المساعد الشخصي الرقمي

مشاهدة النسخة كاملة : صــيــف ٢٠١٠



ذنـيـنـي
03-03-10 ||, 08:52 PM
السلام عليكم و رحمه الله و بركاته



مثل ما تعودنا في كل عام قبل الصيف,,


نبغي نعرف شو مخططاتكم للاجازة ؟؟
الي بيسافر لخارج الدولة وين بيسير ؟؟
و الي بيتم في البلاد شو ناوي يسوي ؟؟

في انتظاركم اعزائي :m_mar7ba:

مــهــابه
03-03-10 ||, 09:21 PM
وعـليكم السـلآم والرحمه

آممم هالصــيف مـآ آعـتقد آني بسـآفر ، لآني قـّررت آقدم تخرجي وآخليه الكورس اليـآي ف لآزم آخذ صـيفي


لذلك بنصّيف فـ بلآدنـآ ..




وآنت ع ويـن نـآوي ؟!

فرفوش
03-03-10 ||, 09:48 PM
مرحبااااااااا حبوبي الغااااالي أن شاء الله ها الصيف ناوي اسير القمر والا كوكب زحل خخخخخخ اعرف دمي ثجيل - اذا الله حيانا فناوي اسير اوروبا الى أسبانيا بس يبالنا انخطط وانعرف اي المناطق انزورها وكم فتره نبقى والمسافه بين الامارات واسبانيا واي طياره ويقولون كل ما حجزت بكيييييير كلما الاسعار كانت زوووووووووت والسموحه

ذنـيـنـي
03-03-10 ||, 09:59 PM
حيا الله فرفروش

نورت الموضوع بوجودك
اسبانيا وايد حلوة,, اخويه سارلها من فتره و وااايد مستانس عليها (اخويه من عشاق التراث الاندلسي و زيارته كانت بشكل اساسي لزيارة ما تبقى من حضارة الاندلس)

عاد عطنا المستجدات اول باول عشان نستفيد

ذنـيـنـي
03-03-10 ||, 10:19 PM
مهابه

طبعا التخرج اهم من السفر و الله يوفقج و يسهل امورج :fa42:


انا اذا شاء الرحمن بسير اوروبا ويا الاشقاء الاربعه و تاج راسنا الوالده ربي يحفظها
و بعد قوم خالتي بييون ويانا

ان شاء الله بنسير ٢١ يوم منها ١٠ ايام في جنيف و ٥ ايام في باريس و ٥ ايام في الوسط ما تحدد مصيرها الى الان لول

هالمره انا الارباب,, من الحين شرطت عليهم, سياره ما بنأجر لأنه جنيف ما يبالها سيارة و باركاتها واااااايد غالية
وايد وايد غالية, اذكر العام لأول يوم سرت كنا ندفع ما يقارب ٦٠ يورو يوميا بس للباركات !! و احسبيها على ٣ سيارات
الـ ٦٠ يورو = ٣٠٠ درهم يعني ٩٠٠ درهم فاليوم, يعني ٩٠٠٠ درهم في العشر ايام خخخخ :wacko:
طبعا غير ايجار السيارات و غير البترول,, في المقابل قلتلهم نبغي نجرب القطارات و الباصات لأنه سويسرا عندهم تذكرة تشمل القطارات و الباصات و الباصات البحرية و سعرها جدا معقول, اذكر الوالده و اخويه كانوا هناك العام و خذوا عنهم ما يساوي ١٥٠٠ درهم عن كل تذكره و الاستخدام غير محدود :fa42:

الشرط الثاني كان,, ما نبغي نسير هناك و ٢٠ جدر ويانا و يمنع تهريب المالح و السحناه منعا بااااتا :a046:
مثل يوم سرنا النمسا, انصدمت يوم رديت الفندق و حصلت الجماعه مسوين عيش و مالح :whistling: قلت للوالده صدق انج بنت سمّاج, ما تيوزين عن هالسوالف :heart:

المزوحي
03-03-10 ||, 10:22 PM
تسلم ذنيني على التذكير، ومثل ماتعودنا بالمخططات ، ولو تبون مساعده إنه نبحث في النت عسب الواحد ياخذ فكره

مب مشكله ... أنا ودي أزور أسبانيا، أما عن رحلة السنة للحين مافي تخطيط

مجموعة إنسان
03-03-10 ||, 11:34 PM
بعد السمر ترييننج وسط الفرن والستانداات والحديد بنشووف شو الترتييب !!

يمكن بنروح تركيا او السياحه في البلاد حلوة بعد هههه

على حسب المادية

حلم الطفوله
03-03-10 ||, 11:50 PM
السلام عليكم


السفر في الصيف .... وما أدراك ما يعني السفر لحلم وخصوصا بأول يوم بالإجازه


السنه جدامي اختيارين إن الله راد ورحنا

1- ألمانيا وضواحيها
2- أستراليا وكم يوم بتايلند او سنغافوره

بشو تنصحوني من حيث الراحه والاستجمام والتسوق !!! اهم شيء التسوق

حلم الطفوله
03-03-10 ||, 11:53 PM
ذنيني !!! أنا أكره شيء عندي أغراض الوالده بالسفر

جدر العيش وملحقاته

السحناه وقواطي التونه !!

