ممكن تشيرون علي .!

[أنامل قلب]

الســـــــلاااام عليكم ورحمة الله وبركاته ،
يا جعلكم كلكم بخيييــــــر وبال مرتاح ..

~،

اممم كالعاده موضوع ينطرح بواحة السيارات = شخص مو عارف يختار سياره .!

بس بغيت أقول قبل إني صدق ماعرف بالسياير ، يعني حتى اللي بيطرح رايه
يفضل ما يستخدم كلمات معقده ، تعاملو معاي بأبسط شكل ممكن ^^"

مثل ما قلت بموضوع الدردشه ، أبي آخذلي سياره تكون بحدود الـ 150 ألف ،
تكون أقل ولا أكثر شوي ما يخالف إذا اقتنعت ابها ، بس ماتكون فوق الـ 180 ..

+ تكون صالون ولا هاللي اكبر عن الصالون ^^" / بس مابي آخذلي فورويل ..
+ يهمني الشكل وايد ، من غير لا أهمل الشغلات الثانيه أكيد ..
+ يحبذ انها ماتصرف بترول وايد ، لأني بستخدمها بشكل دائم ، خاصه إن درب الدوام طويل ..

+ لو بالإمكان / اللي يفضل مثلا الأمريكي يقول ليش ، واللي يفضل الـ ياباني يقول ليش ،
لأني ماعرف الفرق امبينهم الصراحه ..

وبعد إذا إذا إذا بالإمكان طرح صور بتسوون فيني خير ،
+ تراني يايه من طرف مزن ، فهالله هالله فيني P= ..

/

يزاكم الله خير جميعا ..

~ ....

[الهيثــم]

1. انفنتي G35
6 سلندر ، 3.5 لتر ، عدد الاحصنة 325 أعتقد ..
سيارة قوية وسريعة وفخمة ، وحلووة للاستخدام البنوتي مثل ما يقولون ..

http://www.tirekick.com/TK06-May/images/07InfG35.jpg

وفي بعض الانواع من الكاديلاك بحدود هالسعر .. لكن ما تحضرني اساميهن بالضبط لذلك ما عرف أييب لج الصور ، الشرجاوي أخبر مني في الكاديلاك الصالون ..

وعندج الماكسيما اليديدة بعد حلوة ، وشبيهة بالانفنتي في القوة والفخامة تقريبا


http://www.gotryke.com/wp-content/uploads/2009/02/2009-nissan-maxima.jpg

والتويوتا أفالون بعد فخمة وناعمة ..

http://www.arabicmotors.com/new2009/Toyota/Avalon/photo/big/img1b.jpg

والمرسيدس C-Class جميييلة جدا للبنات

http://l.yimg.com/img.autos.yahoo.com/i/articles/2008_mercedes_benz_c_class/mercedes_benz_c-class_c350_x.jpg

هاي بعض المواتر إلي خطرت في بالي ، وإن يا في بالي شي بخبرج ان شاء الله ..

[أنامل قلب]

ونستني الصراحه ، طيب الله خاطرك ..

حلوين ما شاء الله :yes: ، فيما عدا التويوتا حسيتها مادري عاديه
يعني تشبه السيايير اللي اشوفها وايد بالشارع :fa46: !

بس بشوف بعد البقيه شو بيقولون ..

~

[الهيثــم]

الله يطيب خاااطري ^__^

--

ما تبين الأكورد ، ببيعها لج .. ! لول

[أنامل قلب]

^^،

هو بيني وبينك أخوي كنت بالاول ناويه آخذلي سياره جي مستعمله وعلى أرخص ،
عساس يعني توني مو من زمان ماخذه الليسن ، بس عقب هونت ^^"

~

[الهيثــم]

خذي لج لفة على الوكالات مع حد فاهم في السيارات وامورها .. وشوفي الأنسب من ناحية الشكل والسعر والراحة والجودة طبعا ..

وبالنسبة للمستعملة ..
دام ميزانيتج تسمح بالجديدة ، خذي الجديدة وريحي عمرج من صدعة السيارات المستعملة ..
السيارة يوم تطلع من الوكالة راااحة بال ..

[أنامل قلب]

عيشتني الجو ههه ..

بس إي أكيد باخذ لفه عالوكالات ، مع ان صعبه شوي لي اني اسير كذا وكاله ،
بشوف شور أهل الواحات قبل وعقب بشوف الاهل وتالي بقتنع أكثر بروحتي للوكاله ..

ما قصرت عمي ..

[الهيثــم]

الله يكتب إلي فيه الخـــير ..

