.. مـامـات الواحات .. و .. بابات الواحات .. [الأرشيف]

شوق القلوب

16-02-10 ||, 08:31 AM

السلام عليكم...

حبيت افتح هالموضوع لامهات الواحات.. و لاي حد يبا يشاركنا خبراته في سوالف الاطفال العسولين ..

..

اكثر شي لعوزني في حمووودي.. يوم يمرض.. و يزجم..
مرات لا ادويه اتفيد ولا شي..

بس يوم يزجمون يريحهم شوي اذا رقدوا على ظهرهم.. شوي يكون تنفسهم احسن..

..

طبعا سالفه الطيحات و التكفيخ ع الراس بالبيزه.. مسكين راسه دوم وارم..
وحده من ربعي اتقول انه سودو كريم ينفع ينحط مكان الكفخه عشان ما تورم.. بس للحين انا ماجربته !!

..

ممم.. وشو بعد ؟

عهد الوداع

16-02-10 ||, 02:48 PM

انزين نحن مب امهات عاااادي اندز فيسنا ^^

عاد عن شوو بنرمس لووول ... عن عيال خواتنا هههههههه

فدييييييييييت ولدج اتحملي منـــــــــــــــه ..كله ولا الطيحــــــــات ...
هيه انا بعد سمعت عن كريم سودواااا انه وايد زييييييييييييين ...جربي وخبريناااا ومنكم نستفيد يا امهاااات ..وعليج بزيت الزيتون ما اوووصيج اذا زجم ولا طاااح بسم الله عليه قبل ما يرقد دهني جسمه وويهه وايد مفييييييييييد تراا هاا برووحه دواااا ..(:

شوق القلوب

16-02-10 ||, 04:44 PM

حياج الله عهووووده...

بالعكس اصلا احسن من خبره الخالات ماشي... عاد انا كنت خاله جديمه.. و نسيت هالسوالف...

..

والله دوم يقولولي عن زيت الزيتون.. بس مول ما احطله... شكلي الليله بستلمه...

المنصوري

16-02-10 ||, 06:12 PM

من خبرتي من اللي حواليه .. عطي الياهل دوا الكحه ( كح كح كح ) وبيناااام على طووول ( مجرم لاااه :11: )
من يقووول آه ولا ايه ولا يصييييح ... دواااا الكحه ,, إنــــتااااا فيـــن :4:

مبرووك يا ام حمووود ويتربى في عز وااااالديـــــه

مــنــــ9ـــــوري

عهد الوداع

16-02-10 ||, 09:04 PM

الله يحييييييييج ,,,,
صدقج يا شوووق من صرت خاله وعمه صاااارت خبرتي في الامووووومه تووووب ^^

المنصوري
ذكرتني في ربيعتي يوم تبغي عيالها يرقدوون على طووول تعطيهم شراب اكتفت خخخخخخ مجرمه نفسك

جنون امرأة

17-02-10 ||, 03:06 PM

شكرااااااااا على مثل هالموضوع الغاوي ..

عاد انا ما سمعت عن هالشي ××

و معلوماتي عاديه ..

الله يخلي امي كل ما صار شي ل صوغه اتصل بها على طول او حق وحده من خواتي

وان شاء الله نستفيد من هالموضوع

طير الحب

21-02-10 ||, 03:23 PM

السلام عليكم...

مسا الورد على أمهات أ الواحات...

بالنسبة للسودو كريم ما جد استخدمته للضربات ...بس للحساسية والصفح الجلدي وينفع للحروق....وللصيحات استخدم فولتارين جل او فيكس...

وبالنسبة للصغاريه اذا يتهم حمى بعيد الشر عنهم وما تنزل درجة الحرارة اعطيهم نوعين من خافض الحراره كل اربع ساعات بالتناوب ...وخل التفاح ينفع وانا يربته لحور يخفض الحرارة.

شوق القلوب

02-03-10 ||, 09:48 AM

المنصوري...

يوم اتغصص و ما اعرف شو اسويبه... و الصياح شال البقعه.. مالي الا الادول..!! يغمضني اعطيه دوا كحه بلا سبب !! اصلا ادويه الكحه كلها اشوف انها مالها مفعول...

..

الله يبارك فيك... :)
خلاص الحين غدا ريال... جان تبا حد يضاربك و يشرمخك.. ترانا حاضرين :a032:

شوق القلوب

02-03-10 ||, 09:50 AM

جنون امرأه...

انا بعد.. ع الدقه اتصل باختي العوده.. و لا امي..
مرات الواحد يدور اسه... ماشاء الله هالصغاريه سوالفهم ما اتخلص.. و المشكله انج ما تدرين شو يعورهم... كله تخمييين ..!

شوق القلوب

02-03-10 ||, 09:53 AM

طير...

حيالله ام عبادي...

مب وايد نعطيهم نوعين من خافض الحراره... احس مب زين انزود عليهم... !!

و خل التفاح سمعت عنه مره.. يقولون زين لانه بسرعه يتبخر فيسحب وياه الحراره..

..

تسلمين على هالمرور.. و ماشاء الله اتوقع عندج خبره كبيره ويا اليهال...

ضي دبي

02-03-10 ||, 11:27 PM

مســاج كل الهدووء ويعله خالي من صياح و صراخ حمود :pullhair:..

من أكـئب اللحضات يوم الياهل يمررض ويطول في المرررض .. الام تتعب والياهل يتعب بعد وعادي اذا طوول في مرضه يضعف فـ قلب الأم يحاتي ويخاف اكثر كل ما مرض البيبي ولو كان مرض موسمي بسيط ..

اذا كان حمود من النوع اللي يمرض بسسسرعه فـ يمكن يكون السبب انه مناعته ضعيفه .. كيف :m_afaker: ..؟ يمكن مب متعود على اللعب برع او تغير الجو و الأكـل أو انه ضعيفون ما تأكلينه أكـل صحي وايد :bash:يـــمــكــن :fa46:.. فـ حاولي تبعدينه عن الجو البارد او البيئه اللي تمرضه بسرعه واستشيري دكتور مختص شاطر تراه يأثر في العلاج .. ولا تنسين بعد العلاج النفسي للبيبي اذا مـرض لازم اتكونييين صبووره وايد معاه ودوم تمسحينه وتهمزينه بكريم تراه يأثر بعد :vampire:..

وعن طيحات اليهال.. ماشي غيير اتراقبينه 24 ساعه كل ما مشى ولا ركض :h_negab:..

من تجربه خاله اتمووت في الصغاريـــه :a100:

وربي يحفظج ويسعدج مع حمود :a054:

مجموعة إنسان

02-03-10 ||, 11:33 PM

أم حمووود

في دكتور في بوظبي وااااايد شاطر بسوالف اليهال

بنت أختي تحت لسانها لاصق ماتعرفين كيف
قالولها لما تكمل سنه تقدر تسويلها جراحه

بس واايد تمرض المسكينه
دوم فيها حمى

أمطار

03-03-10 ||, 12:02 AM

الســــلام عليـــكم ..

شحــــالهم مــامــات الواحــات :fa35:؟!
عســاكم مرتاحيــن :fa41:

عـــالم الأطفــــال :a032::bash::glare::icecream::7:
:a100:

فعــلاً أصعب شي ع الأم لمــا يكــون الياهـل مريــض ومش عــارف يشكي أو يخبــرها شو اللي يعــوره أو مضـايقنــه فـ يبدا سيناريو الصيــــاح ... :k_no:

فـ ما أقـــول إلا اللـــه يعيـــن كـل أم ويحفظــلها عيــالها ..

مـلاحظــة بس حبيت أقــولها لكم ..
دوا السعــال (أكتيفيد وغيره) أبـــد مش صحيــه للياهل.. حتى لو كان عنده سعــال
خــاصة اليهــال اللي تحت سن 6 سنــوات ..

صــح أنــه يهدّيهم شوي بس واايــد يأثر على صحتكم "سلباً" ..
فـ ما بالكــم تعطونهــم وهم مش محتاجينـــه!! :k_no:

أنــا عنــّي (كـ عمـّه وخـاله ) أفضـّـل استخدام العلاج الطبيعي ..
عندكم مثــال .. العـســل واايد مفيــد للسعــال ..

