شعبيـــة الكرتون .. !! [الأرشيف]

المقاتل

13-09-08 ||, 04:22 AM

السلام عليكم ورحمة الله وبركاته ،،

شحالكم يالربع عساكم الا بخير .. يا جماعة منو شاف حلقة اليوم من مسلسل شعبية الكرتون ولأسف " اليوم " انصدمت من الحلقه ولأسف النهايه مالها اي علاقه بالحلقه باكملها .. وكما اني تضايقت من المقطع .. شو يعني ينتحر ومن ثم يطلعونه وهوه في نار جهنم ويقول هذا هوه المكان الي ارتاح فيه ؟ ويطلع شخص كالمارد وتنشق الأرض ويطلع كهيئة إبليس !!

شي جدا محزن ، عندما ترا مسلمين يضحكون على شي عظيم وكبير كـ نار جهنم او مهما يكن ويتخيلونه ويرسمونه برسومات هزليه .. ما كان ينبغي انهم يطلعون هذا المقطع .. وايضا التساؤل لماذا الرقابه ليس لها اي دور عند وضع حلقه من مسلسل فريج " يوم كانت الحلقه تتحدث عن جهل الناس بالدين " واليوم نرا الحلقه من شعبية الكرتون .. ترا إين الرقابه ؟

كل شي يحتمــــل .. ولكــــن الضحك على امور تتعلق بالديــــن لا نرضى به .

وجهــة نظر حبيت اقولها لكم وسامحونـــي على الاطاله .

بوسند .

الهيثــم

13-09-08 ||, 05:40 AM

ما شفت الحلقة لا من فريج ولا من شعبية الكرتون ..
لذلك ما اقدر أحكم عليهم

لكن إذا كان الكلام مقصود به ..
فلا نرد عليهم سوى بهذه الآية الكريمة

قوله تعالى : { وَلَئِنْ سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنتُمْ تَسْتَهْزِئُونَ }

تحفه

13-09-08 ||, 05:43 AM

عليكم السلام

تبي الصراحه؟ انا كارهه هالبرناااااااامج و اوووول ما يطلع اغيره

وايد ثجيل علنفس ومول مش ترفيهي و مايعكس حياه الاماراتيين وتراثنا وواقعنا ووايد مبالغين في الشخصيات

جي تحسه مالناس هشك بشك و اي كلام

دموع قلم

13-09-08 ||, 06:44 AM

,

وعليكم السلام ورحمة الله وبركاته ..

اممم ..
الحمدلله مادق التلفزيون خير شر ..

بس أخوي بو سنيدة إذا أنت ترمس عن الرقابة عالتلفزيون ..
فـ وااااايـــد برامج غيره فيها بلاوي ..
وماتشوف أي حركة من أي رقابة أو مسؤولين ..

صارت اهتماماتهم بالإعلام ومايعجبه الجماهير ..
وماعليهم بالآثار ولا التخلف اللي بيدمر المجتمع !

أهم شي مصلحتهم ..
شو عليهم من مصلحة العام ..؟؟!!!

الله المستعان ..

,

وحي القلم

13-09-08 ||, 02:28 PM

انصدمت يوم شفته البارحه ..!

بس قلت يمكن أكون أنا اللى ما فهمت قصدهم :a116:

.
.

المفروض ما يدخلون هالاشيا لانها ما تظحك.. خربوا الحلقه كلها بهالحركه

يعني أونه مستانس في جهنم ..!

بنت الدلع

13-09-08 ||, 03:46 PM

السلام عليكم ورحمة الله وبركاته ..

بالنسبه للرقابه.. فالكثير من المشاهد واللقطات التي تعرض من غير داعي
ومافي رادع لهم

بالنسبه للمشاهد الترفيهيه.. بعد نفس الشي
في لقطات جميله جدا ومضحكه
وتعالج قضايا تحصل في مجتمعنا والناس الكبار تشوفهم مندمجين
بس في لقطات جدااااا سخيفه
ومالها معنى
وثجييلة دم

بالنسبه لحلقة امس .. توه شفت المشهد كامل

الي يبا يشوف الحلقه بيحصلها هنه ..

http://www.youtube.com/watch?v=D3fa7NbF-xc

مبالغين فيه بصراحه
وما اشوف انه شي يضحك ابداا !!

استغفر الله يعني كيف جيه يستهزؤون
صح ان غرضهم شي ثاني
بس مب بهذي الطريقه يصورونه

شمعة أمل

13-09-08 ||, 05:44 PM

ماشفته البارحه.

