قصة من الواقع

[المزوحي]

السلام عليكم حبيت اكتب لكم قصة من الواقع
بداية الموضوع
سالم يحب موزة وبغى يتزوجها وهلها رفضوا لأنه كل واحد من عايله ماتناسب الثانيه، مادري عاد كم من مره تقدم لها
بس الحين ارتبطوا ببعض، يعني حلمهم اتحقق ...
مع مرور 5 سنوات يحلمون بطفل، ولكن شاء ربي إنه مايصير حمل .... تعتقدون هل الحب بيفتر ؟؟؟!!!
الحب مب كل شي، هل الحب حقق حلمنا وخلانا نشوف عيالنا ؟؟؟
----
سالم: موزة سمعيني عدل ماباج ترفعين عينج يوم بتمشين وانتي سايره الدوام، تحملي تناقشين فلان وعلان، ترى ها
لا تلومين إلا نفسج ...
موزة: زين سالم بس أنا ماسويت شي، وانته تعرف غلاتك عندي، وبعدين ليش أنا بتطالع حد غيرك، انته كل شي في حياتي
وأنا سايره الدوام مب سايره أسوي علاقات ...
حياتهم تمت 5 سنين نفس الشي ...
------
موزة تشتغل وياها موظفات، تعمقت بالعلاقة وياهم كونها تعرفهم من اشتغلت للحين، ومن كثر ماهم مع بعض، فتلقون
إنهم يتكلمون عن كل شي، بما فيه الحياة الزوجية والنصيحة اللي تكاد تدمر سالم وموزة ..
يتبع ...
بس قولوا إذا تحسون ماشي حماس مابكمل

[رمــش الغـــلا]

يلا المزوحي ... عآآد واآآيد قصير البارت اللي حطيتهـ ..


نتريا التكملة ..~!!*

[المزوحي]

رمش الغلا ماشوف حد غيرج هنيه، وين البقيه ؟؟

أنا تراني ماتشد كتبت قصص، لأني ماعرف اسرد القصه .... بس إن شاء الله تعيبكم

خلني اشوف الردود

[خنفروش]

حرام عليك يالمزوحي والله قهرتني حاط مقطع صغير ياخي كلنا انعرف ان اسلوبك فنان في السرد بس كمل القصة دخيلك عشاني و تراني اول المتابعين و اذا تسال عن البدايه و الحماس امبلا نبغي انعرف كل شي

[حلم الطفوله]

المزوحي .... كمل كمل ..... وطول البارت المره اليايه

[المزوحي]

هلا خنفروش تراني انا القصة اللي بكتبها قصيرة، لكن اهم شي تعيبكم

حلم الطفولة شكرا لج

[المزوحي]

كل يوم على هذا الحال، كل ماتحاول موزة تكون زينه مع سالم، لازم يغثها بشي، بس هي بعد مب مقصره قامت ترد عليه

بين فترة والثانيه، لأنه يجرحها بتصرفاته، هيه نعم تصرفاته، مايحشم حد ، وأسلوبه ترى جاف مع الناس، اقصد ماينداس له

طرف، وشكله مايعرف يسامح .. إذا حد لف عليه في الشارع، ينزل له ويفتح عليه الباب، ومسكينه هالموزه أول كانت

تدافع عن الطرف الثاني، تقول لسالم، استهدى بربك، بس هو يكون طايش ومايسمع الرمسه، يعني عادي يكفخها لو

قالت له شي .. فسكوتها أحسن ... ولو إنها تكون مقهورة منه ..

تحب أكيد تطلع مع ربعها، وصح الريال بكيفه لو قالها ماتظهرين، إنها تم وماتظهر من غير شوره، لكن هيه تاخذ شوره وهو

كل مره يرفض، مع إنه تخبره عن المكان والزمان، وبعد فوق هذا كله تقول وصلني، وتقول له منو هالبنات لكن هو

السالفه هاي ماتدخل باله ...

زين ما اختلفنا على رايه .... لكن حتى بيت هلها ماتسير له ... حتى يوم يسافر عنها ويخليها، تم روحها وبيت

امها مجابل بيتهم ...