:inlove:

ووو شـــو بعـد؟!

بـالتوفيــــق عزيزاااتي ..
:a070:

ضي دبي

03-03-10 ||, 11:46 AM

صــدقــج أمــطار العــسل الطبيعي وااييييييييد وايييييييييد مفيد للكبار والصغار ..

طير الحب

21-03-10 ||, 02:37 AM

ههههههههههههههههههه

اذا عالخبرة ...كل يوم نتعلم

يالله ربي يرزقج بنوته...دلوعه شروات حور.....ربي يبارك فيهم البنات...ضراير مش بنات...حياتي والله

نجمة دبي

06-05-10 ||, 12:25 AM

شوق القلوب

06-05-10 ||, 12:48 AM

هلا عزيزتي...

لا اتخافين و لا اتشلين هم... ان شاء الله تولدين طبيعي هاليومين ... دام انه الياهل بخير.. ان شاء الله كل شي بيكون تمام...

اللي عليج انج تهتمين بصحتج.. وتدعين الله انه يسهل عليج ..

و متى ما الله راد بتربين ... لا اتوترين اعصابج...

و ان شاء الله اتبشرينا جريب :)

نجمة دبي

06-05-10 ||, 01:14 AM

الله يسمع منج الغاليه

احس عمري وايد طولت .. ومافيني صبر بعد

لكن مثل ما قلتي .. كل شس بايد الله سبحانه

ادعولي دخيلكم

شوق القلوب

06-05-10 ||, 01:39 AM

ربي يسهل عليج... استغفري و اذكري الله وايد.. و اقري قران...

وارقدي و ريحي جسمج... لااااحقه ع السهر.. ^ـ^

فرفوش

06-05-10 ||, 08:29 PM

السلام عليكم

كيف الحال؟

تاريخ اليوم 5-5-2010
في هالتاريخ المفروض اني اولد ..

والحينه دخلنا اليوم الاول من الشهر العاشر
وللحين مافي اي علامات للولاده :Oo:

في حملي الاول .. ولدت بـ الطلق الصناعي .. وكان هذا في يوم موعد الولاده ..

لكن في حملي الثاني ماعرف شو السالفه .! :wacko:

الدكتوره قالت لي بتعطيني طلق صناعي يوم العاشر من الشهر العاشر ..

والصراحه بما اني مجربه هالشي من قبل .. ما اظن اني اقدر اتحمل العوار الفظيع والطوييييييل .. :fa43:

خبروني .. شو اسوي؟

مع العلم اني امشي وايد .. وما اشرب مشروبات غازيه .. والعشا يكون خفيف ..

احتاج للنصيحه :sad:

أهتمي بـ أكل الرطب - ورد ذكر الرطب في القرآن في حيث أن السيدة مريم العذراء - تناولت الرطب لتخفيف حدة ألم ولادة النبي عيسى عليه السلام حيث أوحى لها الله عزوجل في كتابه من سورة مريم " وهُزِّي إليكِ بجذعِ النَّخلَةِ تُسَاقِط عليكِ رُطَباً جَنِيّاً(25) فَكُلِي واشرَبِي وقَرِّي عيناً فإمَّا تَرَيِنَّ من البَشَرِ أحداً فَقُولِي إنِّي نَذَرتُ للرَّحمَن صَوماً فلن أُكَلِّمَ اليومَ إنسِيّاً(26)"

هذه المعلومه سمعتها في أحدى القنوات الطبيه^_^

طفلة من هذا الزمان

06-05-10 ||, 08:45 PM

نجمـــــة دبي ،،

الله يسهل علييج إن شااء الله و نسمع بشاارة ولادتج وسلامتج انتي و المولوود جريب بإذن الله ...

نجمة دبي

07-05-10 ||, 02:15 AM

شوق القلوب / طفلة من هذا الزمان
ان شاء الله يارب .. :)

فرفوش
تراني اكل تمر وايد
في اليوم الواحد اكثر من 10 حبات
واليوم شربت جرفه
للحين مافي شي

شكرا للكل

شوق القلوب

07-05-10 ||, 10:23 PM

لا اتهجين جسمج اكثر من اللازم... هذي امور بيد الله سبحانه...

ولا تشربين الخروع تراه مب زين.. لانه يزيد الالم

حلم الطفوله

08-05-10 ||, 12:07 AM

الله يسهل عليج يا نجومه .... وتولدين بالسلامه وتفرحين بالبيبي إن شاء الله

يحليله فرفوش ....من كثر ما غمضتيه وكسرتي خاطره عطاج نصيحه مفيده الصراحه

بس بعد التأخير بالولاده شيء طبيعي فلا تحاتين وايد ....

نجمة دبي

08-05-10 ||, 01:03 AM

شوق القلوب / طنط حلم ^_^

كل حد يقول لي ان في غلط بالحسبه .. واني معطية التاريخ غلط للمستشفى
الصراحه مادري .. ما اذكر .. كل شي جايز

باجر عندي موعد تخطيط .. ان شاء الله خير

دمعة شوق

08-05-10 ||, 04:00 PM

الله يسهل عليج يا نجمه ويقومج بالسلامه انتي والبيبي
عاده طمنينا علييج :)

طير الحب

08-05-10 ||, 04:53 PM

عادي حبي انا بحور تاخرت اسبوع عن موعد الولادة اشربي زعتر او جرفه....وادعي ربج

الله يسهل عليج وعلى كل حامل:)

مــهــابه

08-05-10 ||, 06:03 PM

حبيبتي نجمه لآتحـآتين

آن شاء الله بتربين وبتقومين بالسلامه

آكلي عّجوه يقـولون انهـا وايد زينه ..

الله يسهل عليج ولآتنسين آطمنينآ عنج

نجمة دبي

09-05-10 ||, 12:12 AM

دمعة شوق
سرت اليوم وقالوا كل شي اوكيه .. ويوم بيعورني بطني او استوى اي شي على طول الحوادث
بتريا لين يوم الخميس وبشوف .. اذا ما ربيت بسير عند دكتوره زينب .. كاستشاره
مشكوووره

طير الحب
شربت امسات جرفه لكن ما استوى شي .. الصراحه اخاف اشرب اي شي ..
مافيني عالعوار واخر شي يطلع مب ولاده ..
مشكووووره

مهابه
تراني اكل وايد .. وان شاء الله ربي يسهل عليه وعلى الجميع

شوق القلوب

09-05-10 ||, 11:09 PM

بشرينا عنج ... ماشي اخبار ؟

نجمة دبي

09-05-10 ||, 11:52 PM

للحين مافي شي :(

اليوم العصر مشيت نص ساعه

شوق القلوب

09-05-10 ||, 11:53 PM

ان شاء الله خير .. :)

البيبي شكله مستانس داخل.. ما وده يفارقج

نجمة دبي

09-05-10 ||, 11:58 PM

السلام عليكم

بدخل في الموضوع مباشرة ..

بنتي عمرها تقريبا سنه .. من الصبح احس بها مب طبيعيه
ما اتطيع تاكل اي شي

الصبح رجعت شوي .. وكان في بلغم في صدرها

اي شي احط في حلجها ما اتطيع تاكله

مع انها تلعب عادي وتضحك ..

المشكله في الاكل

كل يوم تتريق وتتغدا .. والعصر فواكه او كيك .. وفالليل تتعشا

لكن اليوم مووووول ما كلت شي

عطيها خاشوقة صغيره عسل طبيعي عسب البلغم يطلع .. وبالغصب بلعت شوي منه

قبل شوي سبحتها بماي دافي .. والحينه رقدت

طمنوني :( وايد احاتيها

شوق القلوب

10-05-10 ||, 12:05 AM

يا اختي سالفه هالبلغم في اليهال مشكله !!

انا ولدي يته شهور.. طول اليوم عادي... من اعطيه حليبته و ارقده في سريره.. تبدا عنده الكحه و السبه هالبلغم.. و مرات يغفل وعقب يتم يكح لين ما يرجع كل شي.. و يرتاح ! طبعا لانه البلغم يكون طلع من صدره...

