ..والله حرام ...


الغاليه ..مهابه .. الكنادير ما تتقرفص ..لاااا.. يس جيه تحسين الخياطه تطلع من الاطراف ...وتقصر ... وجيه مكان العقم اللي في النص ما يكون تام سيده .. :bye2: وسلمي على الكنادير بعد غسلتين ..

[طير الحب]

السلام عليكم....


بالنسبة للملابس الشتوية...كيف نغسلها...


والخوار بعد لاني مالبس وايد الا ببيت اهله...والاحظ انه بالغساله تخترب واكرها واعقها.



والعبي الي فيها شغل بلون فاتح تغسونها كيف؟؟وبشو غير شامبو العبي

[حلم الطفوله]

مساء الورد يا طير الحب


والله من خلاااال تجاربنا البسيطه


الملابس الشتويه من صوف وغيره لاااااااااااااازم (لاندري )......... ما ينفع وياهن إلا البخار


المخاوير ... اغسليهن بدون غساله ......بطشت فيه ماي وشامبو بس


العبي بعد لا تحطينها بالغساله لأنهن بسرعه يكرن ويختربن وخصوصا إذا كان فيهن شغل

فالأفضل تغسلينهن بطشت مع شامبو العبي ( نحن نستعمل شامبو عبي بدبه سودا ما يحضرني اسمه الحين ) بتشوفينه صوب كومفرت وربعه بالجمعيه

وأهم شي كواية البخار للعبي .... اشتريها وبترتاحين وااااايد

إن شاء الله أكون فدتج

[طير الحب]

صباح الورد حلم....

يا اختي الخدامة استغربت غيرت سستم الغسيل عندها..ثياب علايه قامت تخترب...قلت لها كله غسيل يد...وملابس حور نفس الشيء الا البيجامات في الغساله...


مشكلتي ما اعرف اعطي الخدم اوردورات احسها فقيره...

[غرور أنثى]

موضوع مفيد يستأهل الطرح