المافيا وصيد الأسبوع مع // الأخ الاسطوري !

[أنامل قلب]

بسم الله الرحمن الرحيم ،،
السلام عليكم ورحمة الله وبركاته ..

::

هنا نكون معكم مع أول صيد لـ أول وهقــه :a034: ،

فيــ :

http://oasis.bindubai.com/bin/uploaded/6283_01218645036.jpg

مع قروب الـ // مافيــا ~

::

هي سلسلة ننتقي بها العضو عشوائيا ،،
لاستضافته بأحد أفرع واحات بن دبي >> عن طريق القرعه ..

لـ يكون أول صيد لنا // مؤسس القروبات ،،
الاسطوري ~ ! // بـ الواحة المفتوحة :yes: ،

ضيفا كريما مشرفا متوهقا لول ..

::

وكـ تعريف مختصر :

سنتناول معه 7 فقرات على مدار الاسبوع ،،
وبكل فقره مضمون مختلف ،، بأسئله مختلفه ..
لـ نقاش مختلف !



* الاسطوري وواحات بن دبي ~
* الاسطوري بين القاضي والقضاة ~
* الاسطوري بين السائل والمسؤول ~
* الاسطوري وأعضاء بن دبي ~
* الاسطوري والواحة المفتوحه ~
* الاسطوري بين العلوم والمقالب ~
* الاسطوري ومساحة بيضاء ~

كما يكون لـ صيدنا المعني حرية التواصل والموضوع ..

فـ يملك أن يبديه يوميا ،،
أو يكتفي بتكديس الاسئلة لـ آخر الاسبوع وهكذا !
مراعاة منا لـ ظروف المستضاف لـ عدم وجود دعوات مسبقه ..

فابقوا بالجوار //

لـ التسليه ،، والفائده ،،

كما للتعرف على شخص المستضاف
بشكل أطيب باذن الرحمن =]

::

وبختام البدء نقول ،،
ربي يوفقك ويعينك أخوي :whistling: !

/
\

/




يتبعــ الحلقه الأولى من الوهقه ~ !
وباقي الحلقات ستضاف يوميا على مدار الأسبوع =)

[أنامل قلب]

/


[ الاسطوري وواحات بن دبي ~

بهذي الحلقه بنتناول بعض الأسئله الخاصه بالعضو وأسرة واحات بن دبي ككل ..
حيث ستضم كل حلقه سبع نقاط ،، ومن هنا نبدأ باذن الرحمن !

فـ بالبدايه :

كيف الحال :tongue: ، // احم

ـ عرف لنا شخص الاسطوري بالشكل والطريقة والطول والقصر اللي يعجبك أخوي !

ـ خمس اختلافات بين اسطوري الواحات و الاسطوري خلف هذه الشاشه ،، مهمن كانت بنظرك بسيطه !
مع ملاحظة إن هذي الاختلافات ممكن لاحظتها بـ ظن غيرك بك كـ شخص دون قصد مسبق // تحب توضحه ،،
وممكن تكون مقصودة لأسباب ،، أو لا إراديه بحكم إن تواصلنا مقتصر عـ الكتابه .. . !

ـ من تاريخ تسجيلك بالواحات ولـ يومك ولحظتك هذي ،،
شو هي الشغلات اللي كسبتها ،، وأكبر أثر طيب لمسته !

ـ مواقف طريفة مرت بك أخوي خلال فترة تواصلك وأعضاء / عضوات الواحات !

ـ بصراحه ،، شنو إهيه سلبيات وإيجابيات الواحات بنظرك !

ـ إذا طلب منك تشبه واحات بن دبي ابـ شغله ،،
بـ شو كنت بتشبهها ،، وليــــش !

ـ كلمة توجهها للواحات !


:

يتبع الحلقه القادمه غدا ،،
>> الاسطوري بين القاضي والقضاة !

كما جاري ارسال رساله للضيف الكريم =)
+ خذو راحتكم جميعا الموضوع موضوعكم لول ^^"

. ....

[عهد الوداع]

صج صيده هههههههههه

الله يعينك يا الاسطوري ,,شد حيلك في الامتحان ,,,^_^

لي عوده ان شاء الله ,,,,

[حلم الطفوله]

أحسنت الاختيار عزيزتي انامل قلب :)

والله يعينك يالأسطوري ....استلمتك أنامل على رواء :)

بانتظار إجاباتك

[الاسطوري]

موضوع جميل اختي ونحن بانتظار الشخصية بس للعلم تراني
سمعت انه مهاجر او مسافر ومابيرد
إلا عقب 6 شهور
:whistling:
.
.
.
.
.
.
.
.
.
.
.
.
.
.
.
.
.
لا يكون يقصدوني انا، لا لا اكيد تشابه اسماء لا
أكثر، اويييه طلعوا يقصدوني
واخنفروشاااه
:d010:

[أنامل قلب]

استانست بمروركم خواتي + اخوي المهاجر !

(( ابتسامه )) ،،
وان شاء الله الحلقات متتابعه ^^

/

يالله شد الهمه اخوي ،،
ميـــن أدك =)

,

[الا انا]

..^

خخخخ

مسكين الاسطوري ..><
توهق ××

...

تسلمين عالطرح سكون

[شوق القلوب]

السلام عليكم...


ماشاء الله عليج سكون.. عرفتي تختارين ..

..

بصراحه الاسطوري من الناس اللي ودي اعرف شخصياتهم..

لاني قبل كنت احس انه وااااايد جاد و عصبي..

و في الفتره الاخيره.. احس انه سوالف و مرح..

بس بعدني متخربطه فيه.. حتى مرات ما اعرف بأي اسلوب يقدر الواحد ياخذ راحته راحته وياه..

..


الاسطوري.. الله يخليك... حلل عمرك.. عشان نستكشفك :4:

[الاسطوري]

بسم الله يالله نبدأ باستجواب المافيا

كيف الحال :tongue: ، // احم

الحمدلله بخير وعافيه والأمور كلها طيبة // عيش ولحم

ـ عرف لنا شخص الاسطوري بالشكل والطريقة والطول والقصر اللي يعجبك أخوي !

الاسطوري عبارة عن كائن حي يتبع فئة البشر أي له رجلين ويدين ورأس متوسط القامة
والبنية، ذو شعر بني غامق يميل إلى السواد وملامحه
عادية مثل باقي الناس

ـ خمس اختلافات بين اسطوري الواحات و الاسطوري خلف هذه الشاشه ،، مهمن كانت بنظرك بسيطه !
مع ملاحظة إن هذي الاختلافات ممكن لاحظتها بـ ظن غيرك بك كـ شخص دون قصد مسبق // تحب توضحه ،،
وممكن تكون مقصودة لأسباب ،، أو لا إراديه بحكم إن تواصلنا مقتصر عـ الكتابه .. . !

اممم لو كانت نقاط تشابه بتكون أسهل من وين أدور نقاط إختلاف الحين! انزين
أوكيه المقارنة بتكون بين الواحات والحياة بشكل
عام بدون تحديد

غامض في الواحات ولكن في الواقع لأ
جاد في الواحات أكثر من الواقع
اجتماعي في الواقع أكثر من الواحات
أفضفض في الواقع أكثر من الواحات
طموح في الواقع ولكن في الواحات لأ

ـ من تاريخ تسجيلك بالواحات ولـ يومك ولحظتك هذي ،،
شو هي الشغلات اللي كسبتها ،، وأكبر أثر طيب لمسته !

كسبت وايد أشياء ومنها التقرب للقراءة وتعلم لغة الحوار والتمكن من أساليب التعامل من الغير والتعرف على الواقع عن قرب
وإكتساب المعرفة وتكوين صداقات والتعرف على طبيعة حياة أنواع مختلفه من البشر وسماع مايجول
في خواطر مختلف الأجناس من الناس من فئات عمرية مختلفة بجانب
ممارسة وضع الأهداف والسعي للوصول
إليها وغيرها الكثير ..

ومن أهم الأشياء الطيبة اللي لمستها هني التعاون مابين الأعضاء وشد أزر بعضهم البعض ومساعدة الآخرين عند المقدرة

ـ مواقف طريفة مرت بك أخوي خلال فترة تواصلك وأعضاء / عضوات الواحات !

اممم ماتحضرني المواقف الحين ولكن من المواقف الطريفة التلاعب اللي كنت اسويه مرات في الاقتباس سواء في الردود او
على الخاص بإضافة كلام من عندي ومواجهة الشخص به وطبعا البعض يتفاجئ ويحاول يبرر
انه مب اللي كتب هالشي واحتمال ان حد سارق الباسوورد وغيره،
كانت حركه فيها متـــعـــه لين مايكتشف
الشخص التلاعب
:k_harhar1:

ـ بصراحه ،، شنو إهيه سلبيات وإيجابيات الواحات بنظرك !

السلبيات بختصرها بوجود إداريين محسوبين على الإدارة ولكن مالهم أي نشاط إداري وأنا منهم!
الإيجابيات كثيرة وأهمها الإختلاف الواضح بين الواحات وبين باقي المنتديات في المضمون

ـ إذا طلب منك تشبه واحات بن دبي ابـ شغله ،،
بـ شو كنت بتشبهها ،، وليــــش !

بشبه الواحات بالفريج الواحد اللي يتيمعون عياله بشكل شبه دوري في ميالس مختلفه ولهم إهتمامات
متعدده وبطبيعة الحال لازم تصير خلافات بين البعض وتقارب
ومودة بين البعض الآخر

ـ كلمة توجهها للواحات !

أتمنى إن الواحات تستمر على ماهي عليه مع السعي للتغير نحو الأفضل
بشكل دايم عشان يكون لها حيز في حياة
الأجيال من بعدنا

[الاسطوري]

"دمعة عين"

شكرا لأنكم اخترتوني والله يسامحكم في نفس الوقت لأنكم ووهقتوني وانا مانفع
للسوالف هاي، شوفي كيف خليتوا الثنائيين
يتشمتون فيني
:d010:

"عهد الوداع" & "إلا أنا"

"حلم الطفولة" & "شوق القلوب"

مشكورين على المرور والشماته المبدئيه للضحيه الأولى وعقبال ماتكونون من بين الضحايا بعد، شوق
افااا عليج بحلل عمري انتي بس هاتي لي تيزاب وخليني اصبه على
عمري وشوفي شقى بتحلل
:fa32:

[عايش وهم]

السلام عليكم

زين يوم زخيتوا الاسطوري .. بالعاده يوهــg الأوادم و اليوم هو طاح فيها بس هاي بصراحه مب وهــGــه على كثر ما هي فرصه نعرف فيها اخونا الاسطوري عدل .. الاسطوري مقاتل شرس كرمال مصلحة الواحات الله لا يحرمنا منه .

نتمنالك التوفيق حبوب

شكراً للإخت سكون و Gــروب المافيا

متابعين

[وحي القلم]

بالتوفيق

و صدقها شوق الاسطوري من الأعضاء الغامضين فالواحات :k_harhar1:

.
.


الاسطوري مقاتل شرس كرمال مصلحة الواحات الله لا يحرمنا منه .

كِــ رمال مصلحة الواحاات :4:.. و أنا أقول منوه هاي بعد رِمال "مُصلِحة الواحات"؟؟ هههه

.
.

شكراً سكون

[عايش وهم]

إختي وحي :m_afaker: لبدج مرتفعه حرارتج و إنتي ما تدرين ! :bash:

[وحي القلم]

كل شي جايز :4:

[أنامل قلب]

اوه زحمه ما شاء الله ،، تبارك الرحمن ،،
قل أعوذ برب الفلق // و عـ قولتكم (( :fa56:)) لول ^^"

بالبداية اسمحولي عالتأخير ،،
بس كنت متوهقه مع اختي أدرسها // والله يكون بعونها =#



//



[ الاسطوري بين القاضي والقضاة ~ !

همم ،، عدنا !

بعد ما عرف لنا الضيف الكريم شخصه ،، وتجولنا عالخفيف حول الواحات ..
نحب نضيفه (تي) وندردش معاه حبتين حول قضايا العصر الحديث والجيل الأخير :whistling: !

يعني مثل ما تعرف أخوي شر البلية ما يضحك ،،
ومن أطرف الطفرات اللي صارت عدنا ،، وبالبدايه // عشان نضحك شوي :fa55: !

ـ قضية كثرة الأبراج بالدوله ،، بس مش الأبراج اللي نشوفها بالشوارع لالا ،،
الله يسلمك عندكم المراكز والجامعات والكليات سلمك ربي وغيره :icon_rr: !

فـ ما رأيك بـ موضة برج العرب ،، أو بالأحرى برج دبي الدارجه حاليا لدى الفتيات ..
وسؤال يطرح نفسه ،، معقوله الأهل ما يشوفون بناتهم واهمه ظاهرات من البيت ؟

والأطرف من كل ذلك ،، إن عـ كثر ما يتصادمون ابـ تعليقات وذم ،،
نلقاهم يزيدون من طول البرج طابق // وهكذا ؟

:

ـ لاحظنا بالأونه الأخيره قضية يتبادلها الشباب فيما يتعلق بـ غلاء المهور وتكاليف الزواج ،،
فما هي وجهة نظر الأسطوري حول هذي الأزمة ،، وهل هي فعلا غفله يقع بها الإناث !
أم أن من يجب توجيهه حقا هم أولياء الأمور قبلهن ؟
يعني الريال يشكي ،، ومن الصوب الثاني يبادل المعرس اللي ياي لاخته بنفس المطالب !