شرجاوي

13-09-08 ||, 05:50 PM

اللقطه هذي صح انها ما اتضحك .. بس بعد ما اشوف انها تحتاج هذي الجلبه !!!!

باقي المسلسلات البنات فيهم شبه عاريات .. اقصد الملابس الراصه .. تفاصيل الجسم كلها اتبين !!! بس محد تكلم .. و تكلمتوا عن الرسوم ... ودروا عنكم هالسوالف و اللي ما يبا يشوف الاشيا اللي ما تعيبه عنده الرموت و يحط اي قناه دينيه ابرك له بدل ما يحرق اعصابه

تحياتو

الهيثــم

13-09-08 ||, 05:57 PM

أخـوي شرجاوي ، المقصود من الكلام يخص الاستهزاء بالدين ، وأكرر ما شفت الحلقة لذلك ما عرف شو الي صار

وسالفة النساء الشبه عاريات سالفة ثانية ، لكن الكلام عن عن فريج وشعبية الكرتون عن الاستهزاء بالدين

ومب كل شي لازم نسكت عنه ، ونغض الطرف عنه ، لأن كل ما نسكت كل ما يزيد التمادي

هذا عمل وطني وعمل محلي ، لذلك لازم يوصل رسالة هادفة وصورة تعكس حياة المواطن الإماراتي وعاداته وتقاليده وفكره .. سواء بالشي الزين أو الشين

مزايا

13-09-08 ||, 06:52 PM

توقعت هالحلقه بالذات تسوي ضجه

شرجاوي

13-09-08 ||, 07:55 PM

اللقطه ما عليها كلام .. كيف فسرتوا ان اللقطه هاي كانت تخيل لــ نار جهنم ؟؟

انا ما شفت اي نار .. شفت مجرد حمم تحت باطن الارض ..و الدليل انه طلع من تحت الارض ف نهاية الحلقه

مزايا

13-09-08 ||, 08:10 PM

شرجااوي
:thumbup1:

بنت الدلع

13-09-08 ||, 08:15 PM

اخوي شرجاوي
ادخل على اللنك الي حطيته وبتسمع الهندي يقول: انا جهنم يجي وانته ورا ييجي

بإمكانهم يوصلون فكرتهم بمشهد غير هذا
لازم يذكرون اسم جهنم ويحطون مشهد النار والهندي مستانس والثاني الي عداله يتعذب؟

وفي النهايه نحن ما اختلفنا كل حد يبدي رايه من زوايا مختلفه^_^

شرجاوي

13-09-08 ||, 08:36 PM

هذا باكستاني مب هندي :D

بنت الدلع .. كل واحد ابدى رايه .. بس لو الشي اللي شفتوه ما عيبكم و شفتوا فيه اي شي غلط تقدرون اتنبهون و تنصحون اللي سواه

تحياتو

المقاتل

13-09-08 ||, 09:27 PM

يا جماعة الخير خلوني أتكــلم بشكـــل عام ، يقول الرسول صلى الله عليه وسلم : (( ب كلمة لا يلقي لها الإنسان بالاً يهوي بها في النار سبعين خريفاً )) قبل لا نحكم ونقول هالشي عادي ولا بسيط ولا ما يحتاج لهالجلبــه هذا الشي يرجــع لكم وحريه شخصيه .. ولكن يحق لنــا إنّــا يوم نشوف شي ما يعجبنـــا إننــا نستنكر (( فمن لم يقدر فبلسانه , فمن لم يقدر فبقلبه , وذلك أضعف الإيمان )) .. صحيح إن في بقية المسلسلات والقنوات فيها حريم شبه مفاصيخ أو ما شابه لكن شي عن شي يفرق .. و القول هنا إن هالحلقه انعرضت في قناه محليه و حيدر محمد رسّام معروف ومسلم يعني ما اعتقد انه هالشي يخفى عليه .. وكـــما ان الحلقه عرضت النار جهنم على هيئه كاريكاتيريه ورسوم مضحكـــه !!!!!!!!!! .. يقول الله تعالى : (( قُلْ أَبالله وآياته وَرَسُولهِ كُنْتُمْ تَسْتَهزءون * لا تعتذروا قد كفرتم بعد إيمانكم )) سورة التوبة .

قبل لا تؤيدون وتعترضون رجعوا هالشي لدينكم .. الرسوم يعرض حلقات اجتمــــاعيه بطريقه حلوه وممتعــــه لكني أخص على هاي الحلقـــه الي عرضت هالمقطـــع .. وجهـــة نظر .

