شو أحلى أو أسوأ المواقف اللي مرت عليكم في السفر؟؟؟

[خليجيه]

أنا أحب أسمع سوالف السفر وااايد :2: وأشوف الصور:b015:



طبعا الصور موجوده والجماعه مب امقصرين في التقارير، بس شو عن المواقف اللي ما بتنسونها في السفر؟؟؟

[فرفوش]

ان شاء الله افا عليج بس هيدي عشان ازهب وابري القلم
شكلي بكتب وايد


راجعلج:h_daleel:

[الجديدة]

مراااااااااحب

بالنسبة لي السنة رحت لتايلند

وهذه أول مرة أروحها

رحت الجزر و قالوا لي اركبي على الفيل

قلت مستحيل و بعدين ركبته

يا ربي على الاحساس
خوف و فرح و احساس ما اعرف كيف اوصفه

بس ما اظني ارد و اركبه من جديد


الموقف الثاني
كنت في بانكوك ورحت السوق مع صديقتي
منا رايحين في تاكسي و على الرجعة ركبنا القطار

ربي لا يوريكم كيف كان زحمة و بقينا واقفين لين ما وصلنا
بصراحة اسوأ موقف لي اني اظل واقفة في زحمة ناس
ولا ما تعرفي وش يصير عليج بين هالناس

و حلفت ما اكررها و اطلع بروحي و اركب قطار

هذا اللي في بالي الحين

[طير الحب]

هههههههه


مرة بتركيا تحرونا تركية فكان تركي يكلمني فهمت طبعا بالاشارة انه حور مب راقده عدل في الجاري مالها


طبعا بكل تاكيد ما فهمت شيء من رمسته التركية الا انه في شيء غلط وياشر على حور ومعصب...


وفي موقف سخيف في ماليزيا صيحني بذكره بعدين

[فرفوش]

أذكر وانا اصغير في تركيا مع الاهل مسافرين سياحة وفي هذا اليوم كان أخوي مختفي وصار يوم عزاء وحزن سبحان الله كان هذا اليوم متداول بخطف الاطفال وصارت عندنا حالة رعب وبالاخير طلع أن أخوي راقد في السكن وناسينه^_^

[شوق القلوب]

السلام عليكم...


يااااالله ع سوالف السفر... سوالف مووول ما تنطرى... ههههه

بكون مستمتعه وايد و انا اقرا عنكم... :)

[فرفوش]

الصراحه مسكين هذا الفلان - شو موقفه يوم يسمع هذا الخبر - يقال بأن الإمارات تنصح رعاياها بعدم السفر لتايلند وهو حاجز وأمخلص - أكيد هذا موقف عمره ما بينساه ^_^

[حلم الطفوله]

أحلى موقف كان نفسه أسوأ موقف في السفر

يقولكم كنا حاطين ببالنا إنه بنرد على تاريخ معين قبل دوامي بيومين

بس إلي حجز لنا ما أكد على تاريخ الرده

فانصدمنا إنه الحجوزات فل ومستحيل مستحيل نلقى حجز لنا كلنا بنفس الرحلة

فقلت لهم ( كاقتراح ) كل حد فينا يرد برحلة ( وأنا أدري إنه أخوي بيهزبني على هالاقتراح)

وبعد ساعتين ... قالي حلوووم زهبي شطنتج إنتي واليهال ( ولد وبنت ) والشغاله بوديكم المطار عالويتنق

وأنا امبهته !! مووووول ما تخيلت هالموقف !! أنا أسافر بروحي !!

المهم راحت الزعيمه حلم وحصلت 4 كراسي ودخلوني لباب الطياره وودعوني

وطول الرحله أفكر بالموضوع وأضحك ! هل كيف بيكون استقبال الوالده لي يوم بتكتشف إني راده بروحي ههههههه

ورديت وداومت وانهزب أخوي هزاب على فكرته العبقريه

[أنامل قلب]

^ حلوه ..



والموضوع بكبره حلو ، يالله نبي نشوف مواقف أكثر ،
بانتظار تواصلكم جميعا ، وتواصلي جان تذكرت شي ينذكر !.