واخر شي اكتشفت انه المكيف كان يضرب على سريره و هو اللي امسببله هالالتهابات و البلغم... فاشتريتله هالستاير اللي يغطون بها السرير من بيبي شوب... و الحمد الله الوضع صار احسن...

باجر جان رمتي وريها العياده خل يكشفون عليها عشان تطمنين انه ما عندها التهاب...

نجمة دبي

10-05-10 ||, 12:12 AM

المكيف !!

ما فكرت فيه الصراحه

فالليل البسها بيجاما خفيفه .. قميص كت او نص كم مع شورت
يمكن عسب جي !!

قبل ما ترقد دهنتها بزيت الزيتون من راسها لين ريولها .. عسب ترتاح

وباجر ( جان ما ربيت خخخخ ) بوديها العياده ان شاء الله

مشكوووووووووووووووووووووو ووره

وربي يحفظ ولدج ويخليه لكم ان شاء الله

دمعة شوق

10-05-10 ||, 01:01 AM

الله يشفيها يـ نجمـه ~|
اتذكر ولد ختيه نفس الشي كان فيه بلغم ومايرقد الا يوم يرجع كل اللي ماكلنه طول اليوم ’’ وأصلن مايكون ماكل شـي الا يالله يالله
لانه يكون مضايق ، فـ يرجع ويـرقـد ,, حتى انه وااايد ضعف الفتره اللي كان فيها تعبان
~

عن سآلفة تأخير الولادة لاتحاتيـن
توني اتذكرت ان ختيه دخلت العاشر وماربت
والحمدالله ياها الويع بدون طلق صناعي ,, ويوم تروحلهم يهولون الأمور
وبيرقدونها عندهم فـ هي قالت يوم بيني الويع بييكم ,
والحمدالله ربت طبيعـي ^^~
فـ لاتستعيلين وآن شاءالله خيـر ,,

شوق القلوب

10-05-10 ||, 01:12 PM

نجمه دبي..

يحليلها بنوتج لا تلبسينها جي حزه الرقاد.. احسن شي لهم في هالعمر الاوفر رول الكامل ولا بجامه ايدها و ريولها طويله... لانه اليهال لازم يفرون اللحاف.. و اتخيلي الحجره بارده وايدها و ريولها يجيسها هالهوا البارد... فلازم بتستبرد..

وصح جيكي اذا هوا المكيف يضرب على سريرها... رطبي ايدج بماي... وحطيها صوب سريرها.. جي بتحسين بالهوا اذا يضرب عليها..

..

عن تاخير الربا... انت جيكي ع البيبي بين كل فتره.. لانه في مرات تستوي انه الياهل يبدا عنده الخروج ( عزج الله ).. و يختلط بماي المشيمه فيرد الياهل يبلعه.. و هالشي طبعا مب زين.. انا ما ابا اخوفج.. بس الحذر واجب..

نجمة دبي

11-05-10 ||, 02:13 AM

هلا

البارحه فالليل تعبت زياده و رجعت وايد
على طول وديتها حوادث الوصل
قالوا فايروس منتشر

ويوم سالت الدكتوره سبب الفايروس
صدمتني يوم قالت الاكل الـ مب نظيف واليد الـ مب نظيفه

وتذكرت اني مرات الصبح لما اكون راقده .. بنتي تكون عند البشكاره

ومن اليوم ورايح خلاص .. كله عندي وكل شي انا اسوي لها

:(

نجمة دبي

11-05-10 ||, 02:14 AM

اووه نسيت اخبركم

تراني للحين ما ربيت خخخخخخخ

توني شربت كوب حليب دافي مع ملعقتين كبار عسل طبيعي اصلي

ان شاء الله خير :)

شوق القلوب

11-05-10 ||, 02:19 AM

مووول لا اتامنين بشي عند الشغالات..! ترا عادي يوم يآكلونهم.. اتلاقينها تاكل الياهل لقمه و في حلجها اللقمه الثانيه..!!

جنون امرأة

11-05-10 ||, 03:23 AM

شوق القلووووب :s

خليتيني اتخيل !!!!!!!!!!!!!!!!!

لاعت جبدي

شوق القلوب

11-05-10 ||, 03:26 AM

انا وحده امخبرتني انها كانت اتراقب الشغاله... و هاللي شافته..!

سوري ام صوغه.. لوعت بجبدج.. بس هاللي يستوي..

نجمة دبي

11-05-10 ||, 03:49 AM

شووووووووو !!!!

فديتها فطامي والله .. مووول ما بخليها بروحها او عند البشاكير :(

مــهــابه

11-05-10 ||, 12:52 PM

^
آبد آبد لآتخـلون عيـآلكم عند البشـآكير ، محد بيحبهم وبيدآري عليهم شرآتكم آنتووو

حتى لو كـآنت البشـكآره زينه بعد مب هي اللي تعبت عليهم ويـآبتهم ف الاخيره هي مرّبيه لآ آكثر ، دآم انها هي الوحيده وتوها صغيره خليهـآ عندج 24 سـآعه

آنا ختيه للحين مب طـآيعه تييب بشـكآره رغم انه بيـتهـآ عوود وولدهـآ صّيـآآح بس تقول جيه آريح لي ، مـول مانخلي يهـآلنا عند البشـآكير ، آبداً آبداً ، قّبل حتى البامبرز آحنا نغيره لهم ، لكن الحين آنا اعتزلت هالشغله لوول

هم آمانه من الله لآزم نحافظ عليهـآ =)

.

.

نجمه :

جـآن عندكم عزبه فيهـآ نـوق خّبريني
بعطيج طريقه يقـولون آنهـآ تسرع الولآده ، عن تجربه 2 من العـآيله لآنهم عّشرن بـعد ..

شوق القلوب

11-05-10 ||, 03:10 PM

صدقتي يا مهابه...

هاليهال نعمه من ربي...امنها عليهم...
صح المراكض وراهم متعب... بس اشحلاتهم.. عسل ع القلب و الله ...

والوحده اذا حطت شغاله.. اتخليها وياهم بس جدامها.. ولا اذا بتطلع اتخلي الصغاريه ويا الشغاله عند حد من الاهل... لانه صرق مالهم امان.. مهما كانوا زينين.. ولو لا سمح الله الياهل صارفيه شي.. هالشغاله اشعرفها كيف تتصرف ..

الله يعينا والله .. و يحفظ عيالنا

الموز

11-05-10 ||, 04:24 PM

ماشاء الله على مامات الواحات

نجمة دبي

12-05-10 ||, 04:35 PM

لا والله ماعندنا عزبه

البارحه من الساعه 7 المغرب لين 4 الفير كان فيني ويع .. لكن بااااارد
كل ربع ساعه تقريبا

واليوم مافي شي :(

شوق القلوب

12-05-10 ||, 10:40 PM

عيل شكله جرب الموعد... نتريا البشاره ^ـ^

نجمة دبي

13-05-10 ||, 01:41 AM

still nothing
:(

مزن هتان

13-05-10 ||, 07:51 AM

نجمه دبي
ان ياج العوق لا تعلمين الا أمج و خواتج
نحن عدنا الحرمه لما ييها العوق ما نخبر حد
اونه اذا وايد عرفوا انه ياها عوق عادي يبرد و يوقف !
"مجرد معتقدات"

من ييج العوق شربي الزعتر، و طلعي امشي حافيه عـ البحر "الرمله"

عهد الوداع

15-05-10 ||, 01:33 AM

نجمة دبي شكلها ربت الله يسهل عليها ان شاء الله

دمعة شوق

15-05-10 ||, 03:23 PM

^
الله يسمع منج

شوق القلوب

15-05-10 ||, 10:44 PM

هي والله ... عسى انها ما اتعبت...

جان زين لو كان عدنا حد اييبلنا اخبارها..

نجمة دبي

17-05-10 ||, 05:56 AM

هلاإاإاإا
أنا ييت :)

الحمدلله ربيت يوم السبت العصر
وطلعت بنتي ( فجر )

الله يحفظها ويخليها لنا يارب

كان فيني ويع لكن بارد .. عطوني طلق صناعي
الحمدلله

أشكر كل اللي ساندني و وقف ويايه
وشكرا عالنصائح :)

لي عودة ان شاء الله

مزن هتان

17-05-10 ||, 07:50 AM

الحمدلله عـ السلامه "نجمة دبي"
مبروك ما ياج و تتربى بعزكم

شوق القلوب

17-05-10 ||, 01:13 PM

مبرووووووووووووووك.... الله يجعلها من الذريه الصالحه
و ان شاء الله انج ما تعبتي وايد ..؟؟ ..

