القطاع الخاص [الأرشيف] - -:: واحات بن دبي ::-

مشاهدة النسخة كاملة : القطاع الخاص

ولد الشحوح

20-06-08 ||, 01:36 PM

الاسطوري

20-06-08 ||, 03:39 PM

السلام عليكم ..

"ولد الشحوح"

مرحتبين هلا الحمدلله بخير
انت شحالك

بخصوص موضوعك هذا شوف القطاع الخاص يبدأ من أصغر الشركات اللي ماتتقارن بمستوى القطاع
الحكومي (العام) إلى أكبر الشركات اللي تنافس القطاعات الحكومية، أنا
أشوف ان الشركات الكبيرة في دبي عندهم
مميزات وحوافز وسلم
رواتب عالي وخطط ترقيات ونظام تقاعد وبدلات كثيرة وتطور وظيفي ودورات تنمي قدرات الموظف من
خلالها تحافظ على الموظفين عكس الحكومة اللي ماتعطي شي وتخلي
الموظف إما يكرف كراف البلا أو يالس مكانه
مايسوي شي وفرصته
في الترقية في المستقبل تكون ضعيفة يعني عادي 6 او 7 سنين في نفس المكان مايتطور وطبعا لو
يلست تقارن أبوظبي بالامارات الثانية بتحصل فرق شاسع وبتختلف المقاييس،
ولكن في كل الحالات أي شخص ممكن
يلاقي فرصة أفضل
سواء كان في الحكومة أو في الخاص ممكن أنه يتستقيل وينظم للمكان اليديد بهدف التطور والبحث
عن الأفضل او حتى البدء في تجارته الخاصة به، مادري إذا سمعت عن
برنامج كنزي اللي انطرح قبل مدة بسيطة
واللي يهتم بنفس
الأمور اللي انت تدورها وبيكون على ايدي خبراء في هالمجال من دول كثيرة عشان يفيدون الشركات
ويحاولون المحافظة على موظفينهم لمدة أطول، يمكن ماأكون فدتك
وايد بس هاي وجهة نظري في الموضوع
من واقع أعيشه

السموحه

الاســـطـــوري
أخوكم

ولد الشحوح

21-06-08 ||, 01:53 AM

الأسطوري ما قصرت تسلم حبيبي
بس اللي انا مستغرب منه وين الأعضاء ؟
البروجكت مالنا بينعرض على ناس هم اصحاب قرار في الدولة فيكمن يساهم رد من ردودكم في إفادة المواطنين

المزوحي

21-06-08 ||, 11:39 AM

في الفترة الأخيرة لاحظت المواطنين يشتغلون في كل مجال، في الشركات الخاصة وفوق هذا شكلهم مجبورين

يشغلونهم ... لانه ياينهم قرار بتوظيف المواطنين

ولد الشحوح

21-06-08 ||, 01:39 PM

جماعة وينكم ...

أنامل قلب

22-06-08 ||, 05:28 AM

:
.

السلام عليكم والرحمه اخوي ..

بصراحه ودي أفيدك أخوي بس ماعندي خلفيه وافيه عن الموضوع
لكوني ما أملك تجربه شخصيه تفيد لابداء رأيي الخاص ..

وووو بصراحه ماني مضطلعه على هذي الأمور بشكل
يعيني عـ سد حاجة الاستفسارات المطروحه .. !

فالسموحه أخوي ><"

وأتمنى من اللي يملك الافاده يكرمنا ابها .. . !!

:.

ولد الشحوح

23-06-08 ||, 01:40 AM

أنامل قلب كفاية دعمج المعنوي المتجسد في هالرد الجميل
شكرا لج

الخنساء

23-06-08 ||, 01:09 PM

مرحبا

انا اشتغلت في قطاع خاص لمدة 3 سنين ... وشفت الويل ...

المواطن ينظلم وايد ..في هالاماكن من ناحية الترقيات والاولويات ...بعدين دوامات يوم السبت ... وفترات طويله ... اغلب هالاماكن تكون من 8 لين 5 أو 4 ...