كلنا نعرف طبيعة الدوامات، أكيد بيكون في احتكاك بين الموظفين .. وكل واحد يلزم حده ..

بس اللي استوى هالمره غير ... صدق غير

في البداية قلت لكم إنه ربعها في الدوام وايد وياها، ووحده من اللي يشتغلن في دوام ريلها متزوجه، وتوها متوظفه


(ميره )حبت تستخف دمها، فقامت تعق تعليقات، إنه فلانه لفلان، وطبعا منو هذا فلان ؟؟؟؟ سالم

سالم عرف عن الرمسه هاااي وماعيبه اللي يصير ...

وفي نفس الوقت ميره قالت السالفه لربيعتها ( نورة ) اللي هي تشتغل مع موزه مرة سالم ..

عن سالم ( بس بدون ذكر الاسم ) تمت تقول عن شكله ... فنوره عرفت إنه سالم وقالت لها : هيييه هذا ريل موزه

ربيعتنا في الدوام ...

قومي يانورة وخبري موزه بالسالفه، تحملي على ريلج ترى البنات في الدوام حاطين العين عليه، وانتي اهتمي بعمرج

وحافظي على ريلج ...

مب كفايه بيت فتره والثانيه يختلفون، بسبب الغيره، وكل حرمه تغار، بس في غيره تدمر البيوت ...

ونورة بغت اتجحلها بس عمتها !

[المزوحي]

موزة تمت الرمسه في بالها، وماخلت شي في خاطرها، سارت عند سالم وخبرته، وقالت له عن الموضوع، فهو اتنرفز

ولو إنه ( بيني وبينكم ) تعيبه سوالف البنات، ويسير يسولف عندهم ويتريق أحيانا وياهم، بس هو ماحب سالفة ميره

من الأساس وقال هاذيل يبون يخربون من بينا ..

قالت له والحين ؟؟؟؟؟ المهم سكتوا عن السالفة فترة ...

وعقب شهور شو اللي استجد ماندري ؟؟؟

كانت موزة تصيح وكل ربعها مستغربين شو بلاها، وسألوها لكن ماردت عليهم، خذت عمرها وسارت البيت ...

يومين ووحده منهم عرفت إنه سالم هزب ميره جدام الموظفين ، وتوعد إنه يسير عند نوره الدوام ...

لكن موزه بتنحرج جدام نورة وربعها، بس من الأساس ماله داعي تنصحها، لأنه هي نبهتها على شي، بس هالشي

خلاهم يختلفون ...

عقب الويك اند ... سالم مر على موزه الدوام ( على اساس عندها مشوار وبترد )

وتمت نوره متروعه يوم عرفت إنه هيكل سيارة سالم عندهم ... وتمت تقول تراني أنا مب خايفه من شي ..

بس الويه يقول غير جيه .......


يتبع ..

[أنامل قلب]

متابعه ^^

بس شو معقوله من صدق في بنات جي ،،
وصدق بعد شي رياييل جي ،، حتى بيت اهلها =$

,

[المزوحي]

هيه نعم سكون شي، لو ماشي مابتلقيني متحمس في الكتابه ....

[المزوحي]

في الحقيقة موزه مرة سالم، سارت عند نورة وقالت لها، سمعي أباج تسألين عن وحده في دوام ريلي، أبغي اعرف هل

هي متزوجه وإلا لا ... طبعالوشفتوا كيف استوى ويه نوره، مب كفايه سالم مهدد إنه بيي الدوام، بعد لها قلب تعطيها

خبر، حتى لو فعلا نوره تعرف أو حتى عندها حتى تسأله !!

وثانيا يا موزه، شو بيفرق إن كانت متزوجة أو غير متزوجه ( في النهايه ) تكلم ريلج ! يعني في كلا الحالتين مايحتاي

تتكلم وياه، والريال مايحب يرفض مكالمه، لو هو مب البادي، وفلانه يت بتكلمه بيستانس بيحس بعمره إنه مرغوب ...

ولحد هنيه خلصت القصه، لأنه مب عارفين شو اللي بيصير عقب هذا كله




اسمحوا لي على القصه .. قصيره وأول مره اكتب .. اتمنى إنها عيبتكم ... ومره ثانيه بحاول اكتب قصص اطول ...

