عيال البطه السودا !!!

[حلم الطفوله]

السلام عليكم ورحمة الله وبركاته

عيال البطه السودااااا !!!!

دائما ما نردد هذه العباره عند احساسنا بالظلم والشعور بالتفرقه العنصريه

سواء في المنزل عند تمييييز أحد الأبناء عن الآخر ....

أو في المدرسه ... عند تميييز ( بنت الأبله) عيني عينك جدامنا وانيود غبنتنا بحلوجنا:sad:


من فتره سمعت برنامج بو راشد على عيمان ...

وحده متصله فيه اتقوله ...ليش يزيدون مدرسين ومدرسات بوظبي ؟ ليش نحن عيال البطه السودا

قالها ...لا تقولين جيه يا أميييييه .... نحن عيال البطه البيضا وبيزيدون الباجين إن شاء الله :laugh:


والحين ...خبر عاجل على قناة الكويت

مجلس الوزراء يوافق تأجيل العام الدراسي لما بعد شهر رمضان :surrender:
ونحن !!! متى بيزين هالخبر العاجل شاشة تيلفزيوناتنا وبنتهنى برمضان شرات الناس والخلق :fa51:


دعواتكم :a046:

[دمعة عين]

.
.

الله ياليته صدق !
وقسم بالله بيسووون فينا خير لا صار ولا استوى =)

،
.
.

[مــهــابه]

آخر شي يفكرون يسونه هالشي

صدق والله ، نحن كيف بنداوم فـ أول أسبوع رمضان ؟

احس تـعب علينا . .



الله كريم

[حلم الطفوله]

دمعة عين .... إن شاء الله

تدرين !!! أصلا الدوام بشهر رمضان للطلاب أكبر غلط

نحن الحين مدرسين وعايشين الوضع ، الطلاب يداومون وعيونهم كلها رقاااااد ! ودرجاتهم مدنيه وايد لانعدام المذاكره ، وأصلا ماشيء وقت لمراجعة الدروس استنادا للتوزيع التالي

1- دوااااام الصبح بدون حاسيه ولا حياد
2- رقاد الظهر
3- النشه وقت أذان لمغرب
4- متابعة المسلسلات
5- صلاة التراويح
6- متابعة المسلسلات
7- الزيارات العائليه تنشط بهالفتره
8- نشة السحور
9- الصداع واللوعه طووووول اليوم
10- جان وحده الله هادنها وتبغي تختم القرآن

وين هالوقت إلي بتخصصه للمذاكره الحين ؟

صح إلي راده الصلاه ما تفوته !!! بس بعد رمضان له أجواءه وروحانياته وأغلب الأهالي يتركون عيالهم خلال هالشهر وما يتابعونهم لانشغالهم بعباداتهم وطبخاتهم

وهالفقارى إلي يداومون بجامعة العين ويتحملون هالدرب وهم صايمين بعد يغمضون !!! فديتنا والله عانينا شراتكم


وإذا فكرنا فيها بعقل شوي !!! السنه اليايه بيكون رمضانا على الإجازه الصيفيه بعز الحر !!! بس عالأقل بيكون بإجازه

يعني سنه وحده ما بتفرق لو أجلو الدراسه شهر !!!

عطوني رايكم!!

شو إيجابيات وسلبيات الدوام بشهر رمضان ؟

[دمعة عين]

صح !*
والنهـــاار بيكوون طويل ~ وأذان المغرب ع الست ونص ولا سبع
هذا والله آعلم ~


وأنا منقهرره لين ألحييين مب متخيله كيف بعييش أجوااء ارمضان السنه اليايه ~
كل شي بيتغيرعليه كـــــــــــــل شي >_<"


ونحن دوامنا فـ الكليه فـ رمضان لين 3 !!!!
كلاس ورا كلاااس ، وأنا ببدى التخصص السنه اليايه
الله يعيــــــــــــــــــــــ ــــــــــــــــــــــــن >_<"


،
.
.

[شمعة أمل]

شي غريب
مدارس وجامعات عربيه لازم يداومون في رمضان.. وانا في جامعه غير عربيه وغير مسلمه وعاطيـنا رمضان كله اجازه.. لانه صدق ماشي فايده.. 90% من الطلاب مايداوموون ( المسلميـن + المسيحيـين) والسبب انه العرب مشغولوون برمضان والغيـر مسلميـن مشغوليــن بالخيام الرمضانيـه والسهر والشيـشه..
ف محد يروم ينش للجامعه.. غيـر انه خطر عليهم.. تقريبا كلحد يسوق ويوون من امارات ثانيـه


ان شاء الله يعطونكم اجازه.. عشان ماكون روحي في اجازتي!!!!!!!

