جريمة

[المزوحي]

جريمة


نعم فهي جريمة ارتكبتها في حق زميل عزيز، فالمزوحي الذي يعرف الحقوق والواجبات، ماعرف شو

خلاه يغفل، البشر كلها تخطي، ونحن مب ملاك ..

توفي عزيز وشخص قريب ومن عايلة زميلي، فمن واجبي أعزيه ... ياني خبر إنه توفى (فلان) وزميلي

بياخذ إجازة، ماكنت ادل البيت، فالقصور مني، كان عليّه إني أسأل، واللي يسأل مايتوه ..

حتى لو كنت أبغي الصلاة ما بتفوتني !

بس أي كلمة استحق أنا اطلقها على نفسي ... للدرجة هذي أنا ماعندي ذوق !!

الصراحة موقف أبكاني وهزني ... انذهلت من نفسي من تصرفي ...

..........

ابسط شي ابعث مسج عبر الهاتف النقال وأعزيه، وإذا ما شاف المسج اليوم يشوفه باجر وإلا عقبه ..

نعم فأنا أي عذر اطلعه لنفسي ... شو اللي شغلني ...

.......

تأثرت وايد بالموقف ... بعد ماداوم زميلنا وقلت له عظم الله اجركم .. طلع من المكان وما شفناه ..

عرفنا إنه زميلنا احزنه الموقف اللي انحط فيه ( إنه ما قمنا بالواجب ) ...

كثر ما احزنه وفاة قريبه ..

ياني اتصال العصر إنه زعلان ووايد حاط بخاطره وإذا اثنين من الزملاء يتجهون لبيت فلان ، عشان

يستسمحون منه على اللي صار ،،، واااااااااااااايد لومهم وااااااااااااااايد زعلان ومنصدم من تصرفهم

كلنا نعرف الواجب ونحن مب صغار ...

كملوا ساعتين عنده، وهو يحاول يدور لهم عذر، وفي النهاية سألهم هل الغلط مني ؟؟

حسيت بحرارة في جسمي إني فعلا قصرت في حقه، ياني كلام إنه هو يعزنا ومب متوقع ..

خذت ربيعي وسرت بيتهم ... مابتصدقون لو أقول لكم ماقدرت اتمالك نفسي، أول ما وصلت عنده

تناثرت دموعي على خدي، من كثر اللوم، أي عذر أخلقه لنفسي، كل ما أحاول أبتدي بكلمه أحس

بخنقه

قال تفضلوا ومن بعدها بدا من أول يلومنا، ومب متوقع تصرفنا ..

أنا غلطان نعم اعترف وهذا درس لي ... مع إني مب مقصر في حق أي شخص ، كيف فعلت هالشي

.............

أنا تعبان من نفسي واااااااااايد تعبان ...

وهو يقول لو انتوا مب غاليين ما عاتبتكم ..... نعم قوول اللي تباه عنا نحن نستاهل ..

قلت عساك مسامحنا الحين ........... كملنا ساعه ولأنه الوقت متأخر، فستأذنا إنه نطلع من عندهم .

................

ماعرف شو اللي اقدم له، شو اللي بيعوض اللي سويته .. صح نحن كنا مجموعة .. ولكن اتكلم عن

نفسي ..

اليوم الثاني يتكلم ويانا عادي ، كون إنه طلّع كل اللي في خاطره علينا، ومن بعدها قال مافي شي

في خاطري عليكم ...

لكن انا شال على نفسي ... مستغرب تصرفي ... شو اللي خلاني ما اتحرك ...

:fa43:

[عذبة الروح]

اممم اممممم

أكيد انك قصرت بـ تقديم الواجب
وانا ما بـ ازيد عليك اللوم

كافي اللي ياك :)


لكن أحسك كبرت الموضوع حبتين
يوم انك كتبت العنوان .. جريمه


انت يمكن ما كنت تتمنى تنحط بـ موقف اللوم
ولكن ... هذي هي الدنيا


يمكن خذتك بـ مشاغلها
وكل ما يت السالفه في بالك قلت يا الله لين ما اخلص اللي عندي واسير
وعلى هـ الموال .. لين ما قمت تأجل لـ اليوم اللي عقبه
وانتهى وقت الواجب ... بـ دون لا تحس
لانه الوقت كان الاسرع ...


