يوعان و متوهق،، عند -الــوان- الحل !!

[ذنـيـنـي]

السلام عليكم و رحمة الله و بركاته


كم من المرات حسيتوا فيها بيوع و في نفس الوقت ما تبغون تطلبون اكل من المطعم و ما في حد متفيج يسويلكم اكل
أكيد وايد،، و اتوقع انه اول هالاشخاص هو اخونا المنصوري و محدثكم ذنـيـنـي و الكثير غيرنا

في هالموضوع نبغي نسلط الاضواء على بعض الاكلات السهلة و البسيطة و الي ممكن انه نسويها بسهولة
و اتمنى انه كل الاعضاء يشاركونا بوصفاتهم الي يلجؤون لها في اوقات -الوهقة- عشان نستفيد منها و نلجأ لها لو عيبتنا


نتمنى اني اشوف تفاعلكم ويا الموضوع


محدثكم ذنــيــنــي الــيــوعـــان
مـــن قـــروب الـــــــــوان

[ذنـيـنـي]

هالوصفه احد الوصفات البسيييييييييييطة جدا و اتوقع اغلبنا ياكل هالوصفة مع العيش و بالاخص مع المجبوس
لكن هالمره بنحضر هالوصفة لاوقات -الوهقة- و هالشي الي بنسويه له عدة مسميات و منها روب بالخيار او سلطة روب او في حالة الخلطة -المركبة- شي ناس يسمونها - ريطه -

المكونات الي تحتاجونها

- قوطي او قوطيين روب ( على حسب حالة اليوع )
- لومي ( حسب درجة الحموضة المطوبة )
- ملح و فلفل اسود ( حسب الرغبة )
- خيار مقطع لقطع صغييييييرة
- نعناع طازج او مجفف ( اذا تبغون )

بالنسبة لي احط تباسكو او فلفل احمر في الخلطة لأني احبها يوم تكون شوي سبايسي

حطوا كل شي في مله و اخلطوا المكونات كلها
و و و و و
و بس

[العجيبة]

حلو الموضوع وبيفيدنـا - وبيفيدني خاصة - لأني أعيش بسكن وما عندنا مطابخ ، فنلجأ للأكل السريع اللي نقدر نسويه فـ الغرفة إذا تعايزنا نسير الكافتيريا او نطلب من المطاعم .....


فمـثلا ( وهذي أكله أسويها اذا ما عيبني أكل المطعم )


آخذ من عندهم سلطة مقطّعـة ، وأفتح قوطي تونه أحطه عالسلطة، ورشة ملح وفلفل أسود، ليمون وزيت زيتووووون .... وعلى قلبي بالعااااافية ، آكله على طول أو أحطه فـ خبز ( سندويجة ) ووياه دقووس !!!




وامممم



وناكل أكله تقليدية بعد ومشهورة جدا ، خبز وجبن وشيبس عماااان .....



بانتظــــار ابداعاتكم يمكن تزيد لستة الاكلات اللي نقدر نسويهـا .....


وثانكس عالموضوع

[هزاايم]

لو يعت
آكل كورن فلييكس
هذا اضعف الايمان

[قصايد غلا]

أنا الشي اللي أحببببببببببببه واااااااااااااااايد و إن شاء الله ما أمل منه لأني يوم اعشق الشي أتم آكله فترة طويلة ورا بعض لييين أعااافــه


أبشر الطماط و أحطه في ملة + أحط شوية سنّوت و شوية ملح و شوية كزبرة و ربع فلفل أخضر لأني ماباه يكون حار و أدقهم و أحطهم رباعه و أدقهم بالمنحاز + و عقب أييب قوطي روب و أحطه ويا الطماط و السنوت و ربعه و أخلطهم

و آكله ويا خبز محمّص أو خبز فرنسي أو ويا العيش :yes:

[عفاريتووو]

عليكم السلام



عاد انا ياحبي للاكلات السهلة :icecream:

..

ايبوا طماط و خيار و قصوهم صغار
و اييبوا جبن ابض
و اخلطهوهم مع بعض

و حطوا عليه شوي زيت زيتون و ليموون

و بس


..

ايبوا خبر ايراني و قصوه و حطوه في ملة
و عقب حطوا عليه لبن اب

و اذا تبونه يصير احلى حطوا عليه ملح و ليموون :fa52:

..



شكرااا عــ الموضوع ذنيني ^_^

[ذنـيـنـي]

تسلمون على الاضافات



وين الباقين،، نبغي نعرف شو تسوون في اوقات "الوهقة"

[الا انا]

وايد حبيت الموضوع ..

وان شاء الله من باجر بشارك ..^_^

[طفلة من هذا الزمان]

الله لا يحط حد في هالموقف نص الليل ..

يوم الكل راقد و اللي برع البيت ادقلهم واحد واحد تقوله - يوعاااااااانه - و بكل برووود نحن بنتأخر بتتريين ؟!! :fa43: انزين انا يوعانه يعني شو اسوي آخر الليل ...

استر شي ..
خبز صمون و جبن تصبيره لين الصبح أو الرقاد يمدحونه :whistling:


يسلمووااا ذنيني ..

[شوق القلوب]

السلام عليكم..



انا من النوع اللي نادر ما أكل شي في الليل ( يعني من 12 للفجر ) حتى لو كنت يوعانه..! ما ادري اطنش هالشعور وايد..

المهم..

و اذا كان حد وياي.. ويووعاااان.. مافي جدامنا غير كوب جاي حليب.. و صمون وجبن .. :14:

[مــهــابه]

حلـو الموضوع

~ آحيـان اسوي ( خيـار + ملح + ليمـون)

واحيـان ( خبـزا + جبن + طمـاط )

واحيـان ( اندومي )


وبـعد كـورن

يـا أنه يوع آخر الليل مشكله ، آحيـان يـخلوني الروحي اروح المطبخ فـ تــالي الليل

بس يقولون اليوع كـافر

[مزن هتان]

أخاف أروح المطبخ بالليل

أشرب ماي و اذا عندي خربطان اصبر نفسي به
و ارقد (شبسات)، و أبوي يسوي له صمون جبن
آكل وياه اذا كان بالصاله.

نادراً جداً اذا نزلت المطبخ مع خواتي
اقطع ليه خس (من دون شي) قطع صغار مع ليمون و ملح
و الا يزر (من دون شي)

عندي خواتي يطبخن عااادي

[مايهزك ريح]

ايام اليوع ..

كنا نبطل قوطي تونه ونخلطه بمايونيز .. وعليه داقوس بو طير .. وخبز لبناني .. ونحنا والخير باعه ..

واخويه العود يوم يتفلسف .. ياكل له سيريلاك من القوطي بالخاشوقه بدون شي ( انا اغص يوم آكله خالي )

في امريكا .. كنت انا اللي اسير اشتري اكل من السوبرماركت ..
كنت ادور الأشياء اللي تستوي بسرعه منهن بيتزا اسمها tony's cheese pizza تاخذ في الفرن 20 دقيقه وتستوي ..
كان ها اسهل شي
ولذيذه في نفس الوقت ^_^
امسات لقيتها في سبينس .. وانا ادور البراتا الجاهز !

[شوق القلوب]

السلام عليكم..

والله هالموضوع لذيذ :)

..

هالايام لو شفت الريوق ما عيبني... اسير اسويلي شعيريه احمد... الموضوع ع بعضه ما ياخذ اكثر من ربع ساعه..

و في الليل.. يا اسويلي كورن فيلكس...

او سندويجه نوتيلا و يا كوب حليب بارد