وما رأيك بالآراء القريبه من : بإن الزوج بيستهين بالعروس ! //
والألفاظ كثيره وكأن البعض فاهم المهر على إنه استغفر الله تثمين للبنت ؟

واللي يقول آخذلي مغربيه أكرم لي :glare: !

ـ بالمقابل ،، ما رأيك بتزايد قضايا الطلاق عدنا بالدوله ؟
عافانا الله وإياكم جميها ..

:

(( خارج الشاشه ))

ـ هممم ،، عباره قالها أخوي المزوحي مره يزاه الله خير // بما معناه :
ما شي سيايير عند المسيد // فاضي ،، تجاوزنا أيام الشهر الكريم ؟

تعليقك // يمكن كلمتك تفيد من غفل :yes: ..

:





(( بعيدا عن المجتمع الخارجي ))


ـ لاحظنا أزمة واحاتيه تتعلق بـ قلة حماس الأعضاء لـ طرح المواضيع ،،
والتواصل ككل من خلال الردود !

فما هي آراءك أخي بهذا الخصوص ؟

:

(( ! ))

ـ (( الصراحه ،، اللباقه ،، المجامله ،، الذوق )) //
من فتره ليست بالقصير أردت طرح موضوع يضم هذه المصطلحات ،،
وكيفيه اللبس فيما بين بعضها البعض ،،
ومانلحظه من تجاوز الناس أحيانا بتمسكها بأحد هذي المصطلحات // وقد أكون منهم ! ..

فـ لو طلب منك تعريفها لنا أخي ،، بالحدود التي تحسبها بها ،، وكيفية ارتباط كلن منها بالأخرى ؟
+ اذا ما فهمت السؤال علمني برد أوضحه ان شاء الله =)

(( بالأخير ))

ـ قضيه حاب تتحدث عنها مهمن كانت ،،
لك الحريه هنا لتناول ما تحب أن تتناوله مهما كان بسيطا بظنك ،، والعكس ؟!

//


تابعونا بالحلقه القادمه !
ويزاكم الله خير جميعا =)

. ...

[أنامل قلب]

شكرا لكل من تواصل ،، وللضيف الكريم !
+ سبحان من قال لكل امرئ من اسمه نصيب ^_______^ ..

/

أخوي الاسطوري ،، صدقا استمتعت :k_smile2: ..
واعتذر من شخصك على تأخري بطرح حلقة اليوم !

يالله ،، بانتظارك عمي =)

,

[مجموعة إنسان]

عندي كم سؤااال للأسطوووري

,,,


1. شو تعلمت من كثرة زيارتك للكراجاااات عسب هذاك الوحش؟!؟
2. قووول رايك في ذنيني ,, كلكلوووش ,, مجموعة إنسان اللي اكثر ناس في الواحات تشوفهم !! بس بدون عصبية هع
3. شو مشروبك المفضل في كفتريا محارة البحر؟

4.منو العضو او العضوة اللي خاااطرك تضربهاااااااااا بشبشب !!!

[عهد الوداع]

مجموعه

خخخخخخخخخخ

يا حيك والله ع هالاسئله

انزين عادي نسأل عندي 100 سؤال حق الاسطوري والباجي ياي في الطريج ,,,

[الهيثــم]

بصراحة الأسطوري بياكلها صدق بـ هالوهقة ..
والحمدلله إني طلعت منها ، لأنه الأضواء كانت مسلطة علي ..

وتساؤلات جدا رائعة من قبل إختي سكون
وتخلينا نتعرف على شخصية أخونا بو علي أكثر وأكثر

وفي تساؤلات بتكون حارة شوي ، ويايه في الدرب إن شاء الله
وسامحنا عااد ،،
لزووم الحماس .. لازم نحمس الاسئلة ونحمسك ونحمس الي بيقرون الموضوع

والله يعطيك العافية .. وشكرا لكل من شاركنا ..

[مــهــابه]

والله انـتوا ينخاف منكم ..


خفـوا ع الريال شو 100 سؤال


:4:


الأسطوري :

آنـتم السابقون ونحن اللاحقون == > أهَون عليك:fa46:




حبيـت ~ أسجل " اعجابي " بـطرحكم يـا ( المافيـا )

[حلم الطفوله]

مهابه ...ما تلاحظين إنه مجموعه مستوي اجرامي هالأيام ؟

يبغي الأسطوري يضرب( إحداهن ) بشبشب .... زين بعد ماقال نعال بكعب !!

الأسطوري....الله يعينك ...واستمتعنا بردودك

[ملاك الروووح]

حيالله الزعييييييييييييييييييم

:14:

:

استمتعنا بقراية ردودك ..

والاسئله مميزه وحلوه ..

والاسئله الاحلى تترياك ..

ماشاءالله مو مقصرين الاعضاء فيك .. :k_harhar1: !

/


متابعيييييييييييييين

[الهيثــم]

جماعة الخير ،، محد يستبعد نفسه ،، يمكن ادق فـ راسنا ونعطي الضيف استراحة بسيطة
وندخل حد منكم بداله .. ^__^

[أنامل قلب]

الصراحه لا تعليق لول ،،
بس استانست بتواصلكم جميعا بلا استثناء !

والضيف شكله انحاش لول ^^"

/

همم اللي حاب يطرح سؤال للعضو عنده ليـ باجر المغرب ..
يبعثه لي عبر الخاص + نغزه لأخوي مجموعه لول ^^"

بس عشان نلملم الأسئله بشكل مرتب شوي ..
ووووو يالله شدو الهمه // ومثل ما قال اخوي خطاب >> لـحد يطمن بزياده !

/

اختي حلم ،، منو تتوقعين P=

/

حفظكم الرحمن جميعا !

,

[الاسطوري]

همم ،، عدنا !

وأنا كنت بإنتظار عودتكم، أوني عاد أبين اني قد التحدي لووول

بعد ما عرف لنا الضيف الكريم شخصه ،، وتجولنا عالخفيف حول الواحات ..
نحب نضيفه (تي) وندردش معاه حبتين حول قضايا العصر الحديث والجيل الأخير :whistling: !

لو سمحتوا بغيت الشاي ويه حليب وشوية شكر
عشان أستدرج الذاكرة
:14:

يعني مثل ما تعرف أخوي شر البلية ما يضحك ،،
ومن أطرف الطفرات اللي صارت عدنا ،، وبالبدايه // عشان نضحك شوي :fa55: !

ـ قضية كثرة الأبراج بالدوله ،، بس مش الأبراج اللي نشوفها بالشوارع لالا ،،
الله يسلمك عندكم المراكز والجامعات والكليات سلمك ربي وغيره :icon_rr: !

فـ ما رأيك بـ موضة برج العرب ،، أو بالأحرى برج دبي الدارجه حاليا لدى الفتيات ..
وسؤال يطرح نفسه ،، معقوله الأهل ما يشوفون بناتهم واهمه ظاهرات من البيت ؟

والأطرف من كل ذلك ،، إن عـ كثر ما يتصادمون ابـ تعليقات وذم ،،
نلقاهم يزيدون من طول البرج طابق // وهكذا ؟

في الحقيقة هاي تعتبر من الأمور الدخيله على مجتمعنا في الألفيه اليديده يعني لو نرجع مثلا 15 سنه ورا بنشوف بناتنا بصورة مختلفه تماماً مقارنة بما هن عليه الحين وهذا له أسباب كثيرة مابدخل فيها لأنه جانب متشعب وايد، عن نفسي اعتبر هاي من الامور اللي تشوه صورة البنت الاماراتيه جدام هل البلاد قبل الغرب وماشوف انه شي حلو يوم تخلي راسها قد جسمها 4 مرات! هذا غير انها بالطريقة هاي تخلي الشيله مرفوعه من ورا وشعرها نص الوقت ظاهر للخلق وهي ماتدري وماننسى بأن الاسلام حرم هالشي وهذا بحد ذاته سبب كافي يخلي البنات يتركون هالعاده ومايتبعون كل شي غيرهم يسويه بدون تفكير لأن مب كل يسويه فلان وعلان يناسبني فليش امشي وراه حتى لو بين لها انه حلو في الوهله الاولى

:

ـ لاحظنا بالأونه الأخيره قضية يتبادلها الشباب فيما يتعلق بـ غلاء المهور وتكاليف الزواج ،،
فما هي وجهة نظر الأسطوري حول هذي الأزمة ،، وهل هي فعلا غفله يقع بها الإناث !
أم أن من يجب توجيهه حقا هم أولياء الأمور قبلهن ؟
يعني الريال يشكي ،، ومن الصوب الثاني يبادل المعرس اللي ياي لاخته بنفس المطالب !

غلاء المهور وإرتفاع تكاليف الزيجات حسب وجهة نظري الشخصية للواقع اللي أشوفه من الأسباب الرئيسية لإنحراف شبابنا واللي يترتب عليه بالتالي إنحراف بناتنا، مجتمعنا وللأسف يحب الترف والبذخ في الأفراح وخاصة ليلة الزفاف حتى لو كانت العائلتين على قد حالهم لأن هاي صارت من عادات المجتمع الاماراتي اللي مايستغنون عنها، من حق البنت انه تطلب اقامة ليلة زفاف حلوه لأنها ليلة في العمر ولكن في المقابل لازم تشوف امكانيات الزوج هل بيقدر يوفر لها كل هذا ولا لأ فليش تحط عليه ديون ثمن لمجاملة كثير من المعازيم، دول ثانية ماتسوي جيه مثلا في الكويت يملجون وعقب يسوون حفله صغيره في البيت وعقب يصرفون اللي يبونه بروحهم في شهر العسل عشان يستانسون

الاسلام اعطى المرأة حق المهر في الزواج ولكن ماحدده بشي يعني ممكن يكون مصحف ويمكن يكون أمور ثانيه تخلي هالزواج مبارك من رب العالمين، غير ان المرحوم الشيخ زايد حدد المهر بـ 20 الف في الدولة ولكن شي طبيعي ان هالمبلغ مابيكفي حفلة زفاف فارهه دام كل وحده تبى تتحدى الثانية بعرسها على حساب راحتها وسعادتها!

المثل يقول علي وعلى اعدائي فطول ما هالظاهره مستمره بيظل الغلاء مستمر وفي ازدياد إلا من رحم ربي ويطلب مهر معقول أو مايطلب مهر ويخليه على حسب قدرة المعرس والقهر انهم يقولون مجتمعنا يعاني من العنوسه وهم المتسببين في هالشي يعني اغلب اللي ماتزوجوا من البنات يكونون على الاقل رفضوا لهن 5 الاول ماكان وسيم والثاني مب عايله معروفه والثالث شغلته مب حلوه والرابع مب مكمل دراسته والخامس يقرب لناس هم متضاربين وياهم وكلها أسباب مب منطقيه يرفضها الاسلام! وهذا يعود لأخطاء في التربية لأن البنت تعودت انها تحصل كل شي فل اوبنش ماذاقت قسوة الحياة فهي في هالخطوة ماتدور الزوج المؤمن اللي يستر عليها لأ هي تدور فارس الاحلام اللي بتراوي المجتمع كله ان هذا زوجها فيوم ماتلقى مواصفاتها الخاصة ترفض وعقب تتفاجئ انها بالغت وايد فتبدأ تقلل من شروطها شوي شوي لين توصل لمرحله تطلب فيه زوج وبس مهما يكون ولكن بعد مايفوت الفوت ماينفع الصوت

وما رأيك بالآراء القريبه من : بإن الزوج بيستهين بالعروس ! //
والألفاظ كثيره وكأن البعض فاهم المهر على إنه استغفر الله تثمين للبنت ؟



شوفي هذا شي وارد مابقول ولكن بنسبة بسيطة جداً عند البعض من اللي هم بعاد عن الدين وخاصه اذا كانوا شايفين نفسهم وايد على الناس لأن كل شي متوفر لهم وقبل ماينطقون بالحرف يتلبى الطلب فشي طبيعي مابيقدرون الزوجه وبيعتبرونها واجب اجتماعي عشان يحافظون على صورتهم جدام الناس او اذا كانوا مايأدون الفرايض اللي عليهم ويرتكبون الكبائر ترا مستحيل ترتاح وياه مهما عطاها وفي منهم بيوفرون للزوجه كل شي تباه بيت سيارات فلوس غيره ولكن هم مابيكونون موجودين لهم يعني هو لاهي بحايته وشغله وصورته الاجتماعيه وهي في عالم بروحها تتحسر يوم تشوف رياييل الباقيات وياهن طول الوقت لأن في الغالب الريال الدين الخلوق (مهما كان شكله ولونه وأصله) اللي حس بتعب الحياة وكد على عمره لين وقف على ريوله مابيقدم على الزواج إلا وهو عارف نفسه انه مقبل على مسؤولية بيت وأسرة ومفكر في الموضوع الف مره ومستعد له وقادر يصارع عشان يحافظ على زوجته ويوفر لها الراحه والسعاده

واللي يقول آخذلي مغربيه أكرم لي :glare: !