عسى بس فطوومه ما غارت منها ..؟؟ :d014:

دمعة شوق

17-05-10 ||, 06:22 PM

الحمدالله على السلامه يا نجمة دبي
ومبروك ماياج وتتربى في عزكم ان شاءآلله
")

أنامل قلب

17-05-10 ||, 06:43 PM

ما شاء الله ، تتربى بعزكم ،
ومبروك ما ياج ، ربي يجعلها من الذريه الصالحه ..

الحمدلله ع سلامتكم اختي ..

طفلة من هذا الزمان

17-05-10 ||, 07:44 PM

الحمدلله على سلامتج أختي و سلامة البيبي ..

ربي يجعلها من مواليد السعـادة ..

مــهــابه

17-05-10 ||, 09:01 PM

مبـروك مايـآج ختيه نجمه ..

الحمدلله ع سلآمتج وسلآمه البيبي

تتربى ف عزج وعز آبوهـآ ..

وحلــووو آسم " فجر " ..

جنون امرأة

18-05-10 ||, 01:59 AM

نجمة دبي //

حمدالله ع سلامتج .. تتربى في عزكم

نجمة دبي

30-06-10 ||, 01:09 AM

الله يبارك فيكم جميعا :)

الموز

30-06-10 ||, 08:41 PM

تستاهلين السلامه اختي نجمة دبي

سبيجة

19-10-10 ||, 09:31 AM

السلام عليكم

حبيت اسأل أهل الخبره من المامات ....

في حد منكم جرب حبوب الياسمين ؟؟؟؟ :ohboy:

الياسمين

21-10-10 ||, 08:55 PM

جنه حد طراني

انا كنت بستخدمهم لكن قالولي انها يمكن تقطع الحليب.. مع انه الدكتوره قالتلي لا اتخافين بس خفت اغامر

سبيجة

25-10-10 ||, 01:05 PM

هلا ياسمين :d010:

انا سمعت انها تقلل الحليب ومكتوب هالشيء في العلبة ,,, وانها ما تنعطى للمرضع إلا بعد الاستشارة..

للأسف انا لازم اخذها 3 شهور أو شهرين على الاقل ... بس الحين انا في أول شهر وما افكر اكمل ...لأنه وايد مخلتني عصبيه ... ولوعه طووول الوقت ..مثل احساس الوحام بالضبط اتخيلي ...!! قالولي انه بس أول شهر جيه ... بس مب عارفه إذا استمر ويتعدل الوضع في الشهر الياي أو لا ...

طير الحب

31-10-10 ||, 08:23 AM

السلام عليكم...

ابا أفكار كم في تعليم الاطفال شو الافكار الي تستخدمونها عسب تجذبون اهتمامهم

حواري وايد تغار من اختها ...شخصيتها وايد تغيرت من يبت علايه تاعبتني ومخلتني اصير عصبيه ...مالي خلق عالدراسه...مدلعتنها دلع هالحور ...دخلتها المدرسه عسب تلتهي بس ماشيء فايده.

مزن هتان

31-10-10 ||, 08:48 AM

عليكم السلام و رحمة الله و بركاته

أم عبدالله أختي أم سيف أكتشفت متأخر انه بنتها عهود "7س" تغار من اخوها سيف "4س"
تقول حق أمها انج تحبين سيف أكثر عني و صايره وايد تعامل أخوها بعنف

فـ اقترحنا أنا و خواتي انه تخصص يوم لها و يطلعون يتعشون و الا يتغدون
و طبعا مش بس انه يروحون و ياكلون لا بس، عهود لازم تجهز ورقه قبل يوم الطلعه
و تكتب اي شي تبي تتحجى فيه و امها بالمثل، و ينقاشون
و في هديه لها بـ آخر اليوم و انه تاخذ بعد هديه حق اخوها على ذوقها
الطلعه هاي تكون يوم بالشهر بس

أختي مستغربه تقول لمن اهزب سيف تزعل و ما تخلي أمها اطقه بس هي اطقه عادي ؟!!
الاسبوع اللي فات استغلت صلاة امها و زغدت أخوها =S

شوفي شو اهتمامات بنتج و حاولي تشاركينها

بنت أختي تحب تتسوق و تحب تتعشا برع، تحب يلسة البحر
تحب تبات في بيتنا، عهود كبيره فـ أحس شوي التعامل معاها سهل بيكون و بتتفهم

عساكم عـ القوه يا أمهات اليوم :fa41:
و صباح الامومه

شوق القلوب

31-10-10 ||, 12:42 PM

السلام عليكم...

موضوع الغيره انا بعد وايد احاتيه... لانه حمودي بعد مستوي يكفخ اي حد يتقرب من العابه..!!! مع انه ما عدنا يهال في البيت عشان اقول انه اتعلم الضرب منهم !!! بس من اتينا اختيه ما يستحمل حد يلعب في العابه...

والله يستر يوم بتكبر شوشو... شو بيسويبها ..!!
اليهال يبالهم حد يتعامل وياهم بحذر و معرفه عشان ما تطلع نتايج عكسيه

مــهــابه

31-10-10 ||, 10:35 PM

^
تكبرون وتنسّوون ..

وآيد مّنه ، اليهآل يغآرون بشكل مب طبيعي

ختيه آم عبدالله عندهآ سلآمه تغآر من آي شي وكل شي ، مب مجرد آنها تغار حد يقرب من امها ، لآ حتى شنطة امهآ ، نعولها " وانتوا بكرامه " من حد يقرب صوبهم آتصيييح ..

والمشكله تغآر ع آميه بعد، يعني لو كنت حآطه رآسي ع جتف ماما او شي ، عآدي احصل عضّه آو اتير شعري ..

آم عبدالله :

حآولي تخلينها تحب اختها ، يعني مثلاً لو هي تفهم ، قوليلها يالله ساعديني ، هاتي المرضعه ، هآتي شنطتهآ ، ممم خليهآ تشآركج ف الآشيا لي تسويها لآختها الصغيره ولآتحسسيها انج هاملتنها ابداً ..

بالعكس اختها صغيره وللحين ماتفهم ، اعطي الاهتمام لـ حور بالوقت لي تكون علايه راقده آو عند ابوها او شي ..

وكان المفروض انج تمهدين لها موضوع البيبي اليديد ..

وتتربى ف عزج (L )

طير الحب

07-11-10 ||, 04:33 PM

مزن...والله هالحور الله يحفظها مسوتنها ربيعتي مب ينتي الصالون وياي السناتر وياي الاعراس وياي يعني انا وهي نطلع وايد بروحنا لانه عبادي ما يحب سوالف البنات والشوبنج ....بس اذا عطيتها ويه يزيد الدلع واذا بس انتقدت شيء قالت لي ما تحبيني...

مزن مشكله حور على قولة ابوها مالها هوايات بس اكتشفت اني غلطانه في شيء دوم اشتري لعبادي اخر الالعاب الي تنزل وهي اتحراها ياهل...فعاد عبود عطاها الدي اس ماله شفتهاداستنها في كبيتها لاني قلت لها بوديها لج المحل يحط لج استكيرات عليها فديتها تتريا هاليوم وانا مشغوله بامتحاناتي بس واعدتنها قبل لا نسافر بوفي بوعدي...

هههههه هاي حور حتى مني تغار....فدييييتها والله ربي يحفظها

شوق القلوب

19-10-11 ||, 01:44 AM

حبيباتي الامهات...

بغيت اذكركم.. لات تغفلون عن تحصين عيالكم... و اذكروا الله دايما عليهم...

و استغلوا الاوقات اللي اتومونهم فيه بالاستغفار ولا بقرايه القران ...

و الله يعينا و يحفظهم و يصلحهم و يجعلهم من البارين ...

