هل تتنازلين؟؟؟؟؟؟؟؟؟

[وعد]

السلام عليكم و رحمة الله وبركاته

عندي سوال لكم يا فتيات الواحات

الي اي درجه ممكن تتنازلين عشان شريك العمر؟؟؟؟؟؟؟؟؟

مثلا لو طلب منج ترك المكياج خير شر :fa52:

او مثلا ترك الوظيفه الي تعبت فيها عشانه هل ممكن تقديمين علي هالخطوه؟؟؟؟


قصدي الي اي حد ممكن تتنازلين ؟؟؟؟؟؟؟ او من الاساس مبدا التنازل مرفوض؟؟؟؟

[مــهــابه]

وعـليج السـلام والرحمة اختيه وعـد . .

فـ البدايه [ الـعلاقـه الزوجيه ] عـلاقـه تـفاهم بيـن طرفـين ، يـعني الـتنازل لازم يـكون من طـرف الرجل وطـرف المرأه عـسب تـستمر الحياه بـ هـدوء . .

والـغـالب أن الـمرأه هي اللي تـتنازل أكثر عن الرجل . .

شخصـيـاً : -

أتـنازل لـ درجة أنه الـتنازل مـايـهين " كـرامتي " ويـقلل من قـيمتي جـدامه ، هـذا واحد

ثـانيـاً ، أتـنازل فـ الشي اللي احس انه التنازل ماراح يـأثر عـليَه وأهـم شي اني أكون قـنوعه . .

يـعني في أشيـا بسيطه نقدر نـتجازوها مـثل ماقـلتي " المكـياج " يـعني إذا ريليه مايحبني أحط ميك آب ، مابحط ليش لا ( هالنقطه شخصياً ماتفرق لأني ما احط غير هالجحال )

أما في أشـيا ثانيه أكثر أهميه مـثل ( الـتعليم ) أو شي من هالقبيل مستحيل اتنـازل ، عندي طموحات شخصيه وطموحات على الجانب العائلي بس بشرط ، انه مايطغى جانب على جانب ولا يأثر عـليه . .


وبـالـتفاهم تـكون الحياه أســـهل وأسهل . .



شــكراً لــج { وعــد }

[الا انا]

لي عوده ..!!

[ميــرة]

اولا .. الشكـر لج الغلااا على هذا الطرح المميز برأيي ..

ثانيــا .. اي علاقـه في هالدنيـا اذا ما كـانت قايمـه على التفاهم .. والمشاركه الكليـه ما راح تنجح ..

يعنـي التنازل مطلوب .. ولكـن في حدود معينـه .. اول شي ما تمس كرامتي كانسانه ..

وثانيـا ما تحد من حريتـي كانسـانه بكل صفاتي .. ( زوجه واخت وبنت ) ..

وممكن اقولج اللحيـن ما بتنازل عن شغلـي او ممكن اتنازل بس فالاخيـر الظروف بتتحكم في مدى التنازل وكيفيته ..

ومثل ما قالت الاخت مهابـه .. فالاول والاخير التفاهم يخلي الحياه اسهل واحلى ..

[ملاك الروووح]

::

وعليكم السلام ورحمة الله وبركاته

:

هلا وغلا وعـــد

بالنسبه لــــي .. راح أتنازل .. عادي عندي ..

لازم الوحده تضحي .. عشان تنجح العلاقه الزوجيه ..

وخاصه اذا ف مواضيع شرات اللي تطرقتيلها ..

يعني ما أعتبر انه تنازل ..

بالعكس بستانس .. لانه يغار علي ..

يعني سالفة الميك أب ما أعتقد انها بتشكلي أي أهميه ..

لأني أنا الحمدلله مش من النوع اللي أتمكيج وجيه .. شرات مهابه بس جحال :biggrin:

وحتى سالفة الدوام .. اااااااااااااخ أنا أتمننننننننننى اييني واحد يقولي ايلس في البيت

لأني أؤمن انه مهمة المرأه الأولى هي تربية الاولاد :biggrin: ومجابلة ريلها في المقام الاول لوول

والوظيفه الوحده ما تشتغلها الا اذا كانت مضطره .. وظروف ريلها كانت صعبه مثلا ..

وهي تساعده ف مصاريف الحياه .. ف تشتغل .. هذا شي ثاني

لكن اذا هو يقدر يوفر لها حياه كريمه .. ليش اتعب عمرها وتشتغل !!

تيلس بيت ريلها .. معززه مكرمه ..

