حادث *_*

[الجنيه]

السلام عليكم ورحمة الله وبركاته ،،،

شعور وايد خايس يوم انك تكون محتاج طبطة وكلمة حلوه اتطيب خاطرك بس اتلاقي العكس،،،

كنت ماشيه في حالي ومايخصني بحد افكر بس مش لدرجة السرحان طفت اول اشاره وكملت سيده ومن بعدها الدوار وكملت سيده عند التقاطع الثاني طلعت على الاشاره الخضرا وما وعيت الا وانا فوق الرصيف كل الي اعرفه ان في عامود كهربا جدامي حاولت اضرب بريك ماشي فايده احس السياره تتجدم اكثر بسرعه حطيت القير ع P وحسيت ان السياره وقفت غصب عنها اطرافي انشلت وجسمي كله ينتفض غرشه الماي الي ميلسه ف مكان المشروبات ف السياره طارت للدريشه الاماميه شنطتي تحت مكان الريول تلفوني عند البريك نظارتي على الطبلون ورا السكان كتمه ما اقدر اتنفس بسرعه افتح ثمي وادخل اكبر كميه من الهوا وارد اطلعها بهدوء ابي الرجفه الي في ايدي توقف ابي الدموع الي نزلت مني من الخرعه توقف ماشي فايده غمضت عيوني ونقزت ع صوت حد يدق جامتي حاولت افتحها ما تتبطل حاولت ابطل الباب ما يتبطل حسيت غزارة دموعي زادت باب مرافق السائق تبطل " اختي انت بخير؟؟؟ تبين نطلب الاسعاف ؟؟؟ تكلمي اختي عسى ما ياج شي ؟؟؟ " ابي ارد بس احس الكلمات ما تطلع هزيت راسي وبسرعه عدلت شيلتي الي تزحزحت عن مكانها قلبي يدق بشكل مش طبيعي ابي اتطاول غرشه الماي ابي اشرب يغمه اتبل ريجي واتهديني ما قدرت تلفوني يصيح اسمعه بس ما اشوفه هاي اكيد أم خالد اختي تبا تتطمن اني وصلت البيت هي موصتني اول ما اوصل ادق عليها بسرعه تميت ادور ع تلفوني واول ما رفعت السماعه كانت مسكره بيد مرتجفه اتصلت على الغالي رد الله يخليك رد والله بموت "ألو" اول ما سمعتها ما ادري شو الشعور الي ياني قلبي عورني غمضت عيني ويلست اصيح " شوفيج ؟؟ ليش اتصيحين ؟؟ انتي وين ؟؟ شي بلاج ؟؟ شو مستوي عليج ارمسي يا بنت الناس وكل الي قدرت اقوله سويت حادث بنبرة خوف سالني "وين ؟" عند تقاطع البيت حسيتبه منصدم شوي وبسرعه رد سالني تعورتي شي ياج ؟؟؟ "لا" الحمدلله اهم شي ماياج شي لا اتصيحين الحين بييج لا اتخافين ما بيصير شي سكرت عنه ورجعت راسي ع السيت وغمضت عيني هالمره شعوري مختلف احساس الامان وايد غير ....

سامحوني اذا غثيتكم بس هالي صار ويايه اليوم وايد قلبي عورني ع الي صار يعني انا ف امانة الله ماشيه وعشان ناس قررت اتطوف الاشاره الحمرا دفعت الثمن ....

مازعلني شي كثر هالجمله الي تكررت علي اكثر من مره " شو كنتي اتفكرين ؟؟ وين عقلج ؟؟ ليش تسرعين ؟؟" كنت ابي امي مابي شي غير انها اتضمني لها بكل قوه وحنان مابي شي غير اني اغمض عيني وامسح الاربعين دقيقه الي من الحادث ,,,