المهم ...
يكفي اللوم اللي ياك من دموعك & من ربيعك
وهونها .. ربي يهون عليك

والسموحه

[مايهزك ريح]

المزوحي ..
انا ساعات تيني هالحاله ..
اني اكون اصلا طفران ومالي بارض اشوف حد او حد يشوفني بهالحاله ...
او حالتي النفسيه .. *&#@$
فعشان جيه ..
وصح يتمون يلوموني ليش ما ييت وليش مادري شو .. وصح احس بضيج يوم حد يلومني ..
بس يوم يومين ..وينسون ..وانرد مثل ما كنا ..
لا تحط في بالك .. ان شاء الله هالشي يعدي .. على خير ..
والله يعينك والله حاس بك >_<

[المزوحي]

عذبة الروح أحييج أختي على المشاركة ...

مابغي امدح عمري .. قد ماقدر أحاول أقوم بالواجب ... بس نحن ماندري إنه غاليين على زميلنا ...

يمكن تكون المشكلة إنه دايما مانبغي نغثه ومن كثر مانعزه، نحاول نكون رسميين حبتين ..

هذا اللي خرب علينا ..

صدقيني ماكبرت الموضوع يوم كتبت جريمه .. لانه يانا لوووم وكأنه مانعرف الواجب إنه الغريب يعزيه ونحن طنشنا

ومب هذا قصدنا ... قلنا يمكن متأثر وبنخليه، لكن كل شي انعكس علينا اختي ...

هيه ..

واللي عرفته اليوم ، إنه ربيعنا نشده بعدك حاط في خاطرك، رد وقال : انا تلومت فيكم

غريب رده، بعد ماكان حاط في خاطره علينا إنه هو تلوم ..

صح هو ظهر اللي في خاطره، وحد علينا، لكن فعلا هذا اللي يانا منه، بس أهم شي إنه قال مسامحنا ..

يوم اذكر الموضوع، اقول افا يالمزوحي ..

[المزوحي]

تسلم مايهزك ريح ..

تدري والحمدلله إني الوحيد ماغثيت ربيعي بكلمه طول الثلاث سنوات وكنت أقول إن شاء الله استمر ..

ياليت حد يفهم الموقف ... وصدق ابغي ارد له بشي يطيب خاطره ...

مشكور مايد

[مــهــابه]

~ المـزوحي :

أنـت غـلطت صـح بـ حق زميلك


يعني من الواجب انك توقف وياه ، وتعزيه وتشاطره احزآنه

لأنه الشخص ما اظن يحتاي لـ ربعه فـ الأفرآآح كثر مايحتاج لـهم فـ الاحزان !. .


الموقف أسـتوى ، وانت غـلطت ! . .


أهم شي تـفهم الريآل باللي صآر . .


وتعتذر منه

وخلآص

يعـني ما يحتآي انك تضيج بعمرك ، أو تقول اني ندمآن وجيه . .


تـرآنا كلنآ نغلط مثل ما قلت انته . .


يعني فـ الأخير الـغلط [ وارد ] ! ..


أعـتذارك بيكون وافي حآليا


وان شاء الله الأيام اليآيه تثبت لـ زميلك انك انته فـعلاً زميل وانه هالشي صآر بدون قصدك . .


فـ لاتشل هـَم . . .


ولاتوقف على كل موقف صآر فـ حياتك . .



والسموحه منك

[دموع قلم]

المزوحي ..


كلنـــــاا تييلنا حالات ولحظات ..
فيها نبا نيلس ويا نفسنا .. بروحنا ..
مهما كنا اجتماعيين ..!