شيء واحد ما اقدر انكره ابداً وايد تعلمت ..في هالمكان والشغل ممتع وفيه تجديد كبير

وبعد ما طلعت صح ارتحت في مكاني الحالي من حيث كمية الشغل وساعات العمل بس لين الحين مب قادر اتأقلم ... ولا احس اني اشتغل شرات الخاص ... والاهم اني ما اتعلم !!! ولا شيء يديد شغل روتيني ممل ..

ولد الشحوح

24-06-08 ||, 02:52 AM

وها اللي انا ارمس عنه اختي
ثقافة العمل اللي نحن ما نمتلكها بس نبا راتب ودوام مريح روتيني وهالشي غلط
العمل تحدي و طموح وتطوير للنفس ولو قدرنا نغرس هالشي فالأجيال القادمة الكل بيدوام فالقطاع الخاص

الاسطوري

24-06-08 ||, 10:21 AM

رجعـت ..

^
أخوي مانختلف على الشغل في القطاع الخاص ولكن نختلف على نوع الشغل يعني شخص جامعي مثلا خريج إدارة أو تقنية المعلومات أو إعلام يقابلونه في مصنع بسكوت ولا عصير ويقولون له نباك عندنا موظف استقبال دوام 6 أيام في الاسبوع كل يوم 9 ساعات براتب 5,000 أو 6,000 والمجال مفتوح له انه يحصل راتب بين 10,000 و 15,000 كبداية أو في بوظبي فوق 30,000 شو تباه يقول أكيد بيرفض وبشدة بعد لأن هذا مب منطق صح هالشغله مب عيب بس يعني دام هالشركة تبى توطن تحط الشخص المناسب في المكان المناسب مب يحطون أي حد في أي مكان عشان يقولون والله عندنا مواطنين وانا مايبت هالمثال من عندي هذا شي صار في الواقع، لو كان خريج ثانوية بعد ماأظن بيرضى لأن هذا العرض أقل من السوق بالنسبه للمواطنين يقدرون مثلا ياخذون شخص مب مكمل دراسته اعداديه ويدخلونه كم دوره في الانجليزي والكمبيوتر والاشياء اللي يبونها ويحطونه في هالمكان

ولاتنسى اليوم الاعدادية في الجيش راتبه أعلى من راتب الجامعي في دبي كيف تبى يكون في اقبال دام ماشي حوافز صح وياك ان الراتب مب أهم شي في الإستمرار في العمل بس يعتبر عامل رئيسي لايمكن التغاضي عنه كونا نعيش في زمن الغلاء في كل شي والراوتب المتدنيه ماتسوي شي وصاحبها يمكن حتى مايقدر يغطي نفقاته الخاصه فكيف تباه يبدأ حياته، اذا كانت الشركة الخاصة كبيرة فبيكون عليها اقبال كبير من المواطنين واذا كانت توها في البداية ففي الغالب بيكون موظفينها من الجنسيه الآسيوية صاحبة أكبر نسبة في الدولة

السموحه

ولد الشحوح

26-06-08 ||, 09:06 PM

وجهة نظرك في محلها ونحن حطيناها من ضمن المشروع
باختصار " الرجل المناسب في المكان المناسب"

رويان

31-07-08 ||, 06:08 PM

مرحبا ... شحالكم

جماعة انا عندي سؤال " كيف نزيد عدد المواطنين في القطاع الخاص ونضمن استمرارهم فالعمل "
طبعا نحن شغالين في بروجكت عسب تعرفون ليش حاط السؤال

فخاطري أسئلة فرعية وايد ومنها

هل صحيح ان نسبة كبيرة من اللي اشتغلوا في القطاع الخاص فنشوا ؟

ليش كل مواطن لما يسمع عن القطاع الخاص ما يتحمس ؟

هل صحيح ان القطاع الخاص لا يرغب فالمواطنين ؟

هل صحيح ان الشركات ما تعطي حوافز و امتيازات مقارنة بالحكومة ؟

أسئلة كثيرة.. أتمنى الكل يشارك والكل يشاركنا فتجربته اذا كان يدوام فقطاع خاص
انا باعتقادي ان ثقافة العمل في الإمارات هي السبب الكل ينظر للعمل على انه فقط مصدر مال ويجب ان لا يكون صعب او فيه جهد هاي الثقافة المنتشرة في المجتمع ... فأعتقد لو أنشئنا الأجيال القادمة على مبدأ عمل سليم أعتقد انها بداوم فالقطاع الخاص بكل سهولة

في انتظار مشاركاتكم

مسا الخير..

