مــوقف

[المزوحي]

السلام عليكم ورحمة الله وبركاته

من مده ما كتبت في هالواحه، وأكيد من العنوان تتحروني غلطان ولازم يكون الموضوع في واحة السيارات، تتحرون مواقف

السيارات ! بس الحمدلله مب جيه، ولو إني بقولكم إنه حتى هالموضوع يمكن يكون في الواحه المفتوحه ...

المهم

مجال العمل واللي يكون مختلط ... كل واحد في حاله .. ما يخصنا بفلان وعلان .. بس شي شدني اليوم ..

وأنا في المكتب اسمع صوت موظفه يعلى، قلت خلني أشل بعمري وأسير أشوف شو هالصوت في الممر ...

هممم مب فضول، كثر ما الصوت مستمر ومن موظفه بعدها يديده ماكملت شهر ..


انتبهت عليها إنها تتكلم مع جنس خشن ( ألا وهو زوجها ) بس شو يعني زوجها ... هل بس مالجين وإلا متزوجه من فتره

ماعرف قصة حياتها، أشوفها تشد إيده وتقوله تعال الحين خلني أراويك مكتبي تعال وتم تسحبه من إيده .. ؟؟؟




يمكن هي مبسوطه كونها تشتغل وحابه تقوله كل شي عن عمرها، ما فيها شي لو حب يفاجأها ويمر الدوام ويشوف مكان

شغلها، أو حتى يتفقون إنه يسير لها، بحيث يدخل بهدوء وهي كذلك ... يمر يلقي نظره ويطلع ...

طوفت الحركه ...



شويه وخذ بعمره ومشى وياها على طول الممر وأنا من بعيد وراهم أشوف مسكة إيدهم وكأنه زوجين يزفونهم في صالة

الأفراح !

تجامله وتسيره للسياره ... قلنا بعد بنطــّوف !

مشوا لين برع، يضحكون والأصوات تتعالى ... وشويه ودخلوا مره ثانيه، وإلا اتفاجأ بمسكه منها تيره من طربوشة كندورته ..

شو نسمي هذا ؟؟؟؟؟؟؟؟؟

بعد حريه شخصيه لكن كل شي له حدود ! هل لأنه صغيره في السن نتركها تعبر عن مشاعرها، خاصه وإنه حبيبها

زارها في مقر عملها !!

صح حلالها، لكن اذهلتني الصراحه، وأنا أقول الحين بيتركون المكان، وهي مستمره اتدلعه وتلاعبه .. استغربت نعم استغربت

وهي تحط عينها في عيونه، وتلعب بأصابع إيده ...


بعد هذا الموقف في أي واحة أحط الموضوع


:3:

[نجمة دبي]

:10:

:3:

[اماراتيه وافتخر]

بصراحة هي ما تنلام لو الريال اللي معاها كان ريال و محترم كان بيصفعها طراقين مع ورقة طلاقها اليوم الثاني ... بهاي الطريقة هي ما احترمت ها الانسان اللي المفروض يكون زوجها و لا احترمت شخصيته و ها الموقف اثبت انها هي بلا شخصية و احترام .. اذا تبين اتدلعينه دلعينه بينج و بينه هب جدام اللي رايح و اللي ياي .... و بعدين مثل ما قلت يا المزوحي ما فيها شئ اذا يبى يمر عليها و يشوفها في الدوام او يشوف مكان عملها مثل ما قلت بهدوء هب مسوين حفلة عرس .... بس ما تنلام اذا ها الي معاها راضي شو بنقول نحن ؟؟؟؟؟؟

اذا لم تستحي فافعل ما تشاء .....
و الله من حقك تحتار وين اتحط الموضوع ..

[المزوحي]

هلا اختي نجمه، هل تشوفين هالشي عادي، كون إنه ماسوت شي مع اي حد لكن هذا حلالها اللي هو زوجها ؟

[المزوحي]

هلا اختي اماراتيه وافتخر

الريال هو اللي كان بيصسفعنا نحن، مب يصفعها هي، مستغرب ليش المل يشوفهم، ما يبونا نستغرب من التصرفات

لأن في موظفين غيري يمرون ، وعلى فكره فر كلمه بعد، إنه شووووو هذا

[نجمة دبي]

رايي من راي الاخت اماراتيه وافتخر

لو مكانك انا اللي بقول ( شووووو هذاااااا )

[المزوحي]

تخيلي بس !

أصلا مب ريال هذا، مخلنها على راحتها، قلنا مب مشكله لو حاب يشوف المكان، لكن مب التصرفات اللي صدرت منهم !

[اماراتيه وافتخر]

وفي احتمال انها ما شايفة خير عسب جي تبى تقهركم :biggrin::biggrin::hysterical:

[المزوحي]

إذا على مب شايفه خير، تراني مره سمعيتها كان صوتها عالي وهي تتكلم، وتقول إنه الكل مستغرب إني متزوجه، يقولون لي

شكلج صغير .....

بس صدق مب شي جيه ...

[ذنـيـنـي]

ما اشوف انه في مشكلة في الموضوع !!
ريال و حب يشوف مقر عمل زوجته و هي حليلها مستانسة و تبغي تقول حق ربيعاتها هذا ريلي و شوفوه شكثر يحبني لدرجة انه يا يشوف دوامي !!

ما اقصد اني بسوي نفسهم لأنه في عوائل محافظة و في ناس عادي عندهم و في ناس مول امرره فاصخين الحيا

ما ادري يعني بس على حسب الي قريته في الموضوع اشوف انه الموضوع جدا عادي و ممكن انه يحصل في اي مكان
و ما اشوف فيه شي غلط غير انها رمست بصوت عالي شوي

بس حسب تقديري للموقف،، اشوف انه الموضوع كان عفوي من الحرمه و ما اشوف انه تعدى حدود قلة الادب

[اماراتيه وافتخر]

عزيزتي ... ما عليه يحبها ما عنا مانع بس هب جدام الناس نحن عنا عادات و تقاليد لازم نحترمها و عايشين في مجتمع هب بروحهم ...في شئ اسمه الاحترام يقولج تيره من طربوشة كندورته ؟؟؟ جيه عنز (عزكم الله ).. وين الاحترام؟؟

[المزوحي]

ذنيني أنا بعد أقول عادي إنه يمر الدوام ويشوف المكان، والله ما فيها شي ...

لكن إنه صوتها يعلى تخلي الكل يركض الممر ويشوف شو اللي مستوي ( مادري فضول منا ) !

وقلنا غصب عنها علا الصوت ...

أوكي والحوار اللي تم 15 دقيقه، وتعق كلمه وتصد وهي مستحيه منه، ويرد هو يفر عليها كلمه وتضحك بصوت عالي

وتم تلعب في اصابع ايده وتمسح ايده ... وفوق هذا كله بعد مب عايبنه إنه نمر ..

إذا مب عايبنك إنه الموظفين يشوفونكم، من الاساس لاتسوي جيه وفي هالمكان