و الاختلاف في الرأي لا يفسد من الود قضيه ( السموحه على الاطاله ) .

شرجاوي

14-09-08 ||, 12:54 AM

بو سنيده .. والله لين الحين ما عرفت اسمك

الغالي النصح افضل بواااااااااااااااايد من الغِيبه

المقاتل

14-09-08 ||, 01:38 AM

:b015: شرجاااااااوي أسمي بوسنيــــــده عسب ما تقولون شو اسمك غيرته من المقاااااتل لـ بوسنيده :pullhair: أعمـــل إيا يا Qــماعه .. !!

:fa37: والله أنا أنصـــــح أخويه حيـــــدر محمــــــد أنه ما يضــــع فالحلقات القادمــــه مثل حلقة البـاكستاني :osama: و لو يحذف الحلقه من السلسله ابرك له من أنه يستاثم من جراء هذا العمل .. !!

:icecream: وخذنـــا بشور شرجـــــاوي ومثـــــل ما قتلكـــــــم حبينـــا انعبر لكم مافي الخاطر .

مشكووورين ،،
بوسنيده .

الـيـاه

14-09-08 ||, 04:04 AM

هالرسوم يضحكني واجوفه ..
بس هالحلقه الاخيره احس مالها معنى مادري ليش انعرضت ..

بس بعد ماروم اظلمهم يمكن ما افتكر والا شي محد يدري لكن ان شاء الله هالشي مايتكرر مره ثانيه
وان شاء الله تكون في رقابة عنا على هالاشيا ...

الاسطوري

14-09-08 ||, 10:28 AM

السلام عليكم ..

مابدخل في الموضوع لأني ماشفت الحلقه بس أظن لو تاخذون الأمور من منظور ديني فالغالبية يقولون بأن رسم الملامح البشريه حرام يعني الموضوع من بدايته فيه إشكاليه، وبخصوص الرقابه (مقص الرقيب) هالأيام الظاهر انهم يراقبون الافلام وهم ياكلون فراخ وناشوز ويطلعون لأن بصراحه في الأفلام السينمائية تقريبا بدت تتحرر واللقطات اللي كانت تنقص قبل اليوم يخلونها عادي والأدهى من هذا كله فلم اميتباشان اللي انعرض قبل فترة وبعد كم يوم من العرض طلعت عليه شكاوي وعقب وقفوا عرضه اللي كان فيه البطل يمثل دور الإله (الرب) واونه ياخذ اجازه ويحط مكانه واحد ثاني اللي بدوره يكون فاسد ومايعرف يدير الحياة ومثل ماتعرفون بأن الافلام عليها رقابة سابقه ولاحقه والسابقه ماسوت شي واللاحقه ماتحركت إلا بعد الشكاوي لأنهم تعودوا يمشون كل شي مافكروا يتصرفون من نفسهم

بإختصار التلفزيون فيه بلاوي والواحد هو يختار شو يبى منه
والظاهر مانقدر إلا على سعدون
العواجي

الاســـطـــوري
أخوكم

شرجاوي

14-09-08 ||, 01:41 PM

يالاسطوري التمثيل كلها حرام .. لانه جذب في جذب .. مب بس هالرسوم ... جابلوا اليدران احسنلكم

خنفروش

15-09-08 ||, 03:21 AM

يا دحق يا محق

المقاتل

15-09-08 ||, 03:58 AM

:whistling: جمــــاعة الخيــــر ماشاء الله عليكـــــم وسعتوا واتفرعتوا في الموضوع ليكون في اطار المسلسلات الاخرى والتلفاز بشكل عام .. لكن الموضوع من عنوانه شعبية الكرتون " وأخص في حلقة الباكستاني " .. المسلسل الكرتوني يعرض لنا قضايا هادفه وبشكل كوميدي وجميـــل .. ولكـــن هالحلقه بثت شي يجـــب حذفه ونحن بدورنــــا كتبنـــا عسى انه يقرا موضوعنا وياخذ به ..

بس ليش يا أخواني اذا إي انســان كان بيتكلم في موضوع مثل هاي المواضيع كان حلكــم إنه بسيط أو ما يستاهل أو غيّـر القناه ولا تهتم .. لأسف الكثير منّــا لا يريد تحمّـــل المسؤوليه او البعض منّـــا فقط يحاول تهدأة الجو .. جماعة الخير اذا انا وانتوا وغيركم ما تكلمـــوا جان الدنيـــا ضاعت .. لابد وأن نتحمـــل المسؤوليه ونحاول ان نعبّر أو نصل رسالتنــا إلى كل شخص اخطأ او سوا شي يستحق انه نتحــدث وننتقـــد .

بوسند .

المحاق المشتعل

15-09-08 ||, 06:17 AM

يزاك الله خير بوسنيده واضم صوتي لصوتك اخويه رغم اني ما شفت هالمسلسل هاي السنه ابداً

المحاق المشتعل

15-09-08 ||, 06:24 AM

شيء آخر اخي الكريم بوسنيده

يرجى من التأكد من صيغة حديث الرسول صلى الله عليه وسلم ( رب كلمه )

ولك الشكر والتأييد على كلامك الطيب

محاق

المقاتل

15-09-08 ||, 04:32 PM

يزاك اللـــه خير اخوي المحاق المشتعل على التنبيه ، بعد التأكـــد من الحديث قمنــــا بـالتعديــل .. وشكرا على المرور بارك الله فيكـ .

راعي الزعـامه

15-09-08 ||, 09:15 PM

شعبية الكارتون مسلسل فكاهي وحلو واعتبره من انجح المسلسلات اللي انعرضت وانا شخصيا من المعجبين بالهمسلسل الرائع وشخصياته الحلوه ،،
فكاهي لابعد الحدود ،، بس مثل ما قلت في هاي الحلقة شويه تجاوزوا حدودهم ،، ومادري كيف سمحولهم انه يعرضونها

المشكلة اخوي اذا الواحد بينتقد هل تعتقد انه بيكون في رد من المسؤولين ؟؟ ،، ما اقصد رد بالكلام والمجاملات وان شاء الله و مابنعيدها و من هالخربطان ،،
اقصد رد فعلي في ارض الواقع ،، نحن كل سنه انشوف هالهفوات اللي تمس الدين ومافي شي يتغير ،،

الله يعين ،، ومشكور بو سنيده على طرحك للموضوع ،،

إسهر معي ليله

16-09-08 ||, 10:12 AM

حلقة ممتاز من أحلى الحلقات.. خاصه للي عارفين سوالف ممتاز

يعني لو انته ما تدري شو سالفته.. اكيد ما بتفهم وما بتضحك.. يخبروني فيه ناس في بعض الامارات ما يفهمون
عالرسوم.. ولا يظحكهم.. لأنها اشياء ما جد مرت عليهم ولا يعرفون شو هيه..

مثال/ حلقة امس يوم سبتوه تلحق مال البلديه وتقول "هيه هيه فليتي".. فيه ناس من راس الخيمه ما فهموا
شو السالفه لأنه ما مر عليهم فليتي.. اما انا عن نفسي لحقت عليه وكنت واحد من اللي يركضون وراه.. فـ وايد ظحكني

انزين طلعنا برع الموضوع :a116:

بالنسبة لـ ممتاز كنت اتمنى الحلقة تنتهي يوم انتحر.. لأنه يوم دشوا في سالفة جهنم حسيت انه فيه ناس ما بيعيبهم هالشي
خلنا بعيد عن الحلال والحرام.. اذا انته بتاخذ الموضوع مزح ما بتحس بشي غلط.. يعني شرات ما 2 قاعدين ويا بعض
وشوي واحد طفر من الثاني يقوله "ارووح جهنم احسن لي".. وعادي وايد يقولونها ناس ونضحك عليهم

احنا لو فصفصنا سوالفنا وطلعنا الحلال والحرام.. جان هييييه الله يستر..

يمكن انهم يحذوفون هالمقطع من الرسوم بيكون وايد احسن.. عشان بس ما تصير بلبله وظرايب

مشكور عالموضوع اخوي..

الهيثــم

16-09-08 ||, 03:01 PM

أنا شفت الحلقة البارحة ع اليوتيوب .. بصرااحة طفروووه هههههههه
ومثل ما قال إسهر معي ليلة .. يمكن الجماعة إلي ما عيبتهم الحلقة ما يعرفون سالفة ممتاز والمقالب إلي اكلها من الشباب ...

بس سالفة جهنم ،، أنا ما حسيت إنه في جهنم إلا يوم ممتاز قال جي ..
بس فـ نفس الوقت شكله كان يالس في حمم بركانية .. يعني تحت الأرض ولا شو رايكم .. !!

عهد الوداع

16-09-08 ||, 03:27 PM

انا راي من راي اسهر معي ليله ...^_^

المحاق المشتعل

16-09-08 ||, 08:04 PM

السلام عليكم مرة أخرى

في موضوع دايماً اذكره وهو بغرض التذكير وانا ما اكره الناس على تفكيرهم الخاص

كل انسان حر وكل انسان له عمله ... في مره من المرات كنت ابغي اسوي مسابقه

لطلابي للرسم فأقترح عليه احد الوعاض ان اطرح مسابقه برسم بوصف الجنه

وفعلاً قبل لا اطرح المسابقه رسمت الرسمه وكانت جنه وصراط واسفل الصراط النار والعياذ بالله منها

فحسيت شي في نفسي من عدم الراحه من الرسمه هاذي

فاتصلت في احد علمات السعوديه الكبار على حسب ذاكرتي

فسألته هل يجوز اني ارسم الجنه

فقالي لا

كيف ترسم الجنه وفيها مالا عين رأت ولا أذنٌ سمعت ولا خطر على قلب بشر

هاي نقطه

النقطه الثانيه والاهم وإلي هي من وجهة نظري

للأسف قمنا انقلد الغرب في كل شي

وصل فينا الاستهزاء في دينا وفي النار انه اندخلهم في الكركتير عشان نضحك ونستانس

ويوصل حالنا مثل الافلام الاجنبيه إلي انشوفها رهبان في الكنيسه يرقون ويسوون غير وغير

ومؤخراً نزلو فلم مادري بينزل فلم اجنبي انه نوح عليه السلام يرقص ويا حيوانات السفينه والعياذ بالله

والمصخره في هاي الامور بتوصلنا لهاي المواصيل لاحقاً

وانا ما اكره الناس لكن هي وجهة نظر لا غير

والسموحه

المقاتل

16-09-08 ||, 09:21 PM

أخوي راعي الزعـــامه ، ترا هاي هيه المشكله .. المشكله عندنا نحن العرب ما عندنا وسطيه يا دحق يا محق .. اليوم كنت يالس ويا الوالد ولا أقرا مقاله في الجريده كاتبين " إن من كبار المفتين في السعوديه أفتى بجواز قتـــل أصحاب القنوات " أنا لست مفتي ومش ذو علم لكـــن مشايخنــــا ردوا عليه أنه ما يجوز يقول مثل هذا الكلام والقتل كبيره من الكبائر انا ما ريد ادش فالتفاصيل .. القصد إن نحن ما قلنـا نبـــا هالطريقه من الرقابه على القنوات ولا نبا هذا التحرر !! .. نحن نأمـــل إن كلامي وكلامك يوصل للمسؤولين الكبار لعلهم يغيرون ويحذفون بعض هذه المشاهد التي تعارض ديننا الحنيف .. هذا ابسط شي ممكن يسعدونا فيه ( على أمل يعني ) .. شكرا على مروركـ .

( لي عوده )

نور الإيمان

18-09-08 ||, 11:36 PM

استفتي قلبك

..

لدي تحفظ حول هذا الموضوع ..

لا نستطيع الفتوى و التفسير لمجرد ان نثبت وجهة نظرنا ..

و اصحاب الشأن من علماء الدين ان تم سؤالهم حول هذا الموضوع لربما يفيدونا من ناحية طرح هذا الموضوع .. كونه لامس جزءا من الدين ..

المعذرة

المحاق المشتعل

19-09-08 ||, 03:34 AM

نور الايمان

شكراً عالملاحظه اختي بس هالكلام هل اعتبره تعقيباً على ردي ؟

نور الإيمان

19-09-08 ||, 10:57 AM

لم احدد الشخص و كان ردي عاما و ليس خاصا ..

فلك حرية الإختيار!

دموع قلم

19-09-08 ||, 04:17 PM

,

امممم ..
بس مداخلة ضغنطوووطــة ..

دام نحن شفنا الغلط .. وناقشنا الموضوع ..
ونتمنى توصل الرمسة والمعنى لأصحاب الشأن ..

عيل ليش ما نوصل لهم رأينا .. هدفنا .. بطريقة طيبة مقنعة ..؟؟!
برسالة .. إيميل .. أي طريقة ..

سبحان الله ..
الواحد مايدري متى القلب يلين .. والعقل ينضج ..!

.
.

امممم للأسف ..
وااايـــد نكتب مثل هالمواضيع ..
نرمس .. بدون مانحرك شي ..

امممم .. حلو يوم الواحد يجرب .. ويبدأ بالخطوة .. مو ..؟!

والمعذرة ..

,