شكرا خليجية عالطرح =]

[فرفوش]

حلمووووووه - أخوج ما صدق افتك من المسؤوليه ^_^ هههههه -

[حلم الطفوله]

فرفوش

تصدق !! حلوه المسؤوليه

لا وعياله وياي بعد

كانت أكشنات حلوه الصراحه بالمطار والطياره

[قلوب دبي]

يالله يا كثر السوالف والمواقف


يخبركم بسالفه مادري جان قلتها الكم من زمان والا لا .. المهم


مره قلوب كان ساير لندن وكنا نحن 8 نبا انروح ميونخ وطبعا ايامها صار اضراب

المهم كل ما انروح المطار ماشي طيارات قلنا ماشيء غير القطار

سرنا محطة واترلو وقطعنا تذاكر Vip وقالوا الرحله بعد ساعه وطلعنا من لندن وصلنا فرنسا و منها كملنا الى بلجيكا

وهناك لازم انبدل القطار وتمينا نركظ نحن وشنطنا في المحطة ( اتقولون فلم هندي ) ولما وصلنا الى النقطة شفنا القطار امروح

تعالوا واتريوو 4 ساعات و عقب سرنا النقطة عشان نركب القطار وقلوب مستانس شال كيمرته ويالس ايصور سكه الحديد

ما وحالي والا شويه شرطي وشرطية ياييه ( اكسيوزمي باسبروت بليز )

وانا اهني اقول ابخاطري يالله ما ايفوتني القطار هذا بعد

وربعي من ورايه تعليقات : اللي ايقول بنروح عنه واللي يتمصخر

وصل القطار وانا اقوله بليز ابا اسافر : الشرطي قالي لا اتصور مره ثانيه وعطاني محاضره وهدني

برد على محور الحديث واللي هو كيف نوصل ميونخ اتخيلوا القطار بدلنا 3 مرات واخر قطار ركبناه كان عباره عن صندقه مال السامان

يعني حطينا شنطنا ويلسنا فوقها لمدة ساعتين وطبعا طلعنا من لندن 10 الصبح ووصلنا ميونخ 3 الفجر

رحله عذاب واللي امحلنا كيمرتي فيها تفاصيل الذكريات وحتى سكه الحديد اللي مامسحتها هههههه

وبنرد عليكم بالعلوم والسوالف في الايام اليايه

وعن صفحتنا لا اتخوزووون

والا اقولكم مرخوصين..

[حلم الطفوله]

قلوب دبي مستوي بوعمر !!

لا تخوزون أونه :)

[قلوب دبي]

اخووها افتك قال يا بويه هاي حلوووم ام العلوم بتم الا تهذرب واتهاذي خلها اترد هههه

[أمطار]

حط لنا الصــوور في واحة التصوير بوغنيــم ^^~

هههههه أنا بعد استوالي موقف وأنا أصوّر ياني الشرطي ويلس يعطيني محاضره أنه ممنوع أصور وجي
وأنا أقوله أوكي أوووكي أباا اسييييير أهليه كلهم سبقووني وأنا من النوع الـ خوّااف ما احب اتم بروحي!

[قصايد غلا]

حلوة مواقفكم لوووول

بخبّركم عن موقف استوا لنا من شهر تقريبًا

سرنا العمرة و بنات خالي ويانا و وحدة كازخستانية سارت ويانا بعد :h_mar7aba:



المهم

في المدينة ، الأخت الكازخستانية شافتنا نتصدّق و حبّت تقلّدنا

حضرتها يوم نحن طالعين من المسجد النبوي تفلسفت و جان تركض عنّـا

سارت صوب شيبة يدزّونه على كرسي ، نشت و عطته 10 مادري 5 ريالات

جان يهزبها الشيبة ، نحن استغربنا ليش هزبها

آخر شــي اكتشفنا إن الريّال طلع إماراتي

صدق هلّكتناااااااا من الضحك

[قلوب دبي]

ههههههههههههههههههههههههه ههههههه
ههههههههههههههه

حليلها كانت تبا اتسوي خير

---

امطار : ان شاء الله ان حصلت فرصه بنزل صور ..

[فرفوش]

حط لنا الصــوور في واحة التصوير بوغنيــم ^^~

هههههه أنا بعد استوالي موقف وأنا أصوّر ياني الشرطي ويلس يعطيني محاضره أنه ممنوع أصور وجي
وأنا أقوله أوكي أوووكي أباا اسييييير أهليه كلهم سبقووني وأنا من النوع الـ خوّااف ما احب اتم بروحي!


قلوب دبي كريم وأن شاء الله ما بيردنا ^_^

الصراحه قطارات أوروبا جربتها وأحلى شيء يوم أتسافر مع ربعك ذكريات ما تنسى أم أذا مع أهلك فمستحيل أفكر أركبها نستوي شرات الحماليه مع الأهل ^_~

[العجيبة]

خخخخ استمتعت بمواقفكم ....

الصرااحة ما اذكر شي مميز >> مشكلة التسطيييل بعد



ووين مواقفج مس خليجية خلينا نضحك عليج ههه


ثانكس عالموضووع الجمييل :)

[مزن هتان]

موقف صار مع أختي الصغيره ، لمن كنا بـ مصر
هـ الموقف كلش ما ننساه، كنا في جنينه مول أنا و خواتي و عيال ام سيف
امي و ابوي ما كانوا معانا المهم أنا و أم سيف و الباقيات سوالف و نحن نمشي
أختي الصغيره تجدمتنا عمرها كان 8 سنين المهم هي مجدمه عنا تمشي بس صاده
علينا و تضحك و الا ما تنتبه الاخت دعمت واحد من أصحاب الوزن الزايد الريال كان
موخي يربط حبل الجوتي عزكم الله فزّ الريال لف عليها معصب قلنا خلاص
بيصفعها من شافها سكت و تحرك من مكانه

صدينا الصوب الثاني هلكانين ضحك عليها، ههههههههه

نتريا مواقف البقيه

[مــهــابه]

مـن المـوآقف اللي للحيـن يعـآيروني عـليهـآ آنه وآحنـآ ف طريجنـآ ل صــلآله وآول مـآدخلنـآ صوب اليبـآل والمنحنيـآت وجيه ، كـآنت السـآعه 11 الضحـى ، ضبـآآآآآآآآب مش طبيعي ، الرؤيه مش وآضحـه آبداً ، كنـآ طـآلعين قـروبين آحنـآ وهّـل بوظبي ، المـهم طول الدرب آحنـآ نمشي مع بعض ويوم وصلنـآ صوب المنحنيـآت آنعدمت الرؤيه ومـآصرنـآ آنشوف شي ، ضيعـنـآهم وآنحرفـت علينـآ السيـآآآره ومادري من ويـن ظهرت امبينـآ سيـآيرنـآ شـآحنه آنـآ من زووود مـآكنت مرتبـكه ، وبمـآ آني كنت اصغر وحده ف الرحله كلهــا

مـآسكه الآدعيه وآدعي والله مش حـآسه بعــمري آبد ، وآنـآ آقرآ وادعي " حلووه الحياه =P


الـمهم بعد مـآعدينـآ الحمدلله آكتشفت انه الدعـاء لي كنت آدعيه هو " دعاء الثوب الجديد " ههههه


ذلــوني ، مـآتم حد مـآخبرووه السـآلفه ، ومـآتم حد مآتمصخر عليّه، مب منـي

[قصايد غلا]

هههههههههههههههههه مهابتيييييي جتلتيني من الضحك

ما ينلامون يوم يخبرون كل حد عن سالفتج

[خليجيه]

خخخخ استمتعت بمواقفكم ....

الصرااحة ما اذكر شي مميز >> مشكلة التسطيييل بعد



ووين مواقفج مس خليجية خلينا نضحك عليج ههه


ثانكس عالموضووع الجمييل :)

بفكر في موقف اذا شي :k_smile2:

[مــهــابه]

قصـووده :

شـفتي كيف ؟!

والله هذآ الخوف وعمـآيله

[شوق القلوب]

مهابه...!!! موتيني من الضحك... ههههههه

صدق انه الخوف و عمايله !

[مــهــابه]

^
لـوول
هذي أكثر رحله اسـتانسـنا فيهـا ، لآن روحنـا لهـا بـّر ، ومغـامرات وفي مواقف ماتنطرى اهنيه بس جّد
فضيييعه السفره

[خليجيه]

يوم سرنا الهند هاي السنه ضاعت شنطتي في مطار بمبي وبغيت اصيح وخااااصه انه فيها الاي باد

الله ستر انه الشنطه كانت ويا مواطن من الامارات هو ماخذنها بالغلط. عقب تعب الانتظار في المطار وصلنا الفندق وانا تعبانه زياده وطلبنا دكتور وعطاني ابره عن هنتين. حتى اميه علقت وقالت: حشا شنطنا مافتحناهن والدختر ياي يضرب ابر :) وعقبها باسبوع تعبت مره ثانيه وحصلت لي ابرتين بعد

طبعا اسوأ مافي السالفه كلها اني اكتشفت انه اللي امتعبني ويايبللي الحمى هو جاهي الحليب :( ومنعني عنه الدكتور

وسلامتكم

[عفاريتووو]

وايييد مواقف حلوة تمر علينا بالسفر =)

