تعبت .....

[المزوحي]

السلام عليكم وبعد السلام بدخل سيده في الموضوع، لأنه توني راد من الدوام، وما بدلت كندورتي، قلت اكتب لكم عن اللي

انا فيه ... الموضوع من عشر ايام تقريبا ..

كل شخص منا في فتره من حياته يتعرض لأرق، ويوم امر في حالة أرق ماقدر ارقد واتجلب لين يالله ما إييني الرقاد ............

الفترة الأخيرة شو اللي صار ؟؟؟ واللي خلاني الحين اكتب هالكلمات ...

تيني فزات عوذ بالله ،،، وقلت اقرأ أدعية ..

الحمدلله احافظ على الصلوات، اشغل سورة البقرة، اقرأ سورة يس، اقرأ الرقية الشرعية، والاذكار اداوم عليها ...

لكن ماعرف شو اسوي اكثر من اجيه،وصح الله يوم يحب عبده يبتليه ... الحمدلله والشكر ......


يوم اسير ارقد عقب ساعه بالضبط لازم انش، انتبه وماقدر ارقد لين عقب 3 ساعات، ما اشرب منبهات، اسوي رياضة ..

ما ارقد الظهر إلا نادر ... ونص ساعه يمكن ...

البارحه رقدت ساعه ونص يمكن وحسيت إني بختنق، تميت من 2 لين الساعه 5:45 ورقدت وسرت الدوام متأخر .....

الواحد ما يبغي يشكى ، بس شو اسوي ماعرف ............

[مايهزك ريح]

^
الحال من بعضه .. عادي اتعودت اني ما ارقد بالراحه واذا رقدت ساعه ساعتين وانقز .. واتم واعي لين جريب وقت الدوام !
وتتكرر المأساه كل يوم تقريبا ..
بس عادي ما ايلس افكر في هالشي وايد ..

مع انه انا مول ما ارقد الظهر .. بس يوم ايي الفليل حتى لو راقد الساعه 12 تلقاني ناقز الساعه 3 ليش مادري !

لا تفكر .. شل الأوهام من بالك .. وايلس اقرا قرآن وواظب على الأذكار وان شاء الله خير ^_^

[مــهــابه]

آنـا يوم يكون فـكري مشغول بـشي اتيني شرات حـآلتك

وعـآد انا من النوع اذا مارقدت 3 ساعات متواصله ع الاقـل ، احس اني مـارقدت ، واتم طول اليـوم كسـلآنه ومالـي بـآرض لـ شي

لكن الحمدللـه ، ماقـمت احس بهالآشيـا الحين ، يـمكن حسب الحـاله النفسيه

حـاول أنـك ماتـفكر بـ شي ، لاتخلـي شي يشـغل بـالك ، فـكر بـ أي شـي حلـو قـبل الـرقـآد

شـغل القـراءن وخلـه يقـرأ يليـن تـنام ، لآتـقول الحين بنـآم وببنده ، لآ ، خلـه يشـتغل

المـزوحي :

أكيـد فـي شـي قـاعد تـفكر فـيه ، أو شـي شـاغـل بــالك

وحـاسه بـ أحسـاسك ، صـدق تـحس انـك تتـعب نفسيـاً يـوم تـيي تنـام ومـاتـرقد

لـكن !

حـاول بـقدر المسـتطاع انـك تشيل فـكره انك يوم ايي اللـيل ماتـقدر تـنام
يـعني لاتحـط في بـالك انك حطيـت راسـك الحيـن لكـن مابييـك رقــآد


ان شـاء الله هالأرق يـروح عـنك وتـنـآم وانت مطمـن ومرتـآح

[شوق القلوب]

السلام عليكم..

من أسوأ الاشياء اللي اتعب الواحد انك ما ترقد براحه.. حاول اتسوي كمن شغله و ان شاء الله يتعدل ارقادك..

- لا تشرب جاهي المسا.. لانه بصراحه الجاهي فيه منبهات اكثر من القهوه.. و على فكره ترى تأثير هالمنبهات يطلع عقب 3- 4 ساعات من شربها.

- لا اتشغل التلفزيون في حجرتك قبل لا ترقد.. و الافضل انه ما يكون عندك تلفزيون في الحجره..

- لا تفتح النت قبل لا ترقد.

- تقريباً قبل موعد رقادك بساعه شغل المكيف و بند الليتات.. يعني خل الجو جو رقاد..و شغل الابجوره..

- لا اتحاول ترقد و انت مافيك رقاد.. يعني يوم بتحس بعمرك نعسان ادخل ارقد..

- خذلك شور دافي و اتعطر بعطر اتحبه و يكون هادي.. و دخن حجرتك و لا اشتر عطر لافندر ورش كفرك و حجرتك.. اللافندر وايد يريح الاعصاب و اييب رقاد..

- اذا تميت تجلب وما ياك رقاد.. اقرا قرآن .. ولا اقرا كتاب..بس مب قصه.. عشان ما ينشغل فكرك بالاحداث ..

..

انا مرات يستويلي اني ارقد ساعه و انش.. اذا رقدت من وقت وايد.. ومب موعد رقادي.. يعني مره كنت وااايد تعبانه و قلت برقد الساعه 9 بس من يت 10ونص الا انا واعيه و شبعانه.. يعني جني غافله الظهر و ناشه..

طبعاً الرقاد المتواصل بالنسبالي شي من الايام الخوالي.. الحين ما انكمل ساعتين و لا ثلاث الا ناشه عشان حمودي.. و اسوأ شي اني اكون سهرانه وراقده 3 ونص.. وينش بو الشباب شبعان الساعه 7..!!

[المزوحي]

مايهزك ريح، فهمت عليك .. صح أنا من النوع اللي مايرقد وايد، يعني قبل لو برقد الساعه 12 وإلا 1 بنتبه مره أو مرتين

في الليل وبرقد لين الساعه 6:15 مب مشكلة وتقريبا ما أرقد الظهر ...

بس هالحاله متعبه والله يعيني يارب ... وإن شاء الله خير :ohboy:

[المزوحي]

مشكورة اختي مهابه، إن شاء الله ارقد مرتاح ومن اليوم يارب، اليوم داومت متأخر، ربيعي يقول شو على كيفك مداوم

اليوم، قلت له : لا - رقدت متأخر، قال هذا أرق وانا يستوي بي جيه ... مع إني مهابه اشرب بابونج بس ماشي من يقول ..

[المزوحي]

مرحبا اختي شوق القلوب ... لا منبهات ولاغيره، ولا عندي تلفزيون في الحجره اما النت لازم ادخل الواحات :)

بالنسبه للشاور آخذ دش بصابونة لافندر ... وإن شاء الله ربي يعطيني الرقده الهنيه ...

الله يخلي حمودي لكم يارب ...