انسانه عزيزه وغاليه ع قلبي اول ما خبرتها توقعتها اتقولي الحمدلله ع السلامه تتطمن علي اذا تعورت او لا بس الي قالته وين تبين شو اتفكرين منو كنتي اتكلمين ؟؟؟!!!! تضايجت سؤال غبي ما ادري اذا هاي ردة فعل طبيعيه او لا بس الي اعرفه ان هالردود وايد زعلتني حتى اختي كانت اتلومني وانا اقولهم يا ناس مب انا الغلطانه انا طالعه على اشارتي هو الي طايف الاشاره الحمرا بس نفس الكلام ما تغير شي

[عافك الخاطر]

الحمدلله ع سلامتج :)
وحتى لو انتي غلطانة .. الواحد يقدر يبين ها الشي لج بطريقة ما تجرحج .. بس الله يهديهم ان شا الله..
ما احب الناس اللي تهمش حالة الانسان النفسية و يبدون معاه تحقيق جااف من كلمات تخفف عنه هو يحتاجها منهم أكثر من اي شي ..وعقب فترة يسالون عمارهم بغباء ليش ها الشخص فجأة تغير و صار هادي وما صار يسألهم او يلجأ لهم في حل مشاكله ..! >ترى انتوا شردتوه!
يا الله ألف سلامة عليج خيتو :) .. و لا تضايجين..يمكن هم من صدمة الخبر ما عرفوا شو يقولون لج ..تصير ترى ..

.
.

[وحي القلم]

الحمدلله عالسلامه يالجنيه.. صلي لو ركعتين و بترتاحين ان شا الله =)

[أنامل قلب]

:
.

وعليكم السلام ورحمة الله وبركاته ..

انزين .. كانا نحن خواتج واخوانج بالواحات نقولج ألف الحمدلله على السلامه اختي ^_^ ..
حسينا بج وربي وانتي تسردين الاحداث .. خاصه البنت تكون حساسه بشكل أكبر ..
فمابالج إن كانت بروحها .. . !

اختي الجنيـــه ..
لا تلومينهم أبـــد .. . !

بالعاده الاهل والقرايب دومهم بمواقف كثيره مثل هذي يسبقون العتب والملامه ..
مش لأنهم يحبون ينقدون عليج ولا يحطونج بمحل المخطئ .. أبد والله ..

لكن حرصهم الكبييـــــــر على المعني واهتمامهم وخوفهم عليه
يخليهم يتخذون رد فعل يشوفه المعني نفسه بسلبيه وعتب ~ !

انتي احتاييتي لمـــة دافيه تطمنج وتحسسج بإنج لازلتي بأمان ..
واهمه ابدو الاستنكار على لاشيء لمجرد إنهم يبونج تبقين بـ أمان ~ !

انتي قلتيها .. لمن كنتي بعيده عن العين .. شو الكلمه اللي توجهت لج " تعورتي شي ياج ؟؟؟
" الحمدلله اهم شي ماياج شي لا اتصيحين الحين بييج لا اتخافين ما بيصير شي " ..
ولمن كنتي قريبه من العين .. يشوفون إنج بخير جسديا .. يبدون بالعتب ..
لأن خلاص .. ارتاحو من فكرة إن سوء ممكن يكون صابج .. ولهذا السبب يكون عتبهم .. . !

:

أكرر .. الحمدلله على سلامتج اختي ..
صدق عيشتينا الموقف ومدى سوءه ..

لكن لا تنسين بإن أحيانا الغير يبدي كلمه تسيء لج لسوء ظاهرها ..
لكن الخاطر والنوايا والمقاصد عندهم ،، كلها ورديــــه ~

:

بانتظارج دائما ..
وربي يحفظج ويصونج دنيا وآخره ياربي ..

امتناني لسلامتك ..
وهذي بــاقه :a070: من الواحات لـ عيون خاطرج ..
من حبة الخاطر .. . !

:
.

..

[الزرعوني]

الحمدالله ع السلامة اختي و ما اتشوفين شر

و ما عليه طنشي وسامحي .. مرات الواحد من الخوف ما يعرف شو يقول .. او ما يعرف كيف يتطمن ..