من المواقف اللي مول ماقدر انساها لانه كانت على وشك انها توقف قلبنا لول
كنا في لندن و كنا موقفيين تكسي و ركبنا فيه و كانت الدنيا ليل
جان يي واحد سكران الا يبا يركب ويانا و ركب جان نطلع كلنا من الباب الثاني لول متنا من الخوف
نزل سايق التكسي و طلع السكران بره و قالنا اركبوا بسرعه و قفل الباب و رااااح و هذاك يركض ورا التكسي وييييت ويييييت ههههههه


و مرة من سنة تقريا كنا راكبين القطار في المانيا و القطار كان فل
المهم و احنا نسير من عربه لعربه لين ما لقينا مكان مووول ما فيه حد و يلسنا فيه و مستانسين و ماخذنا راحتنا ع الاخر
لين ما يا مال التذاكر قالنا وين التكت و احنا بكل ثقة راوينااه
جان يعطينا نظرة لول و يأشر ع كل واحد و يقول 50 50 50 50 50 يعني كل واحد يدفع 50
ايييه شو 50 لول ليش
جان يقول ون ون ون ون ون go out
جان نقووله we goo?
قال yes gooooooo لول الحبايب يالسين في الدرجة الاولى و لا ندري لول عشان جي فاضي p=

ولا احلى شي يوم ننزل من فوق الجبل مشي ياخذلنا اقل شي 4 ساعات
و يووووم فجاة ينزل هااك المطر القوي و و تصير الارض تزحلق و الطيحااات لول
احلى مغامرة والله =p

عاد كله ولا يوم رحنا خصب و سرنا بالمركب في بحر مسندم
عاد هاك الايام الارصاد الجويد كانوا محذرين الناس ان محد يدش البحر
بس شفنا الجو كان هادي فدشينا البحر
و كل شي كان اوكي لين ما فجأة و احنا رادين الجو انجلب 180 درجة !!
و كلموونا خفر السواحل ان ما نتحرك بس كان الخوف من ان يصير الليل و يزيد
فتمينا نمشي شوي شوي و ايدنا ع قلبنا لول
و كان جنا راكبين هالمركب مال الملاهي p=
و الدرايش انكسرت و الاشياء تطير و لبسونا لايف جاكيتس لول
كان شي فضيييع حتى ما كنت متوقعة ان بنوصل بس الحمدالله الله سلمنا و وصلنا بالسلامة
و من يومها ما اظني بفكر ادش البحر مرة ثانية لول
بس كانت مغامرة حلوة =)

[حلم الطفوله]

يأست وأنا أترجاهم أسافر هالإجازه ومحد طايع !! كلهم بيروحون طلعات شبابيه وشوابيه !!!

المهم


تذكرت موقف صارلي السنه بماليزيا

امسويه عمري شجاعه وداشه لعبة سبايدر مان إلي بجنتنغ مع ولد أخوي العزيز

المهم هاللعبه تركبونها وانتو كأنكم راقدين ...يعني كأنكم عباس بن فرناس يوم فكر يطير

بدت اللعبه وأنا أتحرطم بداخلي من الزيغه بس مستويه كوووول جدام الكل

تحركت اللعبه وأنا أقرأ ععمري وأستغفر ربي عن تهوري إلي بيضيعني

وعقب بدا الصريخ !!! ومن حدرت من اللعبه أترنح !! وولد أخوي يصارخ عموووه خلصنا قومي قومي بس لا حياة لمن تنادي

اللعبه حلوه جربوها ....بس الجبناء مثلي لا يتهورون أبدا :)

موقف ثاني بسنغافوره

داشين المطعم بنتغدى بسنتر من السناتر .... وعيبني شي باللسته بس ما عرفت شو مكوناته ( اختكم خاطرها بعيش )

والطلب بيتأخر شوي .... فقلتلهم بسير المحل لمجابل وبرد بسرعه

المهم وأنا طالعه أشوف الطبق إلي عيبني وعبالي اليالس عالطاوله إلي حذالنا ما يعرف عربي

جان أأشر لأخوي وأقوله ...هذا إلي كنت بطلبه بس هالغجه ما فهم

اشوي وأشوف الريال يبتسم ويقولي طعمه حلو بيعيبج !!! عاد أنا كإنه حد صب ماي بارد فوقي

جان ابتسم وأكمل دربي واتكربع بالدجه !! شكلي كان تحفه

وإخواني ضحكو ضحك لين دمعت عينهم

صدق يوم لا ينسى :)