موضوعك مساحة فضفضة للي جرب القطاعين

أنا كنت اشتغل في قطاع خاص.. وحاليا في جهة حكومية محلية

هل صحيح ان نسبة كبيرة من اللي اشتغلوا في القطاع الخاص فنشوا ؟

من تجربة شخصية الإجابة نعم.. بس مش لاسباب تخص بيئة العمل بالعكس القطاع الخاص جدا ممتاز ويرقى عن الجهات الحكومية " كح كح" بوايد..
بس المشكلة في طبية أعمال هالشركات اللي أغلبها أجنبي.. وقناعاتها أجنبية
في حالتي كنت مبرمجة ومسؤولة عن أمن المعلومات في 4 دول
والبرامج اللي كنت اشتغل عليها كانت اقليمية فتخيل انك بعد ما تدخل اسم المستخدم والباس.. تختار الدولة اللي بتشتغل على بياناتها وتلقى أن الدولة اللي بعد الامارات " إسرائيل " :eek:
نفسيتك تتتعب.. واتحس انك قاعد تشتغل في مكان ضد قناعاتك ويدعم دولة "تكرهها"
وبعد كانت فعالياتهم في توثيق علاقات الموظفين ما تراعي أخلاقياتنا وعاداتنا يعني كانت الأماكن مختلطة وفيها أكل وشرب حرام
وغير جذيه يعتقدون أن المواطن وصل لها المنصب لأنه "مواطن" مش لأنه إنسان كفؤ.. حتى لو حصلت تقدير امتياز من أول سنة بحس ان في داخلهم مش مقتنعين فيك
أحم احم وأكثر من جيه إيرادات الشركات في القطاع الخاص ما تضمن طريقة الحصول عليها حلال ولا فيها حرام وهم ما يحاتون هالشي المهم ان الارقام اللي حاطينها في الخطط يوصلون لها

وأكيد في أسباب كثيرة منها أن سوق الإمارات فيه فرص ومزايا وظيفية وعروض مغرية تخلي الموظف يدور على الأحسن..

ليش كل مواطن لما يسمع عن القطاع الخاص ما يتحمس ؟
ما عانيت من هالنقطة، بس اتوقع بسبب أوقات الدوام الطويلة
عشان تثبت نفسك لازم تعطي من وقتك وجهدك وايد

هل صحيح ان القطاع الخاص لا يرغب فالمواطنين ؟
مجبروين

هل صحيح ان الشركات ما تعطي حوافز و امتيازات مقارنة بالحكومة
بالعككككككككككككككككككس
الجهات الحكومية شو تعطي ؟
Zero
تموت باختصار
إلا إذا عندك واسطة
الجهات الحكومية ما فيها خطط لتطوير الموظفين
الموظف يكمل اكثر من 4 سنوات في نفس الشغلة تخخخخخييل ؟!!!
وإذا بغى يستقيل أو ينتقل ينذل ويحطون له مليون اعثره
من واقع تجربتي الحالية واللي ندمانه عليها القطاع الحكومي ما يهتم بالموظف أبدا

والسموحة على الإطالة..
:tongue:

ولد الشحوح

05-08-08 ||, 02:25 AM

رويان كلامج وايد فادني يا ليتج كنتي معانا فيوم تقديم المشروع
شكرا لج

الجنيه

05-08-08 ||, 12:14 PM

شكلي وصلت متاخره *_^ بس ابي اعقب

بالنسبه لي عندي خبره 3 سنين ف القطاع الخاص والحين بكمل سنه ونص ف القطاع الحكومي

كلن له ايجابياته وسلبياته
القطاع الخاص ما انكر انه اضاف لي الكثير سواء من حيث اللغه او التقنيه والتطور ف مجال شغلي وايد اشيا تغيرت فيني حتى الشخصيه واستفدت من القطاع الخاص اضعاف الي استفدته ف الحكومي هذا اذا كان في فايده اصلا