شوق القلوب

13-02-12 ||, 12:39 AM

السلام هليكم..

اكثروا المامات... و قلت المشاركات...!!

..

الله يعينا.. الحياه اتلهي بس الواحاد ما وده !

طير الحب

25-03-12 ||, 07:44 PM

تولهت عالواحات....

والله لهينا...دوام ويهال ...ودراسه...شخباركم :)

مــهــابه

27-03-12 ||, 04:03 PM

الله يعينكم يــا مامات الواحات

انا اقول لهم ام فيرست تـايم ، وضــايعه ف الطوووشه

يقـولون لي صرتي انعزاليه من يبتي البيبي ، احسسس البيبي خذت ٣ارباع وقتي

واحسس اني وايد خوافه ، اذا عطست ولا كحت ولا شي

احيان تنش تصييييح وماروم اسكتها واصيح وياها ، احسس اول تجررربه صعبه شويه

لگن بيتمون هم زينه الحياه الدنيا

الله يحفظهم ويخليييهم يــارب

يدوه يوم اروح لـها تتطنز عليّه وتضحگ ، اونه انتي ياهل ويبتي يـاهل
وتتخبرني انتي تقمطينهـا ؟ اقــول هيييه ، تيلس تتضحگ عليّه >> ماتقصد عييييوزنا لووول

قرموشة

05-04-12 ||, 12:37 PM

يالله أيــام .. صدق كبرنـا واستوينـا امهـات =)
عندي ( هــند ) وعمرهـا سنه ونـص .. وبيبي في الدرب ^^
يالله كيف الوقت يمشي بسرعه ..
اشتقنالكم ع فكـرة ;)

رمــش الغـــلا

07-04-12 ||, 03:56 PM

.. هي والله كبرنا واستوينا امهات والايام اطوف بسرعة ماشالله..عندي حميد فديته الحين 9 شهور ..أسبوع كامل مرض علي فايرس اسهال وترجيع بس الحمدلله النت ما يقصر طلعت طريقة لانه الاسهال عنده كان شي فظيع " عطيته نشا مع الشاي بدون شكر طبعا " والحمدلله ثاني يوم اصبح بخير .. بس طبعا ضعف وايد وايد لانه ما كان يتم شي فمعدته..

شوق القلوب

09-04-12 ||, 10:03 PM

مهابه .. ذكرتيني بربيعتي... عيالها كملو شهر.. واتقولي للحين ما جربت اسبحهم بروحي !!!!!!!

ام هنوووووووووده... بالبركه عليج.. ولو متاخره ... و الله يقومج بالسلامه :) لاتقطعينا

ام عبادي... هي والله الدنيا تلاهي... مستويه ما احصل وقت لعمري... ربي يباركلنا فيهم

رموووووشه...فديت عمره حميد.. ما يشوف شر... و الاسهال يتعب الياهل... غالبا ينومونهم عشان يحطولهم مغذي... ولا يعطونهم شراب عشان يعوضون السوائل...

عساه الحين احسن... طمنينا

مــهــابه

10-04-12 ||, 02:37 PM

قرموشه :
تقومين بالسلامه ..

رمش:

فديييييت خطيب بنتي انــا
بيشوتي بعد الاسبوع لي طاف مرضت
زجمه وكحه واحتقان ، مووووول ماتطيع تررررضع ، غير بطنها
بس الحمدالله احين احسسسن

شوق:

انا كملت شهرين وماما لي تسبحها عني ، اخااااااااف ><

انا لو تشرق اخاف ، وهقه اليهال يوم توهم صغار

وكل شي بصوووب ومعاناه السهر فــ الاربعين بــ صوب

الله يحفظهم لنــا يااارب
ويكونون عيالكم هادين مب شرا الليل عندي ، البزا لي فيها مب ف حد ٢

شوق القلوب

11-04-12 ||, 01:26 AM

هيييييييه يا مهابه .. ما شفتي حالتي وياهم امس...!! اتخيلي رقدتهم ٩ ع اساس انهم تعباني .. و نشولي ١٢ ... و تموا ليييييييين الساعه ٦ الفجر... كل الحالات النفسيه اطلعت فيني.... اخر شي تميت اصيح... حسيت ماعندي كنترول عليهم ...

الله يباركلي فيهم... و يطرح فيهم البركه...

طير الحب

24-04-12 ||, 08:43 PM

هههههههههههههه.....الحمدلله الحين مدارس انش من وقت عبادي وحور مدارس وعلايه الحضانة وانا الدوام...رقادهم مب متخربط

والله تولهنا عليكم...اقول شوق خلينا نطلع اذا بعدج في بوظبي

شوق القلوب

11-06-12 ||, 11:19 PM

السلام عليكم...

هلاااا ام عبادي... شخبارج ؟

يا ليت لو نقدر نطلع.. بس اصلا انا ما سكنت بوظبي ...

....

مهابه .. شخبار بشوووره ... مالج حس هالايام ؟!

مــهــابه

23-06-12 ||, 02:17 PM

هلآ آم حمودي:

بيشو طيبه الحمدالله ، دلووووووعه ، ماتبا حد غيررررري ولا بعد متعلمه شي يــا تشليني يـا اصيح ><

انتو علوم كتاكيتكم ؟ خذتولهم شي للعيد ؟ ولا بدري؟

شوق القلوب

24-06-12 ||, 09:48 PM

هلا ام بشوووره...

والله حمودي نتشاور افصله كندوره هالعيد... مع اني اشك انه بيطيع يلبسها !!!!!!

وشوشوتي.. ببدا ادورلها .. ع النت من يعيبني شي.. ما الاقي قياسها... ولا زال البحث جاري ...

مايهزك ريح

25-06-12 ||, 03:25 PM

هالمحل بينفعكم بس لازم اتسجلون من اليوم
http://www.melijoe.com/newsletters/062012/SOLDESE12/jmoins2/jmoins2en.html?news&aff=?aff=emailvision18b&utm_campaign=emailvision18b&utm_content=97568911811&utm_medium=email&utm_source=Emailvision

وهالسايت

http://www.melijoe.ae/

مــهــابه

25-06-12 ||, 07:53 PM

ام حمودي :
احنا اولادنا من يبدون ييلسون نلبسهم كندوره صباح العيد وبليل بدله
فصليله ولبسيه غتره ( وناااااسه )

انا خذت ل بنتي فستانين من cacharel
واحد اوف وايت وذهبي والثاني سماي وسلفر

وخذت لها قميص وجينز ارماني وكم بدله من مامز بابز

وبعدني بخذ لها من النت ؛ ياختيه نفس قصصتي ف النت كل شي يعيبني سايزها ماشي :(

مايهزك ريح :
شكراً مقدما ؛
بشوف الموقع احين

خاطري البسها مخور( تلي ) بس ماماتي متحلفتلي ؛

خيال الحب

08-07-12 ||, 08:12 PM

:a032: وانا وين ماماتي:a032:

الله يحفظكم يارب ويحفظ عيالكم ان شاء الله^___^

عقبال ماشوف عياليي :inlove:

مــهــابه

11-07-12 ||, 01:37 PM

آمييييييين يــآرب

انا بيشو محمومه من يومين مطعمتنهـآ ؛ تعووور القلب :(

عمة العيم

13-07-12 ||, 09:10 PM

هلا ماماوات الواحات

انا الحمد لله استويت ماما تاريخ ٢٧-٣-٢٠١٢
والحين ولدي حمودي كمل ٣ شهور ونص

بس مب عارفه كيف ابدا معاه الاكل... حاليا اعطيه حليب مع بسكوت

فيدوني @ـ@

خيال الروح

13-07-12 ||, 10:09 PM

عمه العيم

انا نفس حالج ..
بنتي كملت ثلاث شهور وتمشي في الرابع
ومب عارفه كيف ببدالها في الاكل يوم بتكمل الرابع ،،

مامات الواحات
عطونا من خبرتكم ^^

مــهــابه

14-07-12 ||, 12:06 AM

ياحياتي ع الحلويييين .