[مزن هتان]

و عليكم السلام و رحمة الله و بركاته

أنا بعد مفكره أخذ سياره يعني بين هي و لأ =)
يعني ساعدونا اثنينا اذا ممكن

بس أنا أريد "فورويل، عائليه، حق دروب طويله"
أنا حاطه في بالي من الياباني ماني ماخذه الا لكزس استيشن
غير ذلك ودي ابـ يوكن و الا اسكاليد الاكاديا بعد شكلها حلو بس اشوفها صغيره
عمي اقترح عليه "x6، رنج اليديده و الا G55"

من اللي حطهن هيثم وايد عايبتني المرسيدس بس صغيره عليه >.<

ناطرينكم

[الهيثــم]

تبين نصيحتي ، إذا تقدرين على الاسكاليد خذيها مزوون ولا تترددين ..

[أنامل قلب]

خذي راحتج مزن بالموضوع =)

[مزن هتان]

على فكره هيثم معارضين أخذ زي الاسكاليد و الا اليوكن اونه حق الرياييل
لا تخلوني اتهور و آخذ سييرا P=

أنا دفشه بسواقتي وايد، يعني حفره رمله رصيف زيه زي الشارع عندي
يعني سياره تتحمل سواقتي العاثره

[الهيثــم]

خذي سييرا دبل تااير ^__^

[دهن العود]

~ِْ

انـآمل مـآقصـرتي واللـه نزلتـي
هالموضـوع . .

وانـآ بنظـم ويـآكمـ فالشلـة . , استـوآلي
شهرين وشـوي مـآخذه الليسـن وابـى آخـذلي
سيـآرة ,ابـوي كـآن نـآوي اييبلـي بي ام الفئـة
الصغيـرة واونـه مفـآجأة, مـن دريـت كنسـلت كـل شي
لآنهـآ مـب عـآيبتني! لول

هـمممـ اللكـزس الصغيـرة حلـوة, بـس
حسيتهـآ ظيجـة شـوي.

وعيبتنـي الاكـورد الكـوبي ,بـس قـآلولي دآم
عنـدج ميزآنية لـ الاكورد الكـوبي, لا تـآخذينها خـذي غيـرها!


اشييـرو علينـآ لـو سمـحتوا ^^"



~ِْ

[عهد الوداع]

انااااااااااااااااامل

بشريني يوم بتاخذين السياره ..
والله يوفقج عزيزتي ,,,
ومبروووووووووك مقدما لووووول ,,
والله يعطييج خيرها ويكفيج شرها ان شاء الله ,,,

ولا تنسيــــــــــن اللفه ,,^^

[أنامل قلب]

اختي دهن العود ، حياج ،
بس سؤال عبيط شويه ، شو يعني كوبي ههه ..

وبعدين ليش جم سعره .!

~

هلا عهد ، احم خوزو عني ، اوني اسوق :whistling: .!
تراج أول من توصله أخباري من الواحات ، والله يعينج علي =)

أفا عليج ، آخذج لفه ونص بعد P=

,

يالله وينكم يا أهل الخبره ،
ناطرين الإفاده منكم ..

[الهيثــم]

كوبي ، يعني باب واحد ..

هذي صورة الهوندا أكورد السيدان ( 4 أبواب ) 2009

http://www.fannat.com/news%5CAccord-TestDrive_files/image001.gif

وهذي الأكورد الكوبي .. ( بابين ) ، بصرااحة جميلة جدا .. وسعرها تقريبا 130 ألف

http://www.bernardiparts.com/images/Temporary/2008AccordCoupeProto_Fr_Bck.gif

[أنامل قلب]

امبيه حلوه جان تبي الصدق !
أحس كشخه جي تليق عالبنات ، زغطوطه ..

اممم بس والله حيروني وايد لمن قتلهم عن أول لسته حطيتها ،
احد يقولي خذيلج الانفنتي او المرسيدس ، و اختي تقولي عليج بالانفنتي بس ،
والوالده تقولي ولا واحد فيهم اونه في احلى =#

مادري بنطر لمن برد البيت بسألهم مره ثانيه عن اللي حطيتهم توه ..

[مايهزك ريح]

انفنيتي EX35 .. كتكوته وحلوه للبنات .. شوفيها يمكن تعيبج ..

http://www.prlog.org/10060565-2008-infiniti-ex35.jpg

وعندج كاديلاك BLS ..

http://www.blogcdn.com/www.autoblog.com/media/2006/02/Cadillac-BLS.jpg

[أنامل قلب]

^ الكادلاك اممم أحسها جي كـ شكل تشبه الشباب ^^"
ووو الانفنتي حلوه ، لولا إن اختي عندها مثلها اظني fX شي جي ،
فـ مو حابه آخذ شي يشبه سيايير اللي عدنا ..

ما قصرت أخوي :k_smile2: ..

~

اممم انزين أقول ، عايبتني الاكورد الكوبيه اللي حطها اخوي خطاب الصراحه ،
مادري بس اذا فيها عيوب ولا شي المفروض أعرفها ..!

مابي أتوهق عقب ، تراني هالشغلات ماحب أغيرها ، تصير عزيزه علي لول :fa46:
يعني عادي التم السياره معاي سنوات مديده ممدده :whistling: .!

[طفلة من هذا الزمان]

انصحج بجميلتي ،، لكزس آي اس 300 .. وخذي اللون اللؤلؤي رجــاءا :fa34:

تنطبق عليها كل المواصفات اللي تبينهـــا ..

سعرهـا بحدود ال150 -155 (سيارتي موديل العام من جي سعرها بهالحدود ماادري عن اسعار 2009-2010 ) ، بنوتيــة خالص بس نفس ما قالوا ضيجة شوي من داخل ،، اذا طلعاتج مب عائلية تنفع لج .. واحسها اقتصادية في البترول .. يعني الـ Full ب80 تقريبا .. و معروفه السيارة رااقية كشكل خارجي و داخلي ..

عني ناوية اغيرها جريب بإذن الله للكزس ستيشن ،، ما تهووون عليه لكسي (هذا اسمهـ:4:ـا ) بس مشكلة طلعااتي عائلية و احتاج سعة من الداخل ..

بشرينـــا عنج و انا اقوولج مري ع الوكاالات ترى متعة .. وممكن تطلبين تيست درايف :a049:

موفقة خير وبشرينــا عنج أختي ،، ومبروووك ع الليسن ..

انا اقووولج خذي سيارة وكالة مرة عن مرتين .. وعيشي حياااتج :whistling:

[أنامل قلب]

هلا اختي طفله :fa38: ..

بس عشان أتأكد قبل ، عرفتوني ميح ! // تقصدين هذي صح :

http://saudigear.com/saudi4x4/IS300/ZIL0801.jpg
http://saudigear.com/saudi4x4/IS300/ZIL0901.jpg

لو تقصدين اللي بالصورة ، فـ تراها حلوه ما شاء الله ،
بضيفها باذن الله باللسته عساس أمر أشوفها بالوكاله ..

ويالله زين دامج كنتي مرتاحه ابها + تتهنين بالبديله كذلك =]

~

إي أكيد وناسه ، وأكيد بحطلكم البشاره ^^،


مـــــااااقصرتي ،.

[مجموعة إنسان]

لا تاخذين هوندا ... نصيييحة ...
خفيفه واايد وااايد واايد
وقطع غيارها غالية ..
والبريك لام يتغير كل ٦ شهوور

اللكزس وللا فلااا
صدق صدق راحة في السواقه
راقية
سعرها فيها

انا مجرب كل انواع اللكزس

عندج الgs300 هذي عند اختي .. وايد حلوة في السواقه ومريحة واااااايد

is 300‏ بعد حلوة وايد بس صغيرونه وهذي بعد حرمه تسوقها اللي هيه خالتي ‏...




es350 حلللللوة واضن رخيصة وكل شي فيها حلو
تخيلي انامل ان هذي الأخيره ما شافت الوكاله ابد ابد


وعندج بعد هذي rx350‎ ‎‏ وااااايد حلوة بناتية بعد ...
كانت عدنا النسخه القديمه .. اكرفت كررررف الحمااار
ما شافت الوكاله ابددد
لما وصلت ال٣٠٠ الف كيلو اختربت لان صدق كسرناها .. من ايد لأيد ...
وعدلناها وتمت فتره بعد
عقب لما بعناها على التكسير اللي فيها وكانت مكمله ٤ سنين .. انباعت ب٥٥ الف ...

نصيييحة انامل
لا تقربين من الهوندا والأمريكي ..
خذي لكزس وافتكي من صدعة الراس والوكالات والأعطال ...


وعلى قولتهم اللكزس شييييك
يعني سعره عقب ما ينزل واايد اذا بتبيعينه..

انا عن نفسي بس اتريا يزيدون راتبي على طوووول بشتري سيارة ابوي
صدق ارتاح لما اسوق هالسيارة وااايد ... خاصه في الخطووط الطويله .. ما تتعبج ابد

[الصامت]

نصيحتي لج بموتر من هالموترين

C-Class

is-300

موترين فخمين وبنوتيين وبعد عمليين

[دهن العود]

الهوندا الكوبي كانت داشه خاطري بس اخر شيء
اقنعوني اين ما اخذها، ف الحين خلاص اقتنعت اين ما اخذها واحد الاسباب
انها خفييفة وايد.

شو رايكم فالمورانوا او الطوارق ؟

جماعة الخيير، محد ياب طاري البي ام؟
ماتنصحونا فيها؟
شيء انواع كوبي حلــوة !! قلت بجـوفهم فالوكـآلة
لان صـدق اشكالهم حلـوة..
محتارة بين البي امـ كوبي والسي 200 واللكزس بس اللكزس اخر شيء لوول


بإنتطآركم ...

[أنامل قلب]

حيرتوني وايد :ohboy: .!

[أنامل قلب]

انزين اقول ، انا عيبتني الانفنتي + اللكزس آي اس 300 بعد + لازم بقول ان هم الاكورد عايبتني لولا الانتقادات ^^" ،
بس لو حطيت الالتيما كوبي ـ 2010 ـ ضمن اللسته ، في أحد بيعيبها ..!؟

مادري حسيتها حلوه مع اني مش متأكده منها جان تبون الصراحه ، يعني مادري إن كانت داشه خاطري ولا لا لول ،
بس بغيت استفسر قبل لا أمر الوكاله ..

ولا عموما ما تنصحون بالسيارات الصغيره / اللي ابـ باب مزدوج .؟!

[أنامل قلب]

اخوي ضحك عليه ، اونه أحد ياخذ التيما لول
يقولي معدنها مب شي =#

الصراحه وهقه ، احس لاعت جبدي من طاري السيايير ..

[الهيثــم]

لا تفكرين في الألتيما ، واايد خفيفة ، ربيعي عنده وحده 2008 ، ماخذنها من الوكالة ..
ويوم ساق سيارتي الاكورد 2006 ، قالي سيارتك وااايد أحلى وأثبت ..

وبالنسبة للهوندا طال عمرج ، بعتمد على طريقة استخدامج للسيارة
أنا ولله الحمد السيارة عندي من ثلاث سنيين وشوي ، ما اشتكيت منها في أي شي
لأن استخدامي للسيارة الحمدلله راقي ، أسرع فيها وأخترش شوي ، لكن بعقل ، والسيارة لازم تعطيها مثل ما تعطيك
يعني لا تبخل عليها عشان ما تبخل عليك وتخون فيك ، التزم بأخذها للخدمة بين فترة وفترة ، وبتكون سمن على عسل ... وبتظل بحالة الوكالة .. ( تعالي جربي هنودتي وبتعرفين السبب )

والحين أكثر الوكالات تسوي عروض ، " عقود الصيانة "
تاخذين السيارة وتدفعين مبلغ بسيط ، يمكن 3000 أو أقل أو أكثر بـ شوي ، ويكون السيرفس مجانًا لفترة طويلة تقريبًا ( 60.000 أو 100.000 كم )

وبالنسبة للكزس ، سيارة حلوة ، وسوافتها جميلة .. ولكن خدماتها في الوكالة غالية .. بس تظل سيارة قوية وتتحمل ..

وأهم شي انج تستخيرين ، والله يكتب إلي فيه الخير ..

[عهد الوداع]

عيل اذا فكرت اشتري سياره بستشيرج اول الناااس :fa47:

[أنامل قلب]

اذا يعتمد على استخدامك للسياره ، فأكيد استخدامي ما بيكون أسوأ من استخدامك ، احم :fa38: ،
ووو ماكنت ادري عن هالاجراءات ،..!

هي أساسا داشه خاطري وايد ، لكن أفضل أسير الوكاله أشوف اللي بشوفه قبل ،
وعقب برد لكم خبر بالموضوع ..

وأكيد ما بننسى الاستخاره ، بس تقديم الأسباب كذلك واجب ^^

ما قصرتوا جميعا ..

~

عهد ، شكلج ناويه على شر P=

[رمــش الغـــلا]

اخوي ضحك عليه ، اونه أحد ياخذ التيما لول
يقولي معدنها مب شي =#

..


:glare: ..!!

[أنامل قلب]

اويه رمش لا تقولين =#

تراني مالي خص ماعرف شي أساسا بالسيايير ،
بس مافي سيارة بالأخير مابها عيوب .!

جني توهقت ..

[رمــش الغـــلا]

لا تفكرين في الألتيما ، واايد خفيفة ..


:k_icon9:

[ذنـيـنـي]

لا تحجين لحيتج
قصدي حنجج

الاكورد الي هي سيارتي و سيارة هيثم
احسن من الاتيما الي هي سيارتج
و شكلها بعد احلى و اجمل

سيارتي يوم ادلعها اسميها هنّوده

انتي شو تسمين سيارتج :3:

:fa44:

=======

انامل

مول ما انصحج بالسيارات الكوبي و خاصة الاكورد و الالتيما
اولا سعرهم غالي
و ثانيا وايد ملفته و خاصة يوم بنت تسوقها :smile:

انصحج باللكزس IS300 او الانفينيتي الفورويل الصغيره

القي نظره على وكالة بي ام دبليو
على حسب علمي سيارات بي ام دبليو عليها ضمان و عقد صيانه لمدة خمس سنوات بدون تحديد المسافة
مري على الوكاله و شوفي سياراتهم :smile:

[الـيـاه]

^ ههههههههاااي ياويلي على دلع سيارتك P:

[دهن العود]

~ِْ

ذنيـني:~

هههههه هنـوده ولآ فطومه ههههههههههههههه
كشششخـه الاسـم . .

اممممممـ مـآآعرف صرآحه بـس مـب وآيـد اللـي نصـحوني
بالهـوندآ !! خفيفة والخ الخ الخ .!!

وعـن طـآري ضمـآن الـ بي ام . . صـح تـرى 5 سنـوآت
والـ بي ام قـويية يعنـي اوكـي حق المبتـدئـآت . ,

وعـن سـآلفة الكـوبي ملفتـة للبنـآت , صـح مـآقول لآ
بـس تـرى احيـن شـي وآيـد بنـآت يـآخذون كـوبي!
مـب شـرآت قبل يعنـي, احين لـو شـآفوا وحـدة
رآكبـة كوبـي, مآبيكون شي غـريب !




لـي عـودة . *~


~ِْ

[الهيثــم]

ذنيــني ، فديت الهنودة والله .. محد يسواها يا خي ..
هوووندا تعزك وتحبك ، ولا مرسيدس تذلك .. لول ^__^

=====

صح كلامكم بخصوص الكوبي ، ملفتة نوعًا ما للبنات ..
خذي الانفنتي أنامل ، حلووة ، إلي انا حطيت صورتها ..
أنا جربتها ، عيبتني ، ما شاء الله قويية وصااروخ

=====

غير هااا ، سيري وكالة الجمس ، وظهري لج جمس سييرا شرات هااي .. ^__^

http://images.automobilemag.com/features/news/0708_z+2008_gmc_sierra_denali+front_corner.jpg

آآآآآآآخ يا قلبي ، ويلوموووني في حبه .. !

[رمــش الغـــلا]

لو أدري انكم بتقطعون الالتيـما ما دشيت الموضوع ّ!!

للأسف سيارتي عزيزتي =(

راحت عني اليوم وبسوق الاستيشن من اليوم وسـآير حتى اشعار آخر =(

قلبي عورني وانا اطلع اغراضي منهـآ ..


=====

ذنيني ..

كله ولا رآعي الهنودة احلى دلع هههه ..!
لو عندكم موتر موووووووتر مادري شو بتسوون فيني الا اكورد لول ^__^

[الهيثــم]

رمووش ، الألتيما حلوة ما نذمها واايد ...
بس تظل الأكورد لها ميزتها .. سوقي الاكورد وبتعرفين الفرق ^__^ صدقيني لول

[رمــش الغـــلا]

كل هذا وما ذميتوهـآ ..!

في نظري الالتيمـآ بناتية أكثر من الاكورد عسب جيه احب سوآقتهـآ..~

^__^

[أنامل قلب]

حرام عليكم لا تقولون تلفت لأنج بنت ، صدق داشه خاطري ..

أخوي ذنيني ، اممم هو بيني وبينك بعدني ماروم أبدي رايي دامي ميح بهالسوالف ،
يبالي أسير الوكاله قبل وأشوف السيايير اللي حبيتهم من اللي رشحتوهم لي ..

بس صدق صدق صدق وااايد داشه خاطري هالسياره ، كتكوته وأحسبها تناسب كوني توني ماخذه الليسن ،
ماعرف في حال رسيت عليها وخذيتها ، تراني ما بخليها جي ، عالأغلب بسويلها مخفي ، يدوب بيبين ان في أحد قاعد ..

ماظني لهالدرجة متفيجين يدققون بالسياره يشوفون منو فيها =$

,

أخوي خطاب ، مابي الصاروخ :ohboy: .!

صح الانفنتي حلوه ، حتى الـ لكزس اللي طريتوها ، بس ماعرف ،
ما دشو خاطري كثر هييج ، حتى أخوي لمن طريتها ماقالي شي ، بالعكس مدحها .!

وشو ها بعد :crazy: ، لو سمحت حبها بعيد عن الموضوع :tongue: ..

بس حلوه عالشباب صدق .!

,

رمش / قوليلهم أدلعها [ تـــومه ولا لاميــتا ..!

جني بتكفخ ..

,

دهن العود :a010: ~.

[الهيثــم]

أنامل خذيلج هالجمس ، انا باخذ سودة وانتي خذي حمره ^__^

[أنامل قلب]

^ أفضل آخذلي سيكل هههه

[العجيبة]

هههه

اليوم شفت وحدة عندها التيما كوبي وفوووق ما هي كوبي حمراا بعد !! صدق صدق ملفتــة .. بس واييد حلوة ...
حتى اللي كانت تسوقها حسستني انها راكبـة شي شيي ولا جنه آخرتها ألتيما خخخ


انامل خذي المرسيدس C class واااايد حلللوة .... وحدة من الربع عندهااا .. صغنــونــة وبنـوتيـة ...

[مجموعة إنسان]

مادري
انا مو مقتنع غير باللكزس

لان اكثر بنات العايله اللي يسوقن عندهم

[المزوحي]

أنامل شو رايج BMW الفئة الثالثة

http://www.arabamodifiye.org/bmw-320/bmw-320-2010.jpg

[رمــش الغـــلا]

بالعكس مجموعة انسان ..

انا مول ما اقتنع باللكزس .. البي ام غييييييييير =)


====

انامل .. يبالج الصراحة جمس بتستوين حديث الموسم لووووووول =)

[مزن هتان]

شلون يعني الكوبي مش للبنات و ملفته !!
عادي لا تقولون جيه

بعدني متردده + طلعوا لي بـ موضوع يخليني أأجل موضوع السياره شهر و الا شهرين
و راح اختار بين اللكزس 570 و الا بي ام ضرب 6

أنامل اللكزس الصغيره فنانه و اكو وحده من فئة F اظن حليوه

[أنامل قلب]

هلا العجيبه ، يمكن لأنها حمرا حسيتيها جي ملفته ، أو بشكل عام لأن مانشوفها وايد بالشارع .!
مع اني ما قمت أحب اللون الأحمر عالسيايير وايد جان تبين الصدق ،
يمكن من زود ما أشوف كل من هب ودب نقى اللون الاحمر لسيارته ،
أحس تخيس بسرعه ، وتبين السياره جديمه ..

+ خلو المرسيدس عـ صوب P=
أحس سيايير المرسيدس كلها خقه عالفاضي :k_icon9: ..

~

أخوي مجموعه ، تراني حاطه سيارة اللكزس ضمن اللسته ،
اللي هي أضن اسمها آي اس 300 ..
=)

~

أخوي المزوحي ، حلوه ما شاء الله !.
بس هذي أكيد سعرها مرتفع وايد :fa36: ..

~

رمش ، ما اتخيل الصراحه شو بتكون ردود الأفعال ،
حلوه هذي حديث الموسم ههه ..

على فكره انا اضخم سيارة سقتها النيسان بترول ،
وحتى لمن اسوق السيايير الصغيره يضحك علي الوالد ،
اونه يقولي شو من ريول عندج جي مجدمه السيت P=

مادري هل كل البنات جي ولا شو السالفه ..

بس ربي لا يبليني ابـ هالسياره :doh: ..

~

مززززن ، سبحــــااان الله كنت ابي ادز لج رسالة اقولج تعالي الموضوع ،
اونه ابيج توقفين بصفي :fa38: ، بس ييتيني بروحج ، عفيه عليج خلج معاي ..

ويالله ان شاء الله بيفيدونج =]
بس عن السياره هذي ، فشكلها حلو مع اني اظن سعرها مرتفع ،
تراني مول ماعندي فكره عن الأسعار ولا حتى من بعيد ..

~

كل مره اقول اليوم بسير الوكاله ، الاقي الاهل منشغلين ابـ شي ،
ان شاء الله باجر ولا عقبه يفضولي ..

[الهيثــم]

كورولا عليها عروض ، شو رايج فيها .. ؟

[أنامل قلب]

هي زينه ، بس ماحب الكورولا وايد ،
عموما التويوتا يعني ..

يمكن لأني مو حاطه ابـ بالي آخذ سياره أغيرها بعد سنه ولا سنتين ،
أبي شي أحبه ويكون داش خاطري صدق عشان لا أمل تالي ..

[دهن العود]

~ِْ

بـآآآكـ . . ^_^


انـآمل :~ :$

هههههههههـ كششخه انـآمل لو تسوقين
جمـس , هههههه

مووول مـآحسسهـآ تلييـق حـق البنـآت حتـى لو
مـب نحن اللـي نسوقها بس جيي راكبين فيهـآ .

بالعكـس الكـوبي احسسهـآ دلـع اصـلآ .. حـق بنـآت
وجـيي .

ماعرف ليش انا عن نفسـي مـآحبيت شكل الالتيمـآ
الكـوبي .!

خـآلي يشجعنـي آخذ اف جـي هههههه
الاف جي وين وانا ويـن دخييله!
مـن قـآلي وانـآ اضحكـ لول


سـآلت بنت عمـي عن المرسيـدس
قـآلت لـي حلـوة صح بس حق الخقـة وكـ اسم
بـس مـآفيهـآ اوبشينز !!
يعنـي بس كـ شكـل مـن بـرع . .


سـوو شكلـي بشلهـآ مـن رآسي مع انهـآ
عـآيبتني =(


ولـي عـوودة


~ِْ

[مزن هتان]

أنامل قلب ما عليج متابعه من خلف الكواليس =)

دهن العود انزين من صجه خالج شكو ما تاخذين فاطمه جاسم ؟
قويه السياره فالرمله، كلش ما تردج

[دهن العود]

~ِْ

مزوونـه :~

واللي يرحم لي والديج انا شو يوديني
صـوب الرملـة !؟

نفـس كـلآم خـآلي, يقـولي قـوية فالرملـة
وجييـه , جـآن اقوله شـو يوديني اصـلآ ..
بيــني وبينـج بـدت تدخـل فرآسـي بس احسهـآ
شبـآبية .. ولا شـو رآيج؟



~ِْ

[تحفه]

مممم ... فكرتي في الجاغور؟

http://www.post-gazette.com/pg/images/200804/jaguar_xf_2009_30_500.jpg

اتجنن

2009 Jaguar XJ


http://images.automobilemag.com/future_cars/2008/0609_z+2009_jaguar_xj+front.jpg

http://images.drive.com.au/drive_images/Editorial/2009/07/10/2009_Jaguar_XJ_23_L_700.jpg

http://www.carbodydesign.com/archive/2009/07/11-jaguar-xj/Jaguar-XJ-Interior-3-lg.jpg

:heart:

[الهيثــم]

أنامل ، لا تاخذين أف جي ، صح إنها حلوة وتعيبني .. والبارحة كنت في الوكالة ، شفت الـ 2010
فيها تغييرات بسيطة جدًا ..
بس أحسها تكسر الهاجس الانثوي هالسيارة ، خليج عالمواتر الرقيقة احسن ..

[دهن العود]

~ِْ

تحفـة
ادييتـج الجـآكوآر رووعـة وخـآصة اليديدة
بـس مشكلتهـآ اسعـآرها مـرتفعـة ع الفـآضي . ,

حتـى المـوديل الجـديم اللـي محـد يركبـه غـآلي ع شـو
مـآدري .



~ِْ

[مزن هتان]

هيثم أبويه ألبس النظاره
دهن العود تطري الـ اف جي مش أنامل


دهن العود : لا تمشين عـ رمستي
زي ما قال هيثم مادري شو تسوي بهاجس الاناث
بس عن نفسي تعيبني هالسيايير الشبابيه

[الهيثــم]

هههههههه أدري ، بس دهن العود مقترحه هالشي عـ أنامل نوعًا ما ..
فـ أنا متأكد إنه دهن العود ما بتاخذها عشان جي ما قلت لها ، بس أنامل تسويها يمكن تاخذها لول

مزن ، دام جي السالفة ، مالج إلا جمس سييرا وانتي والخير رباعه

[دهن العود]

~ِْ

مزووونتي :~

لا مـآ بآخذهـآ .. لآنهـآ شبـآبية
واحسسها ماتليق للبنـآت رفضتهـآ لول



~ِْ

[عهد الوداع]

هاا

انامل على شووو استقريتي ,,


مزن ودهن العود ....وانتواااا بعد ^^

[أنامل قلب]

دهن العود ، شفتي كيف ، قام كل أحد يتخيلني أسوق هالجمس :doh: ،
ع قولتج حتى لو قاعدين فيها بس أحس جي مادري شلون ^^"

وامبلا آنا معاج ، أحس الكوبيه جي تناسبنا نحن :k_devil2: ،
مع ان رفيجتي تقولي بالبدايه اوك بس عقب بتتعبين من سالفة القعده ورا ،
لكن مادري داشه مزاجي ، حابتنها ، ويصيييـــر خير ..

~

تحفه ، ياعيني أنا عالجاكوار =)

~

مزن ، حياج دوم =]

~

أخوي خطاب ، الحين آنا عادي آخذلي سياره دفشه :mf_leia: ،
شكلي بعد هالتعليق بسويها صدق وبفكر بالموضوع رسمي :icecream: ..

عالأقل بيخافون مني الجماعه !.

~

عهد ، استقريت على إني محتاجه أحد يوديني الوكاله أشوف السياره اللي باخذها عالأقل !
حاليا نمر بأزمة وقت ، محد فاضي عدنا ، والوالد أهو المفروض يفضالي بس ما يلحق هالكمن يوم ،
ارد من الدوام أنام واقعد من النوم واهو بعده ما يكون رجع البيت ، وإلين يرد يكون الوقت تأخر للطلعه ..

شكلي بتمصلح ع مزن وأخليها تمرني :whistling: !.

[دهن العود]

~ِْ

صبـآحكم فـل يـآلحلـويين . ~*

نمـووولهـ :~

لووول . ,
تعـرفين هـآي هي مشكلـة الكوبـي بـس
اذآ بتـآخذينهـآ حطي فـبالج مـآترومين تظهـرين ويـآج
شلـه . لآزم بالكثير 2 ويــآج واحد جـدآم والثـآني ورى ..

انـآ يـوم اظهـر , الاغلبيـة البشـآكير بيكـونون ويـآي فـ
عشـآن خـآطرهم لآزم نشـوف حـل يـرظي الاطـرآف , هع بس
مـآبسويلهم سـآلفة , شو سـآيرتي ولا سيـآرتهم , آنننننننننـه لوول



لـي عـودة


~ِْ

[مزن هتان]

ربي يحييج، من عيوني يا أنامل
بأي وقت مزن ما تردج ان شاء الله

[أنامل قلب]

^ ما تقصرين مزن =]

دهن العود / لول أحس مو لهالدرجة ،
عادي ربعي كلهم ضعاف يعني ينفع أدخل وحده ونص زياده ^____^ ..

لا صدق أحس المشكلة بس في الدخله والطلعه ، يعني ما بيكون بنفس راحة البابين ،
بس أحس ما بيأثر وايد ، مو من زود ما بقعد اظهر بطلعات وجي ، اللهم جان مع الاهل شوي ،
والطلعات العاديه للدوام وجي ..

فـ يعني ، ماحسها شغله بتأثر وايد خاصه لنا نحن البنات ..

احليلهم ، سلميلي عليهم ، قوليلهم في وحده ماعرفها تسلم عليكم ^-^

~

[دهن العود]

~ِْ

هـممممـ . .

على حسب كل واحد وجهـة نظـره ^_^
انـآ اششـوف جيي .. لآنـي مجربـة سيـآرة اخـوي
البـي ام الكـوبي .. وآيـد ظييـق من صوب الريوول
وفالدخلة والطلعـة .. .. وجيي يعنـي


هههههه سـلآمن يبـلغ .. افـآ عليييج



~ِْ

[أنامل قلب]

^ اها ، مادري تراني ماجربت اقعد بسيارة كوبيه ،
بس كنت اتكلم من ناحية العرض ، عرض السيارة يعني ..

ممكن فعلا من صوب الريل تكون ضيجه ،
بس مشكلتهم اللي بيقعدون ورا ههه ..

:k_smile2:

[دمعة شوق]

مبروك مقدما يـ آنـآمـل ،،
واذا مفكره فـ آللكزس فـ هي جدا راقية ومريحه ف السواقه
والانفينتي بعد حلووه

\

واستنادا على كلام عهد الوداع نتريا اللفه
:tounge:

[المزوحي]

خلاص انامل انا اقولج بي ام ^_^ خذي الفئة الثالثة في حدود 185 ألف شوفي مواصفات اقل بتكون ارخص او شوفي

لو يعطون خصم

[الزرعوني]

http://www.vw.com/cc/en/us/



http://www.toyota-mideast.com/aurion/ar/index.html



http://www.audi-me.com/me/brand/en/models/a4/a4_saloon.html

[الموز]

صالون لكزس ( IS )

فورويل انفنتي ( EX )

[خيال الحب]

نقول راينا ولا نقولج مبرووك على السيارة:14:


خذيلج اودي:fa51: وبــس

[خيال الحب]

هذي الA4

http://i429.photobucket.com/albums/qq12/nqfaq2/audi/Audi_A4_2010_front.jpg

http://www2.diariomotor.com/imagenes/audi-q5-spy-0.jpg

وهذي الQ5 بعد حلووه


ولو تبين وحده بنص مليون خذي هذي:biggrin:

http://www.audi.co.nz/newcars/a8/s8/images/gallery1.jpg

http://www.carztune.com/wp-content/uploads/2009/06/audi-s8-by-mariani_2.jpg

S8:love:

وبطلع ريس وياج:biggrin:

[أنامل قلب]

أخوي المزوحي + اختي الموز + أخوي الزرعوني ،
مشكــــوووورييييين وما قصرتو =)

دمعة شوق ، ومن طيب خاطر ^-^

أخوي خيال الحب ، عساس إني خلاص استقريت عالسياره ،
بس من ييت بتوكل خلاص وحده الله يهداها خلتني أرد أتردد "شويه" ،
+ اليوم صديقتي طرتلي الاودي ، تقولي بيسوولي عليها خصم من الخاطر !.

أحس وايد نطرت ، محتاجه أظهرلي سياره قريب ،
احليله بابا مو من زود الحيل اللي فيه رايح راد يوصلنا ..



وخلاص ما طلبت ، أتحداك ،
كم تروم توصل ، 100 / 110 / 119 :k_devil2: !.

لول

[عهد الوداع]

بشرينا (:

[عهد الوداع]

مبروووووووووووووووووووووو وك ع الاختيااااااااااااااااااا ااار الحلوووووووووووووووووووو والله يعطييييييييج خيرهاااااا ويكفيج شرهااااااااا عنووووني

واتريااااااااااااااا اللفه ...^^