تقدرون تكملون القصه من خيالكم :)

[خنفروش]

والله نقدر نكملها من خيالنا


الله يسامحك يالمزوحي


ما توقعت جيه بتسوي فينا

[أنامل قلب]

خلاص عيل ،،
ناطرين التكمله من أخونا خنفروش !

أخوي المزوحي ،،
مره ثانيه بنطلب منك الخاتمه قبل المقدمه
عشان لا تحمسنا وتشرد ^^"

,

[خنفروش]

سكون انتي تبغين اتدبسيني شو انا مستغرب لا اكثر ... والله في ناس اتحب اتورط غيرها

[أنامل قلب]

إي في ناس جي ،، سبحان الله !

سوالف أخوي ~

[المزوحي]

تراني اول مره اكتب والله واسمحوا لي .. مب قصدي اسوي جيه ... لكت اتمنى اكون افضل مره ثانيه

مشكورين

[خنفروش]

افا عليك نحن ندري انك افضل دايما ... القصه و الحكايه و الروايه كلها تشترك في وجود عقده (( مشكله )) و انت يمكن تفضل النوع الي نهاياته مفتوحه يعني القارئ يتخيل الاحتمالات الي ممكن تتنتهي عليها القصه ... بس هالطريقه مب دايما تلاقي نجاح و احيانا تخرب القصه بدل ما تحليها ... على كل حال انك تكتب و تحاول افضل بكثير من الانزواء عن التجربه ... صدقني اني فرحان بالمحاوله اكثر منك ... و نتريا الجديد

[أنامل قلب]

في شغله ذكرتها بالقصه أخوي ذكرتني بكلام اختي لنا بخصوص بعض الشغلات والمشاكل اللي تصير لهم بالعمل ،،
بشكل عام ،، هممم ماتوعقت إن في رياييل ممكن يحرمون البنت من زيارة الأهل ،، لكنه بالمقابل وافق على انها تشتغل !

مادري أحس القصة تضم عدة نقاط استغربت منها ،، أو يمكن عقولة بعض الناس آنا اللي ماعرف شي ^^"
بس لا صدق ،، مثلا كيف ريال متزوج ( حتى لو ماكان متزوج ) ما بيقول لا (مش باللفظ لكن بالفعل) // لأي بنت تتجاوز معاه الحدوود !

ترى بالنهايه سواء كانت المبادره منه أو من الطرف الثاني تظل النتيجه وحده والغلط غلط !
+ ياما استهانو الناس ابـ شغلات على انها أخطاء صغيره ويعني أمور مو ماخذينها على محمل الجد لكنها عقب تتفاقم لـ محل سيء جدا ..

شرات ما صار مع وحده عندهم ( ابـ شغل اختي ) ووصلت لمرحلة إن الكل ملاحظ عليها التجاوز إلا (هي) ومب طايعه تسمع لـ أحد كلش
على أساس إنها عاديه وماتغيرت والملاحظات اللي تنطرح بخصوص علاقتها وأحد الموظفين ما تتجاوز بنظرها العلاقة الأخويه !

مادري ليش تذكرت موضوع هالبنت ،، وكيف إن الواحد يبدأ يتدرج للأسوأ من مجرد بدايات صغيره جدا ،، تكاد لا تعتبر أخطاء بنظر الأغلب ..

مادري ،، أحس أبي أعلق على كذا شغله :whistling: ! // وابـ نفس الوقت حابة أكملها لـ نفسي ذهنيا :tongue: ..
همم لا صدق ،، بما إنك تركت النهايه مفتوحه // تكون طرحت أمامنا عدة خيارات نحددها نحن كلن حسب فكره وشخصه وتوقعاته :mf_leia: !

بس الأكيد ،، إن كله بيعتمد بالنهايه على موزة ،، زوجة الأخ الكريم سالم :h_negab: !!!
وووويسلمو أخوي عالقصة للمره الثانيه ^_________^ + الله يهدينا ويحفظنا جميعا :k_special2:"

,

[خنفروش]

سكون علقي خلينا نستفيد ... لا اتقولين مابتضيفين شي يديد ... اثري الموضوع بالاحتمالات كلها

[المزوحي]

مشكور اخويه خنفروش على الرد، وتعطيني دافع إني اكتب، ولو إني بقولك عقب ماكتبت القصه‘ إنه فعلا هذا آخر شي صار

يعني ماشي يديد في السالفه ، من جيه مالها نهايه ...