كله نتحرطم أنا وأخوي على أغراضها ومن نوصل وناكل منتجات أغراضها ننسى كل هالتحرطيم

الله يخليهن يارب

مايهزك ريح
04-03-10 ||, 08:47 AM
لين الحين الجماعه مصرين على امريكا ونسير ثلاث عوايل هالمره ..
اذا ما ظبط انا خاطري ارد برلين ...
مادري السواقه فألمانيا غير عن باريس وسويسرا وامريكا .. راحة بال .. بصراحه لا ردارات ولا حشره ..
بنشوف لين الصيف ^_^!!

تحفه
04-03-10 ||, 09:11 AM
انا بعد فتره بسير لندن + فرنسا ... وفي الصيف مراكش + جنوب فرنسا + كان!

خليجيه
04-03-10 ||, 09:22 AM
حلم الطفوله.... صباح الخير :k_smile2:

إذا حابه اتسيرين استراليا تراج ما بتندمين وخاصه انه الصيف عندهم بااارد وغير الطبيعه الخلابه.

بالنسبه للتسوق واللي احبه وايد :fa34: سنغفوره ما اتقصر، والماركات اصليه. والمراكز عدال بعض. وبعد بلادهم حلوه بس فيه شوية حر ولغط

المزوحي
04-03-10 ||, 02:52 PM
حلم الطفوله يعني إما تسيرون أوربا

أو استراليا وعقب شرق آسيا


بس وين ماسرتي قبل ؟؟؟ وإلا زايره الاماكن كلها ؟

مــهــابه
06-03-10 ||, 12:31 AM
ذنيــني :

الشـرط الثـآني لآآآزم وضــروووووري لوول ..

تـرآ الخير عندنـآ وعندك ..


حلـم :


أسـتراليــا حلــوووه ف الصـيف بس مشكلـتهــا بعيييييييييده
آحنـا يوم رحنــاها ف ممم 2002 او 2003 مـا ادري روحنــا لهـــا اسبوع ورجعـنا ع مـاليــزيـا اسبــوع

لكن هي حلـووه


ألمـانيــا بعد حلـوه لكن العـرب كلهــم

وآحنـا البنات في كل مكــان بنتسوق ، حتى لو بقعه السوق فيـهــا ماينفع ، بنحصل شي وبنشتريه =p


.



.


اللي فـ البيـت يبـون يروحـون سـويسـرا ، انـا ختيه حجزتني من الحين عسب ايود عـيالها لوول ، تبغي تسـافر هي وريلهــا بس

والضحيه انـــا

خيال الحب
06-03-10 ||, 03:47 AM
لي رجعــه..

على فكره الي يبي يروح استراليا.. لا تشلون وياكم اي اكــل .. ممنوع تدخلون اي نوع من الاكل بالشنطه@_@

حلم الطفوله
06-03-10 ||, 05:01 PM
مساء الطيبه

خليجية ..مشكوره حبيبتي ..تسلمين

المزوحي ... انا ودي اروح استراليا لأني ما جد سرتلها ...لكن الوالده ما فيها حيل عالرحله وامعارضه الموضوع ،بس دام فيه ترانزيت بقنعها

مهابه ... هيه والله بعيده هالبقعه !!


خيال الحب .... لا تقوووووول !!! الحين كيف بنقنع الحريم إنه الأكل ممنوع !!! ما بيصبرن عن قواطي التونه والجاشع وجبن شيدر !!

اتريا رجعتك خيال ...لتوافيني بالتفاصيل

خيال الحب
06-03-10 ||, 07:51 PM
حلم الطفوله هههههههههه استراليا تمنع المالح والسحناة لووول

ممنوع تدخلون اي شي اي نوع من انواع الاطعمه والبهارات

كلها راح تحصلونهاا هناك في السوبر ماركت

وممنوع تشيلون معاكم اكثر من 10 الاف دولار استرالي للشخص الواحد .. يعني لو عندكم اكثر وزعوهن على الاشخاص البالغين الي وياكم

ولما ترجعون البلاد وزن الشنط المسموح فيها 30 كيلوجرام لو كانت اكثر راح ياخرون اجراءات السفر لين ما تخفون الشنط ل30 كيلوجرام

وبخصوص حقيبة اليد ما يزيد عن 5 كيلوجرام.. ولو زادت كم من كيلو مب مشكله

وبخصوص التكاسي .. في مكاتب عربيه هناك تعاملو معاهم بيكون لكم ارخص من الفنادق الي تاخذونها من الفندق ولو تعرفون لسوالف الباص يكون وايد احسن لكم واسهل