وسبحـااان الله ..
قبل يومين تقريبا ربيعتي خبرتني ان أخ ربيعتنا توفى ..
وما كان بيننا أي تواصل ولا عندي إيميلها أو رقمها ..
بس ربيعتي عطتني رقمها ..
ومن صدق وقتها ما كنت عارفة شو أقولها ..
او .. اممم ماعرف كيف أعزيها ..
وحتى البنية هذي أعزيها ..
بس انا ماعرفت اتعامل ويا هالمواقف ..
فـ يوم قريت موضوعك هذا .. سيدا طرشت لها مسج ..!

عالعموم ..
المغزى اني حابة أشكرك ..
لأن موضوعك ذكرني .. ^^


ومثل ما قالوا الأعضاء ..
كل ابن آدم خطاء .. وكل حد منا يتعلم من أخطاءه ..




دمت بخير أخوي .. ^_^

.
.




ربي يرحمهم ويغفر ذنوبهم ..
ويفتح لهم أبواب جناته .. يااااارب ..

[المزوحي]

مهابه وانا أقرا الرد ... يتني غبنه ..

المراد إنه نحن قلنا بنخليه لين مايرد الدوام، ويمكن واحد بس طرش له مسج وعقب 4 ايام ...

أتمنى هو يحط لنا عذر ويذكر كل الايام الحلوة اللي فاتت وكيف كنا نتعامل وياه وصدق نحترمه، ودايما نستشيره

في أي شي، يمكن بعد هو يقول يوم أنا واااااااايد وياهم ليش ماحضروا العزا ..

صح الحينه مايفيد شي ... بس النسيان نعمه ...

واحد من ربعنا كل هله عاتبوه ... مستغربين من تصرفه هو بعد ...........

[المزوحي]

دموع قلم ...

الكل خذ موقف من عمره، والله يديم الأفراح .. يقولون مهما الانسان كان جريب وإلا بعيد يحتاي إنه نعزيه

ونحن نعرف الواجب، ونعزي الناس .. عاد ليش هذا استوى وياه الموقف ؟؟؟ مب عارفين

نحن مستغربين وهو أكثر .. مب قصدنا انطنشه وحتى العدو نحن بنعزيه .. فما بالج هالشخص !

فالحمدلله الواحد يتذكر الواجب

[مجموعة إنسان]

تبي الصدق !!

صح غلطت انت !!


انا بقولك ليش ., مثلا لو عندك عرس وفي ناس ما يحضرون انت ما تفتكر منو حضر
لانك مستانس

بس لو عندك عزا (لا سمح الله) وربعك ما عزوك بتزعل واايد
لان في اكثر وقت تبي الناس عندك ما ايونك

سوري يعني
انا لو مثلا كان عندي عزا وربعي ما عزوني ما بلومهم ولا شي
بس مستوى العلاقة بيني وبينهم بيقل وااايد ,,


والله لو وين ما يكون العزااا اللي يبي يروح يرووح .. الحمدلله ان هالواجب انا اسويه من غير ما حد يطلب مني


تذكرون قبل فتره كان عدنا عزا في دبي وانا وابوي رحنا المقبره المسا ,,
بعدها بيوم الناس يقولون لابوي ليش اهل العزا يتكلمون عنك ويمدحونك ويقولون ان علي وولده حضروا الدفن
وان علي وولده ما قصروا
وعلي دخل القبر ,, !!
شوفوا كيف الناس يستانسون لما حد يعزيهم ,,
الحمدلله ان مو مقصرين بحق احد ,,

[عذبة الروح]

اسمحلي بـ كومنت حق هواجيس


واكتفي بـ ..

بارك الله فيك
وكثر الله من أمثالك


:)

[المزوحي]

الناس ماتنسى اخي مجموعة انسان ... وانا ما انتظر حد يقولي .. نحن في عمر فاهمين فيه ..

هذا الشي اللي حطمني، كأنه حد كتفنا ومنعنا ...