[بنت الدلع]

الحمدالله عالسلامه حبيبتي :a050:
اهم شي انج بخير وماصار فيج شي


الله يبعد عنج الأذى ان شاء الله


شي طبيعي الانسان يحس بالخوف في هذه المواقف
ويكون في حالة ذهول
ويتريا حد يخفف عنه هالشعور
بس اذا كان في المقابل عتب، هالشي وايد يجرح المشاعر

في ناس ماتقدر مشاعر الآخرين
وفي ناس بعد ما اطمنوا عن حالتج بدوا يعتبون عليج
وفي ناس تلومج قبل لاتعرف السبب

الاجناس مختلفه وكل جنس له تفكيره وطبعه الخاص فيه
فلا تتوقعين الكل يفهمج او الكل يلبيلج الي تبينه

و اول ما اتصلتي على اختج شو كان رد فعلها؟
كانت تسأل وتطمن عليج
لان اهم شي سلامتج بالنسبه لهم
وابدا ماعتبت عليج لانها تفهمت موقفج في ذاك الوقت


انا معاج ان هالشي يزعل
والبنت محتاجه لمسانده بالذات في الاوقات العصيبه والمروعه

بس ليس كل مايتمناه المرء يدركه !


ومره ثانيه اقولج الحمدالله عالسلامه
الحادث صار من الماضي
امسحي صفحة الحادث من حياتج
ولوني الصفحه بالألوان الي تحبينها
وانسي كل شي يكدر مزاجج :fa35:


نحن اهلج الثانين
متى ما احتجتي اي شي
ارفعي السماعه:biggrin: ونزلي الموضوع الي تبينه



بنت الدلع :inlove:

[قرموشة]

صدقها بنت الدلع نحن أهلـج الثانيين متى ما بغيتي حنان تراه عندنا فائض منـه ^^
الحمدلله على سلامتـج حبيبتــي والحمدلله انه في الحديد ولا فيـج !

بالنسبـه لتـصرف أهلـج .. لا تلومينهـم عزيزتـي .. ترا الوالده ما قالت جذه الا لانها كانت خايفه عليج !
والشخـص من الخوف أو التوتر يقول كلمـات ما يقصدها !! .. تريي عليها شوي بتيج وبتقولج كمن كلمه تريح النفس ^^
يا ما انحطيت في مواقف شبيهه بهـاي .. وكنت أحتاج الحنان حزتهـا لكن العصبيه طغت عليها ..
لكن في النهايه ما حصلت منهم الا الكلمه الطبيه اللي تطمن ^^

اتمنى لـج التوفيج ~ والحمدلله على السلامـه مره ثانيه

[طير الغرام]

http://oasis.bindubai.com/bin/uploaded/1184_11201028869.gif

الحمدالله ع ســلامتـج ياختيـه
والحمدالله يوم إنها يت فـ الحديده ولا فيــج !

ولا اتضــايجين عمرج بردود أفعـال غيـرج ،، يمكن لا شعورياً هم قالوا اللي قالوه

وأهم شي انــج الحينـه بخير ولا تشكين باس ^_^


http://oasis.bindubai.com/bin/uploaded/1184_21201028869.gif

[خيال الحب]

الحمدلله على سلامتج ياختـــي..

في ناس من خوفهم عليج يقولون لج جييه ومب قصدهم شــي ..

ياحليــلج والله..

يلا الحديد يتعوض ان شاء الله

اهم شي انه ما صابج شي

والف الحمدلله على السلامه مره ثانيه :)

[مــهــابه]

~ الجنيه :

الحمدلله عـ السلامه ^ ^



~ في مواقف وايد تستوي في حياتنا ، نتريا وقفتهم ، نعتقد انهم الساعد والظهر لنا

لكن !