شوفي حسب وجهة مهما كانت المواطنه او خل نقول الخليجيه فيها علل وحروف جر وعطف تظل افضل من الباقيات بكل المعايير يعني نارهم ولا جنة الباقيات خاصه غير العرب اللي في منهم يدخلون على طمع وباجر تسوي له شي عشان تتخلص منه وترد تدور واحد من نفس ثوبها تاخذه عقب ماتكون كلت الاخضر واليابس ونشفته هذا اذا كان بعده عايش، واحد من ربعي أسمر البشرة ومصر انه يوم بيتزوج بياخذ شاميه ومايبى مواطنه وحاولت اتناقش وياه في هالموضوع وأوصل لحل بس الحبيب مب مقتنع أبداً وهالشي ماصار إلا من اللي يشوفه من بنات البلاد خاصه انه شخص على قد حاله وحليله مايدري ان بياخذ شفاطه حتى دمه بتمصه وبتطرشه بلادها

ـ بالمقابل ،، ما رأيك بتزايد قضايا الطلاق عدنا بالدوله ؟
عافانا الله وإياكم جميها ..

هاي ردة فعل طبيعية لكل اثنين ماخذين بعض مب عشان الدين والاخلاق هالاشياء تدوم وتخلي الواحد يخاف ربه في زوجته وهي تخاف ربها فيه وبالتالي حتى لو ماكانوا يحبون بعض بحكم انها خايفه تعصي رب العالمين بتكون اوكيه ويه ونفس الشي من ناحيته هو اما اذا هو بس يدور الجمال وهي بس تدور الغنى والمكانه الاجتماعيه العاليه ومواكبة ربيعاتها بآخر الصيحات وكلاً مايهتم بالثاني اكيد العلاقه مابتستمر ولكن ماننكر بأن في حالات طلاق تصير بسبب جانب واحد وبدون مبررات مقنعه يعني طلاق عقب 3 شهور او 6 شهور او سنه بحجة انهم ماأرتاحوا لبعض أو ماتحملوا بعض احسه سبب أبداً مب مقنع يعني الشخص لو كان جاد لازم يحاول ويما حريم غيروا رياييلهم من الفساد للإيمان والرياييل نفس الشي بعد ومافي حد بيحصل شي جاهز كل واحد بيتعب في بداية حياته الزوجيه لأن مافي اثنين على وجهة الكرة الارضيه يتفقون في كل شي 100% لابد يكون في اختلاف ولو بسيط وبالتالي الاختلافات كلها تبين بعد الزواج لما يعيشون تحت سقف واحد ولازم كل منهم يتنازل عن بعض الامور ويضحي عشان المركب يتحرك لأن لو كان واحد يبى يروح في طريق أكيد المركب بيغرق

:

(( خارج الشاشه ))

ـ هممم ،، عباره قالها أخوي المزوحي مره يزاه الله خير // بما معناه :
ما شي سيايير عند المسيد // فاضي ،، تجاوزنا أيام الشهر الكريم ؟

تعليقك // يمكن كلمتك تفيد من غفل :yes: ..

الموضوع واضح للأسف مجتمعنا فيه نسبة كبيرة من فئة الشباب واقصد بها الجنسين ماعندهم شي اسمه صلاه ايام الاسبوع بس في ايام الجمعه وفي الاعياد وشهر رمضان ونادراً جان كان طالع ويه حد وصلوا بيستحي على ويهه وبيصلي عشان مايقولون عنه شي ولكن من نفسه هو ماعنده وقت لرب العالمين وبالتالي تكون حياته مليئه بالمشاكل والاكتئابات وهذا كله بسبب ضعف الايمان والابتعاد عن رب العالمين وبصراحه في ناس مهما كانوا مشغولين مستحيل تفوتهم صلاة حتى لو ماصلاها في المسيد مثلا على درب دبي بوظبي شوفوا وقت الصلاة كثير من الباكستانيين اصحاب التاكسي يوقفون سياراتهم على يمين الشارع عشان يصلون ماقالوا عيب مابى الناس يشوفوني وماقالوا مكان خطر صلاتهم قبل كل شي وعقب شغلهم وغيره، عن نفسي بصراحه مابقول اني مداوم على صلاة الجماعة ولكن الحمدلله من أكثر من عشر سنوات ماطوفت ولا فرض حتى لو أصلي متأخر بروحي لأن ماحس بالراحه إلا وانا مصلي وتراها ماتاخذ إلا دقايق فليش الواحد يتهاون في عمود الدين ويضيع دنياه وآخرته

:



(( بعيدا عن المجتمع الخارجي ))


ـ لاحظنا أزمة واحاتيه تتعلق بـ قلة حماس الأعضاء لـ طرح المواضيع ،،
والتواصل ككل من خلال الردود !

فما هي آراءك أخي بهذا الخصوص ؟

مابلوم الأعضاء كثر مابلوم الإدارة شبه المنقطعة عن الأعضاء وهذا شي طبيعي ترتب على غيابها والحل بيكون بتنشيط الادارة من خلال تفعيل دور الاداريين وخاصه مع الاعضاء أو انهم يشلون الاداريين اللي مايقدرون يعطون ويردونهم كأعضاء لهم احترامهم ومكانتهم بين الاعضاء ويحطون مكانهم من هم أجدر اللي يقدرون يطورون ويغيرون وهذا اللي يصيرعلى مستوى الشركات والدوائر في هالحاله

:

(( ! ))

ـ (( الصراحه ،، اللباقه ،، المجامله ،، الذوق )) //
من فتره ليست بالقصير أردت طرح موضوع يضم هذه المصطلحات ،،
وكيفيه اللبس فيما بين بعضها البعض ،،
ومانلحظه من تجاوز الناس أحيانا بتمسكها بأحد هذي المصطلحات // وقد أكون منهم ! ..

فـ لو طلب منك تعريفها لنا أخي ،، بالحدود التي تحسبها بها ،، وكيفية ارتباط كلن منها بالأخرى ؟
+ اذا ما فهمت السؤال علمني برد أوضحه ان شاء الله =)

هو مافهمت بس عادي بحاول ابين لج الدمج بينهم حسب وجهة نظري في قضية وحده على مستوى الحياة الخارجيه، احس كل من هالمصطلحات مرتبط بالثاني بطريقة أو بأخرى يعني مثلا ماقدر أكون صريح وأقول جدام الخلق لـ (سين) من الناس خاصه اذا كانت ماتربطني به علاقه قويه انت واحد ماتستحي على ويهك في الشي اللي سويته لأنه مابيتقبل مني هالجمله وبتكون ردة الفعل عكسية علي وعلى التصرف وفي نفس الوقت مابجامله على حساب مبادئي لأنه راح يتمادى في هالشي اللي سواه فاذا كنت شخص عندي ذوق بحاول أبين له رايي وأعرضه بشكل انفرادي بأسلوب لبق عل وعسى يتقبل هالنصيحه

لو خذنا كل مصطلح على حدى بنشوف ان كثير من الناس تجامل بعضها البعض عشان العلاقات الاجتماعيه والمحسوبيه وان الشخص الصريح تكون له نظرة مب حلوه من اللي حوله حتى لو كان على حق لأنه ماأحسن التصرف بطريقة عرض صراحته وخاصه لو كان فيها نوع من التجريح اما الذوق واللباقه في الغالب لهم نتايج ايجابيه


(( بالأخير ))

ـ قضيه حاب تتحدث عنها مهمن كانت ،،
لك الحريه هنا لتناول ما تحب أن تتناوله مهما كان بسيطا بظنك ،، والعكس ؟!

هي فكرة أكثر من كونها قضية، كل شخص يملك اختارين في أمور حياته وهو اللي يقدر يختار من بينهم اما ان ياخذ الموضوع بإيجابية أو انه ياخذه بسلبيه، مثلا شخص اول ماينش من رقاده مثلا شاف الوقت متأخر عنده اختيارين اما انه يتأفف ويتذمر من الدوام او الجامعه او غيره ويبدأ يومه مكتأب أو انه ياخذ الموضوع بايجابيه بانه يتبسم ويحاول يتلاحق عمره قبل مايتأخر أكثر ويحاول انه يتعلم من هالشي عشان مايتكرر وينحط في نفس الموقف وعقب مثلا وهو يسوق سيارته في أحد الشوارع ومره وحده واحد لف عليه عنده اختيارين اما انه يعصب وبنفعل ويحرق اعصابه لين يرد فيه نفس الحركه او انه يتم في حاله ويحاول يكون متعاون ويه الناس ويتعلم من اللي صار وعقب مثلا وهو في الدوام يته عدة اشغال مره وحده عنده اختيارين اما انه يكره حياته ويكره الدوام ويعلن اليوم اللي اشتغل فيه ويطالع الساعه كل شويه يتريا نهاية الداوم او انه يسويه هالاشغال من خاطره بنفس مفتوحه وتحدي للعمل عشان يثبت نفسه فيه وعقب مثلا في بريك الغدا يروح يطلب له وجبه من مطعم وعقب مايحط الصينيه وييلس يكتشف انهم ماحطوله الاشياء اللي هو يباها او في اشياء ناقصه عنده اختيارين اما انه يصعب ويروح يضاربهم ويلعن اسلافهم ويخرب المود اللي هو فيه عشان وجبه او يروح لهم بهدوء ويقولهم يعدلون الطلب لأنهم مغلطين وياخذ الوجبه اللي هو يباها وييلس ويتهنى بالاكل وعقب مثلا يرد البيت واول مايدخل تستلمه زوجته بكمية من الطلبات والاسئله والتذمر من العيال عنده اختارين اما انه يرد عليه بطفره وانه تعبان ومب فاضي لها ولعيالها ويسبهم وترد عليه وترفع صوتها وتزيده أكثر ويرتفع ضغطه ويوتر عياله او انه بهدوء يحاول يسمعها لين تخلص وعقب يبين لها ان الامور بتنحل بس تحتاج شوية وقت لين هو يرتاح من ضغط الشغل ويبدأ يشوف أسرته وبيته شو محتاجين وقيسوا على هالامثله كل الامور الحياتيه فالواحد دايما وابدا عنده اختيارين اما ياخذ الفعل بإيجابيه او انه ياخذه بسلبيه، الايجابيه بتريحه وبخليه في مود حلو وبتمشي الامور بسلاسه والسلبيه بتخلي موده ومود اللي حوله في توتر وبيعيش يومه مهموم وشايل الدنيا على راسه عشان امور ماتستاهل فكل واحد منكم عنده الاختيار الحين انه ياخذ الامور بسلبيه ويقول الاسطوري عنده سالفه ونحن مب ناقصين عوار راس وفكنا من هالرمسه الزايده او انه ياخذ الموضوع بإيجابيه ويحاول يطبقه على نفسه في تصرفاته ويه الغير من اليوم ويلمس الفرق

^
أتمنى تكون الفكرة وصلت وإذا جربتوا هالشي أتمنى تخبروني عن النتايج سواء كانت
مرضيه او لأ وعلى فكرة تراني ماخذ الفكرة من
ايميل وصلني من زمان
:k_special2:

[ملاك الروووح]

:


كلامك جميـــل .. ومنطقـــي وحلو أخوي الاسطوري ..

:fa42:

:

بالنسبه لسالفة العنوسه ,,

فعلا هاللي صاير عندنـــا !

الوحده تيلس تتشرط .. وتدور على مواصفات خياليه في زوج المستقبل ..

واتدور على عيوب بسيطه .. ممكن انها تتغاضى عنها .. وتنجح علاقتهم الزوجيه ..

وتكون سبب في رفضها لهالانسان ..

وشوي شوي ..

كل ما تكبر في السن ..

تعرف انها غلطت يوم رفضت فلان .. وعلان ..

لأسباب واهيه !!

وتتمنى انه الزمن يرد ورا .. عشان تصلح اللي صار ..

بس للاسف ماشي فايده !

:k_no:

ويلصق فيها اسم ( عانس ) !!


لكن في احيان كثيره يكونون الاهل هم السبب في هالشي ..

يعني يحطون شروط تعجيزيه .. يوم يتقدم الريال .. وما يقدر يوفر لها هالاشيا ..

في حين انه البنت تكون مقتنعه فيه ... وحاسه انها ممكن تعيش وياه حياه زوجية سعيده ..

بدون الحاجه حق هالكماليات ..

لكن دور الاهل هنيه .. يكون سبب رئيسي لعزوف الشباب عن الاقدام ع الخطبه !!

:


بالنسبه للموقف الايجابي والسلبي .. :biggrin:

أخوي كان مطرش لي من سنتين يمكن هالايميل ..

وعيبنيييييييييي !!

لأنه فعلاً نحن اللي نملك القدره على اتخاذ الموقف ..

يا اما السلبي والايجابي ..

والذكي اللي بيختار الايجابي طبعاً ..

لأنه بيريح نفسيتنا .. وبيبعد عنا الضغط .. والقلق .. والعصبيه ..


انا يربت الكلام اللي قريته .. وفعلاً حسيت انه نفسيتي وايد ارتاحت ..

:fa56:

وما كنت اتحرطم شرات قبل .. :biggrin:

بس أحياناً غصباً عنك .. تاخذ الموقف السلبي في الموضوع . :m_afaker:


:

موضوع حلو .. وأسئله حلوه

واجابات أحلى ..!

استمتعت وأنا أقرا ردودك اخوي الاسطوري ..

وبعدنا في انتظار باجي الاسئله .. :k_harhar1:
..

[الاسطوري]

"عايش وهم"


هلا وغلا نور الموضوع مابغينا نشوف هالطله البهيه الشجيه الزعفرانيه ام المسك والريحان،
اقرب طويل العمر <واحد يبى يقدرن، لاتقول مقاتل شرس عن باجر
الاعضاء يتحروني انسان مفترس او يسمعونا
اللي ماينطرون ويقولون
هذا ارهابي ولاتابع مسلسلات هاي الرمال وجملتها ماطلعت إلا من ورا متابعة مسلسل
صراع على الرمال، مشكور عزيزي على مرورك هني ولاتقطعنا
محتاجين تواصلك بشدة على وزن
أؤيد بشدة


"وحي القلم"





شوق الاسطوري من الأعضاء الغامضين فالواحات




ماحيد اني يبت بنت اسمها شوق من وين طلعت هاي بعد ام الغموض،
شاكر لج تواصلج اختي وادعي ان سكون
تخف علي أسئلتها
:d010:


"سكون"


لا عادي افا عليج اختي تأخري قد ماتبين وبعد لو يستوي تنسين حلقه اونه
بالغلط عادي مابخبر حد وبكون شاكر لج هذا التعاون
المثمر الطيب هااا شو قلتي؟
:a108:


"مجموعة انسان"


هااا ماأسمع شووو الصوت يقطع طوط طوط طوط طوط
افااا انقطع الاتصال ولكنا بتستمع
بالسوالف وياه
.
.
.
.
.
.
.
يعني لازم توهقني بأسئلة ماعليه
خل ايي دروك وشوف
:bash:


1. شو تعلمت من كثرة زيارتك للكراجاااات عسب هذاك الوحش؟!؟


تعلمت ان الواحد ماياخذ موتر مستعمل خاصه إذا ماكان
يعرف تاريخه لأن بيتوهق لو طلعت
فيه مشاكل


2. قووول رايك في ذنيني ,, كلكلوووش ,, مجموعة إنسان اللي اكثر ناس في الواحات تشوفهم !! بس بدون عصبية هع


ذنيني: فنان بس مايدق عود راعي سوالف ماشاء الله إذا رمس في موضوع صعب انك توقفه
خلاص ينطلق وحبوب ويعتمد عليه يوم يتكلف بشي بس الهايزه الفترة
الاخيرة ملازمتنه ويتكاسل واتوقع هالشي
يرجع للدوام البعيد
طول الاسبوع والدرب المزدحم المهلك وابتعاده عن حياته اللي تعود عليها طول السنين
اللي طافت، احتمال اقص عليه كل يوم عقب الدوام من
الاسبوع الياي واخليه ايي
يتغدى وياي


كلكلووش: حركي مايعرف ييلس مكانه وماعرف يتم فاضي لازم يشغل عمره بشي أتوقع هو الأول في الامارات في
مجال التطوع ماتوقع في حد كثره يتطوع اتوقع حتى احلامه عباره عن تطوع، ولكنه في
المقابل صار انسان وايد مشغول وصعب يتحصل
لأنه مايملك كل وقته


مجموعة إنسان: فرفوش ولازم يوم نتلقي وياه يخبرنا قصة حياته من آخر مره شفته لين قبل ماتشوفه
بدقيقه فطول الوقت هو يرمس ونحن نسمع تحس انك عايش وياه تعرف كل
التفاصيل حتى شرب الماي عادي يذكره، بالمختصر
صريح وكل شي في قلبه
على لسانه ومافي شي يوقف في دربه طموح ولكن متسرع بعض الشي وحليله مافي مره قلت له
في شي دبي وقال ماأقدر دومه جاهز عند الحاجه يفزع الواحد وخدوم
بمعنى الكلمه يستاهل تصفقون له
هالكثثثر
:a036:


3. شو مشروبك المفضل في كفتريا محارة البحر؟


مشروبي المفضل طولي بعماركم اسمه بطّكه تنقرا (بط طكه) وهذا قصته قصه بخبركم اياها؛ اول ماداوم تعرفت على واحد اسمه بطي الله يذكره بالخير متين شويه وراعي هبه في الاكل ماشاءالله عليه دومه يوعان فماكان يروم يتحمل الدوام بدون مايتريق او ياكل شي فمره من المرات اتصل بكفتيريا وقالهم ابى بطكه قالي انت شو تشرب تبى بطكه قلت له شو هذا بعد البطه قالي عصير يح بلغتهم يقولون بطكه فعيبتني السالفه وقمت يوم اروح الكافتيريا اللي صوبنا اقولهم ابى بطكه هم يفهمون على طول فالحين صرت بمجرد اني امر عليهم على طول اغلب اللي يشتغلون هناك من يشوفوني يضحكون ويقولون بطكه او اذا طلبت ورحت استلم يقولون شو طلبت بطكه ولا وآخر مره خليت مجموعه يشرب بطكه عقب ماقلت له قصة حياتي ويه البطكه فشو رايكم تجربون البطكه بشرط تقولون (أريد بطكه حلو بارد)


4.منو العضو او العضوة اللي خاااطرك تضربهاااااااااا بشبشب !!!


خاطري أضرب مجموعة انسان بالشبشب لأنه
وهقني بأسئلة إضافية
:fa44:


"عهد الوداع"


لا مب عادي غيروا القوانين ليش انتي ماتدرين الحين كل واحد له سؤالين بس
واللي يسألني تراني بسأله واللي مايسأل بريحه من
شري فكري في الموضوع
:icecream:


"خطاب"


هلا والله شو طلعت منها هو على كيفك ولا على كيفك ماشي أنا أطالب وبشدة انك تكون
من عقبي ولا ترا مابكمل باقي الاسئله هااا لاتخليني اوهقك
طرش لي بطاقتين رصيد وبعدل
الرد لوووول
:fa56:


"مهابه"


شفتي اختي عاد كيف اكسر الخاطر يالله تعالي يلسي مكاني وكملي شو رايج جيه يخفون على
الواحد مب بالرمسه بس، ماعليه الدور ياينج ياك الموت ياتارك الصلاة وانا
من الحين بجهز أسئله عشان أطلع حرتي
من اللي سألوني
:k_harhar1:


"حلم الطفولة"


لا عيب انا ماضرب البنات الضربة ردة فيه بحجة من حفر حفرة لأخيه وقع فيها،
شكرا لتواصلكم وان شاء الله تكون الاجوبه
خفيفه عليكم


"ملاك الروووح"


الله يحييج اختي وعقبال ماتنطرح الاسئله الحلوه عليج ونزيد نحن من عندنا
اتريا ايي دوركم، شكرا على المرور وراجع
عقب للرد الثاني
:h_daleel:


"سكون" << مره ثانيه


أنا اتوقع حلم شكلها مناسب
للسوالف هاي
:k_santa_1:


//


تعبت كثر ماأكتب اليوم، الله يستر من
اللي ياي في الدرب
:d010:

[أنامل قلب]

/


السلام عليكم ،،


ما شاء الله عليك أخوي الاسطوري ،، صدق ما شاء الله ..
أسلوبك جميل بتناول الموضوع وأفكارك أجمل بارك الله فيك ..


+حبيت النقاط اللي تطرقت لها صدقا ،،
وتعرفوني أحب أقرا الردود الطويله :tongue: ..


(( طول ما أنا قاعده أقرا مبتسمه لا إراديا ،،
وأحيانا تفلت مني أشباه ضحكه بس عالصامت لول ^^" ))


+ اسمحلي بمر على عجل !


/


بخصوص قضية الفتاه الإماراتيه ،، ومنظرها بموضة الأبراج الجديده كـ مثال ..
فعلا كلامك ما خرج عن الصواب والاختلافات تكون واضحه ..


همم ذكرتني بشغله ،، واللي هي موضة العباه الوسيعه // حلوه وساتره ،،


بس هونت عن فكرتها والله العالم باجر احتمال ارد لها ،،
ليش لأن البعض منهن يرتديها بالشكل وللسبب الخاطئ :a018: ..


خاصه اللي ترفع عباتها أو إهي اللي ترتفع بالغلط لول ،،
و البنطلون يكون كأن برموده والكعب هالطول
فـ المنظر والعباه اهني تلفت أكثر من كونها تستر !

وانا اهني ما أنقد العباه الوسيعه أبد والله ،،
بس حبيت أوضح نقطه إن النيه مهمه وليش ارتدي هذا بدل هذا =)



/



بخصوص قضية المهر وتكاليف الزواج :k_icon9: !


الصراحه بالنسبه لي أعتبرها من أطرف الطفرات اللي صايره عدنا بالبلاد ،،
بصراحه وكأن المعرس والعروس مخططين من البدايه انهم يبدون حياتهم ابـ بلاوي ..
+ الأهل كذلك يأثرون جدا جدا جدا ،، وكأنهم يدورون عالمظهر وماهمهم الأصلح لعيالهم !


مثل ما قلت أخوي ،، إهي ليله بالعمر وحلو إنها تظهر بشكل طيب ،،
بس وين الطيب بـ شغلات ما يرضا ابها رب العالمين !


عدنا خلل بفهم الناس لـ مثل هذي المفاهيم كالزواج والمهر وحتى ليلة العمر ،،
اللي المفروض تكون بداية خير وفرح واحسان ،، مش بلوه الطيح بجبدنا !


ما بنقول إن الزواج بالبدايه غير مكلف لكن كلمن تكون تكاليفه عـ قده وضمن المعقول ،،
والبركه أكيد بمن بدأ حياته بما يرضي ربه سواء من المهر أو غيره ..


ما شاء الله ،، عدني أمثله طيبه أشوفها برفيجاتي بارك الله فيهن ،،
فديتني كل ربيعاتي غير شكل :tongue: ..


اللي تطلب لها مصحف ،، واللي تصاحبه بملغ بسيط جدا فوق ما تتصورون ،،
واللي تتبرع بالمبلغ بنية طيبه ليبارك بها الرحمن زواجها ،،


وأحيد وحده كذلك كان عرسها بسيط جدا بحيث دعت الأقارب فقط للمنزل ،،
وتكون النفسيه مرتاحه وراضيه ولله الحمد ..


ما قول الكل لازم يطبق هالشغلات ،، لا أبد ..
بس حلو ان الواحد يراعي ويجعل النيه من البدايه طيبه ..


وأدري طولت لول ^^"
بس مادري تذكرت أمثله حلوه مرت علي !


//


حبيت إضافات كذلك بخصوص القضايا الأخرى أكيد ..
مثل ما سبق وقلت ما شاءا لله لك أسلوب وفكر طيب بارك لك الرحمن بهما ..


وعن القضيه الأخيره ،، فأكتفي بـ جميل جدا :yes: ..


+ اسمحولي أذن بتوكل وبرجع لحلقة اليوم ^^


//

[أنامل قلب]

//


[ الاسطوري بين السائل والمسؤول ~ !


بهذي الحلقه "عساس" نعطي مجال لـ ست أعضاء
بطرح أي سؤال يحببنه لـ شخص الاسطوري ..


يعني بعد الدردشه والنقاش حول بعض القضايا ،،
قلنا نعطي مجال لاتصال الأعضاء بالضيف ..


لكن بعد ما شفت إن 3 أعضاء من أصل أربع طرحو أكثر من سؤال // هونت ..
قلت ما فيني أنزغد وانا بطبعي خوافه :tongue: ..


ونبدأ ابهم بالترتيب :whistling: !


,,,


ـ سؤال أخوي عايش وهم :


ماهي مخاوف الاسطوري من مستقبل الإمارات بشكل عام و دبي بشكل خاص ؟


ـ أسئلة أخوي مجموعة إنسان :


جاوبت على أسئلته :mf_leia: ..
على فكره مثل ما وصفته ،، أهو فعلا من الأعضاء اللي ما يردون طلب أحد يزاه الله خير ..


ـ أسئلة أخوي المزوحي :


كيف تبدي يومك ؟


شو موقفك لو واحد نرفزك في السواقة ( تتجاهله وإلا تحاول تعانده بعد ) ؟


تحب السهر ؟


هل انته اجتماعي ؟


ـ أسئلة أخوي خــّطاب :


أين يجد الاسطوري راحته .. !


رأيك وبصراحة في الأوضاع التي نعيشها في بلادنا
سواء من الناحية الاجتماعية أم الاقتصادية أم المعيشية بشكل عام ؟


ما هي المعايير التي وضعها الاسطوري في سبيل اختيار شريكة الحياة .. ؟


انطبــاعك الشخصي ورأيك فـ أخـوك خــّطاب . . !


//


وبالأخير ..


ـ سؤال يحب يوجهه أخوي الاسطوري لأحد الاعضاء ؟


//



تابعونا بـ حلقة الغد =)
وأكرر شكري لكل من تواصل هنا ..


. ...

[مزن هتان]

السلام عليكم

موضوكم شيق المافيا
و اختياركم لـ أخينا المتوهق الاسطوري موفق :fa56:
و مستمتعين بـ أسألتكم و أجوبته

بالتوفيق أخوي الاسطوري، عانك ربي

[بنت الدلع]

مسمتعه لأبعد الحدووود D=

[عفاريتووو]

مستمعين بــ صيدة الاسطوري
الله يعينك لوول


موضوع فعلا مميز يا المافيا ^_^

[المزوحي]

أهلا بك أخويه الاسطوري وطبعا اتريا اجوبتك على اسئلتي لوووول

ولي إضافات بسيطة على ردك اللي فوق ..

بالنسبة للأبراج،هالنوعية منتشرة وكلهم يتشابهون وماتقدر تميز من بينهم، بس الله يهديهم ...

اما بالنسبة لغلاء المهور، حتى لو في بعض العوايل ماتطلب على الريال، بس أكيد هو بيصرف، شي وايد على

شي بسيط، من خدمة وأكل .... الخ ... أشوف إنه الواحد يملج ابرك له ويخلي هالفلوس حق السفر / البيت / السياره

أو إنه يسوي حفله بسيطة جدا ..

نرد نعلق على موضوع الطلاق، اللي نعرف بيد الريال، بس حتى الريال مايعرف يفكر ولايتصرف، ويبتدي بالتهديد من أول شهر

الاسطوري أجوبتك فنانه .....

[عهد الوداع]

عدنا من جديد ,,,

عيبتني هالاسئله وحبيت اطرحها لك يا الاسطوري ,...


السؤال الاول يقول :

كيف ستغير خارطة العالم اذا كان بوسعك فعل ذلك ؟

السؤال الثاني يقول :

قريبا في الاحلام لك حرية التصرف في اموال العالم , فماذا ستفعل بها ؟

السؤال الثالث والاخير يقول :

ماذا تتمنى دائما ؟

[دمعة عين]

:

أحيـَــم . ’،

http://suae.net/vb/images/suaeae/oio.gif
وجـآن يوهقـَـون الـ BOSS . .
عآد آنآ مآروم أقـَـول شي http://suae.net/vb/images/suaeae/D.gif . .
عن يروغني من وآحه التصوير لول . .

،

http://suae.net/vb/images/suaeae/eh_s(6).gif
بستوي أحسن عنهم ومآ بسآلك آي سؤأل . .
سكون كفت ووفت . .!*~

:fa38:
متآبعين ،
،
.
.

[الاسطوري]

ـ سؤال أخوي عايش وهم :


ماهي مخاوف الاسطوري من مستقبل الإمارات بشكل عام و دبي بشكل خاص ؟

مخاوفي هي مخاوف كل مواطن خايف على بلاده من الهجوم اللي صاير على بلادنا ومابى اشبه البشر بشي ثاني ولكن التشبيه بالفكرة مثل ما الذباب يتيمعون على قطعة حلاوة من تخلص تركوا المكان وراحوا يدورون شي ثاني وللأسف بلادنا وأقول بكل صراحه لكل الجهات المسؤوله بأنهم باعوا المواطن في مقابل الفلوس اللي اتييهم من برع وبدوا عندنا بشكل خاص في دبي يطردون المواطن من بيته عشان يسوون مشروع يديد للأجنبي ييلس فيه مابننكر ان الدولة تسوي وتطور ولكن بصريح العبارة هذا كله مب لنا للاجانب عشان يصرفون فلوسهم عندنا وتزيد السيوله وتكبر ارباح الكبار، أذكر مره كان اييني اتصال من خارج الدولة وانا من طبعي اني مارد على الارقام الغريبة ولكن لما تكرر مرات متعدده ورا بعض قلت يمكن في شي ضروري او حد يعرفني رديت تم يسأل المتصل اونه منو انت من وين وجيه المهم طلع انه ماعنده شغل ويوم عرف اني من دبي بكل وقاحه قالي (الله لا يهنيكم انتوا عايشين في جنه) صدمني هالرد ماتوقعت ان في ناس بينظرون لنا بالطريقة هاي يتحرون مسوين كل هذا عشان سواد عيونا مايدرون انهم بعد فترة بيلسونا في البرور عشان يحطون هالاجانب اللي مالهم مكان في اماكنا


ـ أسئلة أخوي مجموعة إنسان :


جاوبت على أسئلته :mf_leia: ..
على فكره مثل ما وصفته ،، أهو فعلا من الأعضاء اللي ما يردون طلب أحد يزاه الله خير ..

جاوبنا عليك البارحه يعني سبقت الباقين منو قدك الحين
بس عاد لاتخق رد علينا
:a108:


ـ أسئلة أخوي المزوحي :


كيف تبدي يومك ؟

بخبرك عن أيام الداوم؛ يرن منبه التلفون الأول واحطه على الغفوة وأكمل عقب شويه يرن منبه التلفون الثاني احطه على الغفوة واكمل عقب شويه يرن السنطور أضطر اني انش واروح اسكره (حاطنه بعيد) إذا كنت مستعيل أروح أتغسل وجيه أما إذا كنت مب راقد عدل فأرجع مره ثانيه اكمل لي جيه بعد 20 دقيقه ويه الغفوات المزعجه وعقب ماأنش أصلي وأتلبس وأدق السيارة سلف أبدأ بالبسمله وأقرا دعاء الركوب وواحد من أدعية الصبح وآية الكرسي وأتوكل وأروح الدوام طبعا على هالسوالف كلها أوصل على الوقت ونادراً جان بتأخر دقايق بس الحلو ان مافي تسجيل دخول وخروج في دوامنا يعني الوضع مرن تتأخر شويه او تعوض روحك شويه هذا يعتمد عليك انت ومديرك وضميرك


شو موقفك لو واحد نرفزك في السواقة ( تتجاهله وإلا تحاول تعانده بعد ) ؟

شوف هو يعتمد حسب الحاله اللي انا فيها ومنو وياي وشو هي الحركه ووين سواها، قبل في بداياتي ويه السواقه كنت من النوع اللي ماطوف شي مول اللي يسوي شي يدفع الثمن (وراثه من اخوي) عادي اوقفه في نص الشارع وانزل له حتى لو كان شارع سريع بس عقب ماعقلت شويه تركت عني هالامور وصرت اطوف وايد ويوم اشوف واحد جدامي حارق اعصابه عشان فلان دش جدامه ايلس اضحك عليه يعني صارت هاي حركات جديمه خلاص


تحب السهر ؟

اممم مادري أحس هالسؤال ناقصنه شي، المهم عن السهر بشكل عام ايام الاسبوع احاول اني ماسهر بحكم ان وراي دوام ونشه من الصبح فأرقد تقريبا حدود الساعه 12 او 1 ولكن في حالة اني كنت كم يوم وراه بعض أسهر لأكثر من هالوقت لابد بيي يوم برقد فيه من العصر لين فالليل وبرقد في وقت متأخر أكثر اما عن الويك اند فهو مفتوح عادي ارقد اي وقت بس حدودي للفير عشان مايخترب رقادي تعرف الويك اند كله يومين لو خربت رقادي شو يعدله عقب وفي الغالب أقضي وقتي في الويك اند وخاصه المسا برع البيت يعني نادراً تلقاني يالس وماعندي شي


هل انته اجتماعي ؟

اممم تقريبا انا تطرقت للموضوع هذا في الحلقة الأولى ولكن بوضح اني مب اجتماعي 100% يعني مب من النوع اللي أحتك بكل حد لأ مثلا في الدوام التقي بوايد ناس ولكني ماتواصل إلا ويه اللي عندي وياهم شغل حتى السلام مب ويه الكل بحكم ان الغالبيه اجانب تقريبا ولكن مثلا لو كنت ويه ربعي ودخل ويانا ضيف يديد بتلقاني عادي سوالف وياه مب اني مستحي منه ومب ماخذ راحتي ودايما اختلط بالناس ماأقطع حتى لو كانوا في اماكن بعيده


ـ أسئلة أخوي خــّطاب :


أين يجد الاسطوري راحته .. !

مابجذب وبقول على البحر لأني صرت ماشوفه أصلا إلا كل فترة مع انه صوبنا بس بشكل عام الانسان مايحس بالراحه والطمأنينه إلا في العباده والتقرب من رب العالمين بس لو كنت صدق متضايق او فيني شي ماأرتاح إلا إذا تميت بروحي في أي مكان غير البيت ويفضل انه يكون بعيد بعد


رأيك وبصراحة في الأوضاع التي نعيشها في بلادنا
سواء من الناحية الاجتماعية أم الاقتصادية أم المعيشية بشكل عام ؟

انت وايد عاطني اختيارات في السؤال، خلاص بختار الاقتصاديه لأن المجال فيه واسع وباخذ الجانب الايجابي شوف عزيزي الدولة تعيش طفرة اقتصادية رهيبه ان صح التعبير والاسعار يالسه ترتفع فوق بشكل شبه خيالي والناس كلها تتقريبا تتشكى من هالوضع ومانختلف على هالشي ولكن الواحد لو فكر في البزنس فانا من وجهة نظري هاي افضل فترة ان الواحد يبدأ بمشروعه الخاص اذا توفر عنده راس مال كافي لأن الدولة محتاجه الحين لكل القطاعات والكل يشتغل ماتلقى حد فاضي واذا عرفت تختار الشغل المناسب اللي انت دارسنه وفاهمنه بيمشي شغلك وبيكبر بسرعه ويه الطفره هاي لأن عقب كم سنه مابتروم حتى تبيع سمبوسه على سيكل بيكولون لك رسوم التسجيل في الدائرة الاقتصادية 200 الف سنوياً


ما هي المعايير التي وضعها الاسطوري في سبيل اختيار شريكة الحياة .. ؟

بلاش فضايح ياخي شوف أول خطوة لازم اكون نفسي واكون مقتدر مادياً وماأحبذ فكرة ان الاهل هم يوفرون لي كل شي يعني يساعدوني هيه اما اني حافي وهم يسوون كل شي احس اني مابكون مرتاح وبمر بمواقف مب حلوه اما عن الخطوة الثانية وهي اختيار الشريكة بذكر لك أهم الشروط عندي وهو الدين وكل شي يخطر على بالك يتوزع عقب حسب أهميته إذا دخل ضمن اللسته عندي


انطبــاعك الشخصي ورأيك فـ أخـوك خــّطاب . . !

وايد يسأل وهقه هالانسان مايصدق حد ينصاد إلا وطاح عليه بالاسئله، حبوب كشيخ جنتل محترم صار يحب السيارات الامريكيه ويفضل النظام الامريكي عند دفع الحساب ومادري بعد جان له علاقات ثانيه بامريكا، بخيل ماقام يطرش مسجات مثل قبل ودوم يمر صوبنا ومايتصل الظاهر مايبى يشوفني ويعكر مزاجه ويبالنا نخشره لروحات البر عشان يدخل التاهو هناك ويطلعه بدون التاير السبير اللي تحت والبمبر اللي جدام لووول


//


وبالأخير ..


ـ سؤال يحب يوجهه أخوي الاسطوري لأحد الاعضاء ؟

عـايـــــــــش وهـــــــــم

ليش ترفض تلتقي بالأعضاء وتحديداً الإداريين وأنا منهم؟ ترا كل الأسباب
اللي سمعتها قبل ماأقنعتني هات لي شي يديد
بإنتظارك هني!

تعمدت أكبر الخط عشان يشوف بوضوح
مايقول مانتبهت لووول
:icecream:

[المزوحي]

شكرا لك اخينا عل الاجابات ... ^_^

[عايش وهم]

السلام عليكم



الاسطوري

Gـــلبه متروسه
:m_afaker:


الله يهديك .. خليت الــ3000 عضو .. و ييتني أنا تسألني هــ السؤال !! :ohboy:

حبكت يعني .. و لازم عــ العام ؟ :smile2:

و ع الطاري .. مستويه موضه في المنتدى (الكل يبا يحرجني)


يا ترى ليش ؟
:k_icon9:




الإحترام و التقدير و الشكر و الإمتنان

لكل من تواصل أو يتواصل أو حاول التواصل مع عايش وهم سواءاً عبر الهاتف أو وجهاً لوجه


و يا الاسطوري لا تقول ما أتلاقى ويا الأعضاء أو الإداريين


يعني اللي شفتهم و رمستهم في التيلفون من أعضاء و إداريين عدد لا يستهان فيه


حد يعرف يزخ عايش و حد يشرده


بس إنته بالذات .. ولا مره عرضت عليي نتلاقى و لا غيره

هو صح بتستوي خيانه :whistling: بس بعد إنته ما حاولت






عزيز و غالي يا الاسطوري .. لين باب بيتك بييك .. تامر أمر :k_no:

بس لا يقراها غيرك و يتحرطم بالذات سفير الخيال .

[مجموعة إنسان]

في كل مره نتلااقى نطريييك يا عايش وهم ونقووول ليش ما ايينا هذا !!

[أنامل قلب]

//

[ الاسطوري وأعضاء الواحات ~

حلقة اليوم خفيفه وطيبه :yes: ،،

أو يمكن تكون العكس :fa46: !

لكن مثل ما عطينا فرصة للأعضاء الاتصال بالعضو من خلال الأسئلة اللي طرحوها ،،
بنترك المجال للضيف ياخذ راحته ويحط عالأعضاء تالي !

بس لا لا ،، مو عـ كيفه ..
نحن نحدد له الأعضاء وهو يختار كيف حاب يتصرف !

مثلا بطرح رايه بالعضو ،، سؤال ،، عتب ،، نقد بناء ،،
طلب ،، كلمه بالخاطر والخ من اللي يحب !

//

هممم ،، الأعضاء انتقيناهم عشوائي ،،

وهـــــم :

ـ زعيم الحاره بن دبي ..

ـ أخوي المنصـــوري ..

ـ أخوي بحر المــوده ..

ـ أخوي المحاق المشتعل ..

ـ أخوي المفتــاح ..

ـ أخوي الملهــم ..

ـ أخوي نبراس الليل ..

//


تصرف معاهم عـ راحتك :a100: ،،
ونطرونا بـ حلقة الغد !

كما دمتـــم بعافيه ~

[عايش وهم]

عمي مجموعة إنسان ..

أسعدني ردك الأخير .. الله يديمكم لي إخوان و أحباب

بس عسى ماشي تقطيع :a108: يوم تطروني ؟

[أتمنى]

الاسطوري ~
بورك فكرك
و "جودك" مع الحرف ؛ أغبِطك عليه :smile:
كل التقدير ..


المافيا و بنتهم سكون ~
تقديرنا الكبير لجهدكم الرائع
يسعدكم الهي :)

.
.

[صريح]

[ الاسطوري ]


لكل انسان هدف يبا يوصله فالدوام ؟ .. انته بقناعة نفسك ويين تحس انك بتوصل


و هل انته من النوع بسهوله ممكن يغير وظيفته ولا يتمسك فيها ؟
:14:


الاسطوري راعي بر ولا بحر ؟
:fa38:

[العجيبة]

ما شاء الله نااااايسسس


الاسئلة حاجة ما حصلتششش


والاجوبـــة لا يعلى عليها الصراحة ... قمة في الاسلوب والافكـار ...


اختيااااار موفق يا بنو المافيااا .... الاسطوري طلع اسطوري !! أتمنى له التوفيق دايمـا


وانا وحدة متابعـة وبشغف .... كملوا

[الاسطوري]

"ملاك الروووح"

مجرد إضافه سريعه لردج الثاني، العنوسه مرات بعد تكون رغبة شخصية بسبب ضغوط الأهل أو مخاوف البنت من الإرتباط بشخص هي ماتعرف عنه أي شي فتفضل إنها تيلس مكانها بدون ماتدخل عمرها في أمور غامضة خاصه لو إنها كانت تعاني من بعض الاضطرابات النفسية ان صح التعبير مثل انها معزوله عن العالم علاقتها مب اوكيه مع والديها او احدهم أو مثلا ماعندها ربع وحدانيه ماتلقى الشخص المناسب تلجأ له عند الحاجه تمر بحالات تحس بظلم من حلوها لها ومرات عادي يكون اهلشي بدون مبرر فتكون شبه منقطعه عن الناس وتعودت تعيش حياتها بروحها شبه مركونه على صوب بعيد عن المجتمع الخارجي حتى لو كانت تختلط بالناس في المدرسه او الجامعه او الوظيفه ترجع هي نفس الانسانه المنطويه بعد ماتخلص من واجاباتها المهنيه وهني صعب انها تقتنع بالزواج مع انها لو فكرت فيها عدل بتشوف ان الزواج بيكون لها الملجأ الاساسي عشان تطلع من هالعالم والزوج هو المحرك الفعلي للعمليه هاي خاصه لو تعلق فيها وعطاها كل شي تحتاجه ولو رجعنا للأسباب من البداية اللي وصلتها للمرحله هاي تكون بسيطه وتافهه يمكن بعد من أقرب الناس لها وهم ذويها اللي هي تحتمي بهم في كل الظروف فاذا غاب هالعنصر من حياة الفرد مع تواجدهم جدامها يكون تأثير قاسي جداً واحتمال يخليها تلجأ للشخص الغلط بدون ماتحس فكل شي يبدأ من البيت والتربيه واي غلطه حتى لو كانت بسيطه تنحسب على الاهل لأنه لابد بتبين في يوم من الايام بشكل أوضح، عادي جان خربطت قولي هذا مريض نفسيا وطوفي

بخصوص الاختيارين الانسان صح انه حر بتصرفاته ويملك الاختيار ولكن مرات العاطفه او العصبيه تتحكم فيه فتخليه يرتكب افعال
وهو مب حاس فيها مثلا الشخص العصبي المنفعل يتصرف ويقول اشياء ولما تروح العصبيه ويرجع لحتاله
الطبيعيه يقول انا شو سويت كيف تصرفت جيه ويبدأ يبرد تدريجيا بخصوص نفس
الموضوع اللي كان مستعد يجلب الدنيا عشانه
فالواحد يحاول يسوي اللي
يقدر عليه وشي طبيعي انه بيغلط مرات وبتكون ردة فعله متسرعه نوعا ما مثلا أنا رمست عن اللي ينش متأخر وجان أنش
اليوم متأخر تفاجأت ماصدقت عيوني قلت لأ يمكن ماشفت الساعه عدل فمال بسرعه بسرعه خلصت
اموري وتذكرت اللي انا كاتبنه وحاولت اني اكون ايجابي ويه نفسي ولكن أكيد
حد من اللي قروا عينه حاره وقال بل هذا مول
مايتأخر وجان أتأخر
اليوم

"سكون"

اتفق وياج بخصوص العباه الوسيعه هاي خاصه اللي يسونها بلمعه أكثر من اللازم هي موضه صح
ولكنها تخليهم يطيحون في شبهات مالها داعي مثلا خل نشوف الكم ابداً
مب ثابت على اي حركه الايد كلها طلعت وغيره
الكثير فليش البنت
تبدي الموضه على ستر العورة! مابدش في التفاصيل عن أتصفع بيقولون هذا مابعيبه شي مول بس
الانسان يحاول انه يمشي بعتدال في هالامور قدر الامكان ويسوي مثلا
هالعبي للعزايم اللي فيها حريم وماشابه
مب للدوامات والمولات

"مزن هتان"

شكرا على المرور من هني وعاد لاتتشمتون ترا الدور ياي في
الدرب على اللي مب متوقع نفسه
:whistling:

"بنت الدلع"

شكرا اختي على التواصل حياج
ماتبين تنسألين

"عفاريتووو"

يتطبق عليج المثل اللي يقولون مصائب
قوما عند قوماً فوائد
:d010:

"المزوحي"

بالنسبة للزواج شوف هو يختلف من شخص للثاني يعني حسب المعارف والعادات المتبعه عند كل عايله يعني في ناس
معارفهم شويه فبطبيعة الحال مايسوون شي عود يدوب على قد الحضور في مكان متواضع
(ولكن مب في كنتاكي مثل ناس) وفي ناس معارفهم كثار
وعاداتهم تحتم عليهم إقامة مأدبة
عشا للعرس وأقصد هني عرس للرياييل فإجباري انهم يسوون شي يخدم العدد وصح اني ماحبذ المبالغة في هالامور ولكن
بعد لو تشوف الفكرة من الجانب الثاني حلاة العرس بوجود الجماعه حولك من معارفك كلهم
يعني مب حلو ان الواحد يعرس سكيتي جنه متزوج بالسر،
مافي شي كامل إلا ربك!

"عهد الوداع"

السؤال الاول يقول :


كيف ستغير خارطة العالم اذا كان بوسعك فعل ذلك ؟

أول شي بسويه بلغي الحدود مابين الدول وبقربهم ببعض والطريقة طبعا بتكون بحبل نربطه في
القارة ونسحبها بطراد عشان تتوحد اللغات والعادات والتقاليد
وان شاء الله يكون الاسلام دين
الجميع

السؤال الثاني يقول :

قريبا في الاحلام لك حرية التصرف في اموال العالم , فماذا ستفعل بها ؟

أول شي بخلي الكل يزكي وغير المسلمين يدفعون الجزية وحتى هم في بلادهم (قوانين يديده) ومتأكد
زكاة الناس كلها بتساوي مزانية دول أوروبا كلها إذا ماكان أكثر عشان
مايتم فقير أو محتاج وعشان يتم مساعدة
الدول الفقيرة

السؤال الثالث والاخير يقول :

ماذا تتمنى دائما ؟

أتمنى اني اشوف الناس عايشين بخير وسعاده لأن مب مهم اشقد الشخص يكون
مستانس كثر ماهو مهم اشقد الناس يكونون
مستانسين بسببه
.

"دمعة عين"

هيه أشوفج تسألين على طول بنزلج لووول لا اسولف عادي
أسألي يت عليج انتي يعني ترا الكل
سأل وخلــص
:doh:

"عايش وهم"

محد قالك تكون مشرف غامض وجان ماسألتك، أنا ماعرضتك عليك بصورة مباشرة ولكن عن طريق الحاضر ياما حاولت
ودايما يقول عايش مايبى يحضر أي لقاء لأنه متأكد اللقاء بينجلب سوالف وهو مايحب
هالشي وعن نفسي في أحد الرسايل الخاصه خلال
الفترة اللي طافت رمس عن
موضوع اني لازم ايلس وياك وجه لوجه عشان نخلص أحد المواضيع ولكنك ضربت الفكرة كلها بعرض الحائط وحتى
مارديت معناته جنك تقولي روح دور ربعك وجان اتصلنا من الارقام اللي تعرفها واللي
ماتعرفها ماترد علينا وعندي شهود على هالشي
فشو تباني اسوي
:fa44:

يالله بترياك عند باب البيت
اليوم المسا
:whistling:

"مجموعة انسان"

اوصصص لاتفضحنا
:fa52:

ولي عودة للبقيه عقب ماأخلص
من حلقة البارحة

[الاسطوري]

ـ زعيم الحاره بن دبي ..

في البداية أشكره على إهتمامه المتواصل بالمنتدى وتطويره بإستمرار ولكن لي عتب بخصوص مشاكل السيرفر
والغلق المفاجئ للمنتدى أحيانا بدون سابق إنذار خاصة في اوقات المفاجآت
والمهرجانات والمسابقات فيخترب التنظيم اللي
مسوينه كله فأتمنى
يكون في تنسيق مسبق مع باقي الجهات في الإدارة عشان تتم هالأمور بسلاسة وبدون إصابات بعد إخذ الحيطة
والحذر، شخص بن دبي أحسه دوم على نياته طيب هادي مثقف (مشغول
على طول) وطموح والأهم من هذا تربطني
به علاقة (دمـــ)


ـ أخوي المنصـــوري ..

أبو الحروف الدحيح اللي هل كيف يوزان بين الدراسة والواحات وباقي الأمور الحياتية، له طلعات غريبة
بعض الأحيان ولكن كل مواضيعه لها مغزى وفي الغالب يعبر عن اللي بخاطره
بطريقة غير مباشرة، كان عصبي في السابق
وشاب نار ولكنه
الحين هدا شويه الظاهر الدراسه كان لها دور غير انه يوم غزا الواحات سابقا بمواضيعه وأفكاره عصر
عمره عصار فياله اليوم اللي يعاني فيه من الجفاف فخلصت كل الافكار
اللي ممكن تطري على باله فبرد
شويه

ـ أخوي بحر المــوده ..

راعي الشلات وعاشق النيسان وسفير تايلند المجهول (سبايدي كاه) شخصيه مختلفه وفريدة من نوعها في الواحات أحسه مب
واضح أقصد غامض شويه وماحتكيت وياه عن قرب بس حسيت بطيب معدنه، الله يعطيه العافيه على
اللي يقدمه للواحات (مع انه بدا يقطع الفترات الاخيره نوعا ما) والله
يوفقه وعقبال مانشوف بحور الموده
الصغار

ـ أخوي المحاق المشتعل ..

هو فنان غصب عن الجميع ولكن أول شي خلوني أبدأ بالعتب من زمان ويمكن صارلي الحين سنين طلبت منه رمسه
وحليله مايقول لأ يدق الصدر ويقولك اعتمد ولكن للحين ماشفت شي أخاف ايي يومي
وبعدني ماشفتها وتم في خاطري < طالعوا في شو يفكر،
من خلال رسماته يبين انه انسان
عصبي مايتفاهم يعني بالمختصر المفيد يخوف اللي مايخاف ولكن لما تشوف مشاركاته في المواضيع وباقي الواحات
تلمس الطيب والبراءه فيه فتكتشف انه يفرغ الشحنات اللي فيه من خلال أعماله عشان
يكون في الواقع شخص عادي وسوي السلوك، أتمنى
له الصحه والعافيه دايما

ـ أخوي المفتــاح ..

أعتبره أخوي العود وايد تعلمت منه ومازلت، سمح بشوش الابتسامه ماتفارقه ومتواضع لأبعد الحدود وراعي سوالف
يعني مازال شبابي الكبر ماأثر فيه وواضح في تعامله مع الناس ماعنده لف ودوران ومع
إنشغاله بالبيت والأسرة والحياة مازال مستمر في الواحات
وحتى لو قطع يرجع لها يعني عنده
ولاء ووفاء

ـ أخوي الملهــم ..

راعي فكر واعي وقلم راقي وهالانسان بعد على نياته مايرد حد وخدوم عند الحاجه ولكنه اختفى
الفترة الاخيرة قطعنا وماأعرف عنه شي إلا عن طريق ولد خالتي
اللي دايما يشوفه في الفيس بوك
:h_daleel:

ـ أخوي نبراس الليل ..

يظهر فجأه ويرد يختفي صاير مثل العملة النادرة لما شفته توقعته شخص عود ولكن عقب اكتشفت انه
اصغر مني بكم سنه واعتبره من الاشخاص المجهولين اللي مانلقى لهم
أي معلومات واضحه وحتى أهدافه من التواجد
في الواحات مجهوله

[أنامل قلب]

يزاك الله خير أخوي عـ هذا التواصل الطيب :k_smile2: ..

وعـ طاري الاكمام الوسيعه فمثل ما قت الواحد لازم يعرف وين يلبسها ^^
بس ذكرتني ابـ وحده ربي يستر عليها بالجامعه ،، لمن يت تعدل الشيله !
ما تتخيلون العباه والكم لـ وين وصل ،، ونحن جي استوينا :k_puppyeyes: !
وعادي ماكان موجود حد من الجنس الخشن ،، ماعدا عمال التنظيف وهذول مو ضمن الحسبه :k_icon9: !

+ وحده ثانيه بالمسيد عـ أيام صلاة التراويح :ohboy: ..
مادري شو يسمون هالعباه اللي في منها انواع تنحط عالراس وأنواع لا ..
بس جي وين الكم يكون فيه (( هم ما عرف شو يسمونه )) شرات الخيط بشكل حلقه ،،
جي يدخلون فيه الابهام عساس لا يرتفع الكم ،، والبنوته ما شاء الله عليها كيــــــوووت !
مو عشان العباه والله ،، بس جي كانت كتكوته وبريئه ، مادري كيف بس كانت زغطوطه على صغر سنها =)

وووووو ربي يوفقنا جميعا :fa46: !

/

أكرر شكري لـ طيب تواصلك والموضوع أخوي ،،
فعلا مستمتعين ^_^ ..

,

[أنامل قلب]

//

[ الاسطوري والواحة المفتوحه ~

هممم ،، ماله داعي نقول عدنا :k_icon9: !

بس بعد هالتواصل الكريم بين الاعضاء والضيف ،،
قلنا ما يصير نهمل المنزل اللي استضيف به العضو :tongue: ..

فـ يعني خل ننقل روح الحوار الطيب اللي يملكها صيدنا العجيب للـ واحه المفتوحه ،،
بـ جوله نحسبها خفيفه على القلب باذن الله :whistling: !

//

احـــم ،، بالبداية :

ـ رأي أخونا الاسطوري بالواحه المفتوحه ككل ،،
وكيف إذا ما قارنتها بين الأمس واليوم !

ـ لو كنت مراقب عالواحه المفتوحه ،،
شو أول عمل ناوي تقوم به ،، ولا بتكتفي بالأمور المعتاده لـ مهام المراقب !

ـ بعيدا عن مراقبي الواحه (( خواتي طير الحب وأتمنى // أخوي عايش وهم )) ..
من من الأعضاء (3) كنت لتنتقيهم كـ مراقبي لهذي الواحه غير اللي فوق ^^
ولمـا كنــت لـ تنتقــي هــؤلاء !

ـ مواضيع تذكرها بالواحه المفتوحه ،، تحب ذكرها هنا لـ تميزها بنظرك !

ـ انتقاد توجهه للواحه المفتوحه ،،
والأعضاء ككل من خلال تواصلهم وإياها !
(( بما إن الواحات بالنهايه ما كانت ولن تكن إلا به من تواصل ))

ـ فكره او اثنتين ،، تكرم بهما الواحه المفتوحه !

ـ اهني بالسؤال الأخير ،، صار اللي ما نتخيله !
جلست الاخت أنامل قلب تتحرطم عالاخت دموع قلم بالمسن على هذا السؤال ..
فلم تجد شيئا تطرحه ،، وجف فكرها فجأه فوق ما به من جفاف :whistling: !
فـ يعني وكـ هدية مني ،، ماشي سؤال سابع :bye2: !!!

//


يزاكم الله خير جميعا ،،
وترقبونا غدا بـ

[ الاسطوري بين العلوم والمقالب !

. ...

[أنامل قلب]

ملاحظه : بعد الاستفسارات اللي طرحها أخوي الكريم صريح ،،
نكون اغلقنا باب طرح الاسئله بما إن كنا محددين من البدء ((6 أعضاء فقط )) للتواصل ..
وبـ إضافة اختي عهد الوداع + صريح يكون اكتمل العدد ^________^ ..

+ أكرر شكري لكل من تواصل هنا =)

.. .

[الاسطوري]

راجعلكم

[الاسطوري]

ـ رأي أخونا الاسطوري بالواحه المفتوحه ككل ،،
وكيف إذا ما قارنتها بين الأمس واليوم !


لو رجعت بالذاكرة كم سنه ورا بشوف أن الواحة المفتوحة كانت من أنشط الواحات وحتى الموضوع اللي ينطرح مايمدي له إلا ونزل تحت سواء بطرح موضوع يديد بعده أو إضافة رد على المواضيع الأخرى ورفعها والإقبال كان كبير من الجميع، حتى ان اول موضوع لي في الواحات ككل كان في هالواحة عن شاي الكرك اللي يعطي جوانح بالاشتراك ويه الحاضر، نوعية المواضيع يمكن اختلفت نوعا ما فالمواضيع الساخنه القليله تقريبا مازال لها نصيب أكبر في الحضور والمشاركات عن غيرها من المواضيع العاديه في نفس المكان اللي التواجد يكون فيها يكون معدود على أصابع اليد الوحده في الغالب، بس مقارنة بباقي الواحات الحضور في هالواحة محدود جدا ولابد للإدارة من التخطيط للتطوير والتحسين لأن المنتدى العام أو منتدى النقاش يعتبر واجهة المنتدى ككل ومكان تجميع الغالبيه فيعطي صورة لمن هم في هالمكان


ـ لو كنت مراقب عالواحه المفتوحه ،،
شو أول عمل ناوي تقوم به ،، ولا بتكتفي بالأمور المعتاده لـ مهام المراقب !


هو بصراحه قبل ماأكون مراقب الواحات (سابقا مرافق إداري) على واحة التصوير إنعرض علي اني اكون مراقب على
الواحة المفتوحة ولكن لما وصلني الاختيار فضلت واحة التصوير لأن الواحه المفتوحه يبالها نفس
طويل ويه الاعضاء ومتابعة متواصله، عن التغييرات والله حاليا
مايحضرني شي يبالها مخمخه من العيار
الثقيل عشان نطلع بأفكار
للواحه هاي


ـ بعيدا عن مراقبي الواحه (( خواتي طير الحب وأتمنى // أخوي عايش وهم )) ..
من من الأعضاء (3) كنت لتنتقيهم كـ مراقبي لهذي الواحه غير اللي فوق ^^
ولمـا كنــت لـ تنتقــي هــؤلاء !


اذكر المراقبين القدامى دموع قلم وبهجة الروح حسب الذاكرة وكان بعد في جيل بعد قبلهم بس ماتذكر الاسامي عدل، كل منهم له دور في التطوير والتحسين ولكن مازال كل واحد وله وقته واليوم الامل في المراقبين الموجودين انهم يطورون هذا يتطلب تواجدهم الدايم او مساندة بعض المراقبين لهم او ادخال مراقبين جدد معاهم، بالنسبه للاختيار هو في الغالب بيكون من العنصر النسائي لأنهم النسبه الغالبه في الواحات فبختار حلم الطفولة والعجيبة وشمعة امل بس طبعا يبالهم شوية يدخلون كم دورة عشان يتعلمون ثقافة الضرب بالخيازرين عشان يوم حد يفتن عليهم ماييلسون يصيحون من الصبح لين يوم ثاني هالواحه يبالها ناس شداد


ـ مواضيع تذكرها بالواحه المفتوحه ،، تحب ذكرها هنا لـ تميزها بنظرك !


المواضيع الحلوه كثيره في هالواحه ومابى أذكر جزء
منها وأظلم جزء الثاني فأكتفي
بالابتسامه هني
:k_smile2:


ـ انتقاد توجهه للواحه المفتوحه ،،
والأعضاء ككل من خلال تواصلهم وإياها !
(( بما إن الواحات بالنهايه ما كانت ولن تكن إلا به من تواصل ))


التعصب اللي نشوفه في هالواحة مخرب عليها يعني وايد أعضاء يدخلون الموضوع مب عشان يتناقشون لا
عشان يفرضون رايهم وبالقوة مب بالاقناع وهالشي سبب في تنافر الاعضاء عن
بعض بشكل عام وابتعادهم عن هالمكان
بشكل خاص


ـ فكره او اثنتين ،، تكرم بهما الواحه المفتوحه !


اول شي تغيير مسمى (الواحة) والشي الثاني إدخال إداريين جدد
للتنشيط بالتعاون مع الحاليين
:fa51:

[دمعة عين]

:


مرحـَـب السـَـآع


:birgits_giggle:
يقـَـولكم حلقـَـه اليـَـوم بتنزل بـ إسمي ،
سكَــون عندهآآ بريك اطرآآري اليـَـوم ، ووكلت أحد أعضـَـآء المآفيـَـآ
بطرح الحلقـَـه . .


وفـَـي حلقة اليـَـوم يكون . .
،


[ الاسطوري بين العلوم والمقالب ~


الله يسلمكم حلقة اليوم ما يطرحها لكم بنفسي وربي يجازي المتبرع كل الخير ،،
وووويعني ،، مثل ما تشوفون من العنوان اليوم حلقتنا مختلفه عن باقي الحلقات !


نبي نظهر عن جو الواحات شوي ،، لكن بدون وصايه
اهني المفروض الأعضاء يعينون الضيف الكريم بالاجوبه إذا طلب وما عارض :fa42: ..


إي ما أمزح من صدقي :mf_leia: !


ونبدأ بـ طرح أسئلة المعلومات العامه من الشرق إلى الغرب :k_unlock: ..
وووو حاولت تكون الاسئله خفيفه ^^"


//


همممم ،، بسم الله نبدأ :fa51: :


ـ ماذا تسمى كل من سورة ( البقره وآل عمران ) ،،
بذكر الحديث الشريف ،، عن الرسول عليه الصلاة والسلام ؟


ـ أذكر أحد المواقف الزكيه ،، والتي جمعت الحبيب عليه الصلاة والسلام
وصاحبه أبو بكر الصديق رضي الله عنه ،، دون تحديد من قبلنا ؟
( على راحتكم يعني )


//


بعيدا عن الاسلام :nerd: !


ـ ماهي أسرع النباتات نموا ؟


ـ كم عدد اللغات الرسميه في جنوب أفريقيا :tongue: ؟


//


ألغاز وأحاجي :h_negab: !
مثل ما قلت أحاجي ،، يعني ركزو بدون لا تفكرون الدورون عالاجابه !


ـ ماهو الشيء المشترك بين الحروف التاليه : ب م ف ه ج ع ي ؟


ـ كلمة تتكون من سبعة أحرف إذا حذفت حرف واحد بقيت ثمانية ؟


ـ أي الحروف الانجليزية التاليه غير متجانس مع البقية : P,A,W,B,V ؟


//



ملاحظه : الاسئلة مصدرها كتاب ،،
بيتم ذكره باذن الرحمن بآخر سلسلة
من فكرة صيد الاسبوع !


،
.
.

[أنامل قلب]

^ يزاج الله خير حبابه ،،
واسمحولي عالقصور جميعا ..

/

اخوي الاسطوري ،،
مستمتعين بتواصلك ^^

,

[الاسطوري]

انزين مافي اختيارات او اتصال بصديق
غير راي الجمهور
:fa52:

[الاسطوري]

"عايش وهم"

لا افااا هذا سؤال بعد كيف نقطع الراس العود نحن أصلا نقدر أو نتجرأ! تعرف بعد كلنا تحت أمرك طولي بعمرك ومانطريك
إلا بالخير وذكر الصفات الحميدة والمدح وكل من يلقي الابيات اللي كتبها فيك وفي عطاياك
وفضلك علينا، انت بس اقرب مره واحضر لقاك ويانا
وتأكد بنفسك < هذا لزوم
التقردين
:icecream:

"أتمنى"

الاسطوري مهما حاول وحاول وحاول يظل تلميذكم اللي يتعلم منكم دايما وأبداً، أسعدني
تواجدج بين هالصفحات المتواضعة وأتمنى أكون عند
حسن ظنكم فيني

"صريح"

لكل انسان هدف يبا يوصله فالدوام ؟ .. انته بقناعة نفسك ويين تحس انك بتوصل

تبى الصراحه ياصريح على المدى البعيد انا مالي تقريبا اهداف وظيفيه مول لا اتمنى اني اصير مدير قسم ولا مدير ادارة ولا حتى مدير عام، طموحي اني اكون حياتي واوقف على ريلي بسرعه واطلع من الشغل وابدأ في البزنس الخاص وبدون تحديد يعني اتوسع وادخل في كل المجالات وادير شغلي بروحي يعني مب من النوع اللي يفضل انه يخلي الناس يديرون له شغله عشان يرقد طول النهار ويلعب طول الليل

و هل انته من النوع بسهوله ممكن يغير وظيفته ولا يتمسك فيها ؟

شوف راحة الشخص اهم من المميزات يعني (سين) من الناس مضحي براحته وحريته في مقابل انهم عاطينه مميزات مغريه اما الشخص (صاد) قابل بمييزات خلنا نقول متوسطه في مقابل انه يمكل حريته وراحته ووقته، انا احس عمري اقرب للنوع الثاني ولكن هذا مايمنع اني لو لقيت وظيفه افضل اني اغير خاصه اذا كنت مكتسب خبره كافيه من الوظيفه اللي انا فيها بشرط اني اكون مازلت ضمن نطاق الشخص (صاد) ولكن في النهايه مثل ماقلت في إجابة السؤال الاول ان الوظيفه شي مؤقت والمفروض الواحد مايعتمد عليها لين سن التقاعد لأنه بيكتشف انه خدم الناس وماسوى لعمره شي

الاسطوري راعي بر ولا بحر ؟

عشان أكون واضح انا لا هذا ولا هذا للأسف طلعت مال مولات ولكني احاول اني اتغير الحين، عن نفسي أفضل البر مادري ليش بس احس اني ارتاح له أكثر يمكن لأن عمي توفى وهو في شبابه في البحر ولكن بعد البحر مالنا بد منه يعني سوالف الحداق حلوه بعد اما عن السيف فالوضع لا يعلى عليه، أحيد من سنين مره كنا في سيح شعيب وواحد من الربع عنده اكس فايف وغرزت هناك وربيع راعي الاكس فايف اطن سوادني وياله اتصال كان في حد يبى يعرف هم وينهم جان يقوله السيارة غرزت علينا في الصحرا وكل الشباب اللي كانوا هناك حزتها نقعوا عليه من الضحك اي صحرا على البحر

"العجيبة"

بما انج متحمسه وعايبتنج الاسئله انا ارشحج تاخذ المكان من عقبي
تراج تستاهلين كل خير ومايرد الكريم إلا ... ،
شكرا على التواجد

"سكون"

ماقصرتوا حطيتوا كل الاسئله اللي تطري
على البال واللي ماتطري
بعد (تعذيب)

"دمعة عين"

مسؤولج في الادارة جيه توهقينه
بالاسئله ماعليه
ماعليه

[أنامل قلب]

لول ،، أشوف الأعضاء شردو ..
لهالدرجه الاسئله صعبه P=

خونو :whistling: !

/

للمساعده يعني ،،
أول اثنين سهلين وبتحصلهم سيده عن طريق جوجل !

اللي بالنص ،، هممممم ! // مادري هل أحط اختيارات !

وعن آخر ثلاث فـ صــــــــدق وااااااااايد سهلين لدرجة السخافه ..
ولهذا السبب عني أنا ماعرفت أحلهم لول ^^"

يعني ابـ معنى ثاني ،، دوم نفكر بالأصعب ،،
لكن الاجابه بالنهايه تكون من أبسط ما يمكن أن يكون !

/

ها ،، حاول تحزر =)

,

[أنامل قلب]

//

[ الاسطوري وصفحة بيضــــاء ~

بهذي الحلقه الأخيره عدنا بـ صيد الاسبوع ،،
حبينا نشارك الضيف بـ صفحة بيضـــاء يتصرف بها كيف يشاء !

،،

المطلوب منه يعبي الصفحه ابـ سبع نقاط ،،

بحيث كل نقطه تضم ما يحب
سواء كانت كلمه ،، عباره ،، فقره ،، خاطره
سؤال ،، معلومه ،، نصيحه ،، ملاحظه ،، قصة ،، الخ

أبدا لن نحدد ..

فـ لصيدنا حرية التصرف وصفحته هنا ،،
بـ آخر حلقة من حلقات صيد الاسبوع =)

//

ـ

ـ

ـ

ـ

ـ

ـ

ـ

//


وجزيت خيرا ~

[الاسطوري]

ـ ماذا تسمى كل من سورة ( البقره وآل عمران ) ،،
بذكر الحديث الشريف ،، عن الرسول عليه الصلاة والسلام ؟


السورتان هما البقرة وآل عمران، فقد ثبت في الحديث الذي رواه الإمام مسلم رحمه الله عن أبي أُمَامَةَ الْبَاهِلِيُّ قَالَ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ : ( اقْرَءُوا الْقُرْآنَ فَإِنَّهُ يَأْتِي يَوْمَ الْقِيَامَةِ شَفِيعًا لأَصْحَابِهِ اقْرَءُوا الزَّهْرَاوَيْنِ الْبَقَرَةَ وَسُورَةَ آلِ عِمْرَانَ فَإِنَّهُمَا تَأْتِيَانِ يَوْمَ الْقِيَامَةِ كَأَنَّهُمَا غَمَامَتَانِ أَوْ كَأَنَّهُمَا غَيَايَتَانِ أَوْ كَأَنَّهُمَا فِرْقَانِ مِنْ طَيْرٍ صَوَافَّ تُحَاجَّانِ عَنْ أَصْحَابِهِمَا اقْرَءُوا سُورَةَ الْبَقَرَةِ فَإِنَّ أَخْذَهَا بَرَكَةٌ وَتَرْكَهَا حَسْرَةٌ وَلا تَسْتَطِيعُهَا الْبَطَلَةُ ) (صلاة المسافرين / 1337) قال النووي في شرحه لصحيح مسلم : قَالُوا : سُمِّيَتَا الزَّهْرَاوَيْنِ لِنُورِهِمَا وَهِدَايَتهمَا وَعَظِيم أَجْرهمَا


ـ أذكر أحد المواقف الزكيه ،، والتي جمعت الحبيب عليه الصلاة والسلام
وصاحبه أبو بكر الصديق رضي الله عنه ،، دون تحديد من قبلنا ؟
( على راحتكم يعني )

غادر رسول الله صلى الله عليه وسلم بيته،‏ وأتى إلى دار رفيقه - وأمنّ الناس عليه في صحبته وماله - أبي بكر رضي الله عنه‏.‏ ثم غادر منزل الأخير من باب خلفي، ليخرجا من مكة على عجل وقبل أن يطلع الفجر‏.‏
ولما كان النبي صلى الله عليه وسلم يعلم أن قريشًا سَتَجِدُّ في الطلب، وأن الطريق الذي ستتجه إليه الأنظار لأول وهلة هو طريق المدينة الرئيسي المتجه شمالاً، فسلك الطريق الذي يضاده تمامًا، وهو الطريق الواقع جنوب مكة، والمتجه نحو اليمن. سلك هذا الطريق نحو خمسة أميال، حتى بلغ إلى جبل يعرف بجبل ثَوْر، وهو جبل شامخ، وَعِر الطريق، صعب المرتقى، ذو أحجار كثيرة، فحفيت قدما رسول الله صلى الله عليه وسلم، وقيل‏:‏ بل كان يمشى في الطريق على أطراف قدميه كي يخفي أثره فحفيت قدماه. وأيا ما كان فقد حمله أبو بكر حين بلغ إلى الجبل، وطفق يشتد به حتى انتهي به إلى غار في قمة الجبل، عُرف في التاريخ بغار ثور‏.
ولما انتهيا إلى الغار قال أبو بكر‏:‏ والله لا تدخله حتى أدخل قبلك، فإن كان فيه شيء أصابني دونك! فدخل فكسحه، ووجد في جانبه ثقبًا فشق إزاره وسدها به، وبقى منها اثنان فألقمهما رجليه، ثم قال لرسول الله صلى الله عليه وسلم‏:‏ ادخل. فدخل رسول الله صلى الله عليه وسلم، ووضع رأسه في حجره ونام. فلدغ أبو بكر في رجله من الجحر، ولم يتحرك مخافة أن ينتبه رسول الله صلى الله عليه وسلم، فسقطت دموعه على وجه رسول الله صلى الله عليه وسلم، فقال‏:‏ " ‏ما لك يا أبا بكر‏ "؟‏ قال‏:‏ لُدغت، فداك أبي وأمي. فتفل رسول الله صلى الله عليه وسلم، فذهب ما يجده‏.‏

//

بعيدا عن الاسلام :nerd: !
ـ ماهي أسرع النباتات نموا ؟

يعد الخيزران الدي يستخدم في صناعة ستائر النوافد والاثاث والحصر الارضية و العربات اسرع النباتات نموا،
إذ يمكن ان ينمو 90 سنتم منه في يوم واحد ، وقد يصل طوله حوالي 30 متر ،
ويزرع في الهند والشرق الاقصى
والصين.

ـ كم عدد اللغات الرسميه في جنوب أفريقيا :tongue: ؟

11 لغة رسمية وهم لغات الافريكان، والانجليزية، ونديبيلى، وبيدى،
وسوثو، وسوازى، وتسونجا، وتسوانا، وفيندا،
وزهوزا، وزولو.

//

ألغاز وأحاجي :h_negab: !
مثل ما قلت أحاجي ،، يعني ركزو بدون لا تفكرون الدورون عالاجابه !

ـ ماهو الشيء المشترك بين الحروف التاليه : ب م ف ه ج ع ي ؟

كلهم من حروف الهجاء العربية!

ـ كلمة تتكون من سبعة أحرف إذا حذفت حرف واحد بقيت ثمانية ؟

عثمانية

ـ أي الحروف الانجليزية التاليه غير متجانس مع البقية : P,A,W,B,V ؟

P

[أنامل قلب]

^ ما شاء الله =)
بس الأخيره ،، ليش اخترت P !

فكر بطريقة كتابة هذي الأحرف ^^

,

[الاسطوري]

^
عيل الإجابة A لأن الباقين نكتبهم بدون مانشل
القلم لكن هالحرف لأ
:h_daleel:

أنا أخترت P لأن AB حرفين ورا بعض و VW حرفين ورا بعض بعد فقلت أكيد الاخير
حرف وحداني انطوائي وماعنده ربع وهو اللي
المفروض أختاره
:a036:

[الهيثــم]

والله مستمتع جدا باللقاء مع الاسطوري ..

أسلوب راقي ، وكلامه مقنع في كثير من المجالات إلي تكلم فيها

وحبيت طريقة تفكيره في كثير من الأمور ..

عسى الله يوفقك يا خي .. وتعزمنا فـ أسرع وقت لـ عرسك
ترانا مستعيلين .. ^__^ ...

[أنامل قلب]

^
عيل الإجابة A لأن الباقين نكتبهم بدون مانشل
القلم لكن هالحرف لأ
:h_daleel:

أنا أخترت P لأن AB حرفين ورا بعض و VW حرفين ورا بعض بعد فقلت أكيد الاخير
حرف وحداني انطوائي وماعنده ربع وهو اللي
المفروض أختاره
:a036:



دام السالفه جي ،،
عيل اعتبر الاجابتين :fa42: ..

,

[الاسطوري]

دام إن هاي آخر حلقه من حلقات الصيد حبيت إنها تكون مختلفه شويه وبدل ماأضغط عليكم
هني في هالصفحات حبيت أطرح موضوع منفصل وأدعوكم له
في واحة الجامعات والمدارس
:yes:

علـم النفـس مع الاسطـوري (http://oasis.bindubai.com/bin/showthread.php?t=39434)

وأشكر كل زار هالصفحة وتواصل ويانا أو فضل المرور بصمت
وأتمنى تتقبلون من أخوكم هالورود
المتواضعة
:a070:

[دموع قلم]

,



صـدق صـــــدق استمتعـت بقراءة الإضافات كلهــــــا ..
وردود الأخ الأسطوري على الأسئلة ..

وكنت من الأعضاء اللي أحس الاسطوري غامض ..
أو بالأصح ماعرفه عنه وايد .. إلا شوي مني ومناك !





الأسطوري ..

إضافاتك فعلا أعجبتني .. ووواستمتعت بقراءتها ..
ومن أروع إضافاتك يوم رمست عن القضية الأخيرة ..

للأسف انا عصبية في أغلب الأوقات ..
وويوم تصادفني هالمواقف وأعصب وأعكر مزاجي بنفسي .. كل شي يتخربط ..
بس يوم ابتسم واهدي اعصابي .. أحس كل شي يتيسر ..

سبحـاااان الله .. ^_^

,





موضوع ممتع جدا وفريد من نوعه ..
تسلمييين سكووووني .. ^^

,

[أنامل قلب]

ما قصرت أخوي الاسطوري ،، واستمتعنا صدقا بتواصلك :smile: ..

وعني أنا فـ بالعكس ماكنت أشوفه شخصيه غامضه ،،
على كثر ما أعتبره من الاخوه اللي آخذ راحتي بالتواصل معهم :fa38: ..

محترم ،، وصاحب فكر مميز ،،
ويملك اسلوب طيب بتواصله والغير بالواحات :fa51: ..

/

أكرر ،، استمتعت وأفدت ،،
كما جزاك ربي عنا خير الجزاء ،،
وكتب لك مراتب الاحسان بكل أمرك ..

/

دمتـــم جميعا بـ عافيه ،،
من الصيد لكل من مر ولـ قروب المافيا =)

احترامي ،، والمعذره منكم عالقصور ..

,

[العجيبة]

لا ترشحني ولا ارشحـك ....


اتوقع اني مثل الاعضاء اللي كانوا يشوفونك عصبي وجاااد ، وما تنعطى ويه ... هااا من زمااااان طبعااااا


كانت فـرصـة سعيـــدة تعرفنـا فيهـا على الاسطوري وتفكيره وآراءه بشكل أكبـر وموسّع ....


وشكـرا يالاسطـوري عالدعوة للموضوع اليـديد .. مريت عليه ... وان شاء الله ايلس عليييه يلسه محترمة لأنه ظاهـريا شكله قيّم وما يطوّف ...!


ومشكـورة اختي سكـون ... جهودكم جدا رائعة ...،