[المزوحي]

اختي سكون صح تحسين تناقض في الأمر، بس هو يوم يرفض تزور هلها ( على اساس ريلها وماتعصي له أمر )

الشي الثاني لازم تكون حدود في العلاقات اللي في الدوام، وكلمة عادي تخرب وايد اشياء

عندنا وحده من الاهل ... محترمه لكن ماتحب كلكمة عادي وبالرغم إنها تشتغل في مكان خدمة العملاء

لكن شي حد مع الموظفين والعملاء، حتى متمسكين فيها لثقلها واخلاقها ...

توظف عندهم واحد وعق الميانه وحاول يكون عادي ومن هاذيل اللي يرفعون صوتهم، يتحرى هالشي بيمشي وياها

وإنه اي اثنين في اي دوام عادي يشلون الحواجز، ولكن ماعطته المجال وتغير 160 درجه مب 180

وهي السبب وياها بنات محترمات لكن كلمة عادي على لسانهن، خل واحد من الشباب يقولها يا حيوانه

اسف على الكلمه سكون بس عسب اوضح لج كلمة عادي شو سوت بهم ...

[أنامل قلب]

^ أحاول أستوعب الموقف !
+ خوفتني بزياده من بيئات العمل الجميله !!!

اممم ،، مثل ما ذكرت ابـ نفسك أخوي ،،
الحدود بالنهايه يحددها الإنسان نفسه بالدرجة الأكبر ..
دون غض النظر من إن بكل بيئة ومحل مشاكل لا بد منها .. !

ربي يعافينا جميعا ،،
وأكرر شكري لطرحك أخي ..

,

أخوي خنفروش //
مثل ما سبق وقلت القصة ابها تفرعات كثيره ،،
+ تفاصيل أكثر سواء باللي انذكر أو باللي لازال طي الغيبيات ...!

هممم ،، المشكلة ان الغيبيات بالنهايه
يعتمد جزء كبير منها عـ اللي صار وانتهى + الحاضر نفسه !؟!؟!

,

كلن منا تقيده نفســــه ...

[اماراتيه وافتخر]

قصة جميلة في معانيها و يا ليت لو الكل يقراها عسب تكون درس وعبرة للكل لانه بالفعل ما ما ذكروا الاخوان في ا لردود السابقة هاي الاشيا تستوي و جدامنا و للاسف تاخذ مجرى بعيد و ثاني

تسلم اخوي و ما عليك زود القصة جدا كانت جميلة مع انك خليتها بنهاية مفتوحة ...

[المزوحي]

خليتها بنهاية مفتوحة، لأنه انا عشت مع المواقف اللي صارت أول شي، ولين آخر لحظه ماصار شي، ويمكن يكون صار

شي بس انا مادري عنه، فمن جيه مانهيت القصة.

[مايهزك ريح]

اول مره اشوف هالقصه ..
ما شاء الله عليك يالمزوحي .. ثرك عندك مواهب من ورانا ^_^

[بهجة الروح]

المزوحــي شكلها مستويه السالفة جدامك !

يوم بتعرف شواستوى كملها ... :9:

بس الي ما عيبني في القصه انه سالم يمنع زوجته من زيارة أهلها...وهي ما تقول شي...

شو الي يصبرني عليه اذا ما يباني أشوف هلي ...المفروض ما تبيع أهلها عشان زوجها ..

[المزوحي]

هلا مايهزك ريح، دري هالموقف صار جدامي وقلت بكتب اللي استوى كقصه، وماعرف اكتب بصيغه عدله ...

[المزوحي]

بهجة الروح لو استوى شي أكيد بكملها عسب القصه تكون حلوه يوم تقرونها، لكن للحين مافي شي !

وسالم طبعه جيه، الله يهديه، أونه كلام الريال اللي يمشي ...

ودام إنه ماخذين بعض عن حب، خل أهلها على صوب