المكاتب السياحيه اسمهم

في فندق انا هوتيل راح تحصلون مكتب سياحي عربي اسمه لاوند للسياحه والثاني مكتب الواحة للسياحه

انا رحت القولد كوست .. الصراحه وايد حلووه

فيها مولات كثيره

استراليا فيير
باسفك فيير
برادايس سنتر
شيفرون سنتر

وبخصوص المطاعم مانصحكم تسيرون المطاعم العربيه وايد غاليييييييييييييييييييييي ييييييييييييه

عليكم بماكدونالد هههههههههه

وبخصوص الفنادق

انا سكنت في فندق بينينسولا .. على البحر

غرفتين ومطبخ وعزكم الله حمامين وصاله وطاولة طعام كبيره.. انا الصراحه انصدمت من مبلغ الشقه.. 100 دولار باليوم:thumbup1:يعني والله بلاش

وفي فنادق كثيره

كراون بلازا
هوليدي ان

وغيرهم من الفنادق الحلوه

وبخصوص الاماكن السياحيه

السي وورد
موفي وورد
دريم وورد
وكل حديقه يبيلها يوم كامل

سعر التذاكر 180 دولار استرالي للشخص ..

وبخصوص الاماكن الطبيعيه

برادايس كنتري
فيها شلالات وبحيرات وايد حلوه

وعندكم بعد
توييد هييد بعد طبيعه حلووه


وسامحوني ع الاطاله:mf_turban:

حلم الطفوله
08-03-10 ||, 01:17 AM
تسلم خيال على هالمعلومات التفصيليه ...بسويلها حفظ وكوبي


مشكووور

المنصوري
08-03-10 ||, 01:25 AM
اممم ما فيه أحلى عن اوروبا بعد الإمارات أكييييييييييد

عفاريتووو
08-03-10 ||, 08:35 AM
^ صح كلامك :thumbup1:

ذنـيـنـي
15-03-10 ||, 08:35 PM
الخمس ايام الضايعة قررنا انه نضيفها على جنيف, يعني ١٥ يوم جنيف و خمس ايام باريس

طبعا من جنيف بنتحرك صوب المناطق الاخرى مثل لوزان و لوزيرن و انترلاكن و شامونيه و غيرها

المزوحي
15-03-10 ||, 09:31 PM
ذنيني من يومين ربيعي يخطط حق السفر، طبعا مع الاهل ويهال

بس الجدول ماترتب عدل، بس الخطط ألمانيا ، زيلامسي ، انترلاكن ، بيتنبيرج ..

مايهزك ريح
16-03-10 ||, 09:33 AM
ناصر .. جنيف ممله وعاده اتكون حاره..
انا اشوف لوزان + منترو احلى بوايد انك اتم فيهن وبينهم منطقه اسمها vevey
بعد اذا عندكم وقت سيروا لوجانو lugano .. صدق فنانه وجريبه وايد على ايطاليا .. 70 كيلو توصل ميلان ..
وسوق سياره ابرك لك .. صح بتخسر .. بس تمشي على كيفك ..

ذنـيـنـي
16-03-10 ||, 03:28 PM
المشكلة اني تقريبا الوحيد الي بيسوق
الباقين ما منهم فايدة و ما تقدر تعتمد عليهم في شي :(

نحن بنكون ١٥ شخص تقريبا
======

و اذا عن الملل, ما عليك
ام خالد مسوية جدول مرتب بحيث انه كل يوم نسير رحله الى خارج جنيف, يعني جلوسنا الفعلي في جنيف بيكون اقل من ٤-٥ ايام,, و غير هذا ياخويه, احس مووول مالي بارض اسوق هناك

مايهزك ريح
17-03-10 ||, 10:25 AM
بالنسبه لي كانت السواقه متعه في سويسرا وين ما اتصد اتشوف مناظر ولا اروع ..
عشان جيه كنت كله اسوق وما أمل ..
بس اذا العدد وايد وانته بس اتسوق ما ينفع !

إلا اذا بتأجر باص خخخخخخخخ

بس اذا على الحواطه .. لوزان تبعد 53 كيلو من جنيف .. وبين لوزان وvevey تقريبا 3 كيلو و منترو تبعد 22 عن لوزان ..
الأماكن كلها قريبه من بعض .. واذا تحبون الأرياف .. interlaken فنانه بس هيه في النص بين زيورخ و جنيف ..

ان شاء الله تستانسون في الرحله ..

اذا بتسيرون على طيران الإتحاد دايركت جنيف ..حجزوا من الحين ... عشان هالخط وايد عليه ظغط !

المزوحي
17-03-10 ||, 02:33 PM
ما احس إنه السواقه ممله ذنيني ...