عمه العيم وخيال الروح :
مبروگين ويتربون ف عزكم

احم من خلال خبرتي المتواضعه والقصييييره جدا مع بنوتي ؛ مابدييييت وياه بالاكل يلييييين الـ٤ شهور
وحسيتها كل ما اعطيها شي وانتوا بكرامه تزوع ، خبرت دكتورتها وقالت اليهال امعاءهم ماتكمل يلين الـ ٦شهور ، وفي حد ف ال٤ وحد ٥ لكن بششششكل عام ف ال٦ شهور وهذا الشهر يكون الشهر المناسب

طبعا لازم اول شي تسسسون تست للاشيا اللي بتعطوهم ، انا قمت اعطيها اول ٣ جزر ( اوغره واحط ف الخلاط ويكون مهروس ، كنت بس اعطيها لقمتين او ٣ عسب اتاكد انها ماتتحسس منه

ولد حميتي اكبر عنها ب ٣شهور وظهرت له حبوب حساسيه من الجزر

خلاف ٣ كوسا بنفس الطريقه والحمدالله ماتحسست وعقب بطاطس

يوم شفت انه كل شي سليم بديت اهرسلها ويا العيش

لاتتوقعون انهم بيتقبلون الاكل بسسسرعه لان قابليه اليهال للاكل تختلف ، عندي هالبنت اكلها صعععععب بضرابه وصياح

جدولها كتالي :

اول ماتنش رضعه خفيفه
الظهر ع ال١٢ او ١ عبش مهروس مع حضار
العصر سيريلاك او بسكويت مع الماي لان يوم احطلها ف المرضعه يثجل عليها ويعورلها بطنها
المغرب جريب العشا شوربه شوفان او بطاطا مهروسه
يوم اتعايز اسويلها سيريلاك ابدل ب تفااااح مبشور

تذكرررت شي يوم كانت تمشي ف ال٣ شهور كنت اودن لها تمر ف الماي وخلاف اشخله واشربها واااااايد مفيد ويعطي صحه

انا من النوع اللي ماحب اخبص ل بنتي لكن حميتي ماشاء الله تعطي ولدها بليل عيش وروب وتعطيه هريس وكاستر ووايد اشيا
انا ما اطيع اعطيها مسوتلها جدول ومرتااااحه جيه

وبس

عمة العيم

14-07-12 ||, 09:51 PM

مشكورة مهابه...
ان شاء الله بسوي مثلج
انا يومين عطيته عيش مطحون ويا شوي سكر...بس مره وحده فاليوم يعني الظهر... و باقي الوجبات حليب...
حسيته دوم يوعان و يصيح و ياكل ايده و اي شي جدامه

ف وقفت العيش,,,, الحين احط له بسكوت فالحليب مرتين فاليوم.... و باقي الوجبات حليب روحه احس انه مرتاح... بس مادري يبالي اعطيه شي ثاني مع البسكوت هذا ولالا؟؟؟
والا اوقف البسكوت و ابدا وياه جزر مثلا؟؟؟ ولا اكمل البسكوت و اعطيه جزر بعد؟؟؟ عادي جي؟

هي صح و اعطيه ماي تمر و ينسون بعد بس مب كل يوم... تعرفين الهيازه و جي خخخخ

مــهــابه

14-07-12 ||, 11:10 PM

مممم لاتبدين وياه بالسكر عسسسسب يحب ةيتقبل الاشيا اللي فيها ملح
اذا جبده تتقبل البسكويت ولله الحمد ، حلو
عطيه هالشي حق رضعة بليل عسسب يشبع ويطول ف رقاده
من يخلص الرابع ويدخل فالخامس ع ثاني اسبوع جربي جزر مهروس ٣ ايام اذا الامور طيبه وف السليم كملي
التفاح المبشور بعد عادي لو تبدين به احين

الينسون عطيته اياه من اول اسبوع عسب الغازات واعطيها بعد جاي ميلوبيا وبس

السيريلاك فالسادس و

عمة العيم

14-07-12 ||, 11:20 PM

ان شاء الله
:heart:

عمة العيم

17-07-12 ||, 12:07 PM

هالموضوع وايد فادني
تعرفوا على لغة عيالكم يوم يصيحون هههه

http://yebab.com/بالفيديو-5-أصوات-للطفل-تدل-على-أشياء-محددة

خيال الروح

18-07-12 ||, 10:04 PM

عمه العيم

شفت الفيديو وايد حلو ومفيد في نفس الوقت

مهابه

مشكوره حبيبتي علي المعلومات ،،

رمــش الغـــلا

24-07-12 ||, 02:54 AM

ما يهزك ريح .. عيبني الموقع وايد ^_^

انا دوم اطلب لولدي من Childrensalon.com
childsplayclothing.com

شتشوته

23-09-12 ||, 06:46 PM

ليش الردود تطلع عندي غلط، اول رد طالع عندي اخر رد !

الله يحفظ لكم عيالكم يارب ، أنا عندي بنتي تعبانه شوي اليوم كحه وبغلم فديتها ماظن بيعطوني لها دوا بعدها صغنونه :(

مهابه جدول بنتج بأي شهر؟!

مــهــابه

24-09-12 ||, 04:39 AM

الحمدالله ع السلامه شتشوته..

بيشو الله يحفظها ؛عمرها ٨شهور ونص..

مايهزك ريح

24-09-12 ||, 02:28 PM

العفو اختي رمش الغلا

شتشوته

24-09-12 ||, 08:20 PM

الله يسلمج مهابه خخخخ مادري وين ضيعت الآي فون بدوره وبرمسج عالوتسب

فديتها بشوره الله يحفظها خذي لها ال event baby cooker فنااااانه

مــهــابه

26-09-12 ||, 01:54 PM

انا تلفوني الجديم في مهب الريح والارقام وياه كمان

انا بشاير ماتحب تاكل ، والله الاكل وياها بضررررابه
لازم حركات وابطل حلجي وسياسه ومنيه مناك عسب تاكل ><

بنوتج
ش قدها ؟ وشو سميتيها

شوق القلوب

27-09-12 ||, 12:34 AM

هلا بمامات الواحات...

شخبار الحلوين ؟

اليوم اتاكدت انه عيالي دلعتهم زياده عن اللازم... كل شي كل شي لازم انا اللي اسويه .. ولا الصياح ببيزه...

وفديييييييييت حموووووودي... دخل السنه KG1 ... بس نشه الصبح مب حلوه... الحين ماشي سهر.. لازم نرقد من وقت عشان الحق اجهزه و اوصله المدرسه...

..

ماشاء الله ع الكتاكيت الي بدوا ياكلون...
عيالي ما اكلتهم الا في السادس...بس اتحملوا و حاسبوا و انتو تعطون الياهل شي يديد...

شوشوتي فديتها طلع عندها حساسيه وايد من الاكل... كانت ع طول اترجع و يتحسس جسمها...

..

ووو شو الاخبار بعد ؟

مــهــابه

27-09-12 ||, 11:59 AM

يآروووحي ع الصغنونين انا، ماشاء الله حمدي كي جي ١
يالله عقبال شوشو ..

انا بيشو ارقدها بين ١٠وال١١ واتنش الساعه ٩ طبعاا للحين كل ساعتين او ٣ تنش تبا ترضع
بس مووول ما اعودها ع السهر ، واعطيهت قيلوله الظهر ..

بس ف رمضان كنت ارقدها عقب صلاه الفير لوول

يالله متى تستوي بيشو قد حمودي عشان افكر اييي لها اخو ولا اخت^^

الا انا

01-10-12 ||, 08:21 PM

^

الله يخليلكم عيالكم يارب ~

وناسه يوم اقرى ردودكم احس غير ..!!

