سؤال عن جامعة الشارجة

[ريم العين]

السلام عليكم

بسالكم

شي مواصلات لجامعة الشارجة للي ساكنين فراس الخيمة
؟؟


وممكن معلومات عن جامعة الشارجة

وهي جامعه مختلطة ولا لا

وتخصص الهندسة صعب ولا سهل
شكلي بدرس فيها:fa34:


اترياكم

[عفاريتووو]

عليكم السلام



اظني هيه شي مواصلات لراس الخيمة

و عن لو هي جامعة مختلطة ولا لا
حسب التخصص اللي بتدرسينه
الكليات المختلطة هي كليات الطب و طب اسنان و الصيدلة و العلوم الصحية و الفنون الجميلة
لكن باقي الكليات المفروض انها مش مختلطة الا اذا انتي و حظج خذتي كلاس العدد فيه قليل
فــ بهل حالة ممكن انه يخلونه مختلط !!

بعدين حتى المختلط يكون بحدود يعني الاولاد يكونون بصوب و البنات بصوب ..

[المقاتل]

مرحبا ،،

السموحه على المداخله بس لاني درست فيها ممكن افيدج بكمن معلومه .. واحد انها مش مختلطه .. ثنين فيها مواصلات اما بالنسبه للي من راس الخيمه مش متاكد بس الي احيده انهم يوصلون الطلبه للمناطق البعيده .. بالنسبه للتخصص الي تسعين له ( انا ما درست هذا التخصص ) لكن عسب اكون ( وبدون ما احبطج ) وممكن يطلع كلامي غلط بانه هذا التخصص ضعيف فهالجامعه وكمن طالب اعرفهم اشتكوا ( وما اعرف شي من صحة كلامهم ) بس الجامعه تشتهر بتفوقها في مجال القانون اكثر عن بقية التخصصات .. والاداره :k_special2: يبالها درب طويل عسب انها تتطور ( مع احترامي لطلبة جامعة الشارقة :k_devil2: بدون زعل ههه ) ولكن في الاخير جامعة الشارقة تبقى افضل من غيرها .

بالتوفيق والله يسهل عليج دربج .

[ريم العين]

لو طلعلي مختلط يستوي اغير؟؟

[ريم العين]

المقاتل

تراك زيغتني

شو التخصصات اللي يمدحوها عندهم؟

[المقاتل]

https://www.sharjah.ac.ae/Arabic/FutureStudent/Pages/default.aspx

هذا الموقع ممكن يساعدج بالاجابه على استفساراتج اختي .

[شوق القلوب]

السلام عليكم...

هلا عزيزتي..


انا دارسه هندسه في جامعه الشارجه..


..


المواصلات..على ما أذكر موجوده لراس الخيمه.. يعني باص يوديج كل ويك اند ، نفس نظام جامعه العين.. بس اذا مواصلات يوميه.. ما عندي علم بهالشي..


..


الهندسه في جامعه الشارجه من التخصصات المب هينه.. بالعكس.. الهندسه تخصص صعب ويباله واحد جاد في دراسته.. لانه وايديدن ما يستمرون فيه.. انا مب يالسه أخوفج.. بس يباله شده حيل..


والهندسه تخصص حلو.. وممتع للي يحبه ..:)


..

وصح.. ما اتوقع بتحصلين كلاس مختلط.. وااايدين يدخلون التخصص و مب محتاجين يدمجونهم ويا الطلاب.. فـكوني مرتاحه من هالناحيه..

[ريم العين]

المقاتل
مشكووور ما تقصر^^
تعبتك وياي

شوق القلوب

حيرتوني بالهندسة
اهلي مارضوا اني ادش هالتخصص وتحديتهم
بس شكلي بغير لوول

[قصايد غلا]

السلام عليكم


أنا أدرس في جامعة الشارجة و كل الكلام اللي قالته عفاريتو صحيح .. لأن في هالسنة بدوا يسوّون لنا كلاسات مختلطة ، يعني لو كان الكلاس عدد الطالبات فيه قليل و الطلاب نفس الشي .. في هالحالة يدمجونهم =)


و عن الهندسة ترى شواقة ما قصرت و كل اللي قالته صحيح .. مب أي حد ممكن يستمر في التخصص إلاّ إذا هذا ميوله و يحب التخصص :k_smile2:

[طير الحب]

بالتوفيق ان شاء الله

[ريم العين]

قصايد غلا

احس الهندسة من يوم كنت فالاعدادية وانا حلمي فيه

بس خلاص
قررت احول ادارة اعمال محاسبة

طير الحب
تسلمين

بسالكم شقى اسجل
كم مره يحتاي اسير عسب اخلص اموري؟

[الهيثــم]

السلام عليكم ..

بجاوب بحكم إني طالب في هالجامعة " العريقة " ..

بالنسبة للمواصلات أتوقع إنها متوفرة ، بس بإمكانج تتصلين وتتأكدين

أما بالنسبة للاختلاط ، فـ هي جامعة غير مختلطـة ، والدليل إنشاء مباني متكاملة بكل معداتها وكلياتها نسختين ، نسخة للبنات ونسخة للشباب .. ولكن تحت المجهر ،، أصبحت مختلطة الآن ..

مساقات الصيفي معظمها مختلطة ، مع وجود حاجز بلاستيكي يصل طوله متر يفصل كراسي البنات عن الشباب ، وعرقلة الرؤية للطلاب إللي يالسين ورا بسبة الحاجز ..

ومساقات السنة الياية معظمها بتكون مختلطة بحكم النقص في العدد ، وعدم استطاعتهم على فتح شعب للبنات وشعب للأولاد ..

وبالنسبة لكلية الهندسة إختي ، هاي الكلية هي إلي بدت بموضوع الاختلاط قبل كم سنة .. والآن أصبحت كلاساتهم من غير حاجز ، والأمور ساايبة .. لكن في كلية إدارة الأعمال والاتصال ( الفكرة يديدة ، لذلك الحاجز موجود ) بس معررقل الرؤية للطلاب إلي يالسين في الخلف ..

وأنا تخصصي محاسبة ، إذا عندج اي استفسار لا تترددين ..

[ريم العين]

خطاب

تعرف انك سويت لي رعب><

انا مابا صيفي
بس لو طلعلي مختلط هالسنه
مااتوقع اني بظل فيها مليووون بالمية
اصلا اهلي مابيرضون

بتصل فيهم وبطلب منهم اني مابا مختلط
كافي انهم رفعوا الاسعار بس للمستجدين

انزين والمحاسبة دراستها حلوة ولا

[ريم العين]

وبعد عندي سؤال


لو انا فكلاس مش مختلط وطلعت من الكلاس بجابل بويهي اولاد ولا يفصلوهم؟

[الهيثــم]

المشكلة ما بياخذون الاعتراض بعين الاعتبار ..

لأنه مرات تستوي حالات طارئة إنه طالب او طالبين يدرسون مع البنات ، بحكم التخرج وأمور عدة ، يعني المادة ما اتكون نازلة إلا عند البنات وفي طالب لازم ياخذ هالمادة لأنه خريج .. شو كان الإجراء !!

كانوا ياخذون موافقة كل اهالي البنات ، وإذا في ولي أمر مش موافق ، ما يعطونه المساق ، لكن الحين الموضوع تغير ما يسوون سالفة لـ حد .. ودايما حجتهم بأنه نقص في العدد وما نقدر نفتح شعبتين لنفس المادة .. وآخر شي نحن ناكلها .. يقولون إذا تبون المساق ،، هذا الي نازل وغيره لازم تتريون ، وبـ جي بتتعقد الأمور وبيتأخر التخرج ، فننجبر نرضى بالواقع ..

وبالنسبة للمحاسبة طال عمرج .. كـ تخصص حلوو إذا الدكاترة كانوا ممتازين في الشرح ، ومعقد إذا الدكتور ما يعرف يشرح مثله مثل أي تخصص ..

وبعد ما في شي سهل ،، وما في شي صعب ، على حسب المجهود الي تبذله تنال الدرجات والفهم ..

وتخصص المحاسبة دكاترتهم لاباس فيهم ،، لكن التمويل " Finance " ابعدي عنه ، لأنه مستوى الدكاترة زيررررو مع مرتبة الشرف .. وإدارة الأعمال ، دكاترتهم ممتازين ، لكن كل دكتور عنده عقدة وبهالعقدة يعقد طلابه شوي ، والتسويق ونظم المعلومات الإدارية ما عندي فكرة عنهم ..

وربي يوفقج ان شاء الله ..
وهالقرار صدق ضايجني ، يوم دمجوا المساقات ، لأن في أهالي دخلوا بناتهم هالجامعة عشان يطمنون على بناتهم إنه مش مختلطة ، وللأسف قاموا يدمجووون ..

[ريم العين]

ماعرف شوبسوي

بشاور الاهل بشوف رايهم

انزين اي جامعة تنصحني بها يكون سكن ومب مختلط

[الهيثــم]

اتوقع جامعة الإمارات ...

[أنامل قلب]

^ يعني الهندسة المعمارية دراستها عندكم مختلطه !!!!؟

[الهيثــم]

وبعد عندي سؤال


لو انا فكلاس مش مختلط وطلعت من الكلاس بجابل بويهي اولاد ولا يفصلوهم؟


ما شفت المشاركة ..

إذا كنتي في الكلية في قسم البنات ، ما بتشوفين حد ..
الكلاسات المختلطة اتكون في مباني منفصلة ، بس عادة اتكون هالمباني في قسم الطلاب تجنبًا لدخول الشباب في كليات الطالبات

---

أنامل قلب :: قانونيًا كلية الهندسة والاتصال وإدارة الأعمال والقانون والشريعة والدراسات الإسلامية والآداب والعلوم غير مختلطة ، ولكن إذا صار في نقص في العدد سواء من قبل الطلاب او الدكاترة ، في هالحالة يدمجونهم

بس عموما الي يدرسون في كلية الهندسة بتخصصاتها عندهم مناعة من هالموضوع ، لأنهم اتعودوا خلاص ..

[أنامل قلب]

انزين ، شكرا ..

[الهيثــم]

ملاحظة // بخصوص كليات القانون والشريعة والدراسات الإسلامية ، مب متأكد إذا دمجوا كلاسات أو شي .. ما بحط في ذمتي ..

أما كلية الفنون الجميلة وكلية الطب فـ هي مختلطة من الأساس ..

[ريم العين]

انزين وجان ارد

لو دشيت هندسة وين بشتغل عقب التخرج

ونفس الشي محاسبة وين بشتغل

قولولي كل الاماكن اللي فيها هالتخصصين

[مــهــابه]

^
الهنـدسه حسب الفـرع اللي دخلـتيه " معـماري ، كهربائي " يـعني حّـسب
المحاسبه تقدرين فـ البنوك ، شركات ، وايد اماكن ، يعني مجال العمل ف هالتخصص اتوقع انه مفتوح

وموفقه

[الهيثــم]

بالنسبة للهنـسة حسب الفرع مثل ما ذكرت مـهـابـه
أما المحـاسبـة ، فـ المجـال عنـدج مفتـوح ، من أصغر بقـالة إلى أكبر مؤسسة ..
أي شركة في العالم وأي نوع من التجارة وأي نوع من المؤسسات سواء الحكومية أو الخاصة فيها إدارة مالية ، والإدارة المالية بحاجة لمحاسبين ، ولج إنج تتخيلين الفرص إلي بتكون متاحة لج بعد التخرج ..