بس رييعي العام يوم سار توهق لأنه وايدين وهو كان روحه ، لو حد يسوق بالتناوب زين

حلم الطفوله
19-03-10 ||, 06:13 PM
السلام عليكم


بغيت خبراتكم بشقق تايلند الفندقيه

أبغي مكان زين ونظيف لعايله


أريد هالمساعده هاليومين بلييييز

المزوحي
19-03-10 ||, 09:22 PM
حلم الطفوله الاهل سكنوا في شقق فندقيه ، الماريوت

اظن هذا هو ، لأني انا ماكنت وياهم

http://www.marriott.com/hotels/hotel-photos/bkker-mayfair-bangkok-marriott-executive-apartments/

أنامل قلب
19-03-10 ||, 10:06 PM
أبـــي أســـــااااااافر !.

حلم الطفوله
19-03-10 ||, 11:14 PM
تسلم المزوحي ...بس ما عندك فكره عن أسعارهم ؟

المزوحي
20-03-10 ||, 09:08 AM
لا حلم ماعندي فكره، بس بدور عن الاسعار

المزوحي
20-03-10 ||, 09:17 AM
شوفي هذا الموقع يمكن يساعدج


http://www.tripadvisor.com/Hotel_Review-g293916-d299780-Reviews-Mayfair_Marriott_Bangkok_Executive_Apartments_and_ Hotel-Bangkok.html

ذنـيـنـي
11-05-10 ||, 10:18 PM
للرفع

اشوفكم صخيتوا عن الموضوع
ولا ما عندكم نية تسوون شي فالصيف

=========

الحمدلله البارحه قدمت اجازتي و طلعت التواريخ مضبوطه
طيارتنا بتكون يوم الخميس فليل تاريخ ١٥-٧ يعني الصبح بداوم عادي لأنه سفري فليل فـ قدمت اجازتي على اساس انها بتبدأ من تاريخ ١٧-٧ يوم الاحد
و الرجوع نفس الشي بعد, بيكون رجوعي يوم الخميس ٥-٨ و برتاح يوم الجمعة و السبت و بباشر العمل يوم الاحد

يعني وفرت يومين من رصيدي السنوي و كسبت يومين اجازة فوق اجازتي, صح انهم ويك اند بس بعد المهم اني ما اسير الدوام

طفلة من هذا الزمان
12-05-10 ||, 12:18 AM
خطط السفر كثيرة بس انا ماا بصدق حد لين اشووف تذكرتي بيدي ..

لين الحين ترتبت الخطة وخذنا الباكج لماليزيــا .. بس الاجازات مشكلة !! اللي عندي اقووله عطوك اجاازة يقولي ما يخصج المهم بتسااافرين ؟!!
هالجملة شووو افهم منهاا انااا ... :pullhair:

الرحلـة بتبدا من 10-7 لين 20 -7 >> قبل السفر بيومين عندنا عرس و عقب السفر بيومين عندنا عرس :fa46:
.
.

في الانتظــار لين شهر 7 .. :glare:

حلم الطفوله
12-05-10 ||, 12:20 AM
طفله ..حالي من حالج !! حتى نحن يقولون غيرولنا الوجهه لماليزيا

بس بعد ما بصدق !!

مايهزك ريح
12-05-10 ||, 08:37 AM
انا ان شاء الله .. بسافر آخر الشهر .. بسير مكان محد يتوقعه .. لا من ربعي .. ولا حتى انتوا اللي قي المنتدى ..
مكان يديد ..

توقعوا وين
.
.




.
.
.
.
.
.


.
.
.
بسير جنوب افريقيا .. cape town لمده اسبوع .. كشته وبرد ..
وفي الصيف .. بعدني ما قررت .. بس الأهل سايرين كلهم نيويورك .. ^_^!!

شوق القلوب
12-05-10 ||, 01:00 PM
والله يمدحونها جنوب افريقيا... عاد جان اخرت شوي ع الاقل تحضر الافتتاح...

احيد وحده من ربعي ريلها كان يدرس هناك.. و كانت اتسيرله في الاجازات... اتقول انها حلوه...

..

يالله ان شاء الله تستانس.. حلو الواحد يجرب اماكن يديده في السفر.. :)

مايهزك ريح
12-05-10 ||, 02:51 PM
هيه والله .. مكان يديد .. لازم اغير شويه ..
وعلى طاري الإفتتاح .. انا ساير ويا حد وما عنده اجازه غير هالأسبوع .. اللي هو قبل الإفتتاح .. فما شي فايده !!