بس الشي الوحيد الي خلاني اطلع ساعات الدوام وايد طويله يعني وشفتات صحيح طول النهار بس اسم انه شفت ويغير حياتك هذا طبعا غير الدسائس والمؤامرات الي كنت امر بها بس تغلبت ع الكل والحمدلله طلعت بنتيجه ممتازه غير انه عندك مجال للتجديد والابداع وفي حد يقدر هالابداع ويحسسك بقيمتك ك موظف وآدمي وياهم

القطاع الحكومي مثل ما قالت يموت الانسان ببساطه اتحس انك ف مكان غلط ويا ناس غلط خصوصا اذا كانت عندك عقليات متحجره متمسكه بالمنصب لاسم المنصب لا غير من غير لا اتضيف للمؤسسه او الموظف شي تعارض افكار يعني انت منبوذ ببساطه وسياسة التهميش تتبع بشكل كبير هذا غير الاعتماد ع الجاليات الوافداه اكثر من المواطنين عشان ما يخذون مكانهم مع ان وجودهم والعدم واحد يعني الواحد منهم مش مستعد انه يخسر مكانه عشان مواطن لكن بنفس الوقت ما يفتهم شي والي يمشيه الوافد جنه مخدر ما يسمع لغيره

الله المستعان
الايجابيه الوحيده هي ساعات الدوام متوسطه بحيث انك ان بغيت اتعيش مثل البشر فيه وقت لك واذا بغيت اتكمل دراسه او تاخذ دورات في مجال غير جذه مافي اي حسنه حتى الرواتب تعبانه ع كثر ما يباغمون بنزيد وبنغير الا ان الوضع يسوء يوم بعد يوم

وبس وايد قطعتهم بروح اصلي تشاو

ولد الشحوح

05-08-08 ||, 06:59 PM

الجنية اضافتج تعني لي الكثير
شكرا واتمنى ان القطاع الحكومي يتطور

قلم رصاص

13-08-08 ||, 10:39 PM

ببساطة نحن شعب أتعود على الراحة( الكسل )، مانعرف طعم التعب والإنتاجية ، من إنولدنا والناس تخدمنا، فـ صعب علينا نشتغل ونكرف يوم نكبر ...

تحياتي

عـكس قانونه

13-08-08 ||, 11:41 PM

http://www.hdrmut.net/up/uploads/c9adbdf7c8.gif

القطاع الخاص كله اجانب و ما يحبون يوظفون الا اجانب مثلهم

من نفس اصلهم

على هذا الاساس وزارة العمل خلت توظيف نسبة معينة من المواطنين

شيء الزامي و اجباري على القطاع الخاص

حتى النسبة البسيطة الي يتم توضيفها

يطفرونهم على اساس يقدمون استقالتهم

و من الاساليب الي يتبعونها

انهم يحطون الشخص الغير مناسب في المكان الغير مناسب

مثل ما قب اخونا الاسطوري

او ساعات اكثر

بدون اوفر تايم

و هذا ظلم

و هذا الاشياء تصير

و لهاذا السبب

المواطنين عددهم قليل جدا في القطاع الخاص

و في الختام

اشكرك على طرحك

و موفق ان شاء الله في مشروعك

دمتم بوود

عكس قانونه

http://www.hdrmut.net/up/uploads/a707796ccd.gif

ولد الشحوح

14-08-08 ||, 01:19 AM

قلم رصاص : في فئة جي بس مب كل المواطنين تعودو ع الكسل
بالعكس في مواطنين مبدعين ولهم أثر في كل المجالات

ولد الشحوح

14-08-08 ||, 01:20 AM

عكس قانونه كلامك صح بس لازم نفكر بحلول وما نذكر الأسباب والعوامل ونكتفي بالمشاهدة