:

مثلا اذا يباني أتنقب .. عادي ... بالعكس بستانس بعد :biggrin:


بس استغرب من هييل اللي يعصبون ويتضاربون مع رياييلهم

ويعتبرون هالشي انه محو حق شخصيتهم !! :boxed:

بالعكس الريال يحبج ويغار عليج .. وما يبا حد ثاني يشوفج ..

المفروض تستانسين .. لأنه ريلج مهتم .. ومب شرات هالشباب اللي استغفر الله مادري كيف

يرضون اهلهم يطلعون وهم متبرجات !!

:9:

::

خل ايي ريلي أول شي .. وعقب بسوي أي شي يباه :biggrin:

[الـيـاه]

سلاااام!

شكرا وعـد ع الموضوع


فالحياه الزوجيه مايستوي ان الاثنين يشدون و ولا واحد منهم يرخي
بجي مابتنجح هالعلاقه فـ لازم كل واحد منهم يضحي بشي عسب يرضي الثاني ونفس ما قالو ان فالغالب الحرمه اللي لازم تضحي اكثـر :fa51:..

عني انا هممم .. إذا عن الشغل ترى جي والا جي انا مستحيل اشتغل في مكان حكومي والا خاص .. بسوي شغل خاص فيني انا واعتقد هالشي ما بيأثر على حياتي نفس كراف اللي يداومون يوميا ً فـ ماظني يكون عنده مانع في هالشي :)

وعن الميك اب بعد عادي عندي اتنازل
لانه سبب هالشي يرد لغيرته :inlove: عليّه فـ ماعندي مشكله

لـكـــن ~

كل شي له حد .. يعني مب أنه يتأمر عليّه لمجرد أنه بسسس يبا يتأمر ( ها اللي ناقص :fa44:ههه )
هني بيستوي موضوع ثاني وشي ما احبه لول

.
.
.

[دمعة عين]

~ مرحباآ !*

همممم ~ الريال وحرمته لازم يكون باب التحاور بينهم مفتووح !*
وباب النقاااش بعد مفتوووح ~ ..

وأنا عني بصراحه ، ماعندي مانع إني أتنازل عشانه !
هذا ريلي وبعيش حياااتي وياااااه طول عمري ~ ..

وعن سالفه الشغل / أنا عني ما أفكر اشتغل فـ مكان مختلط !*
يا أشتغل فـ مكان كله حريم أو أيلس فـ البيت أحسن لي !~

وإذ هوه ماعنده مااانع إني آكمل فـ شغلي بكمل !~ بس طبعا لازم اتناقش ويااه فـ هالموضوع
أنا أبى اشتغل عسب انسااعد بعض فـ مصاريف البيت ، ويكوون عندنا كذى مصدر للدخل !

وإذا عن المكياااج ~ أنا بعد عااااااااادي جدا =)
أصلا أنا أباها من الله هع ~ ماحب المكيااج ولا أحب أحطه ع ويهي ><"
اتعقد ><"

:
.

و و و و أنا بعدني صغيره !!! مابا أفكر فـ العررررررررس هع
،
.
.

[بوسلطان]

هلا..

اتنــازلــي.. ليــش لا.!! هذا شريك عمرج وحبيب قلبــج.. واهم شي رضاه.. خـخـ ^^

ولكـن! وركزي هنا.. في " ولكن" اذا كان في شي صعب بنسبالج او ممكن ما قتنعني فيه.. يحق لج ان تناقشينه.. وبعدين نشوف من يقنع الثاني!! قــيـت اتـ!!

وبالتوفيق....

[شمعة أمل]

وعليـكم السلام ورحمة الله وبركـاته

الزواج أسـاسه التـفاهم ثـم الحب.. عشان يسـتمر الزواج لازم بيـن فتره وفتره حد يـتنازل.. ومـب معنـاته بس الحرمه تتنازل.. ولا الحرمـه أكثر وحده تتنازل.. لا طبعـاً.. التنـازل يكون متسـاوي بين الطرفيـن..

كـزوجـه راح أتنـازل لـزوجي لـكن بحدود...

يوم بيتقـدملي شخص.. وهـالشخص بيكـون شـريك عمـري.. بيـاخذني وأنـا بكـون بنت متعلـمه.. بنت تشتغل.. بنت تحـب تطلع.. بنـت تحب تسـافر.. يعنـي بياخذني أنـا مثل مـا أنا.. وبخليـه بالضبط يعرف كيـف أنا قبل لاياخذني.. مـابا واحد مايـروم يكون مسؤول عـني.. والى يّلسـني ويحبسني في البيـت!!