المزوحي
12-05-10 ||, 03:09 PM
مايهزك ريح احلى شي إنه الواحد يجرب بلدان ثانيه ، بس اتحمل عن يقولون نغلق المطار بسبب سحابة الرماد البركاني

الله يحفظكم ( تابع الاخبار )

الـيـاه
12-05-10 ||, 05:12 PM
مايهزك ريح : لوول

ليش محد يتوقع انا عقب امتحاناتي بسير صوب افريقيا :fa42:وبالتحديد جزيره Mauritius حق 5 ايام ( صراحه من الصور حسيت انها تجنن مثل سيشل ) وياريت احصل وقت ويخلونا نسير جنوب افريقيا لانه تبعد عنها بـ ساعتين

بعدين برجع وبسير لندن وبعدين امريكا .. بس امريكا لين الحين 70%

الموز
12-05-10 ||, 09:08 PM
ماشاء الله عليكم وعلى خطط 2010 ماعندنا نيه وإلا بخبركم وين وجهتنا

فرفوش
13-05-10 ||, 02:32 AM
أغريتوني بكلامكم وتوهتوني ما اعرف اي بقعه اسير لها - لو تحطون صور بس عشان اعرف ارسى على بر

مايهزك ريح
13-05-10 ||, 11:08 AM
مرحبا اخواني ..

المزوحي .. بتابع الأخبار اول بأول ما فينا نعلق هناك مديري بينتحر ^_^!!

الياه .. انا دايما اسير امريكا او اوروبا .. اول ما قلت حق ربعي جنوب اقريقيا بطلوا عيونهم ..وقالولي ..وين تبا ..

بس وايدين مدحوا المكان .. عشان جيه اتشجعت .. فيها وايد اماكن سياحيه ويمكن ما اغطيهن في اسبوع بس بحاول ..

فرفوش .. ان شاء الله .. بحط لك صور .. يوم برد ^_^

دموع قلم
13-05-10 ||, 12:56 PM
أبـــي أســـــااااااافر !.



وين خاطرج اتسيرين ؟
^_^

المزوحي
13-05-10 ||, 03:30 PM
مايهزك ريح إن شاء الله تتوفق في الرحله ، وماعليك منهم هاييل اللي استغربوا، بيقلدونك باجر وبيقولون بنسير هناك

فرفوش
13-05-10 ||, 09:00 PM
انا ان شاء الله .. بسافر آخر الشهر .. بسير مكان محد يتوقعه .. لا من ربعي .. ولا حتى انتوا اللي قي المنتدى ..
مكان يديد ..

توقعوا وين
.
.




.
.
.
.
.
.


.
.
.
بسير جنوب افريقيا .. cape town لمده اسبوع .. كشته وبرد ..
وفي الصيف .. بعدني ما قررت .. بس الأهل سايرين كلهم نيويورك .. ^_^!!


والله يمدحونها جنوب افريقيا... عاد جان اخرت شوي ع الاقل تحضر الافتتاح...

احيد وحده من ربعي ريلها كان يدرس هناك.. و كانت اتسيرله في الاجازات... اتقول انها حلوه...

..

يالله ان شاء الله تستانس.. حلو الواحد يجرب اماكن يديده في السفر.. :)


سمعت أن من يفكر يسير جنوب افريقيا أول بادي يطّعم! ما ادري اذا الكلام صحيح

عهد الوداع
15-05-10 ||, 01:42 AM
ان شاء الله بنسير ماليزيا ومقررييين نمر على تايلند بس ماعرف اذا المظاهرات بتوقف ولا

قلوب دبي
15-05-10 ||, 01:21 PM
ان شاء الله المانيا كالعاده ومن هناك ننطلق حولها وحواليها

حلم انصحج بآلمانيا ^ـ^

مزن هتان
15-05-10 ||, 09:28 PM
باجر بـ شوف اذا أقدر اطلع اجازه اسبوعين عالاقل
و عليه راح نحدد وجهتنا بـ إذن الله تعالى

فرفوش
23-05-10 ||, 03:45 PM
تايلند ما أشجع السفر في هذا الموسم وخاصة أن وزارة الخارجيه جددت تنبيهها ونصحها بعدم السفر لتايلند
^_^
تايلند هالسنه مالها نصيب

مايهزك ريح
23-05-10 ||, 05:56 PM
مراسلكم مايد من جنوب افريقيا - كيب تاون
المكان وايد حلو والجو رهيب درجة الحراره ١٨
وايد اماكن فنانه فيها اليوم سرنا Victoria wharf
كله مطاعم ويلسات على البحر ومول
يوم برد ان شاء الله بحطلكم الصور

شوق القلوب
23-05-10 ||, 10:56 PM
ماشاء الله ...

صراحه كلامك يشجع الواحد...

ان شاء الله تستانس.. و نتريا الصور :)

مايهزك ريح
24-05-10 ||, 11:01 AM
صراحه المكان وايد حلو والمدينه أمان البارحه رادين
الفندق متأخر
واليوم الصبح صاب مطر ودرجة للحراره واصله ١٤
احس أني ما أبا ارد أبا أتم اشويه زياده
صورت البارحه الفليل كمن صوره ل
victoria wharf
واليوم بسير اتمشى بدون الكام

المزوحي
24-05-10 ||, 04:17 PM
ماشاء الله عليك لو خذيت هل الواحات وياك ،، اكيد نحن نتريا الصور ،،

جماعه محد بيتشجع يسير السنه هناك ؟

حلم الطفوله
24-05-10 ||, 04:37 PM
تروح وترد بالسلامه أخوي

اللهم لا حسد اللهم لا حسد ...عيني عليك بارده

بس !!