دوم يوم خواتي يربون اول مره اقولهم تحبون البيبي !! يعني يوم اجوفهم يموتون عليهم اقولهم ليش يعني ؟ هههه سؤال غبي بس ..يقولون يوم بتصيرين ام بتحسين ..شعور غير ..~

الله يحفظهم ويخليهم لكم يارب ~

مــهــابه

01-10-12 ||, 10:28 PM

امييييين

جد جد ماحسيت ب ماما كثر ماحسيت بها يوم يبت بشاير
شعور ماعرف كيف
حب خوف ، فرح . مااعرف
بس بشااااير عندي ف الدنيا ،لو زجمت اقلبها مناحه ، خواتي يضحكون ويقولولي انتي متعلقه ف بنتج وايد
ومخلتنها تتعلق فيج
اقولهم شسوي :ضناااي هذي والضنا غاااالي

الله يحفظهم لنا ويرزق كل محروم

شتشوته

02-10-12 ||, 02:07 AM

مهابه بنتي الحين شهر ونص الله يحفظها وسميتها ميرهفديته حمودي الله يحفظهالا أنا امين يارب أنا شراتج مهابه بنتي. مزجمه من تتعب شوي اصيح ولو صاحت وماقدرت اسكتها اصيح وياها لوولالله يحفظهم ويحفظ لنا امهاتنا

صدى جوفي

02-10-12 ||, 11:05 AM

ميثوو عندي دخلت الروضة :11:
بانتم فالواحة شكلنا وبأنورث عيالنا عقبنا

صريح

02-10-12 ||, 06:49 PM

الله يحفظلكم عيالكم و يكبرون و تشوفون احفادهم ان شاء الله

شوق القلوب

03-10-12 ||, 10:53 AM

ااااميييييييييين يا رب...

و عقبال ما اتخبرنا سوالف عيالك :)

<<

اليوم حبيبي ما وديته المدرسه .. ورانا طلعه المول :4:

شتشوته

03-10-12 ||, 05:58 PM

سووووري عالتنقيعات هذا ردي مره ثانيه خخخخ

مهابه بنتي الحين شهر ونص الله يحفظها وسميتها ميره

فديت حمودي الله يحفظه
الا أنا امين يارب أنا شراتج مهابه بنتي. مزجمه من تتعب شوي اصيح ولو صاحت وماقدرت اسكتها اصيح وياها لوول
الله يحفظهم ويحفظ لنا امهاتنا يااارب

صريح امين وعقبالك يارب

صريح

03-10-12 ||, 07:55 PM

احنا خلاص شوبنا و عيالنا بيعرسون
و ناوين ع الحرمة الثانية بس لا تخبرون حد هههههه
:4:

قصايد غلا

04-10-12 ||, 08:34 AM

ااااميييييييييين يا رب...

و عقبال ما اتخبرنا سوالف عيالك :)

<<

اليوم حبيبي ما وديته المدرسه .. ورانا طلعه المول :4:

انتي و نعم الأم شوّاااقة :love: حلو يرتاح الولد يوم من المدرسة :5:

بس لو خليتيها بالخميس بيكيّــف :woot:

مــهــابه

04-10-12 ||, 11:02 AM

^
هههه

شتشوته :
يوم هم فالعمر بلشششه ، تتوهقين فيهم ، الله يخلي لي ماما اللي ربت وقمطت وسبحت بيشو لين كملت شهر ونص
وخلاف روحت عنهاااا ..

كنت اسهر الليل وافرها الصبح عليها ، عاد بيشو حششششره صياحه ماتروم لها بس تتحملها عشاني

الله يحفظها وتشوف عيال بيشو ياااارب =)

.

شوق:
انتي ام وااايد اوكي =)

البارحه رحت ادور ل بيشو ، السوق عوفه ><، كله مال البرد ، ماحصلتلها شي:(

الا انا

05-10-12 ||, 01:46 AM

^

صريح

اعتبر انه الرمسه وصلت لام سلطان ^_^ وشكرا

صريح

07-10-12 ||, 12:33 AM

^

ليش يعني ليش هههه

:k_wheelchair:

قصايد غلا

07-10-12 ||, 10:54 AM

مب ناقصتنكم هنه غير ملاك الروح :heart:

صدى جوفي

29-10-12 ||, 09:05 PM

أنا ما أقدر أغيب بنتي بتاكلني >> دحيحة من الحين تحب الدوام حتى فالاجازات تحن تبا تروح الروضة

شوق القلوب

29-10-12 ||, 09:10 PM

انا اليوم غيبت ولدي.. مب عشان الاجازه... جي طلعتلنا سالفه ..

المهم انه مستانس اليوم ...

صدى جوفي

29-10-12 ||, 09:27 PM

اصلا ما شي دوام رسمي نص الطالبات غايبات بس محسوب علينا دوام

شوق القلوب

29-10-12 ||, 09:31 PM

يا اختي كم بيغيبون... بس مدرسته اتصلوا يسآلون عنه...

طير الحب

02-02-14 ||, 08:17 AM

الله يحفظ لكم كتاكيتكم....

شوق القلوب

28-10-14 ||, 01:30 PM

السلام عليكم

طمنونا على كتاكيتكم ٫٫٫ كم اعمارهم ٫٫٫ وفي اي صف ؟

نجمة دبي

17-11-14 ||, 09:33 PM

اي كتاكيت .. خلاص كبروا ما شاء الله عليهم

فاطمة ٥ سنين
فجر ٤ سنين
محمد ٦ شهور

رمــش الغـــلا

09-12-14 ||, 01:43 PM

الله يحفظ لكم كتاكيتكم ..

حميد عمري 3 سنين ونص الحين " الله يحفظه "

مزايا

20-12-14 ||, 07:21 AM

يالله كيف كبرنا :)

تتوقعون عيالنا بيعرفون شي اسمه منتديات ؟

الاسطوري

23-12-14 ||, 12:08 PM

يوسف سنتين وثلاث شهور ودخلته الحضانة ينمي مهاراته .. أول فترة كانت صعبه بس عقب تعود ورابع زايد وكريم وأكبر وهاريسون وشنايا (ولا مواطن بينهم)

مــهــابه

09-01-15 ||, 10:24 AM

آنا صآرت بيشو ٣سنوات ..
سوآف توه يكمل سنه..

الله يحفظ هم ويبارك فيهم ويجعلهم من الذرية الصالحة..

الاسطوري

22-01-15 ||, 12:10 PM

آمين .. الله يخليهم لكم

شوق القلوب

27-01-15 ||, 09:36 AM

ماشاء الله عليهم .. الله يحفظهم و يبارك فيهم...

سن ال٣-٤ سنين.. هذا سن الشطانه... الحمد الله انهم يدخلون المدارس بعمد ال٤ ... يهدون و يعقلون شوي من عقبها...

الاسطوري : بنتي مخبلتبي من سوالف ربعها.. لين قبل ما ترقد و هي اتسولف عن شما وشمسه و شيخه و سالم و عباتولا ( دلع عبدالله ) واللسته الي ما اتخلص :surrender:

بس بصفه عامه اتحملوا عليهم من كثره اللعب بالاي باد.... ترى والله يخبلبهم... خصه اذا تموا يلعبون فيه وايد في الليل...

حاولوا اتحددولهم وقت معين... وعقب تاخذونه عنهم

مزايا

28-01-15 ||, 02:36 AM

انا ولدي ملعوزني عشان براعم و الايباد مع انه عمره سنه و ٨ شهور و السبب كله مني انا اللي خليته يتعلق بالايباد عشان ما يلعوزني فالطياره .. و الحين يالسه أكلها بروحي ؛( .. ما اعرف شو أسوي به ابغيه يعافه ..

لمّــاح

28-01-15 ||, 09:28 AM

انا عندي احمد, 3 سنين ..
الله يخليلكم عيالكم

شوق القلوب

28-01-15 ||, 09:40 AM

هلا مزايا...

حاسه بمعاناتج.. لانه للحين انا اعاني من هالشي ويا ولدي مع انه ماشاء الله صف اول ابتدائي... بس مثل ما اتقولين من كان صغير و عودناه ع الاي باد و براعم و الحين دزني جونيور... عااااادي استوى عنده اطلع عنه.. ولا يفتكر بحد دام عنده هالاثنين... وطبعا هالكلام يشمل البلاي ستيشن و حاليا الاكس بوكس ... !!!!

اللي رمت اسويله اياه الحين... قمت اخش عنه الاي باد.. عادي بالايام.. و خصوصا ايام المدارس... فالاجازات اعطيه بس احددله وقت... ساعه تقريبا واخذه..
واذا كنا بنسير مشوار طويل.. اعطيه في السياره عشان لا يحتشرون في الدرب...
يعني مجمل الكلام .. عطيه اياه في وقت الحاجه... بس مب دوم موجود جدامه..وخصوصا هو بعده صغيرون حبيبي...