إذا قالـي تركـي وظيـفتج .. فهالشي مسـتحيل .. الا لو عـندي عيـال وأكون مقصـره في حق عيـالي!!.. وإستـغربـت يوم كتبتي انه البـنت تترك وظيـفه تعبت فيـها عشـان ريـلها.. أحس هالشي غلط من ناحيتي.. وظيـفتي لـي ومب لـريلي.. والسبب الأسـاسي انه ليـش مستحيـل أهد وظيفـتي لانه من وأنا صغيـره وأبا اشتغل.. ويوم ريلي بيخطبني بكون موظفـه.. فـ ليش فجأه يقولي يلسي في البيت؟ تخلّّف..

بس اذا عن المكيـاج.. ف هـالشي عادي... المكيـاج مب شي أساسي في حياتي


أنا بتنازل عن أشيـاء لـ ريلي .. كثـر ما هو يتنـازل.. والسالفه مب سالفة عنـاد.. بس انه كل شي يكون متسـاوي ومحد فيـنا يكون أناني.. بس اذا في وقت الخطوبـه كل طرف يكون صادق عن شخصيـته.. محد بيضطر يتنازل عن أشيـاء (كبيـره)

[الجنيه]

ممكن اتنازل بعد ما يقنعني
ممكن اترك شغلي عشانه اذا هو سدني اقصد من الناحيه الماديه الي اشك انه ممكن يصير
ممكن اتنازل بحدود
ممكن اتنازل بس اذا وصل الموضوع للكرامه لا والف لا بشكل عام ما احب الشخصيه المتسلطه وسي السيد الي اوامره مجابه بدون نقاش او حوار العناد والغصيبه نتيجتها وحده الخساره

[الشيـــن]

هممم .. ممكن أتنـأآأآزل بس بح ـدوود !

ومستحيل اتنااازل الا وانا مقتنعه .. لاني لو تنازلت عن شي
ادري اني مابقدر اكمله دامي مش مقتنعه فيه !

ويهمني أعرف السبب عسب اقرر اذا اقدر اتنازل ولا لاء !
يعني نتفاهم .. و نبدي راينا .. ونقنع بعض .. لكن شي بس مني والدرب
كلامه يمشي وخلااااص بدون نقاااش .. مابسوي له شي حتى لو تم مصر
يهمني انه ايي ويتفاهم وياي ويبين لي وجهة نظره !
ويعتمد على الشي .. اذا يأثر على علاقتنا بتنازل .. لكن اذا احس انه شي عادي
ماقدر اتنازل .. بس عن الوظيييفه مستحيييل اتنازل عنها ! تعبت ودرست
عشان اوصل للي أباه . المسألة مش مسألة دخل وراتب وفلوس ..
بالنسبه لي .. الوظيفه اكثر من مجرد وسيلة دخل !
إلا فح ـأآأآلة انها بعدتني عن بيتي وايد .. اهني ممكن اتنازل عنها ..
بس لازم بسوي شي أشغل يومي فيه
ولا اني اعيش بس جي بيت وريل وعيال بدون شغله ولامشغله .. مالي خانه :boxed:

ونفس ما انا بتنازل .. لازم هو يتنازل بع ـد ..
ولا كيف بنبني بيت بدون تفاهم وأخذ وعطا ..
وف النهايه .. كل شي ينبنا على التفاهم يستمر بـ شكل حلو ومريح سواء
بين الاصدقاء ولا الاخوان ولا الزوجين ..:fa41:

---

[دانة حتا]

مرحبااااا وعد ...
اممممممممم اتنازل عادي بس مب من البداية اتنازل عن كل شي عقب بيستغل الوضع
وبعد التفاهم ضروري للحياه وما اقدر افيدكم بوايد لاني افكاري شوي مخربطه احس

[طير الحب]

مسا الورد...


عندي قانون من اتزوجت امشي عليه يطلب مني شيء الدين حرمه أو كرهه وجهة نظره هي الي تمشي..

ثانيا المكياج مب مشكله مصيرية عشان اسوي مشكله او ازعل منه عشانها...في قرارات مصيرية اهم الواحد يتناقش فيها...

وبالنسبة للوظيفة اولا ليش يطلب ترك الوظيفة انتي قصرت في حقه وانشغلتي بوظيفتج او مثلا اطفالج محد يرعاهم وانتِ بوظيفتج ولا مش مرتاح لمكان عملج...شو وجهة نظره على ضوئه ممكن نفهم.


وثانيا بالعشرة ممكن تعرفين اذا زوجج من النوع الي فقط يصدر أواامر لإرضاء غرور الرجل أو فعلا يغار عليج...