إنته كم مره تاخذ أجازه بالسنه :)

دمعة شوق
24-05-10 ||, 08:16 PM
حمستـنـآ يـ مآيـد
ترد بآلسـلامه آن شآءالله
وبنتظآر تقريرك :)

فرفوش
24-05-10 ||, 09:57 PM
أخويه مايد
واحة السياحه والسفر تنتظر موضوع خاص منك وعن رحلتك
وخل الكاميره ملازمتنك دايما في رحلتك
^_~
أترد بالسلامه والوناسه ان شاء الله
ترى جونا حاار جدا
حشى حمام سونا

العجيبة
25-05-10 ||, 02:00 AM
تروح وترد بالسلامه أخوي

اللهم لا حسد اللهم لا حسد ...عيني عليك بارده

بس !!

إنته كم مره تاخذ أجازه بالسنه :)

هههههه والله انج سوالف .... هو ما يشتغل مدرّس هذااا هو الفرق يا أبلـة ..

بانتظـار صورك يا ماااايد ..... وبالسلامة ان شاء الله

مايهزك ريح
25-05-10 ||, 11:20 AM
الله يسلمكم من الشر ..
الجو وايد حلو .. والمنطقه امان .. تعالوا وايد عندهم اماكن حلوه .. رحلات بحريه .. وسفاري وكشتات ..
صرف العمله .. 1.82
يعني الـ100 درهم تستوي 182 راند ( عملة جنوب افريقيا الراند ..)
وتراه وايد مطاعم مكتوب عليهن اكل حلال يعني لا تحاتون اذا بتون ..
والفندق اللي نحنا فيه كله عنده سيرفس Shuttle لأي مكان تبون اتسيرون له ..
في منه ببلاش مال الفندق حق Victoria Wharf.. والباقي بفلوس بس رخيص .. مثال canal Walk

http://oasis.bindubai.com/bin/uploaded/5584bfb7a22ab42c.jpg

Victoria Wharf

دموع قلم
26-05-10 ||, 01:45 AM
^

مـا شاء الله الجو شكله وااايد رهيب ,
وأصلا كلامك مايهزك ريح يحمس الواحد يسافر هناك ^^ ,


خااااطري أسافر ,
أي مكان :fa52:

مايهزك ريح
26-05-10 ||, 09:19 AM
مرحبا اختي دموع قلم
أنا ارشح هالمكان للزياره
بس نحنا يايين اسبوع مول ما يكفي
يبالها على الاقل أسبوعين
للي يبا يغطي كل الاماكن
وعلى فكره هالمنطقه عكسنا
يعني نحنا عندنا صيف
هم عندهم شتا
عشان جيه بارده

دموع قلم
26-05-10 ||, 11:56 AM
^

ترا نادر أسمع حد يسير هالأماكن يعني أفريقيا ,
بس حلو خبرتنا عنه يبالي أضيف هالمنطقة للستة أمنياتي :tounge:

إن شاء تستانس وترد بالسلامة ياارب ,
تراني متحمسسسسة أشوف الصور , :laugh:

مايهزك ريح
27-05-10 ||, 09:36 AM
البارحه سرنا رحله غطينا المنطقه كلها من ٩ الصبح
رادين ٥:٣٠ العصر
الجايد قالنا خلاص خلصتوا المدينه كلها ما في شي زياده اتشوفونه

فرفوش
29-05-10 ||, 06:59 PM
أنزين شو عن أسعار السفر هذه السنه












يثبت حتى ظهور شهر رمضان المبارك

عهد الوداع
30-05-10 ||, 02:21 AM
ما توقعت ا فريقيا تكوون حلوه للسياحه
مايد لا تبخل علينا بالصور ومنك نستفيد ونااخذ معلوماااااااااااات ^^

مناير
09-06-10 ||, 07:38 PM
جنوب افريقيا من احلى الاماكن

أخويه مايهزك ريح: سرت راس الرجاء الصالح: سبحان الله لو مديت نظرك على طول الماي بتلاحظ الفرق بين المحيط الهندي والمحيط الاطلنطي والله
جنه خط بس لازم الواحد يسوي شرات مايقوله المشرف مال الرحله...
مشكلتها جنوب افريقيا ماشي امان حتى العاصمه جوهانسبرغ يعني عقب المغرب ماشي ظهره الا اذا كنت مع شله..
سرتلها السنه اللي طافت ويلست فيها 3 اسابيع ... والمحميه مالهم فظيعه عندي وايد صور من هالرحله...

طير الغرام
19-06-10 ||, 12:45 AM
http://oasis.bindubai.com/bin/uploaded/1184_01253720525.gif (http://oasis.bindubai.com/bin/uploaded/1184_01253720525.gif)


إن شاءالله سفرتنــا بعد كمن يــوم لـ بريطانيــا تقريبــاً ٢٠ يوم
بالتحــديد اسكوتلنــدا - جلاسكــو ومناطــق جريبـــه منهــا + لنــدن

بنحضــر تخـــرج خالتيــه :k_smartass: فـ جلاسكــو وبعــدين بنغيـّر جــو وبنتكشــت



http://oasis.bindubai.com/bin/uploaded/1184_11253720525.gif (http://oasis.bindubai.com/bin/uploaded/1184_11253720525.gif)

ذهب
19-06-10 ||, 10:51 AM
السلام عليكم صراحه انا ابا فيينا انشالله بتكون سفرتنا مرتبه والاكل وايد في اوروبا عموما ان فيها وايد مسلمين مثل الاتراك واكلهم حلال يعني تشترون الدياي ذبح اسلامي عاد مب ديايه ذبيحه من كبرها وحليلهم دياينا عصاقل

مجموعة إنسان
19-06-10 ||, 04:14 PM
اللي عندهم خبرة تايلاند
وبالتحديد بتايا

عطونا كم معلومه للفنادق والرحلات
بسسسرعه شوي لو سمحتوا

مــهــابه
26-06-10 ||, 01:30 AM
وآخيراً لي عندنآ آتفقوا على شي وحجزوا ..

آبويه بيروح الروحه " تايلند " = > هذآ وهو يذمها وعلى قولته مب حلووه ..


الآسبوع مب هذآ لي بعده بيروحون خوآتي الـ 3 هم وريآيلهم وعيآلهم + عـموه وعيـآلها + مرت عمي وبنآت عمي " لندن "


آحنا بعد 15 -7 بنروح مادري أي تاريخ بالظبط " ميونيخ " 5 آيام ، زلآنمسي 5 آيام ، وفينا 5 آيام .. آحنا + واخويه + وآخويه 2 وعيـآله ..

بس بنرد قبل رمضـان بـ يوم آ و يوم يومين آظن


كنـآ نبغي انروح كلنـا ربـاعه بس اجازه اخويه ماضبطت معـآهم ..

فرفوش
02-07-10 ||, 03:05 PM
وزارة الخارجية تلغي التنبيه من السفر إلى تايلند
حالة تايلند في هدوء ورجوع لأمورها الطبيعيه

ذنـيـنـي
10-07-10 ||, 05:41 PM
يوم الاربعاء ان شاء الله سفرنا
الي في خاطره شي لا يستحي و يقول

اخيرا بفتك من ويه الدوام

فرفوش
11-07-10 ||, 12:05 AM
أتسير وترجع بالسلامة
بس لا تنسى كيمرتك وصور عن البلاد ألي سايرلها
وواحة السفر تتريأ موضوع يديد عن المكان المسافر فيه
سفر سياحي وسعيد للكل في صيف 2010

دمعة شوق
11-07-10 ||, 10:05 AM
تروح وترد بآلسـلآمـه يـ ذنيني
:)

ذنـيـنـي
11-07-10 ||, 10:21 AM
الكاميرا بتركب الطيارة قبلي طال عمرك


دمعة شوق
الله يسلمج

مــهــابه
11-07-10 ||, 03:38 PM
^
بالسلآمه ان شاء الله ..

بس لآتنسوون تسجلون ف " تواجدي " ..


آحنا سآفر الوالد تـايلند وقـروب لندن روحو من اسبوع وبـاجر بـتروح ختيه ام عبدالله طيارتهم الصبح وختيه ام خليفه بالثلاثا ان شاء الله ..


آحنا يوم الثلاثا بتاريخ 20 ان شاء الله وطيـارتنا ع العصر >< بنوووصل بليل مب شي

شوق القلوب
12-07-10 ||, 11:47 PM
اتسيرون و اتردون بالسلامه ان شاء الله...

..

و احنا علينا مراقبه الطيايير الصاعده و النازله

:4:

فرفوش
13-07-10 ||, 01:02 AM
^

آحنا يوم الثلاثا بتاريخ 20 ان شاء الله وطيـارتنا ع العصر >< بنوووصل بليل مب شي

لا تنسين الصور وموضوع في واحة السفر
^_^

مزن هتان
13-07-10 ||, 09:48 AM
تروحون و تردون بالسلامه و بالصور السنعه =)
و اجازه ممتعه و مفيده ان شاء الله

صريح
14-07-10 ||, 12:35 AM
http://img695.imageshack.us/img695/4951/dsc01555copy.jpg