ننصدم بردة فعلهـم

وبطريقة تـفكيرهـم

[الجنيه]

وجان تدمع عيوني (ماعليكم مني هاليومين حساسه بزياده والدمعه مره ع طرف الجفن )

عافك الخاطر

الله يسلمج حبيتبي وع قولتج من الصدمه لان منظر السياره يعور القلب واتشكين ان الي فيه ممكن عايش بس الحمدلله ع كل حال ,,,

وحي القلم
الله يسلمج غناتي وربي يحفظج *_*

أنامل قلب
يمه يمه من هالقلب فديته يا ربي والله ان ردج يرد الروووووح *_* انا فاهمه ردة الفعل هاي بس بعدها حازه بخاطري غصب عني ومو بكيفي وامي فديتها محد مسافره عشان جذي تمنيت وجودها ... والله يستر من النويا الورديه مول مب وقتها لانها نرفزتني *_* اتصدقين وانا يايه الدوام احس برهبة مافي ثقه اسوق موتر اختي وايدي ع قلبي من الخرعه :sad:


الزرعوني
الله يسلمك من الشر ويخليك لهلك ,,
سامحتهم بس قلبي شوي خايس ما يسامح بسرعه يبيله :bash: عشان يصحصح ويسامح


بنت الدلع
الله يسلمج حبيبتي وتسلمين والله لو انتو مب اهلي جان ما رمست عندكم واتصلت ع قولتج هع بموضوع ،، بس اتصدقين مول مب قادره الون حياتي بالوان احس بكآبة وتشائم لان هالحادث الثاني في اقل من شهر


قرموشة
فديت ام الحنان انا *_^ الله يسلمج حبوبه ويزاكم الله خير فيكم الخير وما اتقصرون ادريبكم عيال الواحات ماعليكم زوووووود (ابا لوز ) ههههه احيدج العام حاطه صور


طير الغرام
الله يسلمج والحمدلله على كل حال

[مجموعة إنسان]

هلا والله الجنية
حمدالله على سلااامتج اختي

لا تزعلين ولا شي
بالعكس من زوود خوفهم عليييج سألووج في شووو تفكرييييين ؟

يلله ماعليه
في الحديد ولا في الرووح

وربي يعوضج خير ان شاء الله


انا يوم اسوي حاادث اعصااابي تكووون باااااااااارده بشكل مو طبييييعي
اطلع من السياارة
واشووتها

[حلم الطفوله]

الحمد لله على السلامه يالغاليه

أهم شيء بالموضوع كله إنج الحين امبينا بالواحات .... بالحديد ولا فيج إختيه واعذريهم يمكن أسلوبهم خذلهم

[أتمنى]

شدّة الموقف و صدمة الناس
تغير من ردة فعلهم احياناً ..
فلا تشيلين بخاطرك :smile:

اهم شي انك بخير
تستاهلين السلامه عزيزتي و باذن الله
ما يتكرر عليك الاحساس و الحدث ابد ..

.
.

[رمــش الغـــلا]

الحمدللهـ ع السلامة أختي ...~

فالحديد ولا [ فيج ]

.
.

أهم شي سلامتج ..

واعتبري وقت الحادث ..

شي من الماضي خلاص !!

.
.

صدقيني من خوفهم عليج ..

هذا أول شي يسألونج عنّه ..

أهم شي سلامتج

واتحملي ع عمرج فالسواقة ^^

[دمعة عين]

:

الحمــَـدلله ع السلامــَـه الغاليه ~
وماتشوفين شر =)

،
.
.

[المقاتل]

الحمـــــــدالله على السلامـــــــــــه ، فالحديــــــــــد ولا فيج اختي .. وما عليــــــــــج هذا العتاب والملامه شي :wink: طيـــــــب وهذا يــــدل على حرص أهلـــــج عليج .. هب لأنج غلطــــــــــانه :inlove: هذا يدل على حبهم لج ويمكــــــــن من الخوف أحيانا يقول الواحد .. كيف جيه :k_shock_1: وليش ؟ إنته ماااااااااا تشوف ؟؟ جيه وليش وانته وانته ويشتغل شريط المسجــــــل :a046: ألف مره وكثر ما اقولك وانا موصتنك وانته الله يهداك وانته وانته دومك ما تحاسب :a046: شرات مسلسل الفريج يوم أم خماس ترد على التلفون ( نفس صوت الحرمه ) على السريع بالضبط جذه اهلنــا هع هع .