[صريح]

من استوينا و احنا ندرس برمضان .. و محد اشتكى
شمعنه السنه بس بغيتو الدوام يتأجل بعد رمضان ؟

سنيين مرت و الدراسه كانت برمضان و الامور كان تمشي عادي و لا السنه بس التعب زاد


و بنسبه للمدرسين و المدرسات انتو تعرفون وضع المدرسين و المدرسات
فالدوله من ايام ما كنتو طلاب .. شو الي حدكم انه تكونون مدرسين رغم معرفتكم بالوضع
اللي ما تغيير من نص التسعينيات لين اليوم من حيث الراتب و الجهد و التعب

دام رضيتو انه تكونو مدرسين كملو هاي الرساله بدون تحرطيم لانها رساله ساميه

و هالكلام دوم اقوله للمدرسات من الاهل " تتحرطمون و تتحرطمون و اليوم الثاني كلكن مداومات و لا كأنه شي مستوي ، اذا لهاي الدرجه مب مرتاحين للتدريس قدمو استقالاتكم
الوزاره ما بتفتكر فيكم لانه لو قدمتو استقالاتكم ..
اليوم الثاني مليون مدرسه مب مواطنه بتقدم ع وظيفه و بترضى بالشغل اللي انتو تقولون انه متعب (التدريس) "


يمكن كلامي ما يعجبكم ابد
بس هذا الواقع و لازم ترضون به
لانه ما اتوقع بيتغير الا بعد مده طوييله
:smile:


و ان شاء الله يتغير للاحسن باسرع وقت عسب ترتاحون

[حلم الطفوله]

بيتضارب الأخ :4:

خلاص ولا تزعل .... ما نبغي إجازه دامك مب راضي عليها :mf_leia:

بس جرب إنك اداوم شهر 6 كامل بدون طلاب مع إنك كنت إتفضل إنك تاخذه بشهر 9 هالسنه

و جرب احساس إنه غيرك عدهم إجازه بشهر رمضان وإنته لا !! سواء كنت طالب وإلا معلم ما تفرق

وجرب احساس هالبنات إلي يطرقن للجامعات ويتولهن على لمة لفطور والسحور برمضان وسط أهلهم

وجرب شعور إنه ودك تسير عمرة رمضان حالك حال الخلق وما يعطونك إجازه

وجرب شعور حلم لما ينمسح ردها الأولي وتكتفي بالهسطور كرد عليك :fa36:

[قصايد غلا]

هيه والله


يا ليييييييييييييييييييت يطبقون هالشي عندنا


ودّي أتهنّى برمضان


كل سنة نمتحن في رمضان ، و من الله أنا مخّي يقفّل في رمضاااااان في النهار و أصلاً في الليل ما أعرف أذاكر ==> يعني في كل رمضان أعااااااااني :pullhair:


ما جد تهنّينا برمضان ، إلاّ العام الأول (رمضان 2006) كان أحلى رمضان في حياتي لأني ما درست على السمستر الأول و قلت بدرس على السمستر الثاني صدق صدق استمتعت و حسّيييييييييييييت بمعنى رمضاااااااان و وناسته



يااااااااااااااااا رب يطبقون هالقرار عندنا بعد :surrender:





================================




صريح : لو كل مدرسة استقالت شو بتشتغل ؟
الله يهديك يا خويه :)


أحينه حلم تقول الحمدلله ان صريح مب هو وزير التربية :a046:

[عفاريتووو]

السلام عليكم

عيل انا اتفق مع صريح :fa46:

بالعكس انا احاتي رمضان لمن يكون في الاجازة
جي نداوم الصبح و لين ما نرد يكون ما باقي غير شوي و ما نحس بالوقت

و بعدين احلى ايام الدوام عندي ايام رمضان
لانه خفيف و ما يتعبونا و يراعونا :fa34:

و حتى المذاكرة .. احس المعلومات تدش مخي اسرع :fa46:

و اللي يبا يختم القرآن و يزور اهله بيحصل وقت

لا تكفخوني لول :k_harhar1: بس ها رايي

[حلم الطفوله]

اتفق العرب على أن ألا يتفقوا .... حكمه قالوها الأوليين :)

مهابه وشمعة أمل ودمعة العين وقصوده ويانا ... والله جااااااااان زين يطبقونه عدنا السنه عشان نشوف الايجابيات والسلبيات للموضوع

صريح ..ا. صدق بنصحك !!! مووووووووول لا تقرب صوب مناصب التربيه...شكلك ناوي على إبادة التوطين من الحين

عفاريتوووو ... من هالناحيه صدقتي ...الوقت يمر بسرعه وما تحسين بالصوم

بس يغمضني المعلمات إلي عدهن عيال ومسؤوليات ، أكيد يحبن التدريس كرساله ويبدعن بشغلهن ، وأحس إنهن برمضان صدق يجاهدن

يعني ترد البيت سيده عالمطبخ ( تنسى لرقاد) ...صريح من الحين أقولك أنا أتكلم عن ستات لبيوت من المعلمات المتميزات طبعا ...المهم يأذن المغرب وهن عند لجدور ويا دوب يصلن ويشوفن حاير طاير ويسيرن التراويح ومن يردن يجهزن الفواله وعقب يطبخن السحور .... والله يغمضن يا صريح !!! ( حس فيهم)

[أنامل قلب]

:sleepy: ..

[مزن هتان]

أنا مع صريح و عفاريتووو

ندرس و ندوام برمضان شي مو جديد علينا
و أحسن، يمر الوقت بين الكلية و المذاكره
لين حزت المغرب بعدها تراويح.

بعكس لين قعدنا بالبيت طول الصبح
رقود النشه لـ صلاة الظهر عقب بس قعده بلى
فايده<<< هذا راي

يسد الاجر اللي يضاعف بالشهر دراسه + صيام
= جهاد في سبيل الله.
و ان شاء الله يسمعون لكم صوت

[مجموعة إنسان]

مثل ما يقول خنفروش

ابأ آبلوووني لو عطوكم اجازه

[مــهــابه]

أنه نكون فـ اجازه أكثر من شهرين ، وأول يوم دراسه يكون رمضان شي . .

وانه رمضان ايينا ف نص الفصل شي ثـاني . .



انا من الحين قايله أول أسبوع من رمضان مابداوم ، إلا سحب واضافه :P

[أنامل قلب]

:
.

السلام عليكم ..

انا من الحين ماستقريت باجازتي .. !
ومن الحين أحاتي البلاوي اللي يايتني .. !

ادري مب فاهمين علي ؟!؟!

:

انزين .. وبصراحه ..
انا عنصر محايد بين راي الموافق والمعارض ..
بشكل عام .. نظل نحن اللي نحدد مدى تحملنا وتأقلمنا بالاجواء اللي بننحط ابها سواء شئنا أم ابينا ..
والدوام له منافع مثل ما ذكر البعض وإن كان بالمثل له مضار على مجموعة وشريحه كبيره من الناس ..

يعني شرات ماطرت اختنا حلم الطفوله .. عدنا الحريم ممكن ينضرون بشكل كبير جدا ..
والطلبه مالهم بد من التأقلم وإن كان بشكل ضعيف جدا .. !

بالمثل .. ممكن الدوامات تكون لنا وإن كانت ثقيله أهون من قعدة البيت خاصه لمن تكون قعدتنا كلها نوم وخمول !
عالأقل نضمن "بوضعنا للنيه" إن دراستنا هذي نوع من الجهاد والعباده .. والواحد لازم يعرف كيف يأقلم نفسه ..
يعني أذكر كلام وحده من ابلواتنا ..
تقولنا حلو لمن المرء يحط له نيه قبل لا يبدأ بإن دراسته واهتمامه بدوامه جزء من عباده وصانا الحبيب عليه الصلاة والسلام عليها ..

وبالنهايه .. ليش ماتبدون رايكم بمقاله طيبه سواء بالسلب أم الايجاب بأحد الجرايد حول الموضوع ..
حلو لمن الواحد يفكر ويحاول ويشتغل على ايصال صوته للجهه المعنيه ولو من بعيد .. . !

أما عن وجهة نظر أنامل قلب الشخصيه .. فمثل ماقلت ..
داومنا خير ونعمه .. ماداومنا بعد خير ونعمه ..
وبكلا الأمرين منافع ومضار يتم تحديده بيدنا بالدرجه الأولى ..

وربي يكون بالعون ..
وييسرلنا اللي فيه الخير باذنه ..

:

تقديري ومودتي :smile: ..

:.

[حلم الطفوله]

يا جماعة الخير محد فاهمني غير مهابه

مثل ما قالت بالضبط ...يعني إجازه ثلاث شهور للطلاب لأنهم امأجزين من شهر 6 وأول يوم بيكون رمضان صعبه شوي!!

ما عليه نحن أكيييد امداوميييين وياكم ... بس يبالنا عالأقل العشر الأواخر إجازه !!! شفتوا قناعتي

مجموعة انسان .....ابآ آبلوني لعايش وهم ..... وإن شاء الله يصير الخير للجميع

[مزايا]

أبغي أعرف ليش المدرسات عندهم دوام لين 26-6 مع إنه ماعندهم ولا شغله إلا قعده على النت وأكل وحش فالناس ؟؟

[دمعة عين]

.
.

المشكله حتى لو عطونا إجازه فـ ارمضااان > معنه من سابع المستحيلااات !*
بيسحبوونها من إجازه الصيف الياي !~
تعرفوون انتوا مزطه الوزارات فـ الإجازات !*

/

صدق أنا أشووف خواتي كلهم مدرسات ماشالله ~
بين تحضير ومجابل كمبيوتر ~ حتى عيالهم بالعاافيه يدرسوونهم ~ ويراجعوون لهم
درسووهم فـ كيف فـ رمضاان !~

وصح فـ فرق بين انه أول الدواام يكون سيده رمضان ~ وبين إنه يكون فـ نص الدوااام !*

" ربييينااااا يسسستررر "
،
.
.

[طفلة من هذا الزمان]

أميه حلــم .. قومي بنصلي ركعتين شكر ..

الحمدلله صريح مايخصه في التربية و التعليم .. جااان رحناا فيهااا من خاطر .. برووحنا مب مترقعين
(لا تزعل صريح تراك ما قصرت فينا بعد ) :tongue:

المهم ....

بداية أي سنة دراسية تكون اوردي بداية بطيئة .. يعني الطالب - باختلاف المرحلة الدراسية - ياخذ وقت لين يتأقلم مرة ثانية على الدوام ونشة الصبح والمذاكرة .. فما بالكم إذا كان بداية الدوام أصلا في رمضان اللي المغريات فيه كثيرة .. التلفزيون ما يقصر بالعدد المهول من البرامج و المسلسلات ومصيبة اذا سوولهم جزء ثالث من فريج .. ما بنحصل حد مبطل عينه

وشي ثاني.. فعلا المسؤوليات تكبر على ربات البيوت باختلاف وظايفهن .. يعني لو الريال يسده يشوف وجبة وحده جدامه جان نحن بخير (لازم احقد :fa32:) .. احم احم .. يعني اللي بقوله ان كل الناس باختلاف وظايفهم يتأثرون بالشهر خصوصا في الدوائر الحكومية :10:

وانا اضم صوتي لصووتكم ،،
فعلا ياريت إيأجلون العام الدراسي في شهر رمضان ..

لمصلحة الطالب قبل المعلم ولتحصيله الدراسي اللي يتأثر .. والمعلم إنسان بالنهاية و لازم عطاءه بيختلف (مب بالضرورة يقل) عن الأشهر العادية ..

للمعلم اللي ينحرم من عمرة رمضان لرفض إجازته من التربية (مع ان المعلم يكون متناازل عن راتبه خلال ايام تغيبه + تكفله بإيجاد بديل مع انها وظيفة مكتب الاحتياط مب المعلم :whistling: )

وعادة الفصل الدراسي الأول يكون قصير يعني يادوب يخلص المنهج خلاله ، يعني المعلم ماله بد إلا يمشي في المنهج ومايقدر يخفف على الطلبة حتى لو حاول

باختصار (حرام طفلة وايد مختصرة وحليلج :tongue: ) .. الانسان عدو ما يجهل ..
يعني لو جربنا مرة ما نداوم في رمضان بنعرف إذا فعلا في فرق في أدائنا للعبادات والواجبات الاجتماعية وتحصيلنا العلمي وأدائنا لوظائفنا ...

[حلم الطفوله]

عاشت طفله ...عاشت عاشت:a033::11::1::fa34::a034:

[عهد الوداع]

:fa54:



:a052:


:thumbup1:

[مايهزك ريح]

مادري ليش عندي احساس انه بيسوون اللي تبونه بس بالجلب .. يعني بيجدمون الدوامات عشان ما يبتدون برمضان ..
اكيد في خواطركم الحين فال الله ولا فالك .. ^_^
بس هم دايما ما يعطونا اللي نباه .. ما تلاحظون .. !
طبعا انا ما يخصني في السالفه ..انا مب في المدرسة ^_^"

[حلم الطفوله]

ما يهزك ريح !!! حتى أنا حاسه

وتخيلت إنهم يسووون إلي نبغيه ولكن بيخلونا انداوم لين شهر 7 !!!! وابوييييه بنحترق :(

خلاص ما نبا أجازه !!! بس إن شاء الله انرمض السنه بخير وسلام والله يعودنا عليه كل سنه وكل حول

[وحي القلم]

صح كلام ما يهزك ريح.. لازم ترضون بالواقع

لانه وزارة التربية.. يعيبها تسوي عكس اللى الناس يبونه :shutup:

حلوم.. حطيني انا الوزيرة و بعطيكم إجازة :a050:

..

[ريم العين]

صح اول اسبوع بنتعب

بس بنتعود وبيستوي روتين عادي
والحمدلله انه فالشهر الاول مب الشهر الثاني
لانه الامتحانات تبدا بالشهر الثاني

وبعدين يوم بيخلص اول اسبوع بتقولون راحه وبتنسون السالفة
وبالاخير الطالب هو اللي يرسب او ينجح
والمدرسين ما بينزل راتبهم ولا طشه

[عايش وهم]

السلام عليكم

و صبحكم الله بالنور و السرور .

جماعة الخير .. من مدرسين و مدرسات بصراحه يعني إنتوا ما تنعطون ويه ..

وزارة التربية و التعليم في الإمارات من أنجح وزارات الــــعــــالــــم .. يعني اللهم لا حسد خططها سواءاً كانت خمسية و لا عشرينية كلها من أنجح الخطط في تطبيق أجواء دراسية و تعليمة راااااااااااقيه لأبعد الحدود بإسم الله حولهم و حواليهم و ما شاء الله عليهم عادلين و منصفين بداية من السلع و انتهاءاً بــ دبا الحصن و أنا سمعت و كله في ذمة الراوي "عساه ما ارتوى" إنهم من كثر الطفره اللي عندهم في التعليم ناوين يدرسون الجينيوم البشري للمراحل الإعداديه و لا سمعت بعد إنهم بيخلون الطالب يدرس في البيت يشرحله مدرس عن طريق كيمره موصوله بينهم "أظني بيتعاقدون ويا اتصالات بخدمة الكام مالهم" تراه وارد يعني المصالح من بعضها .

يعني أعتقد المدارس بتصفر باجر لا طلبه و لا معلمين و أعتقد من كثر رقي وزارة التربيه و التعليم عندنا و براعتهم في إيجاد الحلول إنهم بيستثمرون المدارس كسكن عمال لقوم بابو و راجو اللي مازرين البلاد بليا مأوى بعد ما ضاجت عليهم الدنيا و غلت عليهم الإجارات في مساكن العمال و العايد من هالإجارات بيخصصونه للطلبه اللي حابين يكملون دراستهم أو حتى إاللي ناوين يقدمون ع الدكتوراه .

بس نحن عافانا الله ما نفتهم و لا نحس ع دمنا و مب مقدرين الجهود الجباره اللي تقوم فيها وزارة التربية و التعليم .. يعني بصراحه يسد إنا تخرجنا من المدارس و نحن طمم و غجج في الإنجليزي أنا كنت أتحرى العيب في المدارس و الوزاره .. طلعت ما أفهم .. لأن الوزارة كانت تبا تحافظ على هويتنا الوطنيه .. عشان جه ما علمونا إنجليزي عدل .

..

دام هالوزاره تركض ورى توفير البيزات و تحط خطط و مناهج منتهيه صلاحيتها فعمرها ما بينصلح حالها و لا بينصلح فيها شي .. شو هالذكاء اللي يقول : خل المعلم في الصيف يداوم و الطلبه مأجزين ؟؟؟ يبونه يدرس الطاولات ولا يرمس المكيفات اللي تكح غبار بدال الهوى البارد .


كل الوزارات في الدوله تترقى و ينعدل حالها يوم بعد يوم .. إلا وزارة التربيه و التعليم على كثر ما تتطور الدنيا هاييلا تخلفهم يزيد ..

ضغط :k_icon28:

اختي حلم ...

دام هالإجازه بتريحكم .. معناته عمركم ما بتحصلونها .. لا تنسون إن الوزاره حاطه دوبها من دوب المدرس جنه موظف عادي و لا كأنه التدريس دور سامي قبل لا يكون مجرد وظيفه و السلام .


جد جد الله يكون في عونكم .. إذا ناوين ع مظاهره خبروني بس :mad:


جماعة الخير من مدرسين و مدرسات أنتوا وايد عاطين الوزارة ويه

[مجموعة إنسان]

عاااايش وهم

عشاان خاطري بس قولهم
ابأه أبلوووني لو انصلح حال وزارة التربية !!!

[عايش وهم]

مجموعة إنسان

لا بن عمك بنحط وحده يديده



لإحلأهُــن هــ الشنبات


إذا انصلح حال هالوزارة

:3:

[مجموعة إنسان]

عاايش
ليش هو في شنب !! بروحه محلوووووق هع




صدق انتوا المدرسين تدلعون
اليوم نازله لكم التصفية ,, يوم تخلص فلوسم تعالوا حطوا عليهم

[الاسطوري]

^
ذكرتني بخطاب تراهن قبل على هالشي ولكن
حسب علمي انه لليوم ماتجرأ
يسويه بالعلن!
:h_daleel:

[طفلة من هذا الزمان]

مجموعة انسان ،،

عن الحسد
اللي يسمعك يقول مدبلينه هالراتب !! ،، ماجنه راتب ثلاث شهور جدام :fa52: ...

يعني معظم المدرسين و المدرسات بيطيرون الحينه لأقرب مكتب سفريات وسفره شهر او اقل بشوي بس عشان ينسون الهم اللي كان ، مع انهم يدرون انهم من الشهر الياي بيقعدون ع "الحديده ":fa55: ..

يعني لو تبدون بصندوق تبرعات حقهم وايد ابرك :boxed:


:k_devil2:

[قصايد غلا]

المدرّساااات روحهن في مكاتبهن يتجاتلن و كل وحدة تكيد للثانية ، كيف تبون الوزارة تكون عدلة:fa55:


أكثر المدرسات فالحات في تعذيب عيال الناس "الطلبة" ، كيف يبن يترقّعن بعد و كيف يبن حد يرحمهن :k_harhar1:



حـــلـــم يا أطيب معلمة تعالي بنسوي مظاهرة وياااااااااااااج عل و عسى يرأفون بحالنا نحن الجامعيين بعد :D ...

[وحي القلم]

الله يعينكم يا حلم :fa39:

هالوزاره العاثره وايد تشجع على أنكم تكملون عندهم... حتى اللى يبون يدرسون تربية :fa55: >> شكلهم يبون الفكاك من المواطنين اللى يشتغلون عندهم

مادري ليش كل سنه يختسون أكثر عن قبل :a046:

..

[ملاك الروووح]

::

ما أقول غير الله يعييييييييييييييييييييييي يييييييييييييييييييييييين كم !!

:

أنا روحي أشوف انه مهنة التدريس متعبه وايد ..

ف ما بالنا .. بوحده تكون متزوجــــه .. وعندها عيال !!

تجابل عيالها وريلها .. وبيتها .. وتشل معاها شغل المدرسه طبعاً اللي مايخلص هناك !

تصحيح امتحانات .. تحضير .. الخ الخ

وفوق كل هذا تكون صايمه !!


اشعليهم الشباب .. ما يتعبون أعمارهم ترى

مب هم اللي يدشون المطبخ من عقب الدوام :bash:

ولا هم اللي يتابعون الأولاد ودراستهم .. ولا هم اللي يجابلون شغل البيت !!

اللي يكون دبل ف رمضــــان !!

:

بس حال وزارة التربيه .. مول مب عدل !!

مادري متى بياخذون بالراي العام .. يشوفون شو المشاكل اللي يواجهونها ..

شو محتايين ..!

مب يحطون مناهج .. ( حشـــو ) لا تغني ولا تسمن من جوع !!

وبدون ما يحطون خطط مدروسه حقها .. ويكون الضحيه .. الطالب !!


وشو هالتخلف !!

المدرسين يداومون في الصيييييييييييف لييييييييييش :boxed:

صدقه عايش وهم !!

بس شو بنقول وشو بنسوي !!

فوضوا امركم لرب العالمين .. وان شاءالله ما بيخيب الرجا فيه !

:

أنا عن نفسي .. حبيت السنه اللي طافت دوامي ف رمضان !

لأنه خفيف .. وخاصه يوم اكون ايفننغ !

صج نحس بجو رمضان ..

وكل يوم أبدع وأسوي لهم شي وأوديلهم اياه :biggrin:

أحس جيه قلوبنا تكون ع بعض ف رمضان بس :biggrin: لووووول

ونااااااسه بصراحه !!

[مزن هتان]

بخصوص بداية السنه الدراسيه بالكويت
خلوها مثل ماهي ماكو اجازه برمضان
يعني حالهم من حالنا

[بنت الدلع]

مس سوزي :a050:

غمضتيني الصراحه
الاغلبيه ضدج
ويمكن انا بعد اكون ضدج :shutup:

هو الصراحه لو يعطونا اجازه بيسوون خير فينا
بس نحن خاابزينهم عدل
مايعطونا اجازه الا وراها تعويض
ونحن الصراحه مافينا يهلكونا بالدوامات لييييييييين مادري متى

وبعدين انا اشوف ان دوامات رمضان خفيفه
يعني الساعات تكون اقل
وفيه بعض التساهلات من بعض المدرسين
يعني يادوب في اليوم ناخذ ماده او مادتين
الدوامات تكون قصيره

وبعدين يوم نداوم ونحن صامين مانحس باليوع
يخلص النهار
نوصل البيت
نرقد
انش على الاذان
خلاص نفطر

لو بيعطونا اجازه على نهاية رمضان حلو
بس اصلا جيه ولا جي هالقانون مابيطبقونه هني
لانه وزارتنا دايما ضدنا
وتحاااول وتساااااااااااااااااهم في احباااطنا في منع الاجازااات ووضع المناااهج الغير معرف بها من قبل الطالب

---

عايش وهم :fa42:

---

المجاهدين في سبيل العلم :k_icon9:

[العجيبة]

العمـل عبـادة ، والأجر مضاعف في رمضان !

[أنامل قلب]

:k_sadwalk:

:
.

[خيال الحب]

واخيرااا وصلت الصفحه الاخيره لووول..

وكل ماخلص رد اقول الحمدلله اني خلصت المدرسه ولا كنت بسب الوزاره على ابو الوزاره خخخ

المهم ..

وزارتناا الموقره احسهم ما يفكرون لا بالطالب ولا بالمعلم.. يت الدراسه باول يوم رمضان ولا باول يوم حق الليله ما يهمهم .. يعني مافي دراسه وبيقولون هالطالب او المعلم بيداوم باول يوم رمضان من بعد هالاجازه الطويله والمريحه والمفيده للاطفال>>.. على الاقل يا انه دوامهم يبدا قبل رمضان او بعد رمضان باسبوع على الاقل ,,

والله يعين المدرسين الصراحه .. احسكم وايد تعانون @__@

وكــل بأجــره ان شاء الله ..

وما ننسى نصفق لوزارتناا الموقره..

وفي شي ثاني ابي اقوله @_@ بس لاتضربوني

لو عطو المدارس والجامعات اجازه في رمضان صدقوني راح يزيد المنكرر.. وتكثر البلاوي .. بتحصلون الناس سهر لين الفجر وعقب رقاد لين قبل اذان المغرب بشوي .. وعقب تلفزيون لين الفجر وكل يوم لين يخلص رمضان واخر يوم يقولون اللهم تقبل منا صيامناا وصلاتناا ..

@_@ على ايام الدوامات والدراسه ادخلو الظهر الجاات وشوفو البلاوي .. ويوم تقولهم سيرو اقرو قران تعبدو يقولك لا احسن عشان يمشي الوقت بسرعه@_@ .. فكييييييييييف لو كانووو باجازه @__@

[مجموعة إنسان]

بس انتوا في سنه مليااااااااااانه اجازاااااااااااااات !!

[ريم العين]

كاتبين لي فالمسن

سوف تبدأ لسنه الدراسية تـآريـخ 31-8-2008م سيصآدف رمضان اليوم الثاني من الدراسة وعلى كل طالب وطالبة الإضراب وعدم الدوام إلى بعد العيد الفطر المبارك.... انشر الحملة الطلابية

صدق ميانين الدراسة احلى من الاجازه ..نبا نكرف شوي..