شوق القلوب
14-07-10 ||, 12:41 AM
هذي مب جنها ليبانوووون ...؟؟؟

دمعة شوق
14-07-10 ||, 01:24 AM
صـريــح

إي لك العآآفيـه
شو بتعمـل بـي لبنآآن
:tongue:
بس بـدك تفرجينآآ وتعـزبنآآآ مسـلاً
:whistling:
~

مــهــابه
14-07-10 ||, 01:42 AM
فرفوش ، آم حمودي ، مزن :

الله يسلمكم

وآن شاء الله بنصوور وبنزل الصور =)

صريح
14-07-10 ||, 11:18 PM
ام حمد

هيه نعم هايدي دي لا بوون


سفره سريعه لقطـر و لبنان

كنا يالسين فالميلس و الكل ملان
قلنا بنسافر و الكل قال تم ، في نفس الوقت حجزنا التذاكر و الفنادق
و الطياره كانت عقب 4 ساعات هههه ، يا دووب ردينا البيوت و زهبنا الشنط
و ع المطار

شباب في رحلة و الامور طيبة ههه

دمعة شوق

كنت رايح اطمن على السوليدير و رجعت بس ههههه
:4:

شوق القلوب
15-07-10 ||, 12:02 AM
يا سلاااااااااام.... هالرحلات الحلوه ولا بلاش...

احب هالعزايم السريعه... اتكون لها متعه غيييييير

..

الحمد الله ع السلامه

المزوحي
15-07-10 ||, 03:40 PM
باجر بسافر لندن لمدة عشر ايام، مع إني ماحب لندن وماجدت زرتها، بس شو نسوي عروض مغريه والسكن ببلاش

طير الغرام
15-07-10 ||, 03:42 PM
^

اتــروح واتـــرد بـ الســــلامــه ياخويــه
وانجــــوي يور تايــــم =)

فرفوش
15-07-10 ||, 04:18 PM
باجر بسافر لندن لمدة عشر ايام، مع إني ماحب لندن وماجدت زرتها، بس شو نسوي عروض مغريه والسكن ببلاش
أكيد أمودي معاك الكاميرا
ونتريأ قصتك عشرة أيام في لندن وموضوع جديد
تسير وترد بالسلامه المزوحي

مزن هتان
15-07-10 ||, 04:50 PM
اذا ما تبي تسير أخوي مروان بسير عنك أنا،، عادي :ohboy:




http://oasis.bindubai.com/bin/uploaded/4474c3f039771087.jpg

فرفوش
16-07-10 ||, 04:37 PM
نصائح فرفوش لكل مسافر في صيف 2010:

1- تعبئة خدمة تواجدي وتصفح موقع وزارة خارجية الإمارات
2-لنكن صبورين فمفاجآت السفر كثيره ولنحاول أن لا نجعل يومنا كآبة وحزن ونبحث عن ما يسعدنا فاليوم سيمر وكل يوم هو يوم جديد
3-ليكن تعاملنا مع الغير بأبتسامة وترحيب (دائم مبتسمون - ويا غريب كن أديب)
4- ما ننسى دعاء السفر ودعاء دخول مكان الوجهه المطلوبه
5- يستحب أخذ الأدوية الأحتياطية كالزكام والحلق وغيرها فجو المكان مختلف
6-ما ننسى الرياضه في سفرنا فالرياضة تساعد في الراحه والطمأنينة (كالمشي)
7-لا ننسى الأكلات المفيدة وكثرة شرب الماء والبعد عن الأكلات الغير مذبوحه بالطريقه الإسلاميه
8-دائم المحافظه على بطاقة عنوان المكان المقيمون فيه
9-لا ننسى رقم سفارة الإمارات في المكان المقصود
10- لا نكون روتينيون في سفرنا حتى لا نشعر بالملل
11-لا ننسى بعد رجوعنا من سفرنا بطرح موضوع في واحة السفر والسياحه ليستفيد الغير ولنستمتع بالمكان

بنت الدلع
11-08-10 ||, 04:19 PM
مرحبااااااااااااااا
نحن سرنا سوريا وتركيا ولبناااااان :heart:
تمينا اسبوعين
وقبل كم يوم ردينا
ان شاء الله اذا صار براويكم الصور

صريح
وانا اقول
هالويه مب غريب علي:k_harhar1:

عفاريتووو
21-11-10 ||, 07:35 PM
عندكم فكره عن شقق زينة بلندن ؟
ياحبذا لو تكون صوب oxford, marylebone . o harley street
يعني هالاماكن

المزوحي
23-11-10 ||, 09:56 PM
اتمنى هالمواقع تفيدج

شقق مارلبون



http://www.presidentialapartments.co.uk/ar/home

شقق هارلي

http://www.harleystreetguide.co.uk/information/hotels/

احتمال تكون اغلاهم

وشوفي شقق الماي فير او ذا اسكوت جريب شارع اكسفورد

عفاريتووو
24-11-10 ||, 07:09 PM
شكرا المزوحي ^_^