كتجربة شخصية جربت الشغل وجربت يلسة البيت حسيت اني ملكة ومرتاحه بدون مسؤوليات وخاصة ان شخصيتي من النوع الي ما احب حد يتامر علي وجدا احب شغلي مرتب يعني ممكن اشتغل عمل حر...ومن النوع الي احس انه الاطفال مسؤوليتي انا اربيهم من الشغالة وثانيا احس الشغل قيل وقال خصوصا اذا كان مكان فيه حريم المشاكل تزيد :)



في شغلات ممكن تتنازلين عنها من البداية بس في شغلات ممكن الظروف تجبرج يوم تكونين بحيرة بين المهم والهم فتتخلين عن المهم من أجل الأهم خلي هذا منطقج...وعيشوا حياتكم بدون منغصات...وأتذكروا اللحظات الجميلة عشان ما نشوهها بعنادنا.:fa41:

[طير الحب]

صدقج شمعة أمل اهم شيء الصدق من البداية لو كل اثنين صادقين من البداية في كل الاساسيات بدون أقنعه شيء أكيد مشاكلهم ما بتكون منهم.........وهذا أحلى شيء هنيه ما بتحس أي زوجه انه زوجها تغير عليها في اي مرحلة سواء خطوبة او ملجه او زواج او بعد انجاب الاطفال لازم كل زوجين يكونون مرنين مع الظروف والمشاكل:a074:

[رويان]

ما اتنازل.. !!

أصلا أحس المصطلح كبير بين ريال وحرمته

يا عزيزتي كل ريال له مفتاح.. والذكية تعرف مفاتيح " مب مفتاح :tongue: " ريلها

وبالأسلوب الحلو تقنعه..

[ا ل غ ل ا]

سؤال جميل جداً

لي عودة مع جوابي عليه ^_^

[أنامل قلب]

:
.

لا أعتبره تنازلا ..

بل ودا أبديه لمن أوده ..

مادام يفهمني وأفهمه ~ !

:
.

تسلميلي عالطرح الخفيف ..
وجزاك الرحمن الخير كلــه ~

.... :smile:

[قلم رصاص]

يازين كلامكن ويا شين أفعالكن ( يالحريم ) ،،،

[نور الإيمان]

لا اتنازل ...



المكياج يعتمد على حسب مزاجي و ظروف شغلي .. و كيفية تصرفه او اوامره علي! ان كان عناد .. فالمشكلة اني اعاند اكثر و اصر على موقفي .. و ان كانت غيره مني و الدرب ... الغشوة ممكن تحل المشكلة .. اما يمنعني عن المكياج خير شر .. هذي مشكلته النفسية خلها يعالجها ..

الوظيفة .. الأمر راجع لي كذلك .. احيانا وظائف الأزواج مقيته و متعبة .. و كثيرا من الأوقات يروح ضحيتها البيت و الأسرة .. و طبعا لازم هو يشتغل ..

ف قصتي و تجربتي السابقة في عالم الزواج .. كنت قد ارتأيت إلى عالم المثالية .. الزوجة المثالية .. يعني .. طرحت عليه فكرة ان اترك الشغل و ان يتولى هو مسؤولية البيت و الإعالة .. ف وافق على مضض!! عقبها اصر اني اكمل شغلي حتى و لو انجبت اطفال .. بحجة الحياة غالية >> و هذا واقع ان الدنيا غالية الحين ..

و اصر اني اشتغل عشان ادفع ايجار الشقة !! الإيجار كله و مب النص بالنص!! و اصر اني اشتغل لأنه ما يبا يصرف علي ولا يعطيني مصروفي الشهري .!!! و اصلا ما عطاني خير شر إلا بعد قيل و قال!!!

بالنسبة للمكياج .. انا من النوع اللي يمتكيج و يكشخ و هذا شي طبيعي فيني ... ف ما اصر اني اتغشى!! فاقترحت عليه اني اتغشى !! استغرب من كلامي و قال لي برايج!!! تعجبت من طريقة تفكيره!! ياخي زوجتك انا مب عشيقتك تبا تتفاخر فيها جدام الناس!!! عافانا الله!!

تنازلت ف وايد اشيا على حساب ناس احبهم > اهلي ..

بالأخير كان الإنفصال هو الحل الأمثل ... و الحمدلله ..

فالحين قراري الآخر .. يصعب ان اتنازل إلا بقرار من ذاتي فقط .. اما ان يأمر الزوج و ممكن كلامه يسبب لي الدمار و ما بيضمن مستقبلي .. باي باي افضل له ..