حاولي اتخلينه يلعب برع.. وفريله بدائل يستانس عليهم... آلوان .. مكعبات وايد حلوه في سنه.. تطور قدراته العقليه.. سيكل.. كور .. سيارات.. وحاولي انت تيلسين تلعبين وياه.. وناستهم اتكون اكبر...

الله يعينا على تربيتهم التربيه الصالحه..
نفس الحال للتلفزيون.. اقوله هذا وقتك.. وهذا وقتنا...

شوق القلوب

28-01-15 ||, 09:42 AM

لماح .. هلا والله ..

ماشاء الله ... الله يخليلك احمداني و يباركلك فيه... ^ـ^

مزايا

28-01-15 ||, 08:00 PM

شوق ..

ولدي من النوع اللي اذا بيعشق بيعشق أشياء معينه بس مش كل شي يشده
و الطامه الكبرى الايباد عشقه الابدي اتوقع ههههه ..
المشكله اني حاليا عايشه برع الإمارات و الجو ابدا مايساعد ع اللعب برع من كثر البرد
ف يكسر خاطري انه محكور و ما يطّلع طاقته الا ف براعم و الايباد ..
لدرجه انه وديناه ديزني عشان يحب ميكي و السفره كلها عشانه و فالأخير عطوني ايبادي ولا بغلس عليكم ..

الله يبارك فيه و يهديه يارب

شوق القلوب

08-02-15 ||, 01:46 PM

هلا مزايا..

عيل انت وضعج غير دامج في غربه... محد بيلومج..
في مكتباتهم بتلاقين عندهم آفكار لالعاب و يوم بيكبر شوي ان شاء الله ..بتحصلين له جي العاب لصق و تركيب .. سوالف وايد يستمتعون بها اكثر من الموجود في البلاد...
يعني.. شوي شوي .. اخذيله العاب التركيب.. البزل.. او العاب حركيه ..كره سله.. بولنج.. من هالسوالف.. اللي ما اتخليه يالس طول اليوم و اتخليه يفرغ طاقته شوي..
الوحده في الغربه عندها مليون شغله اتسويها في البيت.. و تبا الفكه من حشره الصغاريه عشان اتلحق اتخلص..

الله يهون عليكم غربتكم و يردكم بالسلامه ان شاء الله .. :)

قرموشة

04-05-15 ||, 08:42 AM

بنــاتي :heart: هنـد و مـريم و لطــيفة :heart:
الله يحـفظهم ويحفظ لكـم عيالكم ويخـليهم :fa35:

رمــش الغـــلا

01-06-15 ||, 03:54 PM

^ حبيباتي الله يحفظهم ويخليهم ...

الحمدلله الله رزقني ببنتي عائشة ..

قلوب دبي

14-06-15 ||, 01:17 PM

ماشاء الله... والله يبارك فيهم
فيهم و يحفظ لكم عيالكم

حمد، بيكمل 4 سنوات
عبدالله، سنتين

الهيثــم

17-06-15 ||, 08:19 PM

الله يحفظ لكم عيالكم ويبارك فيهن ويجعلهم من الصالحين

وانا الحمدلله الله رزقتي ب ( صقر ) والحين عمره سنة واربع شهور الله يحفظه ويحفظ لكم احبابكم

شوق القلوب

01-08-15 ||, 08:31 AM

السلام عليكم

ماشاء الله ... الله يبارك لكم في عيالكم ، يجعلهم من الذرية الصالحه ..

..

، الحمدالله ربي رزقني ببنوته .. عسى ربي يجعلها قرة عين لنا
و بدا عدنا مواااال السهر ^ـ^ ،الله يعين كل الامهات :)

قرموشة

05-08-15 ||, 01:54 PM

الله يحفظهم يارب

أنامل قلب

06-08-15 ||, 02:05 AM

رجعت قريت الموضوع من بدايته ، حبيت ،،،
الله يحفظهم لكم ويحفظلنا عيالنا وحبايبنا يارب ،

اليوم حبيبي يسوفي قارصته نمله
توهقت بعد قلبي اييني يبي يصيح ويتحجج ..

مادري بالاول حطيتله خل ، عقب دهنته بفكس ولبسته دلاغ
عن يتعبث بيده تالي يدق ويهه ولا عيونه !..

الله يحفظهم لنا ويعافيهم من كل شر
ويديم لكم ذريتكم كما يحب سبحانه ويسخرهم ..

(Heart)

'،
.

أنامل قلب

02-09-15 ||, 02:26 AM

شو رايكم لو نقعد نكتب طرق تطوير مهارات الطفل وتعليمه بشكل عام وخاص سواء بطرق عمليه ، كتب مفيده لنا في التربيه ، برامج ، مقاطع فيديو ، ولهم بعد ملفات صوتية ومرئية تكون تعليميه وترفيهيه ينفس الوقت ، القنوات اللي تنصحون فيها ، أماكن الترفيه ، نوادي ومراكز تعليم خاصه ابهم من تعليم سباحه / رياضة / تحفيظ قران ، وغيره ..

بزمن تمكنت فيه الأجهزه منا مو غريبه ياخذونها اليهال متعه لهم كونهم يشوفونها بشكل مستمر ، والبديل هي الشغلات اللي بنقترحها ان شاء الله ..

^_^

الهيثــم

03-09-15 ||, 05:28 PM

^^ يحلييله الله يحفظه لكم ويبارك فيه

من الي لاحظته انهم ما يحبون التلفزيون الحين ويندمجون في الاجهزة الذكية الحديثة
بس لازم نحدد لهم اوقات معينة يلعبون فيها او يستخدمونها على اساس ما تأثر على صحتهم ونظرهم

أنامل قلب

07-09-15 ||, 02:29 AM

ويحفظكم أخوي ويبارك لكم بذريتكم يارب ..

امممم انا مش من محبي الأجهزه لولا انها شر لا بد منه ، الأمراض اسم الله على عيالنا مو فقط على نظر ولا عدم احتواءهم بالشكل المطلوب وانما توصل لامراض عصبية وذهنيه عافانا الله واياكم يارب ..

حاولو لا تشغلونهم بالالعاب الخاصة بهالاجهزه ، وبرايي ممكن تكون المرئيات لها ضرر اخف جدا من الالعاب والبرامج الاخرى بالايباد والأيفون وغيره ..

الخطأ اللي يصير ان الأهالي احيانا يستانسون لمن الأطفال يكونون متمكنين بهالبرامج والالعاب الالكترونيه ، حلاتها الالعاب العملية واللي فيها حركه وأدوات يتم التعامل معها بشكل مباشر ..

؛

أتمنى من كل من له وجهة نظر يفيدنا ، ولكل من عنده أفكار وطرق وأماكن تنفع تعلم الطفل والاهم انها تونسه وتخليه عايش المراحل الاولى من عمره بأجمل وأطيب واسلم الطرق ^^،

شوق القلوب

22-10-19 ||, 09:59 AM

السلام عليكم

شخبار العيال ؟؟

بالنسبالي برنامج جداً جميل اشتركت فيه و يساعد وايد .. هو برنامج معين المؤسس له د. جاسم المطوع ، خدماتهم حلوه و افكارهم و الاحلى وجود الاستشارات .. انصحكم فيه .

عمة العيم

10-11-19 ||, 09:47 AM

هلا ماماوات و باباوات الواحات

الصراحه عندي محمد عمره ٧ سنوات و مطلع عيني
عيالنا الحين بو سبع سنوات مب مثل قبل
يعني عيونهم مفتوحه ع كل شي ماشاء الله
يعنييييي جدا صعب التعامل وياهم
و برنامج معين صح مفيد وايد و يالس يساعدني

حاليا خشيت عنه الننتندو سويتش
و سويت كنترول علئ قوقل و سفاري و يوتيوب :shutup: لانه الحمدلله و الشكر شاف و عرف الاكو و الماكو .... ها كله وهو تحت عيني ماودره عند الخدم و طلعاتي وياه مول ماودره
الله يعين اللي يودرونهم عند الخدم و لاهين عنهم فالطلعات :shutup: