المساعد الشخصي الرقمي

مشاهدة النسخة كاملة : سنة أولى جامعة


طير الحب
11-09-08 ||, 09:06 AM
اشتقت للدراسة...واحسست ان الوقت قد حان أنفض غبار أحلامي وأبدأ بتحقيقها...أحسست بأني أعود طفلة تود تجربة كل شيء...جهزت أوراقي كي لا اتتهاون وقدمتها وانتظرت بفارغ الصبر أن يتم قبولي...وبعد انتظار تم قبولي...


أول أسبوع...جدا ممل لشغفي ان أبدأ الجد والدراسة في حين طالبات الثانوية جدا مستمتعين بعد وجود محاضرات حسيت عمري زلمه بس تبا تدرس


الجدول مضغوط وهذا الي أسعدني..لأني ما احب البريكات احب اخلص وأطلع ...بصراحه أكثر شيء تعبني اني اتوله على اليهال جدا....ما أصدق أرد البيت ...عشانهم


عندي 6 مساقات واحد بالعربي...مبدأياً اخترت تخصص network بس احتمال أغيره لإدارة الأعمال لأني في السابق جربت هالدراسة وما أدري اذا بفلح فيها...


أحس أني أحب كلاسات الأنجليزي...بس طبعا جدا متولهه على النوم في ظل وجود طفلين لا مجال للنوم لحين وصول الشغاله على الأقل...قمت احس بطعم الويك اند ...



لي عودة
الاسطوري
11-09-08 ||, 10:25 AM
السلام عليكم ..

"طير الحب"

عودتج لمعاقد الدراسة أعتبرها خطوة جرئية منج وخاصة في هذا الوقت بوجود طفلين ينتظرون
منج الرعاية والإهتمام وماشاءالله أشوفج محتمسه من البداية وماخذه 6
مساقات وأشجعج على هالخطوة وإن شاءالله تحافظين
على معدل مرتفع لين التخرج وتاخذين
الشهادات اللي تبينها
وبالتوفيق

الاســـطـــوري
أخوكم
العجيبة
11-09-08 ||, 02:33 PM
ما شاء الله شيء طيـب ...

أهم شي تحـافظيـن على هالحمـاس للنهـاية ... وحاولـي تتغلبين على العثرات ان صادفتج .... والله يوفقج


تذكرينـي بالوالـدة ... العااام درست فصل واحد بس ... ومن عقبها ما طاعت تكمل ... طبعـا بعد ما جهزت لنـا لستــة أعذاااااااار !!!
شمعة أمل
11-09-08 ||, 04:54 PM
ماشاءالله عليج طيـر! شدي حيـلج! وأهم شي استانسـي وايد.. ماشي أحلى من أول سنه جامعه :)
مايهزك ريح
11-09-08 ||, 05:27 PM
بالتوفيق .. اختي طير الحب ^_^
المزوحي
11-09-08 ||, 07:07 PM
شي حلو الصراحة والله يوفقج، لأني فكرت أخطي نفس خطوتج، بس حسيت بعمري ماقدر أكمل دراسه، بعد ماهديتها

فترة طويلة وااااااااايد ..
دموع قلم
11-09-08 ||, 09:50 PM
,


أبييييـــه ..
كشششخـــة .. ^_____^

أهم شي توزنين بين الدراسة والبيت والأطفال ..

واااايد أحب اتعرف بالجامعة على البنات اللي عرسو ويكملون ..
أحسهم حاسين بالمسؤولية .. فاهمين الحياة ..^^


عسى الرحمن يوفقج عزيزتي ..
وييسر لج دراستج إن شاء الله ..


بالتوفيييـــق ..

^_^



,
!..Ổόρš
29-10-08 ||, 07:37 PM
:thumbup1:مآ شالله عليج .. وما شالله ع طموحج:m_9afgah: ..
اذا كنت مثلج بتعايز ارد للدراسة مرة ثانية :ohboy: .. فماشآء الله عليج .. مرة 2

وربي يوفقج ان شالله .. ^.^
هزاايم
31-10-08 ||, 11:42 PM
ماشااء الله عليج

تباارك الرحمن


منصوووره ان شااء الله

اشحقه ماقلتي لي كنت ببادل معاااج,,,بربي لج عيااالج,,وانتي كملي بدااالي =)
طفلة من هذا الزمان
03-11-08 ||, 01:16 PM
العـــودة لمقاعد الدراســة بعــد انقطــاع يعتبــر تحــدي ،،


هي مهــارة ومحتــاج الشخص قــدرة كبيرة و قلــة منــا يملكونهــا فقــط


وانتي يا ام عبــادي من القلة القادرة المحظوظة جدا انها مازالت تملك هالاصرار والتحدي ...


باقي تنظيم الوقــت و لا تحسين بالذنب جدا عيــالج ،، مع اقتنــاعي التام بدور الأم الجبــار في حياة عيالهــا وأهميته و هم كل حياتها و كل شي .. بس اتمين انسانة لها طموحها الخاص و خط سيرهــا في هالحياة ،،


بعد كم سنة من اليوم لما يكبرون الأبو و الأم و يبدون لعيــال يستقلون بحياتهم، معظم الآبــاء و الأمهــات يواجهون صعوبـة في letting their children go و يتذكرون بعد عمر انهم في غمره عطــائهم نســوا الأهم و هو أنفسهــــم ،،


موفقــة يا أم عبــادي وفعــلا انتيRole model لنــا ،، "" يعني ما قدرت اقول قدوة :tongue: "

ربي يحفــظج وعيالج و أبوهم يا رب :k_smile2: ..
أنامل قلب
04-11-08 ||, 03:14 AM
باذن الرحمن موفقه =)
تحفه
05-11-08 ||, 12:18 AM
ام عبودي انا من اكبر المشجعييييين :a034::a034::a034::a034::a034::a034::a034::a034: والله بغمضه عين السنه تمر
طير الحب
20-11-08 ||, 08:28 AM
صباح الورد...


الحين احس اني أروم اتنفس شوي من عقب رمضان انشغلت بالأمتحانات ما لحقنا نلخص first mid-term أسبوع وبدينا الثاني عموما مستمتعه بالجامعه بس يت فترة ملل فقررنا نطنش الكلاسات يوم ونسير السينما تغير والله استانسنا حتى عبود خليته يغيب وخدته وياي هو واخته...


أكثر شيء حابتنه انه الدراسه بالإنجليزي أحس كل يوم أتعلم شيء يديد ولازالت محتارة في التخصص دراجاتي في الادارة عالية وفي الكمبيوتر عاليه بس احس اني اتفاعل مع البزينس أكثر..


عندي بريزنتشن عقب العيد في اي موضوع اختاره جدا محتاره شو اختار اقولها حتى لو عن الميكب اب قالت عادي عندي الحين كدا خيار ياريت تساعدوني ابا اخد درجة ترفع الرأس..تراتي الكي بورد ما فيه حرفد الي عليه نقطه ما اعرف شو فيه من جي اكتب د

الأسطوري...حاطه في بالي هدف واتمنى أقدر أحققه ...وشكرا على التشجيع.

العجيبة...حاطه ببالي أشياء وايد ولازلت متحمسه بس محتاجه هالاجازة الياية نقاهه من الخاطر.


شمعة أمل...>كرتيني بريلي يقولي استانسي ولاتضغطين نفسج بالدراسه ...الله يوفقنا جميعا حبوبة.

ما يهزك ريح....ويوفقك يا اخوي.


المزوحي بالعكس... أجمل شيء ان الانسان يوسع مداركه ولازم الشخص ما يحس انه كبر على الدراسه .. العلم ماله عمر محدد...




عندي مشكله بس ما أدري ...بالبداية كنت بحالي وشوي شوي كونت قروبات بس بعضهم كانوا يسعون يتعرفون علي عسب اساعدهم في الامتحانات يعني اغششهم انا ما عندي مانع اشرح لاي شخص بس اني اساعده بدون ما يستفيد ما احب وعموما اكثر الاكتحانات اختياري يعني مجهودي كله لهم وهم ما يعرفون شيء ولا يسعون انه يتعلمون اقولهم بعلمكم يقولون ما يدش مخنا بس انتي حلي والباقي علينا امتحانين ياني احباط من هالسالفه وما عرفت اركز وكل شوي يكلموني ولا يشوفون اوراقي يقطعون تركيزي...؟ انا ابالغ ولا شو...؟
مجموعة إنسان
20-11-08 ||, 10:47 AM
طيير

ترا الجامعه جذي مااشيه
بس احسن شي قوليلهم ان خلاص ولا يهمكم بغششكم (حفظا لماء الوجه)
وفي الأمتحان لا تغششينهم وقوليلهم اووه الأمتحان كان صعب


انا جذي اسوي
طير الحب
21-11-08 ||, 05:16 PM
ههههههههههههه

انا ابتسم يوم يقولولي غششينا...

دموع قلم...عاد أنا جربت اكون طالبة جامعية قبل الزواج وعقب الزواج... :)


!..Ổόρš ...شكرا


هزااايم...هههههه...والله اتوله عليهم ومن ارد البيت اجابلهم ولا احل الواجبات الا باخر الوقت...تشوفيني احاوط وراهم باوراقي... :)
خيال الحب
28-01-09 ||, 03:52 PM
ماشاء الله عليج يام عبدالله:vampire:

الله يوفقج ان شاء الله
لحن الحياه
29-01-09 ||, 07:54 PM
هههههه يحليلج يا طير الحب

الله يوفقج ان شاءالله وتتخرجين وتفرحين بشهادتج

وترا مجال الزنس وايد حلوووو شدي حيلج وربي يوفقج
جنون امرأة
20-04-09 ||, 02:45 PM
طير الحب الله يوفقج حبوبه ..


ذكرتيني بعمري هالكورس هههه

ارد البيت احس اني يوم كامل ما شفت صوغه ~

مع ان كل يوم عندي بس 3 ساعات ..
طير الحب
23-04-09 ||, 04:19 PM
الحمدلله جدا سعيدة بالنتائج الي احققها...وحاليا ان شاء الله بشارك بمشروع يخصني...بس اتوله على حواري وايد فديت قلبها تزقرتي ماماتي

ان شاء الله بتخصص بيزنس ويارب اتخرج بإمتياز...
الا انا
23-04-09 ||, 09:49 PM
.^^

موفقه يا رب
طير الحب
10-11-09 ||, 08:00 AM
بعد عام...

أشعر بالملل ....


لا رغبة لي في المواصلة...:(
أنامل قلب
10-11-09 ||, 01:19 PM
ليش هالوجه الحزين .!

اختي طير ، لمن نبدي أهداف محدده ونبادر بإبداء الفعل ،
المفروض يكون ما سبق ذلك ـ اللي هو الهدف ـ واضح جدا ،
لأن كل المسائل بترتبط تالي باللي اخترناه / شيء نحب الحصول عليه !

بس هو هذا ، سئلي نفسج عن الهدف ، وكتبيه ،
قعديلج ولو نص ساعه فكري فيها باللي تبينه
من غير لا تنسين الورقة والقلم ، حتى لو كانت النتيجة خربشات ..

~

موفقه دائما اختي ..
مــهــابه
10-11-09 ||, 02:18 PM
^
دآمج بديـتي كـّملي يـآ آم عبدالله

آمسحي هالكلمآت من بـآلج وكمـلي بشوآرج بآمل وعـزيمه


وبـتحسين بنشوه الآنجـآز يوم بتمسكين الشهآده بآذن الله =)


.


.
شوق القلوب
10-11-09 ||, 02:27 PM
السلام عليكم..

ام عبادي...
اقري موضوعج من اول و يديد...
و حسي بشعورج اليديد مره ثانيه...

الدراسه.. صح تعب.. يبالها جهد..
و انت ماشاء الله عندج حلوين اثنين .. من غير مسؤوليه ريلج و البيت...
يعني المسؤوليه مضاعفه...

بس ردي رتبي جدولج من اول و يديد.. و حاولي اتفضين عمرج وقت الليل.. يوم يرقدون الصغاريه...
و ان شاء الله .. ربي بيبارك في وقتج و بتفرحين بنتايجج ..

شدي الهمه.. :)
دهن العود
10-11-09 ||, 02:43 PM
~ِْ

طيـر الحـب

اهنييـج ع بـدآيتـج الجـريئة والقـوية
مـآ شـآء اللـه عليـج ربـي يوفقج
دنيـآ وآخـرة . .

عنـدج اهـدآف وطمـوح لآزم تـوصليـن لهم !
إذآ مـن اول سنـة مليـتي عيـل شـو بتسـوين عقـب؟
شلـي مـن بـآلج كـل هالكـلآم .. مليت / ابـى اوقف / مـآبى اكمـل/
احـس عمـي مـب رآيمـة اكمـل! . . .

عنـدج هـدف لآزم تسعـين لـه , واحيـن الشهـآدة وآيـد مهمـة غنـآتي
تـــوكلـي ع ربـج ومـآبتلقيـن إلآ كـل خيـر

ومثـل مـآقـآلت اختـي شـوق القلـوب .. ردي اقـري موضـوعج مـن اول
ويـديد وحسـي بحـلآوة التجـربة :)

موفقـة غنـآتي , وبدعيـلج مـن كـل
قلبـي .




دهـن العـود


~ِْ
طير الحب
21-03-10 ||, 04:56 AM
والله سواء صديقات مشواري في الدراسة وأنتوا كان لكم أكبر الأثر في الأحساس الجميل الذي أحياه...


الحمدلله...خطاي ثابتة نحو تحقيق الهدف...


دعواتكم....وعقبال ما تحضرون حفلة تخرجي إن الله عطانا عمر....
فرفوش
23-03-10 ||, 09:33 AM
بالتوفيق للجميع
فرفوش
23-03-10 ||, 09:36 PM
السؤال مب اذا انكمل الدراسة ام لا
السؤال هو شو التخصص ألي بنختاره وهل بينفعنا مستقبلا وما بنندم في أختياره
طير الحب
14-05-11 ||, 05:56 PM
دخلت الكلية وانا انسانة مهووسة بالتجارة...واليوم على وشك التخرج وتغيرت افكاري ابدعت بشهادة الجميع في تخصصي..وكان باكورة تخرجي مشروع منتجع القلعه بخورفكان....بس حاليا احاول استثمر طاقاتي واحاول اخذ دبلوم تدريب استراتيجي افكر اطرح دورات واشارك بخبرتي...فالحياة....والله كريم
شوق القلوب
17-05-11 ||, 12:19 AM
السلام عليكم...


بالبركه يا الغاليه ... سعيده بكلماتج :)
طير الحب
17-05-11 ||, 03:36 PM
الحمدلله...شكرا لجامعة الشارقة
ام حمودي