فلا تتكدرين ختيـــه بالعكس لا تتوقعيــــن كل شي يكون سكّـــر .. شويـــه سكّر وشويـــه مرّ وشويه فراوله وشويه لومي وجذه الحياه :fa51: .

أتذكــــر أخوي سوّا حادث .. كان ماخذ موتر الوكاله عسب موترنا كان خربان وعطونا سياره مؤقتــه ( روفر صالون ) وتعرفين يوم تركبينها تتحمسين أتدوسين فـ الحبيب دايس وراكب الرصيف .. ويسرد لنـــا القصه كان ميود عصير فراوله والمهم سرع وواحد خرب عليه وعشان يتفاداه وما يدعمه دعم وركب الرصيـــف وانجب عليه العصير فـ ياه راعي الموتر :shocked: جان يقوله دممممممم دمممممممم :fa52: قاله اتطمــــن عصير فراوله ههههه .. والمهم صارت سالفه طويله .. وأحينه يوم نيلس ويا بعض نيلس نضحك على قصته وانا اتمصخر عليه في مثل اليوم اخوي سوا كذا وكذا .. فـ يعني تجربه مرت عليج وعدت على خير الحمـــــدالله ،،

إن شاء الله ما أطلت عليج بس سردج للقصه يدل على أن التجربه كانت مريعه :k_devil2: كلنا مرت علينا تجارب مريعه بي كوووول .

بوسنيده

[الجنيه]

خيال الحب

الله يسلمك / ج من الشر *_*

مــهــابه
الله يسلمج حبوبه وصدق هالمواقف اتطلع حقائق بعض الناس


مجموعة إنسان
الله يسلمك ويسلم غاليك
ههههه احلى كول اونه اعصابي بارده واشوت السياره عاد انا العكس يوم وصلت البيت عطيت سيارتي بوسه عشان تتفادى الصدمه وقلبي عورني عليها هاي الحب

حلم الطفوله

الله يسلمج غناتي *_* و الحمدلله اني بينكم الحين

أتمنى
الله يسلمج عزيزتي وربي يحفظج

وان شاء الله مايعود هالحدث على حد

رمش الغلا87الله يسلمج وان شاء الله يدوه بنتحمل ع عمارنا :a074:

دمعة عين
الله يسلمج والشر ماييج

بوسنيده
الله يسلمك
هههههههههههههههه حلوه سالفة اخوك حليله ما تهنى بالفراوله :k_blush-anim-cl:

[الاسطوري]

الحمدلله على السلامه

[مناير]

الحمدالله ع سلامتج
وماتشوفين شر....

[شوق القلوب]

السلام عليكم..


ما ادري شو اقولج يا الجنيه..! قلبي عورني.. من وصفج حسيت جنه اختي مستولها هالشي و يالسه توصفلنا شو استوالها..

الحمد الله ع سلامتج يا اختي.. والحمد الله انه يت في الحديد و لا فيـــج..

..

ولا اتضايقج ردود الناس .. مشكلتنا انه مشاعرنا انعبر عنها بطريقه غلط ! يمكن احنا الحين واعين لحاجتنا للكلمه الحلوه بدل اللوم.. لكن الناس ما اتحس بهالشي.. بس الاكيد من ها كله.. لومهم و عصبيتهم هي نابعه من خوفهم و حرصهم علينا..

فلا اتضايجين بعمرج.. صدقيني .. كلهم يحبونج :fa41: مثلنا :inlove:

..

[الجنيه]

الاسطوري
الله يسلمك من الشر

مناير
الله يسلمج والشر مااييج

شوق القلوب
الله يسلمج غناتي وتسلمين ، ع قولتج الواحد احيانا ما تسعفه الكلمات ويرد بردود تعور القلب ف الوقت الي تحتاجين فيه لكلمه طيبه *_*

[شمعة أمل]

الحمدالله على سلامتج :)

[الجنيه]

شمعة أمل

الله يسلمج من الشر